Mohamed
Hussein
16 أكوبر 2014·
بعد ما خلصت شوية
تنضيفات في الشقه كده و شميت بتاع 17 كيلو تراب و شيلت كام لوح خشب و بواقي اعمال الكهربا
والسباكه و رتبت الدنيا شويه , المهم القصه دي خدت 5 ساعات الصبح , شعري بقى كله تراب
و هدومي و جسمي وانا اساسا ماكنتش حالق دقني و بقيت عامل شبه القرموط اللي لسه طالع
من المصرف ,
.
في النهايه نزلت
من الأسانسير و بفتح الباب لقيت واحده ست من سكان العماره , بس ليدي فعلا مش اي كلام
, شياكه بقى و نضافه و كداهون , اللي هما الناس المكويين اللي بيبقو عارفهم انت دول
؟
اللي زاد الطين
بله بقى إني من ضمن الحاجات اللي كنت بعملها في الشقه هي شوية دهانات بسيطه باقيه و
لما ايدي اتنيلت بالبويه طبعا غسلتها بجاز !!.
.
الست دي بصت لي
بصه كده , مممممممممم طب عارف انت كلمة ( شّزراً ) اللي بيقولوها في التلفزيون دي ؟
أهي بصت لي بصه شزرا من فوق لتحت و الكلام كان على طرف لسانها .
و انا خلاص كان
باقي لي تكه و اعترف و اقول لها : أيوه يا هانم أيوه أيوه انا السبّاك الجديد بتاع
المنطقه و في الخدمه سيادتك .
------------------------------------------------------------------------------------------------
Mohamed
Hussein
15أكتوبر
2014·
أسوشيتيد بريس
: الطيران المصري يقصف مواقع لميلشيات إسلاميه شرق مدينة بنغازي الليبيه !!.
.
و لو سألت أي مسئول
مصري هيقولك ماحصلش حتى فتشني فتّش .
.
إنما الحقيقه إنه
حصل , و حصل من زمان وبيحصل و هيحصل , ده اسمه الأمن القومي المصري , اللي ممكن يخلّيك
تقوم بعمليات عسكريه في بنغازي أو طرابلس او حتى مدينة وهران الجزائريه , أحيانا بتٌضطر
تعمل كده و خصوصا لما يكون جارك اللي جايلك منه وجع القلب زي ليبيا كده , مفيش دوله
ولا يحزنون و حدودك معاها كلها صحرا خارج السيطره طب تعمل ايه سيادتك ؟ , أصلك مش واخد
بالك , الثوره نجحت في ليبيا زي ما قال مولانا العلامه طارق و لا مؤاخذه سويدان لما
قال الثوره نجحت في ليبيا , لولولوي ألف ألف مبروك , عقبال عندك يا ست أم فاروق .
.
نسيت أقول حاجه
للأنطاع اللي بيتطاولو على جيش مصر , من فتره حصل هجوم على نقطة تابعه للجيش المصري
عالحدود الليبيه و راح فيها شهداء , والانطاع هاجو و ماجو وقالو جيش نوال و جيش المكرونه
وفين رد فعل الجيش ؟!! ...أهي الهجمات بتاعة النهارده دي هي جزء من رد فعل الجيش المصري
يا نطع , الجيش راح يجيب الإرهابيين من عند المنبع ( من الماسوره الأم ) , ماتنساش
انت بس تلبس الشورت البافته و تنام على بطنك عالسرير و تدخل على تويتر و تكتب #عبث.
----------------------------------------------------------------------------------------------
Mohamed
Hussein
14 أكتوبر
2014 ·
و لنا في الهري
علامات
.
أحمد و هو عيل
صغير كان بيروح الجامع يسمع خطبة الجمعه , الشيخ يطلع على المنبر و يخطب عن عذاب القبر
و التعبان الأقرع الأناكوندا اللي طوله أطول من شارع فيصل , و بعد الدعاء في نص الخطبه
الشيخ يتكلم بقى عن النكاح ( الفقره الثقافيه ) , نكاح المخلوقات اللي بتحيض واللي
بتبيض و المخلوقات الفضائيه و الجراد و الشمبانزي .
.
و لما احمد كبر
شويه أبوه اشترى لهم تلفزيون , لقى برنامج للدكتور العلّامه اللي بيعالج كل الأمراض
اللي ربنا خلقها بخلاصة نبتة ( العشبه الجهنميه ) اللي كان سيدنا النبي بيستخدمها
, والله مانا فاكر ده كان سيدنا النبي ولا سيدنا أبو لهب .
.
أحمد غيّر المحطه
بعد ما خد جرعه طبيه معتبره من الدكتور العلامه , لقى اعلان بيقول لو عندك مشكله عاطفيه
و لا اجتماعيه اتصل بسماح انور و هي هترد عليك بنفسها , اللهم صل عالنبي , وفي السهره
التلفزيون قاله ياحمد لو عايز تعرف برجك الفلكي و كروت التاروت و الماروت اتصل بخبيرة
الأبراج المزه العالمه فلانه الفلانيه , قالت له ماتنزلش من بيتكو النهارده ياحمد
, برجك هو الي بيقول كده و لا تروح لامك , أمك تخينه أوي يا ممتاز .
.
ولو نزلت و روحت
لامك هتطلع لك سحليه حمره عملاقه من تحت السرير ( السحليه دي تقريبا بنت التعبان الأقرع
الأناكوندا بتاع الشيخ ) .
.
أحمد نسي تقريبا
تعليمات خبيرة الفلك و راح زار امه و رجع نام قام جاله منام وحش اوي , كابوس يعني
, و فيه سحليه حمره عملاقه فعلا , صحى من النوم قعد قدام التلفزيون , التلفزيون قاله
ماتنعيش هم ياحمد , لو عندك منام و مش عارف تفسيره اتصل بالشيخ سيد مفسر الأحلام ,
قام الراجل ماكدّبش خبر , اتصل أحمد و الشيخ سيد قاله : السحليه الحمره في المنام يعني
الأهلى هيفوز بالدوري , قُضي الأمرُ الذي فيه تستفتيان !!.
....................-------------------------------------------------------------------------------
Mohamed
Hussein
13 أكتوبر
2014·
بعد الحروب اللي
حصلت في مصر , سواء كانت انتصار أو نكسه كان بيظهر مجموعه كده من الناس و يغتنو فجأه
, بيسموهم ( أثرياء الحرب ) , ناس بتستغل الحرب و ما بعدها في تقليب عيشها , بالحلال
بقى بالحرام مش بتفرق كتير , تلاقيه يتاجر في السلاح السليم و لا السلاح الخرده و لا
يتاجر في أي حاجه تجيب فلوس لها علاقه بحالة الحرب , المهم إنه في النهايه بيغطس له
بتاع سنتين كده ويرجع مالتي مليونير , راكب الحته الألماني و معلّق الحته السويدي تحت
باطه .
.
برضه في الثوره
ظهر مجموعه من ( أثرياء الثوره ) شوية شباب و ناس كبار , استغلو الليله و الثوره دي
, أهي سبوبه حلوه و عهد الله , و أحلى تجاره تتاجر فيها بعد الثورات هي التجاره في
الشعارات , تبيع شعارات و تشتري شعارات , تغطس لك كام شهر و ترجع مالتي مليونير , عيال
شاطرين والله , زي فلان و علان و ترتان و البت مروه اللهلوبه , هتلاقيهم ملقحين في
الجزيره والساعه بألفين دولار يا سيد ( بيخيطو بمكنتهم تقريبا ) , وشويه منهم مرميين
في الجرايد الخاصه الكبيره ,فجأه كده ظهرت عليهم موهبة الكتابه الصحفيه و الثقافه و
النضال و اتاري الواد كان راضع من مرضعة جيفارا بس مخبّي علينا طول السنين , عارفهم
انت العيال دول ؟!.
.
المهم و الشاهد
يعني إني انا و كل أصدقائي الأعزاء اللي هما حضراتكو من النوع الفقري , أه والله فقري
جدا , اللي بيدوّر عالفقر بمنكاش , فات علينا ثورتين زي الفل و كان فيها شوية مليارات
حلوين اتبدرو هنا و هناك و والنتيجه ايه ؟ اشتريت شنطه لبنتي ب 75 جنيه من أول جمال
عبد الناصر و بعد اسبوعين اتقطعت و روحت خيطتها ب 15 جنيه , تلك إذا تسعون كامله ,
يعني يا لوجي يا بنتي لو أبوكي كان مدردح شويه مش كان زمانك شايله شنطه أم 250 بتاعة
سيندريلا و اتوبيس الجزيره و لا المصري اليوم بيوصلك لحد المدرسه ؟ .
.
عشان كده لو حد
قالك انتو مأجورين و بتقبضو و كداهون ماتردش عليه , إدي له بالجزمه على دماغ أمه و
قول له : فشر , إحنا فقريين يا حاج .
--------------------------------------------------------------------------------------------
Mohamed
Hussein
13 أكتوبر
2014·
يعني إيه مثقف
غبي ؟
.
يعني يقولك في
أوروبا و الدول المتقدمه طالب الجامعه بيدخل كليته من غير تفتيش و لا حد يسأله عن كارنيه
ولا بطاقه ولا حتي كارت ميناتيل , دانت تبقى نايم في سريرك كده و فجأه تلاقي نفسك في
مدرّج المحاضرات ( زي ما قال بعضهم ) , أه فهمت , بالبيجاما يعني .
.
طيب حضرتك هو طالب
الجامعه هناك حصل إنه دخل قبل كده بمولوتوف أو ولّع في جامعته ؟ طب لو حصل و دخل
100 أو 20 طالب و عملو بلاوي في جامعتهم برضه الدوله هناك مش بتفتش اللي بيدخل ؟ طب
فيه طالب في جامعة كاليفورنيا ابوه اسمه البلتاجي ؟ طب هناك طالبات حرائر من اللي هما
نازلين من بيوتهم عشان مممممممم ما علينا ؟ طب حصل في جامعة الأزهر بتاعة باريس مثلا
إن الطلبه ولّعو في مدينتهم الجامعيه ؟
.
فهمت يعني إيه
تبقى مثقف غبي و لا لسه ؟ يعني إيه بتنقل خبر أو معلومه بدون أدنى تفكير ( كمثل الحمار
يحمل أسفارا ) , في أوروبا طلبه متحضرين عشان اهاليهم متحضرين مش إخوان , محدش هيقطع
طريق و لا هيخرّب في المال العام و لا هيولّع سجاره في مكان مكتوب فيه ممنوع التدخين
, في أوروبا لو رنّيت الجرس عليا و طلعت تجري هتصل بالشرطه و لو جابوك هتتنفخ لأنك
أزعجتني !! , ولو كررت الحكايه مرتين تلاته قول تسعه هيعتبروك إرهابي يا حاج !!.
--------------------------------------------------------------------------------------------------------
Mohamed
Hussein
12 أكتوبر
2014·
رجعت البيت و انا
مهدود تمام و خلصان و جايب جاز , يوم طويل أوي وشاق و لفّ من هنا لهنا لهنا , كان باين
عليا مشقة السفر و وعثاء الطريق ( حلوه وعثاء الطريق دي يا حاج محمد ؟ ) , فتحت باب
الشقه لقيت مراتي بتقابلني بابتسامه من النوع ده اللي يخلي الواحد يهدى تماما , مدّت
إديها و خدت كيس كان في إيدي عشان تشيل عني , قالت لي استريح يا حبيبي شكلك تعبت أوي
النهارده , أنا مجهزالك الغدا من ساعة ما قلت في التليفون انك قربت توصل , بس قبل ماتتغدى
ادخل هتلاقي الحمام جاهز , لقيت البانيو مليان مايه دافيه و عليهم شوية ( فولاتيل أويل)
من اللي قلبك يحبهم , بيعملو مساج برضه , قلت لها البنات فين ؟ قالت لي نامو يا حبيبي
, قلت اللهم لك الحمد , أنا أصلي تعبان أوي و مش حمل إني انزل سوبرماركت عشان لوجي
ولا محل لعب أطفال عشان لمار و لا حمل فرهدتهم ليا دلوأتي , حسيت إن الجو هادي اوي
بس فيه موسيقى سامعها شدتني , إيه ده ؟ دي موسيقى ( أغدا ألقاك ) بتاعة سومه , أنا
بعشقها دي , قلت : الله , الله , الللللللللللله , الجو ده جو كوره يا كابتن متحت
!!.
.................................
................................
المهم يعني إن
اللي فات ده كان مقطع من رواية ( أحلام العصافير الكناريا ) اللي بحاول أألفها حاليا
و انا مستمتع جدا , مانا زمان قابلت راجل عجوز كان لابس أبيض فابيض و قالي : يابني
إذا كنت في كل الأحوال هتتنفخ فحاول يعني إنك تستمتع !!.
----------------------------------------------------------------------------------------------
Mohamed
Hussein
12 أكتوبر
2014·
عناوين الجزيره
: المتظاهرين يطالبون برحيل السيسي , انسحاب لقوات الأمن من تأمين البوابات , مظاهرات
( عارمه ) تجتاح الجامعات المصريه !! , .......... عارمه نفسها طلعت في الجزيره و قالت
: عليا الطلاق حصل !!.
و اللي كان فاكر
ان موقف قطر اتغيّر شويه اليومين اللي فاتو و كان بدأ يتظبط , أحب أقول له ان العاهره
لما بتتوب بتشتغل قوّاده مش دكتورة نسا و لا مهندسة ديكور .
.
عناوين علاء عبد
الفتاح : فالكون دي عند أمك !! .
الحمد لله , نظرتي
في علاء عبد الفتاح ماخيبتش , ميتين أم الفكر الثوري و ديك أبو الحريه مايركبوش على
فراتيك أم علاء عبد الفتاح , و اللي فاهم إن النضال يعني تقعد تريل و تشتم و تسب في
أي حاجه و تفضل 9 شهور ماتستحماش ولا تسرّح شعرك مايبقاش تنين بامبي يا عم يسري , ده
بكتيره يبقى بقره هولندي , الحريه للبقره الهولندي , البقره الهولندي على الأسفلت
.
.
و بصو بقى يا شباب
, يعني ايه شرطه أو شركة أمن يأمّنو الجامعات ؟ يعني ايه يسألو الطالب فين كارنيهك
و يفتشو شنطته لو اشتبهو فيه ؟ دي مهزله يندى لها جبين الراجل اللي قاعد عالقهوه هناك
ده , احنا لازم نتظاهر ( من غير تصريح ) و نطالب بإن الأمن والشرطه يسيبو بوابات الجامعه
من غير تأمين , اللي عايز يدخل بسنجه و مولوتوف يدخل و اللي عايز يدخل بكتابين ماشي
و اللي عايز يدخل بحشيش مايضرش واللي عايز ناشينكاح هاتو له ناشينكاح ..... #حريه
#حريه #حريه.
.
إنما للامانه يعني
و الشهاده لله الراجل السيسي مابيعرفش يهزر ( أه دمه تقيل ) و لما بينفخ بينفخ , فيا
أيُّها الطالب اللي طلعت في الجزيره و عامل نفسك 7 رجاله في بعض , ماتبقاش تعيط بقى
لما السيسي يعصرك كده في إديه و ينزّل منك طلبة ابتدائي و كيجيهات .
-----------------------------------------------------------------------------------------------------------------
Mohamed
Hussein
12 أكتوبر
2014·
المسئول : هه يا
حبيبي حرقت عربية الشرطه ؟
الطالب : أه سيادتك
المسئول : و ضربت
بتوع الأمن و كسرت البوابات ؟.
الطالب : أه سيادتك
المسئول : و خربت
الجامعه و ولّعت فيها ؟
الطالب : أه سيادتك
المسئول : و اتصورت
في الجزيره و انت بتحرق و تكسّر و رافع شعار رابعه بقى و وشك كان باين و منوّر كده
؟
الطالب : أه سيادتك
المسئول : طب تمام
, إنت كده مفصول نهائي من الجامعه بناء على تعليمات وزير التعليم العالي , و هتسرح
بأمشاط و فلايات في قطر طنطا .
.
الطالب : مفصول
ليه ؟ هو انا عملت ايه يعني ؟!.يعني انا كده مش هبقى دكتور ولا مهندس و لا هاخد شهاده
جامعيه ؟!
المسئول : أه سيادتك
!!.
----------------------------------------------------------------------------------------------------------
Mohamed
Hussein
11 أكتوبر
2014·
أتعس الناس حظا
في مصر دلوأتي مش الإخوان , لا خالص , أنصار البرادعي الحاليين أتعس من الإخوان بكتير
, الراجل الكبير بتاعهم يغيب يغيب و لما يرجع تلاقيه كاتب كلمتين مالهمش أي تلاتين
لازمه , الشباب هما طريق المستقبل , الحريه هي طريق النور , الزقازيق هي طريق بلبيس
الصحراوي , و أي هجص في أي حاجه يعملو تويته .
.
مانا قلت البرادعي
أفلس سياسيا و انتو مش مصدقين , أهو بقى عامل زي عم العريس اللي راح يطلب ايد عروسه
لابن اخوه و كل شويه يقول ( ربنا يتمم بخير ) و بس , الراجل جاي على مضض و أصلا أصلا
مايعرفش حاجه عن العروسه ولا حتى عن ابن أخوه العريس !! .
.
يا أنصار البرادعي
, اطلقو رصاصة الرحمه على البوب الإله و كفايه تعذّبوه بطلب مواقف و تويتات , الراجل
مات من سنه و الضرب في الميت حرام .
------------------------------------------------------------------------------------------------------
Mohamed
Hussein
11 أكتوبر 2014·
عايز أكتب عن مصر
الجميله أوي من غير ماكياج , عن الحب و الخير , عايز أكتب عن اللمبه الجاز و الطبليه
و اللمّه و الكباب اللي من غير لحمه , عايز أكتب عن ريحة الندى وقت الفجريه , عن بهيه
و عيون بهيه , عايز أكتب عن الحب بتاع الجوابات و المراسيل مش بتاع الديسكو و البكيني
, عايز أكتب عن الشوال و الشمره و الشضايا و الشرشره و جمال حرف الشين , عن الحصيره
و البردعه و الوتد و المختمه , عن شكل الملوخيه في أرض القطن , عن عمتي اللي كانت بتموت
في المستشفى و لابسه 7 جلاليب فوق بعض وقالت لي انا هتقلب على جنبي و خد بالك لا تكون
حاجه من ضهري باينه !!.
بس أكتب إزاي ؟
مانا لازم أضحك الأول , بقالنا 3 سنين مابنضحكش , أتاري السياسه دي لها أنياب و مخالب
و بتنهش في ضحكتنا زي الكلب السعران .
-------------------------------------------------------------------------------------------------------------
Mohamed
Hussein
11 أكتوبر
2014·
قلت أساعد لوجي
بنتي في المذاكره بتاعة الإنجليش , كان الهوم ورك بتاعها إني أملّيها باراجراف كده
( ديكتيشن يعني ) , و بعد ما مليتها و هي كتبت بصيت في ورقتها , اللهم صل عالنبي ,
إيه جمال الخط ده ؟ و لا كلمه غلط و لا حرف حتى , المهم قلت أصحّح لها بقى زي المدرسين
واعيش الدور , كتبت لها 10/10 و عملت نجمه و كتبت في التوقيع papa !!.
قالت لي إيه ده
؟ مفيش حاجه في الإنجليش اسمها papa
, بابا دي فرنساوي , في الإنجليش dad
,................ الله يخرب بيتها ميس ميرفت بقى , يخرب بيتها فيري ماتش أه و عهد
الله .
-----------------------------------------------------------------------------------------------------
Mohamed
Hussein
10 أكتوبر
2014·
في ذكرى أحداث
ماسبيرو
.
كنت قاعد في الصيدليه
في السعوديه , منفعل جدا من اللي بيحصل , كمية تحريض غير عاديه , شوية مذيعين هفأ و
سلفيين برياله نازلين بالسيوف و إخوان صهيون ممممممم ابقى حاول تفكّر مين اللي نفّذ
و خطط لمذبحة ماسبيرو عشان مجلس طنطاوي يلبس في الحيطه ؟ و مين بيعرف يركب السلفيين
و يدلدل رجليه ؟ , أظن بعد مرور سنين نقدر نفكر بهدوء .
.
في اليوم ده دخل
عليا دكتور باطنه شغال في المستوصف اللي جنبي , قالي مالك ؟ منفعل ليه ؟ قلت له المسيحيين
بيندبحو في ماسبيرو , قام ضحك ضحكت الإخوان الصفرا دي وقال أحسن يستاهلو !! , الدكتور
الإخوانجي أبو دقن كان بيصلّي بينا إمام في مسجد المستوصف , من يوميها بطّلت أصلي جماعه
وراه .
.
عرفت ليه بقى الناس
و الأرض و التاريخ و التراب و الهوا اللي بنتنفسه كرهو الإخوان و انفجرو و ماقدروش
يستحملو اكتر من سنه ؟! و لما تسأل عن 30 يونيو ابقى قول : ثورة دي ولّا إنفجار ؟!!.
------------------------------------------------------------------------------------------------
ليست هناك تعليقات:
إرسال تعليق