Mohamed
Hussein
15
أكتوبر 2015·
ألف مليون مبروك
, مصر تفوز بعضوية مجلس الأمن عن عامي 2016 و 2017 , انتصار كبير جدا للدبلوماسيه المصريه
, مصر فازت ب 179 صوت , يعني اكتر من تلتين دول العالم ( الإنقلاب كده مش بيترنح ,
ده بيعمل شألباظات , و بيرقص كده كداهو ).
.
من كام شهر السيسي
راح الأمم المتحده , وقتها كان موقف مصر الخارجي صعب جدا و فيه دول كتيره مش معترفه
بالنظام الحاكم في مصر , دي كانت بداية ثقتي الكبيره جدا في السيسي , لما راح الأمم
المتحده مش عشان يتحايل عالدول تعترف بيه ولا يبوس الأيادي , السيسي راح قالهم احنا
عايزين عضوية مجلس الأمن !! .... يوميها قلت ده كده يبقى فارس .
.......................................................................................................................................
Mohamed
Hussein
15
أكتوبر 2015·
البوست الأخير
اللي كتبته مش لاقيه , انا مش لاقي مناخيري يا فخري , بيجيلي عليه اشعارات بس هو مش
موجود في اليوميات , يعني بسم الله الرحمن الرحيم بسم الله الرحمن الرحيم , يكونشي
مرتضى منصور بدل مايعمل سحر للأهلي النهارده عمل السحر لصفحتي أنا ؟ الله يخيبك يا
مورتا , دانا زملكاوي يا جدع , هو الشيخ بتاعك أحول ؟ .
.
و يسألونك عن النكز
و رد النكز قل مالهمشي أي لازمه تقريبا , دي حاجه كده زي كلاكسات العربيات بتاعة سواقين
النص نقل عالطرق الصحراويه يعني سلامو عليكو عليكو السلام , صباح الخير صباح النور
, العواف عليهم الله يعافيكي ياختي , اطفي نورك العالي حاضر أهو , خلي بالك فيه رادار
قدامك أيوه خدت بالي .
.
يا ترى البوست
ده هيظهر ولا هيدخل هو كمان جوه الحجاب بتاع مورتا ؟
.....................................................................................................................................
Mohamed
Hussein
15
أكتوبر 2015·
الزمالك لو غلب
الأهلي النهارده و خد السوبر هيبقى دق المسمار الأخير في نعش محمود طاهر و شلته , جماهير
الأهلي على أخرها و قرّبت تطلع نار من ودانها , يعني باقي لها تكه واحده , رد فعلها
هيكون غير متوقع و ممكن يقلب بعنف .
.
و حيث إني بخاف
على مصر أوي و بحبها أكتر من أي حاجه في الدنيا فمضطر أقول يارب الزمالك يفوز , أه
طبعا و ياكشي جماهير الأهلي تولع في محمود طاهر و مانلاقي مايه نطفيه , و احنا مالنا
احنا دي مشاكل عائليه مالناش دعوه بيها , يعني مشاجرةٌ في نيكاراجوا .
......................................................................................................................................
Mohamed
Hussein
15
أكتوبر 2015·
فيه مطرب مصري
عمل أغنية جديده , الأغنيه بتقول : ( ماتت , حبيبتي ماتت , ماتت حبيبتي ) , و بس كده
, أغنيه مليانه حِزن ( بكسر الحاء حِزن مش حُزن ) و صعبانيات بقى و شحتفه و مناديل
كلينيكس , و غالبا الأغنيه هتكون أول حاجه في الألبوم الجديد بتاع المطرب ( ألبوم
: وحدووووووه ) .
.
و ده يا ولاد نوع
جديد من الغناء , زمان كان عندي المطرب الشعبي و المطرب الرمانسي و المطرب الوطني
, و دلوأتي بقى عندنا نوع جديد ( المطرب الفقي ) , اللي هو بيبقى منه بيغني و منه بيقرّي
عالتُرَب .
...................................................................................................................................
Mohamed
Hussein
14
أكتوبر 2015·
سؤال البلاغه في
مادة اللغه العربيه للثانويه العامه سنه 2032
.
يقول الشاعر في
فيلم للفنانه صافيناز : ( بونبونايه , ملبسايه , يا سينيوريتا يا بسكويته , بت قادره
عمله نادره ) .
.
س 1 : إلى أي مدرسه
شعريه ينتمي الشاعر ؟ ( مدرسة أبولو / مدرسة لولّو / مدرسة السوبكي / مدرسة المشاغبين
؟ ) .
.
س2 : ماهو الموطن
الجمالي في كلمات الشاعر ( سنيوريتا و بسكويته ) و ( قادره و نادره ) , هل هو ( سجع
أو إستعاره مكنيه أو استعاره مشويه بالمكسرات ؟ ).
.
س3 : هل تعتقد
أن تكرار كلمات ( بونبونايه و ملبسايه و بسكويته ) له علاقه بتربية الشاعر و نشأته
في كشك سجاير على طريق اسكندريه الزراعي ؟! .
.
س 4: إذكر مواطن
الجمال في صدر الفنانه صافياز مع الشرح و التوضيح و الهييييييييح ؟.
.......................................................................................................................................
Mohamed
Hussein
14
أكتوبر 2015·
فاكرين الديناصورات
و طائر الرخ و شبشب شجرة الدر و كتاكيت زينات صدقي وتسريحة شعر أينشتاين ؟ طب فاكرين
حزب اسمه مصر الطريه و حد اسمه عبد العليم ابو الفتوح باين ؟! .
.
اهو طلع عندنا
حزب بالإسم ده و ظهر تاني النهارده , بيقولك احنا مقاطعين الإنتخابات , إركن يا سطي
على جنب , كده فيه حمولة ميكروباص 22 راكب مش جايه معانا , وطبعا خالد على هيقاطع هو
كمان يبقى كمان حمولة توك توك 3 راكب أو 2 راكب و واحده ست تخينه .
.
جدي حسين الله
يرحمه خلف 9 رجاله ( أه و الله ) و عنده بتاع 65 حفيد و 180 أبناء أحفاد , عيلتنا لو
قررت تلعب سياسه في مصر هنعمل 7 أحزاب في حجم مصر الطريه و يتبقى عندنا كام عيل كده
ممكن نحتل بيهم قطر .
.......................................................................................................................................
Mohamed
Hussein
13
أكتوبر 2015·
بكره بداية السنه
الهجريه الجديده , كل سنه و حضراتكو طيبين , يارب وزارة الأوقاف لو عملت احتفاليه بكره
بمناسبة السنه الهجريه ماتجيبشي أوبريت عن وصول منتخب مصر لكاس العالم و جون مجدي عبد
الغني و يقولو أصل الأوبريت ده جاي هديه من الإمارات ( قصدي من إيطاليا ) و النبي قبل
الهديه .
...........................................................................................................................
Mohamed
Hussein
13
أكتوبر 2015·
قواعد و تعليمات
اللاب توب بتاعي اللي بيقولهالي كل يوم لما أفتحه
.
1- بص يا عم محمد
, احنا يومنا طويل مع بعض خلينا حلوين كده و حبايب و لازم تمشي عالتعليمات مش تطنشها
زي كل يوم عشان انا تعبت و زهقت و قربت أنفجر.
.
2- مش ضروري تفتح
صفحتين تلاته مع بعض عشان مش أهنج منك و تلاقيني واقف في وشك كده شبه البلتاجي و ريهام
سعيد , أنا صحتي مابقتشي جايبه و مش ذنبي انك بتفكر في 50 حاجه في نفس الوقت .
.
3- ماتدنيش أكتر
من أوردر و بعدين تصبر شويه و تديني أوردر تاني , مش كله في نفس اللحظه , هو أنا الشغاله
الفلبينيه اللي اشتريتها ؟ إيشحال إنك جايبني من التوكيل , دانا بنت ناس يا ناس .
.
4- محدش قالك إن
صفحة جوجل دي تبقى بنت خالتي , و كل شويه عايز جوجل عايز جوجل , هجيبهالك منين يعني
و انت النت بتاعك زباله أساسا ؟ هو حد قالك اني حاوي و بطلع نار من وداني ؟ .
.
5 - عندك لمبه
قدام عنيك أهي , بتنوّر احمر لما البطاريه تفضى , دي كده اشارة تنبيه وانت لا بتتنبه
ولا نيله , أعمل ايه بس ؟ مانا قلت لهم في مركز الخدمه يعملو أوبشن لزرار بيرش مايه
عالزبون لما البطاريه تفضى و مارضيوش .
.
6- و مش البديل
ولا المقابل انك عشان بتكسل تجيب الشاحن قوم لما تجيبه تسيبه لازق في جتتي كده على
طول , يا حبيبي انا مش بخزن كهربا , و لا رامي شوالين جوه الهارد لزوم التخزين .
.
7- و بعدين انا
ذنبي إيه انك غاوي كتابه و لوكلوك لوكلوك , و بتهري في كل حاجه , تقريبا كان حلم حياتك
تطلع باشكاتب بس مجموعك مجابش , انا عايز اقولك حاجه و مكسوف منك و الله بس هقول و
الأرزاق بالله , الهري اللي انت بتكتبه ده محدش بيقراه , و مش بينوبني أنا غير تكتكه
عالزراير و صداع مزمن , بطل تكتب كتير , الكلام مش هيشح في السوق ولا حاجه .
.
8- يعني ياربي
انا لو كنت وقعت في إيد بت مزه من اللي أخرهم يدخلو عالفيس و يكتبو ( تشعر بالوحده
) ( تشعر بالسعاده ) ( تسمع ل فيروز ) مش كان حالي بقى أحسن و مزاجي عنب ؟ أهي المزه
دي بيقف على باب بوستاتها ألف شنب جاهزين باللايك عشان الوحده اللي هي فيها .
.
9- لما أسخن منك
ابقى ارحمني شويه و سيبني أخد نفسي , مش لازم توصلني لمرحلة إلتهاب اللوز , إيشحال
إنك صيدلي و فاهم .
.
10- أبوس إيدك
, اكتب على زرايري بالراحه , يا سيدي عرفت والله إنك فلاح , مش لازم تثبت لي كده كل
يوم , أنا جهاز الكتروني مش المحرات اللي كان عندكو في البلد .
.
11- أخر حاجه بقى
, ماتنساش لما تكلم الغاليه تبقى تسلم لي عليها , انا حبيتها من كتر ما بتتكلم عنها
, و جايز هي اللي مصبراني على عشرتك الهباب .
....................................................................................................................................
Mohamed
Hussein
12
أكتوبر 2015·
النتيجه من الكنترول
.
الأسماء : أبو
الدرداء , نادر بكار , أم مصعب , أم حمزه , أم فارس , أبو يا سين , البلكيمي , أم معاذ
, على ونيس ,أبو زينات , أبو حفصه , يونس مخيون , أم حفصه ( مرات أبو حفصه ) .
.
جدول الأعمال
:
.
1 - طلب إحاطه
مقدم من العضوه الأخت أم حمزه بإصدار مشروع قرار ينص على أن ( وجه المرأه كفرجها )
و يقضي بحتمية فرض النقاب على ربوع مصر , موقع عليه من كبار مشايخنا و علمائنا , و
مدلل عليه بمقوله للعضوه الأخت العضوه أم فارس رئيسة لجنة المرأه ( الجائع يشتهي اللحم
المكشوف و رائحته النفاذه ) , موافقون يا إخوان ؟ على بركة الله موافقه .
.
2- طلب إحاطه مقدم
من الأخ العضو أبو زينات بقانون يسمح بعودة ملكات الأيمان و خصوصا من النصارى و غير
المسلمات و تسهيل الإجراءات من أجل النكاح النكاح النكاح , موافقون يا إخوان ؟ على
بركة الله موافقه .
.
3- طلب إحاطه مقدم
من الأخت العضوه ( رفضت كتابة اسمها و نحترم ذلك ) بمنع استيراد عروسة باربي التي تغني
أغاني فرنجيه و العياذ بالله , موافقون يا إخوان ؟ على بركة الله موافقه .
.
4- طلب إحاطه مقدم
من الأخ نادر بكار وكيل المجلس بالسماح لغير المنتمين إلى وزارة الأوقاف و الأزهر الشريف
بالخطابه في المساجد دون النظر إلى المؤهل و التعليم و خلافه لأن الدعوه إلى الله لا
تشترط كل هذه البدع التي هي من صنع الإنسان , موافقون يا إخوان ؟ على بركة الله موافقه
.
.
........................................................
و بس يا سيدي
, دي أسماء الساده أعضاء برلمان النواب المصري 2015 و ده جدول أعمالهم , ده في حالة
إن حضرتك قررت ماتنزلش و قعدت عالفيس تكتب ( مقاطع للإنتخابات , عبث , يقرأ لمحمود
درويش و يستمع ل فيروز ) .
......................................................................................................................................
Mohamed
Hussein
12
أكتوبر 2015·
كان رأيي فيه كده
من سنين , من يوم ماشوفت سحنته , هو أهيف و أتفه من إنه يكون أي حاجه , ولا حتى يشتغل
في فرن عيش , انما بيشتغل إعلامي و بياخد 10 مليون جنيه في السنه , كل مواهبه هي إنه
بيعرف يقول ( هااااح ) , أحمد موسى اللي جاب فيديو جيم على أنه فيديو للضربات الروسيه
في سوريا , اتحسب على مصر اعلامي و فضيحتنا بره بقت بجلاجل , و على رأي سمير غانم في
فيلم ( عالم عيال عيال ) : أنا قلت لأبويا يدخلني كلية البوسطه في طنطا .
.......................................................................................................................................
Mohamed
Hussein
12
أكتوبر 2015·
عبد الفتاح السيسي
....... رئيس ده ولا زعيم ؟
.
- مع بداية حكمه
قرر إنه يتوجه تماما و نهائيا و من غير رجعه إلى الدب الروسي , و ساب أوباما يولول
على رابعه و يرفع شعارها و يلم قيادات الإرهابيه على حجره
.
- السيسي زار بوتين
مرتين تلاته و بوتين جاله القاهره , صفقات أسلحه و صفقات اقتصاديه , تحالف فيه احترام
لقيمة و مكانة مصر .
.
- في الناحية التانيه
و في التوقيت ده كان الخليج كله أمريكاني ب 52 نجمه كاملين , بدأ السيسي يتعامل مع
دول الخليج بهدوء , تاتا تاتا , و لما جاب قادة الدول العربيه عندنا مجابشي مندوب عن
سوريا ( أصول ال تاتا تاتا ) لكنه في نفس الوقت مجابشي مندوب عن المعارضه السوريه رغم
الحاح دول الخليج في كده , هو اساسا مش معترف بوجود معارضه في سوريا .
.
- بدأت علاقة مصر
بروسيا تاخد شكل متكامل وصل للمشاركه في التتخطيط للسياسات الخارجيه و دخول غرفة العمليات
الروسيه .
.
- الخليج كان لسه
برضه مغرم شويه بالهامبورجر و الكاتشب وأفلام هوليود و عيون كيم كارديشان ( مشيها عيونها
) , بس الصوره كانت بدأت تكون أوضح , بدأت السعوديه و الإمارات يفهمو إن فيه تحالف
قوي فعلا و فيه مصر , السيسي قال لهم أنا رايح انتو جايين ولا إيه ؟ قالو له جايين
.
.
- طبعا أمريكا
قويه جدا ( بؤ من اللي بيعجب الجماهير ) و بكف إيديها ممكن تهد الشرق الأوسط و لو ركنت
بصباع رجليها الصغير عالهرم الأكبر هتجيب أجله, و بتمشي عالحيط و تعجبك أوي , لكن في
النهايه لما أمريكا تشوف إن فيه تحالف قوي فيه دول قويه زي روسيا والصين و دول مهمه
زي مصر لازم في النهايه هترضى بالأمر الواقع , فتحة الصدر موجوده في أفلام السوبكي
بس مش في السياسات الأمريكيه , و لما أمريكا تتعامل مع الواقع الجديد أكيد طبعا هتبدأ
تغير خطتها و تفكر في لعبة شيطانيه جديده , ماهي اللامؤاخذه لما بتتوب مش بتشتغل إمام
و خطيب مسجد النور بالعباسيه .
.
واحد يقولي طب
قطر و الجزيره فين من الليله دي ؟ أقوله في السياله , في سيالة أمريكا مطرح ماتروح
, جنب السواك و السبحه وشرايط الكاسيت بتاعة تحرير القدس .
.......................................................................................................................................
Mohamed
Hussein
12
أكتوبر 2015·
نادي الأهلي العريق
ندهته النداهه .
.
محمود طاهر بيقول
الجماهير ماتقدرش تسحب الثقه من رئيس النادي !! ........... ههههههههه الجماهير تقدر
تسحب الثقه من رئيس الدوله يا حوده مش رئيس نادي بس .
.
و عدلي القيعي
بيقول الزملكاويه اخترقو الأهلي إعلاميا !! ..........طب هو كان اختراق بس ولا فيه
تحرش كمان يا عم عدلي ؟! .
.
صالح سليم لو كان
عايش و سمع تصريحات طاهر والقيعي كان تقمص دور السوبكي في مداخلة وائل الإبراشي .
....................................................................................................................................
Mohamed
Hussein
11
أكتوبر 2015·
حدوته حلوه
.
بيقولك يا سيدي
كان يا ماكان في سالف العصر و الأون , كان فيه راجل أعرابي عنده معزه و عايش في كوخ
في الغابه , الأعرابي كان كل يوم يشرب شوية لبن من بتوع المعزه و يطلع الغابه يصطاد
أي حاجه ياكلها .
.
و في يوم من الأيام
و كان يوم برد و مطر , الأعرابي و هو بيصطاد في الغابه لقى كلب صغير نونو ( أد كداهو
) عمال يترعش و بردان اوي , الأعرابي صعب عليه الكلب النونو و جابه معاه للكوخ بتاعه
و بقى يقسم لبن المعزه بالنص بينه و بين الكلب .
.
الكلب كبر و كبر
و لما كبر الأعرابي لقاه ( بيعوي ) و اكتشف انه كان مربي ديب مش كلب , و في يوم رجع
الراجل من الغابه لقى الديب أكل المعزه اللي كان بيشرب لبنها ( اللي هي تعتبر امه
) , و بس كده قعد الأعرابي جنب الكوخ يقول أبيات شعر شهيره .
.
توته توته فرغت
الحدوته , حلوه ولا ملتوته ؟ .
...............................................................
...............................................................
المهم بقى إن مولانا
الأعرابي ده نسله مانقطعش , و ربنا رزقه بحفيد في عصرنا الحالي , اسمه الملك سلمان
, ماهي الذكاوه و الألمعيه دي بتبقى جينات على فكره , الراجل كان مربي في بيته داعشوش
نونو أد كداهو و بيصرف عليه , و جايز بكره ولا بعده يكتشف إنه كان مربي ديب , و الديب
يكبر و ياكل المعزه الأم بعد ما يشرب لبنها .
.....................................................................................................................................
Mohamed
Hussein
10
أكتوبر 2015·
لعبة الأرقام
.
على سبيل التفكير
, والتفكير هو الطريقه الأعظم على الإطلاق لشكر ربنا سبحانه و تعالى على نعمة العقل
.
.
هما كام خطوه و
حكايه في كلمتين :
.
1- هل تعلم أن
الرقم ( 400 ألف ) هو العدد الفعلي لأعضاء الجماعه الإرهابيه في مصر ؟ .
.
2- هل تعلم أن
الرقم ( 87 ) هو عدد سنين و عمر الجماعه الإرهابيه و اللي مكانتشي بتفوت يوم واحد من
غير ماترفع فيه شعارات و أغاني تحرير القدس و محاربة الصهاينه ولاد الحرام ( عدد الأيام
تقريبا 31775 يوم ) ؟
.
3- هل تعلم أن
الرقم ( 600 ) هو عدد الأنفاق اللي كانت واصله بين مصر و غزه في فترة الإنهيار الأمني
بعد ثورة يناير و إن الأنفاق دي كانت كفيله جدا بتهريب ألاف البشر و العربيات و التريلات
؟.
.
4- و في النهايه
, صدّق أو لا تُصدّق , هل تعلم أن الرقم ( صفر ) هو عدد أفراد الإخوان اللي راحو يحاربو
الصهاينه و يحررو القدس ؟!! .
..............................................
..............................................
.و الحكايه بتقول
, مئات الألاف اللي اتربو على افتكاسة تحرير القدس لمدة 84 سنه و جت لهم الفرصه و كان
قدامهم 600 نفق مفتوحين عالبحري مفيش ارهابي منهم راح يحرر القدس ولا يحارب الصهاينه
.
.
و ممكن نشطب عالأرقام
اللي فوق دي و نلم الكراريس و نقول رقمين أقرب للعقل و المنطق , سنة 1917 كان وعد بلفور
بإنشاء وطن لليهود , و بعد 11 سنه نشأت الجماعه الإرهابيه , يعني الشئ لزوم الشئ ,
المعسل و الفحم .
...............................................................................................................................
Mohamed
Hussein
10
أكتوبر 2015·
مين ده اللي يقدر
يحتل مصر ؟!!.
.
ست طيبه كده و
فلاحه زي حالاتي ( 45 سنه ) جت لي امبارح تقيس ضغطها و سكرها , اللهم صلي عالنبي يعني
, اللهم لا حسد , السكر 450 و الضغط ضارب في سقف الصيدليه , انا انفعلت و قلت لها يا
ستي لازم تروحي المستشفى فورا , ماتناميش و انتي كده , قالت هروح , اومال مش هروح و
النبي هروح , بس هات لي علبة السكر بتاعتي عشان ماخدتش دوا السكر من يومين , طب اسمها
ايه ؟ و الله مانا عارفه , من هنا لهنا وصلت لدواها , طب يا ستي انتي بتاخدي دوا للضغط
قالت لأ .
.
النهارده الضهر
لقيتها قاعده مع اخوها في العماره اللي جنب الصيدليه سألتها قالت روحت و بقيت كويسه
بس هبقى اجي اقيس تاني قلت لها ماشي , و قيست لها , اللهم صلي عالنبي , السكر برضه
فوق ال 400 و الضغط بكرتونته زي ماهو , انفعلت اكتر , ولولا الملامه كنت ضربتها بالبوكس
لحد ما يغمى عليها و خدتها في العربيه وصلتها المستشفى , يا ستي انتي ماروحتيش ولا
عملتي حاجه , قالت بصراحه ماروحتش , أصل انا بس كنت زعلانه شويه و هبقى كويسه , هات
لي علبة الضغط بقى لونها اخضر كده و بتيجي برطمان , يا ستي انتي مش قولتي لي مش بتاخدي
دوا للضغط ؟ اه بس افتكرت اني كنت باخده من ييجي كام سنه , طب اتفضلي , يعني برضه مش
هتروحي مستشفيات ؟ لا هروح طبعا أومال مش هروح و النبي هروح .
.
و بس من شويه راجع
من بره لقيتها قاعده بتضحك مع مرات اخوها و أخر صهلله , اول ما شافتني قالت لي بص بقى
أنا عرفت المشكله فين ؟ انا كنت بشرب 12 كوباية شاي في اليوم و كل كوبايه بمعلقتين
سكر بس انا النهارده قللتهم و خليتهم 9 كوبيات بس !!.
.............................................................................................................................
Mohamed
Hussein
10
أكتوبر 2015·
خبر :
......... الخارجيه الامريكيه : روسيا تقصف الفصائل المعتدله في المعارضه السوريه
.
.
أنا : تطلع ايه
الفصائل المعتدله اللي في سوريا دي يا جناب الخواجه عدم اللامؤاخذه ؟ .
.
الخارجيه الامريكيه
: عندك مثلا ( فور إيكزامبل ) أأأأأأا . و عندك أأاأاأأأأ وفيه كمان أأأأأأأأأ .
.
أنا : صح فعلا
, و نسيت أأأأاأأأأاأأأأأأأأأأ , ده معتدل جدا على فكره .
.......................................................................................................................................
Mohamed
Hussein
10
أكتوبر 2015·
انفجارات تهز العاصمه
التركيه أنقره .
أول امبارح طيران
روسي داخل طالع ( و لا مؤاخذه ) و امبارح صواريخ رايحه جايه و النهارده انفجارات في
قلب العاصمه , أه فهمت , ده باينه كده فرح بنت العمده , بكره بإذن الله هتبقى الدُخله
يا خليفة المثليين و توصل لمرحلة ( إلحجونا ) .
.............................................................................................................................
Mohamed
Hussein
9 أكتوبر 2015·
جايزة نوبل ( للسلام
تحديدا ) بقيت أشوفها جايزة ( سيئة السمعه ) , يعني تستحق حكم من المحكمه بيقول كده
أساسا , و هي أولى باللقب ده ( لقب : سيئة السمعه ) من الراقصه سما المصري .
.
هي دي قناعتي من
4 سنين , من بعد ما شوفت سحنة توكل كرمان و هبلها اللي يتعبى في زكايب , و من بعد ما
شوفت مواقف البرادعي اللي بتبقى ( حماده أوي ) في كتير من الأحيان , تقولي بقى ده فيه
700 لجنه و 70 مليون خبير بيشتركو في عملية الإختيار , هقولك على راسي , مخرج العرايس
الشاطر ممكن يلاعب لك 700 عروسه على نفس المسرح و في نفس الوقت .
.
مبروك لأشقائنا
في تونس جايزة نوبل ( لامؤاخذه ) للسلام , و ربنا يكفيكو شرها , اسمعو الكلام بس وقولو
ورايا اللهم أمين .
.....................................................................................................................................
Mohamed
Hussein
9
أكتوبر 2015·
أنا مستاء
..............بلى أنا مستاءٌ و عنديَ لوعةٌ .
.
مستاء جدا و متضايق
و على أخري و اعجبك أوي , مش طايق نفسي من ساعه ما سمعت الخبر , يعني ايه السيسي يفرض
ضريبه على تذكرة الطيران 50 جنيه ؟ ليه يا كده يا ريس ؟ عشان بحبك يعني تعمل فينا كده
؟ شوفت شوفت ؟ أدي الصداع مسكني أهو , استناني بقى , هبعت العامل يجيب لي علبة سجاير
أل إم أزرق ب 17 جنيه و برطمان نسكافيه كلاسيك ب 21 جنيه و علبة لبن جهينه ب 9 جنيه
, عايز اشرب حاجه عشان الصداع ده يروح , يعني ياربي ازاي التذكره تزيد 50 جنيه ؟ و
50 جنيه بحالهم ؟ يعني مش 30 ولا 40 ؟ طب كنت خليتها تدريجي .
.
أوووووف الصداع
ماراحشي برضه رغم اني شربت النسكافيه و نص علبة السجاير , هبعت العامل يجيب لي شريط
تيمو من عند الواد حنفي الديلر ب 150 جنيه و هضرب نصه جايز , يوووه ضربت التيمو و مجابش
نتيجه , أصلي متضايق و مستاء و أعجبك أوي , مفيش حل مفيش حل أنا هقفل الصيدليه و اطلع
ألف بالعربيه شويه أشم هوا عشان الخنقه دي , أه استنى همون بقى ب 140 جنيه عشان العربيه
مفهاش بنزين , هتمشى شويه عالنيل عشان انا متضايق من القرار و مستاء و أعجبك أوي ,
أيوه هدخل الكافتريا دي , إيه يابني بتقول ايه ؟ مينيمم تشارج 60 ج ؟ ولا يهمني , هات
لي لمون جايز يريحني و اهدى شويه , أصلي متضايق من القرار و مستاء و اعجبك أوي , خد
60 جينه أهي و لا يهمني .
.
أنا هقوم أمشي
بقى عشان اتأخرت و يادوب أرجع , يوووه البت لمار كانت طالبه مني شوكلاته كندر جوي اللي
شكل البيضه دي , عايزه 2 , ب 16 جنيه , هركن جنب أي كشك و اجيبهم رغم اني متضايق من
القرار و مستاء و أعجبك أوي , الحمد لله جبت الكيندرجوي , استنى استنى , دوست فرمله
فجأه , إيه ده ؟ انا افتكرت , انا أصلا نزلت مصر من سنه و نص و مش مسافر تاني لو انطبقت
السما عالأرض .
............................................................................................................................
Mohamed
Hussein
9
أكتوبر 2015·
أنا : رايح فين
يا وله يا عوضين ؟
عوضين : رايح أتظاهر
و اعتصم .
.
أنا : ليه ؟
عوضين : عشان تعديل
الضريبه على تذكرة الطيران .
.
أنا : بص يا عوضين
, لو افترضنا انك بتسافر بالطياره مرتين في السنه يبقى الحكايه هتفرق معاك 100 جنيه
.
عوضين : لا يا
بيه , الحكايه مش هتفرق معايا خالص , 100 جنيه ايه و طياره ايه ؟ انا عمري ما سافرت
أساسا و لا ركبت طياره , و لما بروح ميت غمر بحلف بغربتي .
.....................................................................................................................................
Mohamed
Hussein
9
أكتوبر 2015·
مرشحة حزب النور
المنقبه في تعليقها على موضوع النقاب : الجائع يجذبه اللحم المكشوف و رائحته النفاذه
!! .
.
أنا : يلعن
$%^&*)9) أهلك .
.
اللابتوب بتاعي
: يلعن #$%67*)( اللي بلونا بيكي .
.
الولاعه بتاعتي
: يلعن %^&*900(($%^&* اليوم اللي شوفناكو فيه .
.
لحم مكشوف و رائحه
نفاذه !! , هو ده تقييمك للمرأه ؟ و عايزه تقودي الحياه السياسيه في بلد كليوباترا
و حتشبسوت و شجرة الدر و أم كلثوم و فاتن حمامه و صفيه زغلول و سميره موسى ؟!! .
.....................................................................................................................................
Mohamed
Hussein
9
أكتوبر 2015·
المواطن و الدوله
.
المواطن : صباح
الفل يا دوله , أنا المواطن فلان الفلاني , كنت عايز أسألك عن سياساتك الخارجيه , و
أحط كام علامة استفهام , حقي ولا مش حقي ؟ , بصي يا دوله , أنا مش بحب الشيعه و مش
عارف ليه ؟ إنما مش بحبهم ولا بطيقهم , عشان كده فرحت أوي لما شاركتو في الغارات الجويه
على الحوثيين ( اللي مدعومين من إيران ) في اليمن , بس انتو ليه بقى بتدعمو الضربات
الروسيه ضد داعش السنيه في سوريا و لمصلحة النظام الموالي لإيران الشيعيه ؟ مش حاسه
يا دوله إن ده تناقض ؟.
.
الدوله : صباح
الخير يا محمد , حقك تسأل طبعا , أنا الدوله الكبيره اللي اسمها مصر , في سياستي الخارجيه
مابعرفشي سني ولا شيعي , عندي مصالح معينه و قاعده أساسيه واحده ماقدرشي اتجاوزها
, المصالح كانت بتقول إني أحمي مضيق باب المندب عشان ده مهم أوي بالنسبالي في الجنوب
و أدعم الحفاظ على وحدة الأرض السوريه في الشمال , و القاعده الواحده اللي مش هتلاقي
فيها أي تناقض إطلاقا هي إني لا يمكن أقبل إن عصابه تحكم دوله من دولنا العربيه المحيطه
, في اليمن دعمت الحكومه و النظام الشرعي ضد عصابه اسمها ( الحوثيين ) , بالصدفه البحته
طلعت العصابه دي تميل للفكر الشيعي , و في سوريا دعمت النظام و الدوله ضد عصابه اسمها
داعش , برضه بالصدفه البحته طلعت العصابه دي سنيه , و أزيدك من الشعر بيت , لما أيدنا
الهجمات الروسيه و رفضنا المخطط الامريكي ماشوفناش بطاقه بوتين و لا بطاقة أوباما ولا
بصينا في خانة الديانه , فاهم يا محمد ولا نقول تاني ؟.
...........................................................................................................................
ليست هناك تعليقات:
إرسال تعليق