Mohamed
Hussein
22
مارس 2018·
للأنطاع و الصيع
و العيال اللي بقالهم سبع سنين زانقين مناخيرهم في علبة الكوله , 3 أخبار في يوم واحد
, علقه مكثّفه يعني .
.
1- وكالة بلومبرج
كتبت تقرير إن الصين هتستثمر 20 مليار دولار في العاصمه الإداريه الجديده , طبعا معروف
ان الصينيين بيحبو الفناكيش عشان كده هيشاركو بمبلغ ضخم في فنكوش العاصمه الجديده اللي
هنعمل له افتتاح مبدئي أخر 2018 , يعني اخر السنادي .
.
2- في تركيا سجنو
مذيعه النهارده عشان انتقدت أردوغان , دي ممكن تكون السجينه رقم 2568756 في خلال سنتين
في سجون خليفة الشواذ , و أرودغان لما يغلب هيقول تبع عبد الله جولن , بس انت كواد
عميق و قراري و سابق كوكب الأرض بمليون فدان قاعد تنتقد و تشتم في عبد الفتاح السيسي
ليل و نهار و تنام في بيتكو عادي و في نفس الوقت شايف ان السيسي ديكتاتور و تركيا فيها
تجربه ديموقراطيه فريده !! لدرجة ان فريدة ذات نفسها قرّبت تلطم على وشها بسببك .
.
3- مَدْرسه في
كاليفورنيا فصلت مدرس تاريخ و قالت له اقعد في بيتكو عشان أهان الجيش الأمريكي !!
, مع العلم ان الجيش الأمريكي عباره عن مجموعه من السفاحين المرتزقه اللي ايديهم غرقانه
في دم عشرات الشعوب في العالم ( مش خير اجناد الأرض و لا حاجه ) و مع ذلك إهانة جيش
السفاحين ده بيعتبروها تهمه و جريمه , روح انت بقى أمريكا و قول عالجيش بتاعهم عسكر
و جينرالات بيزنس و بطيخ , عشان يربطوك في عمود نور و اللي رايح واللي جاي يمارس معاك
الرذيله , وانا عارف ومتأكد انك هتتبسط .
......................................................................................................................
Mohamed
Hussein
22 مارس 2018 ·
علاء الأسواني
: أنا محتجز بقالي ساعتين في المطار .
علاء الأسواني
: أنا خرجت من المطار بعد ساعتين من المضايقات التي لا علاقه لها بالاجراءات الأمنيه
!!
.
مممممممم بص يا
علاء يا حبيبي
- مفيش دوله فاشيه
قمعيه في الدنيا كل اللي بتعمله انها بتضايق معارض لها ساعتين في المطار , لا يا ضنايا
, الدوله الفاشيه القمعيه بتمسك المعارض و تسجنه و تغتصبه و تهتك عرضه هو و عيلته و
الشارع بتاعهم و بعدين تاكل دراعه و تعلقه على عمود النور .
.
- حكاية حجزوني
ساعتين في المطار عايز أقولك و عزة جلال الله اني كل مابروح أقابل اخويا او اختي في
المطار بستنى ساعتين واقف على رجلي لحد مايجيبو شنطهم و يختمو جوازاتهم , اكيد الدوله
مش مستقصده اخويا و اختي ولا مستقصداني .
.
- لكن المهم و
باختصار إن حالتك بقت بائسه , أصعب من حالة الخرفان , اه و عهد الله , إفلاس تام و
تويتات عباره عن قرقضة ضوافر , مرّه أصل بنتي خبطت موتوسكل بعربيتها و خدوها نص الليل
و ده شغل مخابرات ( اه المخابرات بعتت لك محسن بيه على موتوسكل عشان بنتك تخبطه بعربيتها
!! ) , و مره أصلهم حجزوني و ضايقوني , لا مالهمش حق و النبي , انا لما أشوفهم هملّص
لك ودانهم .
.
- و بناء على حالة
الإفلاس اللي عندك دي و حيث انك حد مبقاش له أي تلاتين لازمه في الحياه و بيحاول يدوّر
لنفسه على أي تلاتين لازمه عايز أقولك توقعي لتويتاتك في الفتره الجايه هتكون كالتالي
:
.
علاء الأسواني
: انا واقف في صلاح سالم بقالي ساعه ونص , و فيه عطله مش مفهومه مالهاش علاقه بزحمة
الطريق ( أه الدوله الفاشيه قفلت صلاح سالم و كوبري اكتوبر و قناة السويس و قناة بنما
و قناة cbc عشان تضايقك و تجيب لك حب شباب
) .
.
علاء الأسواني
: انا باكل سمك عند طأطأ و فيه شوكه وقفت في زوري , اشمعنى الشوكه دي سابت الناس كلها
و و قفت في زوري أنا ؟! ( على فكره اللي وقف في زورك ده عسكري امن مركزي صغير متنكّر
في صورة شوكة سمكه ) .
.
علاء الأسواني
: من شويه و انا في الحمّام بتشطف بالشطافه قامت لسعت ال ..... , مع اني مش فاتح المايه
السخنه فهل أصبحت سياسات العسكر هي لسع ال .... لمعارضيها ؟! قلنا مرارا و تكرارا أننا
نريد حكما مدنيا لا يتعمد لسع ال .... لمعارضيه .
.
علاء الأسواني
: ابن خالة جوز عمتي راح السجل المدني يغير البطاقه و ينقل العنوان قامو قالو له هات
وصل نور جديد و رجّعوه عالفاضي , فهل تعمدت الدوله الفاشيه مضايقة ابن خالة جوز عمتي
من أجل التأثير على مسيرتي النضاليه اللي على تويتر ؟! .
..................................................................................................................
Mohamed
Hussein
22
مارس 2018·
خلّي الدماغ صاحي
.
بكره بإذن الله
ماتش مصر و البرتغال في سويسرا , اول ماتش في استعداد الفريقين لكاس العالم , الصحف
السويسريه و الفرنسيه و الأوروبيه لما بتتكلم عن الماتش ده بتقول باختضار كريستيانو
رونالدو في مواجهة محمد صلاح ( اتنين من أفضل مهاجمي العالم ) , بتوصفهم بندّيه , كرستيانو
اللي مستقبله وراه ( عمله خلاص ) و صلاح اللي مستقبله قدامه ( و اللي بقى مرشح بقوة
للفوز بالكره الذهبيه كأحسن لاعب في العالم !! ) , صلاح أصلا احتمال كبير يتنقل لريال
مدريد في الصيف ( فيه منافسه بين ريال مدريد و برشلونه و باريس سان جيرمان لضم اللاعب
) , لو راح ريال مدريد هيلعب جنب كرستيانو أو ممكن تقولها بشكل تاني و من غير أي حرج
( كرستيانو هيلعب جنب صلاح ) .
.
بص يابني , انا
أصلا عايز أقولك كلمتين , انت ممكن تحب الخطيب , تحب حسن شحاته , تحب أبو تريكه , طاهر
ابو زيد , فاروق جعفر , حازم امام , على أبو جريشه , أو تحبهم كلهم مع بعض , كلهم لاعبين
عظام و عمالقه و كبار جدا , لكن مفيش أي وجه للمقارنه بينهم و بين محمد صلاح , لا مقارنه
في قيمه سوقيه ولا مقارنه في شعبيه و جماهيريه , مع كل و كامل احترامي للأسماء العظيمه
و نجوم الكره المصريه .
بص , عشان ربنا
عرفوه بالعقل
- القيمه السوقيه
لمحمد صلاح حاليا تساوي ما يقرب من 4 مليار جنيه , لا 4 مليار مش 4 مليون , و القيمه
دي لو عايز تعرف هي قد ايه بالظبط ؟ ممكن أقولك انها تساوي قيمة لاعبي الدوري المصري
في جميع الفرق منذ بدأ الخليقه و حتى الأن .
.
- شعبية محمد صلاح
مش في مصر و السعوديه و تونس و نيجيريا , يعني مش مصريه و عربيه و أفريقيه , لا حضرتك
, شعبيته هتلاقيها في البرازيل و اليابان و أسبانيا و كندا و أستراليا و جزر القمر
, يعني في الكره الأرضيه من أقصى إلى أقصى , فيه مليار بني أدم في كوكب الأرض بيتفرجو
على صلاح و عارفينه و بيسمعو اسمه مقرون دايما بإسم مصر .
.
- الستات في شوارع
انجلترا ممكن يقفو صف كده و يغنو الأغنيه اللي ألفتها جماهير ليفربول لمحمد صلاح مخصوص
( مو صلاح زاي ايجيبشن كينج ) , الأطفال في انجلترا تلاقي الطفل بيلعب كوره و يجيب
جون يروح يسجد زي ما صلاح بيعمل , مع ان الطفل مش مسلم ولا يعرف يعني ايه سجود , هو
بس بيقلد صلاح .
.
- صلاح على وشك
انه يحسم جايزة هداف الدوري الانجليزي و أحسن لاعب فيه و جايزة الحذاء الذهبي لهداف
دوريات أوروبا بالكامل , كده مش هيبقى باقي له غير انه يحاول يوصل مع ليفربول للمركز
التاني في الدوري و لأدوار أبعد في بطولة أوروبا , و يعمل مستوى كويس مع مصر في كاس
العالم ( و يحرز أهداف ) و يا سلام لو نوصل دور ال 8 او حتى دور ال 16 , بعدها يبقى
جاهز تماما للصعود لمنصة التتويج كأفضل لاعب في العالم ( ربنا يحفظه و يحميه و يبعد
عنه الغرور و الإصابات و عيون الناس ) .
.
- أخيرا بقى ,
أتمنى من وزارة التعليم إنها تنزّل سيرة محمد صلاح في مناهج التربيه الوطنيه ,كدرس
للشباب و قدوه و معنى و رساله , من أول ماكان في قريته الصغيره في الغربيه و يعافر
و يسافر ساعات طويله و هو طفل عشان يتدرب لحد ما بقى في المقاولين و بازل السويسري
و بعدين فيرونتينا و روما و تشيلسي و ليفربول ....و قريبا في ريال مدريد
.................................................................................................................
Mohamed
Hussein
21
مارس 2018·
امبارح سيده فاضله
من اللي ظهرو في الفيديو كانت بتتكلم عن النظام العسكري و انه مش بيشتغل بطريقه علميه
و بيبص للنواحي الأمنيه اكتر , و البلد محتاجه علماء و فرق تشتغل على نفس الملف .
.
معلش عندي كلمتين
مهمين لازم أقولهم , و مش موجهين للسيده الفاضله اللي لها كل الحريه في انها تقول رأيها
, إنما هقولهم في المطلق , لأنه فيه زيها كتير , هتقابلوهم حضراتكو في الفيس و تويتر
و الشارع و النوادي الهاي فاي .
.
بصي يا حبيبتي
:
1- الأكلشيه ده
حلو أوي ولازم يتقال كله على بعضه في بؤ واحد ( , نظام عسكري , مفيش طريقه علميه ,
بيهتم بالأمن , مفيش علماء و لا فكرة التيم ورك ) , هايل جدا , تصفيق حاد و مزمن ,
الأكلشيه ده إجمالا بيفكرني بحاجه لذيذه أيام الكليه , لما تكون مش عارف الأعراض الجانبيه
لدوا و جالك في امتحان الشفوى , بص للدكتور و قول له nausea , vomiting , diarrhea ... قولهم في بؤ واحد و انت مبتسم , صح هتاخد
صفر بس هتبان انك قولت حاجه , أهو يبقى اسمك عملت منظر برضه .
.
2- في الطريقه
العلميه يا كتكوته , هضرب لك مثل صغير , عايزين نعمل قاعده صناعيه و نشغل المصانع
, نعمل ايه ؟ برافو , ناخد المفتاح و نروح نفتح المصنع و نشغله ( على فكره ده كان رأي
شمامين الكوله اللي زيك كده في 2013 ) , طب السيسي ( النظام العسكري ) عمل ايه ؟ ,
عمل حاجه مش علميه خالص , قال عشان نعمل صناعه حقيقيه يلزمنا نمشي step wise , خطوات او درجات سلم بنطلعها بالترتيب , نعمل
طرق و كباري و مواني ( بنيه تحتيه ) , نحل مشكلة الكهربا و الغاز و البترول ( الطاقه
) ولا احنا هنشغّل المصانع دي بعصير فراوله و نبقى ننقل البضاعه عالواتس أب ؟ ندرس
السوق الداخلي و الخارجي , ندرس ندرس ندرس و بعدين نفتح المصنع و نشغله , راجل مش علمي
خالص زي مانتي شايفه كده !! .
.
3- في فكرة التيم
ورك , عايز أقولك , في الاقتصاد و قرار التعويم مثلا , اجتمع محافظ البنك المركزي مع
وزير الماليه و رئيس الوزرا و رئيس الدوله و بتاع 17 عالم اقتصاد أقل واحد فيهم واخد
دكتوراه قبل مانتي تتولدي , و اتناقشو و فكرو و درسو و بعدين خدو القرار , مكانشي فيهم
لا عقيد ولا لوا , ناس مدنيين زي الفل و علماء و تيم ورك على كيف كيفك , ولّا برضه
انتي متخيله ان السيسي جاله هاتف في المنام قاله عوّم الجنيه ياعبفتاح قام صحي من النوم
وأصدر فرمان بتعويم الجنيه ؟!
.
4- فيه حاجه اخيره
بقى حازه في نفسي و عامله حز اطول من صلاح سالم , ان النوعيه دي من البني أدمين ( القَرَنات
) بتوع ( بؤ ) الأسلوب العلمي و بؤ ( التيم ورك ) اللي انا حافظهم تماما ( هي تقول
الأكلشيه , تحس بعدها براحه نفسيه رهيبه و تتخيل ان أينشتاين هيطلع من قبره يبوسها
من بؤها ) , الناس دول هما اللي بقالهم سنين بيتركبو من الخرفان و لسه لحد النهارده
أي خروف معدّي بالصدفه بيركبهم عادي ( بس أكيد أكيد , بيتركبو بأسلوب علمي ) .
..............................................................................................................
Mohamed
Hussein
21
مارس 2018·
بمناسبة عيد الأم
, كل سنه و كل أمهات و عظيمات مصر بخير و سعاده .
.
مش هتكسف اكتب
ولا هتضايق عشان الغاليه الله يرحمها من سنه بس كانت موجوده و بتخلي اخواتي يقرو لها
اللي بكتبه ( ماكنتش بتعرف تقرا و تكتب ) , هفضل أكتب عنها طول ما فيا نفس .
.
ليه الأم و ليه
الجنه تحت أقدام الأمهات و ليه و ليه و ليه ؟ بص يا سيدي :
.
- كان فيه ست مخلّفه
ست عيال فوق راس بعض , المرتب بتاع جوزها عالقد خالص , 6 عايزين يلبسو و ياكلو و يشربو
و يتعالجو و يتعلمو و يدخلو الجامعه بمرتب كان تقريبا 200 جنيه و حتة أرض مش كبيره
.
.
- عشان الست دي
يكون عندها بيت بالطوب الاحمر ( مش أوضه بالطوب النيّ في بيت معمول من الطين قاعده
فيها هي و جوزها و عيالها ) اضطرت تبيع دهبها كله و يستلفو من طوب الأرض , لحد مابقى
عندها بيت بس طبعا على حساب كل حاجه تانيه , الغساله مفيش و هدوم الكل بتتغسل في طشت
نحاس , و تفضل تنقع و تدعك و تعصر ساعتين تلاته كل يوم , و هي مولّعه عالأكل في فرن
طين أو عالكانون ) , مفيش بوتاجاز , مفيش تلاجه , حتى التليفزيون جابوه بعد مابنو البيت
بسنين .
.
- الست دي جوزها
اتوفى و كان عمره 39 سنه و هي 32 , فجأه لقت نفسها شايله الحمل كله فوق راسها , 6 عيال
أكبرهم في تالته ثانوي , و أصغرهم في ابتدائي , و برضه عايزه تحقق الحلم و تدخلهم كلهم
الجامعه ( وصية أبوهم بقى ) .
.
- كانت تخرج كل
يوم الفجر تستلف فلوس من أخوها ( و ماترجعهاش طبعا ) لأن ابنها عايز 5 جنيه عشان يروح
الكليه , طب حتى 3 جنيه .
.
- و مشيت الست
العظيمه تزقّ في الأيام و الدنيا و تعافر معاها لحد ما عودها اتحنى , و كل سنه تسأل
ابنها الكبير , انت باقي لك كام سنه و تخلص ؟ ما تخلص بقى عشان تشيل معايا حمل اخواتك
.
.
الست دي عاشت و
ماتت و هي ماتعرفش يعني إيه ماكياج و يعني ايه فسحه و يعني ايه مصيف و البحر ده فين
و بيعملو هناك ايه و يعني ايه طياره و يعني ايه أكل ديلفري , ويعني ايه كاتشب و يعني
ايه مايونيز و مين كنتاكي ده , و يعني ايه مول و الأهم من ده كله , يعني ايه مرض نفسي
و اكتئاب ؟!! لانها لحد أخر لحظه كانت غرقانه لشوشتها في نعمة الرضا .
.
- الست دي تبقى
أمي الله يرحمها , الغاليه , اللي كانت أسعد لحظات حياتي لما أروح لها و أوطي قدامها
و أمسك ايدها الخشنه و أبوسها .
...............................................................................................................
Mohamed
Hussein
20
مارس 2018·
أهم 3 حاجات في
حوار الريس النهارده مع المخرجه الرائعه ساندرا نشأت .
.
1- انه ماعملش
الحوار مع حد من زلنطحية الإعلام اللي فاكرين نفسهم ياما هنا و يا ما هناك ( تخيل مثلا
مثلا يا محترم ان السيسي بعد 4 سنين من بناء البلد و حرب الإرهاب و المؤامره اللي كانت
على عينك يا تاجر يعمل الحوار ده مع واحد زي ابراهيم عيسى , يقوم مولانا ابراهيم عيسى
شادد الأستيك بتاع بنطلونه مرتين و يقوله ( العسكر ) مع نفس الإبتسامه البلهاء , تخيل
وقتها انا لو مكان السيسي وعزة جلال الله مش هتناقش و أقول عيب ولا هشرح له كلمة عسكر
دي كانت بتتقال على مين , أنا هسمع كلمة عسكر من هنا و اقوم مطلّع طبنجه و مفرغها في
دماغه عالهوا ) .
.
2- لأول مره في
تاريخ مصر يبقى عندنا رئيس يتعرض عليه نبض الشارع في حوار تلفزيوني , و رأي المواطنين
فيه , اللي يقول حلو و اللي يقول وحش , اللي يقول بطل و بيبني بلد و اللي يقول مش لاقيين
ناكل , والريس يسمع و يبتسم و يسجل الملاحظات في اجندته , لا حد من الناس اللي اعترضت
عالسيسي هيتعرّض لمشكله ولا مسائله , رأيك وانت حر فيه , زي ملايين بيقولو رأيهم وانتقاداتهم
عالفيس و القهاوي وفي كل مكان .
.
3- شخصية عبد الفتاح
السيسي و طريقة تفكيره ممكن نختصرها في جمله قالها ( أتمنى من ربنا انه كان يرزقني
ب 2 تريليون دولار , مش هوزعهم عالناس , هبني بيهم بلدي ) هي دي باختصار طريقة تفكيره
, اللي هي عكس مبارك تماما , كل قرش ييجي هبني بيه حته في البلد , مش هوزع فلوس عالناس
و أبسطهم و ابيع لهم الوهم عشان أكسب شعبيه .
...............................................................................................................
Mohamed
Hussein
20
مارس 2018·
الأنطاع
.
السيد المهندس
فرج عامر رئيس نادي سموحه و رئيس لجنة الشباب و الرياضه في مجلس النواب المصري !! كتب
بوست امبارح على صفحته عن حوار مع لاعبنا العظيم محمد صلاح , و إن صلاح بيقول للمذيع
أنا اجلت الانتقال من ليفربول لبعد كاس العالم , و ده بناء على نصيحه من الرئيس السيسي
, و الريس أصبح سيد العالم و بيتصل بيا بعد كل ماتش و يشجعني وانا بسمع كلامه لأني
بعتبره زي والدي !! .
.
طبعا من أول ماقريت
أول سطرين من الحوار و انا أبصم بالعشره انه متفبرك , مع كل و كامل احترامي لمحمد صلاح
و كل و كامل احترامي لعبد الفتاح السيسي , لا الريس يلزمه فبركة حوار زي ده ولا محمد
صلاح محتاج دليل على وطنيته و حبه للريس بفبركة حوار .
.
قلنا مليون مره
إن النطاعه دي بتجيب نتيجة عكسيه و تخلّي وشنا مكشوف , و ان الخبر لما يتم نفيه بيحولنا
لمجال للسخريه و التريأه , و للمره التانيه لا عبد الفتاح السيسي يلزمه فبركة حوارات
ولا محمد صلاح يلزمه .
.
قبل ماكتب البوست
فكّرت من باب الأمانه اني أحط احتماليه ان دي مش صفحة فرج عامر , لكن الحقيقه لقيت
الجرايد جابت البوست و أكد لهم ان هي صفحته و إن الحوار ده حقيقي و مش هيتراجع عنه
, من دقايق فرج عامر حذف البوست اللي كان اتعمل له ألاف اللايكات و الشير !! .
.
عزيزي المهندس
فرج عامر , الشعب المصري كره مبارك بسبب الأفوره اللي كان بيأفورها ناس زي معاليك كده
, وانا كمواطن مصري عاشق لبلدي و محب للرئيس البطل الفارس عبد الفتاح السيسي و محب
للاعبنا اللي بإذن الله هيكون أحسن لاعب في العالم محمد صلاح , عايز أقول لك بالفم
المليان , انت أكيد ماكنتش شارب حاجه صفره و انت بتكتب ( الببي ) ده ولا حد ضاغط عليك
, و معروف طبعا الغرض إنك ( تجّود ) زي ما خيري رمضان حب انه يجوّد و هو بيتكلم عن
معاناة ظباط الشرطه !! .
.
بص يا مولانا
, رأيي الشخصي , إنت لا تنفع تكون رئيس نادي بحجم نادي سموحه ولا تنفع تكون عضو برلمان
ولا رئيس لجنة الشباب و الرياضه , إلبس الجلابيه البيضا و اقعد في بيتكو , و الله هتبقى
قدمت أكبر خدمه لمصر , لأنك باختصار شديد انت و أمثالك عار عالبلد دي و عار على مؤيدي
عبد الفتاح السيسي , اه و عهد الله .
.................................................................................................................
Mohamed
Hussein
19
مارس 2018·
قوات خليفة الشواذ
احتلت مدينة عفرين السوريه و رفعت علمها فوق المدينه و علم الجيش الحر !! .
.
أعمال سلب و نهب
لممتلكات السوريين و العربيات و الأثاث ( يعني تخريب كامل ) , شوفو فيديوهات السيدات
و الاطفال و دموعهم و خوفهم و رعبهم و هما بيحاولو يهربو .
.
خرفان سوريا اللي
هما اعضاء جماعة الاخوان الإرهابيه رحبو بقوات الاحتلال العثماني بتاعة الأغا , زي
ما خرفان مصر مستنيين فرصه و يرحبو برضه ( بس هما و قوات خليفة الشواذ تحت بيادة كل
جندي مصري و تحت جزمة كل راجل و ست مصريه ) .
......................
اللي حصل في عفرين
ده اسمه ايه ؟
- اسمه احتلال
حضرتك ( ملوش اسم تاني )
.
و الجيش الحر ؟
- مفيش حاجه اسمها
جيش حر ولا فيه بلد في الكون بيكون لها جيشين , دول شوية خونه و مرتزقه و صيع , الشيطان
اللي عمل المؤامره و الطوفان بيلاعبك بالمصطلحات ( و قناة الخنزيره هي لسان الشيطان
) .
.
طب الارهاب اسمه
عنف متبادل و مفيش إرهاب ولا حاجه دي فزّاعه , و بنشتري سلاح ليه ؟ و هو جيش مصر كان
عمل ايه يعني في السنين اللي فاتت ؟
- اخرس يا كلب
.
..........................................................................................................
Mohamed
Hussein
19
مارس 2018·
الإنتخابات الروسيه
خلصت و بوتين فاز بيها طبعا , معرفش بوتين بيحكم روسيا من امتى فعليا لكن من كتير
, من عشرين سنه , أنا أوعى عالدنيا ألاقي فلاديمير بوتين ده في وشي , تداول السلطه
حد جميل أوي أخر حماده .
.
المهم ما علينا
, اللي عايز أقوله حاجه تانيه خالص , في الانتخابات الرئاسيه الروسيه مكانشي فيه منافس
حقيقي لبوتين , أه و عهد الله ما كان فيه منافس , يعني محسومه مسبقا , و فيه كلمه شهيره
قالها بوتين نفسه ( أنا مش دوري إني أخلق ليا منافس !! ) و في الانتخابات المصريه مفيش
منافس للسيسي , لا موسى مصطفى ولا حمدين ولا البرادعي ولا خالد علي ولا كل الزلنطحيه
, حتى لو عملنا انتخابات أشرف عليها فريق من الأنبياء و القديسين , برضه هتبقى انتخابات
محسومه عشان مفيش أي منافس بشعبية السيسي , و برضه السيسي مش دوره انه يخلق لنفسه منافس
و ينزل يلف عالقهاوي و الأحزاب و الحركات و الحبشتكانات و يقول لهم شوفو لنا منافس
والنبي , منافس لله يا ولاد الحلال , ألاقيش عندك منافس يا سعادة البيه ؟ ولا دور السيسي
إنه يعمل شعبيه لواحد تاني عشان يبقى المنافس بتاعه , و عشان ماتبقاش الإنتخابات محسومه
مسبقا .
.
قلت لكو الكلام
ده ينفع في لعبة ( الدومينو ) , لما تكون حريف أوي في اللعبه و اللي قدامك ميح تماما
فانت عشان تغريه للعب معاك تقوله خد لك 100 نقطه و الفوره من 101 !! , الكلام ده حلو
أوي في لعبة الدومينو , لكن مش في لعبة الرئاسه , ولّا حضرتك عايز السيسي مثلا ينزّل
عرض و offer قبل انتخابات الرئاسه لإغراء
المنافسين و يقول لهم خدو لكو 10 مليون صوت انتخابي هديه منّي و كملو عليهم أصوات حقيقيه
و لو فوزتو هقول لكو مبروك ؟! .
..........................................................................................................
Mohamed
Hussein
18
مارس 2018·
لقد كبرنا يا أمي
و بقينا نخرج من الكونفدراليه بتاعة الفرز التالت من دور ال 128 تقريبا ( 128 سماوي
) , و قدام فرقه اسمها مركز شباب ولاية مش عارف ايه كده .
.
لقد وقفنا على
ناصية الحلم لحد مارجلنا نمّلت من الوقفه و اللي رايح واللي جاي يلطش فينا .
.
حقاً إنك لن تضع
قدمك في ماية الطرشي مرتين
لا بصيص من النور
في نهاية النفق المظلم اللي اسمه مرتضى منصور , اه و عهد الله زي ما بقول لكو كده
.
...............................................................................................................
Mohamed
Hussein
18
مارس 2018·
ردُّو التحيه
.
لملايين المصريين
اللي عايشين جوه مصر , بعد اسبوع معادنا في انتخابات الرئاسه , لو حد فكّر إنه يكسل
و ماينزلش أو قال اللجنه بعيده شويه و المشوار هياخد نص ساعه عايز أقوله , إخواتنا
و أهلنا اللي عايشين بره و متغربين عشان لقمة العيش راحو السفارات و شاركو عشان خاطر
بلدهم , منهم اللي سافر 12 ساعه و منهم اللي سافر 1000 كيلو و اللي وقف في طابور ساعات
طويله في درجة حراره 15 تحت الصفر , و منهم المعاق و الكفيف و اللي عمره 93 سنه .
.
يوم 26 عايزينها
كارنفال و أغاني و احتفالات مش مجرد تصويت في انتخابات , المصريين في الخارج بعتو لنا
التحيه و الكوره دلوأتي في ملعبنا , فحيُّو بأحسن منها أو رُدّوها .
......................................................................................................
Mohamed
Hussein
17
مارس 2018·
الواد ابننا محمد
صلاح ربنا يحميه جاب جونين في واتفورد في الشوط الأول اللي لسه خلصان .
.
أول جون فيهم رقّص
دفاع واتفورد بالشمال و جاب الجون باليمين ( مع إنه أشول ) , و كوّم الدفاع , يعني
عمل بالظبط بالظبط زي اللي عمله المصريين في الخارج في انتخابات الرئاسه و الجون اللي
جابوه في الخرفان و قناة الخنزيره و الصيع و شمامين الكوله .
.
جماهير ليفربول
كالعاده سابت الماتش شغال و قعدت تغني الأغنيه اللي ألّّفتها لمحمد صلاح مخصوص و ترجّ
الملعب بصوتها ( مو صلاح زا ايجيبشن كينج ) , الواد ده لو شد حيله شويه كمان هيخلي
جماهير انجلترا تغنّي بالعربي في المدرجات ( بشرة خير ) و ( قالو ايه علينا دولا و
قالو ايه ) .
...........................................................................................................
Mohamed
Hussein
17
مارس 2018·
لا حول ولا قوة
إلا بالله
- خير حضرتك ,
حصل ايه ؟
.
مش ممكن اللي بيحصل
ده والله
- هو ايه اللي
بيحصل ؟
.
أرواح الناس بقت
رخيصه للدرجادي ؟ معقوله للدرجادي ؟
- حصل ايه حضرتك
, قول بسرعه .
.
كوبري يا سيدي
, كوبري مشاه لسه معمول من 5 ايام و وقع
- كوبري مشاه ؟
.
اه والله كوبري
مشاه , تخيل لما الدوله و المقاولين و الشركات مش عارفين يعملو كوبري للناس تمشي عليه
و احنا في القرن الواحد وعشرين ؟ عبد العاطي كفته في كل مكان .
- يانهار مش فايت
, و حصل ايه لما الكوبري وقع ؟
.
حصل كارثه طبعا
, 6 عالأقل ماتو غير المصابين .
- يا دي المصيبه
, يا فضيحتنا قدام الناس لما نكون مش عارفين نعمل كوبري مشاه .
.
متخيل حضرتك ان
الكوبري ده كان معمول عشان يربط الجامعه بسكن الطلاب ؟ حتى طلابنا مش عارفين نعمل لهم
كوبري .
- استغفر الله
العظيم , الواحد يخرّج عياله من التعليم ولا يعمل ايه في العيشه الهباب دي ؟
.
والله حاجه توجع
القلب , دانا قلبي موجوع من ساعة ماقريت الخبر .
- هو احنا هنشوف
خير أبدا , الفساد للركب و المحليات و المسئولين و كله مرتشي , و بلد بقت أضحوكه للعالم
, يارب هجره لأمريكا .
.
استنى يابني .
- استنى ايه ؟
هو فيه أنيل من كده ؟
.
يابني استنى .
- لا مش هستنى
, يسقط يسقط حكم الع...
.
ياض اخرس و اسمع
.
- اسمع ايه بقى
؟
.
كوبري المشاه اللي
ماكمّلش اسبوع و وقع و اتسبب في قتل 6 ده في فلوريدا يا جحش , عند مامتك أمريكا .
..........................................................................................................
Mohamed
Hussein
17
مارس 2018·
و بس يا سيدي
, صباح الخير الأول , بيقولك وزير الدفاع القطري يصرّح أن الجندي القطري أفضل جندي
في المنطقه !! , اه و عهد الله زي ما بقول لكو كده
.
واحد يسألني و
يقولي , هي قطر فيها جيش ؟
- أقوله أه ياخويا
فيها بتاع كام ألف كده عاملينهم جيش , عباره عن شوية سودانيين على تنزانيين على هنود
, و الشويه دول اسمهم جيش قطر , و الجيش ده له وزير دفاع و مش بعيد يكون له رئيس أركان
و قادة أفرع , يعني كل 17 جندي أفريقي أسيوي شرق أوروبي قطري يبقى اسمهم فرع ولهم قائد
فرع برتبة لوا مثلا , يطلع تنزاني بقى ولا موزمبيقي ؟ ياختي كده ينفع و كده ينفع (
بصوت العظيمه يسرا ) .
.
طب ايه علاقة الجيش
القطري بالقواعد العسكريه الأمريكيه و التركيه الموجوده في قطر بنت الوسخه ؟ والله
بيلعبو دور مهم جدا , دور حيوي و استراتيجي , شوفته في خبر قبل كده , بيتلم الجيش القطري
بقياداته و أركانه و يلمو الزباله من قاعدة العديد الأمريكيه أو يغسلو الهدوم بتاعة
جنود خليفة الشواذ .
.
أما عن انجازات
الجيش القطري الباسل و بطولاته فحدّث ولا حرج , بطولات ضاربه في عمق التاريخ و الجغرافيا
و حساب المثلثات والتدبير المنزلي , بطولات لا تخطئها عين ولا مناخير حتى .
.
يعني دلوأتي الجندي
القطري يبقى أفضل جندي في المنطقه ؟ أه طبعا , و لو ضغطت عليا شويه هقولك الجندي القطري
خير أجناد الأرض ( حتى اسألو يوسف القرضاوي ) , ماهي قاعدة بانجو و تطلب زي ما تطلب
بقى .
.
بص يا بني , الحكايه
دي عشان تفهمها كويس لازم تتخيل التالي , صرصار و جاب شريط ترامادول على شريط ليرولين
على ازازة توسيفان على قطرة بريزولين و معاهم 4 حبيات انتوسيد من بتوع الإسهال و كانزاية
بيبسي و ضربهم كلهم في الخلاط و ضاف لهم شويه من ماية الجوزه و ماية اللفت , و شرب
العصير ده و نام له ساعتين تلاته و صحي الصرصار من النوم مسك الحديده ( الميكروفون
) و عمل مؤتمر صحفي أعلن فيه إنه أقوى مخلوق في الغابه و إنه هيحتل الغابه كلها و يسودها
و هيستخدم أنيابه في افتراس حيوانات الغابه , و الحيوان اللي مش هينفع معاه الأنياب
هيضربه ضربه قاتله بالزلومه بتاعته .
.
و لما احد الصحفيين
سأل الصرصار انت هتعمل الكلام ده امتى يا طويل العمر ؟ فكّر الصرصار قليلا ثم قال للصحفي
, لما نخلص لم الزباله من القاعده الأمريكيه .
.............................................................................................................
Mohamed
Hussein
16
مارس 2018·
يابني أنا عارف
و الله إن منظر طوابير الشعب المصري قدام اللجان و أغانيهم الوطنيه و أعلام مصر و رقصهم
و الكارنفال ده بيجيب لك انهيار عصبي و تسلخات و كساح و شلل رباعي , انا عارف و الله
, و عشان انت غالي عندنا أوعدك المره الجايه في 2022 بإذن الله و احنا رايحين ننتخب
السيسي هنروح اللجنه بالحصان و المزمار البلدي .
...........................................................................................................
Mohamed
Hussein
.
16
مارس 2019·
عظيمات مصر يتقدمن
الصفوف
.
درس جديد من المصريين
لكل الصيع و العواطليه و أعداء بلدهم اللي برّه و اللي جوه , طوابير طويله جدا و إقبال
كثيف على انتخابات الرئاسه في الخارج , عائلات و أسر بتنزل , شايلين علم مصر و مشغلين
الأغاني الوطنيه ( نفس جو 30 يونيو ) , لا حد أجبرهم على النزول ولا حد أجبرهم يشيلو
علم بلدهم .
.
يابني دي مش انتخابات
ولا صناديق , ده السرادق اللي بناخد فيه العزا بتاع الشهيد منسي و الشهيد خالد مغربي
و كل زمايلهم الأبطال بعد ما خدنا تارهم , دي كلمة الشكر اللي بنقولها لكل أم شهيد
, القصه مش قصة رئيس ولا شخص اسمه عبد الفتاح السيسي , القصه قصة بلد و معركة مصير
و خيارات أمه عظيمة .
.
احنا شعب معجزه
بكل المقاييس , دايما نكسب الرهان , ولا عزاء للجزيره والخرفان و الصهاينه و الأتراك
و الأمريكان و الصيع أعضاء حزب ( خُلقنا لننسحب )
.
ممكن تراهننا على
أي حاجه و تكسبنا , راهننا على لقمة العيش أو حتى على هدومنا ممكن تكسب , بس ماتراهنش
على بلدنا عشان مستحيل هنخسر الرهان , دي معركه مابنخسرهاش أبدا , ماعندناش أصلا رفاهية
الخساره ولا رفاهية الإختيار , دي جينات يا مولانا , و فصيلة دم نوعها ( فرعوني قبطي
مسلم ) , و جدودنا أساميهم مستجله في الدفاتر و الورق قبل ما يبدأو كتابة التاريخ بيومين
.
...............................................................................................................
ليست هناك تعليقات:
إرسال تعليق