Mohamed
Hussein
23
يوليو 2015·
وانا بلفّ عالفيس
شوفت ماشاء الله تبارك الله , تحليلات لثورة 23 يوليو من نوع التحليلات اللي تجيب دوسنتاريا
, أه و عهد الله دوسنتاريا و انكلستوما كمان .
.
ده مش ممكن يكون
تقييم سياسي عقلاني ولا مناظره ( فكريه ), ده معمل البرج فتح فرع جديد عالفيس بوك و
جاب ( فكريه ) عشان يحلل لها .
.
بقى عبد الناصر
خرب الدنيا و انقلب على الملك الكيوت اللي كان مقطّع حُصر الجامع ؟ هما الإخوان بيركبوكو
حتى في كتاب التاريخ ؟ يعني انتو بتتركبو من زمان اوي كده ؟ و دي ايه بقى ؟ معركة لمون
جديده بأثر رجعي ؟! يكونشي عبد الناصر كان فلول و سرق منكو ثورة 23 يوليو و الإخوان
كانو رفقاء الميدان ياولاد الوارمه ؟.
.......................................................................................................................................
Mohamed
Hussein
23
يوليو 2015·
و انا صغير أوي
بتاع 7 سنين كده او 8 بالكتير كنت بشتغل راعي غنم مع سيدي (جدي) الله يرحمه , و رغم
ان جدي ده كان عنده بتاع 30 حفيد في بيت واحد بس هو اختارني انا و مات جدي قبل ماكبر
انا و اسأله اختارتني ليه ؟ يعني اشمعنى انا بالذات ؟ هل كان فيا مؤهلات معينه تناسب
ال job description بتاع راعي الغنم ؟ .
.
المهم قطيع الغنم
بتاعنا كان فيه حوالي 40 راس , ما بين خروف كبير و نعجه و حولي صغير , و الحولي كنت
بشيله على صدري وامشي بيه لحد ما نوصل المرعى , و كل يومين تلاته في الصيف ننزّل الغنم
في الترعه يستحمو و انزل انا معاهم , و في المرعى نسيب الغنم ترعى براحتها و اقف انا
على جنب بعصاية صغيره على أدي , و اثناء مانا واقف أدوّر في الأرض خصوصا لو أرض كانت
مزروعه دره , جايز الاقي كوز دره ناشف او بعبوله منسيين في الأرض و اقوم مفرّطه كده
و مأكله للخروف في كف ايدي .
.
أتاريني بقيت واحد
من القوى العامله و خدت title في سن مبكره جدا و المفروض
اكتب الحكايه دي في ال c.v.
بتاعي .
....................................
....................................
لما لمار بنتي
بتحب تذاكر أو تراجع الكلمات اللي تعرفها قدامي و تيجي عند كلمة خروف و تقولي يا بابا
خروف يعني شيب و خروف صغير نونو يعني لامب , عارف ال شيب و اللامب ؟ و انا أقول لها
: إلا عارفهم !! .
.............................................................................................................................
Mohamed
Hussein
23
يوليو 2015·
بتخيل في الأخره
كده لما ادخل الجنه بإذن الله ( مانا عشمي في ربنا كبير ) , المهم في الجنه بقى أكيد
هقابل واحد من المؤمنين اللي حضرو ايام الفراعنه و سيدنا موسى و أكيد هقابل مسلم من
اللي حضر وفاة سيدنا على ابن أبي طالب و ممكن يدور بينا حوار عن الشر و الخداع اللي
شوفناه في الدنيا .
......................................
المؤمن أيام سيدنا
موسى : أنا حضرت أيام السحره بتوع فرعون لما كانو بيرمو العصايا و الناس تتخيلها تعبان
و يترعبو .
.
و المؤمن أيام
سيدنا علي : و انا حضرت أيام الناس اللي قتلت سيدنا علي ابن عم سيدنا النبي و جوز بنته
و شوفت الناس دي و هي متخيله انها عملت عمل ايماني عظيم لوجه الله تعالى .
.
وانا هقول لهم
: و انا حضرت أيام الإخوان و قناة الجزيره .
................................................................................................................................
Mohamed
Hussein
23
يوليو 2015·
حكاية محمود و
جهاد و عم سالم .
.
محمود شاب إخوانجي
كيوت , بيشتغل دكتور , ضاكتووور , و دكتور إخوانجي يعني دماغه أنضف من الصيني بعد غسيله
و جهاد مهندس بس من بتوع يسقط أي حاجه في أي حته يعني برضه أبيض يا ورد .
.
محمود و جهاد انقابلو
النهارده الصبح عالقهوه , و بما إن النهارده 23 يوليو فأكيد السيره اتفتحت , و هات
بقى كيس بلاستيك اسود بتاع زباله عشان تعبّي الكلام اللي هيتقال , محمود افتكر جمال
عبد الناصر الشيوعي الكافر اللي عذب الإخوان الكيوت بتوع الشعر الرومانسي و الموسيقى
الكلاسيك و جهاد اترحم على أيام الملكيه , الأيام اللي فيها مصر كانت بتصنع القنبله
الذريه و الطيارات النفاثه و طبعا الصناعات دي كلها انضربت على ايد عبد الناصر .
.
محمود قال لجهاد
, و من ضمن كوارث عبد الناصر كمان هي حكاية تأميم القناه دي اللي كلفتنا حروب مالهاش
اي لازمه مع ان الحكايه كلها كانت فركة كعب و تنتهي سيطرة فرنسا عالقناه , جهاد قال
لمحمود أنا واثق ان فرنسا كانت هترجع لنا مفتاح القناه يوميها و معاه بوسه و شهاده
تقدير و ساندوتشين بسطرمه و بنطلون ستريتش .
.
و فجأه افتكرو
هما الإتنين حكاية قناة السويس الجديده , اللي هتتفتح بعد كام يوم , محمود قال لجهاد
, المصريين الكفره فرحانين بالترعه اللي عملها السيسي , جهاد ضحك و قال له ترعه و الله
ترعه يا صاحبي , و يادوب يعدي فيها مركب صيد و فلوكه .
.
عم سالم المدير
في وزارة التربيه و التعليم اللي طلع معاش كان قاعد في الترابيزه اللي جنبهم و سمع
الحوار بتاع كيس الزباله , قام قرب منهم و قال لهم : بالكو يا بهوات , انتو معاكو حق
, فرنسا دي زيها زي كل القوى الإستعماريه كانت هتصدق في وعدها و هكذا يفعل المستعمرون
, مش كده ولا ايه ؟ و قناة السويس الجديده اللي أبهرت العالم هي ترعه مش اكتر و طبعا
السد العالي بتاع عبد الناصر ده مجرد كوبري مشاه , و عارفين انتو الإتنين تحديدا بتشتغلو
دكتور و مهندس اهو مع ان اهاليكو غلابه اوي و مكانش حيلتهم اللضا , و لولاش ثورة عبد
الناصر كان زمانكو بتشتغلو ايه ؟ أكيد كنتو هتبقو من الأعيان و البشوات , لا طبعا مش
كلافين في سراية الباشا زي أجدادكو ولا بتنضربو بالكرباج .
.
رحم الله الزعيم
جمال عبد الناصر .
............................................................................................................................
Mohamed
Hussein
22
يوليو 2015·
حركة الجهاد الفلسطيني
: لا غنى عن الدور المصري في ملف المصالحه !! .
.
لا يا سيدي الله
الغني , اتصالحو بعيد عننا ( ده لو كنتو عايزين تتصالحو اساسا ) , و احنا مش عايزين
دور , زهقنا من الدور الممل ده , انتو اساسا مابيتمرش فيكوحاجه حتى لو عملنا خدنا مداس
, كلكو صناعة موساد باختلاف شكل الدقن و اللبس و الكوفيه , الحكايه بالنسبالكو سبوبه
, تحرير القدس و المصالحه الفلسطيزفت , و هنجاهد هنحارب هنقاوم و أغاني و أفلام و حبشتكانات
, دانتو لو مُحتلّين من مخلوقات فضائيه كان زمانكو حررتو بلدكو , بس تحرروها ليه ؟
و السبوبه تروح فين ؟ يعني لو حررتوها هتشحتو على مين ؟ .
.
حكايه بقت عامله
زي حلة الطبيخ البايت و قضيه بقت ماسخه شبه تامر هجرس و ريهام سعيد .
............................................................................................................................
Mohamed
Hussein
22
يوليو 2015·
الرافال طارت امبارح
فوق الجيزه قامت عملت ازعاج جامد لأحمد منصور في الدوحه !! , سبحانك يارب , و إيه اللي
جاب القلعه جنب البحر ؟ .
.
و كتب احمد منصور
المنظر الإخوانجي اللي هو أكبر دليل على ان الجماعه دي أذكاهم حمار , كتب إن مصر اشترت
الرافال من فرنسا عشان تقتل بيه شعبها ( شوفت الكلام يا جدع ؟ ) , مع ان الرافال تحديدا
مش بتستخدم داخل حدود الدوله إلا فيما ندر و بيبقى الغرض منها الشطحات البعيده , يعني
مشوار لليمن مشوار لليبيا , طلعه ناحية السودان و كده يعني , و كتب الحمار الإخوانجي
المثقف ان بشار اشترى ميج من روسيا عشان يقتل شعبه برضه و ماعرفشي مين اشترى ايه من
فين عشان يقتل شعبه , وبكده يبقى فيه تحالف بين رؤساء الدول العربيه و بين الغرب الكافر
ابن الحرام .
.
مع ان احمد منصور
لو فتح شباك أوضة نومة هيلاقي الأمريكان بذات نفسهم بعساكرهم و سلاحهم و طياراتهم و
فياجرتهم قاعدين وقالعين و مراقبين مؤخرته و مؤخرة موزه و ابنها و بيحموها , أو يحمّوها
( بتشديد الميم ) ............ تحالف ده ولا مش تحالف يا متعلم يا بتاع الجزيره ؟ لا
ده مش تحالف ده التصاق !! .
..................................................................................................................................
Mohamed
Hussein
22
يوليو 2015·
السيسي ساب الماتش
شغال و نزل يلف بالعجله بتاعته في مساكن شيراتون !! , أهو الخبر ده بينفي الإشاعه اللي
بتقول ان السيسي زملكاوي , و إلا كان زمانه اتفرج عالماتش و دمه فار و أصدر أول أمر
للرافال بضرب ميت عقبه .
.
الحمد لله انك
مش زملكاوي زي حالاتي يا سيسي , عشان مصر محتاجالك .
.............................................................................................................................
Mohamed
Hussein
21
يوليو 2015·
يا خرابي , الألش
نازل نازل علينا زي المطر من كل حته , عالصفحه و في الشات و المواقع الألكترونيه ,
أنا خايف افتح الحنفيه ألاقي الألش نازل منها , و سوف يأتيك الألش من حيث تترفع انت
على ان تتداخل معه .
.
طب اعمل ايه انا
دلوأتي بقى ؟ انا بقول استخبى أد يومين تلاته لحد ما الموجه دي تعدّي , بس استخبى فين
؟ اه في غيط الدره عايز غيط دره , هاتولي غيط دره .
.
و طبعا هكتب على
صفحتي زي عادة كل المجروحين أمثالي إني هغيب يومين عشان احضر مؤتمر طبي في سويسرا
.
.......................................................................................................................................
Mohamed
Hussein
21
يوليو 2015·
و حيث اني عارف
ان مرتضى منصور مكار و دوقرم و عُقر فانا متوقع منه انه يعمل حركة تمويه جباره و يسيب
الدوري للأهلي , و النبي مكار و يعملها .
.
الزمالكاويه يعملو
أد لبعض , احنا مجروحين يا رجاله , خش في لحم أخوك يا جدع .
.
مع تحيات : حملة
اتريأ على نفسك بنفسك عشان الأهلاويه مايتريقوش عليك
.....................................................................................................................................
Mohamed
Hussein
21
يوليو 2015·
هيييييييييييييح
خسرنا الماتش و خدوها مني كلمه ( خسرنا الدوري ) , وابقو خلو مرتضى منصور يحنّى مناخيره
بقى بلاش الكلمه التانيه , نقل التوتر للفريق و الجهاز الفني , انا حاسس من أول الماتش
ان الزمالك ماجاش ...مبروك يا أهلاويه , ابدأو الحفله بقى علينا و الألش , حقكو و الله
.
..................................................................................................................................
Mohamed
Hussein
21
يوليو 2015·
تنبيه هام جدا
.
- ماتش الأهلي
و الزمالك هيتلعب النهارده بإذن الله الساعه 8 في ستاد برج العرب , و الماتش من غير
جمهور , يعني بدون جمهور يعني ويزأوت جمهور , اظن الكلام واضح أهو يعني كلير .
.
- الماتش مش متشفر
ولا حاجه , يعني حضرتي و حضرتك نقدر نشوفه على 7 الاف قناه مختلفه , في تلفزيون البيت
أو عالقهوه أو عند ست أم شوشو جارتكو أو عاللاب أو الموبايل او حتى تسمعه في الراديو
.
.
- تقولي بقى أصل
رفعت الفناجيلي كان موصيني مافوتش ولا ماتش للاهلي , أصل طه بصري جالي في المنام و
قالي قوم ياحمد شجع الزمالك من المدرجات ولا الهوا .
.
- حضرتك , او اخوك
او ابنك او جوز خالتك او جارك أو صاحبك قرر فجأه انه يعمل نفسه فلوطه و يروح ستاد برج
العرب فانا بقى كبني أدم سو كيوت فشر عمرو حمزاوي بقول ان الحل معاه هوالإعتقال فورا
و لو قاوم يبقى الضرب بالنار و من غير ديه ولا شحتفه على روح شهيد رفعت الفناجيلي و
طه بصري .
.
- مصر أهم من الكوره
و الهبل , هنشجع و نتعصب و نقول يارب باسم مرسي يجيب 17 جون أو عمرو جمال يعمل حصاله
عند الشناوي بس و احنا قاعدين في بيوتنا .
.
إيدك ماتبقاش طريه
يا حكومه , مش عايزينها ايد هياتم , المشجع اللي هيقدر يوصل للمدرجات ممكن يرتكب كارثه
و عالهوا مباشرة قدام العالم كله , واحنا بنلصّم نفسنا بالعافيه , فاهم يا عم ابراهيم
؟ .
...............................................................................................................................
Mohamed
Hussein
21
يوليو 2015·
أهو فهمي هويدي
ده كان من ضمن الفطشات الكبيره اللي عشنا و اتمرمعنا فيها سنين طويله , و قالك الكاتب
الكبير اوي فهمي هويدي , و الكاتب الكبير راح و الكاتب الكبير جه و لو سمحت يا أستاذ
حضرتك ماشوفتش الكاتب الكبير ماشي من هنا ؟ و النبي يا عمنا ماشربشي عندك الكاتب الكبير
عصير برتقان ؟! .
.
و في النهايه طلع
زيه زي أي كلب بيتباع عادي ,ده سوق كبير يعني عرض و طلب , كل الحكايه ان الكلاب أنواع
و كل نوع له تمنه , يعني فيها البلدي وكلاب الشوارع و الروت وايلر و البيت بول , وفيه
الكلب أبو دقن و جلابيه و شبشب و الكلب أبو بدله و كرافته و الكلب ابو بنطلون جينز
و كوتشي و كوفيه فلسطيني , فهمي هويدي يعجن و يقبض و نادر بكار ياخد منحه مجانيه لهارفارد
و أحمد المغير فجأه يلاقي فلوس كتير يلبس و ياكل و بالمرّه يستحمى .
.
وله يا عرفه ,
عارف احنا ليه فقريين و هنموت فقريين ؟ عشان احنا مابنتبعش يا وله , مالناش سوق يا
عرفه .
.............................................................................................................................
Mohamed
Hussein
21
يوليو 2015·
ماينفعش المتحرش
ينضرب بالقلم , ده اسمه اهمال و تسيب , المتحرش ده له حقوق و الدوله لازم تراعيها
, المفروض يتقدم لمحاكمه عادله قدام قاضيه الطبيعي و يجيب المحامي بتاعه و المحامي
يثبت ان موكله أثناء وقوع الجريمه كان في الأردن او يفنّد القضيه كلها عشان المحضر
مكتوب فيه ان المتحرش كان بيلمس و يحسس و يملّس بإيده اليمين و هو في الحقيقه كان بيعمل
كده بإيده الشمال ( يعني ظلمتي الشاب ابن الناس يا حكومه ) , و بعدها القاضي يحكم بالبراءه
و المحامي ياخد المتحرش في حضنه و يطلعو من باب المحكمه و سط زغاريط و فرحة أهل و أصدقاء
السيد المتحرش الرسمي .
.
الله بقى ؟ إذا
كنا بنعمل كده مع الإرهابيين , جت يعني عالشاب المتحرش اللي هو أمل مصر وزهرتها و طاقة
النور بتاعة بكره ؟ يوسف الحسيني معاه كل حق و الحق كله و حقك عليا انا يا جو , أنا
اللي ماتربيتش يا سيدي , و وعد مني هبعت طلب لمعالي رئيس الوزرا لترسيخ مبدأ حقوق المتحرشين
, و بكره بإذن واحد أحد حقوق المتحرشين دي تنزل في تنسيق الجامعات و تاخد مجموع اكبر
من حقوق عين شمس و حقوق الزقازيق .
.
ثوره بقى و ربيع
و كداهون .
................................................................................................................................
Mohamed
Hussein
21
يوليو 2015·
الأغنيه اللي جماهير
الزمالك عاملينها عشان يحتفلو بالدوري بيها ( في التالته يمين ) , أهي الأغنيه دي اللي
ألفها و اللي عمل لها الموسيقى و اللي عمل لها التوزيع و مغنيها و بائعها و شاربها
يستحقو الضرب بالنار .
.
دي مش اغنية جماهير
عشان تحمسهم و يهتفو بيها في المدرجات , دي اغنية اتنين حبّيبه يرقصو عليها سلو في
الأوضه بتاعتهم في ستيلا دي ماري بتاع العين السخنه , أو تنفع كويس أوي موسيقى تصويريه
لبرنامج همسة عتاب .
............................................................................................................................
Mohamed
Hussein
20
يوليو 2015·
مجلس الأمن وافق
عالمشروع النووي الإيراني , يعني ايران بقى عندها مشروع نووي شرعي و رسمي و متوثق في
الشهر العقاري , يعني تقدر تقول إن ايران بقت دوله نوويه , نبويه مين يا عم ؟ بقولك
نوويه , نبويه دي تبقى خالتك .
.
و الملك سلمان
قابل وفد حماس ( حصل بس السعوديه هتنكر زي المعلم هرم في فيلم الكيت كات ) , و بعدين
وفد حماس طلع عالدوحه و قابل القرضاوي عشان يفكرو في الشأن المصري أه و عهد الله المصري
مش الشأن الفلسطيني بتاع حماس ولا الشان القطري الصهيوني بتاع القرضاوي .
.
يبقى ايه بقى ؟
يبقى هنحارب الإرهاب و نطهر بلدنا و نبنيها بإيدينا , بنفسنا , ما حك جلدك مثل ظفرك
, و الكلام عن تحالفات مع زيد أو عبيد هيبقى زي النقش عالمايه , ما هو أصل العالم بعد
الربيع العربي حماده تاني خالص .....و حماده و ربيع الإتنين قاعدين على حِجر أمريكا
.
...................................................................................................................................
Mohamed
Hussein
20
يوليو 2015·
الناس بقت روحها
في مناخيرها و محدش راضي يعطس و يرتاح , السمع بقى تقيل و الإستيعاب كمان , تقول لهم
كفر الشيخ يقولك مالها شرم الشيخ فيها ايه ؟ نقول مخاوف أمنيه و حاطط ايدي على قلبي
و ربنا يستر في ماتش بكره , يقولك يا زملكاوي يا حاقد على الأهلي !! .
.
طب يا سيدي يارب
الأهلي و الزمالك الاتنين يفوزو بكره معرفشي ازاي بس أهي جمله حلو من اللي بتعجب الجماهير
يارب تعجبكو , و نبقى نعمل لكو أغنيه ميكس كده لزوم الإنتصار المزدوج : فريق كبير فريق
عظيم زملكاوي و عيلتي كلها زملكاويه .
.
إنما لو لا قدر
الله حصل أي شغب أو مناوشات أو سال دم عشان الإستاد قريب من القاهره و قريب أووووي
من اسكندريه هيبقى ذنبنا في رقبة مين ؟ خصوصا ان بوادر الشغب و القلق ظهرت من امبارح
, و الأجهزه الامنيه اعتذرت قبل كده عن استضافة الماتش في برج العرب و وافقت تحت ضغط
عشان الماتش يتلعب و ماتبقاش كارثه تانيه , هسيب حضرتك تجاوب أو لو مش عايز تجاوب ابقى
ارزعني شعارين من بتوع القيم و المبادئ .
.......................................................................................................................................
Mohamed
Hussein
19
يوليو 2015·
طيب قابل يا سيدي
و قعد معازيمك
.
الأهلي انتصر الأهلي
انتصر , افرحو يا عيال هللو يا ولاد , بس انتصر في ايه و لا مؤاخذه ؟ في انه ضغط لحد
أخر لحظه عشان مايلعبش في الجونه ؟ في ان الماتش يتلعب في اسكندريه ؟ برافو برافو ألف
ألف مبروك , انتصار كبير انتصار عظيم .
.
ده كمان انتصار
للقيم و المبادئ , أومااااااااااال , بس فين القيم و المبادئ سيادتك ؟ كل الحكايه ان
الماتش كان هيبقى في الجونه في الحر شويه , هو الحر ضد القيم و المبادئ ؟ يعني القيم
و المبادئ مخلوق شتوي بطبعه ؟ ولا يكونشي ملعب الجونه مدنس و نجس و اللي بناه الصهاينه
؟؟ و ملعب برج الغرب بيتغسل كل يوم بماية زمزم ؟ يابني اقعد على جنب , اقعددددددددددددد
على جنب .
.
أو تعالى و تخيل
المشهد , الجونه دي في الغردقه , محافظه بعيده و تأمينها سهل اوي , عدد سكانها اقل
من عدد سكان شارع شهاب في المهندسين , احكام السيطره الامنيه هناك هيبقى سهل , و البديل
بقى عشان نادي دين أم القيم و المبادئ نلعب في اسكندريه , في الطراوه , و أمنّي الماتش
يا حكومه و الا تبقى حكومه فاشله ( لازم ترجع بضهرك عالكرسي و تنجعص عند الجمله دي
) .
.
انما انت طبعا
فاهم ان فيه ارهاب في سينا ؟ وان الإخوان اغلبهم عنده جينات ارهابيه زي الفل ؟ و ان
قيادات الألتراس ( أهلاوي و زملكاوي ) الإتنين متباعين بيع و شرا من سنتين تلاته و
انت عارف مين الشاري ؟ بس أمنّي يا حكومه .
.
و لما يحصل تجمهر
قبل الإستداد بمسافه كبيره , و ناس تندس و ناس تسخّن و الجزيره تصور , و رصاصتين ماتعرف
جم منين في مناطق المفروض انها سكنيه , تبقى الحكومه فاشله و ماعرفتش تأمن ماتش ( برضه
لازم ترجع بضهرك وتنجعص و انت بتقول الجمله دي ).
.
كنت اتمنى الماتش
يتلعب في الجونه حتى لو الزمالك اتغلب مش في برج العرب و نغلب الأهلي بدستتين جوان
, يارب حد يفهم ان جوايا خوف مشروع .....اه نسيت اقول حاجه اخيره لأصدقائي الأهلاويه
, ألف مليون دشيليون مبروك على الإنتصار الساحق لنادي القيم و المبادئ .
................................................................................................................................
Mohamed
Hussein
19
يوليو 2015·
ماتش القمه
.......... و القمه يعني القمه , يعني من الشيفروليه و انت طالع !!.
.
قوم يا صالح يا
سليم شوف ولادك بيهببو ايه , وانا هحكي لك الحكايه , بقى احنا في ظروف امنيه ما يعلم
بيها الا ربنا , و استمرار مسابقة الدوري و لعب ماتش القمه ده له دلالات كبيره على
شوية استقرار سياسي و امني , المهم عشان ماطولش عليك , اتحاد الكوره بعت لكذا جهه يسألها
ينفع تستضيفو ماتش القمه عندكو ؟ اسكندريه رفضت و السويس رفضت و طبعا مديرية امن القاهره
رفضت , اللي وافقت هي مديرية امن البحر الأحمر على استضافة الماتش في الجونه , الزمالك
قال اوكيه الجونه الجونه داحنا حتى مستعدين نلاعب الأهلي على ملعب مختار التيتش !!
, مجلس ادارة الأهلي قال الجونه لا الجونه لا يمكن أبدا !! و بيهدد بالإنسحاب , ولادك
جابولك العار يا عم صالح يا كبير , مجلس ادارة لا يستحق انه يحكم نادي عريق ولا حتى
يدير مركز شباب مغاغه .
.
الموضوع قلب بشوية
كوميديا , ماهو مورتا ده له شطحات بنت لذين , وقال مورتا في أخر تصريحاته , انا حصلت
على موافقة الأمن على اقامة المباراه في ستاد بنها !! , بنها يا مورتا ؟! يعني القمه
الأكبر في الوطن العربي وأفريقيا نلعبها في بنها ؟! , طب و على ايه ؟ أنا كمان حصلت
على موافقة جهات امنيه على اقامة المباراه في السنبلاوين , و لو ضغطو عليا شويه ممكن
أقول لكو نلعبها عندنا في البلد ( في قريتنا يعني ) , فيه حته كده قدام الجامع جنب
الترعه كنا بنلعب فيها واحنا صغيرين 4/4 , و ممكن خواتي وولاد عمي يامنو الفريقين
, عليا النعمه لو حد قرب منهم نطخه بالنار .
.
ياريس عبد الفتاح
, انسحاب الأهلي من ماتش القمه أو عدم اقامتها هتكون له دلالات زي الزفت على الناحيه
الامنيه و الإستقرار , هيقولو مش عارفين يأمنّو ماتش , أنا بقى بترجاك بطلب من مواطن
مصري , أمر مباشر بلعب المباراه في ستاد القاهره و تحت تأمين القوات المسلحه , لازم
الرساله تكون واضحه و قويه , و طلب كمان ياريس , تاخد مجلس ادارة الأهلي تدعكهم في
الجيش اسبوعين عشان يسترجلو شويه .
.
الماتش لازم يتلعب
حتى لو الأهلي غلبنا عشره صفر , والله موافق .
...................................................................................................................................
Mohamed
Hussein
19
يوليو 2015·
لما كل كام يوم
يستشهد جندي و اتنين و تلاته من جيش مصر في حربه ضد الإرهاب في سينا , و لما هو معروف
ان الإرهابيين دول مش بينزلو من السما ولا بيطلعو من بطن الأرض و لما القاصي و الداني
يعرف ان قطاع غزه هو المحطه الأخيره اللي بيتم فيها اعداد الإرهابيين و تجهيزهم و سنفرتهم
و تسليحهم قبل معركتهم مع جيش مصر , و لما تكون حركة حماس مسيطره عالقطاع ده يعني الإرهابيين
بيتهربو لمصر بعلمهم و مباركتهم , و لما الملك سلمان يستضيف وفد حركة حماس الإرهابيه
يبقى ايه بقى ؟! .
.
يبقى نقول باختصار
, المملكه العربيه السعوديه الشقيقه دوله كبيره مش صغيره و لها حكومه و عندها التزامات
سياسيه معينه بشكل ما , يعني من حقها تستضيف زيد او عبيد , وفد من حماس ولا وفد من
اسرائيل مش مهم , المهم ان الملك سلمان اختار سكته , و سعودية سلمان غير سعودية عبد
الله .
.
ده حقهم وحالهم
و مالهم , و مَنْ حكم في ماله فما ظلم , بس احنا كمان مش دوله صغيره , احنا الدوله
الأكبر في التاريخ و الأكبر في الشرق الأوسط , مواقف السعوديه معانا ومواقفنا معاهم
مش هننساها , و حالة التشابك و التلاحم بين الشعبين المصري و السعودي مايقدرش حد يفكها
, إنما من حق النظام الحاكم في مصر إنه يعيد ترتيب أوراقه .
.
و إيه قول الملك
سلمان لو سمع خبر إن القاهره استضافت وفد من تنظيم الحوثيين اليمني اللي إيديه ملطخه
بدماء الجنود السعوديين ؟ طب هي الحكايه دي تختلف عن استضافه الرياض لوفد من حماس اللي
ايديه ملطخه بدم المصريين ؟! .ولا يعني عشان حماس بتقول هنحرر القدس و كداهون ؟ طب
ماحنا ممكن نبني مدينه في اليمن و نسميها مدينة القدس و نقول للحوثيين ارفعو شعار تحرير
القدس بتاعة اليمن و احنا نستضيفكو عندنا !! .
..........................................................................................................................
Mohamed
Hussein
18
يوليو 2015·
سهله الحكايه
.
احنا نقعد و نعيّد
و ناكل ترمس و سوداني و بيتي فور و نتلم مع بعض ونتصل بالقريب و الغريب و نقول له كل
سنه وانت طيب و نفسّح العيال و نجيب لهم بلالين و زمامير و مسدسات مايه و جيشنا العظيم
بيحارب الإرهاب في سينا حتى يوم العيد .
.
بنعرف نفرح و نحتفل
عشان ورانا رجاله .
...............................................................................................................................
Mohamed
Hussein
18
يوليو 2015·
يوم العيد
.
وصلت البلد يوم
العيد على 5 و تلت الصبح و طلعت جري عشان الحق صلاة العيد , الناس فارشين زي كل سنه
في ساحه واسعه عشان اهل البلد كلهم يصلو مع بعض , في مدخل الساحه لقيت ناس من الإخوان
واقفين يقابلو المصلين و يسلمو عليهم , قلت و ماله , سلمت و بوست , الناس دول تحديدا
و عالمستوى الشخصي بحبهم , و دخلت صليت , بعد الصلاه مشيت على طول و ماعرفتش اللي حصل
.
.
بعد كده عرفت ان
حصلت خناقه في خطبة العيد , الشيخ طلع يخطب عن الوحده و نبذ الخلافات و كلام حلو يعني
, و ان مفيش تحزب في الإسلام , طبعا الكام اخوانجي اللي حاضرين الصلاه هاجو و ماجو
و زعقو وعكو الدنيا , و اللي زود الطين بله انهم خلو الشيخ بيخطب و قام واحد منهم يصور
و طبعا الصوره ماتحلاش من غير اشارة رابعه , و بالتأكيد الصوره هتنزل عالنت و تحتها
عنوان جموع الإخوان ومؤيدين الشرعيه يؤدون صلاة العيد بساحة مسجد كذا !! و مش بعيد
تطلع في الجزيره , مع اني كنت واحد من الجموع دي , ومع ان الإخوانجيه اللي كانو حاضرين
من وسط 800 مصلي مثلا مايجوش عشرين تلاتين واحد .
, الشيخ مشكورا
طلب من الولد اللي بيصور انه يقعد و طبعا الإخوان هاجو برضه .
.
اخر النهار قعدت
مع ابن عمي اللي بحبه جدا و معرفشي قلب اخوانجي كده ليه , المهم السيره اتفتحت و المحصله
كالتالي : الجيش و المخابرات هما اللي قتلو النائب العام و فجرو مديريات الأمن و السفاره
الإيطاليه وهما اللي خرمو الأوزون و هما اللي كلو الجبنه , و مفيش ارهاب في سينا ده
الجيش هو اللي عامل الحكايه دي فزاعه عشان يخوف بيها الناس , و شوية تحابيش بقى لزوم
الشئ زي الستات بتغتصب في السجون ( ايوه الجمله دي لازم تتقال ) , مش بس كده , ده عبد
الفتاح السيسي هو عميل المخابرات الأمريكيه و السي أي إيه اللي زرعوه في الجيش المصري
من عشرين سنه ( مع ان مرسي اللي معينه وزير دفاع )!! .
.
الخلاصه , صبحي
صالح كان معاه حق لما قال ( اللهم أمتني على الإخوان ) , عشان طلعنا ولا نزلنا ولا
حتى عملنا شألباظ , الفكر الإخوانجي ده عقيده و ديانه , و النبي لو ربنا نزّل مائده
من السماء على عبد الفتاح السيسي أو مسكو عزه الجرف راكنه على عمود في شارع جامعة الدول
و مستنيه زبون خليجي راكب عربيه لاندكروزر جمرك سفاجا وصوروها فيديو ماهيغير الإخوانجي
رأيه .
.
و في العيد بقى
لما تقابل اخوانجي قول له كل سنه و انت طيب و لما يفتح معاك كلام في السياسه هات من
الأخر و قول له كل سنه و انت طيب .
....................................................................................................................................
Mohamed
Hussein
17
يوليو 2015·
في العيد و ذكرياته
.
توب قماش كبير
أوي , نوع رخيص , بييجي و يتفصّل بيجامات لولاد العيله كلهم عند حمدان الترزي , الخوات
و ولاد العم , لما تلاقي 17 عيل لابسين زي بعض يبقو ولاد عم , و الجزمه كانت بلاستيك
برباط و 3 خطوط من الجنب أو 4 تقريبا , ألوان مختلفه .
.
نصحى من بدري اوي
و نصلي العيد ونكبّر , و نفطر كلنا بدري , وزه و رقاق , ونبوس ايد الأب و الام و الجد
و الجده ( سيدي و ستي ) و نقول لهم كل سنه وانتو طيبين , و نطلع الشارع بالبيجاما و
الجزمه البلاستيك و ناخد عيديات ربع جنيه و بريزه , اللي كان بيجمع مننا 5 جنيه يبقى
أبو زيد خاله .
نشتري بمب و حبش
و مسدس و بلالين , و نلعب و نطرقع و نفرقع و بعدين نكمل اليوم ماتشات كوره لما تخلص
العيديه .
.
و قبل العيد بكام
يوم كان عمايل الكعك و البسكوت , كرنافال لوحده , طبليه كبيره و ماكنة البسكوت تتربط
عليها و نفضل نلف ايد الماكنه و العجينه تطلع و تتقطع و تتعبى في صاجات , تدخل الفرن
البلدي وتبدأ الروايح الجميله تهل علينا , وفي الكحك نقعد ننقشه بالمنقاش طول الليل
قبل ما ندخله الفرن .
.
العيد يبقى عيد
في مصر و بس , حتى لو عشنا عالذكريات .
....................................................................................................................................
.
.
ليست هناك تعليقات:
إرسال تعليق