Mohamed
Hussein
16
يوليو 2015·
في العيد بلاش
تتكلم ولا تفكر في السياسه , حاول تفرح و بس و تفرّح اللي حواليك كلهم , لو قابلت طفل
صغير ادي له عيديه رمزيه ولو 5 جنيه و بلونه و زماره هيفرح بيهم اوي , و لو قابلت طفله
اديلها توكه هديه لونها روز أو بامبي هتفرحها جدا , ولو قابلت اخوانجي طبطب عليه و
قوله مرسي راجع .
.....................................................................................................................................
Mohamed
Hussein
16
يوليو 2015·
راجل كبير في السن
ساكن قريب من الصيدليه ماعرفش اسمه فكل مره اقول له يا حاج و خلاص , بيجي ياخد دواه
بهدوء و يمشي , بس جالي أول يوم في رمضان مخصوص عشان يقولي كل سنه و انت طيب , النهارده
جه هو و مراته أول ناس عشان يقولو عيد سعيد , النهارده بس عرفت اسمه , اسمه الحاج جرجس
.
.
كل سنه و انتو
طيبين يا أهل مصر و حبايبها .
......................................................................................................................................
Mohamed
Hussein
16
يوليو 2015·
باقي عالحلو نقطه
, نقطه ناخدها من الأهلي و نتصور جنب درع الدوري قدام لاعيبة الأهلي و نغيظ عمك عزيز
و احمد شوبير .
.
و ينزل مشهد النهايه
بصوت ريهام سعيد و هي بتقول : شريف , حسام , عبد الله , تريزيجيه , حسام , عماد , نجيب
, وليد , عبد الظاهر , عمرو, صبري ................ كل دول مستنيين مساعدتكو .
................................................................................................................................
Mohamed
Hussein
15
يوليو 2015·
في شغلانتنا دي
مش بنحتاج حد يستطلع هلال العيد ولا حاجه , احنا بنعرف لوحدنا , أول ما نلاقي الإقبال
عالفياجرا و مثيلاتها زاد اوي و الشامبوهات و الشاور جيل وكريم فيت بيتنسفو ( عشان
الحُمّايه الكبيره ) , و العيال اياهم ييجو افواج يسألو عالسرنجات بنعرف ان العيد على
الأبواب , احنا دلوأتي في مرحلة السرنجات , مرحلة ( إديني في الطيلماني ) .
.
بعد بكره هندخل
مرحله جديده :
و الأسطوره بتقول
: إن الصيدليه اللي بتفتح أول يوم العيد بتبيع أنتينال و انتوسيد .
..........................................................................................................................
Mohamed
Hussein
15
يوليو 2015·
فقط في مصر
.
لو معاك مليون
جنيه و عايزهم يبقو 10 مليون تاجر في الدعاره .
.
لو معاك 100 الف
و عايزهم يبقو 10 مليون تاجر في السلاح .
.
لو معاك 10 الاف
و عايزهم يبقو 10 مليون تاجر في المخدرات .
.
لو مش معاك حاجه
خالص و عايزهم يبقو 10 ميلون تاجر في الدين .
................................................................................................................................
Mohamed
Hussein
15
يوليو 2015·
التعليم يا ريس
.
مدارس حكوميه و
تجريبي و تجريبي لغات و خاصه و خاصه لغات و انترناشونال و نُص انترناشونال و انترناشونال
الا ربع , جامعات خاصه و جامعات حكوميه و جامعات اجنبيه , كانتونات يعني , مناطق شعبيه
ومناطق عشوائيه و مناطق معقوله و مناطق نص نص و مناطق راقيه و كومباوندات , العزل بين
الناس , الشعب بقى 17 طبقه و مفيش 3 في البلد زي بعض , الغني قرفان من الفقير و الفقير
حاقد عالغني و عملية عزل بين طبقات الشعب بتتم لها تلاتين اربعين سنه .
.
انت ياد هتدرس
فلسفه وانت لا هتدرس فيزيا ولا اقولك خد انجليزي مستوى رفيع , ايه ده هو الواد ابنك
بيدرس لغه تالته الماني ولا موزمبيقي ؟ طب و التاريخ ؟ التاريخ يا سيد , هتحولي لبنتك
مدرسة ايه يا حاجه ؟ لا لا دي بتاخد الروسي مادة اجنبيه تانيه و انتي بنتك مش اد كده
في الروسي .
.
و اعمل حسابك يابو
العيال السنه الجايه الواد ابننا هيبقى في ثانويه عامه , يعني الفين تلاته في الشهر
للدروس , و انا اجيب منين يا عديله , ياخويا و انا مالي اتصرف ده مستقبل ابننا , و
اعمل حسابك كمان هنفضي الرسبشن عشان المدرسين , و المدرس ده طالع و ده نازل , عايز
انام ساعتين ياعديله ؟ تنام ازاي ؟ مدرس الأحياء جاي دلوأتي .
.
استر يارب , يا
ترى الواد ابننا هيجيب كام , دانا بعت الدهب بتاع مراتي كله , يارب اكرمنا بقى في الواد
, هو طب كان واخد من كام السنه اللي فاتت يا عديله ؟ طب و صيدله ؟ .
.
يوووووه الواد
جاب 96 بس نعمل ايه ؟ مفيش حل بقى يابو العيال غير انك تبيع حتة الأرض اللي في البلد
و ندخله جامعه خاصه , هنحتاج بتاع 300 ألف وربنا يعوض علينا , طب يا عديله ولما نبيع
حته الأرض اللي حيلتنا عشان الواد يكمل تعليمه هنعيش منين ؟ و هو لما يتخرج هيجيب ال
300 ألف في كام سنه ؟ ده ممكن يشتغل عمره كله مايعرفش يوفرهم , يووووووووه يا راجل
, انت عايز الناس تاكل وشي و و عنايات تبقى بنتها طلعت دكتوره و انا ابني لأ ؟! .
...........................
..........................
التعليييييييييييييييييييييييم
يا ريس , المعجنه الاكبر في مصر , قتل للإبداع و الموهبه , قتل للأسر بالبطي , قتل
للشباب و الأطفال , تدمير البيوت تحت داعي ( بنعلم العيال ) .
....................................................................................................................................
Mohamed
Hussein
14
يوليو 2015·
ألف مبروك لكل
أصحابي اللي عندهم اولاد نجحو في الثانويه العامه , واللي اكيد كانو على أعصابهم من
امبارح , أنا بعد 10 سنين بإذن الله هقعد نفس القاعده بتاعتكو دي و هيبقى عرقي مرقي
, و الله بدأت اتوتر من دلوأتي و افكّر يا ترى لوجي بنتي اللي في تانيه ابتدائي جابت
كام في الثانويه العامه ؟
.
دي مش ثانويه عامه
يا جدعان , دي جبهه و كلنا مرميين فيها ( فرض عين ) و غصب عننا هنحارب .
.................................................................................................................................
Mohamed
Hussein
14
يوليو 2015·
من سنين وانا بقول
الصراع بين ايران و امريكا و بين ايران والسرائيل هو صراع فستك , حاجه كده تُدرّس في
علم البلاله .
.
و في سنة ( ما
لانهايه ) يا مؤمن هتوجه ايران صواريخها ناحية تل ابيب , و في سنة ( مالا نهايه +1
) هتحارب اسرائيل ايران , و بعدها لوحة النهايه تنزل و انور وجدي يتجوز ليلى مراد
.
.
ايران من جهه و
دول الخليج النفطيه من جهه هما مجرد عروستين ماريونايت في ايد الأمريكان , يحركهما
كيف يشاء وقتما يشتاء .
.
الكلام بقى عن
الممانعه و التصدي و الصمود و الكرامه و تحرير القدس على يد دولة الفرس بسمعه بالظبط
زي كلام ريري سيلان عن الشرف و كلام الإخوان عن الأمانه .
.
دور أحمد بدير
في مسلسل استاذ و رئيس قسم محبوك كتير عن دور ايران في مسلسل الصراع الوهمي مع الصهاينه
و الأمريكان .
.
اديني واحد اتفاق
نووي و هات بالباقي ممانعه و صمود و اضحك عشان الصوره تطلع حلوه .
............................................................................................................................
Mohamed
Hussein
13
يوليو 2015·
خالد علي , عمرو
حمزاوي , سليم العوا , خيرت الشاطر , ابو اسحاق الحويني , وائل غنيم , عصام سلطان
, محمد حسان , احمد المغير , مصطفى النجار , محمد بديع , صبحي صالح , و الواد الأقرع
بتاع 6 ابريل مش فاكر اسمه , و البت مروه الشاطره اللهلوبه .
.
فقيه دستوري ,
ناشط سياسي , استاذ العلوم السياسيه , و معانا المتحدث الرسمي باسم الثوار , فقيه دستوري
تاني و ناشط سياسي كمان مره , انا و الله حسيت في لحظه ان مصر فيها فقهاء دستوريين
اكتر من بياعين الكشري , حزب ثورة الميدان , حزب ميدان الثوره , حركة ميدان التحرير
, حزب ميدان التحرير , ائتلاف شباب ميدان التحرير , ائتلاف شباب الثوره , ثوار ميدان
التحرير .
.
احنا نعمل دستور
, لأ لأ نعمل انتخابات الأول و بعدين دستور , طب ما نخليها دستور وانتخابات مع بعض
زي شبكه و كتب كتاب و يبقى خير البر عاجله طب ناخد رأي الفقيه الدستوري سلومه الأعور
, انزل لنا هنا باعلان دستوري في نصاص الليالي و عندك واحد دستورعلى مايه بيضا , يوه
هنعمل دستور تاني , خد لك سيف , كمان سيف , اهبدني الدستور قصدي التسعه .
.
أسماء و مسميات
و حركات و حبشتكانات , كنا بنسمعها 47 مره في اليوم , بينزلو لنا حتى من الحنفيه في
سنين الهبل و المعجنه , أيام الطاحونه و الماكنه اللي عمرها ما طلّعت قماش , من فضل
الله و فضل ثورة 30 يونيو بعد ربنا اننا مابقيناش نسمع عنهم .
.
كانت صفحه هباب
و حرقناها .
...................................................................................................................................
Mohamed
Hussein
13
يوليو 2015·
لمار : بابا انا
مش عايزه للعيد طقم واحد , انا عايزه وان تو ثري فور فايف ( بتعد على صوابعها ) .
.
أنا : بس بس ,
ليه ؟ انتي فاكره نفسك بنت طاهر القويري ولا فاكره ابوكي ناشط سياسي من اللي بيطلعو
في الجزيره و الساعه بألفين دولار ؟ هما وان تو بس و خلي التلاته الباقيين عشان خاطر
مصر .
..................................................................................................................................
Mohamed
Hussein
13
يوليو 2015·
اضحك مع المصريين
.
بيجيلي اقتراحات
صداقه عالصفحه , عالشمال كده و انت داخل برجلك اليمين , من ضمنها بتبقى أكاونتات لبنات
أجانب , اللي من موزمبيق و اللي من البرازيل و اللي من السويد , ماعرفشي الطلبات دي
بتترمي في صفحتي ازاي وليه .
.
المهم بتفاجئ ان
تحت كل اكاونت فيهم الاقي فيه بينا أصدقاء مشتركين , مره 10 اصدقاء و مره 25 زي ما
يكونو , افتح الأكاونت المجهول ده ألاقي مثلا بنت يونانيه حاطه صورتها , بتتكلم يوناني
وعايشه في اليونان و مولوده فيها و بطاقتها طالعه من سجل مدني أثينا و كل حاجه متستفه
زي الفل , حتى التعليقات اللي عالصوره يوناني , و مع ذلك لا يخلو الامر من المصريين
بقى ( اللي عندي في الأصدقاء ) و راشقين في أي مصلحه , تلاقي اللي كاتب بالعربي : اللهم
صل عالنبي , ايه الحلاوه دي , و اللي كاتب يا أرض احفظي ما عليكي , جميل أوي الفستان
ده , أيوه بقى الصوره دي احلى بكتير من اللي فاتت .
.
احنا أصلنا شعب
حنين اوي ( حونين ) ولا موضوع اللغات ده بيفرق معانا , و الله مابيفرق معانا , هنقول
البؤين عالصوره يعني هنقول البؤين , أومال يعني نشوف صوره مزه حلوه و مانعبّرش عن شعورنا
و مشاعرنا و شعر صدرنا ؟ .
.....................................................................................................................................
Mohamed
Hussein
13
يوليو 2015·
قوانين الواد ياسر
.
كان معايا عسكري
في الجيش اسمه ياسر , مابيحبش يلعب كوتشينه عشان مابيحبش يخسر , طب و انا زهقان هعمل
ايه ؟ بجيبه و اقول له هتلعب يعني هتلعب يقوم ياسر يقولي اوكيه بس انا ليا قوانين في
اللعب موافق عليها ؟ أقول له عارفها و موافق .
.
طب ايه هي قوانين
ياسر و بيعمل ايه بالظبط ؟ بص يا سيدي , ياسر بيقولك هنلعب لعبة ( بيع و اشتري ) أقول
له أوكيه , يقوم ماسك الكوتشينه ( 52 ورقه ) و شايل منها الصور ( الولد و الشايب و
البنت 12 ورقه ) و يقوم مديني ولد واحد و شايب واحد و بنت واحده و ياخد هو 3 من كل
نوع , و بقية الكوتشينه ( 40 ورقه ) يقسمهم قسمة العدل !! , ياخد هو 28 ورقه وانا
12 .و يتفق معايا بقى , بص يا دكتور انا لو جالي ورقه تقش هقش وانت لو جالك ورقه تقش
انا برضه اللي هقش مش انت .
.
وانا تحت داعي
الزهق كنت بوافق و يغلبني كل مره بقوانينه دي لحد ما صعب عليا ياسر و قررت اني ( اتبناه
) و مازعلش من قوانينه في لعبة الكوتشينه واخد الموضوع بهزار و صدر رحب .
.
موضوع الواد ياسر
ده بيفكرني بالأحزاب اللي طلعت بعد الثوره بتاعة ( خُلقنا للننسحب ) , أهي الأحزاب
دي بالظبط عامله زي ياسر و عايزه تلعب ديموقراطيه بقوانينها هي والا مش لاعبه , تقسيم
الدواير مش عاجبنا و قانون الإنتخابات مش اد كده , و احنا مش عايزين فلان يترشح ولا
علان , احنا اللي نقول مين يترشح و مين لأ , و لو احنا فوزنا نبقى احنا الفايزين و
لو حد غيرنا فاز نبقى برضه احنا الفايزين عشان احنا بنمثل الثوره و الثوره لازم تحكم
, هه ؟ عاجبكو ولا ننسحب ؟
.
أهو انا خايف من
كتر الزهق اللي احنا فيه تقوم الحكومه تقرر انها تتبنى الأحزاب دي زي مانا اتبنيت الواد
ياسر زمان .
.......................................................................................................................................
Mohamed
Hussein
12
يوليو 2015·
تأريخ ل 3 سنين
من العك
.
اعتقادي مسلسل
استاذ و رئيس قسم هيكون أفضل تأريخ لل 3 سنين اللي فاتو قبل ثورة يونيو , يوسف معاطي
تفوق على نفسه , كل النماذج موجوده , ربط بينها يوسف معاطي بشكل درامي رائع , الثائر
الحق و الثائر الزلنطجي و اليساري اللي مابيبعش و اليساري اللي بيبيع و الفلولي النصاب
و الفلولي اللي راح في الرجلين و الإخوانجي الحلنجي أبو 7 ورقات و السلفنجي اللي بياكل
على كل الموائد و الإنتهازي الوصولي بتاع كله .
و الأقباط و الهويه
و تراب مصر و الإنفلات الأمني و خلط الدين بالسياسه و اللي اتحجبت فجأه و البيوت اللي
انهارت بسبب السياسه , و اللي اتسجن ظلم , و الظابط ابن الحلال و الظابط ابن النظام
و حتى الوضع في سوريا و الثوره اللي اتحولت لخراب و الشعب الأبي اللي اتهجر في بلاد
الله .
.
و كنت توقعت من
بداية المسلسل ان عادل امام هيغير كتير من معتقداته و هيفهم ان الفكر الثوري يبقى حلو
و جميل في حاله واحده بس ( لو مفيش تعلب واقف وراك بيوجهك أو حد ابن حرام عامل حفره
قدامك و مغمّي عنيك و بيزقك ناحيتها ) .
.
نهاية المسلسل
الحتميه هتكون بانتصار الشعب و الهويه و التراب #ثورة_30_يونيو .
.............................................................................................................................
Mohamed
Hussein
11
يوليو 2015·
الف مبروك لمصر
و الزمالك .. عملنا ماتش نستاهل عليه البطوله .. لاعيبة الزمالك بقو رجاله في الملعب
و بياكلو النجيله .. بركاتك يا مولانا مورتا .
.
الاهلاوي الجدع
هيبارك للزمالك عالاداء و النتيجه و الاهلاوي التاني ممكن يقول مدرب اورلاندو زملكاوي
و مفوت الماتش للزمالك .
......................................................................................................................................
Mohamed
Hussein
10
يوليو 2015·
ماهو بالتأكيد
و من المؤكد و مما لاشك فيه إن عمر الشريف الله يرحمه مكانشي بيأيد مرسي البهلول و
أكيد لو اتسأل عن الإخوان كان هيقول بطريقته الجريئه : شوية زلنطحيه و صيع و كدابين
زفه .
عشان كده لما يموت
عمر الشريف الفنان العالمي الموهوب المبدع العبقري اللي تاريخه الفني من أول صراع في
الوادي لحد الأراجوز و المواطن مصري بيقول انه موهبه مش هتتكرر تاني , اكيد الإخوان
هيقولو عليه خمورجي و بتاع نسوان و هيكتبو بقى عن اخلاقه و انزل لنا يابني بالأيه بتاعه
( و من يبتغي غير الإسلام دينا ) مع شويه احاديث و تحابيش بقى .
.
طب تخيل مثلا مثلا
,يا سيدي بقول مثلا , ان عمر الشريف ده كان أعلن تأييده للإخوان !! , يا سنه هباب
, كان زمان صفحاتهم دلوأتي مليانه بالرحمات عالفنان المبدع الموهوب اللي كان سفير لمصر
فوق العاده , و انزل لنا يابني هنا بالأيه بتاعة ( لكم دينكم و لي دين ) مع بوست عن
ان ربنا اللي بيحاسب الناس عن أخلاقها مش احنا , و حط الحته الحلوه دي ( مش جايز كان
بيعمل خير كتير في دنيته واحنا مانعرفش و جايز تاب قبل مايموت ؟ ماهو ربك قادر على
كل شئ ) .
.
هو انا ليه مش
بتفاجئ برد فعل خرفان بديعه ؟ و ليه عندي قناعه تامه ان التجاره بدين ربنا أوسخ مليون
مره من الدعاره و تجارة المخدرات ؟
.
إنها لا تعمى الأبصار
و لكن تعمى القلوب التي في الصدور .
.................................................................................................................................
Mohamed
Hussein
10
يوليو 2015·
لو فات عليك
23 يوم في رمضان و في الحر ده و انت ماخدتش بالك ان الكهربا ماقطعتش خالص رغم الحمل
الرهيب عليها تبقى انت اكيد اخوانجي او كولجي .
.
و لو كنت فاهم
أو شايف ان السبب في عدم انقطاع الكهربا هو ان السيسي قبض عالواد اللي بياخد 20 ج و
ينزل السكينه و كتّفه من ايديه و ربطه في رجل السرير يبقى انت بالتأكيد لازم تغير النضاره
او بمعنى أصح تغير الجمجمه .
.......................................................................................................................
Mohamed
Hussein
10
يوليو 2015·
البقاء لله وحده
, عمر الشريف / سامي العدل / سعود الفيصل ..في 24 ساعه , لكل أجلٍ كتاب .
...........................................................................................................................
Mohamed
Hussein
10
يوليو 2015·
النهارده ممكن
تكون ليلة القدر , ادعو لمصر ربنا يحفظها من شر اعدائها اللي بره و جوه و ادعولي الاقي
شنطه سمسونايت سوده فيها 2 مليون دولار أو 7450 جنيه و مايوه جديد في الكيس بتاعه و
سناره و كوز دره مشوي و سخن و صورة صوفيا لورين .
................................................................................................................................
ليست هناك تعليقات:
إرسال تعليق