Mohamed
Hussein
31
ديسمبر 2015·
اعترافات ( ليلة
راس السنه )
.
عارف انت العيال
المسلمين اللي كانو بيروحو كل ليلة راس سنه يرشقو قدام كنيسه و يبصو عالبنات اللي داخلين
و هما لابسين جيبه فوق الركبه و يقعدو يقولو لبعض دول بيطفو النور الساعه 12 في الكنيسه
و يبوسو بعض ؟ أهو انا كنت عيل من العيال دي .
.
ههههههههههه مره
وانا في الكليه خدت اتنين صحابي مسلمين , واحد كان في طب و واحد في صيدله و روحنا عند
كنيسه في المنصوره ليلة راس السنه و قولنا هنسمي نفسنا بأسماء تانيه , جورج و جرجس
و مايكل , مش فاكر انا كنت مين ( تقريبا انا كنت جرجس أو جورج عشان شكلي مايليقش عليه
مايكل خالص ) و ندخل الكنيسه بقى و نبوس يا معلم , بس قفشونا من عالباب و كنا هنتنفخ
.
.
و تجري السنين
و نعرف بعدها ان الكنيسه لا فيها بوس ( ولا سلاح ), يعني كنا هنتنفخ عالفاضي .
.
كل سنه و انتو
طيبين يا أقباط مصر و مسلميها .
...................................................................................................................
Mohamed
Hussein
31
ديسمبر 2015·
توقعاتي و تنبؤاتي
وإرهاصاتي و افتكاساتي لسنة 2016.... معكم خبير الأبراج و عالم الفلك محمد حسين
.
و حيث إن سنة
2016 هيحصل فيها احتكاك بين كوكب زحل و كوكب بلوتو ( تحرش على خفيف كده ) , و حيث إن
السنه هتبدأ يوم جمعه و طبعا يوم الجمعه بييجي بعده السبت و بعدين الحد و بعدين الإتنين
اللي هو أجازة الحلاقين , و حيث إن العيال الصغيرين في كوكب عطارد ممكن يضربو شماريخ
و ألعاب ناريه يوم احتفال عطارد بعيدها القومي اللي هو يوم 7/7 الساعه 7 ...أتوقع ما
يلي :
.
1- البرادعي هيعقل
و يعتزل السياسيه و يتحجّب و يبطل يكتب تويتات وأخر تويته هيكتبها هيقول فيها ( تحيا
مصر ) , و الكولجيه هيبطلو يقولو أبو 50 % و جهاز الكفته و الشعب العبيد و هيقررو انهم
يولعو في قادتهم و يحرقوهم بجاز , و ينزلو الشارع و يلعبو سياسه بدل شم الكوله اللي
قطع نفسهم .
.
2- محمد عطيه هيعمل
ألبوم غنائي جديد بعنوان ( حبيبي راجل أوي ) وانا هقوله صادق من غير ماتحلف .
.
3- هيحصل حادثة
قطر و يروح ضحيتها 17 واحد و عيل صغير في البرازيل أو الأرجنتين , مش واضحه قدامي أوي
, إنما هي في العبّ اللي هناك ده .
.
4- في الفن أتوقع
عمل فني ضخم عن حرب اكتوبر يقوم ببطولته فاتن حمامة الله يرحمها و فريد شوقي الله يرحمه
و معاهم استاذ نبيل الحلفاوي طبعا .
.
5- أحمد موسى هيرجع
لشغلته الأصليه ( صبي عجلاتي ) و مرتضى منصور هيتزحلق عالسلم و يقع على دماغه و يفقد
حاسة النطق لفتره مؤقته و يضطر وقتها يستخدم الإشارات البذيئه بالأصابع عشان لسانه
هيكون بعافيه شويه .
.
6- السعوديه بعد
ما عملت عاصفة الحزم و التحالف الإسلامي هتنزل بحاجه جديده لانج في 2016 اسمها ( عاصفة
حزم التحالف الإسلامي ) هينزل منها لونين الموف و اللبني و هيبقى لها جراب شكله شيك
أوي و مكتوب عليه لا اله الا الله محمد رسول الله و مرسوم جنبها 52 نجمه .
.
7- الصين هتعمل
فندق كبير شويه و تسميه فندق ( الدوحه ) و هتطلب 200 ألف نزيل للفندق من القطريين و
هتغريهم بإقامه مجانيه مدى الحياه و القطريين هيروحو , و بالتالي تميم ابن موزه مش
هيلاقي حد يحكمه غير أحمد منصور وعاصم عبد الماجد و عفيفي الصومالي سوّاق اللاندكروزر
.
.
8- كيم كارديشان
هتيجي تزورني في الصيدليه و مش هتشتري حاجه بس مش مهم .
.
8 - غزل المحله
هيفوز بالدوري و من الدور الأول كمان و أحسن لاعب موسم 2016 /2015 هيكون حمادة طلبه
.
.
.
يوووووووووه ,
انا عايز أطلع في الفضائيات النهارده بقى عشان أقولهم على تنبؤاتي الخطيره دي .
...............................................................................................................................
Mohamed
Hussein
31
ديسمبر 2015·
باقي في 2015 كام
ساعه قليلين أوي , وانا لسه ماحققتش ولا حلم من أحلامي , أه و عهد الله , لا بقيت غني
أوي ولا ناجح في شغلي و مشهور ولا حتى وسيم شبه أحمد عز الممثل , عموما الواحد مش لازم
يفقد الأمل , الكام ساعه دول ممكن يحصل فيهم حاجات كتير , و الجون بييجي في ثانيه
, انا عشمان بس يكون حظي زي حظ الأهلي كده , وأفوز في أخر دقيقه , يعني مثلا ممكن يدخل
عليا راجل لابس أبيض فابيض و راكن حصانه الأبيض قدام الصيدليه و يرمي لي شنطة سامسونايت
كبيره مليانه دولارات , أه حاجه يعني من قصص و حواديت محمد حسان اللي بتخلي الواحد
يتشحتف دي , أو التليفون يرن و ألاقي واحد صوته فخيم كده بيقولي احنا عايزينك معانا
و بالمرتب اللي تطلبه , ساعتها مش هسأله انتو مين ولا عايزني معاكو فين , انا هروح
على طول , هروح يا بيه , ياكشي يكون تاجر حشيش ومحتاج ديلر لمنطقة مدينة نصر .
أو تيجي الساحره
الطيبه الكيوت اللي شبه عمرو حمزاوي و تلمسني بعصايتها السحريه و تجيب معاها مرايه
و تقولي بص في المرايا كده ؟ ألاقي أحمد عز الممثل قدامي , و أقول واووو بقى وأحبني
أوي , و أقعد أصور نفسي صور سيلفي كتير كل 3 دقايق و أنزلها عالفيس بوك , بلا كتابه
بلا وجع قلب , و اللايكات تنزل عليا زي المطر .................. أديني مستني أهو
.
.
كل سنه و حضراتكو
طيبين .
............................................................................................................................
Mohamed
Hussein
30
ديسمبر 2015·
عبد الفتاح السيسي
: أنا ماضيعتكوش قبل كده عشان أضيعكو في ملف سد النهضه !! .
.
لا يا عم , و لا
الكلام ده يدخل دماغنا ببصله , احنا نضمن منين ؟ و بعدين انت تلاقيك ماتعرفشي الحلول
اللي احنا عارفينها و بنهري فيها دي , و النبي تلاقيكو ماتعرفوها , هتعرفوها ازاي بس
؟ دانتو حيالله رئيس دوله و وزير خارجيه و وزير ري و رئيس مخابرات و معاهم ييجي 50
مستشار , و بعدين احنا لازم نتأكد و تقول لنا بصراحه هتعملو ايه , لو هتضربو السد يبقى
لازم تعلنو الكلام ده و الخطه و نفتح الموضوع في حوار مجتمعي و نجيب جميله اسماعيل
و أيمن نور و نتناقش خطة ضرب السد عالهوا , و لو مش هتضربو برضه تقولو لنا هتعملو ايه
و تتصرفو ازاي و كلمتو مين و قالكو ايه و جبتو المسدس بكام , يعني باختصار اجتماعات
سد النهضه كلها تتسجل فيديو و تتذاع لنا بعد نشرة تسعه , وكمان مش هنصدق , هات لنا
بقى رقم الموبايل بتاع رئيس وزراء أثيوبيا عشان نكلمه و نتطمن بنفسنا و عايزين منك
يا سيسي وصل امانه يكون ماضي عليه كوفي عنان و هانزبليكس .
.
.
من يوميات حودة
الكولجي
المهنه السابقه
: محلل اقتصادي و عسكري و خبير سدود و طيارات رافال .
المهنه الحاليه
: عاطل عن العمل و صايع و عنده أكاونت عالفيس بوك .
................................................................................................................................
Mohamed
Hussein
30
ديسمبر 2015·
اللي إيده في المايه
, واللي إيده في النار
.
- اللي إيده في
المايه بيقعد يهري و ينكت في كل حاجه , و يحط عيشه على أم الخير , و يقول النظام النظام
النظام , النظام اضطهد توفيق عكاشه و النظام أسقط السلفيين في الإنتخابات ( عشان السيسي
ضد الفكر الوهابي ) و النظام سجن اسلام البحيري ( عشان السيسي مؤيد للفكر الوهابي
) !! .
. واللي إيده في
النار شايل الحمل على كتافه و ماشي في سكته , مابيبصش وراه , ماهو لو ركن جنب كل واحد
بيهري ثانيتين بس يبقى مش هيتحرك من مكانه خطوه واحده لقدام .
.
- اللي إيده في
المايه قاعد في شغله قدام لابتوبه و بيعزف عالربابه بمصطلح ( البطاله ) و الناس اللي
مش لاقيه تاكل .
واللي إيده في
النار بيعمل مشاريع اقتصاديه عملاقه عشان الناس و بيقول يا ناس محتاجين ييجي نُص مليون
عامل في السنتين دول عشان مشاريع ال 1.5مليون فدان , و العاصمه الإداريه الجديده و
غيرها , يا ترى هنلاقي ؟ يا ناس فيه 300 ألف شاب سوري نزلو مصر في سنتين و محدش فيهم
قعد عالقهوه , يا ناس مصر مفهاش أزمة بطاله , مصر فيه شباب مش عايز يشتغل .
.
- اللي إيده في
المايه صوّر ال 14 واحد اللي معاهم ماجستير و بيعملو وقفه احتجاجيه كل اسبوع و قال
الدوله بتحارب علمائها , لا سأل في يوم هما معاهم ماجستير في ايه ؟ و ماشتغلوش ليه
؟ و هما شغالين فعلا ولا لا ؟ و كلمة عالم بقت مبهوقه كده ليه ؟ طب لو بذلو مجهود أد
اللي بيبذلوه في الوقفه الإحتجاجيه في التدوير على شغل مش كانو اشتغلو ؟ طب هي الدوله
وعدتهم قبل ماياخدو الماجستير بوظايف في المجلس الأعلى لعلماء العالم و بعدين خلت بيهم
؟! .
.
واللي إيده في
النار بيقولك مصر يا مولانا فيها في أخر 10 سنين أكتر من 100 ألف واحد واخدين ماجستير
في التنميه البشريه و إدارة الأعمال , الماجستير ممكن تاخده في شهرين , و لو معاك فلوس
هتاخده وانت قاعد في بيتكو , يا سيدي بقصد الماجستير .
.
- اللي إيده في
المايه بيتكلم عن سد النهضه و يهبّل و يعمل حلول و شألباظات و كوميكس و يقول السواد
جاي و الغوريلا على الأبواب .
و اللي إيده في
النار بيدرس كل حاجه و يستف أوراق و يشوف الوقت المناسب و يدرس رد الفعل العالمي و
مش بعيد يكون بيتشاور مع دول معينه عشان حكاية رد الفعل دي .
.....................................
.....................................
باختصار , اللي
إيده في المايه مش عايز حلول ولا عايز يوجه رساله سليمه للنظام ولا عارف يحط صباعه
على مشكله و سببها , هو عايز يهري و ينكت و يشتم في السيسي 17 مره في اليوم , و مفيش
مانع يشتم عبد الناصر كمان ( من باب الإحتياط ) .
.
- تعالى و انا
أقولك الرساله السليمه بتبقى ازاي و اهو ترحم اللي إيده في النار من الهري بتاعك شويه
.
.
1- أنا ضد سجن
إسلام البحيري , و حكاية ازدراء الأديان دي هي قصه فاشله ولا تليق باسم مصر , القانون
لازم يتغير و يتنسف ( شاور بقى على مجلس النواب و ابعت له رساله ) , بس كمان لازم تبعت
رساله لنقابة المحامين و تسألهم السؤال ده : هو مفيش قانون كده يلزم المحامين انهم
مايرفعوش قضايا عمال على بطال للشهره و قتل الفراغ و الملل ؟! .
.
2- ياريس محتاجين
مدينة بحث علمي كامله شامله , مصر فيها أكتر من 40 ألف عالم بره و جوه , ثروة قوميه
جباره , قول لنا لو فكرنا نعملها ولازم نعملها هنحتاج ميزانيه اد ايه ؟ و ممكن نبدأ
فيها إمتى و نجيب تمويلها منين ؟ و طبعا وقتها ال 14 واحد بتوع الماجستير هيعملو وقفه
احتجاجيه كالعاده .
.
3- في موضوع سد
النهضه لازم نعترف انه أكبر من استيعابنا و نبطل نهري , الحلول الدبلوماسيه بتمشي فيها
لحد أخر خطوه و كل الحلول متاحه قدام النظام السياسي , حتى لو وصل الأمر لحرب شامله
, نقطة المايه مفهاش هزار , مطلوب مننا ندعم النظام السياسي و نثق فيه و بس .
.
.
.
ملحوظه أخيره
, اللي إيده في المايه هيقرا سطرين تلاته من البوست , و مش هيفهم أنا بقول إيه , و
هيدخل يكتب تعليق و يقول ( انت أمنجي و طبّال و ابن #$%%^) .
.............................................................................................................................
Mohamed
Hussein
29
ديسمبر 2015·
لو سمحت لو سمحت
, ممكن حضرتك تتعاطف مع إسلام البحيري و تقول عليه مجدد للخطاب الديني و جرئ و مستنير
, وهو أملنا في تنقيح كتب التراث من الشوائب و الإسرائيليات و أملنا كمان في الوصول
لكاس العالم .......... و نخلص بقى من جون مجدي عبد الغني .
.
أو ممكن حضرتك
تهاجم إسلام البحيري و تشوفه ملحد و زنديق وفاسق و ماجن و يسخر من الأئمه العظام و
من ألهتنا العوالي ,.... أحدٌ أحد ياعم الحاج .
.
المهم يا مولانا
في كل الأحوال , أبوس إيدك يا شيخ طلّع الدوله و النظام و السيسي من قصة إسلام البحيري
دي و من افتكاساتنا اليوميه , السيسي لا هو وهابي و بتاع بول بعير ولا هو ملحد و فلاتي
و و خاربها مداين .
.
أنا شخصيا عجبتني
حاجات كتير جدا في أفكار إسلام البحيري و متفق معاها تماما , لكن لما شوفت مقابلاته
ماحستش إنه يعول عليه في تجديد و تنقيح كتب التراث و المناهج الإسلاميه , شوفته باحث
عمل أبحاثه في كذا نقطه خلافيه و ركز عليهم تماما , اما خارج الكذا نقطه الخلافيه فهو
أبيض يا ورد , يعني مايختلفش عني كتير .
.
و بالتالي فهو
مش عالم ملمّ بالأصول و القواعد الفقهيه زي غيره من علماء الأزهر , عشان كده قررت من
شهور إني مش هعمل تمثال لإسلام البحيري في مدخل بيتنا , لا تمثال عشان أعبده ولا تمثال
عشان أرجمه , له ماله و عليه ما عليه .
.
القصه كلها في
اعتقادي هي قصة محامي بيرفع قضيه و قاضي بيحكم و شوية قوانين باليه محتاجه تتنسف ,
بالظبط زي حكاية المحامي سمير صبري اللي كل مايشوف واحده ممثله كاشفه كتفها يرفع عليها
قضيه بتهمة ماعرفشي إيه و أحيانا كتير بيكسبها , تفتكرو الدوله و السيسي بيبقو موقفهم
ايه من ( كتف ) المممثله ؟! .
............................................................................................................................
Mohamed
Hussein
29
ديسمبر 2015·
عشان حضرتك ماتتفاجئش
.................. حوار مع كولجي
.
أنا : طيب يا سيدي
قولنا الحل من وجهة نظرك في موضوع سد النهضه ده ؟ .
هو : مانت لو رجعت
لفترة حكم العسكر من أيام عبد الناصر كنت هتعرف ان السبب هو أاأ
.
أنا : يابني ارحم
أمي العيانه , بسألك عن سد النهضه , جاوب ماتخنقنيش
هو : أوكيه هجاوب
, ولو إن الوعي الجمعي و النظره الشامله تتطلب أأأ
.
أنا : ياض جاوب
بدل ماغزّك .
هو : طيب , الحل
يا عبيد البياده هو المفاوضات طبعا و الوصول لأحسن وضع من سد قائم لا محاله .
.
أنا : يعني زي
ماحنا ماشيين كده ؟ تفتكر هو ده الحل؟ .
هو : لا بص , المفاوضات
مش هتجيب نتيجه , احنا نقفل الملف ده و نحوله لمجلس الأمن و المحكمه الدوليه .
.
أنا : و مجلس الأمن
و المحكمه الدوليه هيجيبولنا حقنا ؟ طب فكره برضه , ممكن بعد المفاوضات نعملها .
هو : لأ لأ , المحكمه
الدوليه مش هتجيب لنا حقنا و الحكايه هتاخد سنين نكون موتنا من العطش , ده مش حل ده
عبث و تضييع للوقت و ده في صالح إثيوبيا .
.
أنا : يابني مش
انت اللي لسه قايل كده ؟
هو : سوري نسيت
, بص بقى من الأخر , لا مندوحه من ضربه عسكريه للسد و نخلص و نرتاح كلنا .
.
أنا : طب لو ضربنا
السد انت عارف ان امريكا و الدنيا هتتقلب علينا .
هو : أيوه عارف
, بس حق المواطن المصري في ماية النيل لا يمكن التنازل عنه مهما كان التمن , أي كلام
غير كده يبقى مجرد تخرّصات .
.
أنا : طب لو السيسي
عمل كده فعلا , هتطلع بعدها تسأف له و تشيد بشجاعته و انه خلص المشكله من جذورها و
تقف وراه بقى ضد أي عدوان او هجوم ممكن يحصل على مصر ؟ .
هو : لأ طبعا
, وقتها هقول السيسي الغبي وقع في الفخ اللي مايقعشي فيه عيل صغير أد كده , و لبّسنا
في الحيطه و الأيام الجايه سوده , يسقط يسقط حكم العسكر .
...................................................................................................................
Mohamed
Hussein
28
ديسمبر 2015·
توفيق عكاشه مضطهد
من النظام و عايز يهاجر ألمانيا , و كمال ابو عيطه مضطهد من النظام و طالب اللجوء السياسي
لأي دولة عربيه , و الواد اللي انضرب مطوتين في محطة المترو مضطهد من النظام والنظام
كان عايز يغتاله , و عندي واحده في الأصدقاء المايه قطعت عندها في الكافتريا بتاعتها
فقالت النظام بيضطهدني و باعت لي ظباط امن دوله و مخابرات و صاعقه عشان يقطعو المايه
( أه والله ) , و انا يا مؤمن بقالي ساعه مادخليش زبون واحد الصيدليه , أكيد السيسي
بيضطهدني , و موقّف أمناء شرطه على أول الشارع و أخره عشان يمنعو الزباين انها تيجي
عندي و يوقفو حالي بقى .
.
عاااااااجل , بيان
من رئاسة الجمهوريه : صرح السيد الرئيس عبد الفتاح السيسي إنه و عهد الله والختمه الشريفه
وشبكة العشره دول ماهو فاضي لتوفيق عكاشه ولا لكمال أبو عيطه ولا يعرف الواد اللي خد
مطوتين و لا في دماغه الكافتريا بتاعة الأنسه ولا الصيدليه بتاعة محمد حسين , كما يناشد
السيد الرئيس سيدات مصر قائلا لهم : لو سمحتي , لو سمحتي , لو حضرتك انشغلتي عالفيس
بوك و نسيتي صنية البطاطس في الفرن و اتحرقت ماتقوليش إن النظام بيضطهدك , أه صحيح
.
..................................................................................................................
Mohamed
Hussein
28
ديسمبر 2015·
كتبت بوست امبارح
عن سد النهضه و قلت السيسي هيتصرف أكيد , هو أصلا ماعندوش رفاهية الإختيار , لا قلت
انه جبار و بيمشي عالحيط ولا حاجه , و بعد ماروحت البيت و نمت جيت لقيت هجوم حاد من
الخرفان و الكولجيه , الخرفان عارفهم من زمان و بشم ريحتهم على بعد أميال , مانا لما
كان عمري 7 سنين كنت بشتغل راعي غنم مع جدي حسين الله يرحمه , الخرفان و الكولجيه مشتركين
في حاجه واحده , هي إن عندهم أرتيكاريا من حاجه اسمها السيسي أو حاجه اسمها جيش مصر
, لكن بيعبرو عن الأرتيكاريا دي كل واحد بطريقته , الخروف يدخل عالبوست و مايعرفش يعلق
على أي نقطه فيه يقوم يقول ( ربنا يحشرك مع عبد الفتاح السيسي ) , هو طبعا فاهم انه
كده بيدعي عليه , طيب يا مولانا , اللهم أمين , يارب احشرني مع عبد الفتاح السيسي و
مع جنود مصر و ماتحشرنيش مع محمد بديع و خيرت الشاطر , أظن الدعاء بتاعي واضح أهو
.
.
الكولجي لأ , مش
بيدخل يدعي عليا , هو بيدور في دفاتر الكولجيه الكبار على أي معلومه يكون مفادها ان
مفيش حل , مفيش أمل , مفيش فايده , ويقوم واخدها بطريقة ( كوبي بيست ) , يعني يقولك
مثلا : طب و السيسي هيعمل ايه في الإتفاقيه اللي وقع عليها ؟!! هههههههههههههههههههههههه
و عهد الله انتو بتضحكوني أكتر من اسماعيل ياسين , اتفاقية ايه يا هبل ؟ و مين في أم
المجتمع الدولي كان التزم باتفاقيه وقعها ؟ و ايه مشكلتك لما تطلع تقول احنا وقعنا
على مبادئ تفاهم و عملنا اجتماعات و حوارات اد كده و ان الطرف التاني رفض التعاون وبالتالي
يصبح التوقيع على الإتفاقيه كأن لم يكن , و تبعت جواب بالكلام ده لبان كي مون مع ورده
و دبدوب هديه ؟! و لما يفيض بيك من تصرفات الصهاينه هتقعد تقول أصلنا موقعين معاهم
معاهده سلام ؟! .... قول للكولجيه الكبار بتوعك يتألقو أكتر من كده شويه .
.
الخلاصه يعني
, شعار و مبدأ الخرفان و الكولجيه حاليا : املأو الأرض بترانيم الكأبه , وانثرو اليأس
و التشاؤم و السواد على قمم الجبال , و لو حد قالك يا غبي تفائل و هتتحل بإذن الله
قول عليه أمنجي و طبّال !! .
......................................................................................................................
Mohamed
Hussein
28
ديسمبر 2015·
توفيق عكاشه هيهاجر
و يسيب مصر , ألمانيا تستعد لاستقبال تاني أسوأ حدث في تاريخها بعد هزيمتها في الحرب
العالميه التانيه .
......................................................................................................................
Mohamed
Hussein
27
ديسمبر 2015·
سد النهضه يا سد
النهضه
.
- حصل يا مولانا
ان داعش لما قتلت 20 مصري في ليبيا كانت الأوامر للطيران المصري بنفخ الدواعش خارج
حدود مصر .
.
- حصل يا مولانا
ان كام عيل من داعش لما جابو مراسل الجزيره معاهم و حاولو يحتلو شبر من أرض مصر و يرفعو
عليه علمهم كانت النتيجه السريعه جدا برضه هي فرمهم في مكانهم .
.
- اللي عمل كده
مين بقى ؟ لا طبعا مش جميله اسماعيل ولا منظمات المجتمع المدني ولا تويتات البوب الأعظم
, اللي عمل كده جيش مصر و بأوامر مباشرة و سريعه من واحد اسمه عبد الفتاح السيسي .
.
- طب اللي حصل
ده كان رد فعل على مقتل 20 مصري ( عدد صغير جدا ) و احتلال كام متر من الأرض ( مساحه
صغيره جدا ) , فكرك بقى نفس الراجل ده ممكن يتهاون في موضوع مايه النيل و حياة 90 مليون
مصري ؟! .
.
- بص , لو كنت
كولجي أو خروف وانت عارف يعني انك صاحبي و حبيبي و بحب ألسعك على قفاك كل يوم مرتين
تلاته عشان أعرف انام , عايز أقولك و كمان عشان انا حافظك زي خطوط ايدي , انت نفسك
و حلم حياتك السد ده يتم و مصر ماتعرفش تتصرف حتى لو كنا هنموت من العطش كلنا المهم
تكون أثبتت ان قناعاتك صح , انت كارثه بالنسبالك لو نمت يوم و صحيت و عرفت ان موضوع
السد ده بقى بح , انت عامل زي الخنازير اللي مابتعرفش تعيش غير عالزباله , هو ده الخبز
اليومي بتاعك , و أي حاجه نضيفه بالتأكيد هتتعب معدتك .
.
- أنا كمواطن مصري
لا طبّال ولا زيّاط شوفت بعيني تعامل السيسي مع مواقف مماثله يبقى من حقي أقعد كده
و اركن ضهري على حيطه جامده و اقول انا مش قلقان , متفائل جدا , و جايز احتمال يعني
, موضوع سد النهضه دي يكون هو السلمه اللي هيطلع عليها السيسي برجله اليمين عشان يوصل
لنقطة الزعامه .
.
- كل اللي اعرفه
ان عبد الفتاح السيسي ماعندوش رفاهية الإختيار في الموضوع ده , هيعمل ايه بقى و يتصرف
ازاي ؟ مش شغلي , دي حاجه اكبر من استيعابي واستيعاب حضرتك , لما يكون حد قريبك عنده
الزايده ملتهبه و تاخده بسرعه للجراح الشاطر مش بتسأل الجراح هتعمل ايه و تتصرف ازاي
؟ كل المطلوب منك انك تقعد في الرسيبشن و تستنى شويه عشان تاخد المريض في ايدك و تقوله
حمد الله عالسلامه و تمشي .
.
- عايز أقولك كلمه
أخيره في ودنك يارب تفهم , في الماتش بتاع سد النهضه ده انت مش بتلعب مع أثيوبيا (
يارب تصدق ) , و اللي انت بتلعب معاه بدأ يبني السد بعد أحداث أم ثورة يناير ( فاهم
حاجه ؟ ) و بدأ يحول مجرى النهر بعد الزيطه بتاعة جنابك قبل ذكرى يناير ( برضه فاهم
؟ ) , بس مش مهم , زيط انت و هيّص و اعمل شألباظات , عندنا جيش هيلم ورانا كالعاده
, ماتنساش بعدها تبقى تشتمه ( كالعاده برضه ) .
......................................................................................................................
Mohamed
Hussein
27
ديسمبر 2015·
أجواء من الحزن
تسيطر على جماهير نادي الزمالك بعد قرار محكمة القضاء الإداري بحل مجلس إدارة النادي
الأهلي , و أنباء عن نزول الملايين من جماهير الزمالك إلى الميادين للمطالبه بعودة
الشرعيه المتمثله في الرئيس المنتخب محمود طاهر .
..............................................................................................................
Mohamed
Hussein
26
ديسمبر 2015·
ألو , أيوه ياريس
برايز , دلوأتي الوضع اختلف تماما , احنا عملنا كل اللي قلت عليه , هرينا في حكاية
الإختفاء القسري دي و جبنا تقارير و حبشتكانات و البرادعي كتب تويتات و لقينا واحد
انضرب مطوتين قولنا فرصه , النظام الفاشي القمعي كان عايز يقتله مع انه محدش يعرفه
اساسا و خالته نفسها بتتلخبط في اسمه , و أردوغان الله يستره قابل الراجل بتاعنا عالجسر
اللي كان هينتحر ده و وقف و اقنعه انه ماينتحرش و الحكايه اتصورت فيديو مع انها اتهرت
في ألف فيلم قبل كده إنما قولنا هتاكل مع الناس , بس ولا الهوا ياريس , الناس بتتريأ
علينا و تألش كل مانعمل حاجه , حتى السيسي بتاع الإنقلاب لما فرحنا بخطابه اللي جاب
فيه سيرة 25 يناير و قولونا الدنيا هتسخن أتاريه كان بيسلمنا للشعب تسليم أهالي , شكلنا
كده هنتفنخ , لا معانا شعب ولا جيش و لا فيديو ولا مُكْنه , و بقينا معيره لطوب الأرض
, هنعمل ايه ياريس ؟ شور علينا يا كبير , إيه ؟ بتقول ايه ؟ عندك الشريط الجديد بتاع
سلمى حايك , قشطه , انا راشق معاك في المصلحه دي , مسافة السكه أكون عندك , في حفظ
الله يا كبيرنا .
................................................................................................................
Mohamed
Hussein
26
ديسمبر 2015·
أه يا سيدي , في
عرف الدول المحترمه زي مصر كده , إن أي اختراق لحدود الدوله بيتم التعامل معاه بإطلاق
النار الحي مباشرة من غير مايشوفو بطاقة الشخص ده ولا يكشفو عن قواه العقليه و لا يعالجو
حب الشباب بتاعه , الحكايه مش بتبقى ( هوباليصا ) ولا هي جُرْن الهبله .
.
هزيدك من الشعر
بيت , في الجيش المصري تحديدا و في الوحدات العسكريه اللي جوه الأراضي المصريه مش عالحدود
ولا حاجه , لو حضرتك مشيت في وحده عسكريه بالليل و راكب عربيتك و مع إنك بالتأكيد عديت
على بوابة الدخول و فتشوك و اتأكدو من هويتك , بس هتلاقي عساكر خدمه في الطريق , هيطلبو
منك تطفي النور و تقول كلمة السر من على بعد مسافه معينه و بعد كده يشوفو هويتك و يتأكدو
منها , لو رفضت اي حاجه من دول يا معلم يبقى من حق العسكري يضربك بالنار حتى لو كنت
انت قائد الوحده العسكريه دي أو حتى وزير الدفاع شخصيا .
.
هو ده جيش مصر
اللي انا فخور بيه , و طز في حماس و طز في قناة الجزيره و طز حتى في جنابك , ماتيجي
أحكي لك حدوته صغيره كده بس يارب تفهمها , مع انك و عزة جلال الله حمار و مش هتفهم
انا عارف , بقى يا مولانا الحمار سمعت عن الفتاه المسيحيه المصريه اللي اسمها ماريانا
عبد المسيح اللي هربت من تنظيم داعش في أسيوط بعد ماغتصبها كذا مره ؟ و قدرت توصل للأمم
المتحده و عرضت قضيتها و قضيه المسيحيين اللي داعش في مصر بتغتصبهم و تبيهم لكلاب السكك
؟ و بعدين طلبت انها تقابل الرئيس العراقي و تطلع في ندوه في جامعة بغداد و فيه مذيع
عراقي هيستضيفها النهارده عالهوا ؟ سمعت عنها ؟ طب فاهم طيب يا حمار ؟! .
.
هبسطهالك عشان
انت حمار , القصه مقلوبه , الفتاه اللي بحكي لك عنها يزيديه و هربانه من داعش في الموصل
و طلبت انها تقابل الرئيس المصري و تلقي ندوه في جامعة القاهره و تطلع في برنامج إعلامي
في التلفزيون المصري , عارف ليه القصه مقلوبه ؟ عشان احنا عندنا نعمه من ربنا اسمها
جيش مصر العظيم .
.
جيش لا بيسمح لحد
يخترق حدوده ولا بيخلع هدومه و يرمي سلاحه زي غيره ماعمل ولا هيسمح لكلب من داعش يسيطر
على شبر أرض في مصر , خليك انت بس اتفرج عالجزيره و استنى حركة حماس لما تحرر لك القدس
و كده , و من باب الإحتياط و انت نايم ابقى نام جنب أخوك خلف خلاف عشان تعرفو تشمو
في صوابع رجلين بعض .
..............................................................................................................................
Mohamed
Hussein
26
ديسمبر 2015·
ههههههههههههههه
قابل يا عم و قعد معازيمك , الوقت النموذجي للعب الكوره الشراب .
.
محاولة اغتيال
للصحفي أحمد جمال زياده على كوبري المشاه بتاع محطه مترو مش عارف ايه كده , قدام الناس
, اتنين بلطجيه كام معاهم مسدس او بندقيه مش فاكر و ثبّتو أحمد جمال , و ضربوه بالمطوه
, و هو عرف يمسك المسدس منهم والا كانو هيقتلوه , و البلطجيه ماسرقوش منه حاجه لا موبايل
ولا فلوس , بس أكيد تبقى دي محاولة إغتيال من نظام فاشي قمعي .
.
س 1 : حضرتك سمعت
عن كاتب صحفي اسمه احمد جمال زياده ؟ يعني حد جامد تنين و كده و الدوله الفاشيه خايفه
منه عشان ممكن يقلب نظام الحكم سبع مرات ؟ مش كانو البلطجيه دول من باب أولى يثبّتو
بلال فضل مثلا ؟ .
.
س 2 : حضرتك تعرف
فيه كام واحد مصري عالفيس يوك كاتب تحت اسمه المهنه كاتب صحفي ؟ أعتقد حوالي 900 مليون
.
.
س 3 : الشرطه البلطجيه
بعتت اتنين بلطجيه عشان يقتلو الكاتب الصحفي الجامد التنين ده على كوبري مشاه في محطه
مترو وسط الناس ؟ و كان معاهم سلاح ألي بس ضربوه بالمطوه صح ( حركة تمويه يعني ) ؟
قشطه عليك , لا دي تبقى محاولة اغتيال رسمي بقى .
.
.
أصدقائي الكولجيه
, حبايبي بتوع صفحة 6 ابريل , خرفان مصر و حميرها , مش مهم ان دماغك تتحول لكوره شراب
في التوقيت ده حاليا , خصوصا بعد افتكاسة الإختفاء القسري اللي ظهرت فجأه قبل 25 يناير
بشهرين تلاته , عادي يعني تبقى دماغك كوره شراب في رجل الخرفان و اللي يموت في حادثة
موتوسيكل تقول عليه شهيد النظام القمعي ..ده حقك الديموقراطي على فكره , بس للأمانه
و الله , حقك ده في انك تكون كولجي و دماغك كوره شراب ممكن تمارسه جوه بيتك بمنتهى
الأريحيه , أما لو الموضوع يتعلق بمستقبل مصر و أمنها فتأكدو تماما ان معركتكو مع الشعب
, هيدوس على راسكو بالجزمه , أه و عهد الله , و تبقو في الحاله دي شهداء الشعب الفاشي
القمعي .
....................................................................................................................................
Mohamed
Hussein
26
ديسمبر 2015·
مواقع الهطل الإجتماعي
.
هه يا صديق ؟ اتعلمت
و بقيت بتفك الخط , و خلصت تعليم و خلصت جامعه صح ؟ بقى عندك حساب مجاني في الفيس يوك
يعني ببلاش كده , حاجه زي الفل .
.
كتبت بوستات عندك
و علقت هنا و هريت و اتهريت , فتحت لينكات و اتفتح عليك لينكات و شوفت جرايد الكترونيه
و تقارير و حركات و حبشتكانات .
.
ثقافتك بقت الطاقه
عشره , و بقيت ضليع و خبير في كل حاجه من أول الفجل الرومي لحد مواصفات الطياره الرافال
, و وصلت لإيه في النهايه بقى ؟ أنا هقولك , لا و النبي خلي الطلعه دي عليا أنا .
.
1- قالولك حسنين
هيكل لما كان مراسل حربي ايام عبد الناصر كان هو الواسطه لتجنيد عبد الناصر لصالح أمريكا
و اسرائيل , قشطه عليك , هات بوسه بقى , و خد الحبايه دي ابلعها بشوية مايه أو حطها
تحت لسانك .
.
2- قالو لك ان
حكم الملك فاروق كان جامد فشخ و ان مصايبنا ماحصلتش إلا بعد ثورة 52 , و طبعا أكيد
تكون شيرت البوست بتاع أيام الملك كان الجارسون طالياني و الخدامه فرنسيه و كده , اه
طبعا طبعا , و 99 % من الشعب مكانوش شغالين كلافين في وسيات البشوات و بيموتو عالطريق
زي كلاب السكك , الله يسامحه عبد الناصر خلى أجدادنا يمتلكو أرض و احفادهم اللي هما
احنا يتعلمو و يدخلو جامعه و يبقى عندهم أكاونت عالفيس بوك !! .
.
3-أقنعوك ان الحريه
و الفكر الحر المتحرر يستلزم انك تشتم جيش بلد 3 مرات في اليوم بعد الأكل , و ان مصر
لما تدخل في نزاع مع أي دوله يبقى واجب عليك كشاب ثورجي من أحفاد جيفارا عبد الحميد
جيفارا إنك تفخّم و تعظم في القدارت العسكريه للدوله المعاديه لبلدك حتى لو كانت أثيوبيا
أو حتى قبائل ال( كوتو موتو) الأفريقيه .
.
4- شوّهو لك كل
رموز التاريخ المصري و انت قبلت و اقتنعت ( و بلعت ) , و تقارير بقى ان أم كلثوم كانت
شغاله في ملهى ليلي و راقصه ستربتيز , و سميره موسى كانت بتشتغل لامؤاخذه , و عبد الوهاب
كان شاذ جنسيا و سعد زغلول كان بتاع عيال صغيره , و مصر مانتصرتش في 73 ولا حاجه ,
طب بالك انت , هقولك التقيله بقى , عارف الملكه حتشبسوت قبل ماتكون ملكة مصر كانت بتشتغل
ايه ؟ خد عندك الخبر الصادم ده , تقرير سري ممنوع من النشر نشرته مجلة ( ماشربش الشاي
أشرب أزوزوه أنا ) السنغاليه , بيقول التقرير ان خبراء من دولة بنجلاديش عثرو على برديات
بتقول إن حتشبسوت كانت بتطلع كل يوم شارع جامعة الدول و هي لابسه لامؤاخذه و تركن ضهرها
على عمود نور كده و تستنى أي ثري عربي يكون راكب عربيه لاند كروز .
.
5- أحبايبي الخرفان
و الكولجيه , أحفاد جيفارا و أحفاد حسن البنا , انتو هايلين , انتو ممتعين , انتو لايقين
أوي على بعض , فولة و اتقسمت نصين , بالكو انا لو كنت رئيس مصر كنت جوّزتكو لبعض رسمي
, أهو فرصه تخلّفو لنا كام مشبك غسيل على كام حجر معسل .
.....................................................................................................................
Mohamed
Hussein
25
ديسمبر 2015·
الله يسامحك يا
بابا نويل , أه و عهد الله , الله يسامحك , يعني حفله للبت المفعوصه في المدرسه هتقعد
3 ساعات أروح انا اتدبس في الفستان الأحمر بتاعك ده ابو زعبوط , و أدفع 190 جنيه ؟
و بعد كده الفستان يترمي في الدولاب زي بتاع السنه اللي فاتت ؟ 190 جنيه ياعم الحاج
بابا نويل عشان ساعتين زمن ؟ طب و الله و ما ليك عليا يمين , انا أبويا الله يرحمه
اتجوز أمي ب 300 جنيه و طشت نحاس , و جابو 6 عيال .
...................................................................................................................................
Mohamed
Hussein
25
ديسمبر2015·
البرادعي : في
القانون الدولي , يمكن لمجلس الأمن إحالة دوله للمحكمه الجنائيه في حال ارتكاب جريمة
الإختفاء القسري !! .
.
البؤين اللي انت
قلتهم دول يا برادعي مش اسمهم معلومه , انت مش بتخترع الذرّه , اسمهم تحريض يا مولانا
, تحريض ضد بلدك يا مناضل يا بطل , و عن افتكاسة الإختفاء القسري اللي انت عايش عليها
من شهور دي ياريت تبقى تقرا تصريحات الداخليه و تصريحات المجلس القومي لحقوق الإنسان
و بعدين تلاقي الحكايه صفصفت على 24 شخص جاري التحري من أماكن وجودهم او حتى احتجازهم
.
.
و اتمنى تكون فوقت
من الغيبوبه و شوفت حالات الإختفاء القسري اللي طلعت هربانه لبريطانيا أو حتى لداعش
أو في بيتها نايمة تحت البطانيه , و أتمنى كمان انك تفهم ان الشرطه المصريه ( البلطجيه
) مش مضطره لافتكاسة الإختفاء القسري دي , وانها ممكن تعتقل أي حد في أي وقت و تصوره
كمان بالفيديو لحظة الإعتقال بمنتهى الغشم و الغباوه .
.
يا برادعي انت
حيرتني معاك و الله , انت عبيط و عايش في غيبوبه فعلا و بترمي كل كام يوم كلمتين للكولجيه
عشان ( يقتاتو ) عليهم .... و لّا انت خاين بجد ؟!! .
.
إلا قولي صحيح
, إيه أخبار السلطه التنفذيه اللي بتعيّن رئيس للسلطه التشريعيه في الأنظمه الفاشيه
يابو دماغ ألماظات ؟! و كان شعورك ايه لما الإرهابي في أمريكا الشرطه كلبشته و قتلته
وهوفي الكلابوش ؟ يعني و هو متكتف من غير محاكمة يا حنين انت يابو كف رقيق و صغير
, و سؤال أخير بقى و النبي يا بوب عشان استفيد من عقلك اللي سابقنا بمليون فدان , لما
المحكمه حكمت باعتقال عمر البشير حصل ايه ؟ طب تعرف ليه ماحصلش حاجه ؟ انت عارف و عامل
عبيط ولا مش عارف ؟ عموما ابقى سلم لي على مجلس الأمن و المحكه الجنائيه و محكمة العدل
و مركز كارتر بتاع السلام و قناة الجزيره بالمره , أو باختصار سلم لي على ماما أمريكا
.
........................................................................................................................
Mohamed
Hussein
25
ديسمبر 2015·
خبر من الجهاز
المركزي للإحصاء : مصر بتستورد قمصان نوم في السنه بأكتر من مليار جينه و ورق بفره
بمليار جنيه !! .
.
طب يعني احنا كده
نبقى بنستورد حاجات كتير أوي منها مثلا الأجهزه الطبيه و الإنسولين و صمامات القلب
و قمصان النوم و دفاتر البفره , و عندنا أزمة دولار خانقه , الحكومه لو بتفهم بقى و
عايزه تحافظ على شوية الدولارات اللي حيلتنا المفروض توقف استيراد الحاجات العبيطه
اللي مالهاش أي لازمه دي زي الأجهزه الطبيه و الإنسولين و صمامات القلب
..............................................................................................................................
.
ليست هناك تعليقات:
إرسال تعليق