Mohamed
Hussein
8 يناير 2015·
و الفلاح القراري
مابيخافش , ولو على رقبته , برضه هيقول اللي هو عايزه , تقريبا الأرض بتنشّف عوده و
تحمّصه , يا جبل ما يهزك ريح .
.
ليا واحده ست قريبتنا
كل ما أقعد معاها تقول لي أنا بناتي الإتنين متجوزين , الأولانيه متجوزه فلان و ده
بحبه زي عيل من عيالي واكتر و التانيه متجوزه علان و ده مش بطيقه و لما بشوفه بقول
له : والله يابني مانا طايقاك , هو انت ربنا اللي هتاخد روحي ؟! .
و لما وزير الصحه
راح يتفقد أحوال الغلابه في مستشفى حكومي وقع حظه الهباب في راجل من دول , من نوعية
الست اللي فوق , وأكيد الراجل الفلاح الغلبان مرّ عليه ألف موظف من أول مدير المستشفى
لأصغر عامل فيها و مفهّمينه يقول ايه لما وزير الصحه يدخل عليه , الراجل شاف وزير الصحه
من هنا وقاله : يا باشا عليا الطلاق ما فيه خدمات ولا نيله !! .
....................
فلاح و ليا الفخر .
...........................................................................................................................
Mohamed
Hussein
8
يناير 2015·
و لما السيسي بقى
رئيس مصر أول حاجه عملها هي إنه تبرأ تماما من الإرهاب بكل أنواعه و طالب كل دول العالم
بكده و بدأ حرب معلنه لمواجهة الإرهاب في مصر .
يعني باختصار سد
البيبان على أي نطاعه غربيه ممكن تحصل مستقبلا و مصر غسلت إيديها من أي فعل إرهابي
ممكن يحصل خارج أراضيها .
بتخيل إن البهلول
مرسي كان لسه الرئيس و بيطالب بالحفاظ على حياة الخاطف ( الإرهابي ) و المخطوف . وأصلا
هو عضو في تنظيم إرهابي مدرج في قوائم أغلب دول العالم , يا ترى كان ممكن ايه يحصل
بعد حادثه باريس دي ؟!
مش بعيد كنا لقينا
جيوش فرنسا و بريطانيا و أمريكا على حدود اسكندريه جايين مع الموجه و السبب هو محاربة
الإرهاب اللي بترعاه مصر برئاسة محمد مرسي !! .
الدول دي بتحتاج
أي حجّه او افتكاسه أو ذريعه عشان تسيطر على اقتصاديات الشرق الأوسط و تخربه حتى لو
وصل الأمر لسيطره عسكريه أو خلق حرب أهليه , حجتهم في العراق كانت أسلحة دمار شامل
و في سوريا كانت بشار الديكتاتور و في أفغانستان و باكستان كانت محاربة الإرهاب و في
ليبيا كان مصنع البمب بتاع القذافي .
...........................................................................................................................
Mohamed
Hussein
8
يناير 2015·
نقول تاني مع إنها
أبجديات يعني ألف باء .
.
- عظمة دينا الإسلامي
في رحمته .... أفأنتَ تكره الناس أن يكونو مؤمنين ؟!.
.
- و عظمة سيدنا
النبي مش في توبه القصير ولا شعره الطويل , عظمته في أخلاقه و معاملاته , مع أهله و
زوجاته واصحابه و اعداؤه ... ولو كنت فظاً غليظ القلب لانفضو من حولك .
.
- و عظمة المسلم
في اعتزازه بدينه مش في احتقاره لباقي الأديان السماويه .
.
و تفضل جوايا محبه
خاصه جدا لسيدنا المسيح عيسى و أمه البتول و لأقباط مصر اللي شايلين معانا الأوفه أم
ودنين .
.
يا الله يا ولي
الصابرين , شكلنا كده محتاجين مجهود كبير أوي عشان نمحى أثار 50 سنه من خطب المشايخ
اللي منقوعه في براميل البترول و العقول اللي مليانه حاز .
هو انا ياهبل يابن
الأهبل هدخل النار عشان بحب محمد بن عبد الله و عيسى بن مريم ؟!! .
...............................................................................................................................
Mohamed
Hussein
8
يناير 2015·
ضحكة الصبح بدري
.
ممدوح حمزه : الشباب
غضبانين جدا و بيكلموني على تويتر و عايزني اعمل عصيان مدني !! .
بس انا شاب يا
عم ممدوح و مش عايزك تعمل عصيان مدني ولا تعمل محشي كرنب حتى , عشان عارف إن أخرك حاليا
هو إنك تعمل حواجبك .
.......................................................................................................................
Mohamed
Hussein
7
يناير 2015·
حكاية الأعرابي
و الديب ..................... هذه بضاعتكم
.
زمان قريت حكايه
صغيره , بيقولك واحد أعرابي كان بيسرح بالمعزه بتاعته في الصحرا و في يوم من الأيام
لقى ديب صغير أوي لسه رضيع مرمي جنب صخره و بيتكتك من البرد , الراجل الأعرابي صعب
عليه الديب و قرر انه ياخده معاه للخيمه اللي عايش فيها , قال يعيش معانا و لما يكبر
يبقى حمايه ليا و سند .
و بقى الأعرابي
كل يوم يحلب المعزه و يقسم لبنها بالنص , يشرب نصه و يدّي للديب الصغير نصه التاني
, يعني نقدر نقول إن الديب النونو كان بيرضع من لبن المعزه عشان يعيش .
مرّت الأيام و
الديب الصغير كبر و بقى له مخالب و انياب , الأعرابي خرج من خيمته وراح يصطاد و ساب
الديب مع المعزه ( اللي هي أمه ) و رجع لقى الديب واكل المعزه !!
.
و بس بقى , ده
كل اللي حصل في حادثة الهجوم الإرهابي في فرنسا , الغرب لقى ديب صغير متكتك من البرد
اسمه الإرهاب , فقرر إنه ياخده و يربيه و يتحامى فيه ( يستخدمه يعني ) و بقى يرضّعه
و يصرف عليه و يمده بالسلاح و يضمن له الحمايه القانونيه و ( حقوق الإنسان ) , بس أكيد
بييجي اليوم اللي الديب بياكل فيه الأم اللي ربته !! .
.
هذه بضاعتكم رُدّت
إليكم .
..............................................................................................................................
Mohamed
Hussein
7
يناير 2015·
...داعش
تعلن مسئوليتها عن الهجوم على صحيفه شارلي إبدو في فرنسا , أكتر من 12 قتيل و عشرات
الجرحى .
الصحيفه كانت ناشره
رسوم مسيئه عن سيدنا النبي و مش بعيد يكونو الكفره ولاد الحرام دول قالو على سيدنا
النبي انه ارهابي و العياذ بالله , او قالو إن الإسلام انتشر بالعنف .
فقامو المجاهدين
بتوع داعش خدو السلاح و القنابل و المتفجرات والسيوف والسنَج و دخلو عالصحيفه و قتلو
الناس و فرتكوهم و هما بيرددو : دينا الإسلامي ده دين السماحه و التسامح و السماح يا
ولاد *** الكلب , و طاخ و طوخ و طيخ , ده دين الرحمه والسلام يا كفره ياولاد ال
#@%&*) و بومممممممممممم .
..........................................................................................................................
Mohamed
Hussein
7
يناير 2015·
درجة الحراره كانت
7 في الشارع و احنا العصر , أومال الساعه 12 بالليل هتبقى كام ؟! قولي يا حكومه ماتتكسفيش
.
طب نزّلو اعلان
و تحذير في التلفزيون و الراديو إن اللي هيسافر على طرق صحراويه في المطر و البرد و
الأعاصير دي ماينساش يشيّك على عربيته قبل السفر , يعني كاوتشاتك منفوخه و معاك شنطه
اسعافات و مشيّك على مايتك و زيتك و سمنتك و معاك مجدافين و منطاد و حلة محشي محدش
ضامن الظروف , أصلي بحب النهايات السعيده , ثواني هستعجل لكو على المراكبي .
..........................................................................................................................
Mohamed
Hussein
7
يناير 2015·
يبدو إن زيارة
السيسي المفاجأه للكتدرائيه فعلا عملت حالة تربنه في عقول الإخوان و الكولجيه , حاجه
كده زي ما يكون داس على دماغهم قطر و هما نايمين , منهم اللي اختفى فجأه و تقريبا أعلن
الحداد لمدة 9 سنين على روح علية الكوله و دفتر الشعارات و صورة جيفارا , و اللي سارح
عالفيس يهلفط بكلام هو نفسه مش فاهمه و اللي قاعد حاليا يسكر و يضرب بانجو و بيكلّم
صوابع رجليه !!.
.
و تسألني بقى مين
هو السيسي ؟ أقولك باختصار : هو الراجل بتاع : ضربه بالمرزبه و لا 100 بالشاكوش !!
.
......................................................................................................................................
Mohamed
Hussein
7
يناير 2015·
الرائعه إسعاد
يونس في صاحبة السعاده بتفتّش عن مصر الجميله , مصر الطيبه اللي ليها نكهه مختلفه عن
بقية بلاد ربنا .
اللي بتعمله اسعاد
يونس اسمه : رحلة البحث عن هوية وطن عظيم بس تايه من فتره ما بين أزايز الكاتشب و براميل
البترول !!
..............................................................................................................................
Mohamed
Hussein
6
يناير 2015·
السيسي رجع من
الكويت على الكتدرائيه عشان يحضر احتفالات عيد الميلاد , أول رئيس مصري يعمل كده تقريبا
, الحركه دي في لعبة السياسه اسمها جون بحرفنه , و الجون المره دي دخل في شبكتين ,
شبكة الخرفان و الإسلامجيه بتوع تهنئة الأقباط بعيدهم حرام , و جون في شبكة الكولجيه
بتوع السيسي هيتصالح مع الإخوان , و الحقيقه ان السيسي بيصالح مش بيتصالح , بيصالح
المصريين مش بيتصالح مع الإرهابيين .
....................................................................................................................................
Mohamed
Hussein
6
يناير 2015·
حوار البترودولار
................. حوار الطرشان .
.
الشاب : اتفضل
يا مولانا , مدّ إيدك باسم الله .
الشيخ : إيه دول
يا ولدي الكريم ؟
.
الشاب : دول
79 ألف جنيه يا مولانا
الشيخ : أيوه بتوع
ايه يعني ؟
.
الشاب : 50 ألف
جنيه تمن خطبتك الأخيره , و 20 ألف عشان البؤين بتوع الثعبان الأقرع و تكفير مخاليق
ربنا و الدعاء على اليهود و النصارى وقصه الراجل اللي كان بيدعي قدام الكعبه و مش لاقي
ياكل و فجأه جه واحد لابس أبيض فابيض و رمى في حجره شنطه مليانه فلوس , و 9 ألاف عشان
المرتين اللي عيطت فيهم في الخطبه , مانت عارف كل مره بتعيط فيها و تتشحتف ب 5 الاف
.
الشيخ : عيب يا
بني عيييييييييييب , رجع فلوسك , انا مش ممكن هاخد جنيه واحد على خطبتي و دعوتي إلى
طريق الحق , و الله ولا جنيه , إي و ربي .
.
الشاب : يعني إيه
يا مولانا ؟ مش عايز فلوس ؟
الشيخ : لا يا
ابني , أنا قلت مش عايز ولا جنيه , انا عايز حقي بالدولار , مش باخد بالجنيه , هو الجنيه
بيجيب ايه دلوأتي ؟
.
الشاب : أحسنت
يا شيخنا , بارك الله فيك .
الشيخ : إنما ليه
حسبتو المرتين اللي عيطت فيهم مره ب 5 و مره ب 4 ؟
.
الشاب : عشان المره
التانيه عيطت يا مولانا و نسيت تتشحتف .
الشيخ : طيب يا
ابني روح بقى غير الفلوس دي وهاتي لي مكانها دولارات , بارك الله فيك فأنت شاب مجتهد
و متقن لعملك , قال رسول الله صلى الله عليه و سلم : إن الله يحب إذا ...
الشاب ( مقاطعا
) : طب بالإذن يا مولانا عشان ألحق شركات الصرافه ( بتاعتنا ) قبل ما تقفل .
................................................................................................................................
Mohamed
Hussein
6
يناير 2015·
لأطيب مخاليق ربنا
ميريام أيوب و للرائعه Hanan
Wasif,
و أختي الجميله أوي Rita
Toty
.
و لصديقي المبدع
عشرة الغربه و القروانه Nabil
Thabet
, و للجدع أوي Gehad Azez , و لصديقي المثقف المفكر ابو اسلوب بديع دكتور
مايكل اللي كنت بنطق اسمه في الأول ميشيل !! Michael Hilal وحبيبي البرادعاوي Michael Yousef Younan و للواد جون ابو دم خفيف اللي كل يوم يرازي فيا و
عايز يشتري شقة التجمع ب 40 ألف Uohanna R. Shafik
,و لأختي الجميله سها مع إنها مسلمه بس أهو غتاته مني كده Soha Zaki و هي فاهمه طبعا .و صديقي بتاع بلاد بره Youssef Moussa, و صديقي وابني الراجل الصغير Kiro Maher
.
و لكل أقباط مصر
في الداخل و الخارج , كل سنه وانتو طيبين بمناسبة عيد الميلاد المجيد , يارب أيامنا
دايما تبقى أعياد
..................................................................................................................................
Mohamed Hussein
6
يناير 2015·
امبارح ماعرفتش
انام طول الليل , حاسس ان جسمي سخن , رشح و زكام و كحه مش بتقف , سامع صوت الهوا بره
و الخبط و الرزع و متغطي ب 3 بطاطين و برضه بردان .
طب انا كنت راكن
العربيه اللي حيلتي قدام البيت , يعني ممكن اشوفها من الإزاز بتاع شباك أوضة النوم
, وانا سهران بقى بتحايل على النوم انه ييجي سمعت صوت تريله ماشيه في الشارع ( الكلاكس
بتاعها ماركه مسجله ) , قلت في نفسي طب نفترض ان الراجل سواق التريله ده ايده اتجمدت
في الجو اللي ما يعلم بيه إلا ربنا ده و لزقت في الدركسيون , و إنه طلع بالتريله بتاعته
فوق عربيه من اللي راكنين , و انا سمعت صوت ( الطلعه دي ) و خدت بطانيتي و لفيتها حواليا
زي المحشايه و قمت ابص من ورا الإزاز و اكتشفت ان التريله طلعت فوق عربيتي انا و استقرت
الحمد لله !! .
.
يا ترى هعمل ايه
في موقف زي ده ؟ أكيد طبعا مش هسكت , دي العربيه اللي حيلتي , لا مش هسكت , ده على
جثتي , أكيد إني هرجع للسرير بسرعه و اقول للراجل سواق التريله في سري : أنا مش مسامحك
و الله مانا مسامحك !!.
..................................................................................................................................
Mohamed Hussein
5
يناير 2015·
صحيفة تركية: مشعل
يستعد للإقامة بأنقرة بعد مطالبة قطر له بمغادرة الدوحة !! .
.
واهو الراجل مش
مقصّر أهو , نضال نضال مش أي كلام , من قصور دمشق و الأسد لقصور طهران لقصور الدوحه
لقصور أنقره ., طب ماتخادوني أناضل معاكو و النبي ؟ .......... شيكات بكل العملات اللي
خلقها ربنا , و أرصده في البنوك , و قميص عثمان معاه في شنطة السفر ( اسمه تحرير القدس
) .
.
اصبرو شويه على
خالد مشعل عشان أنا حاسس إنه الخطوه الجايه هيكون زهق و هيجيب من الأخر بقى بدل اللفّ
و الدوران , و هتقرا خبر بيقول : خالد مشعل يستعد لمغادرة أنقره للإقامه في تل أبيب
!! .
................................................................................................................................
Mohamed Hussein
5
يناير 2015·
أمي جداً جداً
.
بمناسبة موسم الإمتحانات
و إن الزوجات و الأمهات أعلنو من كام يوم حالة التأهب القصوى و لبسو البياده بتاعة
الجيش و ( مأفّزين ) , معسكرات مغلقه و تدريبات على أعلى مستوى , حالة تربّص بالأعداء
( اللي هما المدرسين اللي بيحطو الإمتحانات ) و تبادل للمعلومات الإستخاباراتيه بين
الأمهات و بعض و مناورات و استطلاع و جس نبض
.
أمي مابتعرفشي
تقرا و تكتب ( مابتعرفشي تفك الخط يعني ) , حكت لي انها راحت المدرسه يوم واحد و ماكملتوش
, راحو جابوها من المدرسه وقالوها أبوكي تعبان و انتي رايحه المدرسه !! .
.
المهم يعني بما
إن الحاجه أمي ربنا يديها الصحه مابتعرفشي تقرا يبقى بالتالي مابتعرفشي الأرقام , و
بالتالي مابتعرفشي في الساعه , إنما بتعرفها بالتقريب , بالوَيَم يعني و عمرها ما خيّبت
في كده , فراسه بقى تقدر تقول , يعني أقول لها صحيني الساعه 6 الصبح يامه تقوم مصحياني
, طب عرفت منين ؟ بتحسبها بحسبه تقريبيه لشروق الشمس .
.
نفس حالة التربص
و التأفيزه دي عاشت فيها امي لمدة 20 سنه تقريبا لحد ما علمتنا احنا ال 6 و دخلتنا
الجامعه بس أيامينا مكانشي فيه فلوس والحاله كانت جيييييييييم , و لما دخلت الجامعه
مكانتش امي تعرف الكلية بتاعتي كام سنه و كل مره أقول لها انا نجحت يامه تقولي : باقي
كام سنه يا محمد ؟ مش هتخلّص بقى عشان تشيل الحمل معايا ؟! و انا اقول لها حاضر هااااااااااانت
.
.
بدأت أنا اشتغل
من سنه تانيه في الكليه , و كانت أمي بتطلب مني دايما أجيب تقدير في الجامعه و تقولي
لازم تجيب ( جداً جداً ) , هي طبعا تقصد جيد جدا بس مابتعرفشي تقولها , و لما النتيجه
تظهر أقول لها جبت جداً واحده يامه بس , تقولي بخاطره يابني مانت بتشتغل لنص الليل
و هتذاكر امتى يعني .
..................
و قلْ ربِّ ارحمهما
كما ربياني صغيرا .
...................................................................................................................................
Mohamed Hussein
5
يناير 2015·
كان عندي دكتور
في الكليه دمه خفيف , فاكره و هو بيشرح لنا تحضير ماية الأكسجين hydrogen
peroxide
, و كان له لازمه دايما بيقولها : اشتغل بما يرضي الله و خدلك حسنتين تدخل بيهم الجنه
بدل ما تتنفخ في نار جهنم .
.
الأرصاد بتقول
إن بكره و بعده هنبقى في مصاف الدول المتقدمه اللي في الشمال أوي دي , اللي هي في العبّ
بتاع طائر البطريق و الدب القطبي , و مش بعيد الواحد يدخل كارفور يلاقيهم بيبيعو البتاعه
اللي عامله زي الجرار الزراعي اللي بتشيل التلج من قدام البيوت , يعني داخلين على يومين
اللي عايز يتدفّى فيهم يبقى ينام في التلاجه .
.
طب فيه غلابه كتير
في الشارع هتلاقيهم ليل و نهار , ناس على باب الله أو بيّاعين سرّيحه أو حتى عساكر
واقفين ينظمو المرور , وانت مهما كنت مش فقير , الحكايه مش محتاجه انك تبقى غني أوي
عشان تعرف تتصدّق في ظروف زي دي , عندك أي حاجه تقيله قديمه حتى لو مقطّعه خدها في
إيدك وانت نازل , جاكت قديم أوي أو بطانيه أو بلوفر , و ماتقولشي بعدين هبقى أدوّر
عليها , لا البرد مش هيستنى , جبت حلاوة المولد طبعا أشكال والوان , أيشي حمصيه و سمسميه
و فوليه , و ولادك كلو منها لما زهقو و أكيد متبقّى منها كتير , وانت نازل خد في ايدك
بقية علبة حلاوة المولد و وزع عالناس الغلابه , هتدفيهم برضه .
.
و يعني من الأخر
كده , دي فرصه تعمل حاجه بما يرضى الله و تاخد لك حسنتين تدخل بيهم الجنه بدل ما نتنفخ
كلنا في نار جهنم .
..........................................................................................................................
Mohamed Hussein
4
يناير 2015·
يا مصر قومي و
شدّي السيفون !! .
.
واحد كان عندي
في الأصدقاء ( قبل البلوك ) , مهندس تقريبا أو دكتور , احتمال يكون استاذ جامعه , ملعون
أبوه التعليم في مصر بقى , لما مولانا فاتح صفحته للدعاره الفكريه , و نازل نشر من
شبكة رصد و وكالة الأناضول , و حوالين منه شوية عيال من اللي هما بيبقو ماشيين ورا
الرقاصه دول واسمهم كلهم ( ترتر) , أيوه يعني اللي هما بتوع ( أيوه يا أبلتي جاي )
, و هو يقول له : أسف لو كنت جرحت شعورك يا ترتر ( مشهد من فيلم الراقصه والسياسي
) .
.
المهم أخر زبون
للنشر في صفحة الدعاره الفكريه عند صديقي السابق اسمه ( شهاب ) , وكالة لا مؤاخذة شهاب
للأخبار أم ترتر , ناشره صوره لشاب فلسطيني ميت ( الله يرحمه ..الفاتحه لروحه يا رجاله
) , و قالك ايه بقى العنوان : أول قتيل فلسطيني برصاص حرس الحدود المصري في 2015
!!
.... وهيييييييييييييح
بقى , التراتير كلهم عملو شير ولايك و تعليقات من نوعية حسبي الله و نعم الوكيل في
جيش الكفره ( اللي هو جيش مصر ) , أدي جيش السيسي الكلاب ( اللي هو جيش مصر ) , و عبيد
الإنقلاب ( اللي هما عساكر جيش مصر ) بيقتلو خيرة شبابنا يا عالم , أه و ربنا زي ما
بقولك كده .
.
و لما دورت على
أصل الصوره أم ترتر دي مالقيتشي لها أصل غير عند وكالة شهاب , مالقيتشي لها حتى مصدر
في و كالة البلح , ولما افترضت ان الصوره حقيقيه جه في ذهني سؤال واحد بس باعتبار إن
أبويا علمني ماكونشي ترتراوي و لا بنظّم المرور زي محمد سعد في فيلم اللمبي .
.
السؤال بيقول
( بفرض صحة صورة وكالة شهاب للدعاره الفكريه ) : لو انت حرس حدود في مصر و دخل عليك
شاب من دوله مجاوره هتقتله ليه و ازاي؟ يعني مثلا الشاب ده قرّب من العساكر وقال لهم
معاكو سجاره يا بلدينا قامو مفرغين فيه الرصاص ؟ ولا الشاب كان جايب حلّه فاضيه و داخل
عالعساكر بيقول لهم والنبي هاتولنا أي حاجه ناكلها أصل عيالي مش لاقيين ياكلو قامو
عساكر الجيش المصري اتشاورو كده مع بعض و قامو مفرغين في الواد الرصاص برضه , يجرى
ايه لو شاب اسمه اكس قرّب من العساكر و قتلهم أو رمى عليهم قنبله ؟!! .
.
طب لو شاب قرّب
من نقطة حدود فيها جيش لأي دوله في العالم و رفض إنه يثبت مكانه و اتقدم ناحيتهم أكتر
المفروض العساكر في الدوله دي يعملو ايه ؟ الإجابه عند أي عقل بني أدم مش عقل حُمّيري
مليان جلّه !! .
.
معلومه يعرفها
أي واحد ( بشرط مايكونشي من النوع الحصاوي ) : في الجيش المصري ( وأي جيش حتى الموزمبيقي
) , و في قلب وحدات الجيش نفسها بيبقى فيه عساكر واقفين خدمه في الكمين , ولو حضرتك
قرّبت منهم بيطلبو منك تثبت و تقول كلمة السر وانت مين و رايح فين ( ولو راكب عربيه
تطفي النور ) , في حالة امتناعك عن الإجابه أو عدم معرفتك لكلمة السر بيفرغو فيك البندقيه
حتى لو كنت وزير الدفاع نفسه ( دي القوانين العسكريه ) يا ولاد سنيه بشتكها !! .
.
#يارب #انصر
#مصر #وجيشها
#يا #مصر
#قومي #وشدي #السيفون
...............................................................................................................................
Mohamed Hussein
4
يناير 2015·
بناتي راحو الإمتحانات
, حتى البت الأوزعه أم 4 سنين عندها امتحان في كي جي 1 , مراتي و لفيف من أمهات التلاميذ
متشعلقين في بوابة المدرسه كأنها مقام أم هاشم , و نازلين أدعيه و قرأن و تواشيح وابتهالات
, وبيراجعو مع بعض مصادر المذاكره و المناهج , و انا واقف جنب العربيه , درجة الحرارة
9 يابه الحاج ابراهيم , صوابعي بيضه زي الشمع و وداني مش لاقيها , عايزه مننا إيه يا
حكومه ؟!.
................................................................................................................................
Mohamed Hussein
4
يناير 2015·
مرات جورج كلوني
بتقول انها بيجيلها تهديدات من السلطات المصريه و مش عارفه تترافع عن مراقيع الجزيره
المحبوسين , و علاء الأسواني ( بطل معركة اللمون ) بيقول ان الإعلاميين مضغوط عليهم
و بيجيلهم تهديدات عشان مش اطلع معاهم في التلفزيون ( قال يعني ماشبعشي ظهور في التلفزيونات
و لبّس جيل بحاله في الحيطه بأم فزلكته دي ) .
و عم مصطفى بتاع
الجراج بيقول إنه بتجيله تهديدات من الحكومه لو سمح لعربية أي برادعاوي انها تركن عندهم
و أم قنديل بتاعة الفجل بتجيلها تهديدات من الحكومه عشان ماتبعشي فجل للإخوان .
و الحكومه أصلها
فاضيه لمرات كلوني و أم قنديل بتاعة الفجل و عم مصطفى بتاع الجراج و عم علاء بتاع اللمون
.
وانا بعد ما قريت
الأخبار دي بقيت أقلق واتوغوش و متوجس خيفه , فجأه كده لقيت جرس الباب بيرن , يا ترى
مين هيجيلنا الساعادي ؟ , استر يارب , قلت بس ده أكيد تهديد من الحكومه , ناديت من
ورا الباب و قلت مين ؟ انت جايب لي تهديد من الحكومه ؟ ... لقيته بيقولي حكومه مين
يا عم أنا المكوجي عندكو زفت هدوم عايزه تتكوي ولا أمشي ؟!.
.................................................................................................................................
Mohamed Hussein
3
يناير 2015·
صبر أيوب
.
نكته سمعتها عن
الكسلانين و الكسل .
بيقولك يا سيدي
: بيسألو واحد كسول أوي بتعمل إيه أول ما تصحى من النوم ؟ قال لهم برتاح في السرير
شويه !! .
.
زمان و انا عيل
صغير عمري 10 سنين تقريبا كان أبويا الله يرحمه بنى لنا بيت بالطوب الأحمر بدل البيت
اللي بالطين اللي كنا عايشين فيه , المهم البيت ده كان فيه بدروم ارتفاعه مترين تقريبا
, عشان يبقى الدور الأرضي عالي عن الطريق بشويه حلوين , طب هنعمل ايه في البدروم ده
؟ المفروض نعمل له سقف و نستفيد منه و السقف ده يبقى هو الأرضيه بتاعة الدور الأرضي
, بس السقف الخرسانه عايز فلوس و الفلوس كانت بح , نعمل ايه طيب ؟ الحل التاني اننا
نردم البدروم ده بالتراب , و كان المتبع وقتها إنك تجيب كام نقلة تراب من الأراضي الزراعيه
بالجرّار و المقطوره و تحطهم جنب البيت و تجيب لودر يشيل التراب ده و يردم البدروم
في يومين مثلا و ياخد 50 جنيه ولا حاجه , مممممممممممممم طب مفيش 50 جنيه نديها للودر
نعمل ايه طيب ؟ .
.
أبويا فكّر شويه
و قال بس مابدهاش , احنا جبنا التراب جنب البيت و عندنا حمار عفي و غبيط و مقطفين و
فاس , يبقى هنردم البدروم أنا و محمد ابني ( اللي هو أنا ) و الحمار !! .
.
و عليها يا رجاله
بدأنا معركة ردم البدروم اللي استمرت شهر تقريبا , كل يوم من 7 الصبح لحد المغرب ,
كام نقله بالحمار بقى ؟ يتهيألي بنتكلم في 5 ألاف نقلة تراب , أبويا يعبّي المقطفين
تلاته بالفاس و يجهزهم و انا اجيب الحمار و على ضهره الغبيط و امسك الغبيط من الجهه
التانيه و ابويا يرفع المقطف المليان على الحمار , و لما الغبيط يتملي خالص اخد انا
الحمار و نمشي و ندخل جوه البيت و اقلب الغبيط اللي مليان تراب ده وارجع تاني و هكذا
..
.
و الحمد لله نجحنا
و كنا بالظبط عاملين زي اللي قرر إنه ينزح البحر بمعلقة الشاي !! .
.
افتكرت الحكايه
دي و صبر أيوب لما جه في ذهني 3 حاجات , الموبايل معمول تاتش سكرين عشان مش عايزين
نتعب صوابعك في الكتابه ولازم تحافظ على نضارتها , و الإيموشنز عملنهالك عشان مش نتعبك
في كتابة تعليق بالمدح أو بالقدح ( استريح انت ) .
و قلنالك لحوم
العلماء مسمومه عشان برضه مش نتعبك في التفكير في كلام البهاليل !! ..
.
بس أنا اللي ردم
بدروم بيته بالحمار و الغبيط , وانا اللي نزح البحر بالمعلقه ماعرفشي ان فيه علماء
لحومهم مسمومه ولا هعبّر عن مشاعري بصورة فيس بيضحك و يعيط يعني فيس بزمبلك .
...................................................................................................................................
Mohamed Hussein
3
يناير 2015·
اللهم صل و سلِّم
و بارك عليك يا سيدي يا رسول الله , صلّو عليه و سلِّمو تسليما .
..................................................................................................................................
Mohamed Hussein
3
يناير 2015·
مشهد هزلي تخيلي
............ فيلم الزوجه التانيه 2015 !!.
.
العمده ( راكب
على حماره ) : و مين البت اللي ماشيه هناك على جسر الترعه دي ياد يا عوضين ؟ مش دي
بنتك اللي بتروح الجامعه في البندر ؟ .
عوضين ( ماشي جنب
الحمار ) : أه هي يا جناب العمده
.
العمده : و مالها
ياخويا كده ماشيه و نافشه ريشها و محدش مالي عنيها ؟ هي مش عارفه يا وله انك راجل غلبان
و بتشتغل اليوم بيومه ؟!
عوضين : أصلها
عقبال أملتك يا جناب العمده بقى عندها أكاونت عالفيس بوك
.
العمده : ههههههههههههه
عيشنا وشوفنا يا ولاد , والله اتنجّرت انت و عيالك يا عوضين و مش بعيد تكونو بتشربو
مايه معدنيه , و تلاقيك ماتعرفشي يعني ايه فيس بوك ؟
عوضين : يعني لاهو
انت اللي تعرف يعني ايه أكاونت يا جناب العمده ؟
.
العمده : بتقول
ايه يا وله ؟ انت بترد عليا يا مقصوف الرقبه , طب غور من هنا و اعمل حسابك من بكره
مالكش شغل في وابور الطحين , غور جاك خابط , حا , حاااا , حااااااااااااااااااااااااا
..
.....................
.....................
حسونه الغفير
: يابه العمده يابه العمده
العمده : هسسسسسسسس
, عايز ايه يا مقصوف الرقبه انت كمان ؟
.
حسونه : اشاره
جايه من المركز يا جناب العمده
العمده : و جايه
لمين بقى الإشاره دي ان شاء الله
.
حسونه : بيقولو
فيه ناس كبارات اوي جايين من البندر عشان بنت عوضين بتاع وابور الطحين .
العمده : عال أوي
, تلاقي الداخليه باعته ناس ياخدو أقوالها , أخسن , ياكشي ياخدوها على بعضها هي وابوها
ابو لسان زالف .
.
حسونه : لا داخلية
ايه يابه العمده ؟ دي الست ريهام سعيد بتاعة التلفزيون جايه تصور برنامج مع بنت عوضين
.
العمده : ريهام
سعيد ؟ مش دي البت الصفره اللي شبه سنبلة القمح الفارغه دي
.
حسونه : أيوه هي
يا جناب العمده
العمده : و هتصور
ليه مع مقصوفة الرقبه بنت عوضين الكحيان ؟
.
حسونه : بيقولو
أصلها كتبت على صفحتها عالفيس بوك , كتبت ايه ياد يا حسونه كتبت ايه يا حسونه ؟ أه
افتكرت , كتبت انها ( تشعر بالملل ) , إلّا يعني ايه تشعر بالملل دي يا جناب العمده
؟! .
.....................................................................................................................
Mohamed Hussein
2
يناير 2015·
حلاوة المولد
........... جمالك يا مصر
.
اشتريت حلاوة المولد
الحمد لله , عجبني اكتر من شكل العرايس و انواع الحلاوه و تشكيلتها و زحمة الناس عليها
عجبني طريقة شغل البياعين في إيتوال هههههههههههه واحد بيرص في العلبه و بيملّي التاني
اللي شغال كاشير , و احد فوليه هو يقول واحد فوليه , اتنين سمسمسيه اتنين سمسميه ,
كأنهم بيغنّو , واحد حمام كبير واحد حمام كبير , واحد شَكلّمه واحد شكلمه .
.
طب ايه علاقة الحمَام
بالحلاوه ؟ و تطلع ايه الشكلمه دي ؟ و الله احنا شعب مبدع و بنختار أسماء عجيبه بس
لها موسيقى و جمال غريب .
.
أتحداك لو لقيت
أصل لكلمة ( شكلّمه ) في أي كتاب عربي , و سيباويه و أبو الأسود الدؤلي لو رجعو للدنيا
تاني و دخلو محل حلواني في مصر غالبا هياكلو من سكات , و هما طالعين هيقولو للكاشير
الحساب كام يا برنس ؟ خدت واحد حمام و اتنين شكلّمه !! .
...........................................................................................................................
Mohamed Hussein
2
يناير 2015·
فنجان قهوه.......
و انت الرئيس
.
تخيل كده حضرتك
إنك صحيت من النوم لقيت نفسك رئيس مصر , بس للأسف مش رئيس مصر أيام العقاد و طه حسين
و ام كلثوم و فرقة رضا و المشربيه و ( ممنون يا هانم ) , مش رئيس مصر أيام ما كنا بنبعت
كسوة الكعبه و داينين بريطانيا بكذا مليون دولار و الطليان بيشتغلو جارسونات عندنا
...لا خالص , حضرتك بقيت رئيس مصر أيام أوكا و أورتيجا والسبكي و محمد حسان و الحويني
و عادل عبد العال بتاع الأعشاب و الطب اللامؤاخذه النبوي , انت بقيت رئيس مصر و هي
مديونه ب 1800 مليار جنيه و الله يجحمه اللي كان السبب , بقيت رئيس مصر و الغرب كله
لابدلك في الدره عشان فيه لوبي إخوانجي كبر وربرب في عهد الله يجحمه و عشان برضه كان
معاك مسئول مصري لبّسك في الحيطه وقتها ( مش واخدلي بالك انت يا حاج محمد ؟! ) , حضرتك
بقيت رئيس مصر والبلد اترشقت سلاح من الشرق و الشمال و الأنفاق و ما أدراك ما الأنفاق
, وعندك بتاع 500 ألف ارهابي تحت الطلب ( الراكب ) و 500 ألف كولجي تحت الطلب ( المركوب
) .
.
خد لك شفطه قهوه
بقى و مخمخ كده و قولي هتعمل ايه ؟ عندك 5 محاور رئيسيه محتاجين سوبر مان ولا الراجل
أبو خطوه وانت بني أدم عادي زيك زينا , الفساد حواليك واصل بين الشعب و الحكومات السابقه
بتناغم رائع و بديع , زي قصة البيضه و الفرخه ماتعرفشي مين فيهم اللي جه الأول , و
رجال أعمال طايلهم الفساد و أحيانا كانو مضطرين له عشان يمشّو مصالحهم , وبيتحكمو في
نص اقتصاد البلد تعمل لهم مذبحه بقى ؟ طب والجحور اللي مفتحو عليك بره ؟ , و المخطط
الأمريكي الصهيوني القطري اللي كان يادوب على الأبواب ؟
.
خد لك شفطه كمان
, و لّا هتاخد المحاور دي واحده واحده بترتيب معين , يعني تقفل الجحور بره و ترجع تفوّر
العك اللي جوه ده ؟ طب ماهو ده اللي عمله و بيعمله السيسي .
.
عايز حضرتك شعارات
؟ عندي والله حتى شوف : يسقط الفساد , تسقط البيروقراطيه , فين حق الشهدا يا كفره ؟
, التعليم يا عبد الفتاح , عيالنا بيموتو عالطريق يا سيسي , المرور يا عبد الفتاح
, بريطانيا يا سيسي , الصحه يا عبد الفتاح , امريكا يا سيسي , الفلول يا عبد الفتاح
, تركيا يا سيسي , السيفون بايظ يا عبد الفتاح , مشابك الغسيل فين يا سيسي ؟!! .
...................................................................................................................................
Mohamed Hussein
2
يناير 2015·
صباح النابالم
.
....تلاته طن متفجرات
في الشرقيه , قنابل في اسيوط و سوهاج و دمياط و شارع الهرم , القبض على صاحب محل في
العاشر بيصنع متفجرات لأعمال ارهابيه .
.
انا وانت شوفنا
بعنينا كمية الكره و الحقد و الغل اللي جوه الإسلامجيه للأقباط المصريين , من أيام
ماسبيرو و قبلها , الناس كانت بتتسلى بإنهم يفجرو كنيسه كل سنيتن تلاته , وانا وانت
شوفنا السلاح بتاع الإسلامجيه لما بيطلع و إرهابهم عشان اختهم كاميليا و اختهم زفت
الطين , و انا وانت شوفنا جرجرتهم للدكتور اللي قالو شيعي و تعذيبه و انا وانت شوفنا
فيديوهات التهديد بتاعة قيادات الإرهابيه بحرق مصر وانا وانت عارفين العلاقه القذره
بين الإخوان و الجماعات الإسلاميه و الجهاديه و كل الإرهابين في العالم .
.
إنما وقت ما بنسمع
عن قنابل و تفجيرات أنا بلعن جدود أبوهم و انت بتقول ده شغل أمن دوله و مخابرات و السيسي
, و راسك و ألف جزمه إن السيسي بيحاول يعمل تفجيرات في البلد عشان يوقّع نفسه , و مش
بعيد السيسي يحاول يغتال عبد الفتاح !! .
أنا بني أدم عندي
عقل و انت كولجي رضيت لعقلك يبقى كوره شراب من 3 سنين , و دلوأتي الكل بيلعب بالكوره
دي و مش من حقك حتى تسألهم هيشوطوها فين المره الجايه ؟!.
......................................................................................................................................
Mohamed Hussein
2
يناير 2015·
ممكن تبقى فلاح
قراري و نزلت الترعه وانت صغير و كنت بتسابق البلهاريسيا في العوم , أو تبقى صعيدي
أوي من الصعيد الجواني و بتقول (أنا مش من دردا , انا من البلد اللي دنبها ) , أو تبقى
موزمبيقي واسمراني أو بدوي و عيشت مع الغنم اكتر ما عشت مع البشر .
المهم بقى لو ظروفك
اتغيرت و قررت تعيش في مدينه كبيره زي القاهره اوعى تغيّر جلدك أو تلبس توب مش توبك
, اوعى تبذل مجهود كبير في انك تنطق الجيم ( كيم ) , و تنسلخ من أصلك شويه بشويه عشان
وقتها هتبقى بتضيع عمرك كله في إنك تتحوّل لمجرد مَسْخ مش اكتر !!.
................................................................................................................................
ليست هناك تعليقات:
إرسال تعليق