Mohamed
Hussein
7
يناير 2016·
افتكاسات ما قبل
25 يناير ................... مولد بقى و كل سنه و انتو طيبين
.
رساله بينشرها
الخرفان و الكولجيه و يشيروها , بتقول الرساله : احترس من سب الشرطه و الجيش و الرئيس
, انت حسابك متراقب و لو مابطلتش تعمل كده هتتعرض للمسائله القانوينه !! .
.
و طبعا الخروف
و الكولجي لازم يحط التاتش بتاعه عالرساله من فوق , دولة الزولم , دولة الكمع , أهم
حاجه يحس انه حاجه مهمه اوي و متراقب , حتى لو كانت صفحته دي فيها 3 اصدقاء و ريري
سيلان , و التلاته الأصدقاء هما نفس الشخص صاحب الأكاونت , بس خلي بالك يا معلم انت
متراقب بقى , عارف ليه انت متراقب ؟ عشان انت مهم أوي , و الصفحه بتاعتك اللي أد علبة
الكبريت دي عامله مشكله للدوله و النظام و للشرق الأوسط و دول الكومنويلث , و السيسي
ركبه بتخبط في بعض كل ما يفتكر اللي هتعمله فيه , المهم انك مهم أوي جدا خالص و أهم
من مشابك الغسيل و حجر المعسل , دانت بس مش مهم , دانت مشهور كمان , أشهر من ساندوتشات
الحواوشي و من سوالف عمرو حمزاوي و أجزاء معينه من جسم كيم كارديشان .
.
و الدوله بتترعش
و ترتبك حتى الراجل ساعي البريد اللي في مبنى رئيس الوزاره كل ما يعمل فنجان قهوه على
صينيه و يجيبه ايديه تترعش و الفنجان يندلق منه عالأرض , و يسألوه ليه يا عم عثمان
؟ يقولهم أصل حماده عنده أكاونت عالفيس بوك و بيشتم الرئيس .
.
هههههههههههههههه
الله يخرب بيوتكو , دانتو وصلتو لمرحلة من الإفلاس و الملل ماتخطرش على بال سحليه يتيمه
محبوسه في حمام عمومي من حمامات رمسيس , يعني الشرطه و الجبش و المخابرات بيراقبوك
؟ و بيحذروك برسايل و يتحايلو عليك و عاملين لك برنامج همسة عتاب ؟ ازاي بقى ؟ مش دول
مجرمين و جبابره و بتوع اختفاء قسري ؟ انت ياض عارف انت بتشتغل ايه بالظبط ؟ طب مامتك
عارفه و راضيه عادي يعني ؟! .
.............................................................................................................................
Mohamed
Hussein
7
يناير 2016·
المناضل التنين
في عقل حمدين
.
قبل المزايده و
المزادات و الشعارات و الإفتكاسات , حصل اني انتخبت حمدين صباحي في انتخابات الرئاسه
بعد ثورة يناير و في الإعاده قاطعت الإنتخابات , و حصل اني انتخبت السيسي في الإنتخابات
الأخيره و قولت لأول مره مش هبقى قلقان من مين هينجح و يبقى رئيس مصر , سواء كان سيسي
ولا حمدين , و هاجمت انصار حمدين اللي تخلو عنه و دفسو مناخيرهم في كيس الكوله .
.
استاذي الكبير
حمدين صباحي : ليس بالشعارات و الإفتكاسات وحدها تحيا الأوطان يا صديقي .
.
1- عن فض اعتصام
رابعه , و نرجع نغنّي تاني في قصة عنب ديبو , مفاوضات مستمره لمدة شهر كامل و وفود
من بره مصر و جواها , طب اسأل مشايخ السلفيين حتى , ماهو مش معقول تكون مناضل من اربعين
سنه و ماتعرفش فكر الإخوان , أو تكون فاهم ان الناس دي كان ممكن تتصالح و تفض اعتصامها
ولو بعد 50 سنه ؟ أومال كربلائياتهم يعيشو عليها ازاي ؟ كانت لحظه و لازم يكون فيها
دوله , لحظه تحت شعار ( نكون أو لا نكون ) , بالمناسبه , الظباط و الجنود اللي اتقتلو
في فض الإعتصام مماتوش في حادثة موتوسيكل !! .
.
2- البرادعي قامه
وطنيه و مش خاين , طيب على راسي يا مولانا , و لو ان كلمة خاين دي مش شرط يكون معناها
واحد بياخد تمويل أجنبي عشان يشتغل ضد بلده , لا ممكن يشتغل مجاني عادي , أو حتى مايكونشي
خاين بس عايش في غيبوبه , المحصله واحده والنتيجه , و في النهايه , اللي مايشوفشي من
الغربال يبقى اعمى .
.
3- الشباب الطاهر
اللي في السجون و الشرطه اللي طلع لها عضلات , طب سيبك بس من افتكاسة الإختفاء القسري
عشان عندنا جهاز شرطه غبي جدا لدرجة اعتقال رجل اعمال ملياردير في الفجر و تصويره فيديو
بالكلابشات , دول مش بتوع اختفاء قسري
.
تصدق بالله يا
عم حمدين , هات ايدك كده , و شبكة العشره دول انا مامقتنع بقانون التظاهر , و لا بحبس
ناس من اللي اتحبسو بسبب القانون , بس هما خالفو قانون بشكل ما , مش مهم , مش عارف
جه في بالي سؤال , و لّا ههري بطريقة اللي إيده في المايه ؟ السؤال بقى , قولي شكل
البلد و الشارع كان هيبقى عامل ازاي في السنتين اللي فاتو و لحد النهارده لو مفيش قانون
التظاهر ( اللي مش عاجبني ده ) ؟ انا اقولك , مظاهرات مرتين في الإسبوع , من غير تصاريح
, و أمن منهك في تأمينها , و عشره شباب ينزلو بضمير نقي يقوم ينزل معاهم عشرين عيل
ولاد تيت , و الجزيره تصور و تقول فيه 30 مليون في الشارع , و نبقى بنلف في نفس الساقيه
, و الشكل العام في الخارج يبقى بلد مش مستقره امنيا و لا سياسيا و بالتالي لا فيه
استثمارات ولا سياحه و تبقى الثوره فعل مضارع مستمر لحد ما نجيب بيبانها , و نقعد عالأطلال
نقرا في تاريخ مولانا جيفارا و نشرب بانجو .
.
4- سؤال بقى و
النبي يا شيخ و حياة بنتك اللي القضاء الفاسد طلعها براءه , انت كنت فين طول السنه
و ليه دلوأتي قررت الظهور ؟ و ايه العلاقه بينك و بين الإبراشي ؟ هل مثلا بتستخدمو
سشوار واحد و ده في حد ذاته كان سبب كافي لظهوركو مع بعض ؟ ........... ممممممممممم
طب ما تعملو ائتلاف و تسموه إئتلاف ( الثوره النقيه و الإعلام النزيه و السشوار )
.
............................................................................................................................
Mohamed
Hussein
6
يناير 2016·
السيسي كالعاده
جاب جون بكعب رجله من نُص الملعب , راح زار الكاتدرائيه و بارك للمصريين على عيدهم
, رساله بتقول باختصار : احنا كده , ربنا خلقنا كده , مش بنخاف , الإرهاب مش بيهدّنا
, و فتاوي البهاليل بندوس عليها بجزمتنا .
.
شابوه يا ريس
.
.......................................................................................................................
Mohamed
Hussein
6
يناير 2016·
واحده من اللي
اشتغلو في الدعاره السياسيه بعد 25 يناير بتشمت في موت الفنان الرائع ممدوح عبد العليم
الله يرحمه , و مستعده تعمل أي حاجه عشان ينوبها أي نصيب من فلوس الخرفان و فلوس بهلول
تركيا أو فلوس ابن موزه , أي حاجه أي حاجه ( بصوت عادل إمام ) ؟ , أه يا سيدي أي حاجه
أي حاجه , دول اعلاميين البيبي دول , هتلاقيهم جاهزين و قالعين على سرير أي خاين .
.
عارف انت الخصال
اللي هي , إذا حدّث كذب و إذا عاهد غدر و إذا خاصم فجر ؟ أهي دي اسمها أيات المنافق
أو أيات عرابي !! .
................................................................................................................................
Mohamed
Hussein
6
يناير 2016·
لحمه و رز بالخلطه
و ممبار و سبانخ و جولاش و ديك رومي , دي شكل السفره بتاعة واحد مسيحي صاحبي , الفطار
هيكون كده بالليل .
.
على فكره يا صاحبي
و تلاقيك ماتعرفش , أنا في البلد بس بيدلعوني و يقولو لي يا محمد , إنما أنا اسمي الحقيقي
جرجس و أمي اسمها ماريا , يعني صايم انا كمان و هطب عليك الساعه 12 بالليل بقى , واهو
تاخد أجر إفطار صائم , و لو فاض حاجه من الديك الرومي نبقى نلفّها في ورق فويل وأخدها
معايا للمقدّسه في البيت .
.
كل سنه و انتو
طيبين يا أقباط مصر , مسيحيين و مسلمين , كل سنه و مصر تاج على روسنا و احنا بيها منصورين
.
.................................................................................................................................
Mohamed
Hussein
6
يناير 2016·
مواقع تقطيع الهدوم
.
إنما أحلى حاجه
في السيسي على الإطلاق إنه سايبنا نهري عالفيس بوك و تويتر , و نتخانق و نقطع هدوم
بعض و نفتكس و نبقى علماء و خبراء في كل حاجه و ننفعل و نتحمق و نهري تاني و عروقنا
تبان و الأدرينالين يعلى و بعد كده نكتشف إننا مش فاهمين أي حاجه في أي حاجه و ننام
بقى وتاني يوم نهري و نفتكس و نخترع و نألف و نقطع هدوم بعض و ينضحك علينا و هكذا
, و هو السيسي ماشي في سكته و طريقه , لا بيبص يمين ولا شمال , ممكن بس يسأل علينا
من بعيد لبعيد .
.
بتخيل ان السيسي
عنده سكرتير اسمه حسن , ده اللي ماسك شئون الفيس بوك في مؤسسة الرئاسه , أخبار الولاد
عالفيس إيه يا حسن ؟ و الله يا ريس بيهرو في موضوع ياسمين النرش و طبعا فيه اللي منشكح
منها و اللي مش طايق أمها , أسف مامتها يا ريس , طب يا حسن أنا هقوم بقى عشان عندي
مشوار مهم أوي لروسيا .
.
الولاد عالفيس
عاملين ايه يا حسن ؟ و الله يا ريس بيتكلمو عن صفقة الرافال , أغلبهم مبسوط جدا و فيه
شويه بيقولو الرافال دي فتيسها بيقفش و شكمانها مخروم , السيسي ( بيبتسم ) طب أنا رايح
أفتتح قناة السويس الجديده بقى , بالإذن يا حسن .
.
هه طمني عالولاد
عالفيس يا حسن ؟ لا النهارده مشغولين ياريس في الكوره و الزملكاويه و الأهلاويه بيالشو
و يقطعو هدوم بعض , ماشي يا حسن ألحق انا أشوف ملف الضبعه النووي و عندي مشوار مهم
لجهاز المخابرات .
.
الولاد عاملين
ايه عالفيس بوك يا حسن ؟ بيتكلمو ياريس عن جوز الممثلين اللي راحو اشتغلو في قناة الإخوان
في تركيا يا ريس , أه تمام , طب بعد إذنك يا حسن بجهز لزيارة الصين .
.................................................
.................................................
باختصار , إمتى
هخاف على مصر في عهد السيسي ؟ في حالة واحده بس , لو قرر الراجل ده إنه يسيب شغله و
مصالحه و مشاريعه و خطته للمستقبل , ويقوم عامل أكاونت عالفيس بوك و يهري معانا و يسلّم
لنا دماغه , و نعوم سوا في ماية الطرشي و كده تبقى ندهته ( الندّاهه ) اللي اسمها مواقع
التواصل الإجتماعي .
............................................................................................................................
Mohamed
Hussein
5
يناير 2016·
الحكومه المصريه
هتعمل اول جامعه حكوميه في سينا , هتكون في مدينة الطور .
.
مبارك أهمل سينا
لمدة 30 سنه , و النتيجه شوفناها بعنينا , إرهاب و تجارة مخدرات و سلاح و غياب تام
لأجهزة الدوله .
.
اللي بيعمله السيسي
هو عملية تعمير حقيقيه لسينا , مشاريع كبيره و استثمارت و فرص عمل للشباب , و أخيرا
جامعه حكوميه عشان هو عارف إن تعمير سينا و تنميتها هيكون أقوى سلاح نواجه بيه الإرهاب
مستقبلا .
.........................................................................................................................
Mohamed
Hussein
3
يناير 2016·
هو الأهلي عايز
مننا ايه يا كابتن متحت ؟ دانا كنت خلاص بجهز الألشات و بعلّق الكهارب و الزينه عشان
نبدأ الحلفه .
..........................................................................................................................
Mohamed
Hussein
3
يناير 2016·
جيل عره و شعب
عبيد و جيش بتاع كفته , و الازهر منظمه ارهابيه و الكنيسه تعبانه مُلّه , لازم بقى
نقتل الجيل العره ونحرق الشعب العبيد و نسرّح الجيش و نفكه و نهد الأزهر و نولّع في
الكنيسه .
.
لا نفس طويل ايه
و صبر عالتطوير و التعديل ازاي ؟ احنا لازم نهد على طول , أي حاجه ماتعجبشي حماده نهدها
, المهم حماده يبقى مبسوط و راضي , و نعمل ثورة كل شهرين و نغير حكومه كل يوم تلات
أكتر مابنغير الشرابات بتاعتنا .
.
أنا لسه عند رأيي
و قناعتي , ماسورة الحريه اللي انفجرت في وشنا بعد ثورة يناير و مع وجود مواقع تواصل
اجتماعي بيدخلها أي حد من غير بطاقه ولا حتى وصل نور , و يهري و يفتكس براحته , تبقى
جرعة الحريه اللي خدناها كانت زياده أوي عن اللزوم , جرعه سامه toxic dose , و كل الهري اللي حاصل هو عباره عن أعراض التسمم
بطبخه أمريكاني كتمت على نفسنا فجأه , اسمها الحريه .
.
الجيل العره ده
هو اللي خلّفنا و جابنا للدنيا , و الشعب العبيد هو اللي نزل قلع جذور الإخوان من الشوارع
, و الجيش و الكنيسه و الأزهر هما اللي حمو مصر في أصعب 5 سنين مرو في حياتها
, و حماده مش هيعجبه
العجب , يبقى طز في حماده , طز في الكولجيه و الخرفان , و من باب الإحتياط , طز في
حرية و افتكاسات سيد القمني .
............................................................................................................................
Mohamed
Hussein
3
يناير 2015·
مؤسسه عريقه عمرها
ألف سنه , نشرت تعاليم الدين الإسلامي في العالم كله , خرجّت أعظم مشايخ و علماء على
مر التاريخ , الألاف من علمائها لسه لحد النهارده سفراء فوق العاده في أفريقيا و أسيا
و أوروبا , و عشان مناهجها محتاجه تعديل و تطويرو تنقيح , و عشان بعض علمائها مؤخرا
( اتوسخو) بالفكر الوهابي و فلوس البترودولار نقوم بدل مانطالب بتطوير المناهج و تنقيحها
من الفكر الوهابي ده نطالب بإدراجها كمنظمة إرهابيه !! و او بمعنى اصح بدل مانوجه سهامنا
لمنبع الفكر الوهابي و نخسر ريالات طويل العمر نهد مؤسسه عمرها ألف سنه !! .
.
الأستاذ اللي قاعد
ورا قولت على سيد القمني مفكر و جامد تنين ولا لسه ؟ الأنسه اللي قاعده هناك انبهرتي
بفكر سيد القمني صح ؟ لا ماهو مش معقول تكوني مش انبهرتي ؟ و أي حد بيسمع فيروز و يقرا
لمحمود درويش و يعرف كلمتين فصحى على كلمتين إنجليزي لازم ينبهر , اومال يبقى فكرك
متحرر إزاي؟ و الناس تقول عليك أوبين ماينديد , طب إيه رأيكو أنا بقول بالمره نهد أبو
الهول , عشان عندي إحساس كده إن مناخير أبو الهول مش متعاطفه مع العلامه الفذ المجدد
اللي بيجي على راس كل 100 سنه , الضليع و الخبير و المفكر و الفيلسوف إسلام البحيري
.
.
بالمناسبه و من
غير مزايدات , أنا مؤيد جدا لكتير من أفكار إسلام البحيري ( لكن مش بديه أكتر من حجمه
....مجرد باحث مجتهد ) , و ضد حبسه تماما , و ضد قانون عبيط اسمه إزدراء الأديان ,
و ضد أفكار كتير بتصدر من داخل مؤسسة الأزهر, إنما لما توصل بينا الوقاحه إننا نطالب
بإدراج الأزهر الشريف كمنظمة إرهابيه يبقى طز في سيد القمني و طزين تلاته في إسلام
البحيري .
.
هدم المؤسسات العريقه
بدل إصلاحها و تطويرها ممكن نقول إنها مرحلة متأخره جدا من حرية الرأي , اسمها مرحلة
: المناخوليا !! .
............................................................................................................................
Mohamed
Hussein
2
يناير 2016·
حازم عبد العظيم
, و جهاز المخابرات بقى تدخل في انتخابات البرلمان و عمل تشكيله حلو كده و توليفه جوه
مجلس النواب , لا مش ممكن , مش معقول , إيتس امبوسيبول , أنا مش مصضأ نفسي ولا يمكن
أوافق عالكلام ده , ضميري المهني و نسقي الثوري و كلسوني البني و صباع رجلي الصغير
لا يمكن يسمحو بكده , دانت ناقص كمان تقول ان جهاز المخابرات تعامل بحرفية شديدة جدا
مع ثورة يناير و امتص الهوجه و خلّى الناس تشوف بعنيها الخرفان و ارهابهم و السلفيين
و بهاليلهم و الكولجيه و افتكاساتهم و شعاراتهم , و في النهايه عرف يعدّي بالبلد لبر
الأمان ؟! .
.
حاجه غريبه جدا
, إزاي نسمح لجهاز المخابرات المصريه يتدخل في شئون مصر في وقت عصيب زي اللي احنا فيه
ده ؟ و يعني ايه جهاز المخابرات المصريه يتدخل في شئون مصر ؟ هي سايبه ولا كانت سايبه
؟ احنا مايتدخلشي في شئونا غير جهاز المخابرات البريطانيه و التركيه و الصهيونيه بس
, أه طبعا , أومال نبقى ثوريين و كيوت و أوباما يشيد بثورتنا إزاي ؟! أهو أوباما لما
يسمع خبر زي ده ممكن ياخد على خاطره و يرجع في كلامه و مايدرّسشي ثورة يناير في مدارس
أمريكا , دانا كنت عشمان ألاقي صورة وائل غنيم و يسري فوده و مصطفى النجار و البت مروه
الشاطره اللهلوبه على جلدة كتاب التربيه الوطنيه بتاع سنه تالته ابتدائي في أمريكا
, الله يسامحها المخابرات المصريه بقى .
.......................................................................................................................................
Mohamed
Hussein
2
يناير 2016·
صباح الخير
.
البت لمار بنتي
اللي في kg2 , اللي هي خليفتي في ملاعب الألش و الإفتكاسات
, امبارح نامت جنبي كالعاده عشان احكي لها حدوتة قبل النوم , و بعد ما حكيت لها الحدوته
قلت لها نامي بقى يا لمار , قالت طيب بس هراجع حاجه خدتها في المدرسه بسرعه كده عشان
اعرف انام , قلت لها أوكيه راجعي , قامت عملت صباعها زي قلم كده و بدأت تكتب على بطني
و ترسم الحروف , A , P , P
, L, E تبقى إيه ؟ صح
تبقى APPLE , أبلّ , و نطقتها 3 مرات , بعد شويه لقيتها
بتدعك بطني رايح جاي بكف إيديها , قلت لها انتي بتزغزغيني ليه يا لمار ؟ قالت لي يا
بابا انا مش بزغزغك , انا بمسح السبوره !! .
.
أهو انا كنت بالغباوه
دي وانا صغير , بذاكر كده , في أي مكان , في البيت , في الطريق , وسط الأراضي الزراعيه
, فوق السطح , في البلكونه , عالسرير , وانا باكل , او حتى وانا في الحمام , معايا
كتاب ماشي , مش معايا مش مهم , و أكتب بصوابعي في الهوا و أكلم نفسي و انا ماشي ( قال
يعني بشرح لها ) , واندمج و انفعل و اتشقلب كده كداهو , و الناس يقولو عليا مجنون
.
.
أتوقع ليكي طفوله
مرهقه وقاسيه يا لمار , ماهو انا مش عارف أجيب لك أرض زراعيه منين عشان تذاكري فيها
زي ماكنت بعمل , هتلاقي متعه تانيه خالص لما تبقى الخضره حواليكي على مدد الشوف و تعلّي
صوتك براحتك , انما حظك يا بنتي انك اتولدتي و عيشتي في القاهره , و في القاهره لو
واحد قدام عمارته شجره يتيمه عمرها 6 شهور و شارع عرضه 9 متر و بيبيع شقه في العماره
دي بيقولك دي على جنينه !! و فيو مفتوح !! و انا اضحك بقى و اتشقلب تاني و أقولهم معذورين
, ماهو اللي مابيعرفش بيقول عدس .
....................................................................................................................................
Mohamed
Hussein
1
يناير 2016·
حدوتة قبل النوم
.
كان يا ماكان يا
ساده يا كرام ولا يحلى الكلام إلا بذكر النبي عليه الصلاة و السلام .
.
كان فيه نمله اسمها
فوزي و كانت بتكره الأسد أوي بس مش عارفه تعمل معاه ايه , و في يوم من الأيام النمله
فوزي قابلت صرصار اسمه حشمت , و بعد ماتعرفو على بعض و كده , النمله فوزي صارحت الصرصار
حشمت بانها مش طايقه الأسد و نفسها تخنقه , و كانت المفاجأه إن الصرصار حشمت هو كمان
بيكره الأسد و نفسه يخلص منه النهارده قبل بكره .
.
النمله فوزري فرحت
أوي و قالت للصرصار حشمت : اسمع يا حشمت ياخويا , انا جت لي فكره جهنميه , بص , بصراحه
كده انا لوحدي مش هقدر عالأسد , و انت لوحدك مش هتقدر عليه , إنما لو حطينا إيدنا في
إيد بعض و نعمل ( تحالف النمله و الصرصار ) أكيد هنفرمه تحت رجلينا , الصرصار حشمت
عجبته الفكره و ( جزّ على سنانه ) و قال للنمله فوزي صح , فكره عبقريه , هات ايدك في
إيدي يا فوزي يا خويا , و بكره نهجم عالأسد و نقطعه نسايل نسايل .
.
و توته توته خلصت
الحدوته , حلوه ولا ملتوته ؟! .
.................................................................................................................
Mohamed
Hussein
1
يناير 2016·
بيان لتحالف الجماعه
الإرهابيه يطالب بالتصعيد في 25 يناير و استخدام كل الوسائل !! يعني حرق و تخريب و
سلاح ومولوتوف و سلميتنا أقوى من الرصاص .
.
كده يبقى عدّانا
العيب و أزح , أفران هتلر هتتفتح ( مكرهٌ اخاكَ لا بطل ) , والشعب اللي هيفتحها لا
شرطه ولا جيش , عشان الناس فاض بيها ( مع إني ضد نزول المؤيدين للشارع , ضد الطوفان
)
.
الكولجي اللي ينزل
مايلومشي إلا نفسه حتى لو كان سلمي , مانا هبسّطهالك , لو حضرتك قعدت في قاعدة حشيش
في شقه مشبوهه مليانه خمره و نسوان , وانت أصلا مابتشربشي حشيش و لا حتى سجاره عاديه
و بتكح من المايه الساقعه وأخر علاقتك بالحريم انك تبص عليهم و تمتع عنيك ( صحتك ماتجيبش
أكتر من كده ) , و احنا كبسنا عليكو بقى و عايزين نلمّكو و ننضف الشقه المشبوهه دي
, المفروض نقولك إيه ؟ خليك انت يا حماده عشان انت شكلك كيوت وابن ناس ؟! .
.
أصدقائي الثوار
القدامى , نصيحة لوجة الله تعالي , انا أصلا مابقيتش طايقكو بس أهي نصيحه أخيره , ماتنزلوش
, الخرفان هينزلو , و هتبقى معركة دولة و شعب ضد جماعه إرهابيه , ده وصفها باختصار
و بدقه , معركه مالكوش فيها , المره اللي فاتت كنت معاكو و مؤيد تماما و كنا كلنا حمير
بس عدّت على خير , بلاش تبقو حمير المرادي كمان , عشان الطوفان مش هيرحم .
..........................................................................................................................
Mohamed
Hussein
1
يناير 2016·
فن اسمه الطرقعه
و الكرباج
.
طب انت يا محمد
عملت ايه في 2015 ؟ الإجابه , بسم الله الرحمن الرحيم , كنت بطرقع للخرفان و الكولجيه
,..... طب هتعمل ايه بقى في 2016 ؟ أكيد طبعا هطرقع للخرفان و الكولجيه .
.
طب ليه يا عم محمد
؟ مش جايز انت ظالم الناس دي و بتفتري عليهم يا مفتري ؟ أنا ؟ لا و الله أبدا , مممممممممم
تعالي يا سيدي و انا أشهّدك عليهم عشان تعذرني , ممكن نبدأ بالخرفان لو تسمح لي يعني
أقولك هما ليه يستحقو لقب خرفان بكل جداره .
.
من كام يوم كتبت
بوست بعنوان ( سد النهضه يا سد النهضه ) , ناس كتير شيرو البوست , اللي عارف انتمائي
السياسي هيكون في الغالب عارف انا بكتب ايه , و اللي مش متأكد أهو بيقرا قبل ما يشير
, المفاجأه بقى كانت في التالي , لقيت واحد مشير البوست و هو حاطط صورة مرسي عالبروفايل
و اشارة رابعه !! , و مش كاتب اي كومنت عالبوست بتاعي من فوق , يعني بيستشهد بيه ,
و غالبا هو قري العنوان بس و فهم منه اني بهاجم السيسي و الجيش على تعاملهم في ملف
سد النهضه و بقول انه مفيش فايده و هنموت من العطش !! مع ان المكتوب في البوست كان
العكس تماما .
.
طب لحد كده ماشي
, المفاجئه التانيه عند صاحبنا ده , إن واحد اخوانجي برضه دخل علق على نفس البوست بتاعي
و بيقول ( انا كنت عارف ان مفيش فايده و عارف انها هتخرب بس بصراحه ماكنتش أعرف التفاصيل
اللي حضرتك كاتبها دي ) !! , المعنى إن الاتنين خرفان محدش فيهم بيقرا , هما بيعملو
شير ( بمجرد الإشتباه ) و بيعلقو و هما مغميين عنيهم زي الطور المربوط في ساقيه , عرفت
ليه اسمهم خرفان ؟!! .
.
طب عرفت ليه شبكة
رصد لو نشرت بوست أي بوست مهما كان المحتوى بيتعمل له شير ألاف المرات من الخرفان في
نفس اللحظه ؟ تعالو نعمل تجربه بسيطه , واللي يعرف أدمن في رصد يبلغه الرساله دي ,
قوله يكتب بوست عالصفحه بالشكل ده .
.
العنوان : عودة
الرئيس الشرعي محمد مرسي لا محاله .
.
التفاصيل : ((
و من المؤكد أن عودة الرئيس الشرعي الدكتور محمد مرسي هي مجرد وهم و خزعبلات في عقول
الخرفان و المتخلفين عقليا , عشان كده مش هنهري فيها , تعالو احكي لكو حكايتي مع المزه
, احنا اتقابلنا و روحنا عندها الشقه , لقيتها ضحكت عليا وكانت قايلالي بابا وماما
موجودين , مالقيتش حد , قلت لها انتي بتخدعيني يا تفيده , و بعدين زعلت منها أوي بس
سهرنا سهره حلوه بصراحه )) ................ انتهى البوست , و شوف كام ألف خروف ممكن
يعمل له شير على شبكة رصد .
....................................................................................................................
ليست هناك تعليقات:
إرسال تعليق