Mohamed
Hussein
6 نوفمبر 2014·
الإخوانجي اللي
على حق .
.
هو اللي لما يلاقي
الحكومه بترحّل كام اسره في سينا يقوم هو لابس بقى توب السيناوي و مراته لابسه البرقع
و تحس انه بيفطر و يتغدى و يتعشى كبسه و مسمّي بنته ( عنيزه ) و إزاي ترحّلو السيناويين
يا كفره يا ولاد الحرام ؟ , قلبي الضعيف لا يحتمل , مع إن جماعته خارباها مداين في
سينا و دم الغلابه يشهد !! .
.
و هو اللي يلبس
توب المسيحي و يعلق صليب على صدره و صورة البابا شنوده في أوضة النوم لما تيجي ذكرى
ماسبيرو , وتلاقيه بيسمّي مراته أم جرجس , وروحي يام جرجس تعالى يام جرجس , مع إن دم
الأقباط في رقبتهم هما و طنطاوي و السلفيين البهاليل , مش الأقباط دول هما الكفره ولاد
الحرام برضه ؟ دمهم حلال و نسائهم سبايا لنا ؟!.
.
و هو اللي يلبس
توب ريهام سعيد و يبقو سو كيوت و قلبه قلب خسايه و يقلبها شحتفه لو حصلت حادثة اتوبيس
ولّا حتى حادثه موتوسيكل , مع إن إيديهم غرقانه بدمنا و دم أطفالنا من 80 سنه و عمرها
ما بتنشف !! .
.
و هو اللي يلبس
توب رأفت الهجان لما يكون فيه شهر عسل مع مجلس عسكري زي بتاع طنطاوي و عنان كده , و
تلاقي شعار الجيش بيرفرف في ودانه و الجزيره تنشر فيديوهات بقى عن قدرة الجيش المصري
على احتلال اوروبا في 4 ساعات و احتلال المجموعه الشمسيه في ساعة عصاري و الإخوانجي
لايك يا جدع و شير , ولما يخلص شهر العسل يبقى اسمه جيش نوال و جيش المكرونه !!.
.......................
......................
و الكولجي اللي على حق هو اللي يوطّي و يتركب
من الإخوان في كل مره و مهما كان التوب اللي الإخوانجي لابسه , والله ما بتفرق معاه
التوب , دي ساعة الحظ ما تتعوضش !!.
--------------------------------------------------------------------------------------------------------------
Mohamed
Hussein
6
نوفمبر 2014·
انفجار في قطار
منوف و محطة مترو المرج , 3 شهداء و شوية جرحى !! .
لا ما تقلقش دول
الإرهابيين ( قصدي الفصيل الوطني ) لقو مصر بتنزف من الصبح فقالو يغزوها غزّه في مكان
الوجع هما كمان , فصيل وطني بقى و طول عمره صاحب واجب.
-------------------------------------------------------------------------------------------------------------------
Mohamed
Hussein
5
نوفمبر 2014 ·
..
18 طالب مصري كل ذنبهم إنهم نزلو يتعلمو في دوله مفهاش تعليم و مشيو في طريق في دوله
مفهاش طرق و ركبو اتوبيس في دوله مفهاش دوله !!.
.
أيام حكم البهلول
مرسي حصلت حادثه مشابهه , وقلنا مرسي يتحمل المسئوليه ( الأدبيه عالأقل ) و طالبنا
بإقالة وزير النقل والتعليم و التحقيق معاهم , طب ايه بقى ؟ هتقولي السيسي مكانشي سايق
الإتوبيس ؟ هقولك ولا مرسي كان سايقه .
.
الحكايه سهله أوي
يا عم عبد الفتاح , بعد ما تشيل وزير النقل و تحقق معاه تجيب عم ابراهيم و تقوله بالظبط
: انت بتشتغل إيه ؟ جاي تشتغل إيه ؟.
......... من يومين
فيه حد في وزارة النقل صرح تصريح خطير جدا , قالك أغلب سواقين النقل بيمشو من غير رخص
و بيبقو شاربين مخدرات !! , والنبي يا مسئول ؟ بجد يافندم ؟ طب ما تجيب بوسه بقى .
.
لو مفيش طرق تنفع
يمشي عليها البني أدمين و مفيش فلوس نعمل لها صيانه يبقى نقفل الطرق دي و لو كان قفل
الطرق بيعني قفل المدارس نبقى نقفل المدارس و لو مصر مش نافعه خلاص يبقى نقفلها يا
بيه و ممكن من باب التديّن يعني نكتب على بابها ( مغلق للصلاه ) ......أرواح عيالنا
مش لعبه .
.
الحل بسيط يا أهل
الحل و الربط , 10 ألاف عسكري بموتوسيكلاتهم ينتشرو عالطرق يوقفو أي سواق مامعهوش رخصه
و يسحبو منه العربيه ويدخل السجن لو سايق سكران , لو خدت 10 عربيات بس من طريق اسكندريه
الزراعي هتلاقي سواقين التريلات في أسيوط اتعلمو الأدب !! , و بدل مانوقف 10 ألاف عسكري
لتأمين موكب 10 وزرا مالهمش أي تلاتين لازمه , لأ نخليهم يأمنو طريق الناس , ويوم ما
10 وزرا يتقتلو عشان مفيش تأمين كافي ساعتها هنقول التأمين ده حمى أرواح 10 مليون طالب
من عيالنا و نقرا على روح الوزير الفاتحه و نشوف غيره .
.
للأسف في الحادثه
دي مفيش عامل سنافور عشان يشيل الليله !!.
----------------------------------------------------------------------------------------------------------------------
Mohamed
Hussein
5
نوفمبر 2014·
واهو الراجل داود
أوغلو قالها بنفسه , الكلام اللي قلته ألف مره , تركيا لما بتروح الإتحاد الأوروبي
بتقول لهم احنا علمانيين و بتوع خمره و نسوان و لما تيجي لحماس تقول احنا بنبيع سبح
و بتوع ربنا و لما بتروح الجزيره بتقول لهم احنا هنحرر القدس و لما بتروح أمريكا بتقول
لهم هنحمي تل أبيب .
.
يعني باختصار
, كدب في كدب و غش في غش , حِربا و عايشه بمليون وش !! .
.
............ وانت
؟ أيوه انت ؟ مش هتقوم تتطمن على دين أم المشروع الإسلامي بتاع تركيا , اللي هي بتاعة
النسوان و الدعاره ؟!.
طب ليه مش عايز
تصدق إن الفكره بسيطه خالص , مشروع إسلامي أمريكي صهيوني تركي قطري إخوانجي و يبقى
خليفة المسلمين اسمه أوباما و تل أبيب عاصمة الخلافه الإسلاميه , و موشى ديان الله
يرحمه قائد جيوش المسلمين و مصر دوله كافره و جيشها ابن حرام , دي سهله خالص أهي .
------------------------------------------------------------------------------------------------------------------
Mohamed
Hussein
4
نوفمبر 2014·
في زمن النفخ
.
و قال فضيلة العلامه
الشيخ فلان الفلاني : إن إخلاء منطقه معينه من سينا من سكانها جائز شرعاً من باب درء
المفاسد !! .
.
و بقينا نسأل الشيخ
عن عمليات الإخلاء و نسأل الشيخ عن أفضل معجون للسنان , و نسأل الناشط عن الأمن القومي
و الحرب على الإرهاب و يا ترى إيه خطة حضرتك يافندم ؟!.
بكره نسأل الصيدلي
على جلدة الحنفيه و الطبيب الشاطر أوي هو اللي يعرف أخر خطوط الموضه و الأزياء و عم
مصطفى بتاع الجراج هو اللي قدر يقول للواد حوكشه العجلاتي إن المغص اللي عنده ده أعراض
زايده ملتهبه .
--------------------------------------------------------------------------------------------------------------------
Mohamed
Hussein
4
نوفمبر 2014·
نظرية دارون في
تطور الكائن الإخوانجي السلفنجي الداعشي
.
و قال عم الحاج
دارون , بص يابني على مناهج التربيه الدينيه بتاعة الوزاره , و بص بصه كمان على الخطباء
والمشايخ اللي هما عريضي المنكعين دول .
هه ؟ بصيت كويس
؟ تعالى بقى وانا أقولك , بعد سنين من فرهدة الكائن المصري و لفه كعب داير بين حصة
الدين و حصة الشيخ إياه هتلاقيه فهم إن الجنه دي بيدخلها الناس بعد ما يتعمل لهم امتحان
m.c.q ..بالنظام الأمريكاني يعني .
.
ملك يقف على باب
الجنه و يسأل الواحد مننا , س 1 يا عبد الله : كام مره تزوج سيدنا رسول الله ؟ س 2
يا عبد الله : متى كان صلح الحديبيه ؟ س 3 يا عبد الله : كم عدد صحابة رسول الله اللي
شاركو في غزوة الخندق ؟ س 4 يا عبد الله : ماهو لون بشرة سيدنا سعد بن أبي و قاص ؟
س 5 يا عبد الله : كم مرة أنجبت أسماء بنت أبي بكر ؟ س 6 يا عبد الله : كام كان عمر
الناقه التي سافر بها رسول الله أثناء الهجره من مكه إلى المدينه ؟ يعني بالظبط بالظبط
زي امتحان الوزاره بتاع الدين .
.
و بعد ما تنجح
يا أخي المؤمن في امتحان ال mcq ده تدخل الجنه على طول .
و هو ده التطور
الطبيعي للكائن الإخوانجي السلفنجي الداعشي .
.
بس أنا يتهيألي
الليله غير كده , و مفيش أسئله في الأخره , و مش مهم تعرف غزوة أحد كانت سنة كام ؟
, المهم تعرف إن المسلم حتى المسلم المتدين مش هيفوز في حرب إلا لو أعد العده كويس
لها أو زي ما قال مصطفى محمود : لو نزل اتنين البحر و احد فيهم مؤمن و التاني كافر
هينجو من الغرق اللي بيعرف يعوم .
.
و يتهيألي كمان
لو كان فيه ملك واقف على باب الجنه يختبرنا فهو غالبا مش هيسأل , إنما ممكن يحط لك
حجر في طريق الناس و يقولك عدّي من هنا , لو شيلت الحجر من طريق الناس عشان الناس تعدّي
تبقى انت كمان عدّيت !!.
---------------------------------------------------------------------------------------------------------------------
Mohamed
Hussein
4
نوفمبر 2014·
بمناسبة عيد الحب
, قلت ألبس بقى و اتغندر و اروح أجدد بطاقتي في الأحوال المدنيه بتاعة السلام , أظن
مفيش حب أكتر من كده , قالولي طابور الحب في الأحوال المدنيه بيبقى ممتد ( كسربِ حمامٍ
من بغدادَ إلى الصينِ ) .
محدش يعرف لي أمين
شرطه هناك أديله قلب أحمر و افقعه قصيدتين لفاروق جويده و أقوله هابي فالانتاين يا
شاويش و يجدد لي البطاقه ؟!.
---------------------------------------------------------------------------------------------------------------------
Mohamed
Hussein
3
نوفمبر 2014·
لما كنت في السعوديه
كنت بفتح النت زي ماكون بفتح كانزاية بيبسي , أه كداهو يعني , و السرعه بقى فشر مصطفى
عبده في زمانه , و لما جيت مصر بقيت أفتح النت كأني بفتح عكا و لما يفتح يبقى بسرعة
أحمد جعفر في الهجمات المرتده !! .
.
........... و على رأي الأغنيه ما بتقول : هات
الفلاشه و اقعد لاعبني .
----------------------------------------------------------------------------------------------------------------
Mohamed
Hussein
3
نوفمبر 2014·
لوجه الله
.
ليا صديق عزيز
اعرفه عالفيس من سنين , كنت بعشق ثقافته و أسلوبه في الكتابه , هو صيدلي يعني ابن كار
و من السنبلاوين يعني بلدياتي , مأسعدنيش الحظ إني أشوفه و أقابله .
.
صديقي اختفى من
سنه و أكتر بعد وفاة والده الله يرحمه , اختفى تماما , وفجأه هيثم اللي كان ناصري عاشق
لناصر و كنت بشوفه سند ليا و support في تفنيد هبل الخرفان و البهاليل
بأسلوبه المميز و ثقافته المحترمه جدا لقيته رجع بتوب قصير , رجع و معاه شرايط الحويني
و حسين يعقوب و بيلعن الناصريه الكافره بنت الحرام و بيقول على مرسي ( الرئيس البطل
فكّ الله أسره ) !! .
.
في الأول افتكرت
حسابه اتهاك بس أغلب ظني لأ , يا هيثم من حقك طبعا تغيّر فكرك 180 درجه و تقف في المكان
اللي يريحك , و إذا كنت شايف إن دي الهدايه فربنا يهدينا جميعا , بس بجد و بصفه شخصيه
هفتقد إبداعك .
Haitham
Abdalrahman
--------------------------------------------------------------------------------------------------------------------
Mohamed
Hussein
3
نوفمبر 2014 ·
ساعات كده بحلم
إن يكون ليا عم عايش في البرازيل وانا ماعرفش عنه حاجه , و فجأه عمي ده يموت ( والله
موتك قطع فيا يا عمي ) , والمحامي هناك يكتشف إن انا الوريث الوحيد لعمي ده ( مع إني
عندي 37 ابن عم في البلد بس ما علينا ) ويبعت لي جواب يقولي تعالى استلم تركة عمك
, أروح انا البرازيل ألاقي الراجل سايب لي أطيان و عقارات و فالنات مالهاش أول من أخر
, أقوم أنا بقى واخد الفلوس دي كلها و أطلع على أكبر مصنع للسلاح في روسيا و أقول لهم
اعملو لي بندقيه ستانلستيل ( كاتربيلر ) تقدر تضرب 700 ألف طلقه ورا بعض , و خدو الفلوس
اللي انتو عايزينها .
.
واخد البندقيه
و الذخيره و ارجع مصر و كل ما أقابل واحد من اللي بيشتم في جيش مصر أطخه , أيوه مانا
مش لسه هفهمه من أول زرع و حصد , هي طلقه و خلاص , و كل واحد إرهابي عبيط اتسبب في
قتل ألاف الأبرياء أو أيّد قتلهم أطخه برضه , هو انا لسه هفهمه ان عدوه في اسرائيل
؟! و طبعا هحتفظ بكام طلقه مخصوص لاحمد موسى ولميس و بكري وعكاشه , أيوه مش عايزين
اعلام ولا زفت , إحنا نرجع نقرا أهرام الجمعه و نحل الكلمات المتقاطعه و كفايه أوي
.
.
تبقى هي الحسبه
كده , 700 ألف متخلف عقليا محتاجين 700 ألف طلقه , والطلقه ب 6 جنيه ( في الجمله يعني
) يبقى محتاج 4 مليون و 200 ألف , غير تمن السلاح و الروس طبعا هيقلبوني في قرشين حلوين
و كل شويه هلاقي واد روسي يقولي ( حمد الله عالسلامه يا باشا ) و محتاج اتنين صعايده
يشيلو معايا شكاير الذخيره وانا ماشي , يبقى 5 مليون حلوين أوي , يا حبيبي يا عمي
.
-----------------------------------------------------------------------------------------------------------------
Mohamed
Hussein
3
نوفمبر 2014·
في حياتي ماشوفتش
أغبى ولا أهطل من الإرهابيين اللي مسميين نفسهم إسلاميين , تلاقيه كان دكتور زي الفل
و فجأه كده جت له الجنّونه و الدروشه قام لبس جلابيه خيش و طلع على أفغانستان بالأر
بي جي و فضل سنين يجاهد ضد الإتحاد السوفيتي لصالح أمريكا !! .
.
و بعدين يرجع بنفس
الجلابيه و نفس الأر بي جيه على على العراق و يجاهد ضد نظام صدام لصالح أمريكا و بعدين
على سوريا بنفس الجلابيه و الأر بي جيه و يجاهد ضد نظام بشار لصالح أمريكا برضه , و
لما دوره يخلص في سوريا يقوم راجع بنفس الجلابيه و الأر بي جيه و قال يجاهد بقى ضد
الجيش المصرري لصالح أمريكا برضه .
.
يا راااااااااااااااجل
غيّر بقى أو افهم و لو مرّه , طب غيّر الجلابيه عالأقل , طب مفيش مره كده تجاهد فيها
لصالح الصين ؟ دي الصين حلوه برضه .
.
و اللي يموت من
الإرهابيين دول يتهيألي كده لما يحبو يعذبوه في الأخره هيحمّوه و ياخدو منه الجلابيه
.
-----------------------------------------------------------------------------------------------------------------
Mohamed
Hussein
2
نوفمبر 2014 ·
الإعلام المصري
مش عاجبني يا أم الإعلام المصري , قصته كلها بتتلخص في مذيع و بدله و كرافته و برطمان
جيل للشعر و يطلع المذيع يهلفط شويه و يتبهلل شويتين و ياخد مليون جنيه في الشهر ,
من أول ريم ليسري لمحمود سعد للميس و جوزها و اخوه و خالته لتوفيق عكاشه واحمد موسى
, كله تيييييييييييييت .
و ربنا يعوض علينا
لو كنا فاهمين إن الإعلام كده .
.
اعتراضي مش على
تطبيل و لا تزمير , إنما الإعلام في أيامنا دي بيمثل 50 % على الأقل من أي معركه ,
معركة ضد دوله ما أو ضد إرهاب أو ضد فساد أو ضد تدخلات خارجيه , و احنا في قلب أم المعركه
دلوأتي , بذمتك دي عقول ناس ينفعو إعلاميين ؟ ده فكر إعلاميين ؟ ده فكر زبّالين يا
عمنا .
.
كل الإعلاميين
في مصر بيشتغلو بطريقة ( بناكل عيش يا بيه ) , الساعه ب 30 ألف و الحسّابه بتحسب ,
و الإعلام العالمي اللي بقى عامل زي الإخطبوط له 7 ألاف إيد و رجل المذيعين عندنا فاكرينه
سمكة زينه أو قطه شيرازي .
.
و مش غريبه أبدا
لو اتخيلت سيناريو زي كده :
المذيع بيسأل المعد
: هه الكلام على إيه النهارده ؟
المعد : فيه قنبله
انفجرت في دكرنس و عيل وقع من عالسطوح في دمنهور و قش الرز عمل سحابه سوده في السنبلاوين
المذيع : طيب و
الحاجات دي هيكفّونا ساعتين ولا تشوف لنا أي حاجه كمان نملى بيها الهوا ؟!.
-------------------------------------------------------------------------------------------------------------------
Mohamed
Hussein
2
نوفمبر 2014 ·
البت لوجي بنتي
قالت لي يا بابا عايزاك تعملي أكاونت عالفيس , قلت لها حاضر يا لوجي , قالت لي بس ماتحطش
صورتي , قلت لها بارك الله فيكي يا بنتي , قالت لي أه ماتحطش صورتي أنا عايزه صورة
نانسي عجرم !! .
--------------------------------------------------------------------------------------------------------------------
Mohamed
Hussein
2
نوفمبر
2014·
عشان تبقى بهلول
و تعرف تقول
.
أنا : مساحة سينا
أكتر من 60 ألف كيلو متر مربع و الجيش بيخلي المنازل في منطقه حدوديه مساحتها 7 كيلو
, يعني 1/ 100ألف من مساحة سينا , هي دي حتة القشطه اللي أد كده اللي وقفت في زورك
و خنقتك بعد ما كلت 18 كيلو بسبوسه ؟
مشروع بهلول :
أيوه هي دي .
.
أنا : طب ما تعرفش
اصحاب البيوت اللي عالشريط الحدودي بنو هناك ليه وسابو ارض سينا اللي أد مساحة قطر
5 مرات ؟ يا ترى كانو عيانين و الدكتور وصف لهم يبنو عالشريط الحدودي و لا فيهم راجل
بنته ماكنتش بتخلّف فالشيخ قال لها لازم تبنو بيت جنب السلك الشايك عشان تخلفي ؟ لا
طبعا الحكايه مالهاش علاقه بسببوبة الأنفاق و تجارة السلاح و الدم
مشروع بهلول :
ماليش دعوه بالكلام ده .
.
أنا : طب انت عارف
ان تكلفة حفر نفق طولة 500 متر عالأقل بعرض 10 متر وارتفاه اد كده و تجهيزه بيتكلف
ملايين متلتله , يا ترى اللي حفرو الأنفاق دي كانو حافرينها عشان يهربو لفّة شاش و
كام كيس قطن تمنهم 17 جنيه للجرحى بتوع غزه ؟
مشروع بهلول :
أه طبعا عشان مساعدة الجرحى و نصرة القدس .
.
أنا : طب الملايين
والمليارات اللي عملها قادة حماس و بعض السيناويين و ظهرت عليهم فجأه يا ترى جايه من
الكام نعجه و خروف اللي بيربوهم جنب الخيمه و كل عيد كبير تلاقي الواحد منهم يبيع له
3 خرفان ب 17 مليون جنيه مثلا ؟! و لا بيكسبو مليارات من محل العطاره بتاع المرحوم
؟
مشروع البهلول
: أه طبعا عندهم غنم و خرفان كتير ( و محل عطاره ) يعمل مليارات .
.
أنا : طب لما تنزّل
صورة لبيت مهدود و جنبه كام ست بيعيطو و تقعد تغنّي جنبها تفرق ايه عن كلاب الحزب الوطني
اللي كانو بيجيبو راجل فقير و عيل صغير ( برياله ) و يتصورو معاه قبل الإنتخابات ؟
مشروع بهلول :
هه #عبث
.
أنا : ألف ألف
مبروك يابني , انت كده مش باقي لك غير إنك تقول #ضد #الديكتاتوريه و #ضد #الفاشيه
و تبقى بهلول أد الدنيا , أه نسيت أقولك حاجه إنت كمان بقيت مرشح لجايزة نوبل للسلام
و جايزة سخاروف و دلوأتي تقدر تعمل بطاقة جديده تكتب فيها الإسم الرباعي ( عبقري ننوس
عين أمه ) و المهنه ( ناشط سياسي و حقوقي ) , لا سيب خانة الجنس فاضيه ماتشغلش بالك
بيها .
-----------------------------------------------------------------------------------------------------------------
Mohamed
Hussein
2
نوفمبر
2014·
هههههههههههههههه
صوره بتختصر المشهد كله , ناس واقفين في الأنفاق اللي كان بيتهرب منها عربيات مسروقه
و مخدرات و سلاح و إرهابيين , و تقريبا العصر أدن و هما جوه النفق , فقامو ركنو على
جنب و قالو نصلي جماعه !!. ههههههههههههههههههههه هنا الشيطان عنيه دمعت من المشهد
المؤثر و قال لهم ربنا يبارك فيكو يا ولاد *** الكلب , إلّا صحيح انتو بتهرّبو و تقتلو
على مذهب مين من الأئمة ؟!!.
.
ستايل الإخوان
ده ستايل حياه لكل بهاليل العالم , نقتل و نحرق و نخرب و نقوم نصلي , قتلونا واحنا
بنصلي و نهرب اسلحه يا سعادة البيه , قفشونا واحنا صايمين و بنفجر مديرية الأمن يا
باشا , مسكونا واحنا بنستغفر ربنا و نسيّح دم العسكري يا مولانا .
----------------------------------------------------------------------------------------------------------------------
Mohamed
Hussein
1
نوفمبر 2014·
ما تقوم تتطمن
على عقلك
.
1- هو : لا مش
ممكن أبدا اللي بيعمله الجيش في سينا ده .
أنا : هو الجيش
بيعمل ايه ؟ ده بيحارب ارهاب انت نفسك معترف بوجوده و خطورته و قرفه و بينضّف بلدك
.
.
هو : لا برضه مش
ممكن و الطريقه مش صح و الخطه مش المفروض تكون كده
أنا : أهه يعني
حضرتك المفروض المخابرات و رئاسة أركان الجيش يطلعوك عالخطه و الطريقه و ياخدو موافقتك
و توقيعك عليها ؟ , هو حضرتك بتفهم في الطب ؟
هو : لأ ليه ؟
أنا : عشان نفتح
مستشفى نسا و ولاده !!.
............................................
............................................
............................................
2 - هي : اللي
بيقتل جنودنا في سينا مش إرهابيين
أنا : أومال مين
سيادتِك ؟ مخلوقات فضائيه ؟
.
هي : لا دي قوات
محمد دحلان
أنا : أهه طبعا
طبعا , بس الإرهابيين و الإخوان معترفين اساسا بالقتل و الخراب ده وبيهددو بيه كل شويه
, بس ما علينا , وانتي شايفه الحل ايه للي بيحصل في مصر بصفتك يعني محلله سياسيه و
استرا(تيجي)ه ؟
.
هي : الحل هو المصالحه
مع الإخوان عشان اللي بيحصل في سينا يقف و الدنيا تهدى
أنا : طب و مال
الإخوان و مال اللي بيحصل في سينا ؟ , أكيد حضرتك تقصدي نتصالح مع محمد دحلان ؟!!
.
-----------------------------------------------------------------------------------------------------------------------
Mohamed
Hussein
1
نوفمبر 2014.
و الحل السريع
عشان صفحتك تكبر أوي عالفيس بوك في ظرف كام يوم إنك تعمل حاجه من اتنين
.
إما إنك تنزّل
صور لكيم كارديشان ( من كل الجهات ) و ساعتها هتلاقي مئات من شباب السبكي واقفين لك
على باب الصفحه و جاهزين باللايكات و في انتظار المزيد من إبدعات صفحتك , عايزين ابداع
بالمايوه بقى والنبي , أيوه كده الله يفتح عليك يا مولانا .
.
أو تنزّل صور لبيت
مهدود و عيل واقف عليه و تقول جيش مصر السفاح و ساعتها هيتلم حواليك مئات برضه من الخرفان
الصغيرين و الشباب بتاع #عبث و برضه في انتظار المزيد من الإبداعات , ألاقيش عندك
صوره لعسكري مصري و هو بياكل دراع عيل صغير ؟! .
.
و لما تعرف ان
صفحتك كبرت فجأه و ربربت لازم تسأل نفسك سؤال هو انت من تلاميذ السبكي النجباء و لّا
مستني فرصه في الجزيره ؟!., يعني غاوي دعاره إعلاميه و لا دعاره سياسيه ؟.
-------------------------------------------------------------------------------------------------------------------------
Mohamed
Hussein
31
أكتوبر 2014·
و قالك الحق يا
جدع المعجزه , شوف المعجزه , لايك للمعجزه , و في الأخر تطلع المعجزه دي هي : إن نعجه
اتبنّت قرد و بترضّعه مع عيالها !! .
طب وايه المعجزه
في كده والنبي ؟ ماحنا بقالنا 3 سنين بنشوف نفس المشهد كل يوم , و النعجه بترضّع القرد
و بتركبه أحيانا !! .
------------------------------------------------------------------------------------------------------------------
Mohamed
Hussein
31
أكتوبر 2014·
في زحمة الطريق
من القاهره للمنصوره , عساكر شرطه غلابه راكبين في عربيه بوكس مفتوحه من الجنبين ,
الدنيا زحمه اوي و دول ماسكين السلاح و قرّبو ينامو , عربيه ربع نقل وقفت جنب البوكس
, محمّله فاكهه , الراجل بتاع الربع نقل مدّ إيده بقطف عنب لعسكري من العساكر , العسكري
رفض في الأول و بعدين خده , وزعه على زمايله , و كلوه ( أه من غير غسيل ) .
في اللحظه دي
, افتكرت ولاد الكلب اللي بيقتلو عساكر الجيش و الشرطه الغلابه , و الغلبان اللي بيمد
لهم إديه بقطف عنب , هو الغلبان بتاع الفاكهه ده مابيلاقيش نشطاء سياسيين يتعاطفو معاه
ليه ؟ اعتبره ارهابي يا أخي !! .
---------------------------------------------------------------------------------------------------------------------
Mohamed
Hussein
31
أكتوبر 2014·
قيادي من حماس
: إقامة المنطقه الحدوديه العازله هو مطلب أمريكي صهيوني منذ العدوان على غزه في
2008 !! .
.
و بالصدفه البحته
يا ولاد هو ده رأي مسعد أبو الفجر و كام ناشط سيناوي , و انزل لي يابني بصور بيوت مهدوده
و اكتب عن الجيش المصري الفاشي اللي دمر البيوت و شرد الاطفال و قضى على التراث و خرم
الأوزون .
.
و مفيش مانع من
فيديو مفبرك عن جيش مصر و هو بيعذب الإرهابيين , انشري يا جزيره أو يا شبكة رصد أو
صفحة مسعد ابو الفجر , و هما التلاته إيه يعني ؟ واحد يفبرك و التاني ينشر و التالت
ينظّر للفبركه .
.
و على سيرة إن
المنطقه العازله مطلب أمريكي من 2008 يبقى على كده مبارك كان وطني جدا و رفض تنفيذ
المطلب الأمريكي و فضل صامد و مقاوم لمدة 3 سنين , الحريه للمناضل حسني مبارك , مبارك
على الأسفلت , البانجو يا وِلْد.
--------------------------------------------------------------------------------------------------------------------
ليست هناك تعليقات:
إرسال تعليق