Mohamed
Hussein
15
مارس 2018·
هو البرادعي مش
هيكتب تويته عن الطالبه مريم عبد السلام اللي توفت في بريطانيا بعد اعتداء همجي من
مواطنين بريطانيين و اهمال طبي في مستشفيات بريطانيا اللامؤاخذه العظمى ؟
- الإجابه : لأ
.
.
طب حمدين صباحي
هيطلع في خطبه عصماء يلعن فيها جدود أبو بريطانيا و اهمالها و همجيتها ؟
- الإجابه لأ
.
.
يبقى خالد علي
هيجيب خالد البلشي و يعملو مؤتمر صحفي ينددو فيه بالحادث و يتعاطفو مع المرحومه مريم
و أهلها ضد البلطجه البريطانيه .
- برضه لأ .
.
خلاص خلاص , أكيد
النشطاء هيعملو وقفه بالشموع على سلم نقابة الصحفيين و يشيلو لافتات تنديد و يبعتو
رسايل لوسائل الاعلام البريطانيه و يترجموها بالإنجليزي و يلعنو جدود أبو اهمالهم و
بلطجتهم ( يا سيدي يعتبروها ريجيني ) .
- في الحقيقه لأ
.
.
لأ , لأ , لأ
, ليه كله لأ ؟
- بص يابني , بس
حاول تركّز .
.
بصيت أهو
- عمرك شوفت قرد
أو تعلب أو ديب أو فار اتعمل له عملية تجميل و اتحوّل فجأه لغزاله أو حصان أو شجرة
ورد ؟
.
لأ طبعا , مستحيل
.
- طيب خلاص , انت
ليه متخيل ان الصيع و الخونه و ولاد الحرام ممكن يتحولو فجأه لبني أدمين طبيعيين و
ناس ولاد حلال ؟! .
............................................................................................................
Mohamed
Hussein
15
مارس 2018·
أنا وبناتي
.
امبارح روحت بالليل
لقيت البنات كانو نامو ساعتين تلاته بعد المدرسه و صاحيين بيذاكرو , لوجي في خامسه
ابتدائي بتذاكر ماث , تحديدا بتحل مسائل ( باترن ) و لمار في تانيه ابتدائي بتحفظ نشيد
( طلع البدر علينا ) , لوجي مشغّله موبايلها جنبها على اغنية ديسباسيتو و بعدها اغاني
مهرجانات ( و سيجاره جابت جوان ) , مممممم مش عارف إزاي ديسباسيتو و سيجاره جابت جوان
و طلع البدر علينا في نفس الوقت !! .
.
المهم قلت لهم
سيبو اللي في ايديكو و تعالو عايز أحكي لكو حاجه مهمه , و بدأت أحكي لهم قصة الجاسوس
الروسي اللي عامل مشكله و خناقه لرب السما بين بريطانيا و روسيا , لمار في وسط الحكايه
سألت خمسين سؤال , يعني ايه جاسوس , و ليه يعمل كده ؟ هو مات ولا لسه عايش ؟ و بنته
ذنبها ايه ؟ و خلصنا الحكايه على خير ( و على انغام سيجاره جابت جوان ).
.
بعدها جبنا ساندوتشاتنا
بقى و قعدنا عالأرض و فرشنا , ناكل و نفكر , هي روسيا تكون فعلا متورطه في اغتيال الجاسوس
ده ولا لأ ؟ فكرنا كتير ( و أكلنا كتير ) و وصلنا لاحتمالين , كل احتمال بتدعمه أسباب
منطقيه أو شبه منطقيه .
.
قلت لهم لأ , روسيا
ماتعملش كده , لأنه في النهايه جاسوس اتكشف من سنين و اتقبض عليه ( يعني كارت اتحرق
) , و ليه بريطانيا ماتكونشي هي اللي عملت كده عشان تلبّسها في روسيا و تضغط عليها
في ملفات تانيه ؟.
.
و فيه احتمال تاني
له وجاهته بيقول أه , تعمل كده و حقها تماما , طب ليه تعمل كده ؟ لسببين مهمين , أولا
هو صح كارت اتحرق لكنه في النهايه كان ظابط برتبه مش صغيره في المخابرات الروسيه ,
يعني حتى لو مالوش أي نشاط حاليا إنما عقله فيه كتير و ممكن بريطانيا و أمريكا يكونو
لسه بيستفيدو منه بأي شكل .
.
و سبب تاني أهم
بكتير , إن العمليه تكون رساله من روسيا , لأن تجنيد ظابط برتبة عقيد من جهاز مخابراتها
حدث مش سهل أبدا , و تكون رسالة روسيا هي رسالة ردع لكل ظباطها الصغيرين , بص يابني
لو فكرت مجرد تفكير انك تخون البلد دي هنجيبك و نحاكمك , و لو عملنا صفقه تبادليه و
رجعناك للدوله اللي خونتنا عشانها هنوصل لك هناك برضه و نقتلك , بس مش هنقتلك بالساهل
كده , مش برصاصه يعني , لا داحنا هنخليك تتعذب لحد ما تموت , و مش انت بس , انت و حد
من عيلتك و هنعمل العمليه دي في قلب الدوله اللي اشتغلت لحسابها , رسالة قوه و استعراض
عضلات و ردع .
.
ده اسمه التفكير
العقلاني المنطقي , التفكير حط احتمالين عكس بعض (و الله اعلم بالحقيقه) , المهم إننا
باستمرار نفكر , بس واضح إن دماغي ضربت رسمي و إن البنات اللي بدل ماحكي لهم حكاية
سيندريلا و الصندل بتاعها اللي ضاع , أحكي لهم عن جاسوس و اغتيال و غاز أعصاب , البنات
دول لو طفشو من البيت هيكون بسببي .
............................................................................................................
Mohamed
Hussein
14
مارس 2018·
خناقه لرب السما
بين روسيا و بريطانيا بسبب الجاسوس الروسي سيرجي سكريبال .
.
النهارده رئيسة
وزراء بريطانيا الحاجه تيريزا ماي اعلنت طرد 23 دبلوماسي روسي و تجميد أموال روسيا
اللي في بريطانيا و فيه إشاعات ان محدش من المسئولين البريطانيين هيروح يحضر كاس العالم
في روسيا و لا هيحضرو لهم فرح ولا ميتم ولا يشربو عندهم بؤ مايه .
.
الحاج بوتين من
ناحيته توعّد برد مماثل و نفى ضلوع روسيا في تسمم الجاسوس الروسي السابق و قال للحاجه
تيريزا : احنا مش على راسنا بطحه يا خالتي .
.
أصل الحدوته دي
بيقول ايه ؟ ظابط سابق في المخابرات الروسيه برتبة كولونيل ( عقيد ) اسمه سيرجي سكريبال
تم تجنيده من المخابرات البريطانيه أو الأمريكيه ( يعني خاين ابن وسخه ) , المخابرات
الروسيه قفشته , و اتحاكم بتهمة الخيانه العظمى و اتحكم عليه بالسجن 13 سنه , أمريكا
اتدخلت و عملت صفقة تبادل أسرى مع روسيا و خدو الخاين بتاعهم , عاش في أمريكا شويه
و بعدين سافر بريطانيا , من كام يوم لقوه في بريطانيا هو و بنته محقونين بغاز أعصاب
و مرميين قدام مول تقريبا و هما حاليا في المستشفى و حالتهم حرجه .
.
بريطانيا و أمريكا
اتجننو و قالو ازاي تقتلو الخاين بتاعنا ؟ ده ضد الأعراف الدوليه و حقوق الإنسان و
حقوق الزقازيق , و كمان بتستخدمو غاز أعصاب يعني سلاح كيماوي ؟ هو انتو عندكو سلاح
كيماوي ؟ لا ده الموضوع كده كبر بقى و شكله هيحتاج قاعده في مجلس الأمن .
.
روسيا حلفت بكل
أيمانات المسلمين و المسيحيين و الهندوس إنهم ماحاولوش يغتالو الواد ده ولا حتى طرطشو
عليه مايه .
..........................
طب نستفيد إيه
احنا من القصه الطويله العريضه دي ؟ مالنا احنا و مال روسيا و بريطانيا و أمريكا و
سيرجي سكريبال وغاز الأعصاب ؟
.
بصو , هما حاجتين
مهمين أوي
أولا : حجم التوتر
و الخلاف ده بيعني ان القصه مش قصة اغتيال لجاسوس سابق ( كارت محروق ) و إن الخلافات
و التوتر بينهم أكبر بكتير من كده , يعني دايما الخبر اللي بيتقال في الوش و بيعلن
عنه بيكون ( حماده ) إنما حجم التوتر بيكون ( حماده السيد ابراهيم عبد المتجلي عويس
حماده ) .
.
ثانيا و ده الأهم
, نفترض إن انا مواطن روسي واسمي حسينكوف , و سمعت الخبر بتاع الجاسوس و محاولة اغتياله
, ايه الحاجه اللي مستحيل اعملها ؟ هي اني اتهم روسيا ( يعني بلدي ) بمحاولة قتله
, و في قرارة نفسي هقول ايه ؟ هقول , ماقتلنهوش و لو قتلناه يبقى ابن وسخه يستاهل
, ليه بقى ؟ عشان احنا مش ولاد حرام !! .
.
بالمناسبه , مصر
ماقتلتش الشاب الجاسوس الأيطالي ريجيني , و لو كانت قتلته مع اني واثق انه ماحصلش
( هقول لهم برافو ) مش هقول لهم ( قتلتوه ليه , هو احنا قصّرنا معاكو في حاجه ؟! )
زي ما قال الصيع و الخونه اللي عندنا .
.............................................................................................................
Mohamed
Hussein
13
مارس 2018·
شوفت يابني اللي
حصل ؟
- خير , حصل ايه
؟
.
شالو وزير الخارجيه
و جابو رئيس جهاز المخابرات عشان يمسك وزارة الخارجيه !!
- ههههههههههه
حتى الخارجيه هيعسكروها ؟ هما العسكر دول مش ناويين يجيبوها البر أبدا ؟ وبكره تشوفو
ماااسر , يسقط يسقط حكم العسكر .
.
استنى بس , نسيت
أقولك حاجه , الخبر ده في أمريكا مش في مصر .
- إيه ؟ في أمريكا
؟! طب معروف إن المدرسه الأمريكيه في الإداره مدرسه متطوره و دائما ما تأتي بالجديد
و المتفرد و الفريد , و ربما كانت لهم وجهة نظر عميقه تستبق الأحداث .
.
أه فهمتك , انت
تقصد إنها بالخطوه دي ممكن تكون بتعالج قضايا متشعبه و تقفز قفزه هائله في استشراف
المستقبل و ربما كانت بصيص من النور في غسق الدجى ؟
- اه بالظبط كده
, زي ما حضرتك بتقول بالظبط .
.
طب غور ياض من
هنا يلعن أبو شكلك , دي امك لو كانت بتتوحم على حجر معسّل أو مشبك غسيل كان فاد البشريه
اكتر منك .
..........................................................................................................
Mohamed
Hussein
13
مارس 2018·
حكاية السفيره
المزيفه داليا التهامي .... والدرس المستفاد .
.
مين بقى داليا
التهامي ؟
- هي ست فاضله
و أموره كده و شيك و تري جانتي , اه و عهد الله .
- داليا التهامي
بتلف بقالها 3 سنين تحضر مؤتمرات و ندوات و شألباظات و أي نشاط أو تجميعه او مكان فيه
تصوير تلاقيها راشقه على طول ( و تتصور ) .
.
- كانت بتقدم نفسها
للمحافظين و المسئولين بإنها سفيره من رئاسة الجمهوريه و مستشاره للرئيس عبد الفتاح
السيسي , المهم تحضر الندوه أو المؤتمر ( و تتصور ) .
.
- و طبعا كل ماتتصور
في حته تنزل صورتها عالفيس بوك .
.
- و جنب صورها
الشخصيه تلاقي صور لشهادات تقدير , شهادة تقدير من مركز شباب أبو نتاشا لمعالي السفيره
داليا التهامي , شهادة تقدير من المعلم عكوه الجزار للسفيره داليا التهامي , شهادة
تقدير من الواد حوكشه بتاع البطاطا للسفيره داليا التهامي , عيلة أبو اسماعين تشكر
السفيره داليا التهامي على مجهوداتها الخارقه , ولاد سليم اللبانين يتوجهون بخالص الشكر
للسفيره داليا التهامي .
.
- لحد ما في يوم
راحت ترشق في أي مصلحه جديده ( و تتصور ) و قدمت نفسها للمحافظ بنفس الطريقه , المحافظ
شك فيها و اتصل بالجهات الأمنيه , قالو له الست دي فستك يعني بلح , و المتحدث باسم
رئاسة الجمهوريه نزل بيان انها نصابه !!
- تفتكرو تسكت
داليا التهامي على كده و تكن في جنب ؟ لا ابدا , نزلت فيديو لايف بتقول فيه انها ماتقبضش
عليها ولا حاجه وانها راجعه في حماية مدير الأمن و إن السيسي عامل لها استثناء شخصي
و إنها مش هتسيب حقها لا مع المحافظ ولا مع المتحدث باسم رئاسة الجمهوريه .
.
- ماطولش عليكو
بقى عشان ماتناموش منّي , الفيديو بتاعها كان امبارح تقريبا و هي اتقبض عليها النهارده
, و هتتنفخ بإذن واحد احد ( و مش هتتصور ) .
..........................
طب ايه القصه دي
؟ القصه باختصار هو المرض النفسي , مرض الشهره و البحث عن الشو و الأضواء و جايز ترشق
في أي منصب , ولو مارشقتش أهي اتصورت و نزلت صورتها عالفيس , ده مرض ربنا يعافينا
.
.
بس مشكلة ( السنيوره
) إن حسن النيه و تأيدها للرئيس مش هيشفعو لها قدام القانون , لأنها باختصار هتحاكم
بتهمة إدعاء صفه غير قانونيه ( و مش هتتصور ) .
.
و ايه القصه كمان
؟ القصه إن الناس دي هما ( بقايا ) العهد البائد , و لو كانت عملت البروباجاندا بتاعتها
وشغل الحلنجيه ده أيام سعادة الباشا و مراته وابنه كانت أكيد ( اتشقطت ) في أي منصب
باعتبارها ( واحد من رجالتنا ) , لكن الحاجّه لسه ماتعرفش إن عبد الفتاح السيسي يختلف
تماما و نهائيا عن حسني مبارك .
.
من أول ما قريت
الحدوته و قبل ماقرا الخبر بتاعها النهارده و انا عارف انه هيتقبض عليها , الحكايه
لا كانت محتاجه عبقريه ولا يحزنون , المتحدث باسم رئاسة الجمهوريه نزل بيان بيقول انها
مزيفه و نصابه تبقى مزيفه و نصابه , ليه بقى ؟ عشان اللي طلّع البيان ده حضرتك بيشتغل
متحدث بإسم رئيس الجمهوريه , يعني كلمته موزونه بالحرف , مش عيل صغير بيجري ورا عربيات
الرش .
...........................................................................................................
Mohamed
Hussein
13
مارس 2018·
المشي عالحبْل
.
لا أدّعي أبدا
اني خبير و محلل سياسي و استراتيجي ومنفلوطي , أنا راجل على باب الله , و الحدوته ممكن
نختصرها في 5 كلمات , إنك تكون : مهتم , بتعرف تقرا الخبر صح , بتفكر باستمرار , بتعرف
تتخيل الصوره كامله و التفاصيل يعني ال details
, عقلك مرن و قابل لاستيعاب المزيد .
.
على سبيل المثال
, خبر بيقول توتر في العلاقات بين روسيا و بريطانيا , سبب التوتر هو عميل مزدوج كان
ظابط سابق في الجيش الروسي , بريطانيا بتتهم روسيا انها حقنت الجاسوس ده بماده سامه
مش عارفين طبيعتها ( و انتو ازاي تحاولو تغتالو الجاسوس بتاعنا اللي كان بيتجسس عليكو
يا كفره ؟ بنت الحرام عضت ايدي و أنا بخنقها تقولشي مرات أبوها ) .
الموضوع اتطور
و تيريزا ماي بقت تطلع تقول تصريحات بنفسها و تمهل روسيا مده محدده , بريطانيا كمان
هددت بالإنسحاب من كاس العالم , و روسيا طبعا متوقعه شغب من الجماهير البريطانيه في
المونديال و الشغب ده ممكن يكون مزروع جواه عناصر بتدبير و تخطيط معين
.
طب كويس اوي ,
ده الخبر , بس نطلع منه بإيه ؟
- المخابرات البريطانيه
هي أصل الشرور في العالم , و أم الخراب و أم اللي جابوها .
- الحكومات البريطانيه
في منتهى البرود , زي ماحضرتك شوفت كده يشغّلو جاسوس لحسابهم ضدك و لما تحاول تغتاله
تبقى كافر و زومبي ( زي ما أنشأو الكيان الصهيوني اللي قتل عشرات الألاف من الفلسطينيين
و لما فلسطين تضرب بمبه من بمب العيد تطلع الميديا البريطانيه و تتهم الفلسطينيين ان
مفيش في قلبهم شفقه ولا رحمه , و زي ما أنشاو و بيرعو جماعة الإخوان و كل الجماعات
الإرهابيه و لما تحارب إرهابهم يبقى اختفاء قسري و فين حقوق الإرهابيين الكيوت ؟!
.
.
- طب العلاقات
المتوتره بين بريطانيا و روسيا تعني القطيعه ؟ لا خالص , اطلاقا , وبكره الصبح هتلاقي
بوتين بيقابل تيريزا ماي في أي خرابه و يبتسمو لبعض و مش بعيد يبوسها من بؤها , وفيه
بينهم مشاريع و تبادل تجاري شغال عادي جدا .
- طب روسيا هتعمل
ايه ؟ هترد غالبا , و مش ضروري الرد نعرفه احنا لكن ده شغل اجهزة مخابرات مع بعض و
مباراه مابتنتهيش و كل واحد بيحاول يجيب جون في التاني , نتيجة المباراه و تفصيل الهجمه
و الهدف بتفضل في أدراج أجهزة المخابرات .
.
- بريطانيا هي
اللي خطّطت لاسقاط الطياره الروسيه في سينا و طيارة مصر للطيران اللي كانت طالعه من
باريس و هي اللي خططت لقتل الشاب الإيطالي الكيوت ( لضرب العلاقات المصريه مع الدول
التلاته) .
.
- المخابرات المصريه
عارفه كده و الفرنسيه و الروسيه و الإيطاليه , بس مستحيل هتعرف تثبت وحتى يوم ما تثبت
و يوم ماترد , محدش فينا هيعرف الرد كان ايه .
- طب نقطع علاقتنا
بقى ببريطانيا ؟ لا يا مولانا , ولا روسيا هتقطع علاقتها بيها ولا فرنسا ولا ايطاليا
, و طبعا بريطانيا معاها أمريكا و الكيان الصهيوني , يعني الترتيب و التدبير بيبقى
مشترك .
.
- طب ليه لأ ؟
عشان هي طبيعة السياسات الدوليه كده , حتى وانت بتلاعب الأشرار مابتقفلش الباب , بص
هبسطهالك , الحكايه عامله زي دوري لكرة القدم , دوري في منتهى القذاره و مفهوش أي عدل
ولا قيم ولا مبادئ , الحكم فاسد ( الأمم المتحده ) و حامل الرايه مرتشي ( مجالس حقوق
الإنسان ) وحتى المذيع ابن صرمه ( الميديا العالميه ) , بس كل دول العالم مضطره تشارك
في الدوري ده , ليه مضطره ؟ عشان مفيش دوري تاني تلعب فيه !! .
طب فين العداله
و النزاهه و القيم الإنسانيه اللي عند الغرب المتحضر و المنظمات العالميه ؟ ممممم بص
ابقى تعالى الصبح بدري هات معاك سلطانيتين , تاخد في واحده عداله و نزاهه و في التانيه
قيم انسانيه .
..........................................................................................................
Mohamed
Hussein
12
مارس 2018·
أربعه و أربعه
.
اللي عمله السيسي
في ال 4 سنين اللي فاتو معجزه بكل المقاييس , معجزه بمقياس الوقت ( 4 سنين مده صغيره
) , معجزه بمقياس الظروف ( حرب على الإرهاب و شرق أوسط في حالة طوفان و خراب ) , و
معجزه بمقياس الإمكانيات الإقتصاديه ( الإحتياطي النقدي كان وصل ل 15مليار دولار في2013
وكنا على وشك الأفلاش ) .
.
إيه هي أهم انجازات
السيسي في ال 4 سنين ؟
- شخصيا احط في
المرتبه الأولى , تخليص مصر من الجماعه الإرهابيه و مصادرة مقراتهم و تفكيك امبراطوريتهم
الاقتصاديه اللي عملوها في فترة حكم ( الناس اللي مش عايزين نجيب سيرتهم ) .
- إعادة تسليح
الجيش المصري بأحدث الأسلحه المتطوره و تنويع مصادر التسليح .
- شبكة طرق و كباري
وبنيه تحتيه ( اتكلفت اكتر من 200 مليار)
- أكبر محطات كهربا
في العالم .
- حل نهائي لأزمة
الطاقه ( كهربا و غاز و بترول و تنقيب و اكتشافات جديده لحد ما قربنا نوصل لمرحلة الإكتفاء
و التصدير في مصادر الطاقه التلاته ) .
- قانون التأمين
الصحي و القضاء على فيروس سي اللي كان بينهش في لحم الملايين
- قانون الإستثمار
و إعادة تشغيل المصانع ( أخر تصريح لوزير الصناعه بيقول افتتاح 4400 مصنع في 2018 و
أخر تصريح لسفير الصين بيقول مصر هتبقى أكبر قاعده تصنيعيه في أفريقيا ) .
- إنشاء مدن جديده
و مطارات و توزيع التنميه في الصعيد و وجه بحري و القناه و المنطقه الغربيه ( البعد
عن المركزيه ) .
- تخصيص 250 مليار
لتنمية سينا ( التنميه هي حائط الصد الأول ضد الإرهاب )
- عودة زراعة القطن
( أخر تصريح لوزير الزراعه هو زراعه 600 ألف فدان ) .
...............................................
أتمنى من الرئيس
عبد الفتاح السيسي في ال 4 سنين الجايين ينجز في الملفات دي :
- البيروقراطيه
, محتاجين نقضي على حكاية فرخ الكربون و الختم و صورة البطاقه في كل مصالحنا الحكوميه
و نستبدلها ببرامج كمبيوتر و شباب يتولى الموضوع ده .
.
- التعليم , حلم
عندي ان بناتي يتعلمو وفي نفس الوقت يعرفو يعيشو طفولتهم و الأباء يعرفو يتنفسو ( تجريم
الدروس الخصوصيه و المدرس ياخد مرتب محترم و الحشو في المناهج يتشال و تنمية الإبتكار
و التفكير و تقليل أعداد المقبولين في الجامعات للنص بعد دراسه واضحه للسوق المصري
و العربي و الأفريقي ) .
.
- الإعلام , محتاجين
قناه اعلاميه عالميه محترفه , مراسلين في كل مكان في العالم و صوتنا يوصل للكل ( الإعلام
كان بيمثل 50 % من خطة تدمير الشرق الأوسط ) .
.
- القمح , أتمنى
الاستمرار في مشروع زراعة القمح و البحث عن طرق للزراعه ماتستهلكش مايه كتير و محاولة
الوصول للإكتفاء الذاتي (القمح هو السلاح رقم 1 مش السلعه رقم 1) .
..............................................................................................................
Mohamed
Hussein
12
مارس 2018·
عندي تحفظ و اعتراض
تام على مشاركة أي وزير او محافظ في أي دعايه أو حمله انتخابيه للمرشح الرئاسي عبد
الفتاح السيسي .
.
الشوادر الإنتخابيه
و مؤتمرات الدعم تعملها أحزاب سياسيه أو يعملها رجال اعمال أو مواطنين عاديين و يشارك
فيها نجوم مجتمع زي نجوم الفن و الكوره و الإعلام و الصحافه و السياسيين السابقين مثلا
, لكن محافظ حالي أو وزير حالي لأ , عبد الفتاح السيسي نفسه مايلزموش الكلام ده .
........................................................................................................
Mohamed
Hussein
11
مارس 2018·
تنويه بسيط
.
البوست اللي فات
بتاع التجربه الصينيه و نقلد الصين و الرئيس يبقى من حقه يحكم مدى الحياه ده هزاااااار
, و عهد الله هزار , و الختمه الشريفه هزار , حتى باين من صيغته , منه هزار و منه نجيب
للبعدا شلل رباعي و كساح , ماهو ماينفعش اكتب في نهاية البوست : أنا بهزر ( إني أمزح
) .
.
قناعتي في الموضوع
ده كتبتها كتير , واهو مجرد رأي لأني مجرد مواطن , لا تنفعنا التجربه الصينيه بتاعة
مدى الحياه ولا الروسيه بتاعة يبقى رئيس و بعدين رئيس وزرا و بعدين يرجع معرفش ايه
, وبرضه ماتنفعناش الأمريكيه بتاعة 8 سنين .
.
روسيا و الصين
كل دوله لها خصوصيتها , و اهل مكه أدرى بشعابها , و أمريكا وضعها مختلف , الرئيس مجرد
واحد بينفذ سياسات قصيرة الاجل و طويلة الاجل , و الدوله بيحكمها مؤسسات سياديه و كيانات
موجوده بالفعل .
.
احنا ك مصر بقى
يناسبنا في التوقيت ده 12 سنه بحد اقصى , يكونو على فترتين كل فتره 6 سنين او تلاته
كل فتره 4 سنين , ليه مش 8 سنين بس ؟ عشان انت بتبني دوله من اول و جديد ومحتاج وقت
اطول عشان تخلص أي حاجه بتعملها , و ليه مش اكتر من 12 سنه ؟ عشان مفيش مخلوق يستحمل
ضغوط و مهام الرئاسه اكتر من كده و إلا هيجيله انهيار عصبي أو يضطر بعد فتره إنه يكبّر
دماغه و يسيبها تخرب ( زي ناس مالناش دعوه بيهم ) .
.
فيه بقى حاجتين
مهمين , أول حاجه ان اللي بيقترح تعديل الدستور ده البرلمان المنتخب من الشعب , و لازم
موافقه على التعديل بأغلبيه معينه و دراسه و جلسات و ليله طويله .
.
الحاجه الأهم على
الإطلاق واللي لازم الناس تركز فيها و تفهمها , القصه هنا مش قصه شخص اسمه عبد الفتاح
السيسي , السيسي في النهايه بشر , لا هو مؤسسه ولا صخره , له عمر ربنا واحده اللي عارفه
, و بالتالي الأهم من مدة الرئاسه هو توفير وتجهيز أكتر من بديل .
.
يعني ايه توفير
بديل ؟ يعني مستقبل الدوله مايتسابشي للظروف زي ما حصل في 2012 , البديل بيكون دوره
إنه لو الأحزاب السياسيه ماخلقتش كوادر تفهم يعني ايه أمن قومي و يعني ايه مشاريع قوميه
و حدود و تراب و جيش و تاريخ و هويه و علاقات دوليه و دفعت بمرشح يفهم الكلام ده ,
يبقى الدوله ومؤسساتها عندهم بديل جاهز تدفع بيه في الانتخابات و الناس تنتخب و تختار
( البديل مش بالضروره يكون شخصيه عسكريه ) , لكن مستقبل الأوطان الكبيره اللي زي مصر
و في توقيتات زي دي ماينفعش يتساب للصدفه .
.
هبسطهالك , نفترض
لا قدر الله ان السيسي توفى بكره الصبح ( كلنا هنموت ) , وبقينا قدام انتخابات رئاسيه
, الأحزاب لا عندها كوادر مؤهله تنفع لمنصب بحجم رئيس مصر ولا عايزه تدفع بمرشح , و
بقى المرشحين اللي قدامنا واحد زي سامي عنان المدعوم من الجماعه الإرهابيه و من أمريكا
و واحد زي خالد علي اللي معلوماته عن حكم الأوطان تساوي معلومات ام نحمده بتاعة الكرشه
عن القنبله الذريه ( واحد سيادتك شايف إن الإرهابي القاتل المفروض مانعدموش عشان كده
ممكن يموت و يخر دم ) , تخيل مستقبل مصر وقتها لو كانت هي دي الاختيارات المتاحه ؟!
.
.........................................................................................................
Mohamed
Hussein
11
مارس 2018·
الصين حلوه
.
البرلمان الصيني
أقر بأغلبيه ساحقة تعديل دستوري يتيح للرئيس الصيني البقاء في الحكم مدى الحياه !!
.
.
خلاص تاهت و لقيناها
, نسيبنا من التجربه الروسيه و حكاية يبقى رئيس وزرا و بعدين يرجع يبقى رئيس و شغل
حاوريني يا طيطه , احنا نجيب من الأخر و نستلهم التجربه الصينيه العريقه , و الرئيس
المصري القادم ( عبدالفتاح شينج بونج ) يبقى من حقه يكون رئيس لمصر مدى الحياه , أه
و عهد الله .
...........................................................................................................
Mohamed
Hussein
11
مارس 2018·
ابننا محمد صلاح
ربنا يحميه متألق في الدوري الإنجليزي في أول سنه له مع ليفربول , بإذن الله يحسم لقب
هداف الدوري الإنجليزي و يفوز كمان بجايزة الحذاء الذهبي اللي بيفوز بيها هداف دوريات
أوروبا بالكامل .
.
محمد صلاح في
2017 فاز بجايزة أحسن لاعب في أفريقيا من الكاف و من ال bbc
, و طبعا أحسن لاعب عربي بدون منافس .
.
صلاح لو استمر
بالمستوى ده و ظهر بمستوى حلو في كاس العالم و فاز بلقب هداف الدوري الإنجليزي و الحذاء
الذهبي هيبقى مرشح بقوة في 2018 إنه يكون واحد من التلاته اللي بيترشحو للجايزه الاعظم
على الإطلاق , جايزة أحسن لاعب في العالم .
.
نادي ريال مدريد
الأسباني مهتم بالتعاقد مع صلاح في الصيف , عشان يبقى ونج يمين جنب كريستيانو رونالدو
.
.
بس الجديد بقى
هو دخول نادي باريس سان جيرمان الفرنسي على الخط , النادي ده بتمتلكه حكومة قطر بنت
الوسخه , و اللي بالتأكيد هترفع قيمة الصفقه أكتر من ريال مدريد عشان تفوز بخدمات محمد
صلاح , التقارير بتقول إن قيمة الصفقه هتوصل ل 200 مليون يورو يعني 4 مليار جنيه
!! .
.
طبعا ريال مدريد
مش هيقدر يدفع المبلغ ده و هتقف مفاوضاته عند 100 مليون يورو أو 120 بالكتير .
.
مش عارف الواحد
ممكن يكون مجرد مشجع لمحمد صلاح و واحد من عاشقيه و ينصحه ولا لا , صح يابني دي كوره
و استثمار و فلوس , و صح مرتبك الإسبوعي في باريس سان جيرمان هيبقى اعلى , لكن رأيي
و نصيحتي , بلاش الفريق المملوك لحكومة قطر بنت الوسخه , بلاش يا مولانا , خلّيك في
ليفربول زي مانت , انت بقيت الملك و معبود الجماهير , و الدوري الإنجليزي أقوى بكتير
من الفرنسي , أو اتنقل لريال مدريد و كمل طريقك للحلم و الجايزه الكبرى .
.
طب ليه بلاش ؟
عشان سببين , الأول ان ملايين المصريين العاشقين لك هيبقو في حيره , نشجع محمد صلاح
و نشجع فريق بتملكة حكومة إرهابيه قذره ولا ايه ؟ السبب التاني و المهم جدا , بس حاول
تركز, الحكومه القذره دي من سنين طويله و هي بترمي مليارات الدولارات في البحر , تصرف
على إرهاب , ترعى إرهابيين , تحاول تخلق لها تاريخ وهمي , تشتري تنظيم بطولات بالرشاوي
, و اللي صرف عشرات المليارات في محاولة إسقاط مصر معندوش مشكله يدفع 200 مليون يورو
لمجرد تجميدك , أه تجميدك بأي شكل , يعني انهاء اسطوره عالميه واعده اسمها محمد صلاح
.
.
طب ليه ؟ عشان
انت بقيت رمز و قدوة لكل شباب مصر بلا استثناء , رمز للعطاء و الوطنيه و الموهبه اللي
بتنجح بالصبر و العمل , انت بقيت حديث الجماهير في العالم , الكبير و الصغير , بقيت
سفير لمصر في أكبر و أشهر البطولات , بقى اسمك و اسم بلدك يتقالو ب 50 لغه مختلفه و
يسمعها مليار بني أدم كل يومين تلاته .
.
و اللي بيدفع مليارات
لمحاولة تشويه تاريخ بلدك بيدفع لتشويه الحاضر و المستقبل , حاول تصدق , انا ماستبعدش
كده أبدا , مش إيمان مني بنظرية المؤامره و عايش فيها ولا الهجص ده , إنما إيمان منّي
بإن وساخة الطرف الأخر ملهاش حدود .
............................................................................................................
Mohamed
Hussein
11
مارس 2018·
متأكد و واثق بإذن
الله ان النزول للإنتخابات هيبقى بنسبه عاليه جدا , لأن الناس واعيه و مدركه إن الحكايه
مش مجرد انتخابات و صناديق ولا فيه أصلا أي منافسه بين السيسي و المرشح المحترم التاني
ولا بين السيسي و أي حد في مصر , إنما الحكايه زي تفويض جديد , رساله للعالم و الغرب
اللي ماوراهوش غيرنا ( بمنظماته و إعلامه و فبركته و انحطاطه ) , رساله للصيع اللي
جوه و البلطجيه و الخونه اللي بره , رساله بتقول إن البلد دي لها جيش بيحارب مابيرميش
سلاحه ولها رئيس بيبني مابيحنيش راسه و لها شعب ساند الاتنين و واقف في ضهرهم .
................................................................................................................
Mohamed
Hussein
10
مارس 2018·
محل الجزاره اللي
على يميني عامل لوحة تأييد كبيره للسيسي و محل السمك اللي على شمالي , و بتوع المخبز
و الأهالي في عماره جنبي لمو من بعض و عملو لوحة قماش كبيره .
.
فكرة إن الناس
بتعمل الحاجات دي لمصلحه أو غرض هي فكره في منتهى النطاعه , لا محل الجزاره ولا محل
السمك ولا الاهالي هيبقالهم مصلحه من كده , ولا هما كانو ماشيين مخالفين و استنو ليومين
الانتخابات عشان اللوحه تشفع لهم قدام القانون , و بعد شهر اللوح دي هتتشال لما تكون
الانتخابات خلصت .
.
تخيل بقى معاليك
بعد شهرين مثلا البلديه رايحه لمحل الجزاره و بتقوله فين الترخيص ؟ يقوم يقول لهم دانا
كنت معلق لوحة تأييد للسيسي من شهرين والله !! , تخيل محصل الكهربا بيخبط على شقه و
بيقول لهم وصل النور يقولو له مش هندفع , داحنا كنا لامّين من بعض و عاملين لوحه للريس
!! , كلام يليق بشوية صيع و أنطاع , ناس لازم تلاقي لكل خير بيتعمل معنى شر جوه عقولهم
المريضه , ترسيم الحدود يبقى بيع جزر , تسليح الجيش يبقى اهدار لمال الدوله , شبكة
طرق و كباري تبقى منظره ملهاش لازمه , تنمية سينا و محاربة الإرهاب يبقى هنبيعها ,
قبضو على فلان يبقى كان ماسك سيديهات عالدوله , محبة الناس و امتنانهم لشخص عبد الفتاح
السيسي تبقى مصلحه و سبوبه .
.
يبدو ان صور الراجل
ده في الشارع بقت تجيب للأنطاع أرتكاريا و انهيار عصبي و شلل رباعي فعلا , طيب تمام
أوي , يارب يكّتر صورك في شوارع مصر المحروسه يا عبد الفتاح , قولو أمين .
...............................................................................................................
Mohamed
Hussein
10
مارس 2018·
حشيش أصلي
.
صباح الخير , نجيب
الخرطوم بقى و نرش مايه قدام الصفحه و بعدين نجيب الكنبه ( الدكه ) و نقعد نشوف هنبيع
سينا لمين النهارده ؟ احنا الايام اللي فاتت بعناها لفلسطين و اسرائيل و السعوديه و
تقريبا الإمارات , وانا كنت عارضها على موقع olx
و جيت الصبح لقيت مكالمة من رئيس فنزويلا و رساله عالواتس أب من فلاديمير
بوتين بيقول انه شاري و فلوسه حاضره ( توتو على كبوتو ) , بس الروس بخله يا عم الحاج
و فنجرية بؤ , و بعدين فنزويلا دي عايشه في ماية البطيخ , الموظف الفنزويلي لو بيقبض
10 مليون بوليفار ( اللي هي العمله بتاعتهم ) في الشهر ف دول مايجيبوش جوز فراخ وبالتسعيره
كمان .
.
نصبر شويه كده
, جايز ربنا يبعت لنا ملياردير ألماني أو رجل أعمال كندي ( كندا فلوسها حلوه) , و جايز
نجيب ساويرس يدخل عالخط ويرمي بياضه , واهي تبقى ماراحتش لحد غريب .
.
اه على فكره ,
نسيت أقول لكو معلومه مهمه جدا محدش يعرفها غيري أنا و عم محفوظ بتاع الجراج و أم نحمده
بتاعة الكرشه , المعلومه بتقول إن قوم عاد هما اللي بنو الأهرامات و كانو عايشين في
المعادي و سينا هنبيعها للهكسوس , و أكبر دليل على كده هو قول الشاعر حسين بن الجسمي
في معلقته الشهيره ( قوم نادي عالمعادي و قَوْم عاد اللي الناحيادي , و الهكسوس ياخدو
العريش , القاعده دي قاعدة حشيش ) .
....................................................................................................................
Mohamed
Hussein
9
مارس 2018·
شوف يابني , انت
معاك حق
.
- السيسي باع تيران
و صنافير للسعوديه ( مش ترسيم حدود ولا حاجه ) و بعنا ألف كيلو من جنوب سينا للسعوديه
برضه ( مش استثمار ولا حاجه ) .
- و أصلا أصلا
السعوديه هتاخد الجزيرتين و الألف كيلو تسلّمهم لإسرائيل , يعني هي مجرد وسيط أو سمسار
, و ممكن تعرضهم على موقع olx .
.
- شمال سينا بقى
بنحارب فيها الإرهاب من سنين و بنعمل لها تنميه ب 250 مليار جنيه عشان نسلمها للفلسطينيين
, لا ياربي نسلمها للصهاينه , يوووه , بص ؟ احنا هنسلمها للفلسطينيين و هما يسلموها
للصهاينه , يعني الفلسطينيين هيبقو مجرد وسيط برضه .
.
- اللي حصل في
الشرق الأوسط مكانشي مؤامره ولا خطه خراب , وأصلا مفيش إرهاب ولا دول خربت و جيوش وقعت
, دي فزاعه عاملاها الأنظمه الديكتاتوريه اللي بتاكل دراع العيال الصغيره , يوووه
, ده فيه ارهاب بس احنا مش عارفين نحاربه , لالا ده فيه ارهاب بس الإرهابيين ضحايا
و لهم وجهة نظر و بالتالي يبقى الإرهاب ده اسمه عنف متبادل .
.
- مكانشي يصح اننا
نشتري طيارات و حاملات مروحيات و أنظمة دفاع جوي , دي بعزقة فلوس عالفاضي , كنا جبنا
بالفلوس دي ساندوتشات حلاوة بالقشطه , معروف في كل دول العالم و في كل الكتب إن ساندوتشات
الحلاوه بالقشطه هي حائط الصد المنيع ضد أي عدوان خارجي , و على قد مايكون عندك مخزون
استراتيجي من ساندوتشات الحلاوه بالقشطه على قد ما بترعب الأعداء .
.
- أمريكا و بريطانيا
دي دول بترعى الحريات و حقوق الإنسان و العصافير الكناريا في العالم , و القنوات و
الجرايد بتاعتهم هي رمز للشفافيه و المصداقيه ولو جبت صحفي منهم و قلّعته القميص هتلاقي
تحته جناحين من بتوع الملايكه بس هو مداريهم عشان الحسد , و مراكز حقوق الإنسان دي
حد جميل اخر فيصل , و المخابرات الأمريكيه مقطعه حصر الجامع و البريطانيه حجت بيت الله
400 مره .
.
- اللي بيهرب من
بلده و يروح يشتغل في قناه تبع خليفة الشواذ أو تبع الشاذ ابن موزه و يقبض بالدولار
و يكون كل دوره هو فبركه تقارير و تشويه في اسم بلده و جيشها و تاريخها , اللي بيعمل
كده بيبقى مناضل و بطل و فارس , مش خاين ابن وسخه ولا حاجه .
.
- نهر النيل نشف
بسبب سد النهضه اللي لسه ماخزنش ولا نقطة مايه , و المجاعه ظهرت و الديناصورات و طائر
البطريق في شوارع مدينة نصر , و احنا موتنا من العطش خلاص وربنا يرحمنا بقى .
.
كل اللي فات ده
جميل أوي و حقك , حقك انك تعبي دماغك سباخ و ببي و صنادل بلاستيك , كده مش باقي لك
غير خطوه واحده , أنا شخصيا مش هتفاجئ لو عملتها , إنك ترسم نخله عالحيطه و بعد يومين
ترسم للنخله دي سباطتين تلاته بلح أو موز , أقولك حاجه ؟ خليهم سباطه بلح و سباطه موز
, و بعدين تتوكل علي الله و تطلع تجيب بلح وموز من عالنخله و تعزم أصحابك , و بعد ماتاكل
و تشبع موز و بلح انت و أصحابك , تقوم طالع عالنخله تاني و تعلّق لوحه انتخابيه بتقول
( خالد علي رئيس مصر 2018 ) و بعدين تنزل و تروح تجيب مسمار و تطلع تاني و تنحت عالنخله
من فوق الجمله دي ( محمد البرادعي رئيس جمهورية الضمير ) , صدقني هتحس بعدها انك بقيت
كويس أوي و سابقنا بمليون فدان .
........................................................................................................................
Mohamed
Hussein
9
مارس 2018·
الجارديان تكشف
المكان المحتمل لعقد القمه التاريخيه بين ترامب و كيم جونج زعيم كوريا الشماليه !!
.
.
أكيد أفضل مكان
على الإطلاق لعقد القمه دي هو الفيلا بتاعة مرتضى منصور , يتجمعو هناك و نسيبهم هما
التلاته مع بعض و نروح احنا بقى نستغفر ربنا كتير و نتوب بسرعه و اللي مخاصم حد يصالحه
و اللي عندها كيسين باميه كانت شايلاهم في الفريزر للزمن تطلعهم و تطبخهم .
........................................................................................................
ليست هناك تعليقات:
إرسال تعليق