Mohamed
Hussein
5
أبريل 2018·
طب هحكي لكو حدوته
.
كان يا ما كان
يا ساده يا كرام ولا يحلى الكلام إلا بذكر النبي عليه الصلاة و السلام .
.
كان فيه بيت كبير
أوي , وفيه ناس كتير و أمم , أجداد و أبناء و أحفاد .
.
في البيت الكبير
أوي اللي ملوش أول من أخر و مليان أوض و أركان و حيطان و بيبان ظهر واحد من العيال
سحنته غريبه و عامل فيها بتاع ربنا , بدأ مولانا ده يلم شوية عيال تانيين حواليه و
يعملو عصابه كده لوحدهم و يتجمعو لوحدهم في حتت ضلمه , و ورا البيبان , و تحت الأرض
أحيانا .
.
مرّت السنين و
جريت السنين و الناس عايشين .
لحد ما حصلت هوجه
, هوجه جامده و شألباظ , و اختلط الحابل بالنابل و محدش بقى عارف مين الكبير و مين
الصغير , و فجأه أهل البيت صحيو من النوم لقو الواد ابو سحنه غريبه و العصابه بتاعته
بيحكموهم و يتحكمو فيهم .
.
أهل البيت قالو
و ماله , ده ابننا برضه هو و اللي معاه , نجرّب و ياخدو فرصتهم , و بعدين العيال دول
شكلهم كده عارفين ربنا , مش جايز نشوف خير على ايديهم ؟ مش جايز نكون ظالمينهم ؟ ,
طيب على خيرة الله .
.
فات شهر و اتنين
و عشره , و بدأت تظهر الوشوش الحقيقيه و أهل البيت يشوفو بعنيهم حركات مريبه , ناس
أغراب جايين و معاهم سلاح , و ابو سحنه غريبه عايز يحط واحد من عصابته على كل باب أوضه
و عايز كمان يبلع البيت و يشكّله على مزاجه على اعتبار ان البيت ده طري , حتة صلصال
كده و قابله تتشكل بأي شكل , مش صخره صلبه لها طعم و جينات و هويه و شكل و لون .
.
أهل البيت حسو
ان بيتهم الكبير بيتسرق كله على بعضه , رايح في سكة اللي يروح مايرجعش , هاجو و قلبو
الدنيا و قالو لأبو سحنه غريبه , انت تغور في ستين ألف داهيه , أصل الحكايه مش دور
كوتشينه هنلعبه عالقهوه ولا هي حقل تجارب .
.
و بسرعه طردوه
هو و عصابته من حكم بيتهم , و قالو لهم عايزين تعيشو زي البني ادمين وسطينا ؟ , أهلا
و سهلا , لكن حكم البيت ده لأ , على جثتنا .
.
أبو سحنه غريبه
خد شويه من عصابته و هربو بره و قررو انهم ينتقمو من البيت و أهله, عملو حتى اللي مايعملهوش
الشيطان , قتلو كتير من حُرّاس البيت و ولاده , حاولو كتير يحرقوه و يهدو حيطانه ,
استعانو بكل أعداء البيت و سجدو قدامهم و قدّمو فروض الطاعه , استعانو بالبلطجيه و
المجرمين و السفاحين , اتاري الخيانه من البدايه بتجري في دمهم .
.
أهل البيت قالو
برضه على جثتنا , هنستحمل و نحارب الخونه , و مهما تعملو يا ولاد الأفاعي , ماهنسيبكو
تحكمونا تاني , و لا حتى بقى ليكو عيش فيها .
.
و توته توته ,
فرغت الحدوته .
..............................................................................................................
Mohamed
Hussein
5
أبريل 2018·
صباح الخير
.
سوسو و توتو و
لوسي و ميمي و زيزي صديقة الطلبه هربو من البيت اللي عاشو و اتربو فيه , و قررو انهم
يشتغلو في الدعاره عشان بتجيب فلوس حلوه , قامو سافرو بلد بعيده و اشتغلو في بيت دعاره
اسمه ( الأردغانه ) , سوسو و توتو ولوسي و ميمي و زيزي صديقة الطلبه كانو باستمرار
بيحاولو يلاقو مبرر لشغلهم في الدعاره , مالقيوش مبرر أحلى من إنهم يقولو إن أصحاب
البيت و المسئولين عنه بيعذبوهم و يسحلوهم و ياكلو دراعهم , عجبتهم الحكايه دي أوي
و بقو يشجّعو بعض , سوسو تقول لتوتو دانا كنت بتعذب في البيت اللي كنا عايشين فيه
, و توتو ترد عليها : وانا كانو بيغتصبوني 3 مرات يوميا بعد الأكل , و ميمي تقول لزيزي
صديقة الطلبه كانو في البيت بيشرّحو وشي بالموس و يكهربوني في مناطق حساسه و زيزي تقول
لها و مين سمعك يا حبيبتي .
.
المهم صاحب بيت
الدعاره جمع البنات الحلوين و قال لهم , انا هشغلكو و احميكو و تاخدو فلوس كتير و تتشألبو
عالسراير بس بشرط , قالو له شرط ايه ؟ قال لهم الكلام اللي بتقولوه بينكو و بين بعض
عشان تقنعو نفسكو بالشغلانه دي تطلعو تقولوه في التلفزيون و هفتح لكو قناه , قالو له
طبعا موافقين , داحنا نتمنى , و بدأو يهتفو للبلطجي صاحب الأردغانه , عاش صاحب الأردغانه
خليفة العاهرات , عاش عاش .
.
مرّت الأيام و
الشهور و سوسو و توتو و لوسي و ميمي و زيزي صديقة الطلبه ماشيين زي الألف , يتشألبو
عالسراير و ياخدو فلوس و يطلعو في التلفزيون يشتمو البيت اللي كانو عايشين فيه و يشتمو
اهل البيت ده و الناس المسئولين عن حمايته , و الفلوس تجيلهم و ينفخو و يشدو و يعملو
بوتكس و يضربو سيليكون و يروحو منتجعات و يرجعو يتشألبو عالسراير و يطلعو يشتمو البيت
و أصحابه و أهله , لحد مالحكايه سخنت في دماغهم و عاشو الدور أوي وصدقوه , لدرجة إنهم
بقو يعتبرو نفسهم مناضلين , أه و عهد الله
.
و في يوم من الأيام
, سوسو و توتو و لوسي اختلفو مع ميمي و زيزي صديقة الطلبه , و اتهموهم بالنصب و السرقه
, و عليها يامؤمن , عينك ماتشوف إلا النور , ردح على كيف كيفك , حاجه كده تليق بمقامهم
, اخرسي ياللي طول عمرك بتقلعي ملط و ماتقوليش بطّلت , يعني انتي ياحبيبتي اللي جايه
تبيعي سبح هنا ؟ مانتي كمان بتقلعي ملط , المهم و في النهايه , البنات الحلوين قطعو
هدوم بعض , قصدي قطّعو لانجريهات بعض .
.
و بس يا سيدي
, أدي كل حكاية العاملين بقناة الشرق ( الأردغانه ) من أول الهروب من البيت لحد الهتاف
لخليفة العاهرات و شتيمة البيت و أصحابه لحد الشألبه عالسراير , لحد ما قطعو لانجريهات
بعض .
..................................................................................................................
Mohamed
Hussein
4
أبريل 2018·
حامل المسك و نافخ
الكير , ما بين بياعين الأمل و بتوع الحوت الأزرق !! .
.
كان معانا حق من
سنين , لما قولنا ان اللعبه في الأساس لعبة عقل , و تحت بند لعبة العقل كان التركيز
الشديد على الروح المعنويه للناس , لو اتهزمت معنويا هتموت و تتحلل و انت قاعد عالكرسي
بتاعك من غير ماتحارب ولا تضرب طلقة رصاص .
.
كان معانا حق لما
قولنا ان التشويه اللي بيحصل في تاريخ مصر ده تشويه متعمد من شوية صيع و خونه , وانه
تحت بند البحث عن الحقيقه بيتم نشر السواد و الاحباط و تشويه الإنتصارات و الرموز
, و في النهايه ماتلاقيش حيطه تسند ضهرك عليها .
.
سنين طويله واحنا
بنبيع الأمل للناس , بنبيع الورد , و الأمل غير الوهم , الامل بيكون مبني على أسس علميه
و شواهد , و مبني في الأساس على حقيقه مطلقه , حقيقه بتقول إن البلد دي لا بتموت ولا
بتنكسر, كتاب التاريخ بيقول كده , و كتاب ربنا بيقول كده .
.
القصه مكانتش أبدا
عبد الفتاح السيسي , ولا كان هو المستهدف , المستهدف بلاد و أوطان و جيوش , و النتيجه
خراب و دمار و تبقى محتاج لك 100 سنه عالأقل عشان ترجع بس لنقطة الصفر ( زي ماحصل في
العراق و سوريا وليبيا و اليمن ) , حتى الجمله الاخيره دي ماينفعش تتقال من باب السخريه
,كل دوله من الدول الأربعه دي محتاجة فعلا 100 سنه عشان ترجع لتاريخ ماقبل الطوفان(
يعني ترجع لنقطة الصفر)
.
ناس كتير من الأصدقاء
كلموني في السنين اللي فاتت , و منهم اللي كان مرعوب , خصوصا المصريين المغتربين في
اوروبا و امريكا , باعتبار ان المغترب البعيد لو خايف على بلده بيبقى الخوف ده مضاعف
, انا جربت الغربه و عارف , و كانت ردودي كلها زي بوستاتي , يا جبل ما يهزك ريح , احنا
خلاص عدينا من الطوفان و عدّينا بانتصار , مش بتعادل ولا بهزيمه ( احنا اللي قلبنا
الترابيزه ) .
.
في الجهه التانيه
من النهر قعد الخرفان و الشمامين , سنين ينشرو السواد و الكأبه و الإحباط , و دولة
العبث , و دولة الظلم , و الفاشيه بتطل ماعرفش منين , و قمة النطاعه انك تلاقي كاتب
أو اديب أو سياسي عايش واكل شارب نايم في مصر و بيسافر و يروح و ييجي و يكتب و ينشر
في مصر و يشتم الكل كليله و في النهايه يقولك الفاشيه تطل برأسها !! , الحاله دي مش
حالة انحطاط , دي حالة مرقعه .
.
أسوأ سنه مرت في
حياتي كانت سنه حكم الجماعه الارهابيه لمصر , و مع ذلك لا فقدت الأمل و لا اهنت بلدي
و تاريخها و جيشها , و لا نشرت السواد و الاحباط , و كان عندي قناعة تامه إنهم مش هيكملو
سنه , وقلت للناس الشوارع و الحواري هتبلعهم و تدوس عليهم بالجزمه .
.
احنا بتوع الورد
, بياعين الامل , حاملين المسك , مش بتوع العفن و البؤس و السواد و في النهايه الانتحار
بلعبة زي لعبة الحوت الأزرق , احنا اللي بنشد الناس باستمرار للحياه ( مهما كانت ظروفنا
صعبه ) , مش بنشدهم للموت .
.
و من باب الأمل
و الورد والحياه عايز أقول لحضراتكو , في 2022 هتكون مصر بتُحكم من العاصمه الاداريه
الجديده ( التحفه المعماريه ) , و هنكون وصلنا لمرحلة التصدير في مصادر الطاقه التلاته
( كهربا و غاز و بترول ) , و هيكون الاحتياطي النقدي لمصر رقم اكبر بكتير من تخيلاتنا
.
.
و للأنطاع و الصيع
و نافخي الكير عايز أقول لهم , مصر ما أعلنتش أفلاسها ولا حاجه زي ماكنتو بتقولو على
مدار سنين , ولا داعش سيطرت على شبر من ترابها ولا الدولار بقى ب 120 جنيه ولا النيل
نشف و لا السيسي اتصالح مع الإرهابيين ,
.......................................................................................................
Mohamed
Hussein
3
أبريل 2018·
شوفت يابني اللي
حصل؟
- خير , حصل ايه
؟
.
مش خير أبدا ,
دي مصيبه , كارثه بكل المقاييس
- قول بسرعه ,
حصل ايه ؟.
.
شوية مواطنين و
عُمّال يا سيدي و طلبة جامعه ( ورد الجناين ) نزلو الشارع يتظاهرو ضد الحكومه و يعبرو
عن رأيهم في رفض قرارات الاصلاح .
- ها و بعدين ؟
.
الشباب اتحمس شويه
و ولع له في كام فردة كاوتش و عملو شوية حرايق بسيطه للتعبير عن غضبهم , مايجراش حاجه
يعني .
- و بعدين , قول
بسرعه .
.
وبعدين الشرطه
بنت الحرام نزلت الشارع نفختهم و سحلتهم و طلّعت فراتيك اللي خلفوهم , و جرجرتهم عالقسم
.
- ههههههههههههههه
, و الله دي ماهي محصله جمهورية الموز حتى , اعتقال و تعذيب و اختفاء قسري , حتى طلبة
الجامعه ماسلموش من أذاهم .
.
معاك حق يا حبيبي
- يعني لإمتى ياربي
هنفضل كده , لا عارفين نعبر عن حريتنا ولا ناخد حقنا الديموقراطي .
.
معاك حق يا حبيبي
- بالك يا أستاذ
؟
.
نعم يا حبيبي
, قول , انا سامعك .
- احنا لسه بينا
و بين الدول الديموقراطيه اللي فيها المواطن له حريه و كرامه ييجي مليون سنه ضوئيه
.
.
ازاي يعني ؟
- في الدول دي
يا استاذ من حق المواطن ينزل و يتظاهر و يعبر عن غضبه و يحرق اللي يحرقه و الشرطه هناك
بتحاول تحتويه و تحضنه و تطبطب عليه , بتعامله كبني أدم يا اخي مش حيوانات زي ما بيعاملونا
كده .
.
معاك حق يا حبيبي
, بس دول زي ايه اللي سابقانا بمليون فدان دي ؟
- زي فرنسا يا
استاذ , باريس , عاصمة النور و الحريه و العداله و حقوق الإنسان .
.
ممممممم معاك حق
يا حبيبي
- ايوه مانا عارف
, احنا هنفضل كده , دول عالم تاسع و الأنظمه المستبده تمرمط فينا , حكم العسكر , زمن
العبث , الفاشيه تطل برأسها من جديد .
.
يووووه خدتني في
الكلام و نسّيتني أقولك حاجه مهمه
- حاجه ايه يا
استاذ , قول بسرعه .
.
مفيش يا حبيبي
, انا بس نسيت أقولك ان الخبر اللي فوق ده بكل تفاصيله , من فرنسا , من باريس , من
عاصمة النور و الجمال و الحريه و حقوق الانسان و ساندوتشات الحلاوه بالقشطه .
- إيه !!!! .
.
غور ياض يابن الصرمه
من هنا , ياهبل يابن الاهبل .
......................................................................................................................
Mohamed
Hussein
3
أبريل 2018·
عايز أروح جزيره
كده لوحدي ,يعني alone , مايكونشي فيها اي حاجه غير شوية شجر و عصافير
و نسانيس , و يبقى معايا كنكه و سبرتايه و كيلو بن محوج فاتح , و راديو صغير بالبطاريات
مابيجيبش غير أغاني ام كلثوم و اجيب فرع شجره رفيع أعمله رُمْح و اصطاد بيه سمك من
البحر ( إنسان الغاب طويل الناب ) .
.
ولا موبايلات بقى
ولا لابتوب ولا نت ولا فيس ولا واتس ولا اخبار ولا عمرو اديب ولا ريهام سعيد ولا الابراشي
و لا صوت الفسبه و أغاني التكاتك و كلاكسات العربيات النقل و مولانا بتاع أنابيب الغاز
و هو بيضرب بالمفتاح عالأنبوبه و ينادي , و لا محصل النور , و لا إشعارات , فلان الفلاني
يدعوك لمشاهدة بث مباشر و هو بياكل حواوشي , فلانه الفلانيه غيرت إسم المجموعه من
( حبني في بير السلم ) ل (علمني العوم والنبي ياحمد ) , أشار إليك علّان العلاني في
بوست بيقول انه عطس عطستين الصبح , تمت اضافتك إلى جروب ( لانجريهات من زمن فات )
.
.
الواحد يروح يغير
جو شويه ويتنفس الصعداء و يقدح زناد فكره و ينفّض راسه تنفيضه معتبره زي تنفيض السجاد
في البلكونه قبل العيد , و يقعد هناك يومين كده أو 3 شهور أو 17 سنه , عموما الراديو
موجود و كيلو البن وفرع الشجره اللي هصطاد بيه , والعصافير و النسانيس مقدور عليهم
( هخليهم يقعدو معايا و يسمعو ام كلثوم ) , مش باقي غير إني يكون عندي جزيره بتاعتي
.
............................................................................................................
Mohamed
Hussein
2
أبريل 2018·
ترامب و فلاديمير
بوتين و الرئيس الصيني و ملوك ورؤساء دول العالم يهنئون عبد الفتاح السيسي بعد فوزه
في الانتخابات الرئاسيه .
.
عشرات الألاف في
ميادين مصر يحتفلون بالفوز .
.
أيها الناس , يا
قوم , لا تحتفلو في صمت بحجّة أن هناك خرفان و عيال ولاد صرمه يتألمون , احتفلو براحتكو
ياكشي يتحرقو بجاز و يجيلهم كساح .
............................................................................................................
Mohamed
Hussein
2
أبريل 2018·
رسميا , عبد الفتاح
السيسي رئيسا لمصر حتى 2022
.
عدد اللي شاركو
في الانتخابات الرئاسيه 24 مليون و ربع , يعني اكتر من 40 % من اجمالي عدد المقيدين
في الجداول ( نسبه ممتازه ) .
.
عدد الأصوات الباطله
1.7 مليون ناخب .
.
عبد الفتاح السيسي
حصل على نسبة 97 % من الأصوات الصحيحه ( 22 مليون صوت انتخابي ) , والمرشح المحترم
موسى مصطفى موسى 3 % ( قد النسبه اللي خدها حمدين صباحي بهيلمانه و صولجانه وجعجعته
في 2014 ) .
.
كده المصريين جابو
جون في معركة انتخابات 2018 , و قلنا ان الحدوته كلها مكانشي لها علاقه بعبد الفتاح
السيسي لأن الانتخابات محسومه و مفيش منافس , انما كان لها علاقه بمصر , الدوله و الكيان
, و صباعنا اللي غطّسناه في الحبر ده حطيناه بعد كده في عين كل ولاد الحرام اللي بره
و اللي جوه , الحدوته كانت تصويت على سياسات دوله و استقلاليتها و محاربتها للارهاب
, الحدوته كانت رساله بتقول احنا في ضهر جيشنا و في ضهر مؤسساتنا السياديه .
.
كل واحد فينا كان
له دور في الحشد و تشجيع الناس , كل واحد فينا عمل الواجب اللي عليه رغم كل السخافات
اللي اتعرضنا لها , و طالما الشعب المصري كان واعي و مدرك و على قلب رجل واحد يبقى
مفيش معركه في الدنيا هنخسرها .
.
و في النهايه عايز
اقول لحضراتكو حاجتين مهمين :
.
- مفيش رئيس مصري
هيكون عنده شجاعة عبد الفتاح السيسي و ياخد في 4 سنين قرارات زي قرار التعويم و رفع
الدعم و ترسيم الحدود ( لأن كل قرار فيهم قاتل لشعبية أي رئيس في الكون ) .
.
- مفيش بني أدم
في مصر كلها و لمدة 50 سنه جايين هيبقى عنده شعبيه زي بتاعة السيسي , حتى لو وقف على
شعر راسه , يعني قدامنا 10 انتخابات رئاسيه جايه ( يدينا و يدّيكو طولة العمر ) و عدد
سكان مصر بيزيد باستمرار , و ال 60 مليون ناخب هيبقو 80 , و أبصم بالعشره و اتحدى انه
ييجي مرشح اسمه x و ياخد في أي انتخابات 22 مليون
صوت أو 36 % من اجمالي عدد الناخبين المقيدين بالجداول .
.
و أخيرا عايز أقول
نصيحه من القلب للخرفان و شمامين الكوله و الخونه و الصيع و العواطليه , شايفين البحر
شو كبير ؟ روحو و اشربو منه , و انتو راجعين من البحر شوفو اوسخ حيطه و اضربو راسكو
فيها , و بعد كده قرقضو ضوافركو و كل واحد منكو يجيب موس و يشرّح راسه عشان ماتنفعشي
لا طبله ولا طار .
.
احنا يابني بتوع
القوه الغاشمه , كل القوه الغاشمه .
...........................................................................................................
Mohamed
Hussein
2
أبريل 2018·
انا قاعد من صباحية
ربنا و ركبي بتخبط في بعض , و سمعت كمان ان الحكومه ركبها بتخبط في بعض , و السيسي
ركبه بتخبط عالجيران , و فلاديمير بوتين مانامشي طول الليل , و فيه اجتماع عاجل للأمم
المتحده و مجموعة الكومنولث والاتحاد الأفريقي و الإتحاد السكندري , و حالة طوارئ في
نص الكره الشمالي و الجنوبي و ألمانيا الشرقيه و الغربيه و الدقهليه , و بيقولو الأرض
هتكف عن الدوران و سكان الكوكب بيحبسو أنفاسهم .
.
ليه كل ده ؟ أصل
يا سيدي , مولانا حازم عبد العظيم ابو دوده , دواسة تويتر , الشرشوبه اللي بيمسحو بيها
سلالم مواقع التواصل الإجتماعي , ناوي يعمل هاشتاج متزامن مع اعلان نتيجة انتخابات
الرئاسه و يقول ( كدابين ) , يعني النتيجه طلعت 25 مليون صوت ( كدابين ) , 20 مليون
( كدابين ) , 10 مليون ( كدابين ) , سبعتاشر صوت ( كدابين ) .
.
أصدقائي الأعزاء
, مهم جدا ان كل واحد مخلف ولد , طفل مذكر يعني , يقعد معاه 3 دقايق كل يوم , يقوله
انت ولد يعني راجل , ولازم تخشوشن و تسترجل و ماتنعمش صوتك , و لو حد قالك تعالى نروح
الخرابه و هفرّجك على حاجات حلوه ماتروحشي معاه , عشان يابني لما تكبر ماتبقاش زي عمو
حازم عبد العظيم .
........................................................................................................
Mohamed
Hussein
1
أبريل 2018·
تصريح عجيب لمحمد
بن سلمان للواشنطن بوست : نشرنا الوهابيه بأمر من الحلفاء في فترة الحرب البارده لمنع
التغلغل السوفيتي !! (طبعا الحلفاء هما أمريكا و بريطانيا)
..........................
يا أستاذ يا أستاذ
- نعم يا حبيبي
.
.
يعني الوهابيه
و ألاف الكتب و الشرايط و الخطب الرنانه و ألاف المشايخ و الدقون , و كعب رجل المرأه
و طحال المرأه و عباية الراس و الثعبان الأقرع و قصة سيدنا ( نُفّيخه ) و الست ماينفعش
تسوق العربيه عشان مايصحش تمسك الفتيس , مكانوش من أجل الله و رسوله ؟
- لا يا حبيبي
, كانو من أجل أمريكا و بريطانيا ( هما دول الله و رسوله بتوع الوهابيه ) .
.
واحنا لما جاهدنا
ضد الاتحاد السوفيتي في أفغانستان مكانشي جهاد في سبيل الله و رسوله ؟
- لا يا حبيبي
, كان جهاد في سبيل أمريكا و بريطانيا .
.
يعني احنا كده
يا استاذ مش متدينين أخر فيصل ؟ واللي مات مننا في الجهاد ضد الاتحاد السوفيتي مكانش
شهيد ؟
- مممممممممممم
خد ياض .
.
نعم يا أستاذ
- ولّا خلاص ,
روح ياض .
...............................................................................................................
Mohamed
Hussein
31
أبريل 2018·
سبحان العاطي الوهّاب
.
.
الناشطه اللامؤاخذه
السياسيه إسراء عبد الفتاح بعد ماكانت بتتشعبط في الميكروباصات و العربيات الكارو
, راحت السنه اللي فاتت تصيف في هاسيندا اللي الليله فيها ماعرفش بكام ألف , والسنادي
عقبال أملتنا في مصيف تاني و الليله بكام ألف برضه .
.
عزيزي شمام الكوله
الصغير الكتكوت :
دي واحده من أيقوناتك
و ألهتك العوالي , مين اللي قالك يابني ان الثوره ماحققتش اهدافها ؟ ( بص لأيقونتك
دي و انت تعرف انها حققت ) , بس عموما مش عايزك تزعل خالص , معلش , و اوعى تفهمها غلط
.
.
أصل انا متأكد
و عندي يقين تام ان اختك المناضله اسراء عبد الفتاح لما بتنزل في رحلة غطس ( و تغطس
غوطيسه ) مش بيبقى غرضها انها تتفرج عالشعب المرجانيه و الأسماك اللي أشكال و ألوان
, لا يابني خالص , دي أكيد بتدور على أهداف ثورة يناير في عمق البحر .
.
و متأكد برضه انها
و هي قاعده عالبيسين في ساعة عصاري و جنبها مشروب البيناكولادا بترفض تشربه و بتقعد
تعيط و تتشحتف على حق الشهدا .
.
و متأكد ان الدوله
الفاشيه القمعيه اللي بتاكل دراع العيال الصغيره مش بيسيبوها في حالها , و مش بعيد
تلاقيهم حاليا بيعذبوها في المنتجع السياحي اللي هي فيه و يضربوها 37 طلقه خرطوش و
يحطو السيخ المحمي في صرصور ودنها .
.
لا يابني تمويل
ايه بس اللي بتاخده اسراء عبد الفتاح ؟ حاشا و ماشا , احنا اللي ولاد تيت و بناخد تمويل
عشان بنقول تحيا مصر و بنصرخ نقول يا ناس احترمو جيشكو و حبو بلدكو و خافو عليها
.
المهم انت يابطل
ماتزعلش ولا تاخد على خاطرك , شدّ حيلك أومال , واكتب تويتات كتير , قول دولة الظلم
و دوله العبث و لساها ثورة يناير و احكي لنا ذكرياتك في ميدان التحرير لما انضرب عليك
رصاص مطاطي و انت عشان عضلاتك قويه كنت بتاخد الرصاصه على صدرك و تطلعها من مناخيرك
, و اوعى تنسى , اوعى تنسى , تغسل رجليك و تشرب اللبن قبل ما تنام .
.......................................................................................................
Mohamed
Hussein
31
مارس 2018·
سعد الدين ابراهيم
كلب أمريكا و كلب الصهاينه و كلب الجماعه الإرهابيه قعد ايام الانتخابات يلف على قنوات
الخرفان و قناة الخنزيره عشان يشوّه الإنتخابات المصريه و الشعب المصري و يشوه عظيمات
مصر .
.
عارفين ؟ محدش
فينا شاف الشيطان , انا عن نفسي ماشوفتهوش , بس والله لو حد طلب منّي أرسم صورة من
خيالي للشيطان , هبقى محتار في اختياري بين صورتين , صورة خيرت الشاطر و صورة سعد الدين
ابراهيم , ورا الملامح و ورا الوشوش دي بشوف كل القبح و كل الإنحطاط و كل الخيانه
, دانا حتى ممكن أكون ظلمت الشيطان .
.................
أكتر سؤال بييجي
في ذهن الناس , طب هي الدوله سايباه ليه ؟ ليه مش بتعتقله ؟ ليه مش بتسقط عنه الجنسيه
؟ ليه سايباه يبرطع براحته و بخيانته ؟ ده سؤال جميل أوي و إجابته هتجاوب على 50 سؤال
تانيين ممكن حضرتك تسألهم لنفسك
.
1- هل تتخيل ان
مصر و السعوديه و الإمارات عاجزين عن دك قطر بنت الوسخه و تسويتها بالتراب ؟ هل لقطر
أي قوه عسكريه او سياسيه او اجتماعيه او اقتصاديه تساوي أو تنافس قوة الدول التلاته
؟ هل قطر من القوه انها تهدد أمن الخليج العربي و حركة طيران الإمارات ؟ ( قطر ماعندهاش
جيش أصلا و محميه بقواعد أمريكيه و تركيه ) .
.
2- هل تتخيل حضرتك
ان الدوله المصريه كانت عاجزه عن فرم الجماعه الإرهابيه على مدار التسعين سنه اللي
فاتو ؟ .
.
3- هل تتخيل حضرتك
ان الدوله المصريه عاجزه عن تعليق الخونه و الصيع بتوع الجمعيات الحقوقيه الأمريكيه
و مراكز حقوق الإنسان و الإعلاميين اللي بيشتغلو في قنوات عالميه لتشويه مصر مخصوص
؟ .
.
طب ليه الثلاثي
العربي ماعملش كده في الكشك الخليجي ؟ و ليه الدوله المصريه مافرمتش الخرفان من بدري
و معاهم عواطلية حقوق الإنسان و معاهم الأشكال القذره اللي زي سعد الدين ابراهيم ؟!
.
.
هي اجابه واحده
لكل الأسئله , عشان محميين بالمعلمه الكبيره , بأمنا الغوله , هما صبيان البلطجي الأعظم
اللي معاهم ضوء أخضر و بيلاقو دايما ( قُبلة الحياه ) .
.
الدوله المصريه
عالمستوى الرسمي مضطره تتعامل مع وساخات أمنا الغوله ( زي ما كل دول العالم بتعمل
) , مضطره تتجنب الصدام , و الحل دايما في إيدينا احنا , احنا الشعب , الحل هو التعريه
و كشف الوشوش القبيحه , الحل هو عزل الصيع و الأوساخ و الخونه , الحل اننا نفهم و نشاور
على كل واحد فيهم نقوله انت خاين ابن حرام ولولا الحمايه الأمريكيه البريطانيه كان
زمانك في أقرب صفيحة زباله .
.......................................................................................................................
Mohamed
Hussein
30
مارس 2018·
أنا عايز أعترف
لكو اعتراف لأني مش قادر أخبي أكتر من كده .
.
من يومين كنت قاعد
لا بيا ولا عليا , بشتغل عادي في المفاعل النووي بتاعي , بعمل قنبله ذريه صغيره كان
فلاديمير بوتين طالبها مني , و في نفس الوقت براجع النظريه النسبيه لاني عارف انها
غلط , و كان المساعد بتاعي مجهّز لي 17 مريض هيعملو عمليات قلب مفتوح , قلت له استنى
بس لمّا اخلّص اللي في ايدي .
.
وفي لحظه لقيت
بوكس شرطه بيركن و نازل منه 74 ظابط من المخابرات و الامن الوطني و الأمن المركزي و
الأمن الغذائي , الظباط كلهم رفعو المدافع الرشاشه في وشي و أجبروني إني أسيب المفاعل
النووي و اروح معاهم ( اختطاف و اختفاء قسري ) , ركبت معاهم و انا بالبالطو الأبيض
و الشبشب , ماسابونيش أغير هدومي حتى ولا عرفت أقول للمساعد يسك عالعمليات اللي عنده
.
.
وانا راكب البوكس
سألت الظباط هو حضراتكو واخدني على فين بالظبط ؟ قالو لي واخدينك عشان تنتخب , قلت
لهم انتخب مين ؟ قالو لي تنتخب فخامة الرئيس عبد الفتاح السيسي يا حيوان , قلت لهم
بس أنا سايب أوضة العمليات و القنبله الذريه و أينشتاين و مش فاضي خالص , قالو لي لا
لازم تنتخب .
.
قلت لهم هو بالعافيه
يعني ؟ قالو اه بالعافيه و قام واحد منهم مطلع سكينة مطبخ من جيبه و غزّني 17 غزه في
وشي وقالي عشان تبقى تعرف تعترض كويس , قلت له مايهمنيش , انا حر و ايه رأيك بقى انا
هدخل اللجنه بس مش هنتخب ؟ قام نفس الظابط و بنفس السكينه قطع دراعي اليمين , قلت له
ايه اللي انت عملته ده ؟ قالي ماحنا لازم ناخد ضمان , و عارفين انك بتكتب بالشمال
, و عموما دراعك اليمين ده هيفضل في الحفظ و الصون لحد ماتطلع من اللجنه و نلاقي الحبر
الفسفوري على صباعك و نرجعهولك , و ادّاني وصل عشان أستلم بيه دراعي .
.
نزلت من البوكس
و دخلت اللجنه , القاضي قالي ايه اللي في وشك ده يا ابني و فين دراعك اليمين ؟ في اللحظه
دي حسيت بالإنكسار و الضعف لأنهم هددوني لو نطقت بكلمة هيخطفو القطه بتاعتنا ( بيري
) و يعذبوها هي و عيالها و يمنعو عنها الدراي فود , مسحت دموعي و قلت له مفيش يا باشا
, انا بس عملت حادثه بالعربيه وانا جاي , و دخلت انتخبت و غطّست صباعي في الحبر .
.
و طلعت بقول للظابط
هات دراعي بقى لقيته مابيردش عليا , شاور للسواق انه يمشي و مشينا شويه و لقيتهم وقفو
, و رموني في حته صحرا مقطوعه , فضلت أصرخ و أصرخ بس مفيش حد سامعني , فين و فين لما
لقيت قافلة أبو سفيان معدّيه و رايحه ناحية مدينة نصر قمت شبطت معاهم , و احنا ماشيين
حكيت لابوسفيان الحكايه و دراعي اللي مارجعش , قام ابو سفيان ابتسم و قالي , مش انت
معاك الوصل ؟ قلت له اه , قالي يا عبيط , مانت بالوصل ده هتروح المرور تسلّمهم الوصل
و تستلم دراعك وانت واقف .
...........................................................................................................
Mohamed
Hussein
30
مارس 2018·
عملتو ايه يا حبيبي
؟ قول و فرحني
- عملنا اللي قلت
عليه بالظبط يا أستاذ , نفس اللي عملناه في 2014 .
.
إزاي ؟ عايزك تقولي
بالتفصيل
- قبل الانتخابات
عملنا حملة تشويه ليل و نهار , و قلنا دي مسرحيه هزليه , و محدش ينزل و خليك في البيت
و قولنا الشعب الحر عمره ما هيستجيب للمسرحيه ,و الشعب الحر فاق و فهم الدرس , و احنا
الصوت لما يلاقو الدنيا سكوت .
.
ها و بعدين ؟
- و بعدين الناس
نزلت و ماسمعوش كلامنا .
.
قمتو عملتو ايه
؟
- قولنا الناس
نازلين بالإكراه و الحكومه الفاشيه بتجبرهم على النزول و بيضربوهم بالكرباج و المنجنيق
, بس الناس نزلت برضه بكثافة اكتر و محدش صدقنا .
.
ها و بعدين ؟
- خلصت الانتخابات
و لما لقينا العدد كبير و النتيجه تخض , قولنا طبعا ده شعب عبيد , عاشق للعبوديه ,
و إذا أمطرت السماء حريه رأيت العبيد يحملون المظلات .
.
ها ها ها , حلو
البؤ بتاع المظلات ده و البؤ بتاع احنا الصوت لما يضيع منا البسكوت , انتو هايلين
, برافو عليكو , انا بجد فخور بيكو .
- يا أستاذ يا
أستاذ ؟
.
نعم يا حبيبي ؟
خير؟ فيه حاجه ؟ .
- اه , هو حضرتك
احنا خطتنا هتبقى ايه للمرحله الجايه , هنعمل ايه يعني ؟
.
ولا حاجه , هنعمل
زي ماعملنا في 2014 و 2018 , هتستنو انتخابات 2022 و تكررو نفس السيناريو بتاعنا بنفس
الترتيب .
- بس حضرتك احنا
كده هنستفيد ايه ؟ احنا بقالنا سنين بنكرر نفس الهبل , مش جه الوقت اننا ننزل الشارع
بقى و نعمل احزاب سياسيه حقيقيه و نشارك و نتواصل مع الناس و نعمل تكتل و ننزل انتخابات
؟
.
انت عبيط ياض ولا
شكلك كده ؟
- ليه بس يا استاذ
؟ انا قلت ايه غلط ؟ .
.
لا , دانت متخلف
رسمي , احزاب ايه و انتخابات ايه اللي ننزلها ؟ احنا كلنا على بعض مانجيش مليون , لو
نزلنا انتخابات هنتفضح و نقلع ملط و نتحول لكارت محروق , اللي بنعمله ده هو الصح ,
نفضل نهمبك عالفيس و تويتر ونترشح و ننسحب و نقول احنا كتير أوي بس رافضين المناخ الغير
ديموقراطي
- طب هنستفيد ايه
من كده ؟ هنوصل لإيه ؟
.
هنستفيد إن أنا
هفضل مشهور و الفضائيات الأجنبيه تستضيفني و اعمل كتب و أقول الأنظمه الفاشيه تطل برأسها
و اطلع في البرامج واخد ألفين دولار في الساعه و سفر و رحلات و شألباظات , و انتو كشوية
شباب هتستفيدو برضه .
- هنستفيد ايه
يا أستاذ ؟
.
يابني انت مش بتكتب
على صفحتك عن الحلم الثوري و الزخم الثوري و طريق النضال وميدان التحرير و ال 75 مليون
طلقة خرطوش اللي خدتهم في 25 يناير و بيجيلك شوية لايكات حلوين و المزز بيقولو لك:
انت بطل و انت هايل وانت فظيع ؟ .
- اه يا أستاذ
.
.
طيب يا حبيبي
, ماهو كده حلو اوي , احنا ناخد شهره و فلوس و سفريات و انت تاخد لايكات , يابني القناعه
حلوه برضه , ده حتى البطران سكته قطران .
.........................................................................................................
Mohamed
Hussein
30
مارس 2018·
لو عايز تحسبها
ممكن تحسبها
.
حمدين صباحي في
عز اللامؤاخذه الزخم الثوري و النضالي و المنفلوطي , أيام ماكانو ملايين المصريين بيشمو
كوله ( وانا منهم ) خد 4 مليون صوت انتخابي .
.
خالد علي في
2012 خد 100 الف صوت و في 2018 ماعرفش يكمل 25 ألف توكيل ( فعمل مؤتمر صحفي و قال مناخ
غير ديموقراطي و شبوره مائيه ) .
.
البرادعي لو نزل
مصر و اترشح للرئاسه و جاب نص مليون صوت انتخابي يبقى أبو زيد خاله .
.
محمد مرسي البهلول
في 2012 خد 5 مليون صوت , و في جولة الإعاده لما الجماعه الإرهابيه سرّحت عناصرها و
كانو بيجيبو الناس من بيوتهم و يوزعو زيت و سكر و يشحنو الناس في عربيات و يخوفوهم
بالجنه و النار و لمو السلفيين و يسري فوده و الأسواني وكل الصيع أبطال معركة اللمون
و جابو المماليك و الفرنساويين و عملو شألباظات خد 13 مليون صوت ( ده كان قبل ما غالبيه
الشعب أصلا يعرفو الوجه الحقيقي القذر للجماعه الإرهابيه ) .
.
عبد الفتاح السيسي
بقى , وانت مغمض عينك كده , و من غير هري كتير ولا فزلكه , الراجل ده خد 3 قرارات في
فترة رئاسته الأولى مايخدهاش غير واحد في منتهى الشجاعه ( أو بمعنى أصح واحد مابيعرفش
يفكر في نفسه ولا في شعبيته ) , قرار ترسيم الحدود عشان تعرف تستفيد من ثرواتك ( قالو
عليه بيبيع الجزر ) , قرار رفع الدعم ( عشان تعرف تعمل تنميه حقيقيه في البلد لأن الدعم
كان بيمثل ربع ميزانية مصر ) , و قرار تعويم الجنيه ( عشان الاحتياطي النقدي كان وصل
لرقم حرج و حلف الشيطان كان بيحاول يسقط مصر اقتصاديا بعد مافشل في إسقاطها بالإرهاب
) , القرارات التلاته دي أقل قرار فيهم كان كفيل بتدمير شعبية أتخن رئيس في الكون
, و مع ذلك و لما السيسي شعبيته اتأثرت جامد , جامد أوي , جامد جدا , جامد خالص , اخد
22 مليون صوت انتخابي .
.
هي دي الحقيقه
المجرده , و الأرقام مابتكدبش , الخرفان هيفضلو في انكارهم و مستنيين مرسي البهلول
يرجع , و شمامين الكوله هيفضلو في انكارهم و يكمّلو حياتهم بنفس الطريقه , يتشألبو
في تويتتين و ازازتين بيره و شوية كوميكس ماسخين , و سفينة مصر ماشيه في طريقها , الطريق
اللي اترسم بإيد رجالتها المخلصين من يوم ما رجّعنا بلدنا المخطوفه في 30 يونيو .
.
باختصار عايز أقول
, مفيش منافس , مفيش مبارز , يبقى ضهرك شويه يا كابتن عشان سفينة مصر عايزه تعدّي
.
........................................................................................................
ليست هناك تعليقات:
إرسال تعليق