Mohamed
Hussein
18
يونيو 2015·
صديقه قديمه من
بتوع الإنكيلاب و الشباب النكي , من النوع اللي بيصحى من النوم يشتم العسكر عشان مالقاش
شاحن التابليت بتاعه و لما يلاقي الشاحن يقول : لقيت الشاحن المجد للثوره .
.
المهم أخر ما زهقت
منها عملت لها بلوك من فتره , و لما سألت عن اخر ابداعاتها امبارح لقيتها ما شاء الله
تبارك الله , كاتبه ( النظام يترنح و الدليل افتتاح محطة مترو السادات ) !! ههههههههههههه
أه و عهد الله زي ما بقول لكو كده , يعني النظام كان بيترنح لما قفل محطة السادات و
بقى بيترنح برضه لما فتحها ( أقصد محطة المترو ) .
.
أهو صديقك اللي
زي كده ما تتعبش قلبك معاه , ولما يقولك انا حريص على مصلحة البلد و مش قصدي اخربها
قوم رازعه بالقلم على قفاه و قول له و انا كنت بعدل لك ياقة القميص مش قصدي ارزعك على
قفاك .
.................................................................................................................................
Mohamed
Hussein
18
يونيو 2015·
فرحةٌ عندَ فطره
.
.
بط و محشي و مج
نسكافيه و ازازة مايه , دي تبقى مغارة على بابا يا معلم , و كفى بها نعمه .
................................................................................................................................
Mohamed
Hussein
18
يونيو 2015·
كان أخرنا في رمضان
واحنا صغيرين نلعب سيجه جنب الجامع و نصلي العصر و نقرا شوية قرأن و نملى القلل عشان
الناس اللي هتصلي المغرب تفطر و نسقعها من طرنبة المايه و نرصها في شبابيك الجامع و
ممكن نلعب شويه كوره في الجرن لو كان باقي فينا نفس , و بالليل وحوي يا وحوي و كوره
بمزاج و المسحراتي بطبلته و فوازير فطوطه و نيلي و كان اصعب منظر اغراء ممكن نشوفه
هو منظر نيلي في الفوازير أو منظر سمير غانم !! .
.
دلوأتي بقى قابل
و قعدّ معازيمك يا معلم , 70 تمثيليه و الرقاصه بتتحط من قبل كتابة السيناريو , و عشان
المخرج كريم أوي فلازم الرقص يكون بقميص النوم , و تقريبا فريق عمل كل مسلسل حالف لا
يفوز هو بأجر إفطار الصائمين , بس بيستعجلو و ياخدو الأجر ده من الضهريه , يعني بيفطرونا
بدري بدري .
.............................................................................................................................
Mohamed
Hussein
17
يونيو 2015·
السيسي لمستشار
ديفيد كاميرون : مصر حمت العالم من الفاشيه الدينيه .
.
و الله السيسي
ده لعيب حريف , فشر محمد صلاح و أيمن حفني , هو عارف ان ديفيد كاميرون واحد من كلاب
العالم اللي بيرعو الفاشيه الدينيه و الإرهابيين و يعلفوهم , بس قدام شعوبهم عاملين
نفسهم ضدها و مايقدروش يجاهرو بحكاية العلف دي , فقال يلاعبهم بالطريقه اللي بتوجع
.
.
احنا بنحميكو من
الفاشيه الدينيه يا كاميرون , مش انت برضه ضد الفاشيه الدينيه يا مولانا ؟! .
............................................................................................................................
Mohamed
Hussein
17
يونيو 2015·
بعد 11 ساعه من
دلوأتي هيتكرر نفس المشهد المأسوي بتاعي بتاع كل سنه , هبقى قاعد كده و قدامي علبة
زبادي مقفوله عشان أكلها قبل الفجر و علبة سجاير فيها بتاع 11 سجاره و ازازة مايه كبيره
مليانه .
باقي عالفجر نص
ساعه , و نبدأ المعركه بقى , بؤ مايه و نفس من السجاره و بؤ مايه و نفسين و ابص لعلبة
الزبادي نظره سريعه وبعدين بؤ مايه و نفس و هكذا بؤ ورا بؤ و سجاره ورا سجاره ( ملضومين
في بعض ) و ابص لعلبة الزبادي برضه , و قبل الفجر بدقيقه هكون بولع أخر سجاره في العلبه
و باخد أخر بؤ مايه من الإزازه ......... باختصار هتحس انك قاعد قدام عربية بطاطا
.
.
و بعد ما الفجر
يأدن بفضل في نفس قاعدتي دي بتاع تلت ساعه كمان مش قادر اتحرك , ببقى فيهم شبه الراجل
اللي في مسرحية الواد سيد الشغال اللي كان عادل امام بيجيب له زيت و عدس من المطبخ
( زينهم السلحدار ) , وبعدين أقوم عشان اصلي الفجر و طبعا مش هنسي أرجّع علبة الزبادي
للتلاجه مقفوله و زي الفل .
.............................................................................................................................
Mohamed
Hussein
17
يونيو 2015·
أمريكا و الإخوان
............... متخصصون في البلطجه شرعيه ( اللهم بلغنا شهر رمضان و بلغنا نهاية أمريكا
و الإخوان في يوم واحد قادر يا كريم ) .
.
- لو حضرتك هتنكر
وجود الشمس يبقى تقدر تنكر الحقيقه دي
الحقيقه بتقول
باختصار إن سياسة الإخوان طول تاريخها هي نفس السياسه الأمريكيه , سياسه واحده اسمها
البلطجه الشرعيه تحت مظلة اللامؤاخذه القانون أو الدين .
.
الإخوان عملو جمعيات
شرعيه و دور أيتام , و بقو يمارسو ارهابهم و خيانتهم و يتاجرو في السلاح و العمله و
ينهبو فلوس الناس و لما تسألهم يقولك : داحنا بنصلي أهو , دي دار أيتام يا بيه , دي
جمعيه شرعيه و الله , يعني يغسلو فيها أموالهم و يغسلو إيديهم من دم الغلابه .
.
و أمريكا سيطرت
على مجلس الأمن و الأمم المتحده ومراكز السلام و محكمة العدل الدوليه و محكمة الجنايات
الدوليه و دوليه ذات نفسها بقت نايمه في سرير أمريكا ( يعني برضه دور أيتام و جوامع
و جمعيات شرعيه ) , تبلطج أمريكا في كل مكان في العالم و تدبح أطفال و تعمل مجازر و
تروح مجلس الأمن تدين محاربة الإرهاب في مصر !! .و تقول حقوق الإنسان و حقوق العصافير
( بلطجه شرعيه ) .
.
من كام يوم البشير
اتحبس في جنوب أفريقيا , و اتمنع من مغادرة البلاد ( بموجب قرار اعتقال من محكمه دوليه
) و بعد جلسه مع السفير الأمريكي عمر البشير ركب الطياره و رجع بلده ( رجع لفوطته و
بشكيره ) , طبعا في الفتره الجايه انتظرو التمن اللي هيدفعه البشير و اللي تم الإتفاق
عليه مع السفير الأمريكي , غالبا رقصة ستربتيز جديده و يتتازل فيها البشير عن جزء جديد
من السودان و بدل ما كانت السودان اتنين هتبقى تلاته و جايز تسعه ( دزعه على رأي السودانيين
) .
.
هتقولي يعني محكمة
الجنايات الدوليه دي تبقى إيه بالنسبه لأمريكا ؟ أقولك دي الجمعيه الشرعيه بتاعة الإخوان
.............. عشان البلطجه تبقى قانوني و حلال !! .
.
و النبي يا شيخ
ماتبقاش تاخد على صدرك بقى و تتشدق بالمنظمات الدوليه دي و المحاكم الدوليه و تقول
لاهاي و القاضي الدولي قال و قرار من مجلس ماعرفشي ايه و تحسسني اننا نايمين في حضن
أفلاطون في المدينه الفاضله , باختصار ماتبقاش حمار زي البرادعي , هذا العالم أوسخ
بكثير مما تتخيل .
............................................................................................................................
Mohamed
Hussein
16
يونيو 2015·
بان كي مون يعرب
عن قلقه العميق بعد الحكم على مرسي !! ...... الراجل ده وظيفته فعلا إنه يشعر بالقلق
, و عميق دي يعني بتاع 3 متر كده .
و أمريكا بتشعر
بخيبة ( أمل ) من صدور الحكم على مرسي .
.
أهو القلق بتاع
بان كي مون و أمل بتاعة امريكا دي هما اكبر دليل إننا ماشيين صح .
.
إنما يعني ولا
مؤاخذه يا مستر بريزيدنت أوباما إنت و مستر قلقان worried man بان كي مون , ولا مؤاخذه يعني ولو فيها قلة ذوق
, suppose يعني إفرض مثلا إن ال citizen الأمريكي جاك ابن أم جاك و معاه العصابه بتاعته كانو
محبوسين في سجن واشنطن العمومي و حصل في أمريكا شوية هرج و مرج و قالو انها revolution , و قوم ايه ييجي ناس تبعهم من المكسيك و يدخلو
أمريكا ( من الأنفاق ) و معاهم سلاح و يقتحمو السجن عشان يخرجو ال citizen المسجون اللي اسمه جاك ابن ام جاك ده , وأثناء عملية
الإقتحام و هروب جاك و عصابته ينضرب نار بقى و يموت soldiers يا مولانا أوباما , و قوم جاك يلاقي موبايل ثريا
صغير كده يعني small ولا مؤاخذه و يتصل بيه بقناة
روسيا اليوم اللي عايزه أمريكا تولع بجاز , فماذا أنتم فاعلون في بلدكم أمريكا بلد
الحريات و الهامبورجر ؟ يعني what will you do
يابن المره يعني يا son of the woman ?
..............................................................................................................................
Mohamed
Hussein
16
يونيو 2015·
للأسف مابعرفشي
أشمت في المرض ولا في الموت , عشان كده كان عندي ألف رد ساخر على بوست ندى سلامه الأخير(
اللي انتحرت ومانتحرتش) و منعني احساسي انها مريضه نفسيا بالتأكيد , اللي يحاول ينتحر
كذا مره ده محتاج علاج نفسي مكثف , و حتى لو كانت غاويه الشهره بطريقه رخيصه اوي كده
فده برضه مرض نفسي .
.
و عندي ألف تعليق
مش قادر اكتبهم على اعدام مرسي و الشاطر و بديع , بتمنى بس اشوفهم على حبل المشنقه
من باب الثأر لوطن بيحرقوه و لدم العساكر و لحيطان البيت اللي كانو بيهدو فيها , اتمنى
كمان سرعة التنفيذ عشان العقوبه تبقى رادعه لغيرهم من كلاب السكك , يتعدمو و يغورو
في داهيه وحق البلد يرجع من غير شماته , اللهم لا شماته .
............................................................................................................................
Mohamed
Hussein
16
يونيو 2015·
إشرب شاي بالنعناع
.
ماتاخدشي على صدرك
, القاضي حكم على مرسي و بديع بالمؤبد و الشاطر بالإعدام , و لا كأني سمعت حاجه , سكة
التقاضي في مصر أطول من صلاح سالم و احنا لسه يادوب عند كوبري الفنجري و فتح الله
, لما نشوف الحكم بيتنفذ نبقى نفرح , تشرب شاي بالنعناع ؟!.
.
الأمن خطف هدير
من بيتها و ندى انتحرت يا ضنايا , فلذات أكبادنا و أمل مصر في المستقبل , لا مش ممكن
ابدا , يا جدع ماتعيطش بقى و لا تتشحتف ولا تعمل هاشتاجات , اصبر شويه الدنيا ماطارتش
, اتقل تاخد حاجه حلوه , تشرب شاي بالنعناع ؟!.
....................................................................................................................................
Mohamed
Hussein
15
يونيو 2015·
دي مصر اللي مالهاش
كتالوج
.
قلت أعلّق زينه
رمضان قدام الصيدليه ( حاجه تفاريح يعني ) , من امبارح و انا بحاول و فشلت , عندي الفانوس
و عندي فرع الكهربا اللي فيه لمبات صغيره , قوم النهارده الصبح لقيت مينا و بولا (
صحاب محل الكاوتش اللي جنبي ) , قالولي فين الفانوس ماعلقتوش ليه ؟ قلت لهم عايز كهربائي
عشان يوصّل له كهربا من أي سلك و مش عارف أعلقه فين , قامو جابو سلم و خدو السلم اللي
عندي و وقفو عليهم قصاد بعض و علقو لي الفانوس و فرع اللمبات ده و وصلو لها كهربا ماعرفشي
ازاي ,
.
.... كل سنه و
انتو طيبين يا مصريين .
.....................................................................................................................................
Mohamed
Hussein
15
يونيو 2015·
عايزه تبقى مشهوره
أوي في مصر ؟ بسيطه خالص , قدامك 3 حلول في منتهى السرعه
.
1- تصبغي شعرك
درجة من درجات الأشقر و تفرديه و تتصوري صورة سيكسي ببنطلون ستريتش و تقولي على نفسك
عالمة فلك و متخصصه في علم الروحانيات و إن ده علم حقيقي مش أي كلام , و تنزلي اعلاناتك
في التلفزيون , أهم حاجه ماتنسيش البنطلون الستريتش , أصل العلاقه وثيقه جدا بين علم
الروحانيات و علم الستريتشات .
.
2- تعملي مداخله
في التلفزيون أو تدخلي عالفيس و تكتبي ان وفد من الشرطه و أمن الدوله و المخابرات الحربيه
و حلف شمال الأطلنطي كسرو عليكو باب الشقه امبارح بالليل و خدوكي من عالسرير و حبسوكي
و اغتصبوكي و انك بقيتي حامل و خلفتي 9 عيال سفاح من امبارح لحد دلوأتي , و بعدين لما
تتشهري تطلعي و تقولي سوري يا جماعه دانا كنت بحلم تقرييا أو مخدتش بالي .
.
3- تكتبي بوستين
تلاته عن الإنتحار و العيشه السوده و الحياه الوسخه و بعدين اختك تنشر خبر انك انتحرتي
و اتدفنتي و شبعتي موت و الملايكه حاسبتك خلاص و بعدين لما اسمك يتردد بقى و يتحفظ
تطلعي انتي و تقولي : بخ أنا عايشه .
...................................................................................................................................
Mohamed
Hussein
15
يونيو 2015·
عارف انت القرموط
وهو لسه طالع من الترعه كده أو المصرف , و بعدين تركنه في صفيحة سمنه فاضيه كبيره لمدة
بتاع 9 ساعات ( لحد ما تخلص صيد يعني ) , بعدين تجيب القرموط ده و هو مفرهد تماما و
تحطه قدامك كده و تناقشه في البعد الفلسفي العميق للنظرية النسبيه وعلاقتها بالموشحات
الأندلسيه و تويتات البرادعي و علاقة ريري سيلان بحرية الإعلام اللي عند قناة الجزيره
؟!!
.
أهو انا ببقى زي
القرموط ده في أول كام يوم في رمضان ( لا سجاره ولا مج نسكافيه ) , عندي عين مقفوله
و عين مفتوح بزاوية 30 درجه عكس اتجاه عقارب الساعه , و لو نزلت الصيدليه بالنهار و
جيت تقولي عايز بنادول هقف قدامك و ابلّم بتاع ربع ساعه و اقولك يعني ايه بنادول ؟
حضرتك جاي تستظرف صح ؟ مفيش دوا اسمه بنادول يا محترم , بتجيبو الأسماء الغريبه دي
منين ؟!
.
#اللهم_بلغنا_شهر_شوال
.
.............................................................................................................................
Mohamed
Hussein
15
يونيو 2015·
احنا شعب و هما
عصابه .......... رُفعت الأقلام و جفت الصحف .
.
لما كان مرسي البهلول
بيحكم مصر كان فيه ازمة كهربا كبيره , طبعا حكاية قطع الكهربا لساعات طويله يوميا بتبقى
مسمار في نعش أي رئيس دوله , طب احنا اياميها كنا بنكره مرسي كراهيتنا للصهاينه و جايز
أشد , لكن حد من كارهي مرسي فكر مثلا إنه يروح يفجّر أبراج الكهربا عشان يعك الدنيا
أكتر على دماغ البهلول و المسمار يبقى مسمارين ؟! لا طبعا محصلش , عشان عارفين ان دي
ممتلكاتنا العامه يعني بتاعة الشعب , والتفجير و الإرهاب مش في قاموسنا ولا نسمع عنه
.
.
لما السيسي بقى
رئيس مصر و بدأ يحل جزء كبير من مشكلة الكهربا اللي أوشكت تماما على الإنتهاء هتلاقي
صاحبك الإرهابي الكيوت مالقاش حل و مالقاش مسمار فقرر انه يخترع لنفسه مسمار و يفجر
أبراج الكهربا لعل و عسى .
.
هي دي الحكايه
باختصار , حكاية شعب ضد عصابه .
.
و مفيش أوسخ من
الإرهابي اللي بيفجر غير الكولجي اللي بيبرر و يقولك اصل انا واقف عالحياد !! , و ليه
واقف بس ؟ يعني ماتعبتش من الوقفه ؟ ما تحاول تقعد طيب ؟ عالحياد أقصد .
.....................................................................................................................................
Mohamed
Hussein
15
يونيو 2015·
صباح الخير يا
ريس ...كل سنه و انت طيب و كل حبايبك بخير و سعاده .
.
- فاكر ياريس عبد
الفتاح الشمره و اللوزه و القنايه و الروّال و الخط و التبديل و القطوع و البُرج و
الكيس الكبير و من قبلهم المحرات و الفاس و الدوده و اللُطع و معاون الجمعيه الزراعيه
و الفرقه و الخولي و العيال اللي بتفتش ؟ّ!. طب فاكر رغيف العيش و حتة الجبنه القديمه
و الخياره و أولّة المايه و المدّه و حزام ابو اسماعيل ؟! .
فاكر ياريس لما
كان واحد بيحب يجوّز بنته يقول لها استني لما نجمع المحصول , واحد عايز يبني بيت أو
يشتري حتة ارض أو حتتين بهايم يقول لما نجمع المحصول , فاكر الكرنفال و الأرض مكسيه
باللون الأبيض زي السجاده و راجل كبير طالع في كيس القطن و ولد صغير بيعبّي الأوفّه
و يناوله و مشغلين الكاسيت أبو روحين على المداحين , سعد الشاعر و عبد المعبود ؟!.
.
فاكر الموسم ده
و الناس كلها مشغوله و فرحانه أوي و كل واحد بيحسب هيجيب كام قنطار , ده حتى الناس
العتاوله كانو بيعرفو يحسبو من أول السجاده اللي باللون الأبيض و يقول السجاده دي هتعمل
أد كده .
.
باختصار باختصار
, فاكر ياريس القطن المصري !! يااااااااااه القطن المصري .
كان واحد من أهم
3 صادرات لمصر , و واحد من أهم 3 مصادر للعمله الصعبه , ده بالنسبه للحكومه , بالنسبه
للفلاح ده كان كارنفال خاص , او تقدر تقول الإيد الطيبه اللي بتشيل السكينه من على
رقبة الفلاح و تقول له اعمل يالله اللي بتحلم بيه .
.
ياريس عبد الفتاح
مشروعك القومي هو القضاء على البيروقراطيه و الفقر , بس بالنسبالي و بصفه شخصيه لو
قدرت ترجّع لنا الكارنفال ده يبقى هنتخبك لمدة 70 سنه جايين و ربنا يطول في عمرك .
.
القطن المصري كان
سلعه استراتيجيه و مش هبالغ لو قلت ان كان ليها علاقه بالأمن القومي , حاجه بتتميز
بيها مصر عن كل بلاد العالم , تقدر تعمل جنبها مصانع و تشغل ملايين العمال, عشان كده
ماعنديش أدنى شك إن تدمير زراعة القطن كان عمل صهيوني مخابراتي بالتعاون مع ولاد الكلب
مبارك و يوسف والي .
.
و زي ما تدمير
الكرنفال بتاعنا كان عمل صهيوني متخطط له سنين يتهيألي ياريس عشان نرجع الزراعه دي
لنا هنحتاج نفس الطريقه , اتصرف بقى , و اعمل اللي شايفه صح , بذرة القطن بتاعتنا لازم
ترجع و الأرض لازم تتمهد من جديد و اهو جونا هو جونا اللي مناسب جدا لزراعة القطن
, هات علماء الزراعه و الأبحاث و اعمل فريق و قول لهم نرجع القطن ازاي , و هات يوسف
والي لو كان لسه عايش و قول له عملت ايه يابن الكلب عشان تخربها ؟!.
..............................................................................................................................
Mohamed
Hussein
14
يونيو 2015·
رمضان اللي جاي
يجري ده هيبقى أول رمضان أقضيه كامل في مصر من 14 سنه تقريبا , قبل كده كانت رمضاناتي
كلها في السعوديه , و في السعوديه مفيش أي معالم لأي شهر ولا مظاهر احتفال , يعني رمضان
زيه زي ربيع الأول زي اكتوبر زي بؤنه , و طبعا كل حاجه بتتاخد على انها بدعه و حرام
و حتى العيد كان
عباره عن اننا نروح نصلي العيد الصبح و نرجع ننام و سكتم بكتم .
.
عندك فوانيس متعلقه
في البلكونات و في إيد العيال الصغيرين وعندك زينه و افران بتعمل كنافه في الشارع و
راديوهات مشغله اغاني رمضان و قبل الفطار حديث الشعراوي و قرأن بصوت الشيخ محمد رفعت
و بعدين راجل يقول مدفع الإفطار اضرب يبقى عندك رمضان ...ماعندكيشي الحاجات دي يبقى
انسى رمضان خالص و اسمح لي أقولك كل سنه وانت طيب بمناسبة عروض كارفورو هايبر باندا
و تخفيضات عبد اللطيف جميل عالعربيات التويوتا .
......................................................................................................................................
Mohamed
Hussein
14
يونيو 2015·
عن الداخليه و
اليوم السابع
.
الداخليه قدمت
بلاغ في خالد صلاح و جريدة اليوم السابع , و خالد صلاح راح النيابه , خد عندك بقى
75 مقال و خبر و تحليل في اليوم السابع , كلام كبير أوي و مجعلص عن الحريات و حرية
الرأي و حرية التعبير و حرية مول , و كله كوم بقى وحكاية الداخليه تطارد صاحبة الجلاله
دي كوم تاني .
.
هو انا صحيح مابحبش
الداخليه لله في لله كده , إنما اليوم السابع يتقال جنبها ( صاحبة الجلاله !! ) , اليوم
السابع تبقى في الوصف صاحبة الجلاله ؟ يتهيألي الوصف الأدق يكون كده ( اليوم السابع
صديقة الطلبه ) !! .
...................................................................................................................................
Mohamed
Hussein
13
يونيو 2015·
لمار رسمت الرسمه
دي وقالت يابابا دي صورتك انت و ماما .... طبعا واضح جدا انا اللي عاليمين الاقرع الحافي
.......... في بيتنا فاروق حسني .
................................................................................................................................
Mohamed
Hussein
13
يونيو 2015·
محكمة النقض تقضي
بإعادة محاكمة عادل حباره و متهمي مذبحة رفح الثانيه !!.
.
اكتر حاجه مستفزه
في الخبر و جايز في حيثيات الحكم هي كلمة مذبحه !! , يعني مذبحه و اعتراف و هنحاكمك
في سنتين قول تسعه , و نديك اعدام و نرجع نقبل النقض , و بعدين تاخد حكم مخفف شويه
تقوم النيابه تطعن و نقبل النقض برضه و بعدين نرزعك 15 سنه بالكتير ( لو مش مرضى قول
و نعيد من تاني ) و اهو نفضل في الليله دي كام سنه حلوين و انت واكل شارب نايم على
قفا الحكومه يعني قفا الشعب , هو يعني انت كنت عملت ايه ؟ دي كل الحكايه مذبحه مش اكتر
, كام قتيل و كان قضية تخابر و شوية ارهاب حلوين و اعتراف يعني أعلى ما في خيلكو اركبوه
, إنما لأ , انت حد جميل , عيش لك بقى شويه معانا , تحب نجيب لك صوفيا لورين تبات معاك
في الزنزانه ؟ .
.
في كل دول العالم
بيبقى نظام التقاضي ده نظام رادع للمجرم و مانع للجريمه , يعني الغرض مش بس معاقبة
المتهم و لكن ردع الغير و منعهم من ارتكاب الجريمه , إلا في مصر , نظام التقاضي بتاعنا
نظام مشجّع على الجريمه و معرفشي عشماوي اللي موجود حاليا بقى كيوت أوي كده ليه , نادرا
ما بنسمع عن حكم اعدام بيتنفذ , بس يوميا بنسمع عن جنود بيتقتلو .
.
و للساده القضاه
الأفاضل بتوع مصر , انتو مرتاحين كده ؟ ضميركو مستريح يعني ؟ راضيين ان محاكمة قاتل
ارهابي تقعد سنين ؟ عارفين ان ده بيشجع غيره على القتل ؟ مستمتعين بحكاية الورق و الختم
و الرول و التأجيل و توب القوانين المرقع ده ؟ هتعملو ثوره على نفسكو امتى ؟ طب حاسين
ان فيه اي فرق بينكو و بين موظفين الأرشيف بتوع مرور السلام ؟! .
.
قالولي المستشار
احمد الزند هو رابسو اللي هينضف الوزاره , اسمه احمد بيه الزند يا حيوان , وانت ماتعرفشي
مين هو احمد بيه الزند ؟ بكره هتشوف احمد بيه الزند , ده عدو الإرهاب الأول , ده وقف
ضد الإخوان وقفه ولا وقفه العيد الكبير , ده كان باقي له يومين ويجيب للإرهابيين اسهال
مزمن و جفاف , ولقيت الفيس بوك كله بيغنّي , الزند الزند الزند الزند , الزند ابو شامه
على جبينه .
.
و انا قلت لهم
أه صح ( زند و الدكتور نعمان ) .
.......................................................................................................................................
Mohamed
Hussein
13
يونيو 2015·
عايزه فانوس يا
ابراهيم
.....................................................................................................................................
ليست هناك تعليقات:
إرسال تعليق