Mohamed
Hussein
5
نوفمبر 2015·
ملخص المؤتمر الصحفي
.
ديفيد كاميرون
: أنا كنت عايز اتكلم عن الطياره الروسيه اللي وقعت في مصر , وبقول يعني ان المعلومات
عندنا بتقول احتمال كذا بس هو احتمال انما وارد لكن مش اكيد بس يفضل احتمال يعني بيرهابس
و ماي بي , المهم ان الطياره الروسيه دي تبقى روسيه و وقعت في مصر يعني وقعت في إيجيبت
, و كنت عايز أقول ايه تاني ؟ أه افتكرت , كنت عايز أكلمكو بقى عن الطياره الروسيه
اللي وقعت في مصر .
.
السيسي : ماتخنقشي
أمي عشان انا جايب أخري , إنت ياض انت ياض مش بعتت الرجاله بتوعك من 10 شهور و قالولك
تمام و أوكيه و الإجراءات الأمنيه زي الفل ؟ .
.
كاميرون : أه حصل
, واحنا ماقولناش حاجه يعني , أدينا بناخد و ندّي في الكلام
.
صحفى لكاميرون
: اه انت تقصد إن الموضوع ممكن يكون وراه إرهاب , طب مش هو الإرهاب ده انتو اللي صنعتوه
يا ولاد الصرمه بعمايلكو السوده في العراق و أفغانستان ؟
.
كاميرون للصحفي
: لا يا حيوان , إحنا كنا رد فعل بعد تفجير مركز التجاره العالمي في أمريكا و انت طبعا
عارف إننا كلاب امريكا و مطرح ما تروح بنروح وراها زي الخنفسه اللي بتبقى ماشيه في
ديل العقرب .
.
السيسي ل كاميرون
: طب انجز بقى و هات من الأخر و افرد طولك كده و قول للشعب البريطاني إنكو بتدعمو الإرهاب
و تعلفوه , ولا رايك إيه ؟ .
.
كاميرون : لا طبعا
مستحيل ندعم الإرهاب , إيمبوسيبل , داحنا خلال شهر واحد يعني على نهاية السنه هنكون
خدنا إجراءات بنت تيت ضد الإرهابيين اللي بيمارسو العنف و اللي بيحرضو عليه كمان .
.
الإخوان : يا نهار
اسود ومهبب , اللي بيمارسو العنف و اللي بيحرضو عليه !! , يا مُرّك يا مهجه , بعتنا
بكام يا صاحبي ؟! .
.......................................................................................................................................
Mohamed
Hussein
5
نوفمبر 2015·
بريطانيا و أدب
بريطانيا
.
الحقيقه إن الحدايه
مش بترمي كتاكيت فعلا و الحقيقه كمان إن ديل الكلب مش بيتعدل , و الحقيقه برضه إننا
مضطرين نتعامل مع الكلب و الحدايه , عشان ده اسمه المجتمع اللامؤاخذه الدولي .
.
بريطانيا بدأت
تلسّن بإن الطياره الروسيه اللي وقعت في سينا انفجرت بعبوه ناسفه , مع ان روسيا بجلالة
قدرها لسه مانطقتش ولا قالت , و وقت التلسين ده جه بالصدفه البحته أثناء زيارة السيسي
لأم بريطانيا , و بالصدفه البحته برضه نظم أعضاء الجماعه الإرهابيه مظاهرات ضد السيسي
في لندن , أه المشايخ و الملالي بتوع الجماعه الإرهابيه عايشين في بريطانيا الكافره
بنت ديك الكلب و بياكلو هناك عيش و بيتزا و بيجاهدو ضد مصر و جيشها من قلب لندن , طالما
وراهم قطيع من الحمير و قطيع كبير من الخرفان مايجاهدوش ليه ضد مصر من لندن ؟! .
.
و بالصدفه البحته
قناة ال BBC عملت لقاء مع السيسي و اسئله
سخيفه بقى وقمة الحك في الجماعه الإرهابيه , كله بالصدفه البحته , إنما إوعى عقلك يوزك
و يقولك ان بريطانيا دي بترعى الإرهاب الدولي و تعلفه زيها زي أمريكا , يا راجل عيب
عليك , دي قلعه من قلاع الحريه , و عهد الله قلعه , بس قلعه ملط !! .
.
أمريكا بقى خدت
الواد الخو* اللي اسمه محمد سلطان اللي كان عامل نفسه ميت عندنا و جابت له كام وجبه
حلوه يرم بيها عضمه , و دخلته الكونجرس عشان يلعن جدود أبو مصر , برضه محمد سلطان ده
مناضل و مجاهد و بيجاهد ضد مصر من قلب امريكا , الكولجيه عندنا اعتبروه مناضل .
.
المهم إن أمريكا
علقت على تصريحات بريطانيا الخاصه بالطياره الروسيه , وقالت لها عيب كده يا بريطانيا
, مايصحش تقولي كده , مش تسبقى الأحداث , بس انتي متأكده يعني من الكلام ده ؟ هههههههههههههههههههه
و عهد الله شغل عوالم على أعلى مستوى , تخيل كده فيفي عبده و صافيناز لو حطو راجل في
دماغهم و حبو يشردوه ؟ مش هيعملو أكتر من اللي بتعمله أمريكا و بريطانيا .
.
يا ريس أنا عارف
إنك واقف على خط النار لوحدك , و النار بتجيلك من ولاد الكلب بتوع بره , وولاد التيت
بتوع جوه , بس احنا وراك , سندك و عكازك .
.
#الشعب_يدعم_السيسي .
....................................................................................................................................
Mohamed
Hussein
5
نوفمبر 2015·
عارفين المشكله
ايه ؟
.
1- المشكله ان
الناس اللي نزلت في يناير عشان تهد نظام فاسد و مترهل , مكانوش واخدين بالهم إنهم متخصصين
في الهدد بس و مش بيعرفو يبنو , و عشان الحفاظ على لياقتهم البدنيه مستمره دايما تخيلو
إنهم ممكن يكملو بسهوله في نفس سكة ( الهد و الهدد و الهدم ) .
.
2- المشكله إن
الورقه البيضا اللي كان المفروض نرسم عليها خريطة مستقبل مصر اتقطعت مننا في ال 4 سنين
( وبإدينا ) و بتحريض من غيرنا احيانا , في النهايه اتحولت ورقة المستقبل لورق كوتشينه
, والشباب زي ماهو , برضه حكاية اللياقه دي خلته عايز يستمر بأي شكل , و قال خلاص بلاها
خريطة المستقبل , مش مشكله , نقلبها دور كوتشينه , خد لك سيف , كمان سيف , اهبدني الثوره
, طب اهبدني دستور جديد , طب اهبدني شوية اعتصامات , طب اهبدني الإخوان و احنا و حظنا
!!.
.
3- المشكله إن
الجيش المصري لقى نفسه فجأه في قلب الأحداث , و وضع جديد تماما عليه , ولقانا مزروطين
الدنيا حوالينا أخر زروطه , فكل اللي عمله إنه حاول يلم الزروطه دي ورانا بأي شكل
, ويقول لنا مصر مش دور كوتشينه هتلعبوه , لو مش عارفين ترسمو خريطه لمستقبلها و قلبتو
الموضوع لدور كوتشينه يبقى اقعدو على جنب أحسن , احنا صحيح مش رسامين أوي , مافيناش
دافنشي في جيش مصر , بس فينا رجاله عالأقل هيوصلوكو لنقطة الأمان , و لما تتعلمو إزاي
تبنو ابقو تعالو و شاركونا و شيلو الحمل معانا .
.
4- و المشكله الأكبر
على الإطلاق إنه لسه فينا شباب مش مقتنعين ولا مصدقين إننا كنا طرف رئيسي و أساسي في
خراب السنين اللي فاتت , و إن الحكايه دي تمت بمباركة و تحت إشراف اللي بنسميهم قاده
سياسيين و محنكين و خبراء و قيادات للمعارضه .
.
ملاحظه أخيره
: عشان تشارك في مرحلة الخراب دي و تعرف تخربها كويس فانت مش بالضروره تكون خاين ,
يكفي جدا إنك تكون حمار .
..................................................................................................................................
Mohamed
Hussein
4
نوفمبر 2015·
وائل غنيم عامل
مبادره للمصالحه !! , ماعرفشي مصالحة ايه و لا مصالحه بين مين و مين ؟ إنما على أي
حال هو وائل ده شاب و كيوت و حنين و ينفع يكون زعيم سياسي لحد ما نلاقي زعيم سياسي
.
.
والنبي يا وائل
يابني كنت عايز أقولك كلمتين في ودنك , إنت تسيبك من الهري ده كويس ؟ و تروح تعمل مصالحه
بين قيادات حزب الدستور و تخليهم يتفقو على كلمه ماشي كده ؟ و بعدين تخطف رجليك لحد
التيار الشعبي و تعمل مصالحه بين قياداته و شبابه و بالمره تصالحهم على حمدين صباحي
تمام كده ؟ و ترجع تاني تجيب الناس الأولانيين اللي هما بتوع حزب الدستور و تصالحهم
عالناس التانيين اللي هما بتوع التيار الشعبي موافق ؟ , و تعزمهم كلهم على أكلة سمك
و جمبري و تقولهم ياخوانا ماينفعشي كده , احنا لازم ننزل و نشارك حتى لو ماخدناش اغلبيه
مش مشكله , و بعد ما تغلسو إيديكو من أكلة السمك و الجمبري تعالى و انا اقولك اللي
فيها .
.
اللي فيها يا وائل
يابني بيقول باختصار إن أكلة السمك هتضيع عالفاضي , هقولك ليه بس ركز معايا , عشان
لما يكون فيه تيار معين عدد أنصاره 100 ألف ولا مليون حتى , متنطورين في وسط 90 مليون
, فالعدد ده سيادتك مايقدرشي ياخد كرسي واحد في برلمان , إنما نفس العدد يقدر لو اتجمع
يملى شارع و ميدان , انت فاهمني يا مولانا ولا إيه , طب فاهم المعنى ؟! عرفت ليه الناس
دي مش هتشارك في أي عمل سياسي و هتفضل تتكلم عن الميدان ؟
.
المهم بقى , روح
اهري في وسط الناس دي و حاول تصلحهم على بعض و تقنعهم يعملو حاجه مفيده في حياتهم وابقى
قابلني لو فلحت , أما مصر و الشعب ماتتكلمشي باسمهم , انت أتفه من كده بكتير , أه على
فكره , مصر بتسلم عليك و بتقولك متشكرين و خد الباب في إيدك و انت طالع .
...................................................................................................................
Mohamed
Hussein
4
نوفمبر 2015·
الحب هو
.
خايف أتصل بأمي
في البلد و أقولها كل سنه و انتي طيبه بمناسبة عيد الحب , هابي فالانتاين داي يا غاليه
, تقوم تشتمني و تبستفني و تقولي يا صايع ياللي كنت بتشرب سجاير وانت في الكليه , والنبي
تلاقي بنات مصر فسدوك أكتر مانت فسدان .
.............................................................................................................................
Mohamed
Hussein
3
نوفمبر 2015·
حد عارف لو الفيس
بوك ده كان موجود أيام حكم سيدنا عمر بن الخطاب واحنا طبعا موجودين و عندنا أكاونتات
ببلاش , كان ممكن يحصل ايه ؟!! .
.
أنا أقولك
: خبر على اليوم
السابع : عمر بن الخطاب ينام تحت شجره بعدما أمن على رعيته .
.
تعليق رقم 1 :
ماينفعشي الخليفه والرئيس بتاعنا ينام تحت شجره من غير حراسه .
تعليق رقم 2 :
الخليفه نايم وسايب البلد تغرق .
تعليق رقم 3 :
البروتوكولات ماتسمحشي للخليفه انه ينام تحت شجره , و شكلنا قدام العالم هيبقى ايه
؟
تعليق رقم 4 :
الله , شوفتو شكل حبيبي الخليفه أمّور ازاي و هو نايم ؟ كيوت أوي يا ناس .
.
.
خبر تاني في مصراوي
: علم موقع مصراوي أن شهود عيان شاهدو عمر بن الخطاب و هو متنكر بالليل و بيسمع الناس
في بيوتهم بيقولو ايه و بيشتكو من ايه
.
تعليق رقم 1 :
ده اسمه اعتداء على حريات الناس الشخصيه , أين منظمة حقوق الإنسان اللي في بلاد الروم
تشوف المهزله بتاعتنا .
تعليق رقم 2 :
خليفه فاضي و مش وراه حاجه و مش حاسس بالدنيا حوالينا , أنا مهاجر و سايبهاله .
تعليق رقم 3 :
الموقع ده مؤيد لحكم عمر , يا عبيد الخليفه , يا طبالين .
تعليق رقم 4 :
اللي كان متنكر ده مش عمر بن الخطاب , ده عسكري أمن مركزي , عمر بن الخطاب مات في حادثة
موتوسيكل من قبل ما سيدنا محمد يتولد و الفيديو موجود على قناة الجزيره .
.
.
الخلاصه , احنا
لو حكمنا سيدنا عمر بن الخطاب رضي الله عنه , برضه هندخل كل يوم الفيس و نهري و نعجن
و ننحت في وبره .
..................................................................................................................................
Mohamed
Hussein
3
نوفمبر 2015·
بتحب الهري و الفرهده
ولا حضرتك جاد في كلامك و متحمس ؟ عندك قضيه و مبدأ ولا مُدّعي ؟ خايف عالبلد دي فعلا
و عايز حالها يتصلح ولا عايزها خرابه المهم تثبت وجهة نظرك ؟!.
.
طب تعالى أقولك
, أولا عيب عليك و على شنبك إنك تتسك على قفاك 50 ألف قلم على سهوه , و كربلائيات الإخوان
اللي ماحيلتهمشي غيرها من 80 سنه تأثر فيك لحد النهارده , ماتدعيش الفضيله يا حمار
ولا إنك حمامة سلام , ولا توصف غيرك بإنه قاسي بقى و قلبه حجر , مانت فاهم و انا فاهم
, و الحمار بس هو اللي يبيع المايه في حارة السقايين .
.
حقك و حقي و حق
البلد دي علينا إننا نستغل الحدوته الهبله دي و نصرخ بعلو صوتنا و نقول يا ريس , القوانين
الباليه دي لازم تتغير , قوانين النيابه و القضاء , ماينفعشي حكاية تجديد الحبس لمدة
شهور دي , حتى لو في النهايه بتتخصم المده من مدة السجن اللي هيقول عليها القاضي ,
طب افرض الشخص طلع برئ ؟ يبقى هنخصم المده دي من ايه بالظبط ؟ و حكاية القضايا اللي
بيصدر فيها حكم في سنتين و تلاته و سته دي , شوفولكو حل يا أهل القضاء العالي , إعمل
حاجه يا عم الزند و النبي , احنا في سنة 2015 ميلاديه مش قبل الميلاد .
.
هه بقى ؟ هتيجي
معايا نصرخ و نقول عايزين قوانين جديده تحترم أدمية البشر و لا هتعمل ايه ؟ إيه ؟ هتروح
تهري و تتعاطف مع البنت , طيب ماشي , و عايز البلد حالها يتصلح صح ؟ قول قول بس , قول
دانا بحبك لما تقول البؤ ده , بحب أسمعه منك أوي .
....................................................................................................................................
Mohamed
Hussein
3
نوفمبر 2015·
حكاية ريري سيلان
و الشيخ حموده و الأخت إسراء
.
الشيخ حموده ده
راجل مجاهد , من يوم ماربنا خلقه و هو كده , وهب نفسه للجهاد , ماراحشي مدارس صحيح
ولا بيعرف يقرا و يكتب , بس مره زمان و هو في الجامع في درس علم , الشيخ بتاعه قاله
لازم تجاهد يا حموده ضد الغرب الكافر ( و مَن والاهم ) , حموده فتح بؤه كداهو عشان
مش فاهم و قال للشيخ ( تطلع ايه و من والاهم دي يا مولانا ؟ ) , مولانا اتعدل كده و
ظبط العبايه الصوف بتاعته قامت بانت الساعه السويسري و حط الموبايل الأيفون على جنب
و قال لحموده , و من والاهم يا بني يعني مصر و جيشها , حموده سمع الكلمتين من هنا و
هاتك يا جهاد من هنا , حرق و قتل و تخريب , حموده ساب الغرب الكافر و ركّز أوي على
( من والاهم ) من وجهة نظر مولاه الشيخ , و لما اتقبض عليه عمل نفسي بيصلي و مجاهد
تاني لحق يصور حموده و يهرب , و نزلت صورة حموده عالفيس , الجيش الموالي للغرب الكافر
قبض على حموده و هو بيصلي ( الحريه لحموده ) !! .
.
ريري سيلان زهقت
من عيشة الفقر , والعبايه اللي منها صيفي و منها شتوي , هي هي نفس العبايه , و كانت
لما تروح تشتغل في سوبرماركت ولا محل ملابس صاحب المحل يتحرش بيها , قالت مابدهاش بقى
, طالما كده تحرش و كده تحرش يبقى نشتغل على نضافه , و بدأت ريري رحلة المجد و الشهره
, من حضن ده لحضن ده , و من سرير فلان لسرير علان , ولما اتقبض عليها و راحت المحكمه
لبست نقاب , و القاضي سألها : انتي ريري سيلان ؟ قالت له : أجل يا سيدي ( الحريه لريري
) !! .
.
و الأخت إسراء
الطالبه الكيوت اللي قلبها قلب خسايه , حرضت عالقتل و الخراب ولما اتمسكت و اتحكم عليها
بالسجن قامت معيطه , و الكولجيه اعتبرو التحريض بتاعها ده نقد ( بناء ) و حرية رأي
, وهاتك يا تعاطف بقى ( الحريه لإسراء ) .
.
طب يا مولانا الكولجي
مش من باب أولى تتعاطف مع الشيخ حموده والأخت ريري ؟ طب ايه الفرق بين التلاته اللي
فوق دول ؟ وانا رأيي إن ريري هي أنضفهم , بس طبعا انت مش هتفهم الكلام ده , عشان انت
( متدين بطبعك ) , عارف يعني إيه ( متدين بطبعك ؟) , أنا أقولك : يعني لما تروح تخطب
و تكتشف إن خطيبتك بتكدب و تفتن على الناس و تغتاب غيرها و تعامل مامتها معامله زي
الزفت , هتقول مش مهم , إهم حاجه إنها محجبه يعني مش كاشفه شعرها , و بالتالي مفهومك
عن الإجرام و الوساخه يبقى هو بالتأكيد : ريري سيلان !! .
.......................................................................................................................................
Mohamed
Hussein
2
نوفمبر 2015·
بصو يا خوانا كده
, في اللينك الي تحت ده هشرح لكو طريقة عمل صينية المكرونه بالبشاميل , يووووه قصدي
هوريكو طريقة عمل القنبله الدخان , حاولو تركزو و النبي , والميليشيات المسلحه تشد
حيلها شويه , أووووووف , انتو مش بتورونا شغلكو ليه ؟ عايزينها خرابه , استنو عليا
ثواني , هضرب تقرير مع صوره متفبركه و ابعتهم لجريده بره مصر , ولو عرفت هجيب لكو عنوان
كام ظابط من بتوع الإنقلاب و انتو طبعا عارفين المطلوب كويس , حلوين كده و حبايب ؟
استنوني بقى
.
بس أمانه عليكو
لو اتمسكت و اتحكم عليا بالسجن تعيطو عليا و تولولو و تقولو ده اتسجن عشان معارض بس
, ده سجين رأي , لا حرض على قتل ولا حرض على خراب , دي دوله فاشيه , وانا من ناحيتي
هعيط قدام الكاميرا و اتصور بالعكاز , ابقو ابعتو صورتي للسي إن إن بالعكار بقى وانا
بعيط .
.
أه حاجه أخيره
كمان , ماتنسوش تعملولي هاشتاج على تويتر و تدوسو فيه جامد , عايز العالم كله يشوف
صورتي وانا بتشحتف و يشوفو الفاشيه بتاعة السيسي اللي بيسجن أصحاب الرأي و القلم .
.
ماتقلقوش عليا
, و حبايبنا اياهم , الحمير بتوع البرادعي الأقرع هيتعاطفو معايا اكيد , الكربلائيات
دي لسه شغاله و بتاكل معاهم حلو أوي , و هنركبهم تاني , لا دي هتبقى أول مره نركبهم
ولا أخر مره .
..............................................................................................................................
Mohamed
Hussein
2
نوفمبر 2015·
مسرحية ( الرجوع
للميدان ) .
.
بالنسبه ليا أنا
تحديدا , هعمل إيه يوم 25 يناير الجاي ؟ بسرعه كده و من غير تفكير , أصلها مش محتاجه
تفكير , بص يا سيدي لو كنت عايش و ربنا كاتب لي عمر هعمل التالي :
.
1- هصحى من النوم
, اتوضى و اصلي والبس هدومي و انزل .
.
2- أركب العربيه
و اروح أفتح الصيدليه .
.
3- أرمي المفاتيح
و الموبايلات و المحفظه في درج المكتب .
.
4- أدخل المعمل
أعمل نسكافيه عشان أعرف أفتح عنيا و اعرف الفرق بين جي سي مول و جنينه مول .
5- افتح اللاب
توب بتاعي ( ده لو اللاب استحملني لحد يناير ) .
.
6- أدخل عالفيس
بوك واشرب شفطة نسكافيه و معاها نفس من السجاره .
.
7- أقرا بوست لصديقي
العزيز اللي عمّال دلوأتي يكتب بوستين تلاته كل يوم عن الميدان و راجعين للميدان .
.
8- بوست صديقي
العزيز وقتها هيكون مكتوب فيه التالي ( خلاص يا جماعه , النهارده مش يومنا , لازم نعترف
, بس اعملو حسابكو 25 يناير 2017 لازم نكون جاهزين و مستعدين , و المره الجايه كلمتنا
لا يمكن تنزل الأرض أبدا ) #حنفي .
.................................................................................................................................
Mohamed
Hussein
2
نوفمبر 2015·
صباح الخير يا
عم ابراهيم , و حيث إنك يعني الإعلامي المفضل بالنسبالي و اللي شايف فيه بصيص أمل و
بقول هييجي منه , فاسمح لي أقولك كلمتين :
.
تعليقك على خطاب
السيسي إمبارح بإن الخطاب معناه إن مفيش سياسه في مصر و إن الرئيس المفروض يطلع ينتقد
زعيم حزب أو شخصيه مشهوره ولها وزن سياسي مش يطلع و يبقى رد فعل على تعليقات شوية اعلامييين
, يعني من الأخر كده ده خطاب واحد فاضي و مش وراه حاجه ........عايز أقولك يا مولانا
.
أولا : عبد الفتاح
السيسي فاض بيه من ( فنجرية البؤ ) اللي اسمهم إعلاميين , و لما يوجه نقد ما لشخص او
اتنين فبتبقى الرساله عامه للكل .
.
ثانيا : أظن جه
الوقت اللي نقول فيه بعلو صوتنا محتاجين قانون ينظم الهري الإعلامي ده , و المعجنه
يبقى لها حدود و محتاجين وزارة إعلام لألف سبب و سبب , و أظن و انت معايا ان الضحك
عالدقون اللي عشنا فيه 4 سنين و حكاية الدول المتقدمه مفهاش وزارة اعلام ثبتت فشلها
عندنا تماما .
.
الدول المتقدمه
ياعم ابراهيم مفهاش اعلاميين مايعرفوش الفرق بين النقد و الإهانه الشخصيه ولا اعلاميين
مايعرفوش الفرق بين التأييد و التطبيل , و مفهاش ناس بتصحى من النوم و قبل ماتغسل وشها
تدخل تشتم رئيس الدوله و جيش الدوله بأوسخ الألفاظ , حتى لو من غير سبب ( أهو بنشتمهم
من باب الإحتياط ) ,و في السنين اللي فاتت ظهرت مئات قول ألاف من المواقع والجرايد
الإلكترونيه المشبوهه اللي كل دورها في الحياه فبركة الأخبار و تهييج الناس و اللعب
بالفوتوشوب و بالكلمه ولا انت مش من هنا ؟! .
.
ثالثا و ده الأهم
: أنا شايف ان خطاب السيسي امبارح جيد و مش معناه أبدا إننا ماعندناش سياسه , و شايف
كمان و ماتزعلشي مني يعني إنك بقالك فتره بتهري في أي حاجه من غير تركيز و من غير ماتحط
ايدك على أسباب منطقيه , من أول كلامك عن الإنتخابات البرلمانيه , يعني بقيت ( بتعبّي
هوا ) زيك زي غيرك .
..............................................................................................................................
Mohamed
Hussein
1
نوفمبر 2015·
منع مرتضى منصور
من الظهور في الفضائيات , الله الله , يارب اللي في بالي يتحقق , و مرتضى زفت يبقى
أول الغيث و بعد كده ينهمرٌ .
.
البلد دي صواميلها
محتاجه تتربط , بدل مالتروس بتلف عالفاضي بقالها 4 سنين , الجعجاع و النصاب و الطبال
و البلطجي و اللي عايز يطلع يقول أي بؤين زباله و يبقى محسوب على بلد ولّا نظام و اللي
تطلع تهبّل و تسمي نفسها اعلاميه و اللي مش عاجبه طبيخ امه ينزل الشارع و يعتصم و يقطع
طريق و اللي بيصحى من النوم يتريأ على بلده و جيشها و الخاين اللي بيسمه نفسه معارض
و المتلون اللي بيسمي نفسه مؤيد و اللي بايع نفسه بالكيلو زي المواشي وعامل زعيم و
مناضل
.
ياريس , البلد
دي محتاجه لسعتين بالخرزانه و شلوت كبير لكل ولاد التيت , و بعدها نبوس راس مصر و نقول
لها حقك علينا , احنا فهمنا الحريه غلط و بهدلناكي معانا .
...............................................................................................................................
Mohamed
Hussein
1
نوفمبر 2015·
عاصم عبد الماجد
: ليس أمام الإخوان في المنطقه غير الجهاد !! .
.
و البرادعي و حمزاوي
و جميله اسماعيل لسه بيتكلمو عن المصالحه والحوار المجتمعي و الحب و الحضن و البولوبيف
بولوبيف , أنا رأيي نجوّز جميله اسماعيل لعاصم عبد الماجد , و هو بقى يقنعها تتنقب
وتتستت و تشيل أر بي جي أو تلبس حزام ناسف , يا إما هي تقنعه يحلق دقنه و يطوّل سوالفه
ويضرب شعره جيل و يلبس مايوه بفته و يقول هاي شله .
.................................................................................................................................
Mohamed
Hussein
1
نوفمبر 2015·
السيسي في خطابه
: إعلامي كان بيقول السيسي قاعد مع بتوع سيمنز و سايب اسكندريه تغرق !! عايز أقوله
مايصحش كده , هذا امر لا يليق .
.
ههههههههههههههههه
ياريس انت لسه هتطبطب وتدّلع ؟ الإعلامي اللي مش عارف خطورة الميكروفون اللي قدامه
ولا خطورة المرحلة اللي بتمر بيها مصر سيادتك تسلمه للشيف شربيني في القناه اللي جنبه
على طول و الشيف شربيني يشغل المفرمه بتاعة اللحمه و يعلمنا طريقة عمل ( صينية الرقاق
بالإعلامي الضاني ) .
.............................................................................................................................
Mohamed
Hussein
1
نوفمبر 2015·
دماغ دي اللي فوق
رقبتي ولا قلقاسه ؟
.
هو انا كنت لما
ببقى راجع من صلاح سالم و عايز أدخل مدينة نصر كنت معلّم شارع الطيران اللي فيه فندق
سونيستا بإن فيه عماره على ناصيته عالواجهه بتاعتها حديد و شبكه ( بيشطبو الواجهه يعني
) , وانا كل مره بقى ألمح العماره دي من بعيد و اعرف إني قرّبت و أقوم ماسك يمين عشان
أدخل شارع الطيران .
.
النهارده وانا
راجع فضلت ماشي ماشي ماشي أدور عالعماره اللي عليها حديد و شبكه مالقيتهاش و لقيت نفسي
في قلب مصر الجديده !! , طب ياربي حد يعلّم دخلة شارع بعماره بتتشطب ؟ ماهي أكيد هييجي
عليها يوم و تتشطب و يشيلو السقّاله و الشبكه دي , مش كنت علمتها بحاجه أفضل ؟ عربية
كبده مثلا تكون واقفه على ناصية الشارع ؟ .
.
و يعني ايه لما
اتكلم في الموبايل و انا سايق و المكالمه تخلص و اللي بكلمه يقولي مع السلامه و أقوله
مع السلامه و الخط يتقفل أكتشف بعدها ب 5 دقايق مثلا إني لسه سايب الموبايل على ودني
, هل مثلا بستني يمكن الشخص اللي بكلمه يرجع في كلامه و يقول حاجه تانيه بعد ماقفل
؟ ولا الموبايل عشان عريض شويه بعمله خداديه و اريح دماغي عليه ؟! .
.......................................................................................................................................
Mohamed
Hussein
31
أكتوبر 2015·
أرفض التصويت
.
سيادة الرئيس عبد
الفتاح السيسي , التفسير و التوضيح اللي نشرته الخارجيه المصريه عن حكاية التصويت في
الأمم المتحده و إنه كان الغرض منه دعم 3 دول عربيه مرشحه في قايمه بتشمل اسرائيل
, و إن الأمم المتحده رفضت التصويت بشكل فردي على كل دوله لحده و أصرت على التصويت
لصالح أو ضد القايمه بطريقة All
or none التفسير ده منطقي
, ماشي معقول يعني و على راسي و كتر خير الخارجيه انها بتتفاعل معانا بسرعه , و الحقيقه
انا لما قريت التفاصيل مأزعجنيش النقطه بتاعة التصويت لقايمه فيها اسرائيل أد ما أزعجنبي
شعور إننا مضطرين باستمرار لمجاملة دول عربيه !! .
...........................................................................................................
Mohamed
Hussein
31
أكتوبر 2015·
الطائره الروسيه
المنكوبه .
.
1- المؤكد إن الطياره
وقعت في سينا , و على متنها 218 راكب , صعب جدا يكون حد منهم لسه عايش .
.
2- المؤكد إن رئيس
الوزراء راح سينا , و فيه فرق إنقاذ و تحقيق في موقع الحادث .
.
3- المؤكد إن تضارب
الأنباء في القنوات و المواقع المصريه و العربيه و العالميه بيقول إن كل واحد له كيس
كوله خاص بيه و بيشم منه بمزاج , و بيسميه ( مصدر مسئول ) .
.
4- المؤكد إن التحقيقات
و الصندوق الأسود و وجود ناجين هيقولو سبب سقوط الطائره , يعني الحكايه مش هينفع فيها
ماس كهربائي ولا عامل السنافور .
.
5- المؤكد إن المصريين
كلهم , المصريين وبس , هيقولو يارب تطلع نتيجة التحقيق و تقول عطل فني ( و ده أغلب
الظن ) عشان البلد دي تستاهل إننا نقول ( يارب ) .
.
6- و المؤكد كمان
و مؤكد أوي إن الكولجيه و الإرهابيين و كل ولاد الكلب فرحو جدا بالخبر و بدأو ينشرو
تقارير وهميه عن سقوط الطائره بسبب عمل ارهابي أو سقوطها بصواريخ إسرائيليه , أهو أي
حاجه نضرب بيها السياحه والإستقرار و نخرب بيها مصر , و نبقى نقعد على أطلالها و (
تلّها ) و نفرح أي و نشرب سيجارة بانجو و نقول ( وجهة نظرنا كانت صح )
.
.
7- و المؤكد جدا
جدا إني بقرف من ولاد الكلب ( و مش بقرف منهم من فراغ ) , اللي عايزين جنازه و يشبعو
فيها لطم , الخونه اللي لابسين توب القديس .
.
مش أن الأوان يا
ريس ولا إيه ؟ انت فاهمني طبعا , بلاش كل مره نلبّس نفسنا في الحيطه عشان خاطر الدول
العربيه و أم الحلم العربي , هو احنا هنفضل ندفع في الفاتوره دي كتير ؟ مانت عارف و
انا عارف , في النهايه بينطو من المركب , واحنا بنشيل الليله .
.
أرفض قرار التصويت
, حتى لو كان لدعم الدول العربيه التلاته , لا مؤاخذه يعني يتحرقو بجاز , كان أولى
بيهم ينسحبو من قايمه فيها الكيان الصهيوني , بلا دول عربيه بلا طموحات عربيه , العربيه
تعبت ياريس من الحموله الزياده !!.
...............................................................................................................................
Mohamed
Hussein
30
أكتوبر 2015·
نهائي البطوله
الأفريقيه لكرة اليد , المقامه حاليا في المغرب
.
الزمالك 35 ..الأفريقي
التونسي 22 ........... ألف مبروك لمصر
...............................................................................................................................
Mohamed
Hussein
30
أكتوبر 2015·
ياريت الناس اللي
اتجمّعت و اتوحدت على قلب رجل واحد و عملت حملة ناجحه جدا انتهت بإقالة ريهام سعيد
من القناه , ياريت ياخوانا نعمل حمله جديده مماثله , جايز نقدر نشيل حماده طلبه من
تشكيله فيريرا .
......................................................................................................................................
Mohamed
Hussein
30
أكتوبر 2015·
مصطلحات و التعلب
فات فات
.
المذيعه اللي اسمها
إيمان الحصري عملت مداخله مع ريهام سعيد عشان البنت البريئه اللي ريهام زفت شلفطتها
, ريهام بتقول للحصري , أنا ماعرفشي اسمك ايه ( الجليطه ) , وانا عملت المداخله عشان
حسن راتب ( الحك ) , و انتي هتردي عليا غصب عنك ( المن*** , مشيها المندوحه ) , و بعدين
ريهام زفت طلعت في برنامجها و قالت إن حسن راتب اللي اتكلمتي عنه باستهزاء هو اللي
علمني ( الحك مره تانيه أو الحك المُركّب ) .
.
شركة ماعرفشي ايه
كده استجابت لنداء الجماهير العريضه اللي هي احنا و قالت هنوقف اعلاناتنا في برنامج
ريهام سعيد , الحقيقه ده مش موقف انساني ولا بتنجاني , قسم الدعايه في الشركه بيقعد
كده في اجتماع و يحسبوها حسبة مكسب و مكسب برضه , يعني لو وقفنا اعلانا عند ريهام زفت
الجماهير هتفرح بينا أوي و تعمل لنا مولد و مقام عالفيس و تويتر و دي تبقى أحلى دعاية
ومجانيه كمان ( النصب والضحك عالدقون ) .
.
خالد صلاح أعلن
إنه هيعمل حلقه مع ريهام سعيد عشان خاطر البنت و أكيد أكيد هيحط السيخ المحمي في صرصور
ودن ريهام ( بطل من ورق ) , عملو دعاية كويسه جدا للحلقه و نسبة مشاهده هتبقى اضعاف
اللي اتعود عليه خالد صلاح ( الضحك عالدقون تاني ) , كده ضمنا الزبون و ممكن نعتذر
عن الحلقه بقى و نقول مش هنقدر نستقبل ريهام عشان هي زباله و هنقولكو موقف قوي في الحلقه
يعني ضمنو نسبة مشاهده غير عاديه ( قعدو الزبون على حجرهم ) .
.
هات إيدك كده
, و شبكة العشره دول أنا مش بستبعد إن الزياده في دخل الإعلانات بتاعة برنامج خالد
صلاح بسبب قصة ريهام زفت دي يكون تم الإتفاق على اقتسامها بين خالد زفت و ريهام زفت
.
.
وانت عامل إيه
دلوأتي ؟ ( بتطمن عليك ) .
............................................................................................................................
Mohamed
Hussein
30
أكتوبر 2015·
أنا و لمار بنتي
( 5 سنين و نص ) .............. في بيتنا ( ستيفن سبيلبرج )
.
في العاده بناتي
بيطلبو كل يوم احكي لهم حدوته قبل ماينامو , وأنا ابدأ أألف أي حدوته ارتجاليه بس طبعا
لازم تكون محبوكه , شكل الحدوته بيحدده الجمهور اللي هما لوجي و لمار , يعني ممكن يطلبوها
حدوته كوميديه أو حاجه مرعبه , و أصعب حاجه هي تأليف الحدوته الكوميديه بس أهو ربنا
بيعيني .
.
امبارح طلبت معاهم
حاجه مرعبه , قلت ماشي , و بدأت أرتجل , كان يا ماكان يا ساده يا كرام ولا يحلى الكلام
إلا بذكر النبي عليه الصلاة و السلام , كان فيه راجل اسمه الشاطر محمد , كان عايش في
كوخ جنب الغابه و كان كل كام يوم يروح الغابه يصطاد غزاله و يرجع بيها عشان ياكلوها
, و يقعدو ياكلو فيها يومين تلاته وبعدين الشاطر محمد يروح الغابه تاني و يصطاد .
.
و في يوم الشاطر
محمد راح الغابه و شاف منظر مرعب, شاف الغزلان ميته , اللي راسها مقطوعه و اللي متاكل
نصها , الشاطر محمد اتخض وقال ايه اللي بيحصل هنا ده ؟ و فضل ماشي لحد ما لمح شجره
كبيره ضخمه من بعيد بس حس إن الشجره دي بتتحرك , قال بس انا اكيد جوعت او من الخوف
شايف إن الشجره بتتحرك , بس لما قرب شويه اكتشف ان اللي بتتحرك مش شجره ده وحش عملاق
, الشاطر محمد اترعب و جري بسرعه استخبى تحت شويه حشائش قبل مالوحش يشوفه , وقلبه فضل
يدق يدق و قال بس هو أكيد الوحش ده اللي اكل الغزلان , الشاطر محمد و هو مستخبي قعد
يفكر أعمل إيه وارجع ازاي ؟ لو الوحش شافني يبقى هياكلني , مش مهم أصطاد بس ارجع ازاي
؟ و لو فضلت هنا متداري الدنيا هتليل عليا و الغابه هتبقى مرعبه أكتر , يعمل ايه الشاطر
محمد يعمل ايه ؟ يعمل إيه يا لمار ؟
.
لمار ( كانت مندمجه
في الحدوته ) : هو ممكن يجيب قفص كبير أوي و ييجي من ورا الوحش كده ويتسحّب و يقوم
رامي القفص عليه يقوم الوحش محبوس جوه القفص و يقفل بالقفل بسرعه و يجيب دبوس طرحه
و يغز بيه الوحش من ورا القفص و بعدين يسحب القفص ده و ياخده يوديه للبوليس .
.
أنا : برافو يا
لمار فكره حلوه أوي , انتي هايله عشان بتفكري في حلول .
.
و بعد ما لمار
لقت الحل و ختمت الحدوته طلبت طلب غريب , قالت يا بابا مش انا بفكر و ألاقي حلول أهو
؟ قلت لها أه , قالت خلاص اكتب الكلام ده عالفيس بوك بقى , قلت لها حاضر .
............................................................................................................................
ليست هناك تعليقات:
إرسال تعليق