Mohamed
Hussein
20
أغسطس 2015·
عصابات أخر شياكه
.
زمان كان شغل العصابات
كده , المعلم زعيم العصابه لابس الجلابيه , يقعد على كرسي عالقهوه و في بؤه الليّ بتاع
الشيشه و جنب منه يقعد صبي واخد بشله ولا اتنين في وشه , المعلم يمسك جرنان و يعمل
انه بيقرا فيه و يقول للصبي هتنفذ النهارده ياض يا شرده ؟ يقوم يقوله وجب يا معلمي
, و بعد ساعتين تلاته يرجع الواد شرده يلاقي المعلم لسه قاعد على نفس القهوه و يقول
له : الأمانه و صلت و نامت في سريرها يا سيد المعلمين ( يعني الحشيش دخل المخازن )
.
.
دلوأتي لا , العصابات
مابتشتغلش كده , العصابات بتعمل التالي , المعلم الكبير مربي دقنه ولابس بدله و كرافته
و لقبه ( أ .د ) , معتكف أغلب الوقت في الجامع , و دراعه اليمين السبحه مش بتفارق ايده
( لابس بدله برضه ) , و عندهم محلات صرافه و مشاريع وفلوس متلتله , و عندهم شباب كتير
, و كل شويه يعملو معسكرات كشافه لشبابهم و حاجات ترويحيه , و يلعبو كوره و يجرو ,
و ينظمو مسابقات و يعملو جمعيات و يوزعو بطاطين عالغلابه و يلمو فلوس من الي معاهم
و يشترو ياميش رمضان و قنابل و متفجرات و يطلعو بقوافل اغاثه طبيه لغزه و يرجعو من
هناك محملين بخير غزه اللي انتو عارفينه !! , و يطلعو عالمنابر يقولو قال الله و قال
الرسول , و يوزعو امساكيات رمضان و أربي جيهات , و زيد بيتعامل بس مع عبيد و عبيد مايعرفش
غير حنفي و حنفي اخره المهندس بهيج و بهيج يكلم ابو حمزه و ابو حمزه يحكي لام حمزه
و ام حمزه تقول لام مصعب و ام مصعب تقول لجوزها ابو مصعب و فين و فين بقى على بال ما
توصل للواد شرده اللي هو صبي المعلم اللي بيخلّص ( الجناح البلطجي ) .
.
و لو جبت شرده
و سألته تعرف المعلم الكبير ؟ هيقولك اه الحاج ابو مصعب !! .
.
و هي دي بقى اسمها
قصة حياة الجماعه الإرهابيه ( الإخوان ) , شغل على مايه بيضا , بيتخطط له عشرين و خمسين
سنه ( يلزمه مسانده من المخابرات الأمريكيه راعي البلطجيه في العالم ), و أجنحه كل
جناح عارف دوره كويس , و تصدير مشهد التقي في الصوره , و يا سلام لو فيه شوية شعارات
و كربلائيات و مسابقات لتحفيظ القرأن الكريم تبقى عنب و لوز و اتعشّت .
.......................................................................................................................................
Mohamed
Hussein
20
أغسطس 2015·
في خلال سنه ,
السيسي زار روسيا مرتين و جاب بوتين و روسيا ذات نفسها هنا في القاهره و رايح روسيا
تاني الإسبوع الجاي في زيارة لمدة 3 أيام , بس سيبك , السيسي ده أصلاً عميل الأمريكان
!! .
.
فكّر كأنك إخوانجي
براس كلب و مناخير قرد ( مشيها مناخير قرد ) .
......................................................................................................................................
Mohamed
Hussein
20 أغسطس
2015·
انفجار في مبنى
الأمن الوطني في شبرا , و كمية هري زي الفل , الحقونا يا ناس البيت وقع على عمتي ,
و بعد 3 دقايق ( عمتي طلعت من المستشفى الحمد لله و البيت سليم ) , فرع صيدناوي اتحرق
و انا شوفته والع , لا لا ده ازازه اتكسر بس ( سوري لازم اكون أدقق في كلامي شويه
) , مش ده المبنى اللي كان بيتعذب فيه ابو دومه و الدفاس و سنيه جاكلين ؟ لا سنيه جاكلين
ماتت في حادثة موتوسيكل جايز تقصد ست ابوها جاكلين ؟ , على فكره الإنفجار ده مالوش
دعوه بالإخوان , اه صح مالوش علاقه بيهم دي صراع بين قوتين تانيين خالص ( كل دي تعليقات
اصدقاء على الإنفجار ) , و غالبا المقصود بالقوتين في التعليق الأخير هما الإتحاد السوفيتي
و البيزنطيين .
.
توفيق عكاشه بيقول
البورصه خسرت 12 مليار جنيه لما اتحبس , و الله انا خايف توفيق عكاشه يجي له دور كحه
و عطس يقوم يقفل الملاحه في قناة السويس و يوسّع خرم الأوزون , و بيقول كمان انه كان
مخطئ في تأييد قرار الحبس في قضايا النشر !! ده على اعتبار انك اتحبست في قضية نشر
مش قضيه رافعاها عليك طليقتك ( يعني حرامي غسيل و برضه لازم يطلع نفسه مناضل سياسي
)!! .
.
اللي في الفقره
الأولى دول اسمهم الشباب , و اللي في الفقره التانيه اسمهم النخبه , أدي الشباب و أدي
النخبه , و ادي البيضه و ادي اللي فقعها !! .
.
صباحك خير و أمل
يا مصر , و الله معجزه من ربنا انك عايشه بنخبتك و شبابك و لسه بتتنفسي و بتضحكي .
..................................................................................................................................
Mohamed
Hussein
19
أغسطس 2015·
في صفحة اخوانجيه
شهيره , قصه بتحكيها واحده من خرائر الإخوان عن اخوها الي انضرب رصاصه و بعدين عرفو
يخرجو بيه و راحو مستشفى تانيه عملو له عملية رد مخ و نجحت الحمد لله , هنا بقى ييجي
السؤال , هي عملية رد المخ دي اتعملت عالبارد ولا المخ كان محتاج يدخل فرن و يترش بلون
الليه ؟! , يارب العمليه تكون اتعملت في التوكيل مش بره , أصل السمكريه بره ماعندهمش
ضمير .
.
أنا مره كنت ماشي
في الطريق رايح المنصوره و لقيت حادثه كبيره , عربيه مليانه خرفان و مقلوبه و فيهم
خروف راسه طارت , و من قوة الحادثه كانت راس الخروف في بنها و جسمه في ميت غمر , قمت
انا اتصلت بواحد صاحبي من بنها قلت له هات الراس بسرعه و تعالى و رجعت انا جري بجسم
الخروف من ميت غمر, و اتقابلنا في كفر شكر , و جبنا شريط لحام و أنبوبه أمير من ورشه
كانت عالطريق و لزقنا الراس في الجسم , العمليه نجحت الحمد لله و الخروف ده لسه عايش
لحد دلوأتي و اسمه احمد المغير .
................................................................................................................................
Mohamed
Hussein
19
أغسطس 2015·
حركة حماس : دور
ايران الجديد يتبني موقف واشنطن !! هههههههههههههههههه قال يعني دور حماس بيتبني موقف
عبوّد !! .
يا جدعان عيب دانتو
قاتلين سارقين متاجرين في ام القضيه الفلسطينيه سوا , و انتو مش كلاب امريكا ولا حاجه
دانتو مجاهدين , صحيح بتجاهدو بالبؤ بس احنا اعتبرناكو مجاهدين !! .
.
الحكايه اصلها
بسيطه خالص و اسهل من تنقية الطماطم من عند ولاد الحاج رجب , الحكايه ان من كام سنه
كان فيه حلف كده بيضم حماس على لا مؤاخذه قطر ولا مؤاخذه طهران و لا مؤاخذه نظام بشار
الأسد , و تسمع منهم احلى شوية خطابات و اغاني عن تحرير القدس و قنوات فضائيه و كوفيات
و طواقي وفلايات .
.
شويه كده وبدأ
اسمه ايه ده ؟ أه الربيع العربي , و داعش دخلت سوريا برجلها اليمين و بدعم خليجي تحت
مسمى اللامؤاخذه الثوره , هنا بقى قعد قيادات حماس مع بعض و فكرو : طب احنا هنبقى مع
مين ؟ نبقى مع سوريا و ايران ؟ و لا نبقى مع قطر و الخليج ؟ و طبعا الريالات و الدينارات
تكسب ماهو الجنيه غلب الكارنيه , يعني حماس تخسر شيكات و مليارات و قصور و فيلل عشان
خاطر ايه ؟ .
.
و لو حماس خسرت
الدعم الخليجي و زكايب الفلوس تبقى خطتها المكرره فشلت , عارفها انت الخطه دي ؟ أيوه
اسم الله عليك , حماس تضرب بمبتين و صاروخ بلاستيك في صحراء اسرائيل تقوم اسرائيل تدك
قطاع غزه و تدرّب الطيارين بتوعها على ضرب اهداف بشريه تقوم حماس و الجزيره يعيطو و
يولولو , يقوم قادة الخليج عشان شكلهم قدام شعوبهم يمدو ايديهم في السياله و يطلعو
بالمعلوم , يقومو قيادات حماس يتنغنغو بقى , و يفضلو كده لحد ما الفلوس تخلص يروحو
يدورو تاني على بمبتين و صاروخ بلاستيك .
.
و هي دي باختصار
حكاية القضيه الفلسطينيه , و القدس اللي في القلب يعني في الحته الطريه الشمال , هي
فعلا طريه و فعلا شمال .
...................................................................................................................................
Mohamed
Hussein
19
أغسطس 2015·
كالعاده , و زي
ما توقعت من اصدقائي الأهلاويه , هاجو و ماجو و بدل ما يرفعو شعارات : الاهلي له حق
ولازم ياخده بالقانون , الأهلي مابيتنازلش عن حقه , الأهلي صاحب قضيه و مبدأ ,
......... لقيتهم رافعين شعارات : الاهلي فوق الجميع , أهلي يا دوله , الأهلي محدش
يقدر عليه .
.
بالمناسبه , محدش
فيكو يعمل نفسه واد بتاع قانون و عدل و عداله لما الشرطه تعمل كده في أي قضيه تخص ظابط
فيها مثلا , ممكن هما كمان يرفعو شعارات : الشرطه فوق الجميع , محدش يقدر عالشرطه
, الشرطه اقوى من الدوله .
.
و لا حد يتكلم
عن نقابة المحامين لما تعمل بوليله بنفس المنطق و تعتبر نفسها اقوى من القانون ومن
الدوله , ولا عن القضاه لما يفكرو بنفس الطريقه ولا طيارين مصر للطيران .
.
أهلا بكم في كانتونات
بلطجيه لن تصنع دوله ولا حتى في كوكب القرود , احنا أحلى ناس نبيع مبادئ و قيم و شعارات
طالما الحاجه ماتخصناش , لكن تيجي على حاجه تخصني أقوم مطلّع لك المشرط من تحت لساني
و اشرّحك , وعهد الله اشرّحك , ماهو كله الا النادي اللي بشجعه !! .
.
السيد المهندس
ابراهيم محلب , لو ناوي يا عم تسيب شغلك و الهم اللي وراك عشان تلغي قرار اتحاد الكوره
( الجهه الحكوميه الرسميه ) و معلش تنزل المرّادي , و تصالح زيد على عبيد و تطبطب و
تدلع تبقى حكومتك دي تستحق لقب حكومة نانسي عجرم .
.
و أصدقائي الأهلاويه
ياريت يهدو شويه , كلها 3 شهور و مارادونا الجديد بتاعكو اللي اسمه احمد الشيخ هيلعب
معاكو , و يجيب لكو كاس العالم في تاكسي لحد عندكو , و اتحداك إني لو بعد 6 شهور من
دلوأتي سألتك : هو احمد الشيخ قاعد احتياطي ؟ هتقولي أحمد الشيخ مين ؟!! .
................................................................................................................................
Mohamed
Hussein
18
أغسطس 2015·
الأهلي قرر رسميا
الإنسحاب من الكاس و الدوري بعد ما اتحاد الكوره أوقف احمد الشيخ و فرض عليه غرامه
.
.
بعيد عن إني زملكاوي
, اللي بيعمله مجلس إدارة الأهلي ده مالوش غير اسم واحد , اسمه بلطجه , و لا ليها علاقه
بقى باخلاقيات النادي ولا بالهري ده , كل الناس كانت متوقعه ايقاف اللاعب و أولهم اعضاء
مجلس إدارة الأهلي , و بعد قرار اتحاد الكوره بدأ ناس من مجلس الأهلي يتكلمو عن ان
الجماهير مش هتسكت , و أي هبل , بالمناسبه لو الأهلي كمل في الكاس هيكسبه بكل تأكيد
, و بالمناسبه كمان , احمد الشيخ لما يلعب في الأهلي هيبقى احتياطي كام ماتش و بعد
كده يترمي في الدرج لحد ما يلاقو له بيعه عشان مالوش مكان فعلا .
.
بدأت أشك في تصرفات
مجلس إدارة الأهلي , و حاسس ان وراها إن , و الله نفس الكلام كنت هقوله لو اللي عمل
كده مجلس الزمالك و مرتضى منصور ( اللي مش بطيقه اساسا ) , اللعب على وتر الجماهير
هنا او هنا و محاولة خلق فتنه و تهييج الناس هو كارثه , و لو الإتحاد استقال أو أقيل
أو رجع في قراره تبقى كارثه اكبر .
.
أصدقائي الأهلاويه
ياريت ماتزعلوش من كلامي , و ياريت كمان ماتفرحوش بحكاية ان الأهلي هيضغط و كلامه هيتنفذ
عشان دي كده يبقى اسمها بلطجه لا تليق بالنادي الأهلي , محدش عاقل بيفرح بالبلطجه
.
.
البوست ده مش كلام
في الكوره , ده كلام عن مصر , يارب تفهمو .
...............................................................................................................................
Mohamed
Hussein
18
أغسطس 2015·
هاله شكرالله استقالت
من رئاسة حزب الدستور و قالت ان الخلافات تهدد بنهاية الحزب !! .
.
هو حزب الدستور
كان بدأ اساسا عشان ينتهي ؟ ده كده يبقى حزب ماركة ( وُلِدَ ميّتاً ) , و طبعا البرادعي
هيكتب تويته بالمناسبه دي , ماهو راجل صاحب واجب : بمزيد من الحزب و الأسى ينعي الدكتور
محمد البرادعي ( من مقر اقامته و نضاله في فيينا ) الساده اعضاء حزب الدستور و عددهم
18 عضو و يدعو لهم ولذويهم بالصبر و السلوان , كما يؤكد أن الفاشيه التي تتساقط من
أعماق البؤره لن تؤدي إلّا لمزيد من الشرخ الأقحواني و الإنقسام الميتوزي .
...................................................................................................................................
Mohamed
Hussein
18
أغسطس 2015·
مالهاش وصف تاني
يليق , هي الوتد و هي عمود الخيمه , ده حال كل الأمهات , ربنا يرحم والدة السيسي و
يصبر أهلها , لما عرفت الخبر دعيت لها بالرحمه و ماكتبتش حاجه , قلت الدعاء لها بالرحمه
و لأهلها بالصبر كفايه .
.
بس بصراحه استفزتني
تعليقات شوفتها بالصدفه , كده كتير بصراحه , كتير أوي على استيعاب أي كائن حي من أول
الكائن البدائي وحيد الخليه لحد الكائن النحاسي و الكائن الستانلس ستيل , يعني ايه
يا بشر ؟ ماتت اللي كنت بتترحم علشانها و ابقى شوف مين هيرحمك بعد كده ( ده بوست من
اعلامي اخوانجي برياله ) , بس ازاي كان بيترحم بسببها و هي يهوديه ؟ ( ده تعليق من
واحده من خرائر الإخوان على نفس البوست ) , ماهي الرحمه بسبب الأم مالهاش علاقه بالديانه
( ده تعليق من خروف بليه ردا على تعليق بتاعة الخرائر على نفس البوست بتاع أبو رياله
) !! .
.
هما ليه مش بيخيبو
ظني ولو مره , حتى من باب التغيير , ليه كل مره بشوف حروفهم و عقولهم بحس إني ماشي
في ماسورة مجاري و لما اطلع منها أقول الحمد لله على نعمة النضافه , الحمد لله على
نعمة العقل .
..................................................................................................................................
Mohamed
Hussein
18
أغسطس 2015·
مرشح للرئاسه الأمريكيه
: الحرب في العراق ستنتهي بتقسيمها إلى 3 دول !! .
.
يا راجل قول كلام
غير ده , معقوله العراق تتقسم ل 3 دول ؟ إزاي بس و هي بتنعم بالحريه و الديموقراطيه
الأمريكاني بعد رحيل ( السفاح ) صدام حسين , بقى هي دي الديموقراطيه اللي جيبتوها للعراق
؟! .
.
عموما احنا العرب
ولا يهمنا , عندنا شوية كولجيه زي الفل , شمامين شرابات بس حاجه تفرح القلب الحزين
و ماسكين في ديل امريكا كأنها أمهم اللي خلفتهم , و اهو لما العراق تبقى 3 دول و سوريا
3 و عندك السودان 2 و فلسطين 2 و ليبيا قول 4 يقوم عدد الدول العربيه بعد ماكان 22
يبقى 45 خلال سنتين تلاته , و شمامين الكوله يفرحو بقى بالعدد الكبير ده , إنجاز ده
ولا مش انجاز يا عبيد البياده ؟! .
.
و تيجي تقولهم
مؤامره صهيونية امريكيه و مخطط ابن تيت و قطر والجزيره هما مجرد الديلر بتاع الليله
دي تلاقي ردود تجيب للواحد الطحال , بالظبط كأنك بتحاول تقنع قرد إن مؤخرته حمره بس
هو مش راضي يقتنع و كل اللي على لسانه كلمة #عبث , المجد للثوره , الحريه للمعتقلين
, السلّاب للسيراميك و البورسلين .
............................................................................................................................
Mohamed
Hussein
17
أغسطس 2015·
حكاية الأحزاب
في مصر و البت لمار
.
صلو عالنبي , البت
لمار بنتي عمرها 5 سنين , و لما بتشوف اختها الكبيره بتصلي جنبي بتحب تقلدها و تيجي
تصلي هي كمان , بس لمار اساسا بتبقى ماشيه في الشقه و هي لابسه من تحت شورت صغير اد
كداهو , و احيانا من غير خالص يعني بلبوص .
.
المهم لمار لما
بتيجي تصلي بقى مش بتنسى تروح تجيب طرحه و تقف ربع ساعه قدام المرايه تربطها على راسها
بدبابيس و حاجات عشان شعرها مايبقاش مكشوف , و في النهايه الاقي واقف ورا مني بت أوزعه
كده محجبه من فوق و بلبوص من تحت , أقوم أنا ناوي الصلاه و اقول الله اكبر !! .
.
و الأحزاب السياسيه
في مصر , مدنيه بقى و لّا دينيه , بشوفها في العمل السياسي زي البت لمار بنتي و هي
بتصلي , أه يعني احزاب محجبه من فوق و بلبوص من تحت .
.
الحزب اللي بيأيد
النظام تلاقيه زي المدرس اللي متظبط و متروق , ماسك قلم و كل شويه يكتب صح صح صح صح
, و الحزب المعارض عايش بطريقة : الإنتخابات حرام و النظام حرام و القرار ده حرام و
اللابتوب حرام و الوزير حرام و طفاية السجاير دي حرام , يعني هو كمان ماسك قلم بس داير
يكتب غلط غلط غلط غلط , لا المؤيد فاهم يعني ايه مؤيد و لا المعارض فاهم يعني ايه معارض
, و كلهم كده محجبين من فوق ( يبيعو لك احلى كلام و احلى شعارات ) و بلبوص من تحت
( مفهومهم عن العمل السياسي العام يساوي صفر ) .
.
و بما اننا داخلين
على انتخابات برلمانيه ( يعني فريضه ديموقراطيه زي الصلاه في الإسلام ) و هي دي العينه
الموجوده , كلها بالشكل ده , فمش لاقي حل غير اننا ننوي الصلاه و نقول الله اكبر
!! .
...............................................................................................................................
Mohamed
Hussein
17
أغسطس 2015·
خبر على راديو
اسرائيل : حماس توافق على هدنه طويله مع اسرائيل لمدة 8 سنين !! , هههههههههههههه اضحكو
يا عيال , قال يعني حماس كانت بتنيّم اسرائيل من المغرب و مربّيالها الخفيف يا عيني
, ماهي حماس دي في هدنه قصدي في شهر عسل مع الصهاينه لهم 10 سنين دلوأتي , ضيف عليهم
كمان 8 جايين يبقى المجموع 18 , و بعد 8 سنين نجدد الهدنه عشان الصلح خير قوم نتصالح
يبقو 36 سنه !! .
.
و لما أقولكو إن
اكبر هديه عملها الفلسطينيين للصهاينه هي انفصال القطاع عن الضفه و ان سيطرة حماس على
القطاع كانت بمباركة صهيونيه كامله تبقو تصدقوني , و لما احلف لكو عالمصحف إن حماس
و الصهاينه هما عباره عن ( بتاعتين في بتاع واحد ) حاليا و لهم قضيه مشتركه و هي محاربة
الجيش المصري و محاولة هدم الدوله المصريه و تخريبها برضه صدقوني , أصلك مش واخد بالك
, المجاهدين ولامؤاخذه في حركة حماس مقتنعين تماما ان تحرير القدس يبدأ بتحرير بنها
و ميت غمر و حدايق حلوان .
.
و ابقى سلم لي
عالقضيه الفلسطينيه و على قدس امك ياسماعيل بيه هنيه .
.......................................................................................................................................
Mohamed
Hussein
16
أغسطس 2015·
خطاب الرئيس
.
أرقام و حسابات
, بالورقه و القلم , هنعمل كذا بتكلفه اد كده في الوقت الفلاني و كذا التاني مش هنقدر
نعمله , مش هبيع الوهم للناس .
.
قناة السويس الجديده
+ أنفاق + مشاريع كذ و كذا + مصانع + مجتمعات سكنيه = تنمية محور قناة السويس , يعني
مكعبات بنجمعها كل كام مكعب مع بعض في شكل معين , و في الأخر لما نجمع الأشكال دي هيطلع
الشكل الكبير اللي كلنا بنحلم بيه اللي اسمه تنمية محور قناة السويس تنميه كامله ,
مضاعفة الدخل بتاع قناة السويس كذا مره , ملايين من فرص العمل .
.
الحمير المثقفين
اللي كانو بيقولو ان قناة السويس الجديده هي هديه للإمارات عشان بيقضي على مشروع تنمية
محور قناة السويس و بالتالي يصب في مصلحة دبي !! , اقعدو على جنب بقى , اقعدو في حتة
ناشفه , و شوفو لكو علبة كُله شمو فيها , أو حتى شراب قديم من بتوع البرادعي .
.
الراجل ده رئيس
مصر , رئيس يليق بعرش مصر , و في خلال سنتين تلاته هتشوفو شكل مختلف للبلد دي , محاولة
اغتيال السيسي هتكون هي الكارت الأخير عند الإرهابيين و وراهم الصهاينه و الأمريكان
وسط مباركه من شمامين الكُله , و ربنا حافظه و حاميه .
.
الساده المسئولين
في مصر , لما يكون فيه موكب للرئيس في طريق سريع و هو راكب مرسيدس 2015 ماينفعشي تمشو
وراه و انتو راكبين فيات 79 !! , يا تكونو عارفين تمشو في الموكب يا تركنو على جنب
و تحوّلو عربياتكو لعشة فراخ , عشة الفراخ تليقُ بكم .
.......................................................................................................................................
Mohamed
Hussein
16
أغسطس 2015·
هيبة الحكومه
.
في طريق المنصوره
السنبلاوين و انا جاي من 5 ساعات , لقينا الطريق مقفول , و ده طريق رئيسي بيربط مراكز
و محافظات , تخيل طريق بالشكل ده يقفله الأهالي عشان حادثه حصلت و مات فيها ناس ؟ طب
ذنب الطريق و ذنب الناس المسافرين ايه ؟ .
.
معالي مدير أمن
الدقهليه , سعادة مأمور مركز السنلاوين , أمي بتسلم عليكو , و بتقول لكو الواد ابني
( اللي هو أنا ) خد المسافه من مدينة نصر لمدخل السنبلاوين ( 200 ك ) في ساعتين , و
المسافه من مدخل السنبلاوين للبلد ( 10 ك ) في 3ساعات !! .
.
الأهالي في قرية
شبرا قباله قررو انهم يقطعو الطريق و العربيه اللي بتحاول تعدّي بيكسّروها , و بالتالي
بقينا مضطرين كلنا ندوّر على طريق تاني , و مشينا صف عربيات ( بتاع 300 عربيه ) على
ترع و مصارف في سكك ماتاخدش اكتر من عربيه واحده مفيش جنبها نص متر فاضي حتى , يعني
لو عربيه عطلت في الصف ده يقف السرب كله و احنا ماشيين في طرق مقطوعه و دنيا ضلمه كُحل
, تخيل لو عربيه فيها حد تعبان او عجوز عنده السكر أو ست حامل و على وش ولاده أو حد
مسافر و عنده معاد طياره ؟ .
.
و كل ده ليه ؟
عشان الأهالي بقت اسهل حاجه عندهم قطع الطرق الرئيسيه ( و بكره لو واحد اتخنق من مراته
هينزل يقطع صلاح سالم ) , ماهي الناس دي لو كان عندها شك ولو 1 في المليون انهم هيترمو
في السجن مكانوش عملو كده , هما عارفين ان اخرها خالص بعد ما يقطعو الطريق ساعتين تلاته
ان يجيلهم مسئول و يبوس راسهم و يطبطب عليهم و يتحايل و يدلّع عشان يفتحو الطريق ,
مسئول يطبطب و يدلع يبقى أكيد مسئول من حكومة نانسي عجرم .
.
و تسألني بقى عن
( هيبة الحكومه ) ؟ أقولك : ( بلا هيبه ) !! .
..................................................................................................................................
Mohamed
Hussein
15
أغسطس 2015·
بالصدفه البحته
, ردّت الروح في مولانا الإمام و كتب تويته عن حرمة الدم في ذكرى فض اعتصام رابعه
, و غالبا مولانا الإمام هيرجع لمقبرته تاني و يبقى يجيلنا بعد 365 يوم بالتمام و الكمال
و يكتب تويته جديده بالصدفه البحته برضه .
.
و بالصدفه البحته
كمان , احتفلت حركة 6 لا مؤاخذه ابريل بالذكرى و وصفتها مجزره في حق الإنسانيه و البشريه
المعذبه , و تطالب حركة 6 لا مؤاخذه ابريل باعتبار اشارة رابعه مش رمز للإخوان لا دي
رمز للمش عارف ايه كده .
.
انا رأيي انها
تبقى رمز ل (اللامؤاخذه ) , ال لامؤاخذه تليقُ بكمْ .
.........................................................................................................................
Mohamed
Hussein
14
أغسطس 2015·
بطل من ورق
.
توفيق عكاشه اتقبض
عليه عشان ينفذ أحكام صادره ضده , قامت حياة الدرديري ( اللي ماعرفش هي بتشتغل ايه
اساسا ) عملت من توفيق عكاشه بطل قومي فشر طلعت حرب و سيف الدين قطز و شوية كده و هتقولك
عكاشه هو اللي وحّد القطرين وأمّم قناة السويس , و لمت شوية مقاطيع حواليها و قالت
انصار الدكتور توفيق عكاشه ( هو دكتور في ايه ؟ ) معترضين و مش هيسكتو و هيزنزنو الزنازين
( أنا فاكر توفيق عكاشه اترشح في انتخابات البرلمان بعد الثوره و خد 18 صوت باين و
قال ان دي مؤامره من الماسونيه العالميه و عصابة الولاوله الحمره ) .
.
بصراحه يا ست حياة
, و حياتك يعني , أدائك FAKE أوي , و بكتيره تنفعي تشتغلي
معدّده , و بصراحه أكتر(( الجنازه حاره و الميت توفيق عكاشه )) .
....................................................................................................................................
Mohamed
Hussein
14
اغسطس 2015·
حكاية الأهطل و
الشيطان و ابليس ذات نفسه .
.
من كام سنه كده
, الشيطان ( وفد أجنبي ) راح يتفاوض مع الأهطل و مع ابليس ذات نفسه في السجن عشان يفضو
الإعتصام بتاع رابعه
.
الشيطان للأهطل
: بقولك ايه ياهطل انت , احنا هنقترح عليك فض الإعتصام و نضمن لك خروج أمن و انت تقول
لأ , نقوم احنا نطلع نقول لقادة الإنقلاب و للقنوات الفضائيه انك رفضت التفاوض .
.
الأهطل : و ليه
أقول لأ ؟ .
.
ابليس ذات نفسه
( قاعد جنب الأهطل ) : وانت مالك يا حيوان , بنقولك تقول لأ يبقى تقول لأ
الأهطل : حاضر
حاضر , قلت لأ أهو , لأ , لأ .
الشيطان لإبليس
ذات نفسه : طبعا انت فاهم و سيد العارفين و أستاذنا كلنا .
.
ابليس ذات نفسه
: طبعا يا شيطان , اومال ايه ياشوشو يا حبيببي , احنا شعبيتنا انضربت و وشنا القبيح
اتكشف ولازم يبقى عندنا قميص عثمان عشان نتاجر بيه السنين الجايه , و بالتالي نحافظ
على معبدنا الوثني من الإنهيار, المجد لألهتنا العوالي حسن البنا و سيد قطب .
.
الشيطان : قول
المجد لأمريكا و الصهيونيه .
.
ابليس ذات نفسه
: المجد لأمريكا و الصهيونيه .
.
الأهطل : و الله
, واللللللللللللله , و حياة الواد احمد ابني و البط اللي كنت باكله في القصر مانا
فاهم حاجه .
.
الشيطان و ابليس
ذات نفسه ( في نفس واحد ) : و انت ياهطل لو كنت فاهم اي حاجه في أي حاجه كنا اخترناك
و رشحناك ؟! .
.
الأهطل : إيه ده
؟ انتو بتشتموني ؟ برضه مش فاهم .
.
إبليس ذات نفسه
للشيطان : سيبك منه المتخلف ده , اطلع قول لهم فخامة الرئيس محمد مرسي الرئيس الشرعي
رفض التفاوض و الصلح و يطالب بعودته لقصر الرئاسه و محاكمة قادة الإنقلاب .
.
الأهطل : أه صح
, عايز أرجع قصر الرئاسه , عايز أكل بط , مش أنا لو رجعت رئيس تاني هاكل بط يا باشمهندس
خيرت بارك الله فيك ؟! .
.
ابليس ذات نفسه
للأهطل : يا حمار انت مش راجع , و لا هتشوف بيبان القصر تاني , وانت كده هتفضل طول
عمرك حمار , بس حمار تقي و متدين , بارك الله فيك .
......................................................................................................................
Mohamed
Hussein
14
أغسطس 2015·
لو حد خطف رجليه
لحد قناة الجزيره دلوأتي و دوّر في أدراجها هيلاقي التقرير بتاع بكره عن ذكرى فض اعتصام
رابعه العدويه , التقرير بيقول كالتالي ( هقولهولكو عشان مش تتفاجئو ) :
.
مذيع سمج ( عالهوا
) : أهلا بكم , ميدان رابعه العدويه الذي أصبح رمزا للنضال و الحريه في كوكب الأرض
و المجموعه الشمسيه و درب التبّانه , في مثل هذا اليوم قامت قوات الإنقلاب في مصر بفض
اعتصام المتظاهرين السلميين في الميدان , و كانت الأرقام و المؤشرات وقتها تشير إلى
اعتصام مايقرب من 17 مليون من مؤيدي الشرعيه في ميدان رابعه العدويه ( جنب الصينيه
على طول ) , و أن الهجوم على الإعتصام أدى إلى استشهاد ما يقرب من 19 مليون معتصم سلمي
, أغلبهم من الاطفال و النساء , جدير بالذكر أيضا أن أغلب الشهداء لقو حتفهم و هم ساجدين
يؤدون الصلاه و كانو صايمين و بيحجو بيت الله في نفس الوقت , أما الأرقام التي ذكرتها
سلطات الإنقلاب عن مقتل مايقرب من 40 ظابط و جندي في فض الإعتصام فيعلم القاصي و الداني
أنهم جميعا ماتو في حادثة موتوسيكل من تدبير جيش الإنقلاب .
.
و معنا بالأقمار
الإصطناعيه من أنقره الشهيد ابراهيم عبد الرازق الذي استشهد في فض اعتصام رابعه لوصف
بشاعة المشهد , و من ستوديوهاتنا بالدوحه نستضيف عضو ائتلاف الشرعيه محمود السيد الذي
استشهد مرتين مره في رابعه و مره في النهضه , و معنا أيضا على الهاتف من واشنطن الصحفي
جوزيف باول الصحفي بجريدة النيويورك تايمز و الذي كان شاهدا على فض الإعتصام و الذي
قام بنفسه بعدّ الجثث و ترقيمها من 1 الى 19 مليون ( وعارفهم نفر نفر ) , و معنا أيضا
على الهاتف السيده ساره بنيامين المتحدث باسم منظمة العفو الدوليه .
.
سيده ساره بدايةً
نبارك لكم على توصيتكم بعدم تجريم ممارسة الدعاره , فقد أثلج القرار صدورنا هنا في
قناة الجزيره , كما نبارك لك سيد باول على السماح بزواج المثليين في بلادكم رمز النور
و الحريه .
............................................................................................................................
ليست هناك تعليقات:
إرسال تعليق