Mohamed
Hussein
14
يناير 2016·
إنك مايكونشي عندك
هدف و لا خطه ولا خطه بديله ولا عارف بكره هيكون ازاي ولا امبارح حصل كده ليه ولا ليك
جوز عيون بتشوف بيهم ولا عارف الخطوه التانيه لرجليك هتكون فين , و لا عندك تصوّر ولا
أسباب مقنعه ولا قادر حتى تبص لنفسك في المرايا و تسألها ليه ؟ أنا نازل ليه ؟ بس فرحان
عشان قناعه معينه ضحكو عليك بيها ان النظام خايف و مرعوب و ركبه بتخبط في بعض !! .
.
انك توصل للمرحله
اللي فوق دي تبقى وصلت لقمة البؤس و الإفلاس , و بقيت متخيل ان مستقبل الاوطان لعبه
ممكن يلعبها كام ألف واحد عشان يحددو مصير و مستقبل 90 مليون , و متخيل كمان إن الثورات
نفسها لعبه , و شعارات الحريه و العداله هي لعبه , و محاربة الفساد لعبه و كل حاجه
بقت لعبه , لعبه و لسان طويل , لعبه و أباحه , لعبه و وقاحه , و تلاقي نفسك فجأه بقيت
معزول عن العالم , في محل ألعاب رسمته من وحي خيالك , تعمل مكعبات زي مانت عايز و تهد
و تبني و ترسم و تلون و تشخبط و بعدين تسأل نفسك هو العالم ابن التيت اللي بره المحل
بتاعي مش بيتغير ليه ؟ الدوله ليه مش بتمشي على نهج المكعبات اللي انا عملتها ؟ ازاي
المسئول ماخدشي باله من الشخبطه بتاعتي دي ؟ طب و ديني مانا ساكت لهم , اهو , و تقوم
مكسر شوية لعب و هادد المكعبات و تقول هعمل ثورة من جديد يعني هركّب المكعبات تاني
في نفس المحل , لما نشوف أخرتها بقى مع المسئولين في الدولة بنت التيت !! .
.
الحقيقه مش الإعلام
هو اللي شوة ثورة يناير , ولا المخابرات هي اللي خلت الشعب يبقى كده ( عبيد بياده يعني
زي مانت بتقول ) ولا الناس كرهت الثورة عشان جهات سياديه قالولهم اكرهوها , ولا و لا
ولا , الحقيقه أن أكتر حاجه شوهت كلمة و مفهوم الثوره و الحريه هما اللي لسه عاملين
نفسهم ثوار حاليا .
.................................................................................................................................
Mohamed
Hussein
14
يناير 2016·
فسخاني التحرير
.
.
- امبارح لاحظت
ظاهره غريبه عالفيس بوك , التايم لاين ظاهر فيه ناس ( أصدقاء ) عمري ماشوفتهم قبل كده
, و بوستات من نوعية راجعين الميدان , و مكملين , و دولة الزولم , طب الناس دي كانت
فين طول السنه ؟ ماظهروش ليه قبل كده ؟ و بعدين لقيت تفسير للظاهره دي .
.
- الثورجيه اللي
عايشين في دور ان الثورات فعل مضارع مستمر , اللي هما عاملين شبه عامل المباني الخايب
اللي حفر القواعد و المفروض بقى يرمي خرسانه و يطلع بالمبنى بس هو ماعملش كده , قال
يكمل حفر و يحفر كمان لحد ماوصل للمايه عجبته الفكره أكتر , قال نكمل برضه لحد ما تجيب
جاز !! .
.
- المهم بقى إن
الثورجيه دول بيفضلو في حالة بيات شتوي طول السنه ( اختفاء قسري يا برادعي ) , ممكن
يدخلو فيس و مايكونشي لهم أي نشاط , و تلاقي صفحتهم لمدة 11 شهر بتهش و تنش , بتكلم
طبعا عن صفحتهم الأساسيه مش الصفحه التانيه اللي بتبقى غالبا بإسم مضروب ( عاشق السمانه
, الحوض المرصود , أبو أخته , زهرة الصبار اليتيمه , فقاقيع السماء ) , و بس يا مولانا
, أول ما ذكرى 25 يناير تقرّب تلاقي الضفادع طلعت من بياتها الشتوي و بدأت تعزق بالفاس
عالفيس بوك في محاولة بائسة لإدراك أي حاجه , الحكايه دي بالنسبالهم هي قُبلة الحياه
اللي ممكن يعيشو عليها كام سنه .
.
- و حالهم ده باختصار
بيفكرني بالفسخاني اللي فاتح تحت البيت عندي , يفضل يهش و ينش طول السنه و ييجي قبل
يوم شم النسيم بكام يوم تلاقي الروح دبّت فيه و بيشتغل باديه و سنانه و مش طايق حد
يكلمه , أصل شم النسيم ده موسم بالنسباله , يعني برضه ( قُبلة الحياه ) .
.
- السيد فسخاني
التحرير , تحية طيبه و بعد , ممكن معاليك تكمل نوم و بيات شتوي عادي , أصلك مش هينوبك
غير انك تقوم و تغسل وشك و تتحمق و عروقك تبان و تعمل شوية شألباظات و تهري و تنكت
في نفسك و الموضوع يطلع فستك زي كل مره .
..........................................................................................................................
Mohamed
Hussein
13
يناير 2016·
هو مش حضرتك مصدق
إن الرئيس و مؤسسة الرئاسة و لجنة تقصي الحقائق و وزارة العدل و النائب العام و البرلمان
و البنك المركزي و كوكب الأرض و المجموعه الشمسيه كل دول متواطئين ضد هشام جنينه ؟
هشام جنينه اللي هو أصلا تقريره بيتكلم عن مخالفات إداريه قديمه و معرفشي فلوس شركات
بترول ماندفعتش من كام سنه و أراضي أوقاف و اعتداء على أراضي الدوله , يعني تقرير هشام
جنينه مقالشي ان السيسي حط في جيبه جنيه حرام , بس انت مصدق ان السيسي عمل تحاف من
كل مؤسسات الدوله بما فيها المؤسسة التشريعيه المنتخبه عشان خايفين من تقرير هشام جنينه
, مصدق صح ؟ .
.
طب اعمل هاشتاج
بقى واقف هناك في الصف جنب علاء الأسواني و مصطفى النجار( أبو سداغ ) .
......................................................................................................................
Mohamed
Hussein
13
يناير 2016·
أسئلة مشروعه
...................... بتحب مصر يا دكتور علاء ؟!
.
1- مش عارف مين
اللي قال ان المفكرين هما أعظم مخلوقات الله , تقريبا أنيس منصور , أه و الله صح المفكرين
هما أعظم مخلوقات الله , بس كلمة مفكر دي مشتقه من فعل اسمه ( فَكَر ) , يعني واحد
بيشغل دماغه و لو بطل يشغل دماغه أو دماغه لسعت من الكوله أو ( البورشام ) يبقى تزول
عنه صفة مفكر .
.
2- مش كيميا هي
و لا لوغاريتمات إن أي دوله عشان تتبني صح يلزمها تتخلص من الفساد و البيروقراطيه و
يكون فيها شفافيه و معارضه بناءه , بتحب مصر يا دكتور علاء ؟ طب حق البلد دي عليك و
حق أنصارك و دراويشك إنك تقول لهم فين الجهات السياديه اللي في تقارير هشام جنينه و
فين الجهات السياديه اللي في لجنة تقصى حقائق , لو ماعرفتش تقول و انت طبعا مش هتعرف
هتبقى حاجه من اتنين , إما انك هجّاص زي كتير غيرك و هنفترض حسن النيه , أو نك صياد
يا معلم ( بسوء نيه ) , في كلا الحالتين تزول عنك صفة مفكر , ماهي مش جُرْن الهبله
هي .
.
3- دماغي وجعتني
من المناهده مع الكولجيه , كل يوم كل يوم , و تصدقو بالله يا كولجيه مصر المحروسه انا
مش لاقي وقت انتقد فيه الحكومه و السيسي و إيدي بتاكلني لكده , بس افتكاساتكو اليوميه
بتاكل الوقت كله , حالكو بقى يصعب عالكافر و بقيت أسمع صوت لكائن مش موجود عالأرض
, و أفضل طول اليوم اقول الصوت ده جاي منين ؟ يا ترى جاي منين ؟ يعني عاملين خايله
كدابه مش أكتر .
.
4- المعارضه اللي
تملى دماغي فعلا و أركن عليها ضهري هي المعارضه اللي عايزه الخير للبلد دي حتى لو لعنت
جدود أبو السيسي طول اليوم , المهم أشوف في عقلها و حروفها فكره و موضوعيه و صدق و
خوف على مصر , المعارضه اللي بتبني بيكون معاها مسطرين و قصعه و شوية رمل و ناس عندهم
عزيمه و صبر , و الناس اللي بتهد بيكون معاهم أجنه و شاكوش وشعارات و افتكاسات , طيب
اللي مايشوفشي من الغربال يبقى أعمى , يا ترى الناس الموجودين حاليا معاهم مسطرين و
رمل و عزيمه و صبر و لّا معاهم أجنه و شاكوش و افتكاسات ؟!
................................................................................................................................
Mohamed
Hussein
12
يناير 2016·
علاء الأسواني
.
- من ساعة معركة
اللمون الشهيره و هو بقى نموذج فج لشم الكوله زي مالكتاب بيقول , اسمع يا سيدي , قال
ماعرفشي الفساد اللي بيطول جهات سياديه شكلو لجنه من جهات سياديه عشان تحقق فيه !!
تصفيق حاد و مزمن .
.
- يا دكتور علاء
, يا مفكر يا أديب , يا جامد و أجمد من فريد شوقي , هو حضرتك قريت التقرير بتاع هشام
جنينه ولقيت فيه جهات سياديه ؟؟ أتحدااااااااااااااااااااااك تكون قريته , طب جناب
معاليك عرفت لجنة تقصي الحقائق فيها مين ؟ جهات سياديه برضه ؟ ناس من جهاز المحاسبات
و من الرقابه و وزارة العدل و خبراء اقتصاد و إحصاء بقو جهات سياديه ؟ يعني تبع المخابرات
و عصابة الولاويله الحمره ؟! .
.
- طب بما انك لا
قريت التقرير بتاع جنينه ولا تقرير اللجنه ولا تعرف اعضائها , ليه تشبثت أوي بكلمة
جهات سياديه ؟ أقولك انا , عشان ده مصطلح رنان بينتزع أهات الكولجيه و تبدو سيادتك
في المشهد في دور المثقف العميق التنين أبو فكر جواني , و الجهات السياديه زي الصناديق
السياديه اللي فيها معرفشي كام 100 مليار و فيها دهب و لولي و مرجان , فاكرها يابو
عقل ألماظات ؟.
.
- طب بص , تحب
نضحك عالناس سوا و ننصب عليهم و نعبي لهم الوهم في أزاير مع كام شعار حلوين ؟ عموما
مابعرفش اعمل كده , أه و الله عندنا فساد ولازم نحاربه , بس التقرير يا مولانا بيتكلم
عن مخالفات أراضي من أيام الهكسوس و تعدّي على أراضي الدوله ( تم إزالتها ) و أراضي
أوقاف و حاجات كتير اغلبها بالشكل ده , يعني لا فيه سياديه ولا ملوخيه .
.
- طب هي الحاجات
دي لها قيمه بمليارات طبعا ؟ اه لها قيمه بمليارات , بس مش فلوس شايلينها في حصاله
و هنكسر الحصاله و ناخدها و الشعب يتنغنغ , لا و الله خالص , خلينا مثلا نتكلم عن التعديات
على أراضي مدينة السادات , الأراضي دي لها قيمه معينه , قول 50 مليار جنيه ( بسعر النهارده
) , الدوله شافت تعديات حصلت في أخر كام سنه و أراضي بقيمة كذا هيبقى قدامها اختيار
من اتنين , إما انها تزيل التعديات دي عشان تطبيق القانون بحسم , أو انها تتصالح مع
الناس وتاخد منهم قيمة الأرض اللي اعتدو عليها , ساعتها خزينة الدوله هيدخلها كام مليار
حلوين بس هتبقى حضرتك أرّخت لمرحلة جديده اسمها ( البلطجه القانونيه ) يعني بلطج يا
عم براحتك و الدوله هتتزنق بعد شويه و تتيجي تتصالح معاك و تاخد لها قرشين , و تبقو
حبايب .
.
- هات لي نصيبي
من ال 600 مليار جنيه بقى يا دكتور علاء انت وهشام جنينه ( بالظبط 7 ألاف جنيه ) عشان
عايز أنزل اشتري طقمين شتوي للبنات , و شوف معاك 5 جنيه فكه عشان السايس اللي بيركّن
العربيات قدام التوحيد و النور , عارف سيادتك , انا بقلق من السايس ده و حاسس انه تبع
جهات سياديه !! .
..........................................................................................................................
Mohamed
Hussein
12
يناير 2016·
من كام يوم طلع
هشام جنينه و قال ان حجم الفساد في موازنة الدوله 600 مليار جنيه , أصحابي الفكسجيه
و النكسجيه و الكولجيه و الهريجيه نشرو الخبر بطريقة شير يا جدع , شير بعنف و النبي
, نفس أم العقل الزرايبي الإخوانجي .
.
كان ردي يوميها
من غير ماكون خبير اقتصاد ولا اعرف هشام جنينه ان الرقم ده مستحيل عشان ببساطه الرقم
ده بيقترب من رقم ميزانية مصر كامله !! طلع بعدها هشام جنينه قال سوري انا مش بقصد
ميزانية سنه واحده بس دانا بتكلم عن 5 سنين !! , لا مش انا و النبي دي اختي منى .
.
السيسي قرر تشكيل
لجنة تقصى حقائق عن رقم هشام جنينه المزعوم , و اللجنه اجتمعت و عملت تقريرها و خد
عندك بقى , هشام جنينه خلط الشامي عالمغربي و حط عيشة على أم الخير و جاب أرقام و مخالفات
من 40 سنه و عك و عجن عشان يوصل في النهايه لرقم 600 مليار , رقم حلو و بينتزع أهات
الجماهير و الكولجيه .
.
أتمنى إحالة السيد
هشام جنينه إلى النائب العام و اتهامه اتهام مباشر بتهمة التزييف والتضليل و بيع الوهم
للناس , و أتمنى من الكولجيه يحطو الرقم بتاع هشام جنينه اللي اتركبو فيه كالعاده جنب
أرقام سابقه زي الصناديق السياديه اللي فيها دشيليون جنيه و زي ثروة مبارك اللي هي
فشرلليون دولار , و طبعا طبعا لازم تعملو من هشام جنينه بطل قومي بقى و تنزّلو صورته
على علبة الكوله .
.............................................................................................................................
Mohamed
Hussein
12
يناير 2016·
المجتمع المدني
............... المسخ المشوه اللي احنا معلقين عليه الأمال و الطموحات و الشرابات
و الفالنات
.
- حزب نشأ بعد
الثوره , عشان يلعب سياسه و فجأه قرر يسيب السياسه و يلعب كوتشينه عالقهوه , و لما
تقوله يا مولانا الحزب تعالى و النبي و اغسل الحنّه اللي على رجليك و انزل الشارع يقولك
لا انا منسحب أصل الشارع مش نضيف و مش مغسول بديتول و ماية ورد , و الوسط فاسد , و
تقسيم الدواير و المثلثات , و القوانين أصلها مش شبه صافيناز , يبقى هلعب كوتشينه
, خد لك سيف , كمان سيف , اهبدني الإنسحاب قصدي التسعه .
.
- عضو في برلمان
2016 , مش عارف و الله هو جامد تنين و لا جامد و مش تنين ولا مش جامد ومش تنين , أكيد
له تاريخ نضالي من هنا لحد أسوان , أو غالبا مالهوش بس احنا عملناله تاريخ , يوووه
يا جدع هو له بس احنا اللي ولاد تيت و بننكر , و عهد الله ماهي فارقه معايا , معالي
جناب العضو قرر تقديم الإستقاله و لما سألوه عن الأسباب و الحيثيات و الإفتكاسات قال
ظروف صحيه , يوووه مش ظروف صحيه , دانا بس مش عاجبني الشكل اللي مش حضاري للبرلمان
في الجلستين اللي فاتو , يا سيادة العضو عايز أقولك كلمه , احمس , أه هو أحمس , هو
معاليك و انت داخل البرلمان لقيت لوحة و سهم مكتوب عليهم البرلمان السويسري ؟ طب حضرتك
في الحمله الانتخابيه خدت كام ألف صوت من مواطنين سويسرا ؟ يعني الشكل اللي مش حضاري
و اللي ممكن بكره الصبح يبقى حضاري بعد ضربتين جزمه على دماع نواب سواق العبور , هل
تعتقد ان ده سبب كافي و مقنع و وجيه ؟ داحنا لسه ماقريناش الفتحه يا مولانا ولا قصينا
الشريط .
.
- بصو , ممكن تقولو
مبارك هو السبب أو السادات أو حتى سيدي حسين الله يرحمه , مش مهم , المهم ان عندنا
مجتمع مدني و سياسيين عباره عن مسخ مشوه , محاربة الفساد و اصلاح حال البلد بتحتاج
نفس طويل و صبر و تعديل من الداخل ( دي اسمها أبجديات ) , أما موضة الإنسحاب و الرحرحه
و فجأه يتحول العضو إلى بطل قومي يبقى زيه زي الحزب إياه بتاع خد لك سيف , الموضه بعد
2011 هي صناعة أبطال من ورق و لا عزاء لأحلام الفقراء و أمالهم .
.
تعالى يا فقير
انت , بص انا مش هعرف اصلح لك حالك عشان أنا منسحب و مشغول عالقهوه زي مانت شايف ,
تاخد لك شوية شعارات و افتكاسات و انسحابات تمشي بيهم نفسك دلوأتي ؟!
.....................................................................................................................
Mohamed
Hussein
11
يناير 2016·
من حقي أسأل
.
ماهو بص حضرتك
, لو ماكنتش بتقدر تسأل نفسك و تتسأل و تحط علامات استفهام و علامات تعجب يبقى عقلك
ده تسلّمه لأقرب حد بتاع روبابيكيا و تاخد مكانه مروحه قديمه و انت الكسبان .
.
1- ليه قبل ذكرى
25 يناير بنلاقي مواقع و صفحات مشبوهه و مقالات كلها كدب و تدليس و نصب و تزييف و كلام
مايدخلشي عقل عيل عمره 3 سنين و في الأخر تلاقيها كلها اعلانات مموله , مين بيمول الكلام
ده ؟! و ليه بنلاقي دول و حكومات و اجهزة اعلام أجنبيه مهتمه أوي بالذكرى و الحدث و
كأنهم ملكيين أكتر من الملك ؟! .
.
2- لما انا بشتغل
في مهنه مرتباتها حلوه و اتغربت 12 سنه , ليه بعد ما رجعت مصر لقيت لبسي و لبس عيالي
و ستايل حياتنا و حجم انفاقنا أقل بكتير من ناس لا اتغربت و لا تعبت و بيشتغلو في مهنه
غريبه اسمها ( ناشط سياسي ) , مهنه ظهرت بعد 25 يناير و خلّت ناس حياتها اتشألبت تماما
و اتشألبت فجأه , وبعد الشبشب و القبقاب بقينا نشوف اللبس الماركات العالميه و الكلاب
الأجنبيه في إديهم , ليه طيب ؟! .
.
3- ليه بعد ثورة
يناير بكام شهر لقيت مصر اتردمت بعربيات زيرو راكبها ناس بدقون , ظاهره مكانتش موجوده
قبل كده , هل يا ترى الناس دول أغنيا فعلا و عندهم العربيات دي بس ربنا هداهم و طلعت
لهم دقن فجأه ؟ و لا هما أصلا ناس بدقون من الأول بس ربنا رزقهم بعربيات زيرو فجأه
؟ ماهي مالهاش احتمال تالت .
.
4- و أخيرا من
حقي أسأل , هو اتوبيس 25 اللي ركبناه في يناير 2011 بطيبه و سذاجه و حسن نية , الاتوبيس
ده كان رايح فين بالظبط ؟!! .
.........................................................................................................................
Mohamed
Hussein
11
يناير 2016·
أه صحيح , هو انا
يعني بعرف الألف من كوز الدره , و اعرف إن أي دوله بتقوم على 3 مؤسسات رئيسيه , أو
3 سلطات , تنفيذيه و تشريعيه و قضائيه , يعني حكومه و برلمان و قضاء , و التلاته عندنا
و بخير الحمد لله إلى حد كبير , و كل واحد فيهم بيقوم بدوره المهم , و الدوله في الحاله
دي بيبقى اسمها دولة مؤسسات , إنما تسألني في قلبك و ضميرك يا كلاوي , انت ساند ضهرك
على مين ؟ يعني مين هو عكازك و أملك و طوق النجاه بتاعك ؟ هقولك بسرعه جدا و من غير
تفكير , هو عبد الفتاح السيسي .
..................................................................................................................................
Mohamed
Hussein
11
يناير 2016·
الهري الجمعي و
النطح الفيسبوكي .
.
1- باسم يوسف
: مايحدث في البرلمان مهزله تدعو للبكاء مش للضحك .
.
بص يا عم باسم
, إحنا نضحك و نتريأ و نألش أه , لكن تقولي مهزله و تدعو للبكاء تبقى صياد يا معلم
و بتصطاد في المايه العكره زيك زي غيرك , الإنضباط و الهدوء و السلوك المتحضر اللي
ماشوفناش ريحتهم امبارح مش مفاجأه ولا حاجه غريبه , الناس دي مش جايه من كوكب تاني
, دول ناس مننا , إحنا كده , ببقى قاعد في الصيدليه و اسمع واحد بيكلم مراته في الموبايل
و هو ماشي في الشارع , و بعد 5 دقايق اكون عرفت قصة حياة اللي ماشي ده و مشكلته مع
مراته و دور أمه في الموضوع و جارتهم اللي هي يا ستي أد أمي و الله أد أمي و كده يعني
, احنا الي بنتكلم في الموبايل قدام الكعبه و نضيع الساعتين بتوع الطواف في صور سيلفي
و نزق في الناس و نتخانق , أه قدام الكعبه .
.
بكره أو بعده
, لو شخصية كبيره و مرموقه قعدت مع ائتلاف دعم مصر 5 دقايق و قالت لهم ممنوع ممنوع
ممنوع , ممنوع الصوت العالي , ممنوع الموبايل , ممنوع الخناق , ممنوع التطاول , يبقى
تاني يوم هتشوف برلمان فشر برلمان سويسرا , فهل ساعتها هيبقى عندنا برلمان قوي و عظيم
و جبار ؟ هقولك لا , لسه مانعرفش , انما وقتها هيبقى عندنا برلمان شكله حلو وكيوت و
بس .
.
2- أصدقائي الأعزاء
الينايرجيه , عُبّاد 25 يناير , و كبار الخُدّام في معبد ميدان التحرير , و النبي تهدو
شويه , مرتضى زفت منصور بيمثل نفسه , يحب ثورة يناير و يتجوزها و يكتب عليها أو يلعن
سلسفيل أبوها هو حر , رأيه الشخصي مش رأي البرلمان ولا رأي الدستور , و طبعا مش رأيي
الحكومه ولا السيسي , بالمناسبه مرتضى منصور عضو منتخب من الشعب ولا يشغل أي منصب حكومي
على الإطلاق , ثورة يناير غلبنا فيها شرح و تحليل , الإيمان المطلق و التقديس كارثه
لا تقل كارثيه عن رفضها المطلق و تخوينها , يعني لو كان مرتضى منصور بلطجي ضد ثورة
يناير فحضراتكو بلطجيه مؤيدين لها , من غير أي موضوعيه ولا كشف حساب , باختصار هقولك
و ممكن أخليك تضحك على نفسك : اغلبكو طبعا من أنصار اسلام البحيري و ضد النصوص المعلبه
اللي بتصطدم بالعقل , مع إنك يا مؤمن لو ركزت شويه هتكتشف إنك بقيت شبه السلفي أو الوهابي
و ثورة يناير بالنسبالك هي صحيح البخاري !! .
......................................................................................................................................
Mohamed
Hussein
10
يناير 2016·
رسميا دكتور على
عبد العال ( أستاذ القانون في جامعة عين شمس ) رئيسا للبرلمان المصري 2016 , حصل على
70 % من إجمالي أصوات الأعضاء ( 401 صوت ) , بينما حصل نائب تزغيط البط توفيق عكاشه
على 4 % ( 25 صوت ) .
.
ألف مبروك دكتور
على عبد العال و ألف شكر جهاز المخابرات المصريه , كتّر ألف خيركو , عشان الحكايه فعلا
ماكنتش مستحمله هبل و هطل و لعب عيال !! .
.........................................................................................................................
Mohamed
Hussein
10
يناير 2016·
في جلسه برلمانيه
مستنيها ملايين المصريين و العالم كله بيتفرج عليها ( و علينا )
.
1- الساده الأعضاء
اللي صوتهم عالي و مستمرين في كده , مكانكو مش هنا و الله , موهبتكو دي تقدرو تطلعوها
في سوق العبور , تقفو جنب عربية فاكهه و ترفعو صوتكو و تقولو , أحمر على أبوه يا بطيخ
, عالسكين , قرّب قرّب , قرّب يا جدع , خد لك فكره و اشتري بطيخه لبكره .
.
2- السيد العضو
اللي كل ما يقابل عضو تاني يقوم مسلّم عليه وبايسه و واخده حضن مطارات قدام الكاميرا
, هو حضراتكو راجعين من عالجبهه ؟ كنتو بتعملو عملية فدائيه مثلا و لسه يادوب متقابلين
بعد ما نجحت العمليه , زي مشهد عزت العلايلي و نبيل الحلفاوي كده ؟ .
.
3 - الساده الأعضاء
اللي بيتكلمو في الموبايل طول الجلسه , هو حضرتك بتكلم مين و بتقوله ايه ؟ يعني إيه
وجه أهمية حضرتك خارج أسوار البرلمان ؟ ايه الحاجه الطارئه أوي اللي تخليك مش متستحمل
تقعد في برلمان مصر كام ساعه و انت ساكت ؟ هل مثلا المفاعل النووي اللي حضرتك بتديره
هينفجر و بياخدو رأيك يعملو ايه ؟ طب مثلا يكون الدكتور مجدي يعقوب مزنوق في عملية
زراعة قلب و في أوضة العمليات و حصلت حاجه قدامه مش فاهمها فبياخد رأيك عشان يستفيد
من علم و حكمة اللي خلفوك ؟! .
.
4- السيد مدير
العلاقات العامه في فندق ماريوت , حضرتك مطلوب على وجة السرعه , محتاجين كام بنت من
عندك يعملو دورة تدريبه لعدد 600 عضو في برلمان مصر , يعلموهم الإتيكيت و الزوق و السكوت
و التعامل و الرقي و النظام .
..............................................................................................................................
Mohamed
Hussein
10
يناير 2016·
دورة حياة المواطن
الكولجي من أول شعارات الديموقراطيه لحد شعارات عودة الملك و الطربوش الأحمر أبو زر
............... يعني من الشيفروليه و انت نازل
.
1- في الأول قالو
ديموقراطيه و صناديق و اختيار الناس و احترام لارادة الشعب , و احنا جامدين أوي و عندنا
كوادر و بكره يحكمنا البرادعي و خالد على و مصطفى النجار و الواد سوكا .
.
2- بعد شويه بدأو
ينكشفو قدام الناس و الشعارات تاخد شكلها الطبيعي ( البلاستيك ) , قالو مش مشكله برضه
احنا جامدين و عندنا كوادر و لو بس نتحد و نتوحد و نبقى إيد واحده هنحكم نص الكره و
الأرضيه و ممكن نسيب النص التاني للإخوان عشان دول رفقاء الميدان .
.
3- بعد شويه كمان
بدأو الناس يكرهوهم أكتر , و حسو إن شعبيتهم في الشارع ماتجيبشي حتى إنهم يفوزو برئاسة
مجلس محلي أبو كبير , قالو بس , ستوب يا عم , احنا نمشيها ثوره و الثورة لازم تحكم
, انت نزلت في 25 يناير ؟ لا يبقى ماتتكلمش معايا خالص , لا تكلمني فانا من شباب الثوره
يعني سيدك و تاج راسك ولازم أحكمك حتى لو كنا على بعض كده مانجيش مليون ( الفاشيه الثوريه
).
.
4- بعد شويه اكتشفو
ان اغلب ثوار الميدان انفضو عنهم و وقفو مع السيسي , قالو لأ بقى , لأ بقى , انتو اتعملكو
غسيل دماغ من توفيق عكاشه و لميس و هميس و عتريس ( ثقافة الإنكار ) , و مهما كنا قليلين
فاحنا النخبه يعني النخبجيه , يعني الواحد مننا يساوي مليون منكو يا عبيد , احنا الناس
اللي فوق و انتو اللي تحت يا شعب عره ( جرعة زياده من شم الكوله ) .
.
5- بعد شويه قالو
و بعدين بقى ؟ احنا كده اتزنقنا في ركن و الشعب نازل فينا طحن , نعمل ايه بس ؟ فقام
واحد كولجي منهم بس مثقف و معاه دكتوراه من جامعة ( ماتطفي النور والنبي ياحمد ) و
قال لهم بصو يا شباب , هو السيسي وصل للحكم ب 24 مليون صوت انتخابي بس احنا هنقول العسكر
عشان نسقط عنه حتة الديموقراطيه دي و عشان نبقى بنتكلم صح يبقى لازم نسب للعسكر من
أيام عبد الناصر , عارفين بقى , احنا شكلنا مش هنحكم مصر ولا بعد 500 سنه , يبقى الحل
هو رجوع الملكيه و أيام الملك و الطربوش الأحمر أبو زر , انشرو ياولاد النعيم اللي
كان فيه مصر أيام الملك و الجارسون كان طلياني , إوعى حد منكو يتهبل و يقول ان 90
% من الشعب كانو شغالين كلافين و عبيد في سرايات البشوات أيام الملك , ركزو على حكاية
الجارسون الإيطالي دي .
.
6- و بس كده ,
حالة الإفلاس المتواصل للكولجيه و حالة الإنعزال التام عن الواقع و الإنكار و الفاشيه
الثوريه بتاعتهم خلتهم ينزلو من عرش الديموقراطيه و يطالبو بعودة الإحتلال !! .
.......................................................................................................................
Mohamed
Hussein
9
يناير 2016·
بكره الصبح بإذن
الله هتنعقد أول جلسه لمجلس النواب المصري الجديد , و هيتم انتخاب الدكتور على عبد
العال رئيساً للبرلمان .
.
الدكتور على عبد
العال هو أستاذ قانون في جامعة عين شمس , عضو منتخب ( مش معين ) , و بعد كده تم انتخابه
أو اختياره من إئتلاف ( دعم مصر ) كمرشح لرئاسة البرلمان و بكره هيتم انتخابه بأغلبية
الأصوات كرئيس للبرلمان , يعني الراجل هيبقى منتخب 3 مرات !! .
.
حد يقول للبرادعي
يلحق يحذف التويته بتاعة رئيس السلطه التنفيذيه بيعين رئيس للسلطه التشريعيه , يادوب
تلحق تحذفها يا بوب , و بالمره تغيّر الباشكاتب اللي بيكتب لك التويتات , شوف باشكاتب
تاني يكون معاه إعداديه عالأقل و بيعرف الألف من كوز الدره , و طبعا يكون سابقنا بمليون
سنه ضوئيه .
.........................................................................................................................
Mohamed
Hussein
9
يناير 2016·
المخابرات الأجنبيه
و الإرهاب و التنظيم الوثني و الشباب ........ و محمود شيكا .
.
1- كان يا ماكان
يا ساده يا كرام , كان فيه مخابرات أمريكيه و بريطانيه , الأولى بتمثل الإستعمار الحديث
و نهب ثروات الشعوب بطريقه شيك ( بالشوكه و السكينه ) , و التانيه طبعا بيجري في دمها
جينات الإستعمار والإستحمار بس بالطريقه القديمه التقليديه ( و النبي الساده الكولجيه
يقعدو على جنب شويه ) .
.
2- الأمريكيه قالت
للبريطانيه , سيبك من الهري ده بقى بتاع الدبابات و الجيوش و عساكرنا تموت , احنا هنحرق
دول الشرق الأوسط و ننهب ثرواته و نغتني و اسرائيل تعيش في أمان و يبقى حواليها شوية
قبائل و دويلات , بس الكلام ده يتم و احنا قاعدين في التكييف كده , هنعمل ايه بقى و
نتصرف ازاي ؟ فكرو و اتصرفو .
.
3- بصي يا بريطانيا
ياختي , التنظيم الوثني بتاع الإخوان المسلمين اللي موجود في الوطن العربي ده و اللي
ليكي عليه أيادي بيضاء هيبقى هو حلقة الوصل بتاعتنا , هما عايزين ايه ؟ يطبقو الشريعه
؟ قشطه GREAT يبقى نسخنهم في حكاية تطبيق
الشريعه دي و ندعمهم و نحميهم و ندافع عنهم ( عندنا مراكز حقوق انسان و تقارير و منظمات
و جيمي كارتر و حبشتكانات ) , و اهو بالمره نعشمهم في المستقبل انهم يحاربونا و يحررو
القدس و يقتلونا و نموت و نخر دم .
.
4- التنظيم الوثني
ده هنعلمه ازاي يوصل لعقول الشباب و يحولها لمجرد فردة شراب قديمه أو مسخ , , و كله
بما يرضي الله , و نملى دماغهم بكلام عن الكفار و الشيعه و نشر الإسلام و الجهاد ,
أو مش مهم نعلمه هو متعلم جاهز , المهم نلاقي قدامنا شوية شباب كاره للخير و للحياه
و للحب و الأمل و الفطره و نور ربنا , الشباب ده هيبقى هو أسلحة الدمار الشامل بتاعتنا
, اللي هنحرق بيه الوطن العربي و ننسخ منه كذا ألف واحد اسمهم محمود شيكا و نعمل منهم
جيوش و تنظيمات , مهم كمان يكون عندنا وسيلة اعلام بتتكلم عربي ( نسميها الجزيره )
و نلغي من قاموسنا كلمات بقت سيئة السمعه زي استعمار واحتلال , و نحط مكانهم مصطلحات
جديده برّاقه زي حرية و ديموقراطيه أو حتى شريعه
.
5- بعدها نحط رجل
على رجل و نتفرج عالحرايق و الخراب , و نقعد نستنى زكايب الفلوس من العرب البهايم
, زكايب من الإرهابيين حبايبنا اللي هيسيطرو على منابع النفط عشان نوفر لهم الحمايه
و نبيع لهم السلاح , و زكايب من الحكومات و الأنظمه الملكيه ( حبايبنا برضه ) اللي
هيقولو : الحقونا , و مع الزكايب تجيلنا جوابات شكر و عرفان و امتنان من صديقنا الغالي
في تل أبيب .
.
و توته توته فرغت
الحدوته .
.
حماده عايز ينزل
يعمل ثوره , قولو لحماده عيب يا حماده .
............................................................................................................................
Mohamed
Hussein
9
يناير 2016·
السيسي للشباب
: عام 2016 هو بتاعكو و ليكو , قروض ميسره بفايده 5 % , و عندكو مشروع ال 1.5 مليون
فدان , و العاصمه الإداريه الجديده و جبل الجلاله , فيه أكتر من مليون فرصة عمل , اتحركو
و اشتغلو و اتعلمو .
.
تعليقات الشباب
شاب رقم 1 : أنا
رايح أعمل مشروع , هاخد قرض بفايده ميسره .
شاب رقم 2 : أنا
رايح أزرع حتة أرض , هحجز في ال 1.5 مليون فدان .
شاب رقم 3 : أنا
رايح أتعلم .
شاب رقم 4 : أنا
رايح أعمل هاشتاج لدعم السياحه .
شاب رقم 5 : أنا
رايح أقدم في مركز تأهيل الشباب للقياده .
شاب رقم 6 : أنا
رايح أقرا تاريخ مصر اللي ماعرفشي عنه حاجه .
شاب رقم 7 : أنا
رايح أفضح مخططات أمريكا لحرق و تفتيت الشرق الأوسط .
شاب رقم 8 : أنا
رايح أزور أثار مصر من اسكندريه لحد أسوان .
.
شاب خروف : أنا
رايح أعمل ثوره .
شاب كولجي : أنا
رايح مع اللي راكب فوقي ده .
............................................................................................................................
Mohamed
Hussein
8
يناير 2016·
طب هو السيسي لما
يقفل الفيس بوك عننا بالشكل ده نعمل ايه احنا و نضيع وقتنا ازاي ؟ الراجل ده بيراهن
على حبنا ليه بس بيضغط علينا أوي , هنعمل ايه دلوأتي من غير فيس بوك ؟ نتسلى بإيه طيب
؟ , يعني نجيب مجلات تاني زي زمان و نقعد نقلّب فيها و نتفرج عالصور , حد معاه مجلة
الشبكه اللبنانيه ؟ طب أخبار الرياضه بتاعة زمان بس يكون فيها الصوره اللي في النص
( للمبادله بأكاونت الفيس بوك بتاعي ) , يا جدعان ماتقعدوش كده و تحطو إيدكو على خدكو
, اصبرو كلها يوم ولا اتنين و السيسي يعقل و يرجع لنا الفيس , الراجل استحملنا كتير
, مفهاش حاجه لما نستحمله يومين , اشغلو نفسكو بأي حاجه , اللي معاه كوتشينه يطلّعها
و اللي عنده شطرنج يجيبه , و الناس الفلاحين اللي زي حالاتي ممكن يعملو ( سيجه ) و
يلعبو و اللي معاه نوكيا 3310 يلعب عليه snakes
, أدينا قاعدين يا سيسي لما نشوف أخرتها معاك .
........................................................................................................................
Mohamed
Hussein
8
يناير 2016
و لو رجع بيا الزمن
لورا , لحد يوم 24 يناير 2011 , و كنت موجود في مصر و سمعت عن دعوه للثورة كنت هنزل
التحرير أول واحد , هنزل ضد نظام فاسد مترهل , هنزل ضد التوريث و فكرة العزبه بتاعة
الباشا و ابنه , هنزل عشان الحريه و العداله , هنزل ضد الوجوه الكريهه زي صفوت الشريف
و فتحي سرور وزكريا عزمي و احمد عز .
.
و لما أنزل و أشوف
كاميرا الجزيره و المراسل بتاعها و شغل ( التهييج ) هرجع لورا 5 خطوات , و لما أشوف
أشكال قيادات الشباب و عقولهم و شعاراتهم و افتكاساتهم هرجع لورا 5 خطوات كمان , و
لما أشوف ناس بتحرق عربيات شرطه من باب الحريه هرجع 5 خطوات , و لما أشوف الإرهابيين
و القتله نزلو و رافعين شعارات الحريه هرجع 5 خطوات , و لما أشوف أوباما طالع يمجّد
في اللي احنا بنعمله و يقول هندرّسه لولادنا في المدارس هقوم في اللحظه دي قالع الجزمه
من رجلي و أفوت عالميدان نفر نفر أضرهم بالجزمه على دماغهم , و أقول لهم امشو من هنا
يا ولاد الكلب , دي الحدّايه مابترميش كتاكيت .
.
أن الأوان تفهم
يا حمار و تعترف إننا كنا حمير طيبين , طيبين أه بس حمير , كل حاجه كانت مدروسه بالورقه
و القلم و المسطره وبالأرقام و التواريخ , قالو العراق فيه أسلحة دمار شامل و خربوها
, و عندنا مالقوش حل غير إنهم يدعمو نظام فاسد لحد مايوصل لقمة الفساد و بعد كده يهيجونا
للثوره عليه , وساعتها نحرق بلدنا بإيدينا , هي دي الحرب الحديثه , بتتلخص في فكره
و صبر و تنفيذ من بعيد و ريموت كونترول و أله إعلاميه , واحنا كنا البندقيه و الدبابه
اللي بتنفّذ التعليمات .
.
ثورة يناير كانت
ثورة ضد نظام فاسد و بلطجي بس لمصلحة ولاد الكلب , ثورة ضد الشيطان لمصلحة إبليس الرجيم
ذات نفسه , و أعظم ثوره في تاريخ مصر هي 30 يونيو , لو مش عاجبك اضرب راسك في أوسخ
حيطه , دي اللي قلبت الترابيزه على دماغ الكل , وقالت لولاد الكلب , مصر مش علبة جبنه
نستو زي غيرها , ولا بتتعمل ساندوتشات .
.
حريتك و أحلامك
و شعاراتك و افتكاساتك لازم يقفو انتباه قدام حيطان البيت .
..................................................................................................................................
ليست هناك تعليقات:
إرسال تعليق