Mohamed
Hussein
14
مايو 2015·
لما أكون فاتح
صيدليه في عماره و فجأه ألاقي موتوسيكل ديلفري بتاع صيدليه تانيه جايب كيس أدويه أد
كده لشقه في نفس العماره اللي انا فاتح فيها !!.
تبان على وشي بقى
كل علامات الغضب و ارفع حواجبي لفوق زي الأستاذ محمود مرسي في فيلم فجر الإسلام و أقول
للإتنين عُمّال اللي عندي : حتى داري دخلتها الفتنه ؟!.
.......................................................................................................................................
Mohamed
Hussein
14
مايو 2015·
حكاية ضبش و جيسيكا
.
الراجل اللي ساكن
في الدور التالت فوق الصيدليه عنده 4 كلاب أنواع مختلفه أصغرهم كلبه اسمها ( جيسيكا
) و بيكلمها بالإنجليزي ( جيسيكا نو , جيسيكا سيت ) , و البواب اللي بعد عمارتين عنده
كلب دكر حلو كده مسميه ( ضبش ) أه و الله , و طبعا بيكلمه بالعاميه المصريه اللي من
الشمخ الجواني .
.
جيسيكا بتاكل أكل
كلاب مستورد أكيد و ضبش بيطلع طول النهار يلم رزقه من الشوارع , يلاقي جلده يلاقي عضمه
هو و رزقه بقى , و يرجع أخر اليوم يستلم ورديته في حراسة العماره .
.
يا ترى ضبش الكلب
الدكر العصامي اللي بيعتمد على نفسه ممكن يتقدم لجيسكا الكلبه بنت الزوات اللي تعليمها
أجنبي ؟ طب ممكن يحبها ولا المجتمع هيرفض ؟ و يا ترى السفير البريطاني في القاهره لو
سمع بحكاية ضبش و جيسيكا هيتعاطف مع ضبش و يقوله تعالى احرس لنا السفاره ولا هيفتح
مكتبه عالبحري ل جيسيكا و يديها جواز سفر بريطاني دبلوماسي ( زيها زي كل كلاب بريطانيا
الدبلوماسيين ؟ ) .
.................................................................................................................................
Mohamed
Hussein
14
مايو 2015·
مصنع مكرونه من
بتوع الجيش المصري أنتج أول عربيه مدرعه مصريه بمواصفات عالميه !!.
.
يعني هما كولجية
مصر اللي ماعجبهمشي الطياره الفرنسيه رافال و طلّعو فيها القطط الفطسانه هتعجبهم المدرعه
المصريه دي ؟ طبعا لأ .
.
و دلوأتي الهري
يشتغل , استنو يا كولجيه , خلو الطلعه دي عليا أنا , بقى العربيه المدرعه المصريه دي
مش حلوه , أه مش حلوه و فيها مشاكل لرب السما , الدركسيون بتاعها مش باور و الفتيس
بيقفش و التكييف مش أد كده و مفهاش فوانيس شابوره ولا فيها مكان في التابلوه نحط فيه
الدبدوب و الفوّاحه .
.
و عندي هنا تقرير
لمجلة ألمانيه اسمها ( هشتنكي شبيجل ماتهشتكتش ) بتقول ان المدرعه المصريه دي هي كارثه
بيئيه و الشكمان بتاعها بايظ , و فيه كاتب موزمبيقي خبير في المعدات العسكريه و المنجانيق
كاتب عن عيوب المدرعه المصريه , و اللي مش مصدقني يعمل سيرش عن إسم الكاتب و المحلل
العسكري المومبيقي ( موجابي عوضين المفش ) .
......................................................................................................................................
Mohamed
Hussein
14
مايو 2015·
تصريح السفير البريطاني
بإنه بيرحب بأبناء عاملي النظافه للعمل في السفاره البريطانيه في القاهره بيفكرني بتصريح
أوباما لما قال : سوف ندرّس الثوره المصريه لأبنائنا في المدارس !!.
.
أمريكا و بريطانيا
لسه لحد دلوأتي بيتابعو الرأي العام المصري و يستنو أي شوية مايه عكره عشان يصطادو
فيها , عايزين جنازه و يشبعو فيها لطم زيهم زي الكولجيه و البرادعي .
.
طب سفير بريطانيا
مارحبش ليه بتحويل ياسمين النرش للجنايات ؟ أو اقترح إنه ياخد ياسمين تشتغل معاهم في
السفاره , و اهي بالمره تطر** عليهم .
......................................................................................................................................
Mohamed
Hussein
13
مايو 2015·
بعتذر عن البوست
اللي فات .... البنت قفلت صفحتها واكيد اتحرجت جدا بسببي ...مكانش قصدي والله ..هي
ممكن تكون غلطت لما سرقت بوستاتي ...بس انا غلطت غلط اكبر لما احرجتها بالشكل ده من
غير مانبهها الاول .
.
انا مش كده با
جدعان .. لو حد يعرف البنت يبلغها اعتذاري ياريت .
.......................................................................................................................................
Mohamed
Hussein
13
مايو 2015·
حدوته من بلدنا
.
في بلدنا راجل
طيب , الراجل ده جه في يوم و جمّع ولاده و أقال لهم تعالو هنزرع شجره , الولاد طلعو
معاه و كلهم حماس ما عدا ولدين منهم .
الراجل بدأ مع
ولاده المتحمسين يعملو حفره عشان الشجره و يزرعوها و يسقوها بشوية مايه رغم ان الجو
كله زعابيب و تراب , و الولدين إياهم قعدو بعيد , واحد فيهم ولّع سجارة حشيش و خد منها
نفس عميق من بتاع المثقفين و قال للتاني : لعلمك بقى الشجره دي مش هتكبر و لا هتطرح
حاجه في الأخر عشان مزروعه مايله ب 7 درجات عكس اتجاه عقارب الساعه anticlockwise و التاني رد عليه و قال له : لأ الشجره دي مش هتكبر
و لا هتطرح حاجه عشان ابويا الكافر مقالشي دعاء زراعة الشجر قبل ما يزرعها .
.
و مر كام يوم و
الوضع على ماهو , الراجل و ولاده بيرعو الشجره و يهتمو بيها و يحموها من الغربان و
المعيز و كلاب السكك و الولدين اياهم بنفس قاعدتهم .
.
و في يوم الشجره
دي بدأت عليها بشاير الخير , خلاص هتطلّع ثمره أهي , الواد الأولاني ولع سجارة حشيش
برضه و خد نفس النفس العميق بتاع المثقفين و قال للتاني : النوّار بتاع الشجره دي هيجيب
ثمره مريضه و متهرطقه و مش هتكفي احتياجات البلد و للأسف الكلام عن تنميه اقتصاديه
هو ( محض تخرصات ) , للأسف مفيش فايده , التاني رد عليه و قال له : الثمره دي حتى لو
طلعت كويسه و معقوله عمر ما ربنا هيبارك فيها عشان برضه ابويا الكافر مقالشي دعاء زراعة
الشجر , و اللي هياكلها هيبقى جسمه بينبت من حرام و النار أولى به .
.
الولاد المتحمسين
سامعين الحوار بتاع الإتنين اللي قاعدين بعيد , سألو أبوهم : نعمل ايه في العيلين دول
يابه ؟ قال لهم ولا حاجه , ما هما لازم يتعاقبو و حالتهم دي هي أفضل عقاب ليهم .
................................................................................................................................
Mohamed
Hussein
12
مايو 2015·
المصداقيه
.
السيسي كالعاده
بيرمي لنا مشاكلنا في حجرنا و يقول : يا ناس شيلو معايا .
و خطاباته كلها
تحت شعار : عفواً نحن لا نبيع الوهم .
.....................................................................................................................................
Mohamed
Hussein
12
مايو 2015·
الواحد يفتح التكييف
مفيش دقيقتين يلاقي نفسه متكتك من البرد , يقفل التكييف مفيش دقيقتين يبقى حران و مش
طايق نفسه .
الجو حر و السما
مليانه سحاب و شكلها هتمطر تاني , طب و بعدين بقى يا حكومه في حركاتك دي ؟ بتعملو فينا
كده ليه ؟ مفيش مسئول يطلع يقول لنا هو الجو حر و لا برد ؟ نفتح الشباك ولا نقفله ؟
.
.
بس أنا لقيت الحل
, أه و الله لقيت الحل , الواحد يروح البيت و يلبس شورت قطن قصير و من فوق يلبس بلوفر
صوف تقيل بكُم و رقبه ( شيرز يعني ) , و اهو لو الجو كان حر أدينا لابسين الشورت و
لو كان برد أدينا لابسين الشيرز .
.......................................................................................................................................
Mohamed
Hussein
12
مايو 2015·
النت زي الزفت
من الصبح و الفيس تقيل أوي أتقل من دم تامر هجرس و ريهام سعيد و محمد البلتاجي مجتمعين
, يتهيألي الكابل البحري اتقطع تاني قصدي اتقطع عاشر , ماهو أصل حكاية الكابل البحري
دي هي البديل بتاع ماس كهربائي , بس كده كتير بصراحه , احنا لازم نعمل هاشتاج لإقالة
وزير الكابل البحري .
....................................................................................................................................
Mohamed
Hussein
12
مايو 2015·
طب و بعد ما وزير
العدل لبس الجلابيه و قعد في بيتهم يا ترى فيه حاجه هتتغير ؟
.
سؤال بيطرح نفسه
أهو من كولاجيه كتير , و بيجمع نفسه على 50 سؤال تانيين و بيقسم نفسه على اتنين و يتبقى
معانا واحد , معادله في الجبر و جبر الخواطر على الله .
.
عزيزي الكولجي
شامم الكوله و بائعها و شاريها و نافخ الكير في وطن اتخنق من كتر النفخ , اللي حصل
ده اسمه قرار سياسي فيه عدم اعتراف بدولة الناس اللي فوق و الناس اللي تحت , عدم المجاهره
بالذنب , و ده أضعف الإيمان .
.
زي ما كان لينا
دور في لفت انتباه المسئولين و زي ما كان دورنا مؤثر لازم يكون لنا دور في استكمال
أوراق القضيه ( قضية العدل و المساواه ) , يعني نضغط زي ماحنا و قبل ما نضغط نبدأ بنفسنا
( إبدأ بنفسك فانهها عن غيها ..فإنْ انتهتْ فأنت حكيمُ ) .
.
يعني ماتبقاش الحكايه
بالنسبالنا رصاصه موجهه للقضاء و النيابه أد ما هي موجهه لدولة المحسوبيه و الرشوه
و الظلم الإجتماعي , يعني حضرتك زي ما بترفض توريث مهنة القضاء لازم ترفض توريث مهنة
أستاذ الجامعه لما الأستاذ بيعيّن ابنه معيد في القسم بدون وجه حق .
.
و عشان معركتنا
كبيره و عايزه نفس طويل , فمفيش مانع انك تفرح النهارده بقرار سياسي محترم و تقول عليه
قرار محترم و بدايه حلوه بس الحقيقه انت لا هتقول ولا هتعيد , أصلي حافظك صم ( كخطوط
يدي ) و ياخي ليا سنتين تلاته مش بتفاجئ أبدا بموقفك و تعليقك على أي خبر أو قضيه
, ستامبه واحده مكرره , قبل القرار حمله شعواء لأقالة الوزير و بعد القرار تقليل من
شأن الإقاله أو الإستقاله و تقعد تدور و تحرك و تفرك عن حاجه تكتبها فماتلاقيش حاجه
أوي تقوم تقول مثلا , و هو ايه هيتغير ؟ ماهي كل حاجه زي ما هي , و نفس أم الفكر السوداوي
بتاعك .
.
بالمناسبه , بيقولو
البرادعي بُعث من قبره و كتب تويته ينتصر فيها لحق عمال النضافه , يا ترى لحق يكتب
تويته تانيه يمدح فيها القرار قبل ما يرجع لقبره و لا كالعاده مالحقش ؟.
......................................................................................................................................
Mohamed
Hussein
11
مايو 2015·
يوم في حياة مصر
............. سجل يا تاريخ
.
- هنبقى نحكي لولادنا
و احفادنا إنه في يوم من الأيام رئيس مصري أقال وزير عشان قال تصريح فيه اهانه للغلابه
في مصر .
.
- عمال النضافه
من حقهم بكره ( و أتمنى ) إنهم يعملو مظاهرة شكر و محبه للسيسي و محلب , شكر على موقف
محترم , مش مظاهرة نفاق ولا تطبيل , يقولو له بس احنا في ضهرك يا ريس و وراك و هنفضل
عكازك لما تحتاج لعكاز .
.
- مش هنبطل نحلم
بالتغيير , ولو كان اللي بيحصل في القضاء و النيابه ده ذنب فأول خطوات علاجه هي معاقبة
اللي بيجاهر بالذنب ده , و أكيد هنوصل لليوم اللي نشوف فيه القاضي متصور سيلفي مع أبوه
عامل النضافه المواطن الشريف .
.
- عايز بس أفكركو
, ياسمين بنت الاكابر اللي ابوها ملياردير و كانت عامله 7 رجاله في بعض متصوره النهارده
بالجلابيه البيضا بتاعة سجن القناطر , و معالى الوزير ابن الأكابر برضه هيلبس الجلابيه
في بيتهم النهارده , مصر رايحه بعون الله لأهلها و لسكانها الأصليين .
..................................................................................................................................
Mohamed
Hussein
11
مايو 2015·
عامل النظافه ينتصر
على وزير العدل ابن الناس الهاي فاي الإكس إكس لارج , ريحتنا الله يريح قلبك يا عبد
الفتاح .
يا بشر بلاش تقتلو
الحلم في صدور الناس , بلاش تبقو متخلفين عقليا بدرجة وزير .
...................................................................................................................................
Mohamed
Hussein
11
مايو 2015·
أرِحْنا بها يا
عبد الفتاح .
..................................................................................................................................
Mohamed
Hussein
11
مايو 2015·
العدل
............. إقالة وزير العدل
.
- لو حضرتك عايز
تبرر موقف الوزير على صفحتي و تقول بقى الكلام العميق بتاع اصل دي ثقافة شعب و احنا
بنعمل كده من البواب و بتاع الدره المشوي و بتاع النضافه عايز أقول لحضرتك حاجه , هنا
, في الصفحه دي , بني أدم لا ابوه كان قاضي و لا طبعا طيار في شركة مصر للطيران , يعني
مكانشي باشا من الأخر .
صاحب الصفحه مصاحب
وليد البواب و عم مصطفى بتاع الجراج و ماليش أي علاقه باللوا سامح اللي ساكن في الدور
الخامس يعني تقدر تقول فقري بامتياز .
.
- كنا عملنا ثوره
مش فاكر سنة كام كده بس كانت قريبه أوي عشان نحقق ولو الحد الأدنى من العدل , و بعدها
عملنا دستور قول دستورين تلاته , فيهم ماده مش صعبه ولا هي لوغاريتمات بتقول المساواه
, عارف يعني ايه المساواه يا مثقف يا عميق ؟
.
- معالى وزير العدل
قال يعني من باب المجامله الرقيقه و عشان هو سو كيوت ( انه بيحترم مهنة عامل النظافه
) , مجامله رقيقه فعلا , وانا كمان عايز أجامل الراجل ده بكلمتين , بقى يا معالى الوزير
, في تاريخ مصر زعماء و فلاسفه و علماء و أدباء و مفكرين كتير , اكتب لي اسم واحد هنا
كان أبوه من الأسر العريقه ( .......... ) , أتحداك , كلهم بلا استثناء هتلاقيهم طلعو
من أوساط فقيره , اللي أبوه فلاح و اللي أبوه موظف غلبان في البوسته و اللي ابوه جايز
عامل نضافه , أنا بقى فخور بالناس دي و بتفاخر بيها و بتفشخر و من باب المجامله هقولك
( كل الإحترام للأسر المحترمه اللي منها معاليك ) , يعني مش بتكبر عليكو ولا حاجه
.
.
- لو الحكايه عالبدله
و الكرافته أظن التوحيد و النور بيعمل عروض حلوه و كريمات الشعر و مزيلات العرق بتتباع
عالرصيف , أيوه يعني لو كان الشكل ده هو المعيار و المقياس بالنسبالك , و اهي الصين
ماخلتش لولاد الأسر العريقه حاجه .
.
- سيادة الرئيس
عبد الفتاح السيسي , فضلا لا امرا , بلاش تشيل شيله مش بتاعتك , انت شايل بزياده و
كفاياك , هي حتة ورقه A4 ب 3 قروش و اكتب فيها جمله
واحده : إقالة وزير العدل المصري و السبب : إنه من أسره عريقه محترمه .
................................................................................................................................
Mohamed
Hussein
11
مايو 2015·
وزير العدل : القاضي
ماينفعشي يكون ابن عامل نظافه , القاضي لازم يكون من وسط محترم !! .
.
أيوه عارفه عارفه
الوسط المحترم ده , أكيد حضرتك تقصد يكون من عيله عريقه محترمه زي ياسمين النرش كده
.
معالي وزير العدل
المصري , أبويا كان راجل فلاح غلبان , و ثورة يناير عملناها عشان يبقى لي حق أترشح
لرئاسة الجمهوريه و بالتالي ممكن يعني بعد اذن جناب معالي سعادتك أحلم زي أي حد بمنصب
وزير العدل .
.
معالى وزير العدل
المصري , انت شكلك كده من عيله عريقه محترمه زي ياسمين بالظبط و كلامك ده مش كلام لأ
, والله ماهو كلام , عليا النعمه انت ما بتتكلم , انت بتش* علينا و تطر** , برضه زيها
بالظبط .
.......................................................................................................................................
Mohamed
Hussein
10
مايو 2015·
أيمن نور : مستعد
للعوده الى مصر و خوض انتخابات رئاسيه مبكره أمام السيسي !! .
.
بيقولك يا سيدي
كان فيه مجموعه من النمل عايزين ينتقمو من الفيل , فيهم نمله اسمها فوزي , النمله فوزي
كانت جريئه شويه و في يوم اتشجعت النمله فوزي و طلعت عند رقبة الفيل و باقي النمل اتحمس
و قرر انه يشجعها فقعدو يهتفو : اخنق يا فوزي اخنق يا فوزي .
.
و بس كده , أيمن
نور جرئ و عايز ينزل انتخابات قدام السيسي و ساعتها الكولجيه هيشجعوه و يقولو له :
اخنق يا فوزي اخنق يا فوزي .
....................................................................................................................................
Mohamed
Hussein
10
مايو 2015·
مشاهد مشاهد
...........و اهو ربك عالم و شاهد
.
مشهد 1
- خرج مولانا الشيخ
من قصره في التجمع الخامس , و ركب عربيته ال بي أم , لا يا ربي سابها و ركب الجراند
شيروكي و راح عالجامع , طلع المنبر و خطب في الناس و شخط و نطر و أمرهم بالزهد و القناعه
التي هي كنز لا يفنى , قال مولانا الشيخ : أيها الناس , اتقو الله و اعلمو إن محدش
واخد منها حاجه , أخرنا توب قماش و حته أرض متر في متر , أه و الله , إي و ربي .
.
مشهد 2
- خرج الإعلامي
من قصره في المعادي , و ركب عربيته المرسيدس لا يا ربي سابها و ركب ال لاند كروزر و
طلع عالشاشه و زعق و شخط و نطر و قال ازاي الطبيب في الحكومه عايز مرتب اكتر من الفين
جنيه ؟ الناس دي عايزه تنهب البلد ليه ؟ مالهم الألفين جنيه مايعيشوش بيت ؟ انتو مش
حاسين بالبلد و بحالة الركود الإقتصادي ؟ انتو لا يمكن تكونو مصريين .
و بعد الحلقه حاول
صاحب القناه يقنع الإعلامي إن 15 مليون حلوين أوي في السنه و الإعلامي راسه و ألف جزمه
لا 15 مليون هيعملو ايه في الزمن الهباب ده , مش هقبل بأقل من 18 مليون و ده تنازل
مني عشان انا عارف إن عليا واجب وطني لازم أقوم بيه تجاه بلادي .
.
مشهد 3
- دخل الطيار المصري
على صفحته عالفيس بوك و كتب بوست طويل عريض عن ثورة يناير و أهداف ثورة يناير و جمال
ثورة يناير و غمازات و ضفاير ثورة يناير , و كالعاده أنهى البوست بتاعه بمقولة خالد
الذكر حمدين صباحي ( الله يرحمه و يشفيه ) : العيش و الحريه و العداله الإجتماعيه
, و مدح الطيار و أثنى و أشاد بتطبيق الحد الأقصى للأجور ( اللي هو 42 الف ) دون استثناءات
.
و بعدين راح الطيار
على مطار القاهره و قدم استقالته و كتب فيها إن 85 ألف في الشهر مايعملوش حاجه , و
ماتقوليش حد أقصى و لا حد زفت و انا مال أمي و مال الكلام ده , انا عايز 150 ألف يا
ولاد التييييييييييييييت .
.
مشهد 4
- لبس الناشط السياسي
الكوتشي بتاعه و الكوفيه الفلسطيني و طلع على قناة الجزيره و قال خطبه عصماء عن أهمية
الثوره و النزول للميادين , و طالب الشباب إنهم مايفكروش في الدنيا و المعايش و الفلوس
, أهم حاجه ينزلو الميادين و محدش بيموت من الجوع .
و بعد الحلقه حصلت
خناقه لرب السما بين الناشط و المسئولين في الجزيره , هما قالو له انت هريت ساعتين
يبقى حسابك 3 ألاف دولار , قال لهم لا , احنا متفقين عالساعه ب 2000 دولار يعني ساعتين
ب 4 الاف , و حساب الفندق و البيره و المزه ( بفتح الميم و ضمها ) عليكو , ده كان اتفاقنا
من الأول يا كفره ياولاد الحرام يا أعداء الثوره و الميادين .
.....................................................................................................................................
Mohamed
Hussein
10
مايو 2015·
يعني إيه أرجع
البيت ألاقي برطمان النسكافيه خلصان و ماشتروش واحد جديد ؟ لا بقى , برطمان النسكافيه
بتاعي خط أحمر و دونه الرقاب .
.......................................................................................................................................
Mohamed
Hussein
9
مايو 2015·
-
كيلو الباميه ب 25 جنيه , يا حكومة العار , احنا لازم نعمل ثوره ( مع ان الباميه دي
لو بتتشحت او بتتباع الكيلو بنص جنيه مش هيشتريها عشان هو مش بيحب الباميه و لا بيطيقها
أساسا ) .
.
- الكهربا قطعت
في طلخا , يا نظام فاشل و فاسد , لا بقى احنا لازم نعمل ثوره ( مع انه عايش في السويد
)
- مبارك صدر ضده
حكم بالبراءه , أه بقى دولة الفساد و القضاء الفاسد رجعت تاني يبقى حتما ولابد نعمل
ثوره .
- مبارك صدر ضده
حكم بالحبس , أه بقى , دي كلها من حيل النظام , النظام الفاشي بيحاول يثبّتنا عشان
مانعملش ثوره بس احنا أكيد هنعمل ثوره
.
- المصريين اتقتلو
في ليبيا , كان لازم الجيش يجيب حقهم مش هو بيقول مسافة السكه ؟ بس ده جيش المكرونه
عشان كده هنعمل ثوره .
.
- الجيش المصري
طلع يجيب حق المصريين و بيدك معاقل داعش في ليبيا , لا بقى السيسي الغبي بيجرّ رجل
الجيش المصري لمعارك خارجيه , كده مفيش حل غير اننا نعمل ثوره .
..........................
.........................
أنا : يابني انت
خيلتني و خنقت اللي جابوني , ماتنزل تعمل ثوره ولا تعمل حواجبك حتى .
هو : لأ , انا
مابعملش , أنا بقول بس .
أنا : أه فهمتك
, و ايه ياد صورة جيفارا اللي انت لازقها ورا قفاك زي الأتب دي ؟
هو : دي لزوم التسخين
و اللايكات , نشاط فيس بوكي يا حلاوه .
.......................................................................................................................................
Mohamed
Hussein
9
مايو 2015·
إبتسامه
.
- لما تلاقي بنت
صغيره قاعده على حجر أبوها و هو بيسرح لها شعرها بالمشط و التوكه ماسكها في بؤه و تقوله
يا بابا مش هتعرف تعملي ديل حصان , يقول لها لأ هعرف دانا عارف كل حاجه .
.
- لما شاب ببدله
و كرافته يدخل على والدته الست الفلاحه و يمسك ايديها الخشنه المكرمشه و يبوسها و يبوس
راسها .
.
- لما الراجل الأرزقي
بتاع عربية الدره يلمح ست على باب الله فينادي عليها عشان يديها جنيه فيدوّر في جيبه
مايلاقيش يقوم مديها كوز دره مشوي .
.
- لما ولد صغير
يكون اتعود يركب على ضهر ابوه و هو بيصلي و يفضل متشعلق في رقبته طول الصلاه و الأب
يركز في صلاته و بعد ما يخلص يقول سامحني يارب .
.
- لما الأبنودي
يقول الشعر مالوش وقت يتكتب فيه , داحنا بنفتح حجْرنا و بنستنى ربنا يبعت .
.
- لما بنت صغيره
اسمها أمل عمرها 3 سنين تدخل عندي الصيدليه و تاخد بارفان اطفال و تقول لمامتها هختار
بارفان ولادي كمان عشان اخويا حمزه .
.
- لما تقابل واحده
ست عندها هموم الدنيا و الأخره بس تحسسك إن الشمس هتطلع بكره أكيد و إن خير ربنا و
خزاينه مفتوحين 24 ساعه مع خدمة التوصيل ( لجيبك و قلبك ) .
.
- لما بسمع الطبلاوي
و هو بيرتل سورة الأحزاب , و لما بسمع الموسيقى في الكوبليه التاني لأغنية ( دارت الأيام
) و لما بسمع دعوة أمي ( ربنا يستر طريقك , إلهي يجعلك تعطى ما تستعطى ) .
...........................................................................................................................
Mohamed
Hussein
9
مايو 2015·
أبو تريكه خط أحمر
................ أخر حاجه في الهري
.
- التحفظ كان على
أموال شركه أحد ملاكها هو أبو تريكه , يعني التحفظ على أموال الكيان اللي هو الشركه
و طبعا التحقيق بيتم مع صحابها اللي من ضمنهم أبو تريكه ( مش بيتم مع حيطان الشركه
ولا طفاية السجاير اللي فيها ) ....سهله دي ؟ , و التحفظ تم عشان احد ملاك الشركه
( مش ابو تريكه ) متهم بالإرهاب و صدر ضده حكم قضائي ( سهله ولا ايه ؟ ) .
.
- أبو تريكه خط
أحمر يعني ممنوع الإقتراب أو التصوير , أو التحقيق أو حتى تقوله من أين لك هذا ؟ ,
و مبارك له انصار بالملايين بس مقالوش مبارك خط أحمر , أهو واحد رغم فساده و بلطجته
كان رئيس مصر لمدة 30 سنه و مع ذلك مرمي في السجن من سنين و بيتحقق معاه و قاضي و نيابه
و ذل ما بعده ذل , و في الأخر خد 3 سنين في قضيه من القضايا , بس أبو تريكه خط أحمر
.
.
- طبعا ماقصدشي
التشبيه بين ابو تريكه و مبارك , و لو حضرتك فاهم أي حاجه في الدنيا هتعرف ان الإتنين
هيطلعو براءه في الغالب , عشان مصر مليانه بنوعية المحامي الفاسد و المحاسب الفاسد
و امين الشرطه الفاسد ( يعني الفساد مننا و فينا ) , و احنا أصلا أساتذه في تستيف الأوراق
الماليه و تفنيد و تظبيط أوراق أي قضيه , إنما حضرتك بيروق لك انك تختزل الليله في
جملتين حافظهم و بتكررهم : القاضي فاسد و الدوله بترعى القضاء الفاسد .
.
- عالهامش خبر
غريب : في حاله نادره , سيده أمريكيه تضع توأمين لأبوين مختلفين !! , ........ و انت
أيوه انت لما بشوف أفكارك و ألاقيك مؤيد للبرادعي بس بتردد نفس كلام الإخوان بالحرف
أكيد أكيد تبقى انت الحاله الأغرب و الأعجب من السيده الأمريكيه , حاله لكولجي مصري
يضع مولود طفل واحد لأبوين مختلفين !!.......صباحيه مباركه يا عروسه .
..................................................................................................................................
Mohamed
Hussein
8
مايو 2015·
في روسيا , و في
احتفالات النصر الأطفال هناك بيلبسو بدلات عسكريه كنوع من الإحترام للجيش , بيعودو
ولادهم من صغرهم على كده , على احترام عمود الخيمه .
.
في مصر بقى , ماتبقاش
واد مثقف فحت و متقعر لو ماكنتش تسب لجيش بلدك , و لما تيجي ذكرى انتصار اكتوبر لازم
تتحزلق و تتفزلق و تثبت بالدليل القاطع اننا مانتصرناش ولا حررنا سينا ولا حاجه , و
أصلا أصلا مفيش محافظه في مصر اسمها سينا و لا فيه شهر في السنه اسمه اكتوبر على فكره
, اومال ايه ؟ مثقف بقى و متقعر و بيجعص ضهره في الحيطه و يقولك : في الواقعععععععع
!! يعني بيتغرغر في الكلام ( هما المثقفين كده لازم يتغرغرو ) .
.
واحد ربنا فتح
عليه في الثقافه و التقعير فكتب على صفحته ( جزمة ابو تريكه فوق رقبة العسكر ) , يعني
فوق رقبة الجيش المصري , يعني خير أجناد الأرض , يعني الجيش اللي داخل حروب في تاريخه
اكتر من عدد سكان قطر , يعني الجيش اللي قدم عشرات الألاف من الشهداء عشان الحلّوف
يعرف يتعلم بدل ما كان زمانه غلام من غلمان الوالي بتاع أي دوله استعماريه .
.
بقت جزمة ابو تريكه
فوق رقبة جيش مصر , اللهم صل عالنبي , القديس بقى , معشوق الجماهير , مولانا القطب
الصالح محمد محمد ابو تريكه , احنا لازم نعمل له مقام و نطوف حواليه و اللي ابنها عيان
تعمل ندر لمقام ابو تريكه و اللي مابتخلفش تروح هناك و تقوله شللاه يا سيدنا ابو تريكه
تبعت لي عيّل .
......................................................................................................................................
Mohamed
Hussein
8
مايو 2015·
انا و لمار بنتي
( 4 سنين و نص ) ............... المناهج اتبعجرت
.
لمار : بابا ,
على فكره مش اسمها طياره اسمها طائره , طاء طائره , و تاء توكتوك و فاء فيفي عبده
!! ( أه و الله ) .
أنا : لا يا لمار
, لا يا حبيبتي مش تقولي كده , جبتي الكلام ده منين ؟ مين اللي علمك كده ؟ , البنات
النوتي بس هما اللي بيقولو تاء توكتوك و فاء فيفي عبده .
.
لمار : أومال أقولها
ازاي ؟
أنا : بصي يا حبيبتي
, عشان تبقى بنت جميله و مش نوتي يبقى تقوليها بالشكل ده : تاء تعميره و فاء فسواني
.
...............................................................................................................................
Mohamed
Hussein
8
مايو 2015·
رغم اني زملكاوي
بس و الله بحب ابو تريكه زي ماكنت بحب الخطيب , كنت بفرح اوي و اتطمن لما اشوفهم في
المنتخب و ازعل واقول يارب استر لما يبقو في الأهلي و هيلاعبو الزمالك , أصل اللعيب
الحريف ده عمله نادره , زي ما الأهلاويه بيحبو حازم امام الكبير و حسن شحاته .
.
يعني على المستوى
الشخصي أتمنى إن التحقيقات تبرأ أبو تريكه , بس لو طلع بقى مدان بتمويل ارهاب يبقى
إيه ؟ يبقى يتنفخ يا باشا , دم العساكر اللي راحو و حق البلد اللي كانو عايزينها تخرب
أهم بكتير من حرفنة ابو تريكه و حسن شحاته , و أهم حتى من سجدتهم في الملعب .
.
عواطفنا ممكن نطلّعها
في قصة حب أو قصيدة شعر أو رسمه حلوه , لكن ماتنفعش لحكم الأوطان .
.
الماتش بدأ , و
الكوره دلوأتي في ملعب القاضي و النيابه .
................................................................................................................................
ليست هناك تعليقات:
إرسال تعليق