Mohamed Hussein
31 أغسطس 2019
قوتنا الناعمه
.
- مصر الدوله الأعرق في التاريخ بنت القاره السمره الجميله , مصر الأفريقيه .
.
طب هي الرياضه جزء من القوه الناعمه للدول ؟
- أه طبعا و جدا كمان , و إن اسمك و علم بلدك يتحط في أول سطر ده مهم أوي, مش بس في دورة الألعاب الأفريقيه الحاليه اللي مصر فازت فيها باكتساح , إنما على مستوى كل البطولات القاريه , في كرة القدم مثلا منتخب مصر له رقم قياسي في بطولة أفريقيا , و في الأنديه الأهلى و الزمالك أصحاب الأرقام القياسيه , و في اليد و الطايره و خلافه هتلاقي الترتيب دايما فيه سطر أولاني محجوز بإسم مصر .
.
- قوتنا الناعمه في القاره الأفريقيه بتشمل التعليم و الوعي والثقافه , و رغم رغبتنا و حرصنا و مطالبتنا كلنا بتطوير التعليم , إلا إني عمري ماحسيت في يوم من الأيام إننا على المستوى القاري فيه دوله بتسبقنا , بغض النظر عن ( الغرغره الفكريه ) بتاعة شوية الصيع اللي بيعشقو جلد الذات و تقزيم مصر , معلش معلش , سافر كده مع أي مواطن لدوله افريقيه من نفس المهنه وفي نفس المجال و اشتغلو في دولة اجنبيه وشوف مين فيكو أفضل أو خلّي الخواجه يحكم بينكو , انا شخصيا و في مهنتي ماحسيتش إنه فيه أفضل مننا لا من دولنا العربيه ولا من قارتنا السمره , يعني احنا أول سطر في التصنيف.
.
- قوتنا الناعمه كمان بتشمل قدراتنا الإقتصاديه و السياحيه و خلافه , ولما التقارير الدوليه تقول ان مصر مرشحه في 2030 انها تبقى من أكبر 10 اقتصادات في العالم ف ده معناه إننا هنكون بلا منافس أكبر اقتصاد في أفريقيا و أول سطر في الجدول .
.
- وطبعا من أهم بنود قوتنا ( اللي مش ناعمه المرادي ) هي الجيش المصري العظيم و ترتيبه الأول عربيا و أفريقيا بلا منافس , و من أقوى جيوش العالم , يعني أول سطر.
.
- بالمناسبه , من ضمن قوتنا الناعمه المهمه جدا في القاره السمراء , الأزهر الشريف و الكنيسه المصريه و جمال عبد الناصر , أه هو زي ماحضرتك قريتهم كده , عندك تحفظ او اعتراض أو أو مع أيا من الكيانات التلاته ؟ وماله ده حقك , بس تقوله بأدب و بعلم ( مش هبد ) وباحترام للكيان , طب هو جمال عبد الناصر كان رئيس دوله ولا كان كيان ؟ لأ كان كيان .
..........................................................................................................................
Mohamed Hussein
31 اغسطس 2019
قطر : جاهزون لمواجهة أي مخاطر بجيش متمكن بسط أجنحته شرقا و غربا !! , هذا و قد صرح وزير الدفاع القطري أأا .
..................
بس بس , بسسسسس , كفايه , يا عم الله لا يسيئك , الله لا يسيئك يا شيخ , احنا ناس ورانا دخلة مدارس و سابلايز و كتب خارجيه و تيكيت و جلاد ألوان و أستيكه بريحة الفراوله يعني مش فاضيين نضحك ولا نهزر ولا نهرش حتى .
.
و بعدين صنف إيه ده اللي بيعلى بالدماغ أوي لدرجة بسط أجنحته ؟ قطر و أجنحته و جيش !! , الأستروكس نفسه مابيعملش كده , ولا ماية الجوزه , و أنا درست كتير و قليل في علم الحيوان و أول مره أعرف إن النمله لها جناحات و بتبسط جناحاتها , طب ماتبسطهاش بقى أكتر من كده ألّا تخبط في البرازيل ولا حاجه
.
بقولك ايه يا معالى صاحب المؤخره العريضه وزير دفاع الكشك القطري , ولو فيها رزاله يعني , انت عندك قواعد أمريكيه و جنود أتراك و ميليشيات حرس ثوري إيراني بيحمو الكشك من عصابة الولاويله الحمره و من هجمات السلطعون المتكرره , إيه رأيك بقى نستغل الجيش القطري (و أجنحته ) في حاجه مفيده غير إنه بيلم الزباله من قاعدة العديد الأمريكيه ؟
.
ايه رأي معاليك لو تبعت لنا الكتيبه القطريه بتاعة كومار الهندي و الكتيبه بتاعة معاوية السوداني , كتايب الجيش القطري أبو جناحات , كتيبة كومار تخطف رجلها لحد الفجاله تلم لنا شوية الكشاكيل و الكراريس من هناك , و كتيبة معاويه السوداني تلف لنا على لانش بوكس تكون خامتها حلوه و سعرها في مستوى المواطن المفحوت عشان البت لمار بنتي مش بتبطل زن على وداني , و أهو يبقى الجيش القطري المجنس أبو جناحات عمل حاجه مفيده في حياته .
........................................................................................................
Mohamed Hussein
30 اغغسطس 2019
السيسي بيحكم مصر من 5 سنين , مافتكرش إن الراجل ده قعد يومين تلاته على بعض في قصر الرئاسه يقابل وفود و يشرب شاي و قهوه ويتمطع و يقرا جرنان , دايما بنلاقيه كده ( ربنا يحميه و يحفظه ), طيارته طالعه على اوروبا , و بعدها امريكا و بعدين رجع على أفريقيا و بعدين طلع عالصين و هوبا تلاقيه في روسيا , ولما بيقعد في مصر يومين بيصحى الفجر و نتفاجئ بيه مثلا في الجلاله أو العلمين أو بيزور الكليه الحربيه أو قاعد وسط ألاف الشباب في مؤتمر من المؤتمرات بيسمعهم أو في قاعدة محمد نجيب في الغرب او عند محطات سيمنز في الصعيد , بيفتتح مشروع أو طريق أو حاجه ضخمه ماكناش أصلا سمعنا عنها قبل لحظة الإفتتاح .
.
بتخيل مبارك كان بيعمل ايه بالظبط لما كان بيحكم مصر ؟ يصحى من النوم و يجيله الفطار , و هو بيفطر يدخل عليه زكريا عزمي
أخبار أوروبا إيه يا زكريا ؟ زي الفل ياريس و بتسلم على معاليك , طب تمام .
أفريقيا عامله إيه يا زكريا ؟ أفريقيا بتبوس الأيادي يافندم , طب تمام
الصين أخبارها ايه يا زكريا ؟ الصين حلوه ياريس و باعتالك سلام والله
أخبار شبابنا إيه يا زكريا ؟ شبابنا 100 فل و عشره و بيشكرو في سيادتك .
.
أخبار مشاريعنا القوميه و بنيتنا التحتيه ايه يا زكريا ؟ أكيد زي الفل و بتسلم عليا و بتبوس الأيادي ؟ أه صح ياريس , سيادتك عرفت إزاي ؟
إلا عرفت إزاي ؟ مانا بقيت مذاكر كويس يا زكريا.
الله عليك ياريس ربنا يحميك , هو فيه حد في مصر كلها مذاكر قد معاليك ؟ .
............................................................................................................
Mohamed Hussein
29 اغسطس 2019
وزير خارجية ليبيا : نستهدف إستيعاب مليون عامل مصري في خطة إعادة إعمار ليبيا !! .
.
ماهي قطر و تركيا مش هيتجننو و يشدو في شعر راسهم من شويه , عشرات المليارات من الدولارات رموها عالأرض هناك , جابو ألاف الإرهابيين و المرتزقه من الدول الأفريقيه الفقيره , موّلوهم بالفلوس و بالسلاح , حاولو بكل الطرق إن ليبيا تفضل أرض محترقه و جبهه مفتوحه على حدود مصر بطول 1200 كيلو متر .
.
تقوم مصر تدعم المشير خليفه حفتر و يشكلو نواة الجيش الليبي ( تقريبا بدأ ب 300 جندي ) لحد مابقو حاليا مسيطرين على 90 % من الأراضي الليبيه , وطبعا مصر بدفاعاتها الجويه و قواتها البحريه بتساعد في حماية المياه الإقليميه و الأجواء الليبيه من بلطجة الصايع خليفة الشواذ .
.
الحكايه بالنسبالنا كانت ولا زالت أمن قومي , مش بس إن دوله عربيه شقيقه حدوديه تكون مستقره أمنيا و سياسيا ولها جيش مسيطر على الأرض وبالتالي نقفل الحنفيه اللي كانت مفتوحه علينا من ناحية الغرب , إنما كمان حكاية إعادة الإعمار , شركات مصريه و عماله مصريه و دخل من العمله الصعبه سنويا أعتقد يعادل دخل مصر من قناة السويس .
................................................................................................................................
Mohamed Hussein
· 29 اغسطس 2019
على فكره بقى أنا اسمي الحقيقي جرجس المقدس و بيدلعوني يقولولي يا محمد يا حسين , يعني ورقي متستف و زي الفل و إقامتي جاهزه , و يمين بالله قصدي و المسيح الحي ما هقبل بأقل من شاليه في المعموره .
.
فيه كلام كمان إنه بيتم حاليا ترحيل الزملكاويه إلى خط القناه عشان يعملو دولتهم هناك نواحي بورسعيد واسماعيليه في إطار خطة السيسي لتقسيم و تقزيم مصر , و أي حد هيلاقوه في القاهره أو خط الصعيد لابس تي شيرت الزمالك أو معلق صورة طارق حامد في الأنتريه هيتم القبض عليه من شرطة السيسي و ترحيله إلى دولته البورسعيديه عن طريق الإنتربول .
.
عموما انا كده مفيش عليا مشكله , هرشق في اسكندريه بصفتي جرجس أو في بورسعيد بصفتي زملكاوي , أهو كده بحر و كده بحر , جاهز يافندم , عوامتي البطه في إيدي و سنارتي في الإيد التانيه .
......................................................................................................................................
Mohamed Hussein
26 اغسطس 2019
مابين ( عَبْد الدُره ) و ( الست المنقبه اللي بتخطف العيال الصغيره ) ..
.
الوعي يا بني أدمين هو عكس الغيبوبه , الدماغ الصاحيه عكس دماغ البانجو , و الطيبه و البراءه شئ جميل , إنما السذاجه و العبط لأ , و عشان تخدم عدوك مش ضروري تكون خاين أو عميل , يكفي جدا إنك تكون غبي أو عبيط أو برياله .
.
زمان و احنا عيال صغيرين لما أهالينا حبّو يخوفونا من اللف في الغيطان لوحدنا اخترعو لنا حدوته مخيفه اسمها ( عبد الدره ) , راجل اسمر ضخم بيبقى مستخبي في الدره , له أنياب و بياكل العيال الصغيرين , احنا بقى نسمع الحدوته و نخاف و مانلفش كتير خصوصا في الغيطان اللي مزروعه بزرعه عاليه زي الدره , أهلنا وقتها كان لهم مبرر , لاننا كنا حرفيا أطفال أشقيا و صعب جدا السيطره علينا , و خوفهم كان اننا نستخبى في غيط و ننام او نقع و يغمى علينا أو أو و بالتالي يبقى صعب جدا يوصلو لنا , يعني لهم مبرر و منطق .
.
الحقيقه افتكرت الحكايه دي وانا عمّال بقالي كام يوم بقرا افتكاسات عن ست منقبه بتخطف العيال الصغيرين و يسرقو أعضائهم , وقالك يا سيدي أنا كنت راكب عربيتي و بالصدفه البحته واقف في حته زحمه سمعت ست منقبه بتقول لست منقبه تانيه , الستات مابقوش ينزلو بعيالهم الشارع نعمل ايه يعني نروح نخطفهم من بيوتهم ؟ قامت التانيه قالت لها استني فيه ست هناك اهي و معاها عيل صغير , دخلو السوبرماركت و دخلت المنقبه وراهم و رشت حاجه كده على وش الواد الصغير قام متخدر على طول و قامو خاطفينه عشان يبيعو اعضاؤه , يوووه , لا نسيت , صاحب القصه و الهبده لحق الموقف و أنقذ الطفل من براثن الست المنقبه , ستوب , كت , هايل يا ولاد الصرمه .
.
يا أهل الله , يا بني أدمين , يا خلق هوووه , مفيش حاجه بتترش في شارع تقوم تخدر عيل وإلا مكانش حد غلب , ورحمة أمي مافي , في الأفلام بس , و مفيش ست هتسرق طفل على باب سوبرماركت و هو ماسك ايد أمه , و ماعندناش زراعه أعضاء بالشكل اللي حضرتك ممكن تتصوره ( سوق كده وفيه طشوت مليانه فشش و كلاوي و قلوب طازه , و كام دكتور واقفين بالسكاكين و العيانين نامين على حصيره ) , ماهي الرحمه حلوه برضه و العقل زينه و عهد الله .
.
طب ايه الحدوته ؟ الحدوته يا مولانا و بهدوء شديد , لو فيه حادث خطف حصل بالفعل فالمؤكد إن فيه ألف قصه اتكتبو , يعني ايه ؟ يعني 999 قصه من الألف اللي حضرتك قريتهم كلهم هبد من وحي تأليف الصايع اللي بيألفها , طب ليه بيألفو قصص ؟ بالنسبه للصايع هيكفيه شوية لايكات و شوية فولورز يزيدو , لكن بالنسبه لأعدائك فالحكايه منظومه كامله و الترويج لها غرضه بث الرعب والخوف في نفوس الناس , حرب نفسيه يعني , فلو سمحتو ماتبقوش متخرجين من الجامعه و شهادات متعلقه عالحيط و تنشرو الهبل ده , لو سمحتو بلاش الطيبه تقلب بسذاجه و تبقو بتساعدو أعداء البلد و شوية الصيع , لو سمحتو اكبرو واعقلو شويه واتخلصو من إدمان اللايك و الشير , اقرو و فكرو الأول , شغلو دماغكو , ده حتى البانجو مضر بالصحه و بالمجتمع وبالبلد دي اللي كل ذنبها في الحياه إنها خلفتنا .
.......................................................................................
Mohamed Hussein
· 25 اغسطس 2019
شوفت كتير أوي من النوعيات دي
...............................
إمتى هقول عليك إنك عجينه طريه و دماغك فاضيه من جوه و أي إيد تشكّلك على مزاجها و أي شوية هوا يطيروك ؟
.
- لما تسافر الخليج سنتين تلاته و ترجع بعدها لابس جلابيه و شماغ و شبشب جلد و ترطن بالخليجي و تقول سياره و دباب و الحرمه و الأهل و أبغي , و تحسسنا إنك ثري عربي جاي و سايب وراه بير بترول هناك .
.
- أو لما تسافر سنتين تلاته لأوروبا و تيجي تلزق نضارة الشمس في وشك و السلسله في رقبتك و تعوج لسانك برضه وتتأفّف و تتريأ على كل حاجه و أي حاجه , و تفتي في الكباري و الطرق و معدات الحفر التقيل و كأنك مثلا خبير ألماني بتشغل منصب مدير فرع شركة كاتربيلر الأمريكيه العملاقه في برلين , مع انك في الحقيقه كل شغلتك هناك انك بتغسل صحون في مطعم درجه رابعه و أخر الليل بتسيأ المحل .
.............................................................................................
Mohamed Hussein
25 اغسطس 2019
الغيره وحشه أوي خصوصا في الوسط الفني , و تقريبا كده والله أعلم إن الفنان محمد رمضان لما شاف الألبوم بتاع عمرو دياب الأخير و عرف إن البنات بيفتفتو الفتافيت قامت الغيره مسكته و قرر إنه يعمل حاجه أنقح من عمرو دياب , فراح مشرشب الشراشيب , شرشبو الشراشيب و شرشبوني ( والله تنفع أغنيه ).
.
بيقولك يا سيدي في مره كده زمان , طفله صغيره اسمها أم كلثوم قابلت طفل صغير اسمه رياض السنباطي على محطة القطر في المنصوره , الطفله سألت الطفل , انت بتعرف تغني ؟ قال لها ماعرفش , قالت له طب السمّيعه بيقولو عليك ايه ؟ قال لها السميعه اللي شوفتهم مابيعرفوش يسمعو !! .
.
والله يا أستاذ رياض و ربنا يبشبش الطوبه اللي تحت راسك يعني إنت و الست , عايز أقولك ان السميعه الأيام دي بقى , في عصرنا الحالي الجميل, لا بيعرفو يسمعو ولا بيعرفو يشوفو ولا حتى بيعرفو يحسو
..............................................................................................................
Mohamed Hussein
25 اغسطس 2019
مين كان يصدق ؟
.
- في 2011 مظاهرات و ثوره و هري و معجنه و تخريب و أي 3 عيال قاعدين على قهوه بيشكلو وزاره و يتكلمو في الأمن القومي و التحالفات و العلاقات الدوليه و البنيه التحتيه مع إن أذكاهم مابيعرفش يفك مسمار قلاووظ بمفك ولو سألته عن الجاحظ هيقولك ده السمكري اللي فاتح جنب اندريه بتاع الكبده , طب مين يابني جورباتشوف ؟ أه ده الباك الشمال بتاع منتخب يوغسلافيا في السبعينات .
.
- في 2012 سحنات بتطلع عالشاشه , لا هي مننا ولا نعرفها , البلتاجي عايز يمسك المخابرات و أم أيمن تمسك حقيبة الخارجيه تقريبا , و عناصر حماس المسلحه في مكتب الإرشاد , و رئيس بدرجة سكرتير مرشد بيقول أهلي و عشيرتي كأنه لامم شوية عيال في جُرن و بيخطب فيهم , و نحافظ بقى على حياة الخاطف و المخطوف وفجأه تلاقي شوارعنا اتملت منقبات و ملتحين راكبين عربيات حديثه وييجي في ذهنك سؤال منطقي , هي الناس دي اتنقبت و إلتحت فجأه و ربنا هداها و كان عندهم أصلا عربيات زيرو, ولّا هما منقبين وملتحين من الأول و العربيات دي لقيوها في البخت ؟! .
.
- في 2013 قرر الشعب المصري انه ممكن يستحمل أي حاجه إلا اللعب في جينات و هوية البلد دي , ممكن ناكل قش بس مانلاقيش شوية صيع محاصرين المحكمه الدستوريه العليا أو بيسحلو شيخ مسن من بيته في الشارع بحجة إنه شيعي , ممكن نستحمل أي حاجه في مقابل إننا نفضل مصر , الدوله , اعظم و أقدم دوله في التاريخ , مش الطابونه ولا جُرْن الهبله .
.
- كنا عارفين ان الفاتوره هتبقى كبيره لما تقرر انك تحط جزمتك على رقبة أقدم و أقذر تنظيم إرهابي صهيوني في التاريخ , كنا عارفين إن أمريكا و بريطانيا و اللوبي الصهيوني اللي بيحكم العالم مش هيسيبنا في حالنا لو قررنا نتخلص من صبيانهم , طيارة روسيا تنضرب في سينا و طيارة مصر للطيران تنضرب وهي طالعه من باريس , لوي دراع اقتصادي و علاقات وصلت لأدنى مستوياتها .
.
- في نفس الوقت مضطرين لإصلاحات اقتصاديه عاجله عشان جوز الست كان بيشتغل بطريقة احييني النهارده و موتني انا و عيالي بكره , وساب لنا تركه هباب , قطاعات كلها بتخسر , بنيه تحتيه صفر , و هشتكه للزبون , وميزانية دوله نصها بالظبط بيطير في الدعم و تسديد فوايد القروض و ربعها مرتبات ل 6 مليون موظف , ربطنا الحزام و دفعنا فاتورة سنين كتير سابقه جنب فاتورة عدم الرضا من اللوبي الصهيوني ( إرهاب و تخريب و تشويه و حرق و تحفز و إبتزاز وميديا عالميه و منظمات لامؤاخذه حقوقيه تقاريرها جاهزه ومتستفه ) .
.
- 6 سنين خدو من جتتنا راق و خدو من روحنا حته لحد ما عدينا و شمينا نفسنا و وقفنا على رجلينا من تاني كدوله ( دوله وصل الاحتياطي النقدي بتاعها في يوم من الأيام ل 13 مليار و كانت على وشك اعلان افلاسها ) , عدينا بمئات الشهداء و ألاف المصابين , شباب زي الورد , عدينا بصعوبات اقتصاديه و أيام مرت صعبه جدا على ناس كتير , عدينا بتفنيد و شرح لملايين الإشاعات و الأخبار المضروبه و القصص اللي بتتألف في ساعة عصاري .
.
- مين كان يصدق إن مصر تعدي من الطوفان ده ؟ و ييجي علينا يوم واتنين و اسبوع نبقى مش مهتمين نشوف أخبار سياسيه , مش مهم خالص , احنا ممكن نكتب عن الحب و الخير و الذكريات الجميله و نحكي حواديتنا , ماحنا وصلنا ل 2019 , و الخطه أصلا كانت إننا مانوصلش ل 2019 , و بالمناسبه أغلب دول الربيع اللامؤاخذه العربي ماوصلوش ل 2019 لسه , و قدامهم 50 سنه على بال مايوصلو .
.............................................................................................................................
Mohamed Hussein
24 اغسطس 2019
غابات الأمازون تحترق و دي بتنتج خُمس الأكسجين بتاع كوكب الأرض !!.
.
خطه في منتهى الذكاء عملها السيسي و المخابرات
- غابات الأمازون تحترق
- يقوم الإكسجين في الغلاف الجوي يقل
- يقوم يحصل عندنا نقص كبير في مستوى الأكسجين اللي بنتنفسه
- يقوم الراجل لما يبوس مراته يتخنقو هما الاتنين و يموتو ( لو البوسه طولت شويه)
- و بكده نبقى حددنا النسل و قللنا عدد السكان , و الساعه بتاعة التعداد السكاني اللي في صلاح سالم دي تشم نفسها شويه وتستريح و تشرب بؤ مايه, عشان هي بصراحه كانت قربت تنفجر و تحدّف العربيات اللي ماشيه في صلاح سالم بالطوب .
.................
مممممممممم الخوف بقى إن المصريين ينتبهو للخطه دي و يعندو و يقررو إنهم يخلفو من غير ما يبوسو , و الخطه كلها تفشل , و ساعتها السيسي هو اللي هيجري ورانا في الشارع و يحدّفنا بالطوب
...........................................................................................................................
Mohamed Hussein
24 اغسطس 2019
بره الصندوق , بشويش و بهدوء
.............................. ثقافة التنكر و طمس الهويه ............................
1- لما بطنك بتوجعك بتروح لدكتور مش لسباك , ولما بتحب تبني بيت بتروح لمهندس مش لعازف جيتار , الحكايه دي اسمها التخصص , بالراحه خالص اهو .
.
2- في الدين الإسلامي عندنا مؤسسه عريقه اسمها الأزهر الشريف , بيرأسها أعلى قامة إسلاميه في العالم اسمه فضيلة الإمام الأكبر .
.
3- لما اتسأل عن النقاب قال بكلام واضح , لا فرض ولا سنه ولا فضل , إنما بيندرج تحت بند العادات ( الفيديو موجود على يوتيوب تقدرو تشوفوه ) .
.
4- و بما إني سمعت رأي شيخ الازهر, يبقى من حقي أقول رأيي من جهه تانيه , النقاب في شوارع المدن تحديدا ( لأن الناس ماتعرفش بعض ) مايبقاش تدين , حتى لو كان ظاهره كده , إنما بشوفه تنكر و طمس للملامح و الهويه , هوية حضرتك هي وشك اللي بيبقى في صورة البطاقه , ملامح الوش , من حقك تشوفي ملامح وشي في الشارع عشان لو ارتكبت مصيبه تعرفي تجيبني وانا نفس الشئ .
.
5- عيلتي كلها مابين منقبه و محجبه , يعني حتى مفيش حد في عيلتنا كاشف شعره مع كل احترامي للي كاشفين شعرهم ( عشان بس البؤ الحمضان بتاع انت عايز الناس تبقى متبرجه و عريانين و الهجايص دي ) .
.
6- التنكر و طمس الهويه مش بيقف عند النقاب بس عشان برضه حضرتك تعرف إني بتكلم على مبدأ أعم و أشمل , إسمك كمان ممكن يندرج تحت بند التنكر , لما تسمى نفسك أبو حفص ( وانت اصلا مش مخلف بنات ) , و أي هجايص ظاهرها إنها كنيه مستحبه لكنها في الحقيقه تنكر و طمس هويه , لو سمحت احنا محتاجين اسم سيادتك , فلان ابن فلان ابن فلان , زي ماحنا محتاجين ملامح وشك و ملامح وشي و اسمي ( احنا هنا مقصود بيها المجتمع و البني أدمين ) .
.
7- فيه مثال للتوضيح , لما اخترعو الفيس بوك , المصريين عملو مليار اكاونت , منهم 999 مليون أكاونت مضروبين , كلهم باسماء وهميه ( ثقافة التنكر ) , اوعى تقولي ان ده تدين (قلبي لزوجي و حجابي سر سعادتي و التنين البائس و ثاني اكسيد الكربون ) , أي اسم تتنكر بيه و بالتالي تعك و تعجن زي مانت عايز و محدش هيعرف يجيبك , بالمناسبه انت كده لا متدين ولا جبار و بتمشي عالحيط , يعني مش أبو زيد الهلالي و لا الخنساء ,أي عيل صايع أو عيله صايعه ممكن تعمل يوميا 17 اكاونت بأسماء مضروبه .
.
8- على مدار 1400 سنه كانو المصريين بيعرفو بعض بأساميهم الطبيعيه اللي في البطاقه و شهادة الميلاد و بيعرفو بعض من ملامح وشهم , لا كان فيه نقاب ولا أسماء مستعاره ولا كنيه , ولو كان ظهر الفيس بوك وقتها كانت الناس هتدخله بصورها و أسمائها الحقيقه , 20 جيل عاشو و ماتو مسلمين , مش كفار ولا حاجه , ولا الإسلام دخل مصر من 40 سنه هو والمروحه والكاسيت أبو روحين .
.
9- هل فيه جهات أو كيانات كانت حريصه على فكرة التنكر و طمس الهويه ؟ اه طبعا , مش محتاجه عبقريه , الجماعات اللي شغلها كله تحت الأرض و بره القانون هتكون حريصه جدا على كده , مانت المفروض ماتستغربش ان رجالتهم لما بيحاولو يهربو بيلبسو نقاب , و أكيد مش من التدين إن الراجل يلبس نقاب !!.
.
10- طب هل الحكايه دي كان لها غرض أشمل من كده ؟ في رأيي الشخصي أه , كانت محاوله ( بائسه ) لطمس هوية بلد بحالها , أعظم دوله في الكون , بلد نفرتيتي و مينا و أحمس وشجرة الدر وعبد الناصر و أم كلثوم تتقزم و تتضائل و تبقى مجرد أفغانستان أو صومال , مع كل و كامل احترامي للجميع .
.......................................................................................................................
Mohamed Hussein
23 اغسطس 2019
مانا قلت لكو من سنين , ريهام سعيد شخصيه مختله عقليا , مريضه نفسيا , جاهله و غبيه , لا تصلح إنها تكون إعلاميه في مصر ولا في بوركينا فاسو ولا تصلح حتى إنها تقف على عربية تين شوكي , بس انتو اتخدعتو بشوية الدموع المصطنعه بتاعة التماسيح وشوية المحن و شوية السهوكه وشوية الماكياج و شوية الملامح البلاستيك .
.
الغريب إني لحد دلوأتي مش عارف هي موجوده ليه ؟ و ليه سحنتها و جليطتها مفروضين على الناس ؟ هل مثلا ماسكه سيديهات عالبلد دي ؟ هل احنا مديونين لها ولازم نسدد الدين اللي في رقبتنا ؟ هل اسمها مكتوب في الدستور و احنا مانعرفش ؟ ولّا تكونشي تقرب لفلاديمير بوتين و موصّي عليها جامد و احنا بنحاول يعني بقدر الإمكان نحافظ على علاقتنا بروسيا ؟!.
................................................................................................................
Mohamed Hussein
23 اغسطس 2019
أرقام و إحصائيات
.
1- أسرع شئ في الكون مش الضوء ولا الصوت و لا الطياره النفاثه ولا محمد صلاح في الهجمه المرتده , أسرع شئ في الكون هو سرعة الراجل لما يشوف مراته داخله عليه و جايه ناحيته و يبقى عايز يعمل تسجيل خروج من البرامج اللي فاتحها , و ماتعرفش ليه يا اخي وقتها اللاب بيهنج و الإيد بتترعش و النت اللي كان ماشي معاك زي السكينه في الحلاوه بيبقى في اللحظه دي أتقل من دم الخليل كوميدي و مي عز الدين مجتمعين .
.
2- أعلى معدل في الكون مش معدل البطاله في السودان ولا معدل التضخم في فنزويلا ولا معدل الجريمه في شيكاغو ولا معدل الإنجاب عند جدي حسين الله يرحمه هو و عياله , أعلى معدل في الكون هو معدل الزن عند مراتك لما تكون عايزه تشتري حاجه وانت مش معاك فلوس , المعدل ده بيزيد و يعلى و يعمل شألباظات طالما مش معاك فلوس , و صدقني أول مايبقى معاك و تشتري الحاجه اللي كانت هتموت عليها بتقوم رامياها في الدولاب و ماتلبسهاش .
..........................................................................................................................
Mohamed Hussein
22 اغسطس 2019
يوم خميس خمس بنات
دخلو عليا الصيدليه و ندهولي
قالو لي عندك فلورست ؟
قلت لأ و لو عندكو هاتولي
فتفتو الفتافيت بإيديهم الحلوين
واحنا لسه من يادوب ماسحين
بنت منهم بصت وقالت لو سمحت
قمت انشرحت وقلت لها قولي
قالت انت جميل اوي و تري جانتي
قلت لها ميرسي خالص و عهد الله ميرسي
...............................................................................................................
Mohamed Hussein
21 اغسطس 2019
أمَمٌ أمثالكم
.
دول أصحابي الجدد اللي حكيت لكو عنهم , قلت أعرفكو عليهم بقى , والحقيقه في الفتره اللي فاتت اكتشفت إن القطط والكلاب ماينفعش تحطهم تحت كاراكتر واحد و شخصيه واحده , لا خالص , كل واحد منهم له شخصيه مختلفه عن التاني , بتبان بمرور الوقت
.
سوسن , القطه اللي في حوض الزرع جنب الشجره كان عندها ولاد صغيرين و كبرو , هي نفسها شخصيتها اتغيرت , وعشان البنات عندي مهتمين بيها جدا و بيشوفوها دايما قدام البوابه و يحطو لها جبنه نستو بقت طماعه و مش عايزه قطه غيرها تاكل , لا في الناحيه دي من الشارع ولا الناحيه التانيه , الإهتمام المبالغ فيه أحيانا بيجيب نتايج عكسيه .
.
محاسن , لها شخصيه عجيبه , هاجس الخوف عندها اهم من الأكل والشرب , لما خلفت اختارت تولد في جنينه بتاعة شقه محدش ساكن فيها , مستخبيه على طول هي و عيالها في الجنينه دي ورا السور , مش بتطلع تلقط رزقها زي بقية القطط , عشان كده هي اكتر قطه بتاكل من ايدي هي و ولادها لما بنادي عليها , بينطو بحركة سريعه جدا يوصلو عندي و ياكلو بنهم و يرجعو للمكان الأمن بتاعهم تاني .
.
عنتر , ده الكلب الأبيض المنقط اللي واقف ورايا , كل مابيشوفني بقرب من البيت ييجي جري و يقف لحد رقبتي فوق و يشوف اي حاجه في ايدي يمكن تكون حاجه بتتاكل , عنتر طيب جدا و عشان هو طيب راح جاب شيبوب , الكلب الدهبي اللي قدامي , واتصاحب عليه وقاله تعالى عيش معايا هنا , و كانت المفاجئه ان شيبوب شرس عكس عنتر , و لو الأكل قليل و هيتخانقو عليه , شيبوب بيكسب و عنتر بيخاف و يبعد ( مع إنه صاحب الدار ) .
.
زينه بقى أكتر قطه بحبها , السمره اللي في حوض الزرع لوحدها , زينه نظرها ضعيف و كان عندها بنت كفيفه عمرها شهرين , كنت بحب بنتها جدا حتى في مشيتها , عشان هي كفيفه بتيجي عالصوت و تفضل ماشيه تترقص كده لحد ما حاجه توقفها , الحاجه دي غالبا بتبقى رجلي اللي بحطها في طريقها عشان تقف , وبنت زينه للأسف في يوم اختفت و عرفنا من بواب العماره انه فيه كلب عضها في رقبتها و ماتت , كان رد فعلي السريع جدا لما سمعت الخبر هو إني قلت , مستحيل يكون الكلب ده عنتر ولا شيبوب , وفعلا طلع كلب غريب و مسعور جاي من بعيد , طلبو له الطب البيطري وجم خدوه , طب ليه انا أجزمت ان اللي عمل كده مش عنتر ولا شيبوب ؟ عشان و بغض النظر عن قوانين الطبيعه و قانون الغابه و خلافه , عندي قناعه أن الحيوانات مايعضوش في بعض طالما بينهم عيش و ملح , الإنسان بس هو اللي ممكن يعمل كده
.................................................................................................................................
Mohamed Hussein
21 اغسطس 2019
بعد رائعة عمرو دياب ( يوم تلات ) , اللي بيقول فيها
يوم تلات تلات بنات ندهوني
ع البساط بصّات يا ناس عجبوني
فتفتو الفتافيت و فتنوني
.
انتظرو في الألبوم القادم لعمرو , أغنيه جديده بعنوان ( الساعه سته )
الساعه سته , سته ونص يعني
حبيبي سابني في الطريق و ودعني
لا لقيت ميكروباص أشبط فيه
ولا حتى توكتوك يرجعني
هو اللي باعني , أيوه هو
و المصحف هو اللي باعني .
....................................................................................................................
Mohamed Hussein
· 20 اغسطس 2019
راعي الغنم
.
- لما كان عمري 6 سنين اختارني جدي حسين ( سيدي حسين ) إني أسرح معاه بالغنم , و مات الله يرحمه من غير ماعرف هو اختارني انا ليه من وسط 20 عيل موجودين في البيت فيهم اللي قدي واللي أكبر و اللي أصغر .
.
- مش فاكر كنت بفطر ولا لا , و كنت بخرج من البيت وانا لابس شبشب في رجلي ولا حافي , كل اللي فاكره انه عندنا قطيع من الأغنام عددهم يمكن 30 موجودين في زريبه في أخر الدار , بنصحى بدري أوي انا و سيدي و نخرجهم من البيت , من وسط الأوض و نطلع نسرح بيهم في الأراضي الشراقي , و نرجع امتى بقى ؟ عالمغرب كده .
.
- وسط الأراضي اللي أصحابها جمعو محصولها بيبقى فيه بواقي أكل للخرفان و المعيز , طب و احنا ؟ احنا معانا ربنا بقى , ماهو أكيد كنتاكي و ماكدونالدز مش فاتحين فروع وسط الأراضي دي , أفتكر اني كنت باكل أي حاجه , قرن فول ناشف مثلا أكله أو أقسمه بيني و بين خروف , عود ملوخيه مزروع اكل منه , شجرة بتنجان منسيه وفيها بتنجانه صغيره نصها اخضر دي بالنسبالي تبقى طبق فاكهه .
.
- حكاية انك ترعى الغنم دي رغم إنها ماستمرتش كتير , تقريبا 4 سنين لحد ماجدي توفى و بعنا الغنم بعدها , إنما ذكرياتها محفوره جوايه , و دروسها عجيبه , مدرسه يا مولانا بتتعلم فيها و منها .
.
- لما نوصل لأرض و نستقر ان الغنم هتاكل هنا في اللحظه دي ممكن أقعد بقى لأننا مش هنمشي , وانا قاعد براقب حركة الغنم , بحسهم بيكلمو بعض , بيحبو يتلمو و هما بياكلو , بينادو على بعض بلغه محدش يفهمها .
.
- الوقت الطويل وانا قاعد جنبهم كان بيدّيني قدره غريبه على التأمل و التفكير , حتى بطونهم كنت باخد بالي منها , نفسي ياكلو أوي و يرجعو شبعانين , كأنهم أطفال صغيرين وانا امهم و ملزمين مني , كنت بفرح لما يخرجو الصبح بدري و بطونهم فاضيه مشفوطه لجوه كده و يرجعو و بطونهم مليانه , بحس اني عملت عمل بطولي .
.
- من أجمل اللحظات اللي كنت بعيشها , هي انه يكون فيه ( حولي ) يعني خروف أو نعجه صغيره اوي ماكملتش سنه ( جايه من كلمة حَوْل ) و ده كنت بضطر أشيله طول الطريق رايح جاي لانه بيتكعبل و هو ماشي , كنت بحب أشيله وامشي بيه , مع إننا اطفال زي بعض !! .
.
- و من أهم الدروس اللي ممكن تتعلمها في المدرسه دي , مدرسة راعي الغنم , درس اسمه الصبر , تفرده كده على مدد الشوف , وفين وفين على بال ماتقول أي , واحد هيسألني و يقولي طب و درس الصبر ده ممكن تستفيد منه بايه ؟ أقولك يا سيدي مثلا مثلا يعني , لما أخد البنات في محل ملابس عشان يشترو فستان أو طقم لكل بنت , و تفوت ساعه واتنين و تلاته و يقيسو و يغيرو و يبدلو و بعد ساعات ماتعرفش عددها تلاقي بنت منهم بتخبط على كتفي و تقولي بابا خلاص احنا مش عاجبنا حاجه في المحل ده , صدقني الحكايه دي محتاجه صبر مش أقل من صبر راعي الغنم الصغير
.................................................................................................................
Mohamed Hussein
19 اغسطس 2019
قليل من الهئ و المئ
.
منكوح حمره ماينفعش كان مثلا يبارك لمنتخب ناشئين كرة اليد بعد مافازو بكاس العالم و يسكت ؟ ماينفعش يبقى راجل و بني أدم طبيعي زينا كده ؟ , لا طبعا مايصحش , اومال يسيب المر*عه و العلو*يه لمين ؟ ده أكل عيشه في البؤين دول .
.
وقالك يا سيدي نفرج عن الشباب المعتقل , اللي هو إزاي يا مندوح ؟ اتحدى انه يلاقي رد أو جواب , ماعندناش شباب معتقل بسبب حرية رأي , يعني شاب دخل على صفحته و كتب انا بكره السيسي قام جه بوكس خده , و شاب دخل شتم الحكومه وقال أغبيا و مابيفهموش قام جه نفس البوكس خده , ماعندناش الكلام ده و منكوح عارف و متأكد , أي شاب في السجن هو شاب ارتكب جريمه أو جنحه حتى لو كانت جريمته حروف و كتابه , نشر الإشاعات و الأخبار الكاذبه اسمها جريمه مش حرية رأي , التحريض على الإرهاب و العنف و الحرق بشكل مباشر او غير مباشر جريمه مش حرية رأي , التحريض ضد جيش الدوله و أجهزتها الأمنيه جريمه مش حرية رأي , الدعم بأي شكل من الأشكال لكيانات و دول معاديه للدوله المصريه جريمه مش حرية رأي .
.
عموما و إجمالا , ليا سنين طويله كل مابشوف تويته لمندوح وأتخيله و هو بيكتب التويته مش بييجي في ذهني غير مشهد واحد بس مابيتغيرش , مشهد عاهره كبرت و عجزت بس لسه مصره تكمل في الكار بتاعها ( على طريقة اللي نعرفه احسن من اللي مانعرفوش ) فبقت تشتغل فتّاحه للزباين مع قليل من الهئ و المئ ( على قد صحتها يعني ) .
................................................................................................................
Mohamed Hussein
18 اغسطس 2019
مش لاقي كلام يوصف جمال الصوره دي ولا لاقي كلمة شكر تكفيهم و توفيهم , ده منتخب نيجيريا للناشئين في كرة اليد , كان مشارك في بطولة العالم اللي فازت بيها مصر النهارده , و من أول ماخرجو من البطوله و هما بيحضرو ماتشاتنا و يشيلو علم مصر و يشجعونا باعتبار إننا بقينا ممثل أفريقيا الوحيد في البطوله , دول أهلنا و ناسنا و تاج راسنا الأفارقه السمر الجُمال .
.
أتمنى من وزارة الخارجيه المصريه و من سفارتنا في نيجيريا يكونو عرفو يردّو الجميل و يبعتو كلمة شكر معلنه و واضحه للإتحاد النيجيري في كرة اليد و للشعب النيجيري الشقيق .
.
اه يا سيدي احنا كده و هنفضل كده , اللي يشيلنا فوق راسه نعمله كحل لعنينا .
..................................................................................................................................
Mohamed Hussein
18 اغسطس 2019
الورد البلدي و العيال اللي بيتولدو رجاله , نبت الأرض الطيبه , أبطال العالم لناشئ كرة اليد لأول مره في تاريخ مصر و أفريقيا ( أول منتخب غير أوروبي ) بعد الفوز على ألمانيا بجلالة قدرها 32/28 .
.
فرحة العيال بالفوز قبل الماتش مايخلص ب نص دقيقه و حضنهم لبعض و لحارسهم العملاق و مدربهم و أبوهم مجدي أبو المجد تساوي الدنيا كلها .
.
العيال دي ياريس و معاهم منتخب الشباب اللي فاز ببرونزيه العالم من كام يوم نحافظ عليهم و نجيب لهم لبن العصفور لو طلبوه قبل كاس العالم للكبار اللي هتتلعب عندنا في 2021 و البطوله ماتخرجش من مصر بإذن الله , بمدرب وطني مش خواجه لا مؤاخذه .
..........................................................................................................................
Mohamed Hussein
17 اغسطس 2019
نقطة ومن أول العقل
.
- الشاب السوري اللي اعتدى على حرمة الطريق و قل أدبه عالناس المحل بتاعه اتقفل , السوشيال ميديا لها أنياب و مخالب و بتعرف تجيب حق الناس و توقف بلطجي عند حده , ده شئ عظيم جدا و جميل و هايل .
.
- فكرة التعميم مرفوضه تماما , و التنمر مرفوض , و إننا من كام يوم نقول الشعب الجزائري كيت و كيت و النهارده نقول السوريين كيت و كيت يبقى بإذن واحد أحد لو مصر هتتحكم من عالسوشيال ميديا يبقى هنقطع علاقتنا بكل الدول العربيه خلال اسبوعين تلاته .
.
- الشاب السوري اللي بلطج عالطريق و قل أدبه فيه زيه مئات و ألاف السوريين , وفيه اللي أفكارهم ضاني من قطيع أردوغان , وفيه ناس كويسين عايزين ياكلو عيش و يربو عيالهم , مانجيبش احنا عيشه و نحطها على أم الخير و نعجن الدنيا عشان نبان اننا وطنيين , التعميم كارثه .
.
- و زي مافيه ألاف السوريين لا يستحقون إنهم يشربو في مصر بؤ مايه هتلاقي برضه ملايين المصريين مايستحقوش حتى الهوا اللي بيتنفسوه , بلطجه عالشارع و الطريق و اعتداء على ممتلكات الدوله و حديد مدقوق في كل حته و شارع مبقاش شارع و فتارين طالعه قدام كل محل و عربيات للباعه الجائلين و لما تفكر تمشي في الشارع بعربيتك تبقى أكيد بترتكب خطيئه انت مش مدرك عواقبها أو بتكفر عن ذنب قديم ارتكبته .
.
- طب هي المشكله فين ؟ و لما نلاقي المشكله اكيد هنلاقي الحل , المشكله الأصغر في المحليات و دولة القانون الحاسم , و المشكله الأكبر فينا احنا , عشان البلطجه و الاعتداء على حرمة الطريق بقت سلوك عام , بقت قاعده , و الشاذ عن القاعده هو اللي مابيبلطجش , حاول تصدق , احنا أصل المشكله , حتى السوري اللي بيبلطج بيقلدنا مش اكتر , احنا اللي شجعناه , احنا يعني انا و حضراتكو , مفيش مخلوقات فضائيه بتنزل تمارس البلطجه في شوارعنا و ترجع تاني لكوكبها أخر النهار .
.
طب و الحل ؟ أول خطوه في الحل عندنا , هي الاعتراف , نعترف إننا أصل المشكله , تاني حل محليات خاليه من المرتشين و الفسده و قانون يتطبق عالكل بمنتهى الحسم والحزم , مفيش حاجه اسمها أصل ده غلبان و بيسترزق , ولا ده باشا و نسيبه , أصل ده مصري و ده سوري , دولة القانون مابتعترفش بالمسميات دي ( الغلبان و الباشا و المصري و الأجنبي ) .
..................................................................................................................
Mohamed Hussein
17 اغسطس 2019
طب خلاص تاهت ولقيناها , احنا كل مانلاقي نفسنا متضايقين شويه أو خارجين من العيد مأشفرين و جيوبنا فاضيه نبعت نجيب فريق من الصومال نغلبه سبعه تمانيه و نفرح و ننبسط وننسى همومنا , ده حتى ساعة الماتش ماتتعوضش .
....................................................................................................................
Mohamed Hussein
16 اغسطس 2019
دندنه
هي , الأصل و المبتدأ و القيمه و القامه و المقام
.
- مصري للنخاع , مصري حتى الثماله , شهادتي في حقها دايما مجروحه , مصر الوطن والكيان ماينفعش نقول لها ما لها و عليها ما عليها , لأ , هي لها كل حاجه و مفيش عليها شئ , كامله مكمله والكمال لله .
.
- في الفن مش هسمع غربي , ماتجيبليش خواجه بيغني بكلام خواجات و لحن خواجات , أنا ودني شبعانه بأم كلثوم و عبد الحليم و شاديه و نجاة و ألحان السنباطي و القصبجي و زكريا و عبد الوهاب و بليغ و كلام أحمد شوقي و حافظ و بيرم و رامي , أنا جاي من بيت شبعان والأكل ده مايلزمنيش , لا يلزم الروح ولا الوجدان .
.
- لو مطرب عربي عايز يغني , وماله , بس يغني بلهجه مصريه عشان أسمعه , هو اللي يجيلي مش أنا اللي هروح له .
.
- في القرأن عمري ماسمعت السديس ولا الحذيفي , قرايتهم حاده زي أفكار الوهابيه بالظبط , وانا برضه ودني شبعانه بالطبلاوي و المنشاوي و عبد الباسط و محمد رفعت و ألاف المقرئين صوتهم جاب لأخر الدنيا , انا ماعيطتش أبدا من تباكي أئمة الحرم و بحسها مسرحيه هزليه لا تليق بمقام القرأن , انما دموعي بتنزل من ترتيل الطبلاوي مع انه مش بيتباكي .
.
- وانا بقرا القرأن و ربنا يسامحني , بقف أكتر عند أي أيات تجيب سيرة مصر بتصريح أو بتلميح , و سيرة فرعون , و موسى و يوسف , بحس بفخر عجيب , مع إنه كله كلام ربنا بس ده إدمان يا مولانا , عشق و ضارب في الجدور من تحت .
.
- (و أتت كل واحدة منهن سكينا ), أتارينا بنقطع الفاكهه بالسكينه من كام ألف سنه و مش محتاجين حد يعلمنا الإتيكيت , قبل مايبقى فيه فرنساويين و ألمان بقرون و زمان .
.
(فلما سمعت بمكرهن أرسلت لهن و أعتدت لهن متكئا) , ممممممممم كان عندنا يا أخي من كام ألف سنه كده حاجه اسمها سيدات مجتمع , و المرأه تبقى ملكه و تحكم مصر مش لسه هنقول لها في 2019 م احنا سمحنا ليكي بسواقة العربيات يا حرمه.
.
- (قال اجعلني على خزائن الأرض ), اه هي دي مصر بلدنا , خزائن الأرض بكلام ربنا و لسان يوسف الصدّيق.
.
- (أليس لي ملك مصر و هذه الأنهار تجري من تحتي ), ماهو أي مَلك في الدنيا يفخر بإيه أكتر من مُلك مصر ؟ و القرأن يذكرها , عشان هي قمة الجبل و مفيش نقطة في الجبل أعلى من قمته .
.
- (فسقى لهما ثم تولّى إلى الظل) , ده بقى الشاب المصري الجدع نبي الله موسى .
.
-(ولقد مكنا ليوسف في الأرض ), ماهو التمكين في مصر يعني التمكين في الأرض , وقتها مكانش فيه كيان ينفع يتقال عليه دوله غيرها , مش هنخترع يعني .
.
- (فأوقد لي يا هامان على الطين ), اتارينا جبابره من زمان و عايزين نبني صرح وبرج و ناطحة سحاب عشان قال نطلع نشوف رب موسى ده فين بالظبط , وقتها كان 95 %من سكان المعموره عايشين في كهوف و بيغطو مؤخرتهم بورقة شجر .
- مين ده بقى اللي مايتجننش بحب البلد دي ويعيش و يموت و هو درويش في محرابها ؟! .
............................................................................................................
31 أغسطس 2019
قوتنا الناعمه
.
- مصر الدوله الأعرق في التاريخ بنت القاره السمره الجميله , مصر الأفريقيه .
.
طب هي الرياضه جزء من القوه الناعمه للدول ؟
- أه طبعا و جدا كمان , و إن اسمك و علم بلدك يتحط في أول سطر ده مهم أوي, مش بس في دورة الألعاب الأفريقيه الحاليه اللي مصر فازت فيها باكتساح , إنما على مستوى كل البطولات القاريه , في كرة القدم مثلا منتخب مصر له رقم قياسي في بطولة أفريقيا , و في الأنديه الأهلى و الزمالك أصحاب الأرقام القياسيه , و في اليد و الطايره و خلافه هتلاقي الترتيب دايما فيه سطر أولاني محجوز بإسم مصر .
.
- قوتنا الناعمه في القاره الأفريقيه بتشمل التعليم و الوعي والثقافه , و رغم رغبتنا و حرصنا و مطالبتنا كلنا بتطوير التعليم , إلا إني عمري ماحسيت في يوم من الأيام إننا على المستوى القاري فيه دوله بتسبقنا , بغض النظر عن ( الغرغره الفكريه ) بتاعة شوية الصيع اللي بيعشقو جلد الذات و تقزيم مصر , معلش معلش , سافر كده مع أي مواطن لدوله افريقيه من نفس المهنه وفي نفس المجال و اشتغلو في دولة اجنبيه وشوف مين فيكو أفضل أو خلّي الخواجه يحكم بينكو , انا شخصيا و في مهنتي ماحسيتش إنه فيه أفضل مننا لا من دولنا العربيه ولا من قارتنا السمره , يعني احنا أول سطر في التصنيف.
.
- قوتنا الناعمه كمان بتشمل قدراتنا الإقتصاديه و السياحيه و خلافه , ولما التقارير الدوليه تقول ان مصر مرشحه في 2030 انها تبقى من أكبر 10 اقتصادات في العالم ف ده معناه إننا هنكون بلا منافس أكبر اقتصاد في أفريقيا و أول سطر في الجدول .
.
- وطبعا من أهم بنود قوتنا ( اللي مش ناعمه المرادي ) هي الجيش المصري العظيم و ترتيبه الأول عربيا و أفريقيا بلا منافس , و من أقوى جيوش العالم , يعني أول سطر.
.
- بالمناسبه , من ضمن قوتنا الناعمه المهمه جدا في القاره السمراء , الأزهر الشريف و الكنيسه المصريه و جمال عبد الناصر , أه هو زي ماحضرتك قريتهم كده , عندك تحفظ او اعتراض أو أو مع أيا من الكيانات التلاته ؟ وماله ده حقك , بس تقوله بأدب و بعلم ( مش هبد ) وباحترام للكيان , طب هو جمال عبد الناصر كان رئيس دوله ولا كان كيان ؟ لأ كان كيان .
..........................................................................................................................
Mohamed Hussein
31 اغسطس 2019
قطر : جاهزون لمواجهة أي مخاطر بجيش متمكن بسط أجنحته شرقا و غربا !! , هذا و قد صرح وزير الدفاع القطري أأا .
..................
بس بس , بسسسسس , كفايه , يا عم الله لا يسيئك , الله لا يسيئك يا شيخ , احنا ناس ورانا دخلة مدارس و سابلايز و كتب خارجيه و تيكيت و جلاد ألوان و أستيكه بريحة الفراوله يعني مش فاضيين نضحك ولا نهزر ولا نهرش حتى .
.
و بعدين صنف إيه ده اللي بيعلى بالدماغ أوي لدرجة بسط أجنحته ؟ قطر و أجنحته و جيش !! , الأستروكس نفسه مابيعملش كده , ولا ماية الجوزه , و أنا درست كتير و قليل في علم الحيوان و أول مره أعرف إن النمله لها جناحات و بتبسط جناحاتها , طب ماتبسطهاش بقى أكتر من كده ألّا تخبط في البرازيل ولا حاجه
.
بقولك ايه يا معالى صاحب المؤخره العريضه وزير دفاع الكشك القطري , ولو فيها رزاله يعني , انت عندك قواعد أمريكيه و جنود أتراك و ميليشيات حرس ثوري إيراني بيحمو الكشك من عصابة الولاويله الحمره و من هجمات السلطعون المتكرره , إيه رأيك بقى نستغل الجيش القطري (و أجنحته ) في حاجه مفيده غير إنه بيلم الزباله من قاعدة العديد الأمريكيه ؟
.
ايه رأي معاليك لو تبعت لنا الكتيبه القطريه بتاعة كومار الهندي و الكتيبه بتاعة معاوية السوداني , كتايب الجيش القطري أبو جناحات , كتيبة كومار تخطف رجلها لحد الفجاله تلم لنا شوية الكشاكيل و الكراريس من هناك , و كتيبة معاويه السوداني تلف لنا على لانش بوكس تكون خامتها حلوه و سعرها في مستوى المواطن المفحوت عشان البت لمار بنتي مش بتبطل زن على وداني , و أهو يبقى الجيش القطري المجنس أبو جناحات عمل حاجه مفيده في حياته .
........................................................................................................
Mohamed Hussein
30 اغغسطس 2019
السيسي بيحكم مصر من 5 سنين , مافتكرش إن الراجل ده قعد يومين تلاته على بعض في قصر الرئاسه يقابل وفود و يشرب شاي و قهوه ويتمطع و يقرا جرنان , دايما بنلاقيه كده ( ربنا يحميه و يحفظه ), طيارته طالعه على اوروبا , و بعدها امريكا و بعدين رجع على أفريقيا و بعدين طلع عالصين و هوبا تلاقيه في روسيا , ولما بيقعد في مصر يومين بيصحى الفجر و نتفاجئ بيه مثلا في الجلاله أو العلمين أو بيزور الكليه الحربيه أو قاعد وسط ألاف الشباب في مؤتمر من المؤتمرات بيسمعهم أو في قاعدة محمد نجيب في الغرب او عند محطات سيمنز في الصعيد , بيفتتح مشروع أو طريق أو حاجه ضخمه ماكناش أصلا سمعنا عنها قبل لحظة الإفتتاح .
.
بتخيل مبارك كان بيعمل ايه بالظبط لما كان بيحكم مصر ؟ يصحى من النوم و يجيله الفطار , و هو بيفطر يدخل عليه زكريا عزمي
أخبار أوروبا إيه يا زكريا ؟ زي الفل ياريس و بتسلم على معاليك , طب تمام .
أفريقيا عامله إيه يا زكريا ؟ أفريقيا بتبوس الأيادي يافندم , طب تمام
الصين أخبارها ايه يا زكريا ؟ الصين حلوه ياريس و باعتالك سلام والله
أخبار شبابنا إيه يا زكريا ؟ شبابنا 100 فل و عشره و بيشكرو في سيادتك .
.
أخبار مشاريعنا القوميه و بنيتنا التحتيه ايه يا زكريا ؟ أكيد زي الفل و بتسلم عليا و بتبوس الأيادي ؟ أه صح ياريس , سيادتك عرفت إزاي ؟
إلا عرفت إزاي ؟ مانا بقيت مذاكر كويس يا زكريا.
الله عليك ياريس ربنا يحميك , هو فيه حد في مصر كلها مذاكر قد معاليك ؟ .
............................................................................................................
Mohamed Hussein
29 اغسطس 2019
وزير خارجية ليبيا : نستهدف إستيعاب مليون عامل مصري في خطة إعادة إعمار ليبيا !! .
.
ماهي قطر و تركيا مش هيتجننو و يشدو في شعر راسهم من شويه , عشرات المليارات من الدولارات رموها عالأرض هناك , جابو ألاف الإرهابيين و المرتزقه من الدول الأفريقيه الفقيره , موّلوهم بالفلوس و بالسلاح , حاولو بكل الطرق إن ليبيا تفضل أرض محترقه و جبهه مفتوحه على حدود مصر بطول 1200 كيلو متر .
.
تقوم مصر تدعم المشير خليفه حفتر و يشكلو نواة الجيش الليبي ( تقريبا بدأ ب 300 جندي ) لحد مابقو حاليا مسيطرين على 90 % من الأراضي الليبيه , وطبعا مصر بدفاعاتها الجويه و قواتها البحريه بتساعد في حماية المياه الإقليميه و الأجواء الليبيه من بلطجة الصايع خليفة الشواذ .
.
الحكايه بالنسبالنا كانت ولا زالت أمن قومي , مش بس إن دوله عربيه شقيقه حدوديه تكون مستقره أمنيا و سياسيا ولها جيش مسيطر على الأرض وبالتالي نقفل الحنفيه اللي كانت مفتوحه علينا من ناحية الغرب , إنما كمان حكاية إعادة الإعمار , شركات مصريه و عماله مصريه و دخل من العمله الصعبه سنويا أعتقد يعادل دخل مصر من قناة السويس .
................................................................................................................................
Mohamed Hussein
· 29 اغسطس 2019
على فكره بقى أنا اسمي الحقيقي جرجس المقدس و بيدلعوني يقولولي يا محمد يا حسين , يعني ورقي متستف و زي الفل و إقامتي جاهزه , و يمين بالله قصدي و المسيح الحي ما هقبل بأقل من شاليه في المعموره .
.
فيه كلام كمان إنه بيتم حاليا ترحيل الزملكاويه إلى خط القناه عشان يعملو دولتهم هناك نواحي بورسعيد واسماعيليه في إطار خطة السيسي لتقسيم و تقزيم مصر , و أي حد هيلاقوه في القاهره أو خط الصعيد لابس تي شيرت الزمالك أو معلق صورة طارق حامد في الأنتريه هيتم القبض عليه من شرطة السيسي و ترحيله إلى دولته البورسعيديه عن طريق الإنتربول .
.
عموما انا كده مفيش عليا مشكله , هرشق في اسكندريه بصفتي جرجس أو في بورسعيد بصفتي زملكاوي , أهو كده بحر و كده بحر , جاهز يافندم , عوامتي البطه في إيدي و سنارتي في الإيد التانيه .
Mohamed Hussein
26 اغسطس 2019
مابين ( عَبْد الدُره ) و ( الست المنقبه اللي بتخطف العيال الصغيره ) ..
.
الوعي يا بني أدمين هو عكس الغيبوبه , الدماغ الصاحيه عكس دماغ البانجو , و الطيبه و البراءه شئ جميل , إنما السذاجه و العبط لأ , و عشان تخدم عدوك مش ضروري تكون خاين أو عميل , يكفي جدا إنك تكون غبي أو عبيط أو برياله .
.
زمان و احنا عيال صغيرين لما أهالينا حبّو يخوفونا من اللف في الغيطان لوحدنا اخترعو لنا حدوته مخيفه اسمها ( عبد الدره ) , راجل اسمر ضخم بيبقى مستخبي في الدره , له أنياب و بياكل العيال الصغيرين , احنا بقى نسمع الحدوته و نخاف و مانلفش كتير خصوصا في الغيطان اللي مزروعه بزرعه عاليه زي الدره , أهلنا وقتها كان لهم مبرر , لاننا كنا حرفيا أطفال أشقيا و صعب جدا السيطره علينا , و خوفهم كان اننا نستخبى في غيط و ننام او نقع و يغمى علينا أو أو و بالتالي يبقى صعب جدا يوصلو لنا , يعني لهم مبرر و منطق .
.
الحقيقه افتكرت الحكايه دي وانا عمّال بقالي كام يوم بقرا افتكاسات عن ست منقبه بتخطف العيال الصغيرين و يسرقو أعضائهم , وقالك يا سيدي أنا كنت راكب عربيتي و بالصدفه البحته واقف في حته زحمه سمعت ست منقبه بتقول لست منقبه تانيه , الستات مابقوش ينزلو بعيالهم الشارع نعمل ايه يعني نروح نخطفهم من بيوتهم ؟ قامت التانيه قالت لها استني فيه ست هناك اهي و معاها عيل صغير , دخلو السوبرماركت و دخلت المنقبه وراهم و رشت حاجه كده على وش الواد الصغير قام متخدر على طول و قامو خاطفينه عشان يبيعو اعضاؤه , يوووه , لا نسيت , صاحب القصه و الهبده لحق الموقف و أنقذ الطفل من براثن الست المنقبه , ستوب , كت , هايل يا ولاد الصرمه .
.
يا أهل الله , يا بني أدمين , يا خلق هوووه , مفيش حاجه بتترش في شارع تقوم تخدر عيل وإلا مكانش حد غلب , ورحمة أمي مافي , في الأفلام بس , و مفيش ست هتسرق طفل على باب سوبرماركت و هو ماسك ايد أمه , و ماعندناش زراعه أعضاء بالشكل اللي حضرتك ممكن تتصوره ( سوق كده وفيه طشوت مليانه فشش و كلاوي و قلوب طازه , و كام دكتور واقفين بالسكاكين و العيانين نامين على حصيره ) , ماهي الرحمه حلوه برضه و العقل زينه و عهد الله .
.
طب ايه الحدوته ؟ الحدوته يا مولانا و بهدوء شديد , لو فيه حادث خطف حصل بالفعل فالمؤكد إن فيه ألف قصه اتكتبو , يعني ايه ؟ يعني 999 قصه من الألف اللي حضرتك قريتهم كلهم هبد من وحي تأليف الصايع اللي بيألفها , طب ليه بيألفو قصص ؟ بالنسبه للصايع هيكفيه شوية لايكات و شوية فولورز يزيدو , لكن بالنسبه لأعدائك فالحكايه منظومه كامله و الترويج لها غرضه بث الرعب والخوف في نفوس الناس , حرب نفسيه يعني , فلو سمحتو ماتبقوش متخرجين من الجامعه و شهادات متعلقه عالحيط و تنشرو الهبل ده , لو سمحتو بلاش الطيبه تقلب بسذاجه و تبقو بتساعدو أعداء البلد و شوية الصيع , لو سمحتو اكبرو واعقلو شويه واتخلصو من إدمان اللايك و الشير , اقرو و فكرو الأول , شغلو دماغكو , ده حتى البانجو مضر بالصحه و بالمجتمع وبالبلد دي اللي كل ذنبها في الحياه إنها خلفتنا .
.......................................................................................
Mohamed Hussein
· 25 اغسطس 2019
شوفت كتير أوي من النوعيات دي
...............................
إمتى هقول عليك إنك عجينه طريه و دماغك فاضيه من جوه و أي إيد تشكّلك على مزاجها و أي شوية هوا يطيروك ؟
.
- لما تسافر الخليج سنتين تلاته و ترجع بعدها لابس جلابيه و شماغ و شبشب جلد و ترطن بالخليجي و تقول سياره و دباب و الحرمه و الأهل و أبغي , و تحسسنا إنك ثري عربي جاي و سايب وراه بير بترول هناك .
.
- أو لما تسافر سنتين تلاته لأوروبا و تيجي تلزق نضارة الشمس في وشك و السلسله في رقبتك و تعوج لسانك برضه وتتأفّف و تتريأ على كل حاجه و أي حاجه , و تفتي في الكباري و الطرق و معدات الحفر التقيل و كأنك مثلا خبير ألماني بتشغل منصب مدير فرع شركة كاتربيلر الأمريكيه العملاقه في برلين , مع انك في الحقيقه كل شغلتك هناك انك بتغسل صحون في مطعم درجه رابعه و أخر الليل بتسيأ المحل .
.............................................................................................
Mohamed Hussein
25 اغسطس 2019
الغيره وحشه أوي خصوصا في الوسط الفني , و تقريبا كده والله أعلم إن الفنان محمد رمضان لما شاف الألبوم بتاع عمرو دياب الأخير و عرف إن البنات بيفتفتو الفتافيت قامت الغيره مسكته و قرر إنه يعمل حاجه أنقح من عمرو دياب , فراح مشرشب الشراشيب , شرشبو الشراشيب و شرشبوني ( والله تنفع أغنيه ).
.
بيقولك يا سيدي في مره كده زمان , طفله صغيره اسمها أم كلثوم قابلت طفل صغير اسمه رياض السنباطي على محطة القطر في المنصوره , الطفله سألت الطفل , انت بتعرف تغني ؟ قال لها ماعرفش , قالت له طب السمّيعه بيقولو عليك ايه ؟ قال لها السميعه اللي شوفتهم مابيعرفوش يسمعو !! .
.
والله يا أستاذ رياض و ربنا يبشبش الطوبه اللي تحت راسك يعني إنت و الست , عايز أقولك ان السميعه الأيام دي بقى , في عصرنا الحالي الجميل, لا بيعرفو يسمعو ولا بيعرفو يشوفو ولا حتى بيعرفو يحسو
Mohamed Hussein
25 اغسطس 2019
مين كان يصدق ؟
.
- في 2011 مظاهرات و ثوره و هري و معجنه و تخريب و أي 3 عيال قاعدين على قهوه بيشكلو وزاره و يتكلمو في الأمن القومي و التحالفات و العلاقات الدوليه و البنيه التحتيه مع إن أذكاهم مابيعرفش يفك مسمار قلاووظ بمفك ولو سألته عن الجاحظ هيقولك ده السمكري اللي فاتح جنب اندريه بتاع الكبده , طب مين يابني جورباتشوف ؟ أه ده الباك الشمال بتاع منتخب يوغسلافيا في السبعينات .
.
- في 2012 سحنات بتطلع عالشاشه , لا هي مننا ولا نعرفها , البلتاجي عايز يمسك المخابرات و أم أيمن تمسك حقيبة الخارجيه تقريبا , و عناصر حماس المسلحه في مكتب الإرشاد , و رئيس بدرجة سكرتير مرشد بيقول أهلي و عشيرتي كأنه لامم شوية عيال في جُرن و بيخطب فيهم , و نحافظ بقى على حياة الخاطف و المخطوف وفجأه تلاقي شوارعنا اتملت منقبات و ملتحين راكبين عربيات حديثه وييجي في ذهنك سؤال منطقي , هي الناس دي اتنقبت و إلتحت فجأه و ربنا هداها و كان عندهم أصلا عربيات زيرو, ولّا هما منقبين وملتحين من الأول و العربيات دي لقيوها في البخت ؟! .
.
- في 2013 قرر الشعب المصري انه ممكن يستحمل أي حاجه إلا اللعب في جينات و هوية البلد دي , ممكن ناكل قش بس مانلاقيش شوية صيع محاصرين المحكمه الدستوريه العليا أو بيسحلو شيخ مسن من بيته في الشارع بحجة إنه شيعي , ممكن نستحمل أي حاجه في مقابل إننا نفضل مصر , الدوله , اعظم و أقدم دوله في التاريخ , مش الطابونه ولا جُرْن الهبله .
.
- كنا عارفين ان الفاتوره هتبقى كبيره لما تقرر انك تحط جزمتك على رقبة أقدم و أقذر تنظيم إرهابي صهيوني في التاريخ , كنا عارفين إن أمريكا و بريطانيا و اللوبي الصهيوني اللي بيحكم العالم مش هيسيبنا في حالنا لو قررنا نتخلص من صبيانهم , طيارة روسيا تنضرب في سينا و طيارة مصر للطيران تنضرب وهي طالعه من باريس , لوي دراع اقتصادي و علاقات وصلت لأدنى مستوياتها .
.
- في نفس الوقت مضطرين لإصلاحات اقتصاديه عاجله عشان جوز الست كان بيشتغل بطريقة احييني النهارده و موتني انا و عيالي بكره , وساب لنا تركه هباب , قطاعات كلها بتخسر , بنيه تحتيه صفر , و هشتكه للزبون , وميزانية دوله نصها بالظبط بيطير في الدعم و تسديد فوايد القروض و ربعها مرتبات ل 6 مليون موظف , ربطنا الحزام و دفعنا فاتورة سنين كتير سابقه جنب فاتورة عدم الرضا من اللوبي الصهيوني ( إرهاب و تخريب و تشويه و حرق و تحفز و إبتزاز وميديا عالميه و منظمات لامؤاخذه حقوقيه تقاريرها جاهزه ومتستفه ) .
.
- 6 سنين خدو من جتتنا راق و خدو من روحنا حته لحد ما عدينا و شمينا نفسنا و وقفنا على رجلينا من تاني كدوله ( دوله وصل الاحتياطي النقدي بتاعها في يوم من الأيام ل 13 مليار و كانت على وشك اعلان افلاسها ) , عدينا بمئات الشهداء و ألاف المصابين , شباب زي الورد , عدينا بصعوبات اقتصاديه و أيام مرت صعبه جدا على ناس كتير , عدينا بتفنيد و شرح لملايين الإشاعات و الأخبار المضروبه و القصص اللي بتتألف في ساعة عصاري .
.
- مين كان يصدق إن مصر تعدي من الطوفان ده ؟ و ييجي علينا يوم واتنين و اسبوع نبقى مش مهتمين نشوف أخبار سياسيه , مش مهم خالص , احنا ممكن نكتب عن الحب و الخير و الذكريات الجميله و نحكي حواديتنا , ماحنا وصلنا ل 2019 , و الخطه أصلا كانت إننا مانوصلش ل 2019 , و بالمناسبه أغلب دول الربيع اللامؤاخذه العربي ماوصلوش ل 2019 لسه , و قدامهم 50 سنه على بال مايوصلو .
.............................................................................................................................
Mohamed Hussein
24 اغسطس 2019
غابات الأمازون تحترق و دي بتنتج خُمس الأكسجين بتاع كوكب الأرض !!.
.
خطه في منتهى الذكاء عملها السيسي و المخابرات
- غابات الأمازون تحترق
- يقوم الإكسجين في الغلاف الجوي يقل
- يقوم يحصل عندنا نقص كبير في مستوى الأكسجين اللي بنتنفسه
- يقوم الراجل لما يبوس مراته يتخنقو هما الاتنين و يموتو ( لو البوسه طولت شويه)
- و بكده نبقى حددنا النسل و قللنا عدد السكان , و الساعه بتاعة التعداد السكاني اللي في صلاح سالم دي تشم نفسها شويه وتستريح و تشرب بؤ مايه, عشان هي بصراحه كانت قربت تنفجر و تحدّف العربيات اللي ماشيه في صلاح سالم بالطوب .
.................
مممممممممم الخوف بقى إن المصريين ينتبهو للخطه دي و يعندو و يقررو إنهم يخلفو من غير ما يبوسو , و الخطه كلها تفشل , و ساعتها السيسي هو اللي هيجري ورانا في الشارع و يحدّفنا بالطوب
...........................................................................................................................
Mohamed Hussein
24 اغسطس 2019
بره الصندوق , بشويش و بهدوء
.............................. ثقافة التنكر و طمس الهويه ............................
1- لما بطنك بتوجعك بتروح لدكتور مش لسباك , ولما بتحب تبني بيت بتروح لمهندس مش لعازف جيتار , الحكايه دي اسمها التخصص , بالراحه خالص اهو .
.
2- في الدين الإسلامي عندنا مؤسسه عريقه اسمها الأزهر الشريف , بيرأسها أعلى قامة إسلاميه في العالم اسمه فضيلة الإمام الأكبر .
.
3- لما اتسأل عن النقاب قال بكلام واضح , لا فرض ولا سنه ولا فضل , إنما بيندرج تحت بند العادات ( الفيديو موجود على يوتيوب تقدرو تشوفوه ) .
.
4- و بما إني سمعت رأي شيخ الازهر, يبقى من حقي أقول رأيي من جهه تانيه , النقاب في شوارع المدن تحديدا ( لأن الناس ماتعرفش بعض ) مايبقاش تدين , حتى لو كان ظاهره كده , إنما بشوفه تنكر و طمس للملامح و الهويه , هوية حضرتك هي وشك اللي بيبقى في صورة البطاقه , ملامح الوش , من حقك تشوفي ملامح وشي في الشارع عشان لو ارتكبت مصيبه تعرفي تجيبني وانا نفس الشئ .
.
5- عيلتي كلها مابين منقبه و محجبه , يعني حتى مفيش حد في عيلتنا كاشف شعره مع كل احترامي للي كاشفين شعرهم ( عشان بس البؤ الحمضان بتاع انت عايز الناس تبقى متبرجه و عريانين و الهجايص دي ) .
.
6- التنكر و طمس الهويه مش بيقف عند النقاب بس عشان برضه حضرتك تعرف إني بتكلم على مبدأ أعم و أشمل , إسمك كمان ممكن يندرج تحت بند التنكر , لما تسمى نفسك أبو حفص ( وانت اصلا مش مخلف بنات ) , و أي هجايص ظاهرها إنها كنيه مستحبه لكنها في الحقيقه تنكر و طمس هويه , لو سمحت احنا محتاجين اسم سيادتك , فلان ابن فلان ابن فلان , زي ماحنا محتاجين ملامح وشك و ملامح وشي و اسمي ( احنا هنا مقصود بيها المجتمع و البني أدمين ) .
.
7- فيه مثال للتوضيح , لما اخترعو الفيس بوك , المصريين عملو مليار اكاونت , منهم 999 مليون أكاونت مضروبين , كلهم باسماء وهميه ( ثقافة التنكر ) , اوعى تقولي ان ده تدين (قلبي لزوجي و حجابي سر سعادتي و التنين البائس و ثاني اكسيد الكربون ) , أي اسم تتنكر بيه و بالتالي تعك و تعجن زي مانت عايز و محدش هيعرف يجيبك , بالمناسبه انت كده لا متدين ولا جبار و بتمشي عالحيط , يعني مش أبو زيد الهلالي و لا الخنساء ,أي عيل صايع أو عيله صايعه ممكن تعمل يوميا 17 اكاونت بأسماء مضروبه .
.
8- على مدار 1400 سنه كانو المصريين بيعرفو بعض بأساميهم الطبيعيه اللي في البطاقه و شهادة الميلاد و بيعرفو بعض من ملامح وشهم , لا كان فيه نقاب ولا أسماء مستعاره ولا كنيه , ولو كان ظهر الفيس بوك وقتها كانت الناس هتدخله بصورها و أسمائها الحقيقه , 20 جيل عاشو و ماتو مسلمين , مش كفار ولا حاجه , ولا الإسلام دخل مصر من 40 سنه هو والمروحه والكاسيت أبو روحين .
.
9- هل فيه جهات أو كيانات كانت حريصه على فكرة التنكر و طمس الهويه ؟ اه طبعا , مش محتاجه عبقريه , الجماعات اللي شغلها كله تحت الأرض و بره القانون هتكون حريصه جدا على كده , مانت المفروض ماتستغربش ان رجالتهم لما بيحاولو يهربو بيلبسو نقاب , و أكيد مش من التدين إن الراجل يلبس نقاب !!.
.
10- طب هل الحكايه دي كان لها غرض أشمل من كده ؟ في رأيي الشخصي أه , كانت محاوله ( بائسه ) لطمس هوية بلد بحالها , أعظم دوله في الكون , بلد نفرتيتي و مينا و أحمس وشجرة الدر وعبد الناصر و أم كلثوم تتقزم و تتضائل و تبقى مجرد أفغانستان أو صومال , مع كل و كامل احترامي للجميع .
.......................................................................................................................
Mohamed Hussein
23 اغسطس 2019
مانا قلت لكو من سنين , ريهام سعيد شخصيه مختله عقليا , مريضه نفسيا , جاهله و غبيه , لا تصلح إنها تكون إعلاميه في مصر ولا في بوركينا فاسو ولا تصلح حتى إنها تقف على عربية تين شوكي , بس انتو اتخدعتو بشوية الدموع المصطنعه بتاعة التماسيح وشوية المحن و شوية السهوكه وشوية الماكياج و شوية الملامح البلاستيك .
.
الغريب إني لحد دلوأتي مش عارف هي موجوده ليه ؟ و ليه سحنتها و جليطتها مفروضين على الناس ؟ هل مثلا ماسكه سيديهات عالبلد دي ؟ هل احنا مديونين لها ولازم نسدد الدين اللي في رقبتنا ؟ هل اسمها مكتوب في الدستور و احنا مانعرفش ؟ ولّا تكونشي تقرب لفلاديمير بوتين و موصّي عليها جامد و احنا بنحاول يعني بقدر الإمكان نحافظ على علاقتنا بروسيا ؟!.
................................................................................................................
Mohamed Hussein
23 اغسطس 2019
أرقام و إحصائيات
.
1- أسرع شئ في الكون مش الضوء ولا الصوت و لا الطياره النفاثه ولا محمد صلاح في الهجمه المرتده , أسرع شئ في الكون هو سرعة الراجل لما يشوف مراته داخله عليه و جايه ناحيته و يبقى عايز يعمل تسجيل خروج من البرامج اللي فاتحها , و ماتعرفش ليه يا اخي وقتها اللاب بيهنج و الإيد بتترعش و النت اللي كان ماشي معاك زي السكينه في الحلاوه بيبقى في اللحظه دي أتقل من دم الخليل كوميدي و مي عز الدين مجتمعين .
.
2- أعلى معدل في الكون مش معدل البطاله في السودان ولا معدل التضخم في فنزويلا ولا معدل الجريمه في شيكاغو ولا معدل الإنجاب عند جدي حسين الله يرحمه هو و عياله , أعلى معدل في الكون هو معدل الزن عند مراتك لما تكون عايزه تشتري حاجه وانت مش معاك فلوس , المعدل ده بيزيد و يعلى و يعمل شألباظات طالما مش معاك فلوس , و صدقني أول مايبقى معاك و تشتري الحاجه اللي كانت هتموت عليها بتقوم رامياها في الدولاب و ماتلبسهاش .
..........................................................................................................................
Mohamed Hussein
22 اغسطس 2019
يوم خميس خمس بنات
دخلو عليا الصيدليه و ندهولي
قالو لي عندك فلورست ؟
قلت لأ و لو عندكو هاتولي
فتفتو الفتافيت بإيديهم الحلوين
واحنا لسه من يادوب ماسحين
بنت منهم بصت وقالت لو سمحت
قمت انشرحت وقلت لها قولي
قالت انت جميل اوي و تري جانتي
قلت لها ميرسي خالص و عهد الله ميرسي
...............................................................................................................
Mohamed Hussein
21 اغسطس 2019
أمَمٌ أمثالكم
.
دول أصحابي الجدد اللي حكيت لكو عنهم , قلت أعرفكو عليهم بقى , والحقيقه في الفتره اللي فاتت اكتشفت إن القطط والكلاب ماينفعش تحطهم تحت كاراكتر واحد و شخصيه واحده , لا خالص , كل واحد منهم له شخصيه مختلفه عن التاني , بتبان بمرور الوقت
.
سوسن , القطه اللي في حوض الزرع جنب الشجره كان عندها ولاد صغيرين و كبرو , هي نفسها شخصيتها اتغيرت , وعشان البنات عندي مهتمين بيها جدا و بيشوفوها دايما قدام البوابه و يحطو لها جبنه نستو بقت طماعه و مش عايزه قطه غيرها تاكل , لا في الناحيه دي من الشارع ولا الناحيه التانيه , الإهتمام المبالغ فيه أحيانا بيجيب نتايج عكسيه .
.
محاسن , لها شخصيه عجيبه , هاجس الخوف عندها اهم من الأكل والشرب , لما خلفت اختارت تولد في جنينه بتاعة شقه محدش ساكن فيها , مستخبيه على طول هي و عيالها في الجنينه دي ورا السور , مش بتطلع تلقط رزقها زي بقية القطط , عشان كده هي اكتر قطه بتاكل من ايدي هي و ولادها لما بنادي عليها , بينطو بحركة سريعه جدا يوصلو عندي و ياكلو بنهم و يرجعو للمكان الأمن بتاعهم تاني .
.
عنتر , ده الكلب الأبيض المنقط اللي واقف ورايا , كل مابيشوفني بقرب من البيت ييجي جري و يقف لحد رقبتي فوق و يشوف اي حاجه في ايدي يمكن تكون حاجه بتتاكل , عنتر طيب جدا و عشان هو طيب راح جاب شيبوب , الكلب الدهبي اللي قدامي , واتصاحب عليه وقاله تعالى عيش معايا هنا , و كانت المفاجئه ان شيبوب شرس عكس عنتر , و لو الأكل قليل و هيتخانقو عليه , شيبوب بيكسب و عنتر بيخاف و يبعد ( مع إنه صاحب الدار ) .
.
زينه بقى أكتر قطه بحبها , السمره اللي في حوض الزرع لوحدها , زينه نظرها ضعيف و كان عندها بنت كفيفه عمرها شهرين , كنت بحب بنتها جدا حتى في مشيتها , عشان هي كفيفه بتيجي عالصوت و تفضل ماشيه تترقص كده لحد ما حاجه توقفها , الحاجه دي غالبا بتبقى رجلي اللي بحطها في طريقها عشان تقف , وبنت زينه للأسف في يوم اختفت و عرفنا من بواب العماره انه فيه كلب عضها في رقبتها و ماتت , كان رد فعلي السريع جدا لما سمعت الخبر هو إني قلت , مستحيل يكون الكلب ده عنتر ولا شيبوب , وفعلا طلع كلب غريب و مسعور جاي من بعيد , طلبو له الطب البيطري وجم خدوه , طب ليه انا أجزمت ان اللي عمل كده مش عنتر ولا شيبوب ؟ عشان و بغض النظر عن قوانين الطبيعه و قانون الغابه و خلافه , عندي قناعه أن الحيوانات مايعضوش في بعض طالما بينهم عيش و ملح , الإنسان بس هو اللي ممكن يعمل كده
.................................................................................................................................
Mohamed Hussein
21 اغسطس 2019
بعد رائعة عمرو دياب ( يوم تلات ) , اللي بيقول فيها
يوم تلات تلات بنات ندهوني
ع البساط بصّات يا ناس عجبوني
فتفتو الفتافيت و فتنوني
.
انتظرو في الألبوم القادم لعمرو , أغنيه جديده بعنوان ( الساعه سته )
الساعه سته , سته ونص يعني
حبيبي سابني في الطريق و ودعني
لا لقيت ميكروباص أشبط فيه
ولا حتى توكتوك يرجعني
هو اللي باعني , أيوه هو
و المصحف هو اللي باعني .
....................................................................................................................
Mohamed Hussein
· 20 اغسطس 2019
راعي الغنم
.
- لما كان عمري 6 سنين اختارني جدي حسين ( سيدي حسين ) إني أسرح معاه بالغنم , و مات الله يرحمه من غير ماعرف هو اختارني انا ليه من وسط 20 عيل موجودين في البيت فيهم اللي قدي واللي أكبر و اللي أصغر .
.
- مش فاكر كنت بفطر ولا لا , و كنت بخرج من البيت وانا لابس شبشب في رجلي ولا حافي , كل اللي فاكره انه عندنا قطيع من الأغنام عددهم يمكن 30 موجودين في زريبه في أخر الدار , بنصحى بدري أوي انا و سيدي و نخرجهم من البيت , من وسط الأوض و نطلع نسرح بيهم في الأراضي الشراقي , و نرجع امتى بقى ؟ عالمغرب كده .
.
- وسط الأراضي اللي أصحابها جمعو محصولها بيبقى فيه بواقي أكل للخرفان و المعيز , طب و احنا ؟ احنا معانا ربنا بقى , ماهو أكيد كنتاكي و ماكدونالدز مش فاتحين فروع وسط الأراضي دي , أفتكر اني كنت باكل أي حاجه , قرن فول ناشف مثلا أكله أو أقسمه بيني و بين خروف , عود ملوخيه مزروع اكل منه , شجرة بتنجان منسيه وفيها بتنجانه صغيره نصها اخضر دي بالنسبالي تبقى طبق فاكهه .
.
- حكاية انك ترعى الغنم دي رغم إنها ماستمرتش كتير , تقريبا 4 سنين لحد ماجدي توفى و بعنا الغنم بعدها , إنما ذكرياتها محفوره جوايه , و دروسها عجيبه , مدرسه يا مولانا بتتعلم فيها و منها .
.
- لما نوصل لأرض و نستقر ان الغنم هتاكل هنا في اللحظه دي ممكن أقعد بقى لأننا مش هنمشي , وانا قاعد براقب حركة الغنم , بحسهم بيكلمو بعض , بيحبو يتلمو و هما بياكلو , بينادو على بعض بلغه محدش يفهمها .
.
- الوقت الطويل وانا قاعد جنبهم كان بيدّيني قدره غريبه على التأمل و التفكير , حتى بطونهم كنت باخد بالي منها , نفسي ياكلو أوي و يرجعو شبعانين , كأنهم أطفال صغيرين وانا امهم و ملزمين مني , كنت بفرح لما يخرجو الصبح بدري و بطونهم فاضيه مشفوطه لجوه كده و يرجعو و بطونهم مليانه , بحس اني عملت عمل بطولي .
.
- من أجمل اللحظات اللي كنت بعيشها , هي انه يكون فيه ( حولي ) يعني خروف أو نعجه صغيره اوي ماكملتش سنه ( جايه من كلمة حَوْل ) و ده كنت بضطر أشيله طول الطريق رايح جاي لانه بيتكعبل و هو ماشي , كنت بحب أشيله وامشي بيه , مع إننا اطفال زي بعض !! .
.
- و من أهم الدروس اللي ممكن تتعلمها في المدرسه دي , مدرسة راعي الغنم , درس اسمه الصبر , تفرده كده على مدد الشوف , وفين وفين على بال ماتقول أي , واحد هيسألني و يقولي طب و درس الصبر ده ممكن تستفيد منه بايه ؟ أقولك يا سيدي مثلا مثلا يعني , لما أخد البنات في محل ملابس عشان يشترو فستان أو طقم لكل بنت , و تفوت ساعه واتنين و تلاته و يقيسو و يغيرو و يبدلو و بعد ساعات ماتعرفش عددها تلاقي بنت منهم بتخبط على كتفي و تقولي بابا خلاص احنا مش عاجبنا حاجه في المحل ده , صدقني الحكايه دي محتاجه صبر مش أقل من صبر راعي الغنم الصغير
.................................................................................................................
Mohamed Hussein
19 اغسطس 2019
قليل من الهئ و المئ
.
منكوح حمره ماينفعش كان مثلا يبارك لمنتخب ناشئين كرة اليد بعد مافازو بكاس العالم و يسكت ؟ ماينفعش يبقى راجل و بني أدم طبيعي زينا كده ؟ , لا طبعا مايصحش , اومال يسيب المر*عه و العلو*يه لمين ؟ ده أكل عيشه في البؤين دول .
.
وقالك يا سيدي نفرج عن الشباب المعتقل , اللي هو إزاي يا مندوح ؟ اتحدى انه يلاقي رد أو جواب , ماعندناش شباب معتقل بسبب حرية رأي , يعني شاب دخل على صفحته و كتب انا بكره السيسي قام جه بوكس خده , و شاب دخل شتم الحكومه وقال أغبيا و مابيفهموش قام جه نفس البوكس خده , ماعندناش الكلام ده و منكوح عارف و متأكد , أي شاب في السجن هو شاب ارتكب جريمه أو جنحه حتى لو كانت جريمته حروف و كتابه , نشر الإشاعات و الأخبار الكاذبه اسمها جريمه مش حرية رأي , التحريض على الإرهاب و العنف و الحرق بشكل مباشر او غير مباشر جريمه مش حرية رأي , التحريض ضد جيش الدوله و أجهزتها الأمنيه جريمه مش حرية رأي , الدعم بأي شكل من الأشكال لكيانات و دول معاديه للدوله المصريه جريمه مش حرية رأي .
.
عموما و إجمالا , ليا سنين طويله كل مابشوف تويته لمندوح وأتخيله و هو بيكتب التويته مش بييجي في ذهني غير مشهد واحد بس مابيتغيرش , مشهد عاهره كبرت و عجزت بس لسه مصره تكمل في الكار بتاعها ( على طريقة اللي نعرفه احسن من اللي مانعرفوش ) فبقت تشتغل فتّاحه للزباين مع قليل من الهئ و المئ ( على قد صحتها يعني ) .
................................................................................................................
Mohamed Hussein
18 اغسطس 2019
مش لاقي كلام يوصف جمال الصوره دي ولا لاقي كلمة شكر تكفيهم و توفيهم , ده منتخب نيجيريا للناشئين في كرة اليد , كان مشارك في بطولة العالم اللي فازت بيها مصر النهارده , و من أول ماخرجو من البطوله و هما بيحضرو ماتشاتنا و يشيلو علم مصر و يشجعونا باعتبار إننا بقينا ممثل أفريقيا الوحيد في البطوله , دول أهلنا و ناسنا و تاج راسنا الأفارقه السمر الجُمال .
.
أتمنى من وزارة الخارجيه المصريه و من سفارتنا في نيجيريا يكونو عرفو يردّو الجميل و يبعتو كلمة شكر معلنه و واضحه للإتحاد النيجيري في كرة اليد و للشعب النيجيري الشقيق .
.
اه يا سيدي احنا كده و هنفضل كده , اللي يشيلنا فوق راسه نعمله كحل لعنينا .
..................................................................................................................................
Mohamed Hussein
18 اغسطس 2019
الورد البلدي و العيال اللي بيتولدو رجاله , نبت الأرض الطيبه , أبطال العالم لناشئ كرة اليد لأول مره في تاريخ مصر و أفريقيا ( أول منتخب غير أوروبي ) بعد الفوز على ألمانيا بجلالة قدرها 32/28 .
.
فرحة العيال بالفوز قبل الماتش مايخلص ب نص دقيقه و حضنهم لبعض و لحارسهم العملاق و مدربهم و أبوهم مجدي أبو المجد تساوي الدنيا كلها .
.
العيال دي ياريس و معاهم منتخب الشباب اللي فاز ببرونزيه العالم من كام يوم نحافظ عليهم و نجيب لهم لبن العصفور لو طلبوه قبل كاس العالم للكبار اللي هتتلعب عندنا في 2021 و البطوله ماتخرجش من مصر بإذن الله , بمدرب وطني مش خواجه لا مؤاخذه .
Mohamed Hussein
17 اغسطس 2019
نقطة ومن أول العقل
.
- الشاب السوري اللي اعتدى على حرمة الطريق و قل أدبه عالناس المحل بتاعه اتقفل , السوشيال ميديا لها أنياب و مخالب و بتعرف تجيب حق الناس و توقف بلطجي عند حده , ده شئ عظيم جدا و جميل و هايل .
.
- فكرة التعميم مرفوضه تماما , و التنمر مرفوض , و إننا من كام يوم نقول الشعب الجزائري كيت و كيت و النهارده نقول السوريين كيت و كيت يبقى بإذن واحد أحد لو مصر هتتحكم من عالسوشيال ميديا يبقى هنقطع علاقتنا بكل الدول العربيه خلال اسبوعين تلاته .
.
- الشاب السوري اللي بلطج عالطريق و قل أدبه فيه زيه مئات و ألاف السوريين , وفيه اللي أفكارهم ضاني من قطيع أردوغان , وفيه ناس كويسين عايزين ياكلو عيش و يربو عيالهم , مانجيبش احنا عيشه و نحطها على أم الخير و نعجن الدنيا عشان نبان اننا وطنيين , التعميم كارثه .
.
- و زي مافيه ألاف السوريين لا يستحقون إنهم يشربو في مصر بؤ مايه هتلاقي برضه ملايين المصريين مايستحقوش حتى الهوا اللي بيتنفسوه , بلطجه عالشارع و الطريق و اعتداء على ممتلكات الدوله و حديد مدقوق في كل حته و شارع مبقاش شارع و فتارين طالعه قدام كل محل و عربيات للباعه الجائلين و لما تفكر تمشي في الشارع بعربيتك تبقى أكيد بترتكب خطيئه انت مش مدرك عواقبها أو بتكفر عن ذنب قديم ارتكبته .
.
- طب هي المشكله فين ؟ و لما نلاقي المشكله اكيد هنلاقي الحل , المشكله الأصغر في المحليات و دولة القانون الحاسم , و المشكله الأكبر فينا احنا , عشان البلطجه و الاعتداء على حرمة الطريق بقت سلوك عام , بقت قاعده , و الشاذ عن القاعده هو اللي مابيبلطجش , حاول تصدق , احنا أصل المشكله , حتى السوري اللي بيبلطج بيقلدنا مش اكتر , احنا اللي شجعناه , احنا يعني انا و حضراتكو , مفيش مخلوقات فضائيه بتنزل تمارس البلطجه في شوارعنا و ترجع تاني لكوكبها أخر النهار .
.
طب و الحل ؟ أول خطوه في الحل عندنا , هي الاعتراف , نعترف إننا أصل المشكله , تاني حل محليات خاليه من المرتشين و الفسده و قانون يتطبق عالكل بمنتهى الحسم والحزم , مفيش حاجه اسمها أصل ده غلبان و بيسترزق , ولا ده باشا و نسيبه , أصل ده مصري و ده سوري , دولة القانون مابتعترفش بالمسميات دي ( الغلبان و الباشا و المصري و الأجنبي ) .
..................................................................................................................
Mohamed Hussein
17 اغسطس 2019
طب خلاص تاهت ولقيناها , احنا كل مانلاقي نفسنا متضايقين شويه أو خارجين من العيد مأشفرين و جيوبنا فاضيه نبعت نجيب فريق من الصومال نغلبه سبعه تمانيه و نفرح و ننبسط وننسى همومنا , ده حتى ساعة الماتش ماتتعوضش .
....................................................................................................................
Mohamed Hussein
16 اغسطس 2019
دندنه
هي , الأصل و المبتدأ و القيمه و القامه و المقام
.
- مصري للنخاع , مصري حتى الثماله , شهادتي في حقها دايما مجروحه , مصر الوطن والكيان ماينفعش نقول لها ما لها و عليها ما عليها , لأ , هي لها كل حاجه و مفيش عليها شئ , كامله مكمله والكمال لله .
.
- في الفن مش هسمع غربي , ماتجيبليش خواجه بيغني بكلام خواجات و لحن خواجات , أنا ودني شبعانه بأم كلثوم و عبد الحليم و شاديه و نجاة و ألحان السنباطي و القصبجي و زكريا و عبد الوهاب و بليغ و كلام أحمد شوقي و حافظ و بيرم و رامي , أنا جاي من بيت شبعان والأكل ده مايلزمنيش , لا يلزم الروح ولا الوجدان .
.
- لو مطرب عربي عايز يغني , وماله , بس يغني بلهجه مصريه عشان أسمعه , هو اللي يجيلي مش أنا اللي هروح له .
.
- في القرأن عمري ماسمعت السديس ولا الحذيفي , قرايتهم حاده زي أفكار الوهابيه بالظبط , وانا برضه ودني شبعانه بالطبلاوي و المنشاوي و عبد الباسط و محمد رفعت و ألاف المقرئين صوتهم جاب لأخر الدنيا , انا ماعيطتش أبدا من تباكي أئمة الحرم و بحسها مسرحيه هزليه لا تليق بمقام القرأن , انما دموعي بتنزل من ترتيل الطبلاوي مع انه مش بيتباكي .
.
- وانا بقرا القرأن و ربنا يسامحني , بقف أكتر عند أي أيات تجيب سيرة مصر بتصريح أو بتلميح , و سيرة فرعون , و موسى و يوسف , بحس بفخر عجيب , مع إنه كله كلام ربنا بس ده إدمان يا مولانا , عشق و ضارب في الجدور من تحت .
.
- (و أتت كل واحدة منهن سكينا ), أتارينا بنقطع الفاكهه بالسكينه من كام ألف سنه و مش محتاجين حد يعلمنا الإتيكيت , قبل مايبقى فيه فرنساويين و ألمان بقرون و زمان .
.
(فلما سمعت بمكرهن أرسلت لهن و أعتدت لهن متكئا) , ممممممممم كان عندنا يا أخي من كام ألف سنه كده حاجه اسمها سيدات مجتمع , و المرأه تبقى ملكه و تحكم مصر مش لسه هنقول لها في 2019 م احنا سمحنا ليكي بسواقة العربيات يا حرمه.
.
- (قال اجعلني على خزائن الأرض ), اه هي دي مصر بلدنا , خزائن الأرض بكلام ربنا و لسان يوسف الصدّيق.
.
- (أليس لي ملك مصر و هذه الأنهار تجري من تحتي ), ماهو أي مَلك في الدنيا يفخر بإيه أكتر من مُلك مصر ؟ و القرأن يذكرها , عشان هي قمة الجبل و مفيش نقطة في الجبل أعلى من قمته .
.
- (فسقى لهما ثم تولّى إلى الظل) , ده بقى الشاب المصري الجدع نبي الله موسى .
.
-(ولقد مكنا ليوسف في الأرض ), ماهو التمكين في مصر يعني التمكين في الأرض , وقتها مكانش فيه كيان ينفع يتقال عليه دوله غيرها , مش هنخترع يعني .
.
- (فأوقد لي يا هامان على الطين ), اتارينا جبابره من زمان و عايزين نبني صرح وبرج و ناطحة سحاب عشان قال نطلع نشوف رب موسى ده فين بالظبط , وقتها كان 95 %من سكان المعموره عايشين في كهوف و بيغطو مؤخرتهم بورقة شجر .
- مين ده بقى اللي مايتجننش بحب البلد دي ويعيش و يموت و هو درويش في محرابها ؟! .
............................................................................................................
ليست هناك تعليقات:
إرسال تعليق