Mohamed Hussein
15 أغسطس 2019
دندنه
هي , الأصل و المبتدأ و القيمه و القامه و المقام
.
- مصري للنخاع , مصري حتى الثماله , شهادتي في حقها دايما مجروحه , مصر الوطن والكيان ماينفعش نقول لها ما لها و عليها ما عليها , لأ , هي لها كل حاجه و مفيش عليها شئ , كامله مكمله والكمال لله .
.
- في الفن مش هسمع غربي , ماتجيبليش خواجه بيغني بكلام خواجات و لحن خواجات , أنا ودني شبعانه بأم كلثوم و عبد الحليم و شاديه و نجاة و ألحان السنباطي و القصبجي و زكريا و عبد الوهاب و بليغ و كلام أحمد شوقي و حافظ و بيرم و رامي , أنا جاي من بيت شبعان والأكل ده مايلزمنيش , لا يلزم الروح ولا الوجدان .
.
- لو مطرب عربي عايز يغني , وماله , بس يغني بلهجه مصريه عشان أسمعه , هو اللي يجيلي مش أنا اللي هروح له .
.
- في القرأن عمري ماسمعت السديس ولا الحذيفي , قرايتهم حاده زي أفكار الوهابيه بالظبط , وانا برضه ودني شبعانه بالطبلاوي و المنشاوي و عبد الباسط و محمد رفعت و ألاف المقرئين صوتهم جاب لأخر الدنيا , انا ماعيطتش أبدا من تباكي أئمة الحرم و بحسها مسرحيه هزليه لا تليق بمقام القرأن , انما دموعي بتنزل من ترتيل الطبلاوي مع انه مش بيتباكي .
.
- وانا بقرا القرأن و ربنا يسامحني , بقف أكتر عند أي أيات تجيب سيرة مصر بتصريح أو بتلميح , و سيرة فرعون , و موسى و يوسف , بحس بفخر عجيب , مع إنه كله كلام ربنا بس ده إدمان يا مولانا , عشق و ضارب في الجدور من تحت .
.
- (و أتت كل واحدة منهن سكينا ), أتارينا بنقطع الفاكهه بالسكينه من كام ألف سنه و مش محتاجين حد يعلمنا الإتيكيت , قبل مايبقى فيه فرنساويين و ألمان بقرون و زمان .
.
(فلما سمعت بمكرهن أرسلت لهن و أعتدت لهن متكئا) , ممممممممم كان عندنا يا أخي من كام ألف سنه كده حاجه اسمها سيدات مجتمع , و المرأه تبقى ملكه و تحكم مصر مش لسه هنقول لها في 2019 م احنا سمحنا ليكي بسواقة العربيات يا حرمه.
.
- (قال اجعلني على خزائن الأرض ), اه هي دي مصر بلدنا , خزائن الأرض بكلام ربنا و لسان يوسف الصدّيق.
.
- (أليس لي ملك مصر و هذه الأنهار تجري من تحتي ), ماهو أي مَلك في الدنيا يفخر بإيه أكتر من مُلك مصر ؟ و القرأن يذكرها , عشان هي قمة الجبل و مفيش نقطة في الجبل أعلى من قمته .
.
- (فسقى لهما ثم تولّى إلى الظل) , ده بقى الشاب المصري الجدع نبي الله موسى .
.
-(ولقد مكنا ليوسف في الأرض ), ماهو التمكين في مصر يعني التمكين في الأرض , وقتها مكانش فيه كيان ينفع يتقال عليه دوله غيرها , مش هنخترع يعني .
.
- (فأوقد لي يا هامان على الطين ), اتارينا جبابره من زمان و عايزين نبني صرح وبرج و ناطحة سحاب عشان قال نطلع نشوف رب موسى ده فين بالظبط , وقتها كان 95 %من سكان المعموره عايشين في كهوف و بيغطو مؤخرتهم بورقة شجر .
- مين ده بقى اللي مايتجننش بحب البلد دي ويعيش و يموت و هو درويش في محرابها ؟! .
....................................................................................................................................
Mohamed Hussein
15 أغسطس 2019
إمبارح كان بيحكم ماتش ليفربول و تشيلسي بنت , اه بنت , ماتش السوبر الأوروبي يعني ليفل الوحوش , يعني جوايز و مكافئات بمئات الملايين , و جماهير ماليه الاستاد و لاعيبه أجسامهم زي التيران و مع ذلك الماتش بيحكمه بنت , لا اتوترت ولا اتهزت .
.
و عندنا يا بيه يبقى الماتش بين سكر الحوامديه و كفر أبو عجوه في دوره رمضانيه و الجايزه تي شيرت لكل لاعب ب 60 جنيه, و الجماهير بتاع 17 نفر منهم سيد أبو ستيته , و اللاعيبه عندهم سل و جفاف و محتاجين يظبطو أمورهم في التأمين الصحي وياخدو حقن لحمه , و الحكم راجل له شنب يقف عليه الصقر بس يخاف يحسب بلانتي ( بلن ) على كفر أبو عجوه عشان الواد سيد أبو ستيته عليه نظرة عين ترعب ده غير ان حارس مرمى كفر أبو عجوه يقرب لمرات الحكم ولو حسب عليه بلانتي هيبقى فيها زعله كبيره و قاعدة عرب .
.......................................................................................................................
Mohamed Hussein
14 أغسطس 2019
من دقايق بس , ليفربول و إبننا صلاح أبطال السوبر الأوروبي على حساب تشيلسي , بعد مافازو بدوري أبطال أوروبا من كام شهر , و بإذن الله يفوزو ببطولة العالم للأنديه و يحققو الثلاثيه , صلاح فخر العرب و أفريقيا بلا منافس ولا منازع ولا مثيل ولا ند , صلاح في حتة تانيه خالص , نفس الحته اللي فيها أم كلثوم و جمال عبد الناصر و أحمد زويل و نجيب محفوظ و عبد الفتاح السيسي
.
طب و بالنسبه حضرتك للكابتن محمد أبو تريكه ؟
- بس يابن ال #$%^& عشان احنا في أيام مفترجه و مش عايز أجيب سيرة الست الوالده اللي ممكن تكون خطيئتها الكبرى والوحيده في الحياه هي إنها خلفتك .
..................................................................................................................
Mohamed Hussein
14 أغسطس 2019
قصة مصرية قصيرة
.
خرجت ست أم شوشو إلى البلكونه و معها سبت الغسيل عشان تنشره , شافت أم فاروق واقفه في البلكونه اللي قصادها , رمت عليها الصباح و ضحكو شويه و جابو في سيرة بنات و ستات الشارع كلهم من أوله لأخره, و فجأه ست أم شوشو و هي حاطه مشبك غسيل في بؤها افتكرت إنها ممكن تكتب كوميكس عن مفاعل الضبعه النووي , ست أم شوشو ركنت سبت الغسيل على جنب و رمت المشبك في السبت و دخلت تجري عالتابلت بتاعها , فتحت صفحتها عالفيس بوك , و كتبت ( روسيا هتعمل لنا مفاعل نووي , اللي عندها كيسين باميه مخزناهم تلحق تطلعهم يا جدعان هاهاهاهاها ) .
.
دخل الشباب و الرجاله عملو إيموشن بيضحك على الكوميكس الجميل البيض بتاع ست أم شوشو .
.
أستاذ عوني موظف في الصرف الصحي عالمعاش , قاعد عالقهوه و كتب تعليق , دمك خفيف أوي يا ام شوشو و سمانة رجليكي حلوه
.
أما الوله سبارس سواق الميكروباص على خط السلام و النهضه , لمح البوست بتاع أم شوشو قام وقف بالميكروباص في نص الطريق و قال يكتب تعليق , و كتب ( هنموت كلنا ) مع صورة أحمد بدير في الفيلم بتاع رامي قشوع .
.
شادي شاب من الشباب التنويري العميق اللي سابقنا بمليون فدان , شادي ماضحكش عالبوست , و كتب تعليق بيقول فيه ( يا جماعه انتو مش مقدرين حجم الكارثه اللي احنا داخلين عليها , نحن أمام وضع عبثى حتى الثماله ) , ردت عليه أم شوشو و قالت له طب نعمل ايه يا أستاذ شادي ؟ رد عليها شادي بعد مافكر شويه و هرش في راسه مرتين و قال لها ( ممكن مثلا نقترح إننا نعمل سور عالي أوي حوالين مفاعل الضبعه عشان الإشعاعات ماتوصلش عندنا ), ردت عليه أم شوشو و قالت فكره هايله و أهو بالمره السور العالي هيمنع العصافير , رد عليها شادي وقال لها , بالظبط كده .
.
الوله شغته صبي المعلم عكوه الجزار دخل في الحوار , و قال ياخوانا موضوع المفاعل النووي ده مالوش أي تلاتين لازمه ولا معمول له دراسة جدوى و أنا من وجهة نظري إن الفلوس اللي هنصرفها في كده كنا نشتري بيها أكلة كوارع لكل مواطن مصري , ده حتى شوربة الكوارع بترم العضم و تعمل الحاجات اللي هي و تخلّي العجوزه صبيه .
.
و فجأه و بينما فلاديمير بوتين يجلس في مكتبه في قصر الكرملين دخل عليه أحد مساعديه , بوتين سأله , مالك يابني قالب سحنتك كده ليه ؟ رد المساعد , كارثه ياريس , خير يابني ماتنطق فيه ايه ؟ المساعد : حضرتك دخلت صفحة ست أم شوشو النهارده ؟
بوتين : لا والله مافضيتش , مالها صفحة أم شوشو
المساعد : كاتبه عن المفاعل بتاع الضبعه و عماله تتريأ هي و اصحابها
بوتين بغضب شديد : معقوله الكلام ده ؟ دي كارثه حقيقيه , إوقف لنا يابني مشروع الضبعه ده فورا , كلم السلطات المصريه قول لهم احنا هنلغي العقد و كلم الفريق النووي بتاعنا فورا وعلماء الذره خليهم يدخلو على صفحة أم شوشو و يستفيدو من خبراتها النوويه هي و أصحابها .
.
أم شوشو بعد ما اتطمنت عالبوست و السبعتاشر لايك اللي عليه لفت انتباهها حاجه مهمه , إن أم فاروق ماعملتش لايك و لا كومنت , قعدت تسأل نفسها هي ليه كده ؟ تضحك في وشي و من ورايا ماتعملش لايك , يا ساتر , السواد مالي قلبها و الغيره هتاكلها , إكمنى يعني سي الأستاذ محفوظ جوزي جاب لنا بطيخه من اسبوعين و هي شافتها , ربنا ينتقم من كل اللي يبص لي في بيتي و جوزي و عيالي , أم شوشو قطع تفكيرها ورقه بيضا متطبقه لمحتها تحت كرسي الأنتريه كان الواد حماده ابنها مشخبط فيها , فتحت الورقه وشافت الشخبطه وخبطت بإيديها على صدرها وقالت يا مصيبتي , ده عمل و عاملهولي أم فاروق , أيوه هو عمل , ربنا ينتقم منها , يارب البلكونه تقع بيها .
.....................................................................................................................................
Mohamed Hussein
12 أغسطس 2019
كل لما بسافر البلد من مدينة نصر للسنبلاوين ببقى مركز أوي في اللي بيحصل حواليا و انا ماشي , في ظرف أربع خمس سنين فاتو اتعمل طريق شبرا بنها الحر بطول 40 كيلو , اللي اختصر الوقت لتلت ساعه بدل ساعه كامله , كوبري ميت غمر الطويل ده اللي بيعدّي من فوق ميت غمر , و كوبري في مدخل اجا و كوبري سندوب التحفه الفنيه في مدخل المنصوره , امبارح اتفاجئت ب تقريبا 6 كباري جديده بتتعمل عالطريق , و أعتقد ان خطة الدوله هي إن طريق بنها المنصوره يكون هو كمان طريق حر مفهوش لا مطب ولا دخلة قرية تقف فيها ولا دخلة مدينة تعطلك , الكباري الجديده دي قربت تخلص و تشتغل , معناها ان المسافه اللي كنت باخدها في 3 ساعات ونص هتفضل تقل لحد ماتبقى ساعتين , يعني توفير كبير في الوقت و توفير أكبر و أهم في استهلاك البنزين .
.
الحقيقه إن اللي مايشوفشي من الغربال يبقى اعمى , الطريق من القاهره للمنصوره مجرد طريق بيخدم محافظتين تلاته , يعني فيه زيه عشرين تلاتين طريق تانيين معمول فيهم نفس الشغل , والحقيقه المؤكده اللي مبقاش ينفع فيها نقاش ولا جدال ولا هري ولا مناهده , حقيقه بتقول إن عبد الفتاح السيسي استلمها فعلا شبه دوله , و إن مصر في تلاتين سنه كان بيحكمها شيخ منصر تحت إيده مسئولين و موظفين مقسومين نصين , نصهم شوية حراميه و النص التاني شوية لصوص !! .
.........................................................................................................................
Mohamed Hussein
· 10 أغسطس 2019
مفيش شارع في القاهره النهارده مفهوش شادر للخرفان أو أكتر , في الجزيره اللي في نص الشارع تحديدا , مفيش شادر منهم مش واقف جنبه عربيه واتنين بيشترو خروف العيد , انا بقى عندي قناعه إني لو كنت ظابط مرور و واقف في كمين دلوأتي و طلبت من كل سواق عربيه يفتح شنطته للتفتيش هلاقي نص العربيات فيها جوه الشنطه الكوريك والاستبن و الخروف , وممكن اللي مالقاش عنده خروف أديله مخالفه , ربنا يجعل بيوت المصريين عمار , كل سنه و حضراتكو طيبين .
................................................................................................................................
Mohamed Hussein
· 9 أغسطس 2019
حد يفكرني بقى كنا بنصوم إزاي ؟ اللهم صل عالنبي , اه فتكرت , بنتسحر بطريقة البستره و الجمل , سحور قبل الفجر بساعه لازق فيه كوباية شاي سخنه مولعه لازق فيها كوباية زبادي ساقعه تلج ( مرحلة البستره ) ,و بعدها 4 لتر مايه و 17 سيجاره ملضومين في بعض ( مرحلة التخزين زي الجمل ) .
..........................................................................................................................
Mohamed Hussein
· 9 أغسطس 2019
عاجل , العثور على صديق بعت لي رسالة في الإنبوكس كاتبها بخط إيده و بيقولي ( كل سنه وانت طيب يا محمد ) , يعني مش صورة ولا فيديو ولا رسالة صوتيه من اللي بتدوس عليهم بزرار يقومو يتبعتو لكل الأصدقاء والفولورز و المغول و البيزنطيين في نفس اللحظه , جاري التحقيق مع الصديق ده و معرفة الجهة التي تموله , و ليه اختار انه يبقى بني ادم و يعيّد على أصحابه وجها لوجه ؟ ليه يابني ماتبقاش بلاستيك زي بقية مخاليق ربنا ؟! .
.................................................................................................................
Mohamed Hussein
8 أغسطس 2019
: بابا احنا عايزين طقمين كمان عشان العيد 3 أيام مش يوم واحد , و عايزين لحمة العيد و الريش و رقبه ضاني , و عايزين شنطة جديده و صندل و كوتشي و شرابات و اكسسوارات و عايزين نروح للكوافير ليلة العيد و عايزين عيدية كبيره , و في العيد بقى نتفسح 3 فسحات و نروح سينما و ملاهي و نتغدى بره .
- انا : شوفو يا بنات , زي ما شرحت لكو قبل كده , كل مرحلة لها توجهاتها و أهدافها المنبعثه من عمق الفكره و من النظره الشامله للظروف المحيطه بالمنطقه والتي ترتكز على قواعد راسخه من الوعي و الإدراك و التناغم الأفقي و الرأسي بين المفردات و المعطيات و المفاهيم التي قد تؤدي بالضروره إلى نتائج محددة المعالم و الهويه دون النظر إلى ما قد تؤدي إليه معطيات أخرى ربما لا تكون وثيقة الصله
.
بناتي : يعني ايه يا بابا الكلام ده ؟
أنا : ممممممم يعني مفيش فلوس يا كلاب .
..................................................................................................................
Mohamed Hussein
8 أغسطس 2019
مصر اللي مفيش زيها
.
قاعد في الصيدليه , دخل الحاج محمد شغال في شركة جنبي , عايز الدوا ده بس هدفع حسابه لما أقبض , حاضر يا حاج محمد , ألاقي معاك ولاعه زياده ؟ معايا دي بس يا دكتور خدها و انا هتصرف , طيب ماشي .
.
إزيك يا محمود( بتاع محل الإزاز ) , أجيب لك ايه ؟ عايز شاحن سامسونج ساعه و أرجعه , طب ادخل خده من جوه , بقولك يا محمود , إبعت لي والنبي كوبايتين إزاز و كرسي زياده عشان جاي لي ضيوف , حاضر هبعتهم مع الواد .
.
أهلا أهلا يا عم أحمد ( بتاع محل الدهب ) , إزيك يا دكتور , الحاج بيقولك عايز الدوا بتاع والدته و لو عندك باكتتين شاي لأنه خلص من عندنا والناس قاعدين , اه عندي يا عم أحمد , استنى بالمره خد المج بتاعي معاك هحط لك فيه نسكافيه و سكر , صب لي فيه مايه مغليه عشان البويلر بايظ عندي , ماشي هاته , خد باكيتات الشاي كلها يا عم احمد وسيب لي خمسه سته بس لاني مابشربوش و جايبه للضيوف
.
عارفين , أحيانا كتير بتعمد إن حاجه من الحاجات اليوميه تخلص خالص من عندي أو تبوظ و ماجيبش غيرها , مش بخل منّي ولا استنطاع عالغير , إنما مش عايز الدايره دي تتكسر , يمكن بعتبرها حاجه من ريحة زمان و ذكريات زمان , أيام ما كان الشارع في قريتنا بيعيش كله بكوبايتين شاي ماتعرف أراضيهم فين كل يوم , و يستلفو من بعض الحصيره و الكراسي و المقشه و إيد الهون و المنخل و الغربال و العبايه السوده والشبشب و الطرحه و السبت و المشابك و الشرشره و الفاس و الكنبه و علبة الألوان و البرجل وعدة الهندسه و بصلتين و شوية كمون و حتى الكوره الشراب .
...............................................................................................................
Mohamed Hussein
7 أغسطس 2019
إبننا محمد صلاح اتبرع ب 3 مليون دولار لمعهد الأورام , يعني 50 مليون جنيه , والحقيقه ان صلاح مكانش مضطر لكده خالص , ده لاعب محترف بره وله اسمه في العالم كله , يعني لا بيدور على وظيفه ولا طمعان في تسهيلات ولا بيتملّق دوله , و الحقيقه برضه إن لو كان اتبرع بمليون جنيه بس زي رجال أعمال مليارديرات عندنا مكانش حد هيقدر يقوله غير ( كتر خيرك ) , مليون جنيه بس مش 50 مليون .
.
صلاح رمز وقدوه لكل شباب مصر بلا استثناء , ولد مصري وطني للنخاع و فلاح كمان , ياريت بقى و النبي حبايبنا الحلوين اللي قاعدين لصلاح على كل هفوه و كل زلة لسان يهدو شويه , و مش معنى إنه فيه شخصية سمجه ولزجه زي أبو زفت بيتمحّك في صلاح كل شويه نقوم ننزع عن الولد صك الوطنيه و احنا قاعدين نهبد قدام الكيبوردات , ولا مطلوب مننا إنه كل شويه نطلب من صلاح يثبت لنا وطنيته و نعمل له اختبارات و كشف هيئه , واحنا ما شاء الله يعني لو فينا واحد مالتي مليونير بعت رساله لتحيا مصر ب 5 جنيه بيصورها و ينزلها عالفيس و بنعتبر إن الرساله أم 5 جنيه دي صك وطنيه تغفر له ما تقدم من ذنبه و ما تأخر .
.................................................................................................................
Mohamed Hussein
6 أغسطس 2019
امبارح و معانا مجموعه من المصريين الوطنيين الجدعان تشرفنا بزيارة المركز الإعلامي لرئاسة مجلس الوزراء المصري بدعوه كريمة من المركز
.
الحقيقه أنا روحت و مش عارف هيحصل إيه ولا رايحين ليه أصلا .
.
في المركز الإعلامي بعد حفاوة الترحاب و المقابله المحترمه جدا , شوفت مشهد يفرح القلب , اه في مصر والله , مجموعة شباب اعمارهم بين ال 25 وال 35 , خليه نحل , متقسمين أقسام وشغلهم بيكمل بعض , مسئولين عن التصريحات الرسميه لمجلس الوزرا و تفنيد الإشاعات و عمل إنفوجرافات للمشاريع و خلافه , و إحصائيات لحاجات كتير بتختصر مواضيع مهمه بشكل مبسط , من أكتر الحاجات اللي لفتت نظري التدقيق , مجموعات بتراجع ورا بعض , ماينفعش رقم يطلع من مجلس الوزرا غلط أو مش دقيق , بحث و تواصل مع المصادر الرسميه , كونتاكت مع كل الوزارات , أغلب الشباب زي ماقال واحد منهم ( الوحده بتاعتنا اغلبها خريجي سياسه و اقتصاد ) و طبعا فيه خريجي إعلام غير خريجي هندسه و كليات التكنولوجيا ( دول المسئولين عن الإنفوجرافات و الحاجات الفنيه ) .
.
بصفة شخصيه و اختصاراً لتفاصيل كتير , لفت انتباهي جدا مديرة المركز , دكتوره نعايم سعد , سيدة شابه , لاحظتها في كل تصرفاتها , إزاي بتقدر ترد على اتنين تلاته مننا و اتنين تلاته من الشباب اللي معاها في نفس الوقت و بتركيز تام و هي مبتسمه ؟ ايه الجو الجميل اللي عاملاه جوه المركز ده ؟ إزاي وصّلت الشباب انهم فعلا مايكونوش عايزين يروحو بيوتهم ويسهرو أحيانا للفجر ؟ إزاي قدرت تقسم الفريق بتاعها لمجموعات و تخلي مجموعه تراجع ورا التانيه و تكافئها لو طلّعت غلطه قبل النشر ؟
.
لفت انتباهي كمان البنت المصريه الجميله سهره , اللي بتشرح في الصوره التانيه , بتحاول تقول لنا طبيعة شغلها و مش عايزه تخلص كلام , حماس غير عادي و سعاده ملهاش وصف باللي هي بتعمله , المجموعه كلها رائعه , أه دول شباب مصر الوطنيين اللي شكلهم يفرح , مش الصوره النمطيه بتاعة شوية المعاتيه اللي منقوعين جوه برطمانات كوله
.
المركز بصراحه بقى فيه عيب واحد , ماعندهمش حاجه تتاكل , ومش عارف ضيوف ييجو زياره من الضهر للمغرب مايلاقوش فطار ولا غدا ليه ؟ هو عبد الفتاح السيسي ماسك إيده أوي كده ؟ إنما الشهاده لله عندهم قهوه حلوه أوي ماشربتش زيها من سنين طويله .
.
ملحوظه مهمه : المجموعه اللي راحت و انا منهم ماروحناش عشان احنا جبارين و بنمشي عالحيط ولا اتعمل لنا اختبارات و شألباظات ونجحنا فيها , احنا كنا مجرد عينه أو نموذج للمصريين اللي بيكتبو عالفيس ويعني لهم شوية متابعين , فيه مليون زينا و أحسن مننا ألف مره , ده بس عشان نقفل الباب السخيف و المحرج ده .
.
أتمنى من كل أصدقائي الأفاضل يعملو متابعه لصفحة رئاسة مجلس الوزرا و ندعمهم عالمجهود الكبير اللي بيعملوه رئاسة مجلس الوزراء المصري
......................................................................................................................................
Mohamed Hussein
5 أغسطس 2019
أه طبعا طبعا , سيتركون العاصمه القديمه تحترق , و الدليل كمية الطرق و الكباري و البنيه التحتيه اللي اتعملت في القاهره اخر 5 سنين , سيتركون العاصمه القديمه تحترق و الدليل القضاء على العشوائيات و تحويلها لمساكن تليق بالبني أدمين , سيتركون العاصمه القديمه تحترق والدليل تطوير مثلث ماسبيرو و دعوة الناس لطلاء منازلهم القديمه في اماكن معينه , ماحنا برضه قبل مانسيب العاصمه القديمه تحترق لازم نظبّطها و نصرف عليها عشرات المليارات , بالظبط زي ما بنعمر سينا و بنصرف عليها ربع تريليون جنيه عشان نبقى نسلمها للصهاينه و الفلسطينين عالمفتاح
....................
بس مين يا حبيبي اللي قالك البؤ بتاع سيتركون العاصمه القديمه تحترق ؟
- ده حضرتك الكاتب و الأديب الكبير والمفكر العبقري أحمد خالد توفيق
.
اه عرفته , بتاع البانجو ؟
- لا حضرتك ده أديب كبير أوي .
.
يابني هو بتاع البانجو .
- بتاع بانجو إزاي ؟
.
لما تكبر هتفهم , البانجو مش بس بيتباع عند تجار المخدرات و الديلرز , أوسخ أنواع البانجو بتتباع في كتب و سطور و كلمات , و يتقال على أصحابها كتاب كبار و مؤلفين و قيادات وقامات و أصحاب فكر , و بيتم تلميعهم من جهات مجهولة
- زي مين حضرتك بتوع البانجو ؟
.
يوسف زيدان , علاء الأسواني , أحمد خالد توفيق , حسن البنا , شيوخ الوهابيه , كل دول يا حبيبي بتوع بانجو .
- يعني ايه بتوع بانجو و غرضهم ايه ؟
.
يعني يزرعو في دماغك السواد و التشاؤم و فقدان الأمل و الغل و الإرهاب والفكر الإنهزامي و كراهية الغير والتشكيك في كل شئ , الماضي و الحاضر و المستقبل , بكل الطرق , مره بإسم الدين و مره بإسم الفكر المتحرر , الغرض واحد , و الممول و الملمّع و مخرج العرايس برضه واحد , هو هو, و تأثير اللي بيكتبوه على عقول المراهقين يعادل ألف ضعف لتأثير المخدرات بكل أنواعها , عقول يابني بتروح و ماترجعش , وبني أدمين يتحولو لمجرد مسخ , عرفت بقى يعني إيه بتاع بانجو ؟
................................................................................................................................
Mohamed Hussein
4 أغسطس 2019
بعد مذبحة تكساس , مذبحة جديده في اوهايو , 20 قتيل و ضيف عليهم 9 كمان يبقى المجموع 29 , و عشرات المصابين في حوادث إطلاق نار متفرقه .
.
الحقيقه , أنا فخور جدا بالأمن و الأمان اللي بتعيشه أمريكا , فخور بأجهزتها الأمنيه اللي بتعرف دبة النمله قبل ما تدبّ برجليها و خلخالها , فخور بكاميرات المراقبه و الأجهزة الحديثه و خمستاشر قول سبعتاشر ألف فيلم و مسلسل عن قدرات ال fbi وال cia و ال wc و الأبطال الخارقين اللي بيمشو عالحيط و رامبو و جون ترافولتا و 24 و جاك باور و ncis و قوات المارينز و إزاي أمريكا عارفه ألوان شرابتنا و ملابسنا الداخليه و إزاي عارفه إحنا هنتغدى ايه بعد 3 أيام ؟ و إزاي قادره على محاربة المخلوقات الفضائيه و حماية كوكب الأرض من غزو الديناصورات و السحليه العملاقه و من عصابة الولاويله الحمره .
.
واللي حضراتكو ماتعرفهوش بقى بسبب الإعلام المضلل بتاع السيسي , إن كل المخلوقات الفضائيه في درب التبانه و المجرات المجاوره أمريكا بتنيّمهم من المغرب , ممممممممممم نلتقى أخر الرواق ( ترجمة معامل أنيس عبيد ) .
.................................................................................................................................
Mohamed Hussein
4 أغسطس 2019
على سبيل الإعتراف
.
كلمة بالإنجليزي عرفت معناها بشكل معكوس و فضل المعني العكسي ده لازق في دماغك طول السنين ؟
.
أه حصل , و تحديدا كلمة Discuss briefly , يعني ناقش باختصار , وانا من الاول اعرف انها ناقش باستفاضه ( براحتك خالص ) و فضلت لازقه في دماغي كده حتى طول سنين الجامعه , كل امتحان تقريبا لا يخلو من رأس سؤال بالشكل ده , و كل ماشوف سؤال بيقول Discuss briefly أقول أهو السؤال بتاع الإستفاضه اللي هنفرد فيه رجلينا ونمدد و نعيد و نزيد و نجيب من الأول تاني ,و أقعد اجاوبه في صفحتين و بعد ما إيدي توجعني من الكتابه أقول لنفسي هو كده كفايه ولا أزوّد شويه كمان؟! .
.
و فضلت على هذا الحال و اتجوزت وخلفت ولا همني , لحد مالبت لوجي بنتي كانت في تالته ابتدائي باين و عندها نفس السؤال فبقول لها , أيوه السؤال ده انا عارفه , لازم تستفيضي بقى , قالت أستفيض ايه ؟ ده معناه ناقش باختصار , ممممممممم نعم ياختي ؟ نعم يا دلعدي ؟ هي المناهج لحقت تتغير عن أيامينا ولا إيه ؟ .
.......................................................................................................................................
Mohamed Hussein
3 أغسطس 2019 ·
لا حول ولا قوة إلا بالله , شوفت يا صاحبي اللي حصل ؟
- خير , حصل ايه ؟
.
مصيبه , كارثه والله
- طب قول بسرعه
.
ناس يا سيدي دخلو سوبرماركت و قعدو يضربو نار
- ها و ايه اللي حصل ؟
.
20 ضحيه ما بين قتيل و جريح
- يا نهار مش فايت , 20 قتيل و جريح ؟
.
أه و عهد الله زي مابقولك كده
- طب وفين الشرطه والأجهزه الأمنيه و كاميرات المراقبه ؟ هما بس شاطرين يزودو مرتبات الشرطه كل يوم تلات ؟
.
أنا عارف بقى ياخويا
- الناس بتمشي في الشارع بالمسدسات و تضرب نار عادي كده ؟ , بلد الأمن و الامان صحيح
.
على رأيك
- يارب يخرجنا منها على خير يا اخي , يعني الواحد ينزل مع عياله السوبرماركت عشان يشتري ربع كيلو جبنه يقوم يدخل واحد يضرب نار و نرجع متكومين كلنا ومتعبيين في أكياس بدل الجبنه ؟
.
دي حاجه ترعب بجد
- يارب هجره , يارب هجره .
.
معاك حق والله , بس عايز تهاجر و تروح فين
- أي بلد يا اخي يكون فيها أمان و بتحترم البني أدمين و حياتهم , والواحد يبقى مأمن على عياله , بدل الرعب اللي احنا عايشين فيه , نفسي أعيش في أمريكا يارب يقبلو طلبي .
.
يووووووه , خدتني في الكلام و نسيتني أقولك , إن الحادثه دي في أمريكا مش عندنا
- ايه ؟!! .
.
- يالله بقى انت اتوكل على الله عشان تلحق الربع كيلو جبنه اللي في امريكا , والنبي السلام أمانه للشرطه و الأجهزه الأمنيه اللي هناك , عشان هما أصلا عارفين كل حاجه و عارفين القرد مخبي ابنه فين , بالك انت ؟ لو قررت تعطس في امريكا قبل ماتقول ( هااااتسي ) هتلاقي مركز الشرطه بيتصل بيك و يقولك , يرحمكم الله .
............................................................................................................
Mohamed Hussein
3 أغسطس 2019
أصدقائي الغاليين , مش عارف أجيبهالكو إزاي والله , بس ممكن يعني أقول لكو , إن التوأم بيتولد لنفس الأب و نفس الأم و في نفس الشهر و اليوم و الساعه و الدقيقه و أحيانا كتير لما بيكبرو بتبقى شخصياتهم مختلفه تماما , و أحيانا بيبقو عكس بعض , فحكاية الأبراج و مواصفاتها و أن ذكر الحمل طيب و حنون و عاطفي و صاحب صاحبه و دمه خفيف وابن نكته و ساعة الإنفعال بيبقى جبار و بيمشي عالحيط و يطلع نار من ودانه , وإحذر بقى من غضب أنثى الأسد خصوصا يوم التلات , كلام جميل ممكن نكتبه من باب الهجايص في ساعة عصاري , يعني قرطاس فيشار مش اكتر من كده .
.
لو عصفوره عملت ببي على هدومك مش هتتكسي ولا حاجه ولا هتلاقي رساله جايالك من محل ملابس بتقولك إنك كسبت معاهم هدوم قيمتها 10 الاف جنيه تاخدهم هديه لأنك سعيد الحظ اللي العصفوره عملت ببي على هدومه .
.
الفرخه اللي بتشوفها في المنام مش نظره ولا معناها انك هتبيض في المستقبل , و لو حد خطفك في الحلم يا حاجه فتأكدي تماما إنك هتصحي من النوم تلبسي هدومك و تروحي شغلك و ترجعي بيتك زي كل يوم عادي خالص , محدش دلوأتي بيخطف نسوان يا خالتي , ويمكن دي مشكلة جيلنا الحالي الكبرى , إنه مبقاش فيه عصابات بتخطف الستات .
.
و لما يا جدعان تشربو قهوه , هتلاقو بعد اخر شفطه شوية بواقي لازقه في الفنجان , و عامله بقى أشكال مختلفه و حرافيش و شنكابالات , صدقني ده مش مستقبل حياتك مرسوم في خريطه سريه مربوطه على رجل سحليه يتيمه في قاع المحيط الأطلنطي , ولاشوية ( التفل ) دول بيحددو مصير العالم و اتجاهاته و بيحددو التشكيل الأمثل لمنتخبنا القومي اللي هنفوز بيه بكاس الأمم , طب تعمل ايه لما تشوف الشنكابالات لازقه في الفنجان ؟ مممممممممممم تقوم تغسله تحت الحنفيه بشوية مايه , بس كده , اه و عهد الله .
....................................................................................................................
Mohamed Hussein
2 أغسطس 2019 ·
روحت البيت من شوية مشوار صد رد , يادوب ركنت العربيه قدام عماره جنب عمارتنا و بفتح الباب لقيت عنتر و أخوه شيبوب و مجانص ( 3 كلاب من اللي بحط لهم أكل بالليل مع القطط ) , لقيتهم لازقين في رجلي , حاسة الشم عند الكلاب قويه جدا , المهم فضلو لازقين فيا و ماشيين معايا و حواليا مش لحد ماوصلت باب العماره , لا لحد باب الأسانسير , و كل اللي في الشارع يبصو علينا , في موكب مهيب و لا كأنه موكب فلاديمير بوتين , ماهي الناس مقامات برضه و الواحد مايصحش يمشي من غير حراسه .
.
المهم طلعت الشقه ربع ساعه و نزلت لقيتهم مستنيين قدام باب العماره , قعدو يتمسحو فيا تاني و يشمشمو, ولما اتأكدو إني مش معايا أكل هزو ديلهم وبصو لي شزرا و مشيو , وانا أنادي عليهم , واد يا عنتر , يا شيبوب , طب تعالى انت يا مجانص دانا بقول عليك انت الطيب اللي فيهم , ايه مش هتمشو معايا ؟ طب و الموكب ؟ و لا الهوا , سابوني و جريو , أه يا كلاب .
.............................................................................................................................
Mohamed Hussein
2 أغسطس 2019 ·
حكاوينا و الناس الطيبين ............... مرات سيدي
.
سيدي اللي هو جدي اتجوز 3 مرات , الأولى ماخلفش منها , التانيه خلف منها 5 صبيان , و التالته اللي هي مرات سيدي خلف منها 3 صبيان أصغرهم كان قدي بالظبط , يعني معايا في نفس الفصل و بقول له يا عم فلان .
.
مرات سيدي كانت ست قويه , كلنا عايشين في بيت واحد , أوضه لابويا و أمي و 5 عيال ولادهم , و أوضه لكل عم من أعمامي و أولاده ( 5 أو سته ) و أوضه لسيدي و مراته و عياله التلاته .
.
مرات سيدي عشان قويه محدش بيقدر عليها , كل ستات البيت بيخافو منها و أولهم أمي طبعا , بس ماعرفش ليه أو ايه السبب اللي خلّى مرات سيدي تختارني أنا عشان ألمّ لها البيض بتاع فراخها , و فراخها رخمين زيها , اللي تبيض في طوالة البهايم و اللي تطلع تبيض فوق السطح تحت قش الرز او تحت الحطب , و كل يوم ألمّ خمستاشر ستاشر بيضه و أديهم لها , كان عمري وقتها 6 سنين , و هي تديني بيضه مكافأه كل اسبوع , طب ليه اختارتني انا وليه جوزها اللي هو سيدي اختارني أنا برضه عشان اسرح معاه بالغنم , كنت الطفل الوحيد في البيت اللي بيلم البيض و يسرح بالغنم مع ان البيت ده فيه ييجي 20 عيل غيري , هل كنت موهوب مثلا في لم البيض و رعاية الأغنام ؟!
.
كبرنا و سيدي مات وانا في رابعه ابتدائي و بعنا الغنم و الجمل و كل واحد و مراته و عياله بنو لهم بيت يعيش فيه , بيوت جنب بعض كلها , ماعدا بيت مرات سيدي كان بعيد شويه .
.
مرت الأيام و السنين , لحد ماحصل موقف بانت فيه معادن الناس الطيبه , الموقف كان وفاة أبويا الله يرحمه وانا في الثانويه العامه و تحديدا ليلة أول امتحان , في الوقت ده إنهارت و قلت لعمي مش هحضر قالي ابوك خلف راجل وبكره هتروح تمتحن , وقرر عمي اني مش هقعد في بيتنا ولا في بيوت أعمامي المجاوره ولا هاخد العزا في أبويا , هروح أقعد في بيت مرات سيدي عشان انا و عمي الصغير عندنا امتحان ثانويه عامه بكره , روحت فعلا و قضيت هناك ال 3 اسابيع بتوع الامتحان , واكل شارب نايم بذاكر بمتحن و برجع عالبيت ده , مرات سيدي شالتني فوق راسها , انا و عمي الصغير و واحد تالت صاحبنا في شقه لوحدنا فوق و الأكل بيجيلنا و الشاي و هدومنا تتغسل و تتكوي , ولما أقول لها عايز أرجع بيتنا تحلف عليا مانت راجع الا لما امتحاناتك تخلص .
.
خلصت الجامعه و دخلت الجيش , و مرات سيدي اللي كان كله بيترعب منها بقت طيبه جدا و مش باقي من شقاوتها بتاعة زمان غير لسانها اللي ممكن يخبط كلمه كده ولا كده , نزلت اجازه من الجيش و أمي قالت لي مرات سيدك عيانه اوي و سألت عليك كتير روح زورها , قلت حاضر و روحت , دخلت الأوضه عليها و أولاها قاعدين ( اعمامي التلاته الصغيرين ) , هي كانت بتحبني أوي , اول ما شافتني و أصلا صوتها كان طالع بالعافيه وشكلها بتموت فعلا , بصت لي كده بكل حنان و قالت لي ( ممممممممممم انت لسه فاكر يا **مك ؟! ) , عيالها فطسو من الضحك و انا كمان , و قلت لها طالما لسانك لسه طويل يبقى انا كده اتطمنت عليكي .
................................................................................................................................
Mohamed Hussein
1 أغسطس 2019 ·
فاسألوهم إن كانو ينطقون
.
خناقه و عاركه لرب السما , و مين حضر مؤتمر الشباب و حضر ازاي و ليه ؟ و ليه فلان مش علان , طب ايه المعايير و المقاييس , كلام كتير و أسئله أكتر , بعضها منطقي إنه يتسأل , يتسأل بهدوء في انتظار اجابه , هل فعلا بيتم اختيار عناصر خرفانيه و شمامين لحضور المؤتمر ؟ هل دي ثغره و غلطه مش مقصوده ولا مقصوده , طب هل لها غرض ولا لا ؟ كلام جميل , لحد ماهووووب و فجأه بقى يتقال , فلان ده أصله فلاح , و هما بيختارو فلاحين ( عرر ) ؟ .
.
بصو انا مش هنفعل عشان تعبت و زهقت, أنا عايز أقول لكو كلمتين بس , البلد دي ربنا أكرمها و نجاها في مرحلة الطوفان بفضل جيش و شرطه و ناس طيبين مالهمش في السياسه ولا الفيس بوك , واحنا على بعض كده شئنا أم أبينا بنمثل جزء من المجتمع اللامؤاخذه المدني اللي انتو قارفينا بيه , و النخبه اللامؤاخذه المثقفه , هاتو إيديكو بقى , و عزة جلال الله لو علينا كانت البلد دي اتحرقت وبقت شوية رماد مايسووش تلاته تعريقه , كنا هنبقى ألعن من سوريا و ليبيا , لما نكون في سنة 2019 و لسه دي عقولنا , ولسه فيه ناس لما تحب تقلل من شأن حد تقول فلاح و تضيف وراها وصف ( عره ) .
.
. 10 سنين بكتب عالمخروب ده , بنشرح من أول ألف باء , بنشرح أبجديات انك تبقى بني أدم , تعبت من الكتابه و إيدي وجعتني , أحيانا بحس إني بأدن في مالطه , و أحيانا بحس إني بكلم شوية أصنام ( فاسألوهم إن كانو ينطقون ) .
.
البوست ده تحديدا اترددت كتير في إني أكتبه , و لما قررت أكتبه ماكتبتوش عشان خاطر تفهمو أو تقتنعو أو تبقو بني أدمين , إن شالله ماحد فهم ولا حد اقتنع ولا حد بقى بني أدم , أنا و الله العظيم كتبته بس عشان خاطر أبويا و أمي ( الفلاحين ) الله يرحمهم مايلعنونيش في قبرهم , كتبته بس عشان خاطر عضم التربه .
.............................................................................................................................
Mohamed Hussein
1 أغسطس 2019 ·
ها يا سعيد , عملت إيه ؟ قابلتها ؟
- أه قابلتها و عزمتها على عصير و شاي و كيك .
.
و بعدين ؟ قلت لها بحبك ؟
- أه مسكت ايديها و قلت لها بحبك
.
و هي ؟ هي عملت ايه ؟ قول بسرعه و فرحني .
- هي ؟ هي يا سيدي سحبت إيديها بالراحه وابتسمت و قالت لي , بص يا سعيد , إنت شخص عزيز عليا , أأأاا
.
بسسسسس , بس يا عزيز , قصدي يا سعيد , ماتكملش , عليا الطلاق مانت مكمل
- ممممممم مانا قلت لها كده برضه .
.
قلت لها ايه ؟
- قلت لها عليا الطلاق مانتي مكمله, و سيبتها تحاسب عالمشاريب
.
أيوه كده صح
- و انا ماشي بقى كانو حاطين عالترابيزه كاسه كريستال شكلها غالي أوي , ضربتها بكوعي و وقعتها عالأرض اتكسرت عشان تدفع تمنها برضه .
.
أحسن أحسن
- ممممممممم بس هي ندهت عليا و عنيها مليانه دموع , و قالت لي إن مش معاها فلوس تدفع تمن الكاسه و المشاريب , بصراحة صعبت عليا أوي و هي بتقول كده .
.
يا حنييين , قمت انت دافع لها طبعا ؟
- لأ , قلت لها مش مشكلتي يا ماما , لو مش معاكي فلوس هيخلوكي تغسلي صحون و حلل بتمن الحاجات دي لحد ما يتقطع نفسك , و لفّيت وشي و مشيت .
.
قشطه , انت كده تبقى سعيد صاحبي , إشرب إشرب وإنسى , دانتو بتتكلمو مع بعض بقالكو سنتين و قربتو تخلفو عيال , و الأخر تقولك شخص عزيز؟
- مانا سايبها دلوأتي بتسيّأ المحل , هي و عزيز .
.............................................................................................................................
Mohamed Hussein
1 أغسطس 2019 ·
زي ما توقعت , الريس بيكرّم أبطال منتخب مصر للشباب في كرة اليد بعد ما فازو بالميداليه البرونزيه و المركز التالت في بطولة العالم اللي أقيمت في أسبانيا من كام يوم , الورد الحقيقي اللي فتح في جناين مصر و العيال دول اللي شوفتهم و شوفت حماسهم و فرحتهم و حزنهم و إحساسهم بتي شيرت بلدهم ( مش شوية جبلّات لامؤاخذه ) .
.
متأكد تماما إن الريس مش هيبخل عليهم بأي حاجه في السنتين الجايين , معسكرات على أعلى مستوى , عشان أغلب الفريق ده هيتصعد للفريق الأول اللي هيشارك في بطولة العالم للكبار , البطولة هتقام في مصر 2021 .
15 أغسطس 2019
دندنه
هي , الأصل و المبتدأ و القيمه و القامه و المقام
.
- مصري للنخاع , مصري حتى الثماله , شهادتي في حقها دايما مجروحه , مصر الوطن والكيان ماينفعش نقول لها ما لها و عليها ما عليها , لأ , هي لها كل حاجه و مفيش عليها شئ , كامله مكمله والكمال لله .
.
- في الفن مش هسمع غربي , ماتجيبليش خواجه بيغني بكلام خواجات و لحن خواجات , أنا ودني شبعانه بأم كلثوم و عبد الحليم و شاديه و نجاة و ألحان السنباطي و القصبجي و زكريا و عبد الوهاب و بليغ و كلام أحمد شوقي و حافظ و بيرم و رامي , أنا جاي من بيت شبعان والأكل ده مايلزمنيش , لا يلزم الروح ولا الوجدان .
.
- لو مطرب عربي عايز يغني , وماله , بس يغني بلهجه مصريه عشان أسمعه , هو اللي يجيلي مش أنا اللي هروح له .
.
- في القرأن عمري ماسمعت السديس ولا الحذيفي , قرايتهم حاده زي أفكار الوهابيه بالظبط , وانا برضه ودني شبعانه بالطبلاوي و المنشاوي و عبد الباسط و محمد رفعت و ألاف المقرئين صوتهم جاب لأخر الدنيا , انا ماعيطتش أبدا من تباكي أئمة الحرم و بحسها مسرحيه هزليه لا تليق بمقام القرأن , انما دموعي بتنزل من ترتيل الطبلاوي مع انه مش بيتباكي .
.
- وانا بقرا القرأن و ربنا يسامحني , بقف أكتر عند أي أيات تجيب سيرة مصر بتصريح أو بتلميح , و سيرة فرعون , و موسى و يوسف , بحس بفخر عجيب , مع إنه كله كلام ربنا بس ده إدمان يا مولانا , عشق و ضارب في الجدور من تحت .
.
- (و أتت كل واحدة منهن سكينا ), أتارينا بنقطع الفاكهه بالسكينه من كام ألف سنه و مش محتاجين حد يعلمنا الإتيكيت , قبل مايبقى فيه فرنساويين و ألمان بقرون و زمان .
.
(فلما سمعت بمكرهن أرسلت لهن و أعتدت لهن متكئا) , ممممممممم كان عندنا يا أخي من كام ألف سنه كده حاجه اسمها سيدات مجتمع , و المرأه تبقى ملكه و تحكم مصر مش لسه هنقول لها في 2019 م احنا سمحنا ليكي بسواقة العربيات يا حرمه.
.
- (قال اجعلني على خزائن الأرض ), اه هي دي مصر بلدنا , خزائن الأرض بكلام ربنا و لسان يوسف الصدّيق.
.
- (أليس لي ملك مصر و هذه الأنهار تجري من تحتي ), ماهو أي مَلك في الدنيا يفخر بإيه أكتر من مُلك مصر ؟ و القرأن يذكرها , عشان هي قمة الجبل و مفيش نقطة في الجبل أعلى من قمته .
.
- (فسقى لهما ثم تولّى إلى الظل) , ده بقى الشاب المصري الجدع نبي الله موسى .
.
-(ولقد مكنا ليوسف في الأرض ), ماهو التمكين في مصر يعني التمكين في الأرض , وقتها مكانش فيه كيان ينفع يتقال عليه دوله غيرها , مش هنخترع يعني .
.
- (فأوقد لي يا هامان على الطين ), اتارينا جبابره من زمان و عايزين نبني صرح وبرج و ناطحة سحاب عشان قال نطلع نشوف رب موسى ده فين بالظبط , وقتها كان 95 %من سكان المعموره عايشين في كهوف و بيغطو مؤخرتهم بورقة شجر .
- مين ده بقى اللي مايتجننش بحب البلد دي ويعيش و يموت و هو درويش في محرابها ؟! .
....................................................................................................................................
Mohamed Hussein
15 أغسطس 2019
إمبارح كان بيحكم ماتش ليفربول و تشيلسي بنت , اه بنت , ماتش السوبر الأوروبي يعني ليفل الوحوش , يعني جوايز و مكافئات بمئات الملايين , و جماهير ماليه الاستاد و لاعيبه أجسامهم زي التيران و مع ذلك الماتش بيحكمه بنت , لا اتوترت ولا اتهزت .
.
و عندنا يا بيه يبقى الماتش بين سكر الحوامديه و كفر أبو عجوه في دوره رمضانيه و الجايزه تي شيرت لكل لاعب ب 60 جنيه, و الجماهير بتاع 17 نفر منهم سيد أبو ستيته , و اللاعيبه عندهم سل و جفاف و محتاجين يظبطو أمورهم في التأمين الصحي وياخدو حقن لحمه , و الحكم راجل له شنب يقف عليه الصقر بس يخاف يحسب بلانتي ( بلن ) على كفر أبو عجوه عشان الواد سيد أبو ستيته عليه نظرة عين ترعب ده غير ان حارس مرمى كفر أبو عجوه يقرب لمرات الحكم ولو حسب عليه بلانتي هيبقى فيها زعله كبيره و قاعدة عرب .
.......................................................................................................................
Mohamed Hussein
14 أغسطس 2019
من دقايق بس , ليفربول و إبننا صلاح أبطال السوبر الأوروبي على حساب تشيلسي , بعد مافازو بدوري أبطال أوروبا من كام شهر , و بإذن الله يفوزو ببطولة العالم للأنديه و يحققو الثلاثيه , صلاح فخر العرب و أفريقيا بلا منافس ولا منازع ولا مثيل ولا ند , صلاح في حتة تانيه خالص , نفس الحته اللي فيها أم كلثوم و جمال عبد الناصر و أحمد زويل و نجيب محفوظ و عبد الفتاح السيسي
.
طب و بالنسبه حضرتك للكابتن محمد أبو تريكه ؟
- بس يابن ال #$%^& عشان احنا في أيام مفترجه و مش عايز أجيب سيرة الست الوالده اللي ممكن تكون خطيئتها الكبرى والوحيده في الحياه هي إنها خلفتك .
..................................................................................................................
Mohamed Hussein
14 أغسطس 2019
قصة مصرية قصيرة
.
خرجت ست أم شوشو إلى البلكونه و معها سبت الغسيل عشان تنشره , شافت أم فاروق واقفه في البلكونه اللي قصادها , رمت عليها الصباح و ضحكو شويه و جابو في سيرة بنات و ستات الشارع كلهم من أوله لأخره, و فجأه ست أم شوشو و هي حاطه مشبك غسيل في بؤها افتكرت إنها ممكن تكتب كوميكس عن مفاعل الضبعه النووي , ست أم شوشو ركنت سبت الغسيل على جنب و رمت المشبك في السبت و دخلت تجري عالتابلت بتاعها , فتحت صفحتها عالفيس بوك , و كتبت ( روسيا هتعمل لنا مفاعل نووي , اللي عندها كيسين باميه مخزناهم تلحق تطلعهم يا جدعان هاهاهاهاها ) .
.
دخل الشباب و الرجاله عملو إيموشن بيضحك على الكوميكس الجميل البيض بتاع ست أم شوشو .
.
أستاذ عوني موظف في الصرف الصحي عالمعاش , قاعد عالقهوه و كتب تعليق , دمك خفيف أوي يا ام شوشو و سمانة رجليكي حلوه
.
أما الوله سبارس سواق الميكروباص على خط السلام و النهضه , لمح البوست بتاع أم شوشو قام وقف بالميكروباص في نص الطريق و قال يكتب تعليق , و كتب ( هنموت كلنا ) مع صورة أحمد بدير في الفيلم بتاع رامي قشوع .
.
شادي شاب من الشباب التنويري العميق اللي سابقنا بمليون فدان , شادي ماضحكش عالبوست , و كتب تعليق بيقول فيه ( يا جماعه انتو مش مقدرين حجم الكارثه اللي احنا داخلين عليها , نحن أمام وضع عبثى حتى الثماله ) , ردت عليه أم شوشو و قالت له طب نعمل ايه يا أستاذ شادي ؟ رد عليها شادي بعد مافكر شويه و هرش في راسه مرتين و قال لها ( ممكن مثلا نقترح إننا نعمل سور عالي أوي حوالين مفاعل الضبعه عشان الإشعاعات ماتوصلش عندنا ), ردت عليه أم شوشو و قالت فكره هايله و أهو بالمره السور العالي هيمنع العصافير , رد عليها شادي وقال لها , بالظبط كده .
.
الوله شغته صبي المعلم عكوه الجزار دخل في الحوار , و قال ياخوانا موضوع المفاعل النووي ده مالوش أي تلاتين لازمه ولا معمول له دراسة جدوى و أنا من وجهة نظري إن الفلوس اللي هنصرفها في كده كنا نشتري بيها أكلة كوارع لكل مواطن مصري , ده حتى شوربة الكوارع بترم العضم و تعمل الحاجات اللي هي و تخلّي العجوزه صبيه .
.
و فجأه و بينما فلاديمير بوتين يجلس في مكتبه في قصر الكرملين دخل عليه أحد مساعديه , بوتين سأله , مالك يابني قالب سحنتك كده ليه ؟ رد المساعد , كارثه ياريس , خير يابني ماتنطق فيه ايه ؟ المساعد : حضرتك دخلت صفحة ست أم شوشو النهارده ؟
بوتين : لا والله مافضيتش , مالها صفحة أم شوشو
المساعد : كاتبه عن المفاعل بتاع الضبعه و عماله تتريأ هي و اصحابها
بوتين بغضب شديد : معقوله الكلام ده ؟ دي كارثه حقيقيه , إوقف لنا يابني مشروع الضبعه ده فورا , كلم السلطات المصريه قول لهم احنا هنلغي العقد و كلم الفريق النووي بتاعنا فورا وعلماء الذره خليهم يدخلو على صفحة أم شوشو و يستفيدو من خبراتها النوويه هي و أصحابها .
.
أم شوشو بعد ما اتطمنت عالبوست و السبعتاشر لايك اللي عليه لفت انتباهها حاجه مهمه , إن أم فاروق ماعملتش لايك و لا كومنت , قعدت تسأل نفسها هي ليه كده ؟ تضحك في وشي و من ورايا ماتعملش لايك , يا ساتر , السواد مالي قلبها و الغيره هتاكلها , إكمنى يعني سي الأستاذ محفوظ جوزي جاب لنا بطيخه من اسبوعين و هي شافتها , ربنا ينتقم من كل اللي يبص لي في بيتي و جوزي و عيالي , أم شوشو قطع تفكيرها ورقه بيضا متطبقه لمحتها تحت كرسي الأنتريه كان الواد حماده ابنها مشخبط فيها , فتحت الورقه وشافت الشخبطه وخبطت بإيديها على صدرها وقالت يا مصيبتي , ده عمل و عاملهولي أم فاروق , أيوه هو عمل , ربنا ينتقم منها , يارب البلكونه تقع بيها .
.....................................................................................................................................
Mohamed Hussein
12 أغسطس 2019
كل لما بسافر البلد من مدينة نصر للسنبلاوين ببقى مركز أوي في اللي بيحصل حواليا و انا ماشي , في ظرف أربع خمس سنين فاتو اتعمل طريق شبرا بنها الحر بطول 40 كيلو , اللي اختصر الوقت لتلت ساعه بدل ساعه كامله , كوبري ميت غمر الطويل ده اللي بيعدّي من فوق ميت غمر , و كوبري في مدخل اجا و كوبري سندوب التحفه الفنيه في مدخل المنصوره , امبارح اتفاجئت ب تقريبا 6 كباري جديده بتتعمل عالطريق , و أعتقد ان خطة الدوله هي إن طريق بنها المنصوره يكون هو كمان طريق حر مفهوش لا مطب ولا دخلة قرية تقف فيها ولا دخلة مدينة تعطلك , الكباري الجديده دي قربت تخلص و تشتغل , معناها ان المسافه اللي كنت باخدها في 3 ساعات ونص هتفضل تقل لحد ماتبقى ساعتين , يعني توفير كبير في الوقت و توفير أكبر و أهم في استهلاك البنزين .
.
الحقيقه إن اللي مايشوفشي من الغربال يبقى اعمى , الطريق من القاهره للمنصوره مجرد طريق بيخدم محافظتين تلاته , يعني فيه زيه عشرين تلاتين طريق تانيين معمول فيهم نفس الشغل , والحقيقه المؤكده اللي مبقاش ينفع فيها نقاش ولا جدال ولا هري ولا مناهده , حقيقه بتقول إن عبد الفتاح السيسي استلمها فعلا شبه دوله , و إن مصر في تلاتين سنه كان بيحكمها شيخ منصر تحت إيده مسئولين و موظفين مقسومين نصين , نصهم شوية حراميه و النص التاني شوية لصوص !! .
.........................................................................................................................
Mohamed Hussein
· 10 أغسطس 2019
مفيش شارع في القاهره النهارده مفهوش شادر للخرفان أو أكتر , في الجزيره اللي في نص الشارع تحديدا , مفيش شادر منهم مش واقف جنبه عربيه واتنين بيشترو خروف العيد , انا بقى عندي قناعه إني لو كنت ظابط مرور و واقف في كمين دلوأتي و طلبت من كل سواق عربيه يفتح شنطته للتفتيش هلاقي نص العربيات فيها جوه الشنطه الكوريك والاستبن و الخروف , وممكن اللي مالقاش عنده خروف أديله مخالفه , ربنا يجعل بيوت المصريين عمار , كل سنه و حضراتكو طيبين .
................................................................................................................................
Mohamed Hussein
· 9 أغسطس 2019
حد يفكرني بقى كنا بنصوم إزاي ؟ اللهم صل عالنبي , اه فتكرت , بنتسحر بطريقة البستره و الجمل , سحور قبل الفجر بساعه لازق فيه كوباية شاي سخنه مولعه لازق فيها كوباية زبادي ساقعه تلج ( مرحلة البستره ) ,و بعدها 4 لتر مايه و 17 سيجاره ملضومين في بعض ( مرحلة التخزين زي الجمل ) .
..........................................................................................................................
Mohamed Hussein
· 9 أغسطس 2019
عاجل , العثور على صديق بعت لي رسالة في الإنبوكس كاتبها بخط إيده و بيقولي ( كل سنه وانت طيب يا محمد ) , يعني مش صورة ولا فيديو ولا رسالة صوتيه من اللي بتدوس عليهم بزرار يقومو يتبعتو لكل الأصدقاء والفولورز و المغول و البيزنطيين في نفس اللحظه , جاري التحقيق مع الصديق ده و معرفة الجهة التي تموله , و ليه اختار انه يبقى بني ادم و يعيّد على أصحابه وجها لوجه ؟ ليه يابني ماتبقاش بلاستيك زي بقية مخاليق ربنا ؟! .
.................................................................................................................
Mohamed Hussein
8 أغسطس 2019
: بابا احنا عايزين طقمين كمان عشان العيد 3 أيام مش يوم واحد , و عايزين لحمة العيد و الريش و رقبه ضاني , و عايزين شنطة جديده و صندل و كوتشي و شرابات و اكسسوارات و عايزين نروح للكوافير ليلة العيد و عايزين عيدية كبيره , و في العيد بقى نتفسح 3 فسحات و نروح سينما و ملاهي و نتغدى بره .
- انا : شوفو يا بنات , زي ما شرحت لكو قبل كده , كل مرحلة لها توجهاتها و أهدافها المنبعثه من عمق الفكره و من النظره الشامله للظروف المحيطه بالمنطقه والتي ترتكز على قواعد راسخه من الوعي و الإدراك و التناغم الأفقي و الرأسي بين المفردات و المعطيات و المفاهيم التي قد تؤدي بالضروره إلى نتائج محددة المعالم و الهويه دون النظر إلى ما قد تؤدي إليه معطيات أخرى ربما لا تكون وثيقة الصله
.
بناتي : يعني ايه يا بابا الكلام ده ؟
أنا : ممممممم يعني مفيش فلوس يا كلاب .
..................................................................................................................
Mohamed Hussein
8 أغسطس 2019
مصر اللي مفيش زيها
.
قاعد في الصيدليه , دخل الحاج محمد شغال في شركة جنبي , عايز الدوا ده بس هدفع حسابه لما أقبض , حاضر يا حاج محمد , ألاقي معاك ولاعه زياده ؟ معايا دي بس يا دكتور خدها و انا هتصرف , طيب ماشي .
.
إزيك يا محمود( بتاع محل الإزاز ) , أجيب لك ايه ؟ عايز شاحن سامسونج ساعه و أرجعه , طب ادخل خده من جوه , بقولك يا محمود , إبعت لي والنبي كوبايتين إزاز و كرسي زياده عشان جاي لي ضيوف , حاضر هبعتهم مع الواد .
.
أهلا أهلا يا عم أحمد ( بتاع محل الدهب ) , إزيك يا دكتور , الحاج بيقولك عايز الدوا بتاع والدته و لو عندك باكتتين شاي لأنه خلص من عندنا والناس قاعدين , اه عندي يا عم أحمد , استنى بالمره خد المج بتاعي معاك هحط لك فيه نسكافيه و سكر , صب لي فيه مايه مغليه عشان البويلر بايظ عندي , ماشي هاته , خد باكيتات الشاي كلها يا عم احمد وسيب لي خمسه سته بس لاني مابشربوش و جايبه للضيوف
.
عارفين , أحيانا كتير بتعمد إن حاجه من الحاجات اليوميه تخلص خالص من عندي أو تبوظ و ماجيبش غيرها , مش بخل منّي ولا استنطاع عالغير , إنما مش عايز الدايره دي تتكسر , يمكن بعتبرها حاجه من ريحة زمان و ذكريات زمان , أيام ما كان الشارع في قريتنا بيعيش كله بكوبايتين شاي ماتعرف أراضيهم فين كل يوم , و يستلفو من بعض الحصيره و الكراسي و المقشه و إيد الهون و المنخل و الغربال و العبايه السوده والشبشب و الطرحه و السبت و المشابك و الشرشره و الفاس و الكنبه و علبة الألوان و البرجل وعدة الهندسه و بصلتين و شوية كمون و حتى الكوره الشراب .
...............................................................................................................
Mohamed Hussein
7 أغسطس 2019
إبننا محمد صلاح اتبرع ب 3 مليون دولار لمعهد الأورام , يعني 50 مليون جنيه , والحقيقه ان صلاح مكانش مضطر لكده خالص , ده لاعب محترف بره وله اسمه في العالم كله , يعني لا بيدور على وظيفه ولا طمعان في تسهيلات ولا بيتملّق دوله , و الحقيقه برضه إن لو كان اتبرع بمليون جنيه بس زي رجال أعمال مليارديرات عندنا مكانش حد هيقدر يقوله غير ( كتر خيرك ) , مليون جنيه بس مش 50 مليون .
.
صلاح رمز وقدوه لكل شباب مصر بلا استثناء , ولد مصري وطني للنخاع و فلاح كمان , ياريت بقى و النبي حبايبنا الحلوين اللي قاعدين لصلاح على كل هفوه و كل زلة لسان يهدو شويه , و مش معنى إنه فيه شخصية سمجه ولزجه زي أبو زفت بيتمحّك في صلاح كل شويه نقوم ننزع عن الولد صك الوطنيه و احنا قاعدين نهبد قدام الكيبوردات , ولا مطلوب مننا إنه كل شويه نطلب من صلاح يثبت لنا وطنيته و نعمل له اختبارات و كشف هيئه , واحنا ما شاء الله يعني لو فينا واحد مالتي مليونير بعت رساله لتحيا مصر ب 5 جنيه بيصورها و ينزلها عالفيس و بنعتبر إن الرساله أم 5 جنيه دي صك وطنيه تغفر له ما تقدم من ذنبه و ما تأخر .
.................................................................................................................
Mohamed Hussein
6 أغسطس 2019
امبارح و معانا مجموعه من المصريين الوطنيين الجدعان تشرفنا بزيارة المركز الإعلامي لرئاسة مجلس الوزراء المصري بدعوه كريمة من المركز
.
الحقيقه أنا روحت و مش عارف هيحصل إيه ولا رايحين ليه أصلا .
.
في المركز الإعلامي بعد حفاوة الترحاب و المقابله المحترمه جدا , شوفت مشهد يفرح القلب , اه في مصر والله , مجموعة شباب اعمارهم بين ال 25 وال 35 , خليه نحل , متقسمين أقسام وشغلهم بيكمل بعض , مسئولين عن التصريحات الرسميه لمجلس الوزرا و تفنيد الإشاعات و عمل إنفوجرافات للمشاريع و خلافه , و إحصائيات لحاجات كتير بتختصر مواضيع مهمه بشكل مبسط , من أكتر الحاجات اللي لفتت نظري التدقيق , مجموعات بتراجع ورا بعض , ماينفعش رقم يطلع من مجلس الوزرا غلط أو مش دقيق , بحث و تواصل مع المصادر الرسميه , كونتاكت مع كل الوزارات , أغلب الشباب زي ماقال واحد منهم ( الوحده بتاعتنا اغلبها خريجي سياسه و اقتصاد ) و طبعا فيه خريجي إعلام غير خريجي هندسه و كليات التكنولوجيا ( دول المسئولين عن الإنفوجرافات و الحاجات الفنيه ) .
.
بصفة شخصيه و اختصاراً لتفاصيل كتير , لفت انتباهي جدا مديرة المركز , دكتوره نعايم سعد , سيدة شابه , لاحظتها في كل تصرفاتها , إزاي بتقدر ترد على اتنين تلاته مننا و اتنين تلاته من الشباب اللي معاها في نفس الوقت و بتركيز تام و هي مبتسمه ؟ ايه الجو الجميل اللي عاملاه جوه المركز ده ؟ إزاي وصّلت الشباب انهم فعلا مايكونوش عايزين يروحو بيوتهم ويسهرو أحيانا للفجر ؟ إزاي قدرت تقسم الفريق بتاعها لمجموعات و تخلي مجموعه تراجع ورا التانيه و تكافئها لو طلّعت غلطه قبل النشر ؟
.
لفت انتباهي كمان البنت المصريه الجميله سهره , اللي بتشرح في الصوره التانيه , بتحاول تقول لنا طبيعة شغلها و مش عايزه تخلص كلام , حماس غير عادي و سعاده ملهاش وصف باللي هي بتعمله , المجموعه كلها رائعه , أه دول شباب مصر الوطنيين اللي شكلهم يفرح , مش الصوره النمطيه بتاعة شوية المعاتيه اللي منقوعين جوه برطمانات كوله
.
المركز بصراحه بقى فيه عيب واحد , ماعندهمش حاجه تتاكل , ومش عارف ضيوف ييجو زياره من الضهر للمغرب مايلاقوش فطار ولا غدا ليه ؟ هو عبد الفتاح السيسي ماسك إيده أوي كده ؟ إنما الشهاده لله عندهم قهوه حلوه أوي ماشربتش زيها من سنين طويله .
.
ملحوظه مهمه : المجموعه اللي راحت و انا منهم ماروحناش عشان احنا جبارين و بنمشي عالحيط ولا اتعمل لنا اختبارات و شألباظات ونجحنا فيها , احنا كنا مجرد عينه أو نموذج للمصريين اللي بيكتبو عالفيس ويعني لهم شوية متابعين , فيه مليون زينا و أحسن مننا ألف مره , ده بس عشان نقفل الباب السخيف و المحرج ده .
.
أتمنى من كل أصدقائي الأفاضل يعملو متابعه لصفحة رئاسة مجلس الوزرا و ندعمهم عالمجهود الكبير اللي بيعملوه رئاسة مجلس الوزراء المصري
......................................................................................................................................
Mohamed Hussein
5 أغسطس 2019
أه طبعا طبعا , سيتركون العاصمه القديمه تحترق , و الدليل كمية الطرق و الكباري و البنيه التحتيه اللي اتعملت في القاهره اخر 5 سنين , سيتركون العاصمه القديمه تحترق و الدليل القضاء على العشوائيات و تحويلها لمساكن تليق بالبني أدمين , سيتركون العاصمه القديمه تحترق والدليل تطوير مثلث ماسبيرو و دعوة الناس لطلاء منازلهم القديمه في اماكن معينه , ماحنا برضه قبل مانسيب العاصمه القديمه تحترق لازم نظبّطها و نصرف عليها عشرات المليارات , بالظبط زي ما بنعمر سينا و بنصرف عليها ربع تريليون جنيه عشان نبقى نسلمها للصهاينه و الفلسطينين عالمفتاح
....................
بس مين يا حبيبي اللي قالك البؤ بتاع سيتركون العاصمه القديمه تحترق ؟
- ده حضرتك الكاتب و الأديب الكبير والمفكر العبقري أحمد خالد توفيق
.
اه عرفته , بتاع البانجو ؟
- لا حضرتك ده أديب كبير أوي .
.
يابني هو بتاع البانجو .
- بتاع بانجو إزاي ؟
.
لما تكبر هتفهم , البانجو مش بس بيتباع عند تجار المخدرات و الديلرز , أوسخ أنواع البانجو بتتباع في كتب و سطور و كلمات , و يتقال على أصحابها كتاب كبار و مؤلفين و قيادات وقامات و أصحاب فكر , و بيتم تلميعهم من جهات مجهولة
- زي مين حضرتك بتوع البانجو ؟
.
يوسف زيدان , علاء الأسواني , أحمد خالد توفيق , حسن البنا , شيوخ الوهابيه , كل دول يا حبيبي بتوع بانجو .
- يعني ايه بتوع بانجو و غرضهم ايه ؟
.
يعني يزرعو في دماغك السواد و التشاؤم و فقدان الأمل و الغل و الإرهاب والفكر الإنهزامي و كراهية الغير والتشكيك في كل شئ , الماضي و الحاضر و المستقبل , بكل الطرق , مره بإسم الدين و مره بإسم الفكر المتحرر , الغرض واحد , و الممول و الملمّع و مخرج العرايس برضه واحد , هو هو, و تأثير اللي بيكتبوه على عقول المراهقين يعادل ألف ضعف لتأثير المخدرات بكل أنواعها , عقول يابني بتروح و ماترجعش , وبني أدمين يتحولو لمجرد مسخ , عرفت بقى يعني إيه بتاع بانجو ؟
................................................................................................................................
Mohamed Hussein
4 أغسطس 2019
بعد مذبحة تكساس , مذبحة جديده في اوهايو , 20 قتيل و ضيف عليهم 9 كمان يبقى المجموع 29 , و عشرات المصابين في حوادث إطلاق نار متفرقه .
.
الحقيقه , أنا فخور جدا بالأمن و الأمان اللي بتعيشه أمريكا , فخور بأجهزتها الأمنيه اللي بتعرف دبة النمله قبل ما تدبّ برجليها و خلخالها , فخور بكاميرات المراقبه و الأجهزة الحديثه و خمستاشر قول سبعتاشر ألف فيلم و مسلسل عن قدرات ال fbi وال cia و ال wc و الأبطال الخارقين اللي بيمشو عالحيط و رامبو و جون ترافولتا و 24 و جاك باور و ncis و قوات المارينز و إزاي أمريكا عارفه ألوان شرابتنا و ملابسنا الداخليه و إزاي عارفه إحنا هنتغدى ايه بعد 3 أيام ؟ و إزاي قادره على محاربة المخلوقات الفضائيه و حماية كوكب الأرض من غزو الديناصورات و السحليه العملاقه و من عصابة الولاويله الحمره .
.
واللي حضراتكو ماتعرفهوش بقى بسبب الإعلام المضلل بتاع السيسي , إن كل المخلوقات الفضائيه في درب التبانه و المجرات المجاوره أمريكا بتنيّمهم من المغرب , ممممممممممم نلتقى أخر الرواق ( ترجمة معامل أنيس عبيد ) .
.................................................................................................................................
Mohamed Hussein
4 أغسطس 2019
على سبيل الإعتراف
.
كلمة بالإنجليزي عرفت معناها بشكل معكوس و فضل المعني العكسي ده لازق في دماغك طول السنين ؟
.
أه حصل , و تحديدا كلمة Discuss briefly , يعني ناقش باختصار , وانا من الاول اعرف انها ناقش باستفاضه ( براحتك خالص ) و فضلت لازقه في دماغي كده حتى طول سنين الجامعه , كل امتحان تقريبا لا يخلو من رأس سؤال بالشكل ده , و كل ماشوف سؤال بيقول Discuss briefly أقول أهو السؤال بتاع الإستفاضه اللي هنفرد فيه رجلينا ونمدد و نعيد و نزيد و نجيب من الأول تاني ,و أقعد اجاوبه في صفحتين و بعد ما إيدي توجعني من الكتابه أقول لنفسي هو كده كفايه ولا أزوّد شويه كمان؟! .
.
و فضلت على هذا الحال و اتجوزت وخلفت ولا همني , لحد مالبت لوجي بنتي كانت في تالته ابتدائي باين و عندها نفس السؤال فبقول لها , أيوه السؤال ده انا عارفه , لازم تستفيضي بقى , قالت أستفيض ايه ؟ ده معناه ناقش باختصار , ممممممممم نعم ياختي ؟ نعم يا دلعدي ؟ هي المناهج لحقت تتغير عن أيامينا ولا إيه ؟ .
.......................................................................................................................................
Mohamed Hussein
3 أغسطس 2019 ·
لا حول ولا قوة إلا بالله , شوفت يا صاحبي اللي حصل ؟
- خير , حصل ايه ؟
.
مصيبه , كارثه والله
- طب قول بسرعه
.
ناس يا سيدي دخلو سوبرماركت و قعدو يضربو نار
- ها و ايه اللي حصل ؟
.
20 ضحيه ما بين قتيل و جريح
- يا نهار مش فايت , 20 قتيل و جريح ؟
.
أه و عهد الله زي مابقولك كده
- طب وفين الشرطه والأجهزه الأمنيه و كاميرات المراقبه ؟ هما بس شاطرين يزودو مرتبات الشرطه كل يوم تلات ؟
.
أنا عارف بقى ياخويا
- الناس بتمشي في الشارع بالمسدسات و تضرب نار عادي كده ؟ , بلد الأمن و الامان صحيح
.
على رأيك
- يارب يخرجنا منها على خير يا اخي , يعني الواحد ينزل مع عياله السوبرماركت عشان يشتري ربع كيلو جبنه يقوم يدخل واحد يضرب نار و نرجع متكومين كلنا ومتعبيين في أكياس بدل الجبنه ؟
.
دي حاجه ترعب بجد
- يارب هجره , يارب هجره .
.
معاك حق والله , بس عايز تهاجر و تروح فين
- أي بلد يا اخي يكون فيها أمان و بتحترم البني أدمين و حياتهم , والواحد يبقى مأمن على عياله , بدل الرعب اللي احنا عايشين فيه , نفسي أعيش في أمريكا يارب يقبلو طلبي .
.
يووووووه , خدتني في الكلام و نسيتني أقولك , إن الحادثه دي في أمريكا مش عندنا
- ايه ؟!! .
.
- يالله بقى انت اتوكل على الله عشان تلحق الربع كيلو جبنه اللي في امريكا , والنبي السلام أمانه للشرطه و الأجهزه الأمنيه اللي هناك , عشان هما أصلا عارفين كل حاجه و عارفين القرد مخبي ابنه فين , بالك انت ؟ لو قررت تعطس في امريكا قبل ماتقول ( هااااتسي ) هتلاقي مركز الشرطه بيتصل بيك و يقولك , يرحمكم الله .
............................................................................................................
Mohamed Hussein
3 أغسطس 2019
أصدقائي الغاليين , مش عارف أجيبهالكو إزاي والله , بس ممكن يعني أقول لكو , إن التوأم بيتولد لنفس الأب و نفس الأم و في نفس الشهر و اليوم و الساعه و الدقيقه و أحيانا كتير لما بيكبرو بتبقى شخصياتهم مختلفه تماما , و أحيانا بيبقو عكس بعض , فحكاية الأبراج و مواصفاتها و أن ذكر الحمل طيب و حنون و عاطفي و صاحب صاحبه و دمه خفيف وابن نكته و ساعة الإنفعال بيبقى جبار و بيمشي عالحيط و يطلع نار من ودانه , وإحذر بقى من غضب أنثى الأسد خصوصا يوم التلات , كلام جميل ممكن نكتبه من باب الهجايص في ساعة عصاري , يعني قرطاس فيشار مش اكتر من كده .
.
لو عصفوره عملت ببي على هدومك مش هتتكسي ولا حاجه ولا هتلاقي رساله جايالك من محل ملابس بتقولك إنك كسبت معاهم هدوم قيمتها 10 الاف جنيه تاخدهم هديه لأنك سعيد الحظ اللي العصفوره عملت ببي على هدومه .
.
الفرخه اللي بتشوفها في المنام مش نظره ولا معناها انك هتبيض في المستقبل , و لو حد خطفك في الحلم يا حاجه فتأكدي تماما إنك هتصحي من النوم تلبسي هدومك و تروحي شغلك و ترجعي بيتك زي كل يوم عادي خالص , محدش دلوأتي بيخطف نسوان يا خالتي , ويمكن دي مشكلة جيلنا الحالي الكبرى , إنه مبقاش فيه عصابات بتخطف الستات .
.
و لما يا جدعان تشربو قهوه , هتلاقو بعد اخر شفطه شوية بواقي لازقه في الفنجان , و عامله بقى أشكال مختلفه و حرافيش و شنكابالات , صدقني ده مش مستقبل حياتك مرسوم في خريطه سريه مربوطه على رجل سحليه يتيمه في قاع المحيط الأطلنطي , ولاشوية ( التفل ) دول بيحددو مصير العالم و اتجاهاته و بيحددو التشكيل الأمثل لمنتخبنا القومي اللي هنفوز بيه بكاس الأمم , طب تعمل ايه لما تشوف الشنكابالات لازقه في الفنجان ؟ مممممممممممم تقوم تغسله تحت الحنفيه بشوية مايه , بس كده , اه و عهد الله .
....................................................................................................................
Mohamed Hussein
2 أغسطس 2019 ·
روحت البيت من شوية مشوار صد رد , يادوب ركنت العربيه قدام عماره جنب عمارتنا و بفتح الباب لقيت عنتر و أخوه شيبوب و مجانص ( 3 كلاب من اللي بحط لهم أكل بالليل مع القطط ) , لقيتهم لازقين في رجلي , حاسة الشم عند الكلاب قويه جدا , المهم فضلو لازقين فيا و ماشيين معايا و حواليا مش لحد ماوصلت باب العماره , لا لحد باب الأسانسير , و كل اللي في الشارع يبصو علينا , في موكب مهيب و لا كأنه موكب فلاديمير بوتين , ماهي الناس مقامات برضه و الواحد مايصحش يمشي من غير حراسه .
.
المهم طلعت الشقه ربع ساعه و نزلت لقيتهم مستنيين قدام باب العماره , قعدو يتمسحو فيا تاني و يشمشمو, ولما اتأكدو إني مش معايا أكل هزو ديلهم وبصو لي شزرا و مشيو , وانا أنادي عليهم , واد يا عنتر , يا شيبوب , طب تعالى انت يا مجانص دانا بقول عليك انت الطيب اللي فيهم , ايه مش هتمشو معايا ؟ طب و الموكب ؟ و لا الهوا , سابوني و جريو , أه يا كلاب .
.............................................................................................................................
Mohamed Hussein
2 أغسطس 2019 ·
حكاوينا و الناس الطيبين ............... مرات سيدي
.
سيدي اللي هو جدي اتجوز 3 مرات , الأولى ماخلفش منها , التانيه خلف منها 5 صبيان , و التالته اللي هي مرات سيدي خلف منها 3 صبيان أصغرهم كان قدي بالظبط , يعني معايا في نفس الفصل و بقول له يا عم فلان .
.
مرات سيدي كانت ست قويه , كلنا عايشين في بيت واحد , أوضه لابويا و أمي و 5 عيال ولادهم , و أوضه لكل عم من أعمامي و أولاده ( 5 أو سته ) و أوضه لسيدي و مراته و عياله التلاته .
.
مرات سيدي عشان قويه محدش بيقدر عليها , كل ستات البيت بيخافو منها و أولهم أمي طبعا , بس ماعرفش ليه أو ايه السبب اللي خلّى مرات سيدي تختارني أنا عشان ألمّ لها البيض بتاع فراخها , و فراخها رخمين زيها , اللي تبيض في طوالة البهايم و اللي تطلع تبيض فوق السطح تحت قش الرز او تحت الحطب , و كل يوم ألمّ خمستاشر ستاشر بيضه و أديهم لها , كان عمري وقتها 6 سنين , و هي تديني بيضه مكافأه كل اسبوع , طب ليه اختارتني انا وليه جوزها اللي هو سيدي اختارني أنا برضه عشان اسرح معاه بالغنم , كنت الطفل الوحيد في البيت اللي بيلم البيض و يسرح بالغنم مع ان البيت ده فيه ييجي 20 عيل غيري , هل كنت موهوب مثلا في لم البيض و رعاية الأغنام ؟!
.
كبرنا و سيدي مات وانا في رابعه ابتدائي و بعنا الغنم و الجمل و كل واحد و مراته و عياله بنو لهم بيت يعيش فيه , بيوت جنب بعض كلها , ماعدا بيت مرات سيدي كان بعيد شويه .
.
مرت الأيام و السنين , لحد ماحصل موقف بانت فيه معادن الناس الطيبه , الموقف كان وفاة أبويا الله يرحمه وانا في الثانويه العامه و تحديدا ليلة أول امتحان , في الوقت ده إنهارت و قلت لعمي مش هحضر قالي ابوك خلف راجل وبكره هتروح تمتحن , وقرر عمي اني مش هقعد في بيتنا ولا في بيوت أعمامي المجاوره ولا هاخد العزا في أبويا , هروح أقعد في بيت مرات سيدي عشان انا و عمي الصغير عندنا امتحان ثانويه عامه بكره , روحت فعلا و قضيت هناك ال 3 اسابيع بتوع الامتحان , واكل شارب نايم بذاكر بمتحن و برجع عالبيت ده , مرات سيدي شالتني فوق راسها , انا و عمي الصغير و واحد تالت صاحبنا في شقه لوحدنا فوق و الأكل بيجيلنا و الشاي و هدومنا تتغسل و تتكوي , ولما أقول لها عايز أرجع بيتنا تحلف عليا مانت راجع الا لما امتحاناتك تخلص .
.
خلصت الجامعه و دخلت الجيش , و مرات سيدي اللي كان كله بيترعب منها بقت طيبه جدا و مش باقي من شقاوتها بتاعة زمان غير لسانها اللي ممكن يخبط كلمه كده ولا كده , نزلت اجازه من الجيش و أمي قالت لي مرات سيدك عيانه اوي و سألت عليك كتير روح زورها , قلت حاضر و روحت , دخلت الأوضه عليها و أولاها قاعدين ( اعمامي التلاته الصغيرين ) , هي كانت بتحبني أوي , اول ما شافتني و أصلا صوتها كان طالع بالعافيه وشكلها بتموت فعلا , بصت لي كده بكل حنان و قالت لي ( ممممممممممم انت لسه فاكر يا **مك ؟! ) , عيالها فطسو من الضحك و انا كمان , و قلت لها طالما لسانك لسه طويل يبقى انا كده اتطمنت عليكي .
................................................................................................................................
Mohamed Hussein
1 أغسطس 2019 ·
فاسألوهم إن كانو ينطقون
.
خناقه و عاركه لرب السما , و مين حضر مؤتمر الشباب و حضر ازاي و ليه ؟ و ليه فلان مش علان , طب ايه المعايير و المقاييس , كلام كتير و أسئله أكتر , بعضها منطقي إنه يتسأل , يتسأل بهدوء في انتظار اجابه , هل فعلا بيتم اختيار عناصر خرفانيه و شمامين لحضور المؤتمر ؟ هل دي ثغره و غلطه مش مقصوده ولا مقصوده , طب هل لها غرض ولا لا ؟ كلام جميل , لحد ماهووووب و فجأه بقى يتقال , فلان ده أصله فلاح , و هما بيختارو فلاحين ( عرر ) ؟ .
.
بصو انا مش هنفعل عشان تعبت و زهقت, أنا عايز أقول لكو كلمتين بس , البلد دي ربنا أكرمها و نجاها في مرحلة الطوفان بفضل جيش و شرطه و ناس طيبين مالهمش في السياسه ولا الفيس بوك , واحنا على بعض كده شئنا أم أبينا بنمثل جزء من المجتمع اللامؤاخذه المدني اللي انتو قارفينا بيه , و النخبه اللامؤاخذه المثقفه , هاتو إيديكو بقى , و عزة جلال الله لو علينا كانت البلد دي اتحرقت وبقت شوية رماد مايسووش تلاته تعريقه , كنا هنبقى ألعن من سوريا و ليبيا , لما نكون في سنة 2019 و لسه دي عقولنا , ولسه فيه ناس لما تحب تقلل من شأن حد تقول فلاح و تضيف وراها وصف ( عره ) .
.
. 10 سنين بكتب عالمخروب ده , بنشرح من أول ألف باء , بنشرح أبجديات انك تبقى بني أدم , تعبت من الكتابه و إيدي وجعتني , أحيانا بحس إني بأدن في مالطه , و أحيانا بحس إني بكلم شوية أصنام ( فاسألوهم إن كانو ينطقون ) .
.
البوست ده تحديدا اترددت كتير في إني أكتبه , و لما قررت أكتبه ماكتبتوش عشان خاطر تفهمو أو تقتنعو أو تبقو بني أدمين , إن شالله ماحد فهم ولا حد اقتنع ولا حد بقى بني أدم , أنا و الله العظيم كتبته بس عشان خاطر أبويا و أمي ( الفلاحين ) الله يرحمهم مايلعنونيش في قبرهم , كتبته بس عشان خاطر عضم التربه .
.............................................................................................................................
Mohamed Hussein
1 أغسطس 2019 ·
ها يا سعيد , عملت إيه ؟ قابلتها ؟
- أه قابلتها و عزمتها على عصير و شاي و كيك .
.
و بعدين ؟ قلت لها بحبك ؟
- أه مسكت ايديها و قلت لها بحبك
.
و هي ؟ هي عملت ايه ؟ قول بسرعه و فرحني .
- هي ؟ هي يا سيدي سحبت إيديها بالراحه وابتسمت و قالت لي , بص يا سعيد , إنت شخص عزيز عليا , أأأاا
.
بسسسسس , بس يا عزيز , قصدي يا سعيد , ماتكملش , عليا الطلاق مانت مكمل
- ممممممم مانا قلت لها كده برضه .
.
قلت لها ايه ؟
- قلت لها عليا الطلاق مانتي مكمله, و سيبتها تحاسب عالمشاريب
.
أيوه كده صح
- و انا ماشي بقى كانو حاطين عالترابيزه كاسه كريستال شكلها غالي أوي , ضربتها بكوعي و وقعتها عالأرض اتكسرت عشان تدفع تمنها برضه .
.
أحسن أحسن
- ممممممممم بس هي ندهت عليا و عنيها مليانه دموع , و قالت لي إن مش معاها فلوس تدفع تمن الكاسه و المشاريب , بصراحة صعبت عليا أوي و هي بتقول كده .
.
يا حنييين , قمت انت دافع لها طبعا ؟
- لأ , قلت لها مش مشكلتي يا ماما , لو مش معاكي فلوس هيخلوكي تغسلي صحون و حلل بتمن الحاجات دي لحد ما يتقطع نفسك , و لفّيت وشي و مشيت .
.
قشطه , انت كده تبقى سعيد صاحبي , إشرب إشرب وإنسى , دانتو بتتكلمو مع بعض بقالكو سنتين و قربتو تخلفو عيال , و الأخر تقولك شخص عزيز؟
- مانا سايبها دلوأتي بتسيّأ المحل , هي و عزيز .
.............................................................................................................................
Mohamed Hussein
1 أغسطس 2019 ·
زي ما توقعت , الريس بيكرّم أبطال منتخب مصر للشباب في كرة اليد بعد ما فازو بالميداليه البرونزيه و المركز التالت في بطولة العالم اللي أقيمت في أسبانيا من كام يوم , الورد الحقيقي اللي فتح في جناين مصر و العيال دول اللي شوفتهم و شوفت حماسهم و فرحتهم و حزنهم و إحساسهم بتي شيرت بلدهم ( مش شوية جبلّات لامؤاخذه ) .
.
متأكد تماما إن الريس مش هيبخل عليهم بأي حاجه في السنتين الجايين , معسكرات على أعلى مستوى , عشان أغلب الفريق ده هيتصعد للفريق الأول اللي هيشارك في بطولة العالم للكبار , البطولة هتقام في مصر 2021 .
ليست هناك تعليقات:
إرسال تعليق