Mohamed Hussein
8 أكتوبر 2015·
بعد ثورة يناير مباشرة جت تصريحات أوباما
و كانت سريعه جدا ( سوف ندرّس الثوره المصريه لأبنائنا في المدارس ) , أياميها كانت
السكينه سارقانا اوي , فرحنا و اتشحتفنا بالظبط زي الي قاعد بيسمع حكاوي و افتكاسات
محمد حسان ...بس بعد فتره و لما هدينا شويه كان لازم نحط ألف علامة استفهام و ألفين
علامة تعجب عالثوره اللي اوباما فخور بيها دي , و نقول بعلو صوتنا , الحدايه مابترميش
كتاكيت و اوباما مش مقطع حُصر الجامع , لحد ما بدأت تظهر المعجنه اللي عيشنا فيها كذا
سنه و الخراب اللي شوفناه حوالينا , و كل واحد فينا ضرب نفسه 100 قلم عشان فرح بتصريحات
اوباما و بلع السم اللي كان في العسل .
.
النهارده أوباما بيقول بالفم المليان (
مش عايزين بشار الأسد ) , و التصريح ده قي حد ذاته كافي جدا بالنسبالي إني أقول يارب
انصر بشار الأسد ( حتى لو مكانش عاجبني ) .
.....................................................................................................................................
Mohamed Hussein
8 أكتوبر 2015·
اعتراف
.
بتجيلي حالة أرتيكاريا و هسهس و حلمبس و
حواجبي يتنفشو بأعجوبه و يترسمو 7 مقلوبه لما حد بيكلمني في التليفون و يقولي أنا أبو
فلان , او واحده تقولي أنا ليا دوا بإسم الحاجه أم فلانه , أو حد يوقع بإسمه أبو فلان
أو أم فلانه , في اللحظه دي تحديدا بتخيل إن فيه صفيحه مليانه جاز اتكبت على دماغي
, و هي الحكايه كده فعلا , برميل جاز و اتقلب على دماغ مصر في ال 50 سنه اللي فاتو
.
.
ياترى سعد زغلول كان اسمه أبو ايه ؟ هي
شجرة الدر اسمها فعلا أم نرمين ؟ طب الملكه ( تي ) مرات أمنحتب التالت كانت بتوقع باسمها
على ورق البردي و تقول ( الحاجه أم أخناتون ) ؟.
.
يا سيدي ابقى قول اسمك ماتخنقنيش و النبي
, الأسماء اتعملت عشان الناس تعرف بعض , و اسمك بالتأكيد مش عيب , سواء كان محمد و
لا منير و لا جعيضي , و انتي يا ستي اسمك مش مثير ولا هيعمل فتنه , و عهد الله اسمك
لا هو حرام ولا عوره و لا هيثيرني حتى لو كان اسمك ده صافيناز السوبكي .
.
أبو فلان و أم فلانه دي تبقو تقولوها لبعض
لما تكونو متجوزين و في ساعة صفا كده , وحشتني يابو محمود و انتي كمان وحشتيني يام
محمود , هات بوسه يابو محمود , خدي بوسه يام محمود , و خليكو على كده لحد ما تنسو أسماء
بعض الحقيقيه و تروحي حضرتك تحجزي لابنك لبس المدرسه و الموظف يسألك اسمه ايه ؟ تقولي
له محمود , أيوه يا ستي محمود ايه ؟ أهاااااا , أبوه اسمه إيه ؟ و النبي يا خويا مانا
فاكره , اسمه أبو محمود باين .
...........................................................................................................................
Mohamed Hussein
7 أكتوبر 2015
رفعت إيدي لفوق .. و دعيت و لبّيتني
...عبدك و راضي أنا ...مابقولشي يا ريتني ...يارب إنت البراح ..لما الضلوع بتضيق
....يارب انت السند ..لو ضهري صار متني
....................................................................................................................................
Mohamed Hussein
7 أكتوبر 2015 ·
الحرب الأخطر في تاريخ مصر
.
- عارف حضرتك سوريا و داعش و الصين و روسا
و أمريكا و الطيارات و الصواريخ و الدوله اللامؤاخذه الإسلاميه , و ملايين المهجرين
و تفريغ دوله كبيره من شبابها ؟ لأ مش هي دي الحرب اللي أقصدها .
.
- طب عارف اليمن و توكل كرمان و الحوثيين
و عبد الله صالح و جايزة نوبل والجيش اللي مابقاش جيش و الدوله اللي بقت أقاليم و حلم
الديموقراطيه و حلمك ياسي علام ؟ لا برضه مش هي دي الحرب اللي بقصدها .
.
- طب عارف ليبيا و داعش و الحكومه اللي
مسيطره بس مش مسيطره و الحريه اللي طفحت في شوارع ليبيا بعد اغتيال القذافي ؟ ....برضه
مش دي اللي أقصدها .
.
- طب عارف الميسترال و الرافال و الطيارات
الروسي اللي جبناها ؟ لا مش دي اللي هتحمينا من الحرب اللي أقصدها .
.
الحرب الأخطر اللي احنا عايشنها من كام
سنه و هنعيشها كام سنه جايين مفهاش عدو واقف قدامك , حرب من غير أعداء , ولا فيها ساحة
معركه و لا قنبله و لا مدفع , عدوك عمل المطلوب منه و علمك ازاي تكون عدو نفسك و خلع
ايده و قعد على جنب ياخد البريكفاست بتاعه في البلكونه و يتفرج عليك و انت بتموت ,
بتتحلل ذاتيا كده , اسمها حرب الدماغ , حرب العقل , حرب التاريخ و الهويه .
.
- سيادتك تقعد و عقلك يستوعب مثلا ان حرب
اكتوبر اللي خلصت من 42 سنه و حضرتك قعدت 42 سنه تغني و تتغنى بنصرها و ترسمها في حصة
الرسم في المدرسه , أهي الحرب دي اكتشفت سيادتك فجأه أول امبارح بالليل انها كانت
( وهم النصر ) , خلي بالك انك اكتشفت بمفهوميتك و ذكاءك الوهم ده بعد سنين طويله أوي
و دماغك مستوعب عادي و مش ممانع خالص .
.
- و الجيش اللي طول عمرك كنت بتفخر بيه
بقى اسمه جيش المكرونه و ابو 50 % , مع انك يا مؤمن عشت طول عمرك حتى من وانت طفل ترفع
راسك فوق ييجي مترين لما ييجي سيرة جيش مصر , بس عقلك استوعب الكلام ده النهارده ,
عشان انت خلاص تم اعدادك و تجهيزك لمرحلة انك تموت عالكرسي بتاعك و انت قاعد ..موته
نضيفه و زي الفل , مفهاش نقطه دم واحده .
.
الحكايه باختصار 3 خطوات , تفقد الثقه
, تدخل في مرحلة الشك , و بعدين تموت .
...............................................................................................................................
Mohamed Hussein
7 أكتوبر 2015·
الطيران الروسي اخترق المجال الجوي التركي
4 مرات في اليومين اللي فاتو , يعني داخل طالع رايح جاي .
.
و زي ما قال الفيلسوف زمان : أنْ تغتصبي
مره فأنتَ مجرم حقاً , و أن تغتصبني مرتين فأنتَ مجرم جدا و أنْ تغتصبني 3 مرات فأنت
مجرم أوي , اما بقى لو اغتصبتني 4 مرات يبقى أنا اللي غاويه و بحبك يا مجرم .
...................................................................................................................................
Mohamed Hussein
6 أكتوبر 2015·
عايزه ( تتجوز ) بس خايفه من الحمل
.
بلال فضل , البانجو اللي فتح في شوارع مصر
, كاتب و سياريست و مؤرخ و مدرس فرنساوي و خبير عسكري , بيكتب في ( العربي الجديد
) المملوكه لتميم و أمه و بتصدر من لندن ( مناضل يعني أهو ) , و في ذكرى نصر اكتوبر
العظيم , كتب العبقري بلال فضل مقال متر و نص أد قماشة البنطلون ( على رأي الكاتب و
المقاتل الراحل جلال عامر ) , و قال مولانا بلال و عاد و عمل شالباظات عن الوثائق بتاعة
الحرب ,كلام من نوعية : اسرائيل نشرت الوثائق بس مصر لأ ليه ؟ هه ؟ يا ترى ليه ؟ طب
ليه مش بتنشرو الوثائق ؟ تكونو خايفين من حاجه ؟ و الله كده شكلكو خايفين من حاجه
, مالخيبه لا تكونو خايفين من حاجه , و بعدين فين مكالمات السادات و حواراته قبل الحرب
و قال ايه و قال لمين و كان بيعمل حمام ازاي ؟ و جاب المسدس بكام ؟ عايزين نعرف بقى
, ماهو احنا لازم نعرف , و لنا حق المعرفه , ولا تكونو خايفين من حاجه ؟ شكلكو كده
خايفين من حاجه , مالخيبه لا تكونو خايفين من حاجه .
.
و بس يا سيدي خلص المقال على كده , إقفلو
الكراريس , أنا هقولكو اللي فيها في كلمتين , بلال فضل عايز يشوه نصر اكتوبر بس مش
جاي دوغري , بيلف و يدور يعني , يقدم رجل و يأخر رجل , بالظبط بالظبط زي اللي عايزه
تتجوز ( بلاش الكلمه التانيه ) بس خايفه من الحمل !! .
.
ياختي طالما الكيف طالب معاكي و اليورو
دلوأتي بالشئ الفلاني , و حِجْر ابن موزه بيسع من بنات الليل ألف طب ما تدخلي دوغري
و تقلعي ملط عشان الناس تشوف مواهبك و( نضالك ).
..................................................................................................................................
Mohamed Hussein
6 أكتوبر 2015·
حملة بلوكات وانا الكسبان .
.
لأي حد من أصدقائي بيشكك في نصر أكتوبر
العظيم أو حتى بيلمح أو يستظرف , ماتفرقوش عندي عن الخرفان بتوع الإرهابيه حاجه , الصهاينه
نفسهم مابيشككوش في نصرنا عليهم زي مانتو بتعملو يا حمير وعاشقه لركوب الخرفان على
ضهرها , الهبل ده ماظهرشي إلا بعد ثورة يناير , بعد ما ماسورة الحريه انفجرت في وشنا
فجأه , ف بقى التشكيك في النصر حريه و سب الجيش المصري حريه , الفكر الإنهزامي و تزوير
التاريخ فشل الإخوان في تصديره للناس في 80 سنه , بس نجحت ماسورة الحريه في تصديره
في ظرف سنتين تلاته .
.
لو كانت ثورة يناير هي السبب فعلا يبقى
ملعون أبوها و تحيا مصر .
.......................................................................................................................................
Mohamed Hussein
6 أكتوبر 2015·
أصدقائي الأعزاء اللي بيدافعو عن أي حاجه
بتحصل و يبرروها , أبوس إيديكو , مفيش حاجه اسمها ( أصل ده هديه من الإمارات ) و لا
منحه من المكسيك و لا نفحه من درب التبانه , الحكايه مش طابونه هي ولا برميل طرشي و
أي حاجه تترمي فيه هتدي طعم زياده , احتفال اكتوبر يبقى أوبريت له علاقه بنصر اكتوبر
العظيم , ببسالة الجندي المصري , بالإصرار و العزيمه , بالقبطي المصري قبل المسلم
, ده اسمه تاريخ و دي اسمها هويه .
.
الإمارات تجيب هديه نخليها لوحدها , منفصله
تماما , في حدث و توقيت و مكان مختلف و نقول لهم ألف شكر , عايزين بقى نشجع عالوحده
بين المسلمين السنه ضد الشيعه ولا المسلمين ضد الكفار و لا البيزنطيين ضد المغول ده
مش مكانه ولا زمانه ولا دي قصتنا أساسا , ده اسمه احتفال نصر اكتوبر , يعني السادات
و خط بارليف و الجنود و الساعه 2 الضهر , الحكايه دي لو فرطت مننا و كل اللي عنده حاجه
هيرميها في أوبريت احتفال اكتوبر هييجي علينا يوم و نلاقي واحد منزل إعلان في الأوبريت
عن عيل تايه و اللي يلاقيه يوصله لأهله و الاجر و الثواب على الله .
.
بنحتفل بنصر اكتوبر و جايبين فقره عن صدر
الإسلام نبقى بالظبط زي النعي بتاع كوهين اللي في النكته ( كوهين ينعي ولده و يصلح
ساعات ) .
..................................................................................................................................
Mohamed Hussein
5 أكتوبر 2015·
في احتفالات نصر اكتوبر العظيم
................ أوبريت ( ماشربش الشاي أشرب إزازتين بيره أنا )
.
جريد نخل و جمل و كعبه , كل الطرق تؤدي
إلى البانجو , هو احنا في 6 اكتوبر حررنا سينا ولا حررنا يثرب ؟ طب هو السادات كان
من الصحابه ؟ استغفر الله العظيم , طب صحيح بقى بجد صحيح يعني إحنا فعلا في 6 اكتوبر
أسرنا عساف ياجوري بالجمل بتاعه و دمرنا كتيبة الجمال اللي كانت معاه ؟! .
.
الناس ( القائمين ) عالعمل ده لازم ( يقعدو
) على خوازيق , ده اسمه تشويه مقزز للتاريخ و الهويه .....................نحن غرابى
عك !!
.......................................................................................................................................
Mohamed Hussein
5 أكتوبر 2015·
طب حط نفسك مكان الراجل مدرب منتخب مصر
كده , يا ترى في مركز حراسة المرمى يختار اللي شال أربعه على أرضه ولّا اللي شال خمسه
بره ؟ الإتنين خدو فرصتهم و فشلو , أنا بقول بقى كوبر يجيبها من قصيرها و يرمي إكرامي
و الشناوي بره التشكيل و يستدعي كمال الجنزوري و فايزه أبو النجا .
...................................................................................................................................
Mohamed Hussein
5 أكتوبر 2015·
صباح نصر اكتوبر
.
تونس كانت من أهم و أخر المعاقل اللي بيعول
عليها جماعة الإخوان الإرهابيه , لما الرئيس التونسي يزور مصرو يحضر احتفالات اكتوبر
( كأنه واحد من أهل البيت ) يبقى الخبر ده بيقول جملتين اتنين بس , في السياسه ( البقاء
للأقوي ), و في مستقبل الإخوان ( البقاء لله ) .
.......................................................................................................................................
Mohamed Hussein
4 أكتوبر 2015·
لما واحد زي أردوغان يطلع النهارده ( يعني
بعد سنه و اتنين ) بنفس أم سحنته دي في مؤتمر من المؤتمرات و هو رافع شعار رابعه اللي
المفروض انها ماتخصش تركيا في أي حاجه يبقى حاجه من اتنين , إما إن الواد ده أهبل و
معاه شهاده طبيه بتثبت كده , أو إنه يكون بيشتغل ( لا مؤاخذه ) و أمه عارفه و مبسوطه
.
.......................................................................................................................................
Mohamed Hussein
4 أكتوبر 2015·
ضحكة الصباح
.
الأوبزرفر : دول الخليج تهدد برد عسكري
على التدخل الروسي في سوريا !! , هههههههههههههههههه أه ياني , و عندك واحد رد عسكري
من قطر على روسيا بس خليه على ماية بيضا , يا طويل العمر يا طويل العمر تبغي رد عسكري
تاني ولا كفايه كده ؟ لا كفايه كده مانبغي نرهق الجيش الروسي أكتر من كده , كنا نبغي
نأدبهم بس , سوّي لي واحد شاهي , وين الكمترى وين الكمترى ؟ .
.
الحقنا يا طويل العمر الحقنا , ويش فيك
انت يا ولد ؟ عفيفي طال عمرك , عفيفي الصومالي سواق اللاندكروز حقك , ماله الزفت عفيفي
؟ زعلان عشان ما أخد الأجازه اللي يبغيها , و طلع بالسياره طال عمرك و معاه جركن مايه
كبير و حالف لا يغرق الدوحه كلها .
الأمير : أفا أفا , ويش نسوي الحين ؟! شكلها
النهايه يا ولد , جيوشنا راجعه من حرب روسيا مرهقه و الجنود نايمين , مين هيحارب عفيفي
؟ .
...............................................................................................................................
Mohamed Hussein
4 أكتوبر 2015·
متشكرين على دور الواجب ده يا رجاله
.
جماهير الأهلي عملو حركة جدعنه حلوه النهارده
, و رمو كل البوستات و الألشات ورا ضهرهم و بدأو في تشجيع الزمالك حتى من قبل الماتش
ما يبدأ وبعد الماتش رفعو القبعات لفريق شافوه بيلعب برجوله و شرف , و لا مندوحه (
يعني لا مفر ) من إني هشجع الأهلي بكره , يارب النصر للأهلي و يفوز بالكونفدراليه كمان
.
.......................................................................................................................................
Mohamed Hussein
3 أكتوبر 2015·
فريقي هو البطل حتى لو ماتأهلناش , النهارده
عملو ملحمه , فرقة صاعقه كانت في الملعب , فرقة رجاله و أبطال ........... ألف ألف
شكر .
.......................................................................................................................................
Mohamed Hussein
3 أكتوبر 2015·
طب قولي لي أنا عملت ايه بس يزعلك ؟ قولي
لي انا غلطان في ايه و انا مستعد اعتذر و اصلح غلطي , كله إلا زعلك مني و إنك تبعدي
عني , انتي غاليه عندي أوي , و عموما يا ستي و قبل أي حاجه أنا أسف جدا و حقك عليا
, اللي يرضيكي و اللي هتقولي عليه أنا هعمله فورا , من بكره هتشوفيني في شكل تاني يرضيكي
بس إديني فرصه .
.
لا لا ده مش واحد بيصالح مراته ولا حبيب
بيصالح حبيبته و لا حلاق بيصالح زبون بعد ما قطع له ودنه , ده مندوب خدمة العملا بتاع
فودافون لما عميله تتصل بيه و تقوله عايزه ألغي خدمة النت الزباله بتاعكو .
.......................................................................................................................................
Mohamed Hussein
3 أكتوبر 2015·
يارب انت القادر و القدير , يارب انت عارف
بقى و انا مش هقول اكتر من كده , هما 4 مش كتير , عبدك باسم مرسي يجيب جونين , ده حتى
يتيم و ابوه لسه متوفي قريب , وعبدك أيمن حنفي جون و الواد مصطفى فتحي جون , يارب كل
عبيدك من جماهير الأهلي اللي قاعدين يشجعو النجم من ساعة الماتش اللي فات يتكبسو كبسة
أحمد منصور لما شاف افتتاح قناة السويس الجديده بعد ما حلف بأمانات المسلمين والهندوس
إن الشركات هربت من المشروع و الكراكات غرقت في الوحل .
.......................................................................................................................................
Mohamed Hussein
3 أكتوبر 2015·
إلا ( الكولّه ) أعيتْ مَنْ يداويها .
.
هو : على فكره أنا مش إخوان , لا تكون فاكرني
إخوان ولا حاجه .
أنا ( في سري ) : قشطه , إنزلي بقى يالطقم
إياه .
.
هو : أنا بس ضد الدم وضد الظلم و ضد الفاشيه
.
أنا ( في سري ) : و ضد الحشره و ضد الفار
, قول يا عم قبنوري , قسم و سمعني .
.
هو :و انا نزلت في ثورة 30 يونيو و انتخبت
السيسي بس أنا ضد الإنقلاب العسكري .
أنا ( في سري ) : يعني ثوره و شوفتها بعينك
و نزلت فيها و انتخابات و انتخبت بس هو انقلاب ؟ سبحان من أبدعك .
.
هو : البلد حالها و اقف و مفيش شغل و الشباب
بينتحر , عندك أنا مثلا , انا كنت بشتغل مدير عام اليونسكو قبل ثورة 30 يونيو و دلوأتي
ببيع دره مشوي قدام السراج مول .
أنا ( بصوت عالي ) : و مين سمعك , مانا
كمان كنت رئيس المجلس الأعلى للقنبله الذريه في روسيا و بعد الثوره بقيت عاطل و بشتري
سجاير كليوباترا فرط من كشك الواد حوده .
.
هو : و على فكره بقى أنا
أنا ( مقاطعا و بصوت عالي ) : استنى يا
معلم , عليا أنا الطلعه دي , هجيب لك من الأخر .
.
هو : طب قول .
أنا : أبو 50 % ماينفعش يحكمنا , و العسكر
يحمي مايحكمش , و أهم حاجه تنميه الإنسان و الحوار المجتمعي و لا مندوحه من الحوار
المجتمعي .
.
هو : صح , عرفتها ازاي ؟
أنا : مانا حافظها يابني الستامبه دي ,
دي هي مبادئ و شعاراتي في الحياه .
.
هو : طب كويس أوي , يعني انت معانا و عايز
حكم العسكر ينتهي ؟
أنا : لا مش عايز كده .
.
هو : اومال عايز إيه ؟
أنا : عايز أبوسك و اطبطب عليك و احطك جنب
الحيطه , و بعدين أروح أبلغ صحابك في حركة تحرير الميدان اللي هي نفسها حركه ميدان
التحرير اللي هما أصلا بتوع رصد و 6 ابريل و بيشتغلو بعد الضهر في الإشتراكيين الثوريين
, و أقول لهم يلحقو بقى يعملولك صفحة بإسم ( كلنا الشهيد قبنوري ) و انت ذات نفسك ممكن
تشارك في صفحة الشهيد قبنوري دي و تكتب لنا عن رؤاك السياسيه العميقه و تحكي لنا ازاي
استشهدت لما حطيتك جنب الحيطه , و إحساسك ايه لما بقيت شهيد ؟
......................................................................................................................................
Mohamed Hussein
2 أكتوبر 2015·
أوتدرونَ منْ هو ال idiot ? .
.
في تصنيف الذكاء بييجي ال idiot في المرتبه
الأخيره يعني في قعر الحلّه , اللي هو الأحمق , و حيث إن الفيس بوك مش بيعمل اختبارات
ذكاء لأي حد عنده أكاونت ولا بيشوف بطايق الناس يبقى طبيعي جدا نقابل عالفيس ناس على
كل شكل و لون من أول العبقري و انت نازل لحد مولانا ال idiot .
.
أشهر مثال للإديوت و الإديوتيين هو صاحبك
اللي شايف السيسي رايح جاي على موسكو و بوتين رايح جاي عالقاهره و السيسي بيشوف بوتين
أكتر مانا بشوف بناتي في أيام الدراسه , و شافهم متفقين حتى في لون البدل و الكرافتات
والمواقف و متفقين على عدد المعالق و الشوك و السكاكين وطقم الكاسات و طقم الجيلي و
مع ذلك ينام و يقوم وعلى لسانه كلمه واحده ( السيسي عميل الأمريكان ) !! .
.
و أبسط تعريف أو تشبيه لل idiot باختصار
, هو الشخص اللي لو قالو له مراتك بتخونك مع عبده الكهربائي هيقول لهم ده لا كهربائي
ولا بيفهم حاجه في الكهربا .
...............................................................................................................................
Mohamed Hussein
2 أكتوبر 2015·
حلم غريب
.
في العاده بتفوت عليا ليالي كتير مابحلمش
فيها , و لو حلمت مابعرفشي تفاصيل للحلم أو أشخاص واضحين إنما بيكون فيه مضمون أو عنوان
للحلم ده .
.
امبارح بقى و على غير العاده و مش عارف
سبب , حلمت حلمين ورا بعض , قمت في النص بينهم شربت مايه , يعني حلم و بعدين بؤ مايه
و بعدين حلم تاني , الحلم الأولاني كان فيه الزمالك بيلاعب النجم الساحلي في ماتش العوده
و اتعادلو 1/1 , و في الحلم التاني ( بعد بؤ المايه ) كان برضه الزمالك بيلاعب النجم
في العوده , في الحلم التاني مكانوش بيلعبو كوره كانو بيلعبو لعبه غريبه كده في ملعب
اخضر برضه , الأغرب ان فيه 2 لاعيبه من الزمالك مش فاكر هما مين كان واحد فيهم بيلعب
ب ( عكاز ) و التاني قاعد على كرسي متحرك و بيلعب ( دي رساله يا مارد ) , هههههههههههههههههه
أه و الله , المهم اتغلبنا في حلم الإعاده ده 4/1 في القاهره ( ما كان لازم نتغلب
) , انا طبعا بعد ما قمت مفزوع و فضلت ألملم شتات ذهني كده و افتكرت إني مش ( على ابن
أبي طالب ) و لا مولانا الشعراوي , و إن الأحلام بتجيب معايا نتايج عكسيه في الواقع
, قمت ضحكت و قلت الحمد لله هنفوز و هنعدّي , بس أموت واعرف مين كان بيلعب على عكاز
( ده أكيد الشناوي ) و طبعا أبو كرسي متحرك ده حبيب قلبي حماده طلبه .
....................................................................................................................................
Mohamed Hussein
2 أكتوبر 2015·
يا ترى فيه كام بنت في مصر تخيلت نفسها
قبل الجواز في مشهد زبيده ثروت لما كانت قاعده على كرسي خرزان من ابو 400 جنيه في الفرنده
جنب الشجر و عبد الحليم حافظ جاي من وراها يغني لها ( بأمر الحب ) ؟ , و بعد الجواز
لا لقت عبد الحليم ولا الفرنده ولا حتى الكرسي الخرزان أبو 400 , و لقت نفسها في مشهد
الخناقه عالريموت كونترول , هي هتموت و تشوف المسلسل و هو هيتجنن و يشوف الماتش
!!.
......................................................................................................................................
ليست هناك تعليقات:
إرسال تعليق