Mohamed
Hussein
13
ديسمبر 2018·
هنبني أكبر سد
في تنزانيا ( سد روفيجي ) .
.
شركة المقاولين
العرب و شركة السويدي هيبنو السد اللي تكلفته مليارات الدولارات .
.
مصر بتستعيد دورها
الأفريقي واحده واحده , و بتنشر قوتها الناعمه بمنتهى البساطه و الأريحيه خصوصا في
منطقة حوض النيل , هتلاقو عبد الفتاح السيسي بيهتم جدا بالدول الأفريقيه وقادتها بنفس
قدر اهتمامه بالدول الغربيه العظمي و الفاعله في العالم , ده واحد عارف كويس أوي هو
بيعمل ايه .
.
من أربع خمس سنين
لما اتفتحت قصة عنب ديبو اللي اسمها سد النهضه , كان رأيي و تفسيري للأحداث إن مصر
بتكسب وقت , بتلعب لعبة الوقت , عشان التوقيت نفسه كان مختلف , جبهات كتيره أوي كانت
مفتوحه علينا و الوضع السياسي و الأمني و الإقتصادي مش مستقر بالشكل الكافي .
.
2018 و 2019 اللي
على الأبواب , الدنيا اختلفت تماما , في 2014 كنا مضطرين للدفاع , تأمين دفاعي محكم
لأن الهجمه شرسه وانت ماعندكش هجوم في لياقته البدنيه , دلوأتي لأ , أمنيا و سياسيا
و الأهم اقتصاديا بيقولو إن الكوره حاليا في ملعبنا احنا , و هجومنا جاهز , و بنعمل
الهجمه بمزاج و روقان .
.
ده رأيي من سنين
ماغيّرتوش , الأوطان الكبيره و العريقه اللي زي مصر و في المراحل والتوقيتات الصعبه
ماينفعش تتحكم أبدا بطريقة ( إوعى ايدك كده ملخت الكُم ) , الحكايه أصلها مش عاركه
في خمّاره و لا دور كوتشينه بيتلعب عالقهوه و اللي يخسر يدفع المشاريب , و الحكايه
مش شعارين حمضانين و كام تويته مضروبين و خطبه عصماء وهاشتاجات و شألباظات , و الحكايه
بتختلف تماما و كليا و نهائيا عن المفاهيم و الإمكانيات العقليه لشوية الزلنطحيه اللي
أخرهم يفتحو كشك سجاير , ده لو عرفو يديروه .
...........................................................................................................
Mohamed
Hussein
13
ديسمبر 2018·
البنات ياخوانا
, الستات , النساء , يعني وومن , بيكونو وومن من يوم ما يتولدو , جينات بقى و حاجه
كده لو عرفتوها تبقو عمد .
.
النهارده البت
لمار بنتي ( 8 سنين ) كان عندها معاد عند دكتورة الأسنان , قاعدين في مركز الأسنان
مستنيين و هي بتتألم وحاطه ايدها على خدها ( ألم الأسنان وحش ) , بعد دقايق الدكتوره
جت و فاتت قدامنا و سلمت و دخلت العياده بتاعتها .
.
لمار ( بتوشوشني
) :بابا , أنا حاسه إن الدكتوره تخنت شويه عن المره اللي فاتت
أنا : مممممممم
يابت انتي في ايه ولا في ايه ؟ .
.
دخلنا العياده
الدكتوره : افتحي
بؤك يا لمار , وريني كده , اه عندك ناب أهو عايز يتخلع و الضرس اللي جنبه , و اللي
تحت ده كمان , و الضرس اللي هناك ده .
أنا ( في نفسي
) : بس بس , تبقى الدكتوره سمعتك وانتي بتقولي انها تخنت شويه يا فالحه , ابقى خلي
طولة لسانك تنفعك بقى .
..........................................................................................................
Mohamed
Hussein
13
ديسمبر 2018·
برّو أبائكم
...تبرّكم أبنائكم
.
صباح الخير
- من يومين عند
صديق عزيز لقيته كاتب عن واحد صاحبه , صاحبه عنده طفلين و الطفلين تعبو أوي و داخ بيهم
عالدكاتره , فقام صاحبه في لحظه كده دعى ربنا و قال يارب خد أبويا و أمي بس سيب لي
ولادي !! ( مش عارف بيقدّم أبوه و أمه قربان لربنا و لا إيه ؟ ) , و صديقي طرح سؤال
, يا ترى ولاد الراجل ده لما ربنا يشفيهم و يكبرو هيعملو ايه مع أبوهم ؟! .
.
زمان و انا صغير
, أمي الله يرحمها حكت لنا حدوته , حدوته من أدب وتراث الريف المصري , بيقولك يا سيدي
كان فيه راجل متجوز و مخلف ولد , و أمه عايشه معاه لان ملهاش مكان تاني تعيش فيه ,
الزوجه بعد فتره بدأت تزن على زوجها و تقول له ماينفعش أمك تاكل معانا في الأطباق بتاعتنا
, والزوج تحت ضغط و زن و إلحاح الزوجه راح جاب طبق خشب و معلقه خشب عشان أمه تاكل فيهم
, الأم حست و فهمت و استجابت و كتمت حزنها و وجعها جواها عشان تحافظ على بيت ابنها
, وبقت تاكل لوحدها في الطبق الخشب بتاعها , بعد شوية الأم دي ماتت , و جت الزوجه ترمي
الطبق و المعلقه الخشب قام ابنها الطفل مسك ايديها , و قال لها بتعملي ايه ؟ قالت له
هرميهم , ماهي ماتت خلاص , قال لها لا سيبيهم عشان لما تكبرو هخليكو تاكلو في الأطباق
دي .
..................................................................................................................
Mohamed
Hussein
12
ديسمبر 2018·
دندنه
.
أبويا و أمي الله
يرحمهم كانو فلاحين هما الاتنين , ماراحوش مدارس ولا عتّبو بابها , و طبعا ماخدوش كورسات
تنميه بشريه و محاضرات عن الطريقه النموذجيه ( ال ideal
) لتربية الأبناء ولا كانو طول النهار بيرطنو قدامنا بالإنجليزي .
.
و مع ذلك , خرجت
من تحت إيديهم و من تربيتهم بقناعات بتقول التالي :
.
- الوطن يعني الحيطه
اللي بنسند ضهرنا عليها , و السقف اللي بيغطينا و الجذور اللي بتخلي لشجرتنا طعم و
معنى و حياه و مستقبل , لأ مش لوكانده هنلعنها لما تسوء فيها الخدمه .
.
- الدين و الديانه
مش بيمنحوني الحق إن أكفّر مخاليق ربنا و أحكم عالناس و انا نايم على بطني عالسرير
, و بالتأكيد ربنا مابعتليش كشف بأسماء اللي هيدخلو الجنه ولا كشف بأسماء المغضوب عليهم
و الضالين .
.
- و أصلا أصلا
عندي يقين تام إني لو قضيت حياتي صلاه و صوم و عبادات و مارتكبتش أي كبيره أو ذنب و
خلاص هدخل الجنه أهو , هلاقي ناس سابقني في الطابور بمسافات , شاب في أقصى جنوب شرق
أسيا مات و عمره 30 سنه , من يوم ماوعي الدنيا و هو بيخدم أمه المريضه و مات , لا شاف
في الدنيا دي خير ولا شر , والله يابني ماعرف هو كان مسلم و لا مسيحي ولا بوذي ولا
عفريت أزرق, كل اللي اعرفه ان اللي زي ده هيسبقني للجنه , ست أرمله في ادغال أفريقيا
بتجري على عيالها و تشتغل في الفاعل 14 ساعه يوميا و ترجع بيتها تنام زي القتيله ,
بس بتكون مبتسمه و راضيه , كل أحلامها و طموحاتها في الحياه ان ولادها يباتو شبعانين
, دي لما تموت هتسبقني للجنه , ماهو ربك عادل .
.
- الرجوله يعني
مسئوليه و معافره في الدنيا و ناس تنحت في الصخر ( مش تحكمات و أوامر ) , و الانوثه
يعني رقه و طبطبه و كلمة طيبه ( مش بغدده و تقطيم ) , و مش ذنبنا أبدا ان كل حاجه في
حياتنا اتعجنت في بعضها و بقينا نشوف رجاله ناقصهم بس يلبسو قمصان نوم حريمي , و ستات
لامؤاخذه دكر .
.
الفطره يا بني
أدمين , الفطره يا خلق الله .
.........................................................................................................
Mohamed
Hussein
12
ديسمبر 2018·
ستراسبورج , باريس
, و الإنبهار , الإنبهار يا سيد
.
صباح الخير
- أفة حارتنا الإنبهار
, حضرتك تنبهر كده , تقوم تفتح بؤك عالأخر , و أي حاجه يحطوهالك في رغيف فينو هتعتبرها
ساندوتش , حتى لو كانت الحاجه دي هي فردة شبشب , و تفضل ماشي عكس اتجاه العقل و كل
ماتبعد و تتعمق في برطمان الكوله اكتر هتتخيل إن عقلك ده ألماظات و إنك سابقنا بمليون
فدان , وتشوف نفسك عظيم و الناس حواليك صراصير , معلش , الباركينول بيعمل أكتر من كده
.
.
في الحادث الإرهابي
بتاع ستراسبورج امبارح , 3 قتلي و عشرات الجرحى , الشرطه الفرنسيه حددت هوية المنفذ
( حددته بسرعه ازاي ؟ مش يمكن هما اللي مدبرينها ؟ ) , وقالو كمان انه له نشاط ارهابي
سابق ( طب لما هو له نشاط ارهابي سابق ماقبضتوش عليه ليه ؟ ولا كنتو مستنيينه لما يقتل
ناس اكتر ) ؟ و قالو ان فرنسا في 2015 و 2016 اتعرضت لهجمات ارهابيه راح ضحيتها اكتر
من 200 شخص ( لا بس ده تقصير أمني , مانتو مش شاطرين في حاجه غير انكو تزودو مرتبات
الشرطه كل يوم تلات , أبو 50 % مش هيفلح في حاجه أبدا ) ......... طبعا اللي بين الأقواس
ده المفروض يكون رد و تعليق شمامين الكوله بتوعنا , بس مش هيقولوه لأنهم تخصص خيانه
لبلدهم .
.
من كام يوم كان
عندي صديق من أشباه المثقفين , اللي هما بيبقو عاملين زي نص اللمونه اللي بتتحط في
باب التلاجه لحد ماتنشف , ولا حد عارف دورها ايه في الحياه , صديقي اللي عملت له بلوك
بنفس راضيه مطمئنه , كان بيعلق على احداث فرنسا و كل جملتين يقول البؤ ده , فرنسا دوله
عظمى بتحترم شعبها , شوفتو كام واحد مات ؟ أربعه خمسه بس , ده لأنهم دوله عظمى و شعب
متحضر , و انا أعيط و اتشحتف , لحد ماخلصت علبتين مناديل من الحجم الكبير فقلت مابدهاش
بقى , البلوك وجب يا عطيه و نحافظ على علبة المناديل اللي باقيه .
.
الإنبهار بيخليك
تشوف الصوره غلط , ماتسلمش دماغك تسليم أهالي لحد يا مولانا, بص هبسطهالك , فيه حاجه
اسمها حجم التحدي الأمني , لما تيجي تقارن مصر ب فرنسا , لازم تحط المقارنه و معطياتها
صح , تقوم تقولها ازاي ؟ تقولها كده , 20 مليون مواطن نزلو في تظاهرات في كل ربوع مصر
, و نزل 200 ألف شرطي للتأمين و الحمايه , ال 20 مليون أغلبهم مايعرفش يعني ايه ثوره
ولا تظاهر ولا حقوقه بتقف عند ايه .
.
في المقابل , في
فرنسا نزل 100 ألف في أماكن محدده و مدن محدده , و نزل عدد مماثل من الشرطه للتأمين
و الحمايه , المحصله , كام قتيل أقل من عشره و ألاف المصابين و المعتقلين ( بما فيهم
طلبة المدارس ) .
.
في مصر كان فيه
مسلحين من بلاد تانيه و اجهزة مخابرات دول و حدود مفتوحه عالبحري لان الدول اللي حواليك
إما وقعت أو بيحكمها خروف , فرنسا محميه في علبة قطيفه اسمها الإتحاد الأوروبي .
.
المقارنات بتكون
كده , و ممكن تقولها باختصار , هات فرنسا و حطها في نفس ظروف مصر 2011 , نفس المعطيات
بالظبط , وقولي عدد القتلى و الجرحى و المعتقلين هيبقى كام ؟! يمكن لما تتخيل المشهد
بشكل صح تبطل إنبهار .
.....................................................................................................
Mohamed
Hussein
11
ديسمبر 2018·
أكتر حد بائس في
كوكب الأرض و المجموعه الشمسيه هو الواد اللي بقاله 5 سنين يقول هنعمل ثوره , ولازم
نعمل ثوره , و ييجي وقت الجد تلاقيه فرخه بيضا مهريه هرمونات , أصل الجيش و الشرطه
قافلين الشوارع بالدبابات و المدرعات و الطيارات النفاثه , أصل احنا مش عايزين نأثر
على اقتصاد البلد , أصل الشاحن ضاع , أصل خالتي حمؤه ماتت محروقه , و أي هجايص بيرددها
ثوار تويتر و هبدجية الكي بورد.
.
أحدث حاجه توصلو
لها , إنهم كانو عايزين يعملو ثوره بالسترات الصفراء بس الحكومه منعت بيع السترات دي
, فيا خساره مش هيعرفو يعملو ثوره عشان مش لاقيين السترات ( بيفكروني بمشهد لاسماعيل
ياسين لما كان شاويش و قالو له اقبض عالحرامي , قال لهم اقبض عليه ازاي و انا مش معايا
الصفاره ؟! ) , صحيح انتو هتعملو ثوره ازاي من غير السترات الصفراء ؟
.
عزيزي المواطن
الهبدجي البائس , عبد الفتاح السيسي و الحكومه مش شاغلين بالهم بيك خالص ولا يسمعو
عنك أساسا و خالتك ذات نفسها بتتلخبط في اسمك, السترات الصفراء هتلاقيها ملقحه في كل
حته و تمنها أرخص من علبتين سجاير مارلوبورو , بس أنا عندي لك فكره أحسن من كده , مش
انت عجبتك حكاية الزي الموحد ؟ خلاص تاهت و لقيناها , خلّي الزي الموحد هو الفانله
البيضا و اللباس , و تبقو كلكو كده لابسين أبيض فأبيض زي موسم أبو قردان في أرض البرسيم
, و فرصه تنزلو من بيوتكو جاهزين و تلاقو الشعب كمان مستنيكو و جاهز , و أهي تبقى شبكه
و كتب كتاب مع بعض في ليله واحده
..............................................................................................................
Mohamed
Hussein
11
ديسمبر 2018·
إعتراف
............. أنا و التركيز و عربيتي
.
عندي مشكله أزليه
وجوديه منفلوطيه مع التركيز , بينا مشاكل و ما صنع الحداد و السبّاك و النجار , و محدش
فينا طايق التاني , انا في فتره كده عوّلت على إن السنين كفيله انها تداوي الجرح و
الشرخ والفجوه اللي بينا بس من غير فايده , يا جدع دانا لو مرات أبوه كان اتكسف على
دمه شويه بحكم العشره على الأقل , و طبعا علاقتي بالتكنولوجيا بالظبط بالظبط زي علاقة
رانيا يوسف بالبطانه بتاعة الفستان , التكنولوجيا عندي على طول مرفوعه لفوق .
.
ذهني باستمرار
سرحان و شارد , في أي أفكار عبيطه absolute
, أفكار ملهاش علاقه بالواقع أوي ,يعني لا بتحلب ولا بتبيض ولا منها أي منفعه .
.
المهم , العربيه
اللي معايا دي شاريها زيرو في 2009 من السعوديه , يوم ماروحت أستلمها الواد قعد يشرح
لي كتير عن المزايا و الأوبشنز و الزراير , و انا اهز دماغي زي البنغاليين و خلاص
, يا عم أوبشنز و زراير ايه بس ؟ انا العربيه عاجبني شكلها أوي , فخمه كده و فخيمه,
ماتكلمنيش بقى عن أوبشنز و زراير , قولي بتدور ازاي و بتمشي ازاي و نقطه يعني فلستوب
.
.
بعد 5 سنين نزلت
مصر نهائي , عندي في البلد الواد ابن اخويا كان عمره وقتها 11 سنه , هو مش كوري صحيح
بس نينجا , و غاوي يركب العربيه و يسوقها , أول حاجه قالهالي , الأستيك اللي راكب في
شنطة العربيه من الجنب ده تعلق فيه الحاجات دي , ماتسيبهاش مرميه كده , قلت حاضر .
.
في مره قالي يا
عمو انت ناسي إزاز العربيه مفتوح , طب خد يا احمد المفاتيح و دور العربيه و اقفل الإزاز
, خلي بالك ياحمد ان الازاز مش هتعرف تقفله الا لما تدور العربيه , خليك ناصح كده زي
عمك , الواد بص لي شزرا و قالي عربية ايه اللي أدورها ؟ هات الريموت , و قعد جنبي
( كنا في البلكونه ) ضغط عالريموت كام ثانيه , قالي الإزاز كده اتقفل , مممممم بجد
والنبي ؟ أه و الله .
.
كرسي العربيه اللي
بقعد عليه حاسه واطي شويه , وفضلت فتره اقول لنفسي أنا لازم أروح لواد عفشجي يرفع لي
الكرسي, روحت البلد من اسبوعين واديت المفاتيح لاحمد عشان ينضف العربيه , جيت اركبها
لقيت الكرسي اترفع وبقى زي الفل , واد ياحمد الكرسي ده اترفع ازاي ؟ هو فيه عفشجي في
البلد ؟ عفشجي ايه يا عمو , الكرسي بيترفع من الزرار اللي جنبك ده , يابني كرسي ايه
اللي يترفع بزرار بس , انا اعرف انه بيطلع لقدام و يرجع لورا من هنا , و الضهر بتاعه
بيتفرد و ينتني من هنا , لكن هو بيطلع و ينزل كمان ؟ اه والله يا عمو.
.
من كام يوم كنت
رايح المدرسه اجيب البنات , لمار البت المقروضه الصغيره ركبت جنبي و أول ماركبت قالت
يابابا شغل التكييف , جيت اشغل التكييف لقيته بيجيب هوا بس , يا نهار مش فايت , التكيف
شكله باظ يا لمار , ده مروحه بس و مفيش تبريد خالص, طب ده نصلحه امتى و هيتكلف كام
؟, يا بابا تكييف ايه اللي باظ ؟ الزرار اللي مكتوب عليه AC
كان بيبقى منور , انت دوست عليه بالغلط , ده بتاع التكييف , ممممم
طب استني كده , أه صح , الحمد لله التكييف اتصلّّح !! .
.
بصو , هو الموضوع
مسّخ أوي , و شكلي بيبقى وحش قدام العيال , هحاول أركز بعد كده , مش أكيد يعني بس هحاول
, ماهو برضه واحد عاش 42 سنه عديم التركيز مش هيركز بضغطة زرار , ممممممممم مالخيبه
لايكون فيه زرار للتركيز وانا اللي مش عارف مكانه برضه .
........................................................................................................
Mohamed
Hussein
11
ديسمبر 2018·
مرحباً , أنا مارك
مدير الفيس بوك و العضو المنتدب و أمين الصندوق , يعني اللي بيقعد على الكيس , و كبير
مشجعي مانشستر يونايتد , أقول لكم أمرا , فإن هذا الفيس بوك سوف لا يكون بالمجان مستقبلا
, كل ما عليكم فعله لتحتفظو بفيس بوك مجاني هو إن كل واحد منكو يبعت لي قفص جوافه تكون
بيضا كده و كبيره و ريحتها فايحه و برطمان لمون مخلل عليه شطه عشان بحب الحاجات دي
أوي , و لو فيه حلة محشي كرنب معموله عالكانون بالحطب يبقى قشطه كده و اتعشت و جبرت
, انسخو هذه الرساله و ابعتوها لكل المعاتيه عشان يبعتوها لمعاتيه تانيين وفي النهايه
يقعدو يهرو في النظريه النسبيه و أسباب انهيار الإتحاد السوفيتي و العولمه و الملبن
و الشكلمه و عايزين يحكمو مصر و ينظّرو على ميتين اللي خلفونا ....والله الموفق والمستعان
.
.
........... إمضاء
: مارك بن زوكنبرج بن حيين بن المهلهلون .
...............................................................................................................
Mohamed
Hussein
10
ديسمبر 2018·
ملخص خطاب ماكرون
للشعب الفرنسي
................
................
بص حضرتك , هما
حاولو يقرصو ودني
- ها و انت عملت
ايه بقى ؟
.
أنا قلت أي .
- ممممممم يعني
اتقرصت يا فالح ؟
.
أه اتقرصت و قلت
أي
- ليه كده بس ؟
.
.
أصل بصراحه حبيت
الحكاية أوي .
- أها , و عايز
ايه دلوأتي يا فخامة المستر بريزدنت ؟.
.
هو انا ممكن أطلب
طلب أو أمنيه ؟
- أه طبعا من حقك
.
.
ممكن يقرصو لي
ودني التانيه ؟ بليز , بليز , سيل فو بلي و النبي .
- ممممممممم هيقرصوها
ماتقلقش , يا عرة البريزدنتات , يا برزيدنت لحد مايلاقو بريزدنت , اصبر على نفسك بس
, دانت لسه جيشك حلبه .
..........................................................................................................
Mohamed
Hussein
10
ديسمبر 2018·
بوست ممنوع على
الستات و البنات و الأطفال و حديثي الولاده والمبتسرين و حتى الرجاله اللي بيتكسفو
( غالبا محدش هيقرا البوست ده غير انا و صديقي كونت ) .
....................
.....................
قولي لي يا بنتي
- نعم يا دكتور
.
انتي عارفه طبعا
إنه لا حياء في العلم
- أيوه طبعا .
.
جميل أوي , عايز
بقى أسألك سؤال صريح
- اتفضل حضرتك
.
باختصار كده و
بشكل مباشر , جوزك كويس معاكي ؟
- ممممم بصراحه
لا , بقاله فتره مش مظبوط خالص .
.
طب مش يمكن عنده
مشكلة الإتصال اللي تعذّر بالخادم ؟
- والله يا دكتور
انا قلت لنفسي كده , و ماخليتشي فوق جهدي جهد , لانجريهات و لبست , بارفانات و حطيت
, نكز و نكزت , غمز و غمزت , ستيكرات و بعتت , اعمل ايه تاني في أم الخادم اللي قاطع
الإتصال والنفس ده؟
.
ممممممم طب ماتجربي
ان حد تاني ينكز معاكي , صاحباتك مثلا , و اهي إيد على ايد بتساعد برضه .
- نعم ياخويا ؟
نعم يا دلعدي ؟ الله الغنى , مش عايزه , هستحمله لحد مامشكلة الاتصال تتحل , ده حبيبي
و أبو عيالي , قال صاحباتك ينكزو معاكي قال .
..............................................................................................................
Mohamed
Hussein
10
ديسمبر 2018·
مصر الفولاذيه
.
صباح الخير
- لسه قاري تقرير
حالا في جريدة أجنبيه بتحاول تعمل حصر للأسلحه اللي تعاقدت عليها مصر و دخلت الخدمه
في قواتنا المسلحه أخر 5 سنين .
.
الأرقام و المواصفات
و المزايا مش هينفع تتكتب في بوست ولا في كراسه , أنواع الأسلحه من الإبره للصاروخ
زي مابيقولو , أو من الألف للياء ( دبابات و طيارات بكل أنواعها و منظومة صواريخ و
غواصات و رادارات و زوارق صواريخ و حاملات مروحيات .... و سيب القوس مفتوح ) .
.
- أجمل مافي التقرير
هي الدول اللي بنتعاون معاها عسكريا , هتلاقي 99 % من أسلحتنا الحديثه , روسيه , فرنسيه
, ألمانيه ( ده طبعا لأن السيسي عميل للأمريكان زي مانتو عارفين ) .
.
- و أجمل مافي
التقرير برضه إن مصر لما بتطلب صفقة أسلحه بتكون حريصه على وجود مركز صيانه إقليمي
في أرض المحروسه و حريصه كمان على نقل تكنولوجيا التصنيع لحد أرضنا كلما أمكن ( بفكرة
إنشاء مصنع لتصنيع السلاح الفلاني بخبرات مشتركه ) .
.
- من كام يوم كان
معرض ايديكس للمنتجات العسكريه الدفاعيه اللي نظمته مصر , و شوفنا جزء من الأسلحه اللي
بنصنعها , زي المدرعات و الرادارت و البنادق و الطيارات اللي بدون طيار , في معارض
التسليح القاعده بتبقى معروفه , انت مابتعرضش كل ما تملك ولا أحدث ما تملك , يعني القاعده
هي ( ماخفي كان أعظم ) , ده مش معرض أدوات مكتبيه سيادتك ولا بتاع ياميش رمضان.
.
- عايز أقول لحضراتكو
باختصار , والكلام ده هيبصم عليه أي خبير عسكري في العالم , إن مصر في 5 سنين عملت
تحديث لجيشها و أسلحتها ماحصلش من أيام نصر اكتوبر العظيم , يعني من 45 سنه .
.
- التوقيت كمان
كان مهم جدا , كوكب الأرض كله على بعضه من كام سنه و هو على كف عفريت , أتخن المحللين
السياسيين مايقدرش يقولك بكره هيحصل ايه في الكوكب ده , التوقيت الحالي هو الأصعب و
الأكتر حرجا من بعد الحرب العالميه التانيه , و الموضوع بقى أشبه بشوية بلطجيه مجرمين
بيحكمو العالم صنعو مارد و بيسرحو بيه في كل حته , المارد نفسه ممكن يخرج عن سيطرة
اللي صنعوه .
.
في توقيت زي ده
بيبقى الجيش القوي الفولاذي هو رقم 1 في المعادله , لا تقولي بقى حقوق و حريات , ولا
هري و تنظير و تويتات , ولا ساندوتشات حلاوة بالقشطه , اه بالمناسبه , بعد أحداث فرنسا
الأخيره أوروبا بالكامل هتتعامل مع ملايين اللاجئين بالجزمه القديمه و محدش هيقدر يلومها
, و أردوغان هتتقفل عليه حنفية السبوبه بتاعة التجاره باللاجئين
.
..............................................................................................................
Mohamed
Hussein
9
ديسمبر 2018·
نشطاء من تونس
يعلنون عن تأسيس حملة ( السترات الحمراء ) لإنقاذ تونس , زي السترات الصفراء بتاعة
فرنسا كده , و بيستعدو لاستكمال مشوارهم النضالي والثوري و المنفلوطي من أجل حياه كريمه
للمواطن التونسي , اه و عهد الله ( كريمة ذات نفسها من الأعضاء المؤسسين للحمله )
.
.......................
.......................
لو سمحت يا حبيبي
- نعم يافندم
.
.
مش انتو ثورتكو
نجحت برضه و جبتو رئيس شمام كوله زي الفل و لما خلّص فترته الرئاسيه بقى بيشتغل ضيف
في قناة الخنزيره ( بيقلّب عيشه يعني ) و لما يتسأل اي سؤال عن أي حاجه في كوكب الأرض
يقول عبد الفتاح السيسي السبب هو و انقلاب 30 يونيو اللي حصل في مصر ؟ .
- ايوه حضرتك احنا
ثورتنا نجحت و جبنا الرئيس شمام الكوله الجميل ده .
.
طب عايزين تعيدوها
ليه بقى طالما هي نجحت ؟
- بص سعادتك, هي
من جهة نجحت فهي نجحت بس مانجحتش بالشكل الكافي .
.
أه , فهمتك فهمتك
, انتو عاملينها زي الثانويه العامه بتاعتنا كده , هي نجحت بس مجابتش مجموع كبير ,
فانتو هتعيدو السنه عشان عينيكو على كلية الطب و تبقى ثوره تحت شعار شقه و فيلا و عربيه
و عروسه و عياده و عزبة و بالطو أبيض و جهاز ضغط و سماعه لكل مواطن .
- لا حضرتك , احنا
بصراحة ربنا عايزين نعيد السنه قصدي نعيد الثوره عشان نجيب تونس عالجنط , يعني تحت
شعار ( اخربها مداين يا ورد الجناين ) .
...............................................................................................................
Mohamed
Hussein
9
ديسمبر 2018·
البانجو لا يزال
في جيبي
.
صباح الخير
خبيرة أبراج في
ضيافة مذيعة في قناه مصريه خاصه بتقول التالي : ياريت يا جماعه بلاش تسمّو أولادكو
أدم ولا أدهم , لأن الإسمين دول بيسحبو الطاقه , عشان كل اسم منهم لو حذفت منه حرف
او حرفين هتلاقي كلمة ( دم ) و بلاش كمان إسم بلال لأن سيدنا بلال كانت طاقته قويه
و احنا مش قد الناس دي , فإسمه برضه هيسحب مننا شوية الطاقه اللي حيلتنا ( معرفش تحديدا
ايه المشكله في اسم بلال ؟ هل مثلا لو حذفنا حرفين هيبقى بل , أو هيبقى (لا) و(لا
) أداة نفي وحشه أوي وبتسحب الأكسجين من الشقه ؟ ولّا لو حذفنا حرفين و عكسنا الحرفين
الباقيين هتبقى لب , واللب زي مانتو عارفين فيه تفتفه كتير و القشر بتاعه بيلزق في
السيراميك و في فرش الأنتريه ).
.
عموما , عايز اقول
لخبيره الأبراج و عالمة الفلك العظيمه دي , حاضر , احنا بعد كده أي ولد نجيبه هنسميه
خيشه أو شحته عشان مايتحسدش , أو ممكن نسميه خريت , روح ياض يا خريت تعالى ياض يا خريت
, لأن إسم خريت فيه طاقه كبيره جدا بتعمل لها اتنين كيلو احيانا , حضرتك متخيل كمية
الجمال و الهدوء و السكينه اللي في إسم خريت ؟ لا والله مانت متخيل , و طبعا و بالتبعيه
, مش هينفع نقول عالناس بني ادمين لأن كلمة بني أدم فيها اسم أدم اللي بيسحب الطاقه
, فلما هنقول بني أدمين بصيغة الجمع هنسحب كمية طاقه من حياتنا كانت تكفي لتوليد كهربا
قد كهربة السد العالي , و محدش يقولي هنولّدها فين عشان انا مش عارف , فممكن نستبدل
كلمة بني أدم بكلمة بني خريت , إفهم بقى يا بني خريت .
.
أما لو عايزين
الجد و عايزين الحل و الربط هقوله لحضراتكو في كلمتين , رجاء محبه , امنعو البانجو
عن اللي بيسمو نفسهم خبراء أبراج و فلك و طاقه و بطيخ من غير بذر , و امنعو البرسيم
عن اللي بيسمو نفسهم إعلاميين , و أخر و أهم رجاء للساده المسئولين في الإعلام المصري
و مديري القنوات , الحكوميه و الخاصه , لو سمحتو , من فضلكو , بليز , حاولو تشوفو أي
معايير لإختيار المذيعات غير معايير الكيرفات و السمّانه و الكام زرار اللي بيتفتحو
من البلوزه , عشان البلد دي تستاهل أنضف من كده والله , يعني باختصار , بلاش تلبسو
بطانه من النوع اللي بيترفع لفوق أوي .
..............................................................................................................
Mohamed
Hussein
8
ديسمبر 2018·
أحلى حاجه في ترامب
إنه جرئ و مجنون كده في نفسه و ممكن يقول أي حاجه في أي حته , يعني مقطّع البطاقه و
ماشي بكارت ميناتل ولا حد هامه , بيفكرني والله بسواقين الميكروباصات بتوع السلام و
النهضه .
.
لما جت سيرة السعوديه
من قبل ما يبقى رئيس لأمريكا قال عالهوا مباشرة , عندهم فلوس كتير أوي و هيدفعو ولازم
يدفعو , احنا عايزين فلوس , فلوس كتير , كتاكيت ( بصوت عبد الفتاح القصري لما كان عامل
مجنون ) .
.
و في قصة خاشقجي
قال معندناش أدله و عندنا صفقات تسليح مع السعوديه بنص تريليون دولار ( الترجمه , ما
يتحرق خاشقجي هو و امه في يوم واحد ) .
.
و لما حب يتكلم
عن فرنسا و الأحداث اللي حاصله فيها حاليا , تحس إنه باقي له تكّه واحده و يكتب بوست
على صفحته يعترف فيه إن هو اللي مدبر الأحداث دي و ممكن يعمل مينشن لتيريزا ماي و يقول:
ملحوظه , الحيزبونه دي شريكتي في الجريمه , ولّا هتنكري يا وليه ؟! .
...............................................................................................................
Mohamed
Hussein
7
ديسمبر 2018·
الشرطه الفرنسيه
هتعمل إضراب عن العمل بكره تعاطفا و تضامنا مع أصحاب السترات الصفراء !! .
.
بس بس أنا كده
فهمت المشهد هيمشي إزاي , بص يا مولانا
- المتظاهرين بتوع
السترات الصفراء هينزلو الشارع عشان يتظاهرو , و الشرطه هتضرب عن العمل .
.
يقومو المتظاهرين
يبصو حواليهم يمين و شمال مايلاقوش حد من أفراد الشرطه بيأمن المنشأت و البلد و لا
بيأمن مظاهراتهم ولا فيه اشتباكات ولا يحزنون .
.
يقومو المتظاهرين
يزهقو من الوقفه الناشفه دي , لا مايرجعوش بيوتهم ولا حاجه , يقومو رايحين لأفراد الشرطه
( في بيوتهم ) و ينزلو فيهم طحن و يعدموهم العافيه و يعتقلو شوية ظباط و شوية عساكر
بتهمة الإضراب عن العمل بدون تصريح و محاولة تعريض الأمن القومي لفرنسا للخطر !!.
...
عموما و بما إنها
قاعدة بانجو من أولها , و البانجو بيطلب زي مايطلب , فعايز أقول لحضراتكو , إن احنا
ك عرب سبقنا الغرب في الحكايه دي .
.
من كام سنه كان
الأخ العقيد معمر القذافي الله يرحمه , أيام ماكان بيحكم ليبيا كان بيعمل مظاهرات ضخمه
جدا تطالب قادة البلاد ( قادة ليبيا ) بتحريك الجيش الليبي لتحرير القدس من إيد الصهاينه
, و كان بيقود المظاهرات دي بنفسه , أه وعهد الله , و مش بعيد في مره من المرات تكون
الشرطه الليبيه قبضت عليه و اعتقلته وجهت له اتهام ( السعي لقلب نظام الحكم ) .
........................................................................................................
Mohamed
Hussein
7
ديسمبر 2018·
يا جني يا جني
يابن الجني
- أيوه يا أستاذ
, نعم فيه ايه ؟ أؤمرني , لك طلب واحد هحققهولك .
.
طلب واحد بس ؟
ليه كده ؟
- هو ده النظام
يا محترم , مش سايبه هي , ولو مش عاجبك اتصل ببتوع حماية المستهلك , اطلب يالله و خلصني
.
.
كنت عايز الزمالك
يفوز بالدوري و الكاس و السوبر و بطولة أفريقيا و كاس العالم للأنديه في نفس السنه
.
- يافندم حضرتك
انا عفريت عادي كده من العفاريت الملقحين على قارعة الطريق , مش عفريت جوارديولا سيادتك
, اطلب حاجه تنفع تتنفذ و بطّلو خنقه بقى .
.
طيب خلاص , عايز
البت لوجي بنتي لما تحب تشتري لها طقم خروج ماتلفّفنيش وراها كعب داير على محلات مدينة
نصر و تبطل تشتري البنطلون و البلوزه في 7 ساعات ,داحنا عبرنا خط بارليف و أفقدنا العدو
اتزانه في ست ساعات يا مؤمن .
- اه قولت لي
, لوجي بنتك , طب قولي عايز الزمالك يغلب برشلونه كام في نهائي بطولة العالم للأنديه
؟ و لو تحب طارق حامد يجيب هاتريك في الماتش ده منهم جون بكعب رجله من نص الملعب معنديش
مانع , دي سهله خالص و في مقدورتنا .
..................................................................................................................
Mohamed
Hussein
7
ديسمبر 2018·
لما تغيب شهر و
اتنين و سنه و اتنين عن صفحات كبار الخرفان و كبار شمامين الكوله و ترجع تشوفها بالصدفه
بتلاحظ حاجتين مهمين .
.
أولا : نفس العته
و الخرفنه والبؤين الحمضانين اللي سيبتهم عليها بترجع تلاقيهم عليها , لا زادو حرف
ولا نقصو حرف ( يعني بحطّة إيدك ) .
.
ثانيا بقى و ده
الاهم و اللي لاحظته , ان التفاعل على صفحاتهم قرب يندثر , قناة الخنزيره اللي فيها
كذا مليون فولور متوسط التفاعل عندها بيبقى 500 لايك حاليا , من كام سنه بس كانت الخنزيره
لما تعطس تلاقي 170 ألف لايك , ابن يوسف القرضاوي كان أيقونه و الناس بتستنى الخراء
الفكري بتاعه , دلوأتي لو البوست تفاعل عليه 6 اشخاص هيعمل مولد 3 أيام بلياليهم .
.
مش حقيقي إن كلامنا
و تعبنا السنين اللي فاتت مكانشي مهم , لا اطلاقا , كل كلمه بنكتبها بيبقى لها صدى
حتى لو بالتراكم , كل شعار و افتكاسه و هبده بنفندهم بيفيدو و بيغيرو قناعات شخص ما
في مكان ما حتى من غير مانحس , الناس بتفهم و بتنسحب بشكل تدريجي من زرايب الخرفان
و من برطمانات الكوله و بتنضف نفسها و توبها من دنس الخيانه و من تغييب العقول , الخير
دايما بينتصر في النهايه و الحق بينتصر .
.
زي مابيقولو كده
, تستطيع أن تخدع بعض الناس بعض الوقت , لكنك لا تستطيع أن تخدع كل الناس طول الوقت
, أو زي ماقال ربنا سبحانه و تعالى في كتابه ( فأما الزبدُ فيذهب جفاءً و أما ما ينفع
الناس فيمكث في الأرض ) .
.............................................................................................................
ليست هناك تعليقات:
إرسال تعليق