من 10 سنين تقريبا , دخلت في مناقشه طويله وحاده مع صديق وزميل عزيز , كنا بناكل وقتها , وقلت له مصر مش هيتصلح حالها إلا لما نبقى مجتمع ديموقراطي مدني ذي أوروبا كده , وقمت رامي الشعار بتاع عمنا علاء الأسواني ( الديموقراطيه هي الحل ) , ساعتها صاحبي بطل ياكل وضحك ضحكه غريبه وبقى الرز يطير من بؤه كأني قلت نكته أبيحه , وقالي ( يا محمد احنا مجتمع قبلي , بتحكمنا أعراف القبيله , اللي مالوش كبير بيشتري له كبير والعين متعلاش عالحاجب , احنا بنعشق حياة الفرعون والعبيد , تيجي انت تقولي ديموقراطيه وأوروبا ؟! ) , وحكي لي صديقي حكايه بسيطه كده , كانت مراته ( وهي طبيبه ) راكبه في ميكروباس من القاهره لاسكندريه , الميكروباس عمل حادثه في الطريق والراجل اللي جنب السواق رجله اتجرحت وبتنزف جامد , طبعا كلهم نزلو من الميكروباس , تادكتوره عايزه تعمل اي حاجه بس مش معاها شنطة اسعافات , طيب تتصرف إزاي ؟ لقت راجل واقف ولابس ( تلفيعه ) , قالت لنفسها كويس , على الأقل نربطها فوق الجرح ونوقف النزيف , الدكتوره قالت اللراجل ( لو سمحت ممكن تجيب التلفيعه بتاعتك ؟ ) , الراجل سكت وبلم ومردش , كررت السؤال مره واتنين والراجل مبيردش , المصاب بينزف قدامها , وفي النهايه الدكتوره انفعلت وقالت للراجل ( هات التلفيعه يا حيوان ) , الراجل بمنتهى السرعه شال التلفيعه من على راسه واداها للدكتوره !! ...........وحشتني والله يا صديقي العزيز , كان عندك حق وانا غلطان , افتكرت الموقف ده لما لقيت الشيخ بيقول ( مرسي بيصلي إمام بسيدنا رسول الله في الحلم ) احنا فعلا بنعشق حياة الفرعون والعبيد والكرباج !!.
.
محمد حسين
ليست هناك تعليقات:
إرسال تعليق