Mohamed
Hussein
15
يناير 2015·
THE
SUM OF ALL FEARS
.
جرّبت إنك تقعد
تتفرج على فيلم رعب ؟ تمساح مثلا بياكل الناس , بياكل الصياد و المزارع و العالم و
البت البطله الجميله و بياكل الغزلان و المعيز و أي حاجه تقابله , لو مالقاش أكله في
المايه بيطلع عالبر و يمشي لحد البيوت ؟
و بعد ما تشوف
الفيلم و تكون اتشحنت بشحنة خوف و رعب معتبره فجأه يجيلك مشوار و تكون مضطر إنك تمشي
جنب شط ترعه أو مصرف فيه شوية مايه , هيجيلك إحساس إن التمساح هيطلع لك من الترعه و
هتبقى ماشي و انت خايف ولو واحد صاحبك حب يعمل فيك مقلب ممكن يرمي حجر في الترعه من
غير ما تاخد بالك ساعتها هتنط في مكانك و تقول سترك يارب.
.
في فيلم الرعب
اللي استمر من 4 سنين حرق و تخريب و قتل , ناس بشر بيموتو لحم و دم مش بلاستيك , بعدها
على طول بقينا نترعب من أي حاجه حتى لو كانت طبيعيه , يعني لو راجل بيجوّز بنته و حب
يضرب طلقتين صوت في الهوا بنترعب و نتخيل الموضوع عمل ارهابي , لو راكب عربيه و فايت
من قدام مديرية أمن أو وحده عسكريه و فجأه كاوتش العربيه فرقع هتترعب و تتخيل الموضوع
قنبله أو لغم , بالمناسبه الخوف في اللحظه دي و زيادة ضربات القلب بشكل غير طبيعي بتكون
كفيله جدا إنها تتسبب في موت الإنسان ( موت من أثر الخوف ) .
.
يعني إيه إرهاب
بقى ؟ يعني التمساح في فيلم الرعب اللي بياكل الأخضر و اليابس , التمساح اللي حابس
الناس في بيوتها و محرّم عليهم شوفة الشارع , و فيه رجاله اسمهم ( جيش مصر ) مهمتهم
من كام سنه انهم يحاربو التمساح ده لحد ما يقتلوه , طبيعي في أي عمليه زي كده إنه يسقط
شهداء من الجيش على إيد التمساح لحد ما يقدرو عليه و طبيعي إن الجيش يعمل دوره ده
, لكن دورنا احنا كمان اننا نحترم الناس دي ( الأبطال ) , ننحني لهم احتراما و نسأّف
لهم و نترحم على شهدائنا .
.
ماعنديش أدنى شك
إن العيال الخرفان و الكولجيه اللي بيسخرو من جيش مصر و من دوره الحالي محتاجين علاج
نفسي و عملية تأهيل من جديد , تأهيل بما يكفي عشان توصل لمرحلة إنك تبقى بني أدم .
.......................................................................................................................................
Mohamed
Hussein
15
يناير 2015·
أسوأ إعلان تلفزيوني
2014/2015
.
في رأيي الشخصي
اعلان عصام الحضري عن منتجات لولوا هو أسوأ اعلان تلفزيوني في 2014 , مانا مش فاهم
إيه علاقة الإعلان بالمنتج المعلن عنه ؟
واحد لابس خوزه
و مأفّز و راكب موتوسيكل و شكله كده رايح يفتح عكا و راجع في السريع و فجأه يقف قدام
ملعب كوره و يشوف الحارس الناشئ الكتكوت و يتبادلو بقى نظرات مليانه حنان و حنيه و
حب و كل الحاجات اللي فيها حرف الحاء دي و في الأخر يطلع الإعلان عن جيل للشعر !!
.
الإعلان ده غالبا
اللي صمّمه واحد فطاطري , و رأيي إنه بعد نظرات الحنان و الحب دي ينفع يكون إعلان تابع
لوزارة الصحه عن أهمية الرضاعه الطبيعيه و لبن الأم !! .
.......................................................................................................................................
Mohamed
Hussein
15
يناير 2015·
اعتقال ( ديودونيه
) أشهر مقدم برامج ساخره في فرنسا بتهمة تمجيد الإرهاب !! .اللي هو مسيو باسم يوسف
بتاعهم يعني .
أه اعتقال , و
في فرنسا بلد الحريات و في قلب باريس نفسها ( اللي هي المُزّه الشفافه اللي عندها غمازات
بتاعة عواصم العالم ) .
و ممكن قرار الإعتقال
يتعلّق على مدخل الشانزليزيه أو يعلّقو الساخر ديودونيه ذات نفسه بمسمارين , عشان الإرهاب
و شيل السلاح و ترويع الناس مش لعب عيال و لا هو حاجه تحتمل حرية الرأي و التعبير و
الإيفيه و الألشه .
.
الفرق بقى إن فرنسا
مش هتلاقي فيها مسيو علاء عبد الفتاح ولا مادموزيل أسماء محفوظ عشان تتعاطف مع ديودونيه
و لو حد من الكولجيه الفرنسيين تعاطف مع الفنان الساخر فأكيد إنه يتعلّق معاه في نفس
المكان ( يعني هيكلّف الدوله مسمارين زياده ) , أه نسيت أقول : مفيش في فرنسا قاضي
بيستشعر الحرج ولا قضيه بيتحكم فيها في 9 سنين و لا صحفيين مخابيل هيعملو وقفه احتجاجيه
على سلالم النقابه بتاعتهم و لا صفحات هتتعمل عالفيس بعنوان #كلنا #ديودونيه
... #ديودونيه #على #الأسفلت !! .
...........................................................................................................................
Mohamed
Hussein
14
يناير 2015·
في بيتنا اللي
في البلد , عمي فلان طالع و خالي فلان داخل , بنت خالي بتحشي مع مرات أخويا في المطبخ
و بنت عمي بتعمل لنا شاي .
البلطه اللي جبناها
عشان نكسر شوية خشب دي بتاعة عمي فلان و الغربال بتاعنا عند مرات خالي , الرُبْع بقى
جبناه من عند الجيران وقت ما كانو بيحسبو الزكاه .
.
بناتي و بنات أخويا
بيسيبو البيت ويروحو يقعدو عند بيت قدامنا كده على مصطبه هناك عاجباهم , قلت لهم براحتكو
, اقعدو في المكان اللي يريحكو ده بيت عمكو فلان الفلاني و سلّمولي عليه .
و تبقى واقف قدام
بيتك و تلاقي واحد راجع من الغيط و معاه حزمة سريس كبيره زارعها في أرضه يقوم محوّد
عليك و يقولك خد شوية سريس صابح أهم .
أمي لما تعبت شويه
و روحنا المستشفى عملنا جراحه بسيطه كده رجعنا لقينا البلد كلها قاعده في البيت عندنا
.
و طول مانت موجود
هتلاقي أبواب مابتتقفلش , و رسايل رسايل رسايل بتقول باختصار ( لسه الدنيا بخير )
.
.
في القاهره , العماره
اللي انا ساكن فيها ارتفاعها 13 دور , فيها 52 شقه , الدور الواحد 4 شقق , و الله ماعرف
ولا واحد من جيرانا ولا اعرف هي الشقق ساكنه و فيها ناس ولا لأ ؟ اللهم إلا شقه فيهم
عرفت ان فيها ناس لما سمعت صوت الكلب اللي هما مربيينه .
طب يا ترى لو خبّطت
عالبيبان المقفوله و قلت لهم أنا فلان جاركو هيعتبرو الحكايه دي عمل إرهابي و اعتداء
على حقوق الإنسان ؟ و احتمال كبير رنّة الجرس تكون أثرت بالسلب على الحاله النفسيه
و الرومانسيه و السايكوباتيه بتاعة الكلب و صوته في النبيح يتغيّر شويه .
...................................................................................................................
Mohamed
Hussein
14
يناير 2015·
الراجل اللي قتل
فرج فوده سأله القاضي إنت قتلته ليه ؟ قال له عشان كافر و كُتبه مليانه كفر بالله
.
القاضي سأله تاني
: هو انت قريت كتب فرج فوده ؟ رد الراجل الإرهابي الطيب و قاله : لأ يا بيه انا مابعرفش
أقرا أصلا !! .
.
و الإرهابيين اللي
قتلو الصحفيين بتوع شارل إيبدو اتسببو بغبائهم في إن أكتر من جريده أعادت نشر الرسوم
بما فيهم شارل إيبدو نفسها اللي بتهدد بنشرها ب 16 لغه مختلفه ( من باب الشهره و النجوميه
) .
.
و بالنسبالي السؤال
الوجودي اللي بيشغل تفكيري من فتره طويله و مش لاقي له إجابه أو جايز عارف الإجابه
بس خايف منها , هو السؤال ده : هما الأغبيا لو كانو متدينين بيدخلو الجنه ؟!! .
السؤال بشكل تاني
: هو الواحد ممكن يحلم بالجنه ويعمل لها و لما يدخلها يكتشف إنها مليانه بشر كانو متدينين
في الدنيا بس من النوع الحصاوي ؟!! .
.
طب السؤال ده حرام
و لّا الإجابه بتاعته هي اللي حرام ؟!! .
..............................................................................................................................
Mohamed
Hussein
14
يناير 2015·
من سنتين تقريبا
دكتور ابن حلال أوي مدير مستشفى للأمراض العقليه سمح لبرنامج تلفزيوني إنه يصور مع
المرضى و يذيع معاناة المجانين على الناس .......... أيوه ده دكتور ابن حلال أوي ولو
سألته عن الحكومه المصريه ( أي حكومه ) هيقولك دي حكومه بنت @$%^&8 .
.
و من كام يوم راجل
سلفي ملتحي و مراته المتدينه المنتقبه بيعذبو بنتهم و يكوها بالنار و يضربوها بضلفة
كوميدينو عشان سرقت صباع كفته من تلاجتهم (مش تلاجة الجيران ) وقالك هنقول لربنا ايه
؟ بنتنا بتسرق من تلاجتنا ؟ و أكيد برضه لو سألتهم عن الحكومه المصريه ( أي حكومه
) هيقولولك دي حكومه بنت $^7**&*.
.
و النهارده مركز
لعلاج الأدمان بيعذب المدمنين , حفلات تعذيب يا مولانا و اللي بيحب ربنا ييجي يضرب
المدمن عندنا , و برضه لو سألت صاحب المركز عن الحكومه المصريه ( أي حكومه ) هيقولك
دي حكومه بنت &^$%&*.
.
و هو ده بقى سلو
بلدنا , بنعذب عيالنا و مرضانا و نفضحهم و نكويهم و نحرقهم , و في وقت فراغنا بنشتم
في الحكومه .
.
وانا نويت بقى
والنيه لله , بكره الصبح هروح اقطع الطريق اللي داخل على بلدنا بفردتين كاوتش مولعين
و هجيب عربيه كارو ارميها على شريط القطر عشان القطر مايمشيش , كل ده الصبح عشان بعد
العصر مش فاضي , مانتو عارفين إني بعد العصر مشغول أوي , بشتم في الحكومه .
...............................................................................................................
Mohamed
Hussein
13
يناير 2015·
حققت أمنيه كنت
بتمناها من سنين , وانا في البلد قلت هولّع راكيه نار في البرد ده , سألتهم على ( منقد
) فخار قالو مفيش , ماهو مفيش حد بيشرب ( جوزه ) دلوأتي , و لقيت ( قصعه ) استخدمتها
بدل المنقد , سألت على كوالح قالو مفيش ( ماهو محدش بيزرع دره الأيام دي ) قمنا جبنا
شوية خشب و قطّعناهم , الواد ابن أخويا طالع شبهي كده و غاوي جنان و أول ما سمع اننا
هنعمل راكية نار ساب الكتاب و المذاكره و الإمتحانات , و لّعنا في الخشب قدام البيت
و اتعشينا , بعدها الجمر كان قرب يطفي وانا فضلت أنفخ فيه لحد ما اتقطع نفسي عشان براد
الشاي يغلي , و المهم شربت شاي عالخشب امبارح و اتلمّينا كلنا حوالين النار و اتدفينا
من غير موبايلات تاتش ولا لابتوبات ولا تابلتات و لا تويتر ولا فيس .
فيه ناس و بس
, بشر , بني أدمين يعني , بيتكلمو مع بعض و بيضحكو ضحك حقيقي من القلب مش إيمشونز ولا
هههههههههه .......... لو كان ده جنان اتجنن .
......................................................................................................................
Mohamed
Hussein
12
يناير 2015·
لسه شويه
.
- لسه ناس في العرب
و المسلمين لما بيعرفو إن رئيسة وزراء الدنمارك اتكعبلت في الجزمه ام كعب عالي بتاعتها
بيعتبرو ده انتصار للإسلام و عقاب من ربنا عشان فيه رسام دانماركي رسم رسوم مسيئه لسيدنا
النبي من كام سنه .
و طبعا لو اللي
اتكعبلت مرات واحد من مشايخنا يبقى المؤمن مُبتلى يا أخي الكريم .
.
- اعصار يضرب شواطي
أمريكا ولا اليابان يبقى غضب ربنا و نزل عليهم ولو ضربنا احنا يبقى امتحان من الله
على صبرنا و قوة إيمانا عشان احنا مؤمنين أوي أخر حاجه !! .
.
- و في الناحيه
التانيه من البحر لسه برضه الحكومات الأوروبيه بترعى الإرهاب في بلادنا و بتشوف الإرهابيين
عندنا لهم حقوق المواطنه و حقوق الإنسان و حقوق الزقازيق و احنا بقى لازم نستحمل و
نحتويهم و إلا مانبقاش بني أدمين ولا عندنا سوشيال بوليتيكال انتيليجنس , إنما الإرهاب
عندهم حرام و الإرهابي يستحق القتل من غير محاكمه .
.
العالم الغربي
ابن الحرام بيكيل بمكيالين و احنا عندنا نفس المكيالين بينا وبين بعض , و هيبدأ الغرب
يحترمنا و يحترم عقولنا لما احنا نحترم نفسنا و نبطّل نفسّر الظواهر الكونيه و الأحداث
اليوميه على مزاج أهالينا .
.............................................................................................................................
Mohamed
Hussein
11
يناير 2015·
الوليه بتاعة ألمانيا
راحت اترمت في حضن الراجل بتاع فرنسا واتشحتفت وقالت له : قلبي عندك يا هولاند ياخويا
, والنبي الحادث قطع فينا كلنا و ماعرفناش ننام ولا نتعشى من ليلة امبارح , دي عين
وصابتنا و الله , بص لها هولاند و قال لها : كان مستخبّي لنا فين كل ده يا ميركل ياختي
؟! .
و كل الحكايه اتنين
ارهابيين و كام قتيل , أومال احنا نعمل إيه و الإرهاب عندنا بقاله 4 سنين بيحصل يوم
أه و يوم لأ زي حقن الأدينوبلكس ؟ و عهد الله الراجل عبد الفتاح السيسي ده المفروض
صورته تنزل على اليورو !! .
............................................................................................................................
Mohamed
Hussein
11
يناير 2015·
نتنياهو و ليبرمان
في مسيرة رفض الإرهاب في فرنسا !! ..كده مش باقي غير إن عاصم عبد الماجد و خيرت الشاطر
و ريا و سكينه يشاركو في المسيره و يطلع نتنياهو عالمسرح يمسك الميكروفون ويقول ( نحن
جامعي حسنات لا جامعي أصوات ) !! .
............................................................................................................................
Mohamed
Hussein
11
يناير 2015·
وانا صغير كده
و أيام ما كانت الحاله ( ض . ج ) كانت أمي بتخيّط أي حاجه مقطوعه في البيت , بيجاما
, بنطلون , مريله , شنطة مدرسه , تقلب ياقة جلابيه أو قميص , و كانت بتستعين بيا عشان
ألضم لها الإبره , شويه شويه وانا بدأت أترقّى من حكاية لضم الإبره دي ( يعني مابقتشي
صبي ترزي ) و بقى لي الإبره و الفتله الخاصه بيا .
اتعلمت حاجات كتير
في الخياطه , أنواع الغرز و أنواع الخيوط و الإبر , أركّب زرار أو سوسته و أعمل رفيه
لبنطلون .
لحد النهارده لما
بلاقي حاجه مقطوعه بطلع جري عالإبره و الفتله و اقول لهم وحشتوني و أخيط الحاجه المقطوعه
و انا في منتهى السعاده , انا تقريبا بتمنى إن حاجه تتقطع عشان أخيطها .
و لو بدأت هتلاقيني
سرحت و في ملكوت تاني و مش داريان بالناس حواليا , دي حالة هيام بقى .
.........................................................................................................................
Mohamed
Hussein
11
يناير 2015·
الإعجاز العلمي
في ( شواشي الدره )
.
و احنا عيال صغيرين
كان المشايخ بيحكولنا عن حاجه مؤثره جدا , و نفضل احنا بقى نسبّح و نهلل و نتشحتف و
تنسكب العبرات ( أه و عهد الله ) .
.
و قالك يا سيدي
: هل تعلم الإعجاز الرباني في ورقة التوت ؟ إيه يا مولانا ؟ شوف يابني : ورقة التوت
دي لو أكلتها النحله بتطلّع لنا عسل و لو أكلتها البقره بتطلع لنا لبن و لو أكلتها
دودة القز بتطلع لنا حرير !! ....لا تخرج قبل أن تقول : حسبي الله و نعم الوكيل .
.
و لما كبرت شويه
ربنا ابتلاني بداء اسمه التفكير , في كل حاجه تقريبا , طب ورقه التوت دي هي مجرد ماده
غذائيه مش أكتر و النحله في كل الأحوال هتطلع عسل سواء أكلت ورقة توت أو ورقة جوافه
أو حتى ورقة بردي .
و دودة القز هتطلّع
حرير سواء أكلت ورق توت أو ورق لوري أو حتى ورق جرايد , الكائنات دي ربنا خلقها كده
, جواها مصانع معده لإنتاج سلعه واحده مميزه أيا ما تكون الماده الغذائيه و بالتالي
مفيش أي معجزه في ورقة التوت ............... يعني باختصار كلام مولانا الشيخ كان عباره
عن خليط من الهطل و الهبل و التخلف العقلي .
.
هبسّطهالك , و
سيبك من ورقة التوت : هل تعلم المعجزه العلميه في حزمة البرسيم ؟ أنا أقولك , أهي حزمة
البرسيم دي لو أكلتها جاموسه بتطلع لبن جاموسي و لو أكلتها بقره بتطلع لبن بقري و لو
أكلتها معزه بتطلع لبن معزاوي ولو أكلتها سمكه بتطلّع بطارخ و لو أكلتها فرخه بتطلع
بيضه ولو أكلها حمار مش بيطلّع أي حاجه ههههههههههه أه و الختمه الشريفه , شوفتو معجزه
اكبر من كده بقى ؟.
بلاش دي , طب تعرف
المعجزه العلميه في شواشي الدره ؟ أهي دي لها دور مهم جدا في نمو كوز الدره و كنا كمان
واحنا صغيرين بنلفّ شواشي الدره في ورقه كده و نعملها سجاير , سبارس يعني و نفضل نكح
..
......................
......................
عن تجديد الخطاب
الديني :
و لو كان ليا إني
أطلب طلب , فرجائي الوحيد من مشايحنا الأفاضل وحياة أبوكو بلاش حكاية الإعجاز العلمي
و الرباني دي عشان شكلنا بقى وحش أوي , ولو عايز تتكلم عن إعجاز علمي تبقى دارس بحث
علمي مش تقولي ورقة التوت و شواشي الدره , عايز تعرف عظمة ربنا في خلقه ادرس حركة الكواكب
و المجرات و ترتيب الإلكترونات في مداراتها و دورة حياة الجنين من أول ما يكون بويضه
و حيوان منوي ..باختصار يا مولانا بلاش تنقل في قصص و حكايات هلاميه بطريقة : نَقَل
, نَسَخَ , نَقَشَ .... و ارحم عقلك شويه يا أخي و حاول تفكّر , دي الفرصه في جيبك
.
...........................................................................................................................
Mohamed
Hussein
9
يناير 2015·
تلخيص البهاريز
في حادث باريز
.
- جوز عيال إرهابيين
بينيّمو الفرنسيين من المغرب حاليا و مصر كان الإرهاب بيرجّها رج زي الإعصار من كل
جانب و الشعب المصري كان بينزل يتفرج عالإرهاب و يشوف القنبله و يتصور جنبها سيلفي
( تسلم يا جيش بلادي ) .
.
- في اقتحام المطعم
اللي فيه الإرهابيين والرهاين سقط قتلى من الرهائن و جرحى من الشرطه الفرنسيه , ده
طبيعي جدا في محاربة أي إرهاب في الدنيا و اسمه ال collateral damage...لما يحصل حاجه عندنا زي كده بقى ماتبقاش تعمل
نفسك عبقري زمانك و تقول ازاي حصل كده و فين الخطه ؟ و تفتكر نفسك محمود الجوهري الله
يرحمه .
.
- فرنسا مترشقه
بكاميرات مراقبه , و عساكر و مستقره سياسيا تماما و مالهاش حدود مع ليبيا ولا السودان
ولا انفاق مع فلسطين ولا الصهاينه جارتهم و مع ذلك دخلها الإرهابيين و مشيو في شوارعها
بالسلاح , يعني مهما عملت الأجهزه الأمنيه بيبقى برضه فيه حاجه اسمها نسبة loss .
.
- هولاند رئيس
فرنسا بجلالة قدرها ملقاش عيب خالص في إنه يطالب الشعب بالتظاهر و يطلب تفويض بمحاربة
الإرهاب يعني محتاج دعم و ظهير شعبي .
.
- و أخيرا , شعاراتك
و مبادئك و معلوماتك اللي بتقراها في كتب أنصاف الحمير مالهاش أي علاقه بالواقع على
الأرض , عشان اللي إيده في كتب دستوفسكي و تويتات البرادعي غير اللي إيده في الشارع
و في نار الإرهاب .......... يارب بقى تفهم إن محاربة الإرهاب بتختلف تماما عن مطاردة
حرامية الغسيل !! .
...........................................................................................................................
Mohamed
Hussein
9
يناير 2015·
الإرهاب طايح في
قلب باريس عاصمة الفن و الجمال , و هولاند بيدعو الفرنسيين للتظاهر يوم الأحد و بيطلب
تفويض لمحاربة الإرهاب !! .
.
عبد الفتاح السيسي
بقى هو المُعلّم و القائد ( و دي بشرة خير ) .
............................................................................................................................
Mohamed
Hussein
9
يناير 2015·
ليلة امبارح
.
دخلت بنت على صفحه
من صفحات المدن الجديده الراقيه و سألت سؤال بحسن نيه ( و يا ريتها ما سألت ) , البنت
سألت : يا جماعه هي محلات GAP ده فعلا اختصار ل GAY AND PROUD ? قولو لي عشان لو كده ماتعاملشي معاها أبدا
!! .
.
و عليها يا مولانا
مترليوس من التعليقات و الألش و السخريه , اللي يقول لها لأ GAP
دي اختصار لكلمة GAY AKOL POTATES
و اللي يقول لها الغرب ماعندوش حكاية ( كذا و أفتخر دي ) و دي اختراع
مصري صرف , و اللي ضرب بالانص وجاب لها اصل كلمة GAP
من عند مولانا جوجل رضي المثقفين عنه و أرضوه .
.
البوست بتاع GAP ده فكرني بمعركه حاميه دارت رحاها من كام سنه و شارك
فيها عشرات من المشايخ و المثقفين و العواطليه و الهييييييييح و المعركه كانت عن تفسير
معنى كلمة PEPSI بعد ما قالولنا انها اختصار
لجملة ( ادفع كل قرش لحماية اسرائيل ) !! , قال يعني الشركه صهيونيه و عايزه تنتشر
في كل مكان في العالم و تصرف على الصهاينه بس ماعرفتشي تداري اسمها أو تختار اسم تمويه
, ( يعني مثلا كانت تسمّي نفسها KBA
يعني اختصار ل KHALTY BETSALLEM ALEK
!! .
.
الحقيقه إن عقولنا
شبه البالونه اللي مرميه فوق سطوح بيت , و أي شوية هوا صغيرين ممكن يطيّروها , و أديلنا
سنين من سطوح البيت ده لسطوح البيت ده , و الحقيقه كمان إن مش مهم خالص كلمة PEPSI اختصار لإيه , إنما المهم إن البيبسي أضراراه زفت
على جسم الإنسان و خصوصا العظام , و الحقيقه إنه مش مهم كلمة GAP اختصار لإيه , إنما المهم إنها واحده من سلاسل المحلات
الغربيه اللي بتستنزف فلوسنا و بتطمس هويتنا المصريه !! .
.
يابني حاول تفهم
, مفيش وقت ( الوقت يداهمنا ) , السطحيه دي خدت من جتتنا راقات , و سنين من عمرنا ضيعناها
في تفسير كلمة بيبسي و معرفة نوع النمله اللي كلمت سيدنا سليمان دكر ولا نتايه و معرفة
اختصار كلمة ( جاب ) , و الله جاب الله خد , الله عليه العوض .
....................................................................................................................
ليست هناك تعليقات:
إرسال تعليق