Mohamed
Hussein
17
سبتمبر 2015·
لاعيبة الزمالك
كانو نازلين من أول الماتش يلاعبو سموحه و عنيهم عالأهلي و لو كنا اتغلبنا كنا في الواقع
هنبقى اتغلبنا من الأهلي مع اننا بنلاعب سموحه !! .
.
كده احنا هنقابل
الأهلي مرتين , مره في نهائي الكاس و مره في السوبر , و ممكن مرتين كمان في نهائي أفريقيا
, يعني 4 مرات , طب ما تيجو نعمل مبادره وطنيه كده و نقسم البطولات , الأهلي ياخد الكاس
و السوبر و الزمالك ياخد أفريقيا أو العكس , أهو الأهلي يختار و انا موافق ههههههههههههههههههه
, أه و الله بدل ما فريرا يحرق دمنا تاني , يا جدعان احنا مصريين مع بعض ليه ندخل خواجه
أجنبي زنديق في النص بينا ؟! .
.......................................................................................................................................
Mohamed
Hussein
17
سبتمبر 2015·
فيه ناس كده ,
عندهم توافق عضلي عصبي عجيب في حيثيات الغباوه, تحكُّم رهيب في عضلات البلاله , المشكله
الأكبر إنهم مستمتعين و مستنكيصين أوي بالغباوه دي
.
زي اللي سمع عن
اقتحام الصهاينه للمسجد الأقصى فقام جاب صوره للمسجد الأقصى وحط في وسطها صورة البهلول
مرسي و قال بقى ( الأقصى يناديكم ) , و تبص على صوره مرسي البهلول ماتعرف هو لابس الخوزه
بتاعة صلاح الدين و لا السلطانيه بتاعة باكستان ؟.
.
يعني هو كده يبقى
اسمه الناصر مرسي الدين البهلولي اللي هيحرر القدس ؟ .
.
#رمضان_بطيخه_بقى_مون_أمور
.
...............................................................................................................................
Mohamed
Hussein
17
سبتمبر 2015·
يُحكى أنّ امرأةً
فلسطينيه تعرضت لاعتداء على يد الجنود الصهاينه في محيط المسجد الأقصى و حاولو تمزيق
ثيابها فصرخت المرأه و قالت : و اسماعيل هنيااااااااه , و اخالد مشعلااااه , واقناة
الجزيرااااااااه , فلما أنْ سمع اسماعيل هنيه و خالد مشعل بصراخ المرأه أمرو على الفور
بإعداد العده و تجهيز الجيوش و ال 5 عربيات الربع نقل بتوعهم و لمّو شوية المجاهدين
و الصيع و المقاطيع و الحتتين الكلاشينكوف اللي حيلتهم ( العيال الشبيحه عندنا بيستخدموها
مزيل عرق ) و قررو التوجه جنوبا نحو سيناء لمحاربة الجيش المصري و معاهم مراسل الجزيره
!! .
.
و لما أنْ سأل
مراسل الجزيره احد القيادات الفلسطينيه : لماذا توجهتم نحو سيناء إذا كانت المرأه التي
صرخت قد تعرضت للإعتداء على يد الصهاينه في مدينة القدس ؟ .
فقال القيادي الفلسطيني
: نحن نؤمن يا أخي الكريم أن تحرير القدس يبدأ بتحرير العريش و الشيخ زويد و بنها و
مغاغه و انت تعلم أن القضيه أصبحت معقده و ملعبكه زي ( الفتله ) الملعكبه كده .
فقال له مراسل
الجزيره : أينعم , صدقتَ و رب الفتله .
.......................................................................................................................................
Mohamed
Hussein
17
سبتمبر 2015·
أصدقائي الأعزاء
.
تعالو لي هنا
, يعني اجمعو بالخطوه السريعه , come here
, مانا بصراحه صحيت من النوم و فتحت الفيس و ليا مزاج اشتمكو , أه وش كده , ممكن تقولو
بحكم العيش و الملح الفيس بوكي ,أو شتيمه من باب المحبه و الموده و الأهم إنها من باب
الخوف عالبلد دي , اللي أكيد بتحبوها أكتر مني .
.
أنا هشتم أهو و
محدش يزعل , أشتم يعني ؟ طب هشتم , بصو بقى بلاش عبط و هبل وقلة عقل , أنا كده شتمت
و سامحوني , البرلمان لازم يتم ( اللي هيسألني ليه هغزه بالمطوه في مناخيره ) , ده
جزء من استقرار مصر السياسي و الإقتصادي , الألشه بتحكم عند حضرتك ؟ طب و الله الألشه
عندي بشيلها على ضهري زي الأتب و مش برتاح إلا لما بكتبها , بس فيه أوقات معينه في
عمر الشعوب لازم نتوقف فيها عن الألش و التشويه المسبق , و نبقى إيد واحده , و جادين
, بطّلو بقى تنشرو طاقه سلبيه عن البرلمان اللي جاي ( ويبقى زيكو زي الخرفان و 6 ابريل
و الكولجيه ) , بطّلو تصدرو صورة سما المصري و نادر بكار في الوش كده , إحنا في وقت
حرب حقيقيه , وصفحتك الشخصيه دي بتبقى شخصيه اغلب الوقت يعني تتكلم فيها براحتك عن
مشاعرك و شعورك و شعر صدرك لكن في وقت معين بتبقى صفحتك و قلمك و صوتك و لسانك هما
طوبه ( لَبِنَه بالفصحى ) في مبنى كبير بنحاول نبنيه , و المبنى ده بيبقى كام طوبه
جنب بعض و فوق بعض , يعني صفحتي و صفحتك وقلمي و قلمك .
.
توقفو عن الألش
و العبط لمدة أيام بس و دوّرو في المرشحين و القوايم هتلاقو ناس كويسه أوي , و هفكركو
بحاجه صغيره أد كداهو , البرلمان اللي اتعمل ايام الخرفان كان مليان عاهات , إيشي فرارجي
و ايشي كهربائي سلسيون و اللي يأدن و اللي يرقي و اللي كان شغال في زاويه و لقى نفسه
في البرلمان , بس وقتها أنصار الخرفان و السلفنجيه كانو بيقولو في البرلمان ده قصائد
شعر كأنه برلمان سويسرا .
.
اتعلمو من أعدائكو
يا بشر , فهمتو ولا لسه ؟ أه و اللي خايف إن البرلمان ده ممكن يشيل السيسي هقوله اتطمن
و حط في بطنك بطيخه صيفي ( ما يقدر عالقدره إلا ربنا ) , الدستور مابيقولش كده , الكوره
في النهايه هتترمي في ملعبنا تاني يعني في ( حِجْر الشعب ) باستفتاء ده لو حصل , و
السيسي أساسا لو عملو استفتاء و المصريين نزلو هيصوتو إنه يكون رئيس لمصر و روسيا و
أمريكا في نفس الوقت .
.............................................................................................................................
Mohamed
Hussein
17
سبتمبر 2015·
هنشارك في انتخابات
البرلمان و هنختار مرشحنا على الأقل بطريقة الإستبعاد .
.
طب مبدئيا كده
قائمة ( في حب مصر ) اللي المفروض كنت أعرف بتضم مين و أحزاب شكلها ايه و توجهاتهم
ايه و كده , إنما مابقيتش محتاج أعرف , يكفي انك تعرف ان واحد من المنسقين بتوعها و
اللي صورته ملطوعه في أي خبر يخص القائمه هو السيد الأستاذ الدكتور المهندس المستشار
مصطفى بكري أبو مليون وش , أهي القايمه دي و عهد الله تستحق المحاكمه بتهمة الغباء
السياسي .
.
يعني ينفع مثلا
أقولك هات أحسن لاعب في الزمالك و خليه يبقى منسق للفريق و متحدث رسمي أقوم ألاقي قدامي
حماده طلبه ؟! طب ينفع محافظ الغربيه يكرم العنتيل و يعمله تمثال قدام مبنى المحافظه
و يخليه المتحرش الرسمي بإسم السيد المحافظ ؟! .
.
الساده الأعضاء
و المرشحين و المرشحات و الفلاتر في قايمة ( في حب مصر ) , قدامكو اختيار من اتنين
و بسرعه جدا عشان مفيش وقت , إما إنكو تغيرو الوش العكر ده و تبطلو استفزاز لمشاعر
الناس و إما إنكو تغيرو اسم القايمه و تخلوها ( في حك مصر ) .
..................................................................................................................................
Mohamed
Hussein
16
سبتمبر 2015·
يا مريم
.
صفر % , مابقيتش
قادر أتعاطف معاكي يا بنت الناس الطيبين , لجنه ثلاثيه وراها لجنة خماسيه , وزاره و
طب شرعي و نيابه , تكاتفو و تحالفو ضدك , طب ليه ؟ ماهي نفس الدوله دي اللي اعتذرت
فورا للمكسك عن الخطأ و اللي أقالت وزير و اعتقلته في نفس اللحظه , والي عملت لجنه
و اتنين و طلعت تقارير , هصدق إزاي دلوأتي إنها تحالفت عليكي أو ضدك ؟.
.
طب هتعتذري للناس
و احنا كمان نعتذر ولا هنكمل في المعجنه ؟ , ليكي حق فعلا و نحارب عليه ؟ أصل رئيس
المكسيك جاي و شكله هيكبر الموضوع بتاع الواحات , و سوريا على وشك كارثه , و المباحثات
الفنيه بتاعة سد النهضه جايه بتقرير زي الهباب و بتستنجد بالرئيس يتدخل , واليمن ماتعرفي
فيها اتوبيس كام رايح فين و داعش مسيطره على المنطقه الشرقيه في ليبيا يعني على حدودنا
, نتوكل على الله و نكمل معاكي ولا نشوف الهم اللي ورانا ؟ .
.......................................................................................................................................
Mohamed
Hussein
16
سبتمبر 2015·
سيناريو تخيلي
.................... إله اللامؤاخذه عند المصريين القدماء
.
مشهد 1 ..... اكتوبر
2010 ... مصطفى بكري و مراته قاعدين في التراس
.
المدام : انا بشوف
معارضتك لمبارك بحس اني فخوره اوي بيك يا حبيبي
مصطفى : أومال
ايه ؟ البلد دي لازم تنضف و انا لا يمكن هسكتب على فساد ابدا .
.
.
مشهد 2
.......... 30 يناير 2011 ..بكري و المدام في نفس التراس .
.
المدام : قولي
بقى عشان انا مش فاهمه , انت عمال تدافع عن مبارك و تهاجم الثوره ليه كده ؟
بكري : اسكتي يا
وليه انتي مش فاهمه حاجه , السياسه فيها متغيرات و مستجدات و مستنقعات .
.
.
مشهد 3 ....اغسطس
2011...نفس الأشخاص و نفس المكان
.
المدام : لا انت
كده ناوي تجنني , هو انت مع مبارك ولا ضده ؟ مع المجلس العسكري ولا ضده ؟ مع الإخوان
ولا ضدهم ؟ .
بكري : اسكتي يا
وليه انتي مش فاهمه حاجه , السياسه فيها متغيرات و مستجدات و مستنقعات .
.
مشهد 4 ... مصطفى
بكري بيحلق دقنه في الحمام و فجأه شاف صورته في المرايه
.
الصوره : انت يا
حيوان راضي عن نفسك كده ؟ دانا مابقيتشي عارف شكلي ولا لوني .
بكري للصوره :
اخرس يا حيوان انت مش فاهم أي حاجه , السياسه فيها متغيرات و مستجدات و مستنقعات .
.
.
مشهد 5 ...يناير
2013 بكري و مراته في التراس
.
المدام : يا راجل
ارحم مرارتي , انت بتهبب ايه و البلد بتضيع ؟
بكري : اسكتي يا
وليه انتي مش فاهمه حاجه , السياسه فيها متغيرات و مستجدات و مستنقعات .
.
مشهد 6 ...5 يوليو
2013
المدام : و النبي
انا هشق هدومي منك , انت بتعمل في نفسك كده ليه ؟
بكري : اخرسي يا
وليه السياسه فيها متغيرات و مستجدات و مستنقعات .
.
.
مشهد 7 .. أول
امبارح بالليل بعد العشا , قاعدين في الصالون و معاهم الولد و البنت .
.
الولد : بابا
, بصراحه كده و من غير زعل يعني , انت راجل معرّض .
بكري : اخرس يا
ولد و اتعلم الأدب و انت بتتكلم , السياسه فيها مستجدات و متغيرات و مستنقعات .
البنت : عيب يا
فوفو ماتقولشي على بابا كده , هو منافق بس .
بكري : عيب كده
يا بنت , السياسه فيها مستجدات و متغيرات و مستنقعات .
المدام : عيب يا
ولد , اخرسي يا بنت , ده بدل ما تشكرو بابي , هو صحيح بمليون وش انما ده ليه ؟ مش عشان
يجيب لكو مصاريف المدرسه و النادي و يجيب لكو عربيات , قومو بوسو راس بابي و قولو له
احنا اسفين يا معرض .
.....................................................................................................................................
Mohamed
Hussein
16
سبتمبر 2015·
أهي ابتدت تندّع
أهي و اللي جاي أحلى .
.
استبعاد أحمد عز
و توفيق عكاشه من الترشح للبرلمان !! .
.
طبعا حيثيات الإستبعاد
مادخلتش دماغي , واحد ماعندوش حساب بنكي ساري و التاني ماعندوش حساب بريدي , و كان
ممكن يقولو ماعندوش فالنات قطونيل , مش مهم , اغلب ظني إن استبعادهم تم بأوامر من جهه
عليا عشان يتجنب استفزاز مشاعر الناس , هتيجي انت و تتحمق و عروقك تبان و تقول يعني
ايه تعليمات ؟ و دي كده تبقى ديكتاتوريه , هقولك أه , بصوت أحمد أدم في فيلم معلش احنا
بنتبهدل ( أه يا عم مصيلحي , قولي ياد يابن القرموطي انت كنت جاي هنا لروحيه عشان تبوسها
فعلا ؟ أااااه يا عم مصيلحي ) , يعني و لو مش عاجبك اضرب دماغك في أوسخ حيطه .
.
اوعي ياد تيجي
عندي و تبيع البؤين بتوع العداله و القانون و الهري بتاعك ده , دانا حافظك زي كف ايدي
, إنت ماكنتش عايزهم يُستبعدو مش عشان القانون ولا البيانو , انت كنت عايز تلاقي حاجه
تهري فيها و تقول شوفو يا ناس مرشحين البرلمان شكلهم ايه ؟ و دولة الفساد راجعه , مش
بقولك انا حافظك .
.
هنحني لك ياريس
احتراما لو كان استبعاد الأشكال دي جه بقرارات منك شخصيا و بالمخالفه للقانون و الدستور
, و في مواقف زي دي تحديدا هقول يا أهلا و سهلا بالديكتاتوريه , يا مراحب يا مراحب
, ياريت تكمل جميلك بقى و قراراتك الديكتاتوريه و تعتقل احمد موسى و مصطفى بكري و مرتضى
منصور و توفيق عكاشه وريهام سعيد و تامر هجرس و شريف مدكور مع ان مفيش تهمه محدده
, بس مرارة الناس ممكن تكون تهمه كافيه , الحفاظ على مرارة الشعب , و لو عايز اجراءات
الإعتقال تبقى قانونيه ارمي لكل واحد حتة حشيش في عربيته و انا هبلغ عنهم النيابه
.
......................................................................................................................................
Mohamed
Hussein
16
سبتمبر 2015·
عندي ناس في الأصدقاء
بلاقي في بوستاتهم كمية تشاؤم تكفي الشرق الأوسط و شمال أفريقيا , و كلام عن إنهيار
اقتصادي جاي على أول الشارع و البطاله اللي ظهرت في مصر أول امبارح بالليل و الفساد
اللي عمرنا ما حسينا بيه إلا بعد ما مسك السيسي الحكم !! .
.
المهم تحس من بوستاتهم
كده يعني إن الواد ده كان شغال مدير عام اليونسكو قبل 30 يونيو و بعدين 30 يونيو أمّمت
المنصب بتاعه و بقى شغال على عربية بطاطا , و بما إنه باشا قديم قبل الثوره فتلاقيه
بينادي عالبطاطا بتاعته و يقول : البطاطا يا كلاب .
.
شوارعنا كانت نضيفه
أوي و بتبرق أيام مبارك و البهلول مرسي بس الزباله بقت اكوام بعد 30 يونيو , و مصر
قبل 30 يونيو كانت داينه أمريكا و اليابان و شركة مايكروسوفت و تويوتا بديشيليون دولار
بس اتحولنا لمديونين بنفس الرقم بعد 30 يونيو .
.
صديقي العزيز المتشائم
, ممكن تحتفظ بالتشاؤم ده لنفسك أو تحوله لطاقه إيجابيه لأنه فعلا طاقه , يعني مثلا
مثلا , انت نسيت إن أيام البهلول مرسي اخترعو جهاز بيحول التشاؤم لطاقه كهربائيه تنوّر
لنا حياتنا و تملاها حرية و عداله , بذمتك يا شيخ مش كنت شايف النور و الحريه و العداله
ماليين شوارعنا ؟ تقدر تنكر الكلام ده ؟ بس احنا يا خساره و للأسف نزلنا في 30يونيو
عشان نشيل النور و الحريه و العداله , تقول ايه بقى , شعب مالوش في الطيب نصيب .
...................................................................................................................................
Mohamed
Hussein
15
سبتمبر 2015·
حال الأب المصري
قبل كام يوم من بداية الدراسه و بعد ما عرف طلبات المدرسه من الكراريس و الكشاكيل و
خلافه .
.
.
الإنجليزي , ا
كوبي بوك كورس بوك جرامر بوك 100 ورقه و 40 كومبوزيشن و تايم فور انجليش و كويز و سبيلينج
و ديكتيشن ( هي البت بنتي داخله تالته ابتدائي ولا الجامعه الأمريكيه ؟ ) !! .
الله يمسيكي بالخير
يا ميس ميرفت , هي كانت كراسه واحده و بنعمل فيها كل حاجه و ابويا كان بيكتب على جلدتها
وزن شكاير الغله قدام ماكنة الدراس .
.
العربي ا كشكول
200 ورقه فواصل حصه و محفوظات و اساليب و تراكيب و شألباظات , و كشكول 60 و كراسه
9 اسطر ( أه عارفها دي ) و كراسه 28 ( بين قوسين مش بيض ) و واحد سكتش رسم صغير , طب
ليه سكتش ؟ هه ليه سكتش رسم في العربي ؟ .
.
و الدين كراسه
60 بس بجلاد ابيض , استفتاحنا لبن ان شاء الله , و الماث كراسه 80 مربعات صغيره و كراسه
تانيه 80 مربعات صغيره برضه ( أحمس ..طب ما تقولو كراستين 80 ياولاد الوارمه ) .
و الجلاد بلو ماشي
يا سيدي , الأزرق يليقُ بكم .
.
و الساينس و السوشيال
و الفرينش و الكمبيوتر و الأرت , يا لهوي يانا يامه , البت بنتي هتاخد 9 مواد في تالته
ابتدائي يعني طفولتها هتضيع هدر , إنهم يحرقون أغصان الزيتون
.
و عايزين كمان
جلاد و تيكيت و الوان خشب و الوان مش خشب و جلو يعني صمغ ( طب ما يقولو صمغ ؟ ) و طبق
و شوكه و جوانتيات و مريله و فوطه و بونيه و مقص و كام علبة مناديل و كام بكرة مناديل
تواليت ............طب و النيش و السفره بتبقى علينا ولا عالمدرسه ؟!
...................................................................................................................................
Mohamed
Hussein
15
سبتمبر 2015·
فيديو مسخره ,
إعلامي لا مؤاخذه من ضمن اللامؤاخذه الإعلاميين اللي عندنا , بس ده لا مؤاخذه برخصه
, لا مؤاخذه أوي جدا خالص , لا مؤاخذه و أمه عارفه .
.
الخواجه اللامؤاخذه
استضاف النصاب سعيد حساسين و قعد يتغزل في تسريحة شعره و يقول له , إنما حضرتك لما
بتسرح شعرك على جنب بتبقى سكر و لما بتحلقه بتبقى اجمل و لما بتجيبه لورا بيبقى اجمل
و أجمل .
يجيبه لورا؟!!
هو إيه ده يافوفو اللي يجيبه لورا ؟ أها تقصد شعره , الله يخرب بيتك لبيت اللي جابك
لبيت الأم اللي ربتك , يا شوية خواجات و محسوبين علينا رجاله و محسوبين عالدوله إعلاميين
.
هو ربنا غضبان
علينا و اللي بيحصل لنا ده بيحصل من شويه ؟ , ده مش اسمه إعلام , دي اسمها نجاسه .
.
#لافيني_بوسه_يادكتور
.
........................................................................................................................
Mohamed
Hussein
15
سبتمبر 2015·
و ممكن كمان تحط
علامة إستفهام طولها من القاهره لحد أسوان على أوروبا اللي فتحت دراعاتها فجأه للاجئين
السوريين و الحدّايه اللي جيناتها اتغيرت و بقت بترمي كتاكيت والإعلام الغربي ( النزيه
) اللي اكتشف فجأه ان فيه دوله اسمها سوريا و إن أهلها مشردين و بيعانو .
.
تصريحات من الرئيس
الفلاني بنية بلاده استقبال مليون لاجئ و المستشاره العلانيه هتستقبل نص مليون و معرفشي
مين هيستقبل ربع مليون , و فجأه نلاقي سوريا فاضيه من جوه , مُفرّغه من شبابها و تروح
هناك تاخد شقتين واحده في دمشق و واحده في حلب و تفتحهم على بعض عشان تعرف تمد رجليك
!! .
.
مع إن الوضع الأمني
في سوريا في الشهرين تلاته اللي فاتو أفضل ألف مره من سنتين تلاته فاتو , يبقى تجيب
علامة استفهام كبيره و تعلقها على صفحتك بتاعة الفيس و تثبّتها بمسمارين و تكتب جنبها
( الحمد لله على نعمة جيش مصر ) , زمان الفلسطينيين باعو أرضهم و بيوتهم للصهاينه القدام
و قبضو التمن , دلوأتي الصهاينه الجدد هياخدو أرض سوريا ببلاش , يعني فري , داحنا كده
نبقى عاملين لهم موائد رحمن !!.
.......................................................................................................................................
Mohamed
Hussein
15
سبتمبر 2015·
كان فيه نكته زمان
بتقول : اتنين راكبين طياره و الطياره دي وقعت في أدغال أفريقيا , شباب القبيله خد
الإتنين دول لزعيم القبيله اللي خيرّهم : يختارو الموت ولا ال ( هونجا ) , سألوه يعني
ايه ( هونجا ) ؟ قال لهم يعني شباب القبيله يغتصبوك .
.
اللي بيحصر اختياراته
في انتخابات البرلمان بين واحد فلولي فاسد و بين واحد سلفنجي متخلف عقليا ( و فاسد
برضه ) هو باختصار حط نفسه و بمزاجه كده ما بين الإختيارين , الموت و ال ( هونجا )
........ و في النهايه هيتفاجئ إنه اختار حاجه تالته خالص اسمها ( هونجا حتى الموت
) .
.
مرشحين البرلمان
فيهم ناس كتير نضيفه و تستاهل صوتك , لسه مقابل واحد منهم من شويه , دوّرو عالناس دي
و انتخبوهم , يطلعو بقى فردي ولا قايمه ولا شمبانزي مش مهم , المهم مايكونشي عندنا
برلمان اسمه برلمان ال ( هونجا حتى الموت ) .
.................................................................................................................................
Mohamed
Hussein
14
سبتمبر 2015·
حاول تدلّك حواسك
............... استمتع يعني .
.
في جريده مصريه
في نفس اليوم و تعليقا على نفس الحادث كانت الأخبار كده
.
المسئول الفلاني
يصرح : الفوج المكسيكي انحرف 2 كيلو عن الطريق في منطقه محظوره .
.
بعد ساعتين
المتحدث باسم وزارة
ماعرفش ايه : الفوج المكسيكي انحرف 6 كيلو عن الطريق في منطقه محظوره .
.
بعد ساعتين كمان
المسئول في غرفة
ماعرفش ايه : الفوج المكسيكي انحرف 20 كيلو عن الطريق في منطقه محظوره !! .
ههههههههههههههه
عليا ب 50 كيلو مين يزود ؟ ماهي حاجه من اتنين مفيش غيرهم , إما إن المسئولين دول مش
معاهم ( مازوره ) و مش بيعرفو يقيسو المسافات يا إما إنهم ناويين كالعاده يفقعو مرارة
حظرتنا .
و مش بعيد بكره
ألاقي خبر في نفس الجريده بيقول : الفوج المكسيكي انحرف أوي و مسكناه في شقه مفروشه
( عشان منحرف طبعا ) على طريقة النكته الأبيحه بتاعة الراجل الفشار اللي ذاكرته ضعيفه
و الأسد !! .
.
يا ولاد الوارمه
هتلبّسونا في الحيطه ربنا يخرب بيوتكو .
.......................................................................................................................................
Mohamed
Hussein
14
سبتمبر 2015·
مراجيح
.
مخلوق فضائي إسمه
( زداحمد ) من مواليد كوكب عطارد , راسه عامله زي راس السمكه البلطيه بس مالوش خياشيم
, زداحمد نزل في مركبه فضائيه صغيره 4 سلندر على كوكب الأرض و تحديدا على مصر , و لما
نزل لقى قدامه مبنى كبير كده و راجل عجوز شعره ابيض ولابس ابيض فابيض و معاه عكاز قاعد
قدام المبنى , العجوز ده اسمه حكيم الزمان الفيس بوكي , زداحمد بيتكلم انجليزي حلو
بس بيعرف عربي مكسّر .
.
مشهد 1
..........
.
زداحمد : مساء
الخير .
حكيم الزمان الفيس
بوكي : بل قل عمتَ مساء ( ماهو لازم يهري أومال يبقى حكيم إزاي ؟ )
زداحمد ( مرارته
بدأت تتفقع ) : أوكيه أوكيه , عمتَ مساء أولد مان .
حكيم الزمان :
عمت مساء يا بني , ماخطبك و ماذا تريد ؟
زداحمد : انا مندوب
من ملك ملوك كوكب عطارد و عندي رساله إلى مصر , تيل مي أولد مان , من المسئول هنا إذا
أردت توصيل الرساله ؟
حكيم الزمان :
عندك 3 أوض في المبنى ده , هما دول المسئولين عن مصر , ادخل لأي حد فيهم , اهم متلقحين
جوه .
زداحمد : أوك
, ثانكس أولد مان .
حكيم الزمان :
يو أر ويلكم يادي الجدع .
.
مشهد 2
.............. في الغرفه الاولى , زداحمد يدخل يلاقي مكتب قاعد عليه توفيق عكاشه و
جنب منه حياة الدرديري .
.
توفيق : نعم ياخويا
؟ عايز ايه يا وله ؟
زداحمد : انا مندوب
من ملك ملوك كوكب عطارد , أردت ان ابلغكم رساله من الملك يقول فيها إن حرقكم لقش الرز
تسبب في دخان كثيف و وصل لحد الكوكب عندنا , لدرجة ان سمو الأميره بنت الملك ( الأميره
نرمين ) جالها ربو مزمن , و بندوخ على بخاخة فنتولين عندنا مش بنلاقي فبضطر انزل كل
كام يوم اجيب بخاخه من صيدلية سيف , لحد ما تعبنا و قرر الملك انه يبعت لكو رساله
, إما إنكو تتوقفو و فورا عن حرق قش الرز أو هنجيب جيشنا بتاع كوكب عطارد و نحتل بيه
كوكب الأرض و نبدأ بمصر و ناخد راسك دي نعملها طفاية سجاير .
.
توفيق : انت اتهبلت
ياله ولا شكلك اتهبلت ؟ طب انت تعرف أصلا بالة القش بتاعة الرز فيها كام قشايه ؟ طبعا
ماتعرفش , عموما انا عارفك و عارف امك , انتو المخلوقات الفضائيه اللي نزلتو في الانتخابات
اللي فاتت و عملتو مخطط عشان يسقطني و اجيب 17 صوت بس , و نازلين عشان الإنتخابات الجديده
قربت , بس على مين انا هنجح يعني هنجح .
حياة الدرديري
: طبعا يا دكتور هتنجح , حضرتك شعبيتك كاسحه , دانت لو اترشحت لرئاسة الكونجرس الأمريكي
هتنجح برضه .
توفيق : قولي للحيوان
ده اللي جاي و فاكرني بتهدد يا أستاذه حياة .
.
مشهد
3..........
زداحمد خرج و هو
محبط و دخل الأوضه التانيه , فتح الباب لقى قدامه مرتضى منصور ( و لسانه ).
.
مرتضى ( بصوت عالي
) : عايز ايه يا حيوان ؟
زداحمد : انا مندوب
من ملك ملوك كوكب عطارد من كواكب المجموعه الشمسيه , و
مرتضى ( مقاطعا
و بيعد على صوابعه ) : ديك أمك على ديك أم كوكب عطارد على ديك أم المجموعه الشمسيه
.
زداحمد : يا سيدي
عايز اكمل رسالتي .
مرتضى : بص يا
شرم** , انا عارفك , انت محمود طاهر اللي باعتك , بس و رحمة امي ما هرحمك لا نت ولا
محمود طاهر و بقولك يا محمود يا طاهر اتلم بدل مانت عارف , و انت يا خو* سيديهاتك كلها
عندي من أيام ماكنت بتطلع بالبيتش باجي و تحك في البنات بتوع كوكب بلوتو انت و حمدي
الفخراني , فاكر ياله ولا نسيت ؟! .
.
مشهد 4 ...
زداحمد خرج و هو
محبط جدا و دخل الأوضه التالته , لقى الأستاذ وائل الإبراشي ( هو و شعره ) , و حكاله
الحكايه , وائل الإبراشي نادى عالمخرج و المنتج و المصور و قال لازم يطلع عالهوا فورا
و ماردش حتى على زداحمد ولا عبره
.
وائل ( بيبص للشاشه
) : هل وصل الأمر أن تصبح القاهره مرتعا للكائنات الفضائيه ؟ ماذا تفعل وزارة الداخليه
و هل يعد ذلك تقصيرا امنياً ؟ هل ستكون نهايتنا جميعا على يد زداحمد و أمثاله ؟ ماهو
كمان مش معقول نكون عملنا ثورتين و ننتهي على ايد واحد اسمه زداحمد .
.
.
مشهد 5 ...
زداحمد خرج من
المبنى و هو كاره عيشته و مش طايق الفالنه اللي لابسها و راح لحكيم الزمان الفيس بوكي
.
زداحمد : بقولك
ايه يا مولانا ؟ ماتعرفليش سواق يكون واد مخلّص من سواقين الشبوره يسوق بيا أم المركبه
الفضائيه دي و يرجعني من مكان ماجيت , أنا أصلي مش شايف قدامي ولا هعرف الفتيس من الدركسيون
.
حكيم الزمان :
خلاص اقعد هنا وانا هجيب لك واد من سواقين السلام و النهضه بس ابقى راضيه بقرشين حلوين
و سجارتين حشيش و خليه بعد ما يوصلك يشبط في أي ميكروباص يكون نازل ..
.......................................................................................................................................
Mohamed
Hussein
14
سبتمبر 2015·
عشان مايتقالشي
عليك طبال و عشان تبقى ولد حر و ثورجي و مناضل جامد كيك .
.
إنزل بالسيناريو
ده :
.
حماده ده طيار
في الجيش المصري , حماده صحي من النوم ولقى مزاجه مش حلو شويه , و بعد ما شرب النسكافيه
بتاعه و خد البريكفاست قام ركب الحته الأباتشي المووف اللي جابتهاله مامي في عيد ميلاده
و خد معاه الظابط الطيار فوفو عشان صاحبه الأنتيم , حماده طار فوق منطقة الواحات و
لقى عربيات دفع رباعي ماشيه كده في منطقه عاديه بس حماده عشان فاهم ان الطيران ده زي
لعبة الأتاري بالظبط قام حب يلعب و يتسلّى و ضرب نار و موت الناس و قعد يسأّف هو و
فوفو صاحبه كداهو و فرحو أوي و نزلو ركنو الحته الأباتشي قدام الشاليه بتاعهم و طلعو
عالجيم و قالو بالليل بقى نكمل سهرتنا في حفلة إليسا .
.
حلو السيناريو
اللي فوق ده يا شباب ؟ حاجات من اللي بتعجب الجماهير أهي و تنتزع الأهات , العربيات
كانت ماشيه في أمان الله في طريق اسكندريه الزراعي و وقفت جنب كشك سجاير عند مدخل بنها
و وفيها سياح أجانب ميكسيكيين كلهم اسمهم كارلوس .
.
بس للامانه :
1- الجيش المصري
مفهوش طيار اسمه حماده ولا طيار اسمه فوفو .
.
2- الطيارات مابتتحركش
بمزاج أهل الطيارين , الحكايه بتختلف تماما عن ركوب التوكتوك الشخصي و الفسبا .
.
3- مفيش إطلاق
نار بيتم من أي طياره إلا بأوامر من جهات أعلى بطريقه تبدو ممله و عقيمه أحيانا .
.
4- الأقرب للمنطق
إن العربيات دخلت مناطق محظوره فعلا و الخطأ هو خطأ مسبق ( خطأ على الأرض ) مابين وزارة
الداخليه و وزارة السياحه , يعني واحد فيهم يستاهل الحرق بجاز أو الإتنين يستاهلو
.
.
5- يروق لمعالي
جناب سيادتك إنك تحط الجيش المصري في أي جمله أبيحه و ترجع بضهرك لورا عالكرسي كده
و تنجعص , مش انت ياض برضه اللي كنت بتتكلم عن خطة الجيش في حربه ضد الإرهاب في سينا
و عاملي فيها حسن شحاته ؟! و تقول كان المفروض وزير الدفاع يطلّع ميدو و ينزل عمرو
؟! .
.................................................................................................................................
Mohamed
Hussein
14
سبتمبر 2015·
اللي حصل في الواحات
تصرف طبيعي و منطقي جدا , في المناطق المحظوره مش مطلوب من رجال الأمن إنهم يقرّبو
من عربيه ( مشتبه فيها ) و يقولو للي سايق ورينا رخصك و يتصورو معاه سيلفي .
اللي بيحصل هو
تحذير عن بُعد و لو مفيش استجابه يبقى التعامل بضرب النار .
الكلام ده بيحصل
حتى داخل أراضي الجيش المصري لو فايت على كمين و رفضت تقف بالعربيه و تطفي النور و
تقول كلمة السر مطلوب من عسكري الخدمه انه يضربك بالنار حتى لو كنت سيادة اللوا قائد
الفرقه العسكريه .
.
كلامنا و احنا
قاعدين هنا في التكييف قدام اللابتوبات حاجه و حماية حدودنا حاجه تانيه خالص , ممكن
تعتبرها نيران صديقه , و التحقيق في اعتقادي هيدين وزارة السياحه و وزارة الداخليه
إن مفيش تنسيق أمني بينهم , يعني المفروض المسئول عن الفوج السياحي ده بيكون عنده تعليمات
من الداخليه بالمناطق المحظور الدخول فيها و العربيات الغير مصرح باستخدامها , إنما
طول ما أمين الشرطه مستني العشرين جنيه تتكرمش في إيده و طول ما بتاع السياحه مهتم
أوي ب ( حلب ) السايح و تقليبه و ( جيف مي وان دولار ) يبقى لله يا زمري .
.......................................................................................................................................
Mohamed
Hussein
14
سبتمبر 2015·
هنا اتربيت
.
ريحة الخبيز (
العيش الطري ) و هو طالع من الفرن البلدي , ريحة الجوافه بين صوابع ايديا , شكل التوت
و الجميز على الشجر , أتشعلّق بين الفروع زي القرود , أجري حافي عالمشايات و المصارف
, أصطاد سمك من الترعه , نصلّي في جامع صغير على حصيرة دابت و شبعت دوبان , أنام تحت
شجرة كبيره و اعمل شبشبي مخده , نلعب سيجه بالتراب و الزلط و الحجاره , نعمل عرايس
و عربيات من الطين , نجري ورا الدبابير و نصطادها بعود شامي , نروح المدرسه بشنطه قماش
و ننام أربعه خمسه جنب بعض و نتغطى ببطانيه خشنه من بتوع الجيش و نلبس في العيد جزمه
بلاستيك و نفرح و نتنطط كداهو كداهو .
.
أتاري مصر دي مليانه
خير و عمرها ماكانت كيميا ولا لوغاريتمات عشان نعرف نفهمها و نحبها .
.......................................................................................................................................
Mohamed
Hussein
13
سبتمبر 2015·
أهم حاجه على الإطلاق
عملتها حركة حماس في الكام سنه اللي فاتو إنها قدرت بنجاح ساحق إنها تكرّه العرب في
القضيه الفلسطينيه , الواحد بقى يقرا أخبار عن عمايل الصهاينه في الفلسطينيين و عمايلهم
في المسجد الأقصى كأنه بيقرا خبر بعنوان ( مشاجرةٌ في نيكاراجوا ) , و يرد زي المعلم
محمد رضا في نفس الفيلم ( مالنا احنا و مال ماشارجوا دي ؟!) .
.
ماهو لما تبيع
قضية بلدك أو تحولها لسلعه أو ورق كوتشينه تلعب بيه ماتستناش من غيرك إنه يتشحتف و
ماينامشي الليل عشان خاطرها , انتو اللي زرعتو اللامبالاه دي جوانا يا ولاد هنيه العالمه
.
................................................................................................................................
Mohamed
Hussein
13
سبتمبر 2015·
السيسي للإعلاميين
: انتو جزء من المعركه , مفيش فايده فيكو ولا ايه ؟! .
.
الإجابه باختصار
: بلى , مفيش فايده فيهم .
.
يا ريس و عهد الله
احنا لو عندنا في مصر كام دكر بط بعدد الإعلاميين اللي فيها كانو نفعونا عنهم , كان
زمانا عملنا مزرعه و بقينا اكبر مصدر لطيور دكر البط في العالم .
.
معركة ايه يا مولانا
و بتكلم مين ؟ داحنا نُص الإعلاميين عندنا بيجيبو اخبارهم من الجزيره و شبكة رصد و
النص التاني بيجيب اخباره و معلوماته من احمد موسى و مرتضى منصور و مجلة ميكي , ناس
زي الفل يعني , بينهم و بين التفكير عداوه و تار بايت , ويعرفو عن المخ انه بيتعمل
ساندوتشات ( الله يرحمك يا عم جلال ) .
...................................................................................................................................
Mohamed
Hussein
13
سبتمبر 2015·
اعتراف
.
من زمان أوي و
انا ذاكرتي قويه جدا في الأصوات , أصوات الناس يعني , لو واحد كلمني مره واحده في التليفون
من تاني مره بعرف صوته أول ما يقول ألو , و على العكس تماما ذاكرتي تكاد تكون صفر في
الأشكال و وشوش الناس , الموضوع ده بيتسبب لي في احراج كبير خصوصا في شغلي , لو دخل
مريض معاه روشته مثلا و قالي طب هروح اجيب الفلوس من العربيه على بال ماتكون جهزت الدوا
و رجع لي بعد 3 دقايق و سألني عن دواه ؟ هقول له دوا ايه و مين حضرتك ؟!! .
.
الحكايه دي معايا
من زمان , مره كنت بتفرج على فيلم مش مترجم و كان ايطالي تقريبا أو ألماني , أهو حاجه
يعني من العب اللي هناك ده , وانا ثقافتي في الإيطالي زي ثقافتي في الألماني بالظبط
يعني أخري ( شلبيديش و بوناسيرا سنيوريتا ) , الفيلم كان فيه 3 أبطال و 3 بطلات كلهم
( شقراوات ) وده صعب عليا المهمه اكتر , المهم انا وقتها اتخيلت سيناريو مختلف تماما
غير سيناريو الفيلم و حطيت له الحبكه الدراميه و النهايه المناسبه , السيناريو اللي
عملته في ذهني بما اني ماليش في الطلياني و بتلخبط في الوشوش كان سيناريو لواحده ست
شقرا متجوزه 3 رجاله و بتنام معاهم , و في أخر الفيلم ماتت البطله في حادثه عربيه قلت
الحمد لله , أكيد ربنا بيعاقبها !! .
.......................................................................................................................................
Mohamed
Hussein
12
سبتمبر 2015·
عزيزي الناخب عزيزتي
الناخبه
.
ابوس ايديكو حاولو
تركزو في حرف الجر ...... احنا في البرلمان محتاجين ممثلين عن الشعب , مش ممثلين على
الشعب .
...................................................................................................................................
Mohamed
Hussein
12
سبتمبر 2015·
أسامه الشيخ و
توفيق عكاشه و أحمد عز و ابن كمال الشاذلي و نادر بكار و امه و اخته وخالته وشويه دقون
من بتوع الرز بلبن و احتمال مصطفى بكري يكون مترشح , أقسم بالله أنا لو بختار فريق
عشان أشارك بيه في مونديال الوساخه مش هلاقي أفضل من الأسماء اللي فوق دي .
.
يا مصريين انتو
اللي هتختارو , يارب ما تكسفوني .
.......................................................................................................................................
Mohamed
Hussein
11
سبتمبر 2015·
من قواعد العشق
الأربعون ..... قاعده رقم 37
.
لما تكون رايح
تصيّف في اسكندريه ابقى اعمل حسابك على بتاع 150 جنيه فكه , لا عشرات و عشرينات ايه
؟ فكه يعني جنيهات و نصاص و برايز و شلنات , و ده بند لوحده اسمه الباركينج يعني الركنه
, في أي حته في أي مكان , حتى لو وقفت لمدة 7 ثواني تجيب ولاعه من كشك سجاير في نص
البحر هتلاقي واحد طالع من تحت المايه في بؤه صفاره و في ايده فوطه بيمسح لك الازاز
و بيقولك اكسر شمال وانت راجع عشان ماتحكّش في الموجه اللي جايه .
.
و حاول على أد
ما تقدر ماتبقاش فنجري أوي في الأول و تتصرف على إنك ابن طاهر القويري عشان في الأخر
ماتلاقيش جيبك فاضي و عيل اد كده يعرفك مين هو طاهر القويري و مين اللي طاهر القويري
.
......................................................................................................................................
Mohamed
Hussein
11
سبتمبر 2015·
أغلب اللي شغالين
في الصحافه و الإعلام في مصر عديمي الموهبه , و الأهم إنهم عديمي الضمير , يعني فاسدين
أو ( فاسدين تحت الطلب ) , زلنطحيه ( أو مشروع زلنطحي ) , وصوليين و انتهازيين , و
كلهم بيقرو من نفس الكتاب , ( كتاب : كيف تصل إلى التورته في خطوتين عالأرض أو كلمتين
في جرنان ) , عشان كده هتلاقي أغلب مقالاتهم شبيهه بمقالات أحمد بدير في مسلسل ( أستاذ
و رئيس قسم ) , مقالات بعنوان ( رئيسنا إلى الأبد ) !! .
.
النفاق و الوصوليه
, محاولات بائسه بيدارو بيها فسادهم القديم أو فسادهم القادم , اللي مطمني و مطمني
جدا كمان إن السيسي مابياكولش معاه الكلام ده , مش بتاع بليله هو, والنبي لو كتبت مقالاتك
كلها بعنوان ( جفنهُ علّم الغزل ) !!.
.....................................................................................................................................
Mohamed
Hussein
11
سبتمبر 2015·
يا حماده , قصدي
يا دكتور حماده , الإنتخابات حتى لو ماعجبكشي مضمونها أوي اسمها استحقاق ديموقراطي
و الإستحقاق الديموقراطي يعني استقرار في البلد , و عدم الإستقرار بيعني زياده في الإستقطاب
البائس , عرفت مين السبب في الإستقطاب البائس و مين محتاج حلحله و حش وسطه ؟! طب إيه
بديلك يا مولانا حماده ؟ , اكتبه هنا ( ........... ) و اكتب الحل هنا (
.......... ) و اكتب كمان اعتراضك على ايه و تصورك الجيوفيزيقي عن العمليه الديموقراطيه
هنا ( ....... ) , أتحداك .
.
مابقيتش اتفاجئ
بدماغك يا حماده , و أقسم بالله أقدر اكتب دلوأتي حالا رأيك في أي حاجه هتحصل في مصر
لمدة 10 سنين جايين , يعني تقدر تلغي حسابك في تويتر و اشتراك النت و انا هقوم مكانك
بالمهمه دي .
.
و لما أحمد عز
الفلول الفاسد يترشح في الإنتخابات و هو عارف إنه كارت محروق و عارف انه فاسد و إن
ترشحه هو استفزاز للكل بما في ذلك الشعب و الرئيس , يبقى احمد عز مايفرقش عنك في الوقاحه
, هو مستفز و انت كمان , مفيش فرق بين حماده عز و حماده البرادعي , كلكو في حب مصر
ماتفرقوش عن حماده مرسي و حماده بديع , كلكو حماده !!
.
................................................................................................................................
ليست هناك تعليقات:
إرسال تعليق