Mohamed
Hussein
6
ديسمبر 2018·
على كف عفريت
.
فرنسا , الدوله
العظمى , بلد النور و الفن و الجمال و العطور و الثقافه و التحضر و السوربون , البلد
اللي أصلا أصلا محميه جوه علبه قطيفه اسمها الاتحاد الأوروبي , البلد دي فجأه كده بقت
على كف عفريت .
.
لو عايز تعرف يعني
إيه طوفان ؟ و أهل الشر يقدرو على ايه ؟ و مصر نجت من إيه بالظبط ؟ اقرا الكلمتين اللي
فوق تاني .
.
لو عايز تعرف ليه
الاتحاد السوفيتي بجلالة قدره سقط و ازاي سقط ؟ لو عايز تعرف مين بيبيع لك الشعارت
و الفلايات بما فيها شعارات التدين و شعارات التحرر , مين بيلعب في الجينات و الهويه
و التاريخ و بيلاعبك عالشناكل وليه بيعمل كده ؟ , اقرا .
.
لو عايز تعرف قد
ايه كوكب الأرض ده منحط و إن القيم و المبادئ و الأخلاقيات و المثل و حقوق الإنسان
و الحريه و الديموقراطيه و الثورات و الربيع مجرد عرايس شكلها حلو بيحركها أهل الشر
, و لعبه بيضحكو بيها عالعيل الصغير اللي زي معاليك ؟ اقرا .
.
لو عايز تعرف إن
الدوله اللي بتحسسك انها بتعيط و تتشحتف لو القطه بتاعتك اتحبست في منور هي نفسها الدوله
اللي لو دمك هيجيب لها دولار هتصفيه و تبيعه ؟ اقرا .
.
و الأهم من انك
تقرا هو انك تفكر , عشان قرايه من غير تفكير هتبقى زي الحمار اللي شايل مجموعة كتب
و مقالات على ضهره و عينيه متغميه و ماشي في السكه اللي عايزينه يمشي فيها ( كمثل الحمار
يحملُ أسفارا ) .
...........................................................................................................
Mohamed
Hussein
6
ديسمبر 2018·
أنا و بناتي
.
اللي بيخلف بنتين
زي حالاتي بيبقى عامل زي اللي متجوز اتنين بالظبط , ده طبعا لو حاول يعدل بينهم , أقول
لدي كلام حلو و تشجيع لازم أقول للتانيه , أخد بوسه و حضن من هنا لازم أحضن وأبوس التانيه
, حتى في البستفه بحاول اعدل بينهم .
.
المهم البت لوجي
كان عندها من كام يوم مسابقه في المدرسه بين الفصول ( ساته ابتدائي ) , الفريق بتاعها
فاز على اول فصل يقابله و خسر في النهائي , أنا طبعا مافوتتش فرصة البستفه وقلت لها
( بهزار و ضحك) , يا فاشلين يا فاشلين , يا فريق فاشل , ماهو انتو مش شاطرين غير في
طريقة عمل التاتو و هنشتري البوت من محل ايه و طول النهار قاعدين على جروبات الواتس
, هتفوزو ازاي و النبي ؟ .
.
و النهارده جه
الدور على لمار الصغيره ( تالته ابتدائي ) , كان عندها نفس المسابقه , خسرو بفرق نص
درجه من الفصل التاني , افتكرت انا بقى اني بستفت لوجي من كام يوم تبقى البستفه وجبت
يا عطيه , قلت للمار بهزار برضه, يا فريق فاشل ولسه ماكمّلتش الجمله قامت معيطه و فتحت
في العياط و قالت احنا فضلنا نعيط بعد المسابقه كلنا في الفريق , حاولت اسكّتها و اصالحها
و كلفتني الحكايه دي 50 جنيه ( رشوه ) .
.
الواحد لازم يفهم
بقى إن حتى كلمة ( فاعدلو ) مش في المطلق كده , لأنك ممكن تيجي تعدل حاجه تلاقيها انتنت
في إيديك !! , لازم تبقى فاهم فرق الشخصيات , يعني لوجي مثلا شخصيتها قويه و واثقه
من نفسها فلما بستفتها قعدت تضحك و تقول أيوه احنا أفشل فريق في العالم وكوكب الأرض
و معترفين بكده , لمار لا , حساسه جدا و بتعيط من أقل حاجه , و أنا اللي بدفع رشوه
الصلح في النهايه .
..................................................................................................................
Mohamed
Hussein
5
ديسمبر 2018·
دندنه
.
ليه بحب المطر
بجنون ؟ و ليه بستناه كل سنه و لما بيتأخر بستعجله , و ليه مابحبش في مدينة نصر حكاية
انها مش بتمطر هنا كتير عكس التجمع مثلا و أغلب أحياء القاهره ؟ ليه بعتبر المطر ضيف
غالي أوي مش بقعد عالكرسي استناه لما ييجي وقت ماييجي ؟ لا دانا بقف له قدام باب البيت
و عيني تجيب أخر الشارع عشان ألمحه و أحيانا بتعمد إني ألمحه بإشارات غلط , يعني لو
الدنيا ضلمت شويه قبل المغرب اتعمد مابصش للسما أشوف فيها سحاب ولا لا , إنما أقول
ده سحاب و المطر جاي اهو .
.
ليه بقى ؟ فكرت
كتير في اجابة السؤال ده , و بعدين وصلت للجواب , المطر في القاهره ملوش شمخه , ملوش
شخصيه أوي , مابيسيبش أثر , الدنيا لو مطرت سيول بعد نص ساعه بتلاقيها نشفت ( و كأن
شيئا لم يكن ) , الدنيا بتمطر و الناس عادي راكبه عربياتها و قاعده في شغلها , المطر
هنا ملوش هيبه , ملوش ذكريات
.
و هنا الإجابه
, الذكريات , حبي للمطر بالشكل المبالغ فيه ده أو الشكل الجنوني مرتبط بالذكريات ,
مطر في بلدنا و قريتنا يعني الأرض الطينيه تتعجن في بعض , يعني توصل الجامع عشان تصلي
في ربع ساعه مع انه الجامع جنبك , يعني النور يقطع و الدنيا تبقى هدووووووء إلا من
نور البرق و صوت الرعد ( بحبهم جدا ) , يعني مطر هو الحاكم الأمر الناهي في المشهد
, له هيبه و حضور و ما علينا إلا إننا ننفذ تعليماته .
.
مطر يعني عيله
تتلم و تتدفى ببعض و حكاوي و حواديت و صوت بيضرب في الشبابيك الإزاز , مطر يعني حياه
تتوقف و ساقيه تبطل تلف عالفاضي و فيشة دماغ تتفصل و ميبقاش فيه غير الدفا و ملامح
الوشوش على نور لمبة جاز , مطر يعني منقد فخار و عليه شوية كوالح و براد شاي , و كوكب
الأرض نختزله في أوضه ملموم فيها شوية بني أدمين بيضحكو من قلبهم , مطر يعني بريك
, استراحه لالتقاط الأنفاس , مطر يعني رساله من ربنا بتقولك اهدى على نفسك شويه و شيل
فيشة العناء , أنا ماخلقتكش في الدنيا دي عشان تتربط طول عمرك في الساقيه .
......................................................................................................................
Mohamed
Hussein
4
ديسمبر 2018·
الواحد لما يحب
يدعي لحد بعد كده إن ربنا يرزقه بالبطانه الصالحه لازم يبقى يكمل الدعوه و يقول إن
البطانه دي ماتكونشي من النوع اللي بيترفع لفوق .
.............................................................................................................
Mohamed
Hussein
4
ديسمبر 2018·
إلى جميع الأشقاء
في فرنسا
.
هتشوفو الأيام
دي في الفيديوهات بتاعة المظاهرات و في القنوات الفضائيه عيال ماستحمّتش بقالها شهور
و لا حلقت دقنها من أيام جاك شيراك , و لابسين شبشب بصباع وبيتشعلقو في ميكروباصات
خط باريس ليون , حاولو تتوددو ليهم و تعملو معاهم علاقات و تاخدو أرقام موبايلاتهم
, عشان نفس العيال دي بعد كام شهر هتلاقوهم بقدرة قادر كده راكبين مرسيدس و بي إم و
عندهم شاليهات في مارسيليا و بيشتكو انهم مش لاقيين المارشميللو , و بكره الخسيس يقول
للأصيل تعالى اشتغل عندنا خدّام .
......................................................................................................
Mohamed
Hussein
3
ديسمبر 2018·
قصاقيص ورق
........... بهدوء شديد و بشوية تركيز
.
اللي حصل أخر عشره
خمستاشر سنه هو رجه كبيره جدا هزت و بتهز و هتهز العالم , من أول اللامؤاخذه الربيع
العربي لحد اللامؤاخذه برضه الربيع الأوروبي اللي شغال حاليا .
.
هات عقلك بقى و
كوباية شاي و حاول تفكر و تجاوب و ببساطه شديده.
الأحداث دي بتسلسلها
و باختياراتها لدول معينه هل ممكن تكون محض صدفه و رُب صدفه خيرٌ من ألف بتاع ؟ لا
غلط .
.
فيه حد خطط للمعجنه
؟ اه فيه .
مين ده ؟ ممكن
تسميها الماسونيه أو الصهيونيه العالميه , سميها أي اسم ياكشي تسميها جمالات على إسم
جدتها .
أيوه يطلعو مين
دول بقى ؟ يطلعو بالترتيب , بريطانيا , أمريكا , اسرائيل , و صبيانهم في كل منطقه
.
.
طب السبب للتخطيط
ايه ؟ اسباب كتير امنيه و اقتصاديه و منفلوطيه , ممكن تحطهم كلهم تحت بند واحد , إسمه
إحكام السيطره على العالم , انت عايز تفضل باستمرار التكتل الأكبر و الأقوى المسيطر
على كوكب الأرض .
.
نجحو ؟ أه نجحو
إلى حد كبير, و الحكايه مشيت معاهم زي السكينه في الحلاوه , و بعض المناطق شافو فيها
نتايج أبهرتهم هما شخصيا .
التخطيط ده تم
أول امبارح بالليل في ساعه عصاري ؟ لا ده تم من عشرات السنين
.
أدواتهم ايه ؟
قصاقيص ورق يا مولانا , و نظريات العقل و المنطق و أله حاسبه من أم 30 جنيه , لا أكتر
ولا أقل .
.
يعني ايه ؟ يعني
انا عايز أسيطر عالكوكب ده مستقبلا لمدة 50 سنه و 500 سنه , يلزمني ايه ؟ حروب نظاميه
بشكل مباشر ؟ لا طبعا , دي خسايرها كارثيه و ممكن نتنفخ فيها .
.
خلاص نفكر بالعقل
, يلزمني في كل منطقه كلب يدين بالولاء ليا , الكلب ممكن يكون دوله أو حكومه أو مجموعة
أشخاص مؤثرين أو كيانات و تنظيمات بنتحكم فيها , و يلزمني اعلام قوي جدا , هصرف عليه
مليارات لأنه الأصل , الأصل اللي هيصور للناس الفيل على انه فار و الفار على انه فيل
, و السحليه يخليها تمساح و التمساح يبقى سحليه , حسب ماحنا عايزين .
.
يلزمني كمان شوية
مراكز حقوق انسان نعرف نساوم بيها و نبتز و نطلع تقارير تخدمنا وقت مانحب .
و يلزمني كل حاجه
في المنطقه المستهدفه , بمعنى , حالة الناس الاقتصاديه تهمني , لو فقرا يبقى قشطه هنلعب
على وتر فقرهم , لو جهل ؟ حلو اوي هيفيدونا , لو عندهم رئيس فاسد و حكومات فاشيه ؟
يبقى عز الطلب , كلها اسلحه و ذرائع هنستخدمها .
.
نوصل لإيه في النهايه
؟ نوصل لغايتنا , كوكب الأرض نشكله زي ماحنا عايزين , واللي غير قابل للتشكيل يمشي
عالصراط المستقيم بتاعنا , فكّر مجرد تفكير انه يروح يمين أو شمال نقرصه قرصه من ودنه
, اوراقنا و عدتنا و بؤجتنا جاهزه , و قابل معازيمك بقى يا معلم و قعدهم ( ده لو عرفت
تقعدهم ).
.
طب التنظيم ده
هينجح و يستمر بنفس قوته ؟ توقعي إنه لا , لانه قايم في الأساس على فكرة الخداع , مش
فكرة انه جبار و بيمشي عالحيط , هو مخادع ذكي أو ممكن تقول ساحر , بمجرد مابتنكشف ألاعيبه
بيفقد 90 % من قوته .
.
النقطه التانيه
إنه التنظيم ده أضعف من تحمل نتائج الخراب و ال damage اللي اتسبب فيها , وارد جدا ينقلب السحر على الساحر
, و وارد جدا انه يكون بنفس الأسلوب و الطريقه , يعني بألاعيب سحره جدد .
.................................................................................................................
Mohamed
Hussein
3
ديسمبر 2018·
لسه شايف فيديو
حالا للشرطه الفرنسيه و هي بتتعامل مع متظاهر فرنسي بكل الحب , و كل المعامله الأدميه
الراقيه , الواد اتزنق جنب سور و نزلو فيه حب و معامله أدميه راقيه لحد ما عدموه العافيه
, فيه حتة معامله راقيه جت في عينه و مش هيشوف بعد كده غالبا , و كبشة حب كبيره هتعمل
له مجموعة عاهات مستديمه , ده طبعا لو عاش .
.
الحب و المعامله
الأدميه الراقيه بتاعة الشرطه في أوروبا هي رد الفعل الطبيعي و المنطقي للتحضر بتاع
المواطن الأوروبي , أكيد شوفتو المواطن الاوروبي المتحضر و هو بيحرق عربيات الشرطه
و عربيات الإسعاف و المتاحف و بيسرق المحلات بمنتهى التحضر , و الله تلاقيكو شوفتو
الحاجات دي بس هتنكرو
.........................................................................................................
Mohamed
Hussein
3
ديسمبر 2018·
اضحك مع الدوري
الإنجليزي
.
النهارده كان ماتش
ممكن ينزل في غرائب و طرائف و مواقف و عجائب .
.
ليفربول بيلاعب
ايفرتون , ليفربول اللي بيعلب فيه ابننا محمد صلاح و بينافس على قمة الدوري الإنجليزي
, بيحتل المركز التاني بعد مانشستر سيتي اللي بيدربه جوارديولا , الراجل الكافر ده
اللي مابيتغلبش ولا يتعادل غير مره كل سنتين تلاته
.
الماتش في ملعب
أنفيلد بتاع ليفربول , وطول الماتش معركة تكسير عظام عشان المستويين قريبين اوي من
بعض , مدرب ليفربول خرّج صلاح و فرمينيو في الأخر و بقى يهبل و زي ماتيجي .
.
شوف المشهد الاخير,
النتيجه استمرت تعادل 0/0 و الحكم حسب 4 دقايق وقت ضايع و الفرقتين كانو تعبو و جابو
جاز و ارتضو بالتعادل و خلاص , مع ان ليفربول في عرض كل نقطه .
.
في الدقيقه 94
يا مؤمن , فاول عند منطقة جزاء ليفربول , طلع الحارس باصاها للمدافع , المدافع شاطها
لقدام , وصلت منطقة جزاء ايفرتون , مدافع ايفرتون طلع الكوره براسه , طلعت بره منطقه
جزائهم و وصلت لمدافع تاني من ليفربول , المدافع التاني شاط الكوره قامت قلشت منه و
طلعت فوق فوق في السما , و رجع بسرعه جري بعد الكره الألشه دي( وهو ندمان ) , الكوره
لما طلعت فوق في السما كانت ضعيفه مش قويه , قامت نزلت على القائم بتاع مرمى ايفرتون
, خبطت في القائم و كانت هتطلع أوت على جنب , الحارس بتاع ايفرتون بقى ( على فكره ده
احسن حارس في الدوري الانجليزي و تقريبا في العالم ) عمل ايه ؟ حب انه يجوّد من عنده
, الكوره كانت هتضرب في العارضه و تطلع اوت على جنب , قال لا يمسكها قبل ماتطلع اوت
, جه يمسكها قام مرجعها ناحية المرمى تاني , قام واد من ليفربول جابها جون بدماغه
, لقاها قدامه .
.
الواد بقى اللي
جاب الجون ده اصلا اصلا أول مره يلعب مع ليفربول و محدش عارف اسمه , يمكن حتى لاعبي
ليفربول مايعرفوش مين ده و جاي مع مين .
.
مدرب ليفربول نزل
يجري في الملعب زي المخابيل و يحضن كل واحد يقابله مع ان الماتش لسه ماخلصش , و الحمد
لله انه ماحضنش حامل الرايه ( لأنها كانت بنت ) , و كده يبقى الواد اللي جاب الجون
ده و محدش يعرف اسمه جاب اغلى 3 نقط لليفربول .
.
الدروس المستفاده
, هما 3 دروس , ماتفقدش الأمل ان فريقك يفوز لحد اخر ثانيه ( خصوصا لما يكون فريقك
بيلبس أحمر ), مش مهم تكون احسن واحد في الفريق عشان تفرق معاه ( بتيجي مع العور طابات
) , و أخيرا مش شرط تكون تستاهل الفوز عشان تفوز أو زي ماقال الحكيم الهندي قديما
( اللي امه بتدعي له , أحسن من اللي امه بتدي له ) .
.............................................................................................................
Mohamed
Hussein
2
ديسمبر 2018·
من غير مقارنات
ولا حاجه .
.
فرنسا بجلالة قدرها
بتتشألب و تتخبط بسبب 75 ألف متظاهر بيتظاهرو في أماكن و مدن محدده , و عندهم شعب مثقف
و متحضر و واعي و مستحمي و بيبرق و عندهم كمان جهاز شرطه يا طوله يا عرضه و أحدث الأجهزه
و المعدات و الكاميرات و الحبشتكانات .
.
من سنين و انا
بقول لحضراتكو , لما خمستاشر عشرين مليون ينزلو شوارع مصر من فوقها لتحتها , نصهم عالأقل
مايعرفش يعني ايه ثوره ولا يعني ايه تظاهر ولا يعرف الألف من كوز الدره , و يبقى مدسوس
وسطهم ألاف الإرهابيين و البلطجيه في بلد مساحتها مليون كيلو متر مربع , و ييجي مسلحين
و مرتزقه من دول جنبنا و أنفاق ملهاش عدد و جبهه غربيه مفتوحه طولها 1200 كيلو كلهم
صحرا و بتأمنها من طرف واحد , و مؤامره بيتصرف عليها عشرات المليارات و متخطط لها من
20 سنه , و قنوات فضائيه مفتوحه 24 ساعه لنقل الحدث , و رئيس أكبر دوله في العالم يطلع
عالهوا كل 5 دقايق كأنه مفيش وراه غيرنا , و يبقى عندك ملايين من شمامي الكوله اللي
قاعدين في قعر البرطمان من تحت , بتوع الشعارات و الفلايات , و عندك اقتصاد أصلا بيكح
تراب و الناس بتكمل عشاها مايه .
.
الظروف و المعطيات
و الحيثيات اللي فوق دي هي حضرتك كفيله باسقاط قاره , مش دوله بس , لا دوله اسمها فرنسا
ولا حتى دوله اسمها أمريكا .
.
لما بنقول البلد
دي ربنا حافظها و حاميها , ببركة أهلها الطيبين ( اللي ماتوسخوش بالسياسه ) و بجيشها
و شرطتها و تضحياتهم يبقى لازم الناس تصدق .
.................................................................................................................
Mohamed
Hussein
2
ديسمبر 2018·
رابطة المدافعين
عن ( أقراص الجلّه الناشفه )
.
صباح الخير
- ظاهره غريبه
جدا ظهرت فينا و وسطينا , تحديدا بعد 2011 , الناس اتهطلت أقسم بالله , وبقى فيه شله
كده تدافع عن أي حاجه و أي حدث و أي موقف و أي حد و أي حاله و أي حته .
.
يعني مثلا مثلا
- لو ظهر واحد
وقال العصر 3 ركعات مش 4 , هيلاقي شله بتدافع عنه , و بعدين تلاته حلوين أوي من باب
التجديد و التحديث و الحداثه و يعملو هاشتاج , ادعم العصر 3 ركعات .
.
- لو سحليه نتايه
اتحشرت في ماسورة صرف صحي هتلاقي اللي بيدافع عنها و عامل هاشتاج لانقاذها , خصوصا
انها نتايه , و إلا مايبقاش في قلوبنا شفقه ولا رحمه ولا رفق بالقوارير !! .
.
- لو عيل صايع
طلع قال ان ماية الجوزه بتعالج الإيدز و الكانسر و حب الشباب هيلاقي له شله تتغنى بفوايد
ماية الجوزه .
.
- لو عيل خو* قلع
ملط و صور نفسه و هو يتهاك , هيلاقي شله تدافع عنه و عن حريته في انه يتهاك , و على
رأسهم طبعا فنانا ( الجميل ) خالد ابو النجا .
.
- لو واحد كتب
و أقسم انه بيسوق عربيته و هو قاعد في شنطة العربيه لان الدركسيون جوه الشنطه هيلاقي
ناس بتأكد عن كلامه و بيدافعو عن مفهوم الدركسيون اللي في الشنطه .
.
- الإرهابي و القاتل
لقو اللي يدافع عنهم و يعمل لهم هاشتاج وقضيه , و الخاين و المنحط و الهربان من بلده
عشان يهاجمها لقى برضه اللي يدافع عنه .
.
- بالمثل , فستان
رانيا يوسف لقى اللي يدافع عنه , مع اني أبصم بالعشره ان كلهم بلا استثناء شافو الفستان
ده بشكل واحد فقط , انه مقرف و مقزز , مقزز و مقرف, لا شافوه شياكه ولا تحضر ولا حتى
انه فستان مثير , هو مقرف و مقزز ملوش إسم تاني .
.
- يا اخي انا ممكن
أتفهم موقفك والله و أحترمك اكتر لو كنت فاضي و هايف و عندك أفلاس عقلي و عملت رابطة
المدافعين عن ( أقراص الجله الناشفه ) باعتبار إنها كانت مفيده زمان و بتستخدم كوقود
.
.
- طب بس أصل البرلمان
هيناقش موضوع الفستان و المحامي الفلاني رفع قضيه !! , والله سيادتك عضو البرلمان اللي
طلب كده هو الهايف التافه سعيد حساسين اللي باع الوهم لملايين البسطاء و عالجهم بالكسبره
و منقوع الجلاوين , و عمل من وراهم ملايين متلته و بقى اسمه اعلامي و عضو برلمان ,
ماهو النصاب يلزمه جاهل .
.
- و المحامي اللي
عمل كده هو المحامي اللي قاعد بالجلابيه البيضا في مندرة بيتهم و فاضي لكل هايفه يتصدر
فيها , أنا شخصيا اشوف الاتنين لابسين نفس فستان رانيا يوسف , يعني المنظر المقرف و
المقزز هو هو , و الغرض واحد , هي طلعت بالشكل ده عشان تدور على فضيحه تشهرها و هما
بيدورو على فضيحه تشهرهم , مانا قلت لك نفس الفستان لابسينه و التلاته مبينين اللامؤاخذه
.
...........................................................................................................
Mohamed
Hussein
1
ديسمبر 2018·
إتجوز اللي لمّا
تلاقي فريقك المفضل اتغلب تطبطب عليك و تقولك معلش , ولما يغلب تعمل فرح و بوليله و
تحسسك انها منبهره بأداء الفريق مع إنها أصلا ماتعرفشي الفاول من الأوفسايد و فاهمه
ان كابونجو و كاسونجو اتنين أفارقه بيلعبو في الزمالك و فيهم شبه كبير من بعض .
.................................................................................................................
Mohamed
Hussein
1
ديسمبر 2018·
الأستاذه الدكتوره
رانيا يوسف
.
أستاذتنا الدكتوره
رانيا يوسف بتمارس اللي بيمارسه كتير من المصريين المفلسين عديمي المنفعه , بتمارس
الشرح و التنظير , بتعلّمنا عشان احنا بهايم و محتاجين اللي يعلمنا , و بتقولك يا سيدي
إشمعنى تنبهرو بكيم كاردشيان و جينفير لوبيز و تيجو عندي و تتكلمو ,هي المصريه أقل
منهم في ايه ؟ و ليه ندفن راسنا في الرمل ؟! .
.
لا يا فنانه يا
عظيمه ياللي انا مش عارف لك دور ولا بطوله عشان اعرف اصلا انتو بتروحو المهرجانات دي
ليه و مين بيعزمكو بالظبط ؟!! المصريه حفيدة كليوباترا و شجرة الدر و نفرتيتي و فاتن
حمامه و أم كلثوم و سميره موسى مش أقل من دول , و مش محتاجه تثبت انها احسن منهم بطريقة
تصدير المؤخره للكاميرات , الرخص ده مش عظمه ولا تحضر ولا فن ولا ابداع ولا أي بطيخ
.
................
بصو بقى , الحكايه
هقولهالكو عشان ماتتخضوش و عشان ماندفنشي راسنا في الرمل زي ماقالت عالمة الذره رانيا
يوسف , الحكايه و مافيها ان المفلسين بيدورو دايما على مسمى يتحطو تحته , و يمارسو
علينا التنظير من خلال المسمى ده .
.
- لما اتكلمنا
عن النقاب و جت ألاف الرسايل شتايم و تهديد , انا ببقى متأكد ان اغلبهم أصلا مابيركعهاش
ولا عمره دخل جامع , بس هو لازم يمارس التنظير عشان يتحط تحت عباية و مسمى التدين
.
.
- لما قولنا إن
خبر تصدير الكلاب مش حقيقي و لقيت ناس عامله هاشتاجات لا لتصدير القطط و الكلاب , برضه
أبصم لكو بالعشره إن اغلبهم مقاطع أمه و اخواته , يعني مابيمارسشي أصلا الرفق بالإنسان
قبل مايرفق بالحيوان , و اغلبهم لو داس قطه في الشارع بعربيته مش هيلاقي ضميره بيأنبه
ولو ثانيه , بس هي حلوه حكاية الرفق بالحيوان , مسمى جميل و عباية يمارسو من خلالها
التنظير .
.
لما بنتكلم عن
الملابس و الأشكال المبتذله الرخيصه , اللي بيلبسها عارف انه مبتذل و انه بيراود نوعيات
معينه من المنتجين لأغراض معينه , انما برضه لازم يمارس علينا التنظير .
.
الحكايه و مافيها
في كام كلمه , إفلاس فكري و عقلي , عبايه أو مسمى تتحط تحته , مارس بقى التنظير على
مخاليق ربنا , و في كل الحالات تقدر تسمينا بالقطيع , القطيع اللي مش متدين , القطيع
اللي مش متحضر , القطيع اللي مابيفهمش في الموضه , الميكروفون معاك يا مولانا المفلس
الصايع التافه الرائع الجميل المتدين المتحضر .
............................................................................................................
Mohamed
Hussein
1
ديسمبر 2018·
طول ما فيا نفس
مش هبطل أكتب و أحلم و أصرخ , مصر اللي جوايا عايزها مصريه , بحلم بيها مصريه , مصريه
و بس , لا أكتر ولا أقل , مصريه يعني من غير عبايه سوده و نقاب , و مصريه يعني من غير
فساتين مبتذله و منحطه , مصريه يعني مايتلعبش في هويتها و تاريخها و جيناتها تحت بند
التدين ولا تحت بند التحرر , مصريه يا بيه , مصريه يا هانم , مصريه يا بني أدمين ,
مصريه يا كوكب القرود .
........................................................................................................................
Mohamed
Hussein
30
نوفمبر 2018·
مستوى الأهلي و
الزمالك في البطوله العربيه مايختلفش كتير عن فستان رانيا يوسف في مهرجان القاهره السينمائي
الدولي ,كلها مشاهد أبيحه , أه و عهد الله.
......................................................................................................
ليست هناك تعليقات:
إرسال تعليق