Mohamed Hussein
23
أكتوبر 2014·
هبسطهالك
.
الإشتراكيه هي
: إنك يكون عندك عجله تقوم تخلّي العيال صحابك يشاركوك فيها و يركبوها معاك و ولاد
الجيران و حتى ابن البواب وابن عم مصطفى بتاع الجراج .
.
الرأسماليه هي
: إنك تلاحظ إن صحابك كتير أوي و ماعندهمش عجل , تقوم تشتري عجله و تأجّرها لهم و تاخد
منهم فلوس , وتاخد شباشبهم رهن أو حتى تمضّيهم على كمبيالات و اللي يتأخر في الدفع
تاخد عليه فوايد , و لو حد من السلفيين سألك قول له دي رسوم إداريه يا مولانا ( أه
هي دي كلمة السر ) .
.
الثورجيه في النسخه
المصري هي : إنك تشتري عجله و تظبّطها و تروح تديها للإخوان و تقول لهم : والنبي ابقو
إدّوني لفّه .
.
البرادعاويه هي
: إنك ما تشتريش عجله و لا حتى تدفع فيها مقدم و تتعب شويه عشان تقسّط الباقي , لا
, و عليك بإيه وجع القلب ده كله ؟ إنت تحاول تشترك في مسابقة كوكاكولا جايز تكسب العجله
, وتفضل طول النهار والليل تجمع في غطيان الكازوز و تقرا لمحمود درويش و تسمع فيروز
وتكتب عبث , و طولة البال تبلّغ الأمل , أديك مستني الكازوزه اللي فيها الجادون !!
.
.......................................................................................................................................
Mohamed
Hussein
23 أكتوبر
2014·
هو حضرتك ليه مش
مصدق إن الطالب الإخوانجي اللي بيروح الجامعه دلوأتي مش رايح يتعلم ؟ , ولا الطالبه
الإخوانجيه , الحرق و التخريب هو التارجيت بتاعهم حاليا .
ليه مش مصدق إن
طلاب الإخوان بيروحو يتعلمو لما يكون تعليمهم في مصلحة الجماعه و يروحو يحرقو و يهيّجو
الدنيا لما تكون دي مصلحة الجماعه , وبياكلو عشان مصلحة الجماعه ويصومو لمصلحة الجماعه
, و ينزلو انتخابات عشان الجماعه و يمتنعو عشان الجماعه ويقولو الجيش حلو عشان الجماعه
والجيش ابن تيت عشان الجماعه و الشعب مؤمن و متدين و حر عشان الجماعه والشعب وثني وشوية
عبيد عشان الجماعه و ثوّار يناير أعظم شباب في مصر عشان الجماعه و مأجورين و ممولين
و ولاد كلب و شوية عاهرات عشان الجماعه .
ليه مش مصدق إن
مصر فيها 300 ألف إخوانجي بيعتبرو الجماعه الوثنيه دي هي العقيده والدين و الوطن والعلم
والنشيد و الهدف و الرجا ؟ طب هتصدق امتى طيب ؟ محتاج كام ألف دليل تاني عشان تقتنع
؟
........................................................................................................................................
Mohamed
Hussein
22
أكتوبر 2014·
واحد منتحل اسمي
و صورة عم جلال ( نفس اللي انا حاططها بالظبط ) و عامل أكاونت و التاني كل شويه يبعت
للفيس بوك يطلب كلمة سر جديده لحسابي أنا !! , هي أمراضنا المزمنه دي هتنتهى إمتى ؟
أيوه التطفل و و الغتاته والخنقه دي امتى بقى ؟ عايزين الأكاونت ؟ خدوه , محدش عايز
العربيه طيب ؟ طب محتاجين فلوس ؟ ..............خد قوتي وقوت عيالي يا عبد الهادي
.
.
و قالك نطالب بالحريه
بقى و الديموقراطيه و حقوق الإنسان , و تسقط الفاشيه و تسقط الديكتاتوريه , ياخي اتلهي
على عين اللي خلفوك , مش لما تعرف ألف باء حريه يعني ايه الأول ؟ طب عارف أبسط قواعد
حقوق الإنسان ؟ .
.
ماهو لازم نعمل
ثوره على نفسنا قبل كل شئ , و نهتف بسقوط وقاحتنا و رخامتنا و لو تطلب الأمر نعتصم
ضد الشر اللي جوانا.
.....................................................................................................................................
Mohamed
Hussein
22
أكتوبر 2014·
مشهد عبقري من
فيلم الكرنك
.
فريد شوقي و هو
رافع قرعة البوظه على بؤه : انت عايز تتجوز دكتوره ؟ دي دكتوره يا عالم , دكتوووووووووووره
, عليا النعمه انت ما بتتكلم , انت بتنهق .
.
على الشريف ( الفرارجي
) : وهي يعني الدكتوره دي لما تتوظف هتاخد كام ؟ دي ماهيّتها ماتجيبش جوزين فراخ و
بالتسعيره كمان !! .
..........................
و يفوت نٌص قرن
تقريبا , ويفضل نفس المشهد و يتكرر قدام عنينا , قال انا فكرت إني هنزل أشتغل بقى من
الإسبوع الجاي , وحسبتها حسبه بسيطه أوي , أنا لو اشتغلت في صيدليه 9 ساعات يوميا هقبض
2000 جنيه في الشهر , في نفس اللحظه افتكرت ان الأسطى فلان الفلاني النقّاش خد مني
2700 جنيه على دهان الشقه و عملها في 5 ايام , يعني بمعدل 15 الاف جنيه في الشهر بالمستريح
( ربنا يبارك له ) .
.
يعني انا لو كنت
استفدت من سنتين من السنين الطويله اللي ضيعتها في التعليم دي في إني أتعلم مسكة المشط
( الفرشه ) و الروله مش كان زماني أسطى نقّاش أد الدنيا ؟ و كان زماني فاتح بيت و اتنين
و تسعه دي حتى ماهية الدكتور ماتجيبش جوزين فراخ و بالتسعيره كمان .
.
مصر فيها حاجه
غلط , البلد دي متشألبه يعني عامله شألباظ و واقفه على راسها , ماتقولشي بقى احنا محتاجين
رئيس قوي و جبار , لأ , احنا محتاجين 7 أنبيا ينزلو مع بعض في نفس الوقت جايز يعرفو
يعدلو الحال المايل .
.
و على فكره بقى
, الفرارجي كان بيتكلم صح و فريد شوقي هو اللي بينهق................ الكوميديا السوداء
.
....................................................................................................................................
Mohamed
Hussein
21
أكتوبر 2014·
بالصدفه البحته
.
بالصدفه البحته
قرر جيمي كارتر انه يقفل كشك الحريه و الديموقراطيه بتاعه اللي في مصر و توكل كرمان
بعد ما خدت نوبل للسلام رفعت شعار رابعه و مالالا الباكستانيه رفعت شعار رابعه قبل
نوبل للسلام , و بالصدفه البحته تنبأ مولانا تميم البرغوتي بعنف و خراب في مصر و بالصدفه
البحته بقت الجزيره و صفحات الإخوان لما يتكلمو عن الخرفان الصغيرين يقولو ( الثوار
) !! .
.
بالصدفه البحته
ألتراس أهلاوي بيهيج على أي حاجه و وايت نايت نفس الحكايه , بالصدفه البحته بقى الإرهابيين
اللي بيحرقو الجامعات و يخربوها يتقال عليهم ( طلاب مصر الشرفاء ) , لأ لأ لأ مفيش
فلوس و لا تمويل و لا ناس غاويه تتركب حُمّيري و لا شر عامل كماشه حوالين البلد دي
.
.
.......... بالصدفه
البحته بتلاقي صاحبك الكولجي في وسط الإرهاب و الخراب ده عامل نفسه ( حمامة السلام
) و مرهف الحس بقى و سو كيوت , و صاحبته لابسه أخضر فاخضر و عامله نفسها ( غصن زتون
) , ياخي ملعون أبوها الحمامه أم غصن زتون .
............................................................................................................................................
Mohamed
Hussein
21
أكتوبر 2014·
بيحصل ساعات ,
تبقى سايق عربيتك و انت تعبان أوي و منهك و مش مركز , يعني دماغك مش معاك و لا الهوا
, و فجأه تلاقي نفسك وصلت للمكان اللي انت عايزه , تقوم تسأل نفسك أنا وصلت هنا إزاي
؟ دانا لا فيا عقل و لا تركيز , غيرشي جوز عيون بيشوفو الطريق , و جوز عيون من غير
عقل و تركيز يبقو مجرد حتتين إزاز من النوع الشاف .
أنا وصلت للنقطه
دي إزاي ؟ معقوله أكون طلعت 3 كباري و نزلت نفقين و دخلت يمين و يعدين يمين في شمال
و عدّيت على5 مطبّات و هدّيت عندهم ؟ أنا مش فاكر إني عملت كده خالص , طب وصلت إزاي
بقى ؟ من غير مارشق في كوبري أو أكل مطبين تلاته ؟
.
العلم ممكن يتشألب
و يقولك ده اسمه العقل الباطن يا جاهل و ممكن تفرط منه شويتين أكتر و يقولك : إنت عارف
الحمار اللي في بلدكو لو مشي من البيت للغيط مرتين تلاته بعد كده هيعرف الطريق لوحده
من غير ما توجهه , ممممم طب أفهم من كده إن العربيه بتاعتي بقت زي الحمار اللي في البلد
؟!.
.
رأيي الشخصي إن
الحكايه لا ليها علاقه بعلم و لا بحمار البلد , الحكايه باختصار شديد اسمها ستر ربنا
وبس ( و عينُ اللهِ ترعانا ) .
.
نفس الحكايه دي
حصلت لمصر في ال 3 سنين اللي فاتو , ماشيه من غير عقل و لا تركيز , و هما حتتين الإزاز
اللي بتشوف بيهم طشاش بس في النهايه وصلت لنقطة أمان , ده برضه اسمه ستر ربنا .
.
أه وصلت لنقطة
أمان , سيبك انت من تميم البرغوتي و حكاية العنف القادم و الهطل ده , ماهو فيه ناس
بيفرحو أوي في الخراب , بيقتاتو على الدمار و منظر الدم , بالك إنت ؟ العرب طول عمرهم
أمة بيان , و العرب زمان قالو ( نَعمَ كلبٌ في بؤسِ أهلهِ ) , ابقو اسألو تميم البرغوتي
عن الجمله دي و هو هيفهم , ماهو شاعر واكيد بيفهم و يحس !! , إلا بالمناسبه هو مين
شاعر الثوره ؟ يوسف القرضاوي ولا تميم البرغوتي ؟ طب مين كبابجي الثوره طيب ؟!! .
.........................................................................................................................................
Mohamed
Hussein
20
أكتوبر 2014·
معاني و عاجباني
.
عبد الناصر اسمه
الزعيم , التاريخ بيقول كده و العقل كمان , انتقد حكمه بس ماتنساش و انت بتتقد تقول
( مش عاجبني كذا في حكم الزعيم جمال عبد الناصر ) , والسادات اسمه البطل , برضه انتقده
بنفس الطريقه , انتقد الرئيس البطل أنور السادات , السيسي هو المنقذ بلا منازع , ممكن
لو سمحت تنتقد حكم الرئيس المنقذ عبد الفتاح السيسي ؟! .
.
أحمد موسى , مصطفى
بكري , توفيق عاشه , هما الناس اللي ماينفعش تقفل على نفسك باب و تسمعهم , عشان ده
عيب و حرام ويتهز له حاجات كتير , دي شغلانتهم و هما عارفين كده ( و أمهم هي كمان عارفه
) , وانت عقلك في راسك , ماتشاركش معاهم في كبيره من الكبائر بقى .
.
ثورة يناير , أعظم
ثوره في تاريخ مصر الحديث , ماتقلش أبدا عن ثورة 30 يونيو , لولا 25 يناير مكانش هيبقى
فيه 30 يونيو , يعني تقدر تقول يونيو إبن يناير ( و هذا الشبل من ذاك الأسد ) ...و
أكبر إهانه ممكن تتوجه لثورة يناير اللي نزل فيها ملايين و هزت الأرض تحتها هي إنك
تحصرها في أوضه و صاله و عفشة مايه اسمهم أسماء محفوظ و علاء عبد الفتاح و عبد الرحمن
القرضاوي .
..........................................................................................................................................
Mohamed
Hussein
20
أكتوبر 2014·
تميم البرغوتي
!! , وانا أقولك بقى مين هو تميم البرغوتي ؟ , ده يا سيدي يبقى خاتم الأنبياء و المرسلين
و المحللين السياسيين و الكرويين و كبير الحاخامات و كبير كهنة المعبد و بابا الفاتيكان
اللي جاي , راجل مبروك أوي يعني , أيوه من النوع اللي هو بيمشي عالحيط ده و تلاقيه
قاعد في الجامع بتاع البدرشين مابيصليش عشان هو في نفس اللحظه دي بيصلي إمام للمصلين
في مكه و لو ركزت شويه هتلاقيه واقف في الصف التالت في نفس الوقت في جامع في مقدشيو
.
.
و الراجل المبروك
شايف إنه ب ( يَلْمح ) و ( يلمس ) غضب مكبوت جوه صدور المصريين و ثوره عنيفه أوي جدا
خالص هتحصل , حاجه كده تقول إن العنف اللي بيحصل في سوريا والعراق ده مجرد عطسه من
اللي هيحصل في مصر .
.
و انا من رأي مولانا
تميم البرغوني , عنف شنيع في صدور الناس و مكبوت و مكتوم و مردوم عليه و مكفي عليه
ماجور , هنروح بعيد ليه ؟ إمبارح كان نفسي في دره مشوي , نزلت ألفّ في الشارع , لمحت
نار من بعيد قلت بس عربية دره مشوي هناك أهي , لكن لما وصلت هناك مالقتشي عربية الدره
, و لقيت راجل جواه عنف و كبت و عمّال يطّلع نار من ودانه , يبقى الشهاده لله و لّا
مش الشهاده لله ؟!.
......................................................................................................................................
Mohamed
Hussein
19
أكتوبر 2014·
قبل انتخابات الرئاسه
الأخيره باسبوعين تلاته كتبت إن الجزيره هتقول الإنتخابات مزوره من قبل ما تبدأ و قد
كان , وقلت انك لو لك واسطه أو معرفه عند تميم و امه ممكن الجزيره تجيب لك شرايط التزوير
و فيديوهاته من قبل الإنتخابات بيومين تلاته , كل حاجه متستفه عندهم في الدرج .
.
و قبل الإنتخابات
البرلمانيه القادمه في مصر أقدر أقول بالفم المليان إن الجزيره برضه هتقول مزوره من
بكره الصبح و عندها الشرايط و الفيديوهات وشهادات الشهود بس المره دي ضيف عليهم نشطاء
الفيس بوك و عمك الحاج كارتر , هما كمان بيقولو الإنتخابات اللي لسه هتحصل في مصر اتزورت
من كام شهر و اللي كان كان !! .
.
يبقى كده عندنا
الجزيره و النشطاء بتوع #عبث و كارتر , 3 أنبياء أهم بيجيلهم الوحي من السما أو من
مكتب السي أي إيه و يقول لهم كل حاجه , و باقي لهم جوز أنبيا واتنين صالحين كمان و
تلاقيهم واقفين صف في الجامع و مستنيين مرسي يصلي بيهم إمام , اللهم صل عالنبي .
............................................................................................................................................
Mohamed
Hussein
18
أكتوبر 2014·
أيوه صح , أنا
مش موافق إني أدفع جوز جنيهات من جيبي عشان في النهايه الشعب يجمع كام مليون و الحكومه
تعمل بيهم مدينة جامعيه لشوية عيال صيّع يسكنو فيها على حسابي انا و حضراتكو و في الأخر
يحرقوها و يحرقونا معاها , مش موافق , الله لا يجعلهم يسكنو و لا يتعلمو .
.
و هما يعني بتوع
الإخوان لما يتعلمو هيعملو ايه ؟ هيبقو دكاتره ( أه زي عصام العريان كده ؟ ) و مهندسين
( زي خيرت الشاطر صح ؟ ) و أساتذة جامعه ( زي مرسي بالظبط مش كده ) ؟ , يعني في النهايه
هيبقو متعلمين أوي بس بدرجة بقره .
.
يبقى عالأقل نكون
عارفين , والحكومه و هي بتلم مننا الفلوس و الضرايب ماتقولش احنا هنعمل مدينة جامعيه
عشان التعليم و تفتيح العقول , لا تقول لنا هنعمل مشروع لتسمين العجول !!.
.................................................................................................................................................
Mohamed
Hussein
18 أكتوبر 2014·
حكاية الراجل الصالح
و ال 7 تفاحات
.
هحكي لكو حكايه
صغيره , كان فيه 7 شباب تايهين في الصحرا و جعانين اوي , وفجأه طلع لهم راجل صالح لابس
أبيض فابيض , قال لهم يا ولاد انا معايا 7 تفاحات ( بالصدفه البحته ) , اللي هيقول
منكو ( تحيا الديموقراطيه الأمريكاني ) هديله تفاحه , الولاد فرحو أوي و بدأو يرددو
شعار الديموقراطيه الأمريكاني واحد ورا التاني ,
.
وكل واحد يقول
الشعار ياخد التفاحه ( الجايزه ) بس يموت بعدها , الأول أكل التفاحه و مات والتاني
أكلها ومات و هكذا لحد ما مات الشاب السادس , و جه الدور على الشاب السابع اللي كان
ذكي أوي ( أه والختمه الشريفه ) بص للراجل كده وفكّر لمدة ثواني وافتكر انه كان بيقرا
لمحمود درويش و بيسمع فيروز و بص للراجل الطيب وقاله ( هات التفاحه يا حاج , تحيا الديموقراطيه
الأمريكاني ) !! , لكن ستر ربنا بقى إنه بعت له راجل فلاح جاي جري و عرقان , شد التفاحه
من إيد الواد و رماها وضربه قلمين و قاله امشي يابن الكلب من هنا , 6 ماتو قبلك وانت
مابتفهمش ؟ يا خساره تعليمي وربايتي فيك .
.
في اللحظه دي التوب
الأبيض فابيض وقع من عالراجل الصالح و ظهر مكانه توب اسود في إسود و قرنين و ضحكه شريره
بعدها الراجل الشرير اللي كان صالح من شويه قال للواد الي فلت ( أنا ماشي , إنتو الجو
بتاعكو مايشجعش على الديموقراطيه و هقفل مكتبي ) , إنتو أشرار و ماعندكوش سوشيال بوليتيكال
انتيليجنس.
.
........................باي
باي كارتر , على موبايلات بقى .
.........................................................................................................................................
Mohamed
Hussein
17
أكتوبر 2014·
جيمي كارتر قفل
مكتبه في مصر و قال إن المناخ في مصر الأن لا يساعد على الديموقراطيه !! .
.
أفهم من كده إن
الديموقراطيه كُنّا بنعبيها في زكايب أيام مبارك و كانت بتنزل لنا من الحنفيه أيام
مرسي عشان كده سيادتك كنت فاتح مكتبك و بترش مايه قدامه كل يوم ؟!.
.
كده أنا أبصم بالعشره
إن النظام الحاكم في مصر حاليا ماشي بما يرضي الله , ماهو الشيطان لما يذم في حد يبقى
أكيد الحد ده ولي من أولياء الله , عمركشي شوفت شيطان قال كلمه وحشه في حق كيم كارديشان
أو ريري سيلان أو حتى في حق قطر و جايزة نوبل للسلام ؟!.
.
لأ , لأ , يا كارتر
يابني استنى ماتمشيش , استنى , استنى يابني , مصر مش هتعرف تنام من غيرك و هتفضل ترفّص
برجليها طول الليل , هنعيش إزاي من بعدك ؟ دانا كنت عشمان إن السكر بتاع أمي يتظبط
و زرعة القمح بتاعة أخويا تبقى فله على يدك , طب نهر النيل هيجري ازاي وانت مش في مصر
؟ دانا سمعت ان نهر النيل كان بيجري طول السنين اللي فاتت دي لحد ما نفسه اتقطع عشان
بس كان خايف منك !!.
.
غور يا مولانا
كارتر , يا إله الديموقراطيه و الحريات و الورق اللوري , غوووووووور , و اكتب يابني
عندك , إكتب : مصر كان فيها 1000 كلب و بقو 999 , و مش هنعمل جنازه حاره عشان الميت
كلب .
..................................................................................................................................................
Mohamed
Hussein
17
أكتوبر 2014·
صديق عزيز ( بحبه
والله ) بس هي فرطت منه شويه لأ شويتين , المهم إنه شايف إن أسوأ تاريخين في حياة مصر
هما 23 يوليو 52 و 30 يونيو 2013 !!.
.
يعني باختصار
, مصر كان المفروض تفضل مملكه زي ما هي ويورثونا لولادهم , فيها بتاع 500 باشا , كل
واحد واخد له كام ألف فدان منحه كده من جلالة الملك , وبقية الشعب يشتغلو كلّافين بالأجره
عندهم , بنظام السخره .
.
و مصر كان المفروض
تفضل تحت حكم الإخوان و يورثونا لمكتب الإرشاد لحد ما ييجي يوم و نلاقي أم أيمن نفسها
بتحكم مصر , تخيل كده : رئيس جمهورية مصر العربيه اسمه ( أم أيمن ) ؟! .
و في النهايه مكتوب
علينا نعيش عبيد في وسية الباشا أو نعيش كفره ولاد كلب و عبيد برضه في وسية خليفة الله
على الأرض !! .
.
يا أتباع نبي الله
جيفارا , جيفار نفسه لو كان عايش و شافكو كان زمانه مات بالتيستوميجالي !!.
...................................................................................................................................................
Mohamed
Hussein
17
أكتوبر 2014·
ثورة الشك
.
1- من حقك تسأل
أي حد بيشتغل أو اشتغل في الشأن العام عن أي تغيير ملحوظ في حياته , الشألبه دي جت
منين ؟ من أين لك هذا ؟!.
.
2- من حقك تسأل
نفسك هي الجزيره كانت مفحوته أوي معانا في ثورة يناير و بتغطّي كل الأحداث حتى لو واحد
من الثوار دخل الحمام بتكتبه خبر رئيسي و لما يطلع يلاقي مراسل الجزيره مستنيه و بيقول
له ( شوفيتم يا بطل ) , و لما جت ثورة 30 يونيو قالت انقلاب ليه ؟!!.
.
3- من حقك تسأل
نفسك هي إيه العلاقه بين جايزة نوبل للسلام و بين خراب الدول أو محاولة خرابها .
.
4- من حقك تقرا
كتاب ( حديث الأربعاء ) بتاع طه حسين و تعرف إن تاريخك العربي فيه كتير مزيف و حتى
فيه شخصيات مشهوره جدا مع إنها وهميه ( يعني هوا) من خيال المؤرخ الخصب , فمن حقك ماتستناش
لحد ما الواقع بتاعك والمستقبل هما كمان يتحولو لتاريخ مزيف !!.
.
5- من حقك تستخدم
عقلك و أي حد , أي حد بيتكلم في حاجه هتأثر على مستقبلك و مستقبل بلدك و ولادك يبقى
تحاسبه حساب الملكين .. إنما لو جيت وقت حسابه و عملت نفسك نحنوح أوي وقلت دي تبقى
غيبه و خوض في سيرة فلان يبقى مفيش فرق بينك وبين خرفان الإرهابيه ... هما كمان استنو
لحد ما مرسي مسك حكم مصر وبقو يقولو لأي نقد : دي غيبه و ده راجل كبير ومايصحش نهينه
, و مش باقي غير انك تنزل بشوية أيات و أحاديث بتوع الغيبه و النميمه !!.
.
6- من حقك تستخدم
عقلك و تشوف الدنيا حواليك بيحصل فيها ايه قبل ما عقلك يصدي و يتكتم و تبقى محتاج تدلق
عليه ماية نار عشان ينضف.
.
7- و أخيرا بقى
, من حقك تبيع و تشتري و تتاجر و تغتني من أي حاجه و في أي وقت إلا أرواح الشهدا وقت
الحروب والثوارات .
.................................................................................................................................................
Mohamed
Hussein
17
أكتوبر 2014·
بعد ما شوفت صورة
أسماء محفوظ و جوزها قبل الثوره و بعد الثوره ( عارف إنت الفرق بين شرم الشيخ و كفر
الشيخ ) ؟!.
.
الست أسماء في
الصوره الأولى ( بتاعة كفر الشيخ ) شابكه في إيد خطيبها و تقريبا كده قاعدين في ( الجونينه
) و مستنيين عربية الداندورما أم 75 قرش , وفي الصوره الأخيره ( أيام شرم الشيخ ) لابسين
لبس ال ( دايفينج ) ربنا يوعدنا بقى يا مولانا , و شايله ولد صغير على إديها .
.
ماعرفش ليه في
لحظه كده اتخيلت الواد الصغير ده اسمه ( حسن ) , و بعد 5 سنين حسن ده كبر و بدأت أسماء
تحكي له عن حياتها و كده يعني , قالت له:
.
..............
عارف يا حسن أنا في أول حياتي اشتغلت في سوبر ماركت و كنت بطلع دليفري أحيانا و بيجيلي
بقشيش حلو , اللي يديني جنيه و اللي يديني نص و عملت قرشين معقولين جبت منهم عدّه
3310 مستعمله بس كانت عيني هتطلع عليها , وبعدين اشتغلت في بوتيك بتاع لانجريهات حريمي
صيني و كان مرتبها معقول برضه يا حسن , لحد ما جت ثورة يناير واشتغلت في ثورة يناير
بس دي بقى عملنا منها قرشين حلوين أوي يا حسن !!.
..............................................................................................................................................
ليست هناك تعليقات:
إرسال تعليق