Mohamed
Hussein
22
أكتوبر 2015·
ههههههههههههههه
قبضو على حسن مالك , تاني أوسخ راس في التنظيم الإرهابي بعد خيرت الشاطر , حسن مالك
اللي هو البيج بورص بتاع فلوس الجماعه الإرهابيه , يعني عم مغاوري الجنايني , لو سيادتك
لسه لحد دلوأتي فاكر الناس دي كانت بتشتغل و تصرف مليارات في السنه من اشتراكات الأعضاء
و تبرعات أهل الخير و محل العطاره بتاع المرحوم يبقى اقعد على جنب و النبي عشان المرارتين
بتوعي اتفقعو ( اه هما اتنين ) .
.......................................................................................................................................
Mohamed
Hussein
22
أكتوبر 2015·
و في مصر مش هتلاقي
أي فرق بين المحلل السياسي و المحلل الرياضي , الإتنين بيشتغلو محللين , يعني بيحللو
اللقمه اللي بيطفحوها مش اكتر .
.
لو عايز تشتغل
خبير و محلل سياسي هقولك عالجملتين اللي لازم تحفظهم و تقولهم بمناسبه و بدون مناسبه
و في أي وقت و أي مكان ( و تقولهم كمان بينك و بين نفسك و انت قاعد في الحمام ) ,
1- ( تنمية الإنسان لازم تكون هي محور اهتمامنا الرئيسي ) , حتى لو كان المذيع بيسألك
على زلزال حصل في دولة نيبال , و الجمله التانيه لازم تقولها في أي حاجه ( محتاجين
نفتح في الموضوع ده حوار مجتمعي موسع ) حتى لو كان الكلام على مشابك الغسيل و حجر المعسل
.
.
و في الكوره يا
سيدي قاعده اساسيه لازم تفهمها و تشتغل بيها لو حابب تكون محلل كروي و مستكاوي عالأخر
, القاعده بتقول لما الماتش يخلص و فريق يفوز و يسألوك هو فاز ليه ؟ قول لهم التغيير
اللي عمله المدير الفني العُقر لما طلع أبو دومه و نزل الدفاس كان نقطه تحول في مجرى
المباره و مجرى قناة بنما شخصيا , و لو فريق أبو دومه و الدفاس هو اللي اتغلب قول نفس
الجمله بس بالشألوب , التغيير اللي عمله المدير الفني التعبان مُلّه لما طلع أبو دومه
و نزل الدفاس هو اللي خربها مداين .
.
أنا و الله اكتر
تلاته بيضحكوني في مصر هما المحلل السياسي و المحلل الكروي و اسماعيل ياسين .
....................................................................................................................................
Mohamed
Hussein
22
أكتوبر 2015·
جبلاية القرود
2
.
و طالما محافظ
البنك المركزي مشي يبقى لازم نحوله لبطل قومي و هما أصلا مشوه عشان كان هيفضح اداء
الحكومه السئ و يطلع السيديهات اللي عنده , مع العلم إنه لما كان في منصبه كان نفس
الجبلايه بتقول عليه فاسد و فاشل .
.
و طبعا اللي هيمسك
مكانه يبقى أكيد فاسد و فاشل ( حكم مسبق ) و امه بنت خالة شارون و هو كان متجوز كونداليزا
رايس عرفي من ورا مراته و بينسى يشد السيفون بتاع الحمام , و زمان وهو صغير قفشوه بيسرق
كوز دره من غيط أبويا عوضين و بكده يبقى غير مؤتمن عالبنك المركزي , و نفضل كده نشوه
فيه طالما ماسك المنصب و لو تمت أقالته نقول إيه بقى ؟ برافو عليك , نقول كان نزيه
و شاطر جدا و هيفضح الحكومه عشان كده مشوه و نعمله بطل قومي , شوفتو الحكايه بتبقى
سهله أوي في الجبلايه و مكرره بصوره ممله ازاي ؟! .
...................................................................................................................................
Mohamed
Hussein
22
أكتوبر 2015·
رئيس في جبلاية
القرود
.
عبد الفتاح السيسي
, أنا لو مكانك أنفجر و الله , و ارمي المفاتيح و اقول احكموها بقى يا قرود الجبلايه
, إيه يا أخي التحكم العجيب في أعصابك ده ؟ جبته منين ؟ قرود بتتنط حواليك في كل مكان
و مش عاملين لك خايله كدابه ليه ؟ قرود كل قرد منهم بلسانين و 7 رجول , لا بيبطل كلام
ولا بيبطل تنطيط , بقى معقوله كل دول مثقفين و سياسيين في البلد يا ربي ؟ كل دول خبراء
و ( مناخيرهم ) حمره ؟! .
.
إيه علاقة طابور
الإنتخابات بالوضع الإقتصادي يا قرود الجبلايه ؟ هو برلمان 2011 لما كانت نسبة المشاركه
اعلى كنت جضرتك واقف في الطابور لابس بدله ايطالي و في جيبك العلبه المارلوبورو و في
ايدك كيس مليان ساندوتشات كافيار ؟ و لما نزلت المرادي نزلت بجلابيه مقطعه و 3 سجاير
كليوباترا فرط ؟ كنا في رفاهيه اقتصاديه في 2011 و بقينا منهارين دلوأتي ؟ .
.
و ايه علاقه الحكومه
بنسبة التصويت ؟ هي الحكومه فاشله يابو مناخير حمره ؟ ماهي لو فاشله و انت مثقف و تنين
مجنح يبقى المفروض تنزل بكثافه أعلى عشان تراقب الحكومه بنت التيت و تحط السيخ المحمي
في صرصور ودنها .
.
و إيه علاقة قناة
السويس الجديده بالهبل ده كله ؟ بتفهم ألماني ؟ قناة السويس الجديده مشروع عملاق اتكلف
بمشاريعه الملحقه 60 مليار جنيه ( يعني ما يكفي لزراعة و استصلاح 4 مليون فدان في الصحرا
) و عشان هو مشروع اتعمل بفلوس الناس و فلوس الناس لازم ترجع لهم بأرباحها يبقى هنقعد
5 سنين لما المشروع يكون خلص كل أصل الدين اللي علىه بفوايده , يعني باختصار المشروع
ده بيحقق عائد سنوي بالتقريب كده 17 مليار جنيه و مش هنشوف منهم حاجه الا بعد 5 سنين
, كلام منطقي جدا و محترم عند أي حد مناخيره مش حمره , ده مش كشك سجاير هتفتحه قدام
جامع السلام , و الحكومات مش بتبيع لبن يا قرود الجبلايه .
.....................................................................................................................................
Mohamed
Hussein
21
أكتوبر 2015·
حزب الدستور لو
كان له فريق بيلعب في الدوري الممتاز كان انسحب من كل الماتشات و قدام كل الفرق , و
أخر الموسم هيطالب بإعلان فوزه ببطولة الدوري العام باعتباره الفريق الكروي والممثل
الشرعي لميدان التحرير وعلى اتحاد الكوره إنه يجيب لنا درع الدوري لحد عندنا في مقر
الحزب , لو مالقاش حد مننا هناك يسيب الدرع عند عم عثمان الفراش مش مشكله , و لو اتحاد
الكوره رفض هنفضحه قدام العالم الخارجي و نقول إن الدوري ده باطل و ضد أهداف و مبادئ
ثورة 25 يناير و مش هيجيب حق الشهداء .
.
و البرادعي هيدخل
على تويتر ويكتب : حزين عليك يا دوري .
....................................................................................................................................
Mohamed
Hussein
21
أكتوبر 2015·
الحمد لله الدوري
هيبدأ النهارده , خلي الناس تتلهي شويه في الأوفسايد و البلانتي اللي مش بلانتي و وقفة
رمضان صبحي و الكوبري اللي هيتعمل في حسام غالي .
.
يارب اللي فريقه
يتغلب مايقولشي السيسي هو السبب هو و الحكم و الوضع الإقتصادي و قناة السويس الجديده
و طول النجيله في الملعب و لون شراب الفريق المنافس و المناخ الغير ديموقراطي اللي
اتلعب فيه الماتش و الإهمال في تنمية الإنسان و عدم فتح حوار مجتمعي قبل المباراه
!! .
.......................................................................................................................................
Mohamed
Hussein
21
أكتوبر 2015·
ديموقراطيه دي
و لّا يَخني ؟!.
.
حزب النور بعد
ما المرحله الإولي في الإنتخابات قلّعته ملط في الشارع بيفكر جديا إنه ينسحب من الإنتخابات
و مايكملش المرحله التانيه , الحزب عنده أسباب وجيهه منها إن السيسي ساب الإعلام يشوه
الحزب و الناس تشتمه في الشوارع !! , منطق برضه , هو السيسي غلطان فعلا .
.
الأحزاب و الحركات
الثوريه قررت إنها ماتشاركش من الأول , انا رأيي إنهم خافو يقلعو ملط زي حزب النور
كده , بس هما قالو لأ , احنا عندنا أسباب وجيهه , منها إن السيسي مامنعش حزب النور
و لا أعضاء الوطني المنحل من الترشح و مخلاش الشارع مؤهل لعملية ديموقراطيه , و ماغسلشي
الصناديق الإنتخابيه بديتول وماية ورد , هو السيسي غلطان فعلا .
.
الشباب اللي بقاله
4 سنين بيلعب ثورات و مظاهرات و قال الدوله تجيلي لحد عندي و أنا اتقل بقى و أتدلّع
و اتشرّط , لازم يفضّولنا الملعب تماما و ننزل احنا لوحدنا نلعب و مايكونشي فيه فريق
منافس و الجون يكون فاضي , و إلا مش نازل و مش هنتخب و هشرح راسي بالموس عشان ماتنفعشي
طبله ولا طار , هو السيسي غلطان فعلا .
.
باختصار يعني
, الديموقراطيه في كل بلاد ربنا كوم و عندنا احنا كوم تاني , حاجه كده عامله زي اليخني
اللي كان عادل إمام بيعمله في التمثيليه زمان , أكله عجب و هتعجبك أوي .
...................................................................................................................................
Mohamed
Hussein
20
أكتوبر 2015·
..15
أكتوبر 2015
.
حماده : ألو ,
أيوه يا ريس برايز , بقولك ايه ؟ انت طبعا عارف إننا مقاطعين الإنتخابات اللي بعد يومين
دي , بس هندخل عالفيس و نقول للناس إيه ؟
الريس برايز :
أيوه يا حماده , هتقول لهم احنا مقاطعين عشان حزب النور نزل الإنتخابات و السيسي بيسلّم
البلد تسليم أهالي للدقون .
حماده : حاضر ياريس
, عُلِم و جاري التنفيذ , في حفظ الله يا مولانا .
.
..19 أكتوبر
2015
.
حماده : ألو ,
أيوه ياريس برايز , الحقنا ياريس , النتايج بدأت تظهر , و حزب النور فستك يعني بكتيره
10 % , هنقول للناس إيه بقى ؟
الريس برايز :
اهدى يا حماده , مش عايزك تبقى خفيف كده , هنقول لهم حزب النور منسق مع قايمة في حب
مصر و كله بتخطيط السيسي و عصابة الولاويله الحمره .
حماده : حاضر ياريس
, ربنا يستر , في حفظ الله يا مولانا .
.
.. 21 أكتوبر
2015
.
حماده : ألو ,
ألو , ألو , ياريس الحقنا , الناس ماصدقتش حكاية التنسيق دي و شكلنا بقى لا مؤاخذه
أوي قدامهم , البوست مابقاش يجيب 7 لايك على بعض , انجدنا يا ريس .
.
الريس برايز :
ياحماده قلت لك ماتبقاش خفيف , ياما في الجراب يا حاوي , بص يا سيدي , هنقول لهم أصلا
أصلا أصلا حزب النور ده نزل الإنتخابات عشان يلعب دور كومبارس في مسرحيه هزليه من تأليف
السيسي زي ما حمدين عمل في انتخابات الرئاسه و لا مندوحه من تمكين الشباب .
.
حماده : أيوه كده
ياريس , الله يفتح عليك الله يفتح عليك ( بصوت أحمد عز في فيلم المصلحه ) , انت دماغك
دي ألماظات و الله , حلو أوي البؤ باتع كومبارس و مسرحيه هزليه .
.
الريس برايز :
مانا قلت لك ماتبقاش خفيف .
.
حماده : و الله
يا ريس احنا من غيرك نلوص و نغرق في شبر مايه , بقولك ياريس برايز , بمناسبة الحل الجهنمي
اللي قولتهولي دلوأتي , ألاقيش عندك الشريط بتاع هويدا بنت صباح ؟ , عشان نحتفل يعني
بانتصارنا و ب ( تمكين ) الشباب و ماتفهمنيش غلط يا مولانا .
.......................................................................................................................................
Mohamed
Hussein
19
أكتوبر 2015·
برلمان 2015 .
.
الدرس الأول
.
- قايمة في حب
مصر , اكتساح , حزب النور فستك يعني بح , برفض شعبي مش قرار محكمه , و قدام العالم
الدقون مشاركين اهم , حتى تعالو شوفو بنفسكو , شاركو و سقطو واتحرقو , فهمت سيادتك
ولا لسه ؟!! .
.
الدرس التاني
.
- النهارده يعني
19 اكتوبر , حزب الدستور و التيار الشعبي و كل الحركات و الحبشتكانات اللي ظهرت بعد
ثورة يناير ( أحزاب ماركة خُلقنا للننسحب ) كتبو شهادة وفاتهم بإيديهم و وثقوها من
الشهر العقاري و أول ناس هيوقعو على شهادة الوفاه هما أعضاء الحزب نفسهم , العاقل منهم
هيوقع و هو عارف إنها شهادة وفاه و الكولجي هيوقع و هو فاكرها قسيمة جواز !! .
.
الدرس التالت
.
ستات مصر و كبار
السن شالو الليله على كتافهم , نسبة المشاركه هتبقى جيده بسببهم , رساله للشباب بتقول
باختصار : انتو تعبتو يا ولاد و كتر خيركو لحد كده , اقعدو على جنب بقى عشان مصر عايزه
تعدّي .
..................................................................................................................................
Mohamed
Hussein
19
أكتوبر 2015·
أصدقائي الأعزاء
اللي مؤيدين للسيسي و ل 30 يونيو و لخارطة الطريق , اللي قررو فجأه إنهم يقاطعو الإنتخابات
و ينشرو طاقتهم السلبيه عالناس , أنا فخور بيكو و مصر هي كمان فخوره بيكو و الود ودها
تبوس كل واحد منكو من بؤه .
.
كملو ألش بقى مع
الإخوان و الكولجيه , و شمرو بنطلوناتكو و انزلو غوصو في أعماق و دهاليز الأسباب و
الحيثيات و قولو اصل الناس بدأت تزهق , أصل الوضع الإقتصادي , أصل حزب النور , أصل
الفلول , و كملو قصيدة ( أصل ) , و لو مش عارفين خدوها كوبي و بيست من شبكة رصد .
.
أنا من امبارح
و انا عمال أسأف لكو , تصفيق حاد و مزمن لحد إيدي ما وجعتني , الأخ اللي هناك ألشت
ولا لسه ؟ عومت يعني في الموجه و ضربت غطسين حلوين ؟ صح ؟ دمك خفيف و ألشك فطسني من
الضحك , و طبعا و هلبّت ( حلوه هلبّت دي ولا نقول لا مندوحه أحسن ؟ ) , و هلبت مانت
عميق و جواني و عارف البديل لو مكانشي البرلمان ده اتعمل ؟ و أكيد عارف طريقه ماتخرش
المايه لعزل حزب النور ( مع انهم ممكن يحلقو دقنهم و يرجعو تاني باسم : حزب مش النور
) , و برلمان البهاليل بتاع الإخوان و السلفيين كان على قلبك زي العسل و نموذج للديموقراطيه
اللي محشيه بالمكسرت .
.
بالمناسبه , انا
مش مترشح في الإنتخابات ولا عضو في أي حزب , ولا أعرف أي مرشح معرفه شخصيه ولا أعرف
حد واصل في البلد دي , و أكتر حد واصل في معارفي هو أبو دعاء البواب .
.
في انتظار مزيد
من ألشاتكو , حاولو تبدعو شويه , و ممكن تعملو فريق عمل ( team work ) زي الناس في بلاد بره , يعني 2 خرفان على
2 كولجيه على 2 سيساويه مقاطعين , و تعملو أوبريت للألش المتواصل , اوعو تنسو ان الخرفان
و الكولجيه كانو رفقاء الميدان , إنما اللي بينا و بين البرلمان دم !!.
..................................................................................................................................
Mohamed
Hussein
19
أكتوبر 2015·
السيسي و البرلمان
.
من امبارح و انا
شايف عك للركب في الفيس , أتاري الناس اتهطلت فجأه و قعدت طول الليل تنشر الهطل على
حبل الغسيل بتاعها اللي اسمه الأكاونت .
.
السيسي طلع بنفسه
و دعى الناس للنزول و ده اجراء روتيني تشجيعي مش أكتر , عشان شكلنا إحنا ( الشعب و
الدوله ) يبقى حلو أوي قدام العالم اللامؤاخذه الخارجي , لكن نزلتو بنسبه 10 % أو
50 % أو 107 % مش هتفرق مع السيسي أي حاجه , إزاي بقى ؟ .
.
بص يا سيدي , البرلمان
ده هو أخر خطوه في خارطة الطريق , و طالما عندك دعوه لانتخابات برلمانيه و مرشحين و
لجنة اشراف و لجان انتخابات و ناخبين تبقى العمليه تمت و بنجاح , هبسطهالك , انتخابات
البرلمان هي ماتش كوره مطلوب منك فيه تجيب 3 نقاط و تفوز حتى لو 1/0 أو تفوز بضربات
الجزاء , يعني أي نسبة مشاركه و اعلان نتيجه بعدها و ال خمسميه وكام كرسي اتملو تبقى
كسبت الماتش و خدت ال 3 نقاط و ده اللي بيتسجل في الكتب و التاريخ , يعني مش مهم توصل
بنسبة مشاركه ل 40 % , مش مهم في الماتش تطلع غالب 9/0 .... المهم ال 3 نقط .
.
السيسي رئيس فاز
بنسبة كذ و تسعين % , يعني يا جبل ما يهزك ريح , البرلمان نفسه و نزول الناس عمرهم
ما كانو استفتاء على شعبية السيسي ولا له أدنى علاقه بكرسي الرئاسه , عشان بس أصحابنا
المخابيل اللي فيهم ناس نازله و فاكره نزولها لدعم السيسي و ناس مقاطعه و فاكره مقاطعتها
هتبقى انتقام من السيسي !! , طب أقول لكو ايه والنبي ؟ .
.
بتفهم ألماني ؟
طب هقولك , برلمان 2015 مفهوش معارضه للرئيس بالشكل اللي يقلق , أكبر كيانين فيه هيكونو
قايمة في حب مصر و دي مؤيده , و حزب النور و ده مش بتاع معارضه ده بتاع رز بلبن و بياكلهم
على ترابيزة أي حاكم .
.
و بصفه عامه و
اجمالا أي برلمان هييجي هيكون بالنسبه للسيسي إما مؤيد بأغلبيه ساحقه و ساعتها بيكون
زي ( النيش ) بتاع العروسه , أو فيه معارضه قويه ( و طبعا مش أغلبيه ) و دي هتعمل للرئيس
و حكومته شوية صداع في الأول , يعني زي حماة العروسه لما تيجي تقعد عندها يومين .
.
نزولك لانتخابات
البرلمان بيكون غرضه الوصول بشكل البرلمان لأفضل صوره ممكنه و أفضل تمثيل للشارع ,
ماتحطش عيشه بقى على أم الخير , و أسف جدا اني جرحت شعورك أو احبطتك و فهمتك ان معارضتك
و مقاطعتك مالهاش أي تأثير حتى على تسريحة شعر السيسي .
.......................................................................................................................................
Mohamed
Hussein
19
أكتوبر 2015·
واحد كولجي لقى
مصباح علاء الدين و دعكه , طلع له العفريت , وقاله : شبيك لبيك تطلب ايه ؟ لك طلب واحد
بس .
الكولجي من غير
تفكير قال للعفريت عايز فلوس كتير اوي و دهب و لولي و مرجان , العفريت قاله ماعنديش
الكلام ده , انا عفريت علاء الدين مش علاء مبارك , اطلب طلب تاني .
.
الكولجي فكر ثواني
و قال للعفريت طب خلاص عايز الانتخابات البرلمانيه في مصر تطلع نتيجة التصويت فيها
زباله و مصر تتفضح قدام العالم كله .
.
العفريت بص للكولجي
و قاله : لا برضه مش هقدر , بس أنا هريحك و هحقق لك أمنيه حلوه , انا هطير من هنا و
اروح لقيادات حزب الدستور بتاعك و اقنعهم يبطلو حكاية ننسحب دي و ينزلو أي انتخابات
, و عشان أغريهم شويه هقول لهم ينزلو انتخابات مركز شباب الحبانيه و انا هساعدهم فيها
انا و زمايلي العفاريت كلهم , واحتمال كبير يفوزو بمقعد أمين صندوق مركز شباب الحبانيه
.
..................................................................................................................................
Mohamed
Hussein
18
أكتوبر 2015·
هو : أنا عايز
ديموقراطيه يا أونكل
... و دي عايزها
ازاي يا بني ؟ ديلفري يعني ؟
هو : أه , تجيب
لي ورقة التصويت بتاعتي لحد السرير .
... حاضر يا حبيبي
هو : و تجيبها
ورقه بيضا من غير أسماء مرشحين
... ليه يابني
؟
هو : أنا اللي
هحط اسماء المرشحين من دماغي
...حاضر يا بني
, هتحط الأسماء و تختار واحد منهم ؟
هو : لأ , هحط
الأسماء و أفكر الأول , ده حقي الديموقراطي .
... أوكيه , وبعد
ما تفكر يابني ؟
هو : بعد مافكر
مش هختار حد عشان الأسماء اللي انا حاططها بايدي مش عاجباني .
... يعني هتعمل
ايه ؟
هو : هقاطع
..و هتستفيد ايه
؟
هو : هقول لاصحابي
و الشله اني قاطعت الإنتخابات عشان يفهمو إني مثقف في السياسه و عميق في التفكير .
.............................................................................................................................
Mohamed
Hussein
18
أكتوبر 2015·
الأرقام و الإحصائيات
شبه المؤكده بتقول إن نسبة مشاركة الستات في الإنتخابات لحد دلوأتي هي 4 أضعاف الرجاله
!! .
.
مانا قلت لكو الست
المصريه بتشيل مصر وقت الزنقه , انتو على راسي و الله و راس البلد دي , بالنسبه للرجاله
بقى : أعملكو شاي ؟ طب دورين طاوله كده عالسريع و افتح لكو التلفزيون و احنا بنلعب
و نجيب شوية لب و تسالي و نتفتف , اهو بالمره تشوفو الستات واقفين على رجليهم في الطوابير
و نضحك و نألش عليهم , و نعمل مجال يعني !!.
...................................................................................................................................
Mohamed
Hussein
18 أكتوبر 2015.
·
كلمتين و بس
.
لو سمحت انزل و
شارك , أو ماتنزلش لو واثق ان ليك موقف معين و عندك اعتراض قوي و واضح على الإنتخابات
, حكاية نزول حزب النور دي ماتخوفكش أوي , انت اللي بايدك تسقطهم , و هبقى أقولك بعدين
هما ليه اتسمح ليهم بالمشاركه , الحكايه مش فتحة صدر على فكره , و بالمناسبه حزب النور
في أحسن حالاته و بدعم الإخوان و مقاطعة حضرتك مش هياخد اكتر من 10 % .
.
لو مانزلتش ماتبقاش
جزمه قديمه , مش مهم يعني تلعب دور الجزمه القديمه طول الوقت و تقول عالستات اللي نازلين
ينتخبو كلام وسخ زي اللي اتربيت عليه , حاول تكون بني أدم ولو للحظات , من باب التغيير
يا أخي .
.
ماتبصش عالجزيره
و شبكة رصد , من غير ماشوف كده هتلاقي العناوين , اقبال ضعيف , اقبال هزيل , عمليه
مهترئه , و النبي لو مصر نزلت كلها في لجنه واحده و وقفت طابور و حبو يصورو لك اللجنه
دي هيجيبوها فاضيه برضه , من شوية لقيت رصد كاتبه اقبال ضعيف و جايبه صوره لست جوه
لجنه بتدلي بصوتها , الست لوحدها !! ماهو طبيعا تكون لوحدها يا بقف , هي مش بتاخد طابور
الجمعيه معاها قدام الصندوق , و صوره تانيه من بعيد لكشك سجاير حتى مش باين و برضه
جنبها اقبال ضعيف ( هما فتحو لجان في أكشاك السجاير ؟ ) .
.
بلاش حكاية هبطل
صوتي دي , احنا مش بنختار بين شفيق و مرسي , أسماء المرشحين مش هتلاقي فيهم أبو بكر
ولا عمر و لا نيلسون مانديلا , و لا في انتخابات 2075 هتلاقي الأسماء دي , الحكايه
بسيطه خالص , استبعد الفلولي الفاسد اللي فساده بيّن ( و ماتاخدشي بالإشاعات ) , لو
خدنا بالإشاعات بعد الهري بتاع ال 5 سنين اللي فاتو هيبقى البلد دي مفهاش حد صالح و
لا حتى انا وانت , و طبعا حزب النور مرفوض أيا كان اسم المرشح و طول دقنه , كلهم قطعيه
واحده , نفس العقل الزرايبي .
.
انزل بقى عشان
تكمل أخر استحقاق ديموقراطي في خارطه الطريق , الحكايه كلها ساعة زمن , مش هتكون أتقل
على قلبك من ساعه قعدت تتفرج فيها على حلقه ل ريهام سعيد .
.............................................................................................................................
Mohamed
Hussein
17
أكتوبر 2015·
حقاً إنكَ لنَ
تضع رأسك في ماية الطرشي مرتين
.
العيل من دول تبقى
أمه حملت فيه 9 شهور و ينزل للدنيا و لما يكبر يكون عنده حساب عالفيس بوك فيه صورته
و بياناته و عنوانه و طوله و وزنه و مكان شغله و مقاس ملابسه الداخليه , و له ييجي
سنتين يصحى من النوم كل يوم و قبل مايغسل وشه يقول السيسي عر* و الحكومه بنت تيت و
الجيش ابن كذا و مصر بنت كذا و ملعون أبو كذا , و يعمل الحكايه دي 37 مره في اليوم
.
.
و لما تيجي تسأله
إيه اللي مش عاجبك بس ؟ يقولك أصل النظام الفاشي بيعتقل أي حد بيعارضه أو يقول رأيه
!! ............. لا يا شيخ ؟؟؟؟؟؟؟ .
.
اللي يجننك بقى
إن الفكيك اللي فوق ده بيبقى متصور و هو حاطط صباعه جنب عنيه و عاملي فيها أينشتاين
, قال يعني بيفكر و كده .
.....................................................................................................................................
Mohamed
Hussein
17
أكتوبر 2015·
سؤال للأذكياء
و المثقفين و هواة التاريخ :
.
ماهو إسم رئيس
وزراء مصر الحالي ؟!!.
اختار الإجابه
من بين القوسين , هل هو ( اسماعيل صبري , شريف صبري , أدهم صبري , سمير صبري ) ؟.
..........................................................................................................................
Mohamed
Hussein
17
أكتوبر 2015·
شهادة حق
.
المرأه المصريه
هي اللي شالت مصر في أخر سنتين , شالتها في 30 يونيو و في الإستفتاء اللي بعدها و الإنتخابات
الرئاسيه , عندي تفسير لكده , هي حست بالخوف و الخطر على بلدها و ولادها و على بكره
, و الست بتحس بالخطر و الخوف قبل الراجل بكتير , و ساعتها بترمي كل اللي في إديها
و تقول لأي حاجه و كل حاجه ( طز , مش مهمه ) و تنزل تدور عالأمان لولادها .
.
الست المصريه في
الفرح بترقص و في النجاح بترقص و لما تحس بالأمان بترقص , ست حلوه أو مش حلوه بترقص
, بتعرف أو مابتعرفش بترقص , هي دي تركيبتها الرائعه من قديم الأزل , لو حضرتك هتقرا
السطرين دول بسخريه و نطاعه و جليطه يبقى هقولك أبشر , فردة الشراب اللي في دماغك قدمت
أوي و ريحتها طلعت و مابقتش تنفع لأي حاجه غير إنها تتحشي بشوية قماش و تتعمل كوره
شراب يلعب بيها الخرفان و كلاب الجزيره .
............................................................................................................................
Mohamed
Hussein
17
أكتوبر 2015·
صباح الخير
.
الريس بيقول لكو
انزلو انتخبو و مارسو حقكو الديموقراطي و اسمعو كلام محمد حسين , أيوه قال كده يا خويا
, انا لسه سامعه حالا .
..................................................................................................................................
Mohamed Hussein
16
أكتوبر 2015·
عاصم عبد الماجد
: مواقف حزب النور تخالف الصحابه و لا تمت للدين بصله !! .
.
و طبعا يا ولاد
الصحابه اللي يقصدهم عاصم عبد الماجد انتو عارفينهم , سيدنا خيرت الشاطر و سيدنا عبود
الزمر و سيدنا محمد بديع و سيدنا تميم ابن موزه كرم الله وجه , ماهو احنا بقينا في
زمن كل شوية مخابيل يتجمعو مع بعض و يربو دقنهم و يبقى لهم الصحابه بتوعهم و الفتاوي
المتفصله زي بيجامة العيد بتاعة زمان , ويبقى اسمهم القطيع الفلاني ( و ينطحو في بعض
زي الخرفان بالظبط ) , يعني قطيع إخوان و قطيع سلفيين و قطيع جماعات اسلاميه , و قطيعه
تقطعهم كلهم .
..................................................................................................................................
Mohamed
Hussein
16
أكتوبر 2015·
حاول تصدقني
.
..90 % من اللي
بيقولو إنهم هيقاطعو التصويت في الإنتخابات البرلمانيه هما في الحقيقه مكسلين ينزلو
من بيوتهم , بس حولو الكسل ده لموقف سياسي ( كسلان و أفتخر ) .
.
..90 % من الحركات
و الاحزاب اللي قاطعو الترشح في الإنتخابات هما عارفين إنهم لو نزلو مش هينوبهم غير
مصاريف و تعب و فرهده و النتيجه هتبقى شهادة وفاه بالنسبالهم , ف برضه حولو حكاية شهادة
الوفاه دي لموقف سياسي ( منعت شهادة وفاتي و أفتخر ) .
.
.. الجزيره جاهزه
من دلوأتي بتقاريرها و حواراتها و حبشتكاناتها , و الكاميرا هتعمل أحلى شوية لعب و
شألباظات , و لو عايز تقارير ( مصوره ) عن الإنتخابات الرئاسيه في مصر 2018 هتلاقيها
موجوده في أدراج أحمد منصور من كام شهر فاتو, ولو لسه بتصدقهم تبقى حمار , الحمار بس
هو اللي بينضرب 17 قلم على سهوه .
.
هننزل و ننتخب
و نمارس حياتنا الديموقراطيه , و نبعت رساله للجزيره و كارتر و كل الكيانات الصهيونيه
و نقول لهم : طزززززززززز.
....................................................................................................................................
Mohamed
Hussein
16
أكتوبر 2015·
الإقتصاد يا ريس
.
الدولار تجاوز
ال 8 جنيه و البورصه حالها مايسرش غير الإخوانجي و الكولجي , طب و يعدين ؟ نجحنا عالمستوى
الخارجي في حاجات كتير , ترتيب وضع سياسي , مقعد في مجلس الأمن , صفقات عسكريه كبيره
, اعتراف من أغلب دول العالم إننا بنحارب إرهاب فعلا مش بنخانق دبان وشنا .
.
طب يا ريس الوضع
الإقتصادي نعمل فيه إيه ؟ مع العلم :
.
1- إننا في ال
5 سنين اللي فاتو غيرنا حكومات و جبنا خبراء اقتصاديين أد كداهو , و السنين دي أثبتت
لي أنا شخصيا المثل اللي بيقول ( اللي عالشط عوام ) , يعني الخبير من دول تلاقيه قبل
ما يبقى مسئول يطلع في برنامج توك شو و يحسسك إن مصر فيها كنوز و ثروات و المفروض ننام
و نصحى نلاقي نفسنا زي سويسرا كده , و أول ما يبقى مسئول تلاقي بني أدم تاني خالص
, ماتعرفشي ايه بيحصل له ؟ هي البيروقراطيه بتشده و لا النداهه بتندهه ؟ طب فين يا
عم الكلام الكبير المجعلص اللي كنت بتقوله ؟ و لا الهوا .
.
2- مصر خرجت من
عهد مبارك ( و النبي أبناء مبارك يقعدو على جنب شويه ) , خرجنا و احنا مديونين بمئات
المليارات , يعني البلد كانت ماشيه بقروض و ديون واحنا عايمين في ماية البطيخ , مبارك
دمر الإقتصاد و خلى الدخل العام أقل بكتير من الإنفاق , و لما تبقى مديون بحوالي تريليون
جنيه هيبقى جزء من ميزانيتك بعد كده هي تسديد فوايد الدين , يعني قول 100 مليار بتترمي
كل سنه في تسديد فوايد , طب هتجيب منين ؟ تضطر تندين تاني , و غيّر لي دولارز تاني
يا أستاذ راضي .
.
3- دول الخليج
و السعوديه تحديدا كانت رابطه مساعداتها الماليه بمواقف سياسيه معينه و ممكن في أي
وقت ترجع في كلامها أو تتحجج , بس احنا كمان مكانشي ينفع نتخلى عن مبادئ و قناعات معينه
في الأمن القومي عشان شوية الدولارات و ده اللي حصل غالبا .
.
4- لو يا ريس عملت
قناة سويس جديده هتلاقي الخرفان و الكولجيه بيقولو ترعه , و لو خدت مقعد في مجلس الأمن
هيقولو ده كان بتاعنا اساسا و مكتوب باسمنا في الشهر العقاري , و لو عملت استصلاح مليون
فدان هيقولو قيراطين أرض و نزرعهم كوسه بقى , و لو بنيت مصنع هيقولو كشك سجاير , يعني
من الأخر دوس عالنوعيه دي بالجزمه و بص لقدام .
.
5- تحلها إزاي
القصه بتاعة الأقتصاد دي ؟ أنا مش عارف , التركه تقيله أوي بس أكيد انت تعرف ولو مش
عارف هات خبراء حقيقين مش بتوع توك شو ( و لا بياعين كلام و هجايص ) , ولو وصل بيك
الأمر هات الخبراء دول من بره .
.
6- حاجه اخيره
انا معترض عليها تماما يا ريس , زيادة المرتبات ( خصوصا الشرطه و القضاء ) , الحكايه
اتكررت و بقت سخيقه أوي , في دولة هيوصل حجم الدين العام بتاعها لأكتر من 2 تريليون
جنيه , ماينفعشي نبقى مش لاقيين ناكل و نقول ( عايزه ورد يابراهيم ) .
........................................................................................................................
.
ليست هناك تعليقات:
إرسال تعليق