Mohamed
Hussein
1
يناير 2015·
لمار بنتي ( 4
سنين و نص ) أصرّت و حلفتني إني أنزّل رسمتها عالفيس بوك زيها زي لوجي , قالت لي دي
صورة بابا نويل !! .
و الله يا لموره
مانا عارف ده بابا نويل ولا شكوكو ؟!!
........................................................................................................................................
Mohamed
Hussein
1
يناير 2015·
الجو دلوأتي حاجه
تحفه , بيقولو الليله دي هتبقى أبرد من ريهام سعيد و تامر هجرس مع بعض , و ولاد الحلال
نصحونا : استعينو على قضاء ليلتكم بالبطاطين و الطواقي والجوانتيات و الهدوم التقيله
و السحلب و شوربه العدس .
.
افتكرت وانا صغير
كنا في ليالي تامر هجرس دي بنجيب ( منقد ) معمول من الفخار و نجيب شوية حطب و خشب و
نعمل راكية نار نسيبها قدام البيت شويه لحد ما الحطب و الخشب يبقو زي الجمر و الدخانه
تروح و بعدين ندخله البيت بقى و نتلم كلنا في أوضه واحده حوالين المنقد ده ندفّي ايدينا
و نعمل شاي بالمرّه .
.
طب لو فكرت أعمل
الحركه دي هنا إيه اللي ممكن يحصل ؟ حركة المنقد و الحطب و الدخانه و الجمر في قاهرة
المعز لدين الله ؟ والنبي ولا حاجه ابدا , غيرشي بس السكان هييجو يطردوني من العماره
و مراتي هتتصل بيا بكره الصبح تصحيني من النوم و تقولي انا قاعده من بدري على سلم محكمة
الأسره , انت اتأخرت ليه ؟!!.
..............................................................................................................................
Mohamed
Hussein
1
يناير 2015·
في 2015
.
قاعد في الكافتريا
و بنت قاعده عالترابيزه اللي جنبي معاها اتنين شباب صحابها , أعمارهم في العشرينات
هما التلاته , فتحت الموبايل و ورّتهم الصوره بتاعتها اللي منزّلاها عالفيس و انها
جابت 650 لايك في أول ساعه بس , قالت لواحد فيهم : يابني انا محبوبه من الفيس بوك
!! .
بصيت كده و كنت
عايز أقول لها : وانا محمدحسين من كوكب الأرض
.
يااااااااه بقى
يالميدان , 2015 داخله برجليها اليمين أهو , ولسه صورة المزه بتجيب 650 لايك في الساعه
و ما زال النيل يجري حتى أوقفه الكمين ( الله يرحمك يا عم جلال ) .
.
على فكره يا شباب
, أنا اسمي الحقيقي سونيا مش محمد حسين و دلوعه أوي أخر حاجه و هنزّل لكو صورتي في
البوست الجاي جايز ربنا يسهل بقى .
................................................................................................................................
Mohamed
Hussein
1
يناير 2015·
لوجي بنتي رسمت
لكو الرسمه دي بمناسبة 2015 .( موقّعه اسمها logyn
). و بتقول لكو كل سنه وانتو طيبين
.....................................................................................................................................
Mohamed
Hussein
31
ديسمبر 2014·
لمار بنتي الصغيره
جابت سَبَت الغسيل اللي مليان مشابك , إيشي خشب و إيشي بلاستيك ألوان و فرطتهم في أرض
الرسبشن و حلفت عليا أنزل ألعب معاها بالمشابك و نعمل قطر و أشكال جميله .
قاعدين عالبلاط
اهو ( أون سيراميك ) و بنعمل أشكال حلوه أوي بمشابك الغسيل , بنحتفل يعني براس السنه
.
يالله بقى كل واحد
من أصحابي يقول هو بيحتفل براس السنه ازاي ؟ .
.......................................................................................................................................
Mohamed
Hussein
31
ديسمبر 2015·
·
لما يكون عندي
بنتين و عايز أربيهم كويس تبقى مشاكل التعليم و اليوم الدراسي و الدروس الخصوصيه و
حياة الطفل اللي بتبدأ من 7 الصبح ل 9 بالليل في مصر هي مشكلتي الخاصه جدا و حلها بالنسبالي
أمنيه شخصيه .
تبقى أزمات المرور
و سواقين التريلات السكرانين و اللي ماشي من غير مرايات و اللي ماشي عكس السير بالنسبالي
هي أزمة شخصيه خاصه مش عامه .
يبقى مستوى الخدمات
الصحيه و الرقابه عليها هو مشكله خاصه مش عامه .
.
أمنيتي في
2015 :
بحلم إني أصحى
من النوم في يوم من الأيام و أدخل الحمام و ألاقي نفسي كده من غير ما أحس بغنّي و أدندن
: هذه دولتي و حلم حياتي !! .
.
..................................................................................................................................
Mohamed
Hussein
31
ديسمبر 2015·
أبو اسحاق الحويني
: احتفال المسلمين بالمولد النبوي حرام !! .............
................
واحد هيسألني و يقولي ليه الإحتفال بالمولد النبوي حرام ؟ هقوله جايز عشان فيه تشبّه
بالمسلمين !!.
مرحى مرحى , يا
حُرّاس يا حُرّاس , أعطو هذا الشيخ ألف دينار أو برميلين بترول .
...............................................................................................................................
Mohamed
Hussein
31
ديسمبر 2014·
ليا صديقه رائعه
و أخت عظيمه عايشه في بلاد بره ( ألمانيا تحديدا ) , و من يوم ماعرفتها عالفيس و هي
صوتها اتنبح تحاول تفهّم الناس إن حياة المسئولين الشخصيه لا تعني أي شئ , حياة البشر
الشخصيه يعني لها حرمه ولا تعني إن الشخص ده ينفع في المنصب الفلاني ولا لا , و بتتكلم
عن رفضها التام لاقتحام خصوصيات الناس و التجسس عليهم و بترفض نشر أي صور أو تسجيلات
فيها انتهاك للخصوصيه !! .
يا عزه انتي بتأدني
في مالطه يا ستي , بصي , في مصر تحديدا ممكن يكون الشخص حرامي أو قاتل أو نصاب أو حلنجي
أو مزور أو ارهابي و نقبلها عادي و نقول عليه شخص عظيم , حاجتين اتنين مش بنقبلهم في
مصر , إن الشخص ده يكون له علاقات نسائيه أو علاقات رجاليه !! .
أصلنا شعب متدين
أوي ولا مؤاخذه , بس متدين على سطر و عشره لأ , و ممكن نرتكب كل الكبائر و الموبقات
و نتجسس و نزوّر و نكدب و نفتري و نشهد بالزور عشان نثبت ان فلان ده باس فلانه اللي
هي مش مراته أو مسك ايديها ( الويل لهما.... الويل لهما ) و نرجمهم بقى و نلعن جدود
أبوهم و نرجع بيتنا نقول أذكار المساء و ننام في هدوء وسكينه لحد ما سكينه نفسها اشتكت
مننا .
....................................................................
Azza Zain
.........................................................................................................................
Mohamed
Hussein
30
ديسمبر 2014·
اجمل حاجه في حلقة
نجوى ابراهيم امبارح مع اسعاد يونس إن الواحد لما ركّز كده حسيت ان نجوى ابراهيم دي
من طينة و نوعية فاتن حمامه , اللي هما ولاد الناس أوي ( كلاس يعني ) , الكلمه بحساب
و الضحكه بحساب و الهمسه بحساب , بتقولك احنا اتعلمنا لما نطلع عالشاشه نخبّط و نستأذن
!!..
بس المشكله انها
بتفكر ترجع للأضواء تاني , و تقدم برنامج مثلا , يعني ترجع دلوأتي وسط أوكا و أورتيجا
و السبكي و احمد موسى و توفيق عكاشه ؟ .
.
اثبتي مكانك يا
ماما نجوى و حافظي على تاريخك , اللي موجودين حاليا هما : مجاري و طفحت في شوارع مصر
.
..................................................................................................................................
Mohamed
Hussein
30
ديسمبر 2014·
الجهاز الإداري
بتاع عم الحاج علي !! .
.
الهيئه العامه
لمنظمة الأعضاء , جمعية رعاية المتخصصين , المجلس القومي لفك حسبة برمه , المجلس الأعلى
لشئون اللجان المتخصصه , اللجنه الفنيه لترويق القناني و التهويه على البيض المسلوق
!! .
.
وانت ماشي في شوارع
مصر الحروسه هتلاقي مباني و منشأت حكوميه بالإسم الهلامي اللي فوق ده , قطع أراضي بمساحات
شاسعه في أماكن سعر متر الأرض فيها بالشئ الفلاني , و شوية خرسانه زي الفل .
.
عندي قناعه تامه
إن الحكومه لو قررت تلغي تلتين المباني والمصالح الحكوميه الهلاميه دي مش هنخسر أي
حاجه , بالعكس هنبيعها بمئات المليارات .
.
عندي قناعه إن
تلتين الموظفين في الجهاز الإداري للدوله بيشوفو مكاتبهم في المناسبات و عيد العمال
, و تلاقي الموظف منهم داخل على مكتبه كده بوحشه بعد طول غياب و يقول للمكتب و دموعه
نازله من عنيه : وحشتني يابن الكلب !! .
.
عندي قناعه إن
نص الموظفين الحكوميين في مصر يا إما عاملين خط سير و بيصيّفو في جمصه يا إما بيعزّو
في زميلهم الحاج على اللي مات و الحاج علي بيموت في الإسبوع مرتين ( حد و خميس ) ,
ربنا يرحمه بقى ويطوّل لنا في عمره .
.
عندي قناعه إن
حكوماتنا المتعاقبه بتصرف مليارات في العبيط كل سنه على جهاز متهالك مالهوش أي تلاتين
لازمه , و بتبقى الحكومه عامله زي واحد ثري خليجي وارث بير بترول و أول مره ينزل شارع
الهرم و يشوف رقاصه في حياته , و لما الثري العربي ده ( قصدي الحكومه ) تطلع من الكباريه
و تلاقي واحد غلبان بره بيقول لها : حاجه لله يا حكومه , تقولك هجيب لكو منين ؟ دي
الحاله جيم .
.
عم ابراهيم أبو
محلب راجل مجتهد جدا و عنده خبره و عايز يعمل حاجه , بس مصر محتاجه رئيس وزاره يكون
مخلّص و يجيب من الأخر , رئيس وزاره يفكّر خارج الصندوق , رئيس وزارة يكون جرئ و مقطّع
بطاقته و ماشي بكارت ميناتيل وبيقول للغوله عينك حمره , مطلوب رئيس وزاره مش يعمل اصلاح
للهيكل الإداري بتاع الحاج على ده , لأ , مطلوب تفوير الجهاز البيروقراطي الإداري العقيم
اللي بيكلفنا مئات المليارات و في النهايه يا إما في جمصه يا إما في عزا الحاج علي
!! .
...........................................................................................................................
Mohamed
Hussein
29
ديسمبر 2014·
انا وعيت عالدنيا
لقيت نجوى ابراهيم بتقدم برنامجها التلفزيوني , و أمي وعيت عالدنيا لقت نجوى ابراهيم
بتقدم برنامجها ده , و ستي اللي هي جدتي وعيت عالدنيا لقت نجوى ابراهيم بتقدم برنامجها
( و كانت بتقول ماما نجوى ) !! .
و دلوأتي نجوى
ابراهيم طالعه مع اسعاد يونس في صاحبة السعاده , عايز اقول ايه بقى ؟ حسبي الله و نعم
الوكيل يا ماما نجوى , دانتي اكبر مني ب 45 سنه ولو قابلتك في الشارع دلوأتي هتقولي
لي يا أونكل !! .
.
اللهم لا حسد
, قل أعوذ برب الفلق .
...............................................................................................................................
Mohamed
Hussein
29
ديسمبر 2014·
القضاء الإداري
في اسكندريه قرر إلغاء مولد ابو حصيره الخاص باليهود , و صحابي نازلين شحتفه على حرية
الأديان و المعتقدات و كده مع إن الناس فرحانه أوي و خصوصا أهالي المنطقه اللي كان
بيتم فيها المولد .
.
بس الحكايه لها
أصل و مالهاش علاقه بحرية الأديان خالص ده اعتقادي أنا , الحكايه ان احنا المصريين
مابنعرفش نفرّق بين اليهوديه كديانه و بين الصهيونيه كفكر استعماري , و تاريخنا المهبب
مع الصهاينه انعكس ( حتى ولو بالغلط ) على نظرتنا لليهود ( كمعتنقي ديانه ) , و الحكايه
كمان إن الديانه اليهوديه هي الديانه السماويه الوحيده اللي عامله لها وطن واحد اسمه
اسرائيل فبقى من صعب جدا او مستحيل إن الناس تفرق بين الدوله الصهيونيه و بين ديانتها
.
.
أصدقائي اللي زعلانين
اوي على مولد ابو حصيره ياريت تنزلو الشارع و تقابلو أي راجل بسيط و تحاولو تعملو حاجه
غلط أوي هتلاقيه بيقولك انت كافر يا جدع , انت يهودي يا جدع !! ............ حتى اليهوديه
بقت مرادف عندنا للكفر ( مع الأسف ) .
.
و بمناسبة حرية
الأديان فانا لسه فاكر كلمه قالها احد الأقباط ( إن ترخيص كنيسه في مصر بياخد 3 سنين
و ترخيص كباريه بياخد 3 شهور ) !! .
و بمناسبة حرية
الأديان فحضرتك بتقبل بسهوله انك تشغل ميكروفون الجامع و يجيب لاخر الدنيا في الأدان
و الصلاه و بترفض كده للكنيسه .
و بمناسبة حرية
الأديان فأكيد حضرتك ممكن تشغّل كاسيت بيتكو على اذاعة القرأن الكريم و تعلّي الصوت
للأخر و تسمّع كل العماير اللي حواليك حتى لو تلتينها مسيحيين بس مش من حق المسيحي
يعمل كده و يجبرك تسمع ترانيم مسيحيه .
.
حتى احنا عندنا
قميص عثمان اللي بنطلّعه وقت اللزوم , و قميص عثمان بتاعنا اسمه ( حرية الأديان و المعتقدات
) .
.....................................................................................................................................
Mohamed
Hussein
29
ديسمبر 2014·
الفلوس مع مين
؟
.
صباح الخير , دي
لعبه اخترعتها , مش موجوده عالفيس بوك , لأ دي موجوده في الشوارع و الحواري , يعني
واقعيه مش عالم افتراضي .
الفلوس مع مين
؟ معاك فلوس يا أستاذ ؟ طب الأنسه معاها فلوس ؟ معاكي فلوس يا مدام ؟ الباشمهندس اللي
ورا معاك فلوس و لّا ؟ لأ لأ لأ .....يبقى فيه حرامي بينا يا رجاله ( مغارة علي بابا
) .
.
في مصر , من زمان
أوي , من أيام فيلم الكرنك و جايز من قبل كده بكتير و التعليم مابيجيبش فلوس , الفرارجي
راح يخطب الدكتوره و قال لابوها : و ايه يعني دكتوره ؟ دي ماهيتها ماتجيبش جوزين فراخ
و بالتسعيره كمان .
.
و لا الموهبه بتجيب
فلوس , الملحنين و الشعراء و الأدباء و الكُتّاب الموهوبين بيشحتو عالقهاوي و تلاقي
الواحد منهم قاعد لوحده و بيطلب اتنين شاي ( واحد له و واحد لموهبته ) , طب حاول تتعلم
طيب , ذاكر يابني عشان تبقى متفوق , 17 سنه قول 19 , و في النهايه مرتبك في شهر يساوي
مرتب النقّاش في اسبوع , و لازم يعني تقلّب عيشك في شغلتين تلاته عشان تعرف تعيش ,
أو بقى تتغرّب في بلاد الله و يا عالم هترجع لنا و لا هنجيلك احنا .
.
طب الفلوس مع مين
بقى ؟ انظرْ حوالك .
رقاصه زي فيفي
عبده عندها فلوس أد 56734 طبيب و مهندس من بتوع ( ذاكر يابني ) , و محمد حسان دخله
في الساعه يساوي راتب 37 ألف صيدلي و نص , يبقى الفلوس مع الرقاصه و الشيخ , عشان بس
مانلفش و ندور , و نكرر نفس المعطيات ألف مره و ننتظر نتيجه مختلفه ( و النبي حلو البؤ
الأخير ده , بؤ بتاع مثقفين يعني بتاع شحاتين ) .
.
و بالتالي نقدر
نستنتج من كل اللي فات ده و من حكاية إن الفلوس مع الرقاصه و الشيخ إننا شعب متدين
بطبعه و بنصرف فلوسنا على الرقاصات أو إننا شعب بتاع هلس بطبعه و بنصرف فلوسنا عالمشايخ
.
مش مهم , في كلا
الحالتين احنا برّه اللعبه , و على رأي برنامج لبناني كنت بشوفه زمان : احنا الحلقه
الأضعف , الله معنا !! .
..................................................................................................................................
Mohamed
Hussein
29
ديسمبر 2014·
البنت الطفله ياسمينا
اللي عمرها 16 سنه و بتغني لأم كلثوم و أسمهان صوتها رائع فعلا , موهوبه جدا , احساسها
بالموسيقى مالوش حل .
طب ايه اللي هيحصلك
يا ياسمينا يا ترى ؟! هتحافظي على موهبتك و تنميها و تستمري و نقول نسل أم كلثوم ماتقطعش
؟! .
يا خوفي يتبناكي
منتج من إياهم و يقنعك انك تصبغي شعرك و تحقني سيليكون و بوتكس و تعملي شفايفك زي شفايف
ماعرفشي مين و يلبسك بنطلون سترتش و بودي صدره عريان و يجيبلك حصان أو مركب في النيل
و يقولك غنّى بقى : الهُوأ البُوأ الدربوأ !! .
..........................................................................................................................
Mohamed
Hussein
28
ديسمبر 2014·
مراحل تطور الإنسان
الطبيعي
.
وانا صغير اتولدت
و عشت في قريه صغيره اوي مفهاش مسيحيين ولا ولاحد ولا حتى القرى المجاوره كان فيها
مسيحي واحد , دخلت الكُتّاب و يتهيألي أنا من أخر جيل دخل الكتاب و شاف الفرقله ( بتاعة
الشيخ عوضين ) , و حفظت ما تيسر من القرأن , بتاع 6 اجزاء ( و نسيتهم للأسف ) !! .
.
المهم الجو الخالي
من مسيحيين ده كان جو مناسب جدا انك تسمع أفلام و حكايات و خزعبلات عن المسيحيين المصريين
, الطرف الأخر , البعبع جايز , و تشويه تام لكل ما هو مسيحي في مصر , ماعرفشي مصدر
الخزعبلات دي كانو مشايخ الجهل و لا من صنع الدوله عشان تعمل فتنه مستمره ( من باب
: فرّق تسد ) .
.
لما دخلت ثانويه
عامه برضه لجل حظي ماشوفتش طالب مسيحي واحد في الفصل بتاعنا , و زادت الأفلام و الخزعبلات
عن البعبع اللي اسمه المسيحي , لحد بقى ما دخلت الجامعه و اتخبطت في الواد أغاثون
( ده اسم تقابلو بيه ربنا يا جدعان ) , و أول كلام بينا كان في اتوبيس شرق الدلتا راجعين
من الكليه و انا بقوله يا اغاثون النقابه عامله فطار جماعي ( كنا في رمضان ) هتيجي
معانا ولا ايه ؟ لحد كده ماكنت اعرف يعني ايه طالب مسيحي , اغاثون ابتسم و قالي انا
مسيحي يا محمد فطار ايه ؟.
.
و من يوميها وبقى
اغاثون لازق فيا زي الأتب , لحد ما خلصنا الجامعه و كنا بلا فخر من أفقر الطلبه في
كلية الصيدله أنا و أغاثون ( إيد واحده ) , بعد كده دخلت الجيش سلاح الخدمات الطبيه
و طبعا اغاثون معايا , و لما اتوزعنا روحت سريه طبيه في لواء مشاه و برضه اغاثون معايا
في نفس الأوضه .
.
قلت مابدهاش بقى
انا هسافر السعوديه بعد ما خلصت الجيش , انقطعت اخبار اغاثون كام يوم و لما سافرت لقيته
داخل عليا الصيدليه في الدمام و بيقولي هات مفاتيح شقتك هروح اتفرج عالتلفزيون شويه
لحد ما تجيلي بالليل و هبات معاك , مش انت عندك هوت بيرد ؟!! .
.
عايز أقول لاصحابي
المسلمين اللي عايشين بطريقة ( اوعى ايدك كده ملخت الكُم ) إن الواد اغاثون مسيحي صحيح
بس له إيدين اتنين ( زينا بالظبط ) و جوز رجول ( زينا بالظبط ) و طحال واحد و بنكرياس
واحد ( زينا بالظبط ) و مالهوش ناب طويل ولا بياكل العيال الصغيرين و إنه بعد عِشرة
سنين طويله ماكلمنيش و لا مره عن اني اعتنق المسيحيه ولا انا جبت له سيرة الإسلام
, و كان الهوت بيرد و قهوة عمك حسني بتاع الهايكستيب بتجمعنا في الخير عادي خالص
!! .
.......................................................................................................................
Mohamed
Hussein
28
ديسمبر 2014·
أهم 8 حاجات في
تاريخ البشريه .
.
تفاحة نيوتن ,
و جزمة سيندريلا , و رقبة صوفيا لورين , و البانيو بتاع أرشميدس , و صوابع زينب و اللاب
توب بتاعي داهو , و جون مجدي عبد الغني في كاس العالم , و شنب الشيف شربيني .
.........................................................................................................................
Mohamed
Hussein
28
ديسمبر 2014·
حلاوة المولد بقت
غاليه اوي , شكلي مسافر من زمان , فين أيام ما كان كيلو حلاوة المولد ببلاش و تاخد
عليه اتنين كيلو هديه .
العبد عامل علبة
حلاوة المولد مليان حاجات من الناشفه دي و كلها (ميني ) و ب 150 جنيه !! ,.
زمان كان بيجيلنا
حصان حلاوه للولد و عروسه حلاوه للبنت و تلاقي الحصان ب 2 جنيه و العروسه ب 2 ونص
, يعني الليله دي كلها تخلص بخمسه سته جنيه .
.
كل سنه و أهلك
بخير و سعاده يا مصر .
................................................................................................................................
Mohamed
Hussein
27
ديسمبر 2014·
مسابقات في الطبيخ
!! ..........من كتاب ( الشيف الهمام في جعاليص الكلام ) للكاتب : علاء بن الشربيني
.
.
في مسابقة بتيجي
عن الطبيخ في التلفزيون , جابو الطباخين المشاهير و منهم علاء الشربيني و جابو الطهاه
الهاويين ( متسابقين ) عشان يطبخو و الشيف المشهور يقول رأيه , طب لحد كده كويس باعتبارنا
بقينا فاضيين أخر حاجه و بدل يعني مانشم في صوابع رجلينا أهي حاجه تسلينا .
.
المهم بقى , المتسابق
اللبناني تقريبا و كان تخين شويتين و عامل سمك امبارح و طبعا المفروض الشيف الجبار
علاء الشربيني داق من السمك بتاع الواد المتسابق التخين ده , اسمعو بقى رأي علاء الشربيني
ايه عشان تعرفو إننا ههههههههههههههههههههه و عهد الله ههههههههههههههههههه أه والله
احنا ظاهره حنجوريه و بتوع كلام مجعلص .
.
الشيف علاء الشربيني
( بيشتغل طباخ على فكره ) قال للمتسابق : انت السمك بتاعك معمول بشكل جميل و التتبيله
معقوله و استخدمت كذا و كذا بس للأسف التتبيله بتاعتك مش عامله شخصيه للسمك !! .
أه و الله قاله
كده ( التتبيله مش عامله شخصيه للسمك ) , وانا عندي ارتيكاريا من الكلام المجعلص الأجوف
اللي صاحبه بيخبطه كده و خلاص من غير مايعرف معناه ( ماعنديش أرتيكاريا من التتبيله
) , يعني إيه التتبيله مش عامله شخصيه للسمك يا مولانا الشيف ؟ تطلع ايه شخصية السمكه
دي يا جناب العمده ؟ يعني السمكه تبقى ماشيه في المايه كده و نافشه خياشمها و رافعه
ديلها في السما , و يا ترعه اتهدي مافيكي أدِّي ؟!! .
.
طب طالما الشيف
علاء الشربيني بيعرف يقول الحاجات دي ( التتبيله مش عامله شخصيه للسمكه ) يبقى أكيد
ينفع جدا يدّي محاضرات في التنميه البشريه أو يؤلف روايات زي غاده السمان و احلام مستغانمي
!! .
...............................................................................................................................
Mohamed
Hussein
27
ديسمبر 2014·
دار الإفتاء المصريه
....... عندما يكون الأعور أسوأ من الأعمى !! .
.
بتقولك ايه بقى
؟ يجوز تهنئة الأقباط بأعيادهم بشرط استخدام ألفاظ اسلاميه !! .
وانا على أد ما
قريت في كتب الأدب و الشعر العربي من أول الجاهلي للأموي والعباسي و حتى الصعاليك ماعرفشي
يعني ايه ألفاظ أو لغه اسلاميه دي , ماعرفشي إن الدين الإسلامي نزل و جاب ألفاظه معاه
يعني له لغه و حروف و أبجديات خاصه بيه .
إلا إذا كان المقصود
هو المصطلحات , يعني بلاش نتكلم بالإنجليزي , بلاش مصطلحات الفرنجه , بلاش تبوسني في
عنيا , بلاش ميري كريسماس و بلاش عيد ميلاد مجيد .
طب نعمل ايه يا
دار الإفتا ؟ نقول إيه يعني ؟
استنو أنا هقول
لكو نعيّد على الأقباط إزاي من غير ما نزعل مننا دار الإفتا و يحطو السيخ المحمي في
صرصور ودننا .
احنا ندخل عالمسحيين
في احتفالات الكريسماس و نقول لهم : عيدك مبارك يا أخ يوحنا , بُوركت يا أخ جون , من
العايدين الفايزين يا أخت جاكلين , رمضان كريم يا ست أم بيشوي !!.
...............................................................................................................................
Mohamed
Hussein
27
ديسمبر 2014·
علمتني الأيام
.
- من أد 50 قول
70 سنه كده طفح البترول في أرض الخليج , و البترول بقى بفلوس , و الفلوس بقت زكايب
زكايب , و عليها : عُمّال رايحين و عمال جايين , الخير كان هنا , ناس مسافره عشان تعرق
و تكوّن نفسها و بتاخد أجر و لو إن الغربه تُربه!! .
.
بس الشر كمان كان
هنا , مشايخ و فكر عجيب , حنفية تكفير و اتفتحت , وهابيه و إخوان و سلفيين و داعش و
شباب مجاهدين و كل واحد يقول مفتاح الجنه معايا و معايا كمان قايمه بأسماء الناس اللي
هيدخلوها , اسمك ايه يا حاج ؟ مصطفى عبد السميع ابرهيم , طب استنى كده , مصطفى مصطفى
مصطفى , لا اسمك مش في الكشوفات يا مصطفى , يا شباب هاتو الأر بي جي و اقتلو اخوكو
مصطفى عشان ده كافر .
- و بما إن مصطفى
اسمه مش في الكشوفات فأكيد أكيد إن جورج و ميشيل و ريتا مش موجودين , يا شباب , الأر
بي جيه يا شباب .
.
- و بس كده , طلع
الجيل بتاعنا متعبّي بأفكار ( البترودولار ) , و تحس إن دماغه مليانه جاز وقطران ,
توب قصير و دقن طويله أو متوسطه حسب الفصيل بتاعك , نقاب و حجاب و ألف كتاب عن وجه
المرأه و كعب المرأه و صوت المرأه و مناخير المرأه و الطحال بتاع المرأه ( أفتنا يا
شيخنا : ما حكم الإسلام في عمل أشعه مقطعيه على طحال المرأه بدون وجود محرم ) ؟!.
.
- و بقينا احنا
محتاجين نبدأ الحياه و أبجدياتها و نربّي ولادنا من أول ألف باء , من زرع و حصد , زي
إنسان الغاب , لا انسان الغاب كان على الفطره ( و ماعندوش أر بي جي ولا صكوك غفران
) , و العك والعجن بتاع الخمسين سبعين سنه اللي فاتو محتاج ثوره حقيقيه , ثوره بتقول
يابو محمد علّم محمد ابنك إنه ممكن يصحاب مايكل و قول لفاطمه تصاحب كريستين , ثوره
بتقول إن الوقت اللي ضيعناه في التكفير محتاجين نبذل أده مرتين في التفكير , و الوقت
اللي ضيعناه في التدوير في كشوفات أهل الجنه يكفي جدا اننا نزرع فيه مليون شجره و نقرا
مليون كتاب , ساعتها بس هنقدر نهز عرش أمريكا اللي هي الشيطان الأعظم و نزلزله .
.
- يا خرابي , دانا
حتى الأيام علمتني إني أكتب بوست متر و نص أد قماشة البنطلون ( الله يرحمك يا عم جلال
) .
.................................................................................................................................
Mohamed
Hussein
26
ديسمبر 2014·
الراجل اللي حكيت
عنه من كام يوم اللي هو الشحات اللي ماشي في الشارع الساعه 1 بالليل و معاه ميكروفون
صغير و طبله , اللي صوته رائع و طبلته سليمه , الفنان الشحات يعني .
النهارده اكتشفت
انه بيلف العصر كمان بنفس الطريقه بس بربابه مش طبله و نفس الحكايه عزفه عالربابه رائع
...ما الخيبه لا يكون الراجل ده قائد أوركسترا و الزمن جار عليه !! .
و امتى بقى حالنا
هيتصلح ؟ أقولك انا , لما المليونيرات و المشاهير مايكونوش مشايخ بهاليل من نوعية حسان
و الحويني ولا شوية صيع من نوعية السبكي و اورتيجا و فيفي عبده .
هيتصلح حالنا لما
العالِم و الفنان المبدع الحقيقي يبقو هما المشاهير و الصفوه مش يوصل بيهم الحال للتسول
في شوارع المحروسه .
.................................................................................................................................
Mohamed
Hussein
26
ديسمبر 2014·
في ليبيا قتل الناس
بقى اسهل من شرا الساندوتشات , ده مسيحي نقتله , ده ضدنا ياخد رصاصتين , الناس بتمشي
بالسلاح في الشارع مش مهم المحفظه ولا البطاقه المهم حتة السلاح تبقى في إيدك وانت
نازل هي و فرشة الشعر , و في مصر بعد صلاة الجمعه قابلني بتاع 15 ست سوريه بيشحتو و
معاهم أطفالهم , شريفات سوريا بيتسولو في بلاد الله .
طب تخيل بس إنك
نازل تشتري أكل لعيالك في مصر فخدت رصاصتين من الإرهابيين أو تخيل إن بيتك اتهد و هربت
لبلد تانيه و مراتك و ولادك نزلو يشحتو قدام الجوامع و الكنايس ؟ عارف يعني نعمة الأمن
و يكون عندك بيت 4 حيطان يستروك ؟ عارف يعني إيه جيش مصر و لا لسه مش ناوي تفهم ؟!.
.............................................................................................................................
ليست هناك تعليقات:
إرسال تعليق