Mohamed
Hussein
18
مايو 2017·
مولانا
.
مولانا الشيخ فلان
الفلاني , المسيحيين كفار و هيروحو النار , حاضر حاضر , بس هدّي اعصابك شويه , اعمل
لك شاي ؟ خلاص عملنا كل حاجه في تعاليم الدين الاسلامي و بقينا كاملين المعاني و مقطعين
حصر الجامع و مش بنكدب ولا نسرق ولا نقتل ولا نغتاب و مش باقي غير التفكير في إننا
نكفّر غيرنا ؟ طب هقولك على حاجه حلوه , معاليك تحتفظ برأيك لنفسك , جوه بيتك وبس
, كويس ؟ و تصحى كل يوم تقول للحاجه أم مصطفى مراتك , المسيحيين كفار يا حاجه و هي
تقولك كفار يا خويا , المسيحيين هيروحو النار يا حاجه , و هي تقولك هيروحو جهنم الحمره
يا خويا , و اهو ترتاح شويه , و انت و الحاجه تستحملو بعض .
.
مولانا القسيس
فلان الفلاني , المسلمين كفار و هيروحو النار , حاضر حاضر , بس هدّي أعصابك شويه ,
اعمل لك شاي ؟ خلاص عملنا كل حاجه في تعاليم الدين المسيحي و بقينا كاملين المعاني
و مقطعين حصر الكنايس و مش بنكدب ولا نسرق ولا نقتل ولا نغتاب و مش باقي غير التفكير
في إننا نكفّر غيرنا ؟ طب هقولك على حاجه حلوه , معاليك تحتفظ برأيك لنفسك , جوه بيتك
و بس , كويس ؟ و تصحى كل يوم تقول للمقدسه أم مينا , المسلمين كفار يا مقدسه و هي تقولك
كفار يا خويا , المسلمين هيروحو النار يا مقدسه , و هي تقولك هيروحو جهنم الحمره يا
خويا , و اهو ترتاح شويه , و انت و المقدسه تستحملو بعض .
.
مولانا الشيخ
, مولانا القسيس , ماهو حاجه من اتنين , إما اننا نفهم يعني ايه وطن و يعني ايه مواطن
و يعني ايه مبدأ مواطنه , و يعني ايه حرية معتقد و يعني ايه أمن قومي و يعني ايه فتنه
طائفيه ؟ ده لو عايزين يبقى عندنا ديموقراطيه و حريه و تقدم و نعيش زي مخاليق ربنا
, يا إما نشتغل في الهبل ده و نقعد ليل و نهار نكفر بعض و نقطع هدوم بعض و لو وصل الأمر
ندبح بعض , و طبعا كل واحد فيكو هيكون معتقد إن ربنا سبحانه و تعالى و سيدنا محمد و
سيدنا المسيح فرحانين أوي باللي انتو بتهببوه .
.................................................................................................................
Mohamed
Hussein
18
مايو 2017·
الطفل المعجزه
عصام حجي : التفاعل على صفحة الفريق الرئاسي اللي احنا عاملينه 3 أضعاف التفاعل على
صفحه السيسي !! .
.
بس هو كده تمام
أوي , محدش يرص له تاني بقى , نعمل صفحه عالفيس و الصفحه تنتشر و تجيب فولورز كتير
من مصر و السودان وفلسطين و النمسا و بوركينا فاسو و الجزائر و مراجيح السبتيه , و
كل واحد يعمله 20 أكاونت و يدخل يتفاعل , نقوم نعتبر ان ده تقييم للشعبيه , و نجيب
كتاكيت عالفيس و تويتر و الكتاكيت تكبر و تبيض , و البيض يفقس و يجيب كتاكيت أكتر
, و نفضل كده على الفيس و تويتر نبيض و نفقس و نفقس و نبيض لحد ما يبقى عندنا أكبر
مزرعه كتاكيت افتراضيه في العالم , و بعدها نعمل استفتاء فيسبوكي بقى , و انجح انا
طبعا و ابقى رئيس جمهورية الكتاكيت الفيسبوكيه و الفراخ البيّاضه .
.
عزيزي الطفل المعجزه
عصام حجي , عارف انت البنات دول اللي بيشتغلو في المحن ( بالطريقه الإسلاميه ) ؟ اللي
هي البت تكون محجبه ماشاء الله تبارك الله و تقوم منزله صورتها و هي عامله بوز بطه
( أو بوز معزه ) و تقول أنا سحلانه عشان محدش بيصلي على سيدنا النبي , أه سحلانه عشان
بتتدلع و كده , أهي المعزه دي ممكن تاخد 2 مليون لايك و 5 مليون شير و 7 ميلون بوسه
و 12 مليون رساله في الاينبوكس .
.
بلاش خالص , تاهت
و لقيناها , تخيل مثلا لو كيم كارديشان عملت صفحه باسم ( مؤخرة كيم ) و نزلت صوره بس
كل يوم , عارف هيحصل ايه ؟ كام دشيليون لايك ؟ بتعرف تعد لحد كام ؟ يبقى بالمنطق بتاعك
اللي هو منطق ثورة الطماطم و احنا بنشتري سلاح ليه , بالمنطق ده لو كيم كارديشان أعلنت
ترشحها للرئاسه في مصر هتفوز باكتساح , انا ذات نفسي ممكن وقتها أعيد نظر في انتخابي
للسيسي , و اهو كيم تاخد فرصتها برضه , و تبقى أول رئيس مدني منتخب و مقلوظ .
.
عزيزي الطفل المعجزه
عصام حجي , الفيس بوك و تويتر حماده و الشارع حماده تاني خالص , هات ايدك كده , و شبكة
العشره دول , لو نزلت الشارع في مصر و قابلت ألف بني أدم على كل شكل و لون و سألتهم
تعرفو ايه عن عصام حجي ؟ هتلاقي 999 واحد منهم بيقولو لك اه طبعا نعرفه , ده الباك
الشمال بتاع الزمالك في التسعينات .
.......................................................................................................................
Mohamed
Hussein
17
مايو 2017·
مابحبش السيسي
قد ما بحب البلد اللي هو حارسها و حاميها .
.
لما بلعن جدود
أبو الكولجيه , ببقى عايزهم يفوقو , يعرفو يعني ايه وطن , يفهمو ان خيانة الأوطان مش
وجهة نظر ولا منهج فكري , مش بلعن جدود أبوهم عشان هما بيشتمو السيسي .
.
لما بلعن جدود
أبو الخرفان , ببقى عايزهم يتحرقو بجاز لأنهم تنظيم صهيوني إرهابي بيمثل الخطر الأكبر
على مستقبل مصر ( على مستقبل مصر مش على مستقبل السيسي ) , مفيش خطر أكبر على بلدك
من وجود تنظيم دولي جواه , تنظيم يكفر بمعنى و مصطلح الوطن , تنظيم ولاؤه و انتماؤه
مش للبلد اللي هو عايش فيها , تنظيم بتستخدمه أمريكا و بريطانيا ك (ورقة حرق ) في وقت
المؤامره , و بتستخدمه ك ( ورقة ضغط ) في وقت السلم .
.
لما لعنت جدود
أبو البرادعي مكانشي عشان السيسي , البرادعي خاين و كلب و لبّس البلد في الحيطه ( لبّس
البلد مش السيسي ) , وقتها مكانشي السيسي رئيس مصر على فكره , لعنت جدود أبوالبرادعي
عشان ناصب على شوية شباب و مشوه عقولهم و مفهمهم ان الإرهاب اسمه عنف متبادل , وان
الإرهابيين في مصر اسمهم فصيل وطني ولازم نحتويه , أتحدى البرادعي و ابراهيم عيسى و
كل شلة الزلنطحيه اللي حواليه انه يترجم الكلمتين الهبل بتوعه بالانجليزي , او يقولهم
على حادث ارهابي يحصل في فرنسا مثلا , كان زمانه بالحرف الواحد ( بيتن** ) .
.
عبد الفتاح السيسي
بالنسبالي هو الحارس الأمين اللي سلّمناه مفتاح البيت , و حافظ عليه و بيحافظ و هيحافظ
, مشكلتي و قضيتي و حبي و عشقي و هيامي هو للبيت مش للحارس .
.
قبلت الأزمه الاقتصاديه
و ارتفاع الأسعار , بنتحمل و بناكل قش , عشان بس عارفين ان الوضع صعب وله أسباب كتير
و إن الحارس و رجالته اجتهدو على قد ما يقدرو , و يفضل الحد الفاصل بيني كمواطن و بين
السيسي كرئيس إنه مايبقاش خاين , مايخونشي الأمانه دي , ماتسقطشي عنه صفة الحارس الأمين
.
.
الراجل بقى اللي
رفض التصالح مع الجماعه الارهابيه رغم كل الضغوط البشعه , و اللي رفض التضحيه بجنود
مصر في حروب خارجيه مقابل دولارات قد كده , ده حارس أمين , لا خان و لا هيخون .
.
عرفتو الحدوته
كلها ؟ و ليه بندافع بشراسه أوي كده ؟ الحدوته في كلمتين , قضيتنا اسمها بهية مش عبد
الفتاح السيسي .
........................................................................................................................
Mohamed
Hussein
17
مايو 2017·
هتلر و هولاكو
و أبو لهب و دراكولا و ريا و سكينه لو كانو عايشين حاليا و شافو قطعان الأغنام و هي
بتتساق من أي حد , كانو خدو فرصتهم هما كمان و عملو تحالف مع الدول الإسلاميه لحماية
الخطاب الإسلامي و الموروث الإسلامي و الزي الإسلامي و القلقاس الإسلامي من العفريت
الشرير اللي بيطلع بالليل و ياكل دراع العيال الصغيره , التحالف تحت شعار ( إمشي يا
حفريت ) .
.........................................................................................................................
Mohamed
Hussein
17
مايو 2017·
هيا بنا نحلب البقره
, و بالمره نخرب الوطن العربي !! .
.
الحكايه سهله خالص
, صلو بينا عالنبي
- ترامب جاي السعوديه
, حلو ؟ حيلو ( بصوت عادل امام ) .
- هيقول خطاب عن
رؤيه سلميه للإسلام , اه و عهد الله هيقول و مش بعيد يبدأ الخطاب ب ( السلام عليكم
) واحنا نفرح أوي كالعاده .
- طب غرض الخطاب
ايه ؟ قالك الغرض انه يجمع الدول الإسلاميه مع أمريكا ضد أعداء الحضاره المشتركين
, أه و عهد الله برضه .
- طب مع أمريكا
دي بتعني ضمنا ( مع بريطانيا و اسرائيل ) , دي معروفه زي سلامو عليكو عليكو السلام
.
- يعني الدول الإسلاميه
تتحالف مع أمريكا و بريطانيا و اسرائيل عشان تواجه أعداء الحضاره !! , اللي هما مين
بقى أعداء الحضاره ؟ اللي هما داعش ؟ , داعش دي اللي هي بنت أمريكا أصلا ؟, و لّا جايز
يقصد بأعداء الحضاره إيران و حزب الله و عصابة الولاويله الحمره و الأستاذ محمود المليجي
؟!
.
- طب هي ايران
بتمثل تهديد للعالم الإسلامي و الدول الإسلاميه و كده ؟
شوف يابه الحاج
, مشكلتي اني مش بعرف أشوف المشهد العبثي ده إلا من خلال سكريبت صغير , فيه 3 مشاهد
ورا بعض كداهو :
1- وزير دفاع إيران
يطلع بتصريح ناري يهدد بيه دول الخليج ( حصل من كام يوم )
2 - ترامب ييجي
السعوديه و يعبّي زكايب فلوس .
3- يمشي ترامب
يرجع بلدهم و نبص حوالينا مانلاقيش دولتين تلاته من دول الوطن العربي .
............ ستوب
, كت , هايل يا أستاذ .
.
مشاهد مكرره حتى
الملل , و في المشاهد دي , هنلاقي حقيقه واحده , واضحه زي الشمس , حقيقه بتقول إنه
في أخر 20 سنه ضاعت العراق و سوريا و ليبيا و اليمن , والمدينتين الوحيدتين في المنطقه
اللي مانضربش عليهم رصاصه أو طرطشو عليهم بشوية مايه هما طهران و تل أبيب !! , و نقطه
يعني فلستوب .
.
مابعرفشي أشوف
المشهد إلا مشهد عرايس بتحركها أمريكا وبريطانيا و اسرائيل , ولا استبعد أبدا إنه تكون
إيران بتاخد شويه من اللبن اللي بتحلبه أمريكا و بريطانيا من البقره ( يعني أبو قسم
) .
.
اطلع ياض انت قول
تصريح ناري يهدد أمن الخليج , و انا أروح أقولهم جاي احميكو من السلعوه ( اللي هي انت
) , واخد فلوس كتير و اعمل قواعد عسكريه , و نخرب لنا كام دوله عربيه , و عمولتك محفوظه
طبعا .
.
المسرحيه الهزليه
دي مش هتنتهي إلا بطريقتين , إما بحرق كل دول الوطن العربي ( بما فيها البقره ) و ده
السيناريو اللي ماشي حاليا , أو باننا نلحق نفسنا , إزاي بقى ؟ باستبعاد و تحييد سبب
وجود الأمريكان و البريطانيين و الصهاينه وسطينا و على أراضينا , اللي هي ال !! .
.
استبعاد و تحييد
ال !! بيعني عمل تحالف عربي غير خليجي فورا , بس الموضوع ده صعب جدا , لأن الدول اللي
كانت تفيد في تحالف زي كده اغلبها سقط ( و بالعافيه بيلم أشلاؤه ) و بقية الدول بيسيطر
عليها الأبقار اقتصاديا , يعني متباعه بالفلوس .
.
هي دي الصوره من
غير تجميل , و مصر عمود الخيمه الوحيد اللي لسه واقف على رجليه , هل هنقدر بقى ننقذ
المنطقه من خطة الصهاينه و من جنون البقر ؟ و لّا فلوس الجاز الكتير مع شوية خونه
( و بهايم ) وسطينا هيقفو كالعاده زي اللقمه في الزور ؟ و نبص حوالينا فجأه نلاقي نفسنا
بقينا 56734 دوله في جامعه الدول العربيه اللي هيكون مقرها الدوحه أو تل أبيب ؟!
.....................................................................................................................
Mohamed
Hussein
16
مايو 2017·
لما كانت طابونه
.
رجال الأعمال و
الاعلاميين و المشاهير كانو بياخدو أراضي الدوله وضع يد ( أو بتراب الفلوس ) بالكذا
ألف فدان للشخص الواحد , مش كذا فدان , كذا ألف فدان , حاجه كده شبه اللي كان بيعملها
اسم الله على جمال أمه الملك فاروق على محاسيبه و شله الصيع بتاعته , مكانشي ناقصهم
والله غير لقب البشويه !! , و اللي بيعمله السيسي حاليا زي اللي عمله عبد الناصر من
60 سنه .
انا مع الراجل
ده لأخر الخط , حتى لو هاكل قش , يكفي إنه نضيف مش فاسد ولا مفسد , و بيحارب الأوساخ
في كل مكان .
............................................................................................................................
Mohamed
Hussein
16
مايو 2017·
محبة الناس دي
بقى أكبر نعمه ممكن ربنا ينعم بيها على عبده , و الغاليه الله يرحمها كان لها دعوه
كده زي لازمه على لسانها ( ربنا يحبب فيك خلقه ) .
.
قوم الواحد كل
شويه يتكعبل بناس عالفيس و في الواقع , و يلاقي المحبه دي موجوده , أتاري ان حتى عدد
اللي بيقرا بوستاتي أكبر بكتير من الأعداد اللي بتبان في التفاعل , و الناس تبقى فاكرالي
حاجات و بوستات و تشبيهات و أحيانا فكره أو تفنيده و يتكلمو وهما مبتسمين .
.
على كل شكل و لون
, الفقير و الغني , العامل و الموظف و الدكتور و اللوا و استاذ الجامعه و الصنايعي
, فرحانين و بيضحكو , أصلا الضحكه و الابتسامه في أغلب الأحيان بيكونو غايه أو هدف
, يابني أنا مش عميق ولا نيله , بالعكس , دانا حتى عندي حساسيه من الناس اللي بتعيش
في دور ( حماده العميق ) , وبفضل أهرش طول الليل بسبب مولانا حماده العميق ده .
.
النهارده تحديدا
شرفت و تشرفت و سعدت جدا بأصغر صديقه بتقرالي عالفيس , الأنسه الشرقاويه روان وائل
, 11 سنه , بنت الشاعره و الصديقه الرائعه صفاء محمد , روان أطلقت عليا اسم أو لقب
, لما بتقرا بوستاتي تقول لمامتها , ده الفلاح الدكتور المثقف , على فكره يا روان
, انا برضه عندي حساسيه من كلمة مثقف و من كلمة دكتور , احذفي كلمتين بقى من اللقب
و خلّي التالته , الفلاح .
..............................................................................................................
Mohamed
Hussein
16
مايو 2017·
فيسبوكيات
.
تمشي في التايم
لاين ساعة عصاري تلاقي بوست عاجبك تقوم عامل لايك , بعد فيمتو ثانيه تلاقي صاحب البوست
داخل عندك و عامل لايك برضه , ..............أيوه عارف الحكايه دي , اسمها عندنا في
الفلاحين ( الزمال ) , يعني تروح تساعد جارك في ضم الرز ييجي يساعدك في جمع القطن
, او تنقطه في فرح بنته و ينقطك في نجاح ابنك في الثانويه , الكراسه الصفره بتاعة اللمبي
.
.
صديقه تبعت لك
طلب صداقه و أول حاجه تشوفها في صفحتها بالبنط العريض هي جملة : الشات ممنوع احتراما
لعيلتي و خالتي و رئيس المجلس المحلي بتاع بلدنا , و أول ماتقبل طلب الصداقه تلاقيها
باعته 17 رساله و ورد و تورتات و حلل محشي , ........ مممممم هو الشات ممنوع بس مش
ممنوع أوي يعني .
.
الصديق ( الأسد
الشرس ) اتعود كل مايفتح الفيس يعمل نكز للصديقه ( قلب خسايه ) , النكز هنا يعني انتي
فين ؟ ابعت رساله ولا ايه ؟
قلب خسايه ترد
عالأسد الشرس بنكزايه , يعني لا استنى , امي قاعده جنبي ولازقه فيا , استنى شويه لحد
ماتقوم تنشر الغسيل , اه ده سيم بينهم بقى , بيلمو بعض بيه من عالقهاوي ( سانتنتانضانو
).
.
صديقه ( مزه )
تكتب بوست على صفحتها ,( مش معقول كده صحيت من النوم و عطست عطستين , شكلي داخله على
دور برد و مش هروح درس الزومبا , كده كتير أوي , تو ماتش بصراحه ) و يدخل صديق يعلق
عالبوست : ( ألف مليون لابأس عليكي , يارب اللي يكرهوكي هما اللي يعطسو و يموتو , انتي
محسوده على فكره , بس ان شاء الله هتبقى كويسه و هيطلع الموضوع بسيط , لو محتاجه نقل
دم أنا جاهز ) .............. ممممممممم حد يناولني فردة شبشب يا جدعان .
.
صديق من الفولورز
يبعت لي رساله في عيد ميلادي , أرد عليه ( و انت طيب و كل حبايبك بخير و سعاده ) ,
يقوم باعت بعدها قلب و ورده و إيموشن فيس مكسوف و إيموشن عين بتغمز !!
............ و بعدين بقى ؟ أنا مش مرتاح لك ياض انت , شكلك كده من العيال اللي لما
بتركب المترو بتختار دايما العربيات الزحمه أوي .
.
صديق غلبان زي
حالاتي , عاش طفولته و أغلب حياته تحت خط الفقر بتسع خطوط , يدخل عالفيس يكتب ( أووووف
التكييف مش مبرد أوي و طعم النسكافيه متغير , رايحه بينا على فين يا مااااسر ؟! )
............ الله يرحم أبوك , أول مره يسمع فيها كلمة برجر كينج كان فاكر ده اسم رئيس
أمريكا في التسعينات .
........................................................................................................................
Mohamed
Hussein
16
مايو 2017·
الملك سلمان :
زيارة ترامب للمملكه تسهم في مواجهة الإرهاب !! .
.
على يدي , ترامب
هيبقى قاعد عالكرسي ده و سلمان عالكرسي ده , سلمان يقول لترامب الإرهاب ده شئ خايس
و ما عنده سلفا يا مستر بريزدنت , و ترامب يقول لسلمان , اوف كورس , تيروريزم إذ باد
ثينج , وي هيت تيروريزم يا طويل العمر .
.
إبليس بقى هيبقى
قاعد عالأرض , في النص بالظبط , بين رجلين طويل العمر و رجلين مستر بريزدنت , يلفّ
سجاير بانجو و يشرب , و يلف و يشرب , و يهرش في شعره و قرونه , عشان يعرف يستوعب الموقف
, و بعد ما ابليس يشرب له بتاع 17 سيجاره هيبص لترامب و يضحك و يبص لسلمان و يضحك برضه
, ستوب , كت , هايل يا فنان .
على فكره , اللي
صنع الإرهاب في المنطقه و اللي موله و دعمه معروفين بالإسم , و مفيش داعي للإنكار
, هما الأستاذ شريف مدكور و الأستاذ كمال أبو ريه و الأستاذه نيرمين الفقي .
.................................................................................................................
Mohamed
Hussein
15
مايو 2017·
أنا كنت بنزل السوق
في 2015 و في جيبي 20 جنيه عشان اشتري طلبات الاسبوع , اجيب الخضار و الفاكهه و الخيار
و البرقوق و الرز و المكرونه و الزيت و السمنه و الفراخ و اللحمه والسمك البلطي الشبار
الكبير ده , و يتبقى معايا 12 جنيه أقوم شاري بيهم عربيه مرسيدس زيرو وانا راجع ( ملعون
أبو القرش اللي ما ينزّه صاحبه ) , و مراتي اول مادخل من باب البيت تقولي فين ال
12 جنيه الباقيين ؟ , أقولها بصي من البلكونه كده يا حبيبتي , شايفه المرسيدس اللي
راكنه تحت الشجره و بتبرق ؟ ايه رأيك في المفاجأه دي بقى ؟ .
.......................................................................................................................
Mohamed
Hussein
15
مايو 2017·
فريق الإنسحاب
من الانتخابات الرئاسيه !!
.
عصام حجي عايز
ضمانات , أه والله عايز بتاع 17 ضمانه , و صيانه شامله و خدمه ما بعد البيع , طب تمام
, و من ضمن الضمانات مراقبة جهات أمريكيه و أوروبيه للانتخابات , يعني ييجي عصام حجي
بفريقه من أمريكا و يجيب معاه فريق تاني من أمريكا برضه ( يراقب الأوضاع عن كثب )
, الفريق التاني ده أصلا معروف انه بييجي و تقريره معاه جاهز و متستف , زي تقارير الجزيره
كده , ماهو مش معقول تكون لسه حمار و مش عارف ان الجزيره عندها تقارير جاهزه حاليا
بتؤكد تزوير الإنتخابات الرئاسيه في مصر 2018 !! , و مداخلات و فيديوهات و شهادة شهود
و ورق تصويت مرمي في الشارع , يا بني فوق بقى , الحموريه عمرها ماكانت وجهة نظر ولا
منهج فكري .
.
طب مولانا الطفل
المعجزه بتاع ثورة الطماطم عصام حجي هيعمل ايه ؟ هقولكو الإجابه أهو , و من الكنترول
, يعني قبل الانتخابات بسنه , عصام حجي هيقضيها هرتله الفتره الجايه و ييجي قبل الإنتخابات
بكام يوم يعمل مؤتمر صحفي و يجيب الجزيره و البي بي سي و السي إن إن و كل القنوات اللي
بتبيع سبح دي و يعلن انسحابه من العمليه الانتخابيه الهزليه الفاشيه اللي بتحصل في
مصر و مش بعيد يقول انه اتعرض للتحرش و الاغتصاب من أجهزة الأمن , اه داحنا جامدين
أوي , نبقى قاعدين هنا في مدينة نصر و نغتصب الأطفال المعجزه اللي في مدينة شيكاغو
, ده فيلم اتهرس ألف مره يا جحش , من أول ما ظهرت الأحزاب ماركة ( خُلقنا لننسحب )
, الدستور و التيار الشعبي و حماده بالجنزبيل .
.
عزيزي الشاب الكولجي
الكيوت , اللي لسه ماوصلتش لقعر علبة الكوله , نداء أخير , يا بني اركب معنا , صوتي
اتنبح والله , لو عايز سياسه و عايز تشارك في حكم مصر , اعمل حزب حقيقي , وانسى تماثيل
العجوه اللي انت ماشي وراهم , كلهم متباعين بيع و شرا , انت بالنسبالهم زبون بيلعبو
بيه مش اكتر, وبيقبضو عليه ( فلوس و شهره وهميه ) , اعملو حزب و اختارو قيادات شبابيه
منكو , و انزلو الشارع و اكسبو شعبيه حقيقيه , عندك انتخابات رئاسيه بعد سنه و انتخابات
برلمانيه بعدها بسنتين , مش ضروري تفوزو في أول مره , لما تاخد 10 % في انتخابات الرئاسه
تبقو كيان له احترامه و يتعمله حساب , لما تاخد 15 % في البرلمان هيبقى صوتكو مؤثر
, و تكملو , في الشارع مش على تويتر , مش عايزين و مش حابين و متسنجفين كده ؟ طب وماله
, انا كمان مبسوط كده , مرتاح كده , خلّينا نتسلى , انزل بقى بهاشتاج و انا أرد عليك
بهاشتاج , و تبقى حضرتك رئيس جمهورية تويتر و انا أقولك : هاشتجنا و بشتجنا ياريس
, دانت رئيس في الكوله كويس .
.........................................................................................................................
Mohamed
Hussein
14
مايو 2017·
التجربه المصريه
.............. حلم حياتي
.
الغرب متقدم عننا
بكتير , بس انا مش منبهر أوي بالغرب , عايز حاجات منهم , بحث علمي , فكرة العمل الجماعي
, ازاي تتعامل مع باحث أو مع فكره ؟ بالتشجيع مش بتكسير المقاديف , عايز منهم نظام
و شوية تكنولوجيا و هدوء في التعامل , و بس كده .
.
مش منبهر الحقيقه
بفكرة الديموقراطيه الغربيه و اعتقد انها علبه قطيفه شكلها شيك , بس فاضيه من جوه
, ولا تدار الدول الكبرى بمفهوم الديموقراطيه اللي واصل لنا , مفهومنا عن الديموقراطيه
اللي هي الرحرحه في الهواء الطلق دي و انك تسيب مستقبل دولتك و أمنها القومي لصندوق
ده مفهوم بلح .
.
مش منبهر الحقيقه
بفكرة ان الشعوب الغربيه شعوب متحضره , و التحضر اللي اعرفه مش انك ترمي الورقه في
الباسكت و تبدأ كلامك ببليز , المواطن الأمريكي و البريطاني و الفرنسي و كل مواطني
الدول الإستعماريه بشكلها القديم و الحديث هو مواطن عارف كويس جدا , ان جزء كبير من
مرتبه و من مرافقه و من انفاق حكومته جاي بشكل مباشر أو غير مباشر من قتل ملايين البني
أدمين في مكان أخر في العالم , إما بتأجيج حروب أو ببيع سلاح أو حتى بهجوم مباشر و
نهب ثروات الشعوب دي , يبقى متحضر ازاي ؟ .
.
الأزهر الشريف
محتاج شغل كتير من جواه , و تعديل مناهج و تغيير خطاب ديني بما يتفق مع فكرة الدوله
و المواطنه , انما دفاعي عن الكيان هو إدراك ان الفراغ اللي هيخلّفه غياب الأزهر الشريف
هو فراغ كارثي , اتمنى نوصل لمرحلة تأهيل الخطباء بشكل محترم , الخطيب يطلع بكارنيه
عالمنبر زي الدكتور .
.
اتأثرنا شويه بالفكر
الوهابي و ( حدْف الشرق ) , كانت مرحله وراحت لحالها , لعبو على وتر الدين , و استغلو
طيبه الناس ( و جهلهم ), شويه خرافات على خزعبلات على شحتفه , شكرا يا مولانا مش عايزين
.
.
التاريخ لأي دوله
في العالم هو الحيطه اللي بتسند ضهرك عليها عشان تعرف تبني , لو معندكشي تاريخ بيخترعو
لك تاريخ , بيخترعو لك أبطال ( حتى لو من قصص وهميه ) , فاحنا في مصر معندناش أكبر
من كتاب التاريخ , صح ممكن تكون فيه أحداث و شخصيات تاريخيه بندرسها و نتعلمها بشكل
فيه مبالغه و أفوره , انما الحقيقه بتقول إن كل اللي بيقول انا غرضى نعرف التاريخ الحقيقي
هو كداب , و غرضه تشويه التاريخ , صبيانه و ألاضيشه بيحبو كده كمان , هبسّطهالك , لو
لقيت كتاب تاريخ بيقول ان شجرة الدر عملت كذا و كذا و أخفت كذا عشان كذا , هيكون رد
فعل صاحبنا سريع جدا ( كدااااااااااابين و الكلام ده محصلش ) , طب قوله غمض عينك كده
, شجرة الدر دي كانت بنت تيت و خاينه و عاهره و شاذه , هيقولك بسرعه جدا برضه ( أيووووووه
هو ده التاريخ المظبوط ) !! .
.
عاداتنا و تقاليدنا
و مفرداتنا و لغتنا و أكلاتنا و جيناتنا اللي اتشكلت في مئات و ألاف السنين مش حاجه
نتكسف منها , مش بنبهر بمعاليك لما أحسك رافض للعادات دي ( و غربي أكتر من الغرب نفسهم
أو شرقي أكتر من طال عمره ) , مش بنبهر بحضرتك يا مدام لما يبقى تلتين كلامك انجليزي
( أو يا حاج لما تقول هنسوي و نسولف ) , كما لو كانت لهجتنا المصريه دي لقيطه و لاقينها
في الشارع .
.
بحلم بتجربه مصريه
بحته و خاصه جدا , ناخد فيها اللي محتاجينه بس من غيرنا , و نركن ضهرنا على كتاب التاريخ
و نبني بلد بأدواتنا و مفرداتنا , زي ما بنينا الأهرامات , يا ترى جدودنا اللي بنو
الأهرامات و عملو أعظم حضاره في التاريخ كانو بيقلّدو مين ؟ كانو متأثرين أوي بأنهي
تجربه ؟ .
.........................................................................................................................
Mohamed
Hussein
14
مايو 2017·
السيسي بيعمل تنميه
حقيقيه في الصعيد و في سينا , اللي هي المناطق اللي أهملها تماما مبارك , تنمية الصعيد
و سينا مش بس مشاريع و استثمار و فرص عمل , إنما كمان بتبقى حائط صد ضد الإرهاب و ضد
الجريمه بصفه عامه , يعني تنميتهم أمن قومي .
.
و لما جت سيرة
أراضي الدوله اللي اتاخدت وضع يد , قال بنشجع الاستثمار أه انما احنا في دوله مش في
طابونه , يعني الاستثمار ده له أبواب تخبط عليها عشان تدخل , مش بطريقة ( إنّا أسفهناكم
) , و بالتالي كلّف الجيش و الشرطه بسحب الأراضي اللي اتاخدت وضع يد في خلال اسبوعين
, أه الجيش يا لوسي , الجيش اللي بيحمي الحدود و بيقوم بمهامه الرئيسيه و بيحارب الإرهاب
و بيعمل مشاريع عملاقه و بيشارك في توفير السلع الرئيسيه , طلبنا منه كمان يساعد الشرطه
في سحب أراضي الدوله .
.
مانا قلت لحضراتكو
قبل كده , أتحدى أي واحد دلوأتي أو بعد 10 سنين يقولي مين هما البارتيته بتوع السيسي
؟ مين هما ألاضيشه و محاسيبه و صبيانه اللي بيسيبهم ينهبو في مال الشعب و في ممتلكات
الدوله ؟ , مين في مصر و ابن مين اللي فوق دولة القانون حاليا ؟ السيسي ملوش بارتيته
ولا هيكون له حتى لو فضل يحكم مصر 50 سنه
........................................................................................................................
Mohamed
Hussein
14
مايو 2017·
بص يا حبيبي
- نعم
.
احنا عايزين وفود
أمنيه تبقى موجوده في مطاراتكو اللي السياح بتوعنا بييجو عن طريقها .
- تمام , و ايه
كمان ؟
.
و عايزين نبقى
نيجي نعمل تفتيش دوري عندكو , كل يوم تلات كده
- تمام , و ايه
كمان ؟
.
و نعمل قاعده عسكريه
عندكو
- و ايه كمان ؟
.
و حقول الغاز بتاعة
البحر المتوسط , نطلع منها بأي مصلحه برضه
- خلصت طلباتك
؟
.
أه خلاص
- واحنا مش موافقين
.
ليه مش موافقين
؟ احنا سياحنا كتير أوي و انتو محتاجين فلوس و بتكحو تراب ؟
- طب بص .
.
بصيت أهو
- عارف الراجل
اللي اسمه باراك أوباما ؟
.
أه عارفه , رئيس
أمريكا السابق , ماله ده ؟
- عارف صرف كام
من يونيو 2013 و عمل ايه عشان يحاول يكسرنا ؟ عارف انه كان باقي له تكه و يطلع عالهوا
لابس تي شيرت عليه شعار رابعه ؟
.
أه عارف طبعا
.
- طب تمام , عارف
السعوديه كان ممكن تدفع لنا كام لو شاركنا في حدوتة سوريا أو اليمن ؟
.
أه عارف طبعا
- طب لما انت عارف
, بتوجع دماغك و دماغنا ليه ؟
...............................................................................................................
Mohamed
Hussein
13
مايو 2017·
صديقه مصريه عزيزه
, مقيمه في كندا و معاها الجنسيه , بتشتغل مخطط استراتيجي في الحكومه الكنديه , لما
شافت مؤتمر الشباب الأخير و شافت و سمعت السيسي و هو بيطلب من الشباب يعملو فريق عشان
ماعرفش ايه كده , كانت هتتجنن , قالت ده مجال شغلي , طب عايزه اساعد بقى , لازم اساعد
بحاجه ( على قدي ) و من يوميها و هي بتحاول تتواصل , مع الرئاسه و مع الشباب , تدور
على ايميلات , قالت هتحمل كل حاجه بما فيه تذكره سفري , مش عايزه فلوس , مايلزمنيش
, ولا عايزه منصب , عايزه احس اني عملت حاجه لبلدنا .
.
لو حضرتك بقى عايز
تهاجر لكندا مثلا , فانت حاله من اتنين , إما بتدوّر على فرصه عمل احسن و دخل أفضل
و حياه أفضل و ده مش عيب طبعا , مش مستحمل الظروف شويه ؟, برضه مش عيب , سافر و هاجر
و ربنا يكتب لك السلامه و يرجعك بلدك بألف سلامه .
.
أو تكون عايز تهاجر
عشان كاره مصر , و ناوي بإذن واحد أحد تشوف لك اي جريده او قناه او مركز حقوقي هناك
و بتدور على أي فرصه تهين بيها بلدك و اسم بلدك ؟ يعني تبقى نسخه مكرره من الخرفان
و الكولجيه اللي بيهاجرو و تشتغل لامؤاخذه و تبقى امك عارفه ؟ يبقى غور في ستين مليون
داهيه تاخدك انت و اللي خلفوك , فيه مصريين كتير أوي هتقابلهم هناك , جزمتهم برقبتك
, عاشقين بلدهم و بيكحلو عنيهم بشويه من ترابها .
.......................................................................................................................
Mohamed
Hussein
13
مايو 2017·
مرحلة اختلال التوازن
...... imbalance
.
هو ايه اللي بيحصل
في عقولنا بالظبط ؟ اللي بيحصل اننا في مرحلة عدم اتزان عقلي و نفسي , سببها ايه ؟
سببها الهري و الفرهده اللي شغالين من 6 سنين بشكل متواصل من غير اجازات ولا ويك إند
, سببها الفرهده و الشيل و الحط و الأخبار المضروبه و افتكاسه تيجي ورا افتكاسه و موجه
تجري و را الموجه و احنا مش ملاحقين , كله على دماغنا أو في دماغنا , لحد ما بقينا
ماشيين في الدنيا ( و في الفيس ) زي السكرانين , هل رأي الكونُ سُكارى مثلنا ؟! .
.
عدم الاتزان شغلنا
و شدنا لبحر رمال متحركه , التفاصيل و الديتيلز , مواضيع بتتفتح فجأه و نبدأ الهري
فجأه , نختلف في شكل الزراير و في تفصيلة البدله , حتى لو كنا قدام جلابيه مش بدله
, و في الوقت اللي احنا فيه مشغولين بالتفصيل و الزراير و بناخد المقاسات ( بتاعة البدله
) فيه غيرنا بيحرق البيت , هو سعيد أوي بانهماكنا في اختلافنا و تقطيعنا في بعض في
موضوع البدله اللي هو مش بدله , و أحيانا كتير بيرمي لنا الموضوع اللي نهري فيه , يرمي
الطعم بس , و يقول لنا بصوت ستيفان روستي ( اشتغل يا حبيبي اشتغل ) , أو على طريقه
الراجل الحرامي اللي كان في فيلم جاءنا البيان التالي , لما قال رجالة الاسعاف بيقومو
بشغلهم و رجالة الشرطه بيقومو بشغلهم , و رجالتنا احنا كمان بيقومو بشغلهم !! .
.
تعالو نقطّع هدوم
بعض بين مؤيد و معارض لصلاح الدين و عبد الناصر , تعالو نقطع هدوم بعض مسلمين و مسيحيين
, تعالو نقطع هدوم بعض في يساري و يميني و علماني و منفلوطي و عفريت أزرق , من شوية
صديقه بس جابت سيرة الريف و الفلاحين اللي بييجو المدينه و يبهدلوها و حيث اني واحد
من الناس دي كنت هكتب عريظه قد كده , يا طولها يا عرضها , و نقطع هدوم بعض بقى فلاحين
و حضر , بس لحقت نفسي .
.
التوقيت خطير يا
أساتذه و طوبى لمن ترك المراء و لو كان محقا , و عايز أقولكو كام حاجه , هما مش اختراع
منّي
- أحد أدوات (
و أسلحه ) الخراب في سوريا و اليمن , كانو كلمتين اتنين تم ترويجهم مش اكتر , اسمهم
( سنّه و شيعه ) .
.
- أمريكا ملهاش
تاريخ يُذكر , و تاريخها كله دموي استعماري , عدد اللي اتسببت أمريكا في قتلهم في كوكب
الأرض عشرات الملايين , يعني مفيش رئيس أمريكي إلا و إيديه غرقانه في الدم , يا ترى
الأمريكان بيكتبو تاريخهم ازاي؟ بيكتبوه بالدم ؟
.
- الأصل و الحل
و الإجابه و التخلص من حالتنا يكمن في كلمتين , انت مين ؟ أنا مصري , و بس ؟ أه و بس
, و بالتالي عدوي جوه مصر هما الأعضاء الفعليين للجماعه الارهابيه , لأنهم ضد مصر
, ضد سيادتها و تاريخها و اسمها و أهلها , انا مصري , و بالتالي اعادة كتابة التاريخ
مش حدث مهم بالنسبالي حاليا , لأننا في مرحلة عدم اتزان ( من أقصى إلى أقصى ) و لأننا
( يعني مصر ) في حالة حرب , و السلام ختام .
...............................................................................................................
Mohamed
Hussein
13
مايو 2017·
لما كنت في اعدادي
منعت الغش تماما في اللجنه اللي انا فيها , مع اني ماكنتش طالب جرئ ولا بلطجي ولا يقدر
يقف قدام مدرس و يعلّى صوته , انما في اللحظه دي جت لي قوه و شجاعه غريبه , المراقبين
بنفسهم عايزين يغششو الطلبه , طب ازاي ؟ و انا تعبي طول السنه يروح فين ؟ بقيت أقف
و اقول للمراقب لو سمحت بلاش الغش , المراقب يتحرج و يبطّل , الموضوع كبر بقى , و حيث
ان الناس في القرى بيبقو عارفين بعض كلهم , جيت انا على بالليل و لقيت وفد و لفيف من
المدرسين و أولياء الأمور عندنا في البيت , بيكلمو أبويا الله يرحمه , ابنك محمد عامل
لنا مشكله في المدرسه , و مانع الغش و احنا مش عارفين نساعد الطلبه , المهم أبويا كلمني
, قال يابني عارف ان الغش حاجه هباب و زفت بس مش عايزين مشاكل و مش عايزين الناس تزعل
مننا , طب اعمل ايه اعمل ايه ؟ قلت له على حل إلى حد ما يرضيني , أنا هسلّم ورقة الإجابه
و اطلع من اللجنه قبلها بتلت ساعه او نص ساعه , يغشو هما بقى أو يتحرقو بجاز مليش دعوه
, اهو ماحضرش اللحظه دي و خلاص , قال ماشي , حل كويس , و بالفعل عملت كده .
.
و بقى الطلبه زمايلي
و المراقبين يستنو اللحظه اللي أسلّم فيها ورقة اجابتي و اخرج , و تبقى فُرجت من وسع
( و يكسرو ورايا أولّه ) , و طبعا المراقبين شايلين مني و معبيين أد كده , ازاي طالب
يقف لهم و يقول لهم الغش ممنوع ؟ حتة عيل لا طلع ولا نزل , لحد يوم كان امتحان الدراسات
تقريبا و خلصت بدري أوي , و باقي عالوقت اللي أخرج فيه كتير , قمت مسكت ورقة الأسئله
و عملتها مركب , المراقب شافني و انفعل أوي و إدّاني درس في الأخلاق !! أه و عهد الله
في الأخلاق , انت ازاي تعمل ورقة الأسئله كده ؟ دي استهانه بورقة الأسئله , و اللي
مايحترمش ورقه الأسئله بتاعته يبقى مابيحترمش اللجنه بتاعته و لا بيحترم المدرسه بتاعته
!! أه نفس المراقب اللي بيغشش الطلبه .
.
الموقف ده الحقيقه
بفتكره كل ما أجيب سيره ناس و دول سفاحين و قتالين قتله , شاركو في حرق و خراب و تدمير
جيوش و تهجير ملايين الأسر , و أخرج عن شعوري مره و أشتم , ألاقي مثلا واحد من نفس
عصابة السفاحين دي داخل يعلق أو يبعت رساله و يقول أخلاق المسلم ماينفعشي يشتم أو يقول
بلاش نشق الصف العربي !! أه تصدق صح , ماينفعش نشتم القتالين السفاحين , ماينفعشي أعمل
ورقة الأسئلة مركب , و إلا تبقى أخلاقي بايظه و مش كيوت ولا متربي , انا هروح من ربنا
فين ؟! .
....................................................................................................................
Mohamed
Hussein
12
مايو 2017·
لو سمحت لو سمحت
- نعم يا حبيبي
.
انا عايز الناس
تقول عليا مثقف جامد أخر حاجه و مفكر جامد أخر فيصل , اعمل ايه ؟
- أها , عايز يتقال
عليك تنويري و تُحارب بقلمك في دروب الجهل و تحملُ شعلة النور و طوق النجاه في بحر
الظلمات ؟
.
ايوه بالظبط ,
هي البتاعه اللي بتقول عليها دي , بتاعة شعلة التنويري في طوق الظلمات دي .
- طب بص يا حبيبي
.
بصيت أهو
- انت تدور في
كتاب التاريخ أو في حياتنا , على أي حاجه كده و تشألبها , يعني تخلي رجليها فوق و راسها
تحت , فتبدو في المشهد انك مختلف و مميز عن غيرك من العامه و الدهماء اللي هما احنا
.
.
أيوه عايز أبقى
مميز عن الدهماء دي , مش عايز أبقى دهماء , بس أشألب الحاجات ازاي بقى ؟
- يعني مثلا تقول
المسجد الأقصى مش في القدس , المسجد الاقصى الحقيقي في شيكاغو ورا البنزينه , تقول
المعزه لها 7 رجول و مش هي اللي دايما بتولد ,لا هي بتولد مره و جوزها الجدي بيولد
مره لأن عالم المعيز ده أنقى و أكتر رقيا من عالم الانسان , و تقول إن الفاسّويين
( بتوع بوركينافاسو ) هما اللي بنو الأهرامات و بنو قهوة عماد اللي في النعام , و ماتنساش
تقول ان عبد الناصر هو السبب في الحرب العالميه و هو اللي خرم الأوزون هو و صلاح الدين
, كل واحد فيهم مسك شنيور و نزلو قصاد بعض يخرمو الأوزون , و طبعا تقول على ثورات التحرر
انهيار ثقافي و اجتماعي و منفلوطي و تقول إن الاحتلال ده حد جميل .
.
أه فهمتك فهمتك
, تقصد باختصار اني أبقى كولجي أد الدنيا
- أيوه الله يفتح
عليك , و ماتنساش بقى في طريق الشهره و النجوميه تألّف شوية كتب و روايات .
.
بس انا حضرتك مش
مؤلف ولا موهوب و بالتالي مش هعرف .
- يا جحش و هو
مين اللي بيعرف ؟ انت تجيب شوية روايات أجنبيه مترجمه و تاخدها كوبي بيست , و اسمك
ينتشر و تبقى أشهر من البناطيل الستريتش .
.
طب ولما اتقفش
واتفضح هيبقى شكلي ايه قدام أنصاري ؟
- انت عارف أصلا
مين اللي هيكونو أنصارك ؟
.
لا صحيح هيبقو
مين ؟
- عارف العيال
بتوع قف على ناصية الحلم و أفقأُ عينيك و حقاً إنكَ لن تضع قدمك في ماية الطرشي مرتين
, عارف العيال دي ؟
.
أه , هما دول بقى
أنصاري و دراويشي ؟
- أه بالظبط ,
و دول أحسن ناس بيتركبو على فكره , بس بيتركبو بشكل شيك , شكل ثقافي كده و متحضر ,
و بيفضّلو اللغات الأجنبيه في الركوب , خصوصا الإنجليزي و ( الفرنساوي ) .
.
يعني لما اتقفش
و اتفضح مش هيقولو عليا حرامي و نصاب و مدعي و ابن تيت ؟
- لا خالص , هيقولو
توارد أفكار و توارد خواطر و العالم قريه صغيره , و ده شغل لجان السيسي الإلكترونيه
اللي بيستهدفو بيها الإستاذ , و لكن سنقاتل سنقاتل , أبدا لن تطفئو جذوة نضالنا .
........................................................................................................................
Mohamed
Hussein
12
مايو 2017·
بنفعل ليه بقى
؟
.
أصدقائي الغاليين
- والله العظيم
تلاته , تلاته بالله العظيم , و عهد الله , و رحمة الغاليه , أنا البلد دي بالنسبالي
هي بلدي و جنسيتي و وطني و ديني و عقيدتي و حبيبتي و أمي و بنتي و زي ما تقول قول
, و بكل الأيمانات برضه هقول لكو : البلد دي مش مستحمله , كفايه المؤامره اللي عليها
من كل ناحيه .
.
فلو سمحتو يعني
, يا مولانا الشيخ العلامه الحبر الفهامه و يا مولانا التنويري اللي مفيش زيك أبدا
, لو سمحتو , أرجوكو , بليز , سيل فو بلي , سيبو أم مصر في حالها , سيبو تاريخ مصر
في حاله , سيبو أقباط مصر في حالهم , أجّلو التشويه شويه , شويه بس عشان خاطر ربنا
, لحد ما نعدّي من المرحله دي و أوعدكو بجد أول ما نوصل للأمان و اتطمن عليها انا بنفسي
هجيب عبد الناصر و صلاح الدين و شجرة الدر و أمدهم على رجليهم , و انا بنفسي هجيب المسيحيين
ولاد التيت دول واقعد أكفرهم واحد واحد .
.
طب اقولكو حاجه
و تصدقوها ؟, بتخيل حال مصر زي فيل ضخم بيحاول يقوم ( يفزّ) , و السهام بتصيبه من كل
ناحيه و راشقه في جتته ( صديقي احمد قاعود ياريت يرسم لنا الصوره دي ) , سهم جاي من
الديب و سهم جاي من التعلب و سهم من القرد و سهم من الفار و سهام كتيييير من ولاد الفيل
نفسهم , اللي بيضربو سهامهم في أمهم و هما فرحانين أوي
..................................................................................................................
.
ليست هناك تعليقات:
إرسال تعليق