Mohamed
Hussein
10
سبتمبر 2015·
إعتراف
.
أيوه انا اللي
بيروح المصيف في قريه سياحيه مثلا أو تبع فندق و يبقى دافع في اليومين تلاته ألفين
تلاته و مع ذلك لما بنزل البحر مابعرفش استمتع بالمايه والبحر والموج عشان عيني بتبقى
عالشمسيه و خايف حد يسرق الشبشب البلاستيك بتاعي أبو 8 جنيه .
................................................................................................................................
Mohamed
Hussein
10
سبتمبر 2015·
لما تغيب ساعات
عن الفيس و النت و الأخبار , و بعدين تفتح التلفزيون و يشاء السميع العليم تلاقي الجزيره
مباشر , تقول هه نشوف بقى و نتفرج ( عًمْ نتفرّج على رأي الراجل بتاع فيلم كراكون في
الشارع ) .
.
الله الله , قول
يا سيدي قول , سبحان من أبدعك , واحد خوا ( خواجه يعني ) و واحده شر ( شربات أقصد
) ومؤتمر صحفي من جنيف ( مهد الأنبياء والرسل و الملايكه ام جناحين ) , منظمة حقوق
الإنسان الأمميه المشويه منها و المقليه , و كلام بالانجليزي عن الرئيس الشرعي المنتخب
محمد مرسي ( ههههههههههههههههههههه يا ولاد الشر ..الشربات يعني ماهو مبارك كان منتخب
, منتخب جدا منتخب أوي ) .
.
و ملاحقات لحزب
الحريه و العداله الكيوت !! هييييييييييييييح , و حكم العسكر اللي بيرعى الإرهاب ههههههههههه
و بيهدد الأمن والسلام في مصر و المنطقه و العالم ( طب و كوكب الأرض و المجموعه الشمسيه
و درب التبّانه ؟!! ) .
.
بس سيبك انت أهم
حاجه قالوها , نظام السيسي هيقول لنا حاضر هنراعي حقوق الإنسان , و مش هيراعو حاجه
, ماحنا بعتنالهم تقرير في مارس و قالو لنا حاضر و ماعملوش حاجه , و برضه هيزودو القمع
, لا يا خواجه وانت الصادق , نظام السيسي هيمسك التقرير و يبرمه و يحطه في الحماده
!! .
.
بس بس بس , كده
انا اتطمنت على مصر أه و عهد الله , ماهي طالما الحكايه فيها قناة الجزيره بنت الشربات
و منظمة حقوق الشربات ( يا شربات العالم اتحدو ) و الجماعه الإرهابيه , يبقى احنا وصلنا
باختصار لمرحلة ان الجماعه ( الإرهابيه ) أفلست تماما و وصلت لمرحلة انها كشفت راسها
و بتدعي علينا دلوأتي عندم مقام الطاهره اللي اسمها منظمة حقوق الانسان في الأراضي
المقدسه السويسريه .
................................................................................................................................
Mohamed
Hussein
8
سبتمبر 2015·
سؤال علمي : إحسب
سرعة سقوط قنبله ذريه سقطت من طائره امريكيه فوق الأراضي السوريه عند الثانيه الخامسه
من بداية السقوط إذا كان ارتفاع الطائره عن سطح الأرض هو 650 متر و وزن القنبله
4000 كيلو ؟.
.
الإجابه :
طالب أمريكي :
سرعة القنبله بتساوي كذا مضروب في معامل كذا و مقسوم على كذا , بس أنا قلقان على الحاله
النفسيه للعصافير و طيور السنونو في الدول المحيطه ب سوريا بعد سقوط القنبله .
.
طالب بريطاني
: السرعه زي ما قال الطالب الأمريكي و انا قلقان على معدل نمو الشعر في صدر الديناصورات
اللي في غابات السافانا بعد سقوط القنبله .
.
طالب استرالي
: السرعه زي ما قال الأمريكي و البريطاني و انا قلقان على حاجه بس مش فاكرها .
.
طالب روسي : لا
, انا هحسب سرعة الصاروخ الروسي اللي يصطاد الطياره الأمريكيه قبل ماتوصل لسوريا و
هحسب كمان هنبيع الصاروخ للعرب بكام ؟
.
طالب عربي رقم
1 : مادري ويش هي السرعه بس انا قلقان على مؤخرة كيم كارديشان و خايف انها تتأثر بسقوط
القنبله .
.
طالب عربي رقم
2 : نايم و بيشخّر .
.
طالب عربي رقم
3 : يعني ايه قنبله ذريه ؟
.
طالب إخوانجي
: يعني ايه سوريا ؟
.
طالب سلفنجي :
لو الطياره عدت من فوق السعوديه و طارت فوق الكعبه يبقى حرام عالأمريكان و هيروحو النار
عشان الكعبه مكان مقدس و الهوا اللي فوق الكعبه هو كمان مقدس , لكن يجوز لنا أن ننكح
المضيفه الأمريكيه اللي في الطياره .
.
طالب كولجي : الحريه
ل زينات أبو شفّه و ست أبوها جاكلين .
...................................................................................................................................
Mohamed
Hussein
7
سبتمبر 2015·
الشكرمون بعد ما
طاخ في الترالولي ( مرحلة ما بعد الترالولي ) .
.
رجل الأعمال :
بقولك يا باشا , هتديني حتة الأرض اللي قلت لك عليها و انت عارف انا عنيا ليك .
الوزير : انت بتقول
ايه يا مون بيه , الموضوع ده صعب جدا و انت عارف ان العين علينا .
.
رجل الأعمال :
يا باشا ده شيك على بياض اكتب فيه الرقم اللي تحبه .
الوزير : أرجوك
يا مون بيه ماتضغطش عليا اكتر من كده , انت عارف انا بحبك أد ايه .
.
رجل الأعمال :
وفيه شحنة بدل و كرافتات مستورده وصلت البيت عند حضرتك من شويه .
الوزير : ده كتير
يا مون بيه , بس اللي احنا بنعمله ده حرام على فكره .
.
رجل الأعمال (
بيمد إيده في جيب البدله ) : و عشان هو حرام , اتفضل يا سيدي , دي تذاكر حج لمعاليك
و للحاجّه أم الولاد و لكل حبايبك عشان تكفّر عن الذنب ده , بس و النبي تدعو لنا و
وانتو في الروضه الشريفه عند قبر سيدنا النبي .
.
الوزير ( مبتسم
) : مفيش فايده فيك , عرفت تقنعني , اللهم صلي و سلم عليك يا سيدنا النبي , هات الطلب
أوقعه , أنا هدعي لك ربنا يهديك يا مون بيه .
رجل الأعمل ( دمعه
نزلت من عينه ) : الدعوه وصلت يا باشا .
....................................................................................................................................
Mohamed
Hussein
7
سبتمبر 2015·
سبحانك يا رب
.
يعني الوزير من
دول قبل ماينزل من بيتهم يقعد في التراس يشرب قهوته مع الفطار الكونتينينتال و يتناقش
مع الهانم مراته , يا ترى يتغدو كافيار و جمبري و سبيط و لا يطلبو من تشيليز أفضل ؟
و تسأله الهانم : هنروح فين في الويك إند ؟ يا ترى الفيلا بتاعة مارينا ولا الشاليه
بتاع الغردقه , ويقوم هو يسرح و يفكر كده و يقول لها نروح مارينا عشان أقرب و الجاكوزي
فيها احلى ( بس هو افتكر ان المزز في مارينا أحلى وقال لنفسه : أمتّع عنيا شويه و أدلّع
حواسي ) .
.
و ينزل من بيتهم
يلاقي عربيه مرسيدس 2016 و موكب و صولجان و موتوسيكلات و ظباط بيدّوله التحيه , يركب
في الكرسي الوراني و ينجعص كده و يقول للسواق , بالراحه شويه يا حيوان هي الدنيا مش
طارت , و يطلع بقى على مكتبه الفخيم في الوزاره وسط انحناء و ابتسامات بلاستيك من جميع
الموظفين .
.
و قوم يشاء السميع
العليم ان نفس الوزير ده ينزل في استدعا لمكتب رئيس الوزاره و محلب يبرم له الإقاله
و يحطها ( في إيده ) و ينزل الوزير السابق من هناك يلاقي بوكس شرطه مستنيه تحت و جوز
عساكر يجيبوه من ياقة البدله و يزقّوه جوه البوكس , بعد شويه الوزير السابق يقول للعسكري
و النبي تقول للأستاذ السواق بسرعه شويه عشان محصور و عايز ادخل الحمام , و هو في الطريق
يفكر و يتخيل و تبقى أقصى امانيه انه يلاقي جردل عشان يستحمّى بيه في السجن , و يلاقي
وجبه يوم التلات غير العدس و يقول يارب يارب المساجين مش يسمّوني حلاوه !! .
...................................................................................................................................
Mohamed
Hussein
7
سبتمبر 2015·
إقالة وزير الزراعه
من منصبه , و قبضو عليه عشان يتحقق معاه كمان !! , أنا كده اتأكدت إن السيسي رجع من
جولته الخارجيه , أصل عمك ابراهيم ده راجل طيب كده و بركه و صحته على أده , و زي ما
بيقولو في الأمثال ( ي ي ي ) , يادوب يعرف يط*** .
.
أيوه كده يا سيسي
خليها تنضف شويه , يارب عقبال الوزير التاني اللي في بالي و الوزير التالت اللي في
بالي و فخامة معالي صاحب السمو الملكي الوزير الرابع اللي في بالي , اللي هو بسم الله
الرحمن الرحيم بسم الله الرحمن الرحيم .
...............................................................................................................................
Mohamed
Hussein
7
سبتمبر 2015·
تصريحات أحمد الزند
كلها مستفزه و بترسخ ل عنصريه و طبقيه غريبه و مقيته , بشوفها طبقية واحد (( مُحدث
نعمه )) , ده رأيي , و ماشوفناش للزند أي قرارات من شأنها اصلاح منظومه متهالكه اسمها
منظومة القضاء إنما شوفنا منه شوية هري و جليطه و مليطه و أنعره كدابه و كلام عن المصايف
بتاعة الباشا القاضي و مرتبات و بدلات الباشا القاضي , و الباشا القاضي لازم يتدلع
و الشعب يعمله رجليه باديكير كل يوم الصبح , لما بقيت حاسس اننا عايشين في تمثيلية
الوسيه .
.
من كام شهر لما
اتولى الزند الوزاره اتعملت عالفيس أفراح و ليالي ملاح و طلعت الأغاني تقول الزند الزند
الزند الزند الزند أبو شامه على جبينه , و العيال تجري في الشوارع و تقول انت كده مسكتني
من زندي اللي بيوجعني , و اللي يقولك انت ماتعرفش الزند ده عمل ايه في الإخوان ؟ ده
نفخهم , ده ولا صلاح الدين الأيوبي و الظاهر بيبرس , الزند اللي الأسفلت اشتكى منه
, الزند اللي كان باقي له يومين و صورته تنزل عالجنيه , الزند ده رابسو اللي هينضف
الوزاره , وانا بصراحه مش شايف لا صلاح الدين ولا فساد الدين و لا الظاهر ولا الباطن
, انا شايف واحد أرعن و برياله , و للأسف هيتحسب عليك يا ريس مع اني قلت لك يوميها
إنه ( كارت محروق ) .
.
إفتكر ياريس إني
قلت لك بلاش .
.
#زند_والدكتور_نعمان
.
#زند_صبري .
.......................................................................................................................................
Mohamed
Hussein
7
سبتمبر 2015·
مفيش في مصر كلها
حد أهيف ولا أعبط من واحد قرر انه ينزل ينتخب مرشح فلول عشان يسقط السلفيين أو واحد
قرر ينتخب مرشح سلفي عشان ينتقم من الفلول .
.
بكره , و ساعة
الجد أول ناس هينضمو لبعض و ياخدو بعض بالأحضان هما الفلول و السلفيين , تجار الدين
و تجار القوت و الأراضي , التجار هيعملو أد لبعض .
...................................................................................................................................
Mohamed
Hussein
7
سبتمبر 2015.
أعتذر عن البوست
اللي فات ( بتاع نفخ حمدي الفخراني ) , الخبر بيقول لسه هيحققو معاه بتهمة الرشوه يعني
مجرد متهم , و الخبر التاني اللي بيأكد انه خد رشوه فعلا ورد على لسان أحمد موسى و
بالتالي ده اكبر دليل إن حمدي الفخراني برئ !! .
.
إعتذار واجب لحمدي
الفخراني لحد ما تخلص التحقيقات .
.....................................................................................................................................
Mohamed
Hussein
6
سبتمبر 2015·
زغرطي يا ست أم
كوثر , عقبال عندك يا ست أم فاروق , لولولولي , إبن كمال الشاذلي اترشح في انتخابات
البرلمان 2015 , أه و عهد الله , كأن الأرض كرويةٌ و بتلف حوالين رقبتنا احنا , و لّا
هو الزمن رجع بالحماده بتاعته لورا ولّا ايه ؟ هما اللي اختشو ماتو فعلا ولّا احنا
اللي هنموت مفروسين ؟.
.
و طبعا أهالي دايرة
الباجور مش هيقصرو مع الغالي ابن الغالي و هينجح دور أول و بامتياز , الله يرحمه أبوك
كان عامل تسعيره لكل حاجه من أول دخول الطالب لكلية الشرطه لحد اختيار الحزب الوطني
لمرشحيه , ده ب 30 ألف و ده ب 500 ألف و الحسّابه بتحسب, و طبعا إنت اللي ورثت المجد
الشخصي و التاريخ النضالي المشرف ده كله ( أه يا نضالي اللي اتفقعو ) , أتاري إن الديموقراطيه
مش بس لها أنياب , دي أحيانا بيكون لها بوز و شلاضيم و بتبقى شبه ريهام سعيد .
..................................................................................................................................
Mohamed
Hussein
6
سبتمبر 2015·
القواعد العشره
في فن اختيار المرشحين
.
عزيزتي الناخبه
عزيزي الناخب , محتار و مش عارف تختار ؟ و مزنوق أوي في القرار ؟ طب تعالى أقولك على
نظربة ( القفا ) بس تعزمني عالفطار :
.
1- لو مرشح قالك
ماتنتخبش جرجس ولا مينا و إلا هتبقى من ولاد الذين و تبقى وافقت ان نجيب ساويرس يمسك
رئيس وزاره ورئيس اتحاد ملاك العماره ... على طول ترزعه على قفاه و تقوله انت كده حمار
في الديموقراطيه وأخرك تشتغل في مطعم فول و طعميه .
.
2- لو مرشح قالك
انتخبني عشان تدخل الجنه في الأخره ارزعه على قفاه و قوله دورك تدخلني الجنه في الدنيا
يابو عقل فاسكونيا .
.
3- لو مرشح قالك
انتخبني عشان اخدم الدايره و ارصف شوارع الدايره و اشوف وظيفه لشباب الدايره ارزعه
على قفها و قوله يابن الدايره دورك الرقابه و التشريع و صوتي مش للبيع .
.
4- لو مرشحه كتبت
اسمها في الدعايه و حطت صورة ورده أو صورة جوزها ارزعها على قفاها و قول لها اقعدي
في البيت يا أم العيال و اتفرجي عالشيف شربيني و الريس متقال , يابت بيقولك ابوكي ماتطلعيش
في القياله .
.
5- لو مرشح قالك
انتخبني من أجل الشهداء و حقوق الشهداء و أهل الشهداء ارزعه على قفاه و قوله انت كده
تبقى تاجر و في الأصل فاسق و فاجر .
.
6- لو مرشح قالك
خد كارت شحن او علبة دوا و انتخبني ارزعه على قفاه و قوله أنا بفكر في مستقبل جيل كامل
هيحاسبك و يحاسبني , من ضمنهم إبنك و إبني .
.
7- لو مرشح قالك
انتخبني عشان انا بحب السيسي ارزعه على قفاه و قوله دورك تراقب الحكومه و السيسي حته
لو بتحبه مش تبقى طبّال وعيّل لامؤاخذه شمال .
.
8- لو مرشح قالك
انتخبني عشان اجيب لكو داعش تحكمكو هي و طالبان و المجاهدين و زفت الطين ارزعه على
قفاه و قوله أنا المصري حفيد الفراعنه و انت يابن الكلب مين ؟
.
9- لو مرشح قالك
انا كنت فلول بس توبت وانتخبني ارزعه على قفاه و قوله الشرم*** لما بتتوب بتعرّ* و
المؤمن مش من جحر مرتين بيتقرّص .
.
10- لو واحد قالك
انا اسمي مصطفى بكري و كنت مناضل زمان أيام مبارك و انتخبني ارزعه على قفاه و قوله
الشعب مابقاش داقق على دراعه عصافير ولا نسور يا طبّال لكل العصور .
...............................
...............................
و بس بقى يا سيدي
, تفضل كده ترزع المرشحين على قفاهم و تستبعدهم لحد ماتوصل لواحد كويس , يكون شاطر
فعلا و اسمه مكتوب في الشطار , قوم بقى هات الفطار .
.......................................................................................................................................
Mohamed
Hussein
6
سبتمبر 2015·
ألف حمد الله عالسلامه
ياريس , نورت بيتك و مطرحك , بقولك ياريس عشان ماتتفاجئش يعني , أنا هبعت لك الواد
الموس و الواد القُشاط عشان يسرقو جواز سفرك بالليل , مؤقتا بس , أصلنا محتاجينك هنا
أوي , تشوف لنا حكاية القضاه و كبار الظباط و الطربوش الأحمر أبو زر , و كمان تشوف
مريم جابت صفر في الثانويه بمجهودها ولا بالدروس الخصوصيه أصل انا قلقان انها تكون
غشّت في الإمتحان .
.
و تشوف لنا معالي
محافظ بورسعيد راعي الفن و الفنانين و الفنانات و البيبي دول , و معالي محافظ الشرقيه
بتاع صالونات الحلاقه و البوتيكات , و تخطف رجليك لحد معهد أمناء الشرطه تشوف الرجاله
هناك لو ناقصهم حاجه عايزين حاجه ؟ جاكوزي , ساونا , ساندوتشات هامبورجر , حصانه ماشي
, جوازات سفر دبلوماسيه مايضرش , إحنا عنينا ليهم ولا نعرف نعيش من غيرهم أبدا , بالك
ياريس كتاب التاريخ بيقول إن أمناء الشرطه هما اللي حاربو الهكسوس و التتار و أسرو
لويس التاسع و واجهو الحملات الصليبيه و كان لهم الدور الأبرز في حرب الإستنزاف .
.
أنا طبعا عارف
ان كل اللي فات دي مش شيلتك بس الشيله كلها في النهايه بتترمي في حجرك و معاليك لما
سافرت كنت على رأي اللي قال بيتعب و يشقى بره عشان يبعت فلوس لعياله و خواته اللي في
الحكومه , بس عياله و خواته كانو بياخدو الفلوس دي و يتصرمحو بيها في الكباريهات ولامؤاخذه
, يعني القصد , اللي بتعمله سيادتك باليمين بيروح على اديهم بالشمال .
.
أه ماتنساش ياريس
تصور جواز سفرك صورتين تلاته قبل ما الموس و القشاط يطبو عليك بالليل و تخليهم معاك
إذ ربما ظابط يوقفك في كمين ولا حاجه , قول له جواز سفري اتسرق و معايا الصوره .
.......................................................................................................................................
Mohamed
Hussein
5
سبتمبر 2015·
ماعتقدتش فيه حد
بائس في الدنيا دي أكتر من واحده نزّلت صوره فوتوشوب لمرسي البهلول و هو حاضن الطفل
السوري الغريق و مكتوب فوقيها : أين أنت سيادة الرئيس لتنقذ العرب و المسلمين , فك
الله أسرك !!
.
لما شوفت الصوره
دي و التعليقات عليها حسيت ان كوكب الأرض ماسك في إديه سيجارة بانجو كبيره من 4 سنين
, لا عايز يكمّلها ولا عايز يطفيها , و تقول لكوكب الأرض يا حماده السجاره هتلسع صوابعك
, عيب يا حماده و مفيش فايده .
.
أه بالمناسبه
, البائسه دي بتشتغل إعلاميه ولامؤاخذه في قناة القدس و عندها 100 ألف فولور بيتابعو
إبداعاتها اللي تخطّت حدود الزمان و المكان ( والزمكان ) , كلهم ماركة ( سيبها و خدها
يوم الحد ) .
.......................................................................................................................................
Mohamed
Hussein
5
سبتمبر 2015·
نص بيان جامعة
الدول العربيه رقم 56734 بتاريخ 05/09/2035
.
هذا و قد قررت
الجامعه العربيه بإجماع الأراء أن تشجب و تستنكر و تدين الإعتداء الغاشم من حكومة داعش
المجرمه في دمشق على السوريين العُّزل في مدينة حلب المحتله و الذي أسفر عن مقتل اكتر
من 1200 سوري معظمهم من النساء و الأطفال , كما تؤكد الجامعه على حق العوده للاجئين
السوريين .
.
أخبار ذات صله
:
.
- السعوديه و الإمارات
تقرران التبرع بمبلع 5 مليار دولار لإعادة إعمار مدينة حلب .
- أغنية ( حلب
في القلب ) تنتشر بين الأطفال العرب وافتتاح قناة ( راجعين يا سوريا ) .
- الكوفيه الحلبي
تحل محل الكوفيه الفلسطينيه على اكتاف الشباب و المجاهدين و بتوع 6 ابريل .
- قيادات المقاومه
السوريه يؤكدون من قصورهم في الدوحه و طهران أن الرد على الإعتداء سوف يكون مدمر و
مزلزل ( وعنيف أخر حاجه ) .
- الخطباء و الدعاه
يدعون على داعش في صلاة الجمعه : اللهم احصهم عددا و اقتلهم بددا .
- اسرائيل تعلن
هبوط أول مركبة فضاء اسرائيليه على سطح كوكب عطارد .
.
و أخيراً :
- قناة الجزيره
تطالب مصر بفتح المعابر مع مدينة حلب المحتله و فك الحصار ( مع ان مفيش معابر بينا
أساسا ) .
..................................................................................................................................
Mohamed
Hussein
5
سبتمبر 2015·
فالاد حرامي خرسيس
أدب يوك
.
لو صح الخبر ده
بتاع استثناء أبناء القضاه وكبار الظباط من التوزيع الجغرافي و التحويل بين الجامعات
بحجة الأمن القومي ( اعتبارات قوميه ) !! .
.
تبقى الحكومه دي
مصره انها تجيب طين و تحط على دماغها أو بمعنى أصح على دماغ انصارها اللي هما احنا
, طب و اعضاء مجلس الشعب يا باشا ؟ و كبار الموظفين في البنوك و شركات البترول و الوزرا
و المحافظين و مساعديهم و أساتذة الجامعات الأجنبيه و السفراء و الفنانين و لاعيبة
الكوره و الإعلاميين و الرقاصات ؟ مالهمش نفس هما كمان ؟ ماهما دول كمان مستهدفين و
أمن قومي و محدش مش مستهدف ولا يمس الأمن القومي في أم البلد دي غيري أنا و أبو دعاء
البواب بتاع العماره , احنا ولاد كلب يا شيخ .
.
يعني يا حكومه
بدل ما نحلم بالقضاء على المعجنه اللي اسمها البيه و الباشا , نقوم نقنن بشويتهم و
بهويتهم دي , يعني بدل ما نصلح الغلط نقوم نعمله و نخليه قانوني ؟ , طب كمل جميلك بقى
يا عم ابراهيم و النبي , و رجّع لنا الطربوش الأحمر أبو زر , و خلي القاضي يلبسه هو
و الظابط الكبير , و لما القاضي يقعد على منصة القضاء و قدامه حرامي غسيل يقول له
: انت حرامي خرسيس فالاد , أدب يوك , أخلاق يوك , يا عثمان يا عثمان , اضرب فالاد حرامي
خرسيس بالكرباج .
.......................................................................................................................................
Mohamed
Hussein
5
سبتمبر 2015·
حوار في ماية البطيخ
.
أنا : شوفت اللي
حصل ؟
ناشط سياسي : حصل
ايه تاني ؟ قول و اشجيني
.
أنا : فيه 25 عسكري
ماتو في اليمن و احتمال العدد يوصل 40 .
الناشط ( ضحكه
و سعاده مفاجأه ) : أه , مش قلت لك السيسي هيخربها و يودي عساكرنا عشان يموتو هناك
, عشان كفيله اللي بيصرف عليه هيطلب منه كده .
.
أنا : بس العساكر
دول إماراتيين .
الناشط ( زعل شويه
) : أه , بس بس , يبقى السيسي خلع ايده عشان جبان و هيبوظ علاقتنا بدول الخليج , صح
صح عشان كده سافر روسيا و هيتحالف مع روسيا و نظام بشار ضد الثوره السوريه و الربيع
العربي .
.
أنا : شوفت الطفل
اللي لقوه غرقان على شط البحر ؟
الناشط : من غير
ماشوف , يبقى جيش السيسي قتله , السفاحين , و هتلاقيه اتقتل في سينا و الجيش هيبرر
كالعاده و يقول احنا بنحارب الإرهاب .
.
أنا : لا ده مش
في سينا , ده طفل سوري رضيع هرب مع أهله من نعيم الثوره السوريه و الربيع العربي هو
و ملايين السوريين و مات غرقان على شواطئ تركيا .
.....................................................................................................................................
Mohamed
Hussein
4
سبتمبر 2015·
قيادات حزب النور
فاهمين إنهم لما يلبسو كرافتات و بدل و يقلدو الخواجات و الفرنجه يبقو كده اتحولو لمدنيين
ولاد مدنيين وفاهمين كل حاجه عن الدوله المدنيه .
.
بس لما نزّلو اعلانات
لمرشحيهم في الشارع نزلو اعلانات المرشحات من غير صوره , طبعا عشان وجه المرأه عوره
( و مناخيرها عوره هي و الودن الشمال وضرس العقل ) , ولما المرشحه دي تنجح في الإنتخابات
و تبقى قاعده في البرلمان و عايزه تتناقش في قضيه مش هتتكلم ( عشان صوتها عوره ) لكن
ممكن تجيب حد محرم يتكلم مكانها أو تكتب بإديها اللي عايزه تقوله , لأ بلاش تكتب باديها
دي , خطها ممكن يكون حلو و يثير شهوة رئيس البرلمان , ولو انطلب توقيع كشف طبي على
الأعضاء أكيد الحزب هيرفض الكشف على عضواته , مش جايز الدكتور يطلب أشعه و الطحال يبان
؟ و انتو طبعا عارفين ان طحال المرأه عوره هو و البنكرياس , حذاري يا أختاه من أن يرى
الدكتور بنكرياسك في الأشعه .
.
انتخبو حزب النور
, حزب الرز بلبن المدني أخر فيصل , و ساعتها البلد كلها هتاكل رز بلبن ( مع الملايكه
) .
.............................................................................................................................
Mohamed
Hussein
4
سبتمبر 2015·
شكل البرلمان القادم
: راجل بدقن طويله و جلابيه قصيره و ماسك في إيده سيجار كوبي ماركة ممبار !! , يعني
باختصار اللي مصو دم الشعب زمان مع اللي شوهو عقول الشباب , تجار أراضي الدوله مع تجار
الدين ( يبقى برلمان التُجّار), و ييجي واحد يتحمق أوي و يسأل يا ترى رئيس البرلمان
اللي جاي اسمه ايه ؟ هه اسمه إيه ؟ ياخويا يكون اسمه زي ما يكون , أقولك هيكون اسمه
( أبومصعب أحمد عز ) أو ( أم الدرداء سوزان ثابت ) , هتفرق معاك ؟! .
.
ده طبعا إلا إذا
, إلا إذا قررت الأحزاب إياها بتاعة ( خُلقنا للنسحب ) إنها تعمل ثورة سريعه جدا على
نفسها و تنزل الشارع و تلحق اي حاجه من التورته , و الاحزاب اللي عايشه عالفيس بوك
أحب أقول لهم إن مارك ذات نفسه مالوش صوت انتخابي , و الأحزاب اللي بتعمل تحالف العصر
و تهده أخر النهار تسرّح المعلم ( أبو الهدد ) و تبعته رحله ل ( مشاراجوا ) , اللهم
قد بلغت اللهم فاشهد .
.....................................................................................................................................
ليست هناك تعليقات:
إرسال تعليق