Mohamed
Hussein
4
يونيو 2015·
الحشيش و الفحم
...الشئ لزوم الشئ
.
خبر أول (في علم
الحشيش )
نوال السعداوي
: تلت العالم من المثليين و القوانين اتغيرت عشان يتجوزو بعض !! .
.
الترجمه بقى :
يعني كل 3 من صحابك او زمايلك فيهم عيل و لامؤاخذه ( حاول تبعد عنه بسرعه و ماتروحشي
تذاكر معاه ) , و البت الشمال تتجوز بت شمال و الراجل ولا مؤاخذه يتجوز راجل تاني ولا
مؤاخذه ( و ما تسألنيش مين فيهم هيلبس قميص النوم ؟) .
.
خبر تاني ( في
علم الفحم )
محمد حسان يعاود
الظهور في رمضان لتجديد الخطاب الديني و تطويره !! .
.
الترجمه : احنا
هنطور خطابنا الديني على ايد محمد حسان و عارف انت القصه اياها اللي بيعشقها محمد حسان
بتاعة الراجل الغلبان اللي كان قاعد في الحرم بيقول يارب اقضي عني ديني ؟ و بعدين جاله
راجل لابس ابيض فابيض و راكب حصان ورمى في حجرة شنطة دولارات ؟ أهي القصه دي هتتغير
بقى عشان تجديد الخطاب الديني على ايد محمد حسان , هيحصل فيها تغيير جذري , يعني مثلا
الراجل اللي راكب الحصان بدل ما يرمي في حجر الغلبان شنطة دولارات هيرمي في حجرة مفتاح
فيلا في كومباوند ماونتين فيو و عقد عمل في الجزيره و عدة موبايل أيفون سيكس , أه و
الله سيكس , إي و ربي .
.
في رأيي الشخص
, لولا وجود محمد حسان مكانشي هيبقى فيه نوال السعداوي , يعني هما الإتنين بيمثّلو
( الشئ لزوم الشئ ) , الحشيش و الفحم .
.....................................................................................................................................
Mohamed
Hussein
4
يونيو 2015·
أنا ماتربيتش أساسا
.
شركات النت , فودافون
و تي إي داتا , اتصلت بيهم , و قال استغفر الله العظيم و خير يارب اللهم اجعله خير
إني عايز راوتر عشان ادخل نت زي مخاليق ربنا ( مانا فجرت بقى ) .
.
الموظف :
...... تحت أمر حضرتك يا فندم , طب هنقول لحضرتك عروضنا , احنا عندنا كذا و كذا و كذا
ليميتد و كذا و كذا أنليمتد , ناخد بيناتك بقى و بيانات صاحب التليفون و رقم بطاقتك
و رقم موبايلك و العنوان , محتاجين من حضرتك صورة البطاقه و صورة العقد و صورة اخر
فاتورة تليفون تكون مدفوعه , مش من حقك تلغي الخدمه قبل نهاية العرض و لازم هتدفع يعني
هتدفع ولو الكام جيجا بتوعك فاض منهم حاجه في أخر الشهر هيضيعو عليك يا معلم أما لو
خلصو منك بدري يبقى تشتري تاني يا حيوان .
.
عايزين تاريخ ميلادك
و نشوف رقم التليفون عليه اي مشكله أو احتمال يكون مسجل أداب أو مخدرات ولا حاجه ,
أه ماقولتليش نبعت لك أم الراوتر في شركة شحن ولا تيجي تاخده من ميتين أم أي فرع لنا
؟.أه استنى استنى ده محل تجاري مش سكني كده الوضع هيختلف هنعوز كمان صورة البطاقه الضريبيه
و السجل التجاري و رخصة المحل و فاتورة تليفون و هناخد العامل اللي عندك رهينه لحد
ما نتأكد .
.
الخدمه هتشتغل
عندك أول ما تكمل لنا الأوراق و تدفع الإشتراك و تمضي عالعقود و الكمبيالات بعدها تحسب
اسبوعين بحد أقصى 6 شهور , يدينا و يديك طولة العمر , حضرتك تؤمرني بحاجه تاني ؟ تحت
أمر حضرتك يافندم .
.
أنا : كده خلاص
حضرتك ؟ .
.
الموظف : لا استنى
دقيقتين بالظبط أشوف لك رقم التليفون الأرضي ده متغطي ولا لا ؟ مممممم للأسف يافندم
التليفون الأرضي بتاعك مش متغطي بشبكتنا لازم ترجع للسنترال و وزارة الإتصالات و الكابل
البحري عشان تغطيه , حضرتك تؤمرني بحاجه تاني ؟! .
................................................................................................................................
Mohamed
Hussein
4
يونيو 2015·
تعالو نتكلم عن
الصفقه.............. و الدليل قالوله !!
.
الدليل أهو : قضت
محكمة النقض فى جلستها المنعقدة الخميس، بنقض "إلغاء" كل الأحكام الصادرة
من محكمة الجنايات ببراءة الرئيس الأسبق حسنى مبارك، فى قضية قتل متظاهرى ثورة يناير
2011، فى القضية المعروفة إعلاميا بـ"محاكمة القرن". وأمرت المحكمة برئاسة
المستشار أنور محمد جبرى نائب رئيس محكمة النقض، بإعادة محاكمة مبارك من جديد محاكمة
جنائية بمعرفتها، لتصدر فى ختام تلك المحاكمة حكما نهائيا وباتا فى موضوع القضية لا
رجعة فيه ولا طعن عليه بأى صورة من صور التقاضى.. وحددت المحكمة جلسة 5 نوفمبر المقبل
لنظر موضوع القضية.
.
يعني مبارك هيرجع
يتحاكم تاني في قتل المتظاهرين , خلي بالك , مبارك ده مرمي في السجن من 4 سنين , اغلب
السنين دي كان بيحكم مصر فيها واحد عسكري ( العسكر يا سيدي ) , و أكيد فيه صفقه بين
قادة الجيش و مبارك و أكيد ان القضاء مسيس , شوفتو الصفقه حلوه ازاي ؟!!.
.
يا ترى بقى لو
مبارك خد اعدام بس ركز معايا و النبي و ماتبصش للسقف , لو مبارك خد إعدام حمدين هيكتب
تويته إن ( الإعدام مش هو الحل ) ؟ , و رئيس برلمان ألمانيا هيطلع يعترض على إعدام
مبارك ؟ ولا الراجل تخصص إعتراض على إعدام قادة الجماعات الإرهابيه الكيوت ؟!!
....................................................................................................................................
Mohamed
Hussein
3
يونيو 2015
زيارة السيسي لألمانيا
حيّدت أخر معقل و قلعه كان بيتحامى فيها الإخوان في أوروبا , كده مش باقي للخرفان بلاد
تحميهم و تلمّهم غير قطر و تركيا و قرية أبو شقوق مركز كفر صقر ( اللي فيها سوق المواشي
) !!.
.......................................................................................................................
Mohamed
Hussein
3
يونيو 2015·
أحمد مصطفى ابراهيم
, الشهير بالمستريح , نصب عالناس الغلابه في 54 مليون جنيه , المستريح اتقبض عليه و
بيتحاكم , المفاجأه بقى إنه دخل قاعة المحكمه و هو رافع المصحف !! .
.
و كل واحد صايع
و نصاب و ابن كلب أو قاتل و ارهابي في البلد دي لما يتحاكم يقوم رافع لنا المصحف في
وشنا كده .
يا راجل دانا وصلت
بتفكيري إني اتخيلت إن ابليس الرجيم ( الأب الروحي للصيع و النصابين و الإرهابيين
) لما كان بيعترض على حكم ربنا و أوامره كان رافع المصحف في إديه !! .
.
رضا الفولي عملت
فيديو كليب اسمه ( سيب إيدي ) , كانت طالعه بقميص نوم يجنن بصراحه , أو بمعنى أصح هي
نسيت تلبس قميص النوم , رضا الفولي اتقبض عليها و بتتحاكم , يا ترى هترفعي المصحف يا
حاجه في المحكمه ولا ايه نظامك ؟ هي يعني جت عليكي , و ممكن تقولي ان مصر مفهاش شغل
و الحكومه مش بتوظّف الناس و بتحارب العلماء ( و العوالم ) عشان كده اضطريتي تعملي
الكليب ده عشان تجيبي الدوا لأمك اللي عيانه ( قميص عثمان ) , ماهو عادي جدا في مصر
تبقى بتتحاكمي على قميصك اللي رافعاه تقومي انتي رافعه قميص عثمان , و احنا نحتار بقى
بين قميص رضا الفولي و قميص عثمان .
.
لو كنت قاضي ,
كنت حاكمت المتهم اللي يرفع مصحف في المحكمه مرتين , مره على جريمته و مره على المتاجره
بكتاب الله .
............................................................................................................................
Mohamed
Hussein
2
يونيو 2015·
رئيس برلمان ألمانيا
هاج و ماج و قالك مصر فيها 40 ألف معتقل في الكام شهر اللي فاتو ( مع اني ماعتقدش ان
مصر فيها سجون تكفي ل 40 ألف ) و لا أعتقد إن العدد الفعلي لتنظيم الإخوان الإرهابي
يوصل ل 40 ألف , طب معنى كده ان كل الإخوان معتلقلين ؟ أومال البهايم اللي لسه بنقابلها
في الشارع و عالفيس بوك دي جت منين ؟! .
.
و قالك كمان :
أنا رئيس برلمان منتخب و السيسي وصل للحكم بطريقه غير ديموقراطيه !! , و الله يا مولانا
و ما ليك عليا يمين هي دي أم الديموقراطيه اللي انتو علمتوهالنا , صناديق و ناس و طوابير
و قاضي و ختم و حبر و فرز و عدّ للأصوات و اللي يفوز يبقى نجح بطريقه ديموقراطيه ,
انتو اللي علمتونا كده , مش كيميا هي ولا لوغاريتمات , و لا كان لازم حمدين صباحي يجيب
47 % و السيسي 53 % عشان تقتنع ؟ هو ده مفهوم أمك عن الديموقراطيه ؟! طب حاضر , الإنتخابات
الجايه نقول لشويه من انصار السيسي ينتخبو حمدين عشان تبقى النسب متقاربه و انت تقتنع
.
.
و بالنسبه بقى
للأصوات اللي كانت بتطالب السيسي انه يلغي زيارة ألمانيا و ياخد على خاطره و كداهون
, أهو انا بحب الناس دي بجد , بالك انت و انا صغير كده كان فيه واد اسمه حسن عنده كوره
شراب و بالتالي يبقى حسن هو أصلا صاحب الشراب اللي اتعمل منه الكوره , و كان حسن ده
كل يوم ييجي يقولي تعالى نلعب كوره و انا اروح معاه , إنما لو كنت زعلان من محمود ابن
خالة حسن ماكنتش برضى اروح أصلي ببقى واخد على خاطري و كرامتي ناقحه عليا , فكنت بقول
لحسن لأ انا مش جاي , واقعد بقى عالمصطبه و الوي بوزي شبرين .
.
بس زيارة السيسي
لألمانيا دي معد لها من شهور , يعني جدول أعمال و وفد امني سافر من بدري و وفود سياسيه
و تجهيزات و مقابلات و صفقات و مشاورات و ترتيبات , أهو السيسي للأسف طلع فاهم يعني
ايه تبقى رئيس دوله بحجم مصر , يعني للأسف طلع مش بتاع مصاطب و لا كوره شراب .
.......................................................................................................................................
Mohamed
Hussein
2
يونيو 2015·
و لما وصل محمد
سلطان لأرض الأمريكان الكفره ولاد الحرام , جابوله بقى وجبات بيتزا و دوناتس و الراجل
فرح أوي يا ولداه كأن مغارة على بابا اتفتحت له , بس بيتزا و دوناتس ايه يا أوباما
يا كافر يا خسيس يا عديم الضمير , يعني مفيش دكر بط و لّا ديك شمورت للراجل يرم بيه
عضمه ؟ ده مضرب عن الطعام بقاله 465 سنه و شهرين و 3 أيام و 7 دقايق .
.
انت جيت يا سلطان
؟ طب اعمل حسابك بقى يابو السلاطين انك الأيام الجايه هتبقى أشهر من البليله و من عيون
صفيه العمري و ( مناخير ) هياتم , هتلاقي حوارات لك في الواشنطن بوست و مداخلات مع
السي إن إن و الجزيره و احتمال كبير صورتك تنزل عالدولار.
.
و لما يخلص المولد
بتاعكو , هتشتغل ( بويجي ) في شوارع شيكاغو , تمسح جزمة أسيادك , حاول تلحق لك فرشه
على ناصيه من دلوأتي قبل نشطاء السبوبه ما يخطفوها منك .
....................................................................................................................................
Mohamed
Hussein
1
يونيو 2015·
بيان للأجهزه الأمنيه
المصريه :
.
تمكنت الأجهزة
الأمنية من رصد وإحباط مخططات تنظيم الإخوان الإرهابى الدولى، بالكشف عن خلية إرهابية
تسمى "أبناء خيرت الشاطر" تستهدف جمع معلومات استخباراتية وتنفيذ عمليات
عدائية ضد أجهزة الدولة ومؤسستها وشعبها وبصفة خاصة رجال الشرطة والقوات المسلحة والقضاة
والإعلاميين وقيادات سياسية وشخصيات عامة وذلك بتكليفات من قياداتها بالخارج والداخل
لتشكيل خلية إرهابية.
.
البرادعي : لا
أملَ في وطن يستهدف خلاياه الإرهابيه .
.
حمدين صباحي :
إحباط مخططات الخليه الإرهابيه لا يجب أن ينسينا العيش و الحريه و التلاته في الميه
.
.
عصام حجي : هذا
البيان هو عار على مصر و على العلم و العلماء , مفيش حاجه اسمها خليه إرهابيه , الخليه
هي وحدة التركيب و الوظيفه في الكائنات الحيه يا متخلفين .
.
شبكة رصد : بيان
الأجهزه الأمنيه بتاعة الإنقلاب هو افتراء و تقوّل على الجماعه السلميه الربانيه .
.
حركة 6ابريل: بيان
الأجهزه الأمنيه بتاعة الإنقلاب هو افتراء و تقوّل على الجماعه السلميه الربانيه .
.......................................................................................................................................
Mohamed
Hussein
1
يونيو 2015·
إيمانا كبير أوي
, أه و الله ييجي 500 طن ( أد شحنة الفوسفات اللي وقعت في النيل ) , احنا حتى بنمشي
في الشارع و الإيمان بيدلدق مننا و احنا ماشيين , لو سمحت لو سمحت , حتة الإيمان دي
وقعت من حضرتك وانت ماشي , أه دي بتاعتي فعلا كنت شايلها في جيب القميص شكرا أخي الكريم
جزاك الله خيرا .
.
مره واحد ايمانه
كبير بتاع 9 كيلو أصدر فتوى بالجهاد المسلح ضد شعب مصر و جيشها و واحد تاني سني ايمانه
بتاع 37 كيلو راح فجّر مساجد الشيعه و هما بيصلو و واحد شيعي ايمانه 61 كيلو بقى كل
ما يقفش واحد سني يدبحه و يعمل عليه شوربة لسان عصفور و محاشي و مخاصي ( و طبعا مش
هينسى يقول باسم الله قبل الأكل ) .
.
ايمانا كبير أوي
و طويل أطول من ليالي الصيف و من شارع صلاح سالم و من لسان مرتضى منصور , يبقى طبعا
لما ييجي عيل مسيحي كافر زنديق و يكتب بوست عالفيس يسخر فيه من دينا و ايمانا طبيعي
نهجم على عيلته و نهددهم و ممكن نحرق البيت على دماغهم ( مش بقول لكو ايمانا كبير و
طويل ) , ماهو كله إلا دينا و ايمانا يا ولاد دين ال تييييييييييييييييييييييت .
.
الغريبه بقى انك
لما تسأل أي واحد من اللي ايمانه كبير و طويل ده ايه أهم سمه في الإسلام و في سيدنا
النبي يقولك السماحه و التسامح و السماح و كل الكلمات الحلوه اللي فيها حرف السين دي
!! .
.
و عمدة القريه
حكم بتهجير عيله الواد المسيحي ( من بيتهم ) حفاظا على أرواحهم عشان فيه ناس ( من اللي
ايمانها كبير ) هددتهم بالقتل و الحرق !! , طب انتو فاكرين الإعلان بتاع حزب الوفد
يا حزب الوفد ؟ اهو الإعلان ده جه في بالي , و جت لي فكرة اعلان مماثل بيقول ( هيبة
الدوله يا هيبة الدوله ).
.......................................................................................................................
Mohamed
Hussein
1
يونيو 2015·
مالناش كتالوج
.
امتحان القرأن
الكريم بتاع الأزهر يعني امتحان الدين اتسرّب و الطلبه أكيد غشو في الإمتحان ده , أه
بنغش في القرأن عادي .
مع إنك يا جدع
لو روحت للريس برايز و قلت له عايز شريط الفيديو الثقافي بتاع سلمى حايك عمره ما هيضحك
عليك و يغشك ولا يديلك شريط برشتينا بتاعة ألمانيا ..
أهو احنا كده
, مالناش كتالوج , بنغش في الدين و نؤتمن في الأفلام الثقافي , و على رأي صلاح عبد
الله ( أسامحك إزاي بعد ما نجّست لي الكباريه ؟! ) .
...................................................................................................................................
Mohamed
Hussein.
31 مايو 2015·
و كل ماتعب من
صوت العربيات و الموتوسيكلات و الموبيلات و الرسايل و الرنات و خناقات الناس و أبواب
المحلات و هي بتترزع في الفتح و القفل , و الزحمه و الفيس بوك و الإشعارات و الهري
و المفرمه و الطاحونه و الناس اللي راكبين فوق رجل بعض و الشارع اللي مابقاش شارع و
و الرصيف اللي عامل نفسه رصيف و البلكونه اللي هي مش بلكونه ولا حاجه و الهوا اللي
بندور عليه زي الإبره في كوم قش أقوم طالع بقى عالبلد , أقعد في البلكونه دي و املى
عينيا بالخضره و اعبّي الهوا في صدري زي العطشان اللي كان تايه في الصحرا و وقع على
بير مايه فجأه .
..................................................................................................................................
Mohamed
Hussein
31
يونيو 2015·
درجات الترقي في
سلم التقوى و الورع الإخوانجي
.
القيادي : شوف
يابني , إنت عشان تبقى شاب تقى و لك وضعك في التنظيم الربّاني بتاعنا لازم تعمل 3 حاجات
الشاب : ايه هما
يا مولانا بارك الله فيك ؟.
القيادي : انت
تلبس تي شيرت عليه شعار ( القدس في القلب ) و تطلع عالمنبر تلعن جدود أبو الأمريكان
أحفاد القرده و الخنازير و تنزل تحرق بوكس شرطه مصري .
الشاب : السمع
و الطاعه يا مولانا .
.
القيادي : ولو
عايز تبقى تقي و ورع لازم تعمل 3 حاجات برضه
الشاب : ايه هما
يا مولانا بارك الله فيك ؟.
القيادي : انت
تلبس تي شيرت عليه شعار ( القدس في القلب ) و تطلع عالمنبر تلعن جدود ابو الأمريكان
أحفاد القرده و الخنازير و تنزل تقتل عسكري مصري يكون واقف في الخدمه .
الشاب : السمع
و الطاعه يا مولانا .
.
القيادي : أما
بقى لو عايز توصل لأعلى مراتب التقوى و الورع فانت مطلوب منك 3 حاجات .
الشاب : ايه هما
يا مولانا بارك الله فيك ؟ .
القيادي : انت
تلبس تي شيرت عليه شعار ( القدس في القلب ) و تحرق مصر أو تحاول يعني على أد ما تقدر
, و ماتطلعش المنبر بقى ولا تلعن حد بالعكس انت تاخد الجنسيه الأمريكاني و لو اتقفشت
و اتحبست تطلع على أمريكا و أول ما توصل هناك تسجد سجدة شكر للمولى إنك وصلت بسلامة
الله إلى أرض واشنطن المقدسه و إلى احضان إخواتنا الأمريكان بارك الله فيهم
.
الشاب : مش الأمريكان
دول يا مولانا هما أحفاد القرده و الخنازير ؟!.
القيادي : اخرس
يا حيوان قطع لسانك و لسان اللي يقول كده .
.........................................................................................................................
Mohamed
Hussein
29
يونيو 2015·
هنحب و نحارب
.
الإخوان بيعلنو
رسميا عن إرهاب مسلح و بيدعو لتكوين حرس ثوري !!.
.
و انا في البلد
, قاعد عالحصيره في بلكونة البيت , أمي نايمه جنبي و بتحكي لي و انا شايل اللاب على
رجلي و جنب مني فنجان القهوه , نسمة الهوا ترد الروح , و أخويا قدام البيت بيلاعب بناتي
و ولاده ( نتشة الطاقيه ) .
.
في بطني بطيخه
صيفي و ليا مزاج أكتب عن الحب , خلي الإخوان يعملو حرس ثوري أو يعملو حواجبهم , البلد
دي لها رب في السما حارسها و جيش في الأرض حاميها .
.................................................................................................................................
ليست هناك تعليقات:
إرسال تعليق