Mohamed
Hussein
30 أبريل
2015·
في العاده بكتب
على صفحتي بس , مش بنشر بوستات من مكان تاني ولا صور , بس كان لازم اكسر القاعده عشان
خاطر عيون الصوره دي , الصوره دي مفتريه , صوره جباره , صوره بتنطق , بتتكلم زياده
عن اللزوم , صوره لكاكه من الأخر ......و بجد بجد : يا مرك يا مهجه .
داحنا كده مش محتاجين
نجيش جيوش عشان نحرر الأندلس , ماهي اتحررت لوحدها أهي , و الست الملكه ممكن تكتب لنا
مبايعه بالأندلس بيع و شرا و نسجلها في الشهر العقاري كمان .
.
#لم_مراتك_يافيليب_عشان_عيب
...................................................................................................................................
Mohamed
Hussein
30 أبريل
2015·
فن السياسه الخارجيه
عند عبد الفتاح السيسي
.
حاول تركز كده
, أكتر 3 دول زارهم السيسي في أوروبا و استقبل رؤسائهم هما روسيا و اليونان و قبرص
, صح لنا مصالح كبيره مع الدول دي و اتفاقيات عسكريه و اقتصاديه و ترسيم حدود للمياه
الإقليميه , بس كان فيه هدف تاني اضافي مايقلش أهميه عن المصالح المشتركه .
توطيد العلاقات
بروسيا كان للضغط على أمريكا بعد ما كان أوباما أوشك انه يطلع عالتلفزيون الأمريكي
بتي شيرت ( رابعه رمز الصمود ) .
و توطيد العلاقات
باليونان و قبرص للضغط على تركيا عشان هرتلة أردوغان اللي مابتنتهيش .
الحكايه بتقول
باختصار , إن السيسي ده رئيس عارف حجم مصر , رئيس بحجم مصر , , لو كنت عايز علاقات
كويسه مع مصر تعالى و نبقى حبايب و نشيلك على راسنا , و لو عايز تهرتل هرتل براحتك
, لا هنتحايل ولا نبوس الإيد , مصر مش بيتلوي دراعها .
..................................................................................................................................
Mohamed Hussein
30
أبريل 2015·
الحمد لله الحمد
لله , لمار بنتي خلصت امتحانات كي جي 1 النهارده و نجحت النهارده و خدت الشهاده النهارده
( توتو على كبوتو ) , مكتوب لها excellent
, و خلي بالك كي جي 1 دي شهاده زي الثانويه العامه , أيوه مراتي حسستني بكده , معسكرات
مغلقه و ممنوع و ممنوع و ممنوع , قايمة ممنوعات , كويس انها ماحلقتش للبت زيرو في أيام
الإمتحانات دي , تقولشي يعني رايحين نلعب في أولمبياد بكين ؟
.
كانت صعبانه عليا
البت لمار أوي , أدي ميزة إن الواحد تكون مامته مابتعرفشي تقرا و تكتب , تذاكر بقى
ماتذاكرش مش مهم , مفيش معسكرات مغلقه , أنا مره و انا في تالته اعدادي كنت ماسك مجلة
أخبار الرياضه بقرا فيها و مركز على صورة البنت اللي كانت بتبقى في النص دي , أمي شافتني
و قعدت تدعي لي , ربنا يوفقك يابني و ينجحك , إلهي أشوفك دكتور أد الدنيا .
ممممم بس بعدها
اتكسفت من نفسي و قمت ذاكرت ( و خبّيت المجله تحت المرتبه ) .
...................................................................................................................................
Mohamed
Hussein
30
أبريل 2015 ·
مميش : توقيع اتفاقية
تفاهم مع اسبانيا لإنشاء مزارع سمكيه في محور قناة السويس !!.
يعني مش بس هنفتتح
قناة السويس الجديده في معادها لأ , احنا بنشتغل عالمشاريع الجانبيه و تنميه محور قناة
السويس , اللي هي ( مرحلة ما بعد افتتاح القناه الجديده ) .
.
كان عندي صديق
كولجي من كام شهر و كان فرحان أوي بخبر ان فيه تسريب مايه في حته كده من قناة السويس
الجديده , و هاتك يا بوستات و مقالات و اراء خبراء ( مش اخوان بس بيحترموهم ) و قالك
الحكومه لازم تردم اللي حفرته في قناة السويس الجديده فورا و إلا هيحصل كارثه يشيب
من هولها الولدان , و احتمال البحر المتوسط يزحف عالبحر الأحمر و قناة السويس تدخل
في قناة بنما و الدلتا تغرق في شبر مايه و الصعيد يتعلق في قشايه , و تبقى نايم في
أمان الله في كفر شكر تصحى يا مؤمن تلاقي نفسك واجادوجو .
.
لصديقي الكولجي
المثقف الفحت : يا ترى شعورك ايه دلوأتي ؟ طب هي عامله إيه دلوأت ؟!
..................................................................................................................................
Mohamed
Hussein
29
أبريل 2015·
عبد الفتاح السيسي
راح يزور أسبانيا , عادي يعني مفهاش حاجه , قام ملك أسبانيا قال نعزمو الراجل على غدوه
حلوه و نرحب بيه , برضه لحد هنا كويس .
.
إنما فجأه كده
تيجي الملكه ( المزه ) ليتيسا مرات الحاج فيليب و تقول انا هاجي أتغدى معاكو , طب السيسي
ماخدشي الحاجه انتصار معاه , هه ؟ ليه بقى يا ليتيسا ياختي ؟ تقولك أنا هكسر البروتوكولات
عشان أرحب بالرئيس المصري و بأهمية الزياره , حركات بنات طبعا !! .
.
بصي يا حاجه ليتيسا
, بما إنك مزه كده فانتي أكيد مشغوله طول اليوم في الميك أب و الأي شادو و كريمات نحت
الجسم و بصراحه اتنحت صح ( إلا صحيح : انتي تعرفي محمود مختار ؟ ) , المهم ما علينا
, و عشان انتي مشغوله بجمالك فأكيد ماتعرفيش كتير عن عبد الفتاح السيسي , بقى السيسي
ده يا ست البنات بالنسبه للرجاله في مصر هو الراجل المصري الجدع اللي شال السكينه من
على رقبة البلد , أما السيسي بالنسبه للبنات بقى فهو باختصار سي الأستاذ عبد الحليم
حافظ !!.
.
يعني من الأخر
, تروحي الغدوه , عينك ما تترفعشي من عالأرض , هه ؟ و إلا بكره الصبح هنلاقي 40 مليون
بنت مصريه في ميدان التحرير بيطالبو بالحرب على أسبانيا و هاشتاج #انتي_عايزه_إيه_مالراجل_يا_دلعدي
؟!.
.......................................................................................................................................
Mohamed
Hussein
29
أبريل 2015·
المنطلون لأ
.
الموضوع كبر ,
شكله كده كبر , الملك سلمان شال سعود الفيصل اللي مسك منصب وزير خارجية السعوديه يوم
فرح أبويا و امي ( سنة 75 ) , يااااااه دانا ابويا اتجوز امي و خلفو 6 عيال و العيال
كبرت و اتجوزت و خلفت و سافرت و رجعت و طلعت و نزلت , كل ده و سعود الفيصل وزير خارجيه
.
.
بس لقيت في الموضوع
ده كمية هري و تحليل و تفسير و تحليل تاني بصراحه تجيب للواحد دوسنتاريا .
.
و الفرع السديري
في العيله الحاكمه عايز يسيطر , لأ دي الناس زهقت من العواجيز فقالو نمكن الشاب و حماس
الشباب و حب الشباب .
.
الحكايه فرطت أكتر
و قالك دي نبوءه شيعيه معروفه و مذكوره في المزامير و الكتب المقدسه , موت الملك عبد
الله اصلا كان منحوت بالتاريخ على شجره في مدينة السلام , و فيه عرّافه فلبينيه كانت
عارفه كل حاجه و لقت اسمه مكتوب في الفنجان و قالت له بابا انت فيه موت في توينتي فورتين
.
و نهاية حكم أل
سعود هتيجي بعد موت الملك عبد الله ب 3 سنين و 3 ساعات و 3 دقايق و 3 فيمتو ثانيه
, و هنا اختلف الفقهاء , منهم اللي شاف دي حاجه حلوه و بداية لظهور المهدى المنتظر
و تحرير القدس و عودة الخلافه الإسلاميه و السيطره على كوكب الأرض و المجموعه الشمسيه
, و منهم اللي شايف انه لأ , هينهار حكم ال سعود و بعدين تتحول السعوديه لقبائل تحارب
بعضها يعني مثلا الدمام تحارب القصيم أو القحطانيه يحاربو الدواسر و كده يعني , و تظهر
السلعوه على شواطئ الجبيل , و الناس يبقو قاعدين بيشو فراخ ( دجاج ) يلاقو السلعوه
العملاقه داخله عليهم بالبيتش باجي .
.
أنا شخصيا قررت
أتجنب الهري ده و أحتسي النسكافيه بتاعي كالعاده , و الحمد لله إن تاريخ وفاة الملك
عبد الله مكتوب في فنجان القهوه مش مج النسكافيه , أصلي عندي 3 قناعات كده أو 6 مش
فاكر , السعوديه مش هتجيب فيصل تاني ولا الإمارات هتجيب زايد , علاقتنا بالدولتين هتفضل
قويه حتى لو حكمهم سلومه الأعور , سلمان غير عبد الله ( والله يرحم الجميع ) , كل دول
الخليج لها علاقات قويه بأمريكا و الجناح السديري و الجناح اللي مش سديري , و حكاية
الممناعه الإيرنيه لأمريكا و الصهاينه دي اكبر كدبه في القرن ال 37 اللي احنا عايشين
فيه , مفيش دوله في العالم مالهاش علاقات بأمريكا ( القوى العظمى الوحيده ) و العلاقات
شئ طبيعي و منطقي بس ماتوصلشي بقى للبنطلون , كله إلا البنطلون , المنطلون لأ .
...................................................................................................................................
Mohamed
Hussein
28
أبريل 2015·
من شهرين روحت
أقابل مرات اخويا في مطار القاهره , قالو لنا اللي جاي يقابل حد يستنى بره , ممنوع
دخول الزوار لداخل صالة المطار , اجراءات أمنيه .
و النهارده قريت
خبر عن حمار دخل مطار القاهره في الصاله رقم 1 , مش جايز الساده المسئولين بتوع مطار
القاهره احترموني أوي و مارضيوش يدخلوني يوميها عشان انا مش حمار ؟!.
..................................................................................................................................
Mohamed
Hussein
28
أبريل 2015·
لما تشوف لقطه
و مشهد لأبله فاهيتا مع شريف مدكور , و المفروض انه مشهد كوميدي يبقى لازم تحمد ربنا
و تقول قدّر و لطف , خليك متفائل و كويس إن تامر هجرس مش معاهم .
.
البيض علينا حق
, و الجيل بتاعنا ده مكتوباله , ملكة الإغراء تبقى ناديه الجندي ذات السبعين ربيعا
و ملك الكوميديا يبقى شريف مدكور .
...................................................................................................................................
Mohamed
Hussein
27
أبريل 2015·
الزمالكاويه عمرهم
ما اجتمعو في نفس الوقت على مدرب واحد و حبوه و اتمنو له السلامه و الإستقرار و طولة
العمر و الثبات في موقعه , الوحيد اللي كسر القاعده دي هو جاريدو !!.
.................................................................................................................................
Mohamed
Hussein
27
أبريل 2015·
مبروك علينا الدوري
يا رجاله , الزمالكاويه يقومو يحضنو و يبوسو بعض , خش في لحم أخوك يا جدع .
.
لقد فعلها حسن
شحاته .
....................................................................................................................................
Mohamed
Hussein
27
أبريل 2015·
لما قبيله في سينا
تهاجم الإرهابيين اللي فيها ف ده مش خبر حلو ولا حاجه , بلاش تزيطو مع الزيطه و خلاص
.
الخبر ده من انواع
الأخبار السرطانيه الخبيثه , و ترجمته باختصار ان سينا خارج سيطرة الدوله .
انا شخصيا مش منتظر
و لا عايز من قبايل سينا حاجه أكتر من إنهم بس يطردو الخونه و الإرهابيين اللي واكلين
شاربين نايمين في بيوتهم و يسيبو مصر في حالها و بس .
.
اه استنو عشان
محدش يزعل , قبايل سينا وطنيه و مخلصه و شريفه أخر حاجه , و السلام الوطني بتاع مصر
بيرفرق في ودن كل عيل هناك و لا بيتاجرو في سلاح ولا مخدرات ولا بيبيعو جنودنا للإرهابيين
و لا بيخبّو الإرهابيين في بيوتهم , و بيعشقو تراب مصر و لو دخلت اي بيت أو خص هناك
على طول هتسمع أغاني شاديه الوطنيه و هتشوف بعنيك صورة الأستاذ نبيل الحلفاوي و هو
حاضن عزت العلايلي متعلقه في المندره ................. بؤ حلو أهو عشان الترويج الإعلامي
, بؤ من اللي بيعجب الجماهير .
......................................................................................................................................
Mohamed
Hussein
27
أبريل 2015·
حملة ماعرفشي ايه
كده اللي هدفها برضه ماعرفش ايه , يقومو يردو عليها بهاشتاج ماعرفشي ايه اللي هدفه
تفنيد حملة ماعرفشي ايه .
.
دماغنا ورمت و
الله من الحملات و الهاشتاجات , بقالنا سنين على دا الحال , طب انا جت لي فكره حلوه
, إحنا نعمل حملة و نسميها ( مفيش حمله ) و هاشتاج اسمه ( و لا حاجه ) و يكون هدفهم
إننا نرحم عقولنا شويه من الهري و الهري المضاد , يعني ممكن نعتبر الحمله و الهاشتاج
شجرتين صفصاف بنريح راسنا تحتهم في ساعة عصاري .
.
حملة #مفيش_حمله
و هاشتاج #ولا_حاجه.
.................................................................................................................................
Mohamed
Hussein
27
أبريل 2015·
امبارح رجعت البيت
الساعه 1 بالليل , لقيت لوجي و لمار مستنيني , لوجي فتحت الباب , لابسه تي شيرت أول
مره تلبسه و راسمه على كتفها تاتو فراشه , قلت لها التي شيرت ده مش غريب عليا , ضحكت
و قالت أه بتاع ماما !! , و بعدين لمار قالت لي انا و لوجي اخترعنا رقصه كده بنرقصها
تعالى نوريهالك و ترقصها معانا .
.
أنا كده بدأت اتوغوش
, تي شيرت cut و تاتو فراشه , ايه يا لوجي
؟ انتي فاكره نفسك محافظ اسكندريه ؟ و في الأخر ارقص معاهم رقصة لوسي ابن طنط فكيهه
في فيلم أشاعة حب .
.
البت كبرت يابه
ابراهيم و كلها سنتين تلاته و خرّاط البنات يخرطها , أيوه انت فاهمني طبعا ماتعملشي
نفسك مش واخد بالك و تقعد تبص في السقف , إيدك يالله على شيك ب 200 ألف عشان نبدأ نجهّزها
, 200 ألف ماينقصوش مليم , مانت عارف أمي و عمايلها , دانا اتنفخت في جواز ال 3 بنات
خواتي , و كل حاجه لازم اجيب منها اتنين و 5 و عشره و خمسين , يعني غسالتين و تلاجتين
و 12 بطانيه و 6 لحاف و 175 فوطه , و معرفش كام طقم كاسات على كام طقم معالق و شوك
و سكاكين , دي الصباحيه بتاعة اختي كانت بتكلفني 5 ألاف جنيه , و لو بس قلت يامه كده
كتير تقولي يابني انت عايز الناس تاكل وشنا ؟!! .
.
و أكيد أمي ربنا
يديها الصحه هتعمل كده مع بناتي , و اهو الحمار هيدفع , بس الحمار و عهد الله بقى جيبه
أنضف من مخ محمد مرسي , هجيب منين يعني ؟ هات بقى , دانا يا راجل قاعد جنبكو ليل و
نهار أدافع و أبرر و أطبل لدرجة اني ماخدتش بالي ان البت المفعوصه كبرت , هات يابه
ابراهيم ولا تحب أروح اشتغل ناشط سياسي و أطلع في الجزيره الساعه ب ألفين دولار ؟!
يعني 10 ساعات في الجزيره وارجع معايا الجهاز بتاع بنتي من و إلى , هه ؟ قولتي ايه
يا حكومه ؟ .
.......................................................................................................................................
Mohamed
Hussein
27
أبريل 2015·
الضربه القاضيه
اشتغلو يا رجاله
, ابدأو الهري , بس استنو دقيقتين مش هيجرى حاجه
.
من بعد 30 يونيو
كانت مصر واقعه في مشاكل كتير بره و جوه , السيسي بدأ يتعامل معاها واحده و احده ,
علاقتنا بالسودان , بالجزائر , بالإتحاد الأفريقي , بالأمم المتحده , بأمريكا و روسيا
, يعني باختصار بدأ يظبط الدنيا شويه .
.
و الإرهاب شغال
مابيتوقفش , برضه السيسي تعامل معاه بحزم , لدرجة انه دخل ليبيا عشان يحمي حدودنا الشرقيه
.
.
و في قصة اليمن
شارك و حجز لنا كرسي و مكان و ماتورطناش في حرب بريه ( يعني مش راجل أهبل ) .
.
الإرهاب ماجباشي
النتيجه اللي عايزها الإرهابيين , و لا المظاهرات بقت تجمّع خمسه سته على بعض , و السيسي
ماشي و دايس , يوم يظهر في مصنع و يوم في طريق , فجأه تلاقيه في روسيا و بعدين تصحى
تلاقيه في اسكندريه , طب و بعدين ؟ نعمل شوية تفجيرات جايز تجيب نتيجه ؟ لأ برضه مفيش
فايده .
.
الكلام اللي فوق
ده شكله ملخبط كده و مش مترتب , هو انا عايز أقول ايه ؟ يارب تصدقو , مصر نجت بأعجوبه
من مخطط تقسيمها و تفتيتها و خرابها زي سوريا و اليمن وليبيا , بس مخرج العرايس لسه
فيه نفس و صارف كتير عشان خراب مصر و مش هيتراجع بسهوله , و زي ما المخرج له علاقه
بالإرهابيين فأكيد له علاقه بالفلول و كان بيعلفهم مع الإخوان في نفس الطوّاله طول
عشرين سنه فاتو , يبقى ننزل بكارت مبارك .
.
لاحظ على الهامش
, كمية حرايق بمعدل مش طبيعي في مصر , كمية حوادث تخض في نفس اليوم , هجوم اعلامي عالسيسي
, حملة بدايه , مداخلة مبارك و غيره كتير .
الراجل ده واقف
لوحده , فرداني , و ال 3 كلاب المسعورين اللي مربياهم أمريكا في مصر ( إخوان و فلول
و كولجيه ) بينهشو فيه , أبصم بالعشره ان الراجل ده لوحده و إنه مش بيبيع , بس اللي
بيبيعو موجودين و بدأو المعركه .
.
معاك يا ريس ,
مش عشان سواد عنيك , عشان انت لو وقعت هتبقى دي الضربه القاضيه لمصر زي ما المخرج عايز
.
.
طز في الديموقراطيه
و الحريات , طز في رابعه العدويه , طز في حق مبارك في الظهور , طز في حملة بدايه ,
طز في الفلول و الكولجيه و الإرهابيين و في كل غبي و كل حمار و كل خاين ..طززززززززززززز.
...........................................................................................................................
Mohamed
Hussein
26
أبريل 2015·
أحمد موسى يليقُ
بكْ .
.
مبارك في مداخله
تليفونيه على صدى البلد مع أحمد موسى في محاوله بائسه لإعادة تلميعه , السيسي بيحاول
يبني و فيه 50 ألف إيد بيهدو .
.
أشفق عليك يا ريس
من مثلث الخراب ( إخوان و كولجيه و فلول ) .
.......................................................................................................................................
Mohamed
Hussein
26
أبريل 2015·
حكاوي مصريه
............ حكاية الحاج عبعزيز
.
الحاج عبد العزيز
الله يرحمه ده كان راجل فلاح بلدياتي , راجل داخل عالسبعين , عنده ولاد و أحفاد كتير
, و أحفاده أغلبهم أكبر مني .
كل يوم الصبح بدري
كنت بشوفه ماشي عالسكه اللي جنب بيتنا و رايح ناحية الأرض بتاعته , يفضل هناك ساعتين
تلاته و يرجع على قرأن الضهر يدخل الجامع و يستنى الأدان .
و مره كمان بعد
العصر يروح يشقّر على زرعته و بهايمه , رغم إن ولاده متجوزين و مخلفين و مراعيين الزرعه
و الأرض و البهايم , بس هو كده , مابيعرفش يقعد .
الحاج عبد العزيز
فضل عالوضع ده سنين طويله لحد ما مات وسط زرعته , و تقريبا كان بيتمنى يموت كده , الله
يرحمك يابه الحاج عبعزيز
.
بتخيل لو كان الراجل
ده عنده أكاونت عالفيس بوك كان عاش يومه ازاي ؟ أكيد مكانشي هيطلع من بيته , كان هيقعد
عالسرير يستنى الأخبار و يكتب بوستات عالفيس , ( الواد ابني بيقول لوزة القطن مش حلوه
يابه #عبث ) , ( قالولي أرض الرز بتاعتنا مليانه عجير و دنيبه #يشعر_بالإحباط
) , ( بعد ما الولاد بيّتو عالدرّاسه بتاعة رمضان ابو غريب ييجي عطيه ابن الحاج رمضان
و يقول البابور هنعملّه عَمْره !! #تخرصات_وأكاذيب) , ( سلامه ابني راجع من حش البرسيم
و كتفه اليمين واجعه من ماسكة المنجل #يشعر_بالإرهاق ) , ( بقرتنا الهولندي اللي
اشتريناها من عبفتاح المغربي على وش ولاده #إدعولنا_يا_جماعه ) , ( هنشتري الكيماوي
السنادي من شيخ البلد بسعر زياده 2جنيه في الشيكاره أمرنا لله , يشعر ب #التنميه_السلطويه_و_الإقتصاد_الريعي
) .
....................................................................................................................................
Mohamed
Hussein
26
أبريل 2015·
ذهبَ الحمارُ بأم
عمروٍ
.
أسماء محفوظ انضمت
لحمله عاملها ناس ( مش اخوان بس بيحترموهم !! ) , هي و زياد العليمي , الحمله اسمها
( بدايه ) و انا مش عارف بدايه لإيه بالظبط ؟ أو بدايه بمعنى ايه ؟ هل تقصد مثلا نبدأ
ب مؤيدين خالد علي , اللي هما حمولة ميكروباص 18 راكب أو مؤيدين 6 ابريل اللي كانو
واقفين في الصحرا من كام يوم اللي هما حمولة ميكروباص 22 راكب و بعدين نكمّل بقى و
الناس تستجيب لنا و العدد يكبر و كده ؟ طب ما الأفضل يسموها حملة ( ميكروباص ) ؟!!.
أو بدايه بمعنى
بدايه لحراك سياسي ( حلوه حراك سياسي دي يا حاج محمد ؟ ) و حراك شعبي و جماهيري و عمل
ثوري يكسر الدنيا و يزنزن الزنازين بنفس حمولة الميكروباص .
.
عموما هي نظرية
اقتصاديه معروفه و لها وجاهتها , النظريه بتقول إحنا نجيب كتكوت و نربيه و الكتكوت
يكبر و يبقى فرخه و الفرخه تبيض 3 بيضات و البيض يفقس و يطلع 3 كتاكيت منهم فرختين
و ديك , الفرختين يبيضو و البيض يفقس و هكذا و نفضل نبيض و نفقس و نبيض و نفقس لحد
ما يبقى عددنا بالملايين و نكسّر ( الأقفاص ) و نغزو الشوارع و الميادين و نكاكي بقى
طول الليل قصدي نهتف !!.
.
على الهامش , شركة
nike عامله عروض جباره على الكوتشيات بتاعتها , الكوتشي
بيتراوح سعره من 750 ج ل 2000 جنيه , وانا و الله لسه فاكر فرحتي و سعادتي البالغه
يوم ماشتريت كاوتش أبيض قماش من باتا ب 6 جنيه و ربع و يوميها فضلت أجري بيه في الشوارع
زي اللي لقى مصباح علاء الدين عبد الفتاح المناضل السياسي .
.
أنا قولت أقولك
يا ست أسماء على عروض nike دي عشان ماليش فيها , و بعد
غربه 13 سنه في بلاد الله شكلي كده هرجع أدور على فروع لباتا في مدينة نصر , يارب يكون
الكاوتش لسه ب 6 جنيه و ربع .
.
أتاري إن مهنة
ناشط سياسي دي بتكسب أكتر من تجارة المخدرات و السلاح , و عموما الست أسماء و الأستاذ
زياد العليمي لو يأسو خالص من حملتهم و ماعرفوش يكملّو حملة الميكروباص أو حمولة الميكروباص
فأكيد هيسافرو تركيا او قطر أو أمريكا و احتمال تل أبيب و كله يهون عشان nike و عيون nike
.
.
و أكيد لما أسماء
و زياد يسافرو هيجاهدو و يناضلو من وراء البحار زي غيرهم و مش هيرجعو تاني و مصر تنضف
أكتر .......... ذهبَ الحمارُ بأم عمروٍ فلا رجعتْ ولا رجعَ الحمار .
.......................................................................................................................................
Mohamed
Hussein
26
أبريل 2015·
أمنت بالله , و
رفعت القبعه لناس ماكنتش بصدقهم , بس شوفت بعيني و اتأكدت , لأ , أغلب اللي بينتقدو
مصر لا عايزين يبنو ولا يزرعو , عايزين يهدو فعلا , مأجورين بقى ولا عفريت أزرق مش
مهم , مش قصتي .
.
اللي كل دقيقتين
ينشر خبر كاذب من موقع اخوانجي وسخ و يلاحق عالخبر بخبر تاني و تالت و عاشر , اللي
بيكتب عن حالات التسمم انهم 500 و نفسه يبقو 500 ألف ده مش ناشط سياسي ولا بيحب مصر
و بيتمنالها الخير ولا هو ناقد , ده باختصار اسمه ( *** ) , و اوعو تصدقو حكاية أصلنا
عايزين ننتقد الحكومه , اصلنا بنحلم بمستقبل أفضل لعيالنا و بنحلم بالحريه و الديموقراطيه
و العداله و كل الهري ده , إنسو , فيه بينكو ناس عايزينها خرابه , و عزة جلال الله
نفسهم تبقى خرابه و بيحاربو بإديهم و سنانهم عشان تبقى كده .
.
الفرق بين النقد
عشان تبني بلد و النقد عشان تهدها و تخربها هو باختصار شديد الفرق بين الوطنيه و الخيانه
.
.
يا شباب , لو سمحتو
مش عايز خاين على صفحتي حتى لو وصل عدد الأصدقاء عندي ل 3 هبقى راضي و مبسوط , و الله
بتكلم جد , اللي هيشتغل بطريقة أخبار مضروبه و مواقع مشبوهه يعملي بلوك من دلوأتي
, بالزوق يعني , بلدي مصر ( في الوقت ده تحديدا ) تبقى أهم من الصفحه و أم الصفحه و
صاحبها.
.
اللهم قد بلّغت
.
...................................................................................................................................
Mohamed
Hussein
25
أبريل 2015·
الورد له أوقات
يهجر و مايحبّش
و ساعات ماينطقشي
كأنه فرع عجوز
و الحب مش دوره
.
من فضلكم يا خلق
ما تسألوش الورد
و لا تجرحو شعوره
.
محمد حسين
...................................................................................................................................
Mohamed
Hussein
25
أبريل 2015·
السمك لسه بيلعب
.
خبر حلو عالصبح
, الحكومه تعلن انتشال 90 % من شحنة الفوسفات الغرقانه في النيل عند قنا .....طب و
الله خير , أفلحت إن صدقت .
.
الهري اللي حصل
على موضوع الفوسفات هو الدليل رقم 56734 على ان الناس بقو فريقين , فريق مستني أي جنازه
عشان يشبع فيها لطم , و بيكبّر و يضخّم كل حدث , و فريق بتاع كله تمام و احنا زي الفل
و اللي بيحب ربنا ييجي يتفسفت عندنا .
.
شحنة الفوسفات
كانت ماده خام , و فيها شوائب كادميوم و حاجات تانيه , الأضرار و المخاوف مكانتش بالصوره
اللي اتقالت , و على أي حال , نهر النيل مش برميل الطرشي اللي أي حاجه وقعت فيه بتعمل
له طعم مستحب , كان المفروض تفكيرنا بدل الهري و الهري المضاد ينحصر في حاجتين الحكومه
مسئوله عنهم , الحاجه الأولى هي اتهام بالإهمال عشان نقل المعادن اللي ممكن تسبب خطوره
ماينفعش يكون عن طريق النيل و المايه اللي بنشربها و بناكل السمك بتاعها و أساسا نهر
النيل مش ناقص .
.
و الحاجه التانيه
المسئوله عنها الحكومه هي التعامل و التعاطي و التفاعل مع المشكله بعد ما حصلت , كنت
اتمنى عملية انتشال الفوسفات تتصور فيديو عشان دي أهم , أهو شيلناه من النيل سواء بقى
كان فيه كادميوم و يورانيوم ولا كان فيه عسل و طحينه .
.
و معنى تصريح الحكومه
بانتشال 90 % معناه ان فيه 10% لم يتم انتشالهم و هنا محتاجين توضيح صغير , هي الكميه
دي لسه موجوده في النيل ( و هي نسبة أرحم بكتير من 100 % ) و انتو مش عارفين توصلو
لها أو هتاخد وقت و انتو شغالين ؟ ولا الكميه دي هي المواد اللي ذابت في ماية النيل
في الكام يوم اللي فاتو ؟ .... رجاء من السيد المحافظ بتاع ( السمك بيلعب ) يمتنع عن
التعليق و الرد , عشان التسمم مش معناه ان الواحد يشرب حاجه مسممه و يقوم طالع جري
عالمستشفى , أو سمكه تبطل تلعب , أبوس ايدك بلاش تتحفنا بتصريحاتك .
....................................................................................................................................
Mohamed
Hussein
25
أبريل 2015·
البنت اللي ماعندهاش
مانع انها تلبّس نفسها و سمعتها قضية اغتصاب و تعلنها على الملأ عشان بس تورّط رجال
شرطه أو حتى رجال مطافي , البنت اللي بالوصف ده تبقى جابت أخر قاموس الوساخه الخاص
بالبنات يعني داست على كل ذرّة حياء و كرامه و كل الجينات اللي ربنا خلقها في الأنثى
, و الحكايه دي ماتلاقيهاش إلا عند حرائر الإخوان هههههههههههههههه حلوه كلمة حرائر
دي ؟ حلوه يا حاج محمد ؟ .
.
و الأب اللي ماعندوش
مانع ان بنته تعمل كده , بالعكس ده بيشجعها , يبقى مش يستاهل القتل بالرصاص لأ , ده
من الأخر كده يستاهل فرج و برضه على الملأ و علنا و قدام الناس ( هو وبنته في سرير
واحد و ثالثهم فرج ).
.
واهو كله فداء
للتنظيم الإرهابي الدولي اللي هيطبق الشريعه الإسلاميه من مقره الحالي في لندن , بلد
الكفار أحفاد القرده و الخنازير , أه و الختمه الشريفه .
.............................................................................................................................
Mohamed
Hussein
24
أبريل 2015·
ديل الكلب
.
جريدة العربي الجديد
المملوكه للحكومة القطريه ( ديل الكلب ) و مقرها لندن و بيكتب فيها وائل قنديل و بلال
فضل و ريري سيلان و زيزي صديقة الطلبه و الناس المبدعين المثقفين أوي الثورجيه دول
.
.
الجريده كاتبه
مقال عن شحنة الفوسفات اللي وقعت في النيل , هذا و قدر صرح الدكتور فلان بأن خطورة
هذه الحادثه تهدد حياة أجيال كامله في مصر و تهدد بإبادة جماعيه حيث يحتوي الفوسفات
على يورانيوم و بلوتنيوم و خشمونيوم و خرمونيوم مشعّ !! .......... مممممممممم و كلام
حلو زي كده .
.
بس الناس دي مش
عندها ابداع و الله , يعني هي الحكايه مش إباده بس , ياريتها جت على أد الإباده , أنا
توقعي ان الفوسفات ده هيتسبب في موت كل أنواع الحياه على أرض مصر بما فيها الإنسان
و الحيوان و الإخوان و القرود و الشمبانزي و شجر المنجنيز الأحمر , و بعدها ب 3 ايام
هتظهر سحلية عملاقه في امبابه و تاكلنا كلنا , السحليه هتكون اتعملقت كده نتيجة تغييرات
جينيه في الدي ان ايه و الدي دي تي أدت لظهور طفره في نوع معين من انواع سحالي الحقل
, بعدها نبدأ مشهد the end
of the world
.
.
طب تصدقو بالله
؟ , أنا لما قريت المقال خوفت من حاجه واحده , إن أمريكا تقرا المقال ده ( ده طبعا
بفرض ان مش هي اللي كاتباه ) , و بعدها على طول تبعت هانز بليكس و البرادعي للبحث عن
اسلحة الدمار الشامل الفوسفاتيه في مصر , و على الفور اتصلت باخويا في البلد و قلت
له انا كنت شايفك أخر مره جايب شكارتين فوسفات للأرض حاول تتاويهم دلوأتي عشان اللجنه
بتلف و البرادعي مش بيرحم أبوه .
.
مصر يا ولاد تمتلك
اسلحة دمار شامل فوسفاتيه و أخرى من غاز البوتاسيوم , و خامس بوتاس الفاسيوم , ماتقولوش
لحد بقى عشان الموضوع ده توب سيكريت .
....................................................................................................................................
ليست هناك تعليقات:
إرسال تعليق