Mohamed
Hussein
20
نوفمبر 2014·
و قالك الرئيس
المصري المنتخب عبد الفتاح السيسي , أول رئيس منتخب بعد ثورة 30 يونيو !! .
ههههههههههههههه
لا ده مذيع من الجزيره , الرقاصه يعني بعد ما اتحجبت فجأه على نفس المسرح و قدام نفس
الجمهور !! , أحب أقدم لكو أختنا الفاضله أم حمزه ( ريري سيلان سابقا ) .
.......................................................................................................................................
Mohamed
Hussein
20 نوفمبر 2014·
المراجعه النهائيه
في شأن المصالحه القطريه
.
1- الدم اللي سال
و الخراب اللي حصل يتسأل عنه دايما الفاعل و المحرض ( يعني دم جنودنا في إيد موزه وابنها
زي ماهو في إيد الخرفان و أعوانهم ) ..... ده موجود على فكره في كل قوانين العالم و
في كل الديانات حتى الديانه البحلقيه ( اللي العابد فيها بيضيع نص يومه في البحلقه
في مخاليق ربنا ).
.
2- بميل كمان للرأي
والفكره اللي بتقول إن قطر عايزه تغسل إديها من أي خراب ممكن يحصل في 28 نوفمبر بعد
ما جهزت العده وستفت كل حاجه , يعني نظام المحرض بتاع الجريمه يبقى قاعد مع الضحيه
وقت تنفيذ جريمته ( و في إيده السبحه ).
.
3- الحكومه القطريه
زيها زي الصهاينه والخرفان , مالهاش عهد ولا دين , ولو كان السلام نفع مع الصهاينه
و المصالحه اللي اتعملت مع الخرفان الف مره جابت نتيجه يبقى استنو نتيجه من فيلم (
الحضن العربي ) .
.
4- أفهم كويس أوي
إن الحكايه دي تمت برعايه أمريكيه , وإن مصر و دول الخليج استجابت عشان تخلص من أم
الزن بتاع أمريكا , بس أمريكا ربّت الديب و مش هتبيعه بسهوله , لسه دوره مانتهاش .
.
5- عبد الفتاح
السيسي ثقتي فيه مالهاش حدود , وعارف إنه راجل قراري مش داقق عصافير على دراعه , عشان
كده بفهم قبوله للمصالحه عشان أنا عارف دماغه فيها ايه , بالبلدي كده , هو كرئيس دوله
( شايل الليله ) لازم يقبل بالمصالحه دي وانا كمواطن مش مسئول عن حاجه لازم أقبلها
بحذر واكتب بوستين تلاته العن فيهم أبو الحكومه القطريه وافكرهم بماضيهم الإسود .
.
6- البوستات موجهه
باختصار لأصدقائي اللي كانو أول امبارح بيقولو الديب القطري و النهارده بيقولو الشقيقه
الصغرى , يعني يابن الحلال ماتبقاش عبيط و تخنق أمي , افهم اصول اللعبه .
.
7- اختصار الكلام
, المصالحه اللي بفهمها و اللي انا متأكد ان السيسي هيعملها هي مصالحه من ( عالباب
) عشان نخلص من زن أمريكا و نلعب معاهم صح ( و ده اللي هيعمله السيسي ) مش مصالحه بطريقة
الأحضان واتفضلو بقى في الصالون ولازم تشربو حاجه ويا مراحب يا مراحب داحنا زارنا النبي
( زي ما حضرتك فاهم ) .
.......................................................................................................................................
Mohamed
Hussein
19
نوفمبر 2014·
منتخب مصر بره
البطوله اللي كان بيفوز بيها بصباع رجليه الصغير , احنا كنا وصلنا لمرحلة إن البطوله
دي لو اتلغت لأسباب وبائيه في القاره مثلا كان الإتحاد الإفريقي هيصدر قرار بإلغاء
البطوله و منح الكاس لمصر , و باقي المنتخبات كانت هتوافق و تقول : حقها يابو كمال
!! .
.
كنا وصلنا لمرحلة
إن المنتخبات قبل البطوله بتبقى عارفه انها جايه عشان تنافس عالمركز التاني و يتخانقو
عليه , أدينا نزلنا للشمخ الجواني و هنلاعب جمهوريات الموز و الشمبانزي , يعني في التصفيات
الجايه هتلاقي مصر بتلاعب دوله عمرنا ماسمعنا عنها , ولاعبي المنتخب التاني هيبقو نازلين
من غير هدوم و مغطيين وسطهم بورق شجر و في إيديهم البتاعه دي اللي بيصطادو بيها الغزلان
.
..........................................................................................................................
Mohamed
Hussein
19
نوفمبر 2014·
سلامو عليكو ؟
عليكو السلام !!
.
السعوديه بعتت
لمصر تقول لهم والنبي تقبلو الإتفاق التكميلي اللي عملناه مع الكلب اللي اسمه قطر
.
قامت مصر بعتت
الرد للسعوديه و قالت : اتفاقكو على راسنا يا جدعان واحنا موافقين من أجل وحده الصف
العربي و نبذ خلافات الماضي الخ الخ الخ .
.
الحكايه بسيطه
أوي , زي سلامو عليكو عليكو السلام .
و الخراب و الدم
و القتل والتحريض اللي كان برعاية الكلب القطري ؟ مممممممممم يا جدع بقولك عفا الله
عما سلف , تصدق صح , و نعم بالله , أمنت بالله .
.
طيب أنا موافق
عالإتفاق السعودي و بالتالي موافق عالرد المصري بس بشرط , يقولي قادة مصر والسعوديه
و الإمارات يعرفو إيه عن ديل القط ؟!
أقول لكو أنا
, ديل القط ده نوع من الحشائش الضاره المقرفه بيطلع في أرض الفول , يتغذّى على حساب
نبتة الفول الأصليه , و مالوش أي تلاتين لزمه , و بيفضل كده مقرف حتى يوم ما تيجي تقطعه
من الأرض .
.
بلاش بلاش , بلاش
ديل القط , تعرفو إيه طيب عن ديل الكلب ؟!!.
......................................................................................................................................
Mohamed
Hussein
19
نوفمبر 2014 ·
حموضه , قولون
عصبي , اضطراب في الجهاز الهضمي على امتداده ( من بغدادَ إلى الصينِ ) !!.
.
واحد اتولد في
الريف وعاش فيه ربع قرن , كان بياكل سريس و عيش طري و جبنه قديمه يقول اللهم دمها نعمه
واحفظها من الزوال , شوية باميه من عالشط و يتعملو أكله , عودين ملوخيه نجمعهم من أرض
القطن و أمي تطبخهم للعشا , شوية سمك أصطادهم من الترعه صابح و زي الفل , قعد 17 سنه
يذاكر و يمشي بالكتاب بين الغيطان , وسط الخضره و الهوا ( يتهيألي العدّاد بتاع كعب
رجلي عمل بتاع ربع مليون كيلو مشي ) , عبايتك على جسمك و شبشبك في رجلك و كتابك في
إيدك واخرج لنور ربنا , هات لي بقى مادة ال هيتيروسايكليك المعقده جدا وانا أذاكرها
في ساعتين زمن , أخر النهار تقدر تشوف غروب الشمس كأنها بتترمي في حضن الأرض و الصبح
تمتّع عنيك بشكل الوز العراقي و أبو قردان ( ناصع البياض ) , و تقدر تلاقي وقت كبيييييييير
جدا للهدوء , تتأمل فيه في خلق الله , الأخضر في الغيط درجات , أخضر الفول غير أخضر
البرسيم غير الدره و القطن غير شجرة الكازوارين غير الكافور غير لون النخله خالص ,
مش كله أخضر والسلام , دي سجّاده خضره ربّاني من أول أخضر السريس ( البوستاج ) لحد
ما تقول قول .............سبحانك يا ربي .
................
.
القاهره , الطيور
المهاجره , أضواء المدينة , صخب و إزعاج وضوضاء و تروس ساقيه بتلف عالفاضي , وشوش بلاستيك
و ضحكات خشب , متطلبات الحياه بتحوّل حياتنا لمفرمه أو خلاط بننضرب فيه كل يوم ,
...... أنا إيه اللي جابني هنا يا خال ؟!!.
.......................................................................................................................................
Mohamed
Hussein
19
نوفمبر 2014·
مره كانت راجع
من صلاة الفجر أنا وابويا الله يرحمه , جنب بيتنا فيه حته واسعه كده على شمال الطريق
, واحنا راجعين بيقابلنا الهوا النادي بتاع ربنا اللي لسه ماتلوسش بإيد الإنسان , لقينا
شوية بنات وستات قاعدين في الحته الفاضيه , رايحين يشتغلو في أرضهم ( ده كان وقت تشتيل
رز تقريبا ) ومستنيين رجالة البيت يطلعو بس من صلاة الفجر , أبويا واحنا فايتين عليهم
قال لهم ( صباح الخير يا صبايا ) , ردو عليه ( صباحك نادي يا عم أحمد ) .
فات سنين طويله
أوي و انا مابعرفش انسى الكلمتين دول ( صبايا ... نادي ) , عجبني أوي المصطلح ( صباح
الخير يا صبايا ...صباحك نادي يا عم أحمد ) , و مصر هتفضل أم الدنيا طول ما فيها صلاة
الفجر و الصباح نادي والوشوش بتضحك و الرجاله وصفهم رجاله و ستاتها و بناتها اسمهم
( صبايا ) .
.
صباحكو نادي يا
رجاله , صباح الخير يا صبايا .
.......................................................................................................................................
Mohamed
Hussein
18
نوفمبر 2014·
لوجي بنتي ماشيه
معايا بنظام ( اللوحه المكتوبه ) , يعني تكون مبسوطه مني تكتب لوحه أو ترسم قلب على
ورقه , و تكتب بحبك يا بابا i
love you dad
.
النهارده بقى اتضايقت
مني أوي عشان بقالها ساعتين بتقولي ألعب معاها بليي ( جمع بليه ) و انا بقول لها اصبري
شويه انا تعبان .
.
المهم غابت غابت
و كتبت لي اللوحه دي على سبورتها الصغيره
i dont
love you dad , you are not good dad
when i
tell you thomthing you shout at me
.
...............
أنا : ممممممممممممممممممم
ضاعت فلوسك يا صابر , هي something ولا thomthing يا لوجي ?!!.
.......................................................................................................................................
Mohamed
Hussein
18
نوفمبر 2014·
في عيد ميلاده
.
كل سنه وانت طيب
يا ريس , يارب عقبال 1973 سنه , رئيس مصري إبن بلد و مجدع , مش حرامي زي ولاد الصرمه
و لا خاين زي ولاد الكلب .
.............................................................................................................................
Mohamed
Hussein
18
نوفمبر 2014·
شبكة رصد و العيال
( اللي مش على بعضهم ) عاملين هاشتاج بإسم ( إخلع ) , موجهه للشباب المصريين عشان يخلعو
زيهم العسكري أو مايروحوش يسلّمو نفسهم في التجنيد في حالة الإستدعا مثلا أو في حالة
وصولهم لسن التجنيد !!.
.
أه ماتروحوش يا
ولاد , ده على اساس إن الإستدعا دي بتيجي من مجموعه مطاعم هارديز ولو حضرتك ماروحتش
هتتحرم من ساندوتش كومبو , مش جايه من الجيش المصري ولو ماروحتش بتتنفخ و بيجيبوك انت
و عيلتك حتى لو ساكن في بدروم بيت في أرياف هونولولو .
.
المهم بقى إن محمد
عطيه سمع اسم الهاشتاج غلط , سمعه كده ( إقلع ) و كان فاكر إنها دعوه لقلع الهدوم
, فعجبته الفكره و قام طلع بتصريحه عن الأمن الي مش عاجبه والجيش والشرطه الوحشين
, والترجمه يعني ( أنا قلعت أهو ) .
.
عموما أنا متوقع
إن يوم 28 نوفمبر ده هيبقى يوم حلو , و بعد شويه مش هتعرف مين نايم في حضن مين , مين
عالم ؟ مش جايز محمد عطيه يكون سعيد الحظ و يقع في إيد واحد سلفي يكون من مواليد الغربيه
؟!!.
...................................................................................................................................
Mohamed
Hussein
17
نوفمبر 2014·
مدير مستشفى يسمح
لبرنامج تلفزيوني انه يصور مريضه عندها زهايمر !! , واهو تبقى حلقه برضه و تجيب فلوس
و الناس تضحك و تتريأ عالمريضه و يتسلو يعني , و ملعون ابوها الحكايه اللي اسمها خصوصية
المريض دي , بلا قسم أبو قراط بلا قسم أبو مصعب الزرقاوي !! .
.
جريده تنزل تحقيق
بالأسماء والصور عن النجوم اللي جالهم سرطان , حبذا لو فيه صور لهم و شعرهم واقع
!! . و دي بقى يبقى اسمها الصحافه صاحبة الجلاله ؟ ولا اسمها ريري صديقة الطلبه ؟!.
.
مدرس دين في السعوديه
دخل الفصل و ضربت في دماغ أمه إنه يعلّم أطفال في تالته ابتدائي طريقه تغسيل و تكفين
الموتى !! .بدل ما يكلمهم عن الورد و الشمس و الأمل و نور ربنا و الموسيقى والشعر والرسم
و الحب .
.
...................................................
الفهم و الذوق
و الأدب والشياكه و خصوصيات الناس و حرمة المرض بقو حاجات منقرضه عندنا كده زي الديناصورات
و طائر الرخ , و كل معلوماتنا حاليا عن الذوق إنك لو ماشي في شارع ولقيت بنت وقع منها
كتاب أو شنطه توطّي انت تجيبها خصوصا لو كانت بت مزه و لابسه بنطلون ستريتش !!.
.......................................................................................................................................
Mohamed
Hussein
17
نوفمبر 2014·
بنت رابعاويه عملت
احصائيه لذيذه , بتقولك مصر فيها 27 محافظه ( شكلك فاهم يا نصه ) و كل محافظه فيها
مراكز و قرى ( اللهم صل عالنبي ) , بت ذكيه مفيش كلام , لأ و مثقفه كمان , المهم أختك
في الله الرابعاويه دي بتدعو سكان القرى و المراكز في كل محافظه انهم يتجمّعو كده و
يحرقو بوكس شرطه ( أو يكسّروها ) أو عربية ظابط أو بيته أو أي حاجه تخصه يعني و أهو
كده نبقى عملنا ثوره ( سلميه ) ماستخدمناش فيها السلاح أهو ( بعيد عن العنف و العياذ
بالله ) !!.
.
في فيلم العار
, حسين فهمي قال لاخوه نور الشريف ( تاجر المخدرات الكبير ) تشرب ويسكي ولا كونياك
؟ رد نور الشريف و قاله : أعوذ بالله , خمره ؟ أنا أشرب منكر ؟ حد الله بينا وبين الحرام
.
.
و في فيلم العار
الإخوانجي هتلاقي أختك الرابعاويه شايفه إن الحرق و التكسير سلميه و حلال و لما تقول
لها ما تسخدمي سلاح بقى ؟ تقولك أعوذ بالله , سلاح ؟ حد الله بينا وبين الحرام .
أه ماتستغربش
, هما كده عندهم بنات لو اتعمل لهم أشعه عالمخ الدكتور هيلاقي تلافيف كتير كده , هيشتبه
الدكتور فيها , في الأول هيفتكرها تلافيف المخ و بعدين لما يفتح هيكتشف إن التلافيف
دي هي رباط الجزمه مش أكتر .
....................................................................................................................................
Mohamed
Hussein
17
نوفمبر 2014·
عندك راوتر ؟ لأ
؟ يبقى ماعندكش نت , يلعن *@#$% أم الفلاشه , أنا لو بفتح خزينة البنك المركزي بمفتاح
شقتي كانت فتحت .
.......................................................................................................................................
Mohamed
Hussein
15
نوفمبر 2014·
إرهابيين , بيت
المقدس , بدو سينا , و دم جنونا حنفيه مابتتقفلش !!.
ماتكلمنيش عن تهجير
ل 7 كيلو بقى , كلمني عن مكان موبؤ محتاج يتفرم , ويا عم عبد الفتاح احنا في حالة حرب
, إنت عارف كده و احنا عارفين , في الحرب مابيمشيش العساكر بالسلاح ده ولا بالعربيات
دي , إنت برضه عارف واحنا عارفين , طلّع سلاحك من التكديس , دباباتك و مدافعك , عايز
أشوف الطيران المصري بيغطي السما , قافل التكديس ليه و سايب سلاحك جواه ؟ مش ده برضه
اسمه تكديس حرب و لا ده النيش بتاع العروسه ؟!
..................................................................................................................................
Mohamed
Hussein
15
نوفمبر 2014·
نوبة ضحك هستيريه
بتجيلي و حالة سخرية من النفس ببقى فيها فشر الجاحظ و برنارد شو كل ما بفتكر إني تخيّلت
الناس دول بتوع ربنا فعلا !! , وعشت على كده عشره قول خمستاشر سنه .
.
الإخوان بتوع ربنا
, بس إزاي يا عمنا ؟ دي قايمة اغتيالاتهم أطول من الليالي السوده و مفهاش اسم صهيوني
واحد , كلهم عرب و مسلمين .
خلاص بلاش بلاش
, يبقى السلفيين هما بتوع ربنا , بس دول بقالهم خمسين سنه عايمين في حلة رز بلبن كبيره
و تلتين كلامهم بيبقى عن النكاح و كعب المرأه و صوت المرأه و مناخير المرأه و ضرس العقل
بتاع المرأه و الكليه اليمين بتاعة المرأه و كرات الدم الحمراء (و العياذ بالله ) بتاعة
المرأه , و نوع النمله اللي كلمت سيدنا سليمان ( دكر ولا نتايه ؟ ) , لا مش ممكن يكونو
بتوع ربنا , خلاص خلاص مفيش غير داعش , دول بقى بتوع ربنا و عيال مجدع و كفاءه , بس
داعش بتقتل الاطفال و الستات و بتقطع الروس و تلعب بيها كوره , مش ممكن يكونو بتوع
ربنا .
.
و ليا سنين على
دا الحال , روح ياض يا بتاع ربنا , تعالى ياض يا بتاع ربنا , أه وربنا !! .
.
هو بس لو فيه واحد
كده يكون مثقف و قاري و مطّلع و عليم بالنظريات و بواطن الأمور يقولي إذا كان دارون
الله يرحمه كتب فقره في نظرية التطور بتاعته عن المواطن العربي الحمار ( اللي زي حالاتي
) و قال فيها : إن المواطن العربي كان أصله إيد هون أو رجل كومدينو ؟!!.
.........................................................................................................................
Mohamed
Hussein
14
نوفمبر 2014·
و قام المناضل
أحمد موسي قالك ايه بقى ؟ قالك أنا عارف زينب المهدي انتحرت ليه ؟ هتقول يابو الفتوح
ولا أقول أنا !! .
.
واهو احمد موسى
بيتقال عليه إعلامي كبير في مصر زي ما نادر بكار بيتقال عليه المتحدث الرسمي باسم حزب
النور و السياسي المحنك و زي ما الكولجيه عملو من زينب المهدي إنها نيلسون مانديلا
و زي ما سعيد حساسين بيعالج أمراض الدنيا والأخره بخلاصة نبات الزوربيح .
................................
و كل اللي بيحصل
لنا و فينا مالهوش غير اسم واحد , اسمه زوربيح , زوربيييييييييييييح , و تسألني يعني
إيه زوريح يا مولانا ؟ أقولك يعني احمد موسى يشمت في موت حد مات و البهايم يعملوها
بطل قومي مع إنك لو سألت واحد منهم من 3 ايام بس تعرف حد اسمه زينب المهدي ؟ هيفكر
شويه و يقولك أه مش هي دي الممثله الشابه اللي كانت بتمثل في فيلم ( صايع بحر ) ؟!
.
.
و تسألني يعني
إيه الأمل ؟ أقولك يعني أبص في وش الحاجه أمي ألاقيها بتضحك زي الأطفال , و تعيشي يا
ضحكة مصر تعيشي .
.............................................................................................................................
Mohamed
Hussein
14
نوفمبر 2014·
الله يجزاها خير
الأخت هيفاء بنت وهبي , رجّعتنا تاني لزمن الإنسان البدائي الجميل النقي , الإنسان
البدائي اللي كان عايش زمان في الغابات ( إنسان الغاب ) مكانش بيلبس هدوم , كان بيغطي
عورته بورقة توت , أو ورقه من أي شجره و السلام , هي كمان عملت كده بس تحت إسم الموضه
و الفساتين الشفافه و الأزياء الباريسيه , و يتهيألي كده ابن شيخ القبيله حاطط عينه
عليها و هي بقى مصممه إن مهرها 10 ألاف غزاله وقردين و شمبانزي نونو صغير وطبعا النيش
و طقم الجيلي عالعريس .
.............................................................................................................................
Mohamed
Hussein
14
نوفمبر 2014·
عن السعيد ابن
خالي اللي هيطلع بعد نص ساعه بالتريسيكل عشان يروح يشتري الخضار و الفاكهه بدري من
السوق , عن أخويا هاني اللي بيصحى كل يوم من الفجر ينزل أرضنا يزرعها ويراعيها و مايطلعش
منها إلا المغرب , عن الست اللي قابلتها في طريق المنصوره بتبيع جذر بلدي و اشتريت
اللي معاها كله ب 10 جنيه , فرحت بيها كأنها كسبت شقه في الرحاب , عن العسكري اللي
واقف خدمه بالسلاح أو بيطارد إرهابيين دلوأتي , و الست اللي بتقوم من النجمه عشان تجهز
لبس و فطار ولادها , عن كل موظف شقيان على لقمة عيشه و بيتقي ربنا في عياله و أهله
........... هما دول سكان مصر الأصليين .
.
إحنا بقى سكان
دولة الفيس بوك , بتوع الهري و الهري الأخر , اللي بنتاجر في الموت والدم والتراب و
الحدود و الشعارات والعلم والنشيد و الدين و الأخلاق , اللي بنبيع ثقافه أغلبها بلاستيك
و وطنيه تايواني مش أصلي , احنا مجرد شوية أصفار , وانا أول صفر فيكو .
...............................................................................................................................
Mohamed
Hussein
14
نوفمبر 2014·
واحد من حزب النور
السلفي له علاقات نسائيه و واد بقى اوعى وشك يا مولانا !! ................ طب و انا
مالي ؟ .
وهو لو مالهوش
علاقات نسائيه ده معناها انه يبقى مؤهل مثلا يكون عضو في البرلمان ؟ ماحنا شوفنا اللي
( مالهمش ) لما دخلو البرلمان هببو إيه ؟ هنأدّن بقى و واحد يرقي التاني و التالت يجيب
لعبة أطفال ويقول بتسب الصحابه , واللي يحلم ان سيدنا النبي ملّس بإيده على قبة البرلمان
, واللي نكتشف انه كان أصلا حلاق و اللي كان صبي كهربائي و ربى دقنه وبقى شيخ و عضو
برلمان .
.
رأيي الشخصي ان
حكاية العنتيل دي هي حياته الشخصيه حتى لو كانت زباله , و إن حزب النور ده ابن تييييييييييييييت
و ألعن من الإخوان و الحزب الوطني ذات نفسه .
شوية زلنطحيه بتوع
فته و رز بلبن , لما مصر حكمها الإخوان قالو معاكو , ولما حكمها السيسي قالو معاكو
ولما كان مبارك في الحكم حرّمو الخروج عالحاكم و لو حكمنا إبليس الرجيم ذات نفسه هيبايعوه
.
.
يعني باختصار حزب
محتاج الحرق سواء كان له أو ( مالهوش ) , أقصد علاقات يعني .
.......................................................................................................................................
ليست هناك تعليقات:
إرسال تعليق