Mohamed
Hussein
2 أكتوبر·
عاش الرز مع البسله
.
فاطمه ناعوت اتجننت
رسمي , عامله هجوم شرس على فكرة الأضاحي و متعاطفه جدا مع الخرفان , بتقولك : مذبحه
يُساق إليها ملايين الخراف كل عام , وطبعا احنا لو قررنا نضحي مانسلمش من التريأه باعتبارنا
من أكلة لحوم الخرفان !! و بنشارك في المذبحه ............. يامه يامه , خاف ياد يا
عيد .
.
قطيعه بقى تقطع
الثقافه عالمثقفين عالكتب عاللي بيقراها من غير عقل و لا تفكير , أه فهمتك فهمتك يا
أستاذه , أصلي مش مثقف و فهمي بيتأخر شويه , حضرتك تقصدي إن الخرفان و المعيز دي ربنا
خلقها عشان تدخل المدارس و تتعلم و تشتغل في مهنة مرموقه و نجيب لها جاكوزي و صوفيا
لورين تبات معاها في الزريبه !! , طب إيه الفرق سيادتك بين الخروف اللي بيندبح في وقفة
عرفه والخروف اللي بيندبح في أي يوم تاني ؟ و لا الخرفان بتنزّل دم بس و تصعب عليكي
لو اندبحت يوم عرفه ؟ .
.
و عشان حضرتك قررتي
تاكلي سلطه خضره في العيد فنحرم الناس من أكل اللحوم اللي ربنا حللها ( و فينا ملايين
الغلابه اللي بيستنو اليوم ده عشان يدوقو طعم اللحمه ) , و بالمره نعمل هجمه شرسه عالصيادين
الكفره ولاد الحرام اللي بينزلو بشباكهم في البحر و كل واحد يطلع له كذا ألف سمكه
, دي مذبحه للأسماك , الحريه للأسماك , الأسماك على الأسفلت , ياخي انت ماعندكش قلب
ولا رحمه ؟ بص كده في عين السمكه قبل ماتاكلها وانت تعرف هي رقيقه ازاي .
.
خلاص يا رجاله
احنا نلغي أكل اللحمه والسمك و نقضيها رز و بسله عشان نبقى مثقفين و سو كيوت و بنفهم
في حقوق الإنسان و حقوق الحيوان و حقوق الزقازيق .... عاش الرز مع البسله .
Mohamed
Hussein
2 أكتوبر·
بعد ماتجوزو 3
أيام , جورج كلوني هيطلّق أمل علم الدين !! , افرحو يا بنات هيّصو يا بنات , طب إيه
هو بقى سبب الطلاق السريع ده ؟
فيه أخبار بتقول
إن الحاج كولوني في ليلة الدخله اكتشف إن أمل مش أنسه , فقام كتم في نفسه كده بس الصبح
أمه لما جت تزورهم في الصباحيه قالت له أنا حاسه بيك يا ماي سَن , ديفورس هير , طلّقها
يا ولدي واغسل عارك بيور هاندز .
.
بس انا يتهيألي
السبب غير كده , الحاج كلوني بعد ما قفش و مسك القرشينات بتوع أمل مالقاش حاجه تانيه
يمسكها فقال لها لمّي خلجاتك و روحي بيت يور ماذر , وغالبا كده هياخد الفلوس بتاعتها
و يطلع على شقة كيم كارديشان .
Mohamed
Hussein
2 أكتوبر·
في العيد بقى
.
بكره بإذن الله
هروح البلد في المنصوره عند الحاجه أمي , العيد مايبقاش عيد لو ما حبّتش على أيديها
الخشنه دي .
.
و بما أني جيت
النهارده من مدينة نصر لأول جسر السويس في ساعتين و نص و الدايري كان واقف من أوله
لأخره ولو فيه طياره هليكوبتر أو قمر صناعي بيصور من فوق فأكيد الصوره كان هيظهر فيها
بتاع 3 مليون نملايه عالدايري بيتحركو ببطء شديد , وانا والله من التعب و قلة النوم
كنت هنام في النملايه بتاعتي وانا عالدايري , قصدي في العربيه .
.
عشان كده أنا متوقع
إني لو طلعت من هنا بكره العصر في اتجاه المنصوره فاحتمال الحق تاني يوم العيد في البلد
, و بكده هيفوتني البط و الرقاق بتوع أول يوم الصبح و لمّة العيله على صينينه كبيره
عالأرض , و فرحة الأطفال بالعيديه .
.
أنا عايز طياره
هليكوبتر توديني البلد يابه الحاج عبفتاح , مش احنا نور عنيك و لا رجعت في كلامك ؟
أقولك على حاجه , تعالى معايا في الهليكوبتر و هات الحاجه انتصار والولاد وانا أعزمك
على أحلى رقاق و بط , يا مراحب يا مراحب , داحنا زارنا النبي
.
كل سنه و انتو
طيبين يا أجدع شعب في الدنيا .
Mohamed
Hussein
1
أكتوبر·
جميله أبو حريد
قصدي جميله أبو اسماعيل بتقول : نحصل على أكبر الجوايز العالميه و نتظاهر ضد قانون
التظاهر و نحن داخل السجون !!.
يا ست جميله هو
انتي اتطلقتي من أيمن نور بجد و لا دي حركة تمويه ؟ يعني انتو مختلفين في حاجات كتير
مثلا أدّت لانفصالكو ؟ طب أنا ممكن أحط صورتك و أفكارك جنب صورة أيمن نور و أفكاره
و اتحدى أصدقائي إنهم يطلّعو 3 فروقات بينكو .
.
انتي بتجاهدي داخل
السجون مع إنك مش في السجون و جوزك بيجاهد ضد أمريكا الكافره من قلب قاعدة السليه الأمريكيه
في قطر , و أكيد تكون المجاهده ريا أخت المجاهده سكينه هي اللي بلّغت الحكومه عن العصابه
اللي بتخطف الستات , المجد للمجاهدين هاااااااااااح .
.
بس هاتي إيدك كده
, و عهد الله يا شيخه بكره هتبقى جايزة نوبل بتتباع على أرصفة الموسكي و تشتري اتنين
نوبل للسلام ب 10 جنيه و تاخدي عليهم سخاروف هديه أو ولّاعة مطبخ .
Mohamed
Hussein
1 أكتوبر·
يعني إيه منطقه
شعبيه ؟!
.
لما تسكن في عماره
ارتفاعها 12 دور على شارع عرضه 6 متر .
.
يعني تدخل اوضتك
تحاول تنام , فجأه تسمع صوت واحد واقف في الشارع و بينادي على صاحبه اللي ساكن في الدور
السابع ( وله يا حوده وله يا حوده ) , و حوده مابيردش و لو رد هتسمع صوته أكيد ( ماتنزل
يا حوده و ترحم أمي العيانه عايز أنام ) , ثواني كده وتسمع جارتك اللي بعد 3 عماير
بتقول لجوزها انت كل يوم كده تتأخر تتأخر تتأخر دي مش عيشه دي ( يا ستي معلش امسحيها
فيا انا , احنا داخلين على عيد و المسامح كريم ) , ثواني كمان و تلاقي توكتوك وقف تحت
العماره و مشغل الكاسيب بعلو صوته , يا صياد الطيور حافظ على الخرطوش ( يا كابتن يا
كابتن ألاقيش معاك أغنية طبيب جراح عشان اسمعها وانا بنام ؟ ) , شويه كمان و تلاقي
بيكيا بيكيا بيكيا , يابو كريم يابو كريم و النبي هات لي اتنين كيلو كوسه من عند ام
محمود قبل ما تقفل و كيلو باميه و خليها تقمّعه , صوت سارينة شرطه بس دي مش عربية شرطه
انا عارف , تلاقيه موتوسيكل أو فزبه , وادي لي ساعتين على دا الحال .
.
منطقه شعبيه يا
محترم يعني باختصار إن الشعب بيعيش معاك في نفس الأوضه , أه الشعب ساب الشارع و العماير
و الشقق و جه كله يعيش معاك في نفس الأوضه و أمي جابت طابور الجمعيه معاها يا سعاد
.
Mohamed
Hussein
30
سبتمبر·
الحوثيين احتلو
صنعاء , اللهم صل عالنبي , و توكل كرمان عمّاله تسكر و تضرب بانجو و تشتم في الحوثيين
و تكتب ( صنعاء تحت الإحتلال ) , ماعرفتكش انا كده يا عصام , أتاري الثوره اليمنيه
نجحت أهي و جابت مجموع كبير أوي , أه مجموع يدخّلها حرب أهليه بالمستريح , يعني وهي
حاطه رجل على رجل كده .
.
و لما فشل المخطط
الأمريكي لفرهدة مصر من الشمال في الفيلم الهندي بتاع العدوان على غزه ده قامو قالو
ندخل لها من تحت , عمر البشير هيتكلم كل يومين عن حلايب و إنها سودانيه و كل اللي فيها
زولات , و هينام و يصحى يقول حلايب حلايب مع إنه ساب نص السودان الجنوبي في قاعدة شاي
عادي يعني و ممكن يسيب الشرقي لو اتعزم على أكلة بط بس كله إلا حلايب بقى .
.
و الجديد هو خراب
اليمن , واليمن يعني مضيق باب المندب , و في الجهه التانيه من المضيق هتلاقي الصومال
وحركة شباب المجاهدين و لما تنزل مقدشيو مش هتعرف مين بيحكم إيه و مين بينام في حضن
مين ؟ , يبقى كده الصومال و اليمن راحو في الوبا الأمريكي الديموقراطي و مضيق باب المندب
هيبقى مجرد ترعه ممكن تزرعها رز و بسله و مولوتوف , و بالتالي و بناء عليه فاحنا في
الشمال ممكن وقتها نعمل مشروع صغير في قناة السويس و نربي فيها بط مسكوفي , أومال إيه
؟ البحر الأحمر ده عامل زي ماسوره و السفن بتدخلها من قدام ( قناة السويس ) عشان تطلع
من ورا ( باب المندب ) و لو اتقفل باب المندب يبقى مفيش سفينه هتهوّب ناحية الماسوره
من قدام .
.
أهي مصر دي بقى
ربنا حاميها و عهد الله , لو كان فيها بس 3 زي توكل كرمان و اتنين زي علاء عبد الفتاح
, يعني 3 نوبل و اتنين سخاروف ( على ماية بيضا ) , و مفهاش جيش زي جيشنا كده كان زمانا
عمالين نسكر و نضرب بانجو زي الست توكل و نعمل هاشتاج ( القاهره تحت الإحتلال )
!!.
Mohamed
Hussein
30
سبتمبر·
عن الأيفون أبو
11 ألف
.
أبويا الله يرحمه
اتجوز امي في 74 ب 300 جنيه , أه و عهد الله , طبعا الزمن غير الزمن و أياميها رغيف
العيش كان قطره 3 متر و الفرخه بتبيض 7 مرات في اليوم , ما علينا , بس حتى الأيام دي
, في الأُسر الفقيره الشاب بيتجوز يجيب أوضة نوم و أنتريه و سفره و مأذون و دي جي اللي
و اللي ب 10 ألاف , ماتنفعلش أوي , أصلك ماتعرفش إن فيه ناس كده و اللي مايعرفش بيقول
( لا مش ممكن أبدا ) .
.
زمان كان الإستعمار
الأجنبي بيعمل ايه بقى ؟ بيجيب جيوشه و عساكره و عربياته و معداته وسلطاته و ييجي عندنا
في الشرق الأوسط , يحتل دولتين تلاته و لّا قول 7 , ويقعد كام سنه ياخد الواجب بتاعه
و ينهب من خيرنا شويه و يكبش كبشتين و يرجع تاني بعد ما يكون سابها عالحميد المجيد
.بس الحكايه دي كانت بتكلفه أرواح جنود من عنده و تعب و بهدله و رصف طرق و بيصرف شويه
عالسبوبه في الأول , اومال إيه بقى ؟
.
الإستعمار الجديد
يا محترم بيجيلك لابس بدله شيك و كرافته و مسرّح شعره و ضارب الفازلين , عارف انت الفرق
إيه بين الحرامي و النصّاب ؟ الحرامي بيمد إيده في جيبك عشان يسرقك و احتمال يغزّك
بمطوه أو يكسر باب شقتك بطفاشه عشان يسترزق الراجل ( الإستعمار القديم ) , أما النصاب
فبيجيلك و يقولك لو سمحت بليز ممكن تديني الفلوس اللي في جيبك و التلاجه و التلفزيون
اللي في شقتك ؟ تقول له ليه ؟ يقولك هاخدهم منك و أخليهم يبيضو و يولدو و أرجعهم لك
أضعاف بقى , تقوم انت تقول له حاضر اتفضل و توصّل له الحاجه لحد عنده ( والنقل و الشحن
عليك ) يقوم يقولك ثانك يو , يو أر سو كيوت ( الإستعمار الحديث ) .
.
و أه ياني , يا
مُرك يا مهجه , هتلاقي شاب من العيال الثورجيه الجامدين أو الإشتراكيين الثوريين ماسك
الأيفون أبو 11 ألف و هاتك يا بوستات عن أضرار الإستعمار ويسقط الإستعمار و مش هنسمح
بالإستمعار , طب مانت كده مُستعمر يا جحش , مممممممممم عادل إمام في فيلم كراكون في
الشارع قال للمعلم أبو دومه ( لا أنا عمري ما شربت حشيش ولا أحب اللي بيشربوه ) , أومال
اللي انت بتشربه ده إيه ؟ ماهو ده حشيش , عشيييييييش ( بصوت المعلم أبو دومه ) .
.
الله يخرب بيت
شركة أبل و جالاكسي والعالم دي , ولاد الحرام لسه ماعملوش موبايل و لا تابلت يفتح بؤ
الواحد مننا و يأكّله و يمضغ مكانه , هتروحو من ربنا فين يا كفره ياولاد الحرام .
Mohamed
Hussein
29
سبتمبر·
البت لمار بنتي
اللي في كي جي 1 , أيوه بتاعة ( غزل البنات ) , إمبارح رجعت من المدرسه و هي فرحانه
أوي , قالت لي إن الميس خلّتهم يلوّنو علم مصر , قلت لها برافو يا لمار برافو , و لوّنتو
العلم بإيه بقى ؟ قالت لي يا بابا لوّناهم ب ( ييلو أند بلو ) , الميس قالت لنا كده
, قلت لها مممممممم ييلو أند بلو ؟ ده كده يبقى علم أوكرانيا يا حبيبتي , هي الميس
بتاعتكو اسمها دينا عبد الحميد مدفيديف ؟!
Mohamed
Hussein
29
سبتمبر·
مجرد حلم
.
أتمنى في السنين
الجايه تبقى الموضه في لبس البنات هي الجيبه و البلوزه و الفساتين , حكاية البناطيل
والتي شيرتات اللي بيلبسها البنات دي بتبقى حاجه من اتنين , يا إما بناطيل سترتش و
تبقى البنت ( مثيره ) , يا إما فضفاضه أوي و بنطلون جينز على كوتشي و تبقى مثال للبنت
والمرأه ( المفحوته في الدنيا ) , .
الرومانسيه و الرقه
و الأنوثه بقى بشوفهم أكتر في لبس الفساتين و الجيبات بشكل معين , و لما انتي تعرفي
الفرق بين الرومانسيه و الرقه و بين الإثاره فأكيد أكيد هتلاقي الشاب اللي بيعرف الفرق
بين الرومانسيه و التحرش !!.
Mohamed
Hussein
29
سبتمبر·
في ذكرى رحيل الزعيم
.
لولاك بعد ربنا
كان زماني أنا و أغلب أصدقائي هنا بنشتغل كلّافين في وسية الباشا و ننضرب بالكرباج
زي الحمير , و كان زمانا بننام من المغرب ولا نعرف لابتوب ولا تابلت ولا فيس بوك عشان
الباشا صاحب العذبه مش هاين عليه يعمل وصلة نور للعشش اللي عايشين فيها , بس فينا ناس
أول ما دخلو مدارس واتعلمو القرايه و الكتابه وبقو ( يفكو الخط ) إيدهم نِعمت و اتعلمو
يهينو إسمك و سيرتك العطره , دي عيال ناقصه ربايه يا زعيم .
Mohamed
Hussein
29
سبتمبر·
سيبك انت من خطاب
السيسي في احتفال جامعة القاهره , هو في النهايه مش هيقول حاجه جديده لأنه باختصار
بيقول اللي جوانا و اللي قولناه و بنقوله .
إنما تعالى نركّز
في ردود الأفعال اللي هتحصل بعد إذاعة الخطاب
.
الإشتراكيين الثوريين
: إزاي نعمل حفله بالتكلفه دي , وشوف كام لمبه مولّعه و كام كوباية شاي و إزازة مايه
و لّا علب الكلينكس اللي محطوطه , في دوله فيها ملايين تحت خط الفقر .
.
المثقفين الجامدين
: هل تعلم إن إلغاء الدراسه بجامعة القاهره عشان الخطاب ده بيكلّف قاطرة التنميه والتقدم
1 / 56734 الجذر التربيعي ل ص يد اتنين ألف ؟!
.
شباب الإخوان
: السيسي مات من سنتين تلاته و اللي ( السيسي ) بيكرمهم دلوأتي دول مش طلبه و طالبات
, دول عساكر أمن مركزي !!.
Mohamed
Hussein
28
سبتمبر·
مركز شباب الفيس
بوك
.
مشهد رائع من فيلم
( التجربه الدنماركيه ) , عادل إمام ( الوزير ) دخل مركز الشباب في زياره مفاجأه
..........................
..........................
الوزير : إنما
إيه الخرفان و المعيز و البط ده ؟
الموظف : ده نشاط
اقتصادي يا باشا .
.
الوزير : و إيه
كمية الهاشتاجات دي كلها , و هو كل واحد نزل التحرير من 3 سنين و عطس عطسه من يومين
تعملو له هاشتاج ( يرحمكم الله يا بطل ) ؟
الموظف : ده نشاط
سياسي يا حلاوه .
.
و فجأه هتلاقي
واحده كده صدرها بيشخشخ من كتر شرب المعسل و تقولك أنا كنت بمشي من التحرير للإتحاديه
19 مرّه كل يوم أيام ثورة يناير
.
ممممممممممممم
أه عرفتك عرفتك , إنتي أكيد مدربة الكونغو كنو !!.
Mohamed
Hussein
28
سبتمبر·
الجحش العجوز
.
كلام المحامي خالد
أبو بكر عن باسم يوسف , باسم شتم السيسي بألفاظ خارجه و المكان كان فيه ستات و أطفال
, و ماعرفش قال زعلان من إلغاء سباق دراجات كان مشارك فيه .
الحكايه باختصار
إن باسم رغم موهبته ( اللي أنا بحترمها جدا ) بس هو فجأه لقى نفسه مشهور جدا , الحكايه
دي حصلت بسرعه أوي , مفيش شهور من ساعة أول ظهور له , إعلام بقى و أضواء و تعالى يا
باسم و ممكن اتصور معاك يا باسم ؟ طب ممكن توقّع لي هنا يا باسم ؟ مؤتمر علمي بحضور
الإعلامي باسم يوسف , مؤتمر طبي بحضور باسم يوسف , مؤتمر عن السياسه عن المناخ عن الحفريات
عن أي حاجه , افتتاح فندق , جريده محتاجه كاتب صحفي لحد ما تلاقي كاتب صحفي و هكذا
يعني , الراجل في ظرف خمس ست شهور كان مقلّب عيشه في بتاع 17 حاجه .
باختصار الحمل
كان على باسم كبير أوي , أبواب شهره و نجوميه اتفتحت كلها فجأه و في نفس اللحظه , الحكايه
ماحصلتش تدريحي ولا خدت وقتها , بالظبط الحكايه دي عامله زي الجحش اللي لسه صغير وفجأه
صاحبه يحمّل عليه حمل كبير أوي , حِمل محتاج حمار قراري , اللي بيحصل إن الجحش ده مابيكبرش
أبدا بسبب الحمل الكبير ده , عمره بيعدّي وبيعجّز و هو لسه جحش , بيبقى اسمه ( الجحش
العجوز ) , و هو ده كل اللي حصل .
.
قول يا باسم قول
, قسّم و سمعني , و لما تتقدم للمحاكمه بتهمة سب و قذف رئيس الجمهوريه هنبقى نعمل هاشتاج
#الحريه #لباسم , و لما تطلع براءه ( زي كل الناس يعني ) هنبقى نهتف ونقول باسم
على الأسفلت ولو اتأخرت شويه هنقلع ملط كلنا أومال ايه ؟ بس بما إنك ضليع في استخدام
الألفاظ الأبيحه في أي وقت و أي مكان فانا أقترح نعمل هاشتاج ( أم الحريه لميتين أم
باسم ) و ( ديك أم باسم على ميتين أم الأسفلت ) .
Mohamed
Hussein
27
سبتمبر·
البت لمار بنتي
الصغيره أم 4 سنين فجأه كده وهي راكبه معايا العربيه قالت يا بابا أنا لما أكبر عايزه
أشتغل زي الراجل اللي بيلف ب( غزل البنات ) , أشيله كده على ضهري و أمسك زماره في أيدي
و أزمّر , ولوجي أختي تبقى تنزّلي السَبَت و انا أحط لها غزل البنات واخد منها جنيه
.
مراتي اتخضت و
كان نفسها لمار تحلم بالحلم الأزلي المصري المعقد إياه , إنها يعني تبقى دكتوره و لا
مهندسه , بس انا شايفه حلم و مشهد رومانسي رائع , البت دي بنتي .
Mohamed
Hussein
27
سبتمبر·
أتوبيس نقل عام
و قف على شمال الطريق , والسواق راسه و ألف جزمه لا يقف هنا ينزّل الركاب ويحمّل ركاب
تانيين , الأتوبيس قفل الطريق تماما و فضل على كده بتاع 10 دقايق , كلاكسات بقى و ما
كلكسات ولا الهوا .
فجأه كده جه في
بالي سؤال , هو ينفع الحكومه تدّي مخالفه لأتوبيس الحكومه ؟ يعني ينفع الحكومه تراقب
الحكومه و لّا احنا محتاجين حكومه تانيه تراقب الحكومه الأوّلانيه ؟ ولما الناس بتوع
الحكومه التانيين ماعرفوش ياخدو حق ولا باطل مع الناس بتوع الحكومه التانيين قامو خدو
أتوبيس نقل عام و رجعو .
.
ماتاخدش على كلامي
يا عم إبراهيم أبو محلب , دي شقاوة شعب يافندم , مايجراش حاجه لما الراجل يقف و يقفل
الشارع , ولو كان السواق ده ماشي في صلاح سالم و حس إنه جعان إيه المشكله يعني لما
يقف بالأتوبيس بالعرض و يقفل صلاح سالم و ينزل يفطر في المطعم و يعدين يدخل القهوه
اللي جنب المطعم ويشرب كوباية شاي و حجر معسل ؟ مفهاش حاجه والله , ماحنا صبرنا على
مبارك 30 سنه مش عارفين نصير عالسواق ساعتين ؟ و لّا عشان هو سواق و غلبان ؟ بلاش الراجل
يفطر و يظبط دماغه ؟ مش كده أحسن مايبقى سايق و مش مركّز ويرشق بالأتوبيس في برج التجاره
العالمي ؟ أو يتوه و الناس تنزل تلاقي نفسها عند تاج محل في الهند ؟!
.
مانا واثق إن السيسي
لو مسك السواق ده هينفخه و في الأخر يعلّقه عالإزاز الوراني بتاع الأتوبيس , بس مش
المفروض السيسي يعمل كل حاجه في أم البلد دي يا عم محلب , من أول تثبيت أوباما بمسمارين
10 سم في الحيطه لحد ما يبقى مسئول عن عمل منشر الغسيل اللي مراتي عايزاه , المفروض
معاليك تتحرك بقى شويه , والنبي يا شيخ بلاش تطلب حاجه من سيادة اللوا محمد إبراهيم
, الراجل مش مقصر و متمرمط يا ولداه من صوان العزا ده لصوان العزا ده لحد ما بقى الصديق
الشخصي و الأنتيم لأغلب المقرئين و بتوع الفِراشه ......... و لا أراكم الله مكروها
في وزيرٍ لديكم !!.
Mohamed
Hussein
27
سبتمبر·
و سألني صاحبي
عن رأيي في العربيات الصيني , قلت له : اللي يشوفها من بره غير اللي يشوفها من جوه
, قالي يعني إيه ؟ قلت له : يعني حلوه في الشكل زباله في المضمون , قالي برضه مش فاهم
.
قلت له من الأخر
كده من الأخر , العربيات الصيني تستحق جايزة نوبل للسلام أو عالأقل تاخد سخاروف , قال
لي أه فهمت , لا يا عم مش عايز , ربنا يكفينا شرها .
.....................
علاء عبد الفتاح
على الأسفلت , رجع يمارس بذائته و انحطاطه في المعارضه , و توكل كرمان خربت بلدها مداين
و ناويه بإذن واحد أحد تجيب ضٌلفها و تطفي النور و تقفل الباب وراها قبل ما تمشي
........... , و لو مرّه هب النسيم في مؤسسة نوبل لازم يغني و يقول سخاروف !!.
Mohamed
Hussein
26
سبتمبر·
و لما يموت واحد
من مؤيدين السيسي أو يُصاب بمرض خطير ( ربنا يعافينا ) يقولو ده غضب ربنا عليه عشان
كان مؤيد للسيسي !! , و لما يموت واحد منهم يقولو ده ابتلاء من ربنا للمجاهدين الصابرين
, و المؤمن يُبتلى يا أخي الكريم !!.
.
زمان واحنا صغيرين
كان بييجي خطباء في الجوامع عندنا يحكو حكايه عجيبه أوي , قال ماعرفش مين من الأنبياء
و لّا الصالحين مش فاكر و كان بيحاول يهرب من الكفره ولاد الحرام فراح استخبى ورا قطيع
من المعيز قامو المعيز اتفرقو و كشفوه , فراح استخبى ورا قطيع من الخرفان قامو الخرفان
اتلمو على بعض و عرف فعلا يستخبى وراهم , عشان كده ربنا خلق الخرفان لهم ( ليّه ) من
ورا يعني سترهم عشان سترو الراجل الصالح ده و خلق المعيز عريانين من ورا يعني ماسترهمش
زي ماعملو مع الراجل الصالح !! .
.
في الجيل بتاعنا
بقى ناس كانت بتصدق الهبل و الهري ده و تردده في مجالسهم وسط أهاااات الحضور , وانا
دايما كان عندي رأي في القصه دي , ليه الراجل الصالح يستخبى ورا المعيز و الخرفان ؟
ليه مافكّرش يستخبى في غيط الدُره أو وسط لبشة قصب ؟ أو عالأقل يستخبى في مدينة نصر
ويحاول يتنكر و يعمل سكسوكه مثلا !! .
.
الجيل بتاع قصة
الخروف والمعزه ده بقى لما كبر اتجوز و خلّف , زي كل الثدييات يعني , ولما خلّف عياله
كبرو و بقى عندهم أكاونت عالفيس و يشمتو في اللي مات لو مؤيد للسيسي و يقولو مجاهد
و مبتلى لو معارض , نفس أم النظريه القديمه ( الخروف والمعزه ) .
.............
أبناء الجهل و التخلف و الخروف والمعزه !!.
Mohamed
Hussein
26
سبتمبر·
مليونية إخوانجيه
فاتت من تحت شقتي دلوأتي في شارع جانبي من شارع جانبي تاني متفرع من شارع جمال عبد
الناصر اللي متفرع من جسر السويس !! , المليونيه قوامها 63 شخص و عيلين صغيرين و طبله
بيطبلو عليها , وبيشتمو بقى في السيسي و الحكومه و يهتفو ضد حكم العسكر و عايزين حق
( الشهيد ), و مفيش مانع من كلمتين عن الثوره و الإسلام و تحرير القدس و الأندلس و
كداهون يعني .
.
شوفتو القمع اللي
احنا عايشين فيه ؟ في حواري مصر وأزقتها إهانه وسباب لرئيس الجمهوريه و تظاهر بدون
ترخيص و ألفاظ زبالة , قمع قمع مفيش كلام , و هنا بقى يحضرني جمله قالها الرئيس الفيلسوف
محمد مرسي عن القمع تحديدا ( القمع مش محتاج صوامع , القمع محتاج صوامع !! ) .
Mohamed
Hussein
26
سبتمبر·
كانو بيراهنو على
شطب إسم مصر من الإتحاد الأفريقي و الأمم المتحده , قام السيسي راح طلب مقعد لمصر في
مجلس الأمن ذات نفسه !! .
و مش بعيد بعد
شهرين تلاته يطلب مقعد دايم زي أمريكا و روسيا و يبقى لنا حق الفيتو !!.
.
ماهي مصر مش أقل
منها ( بحكم التاريخ على الأقل ) , و الرك عالعيون اللي بتشوف , السيسي عيونه زي عيون
ولاد البلد الجدعان شايفه مصر كبيره أوي , و فيها بهاليل شايفينها صغيره أوي لدرجة
إن عشة فراخ زي قطر ممكن تتحكم فيها , و بهاليل تانيين شايفينها متناهية الصغر لدرجة
إن تويته هتقرر مستقبل مصر و مصيرها .
.
.............
خدو عيني شوفو بيها .
Mohamed
Hussein
26
سبتمبر·
أردوغان اللي فتحها
( أردوغانه ) في تركيا لسه عايش في دور الأستاذ محمود المليجي وأحيانا بيفكر نفسه عتريس
بتاع الحاره , و بعد تصريحاته الصبيانيه عن مصر في الأمم المتحده كان الرد المصري هادي
جدا و متزن و رااااااااااسي أوي , أنا عن نفسي اتطمنت بالتصريحات المصريه .
.
ماهو لما تلاقي
واحد أهبل برياله بيرمي طوب و زلط على راجل محترم ماشي في الشارع و بعدين الراجل ده
يروح للواد الأهبل بمنتهى الهدوء و بابتسامه و يقول له ( ليه بتعمل كده يا حماده ؟
, عموما أنا مش زعلان منك ) , ساعتها تعرف أن الراجل ده بيرقّد على نفخه معتبره للواد
أبو رياله .
.
أقف في الصف يا
أردوغان و استنى دورك في النفخ , دي مصر يا أستاذ مليجي مش قطر ولا جيبوتي , يالله
استعد بقى و اقلع هدومك بنفسك عشان عندك كشف هيئه قريب .
ليست هناك تعليقات:
إرسال تعليق