صباح الخير , جرت العاده إننا نسمع الخبر ده بالشكل ده ( هذا وقد نجى الربان من المركب قبل الغرق ) , خبر منطقي جدا , اللي بيقفز من المركب قبل الغرق هو الربان مش مهندس الديكور , والربان بيقفز من المركب مش من الطياره الهليكوبتر ! , المركب المصري مخرومه ذي ما قال وزير الداخليه , والإخوان بغباوتهم جابو أنصارهم وقعدوهم في ناحيه واحده من المركب , يعني مفيش توزيع عادل للحموله والاوزان عشان كده المركب جنّحت كمان , وبدأت تغرق , ماهي لازم تغرق , يا رجل دي لو عايمه في بانيو ولا في ترعة السنبلاوين اللي عمقها متر ونص هتغرق برضه , كل اللي فات طبيعي ومنطقي وعقلاني , إنما اللي مش طبيعي ولا منطقي هو رد فعل انصار الإخوان , اللي يقولك أنا عارف إنها بتغرق بس ده له بُعد نظر وتخطيط للمستقبل , وأغلب ظني إن أنصار الإخوان بيعتقدو مرسي هو سيدنا الخضر عليه السلام , عشان كده منتظرين الغايه الجميله اللي من أجلها بيغرقو المركب وخصوصا بعد ما قال أنا أعلم ما لا تعلمون , يا أصدقائي سيدنا الخضر مات , أه والله مات وعبد الحليم حافظ هو كمان مات , مفيش غايه جميله ولا يحزنون , كل الحكايه إن المركب لما تغرق , هتيجي قطر وتجيب ونش كبير أمريكي أو إسرائيلي وتشدها من البحر , وبعد كده قطر تاخد مصر بتراب الفلوس وتبيعها خرده في شوارع الدوحه , و(الشاطر) بشطارته اللي ياخد منها مجداف أو عرقين خشب أو ياخد الشراع يعمله ناموسيه أو غطا لترابيزة السفره , يعني على طريقة ( إن خربت دار أبوك خد لك منها قالب ) أنا عن نفسي قررت من البدايه إني اخد لنفسي جهاز الإنذار والإستغاثه !!
.
محمد حسين
ليست هناك تعليقات:
إرسال تعليق