Mohamed
Hussein
1
أكتوبر 2015·
بس السيسي غلطان
على فكره , أيوه غلطان , ماهو لما يشوف الحروب حوالينا من كل ناحيه و الإرهاب زي السوس
بينخر في البيوت و في حيطان الدول و العالم شكله داخل على حرب عالميه جديده مكانشي
بقى يروح يجيب صفقات أسلحه و صفقات طيارات و سفن حربيه , كان المفروض يركز كل جهده
في صفقات البطاطس المهروسه عشان نعرف نعمل للعيال ساندوتشات الصبح .
.......................................................................................................................................
Mohamed
Hussein
1
أكتوبر 2015·
إنزل لنا يابني
هنا بنغمة ( الهجوم على الإسلام و المسلمين السنه في سوريا ) , دي شغاله و الله رغم
انها اتهرست ألف مره قبل كده , قال يعني بوتين كافر و أوباما حج بيت الله ييجي 400
مره , الله يخيبكو يا بُعدا , يابني الحكايه باختصار إن روسيا مش بتبيع سبح ولا أمريكا
, إنما وقوفنا جنب مفهوم الدوله ( أو ما تبقى منها ) في سوريا هو ده الهدف , الدوله
يعني الدوله حتى لو كان حاكمها ديكتاتور و فاشي و عفريت أزرق , سوريا اللي حضارتها
كذا ألف سنه ماينفعش يحكمها شوية دواعش لابسين شبشب بصباع .
.
و مين بقى الحمار
اللي فهمك إن أمريكا هي حامي حمى المسلمين السنه في العالم ؟ و إن اوباما هو المهدي
المنتظر ؟ , أه ياني لو ده المهدي المنتظر أومال مين هيلعب دور المسيخ الدجال ؟!.
..................................................................................................................................
Mohamed
Hussein
1
أكتوبر 2015·
ذكريات
.
طفل صغير عمره
بتاع 9 سنين , سرح الغيط مع أبوه , و معاهم الحمار و المحرات عشان يحرتو أرض القطن
, الطفل قلع شبشبه على راس الأرض عشان مايتقطعش و قرر إنه هيمشي حافي بين الخطوط اللي
مزروعه قطن , الأب مسك المحرات و علّقه في الحمار و دور الطفل إنه يمسك الحمار و يمشي
بيه في خط مستقيم و الأب يبقى ماسك المحرات من ورا , الطفل بيسرح , ماهو انت هتحرت
بتاع 40 أو 50 خط بطول الأرض , يعني هتمشي حوالي 4 كيلو بطريقة ( تاتا تاتا ) , الطفل
يشده أوي ريحة شجرة القطن و منظر شجرة الملوخيه اللي طالعه شيطاني و رجليه الحافيه
تدوس عالتراب الخشن و الحصى ( مساج صيني أهو ) , يفتح كادر عنيه يلاقي شجر الصفصاف
و الكازوارين ( الجازوارين ) و الكافور و فيه كام نخله باينين من بعيد , كل ده و هو
ماسك الحمار ( من المختمه ) و ساحبه تاتا تاتا , يسرح بقى في ملكوت الله و السجاده
الخضره الجميله , تقوم تهف عليه نسمة عصاري و يسرح أكتر , و هوووووب يلاقي القلم نازل
على قفاه , أأي , إيدك تقيله أوي يا حاج , يبص كده يلاقي نفسه سرح فعلا و ساب الخط
اللي كان ماشي فيه و الحمار سحبه لخط تاني محروت أصلا , تسلم إيدك يا سيد المعلمين
, الله يرحمك يابه , بس على فكره بقى انت خدتني على خوانه .
.
يااااه , أنا لو
حكيت الشغلانات اللي اشتغلتها و انا صغير من سن 6 سنين لحد الجامعه كده هتحسو إن فيه
قبيله في دماغي , هي قبيله فعلا , المشكله ان مفيش حد في القبيله دي عارف يبسط سيطرته
عالباقيين عشان يريحني , ربنا يعمي عيون الامريكان عن دماغي بقى , بدل مايسمعو ان فيها
شوية مناوشات و محدش مسيطر و يبعتولي واحد اسمه محمد حسين بدقن و سبحه و ألاقيه داخل
عليا كده و بيقولي ( أنا عايز أطبق الشريعه ) , ده على جثتي يا مولانا , دماغي باللي
فيها هما أحرار مع بعض , و بنات أفكاري يتخانقو زي ماهما عايزين , يسرقو التوك من بعض
و يشدو شعر بعض براحتهم خالص , إنت لأ , مالكش مكان عندنا , يعني مالكش مكان حدانا
.
..........................................................................................................................
Mohamed
Hussein
1
أكتوبر 2015·
دعاء أول يوم في
الشهر , خصوصا في شهور الصيف دي
.
يارب محصل الكهربا
يتوه و مايعرفش مكان الصيدليه و لا البيت , يارب و هو قاعد بيشرب شاي الصبح و الفواتير
قدامه تندلق كوباية الشاي عالفاتورتين بتوعي بس و يروح يطبع فواتير جديده مكانهم يلاقي
السيستم عطلان , يارب تجيله مأموريه مستعجله في الكونغو أد شهرين تلاته بحق جاه النبي
.
.........................................................................................................................
Mohamed
Hussein
1
أكتوبر 2015·
أؤيد تماما قرار
جامعة القاهره بمنع المنقبات ( عضوات هيئة التدريس ) من دخول قاعات المحاضرات و المعامل
بالنقاب , أه و عهد الله , انا مش بس بأيد كده , انا اتمنى يمنعو الطالبات المنقبات
من دخول الجامعه , طبعا اصدقائي هيزعلو من البوست ده و مش هيعملو لايكات و اللي مش
هيزعل هيخاف يعمل لايك أحسن السلعوه تطلع له بالليل و تقوله ( بخ ) , على طريقة ( يا
ويلي شٌلّت ذراعي ) .
.
اللي بقوله ده
مش له علاقه بدين ولا بتدين , ده رأيي , و في أيام زي اللي احنا بنعيشها دي يبقى أكبر
الكبائر أساسا انك تدخل في جدليه ( هو النقاب سنه ولا فرض ولا عاده و لا عباده ) ,
يعني مجرد السؤال نفسه بشوفه كبيره , و عشان أجيب لك من الأخر ممكن اسألك سؤالين و
تجاوب عليهم بسرعه أوي , لو كنت مع ولادك في مول تجاري و عيل منهم تاه و عايز تسيب
التاني مع حد عشان تروح تلف عاللي تايه و كان قدامك اختيارين , واحده ست منقبه معاها
اطفالها أو ست مش منقبه معاها أطفالها برضه , هتسيبهم مع مين ؟!! طب مسألتش نفسك ليه
؟ , السؤال التاني , لو مراتك رايحه تركب متر وفيه عربيتين ستات فاضيين تماما , واحده
فيها بس ست منقبه و التانيه فيها ست مش منقبه , مراتك هتختار مين ؟ او انت تفضل لها
تركب فين ؟.
.
و حكاية الإغراء
و الإثاره اللي في وجه المرأه دي محتاجه إعادة النظر خصوصا في سنه 2015 , يعني 5 ألاف
قناه للسكس و 5 مليون موقع جنسي و عاين يا فرج و قلب في بضاعتك .
.
و قبل ماتجيب الكرباج
و تبدأ الضرب إعرف اني بس بفكر في أمن و أمان بناتي و ولاد المصريين كلهم , و النقاب
بالنسبالي يعني وش متغطي بملامحه , يعني باختصار شخص مجهول الهويه , و لو عمل مصيبه
سوده محدش هيجيه حتى لو كان فيه كاميرات تصوير ومراقبه , أقولك حاجه أخيره , تخيل إن
الرجاله لبسو ماسكات و غطو وشهم و دخلو الجامعه يدو محاضرات او دخلو عربية مترو , عيش
حياتك بقى يا معلم .
.
أصدقائي الأعزاء
, محدش يعمل لايك , إوعو السلعوه .
....................................................................................................................
Mohamed
Hussein
30
سبتمبر 2015·
واحد بعت لي رساله
في ال ( others ) بعد البوست بتاعي الأخير , الرساله فيها ما
لذ و طاب من الكلام الهباب , طبعا اول حاجه عملتها اني فتحت صفحته , وماتفجئتش خالص
, فيديوهات لمعتز مطر و شير لبوستات و أفشخانات رصد و فرحه عارمه بإن يوسف الحسيني
انضرب بالقلم , المهم كعادتي مع الناس دي بتعامل بمنتهى الهدوء ( و لا جراح بريطاني
) , و باخد الزبون على حجري كده أهشتكه و أدلعه و اسيبه يجيب كل اللي عنده و بعدين
أبوسه و أحطه جنب الحيط ( يعني بلوك ) , و كذلك نفعل بالمتخلفين .
.
الحوار كله في
أول تعليق مع حذف اسم الشخص , أهي فرصه تعاينو بنفسكو و تتفرجو على عقول المخلوقات
في كوكب الخرفان , مش متخيل إن الناس دي كانت بتحكمنا و عايزه تحكمنا , كانت سنه هباب
الله لا يعيدها .
...........................................................................................................................
Mohamed
Hussein
30
سبتمبر 2015·
السعوديه بتهدد
بشار الأسد , إما الرحيل أو مواجهة الخيار العسكري !! .
.
طب و الله العظيم
, و مع احترامي للملكه و شعبها اللي هما حبايبي أساسا , بس السعوديه بجيشها و أسلحتها
و اللي و اللي , ماتقدرش توجه أي ضربه عسكريه لأي جيش نظامي في العالم حتى لو كان بقايا
الجيش الصومالي .
.
و هيبقى قدام المملكه
خيارين اتنين لو حبت توجه ضربه عسكريه للجيش السوري , إما انها تستعين بمصر و ده مش
هيحصل عشان السيسي مش هيرمي طوبه واحده على قاعده من قواعد الجيش السوري , اللي هو
جيش مصر الأول , مش هنحارب جيشنا يعني ( بغض النظر عن رأينا في نظام بشار ) , و الإختيار
التاني هو ان السعوديه تستعين بالأمريكان , و لو حصل هتبقى أمريكا لبّست السعوديه في
الحيط رسمي , و سلمان هيحمل لقب ( أخر ملك في أسرة أل سعود ) .
.
يا جلالة الملك
صدقني و الله انتو مش حمل فرهده , الملعب ده كبيرعليكو و انتو بقالكو 1400 سنه مادخلتوش
حرب , يعني عايشين في الأنيخ و الرحرحه , الحروب مفهاش نظام الكفيل يعني مش هينفع تجيب
ناس تحارب مكانك و انت يبقى اسمك طويل العمر ( أو راعي الحلال ) , الحروب بتختلف تماما
عن انشاء مصنع للزبادي , و الامريكان وقت الجد هيسيبو إيديهم كداهو , و هووووووووووووب
تلاقي نفسك وقعت يا معلم و راسك اتغرست في الأرض ( زرع بصل ) !!.
.......................................................................................................................................
Mohamed
Hussein
30
سبتمبر 2015·
يعني إيه كلمة
بطل ؟
.
في الكوره البطل
هو المدير الفني الداهيه اللي بيعرف يجيب بطولات و يحط خطط و يتصرف و يتعامل , و ممكن
البطل يبقى اللاعب الهداف الحريف اللي بيعرف يجيب لفريقه ال 3 نقاط أو حارس المرمي
المعجزه اللي بيحمي فريقه من سيل جارف من التسديدات , و في الطب البطل ممكن يكون مجدي
يعقوب او محمد غنيم , و زمان أيام الجاهليه كان البطل هو الشاعر الموهوب يعني عنتره
و امرئ القيس , و في سويسرا و النمسا ممكن يكون البطل هو الشخص المفوه اللي بيتكلم
عن حقوق العصافير و أهمية افتتاح مستشفيات خاصه للققط الشيرازي , أصل سويسرا مفيش جنب
منها دول بتولع ولا دول اتحرقت ولا هي جزء من مخطط عايز يجيب أجلها .
.
في مصر حاليا و
بصفه عامه , و عشان احنا مش في أيام الجاهليه و لا في سويسرا , ( يعني التاريخ و الجغرافيا
مختلفين تماما ) , يبقى البطل بالنسبالي هو العسكري فلان الفلاني اللي محدش عارف اسمه
ولا هيعرف , اللي راح سينا يحمي أرضنا و عرضنا و يا رجع بيتهم على رجليه يا رجع ملفوف
في علم مصر , ده البطل الحقيفي .
.
كل اعتذاري و احترامي
لفلان و علان و ترتان , و اوعدكو و الله لما نرجع لأيام الجاهليه هبقى اعلق صوركو و
تحتها كلام الفزلكه ( المعلّقات السياسيه ) في مدخل الخيمه جنب صورة عنتره , و لو بقينا
سويسرا برضه هعتبركو أبطال و هشارك معاكو في معركة البحث عن أسباب تأخر نمو الشعر في
صدر القط الشيرازي كوكي .
...........................................................................................................................
Mohamed
Hussein
29
سبتمبر 2015·
مندوحه , تخرصات
, تنميه سلطويه .......... ناس طيبين أوي يا خال , مثقفين و مقعرين وفكرهم أعمق من
أعمق نقطه في المحيط الهادي , فيهم واحد سابقنا بمليون سنه ضوئيه والتاني سابقنا بمليون
فدان مزروعين ملوخيه بالأرانب , ينفعو و الله كويس جدا لتشكيل الحكومه في دولة الفزلكه
الديموقراطيه المتحده و تشكيل المجلس الأعلى للأنعره الكدابه .
.
هي ساقية الصاوي
اتهطلت كده ليه ؟ بقالنا سنين و الساقيه بتلف عالفاضي , لا بتطلع مايه و لا بتطلع قماش
.
.
على العموم أنا
نويت و النيه لله أبقى مثقف و مقعر و ليا قيراطين أرض في سبوبة المحيط الهادي دي و
تحضرني أبيات شعريه لمولانا امرئ القيس بيقول فيهم اللهم صل على سيدنا النبي , أه افتكرت
( هصرتُ بفودي رأسها فتمايلتْ عليَ هضيم الكشح ريا المخلخلِ ) , اه و عهد الله المخلخلِ
, يعني اللي مش على بعضه .
.
بذمتكو بقى مش
أستاهل أبقى وزير ال ( أي حاجه ) في حكومة دولة الفزلكه ؟ .
.
ملحوظه : بيت الشعر
بيوصف فيه امرئ القيس حالته لما كان زانق المزه في بير السلم .
............................................................................................................................
Mohamed
Hussein
29
سبتمبر 2015·
مراحل تطور الكائن
الكولجي في نفس ذات الموضوع الواحد .
.
يعني خد عندك مثلا
, صفقات الأسلحه اللي مصر جابتها أو تعاقدت عليها في ظرف سنه .
.
المرحله الأولى
: على فكره بقى السيسي العر* بيتكلم عن صفقات وهميه للمصريين و هما عشان معر*** زيه
بيصدقوه , شعب عبيد هنعمل ايه بقى ؟ .
.
المرحله التانيه
( بعد ما تيجي الصفقه ) : السيسي العر* راح يجيب طيارات فرز تاني و فتيسها بيقفش ,
ادي تقرير من كبير مهندسي التكاكتك في الهند عن عيوب التصنيع في الطياره الرافال الفرنسيه
, و أدي تقرير تاني عن وجود ثقب في بطن حاملة الطائرات ميسترال و ان الثقب ده هيوسع
خلال شهرين و السفينه هتغرق في شبر مايه .
.
المرحله التالته
( بعد ما يكتشف ان فتيس الطياره مش بيقفش و إن الثقب ده مش في الميسترال ده في حته
تانيه !! ) : السيسي العر* جاب الأسلحه المتطوره دي من غير ما يعمل حوار مجتمعي حواليها
, و دي بقى اسمها الفاشيه و الديكتاتوريه و حكم الرجل الواحد .
.
المرحله الرابعه
: و بعدين بدل ما نصرف ديشيليون دولار على شوية أسلحه مالهمشي أي لازمه كنا صرفناهم
على التعليم و الصحه و تنمية الإنسان ( حلو البؤ بتاع تنمية الإنسان ده ؟ ) .
.
المرحله الخامسه
: الكولجي الحمار يعوج راسه لفوق كده و يبص عالخروف اللي راكبه و يقوله ماتضربش يا
عم بتضرب ليه ؟ مانا ماشي كويس اهو , الخروف يقوله لا شغلك مش عاجبني و مش مأثر في
الناس , مفيش عندك ابداع , يرد الكولجي يقوله حاضر حاضر هحاول أركز ( إن صفقات الرافال
و الميسترال لهي أكبر دليل على جنوح السيسي تجاه حرب شامله في المنطقه سوف تحرق الأخضر
و اليابس ) مبسوط مني كده يا عمنا ؟ , الخروف : أه كده مبسوط , هات بوسه مشبك بقى
.
المرحله السادسه
: الحمار : حاضر هديك البوسه , استنى دقيقه واحده بس هعمل حاجه كده , الخروف : هتعمل
ايه يا حمار ؟ الحمار : هعمل بلوك لمحمد حسين عشان قاعد يتريأ عليا و يشبهني بالحمار
و يقول انكو خرفان و بتركبونا ....الخروف : اه اعمله بلوك الحيوان عدو الله و الشرعيه
ده , و ريبورتات كمان و وصي زمايلك عليه , بسرعه يا حمار
................................................................................................................................
Mohamed Hussein
29
سبتمبر 2015·
ريهام سعيد و يسري
فوده ...................... صراع بين البيضه و البيضتين !! .
.
و تسألني مين هي
ريهام سعيد ؟ أقولك باختصار : كرتونة بيض وقعت من على عربيه ربع نقل في طريق اسكندريه
الصحراوي و داست عليها تريلا الساعه 12 الضهر في شهر أغسطس , أهو شكل البيض عالرصيف
في الوقت ده هو الوصف الحقيقي لشخصية ريهام سعيد , يعني كائن لزج متخلف و غبي , بارد
و سمج و زي ما تقول قول , ألف باء أخلاق مش موجوده , ألف باء إتيكيت مفيش , ألف باء
أدميه ماتلاقيش , حلقة سوريا و قبل منها حلقه في مصحه للأمراض النفسيه و لقاء مع ست
مختله عقليا !! , يوميها لعنت جدود أبوها و جدود أبو السيد الدكتور مدير المصحه
................ ده اسمه باختصار ( إنحطاط ) , بس ريهام سعيد لها شعبيه و نسبة مشاهده
معتبره , زيها زي توفيق عكاشه و احمد موسى وسعيد حساسين و زي احمد منصور و كل كلاب
الجماعه الإرهابيه ........ ودي في حد ذاتها ظاهره بنت تيت تستحق الدراسه .
.
أما مولانا يسري
فوده و هو كمان له شعبيه زي الفل , و لما كان بيقدم برنامجه كان فيه شئ من الإحتراف
و العمل الجاد ( يعني اجتهاد مطلوب ) , إنما شخصيا مش هنسى لجنابه موقف مهم جدا , إنه
كان واحد من أبطال معركة اللمون الشهيره اللي لبسونا في الإخوان , و بعدها بكام شهر
طلع يقول لمرسي ( لست رئيسي ) , هيييييييييح , بعد ما لبسنا يعني , و كان دار في ذهني
سؤال مشروع اتمنى من الأستاذ يجاوب عليه , و أتمنى من أصدقائي يفكرو فيه باعتدال بعيد
عن التعصب , هو يسري فوده لما كان مراسل للجزيره كان بيعمل تقاريره الجباره عن طالبان
و تنظيم القاعده و مقابلاته هناك و يقابل الملالي في كهوف تورا بورا إزاي ؟؟؟؟؟ أفغانستان
كانت مولعه ساعتها و المفروض بين قوسين يعني بين مزدوجين ( على رأي الجزيره ) إن حرب
طاحنه تدور رحاها بين أمريكا و حركت طالبان , و المفروض بين مزدوجين برضه إن قادة طالبان
دول عايشين في مكان الجن الأزراق مايعرفوش , طب ازاي عرفه يسري فوده و وصل ازاي ؟ هل
كانت ليسري فوده علاقه بالجن الأزرق و لّا بالجن التاني أبو 52 نجمه ؟؟ .
.
خناقة ريهام سعيد
مع يسري فوده هي باختصار صراع بين البيضه و البيضتين , بين واحده ماتسواش تلاته تعريفه
و واحد عمل نفسه بطل قومي في زمن الغباوه .
......................................................................................................................................
Mohamed Hussein
28
سبتمبر 2015·
السيسي جاب جون
في الأمم المتحده و أعلن ترشح مصر لعضوية مجلس الأمن لحفظ السلام في المنطقه و مواجهة
الإرهاب كخط دفاع أول ضد الإرهاب في العالم ............. تحيا مصر تحيا مصر تحيا مصر
.
.
ههههههههههههه
تصفيق حار , يا خرابي , كل دول عساكر أمن مركزي ؟!.
....................................................................................................................................
Mohamed Hussein
28
سبتمبر 2015·
الفيس بوك وقع
بتاع 10 دقايق و وقعت معاه كل قلوب المصريين , كل واحد تخيل ان صفحته عليها هاكر (
أو جوست ) , هتسألني طب و هي قلوب المصريين تقع ليه لو صفحات الفيس حصل فيها مشكله
؟ هقولك اخرس يا حيوان , و انت مال أهلك انت .
...................................................................................................................................
Mohamed Hussein
28
سبتمبر 2015·
في ذكرى رحيل الزعيم
.
.
أكتر واحد بائس
في مصر كلها هو واحد فلاح ( زي حالاتي ) أو من أصول فقيره جدا ( زي حالاتي برضه ) و
مع ذلك لما ربنا فتح عليه و بقى عنده لابتوب و أكاونت عالفيس كتب بوست يسب فيه الزعيم
, و تحس من كلامه ان عبد الناصر أمم ممتلكات جده عوضين باشا أبو لباس , مع إن لولا
عبد الناصر كان زماني أنا و هو شغالين في وسية الباشا بنجمع طماطم و لمون و ننضرب بالكرباج
.
.
طب أنا ممكن أتفهم
ان حفيد باشا حقيقي يكون شايل من عبد الناصر و معبّي , أو واحد ثورجي لسانه أطول من
صلاح سالم زي علاء عبد الفتاح كده يقول كلمتين هباب في حق الزعيم , بالك انت علاء ده
و عيلته لما بيصحو من النوم بتلاقي واحد فيهم بيقول للتاني : صباح الخير يابن *** الكلب
, و يرد التاني عليه : صباح النور يلعن **** أمك .
.
ماشي , الناس دي
مابتعرفش في الدنيا غير كده , مش طايقين حتى الهدمه اللي بيلبسوها , إنما انت عايز
تعمل نفسك واد حر و مثقف ومن أصحاب الكرافتات الشيك بس انا والله بتخيلك في مشهد كوميدي
, بالظبط مشهد سمير غانم لما كان لابس الكرافته على لحم بطنه !! .
.
عبد الناصر مات
من أكتر من نص قرن و لسه عاملكو خرم في دماغكو , طب كنت اسأل الصهاينه قالو ايه بعد
موته يا حفيد عوضين باشا أبو لباس .
.....................................................................................................................................
Mohamed Hussein
28
سبتمبر 2015·
أول يوم في الدراسه
و انا بجيب لوجي من المدرسه
.
لوجي : بابا احنا
الفصل بتاعنا اتغير و طلعونا فصل كده في الدور التاسع باين , فضلنا نطلع سلالم كتير
و انا كنت هقولهم كفايه كده و كملو انتو
.
أنا : يا لوجي
المدرسه بتاعتك 3 أدوار اصلا , طلعتو التاسع ازاي ؟ .
.
لوجي : انا عارفه
بقى , اصل الشنطه تقيله اوي و الكتب و الكراريس كأني شايله جمل على ضهري .
.
أنا : يا حبيبتي
ماهي وزارة التعليم عايزاكو تبقو أقويا و يطلع لكو عضلات في البايسيبس و الترايسيبس
و الديليسبس .
.
لوجي : هو احنا
رايحين نتعلم و لا نربي عضلات ؟
.
انا : لا رايحين
تربو عضلات , بالك يا بت يا لوجي , ابوكي ده لو بيفهم كان جاب لك كوزين اسمنت و سيخ
حديد ب عشرين جنيه في البيت و ماكنة خياطه سنجر و اهو تربي عضلاتك قدام عنينا , ولا
مدرسه ولا وجع قلب , و نبقى حققنا سياسة وزارة التعليم بأقل تكلفه .
.............................................................................................................................
Mohamed Hussein
28
سبتمبر 2015·
أصدقائي الأهلاويه
هيقعدو قدام ماتش الزمالك بتاع العوده مع النجم الساحلي و هما على وشهم ضحكة حسن فايق
, و لما الزمالك هيجيب أول جون هتتحول لضحكة لميس الحديدي و لو الزمالك جاب التاني
هتبقى الإبتسامه الصفره بتاعة ريهام سعيد و لو ربنا قدرنا و جبنا التالت قبل مايخلص
الشوط الأول هيدخلو بقى في مود عبله كامل و أمينه رزق .
.
اللهم بلّغ جمهور
الأهلي مود أمينه رزق في ماتشنا اللي جاي .
............................................................................................................................
Mohamed Hussein
28
سبتمبر 2015·
مش متعصب أوي ولا
بقطّع في هدومي , إنما بحب الزمالك , بحب كورته و لمسته , فرحة الأهلاويه الهستيريه
مش لاقي لها تفسير غير حكاية ( القارعه ) , عندي قناعه تامه ان النجم الساحلي فريق
على أده و ممكن يتغلب أربعه و سته عادي , امبارح كنا بنلاعب النجم الساحلي و الجماهير
( و احنا ماعندناش ) و الحكم ( اللي قلب الماتش تماما ) و حامل الرايه ( ابقو شوفو
الأوفسايدات اللي حسبها ), و كمان كنا بنلاعب حماده طلبه !! .
.
في ماتش العوده
هنغلب و نصعد للنهائي , مطلوب حضور 3 ألاف مشجع بس ( و ده اضعف الإيمان ) و ننزل بتمركز
دفاعي جيد و نطلع الشوط الأول فايزين 2 صفر أو فرق جونين , و لو ماصعدناش هقول للاعبي
الفريق برافو يا رجاله كتر ألف خيركو , انتو اللي فرحتونا 3 مرات في شهرين .
.
أصدقائي الأهلاويه
ركزو مع فريقكو , أورلاندو فريق بيلعب كوره نضيفه على ملعب نضيف وسط جماهير نضيفه و
مش بتاع حكام , يعني لا بيفرق معاه ارض ولا جمهور , و لا تأمنو مكر شريف إكرامي
............ نشوفكو في النهائي بقى .
...................................................................................................................................
Mohamed Hussein
27
سبتمبر 2015·
طيب كنا بنقول
ايه بقى ؟ أه افتكرت , كنا بنقول ان المدارس هتبدأ بكره و إن العيد كان يوم الخميس
.
....................................................................................................................................
Mohamed Hussein
27
سبتمبر 2015·
و شوف حكمة ربنا
يا جدع , الحته الرافال التابعه للجيش الفرنسي طلعت من حاملة الطائرات اللي في الخليج
العربي ( اه عندنا دي ) و ضربت أهداف في سوريا تبع تنظيم داعش و الجيش الفرنسي بيقول
( بيقول بالفرنساوي طبعا ) إن هدفهم هو حماية الأمن القومي الفرنسي و الأمن الغذائي
و أمن و سلامة المواطنين ( و سلامتها أم حسن ) و بيقول كمان انه هيضرب اهداف داعش و
هيحمي السوريين من اعتداء بشار الأسد !! الله بقى ؟ دي كده تبقى فرنسا داخله بنفرين
, ماهي جمعيه و بيقبضوها كل شهر .
.
و تعالى هنا جنبي
و اقرا التقيله , الرئيس الفرنسي بيقول ان قواته الجويه بتتحرك فوق سوريا بمنتهى الحريه
و الأريحيه ( يعني و هي سايبه ايديها كده ) رغم سيطرة أمريكا على الأجواء في سوريا
!! , يعني أمريكا مسيطره عالأجواء السوريه بس احنا برضه بنتحرك و نروح و نيجي و نعمل
شألباظات , و من كام يوم كانت الهجره الغريبه و المريبه لألاف من الشباب السوريين
, طب و النبي و مين نبّى النبي نبي سوريا كده أرضها و سماها بقو عاملين زي مائده من
موائد الرحمن و أي عابر سبيل بيقعد و ياكل و يلهط و يكسّر الصحون و الكوبايات , و محدش
بيدفع الحساب في الأخر , أصل الحساب مدفوع مقدما من المعلم الكبير , الله يخرب بيته
البترول اللي طفح في جزيره العرب .
.
و لما أنا بقى
أقول كلمتين حلوين في حق جيش مصر أبقى بطبل للجيش , لا معاك حق يا وله , المره الجايه
ابقى فكرني أطبّل للست الوالده .
....................................................................................................................................
Mohamed Hussein
27
سبتمبر 2015·
عارف حضرتك لو
جبت شوية (مفيش ) و حطيتهم في صينية ( ولا حاجه ) و رشيت عليهم حبّة ( هوا ) من فوق
و حطيت الصينيه دي في فريزر عند درجة حراره 200 تحت الصفر و سيبتها بتاع نص ساعه هتطلع
لك في الأخر ريهام سعيد .
..................................................................................................................................
Mohamed Hussein
27
سبتمبر 2015·
أكتر اتنين ربنا
ابتلاهم في عقولهم في مصر هما دول :
.
واحد قعد سنين
يتكلم عن الديموقراطيه و المساواه و حقوق الجميع في ممارسة العمل الديموقراطي و يصدع
دماغ أهلنا و لما اترشحت واحده كانت بتشتغل رقاصه هاج و ماج و ركب دقن و اتحول فجأه
إلى إمام و خطيب مسجد الفيس بوك الكبير و باقي له تكه و يقول الديموقراطيه أصلا حرام
.
.
و واحد فهم الديموقراطيه
على إن الإرهابي القاتل و السفاح والنصاب و الحرامي و اللي بيبيع بلده لكلاب السكك
من حقه يترشح و يبقى عضو برلمان أو حتى رئيس دوله ( و فصيل وطني ) بس الرقاصه لأ (
طب ما تعتبرو الرقاصات فصيل وطني ؟ ) , الرقاصه لا يمكن , الرقاصه على جثتي , نعمل
برلمان بهاليل ماشي , دراويش و ناس بتوع رز بلبن مايضرش و نجيب المكفّراتيه يحكمونا
ياريت , عبود الزمر يدخل البرلمان ولا حتى ريا و سكينه ايه المشكله ؟ هي ريا كانت بتشتغل
رقاصه يا جدع ؟ طبعا لا , يبقى من حقها تترشح , حقها ولا مش حقها يابو كمال ؟.
.
هههههههههههههه
وجعتو دماغي يا كولجية مصر , يا بتوع معركة اللمون , الله يرحم ام أيمن لما كانت بتبص
من شباك قصر الرئاسه و قالت انا شوفت الولاد و البنات في الخيام بيعملو حاجات وحشه
مع بعض !! ........هي دي اللي كانت بتحكمكو يا شوية حمير حصاوي , بس أم أيمن مش رقاصه
على فكره , هي مناخير أبو الهول وقعت من شويه .
...........................................................................................................................
Mohamed Hussein
26
سبتمبر 2015·
نقطه و من أول
الحج
.
- اللي ماتو كتير
, فيهم مصريين كتير أوي , و من حقنا نسأل , و من حقنا كمان نقول إن الحج فريضه على
المسلم القادر مش دعوه للإنتحار الجماعي .
.
- الأعداد المعلنه
من الحجاج بتبقى اعداد وهميه عشان العدد الحقيقي اضعاف كده بكتير , تخيل لما سبعه تمانيه
مليون يتجمعو في مكان أد ستاد القاهره ؟ و البركه طبعا في ولاد التيت استغفر الله العظيم
اللي بيفشخو أفكارنا و يقولك انا حجيت 7 مرات او حجيت 11 مره !! .
.
- حادثة الرافعه
و الحريق و التدافع , مئات الشهداء , و حكاية قضاء وقدر دي أحيانا بتكون مجرد شماعه
بنعلق عليها جهلنا أو ( قلة حيلتنا و خيبتنا التقيله ) , وارد جدا يكون فيه شبهه جنائيه
, 2015 بتختلف تماما عن أي سنه , انت بتتكلم عن حروب مفتوحه و السعوديه دخلت طرف فيها
.
.
- يابني افهم احنا
في زمن ( الكيمتريل ) مش حرب السيوف و المنجنيق , و ترتيب حادثه يموت فيها مئات البشر
في مكان زحمه جدا ده بقى ألف باء في شغل الدول بنت الكلب .
.
- ايران و تركيا
و مطالباتهم بتدويل الإشراف على الحج بيعني باختصار إن ولاد التيت مصرين يبقو ولاد
تيت و بيصطادو في المايه العكره ( و الله اعلم مين اللي عكر المايه دي !! ) , ماهي
مش مشكلتي ان كراهيتك للسعوديه خلتك تتعاطف مع ايران و الحوثيين و لا مشكلتي إن كراهيتك
للسيسي خلتك تتعاطف مع تركيا , و مش مشكلتي انك فاهم إن فيه عداوه بين أمريكا و إيران
أو متخيل إن أردوغان هيحرر القدس بكره في ساعة عصاري , الله يخليك إقعد على جنب بقى
و عيش و تعايش مع افتكاساتك .
......................................................................................................................................
Mohamed Hussein
26
سبتمبر 2015·
بس أنا كده فهمت
, من الأخر يعني , سبتمبر هيخلص و بعدين أغسطس هيرجع تاني , و تبقى شهور الصيف في
2015 بالشكل ده , أغسطس سبتمبر أغسطس , زي مرعي السيد مرعي .
.......................................................................................................................................
Mohamed Hussein
25
سبتمبر 2015·
هذا ما وجدنا عليه
أباءنا
.
و تسألني بتعمل
ايه لما تروح البلد في العيد ؟ أقولك بناكل , و بنعمل إيه تاني ؟ بناكل تاني , و بتعمل
ايه برضه ؟ بناكل برضه , يا بيه احنا بنفطر يوم العيد فته و بطه أو وزه و نتغدى لحمه
و العشا ممكن يكون ممبار على حتة وزه باقيه , تقولي بقى حركة الجهاز الهضمي أو حركة
المحافظين , ولا بيفرق معانا الكلام ده , وامي بين كل اكله و التانيه ألاقيها بتديني
فاكهه و تحلف عليا , يابني كل بدل مانت هفتان كده , وانا اكل و اتزغّط , هو ده التزغيط
المظبوط .
.
لمتنا عالأكل بتفتح
النفس , القاعده والعيال و الحصيره , و تلاقينا بناكل شبه يهود قريش كده , أو شبه عادل
امام في بخيت و عديله , انا م البلد دي , يقولون أن ديناً جديدا ظهر في القاهره يروج
لساندوتشات الجبنه عالفطار و العشا مع خيارة متقشره , الويل لهم .
...................................................................................................................................
ليست هناك تعليقات:
إرسال تعليق