Mohamed Hussein
13 أغسطس 2015 ·
ههههههههههههه الحارس بتاع الجونه خد
13 جون , و خد الفانله بتاعة حسام غالي بعد الماتش , بس هو طلع فرحان اوي , مش عارف
هو فرحان عشان ال 13 جون ولا فرحان بالفانله ( الفالنه ) ؟.
و الواد زياد ابن الصحيفي بيقول بعد الماتش
انه فرحان اوي عشان سلم على حسام عاشور و احمد فتحي و سلم على ناس كتير , أه و عهد
الله .
.
مامة زياد ( قبل الماتش ) : بقولك يا زيزو
يا حبيبي , انت أول ما تنزل الماتش تسلّم على عمو حسام غالي و عمو احمد فتحي و كل حد
من عموهاتك تسلم عليهم عشان مايقولوش عليك طفل نوتي , و اوعى يا حبيبي بعد ما تنزل
الماتش تروح للحكم و تقوله عايز اروح التواليت يا عمو.
.......................................................................................................................................
Mohamed Hussein
13 أغسطس 2015·
الجونه نزل يلاعب الأهلي في دور ال 16 في
كاس مصر , و طبعا في الكاس اللي بيتغلب بيطلع , الجونه كان مشي منه كام لاعب بعد ما
نزل من الدوري الممتاز , فجه عضو مجلس ادارة الجونه اسمه الصحيفي قال مابدهاش بقى
, احنا كده كده مغلوبين و منفوخين يبقى ننزل بالناشئين تحت 16 سنه .
.
استاذ احمد الصحيفي قعد يفكر في الفكره
الجهنميه دي في بيتهم وهو بيشرب قهوته في البلكونه , و بالمره يكلم الحاجه أم العيال
, الحاجه تفتق ذهنها عن فكره عبقريه جهنميه زي فكرة جوزها , وقالت له ياخويا طيب طالما
كده كده هنتغلب و نتشقلط طب ما تخلي الواد ابننا ابو 14 سنه ينزل يلعب ؟ أهو عنده شورت
و فالنه على مقاسه و الواد يا كبد امه نفسه في كده أوي , عالأقل هيتصور سيلفي مع لاعيبه
الأهلي ..
.
أحمد الصحيفي : يا وليه انتي بتقولي ايه
؟ و اقول للناس ايه ؟ لا مش ممكن ابدا .
الحاجه : و النبي ما تكسر بنفس الواد ,
أنا هعملك طبق كوارع يرم عضمك بقى .
أحمد الصحيفي : طب خلاص هخليه يلعب و يتصور
سيلفي و ياكشي يتحرق نادي الجونه على دماغ صاحبه , هقول احنا معترضين على سياسة اتحاد
الكوره و عشان كده هنلاعب الأهلي بالأطفال و الرضع و حديثي الولاده و المبتسرين .
.
.
الساده ملّاك نادي الجونه , انتو هيتعمل
عليكو حفله النهارده , بس الحمد لله الحاجه مرات احمد بيه الصحيفي راضيه عنكو و هتدعي
لكو لما تروح الحجاز .
....................................................................................................................................
Mohamed
Hussein
13
أغسطس 2015•
إن بعض الظن إثم
, أنا ظلمت الفنانه اللي كرمها محافظ بورسعيد يا جدعان , و الإعتراف بالحق فضيله ,
لا هي مش اسمها فضيله اسمها شيما , البونيه طلعت رقاصه درجة تالته , عارفهم انت دول
؟ من الناس المكافحين يعني اللي النقطه بتنزل عليهم بال 5 جنيه و ال 10 جنيه و اخرها
20 , مش بتوع الفنادق ال 5 ستارز , غلبانه يعني و أكيد سيادة المحافظ بيكرمها عشان
يشجعها باعتبارها مكافحه و قصة كفاح و هنكافح و كافحنا و اتكافحنا .
.
و البونيه المكافحه
لها صوره ببدلة الرقص بصراحه لما شوفتها حسيت اني غلطت في حقها , اصل هي الحكايه بتبقى
نسبيه يعني comparatively , اقصد لما تكون دي بدلة الرقص بتاعتها يبقى
البيبي دول اللي قابلت بيه المحافظ بالنسبالها ده الإسدال و النقاب , يعني نازله من
بيتهم في منتهى الحشمه , دي قناعتها اكيد .
.
و بالنسبه يعني
للي كان واقف في البلكونه بيشرب سجاره حشيش و هييجي يقول ( هو يعني المحافظ المفروض
يفتش على لبس الناس قبل ما يكرمهم ؟ ) , هقوله أه , مش هو اللي بيفتش , المفروض انه
له مساعدين و حراسه و هيلمان مالوش اي تلاتين لازمه غير انه بيتعلف و بياخد مكافئات
على أي هجص في أي حته , سكرتيره بقى ولا الواد السيكا بتاع مكتبه يقوم بالدور ده ,
بنت لبسها مسخره و رقاصه درجة تالته ماتطلعش , طب هبسطهالك , افرض مثلا يعني إن الحفله
دي كان بيتكرم فيها عبود الزمر او عاصم عبد الماجد أو الله يرحمه اسامه بن لادن ؟ ينفع
المحافظ يكرمه كده و يدي له جايزه عالهوا و يقول اصلي اتفاجئت بيه عالمسرح قدامي ؟..........
أقصد هي بتبقى طابونه أوي للدرجادي و فلان داخل و فلان طالع ؟ بتبقى زي حمامات رمسيس
العمومي كده ؟.
.................................................................................................................................
Mohamed
Hussein
12
أغسطس 2015•
مع الشيف قبّاني
.
.
بتخيل مثلا لو
( بلقيس ) محبوبة نزار قباني و مراته كانت مصريه و من النوع إياه , و نزار داخل طالع
عليها بورد و أبيات شعر , و لما غابت عنه يومين بعت لها رساله يقول فيها ( وجعي يمتدُ
كسرب حمام من بغداد إلى الصينِ ) .
.
و بعد سنتين تلاته
ربنا كان رزقهم ببنت اسمها ملك , و بدأت بلقيس تاخد دور الحاجه أم ملك , و تقول ل نزار
: عايزين ننجد الصالون , التلاجه مفهاش لحمه بقالنا اسبوعين , ملك لازم نأمن لها مستقبلها
, نيفين جارتنا جابت لابنها قط شيرازي مش هتجيب ل ملك قطه شيرازي ؟ و الله هتفرح بيها
أوي , فرح بنت خالتي الأسبوع الجاي و عايزه طقم يكون حلو كده و ماتقوليش من التوحيد
و النور , ياخويا شعر ايه بس اللي بتكتبه ؟ هو الشعر بيجيب فلوس ولا بيأكل عيش ؟ ما
عندك الحاج محمود جارنا فتح فرن بلدي و مهنن مراته و مستتها , الست لابسه دهب من هنا
ل هنا , مش انا يا حسره اللي مقضياها اكسسورات و لما حد يسألني أقول له : أصلي مابحبش
ألبس دهب , ماتشوف لك شغلانه تكون بتجيب فلوس يابو ملك بدل الهم اللي احنا فيه ده
.
.
و بعد ضغط و ستريس
و محايله من الجميله بلقيس ( اللي هي بقت الحاجه أم ملك ) قرر نزار قباني انه يتوقف
تماما و نهائيا عن كتابة الشعر و نزل اشتغل في مطعم شاورما سوري , و مرت الأيام و بقى
المعلم أبو ملك ( نزار قباني ) اسم معروف في عالم الشيفات , لدرجة انه اتعرض عليه يقدم
برنامج في التلفزيون ( مع الشيف قبّاني ) , في الوقت ده كان نزار تخن أوي وبقى بكرش
و لبس نضاره و ربّى شنب كبير .
.
المشهد الأخير
( النهايه السعيده )
الشيف قباني طالع
عالسلم بعد ما قدم حلقه في التلفزيون عن الفته باللحمه الضاني و طبق المخاصي , شايل
على ايده قفص فيه جوزين أرانب ( أنارب ) و كام حزمة ملوخيه و صنية بسبوسه و بطيخه
, بلقيس فتحت الباب و أول ما شافته بقت ابتسامتها من هنا ل هنا .
الشيف قباني :
امسكي يا حاجه امسكي , جوزين الانارب دول تعمليهم عالملوخيه للغدا و بعد الأكل تشقي
لنا البطيخه دي , و امسكي كمان الفلوس دي عشان تنجدي الصالون و تجيبي القطه الشيرازي
و معاكي فلوس بزياده عشان فرح بنت خالتك .
.
بلقيس ( محبوبة
نزار ) : عنك ياخويا عنك , لولولولوي , أيوه كده بقى , يا ألف نهار أبيض .
................................................................................................................................
Mohamed
Hussein
12
أغسطس 2015•
امبارح كنت رايح
مشوار , فقلت اركب تاكسي أحسن بدل ماتوه في الطريق , شاورت لتاكسي و وقف لي قلت له
عايز اروح عابدين قالي اتفضل و لما وصلنا سألته الحساب كام ؟ قالي 30 جنيه قلت له اتفضل
, سلامو عليكو قالي عليكو السلام , و بس كده .
.
أه حصلت بجد ,
لا سواق التاكسي فتح معايا كلام في السياسه و طلع مثقف فشر عمرو حمزاوي و لا انا انعمت
عليه بخبرتي السياسيه اللي اكتسبتها من الهري 4 سنين عالفيس بوك , انتو مش مصدقين اللي
بقوله صح ؟ معاكو حق ماتصدقوش , ماهي حكايه ليها العجب .
.
دانا كمان ماقولتلكوش
عالتقيله , انا نزلت من التاكسي من هنا و لقيت ست عجوزه على باب الله , الست قالت لي
ساعدني يابني دانا شايله الطحال والبنكرياس و كليتين و عايشه بالتالته , و عندي بنت
عايزه تتجوز و واد صغير عايز يلعب في أشبال الزمالك أو حتى ليفربول , وخالتي حمؤه ماتت
محروقه , و الواد ابنها قاعد جنب منها و عمّال يفلّي اخته اللي على وش جواز و فيه حاجات
نازله من مناخيره , قمت انا بصيت لها بصه كده من بتوع زكي رستم و قلت لها مش معايا
فكه يا حاجه و مشيت .
.
و جيت أهو عشان
احكي لكو عالموقف الإنساني اللي كله شجن ده , اعملولي لايكات كتير بقى و اكتبو في التعليقات
( يا سلام عالحنيه , يا سلام عالإنسانيه ) .
...............................................................................................................................
Mohamed
Hussein
11
أغسطس 2015•
في المدينه الباسله
بورسعيد قرر السيد المحافظ اللي انا مش عارف اسمه انه يكرم الفنانين اللي انا مش عارف
أساميهم في حفل ماعرفشي بتاع ايه , ماهو احنا اساسا فاضيين ولازم نكرم الممثلين كل
شويه , اومال يعني نقعد كده و مانكرّمش الناس ؟! و لا نسيبهم كده من غير تكريم ؟ .
.
و في الحفل طلعت
ممثله عالمسرح عشان تتكرم , البنت كانت لابسه قميص نوم او بيبي دول مش واخد بالي بس
الشهاده لله هي لبست فوق منه الروب الشفاف اللي عامل زي الطرحه ده , أهو برضه ستره
, هي تقريبا نزلت مستعجله من بيتهم و نسيت تلبس لبس خروج أو كانت بتمثل دور في فيلم
( حبّني في بير السلم ) و لسه راجعه يادوب من بير السلم قصدي من اللوكيشن .
.
يا معالي محافظ
المدينه الباسله , واخد على خاطري منك أوي و زعلان من هنا لحد أسوان , اللي زي دي ماتتكرّمش
بالشكل ده معاليك , قصدي يعني ماتتكرمش قدام الناس , الفن الهادف برضه له هيبته و احترامه
و بيحتاج معامله خاصه , و طالما الفنانه جت بقميص النوم يبقى معاليك كان لازم يقابلها
بالبرنص أو حتى بالبيجاما بتاعة عماد حمدي و فوق منها الروب لما كان بيقول ( يا نينه
) , إنما تلبس بدله و كرافته في حفل تكريم زي ده و تكرمها عادي كده قدام الناس ؟ اهو
ده الإبتذال بعينه بقى .
.
و على رأي عادل
إمام في الفيلم زمان : أنا عايز أكرّم الممثلين , إشمعنى الأستاذ يوسف شعبان ( قصدي
الأستاذ المحافظ ) يكرّم و انا لا ؟! .
.................................................................................................................................
Mohamed
Hussein
11
أغسطس 2015•
منظمة العفو الدوليه
تطالب بعدم تجريم ممارسة الدعاره !! .
.
كده يبقى مذيعين
الجزيره فلتو من العقاب ولاد المحظوظه .
.......................................................................................................................................
Mohamed
Hussein
11
أغسطس 2015•
أزمة سكن عشان
خاطر عيون حماده
.
و قال الخبر إن
الحكومه بتبني 100 ألف وحده سكنيه سنويا و ان العدد ده مش كفايه و احنا محتاجين
500 ألف وحده سنويا , و في نفس الخبر و نفس السياق تيجي القنبله بقى , و اللهم صل عالنبي
, مصر فيها 4 مليون شقه مقفولين بسبب قانون الإيجار القديم ( أو ناس خدوها من الدوله
و ركنوها ) , و حط تحت كلمة مقفولين و مركونه دي ألف خط و خلينا نقول إن المقفولين
بسبب الإيجار القديم 2 مليون شقه بس .
.
يعني شقق بقانون
الإيجار القديم و صحابها قافلينها و عايشين في شقق تانيه , طب ليه قافلينها ؟ ماهو
أصلك مش واخد بالك الشقه دي ايجارها 90 جنيه يعني تمن كيلو لحمه من عند سلامه , فانا
قلت أقفلها يعني و نستفيد منها مستقبلا بعد 5 سنين ولا 50 سنه , أصل عقبال عندك مرات
الواد سمير ابني حامل في حماده , و حماده ده بكره يتولد و بعد 30 سنه يبقى عايز شقه
عشان يتجوز فيها , فاحنا قولنا نسيبها لحماده !! .
.
طب بالورقه و القلم
و بحسبه بسيطه خالص , 2 مليون شقه قيمتهم السوقيه في المتوسط 600 مليار جنيه ( أد ميزانية
مصرتقريبا ) , المالك مش مستفيد أي حاجه من حكاية كيلو اللحمه دي قصدي الإيجار الشهري
و تلاقيه قاعد بيشد في شعره على شقته اللي قيمتها نص مليون و بياخد منها ايجار 90 جنيه
, و الدوله مش مستفيده , بالعكس الشقق المقفوله عامله ازمة سكن اهو , و المستفيد الوحيد
هو المستأجر ( جد الواد حماده اللي لسه ماجاش للدنيا ) .
.
تخيل بقى لو الحكومه
شربت بيريل و قررت انها تفسخ عقود الإيجار القديمه كلها بقرار رئاسي و حكومي مفهوش
فصال و قررت انها تعرض كل الشقق دي للبيع , و إن 50 % من تمنها يروح للمالك ( هيفرح
طبعا و يزقطط بدل من حاله الواقف ) , و 30 % للمستأجر ( يعني مثلا 180 ألف يحطهم وديعه
لحماده في البنك ) و الدوله تاخد 20 % , يعني تاخد بالظبط 120 مليار جنيه , تعمل بيهم
بقى المشروع بتاع فاروق الباز و نهر النيل الجديد و توفر كذا مليون فرصة عمل و نرجع
نصدر القمح زي زمان , و ممكن الحكومه يعني من باب اثبات حسن النيه تقول لكل مستأجر
إن وظيفة حمادة جاهزه و مستنياه في نفس المشروع وأول ما ربنا ينتع مامة حماده بالسلامه
هندّيله شهادة الميلاد و معاها جواب التوظيف .
.................................................................................................................................
Mohamed
Hussein
11
أغسطس 2015•
الأرصاد الجويه
بتسلم عليكو , و بتقول لكو إن الحر في اليومين اللي فاتو كان حماده و الحر في الكام
يوم الجايين حماده هيقلع بلبوص في الشارع , وبتنصحكو باستخدام واقي شمس لأي حد نازل
من بيته حتى لو كان نازل يجيب عيش و لّا ب 2 جنيه فول ( و حبذا لو كان واقي الشمس ده
من الصيدليه بتاعة محمد حسين ) , و بتقول لكو انها بتقيس الحراره في الظل يعني تحت
الشجر يا وهيبه فبلاش تصدقو الرقم اللي بيتكتب في الجرايد , أما خبراء الطقس بقى فبيتوقعو
إن مؤشر الحراره في الأيام الجايه هيجيب درجات تدخّله طب ( عين شمس ) و هو حاطط رجل
على رجل .
...................................................................................................................................
Mohamed
Hussein
10
أغسطس 2015•
أجيال ورا أجيال
( حكاية رامي عمرو محفوظ أبو عجوه ) .
.
في أواخر سنة
59 قعد الأستاذ محفوظ أبو عجوه على كرسي في محل المعلم حنفي المنجد , استاذ محفوظ ده
قيادي بارز في حزب الوفد , من الناس اللي جار عليها الزمن بعد ثورة 52 , محفوظ بص للمعلم
حنفي وقاله : انت فاهم ان عبد الناصر يقدر يعمل السد العالي ؟ طب هيعمله ازاي و منين
؟ و لا روسيا هتساعده ولا امريكا هتسيبه في حاله , ده اصلا مشروع عملاق و عبد الناصر
بيضحك عالشعب الغلبان و ينصب عليه .
.
و بعد كام سنه
قعد استاذ محفوظ في نفس المحل و قال للمعلم حنفي المنجد : على فكره بقى السد العالي
اللي انتو فرحانين بيه ده هو مجرد كوبري مشاه يعني يمشي عليه اتنين حبّيبه , و لا ليه
أي تلاتين لازمه .
.
استاذ محفوظ ربنا
كرمه بولد اسمه عمرو , عمرو كبر ما شاء الله و بقى عضو في جماعة الإخوان المسلمين
( شيخ يعني ) , و استاذ محفوظ بقى الله يرحمه و يحسن اليه .
.
و في سنة 1973
كانت بودار حرب تحرير سينا , قعد الشيخ عمرو في نفس المحل اللي كان بيقعد فيه ابوه
, و قال للمعلم حنفي المنجد : انت مصدق اننا هنعرف نعدّي خط بارليف العظيم المحصن ؟
و ننتصر على الصهاينه و الأمريكان وراهم ؟ السادات بيسرح بالشعب و بياكل بعقله حلاوه
.
و في أواخر اكتوبر
73 قعد الشيخ عمرو مع المعلم حنفى و قاله : على فكره بقى احنا مانتصرناش ولا حاجه و
الحكايه كلها كانت تحريك قوات على الأرض من أجل تحريك عملية السلام و أصلا أصلا خط
بارليف ده كان أي عيل صغير يعمل بيبي عليه فيقوم موقّعه , يعني شوية رمل و خط تعبان
مُلّه .
.
الشيخ عمرو ربنا
رزقه بولد اسمه رامي ( رامي عمرو محفوظ أبو عجوه ) , و الولد قرر انه ينشق عن الجماعه
بعد وفاة والده و ينضم لحركة 6 ابريل ( قال يعني هو كده يبقى انشق ) و المعلم حنفي
ربنا مطوّل في عمره .
.
و في يوليو سنة
2014 رامي راح للمعلم حنفي و قعد على نفس الكرسي بتاع ابوه و جده و قاله : انت فكرك
يعني السيسي هيعرف يعمل قناه بالحجم ده و مشروع ضخم بالشكل ده في ظرف سنه ؟ ده من رابع
المستحيلات , السيسي اصلا كداب و بيضحك عالناس , لا هيعرف يجيب تمويل للمشروع و لا
هيلاقي شركات تنفذه في سنه ولا حتى 3 سنين و ابقى قابلني .
.
و في أغسطس
2015 قرر المعلم حنفي المنجد انه يروح يزور رامي في البيت عشان ماجاش بقاله فتره و
هناك قال له انا قلقت عليك يا رامي يابني , و عموما انا كنت رايح احضر افتتاح قناة
السويس الجديده لو تحب تيجي معايا , رامي في الوقت ده كان ربّى دقنه من حالة الإكتئاب
اللي عايش فيها , و قام مولع سيجاره و قال للمعلم حنفي : يا راجل مش عيب عليك في السن
ده تروح تحضر افتتاح ترعه ؟ .
.......................................................................................................................................
Mohamed
Hussein
10
أغسطس 2015•
أستاذ حسّان ,
موظف كبير في إدارة الجامعه , و كمان عضو في حركة الإشتراكيين الثوريين , استاذ حسان
نزل من بيتهم عشان يجدد رخصة العربيه بتاعته في المرور , و هناك لقى طوابير و ناس واقفه
اللي ليه ساعتين و اللي من 7 الصبح واقف , الراجل فكر شويه كده و قال انا مش هقف زي
الناس دي , قعد يدوّر و يلف لحد ما لقى عيل من العيال اللي بيلفو في المرور , الولد
عرض عليه يخلص له كل حاجه وياخد 700 ج , استاذ حسان قاله ليه 700 ؟ ده كده يبقى افترا
و نصب عيني عينك , و من هنا لهنا اتفقو على 500 , الولد قاله استريح حضرتك تحت المظله
و اشرب حاجه ساقعه , ساعه بالكتير هتكون الرخصه معاك .
.
بعد ساعه كان استاذ
حسان واخد الرخصه في ايده و راكب عربيته , و هو ماشي سمع صوت سارينة اسعاف و لقى العربيات
بتاخد جنب عشان الإسعاف تعدي , بس هو رفض و اصر يمشي قدام الإسعاف و قال براحتي ( أنا
حر ) , السارينه شغاله و هو علّى الكاسيت عالأخر و شغل التكييف و قفل الإزاز , و بعد
شويه كانت الإشاره قافله و العسكري واقف مشاور بايده , استاذ حسان كسر الإشاره و اتسبب
ان عربيتين يدخلو في بعضهم بس لمح العسكري بيكتب رقم عربيته , طبعا ماوقفش بس انفعل
شويه و من عادة الأستاذ حسان انه لما بينفعل بياكل موز , عشان كده لازم كيس الموز يكون
في الكرسي اللي جنبه طول ماهو في الشارع .
.
بدأ استاذ حسان
يقشر في موز و ياكل و يرمي القشر من الشباك و لما هدى شويه افتكر موضوع ابن اخت المدام
, الواد ما شاء الله عليه جايب جيد في الكليه في التقدير التراكمي و ترتيبه رقم
1754 على الدفعه , استاذ حسان مسك الموبايل و كلم رئيس القسم , مساء الخير يا باشا
, معاك حسان عبد العظيم من ادارة الجامعه , كنت كلمت حضرتك عن تعيين الطالب فلان الفلاني
معيد عندكو , يا ترى عملت لنا ايه في الموضوع ده ؟! اتمنى ماكونشي بتقل على سيادتك
.
.
و بعد ما رجع استاذ
حسان بيتهم و اتغدى وريح ساعتين ( و طبعا كان قابل لمدام نيفين توقّع مكانه في الحضور
في الجامعه ) , الراجل نزل في اجتماع حركة الإشتراكيين الثوريين اللي هو قيادي بارز
فيها و طلع يقول خطبته العصماء عن الفساد و الرشوه و المحسوبيه و الشوارع اللي مش نضيفه
و احترام القوانين و المرور و أدمية البشر !! .
.......................................................................................................................................
Mohamed
Hussein
9
أغسطس 2015•
وزير خارجية عزبة
قطر : لو خدنا عالكلام اللي بيقوله الإعلام المصري كانت قامت حرب عالميه تالته !!
.
هههههههههههههه
أهي دي بقى قمة الكوميديا السوداء اللي بيقولو عليها , حرب عالميه تقوم بين أقدم دوله
في التاريخ وبين كشك عالخليج , الله يخرب بيت أم البترول على أم الغاز اللي طفح في
جزيره العرب , دانت جدك كان أخره يمسح جزمه عبد البناصر و يرجع الخيمه يتفشخر بكده
و يعملو له مولد و مقام عشان مسح جزمة ناصر .
.
و هتحاربنا بإيه
يا عرة الرجاله ؟ بالأمريكان اللي راكبينكو في قاعدة السيسليه ؟ ولا هتشترو جيش و تلمّوه
من فنزويلا و النرويج و كزاخستان و صربيا و تحاربو بيه ؟ و لا هتحاربونا ب مبرد المونيكير
بتاع موزه وابنها ؟! .
..................................................................................................................................
Mohamed
Hussein
9
أغسطس 2015•
الحمار اللي نشر
خبر عن الجيش القطري الحر !! .
.
يا حمار قطر مفهاش
جيش عشان يبقى فيها جيش حر , قطر فيها قاعده أمريكيه اسمها السيليه بتحميها و لو حصل
انشقاق او انقلاب على موزه وابنها يبقى الدقه بتقول : انشقاق في القاعده الأمريكيه
و تكوين ( جيش السيليه الحر ) .
.
هقول للمره الألف
و اللي يزعل يزعل , ياريس عبد الفتاح , أبوس إيديك , الأشكال اللي زي أحمد موسى و مصطفى
بكري هما مجرد طبالين و هجاصين و أخرهم يسرحو ببيانولا في قطر طنطا , الناس دي هتتحسب
عليك بالغط و هتبقى شايل شيله مش بتاعتك , إحنا في مرحله حرجه جدا و انت هتبني و هتلاقي
ألف هلفوت عبيط بيهد , منهم الهلفوت الإرهابي و الهلفوت الكولجي و الهلفوت الإعلامي
اللي محسوب علينا مؤيد .
.
عدوك صارف مليارات
عشان يعمل أله اعلاميه بنت وسخه محترفه في حرق الأوطان , و احنا هنرد عليهم بشوية هلافيت
و بيانولا ؟!! .
.
مطلوب قناه فضائيه
واحده باستثمارات حقيقيه وقويه , يشتغل فيها ناس عندهم شوية موهبه و شوية عقل و شوية
فهم لخطورة المرحله دي , و هدم ماسبيرو اللي بيخسرنا مئات الملايين في السنه و ملهوش
أي تلاتين لازمه , يعني الفلوس اللي بنصرفها على بودرة الماكياج و كتافات المذيعات
و النسكافيه و العلف لموظفين ماسبيرو ( اللي شبه موظفين وحدة مرور السلام ) تفتح لنا
قناه اخباريه قويه جدا .
.
اللهم قد بلغت
, اللهم فاشهد .
..................................................................................................................................
Mohamed
Hussein
9
أغسطس 2015•
لما تكون زملكاوي
زي حالاتي و تعرف إن الأهلي اتغلب النهارده و غالبا هيطلع تاني المجموعه والزمالك هيطلع
أول مجموعته , فيقوم الأهلي يقابلنا في قبل النهائي , على طول تفتكر مشهد من مسرحية
الزعيم و تقول ( الله يخرب بيتك , هو انت ورانا ورانا ) !! .
...................................................................................................................................
Mohamed
Hussein
8
أغسطس 2015•
البنت المصريه
لما تتخطب و تكون بتحب خطيبها أوي بس عرفت انه كان بيحب واحده تانيه قبل كده و انه
خرج معاها مره و عزمها على كابتشينو و العياذ بالله ( هو اللي اعترف لها ) , هتقوله
خلاص انا سامحتك و هننسى الموضوع ده بقى
.
في أول مره ( خطيبها
بيزورهم في البيت )
البنت ( مكشره
) : ازيك يا احمد
خطيبها : الحمد
لله , الجميل مكشر ليه ؟
البنت : مفيش
أحمد : لا بجد
, فيه حاجه مضايقاكي .
البنت ( بعد إلحاح
من احمد ) : بصراحه افتكرت موضوعك مع مروه .
أحمد : يا حبيبتي
دي كانت حاجه عبيطه و راحت لحالها و احنا اتفقنا ننسى .
البنت : خلاص خلاص
هحاول انسى بس انا مش بزرار يعني .
.
في تاني مره (
أحمد عزمها عالغدا )
أحمد : هتاخدي
ايه حبيبتي انا هطلب بوفتيك
البنت ( سرحانه
) : هو انت لما عزمت مروه على كابتشينو , بذمتك ماعزمتهاش ولا مره عالغدا بره ؟ احكي
احكي و انت عارف انا سامحتك و نسيت الموضوع .
أحمد : اللهم طولك
يا روح
.
في تالت مره (
مكالمة تليفون )
أحمد : ازيك حبيبتي
عامله ايه وحشتيني اوي
البنت : وحشتك
بجد ؟ طب ليه مش قلت اسمي ؟ ولا خايف تغلط و تقول يا مروه , قول قول انت عارف انا نسيت
الموضوع اساسا و سامحتك .
أحمد : طب انا
هقفل دلوأتي , افتكرت مشوار مهم .
.
في رابع مره (
احمد عزمها في كافتريا )
الجارسون : حضراتكو
تشربو ايه
أحمد : عندكو مشاريب
ايه سخنه
الجارسون : فيه
شاي و قهوه و هوت شوكليت و نسكافيه و كابتشينو
البنت ( بانفعال
) : بلاش الزفت الكابتشينو ده اطلب لي حاجه تانيه .
أحمد للجارسون
: هات لنا 2 اي حاجه ماعدا الزفت الكابتشينو .
أحمد للبنت : انتي
عارفه يا حبيبتي انا كنت نسيت مروه تماما بس انتي عملتي فيا خير كبير و بتفكريني بيها
كل يوم هههههههههههههههههههه , ولو رجعت لها هتبقى انتي السبب .
و عارفه كمان
, بجد بجد , لو ملك الموت بيحاسبني بالطريقه دي كنت قلت له يا عم دخلني النار و اخلص
.
.
البنت : يعني ايه
ياحمد ؟ تقصد ايه ؟ عايز تسيبني ياحمد ؟ مانت عارف اني سامحتك و نسيت الموضوع .
احمد : يعني بحبك
بجد , و الله العظيم بحبك انتي , بس ارحمي أمي العيانه .
......................................................................................................................................
Mohamed
Hussein
8
أغسطس 2015•
حوار مع سلفنجي
.
امبارح بالليل
داخل عليا راجل سلفنجي , بعرفهم بسهوله من الشاسيه بتاعهم و شكل الدقن و ملامح الوش
( مختلفين في الشاسيه عن الإخوان ) , الراجل طلب ادويه و عايز يقيس الضغط قلت له اتفضل
, فتح في الكلام قلت و ماله , الكلام جاب كلام لحد ما وصلنا للسياسه كالعاده , التزمت
الصمت تماما لحد أخر جمله و حطيت إيدي على خدي عشان اسمع البؤين من الأول للأخر و اخلص
.
.
هو : إوعى تكون
حضرتك من مؤيدين الدم ؟ أصلنا مش فريقين ولا حاجه , احنا ناس بتستحرم الدم و ناس و
العياذ بالله بتأيده , و انا انضربت 64 خرطوشه لما كنت في رابعه .
أنا ( ساكت و بقول
في سري ) : لأ هما 63 خرطوشه بس و انت بتغالط في العدد يا مولانا .
.
هو : و على فكره
السيسي ده تربية مبارك و ابنه و عميل للصهاينه و الامريكان
أنا ( في سري
) : ماهو مرسي اللي عينه مش أمي و أوباما لحد النهارده مش ناقص غير انه يطلع لابس تي
شيرت عليه شعار رابعه .
.
هو : و لعلمك كل
ده هيتغير في لحظه و انا شوفت رؤيه حسنه و التغيير هييجي من الجيش و فجأه مش هنلاقي
السيسي ولا صدقي .
أنا ( في سري
) : يعني عايز انشقاق في الجيش ؟ بركاتك يا مولانا , و النبي تحلم لنا حلو كده إني
جت لي منحه في هارفارد مثلا أو خدت جايزة نوبل في أي حاجه , و غالبا انت اللي حلمت
ان سيدنا جبريل نزل و ملس بإيديه على برلمان الإخوان .
.
هو : و حديث خير
أجناد الأرض ضعيف و اصلا المقصود بيهم الشعب مش الجيش
أنا ( في سري
) : لأ المقصود بخير أجناد الأرض هما الإخوان و السلفيين و بتوع 6 ابريل و شجر الصفصاف
و طائر النورس و مشابك الغسيل .
.
هو : و سيبك انت
من محمد حسان ونادر بكار و شلة النصابين دول , انت عارف النصراني الفلاني اللي ضد الإنقلاب
؟ أهو ده افضل عندي من محمد حسان مع انه نصراني و كافر و هيدخل النار بس حسابه عند
ربه .
أنا ( في سري
) : منين حكمت انه هيدخل النار و منين بتقول حسابه عند ربه ؟ ما ترسى على بر يا مولانا
.
.
هو : وانا يا دكتور
بصراحه ولا اخفيك سرا , في قلبي غصه منك عشان انت مؤيد للإنقلاب , رغم مقابلتك الطيبه
ليا .
أنا ( نطقت بقى
وقمت من عالكرسي ) : المهم يا شيخنا ماتنساش تواظب عالمشي عشان وزنك ينزل شويه , و
ضغطك ما تقلقش منه هو كده معقول و اشرب مايه كتير عالريق عشان البلغم اللي في صدرك
, في حفظ الله , شرفتني و الله .
.......................................................................................................................................
Mohamed
Hussein
8
أغسطس 2015•
وائل عباس دخل
عالبوست عندي و كتب تعليق بألفاظ كلها +18 , أصل لسانه كده دايما رطب بذكر الله ( هو
والإخوان ) , المهم انه كتب التعليق و عمل بلوك وانا بره ( أصله مش جبان ).
.
علامة الإستفهام
يا استاذ وائل يا مثقف يا فشيخ لما بتتحط بعد جمل معينه و من شخصيات معينه بيبقى استفهام
للتأكيد أو استفهام مطلوب الإجابه عليه ب نعم ( أو نعمين ) , دي أبجديات اللغه العربيه
, و هقولك تاني انت برضه حاجه من اتنين , إما انك مش فاهم ان استفهامك للتأكيد و ساعتها
تبقى حمار أو تبقى فاهم و بتستعبط أو بمعنى أصح تتم*** , تبقى خاين و اللي ماشيين وراك
هما اللي شوية حمير .
.
و لما تكون الشركات
انسحبت عشان استحالة التنفيذ في سنه ده له ترجمه ان المشروع عملاق و اكبر من قدرة شركات
عالميه على التنفيذ ( مجتمعه ) , أبجديات أهي , و لما المشروع العملاق ده يتنفذ يبقى
قمة الحماقه و السفاله انك تشبهه بترعه , مش كده و لا ايه يا زعيم الشباب يابو عقل
ألماظات ؟! .
.
ده تعليق وائل
عباس قصدي الدكتور وائل عباس ( لا يكون رايح هارفارد واحنا مش عارفين )
..........................................................................
..........................................................................
Wael
Abbas هو الناس بتقولك
يا دكتور ليه وانت ابن وس** جاهل مش بتقرا ان فيه علامات استفهام على كلامي يعني سؤال
ثانيا لو تابعت كنت عرفت ان فيه شركات انسحبت فعلا يابن الخ** انت والمتن**** المعلقين
.......................................................................................................................................
Mohamed
Hussein
8
أغسطس 2015•
مشهد صغير
.
- في حديقة الأسره
اللي جنب الرحاب family
park
, جزء كبير من العائلات اللي جوه سوريين و , غالبا من سكان التجمع و الرحاب , على المراجيح
و الزحاليق تلاقيهم , في الكافتريات موجودين و عند النافوره الراقصه , و لحد ما ركبت
القطر الصغير اللي جوه ده ( الطفطف ) , لقيت قدامي عيله سوريه , شاب و مراته و طفلين
صغيرين , الأطفال فرحانين أوي .
.
الإحساس بالأمان
ده نعمه مايقدرهاش إلا واحد عنده أطفال صغيرين , في لحظه كده ركزت مع الطفلين و فرحتهم
و تخيلت إن لولا ستر ربنا بمصر و لولا جيشها كان زماني انا و بناتي و العيله السوريه
دي بندور على مرجيحه للعيال يركبوها في ملاهي فنزويلا أو في حديقه في كوريا الجنوبيه
أو حتى شجره يتنططو عليها في أدغال أفريقيا .
.
فهمت يابو عقل
( مرفوع ) من الخدمه و بنطلون ( ساقط ) من على وسطه ؟!.
...................................................................................................................................
Mohamed
Hussein
7
أغسطس 2015•
مرّه واحد شاف
عاصفة رياح قويه جايه من بعيد قام فرح أوي و قال دي فرصه عظيمه ممكن نستغل الرياح دي
في توليد الكهربا .
.
بدأ صاحبنا يجيب
المعدات المطلوبه و زرعها جنب البيت و بدأ يفكر و يحلم بالخير اللي هييجي من توليد
الكهربا بسبب الرياح دي .
.
صاحبا فجأه كده
بص عالبيوت اللي حواليه لقى شبابيكها بتتخلع و بيبانها بتتكسر و السقف بتاعها بيترج
رج , و سكان البيوت دي طلعو منها جري و هما مذعورين و اتشرّدو بقى في كل الطرق و الحواري
.
.
صاحبا فكرشويه
كده وقال : ايه اللي انا بعمله ده ؟ فرحان بالرياح اللي بقت أعاصير و مش خايف على بيتنا
لا يتهد على دماغنا ؟! .
.
صاحبنا ساب العك
اللي كان شغال فيه و لم خواته وبدأو يعملو تقويه لعمدان البيت و حيطانه و يعملو مصدّات
للرياح عشان الإعصار مايهدوش , وقال ملعون ابوها الكهربا دلوأتي , المشروع مش هيطير
, حيطان البيت أهم .
.
.
أهو أنا بقى صاحبنا
ده , و ده حالي باختصار ( و بالترتيب ) بعد الربيع اللامؤاخذه العربي .
...........................................................................................................................
Mohamed
Hussein
7
أغسطس 2015•
وائل عباس بيشتغل
مدون , المهنه مدوّن , يعني يكتب عالفيس و تويتر و يبقى ناشط سياسي و فيسبوكي و له
أنصار و مريدين و كولجيه , مع انه في الحقيقه بيشتغل معدّده ( زي ما كتبت صديقه عزيزه
على صفحتها ) , المعدده دي كنت بشوفها زمان , تتمرمغ في الأرض أول ما توصل العزا و
تعيط و تتشحتف على روح المرحوم اللي اتخطف و يا عيني كان عيل لسه مادخلش دنيا مع ان
اللي ماتت ست عمرها 190 سنه , و المعدده كنت بشوفها نازله من العربيه أخر ضحك و صهلله
و أول ما تقرب من بيت المرحوم ( الزبون ) تبدأ فقرتها الإستعراضيه .
.
وائل عباس اللي
بيشتغل معدده , كتب من 6 شهور بخط إيده إن الشركات هربت من مشروع القناه عشان تنفيذه
في الوقت ده مستحيل , و لما الموضوع تم و المستحيل اتحقق نشر صوره بتقول ان السيسي
كان بيفتتح ترعه أو مصرف ( يبقى بيشتغل إيه ؟ قولو انتو بقى ) .
.
و حازم عبد العظيم
هو كمان بقى بيشتغل معدده , و لما مالقاش له دور في الحكومه بقى يتكلم عن الدبانه اللي
كان بيهشها السيسي في المؤتمر !! .
.
اللي زي وائل عباس
و حازم عبد العظيم دول لازم يتعاقبو و أفضل عقاب ليهم إنهم يستحمو , أه يستحمو 9 مرات
بديتول وبعدين نجوزهم لشاب يكون جامد عشان نعالج اضطراب الهرمونات اللي عندهم , للأسف
هو ده الحل الوحيد , أو نسفرهم أمريكا و هناك بحسب القوانين الأمريكيه و الديموقراطيه
الأمريكاني يقدرو يتجوزو بعض , أو يتجوزو أوباما ذات نفسه .
...............................................................................................................................
Mohamed
Hussein
7
أغسطس 2015•
الجبهه التالته
شمال , أه شمال .
.
البرادعي استغل
افتتاح القناه الجديده و كتب تويته عن القنبله الذريه و هيروشيما , ماهي المسافه بين
هيروشيما واسماعيليه فركة كعب , و ده بقى اسمه الذكاء المركب الكومبليكس , أنا مره
و الله و انا في الكليه سنة 98 دخلت لدكتور شفوي بتاع عقاقير ( pharmacognosy ) و سألني مين اللي هيفوز بكاس العالم قلت له
البرازيل قالي برافو .
.
هو أوباما مش هيطلع
في خطاب عاجل على القنوات الأمريكيه و يقول : سوف نعلّم أبنائنا إزاي يحفرو قناة طولها
35 كيلو في سنه واحده مع ان خبرائنا بيقولو 5 سنين ؟ ..لا مش هيقول , غالبا هو كمان
هيطلع يواسي الشعب الياباني في ذكرى قنبلة هيروشيما مع إنه هو اللي رماها !! .
.
الواد صاحبك الشمال
بتاع #عبث , داير على صفحات الفيس يكتب نفس التعليق , كوبي و بيست , طب ابقو خلو
القناه الجديده تنفعكو زي ما المشروع الإقتصادي نفعكو , مع انه و عزة جلال الله لو
فتح كشك سجاير و سألته هتكسب منه امتى وتبدأ تحقق أرباح , هيقولك لا طبعا مش قبل سنه
, انت فاكرني سارح بعربية دره مشوي يا أستاذ ؟ دانا فاتح كشك سجاير أد الدنيا .
......................................................................................................................................
Mohamed
Hussein
7
أغسطس 2015•
في الوقت اللي
سوريا فيها ما فيها و اليمن على باب الله و ليبيا تعيش انت و العراق يعني ايه العراق
؟ في الوقت ده احنا بنعمل مشاريع كبيره و بنحتفل و بنفرح و بنعزم القريب و الغريب
.
.
أهي رساله لأمريكا
وكلابها اللي مشغلاهم , لما تحب تنفذ مخطط من مخططاتك و تسميه ربيع عربي او حتى تسميه
سوسن والنبي يا شيخ تبعد عن مصر , عشان في النهايه كان اسمك امريكا ولا اسمك المغول
و لا الهكسوس هيبقى مخططك ده لما ييجي عندنا عباره عن حزمة حطب زي اللي كسرها عبد الهادي
( عزت العلايلي ) على ركبته في فيلم الأرض ................... يارب تفهمو الرساله
يا شوية خوااااا ( خواجات يعني ) .
.
الحكايه مش قناة
السويس الجديده , الحكايه بتعني دوله لها كيان و واقفه على جوز رجول و بتتنفس و تعيش
و تتكلم و تفرض كلمتها و تحب و تحارب و تحتفل و تزرع شجره , الحكايه 4 حيطان مصلوبين
و واقفين على حيلهم و رقبه مرفوعه للسما و ضهر ماينحنيش .
.....................................................................................................................................
ليست هناك تعليقات:
إرسال تعليق