Mohamed
Hussein
3
سبتمبر 2015·
الدايره المقفوله
.
حاول تركز , الوقت
يداهما , لا مش بيداهمنا ولا حاجه , ماتركزش أوي , أصلا مفيش جديد , دي دايره و بنلف
فيها زي الساقيه , احنا بس لما بنتعب بنركن شويه نقوم نتفاجئ و احنا راكنين اننا مربوطين
في ساقيه .
.
حال العرب كده
, مش عارف انت متفاجئ ليه زي الراجل اللي خد 17 قلم على سهوه , الحكايه لا حرب على
إسلام ولا حرب على أسامه , و دي بقى قصة عنب ديبو اللي هنحي فيها و نتحاكى , الحكايه
اسمها كيان صهيوني واتزرع في وسطينا زي الورم الخبيث , و بلاد مطلوب لها تعيش و تعوم
في الجهل و التخلف ( حسبة اقتصاديه بحته ) , قدرنا ان ربنا أنعم علينا ب كذا نعمه مش
عند غيرنا , الموقع الجغرافي ( في نص الكوكب البائس اللي محتاج حلحله لاستقطابه ) و
الثروات الطبيعيه ( زكايب زكايب ) فكان لازم و حتما ولابد نكون كده , اومال العالم
الأول يعيش إزاي و يجيب لعياله كاتشب و مايونيز و جاكوزي منين ؟ يعني انت عايز الست
أنجيلا تاكل عيالها ؟!.
.
إرجع بضهرك لورا
من تاني و قول دي حرب على الإسلام , الجمله دي بتريحك صح ؟ خلاص ارتاح و افرد رجليك
, حقك عليا , سيبني يا سيدي أكلم نفسي , و بقى يا محمد حكاية اننا نعوم في جهلنا دي
كان يلزمها 4 حاجات , لا هما تلاته , حاكم فاسد و شعب جاهل !! .
.
تيجي بقى تقولي
طفل غرقان , ربيع عربي و طلع مش ربيع ولا ياسين قصدي ولا يحزنون , ناس بتقطع هدوم بعض
حتى جوه البيت الواحد , كلاب وديابه و تعالب طلعو من وسطينا , بالك ياد يا محمد إحنا
في الدايره دي من زمان أوي و أول خطوه للعلاج و الحل هي الإعتراف بالمشكله , أه والله
كلامك صح , الله يفتح عليك , اطلب لنا اتنين شاي بقى .
.......................................................................................................................................
Mohamed
Hussein
3
سبتمبر 2015·
عندنا عساكر في
سينا بتحارب و عساكر في الكماين بتموت و إرهابيين عايشين بره و بيحرضو العالم كله ضدنا
في وسائل الإعلام , و شعوب بتتهجر من أرضها و أطفال بيموتو غرقانين , و عندنا إعلامي
طالع يعمل سنفره لرجليه عالهوا عشان تبقى ناعمه و طريه !! .
ياريت يا شريف
الحلقه الجايه تورينا أفضل الطرق لرسم الحواجب و بالمره تفرّجنا عالتاتو الفراشه اللي
رسمته على صدرك .
.
طب و شرفي يا أونكل
انا بقدم إعلام هادف , شرفك ولّا شرف الخنافس ؟! ( بصوت يوسف وهبي ).
..................................................................................................................................
Mohamed
Hussein
3
سبتمبر 2015·
صباح الخير
.
الريس خلاص قرّب
يخلص جولته الخارجيه , الجوله طولت شويه بس كان لابد منها , كلها زيارات في منتهى الأهميه
, مش مهمه أوي بحسبة اللي فات أد أهميتها بحسبة اللي جاي , لها علاقه بترتيبات سياسيه
معينه زي الوضع في سوريا مثلا ( زيارته للصين و روسيا ) و صفقات عسكريه عشان احنا في
حالة حرب فعلا (و في الحرب مش هتنفعنا تويتات البرادعي) , و مشاريعنا العملاقه كانت
سابقاه في كل زياراته ( تنمية محور قناة السويس , العاصمه الإداريه الجديده , حقل الغاز
اللي تم اكتشافه ) .
.
الراجل لف اللفه
دي زي المكوك و عمل و ظبّط و مش بسهوله هيضيع اللي عمله, دي تحويشة العمر يا مولانا
, و المعنى إنه لما يخلص جولته و يستقر في مصر هتكون فيه عملية نفخ معتبره , أتمنى
ياريس أول ناس يكونو في ( جدول النفخ ) بعد الوزرا و المحافظين هما ( مصطفى بكري و
أحمد موسى و توفيق عكاشه ) , عايز فرمان ديكتاتوري بضربهم ب ( الصرم ) قدام الصيدليه
عندي عشان أضرب معاكو , و ريهام سعيد تشوف لها فدانين غرقانين مايه و فيهم مشتل رز
و تنزل هي تشتّلهم , اهو جايز تبطل تكشيرة أمها اللي عامله شبه شهر أغسطس دي .
...................................................................................................................................
Mohamed
Hussein
3
سبتمبر 2015·
أغرب رساله جت
لي عالفيس بوك من شويه , رساله من صديقه من دولة اليابان الشقيقه , دخلت صفحتها لقيتها
ياباني أصلي مش تايواني تقليد , عندها 300 صديق كلهم يابانيين حتى اسمها كاتباه بالياباني
, و الرساله بتاع 12 سطر برضه ياباني , مع إني في الياباني ماتلقاني .
.
في الأول قلت بس
دي أكيد بتشتم زي أغلب الرسايل اللي بتجيلي في ال others , ماشي يا ست سوزوكي اشتمي اشتمي , و بعدين افتكرت
ان اليابان مفهاش خرفان ولا كولجيه و لا بتوع التلاته في الميه يبقى هيشتموني ليه ؟!
.
.
و في أخر الرساله
لقيت رقم تليفون , اااااااااااه بس بس انا كده عرفتك , انتي أكيد عايزه تبيعي لي مروحه
ناشونال و كاسيت من ابو روحين مستعملين استعمال طبيب , يا إما عايزاني أشحن لك كارت
موبايل من أبو 50 .
.......................................................................................................................................
Mohamed
Hussein
2 سبتمبر 2015·
لما مئات الألاف
من السوريين نزلو مصر ماعتبرناش ان ده حدث يستدعي التصوير و كاميرات التلفزيون و السهوكه
, احنا من غير مقدمات قولنالهم اتفضلو ومن غير مقدمات لقيناهم وسطينا و من غير مقدمات
اتصاحبنا و بقينا أهل و نسايب .
.
هي دي مصر اللي
بتعرف تحضن و تحتوي من غير هري كتير ولا بروباجندا , ولو كنت عربي و نزلت مصر هتلاقي
نفسك من غير ماتحس اتشديت وسط الناس و مشيت معاهم لا انت سألتهم رايحين على فين و لا
هما سألوك انت جاي مع مين ؟ اللقمه بنقسمها بالنص و الشارع بتاعك و بتاعي و مش شرط
نكتب بينا عقد بالكلام ده ولا نتصور عشان نوثق الحدث , يمكن عشان كده ماعجبناش البرادعي
, يعني انا مثلا المفروض لو لقيت عامل سوري بيشتغل ديلفري في مطعم وجايب لي أوردر أقف
جنبه و اتصور و جنب مننا ساندوتش الشاورما و أكتب بوست عن حنيتي وإنسانيتي ؟! .
.
إلهي يجيلك ( حلحله
) في ركبك يا برادعي و يحصلك ( استقطاب بائس ) في حواجبك ماتعرف تفردهم عن بعض قادر
يا كريم , هو انت مش ناوي تغلط مره و تكتب كلمتين حلوين عن مصر ؟ ياراجل من باب التغيير
حتى , ولا هو الشيخ الغريب سره باتع ؟! .
.......................................................................................................................................
Mohamed
Hussein
2
سبتمبر 2015·
حركة شباب 6 إبريل
( اللي مالهاش علاقه بالإخوان ) بتبارك لقناة الشرق الإخوانجيه على عودة البث !! .
.
و في سياق متصل
, ريري سيلان تهنئ زيزي صديقة الطلبه على أوضة النوم الجديده و قالت ريري لزيزي في
تدوينه على الفيس بوك : ألف مبروك على أوضة النوم الجديده , تدوبيها في عرق الرجاله
يا حبيبتي يا طاهره .
.....................................................................................................................................
Mohamed
Hussein
1
سبتمبر 2015·
توكل كرمان بتقول
: لبنان على موعد مع الفجر !!.
.
غراب البين زعق
في بيروت , مع انها قاعده ليل و نهار تشتكي من الخراب اللي طال بلدها , مش كان من باب
أولى يا ست توكل يا بتاعة جايزة نوبل ولا مؤاخذه للسلام تقولي للبنانيين كده : لبنان
على موعد مع الفجر زي الفجر اللي عندنا في اليمن بالظبط ؟ و بالمره تبعتي لهم كام صورة
تذكاريه للفجر اليمني و الغراب اللي فارد جناحاته !!.
..................................................................................................................................
Mohamed
Hussein
1
September at 21:22 ·
الكونترول ياريس
...يعني التحكّم بالعربي
.
في كنترول الثانويه
العامه السنادي , القصه مش مريم ملاك ولا منال فوزي , دول هيبقو أول القصيده و أخرها
هيكون كُفْر , انا مش عايز حق البنتين دول انا عايز حق البلد و حق المستقبل و حق بكره
و حق أجيال جايه , انا مش عايز درجات تتوزّع عالبنتين كأنهم منحه حكوميه أو مكرمه ملكيه
أنا عايز العدل , أنا عايز الموظف اللي عمل كده و اللي وراه و اللي جنبه والمسئول و
اللي فوقه , عايزهم قدام قاضي يديهم حكم بالإعدام , بالإعداااام عشان نعرف نودي عيالنا
مدارس يا إما تلغو التعليم و تفضوها سيره , و كل واحد عنده بنت يعلمها الخياطه و يجوزها
من سن 12 سنه , و نرجع بقى لأيام ( ما قبل اللمبه الجاز ) أو لأيام الجاز ذات نفسه
.
.
و لو البنتين مالهمش
حق تطلعو و تقولو برضه و بالدليل و البنتين و أهاليهم يتقدمو للمحاكمه عند نفس القاضي
, مستقبل التعليم في مصر مش لعبه , ولا هي كوره بتتشاط ما بين رجول الاهالي و الإعلام
و المسئولين .
.
محتاجين كنترول
يا ريس .
.......................................................................................................................................
Mohamed
Hussein
1
سبتمبر 2015·
أنا مين ؟
.
راجل عجوز و عندي
كلام كتير و شعارات و هرّايه , بلبس نضاره كعب كوبايه , خدت جوايز كتير وتكريمات و
شرابات قطن و فالنات , جيت مصر من كام سنه وقلت لهم أنا جيت جيت أنا , و لميت حواليا
الشباب الحلو الشطور و عملنا حزب كيوت و أمّور , سميناه حزب الدستور , و بعدين زهقت
و مشيت قلت أروح أشقّر عالبيت , و زي ما روحت يا مولايا زي ماجيت , وفي الحزب عشان
بنؤمن بالحريه وطشّة الملوخيه هتلاقي القرص اشتغل و العض و الناس قطّعو هدوم بعض ,
اتصلو بيا و قالولي : الحقنا يا باشا, إحنا كده قالعين ملط ... قلت لهم أنا في شغل
الأحزاب خلاص بطّلت !! .
.
و حيث إني بقيت
كارت محروق و مش عايز أفهم ولا عايز أفوق قررت إننا مكملين و مقملين و بقيت شبه عصام
الحضري كده لا عارف ألعب ولا عايز أعتزل , ياااه يالميدان , بعد ماكنت حارس الاهلي
و الزمالك و حارس المنتخب الأول بقيت موافق إني ألعب ياكشي في نادي إسكو , هفضل كده
أجاهد على تويتر من وراء البحار زي الفرسان الشطار , و هغنّي لنادي إسكو , انا أصلي
عفريت و لبسكو , والشاطر فيكو يطلعني , على ورق الفل دلّعني .
.
أيوه انا , انا
بتاع أحلام الشباب و بوكسرات الشباب و حَب الشباب , وانا بتاع حلحلة الإستقطاب , وببيع
كمان شعارات و فلايات و تخرصات , أنا لسه عايش و ماتختشيتش , ماهو أصل اللي إختشى مات
!! .
....................................................................................................................................
.
Mohamed
Hussein
1
سبتمبر 2015·
البتاعه دي ممكن
نقول انها مجازا كده ( عَجَلة الفقرا في الريف ) , كانت كده فعلا و كنا غلابه بنفرح
بيها أوي , هي مش بتتركب لكن بتمسكها و تمشي بيها قدامك و لها طريقه تخليها تلف يمين
و شمال زي فكرة العرايس المتحركه .
.
كنا بنعملها إزاي
بقى و احنا عيال صغيرين ؟ الاول نلمّ شوية كازوز حلوين ( غطيان أزايز الكاكولا ) ,
و أحسن مكان تلاقي فيه كازوز كتير اوي هو قدام الجامع بعد كتب كتاب أو جنب الدكان بتاع
خالتك ( فرحانه ) , و نجيب بكرتين بتوع خيط فاضيين ( بعد ما يخلص الخيط منهم ) و نجيب
جريدة نخله ناخد العصايه الي في النص ( بالإنجليزي اسمها midrib ), و نعمل في كل كازوزه خرم صغير في النص بمسمار
و شاكوش ( او حته حجر ) , و ندخل حتة أستيك صغيره في الخرم ده كازوزه ورا التانيه و
لما تكمل الدايره نربط الأستيك و ندخلهم فوق البكره و بعدين نعمل الجريده دي كأنها
الشاسيه و حته صغيره بالعرض تبقى هي الدركسيون و حته من قدام تمسك العجلتين ببعض ,
و نمشي بقى و نلف و نجري بيها في الشوارع و نفرح و نتنطط كده كداهو .
.
أجمل ما في الحكايه
اننا كنا بنعمل كل حاجه بإدينا , الفكره من راسنا و التنفيذ في كل خطواته بادينا ,
بإيد الاطفال الغلابه , و بنعرف نتصرف و نلاقي حلول , و ممكن نزيّن العجله بتاعتنا
بشوية شراشيب قماش و كمان عشان نعلّمها بدل ما تتسرق ( زي ما أمي كانت بتعلم الوز بتاعنا
بحتة قماش برضه ).
.
ماعتقدش ان اطفالنا
بيفرحو باللعب الصيني ام ريموت و الحاجات اللي بتغني أد ماحنا فرحنا باللعب البسيطه
البدائيه دي , مانا قلت جمال الحاجه و فرحتها لما تعملها بإديك , مش مهم يكون معاك
فلوس طول مانت بتعرف تفرّح نفسك بنفسك .
.
ألف شكر لصديقي
الغالي اللي فكرني بأيامنا الحلوه .
.......................................................................................................................................
Mohamed
Hussein
31
أغسطس 2015·
البرادعي دايس
أوي في تويتر بقاله كام يوم , خير يارب اللهم اجعله خير , و مهتم انه يعمل ريتويت للناس
و بلوكات للمعارضين و بيفلّي صفحته 9 مرات في اليوم , انا اعرف ان الممثله في مصر لما
بتتخن أو تعجز أوي و ماتلاقيش منتجين بيطلبوها بتتحجب و تقدم برامج دينيه و تقول (
ربنا هداني و سيدنا النبي ناداني ) , سِلْو بلدنا كده , اول مره اعرف انهم ممكن ماتتحجبش
و بدل ما تقدم برامج دينيه تقعد تكلم صوابع رجليها .
.
يا برادعي , مصر
يعني الخيمه اللي ساترانا , و حريتنا و حريتهم بتنتهي عند لمس الخيمه دي , في البلد
اللي انت عايش فيها لو حصل تفجير واحد أو تهديد واحد هتنزلك لستة قوانين أطول و أوسخ
من الليالي السوده و انت هتطبقها زي الجزمه و إلا هيجيبوك ملط
.
خليك على كده و
غنّي يا منعم , أخرك تشتغل معدّده و عمرك ما هتبقى فارس
................................#ماينفعش_تكون_فارس_وانت_خايف_تمسك_اللجام
!!.
................................................................................................................................
Mohamed
Hussein
31
أغسطس 2015·
لمار بنتي لما
بتطلب اني العب معاها و اكون لعبت فعلا و تعبت و محتاج انام فأقول لها كفايه كده تقولي
طيب أوكيه ( ملاك برئ أهو ) , وتسيبني انام بقى .
.
و لما أصحى من
النوم و ابدأ ألبس عشان أنزل أكتشف الوجه الأخر للملاك البرئ , فين مفاتيح الشقه ؟
و فين المحفظه و الموبايل الكبير؟ طب علبة سجايري فين ؟! مفيش اجابه , يا لمار يا حبيبتي
قولي لي مخبياهم فين أنا اتأخرت ؟ ولا الهوا , و طبعا لمار مابتعملش حاجه من تلقاء
نفسها , أكيد أختها الكبيره هي المحرض الأساسي و العقل المدبر .
.
و في الغالب بيكونو
خبو المفاتيح في البونبونيره مثلا و الموبايل تحت شلتة الكنبه و علبة السجاير في درج
من أدراج المطبخ وانا أقعد ألف و أدور زي الإخوانجي اللي سمع خبر اكتشاف حقل الغاز
المصري .
.
و مستحيل بنت فيهم
تعترف على أختها , لا بالترغيب ولا بالترهيب , على أد مانا فرحان قوي إنهم قدرو يشكلو
عصابه واحده متكاتفه غير قابله للإختراق إنما بيطلعو عيني بجد , النهارده قعدت ييجي
ساعه أدور على المحفظه , و الأدرينالين علي في نفوخي , طب يا لمار هنزل و اسوق العربيه
ازاي من غير بطاقه ولا رخصه ؟ لو ظابط وقفني أقوله معلش أصل لمار زعلانه مني شويه عشان
ماكمّلتش لعب معاها ؟!! .
...........................................................................................................................
Mohamed
Hussein
30
أغسطس 2015·
سبحانك يارب
.
كل ما بشوف زياره
من زيارات السيسي أو مشروع من مشاريعه أو اسمع خطبه من خطبه بحس إن فيه ( أمل و سعد
) جايين يجرو في الطريق .
.
و كل ما بشوف خلقة
مصطفى بكري و سحنة أحمد موسى و اعرف انهم لسه بينظّرو و يصرحو و يتكلمو عن مصر و السياسه
و البرلمان بحس إن ( أمل ) بقت شغاله في شقه مفروشه و ( سعد ) بقى شغال بواب العماره
اللي بتطلع فيها ( أمل ) بالليل , بياخد عرقه برضه .
.................................................................................................................................
Mohamed
Hussein
30
أغسطس 2015·
أكبر كشف للغاز
الطبيعي بالمياه المصريه !! .
.
أيوه بقى , أخيرا
هشتغل كفيل و أشتري عربية لاندكروزر و يبقى عندي كرش و شغاله فلبينيه و 9 بطايق فيزا
في المحفظه و صورة ( أم فراس ) جنبهم , و لو حسيت اني زهقان شويه أقتل عفيفي الصومالي
سواق اللاندكروز حقي .
.....................................................................................................................................
Mohamed
Hussein
30
أغسطس 2015·
قصيدة : ثم
.
روحت اسأل على
مصاريف المدارس بتاعة البنات , عادي يعني لا بيا و لا عليا , سألت موظفة الرسبشن قامت
مطلعه ورقه و قلم و طق طق طق , وانا عايز أقول لها يا ستي اللي بتكتبيه ده عيب و حرام
, هي المصاريف زادت حضرتك ؟ قالت بملئ فيها ( أه طبعا ) , و مش عارف أه طبعا ليه ؟
مفيش أيه في القرأن ولا بند في الدستور بيقول إن مصاريف المدارس الخاصه تزيد بالهبل
ده من غير رقيب ولا حسيب يبقى ليه طبعا ؟!.
.
واحد هيسألني السؤال
التقليدي و يقولي : يا أخي ما تدخلهم مدرسه حكومي و خلاص ولا هو يعني فقر و عنظزه ؟!
, أقوله لا يا فالح , كل الحكايه بس اني مش عايز بنتي ترجع في يوم و هي مضروبه بلوح
خشب أو سور مدرسه واقع عليها أو حتى عملت بيبي على نفسها عشان المدرس كان مزاجه مش
حلو فرفض يسمح لها تروح الحمام , أبقى أنا كده غلطان ؟ .
.
الحكايه أصلها
بدأت بانهيار في التعليم الحكومي , و دروس خصوصيه و مدرسين بيروحو ينامو في المدارس
, و دوله عايمه في ماية البطيخ , يعني دولة في غيبوبه ثم انهيارفي التعليم ثم نوم في
المدرسه ثم استهبال في المعامله ثم عيل يرجع لك متشلفط ثم تضطر تودي ولادك مدرسه خاصه
ثم أصحاب المدارس الخاصه يعاملوك كأنك كورة بينج بونج ثم ييجي الضرب كله عالنفوخ ثم
تشحت على باب السيده , و انا بصراحه عايز أقابل سيادة الريس (( عشان أكمّله قصيدة
: ثم )) .
.
التعليم يا ريس
, ال ت ع ل ي م , و كفاية زيارات لروسيا بقى داحنا لو متجوزينها عرفي ماكناش زورناها
كتير كده , ممكن بس تستعين بالأسلحه الثقيله و الطيارات اللي جبناها من موسكو في التعامل
و التعاطي مع وزارة التربيه و التعليم , و الله هو ده الحل الوحيد عشان النضافه من
الإيمان .
.......................................................................................................................................
Mohamed
Hussein
29
أغسطس 2015·
دماغ تركيب
.
الناس بتشتكي منّي
و رسايل بتجيلي فيها ما لذ و طاب من الكلام الأبيح , أصدقائي الغاليين , عمري 39 سنه
بس عشتهم بالعرض مش بالطول , يعني بالبلدي كده ( عشتهم زحّافي و محرات رايح جاي )
, دماغي دي اللي شبه القلقاسه ركبتها بإيدي , زي لعبة المكعبات بتاعة الاطفال , مفهاش
مكعب واحد خليجي عربي ولا مكعب أمريكاني غربي , دماغ مصريه بحلوها و مرها و جمالها
و زفتها , مابعترفش بالشرق خصوصا الشرق العربي ولا ب ( نَتْر ) الشرق علينا من وهابيين
و سلفيين و بيزنطيين , و لا بعترف بالغرب وافتكاساته , مش بيبهرني الهامبورجر و الكاتشب
و دلع البنات الامريكاني الماسخ , ولا بيشدني العفه المصطنعه بتاعة عباية الراس , يا
جدع مانت عارف اللي فيها و انا عارف و احنا الإتنين عارفين .
.
هتلاقوني طايح
في الوزير و المحافظ و أي مسئول مع اني مؤيد للنظام , بس دماغي المصريه بتطلب كده
, تطلب زي ما تطلب بقى , هو حد قالك إني أخو أحمد موسى في الرضاعه ؟ , و مش عاجبني
البرادعي و سهوكته اللي بقت شبه حلة الطبيخ البايت و لا شايف في 6 ابريل ولا قيادات
الألتراس غير شوية زلنطحيه حافظين شعارين و بيجترّوهم طول الليل و يقعدو يمضعو فيهم
زي الجِمال , الإخوان جماعه ارهابيه , رفعت الأقلام و جفت الصحف , و السلفيين بتوع
بليله و رز بلين و بياكلو على أي ترابيزه أو حصيره , تطلع بقى ترابيزه تبع تيار اسلامي
ولا تيار علماني ولا تيار كهربائي و الله ما بتفرق معاهم .
.
عايزني أفك دماغي
تاني و أركبها على مزاجك عشان أعجبك و ماتشتمش ؟ و الله يابني مابقى فيا حيل للفك و
التركيب , و رأيي انك تاخد القلقاسه كده على بعضها لوكشه واحده as it is أو ترفضها على بعضها , و اللي شبكنا يخلصنا .
............................................................................................................................
Mohamed
Hussein
29
أغسطس 2015·
صعد الشيخ أبو
الفساء البهلواني إلى المنبر أمام جموع غفيره من تلامذته و مريديه , وبعد أن صلى و
سلم و حمد و شكر قال للمريدين :
.
يا إخواني , إنما
نحن في عصر الفتنه و يجب على كل التيارات الإسلاميه في مشارق الأرض و مغاربها ان يتحدو
على كلمة رجل واحد و أن ينبذو الخلافات فيما بينهم , و طالب الشيخ جماعة الإخوان و
السلفيين و داعش و شباب المجاهدين و حركة طالبان و غيرهم ان يتحدو , لأنهم يحملون على
عاتقهم لواء نشر الدين .
.
ثم ارتفع صوت الشيخ
و هو يقول : لا تصدقو الإعلام الخائن الماجن ولا أفلام الزنديق عادل إمام و لا نشرات
الاخبار فهم يتهموننا زورا وبهتانا أننا نقتل الشيعه و نصلب المسيحيين الأطفال و نعبث
برؤس الجنود المسلمين و يتزوج مشايخنا المسنين من فتيات في عمر 15 سنه , و يدّعون علينا
أنا نخرّب و نحرق الأوطان و نقاتل الجنود المسلمين ولا نمس جندي صهيوني واحد , و يقولون
أننا نكذب و نكذب حتى أصبح الكذب ديننا و ملتنا , و يفترون علينا بقولهم : نعاهد الأمريكان
و الصهاينه و نواليهم ثم نتهم مَن ليس منا بأنه عميل للصهاينه و الأمريكان ....تباً
لهم , الويل كل الويل لمن ليس معنا .
.
ثم هدأ الشيخ قليل
و انهمرت دموعه فجأه و هو يخرج من سيالته علبة بلاستيك و يقول للمريدين , بالأمس (
بكاء و شحتفه ) رأيت الحبيب في المنام ( المصلين : عليه الصلاة و السلام ) , و أشار
الحبيب إلى عشبه جبليه و قال لي : يا عبد الله , عليك بهذه العشبه فهي من أعشاب الجنه
و فيها شفاء من السرطان و الضعف الجنسي و أيضا لها مفعول السحر في علاج حب الشباب و
البواسير و تفتيح البشره و تقضي على البهاق و النمل والصراصير , أحضرت لكم خلاصة هذه
العشبه المباركه في هذه العلبه المباركه و عليها هذا الغطاء المبارك من سيالتي المباركه
.
.
المريدين : الله
أكبر , الله أكبر .
................................................................................................................................
Mohamed
Hussein
29
أغسطس 2015·
مصطفى النجار
: البرادعي هو الوحيد القادر على مواجهة شعبية السيسي !! .
.
تصدقو معاه حق
, و البرادعي لو رجع مصر و شال رجليه من ماية البيسين و قفل حسابه على تويترو باع التابلت
وقرر إنه يترشح في انتخابات الرئاسه أنا وقتها هبقى محتار جدا , محتار و مش عارف أعمل
إيه ؟ , يا ترى أنتخب السيسي و لا أنتخب عبد الفتاح ؟! .
.....................................................................................................................................
Mohamed
Hussein
28
أغسطس 2015·
كنت رايح أشتري
مايوه للوجي عشان المصيف , مايوه و بس , عادي يعني الدستور بيدي الحق لأي حد انه يشتري
مايوه وبس , المهم طلعت من المول و انا ايه بقى ؟ جايب مايوهين واحد للوجي و واحد للمار
( مع إن عندها ) , و شنطتين مدرسه للوجي و لمار( مع إن عندهم ) و لبس العيد للوجي و
لمار ( مع إن العيد لسه باقي عليه 3 سنين ) , يا بنات طيب مش عايزين أطقم ملايات و
فوط و طقم حلل ستانلستيل لكل بنت بالمره عشان فرحها قرّب , بعد 20 سنه ؟! .
.
و عهد الله أنا
أب كيوت فشر عمرو حمزاوي و العيال دول بيستعبطوني .
.......................................................................................................................................
Mohamed
Hussein
28
أغسطس 2015·
ملحمه رائعه
.
هروب 8 مساجين
من سجن كفر سعد العمومي !! و قالك المساجين ضربو الحارس و هربو أثناء تجميع القمامه
من العنابر !! .
إديني عقلك بقى
, 8 مساجين معاهم حارس واحد بيلفو عالعنابر , و لما يضربو الحارس ده يطلعو كده مايلاقوش
بوابات و لا سور و لا أمن ولا حراسه و لا حتى حجر يتكعبلو فيه , سجن ده ولا القناطر
الخيريه ؟!! .
.
ما تحترمو عقول
الناس شويه , أصل حكاية ضربو الحارس دي مش مبلوعه , إنما الأقرب للمنطق إنهم كرمشو
كام عشرين جنيه لأمناء الشرطه و الحراس .
.......................................................................................................................................
.
بس الملحمه البطوليه
الرائعه بتاعة هروب المساجين دي ماتكملش ولا يبقى لها طعم إلا لو الأستاذ وائل الإبراشي
أو أستاذ أحمد موسى استضاف كام مسجون من الهاربين على الهوا و عرض مطالبهم , مش جايز
تكون مطالب مشروعه ؟ اعتبرهم أمين شرطه اعتصم و بلطج يا أخي .
.
أستاذ وائل , السبعه
عشره خمستاشر مليون جنيه اللي بتاخدهم مرتب في السنه يستدعو انك تجيب حد من المساجين
الهاربين و تملى الهوا , و مفيش مانع تعمل مداخله مع المتحدث باسم وزارة الداخليه
, و هو يقولك المسجون ده زي ابني و حريصين على مصلحته و انا بنصحه انه يسلم نفسه و
احنا هنشوف طلباتهم , لو عايزين شاشات إل سي دي و اشتراك في الجزيره الرياضيه عشان
يشوفو الدوري الأوربي أوكيه و لو عايزين صوفيا لورين أو صافيناز تبات معاهم في الزنزانه
مفيش مانع .
.
و نبقى كل يوم
الصبح نشغّل لهم أغنية ( على ورق الفل دلعني ) .
ليست هناك تعليقات:
إرسال تعليق