Mohamed
Hussein
11
اكتوبر 2018·
من كام يوم كان
نتنياهو بيتكلم عن خسائر اسرائيل الفادحه في حرب 73 و انهم مش مستعدين يكررو الخساير
دي مره تانيه , وانهم لازم يكونو مستعدين تماما عشان مايخسروش بالشكل ده في المستقبل
.
.
والنهارده عبد
الفتاح السيسي بيتكلم عن نصر اكتوبر العظيم و برضه بيوجه خطابه للصهاينه و بيقول ان
خسائرهم في الحرب ضحايا و مصابين بالألاف , وانهم أكيد مش مستعدين يكررو التجربه دي
مره تانيه , و أكيد عارفين ان الجيش المصري اللي قدر يعملها مره هيقدر يعملها كل مره
.
.......................
.......................
الكلام اللي فوق
ده مهم أوي , في غاية الأهميه
.
- صيغة الكلام
تبان عاديه من الطرفين , انما هي مش عاديه .
- قادة الدول لما
بيجيبو سيرة حروب و خسائر و ضحايا مابيبقاش كلامهم اعتباطا.
.
- اللي حاصل و
اللي بين السطور بيقول إن المنطقه داخله على موجه تانيه من الاضطرابات , ممكن تكون
أخطر من اللي فاتت , تحالف مصر مع قبرص و اليونان , حقول الغاز في شرق المتوسط , ابتزاز
أمريكا للسعوديه ورفض السعوديه دفع الإتاوه للبلطجي , خطف جمال خاشقجي , الأزمه الاقتصاديه
في تركيا , و ليله طويله أوي سعادتك .
.
- شكل الإضطرابات
دي هيكون ايه و ازاي ؟ الحكايه ممكن توصل لمعجنه بالمعنى الحرفي أو حتى حرب عالميه
تالته .
.
- طب ايه علاقة
الكلام ده بخطاب السيسي و تصريحات نتنياهو ؟ بص يا مولانا , فيه اتنين قادة دول بيقولو
و يردو على بعض , واحد بيقول للتاني انا مش مستعد اخسر الخساير اللي خسرتها من 45 سنه,
ايه رأيك ؟ والتاني رد عليه وقاله وانا كمان ببني بلد ومش مستعد لمعركة تكسير عظام
بتاكل الأخضر و اليابس , يعني ايه ؟ يعني اتفاق ضمني أو بمعنى أصح اتفاق علني برسايل
واضحه , كل طرف بيحيد الطرف التاني عشان عارف قوته و خطورته .
.
معركتنا اللي جاية
معركة بناء بلد و دوله فيها 100 مليون بني أدم عايزين يعيشو عيشه كريمه , بنأمن ثرواتنا
و حقول الغاز و ندافع عنها بكل قوه و نعمل تحديث لجيشنا باستمرار و اقتصاديا وقفنا
على رجلينا الحمد لله , لكن مش هننجر لحروب مباشره أو حروب بالوكاله إلا في حالة واحده
بس , إن السعوديه تتعرض بأي شكل من الأشكال لاعتداء مباشر أو لأي خطر قادم ( بغض النظر
عن تصرفات السعوديه في السابق و خطيئتها الكبرى في سوريا و بغض النظر عن شوية تصريحات
صبيانيه ضد مصر في وقت من الأوقات ) .
...............................................................................................
Mohamed
Hussein
11
أكتوبر 2018·
صباح الخير
.
قناة الخنزيره
: المخابرات البريطانيه مقتنعه أن جمال خاشقجي مات بجرعة مخدرات زائده .
.
قناة مقملين :
جمال خاشقجي اتقتل و اتقطع 3 حتت و اتبعت في 3 طيارات لمصر و السعوديه و الإمارات
( و في رواية أخرى 15حتة ) .
.
غاده نجيب ( من
نعجات تركيا ) : خاشقجي اتنشر بمنشار ( و ليا واحد قريبي ساكن جنب السفاره السعوديه
سمع صوت ززززززز ( بتاع المنشار يعني ) .
.
قناة الخنزيره
تاني : الوفد الأمني السعودي اشترى شنط من السوق المصري في اسطنبول و دخل بيها السفاره
و ماخرجش بيها ( أكيد الشنط دي كان فيها كتيبة صاعقة مصريه و دباباتين و طيارة f16 صغيره ) .
........................
........................
بصو يا جدعان
,العرب زمان قالو ( البعره تدل على البعير ) , و السيناريوهات الحمضانه بتاعة بريطانيا
و أمريكا و كلابها في الشرق الأوسط ( الخنزيره و مقملين و تركيا و خرفان و نعجات الجماعه
) , والليله بتاعة خطيبته , و حكاية انه معاه جنسيه أمريكيه ( بالمناسبه كل ولاد الوسخه
الخونه الصيع بنكتشف في النهايه ان معاهم جنسيات أمريكيه أو بريطانيه بالصدفه البحته
) .
.
المهم , محدش في
مصر كان يسمع عن خشمندي ده ولا حد يعرفه , و السعوديه بالتأكيد مش شاغله بالها بواحد
صايع هربان فيه زيه كتير , و ولاد زايد مش فاضيين للأستاذ خشمونيوم ولا كان بيزلزل
أركان النظام ولا حاجه .
.
طيب تمام , كده
الليله دي خلصانه بالتالي , الشاب الإيطالي ريجيني , ضرب الطياره الروسيه في سينا
, ضرب طيارة مصر للطيران في باريس , قانون جاستا الأمريكي ( اللي مرمي في أدراج الكونجرس
) , اختفاء جمال خاشقجي .
.
ايه العامل المشترك
بين الحاجات اللي فوق دي ؟ المنفذ واحد , و الغايه هي هي , مخابرات أمريكا و بريطانيا
و الصهيونيه العالميه بيلعبو نفس اللعبه القذره المكرره بشكل ممل , خاشقجي بالنسبالهم
بقى كارت محروق ملهوش أي تلاتين لازمه , طيب يستفيدو منه بقى , ايه الفايده ؟ الفايده
دايما بتكون حاجه من اتنين , إما ضرب علاقات دولتين ببعض ( مصر و أيطاليا ..مصر و روسيا
..مصر و فرنسا ) أو مساومة دولة ما ( زي السعوديه في قصة جاستا و قصة خاشقجي )
.
يعني هي دي سياسات
المخابرات الأمريكيه البريطانيه ؟ لو دمك هيجيب لهم دولار هيصفوه و يبيعوه في أزايز
؟ أيوه يا فندم بالظبط كده .
.
من كام يوم اتكعبلت
في تعليق لواحد من أشباه المثقفين اللي ربنا ابتلانا بيهم , تعليق من النوع المثير
للشفقه و الغثيان ( أمريكا و دول الغرب بترعى الحريات و العصافير الكناريا في العالم
ولولا مراكز حقوق الانسان اللي بتسيطر عليها الدول المتقدمه دي كان زمان المفكرين و
المثقفين في بلادنا المتخلفه مدهوسين تحت دبابات الأنظمه الفاشيه !! ) , ده لسه رأي
معاليه لحد النهارده في سياسات أمريكا و بريطانيا , أه و عهد الله زي مابقول لكو كده
.
.
اللهم أهلك الإرهابيين
بالشمامين و أشباه المثقفين و أخرجنا من بينهم سالمين .
..................................................................................................
Mohamed
Hussein
10
أكتوبر 2018·
شوفت يا حبيبي
اللي حصل ؟
- خير , حصل ايه
؟
.
مصيبه , كارثه
, مش عارف أجيبهالك إزاي و الله
- لا قول والنبي
, قول بسرعه .
.
هيعينو وزيره لمنع
الإنتحار , عشان الموضوع أصبح ظاهره مخيفه .
- يادي المصيبه
السوده , شكلنا قدام العالم هيبقى ايه دلوأتي ؟
.
انت عارف أصلا
الاحصائيه بتقول فيه كام حالة انتحار في السنه ؟
- لا مش عارف
, بس شكلها كده اكتر من 100 .
.
ياريت ياريت ,
دي الأرقام بتقول ان حالات الانتحار 4500 في السنه
- يا نهار مش فايت
, حسبنا الله ونعم الوكيل , طبعا ماهي الناس بتاكل من الزباله و محدش لاقي شغل و لا
حد عارف يتجوز , و الكبت و تكميم الأفواه و منع الحريات و اللي بيفتح بؤه بيترمي في
معتقلات السيسي , الناس معاها حق تنتحر .
.
سيسي مين يا حبيبي
؟
- قائد الإنقلاب
اللي بتطبلو له , ماهو السبب .
.
يا خرابي , انت
خدتني في الكلام و نسيت أقولك ان وزيرة الإنتحار اتعينت في بريطانيا وان الإحصائيه
عن حالات الانتحار في بريطانيا مش في مصر , وإن الحالات في مصر ماتجيش 1 على 1000 من
الرقم ده يا اهبل يابن الاهبل .
...........................................................................................................
Mohamed
Hussein
10
أكتوبر 2018·
صباح الخير
.
ماتخليش حد يعلى
عليك , طبيعة المرحله كده يا مولانا , لو اللي قدامك بيكلمك و هو شارب ماية جوزه عالريق
ابدأ كلامك معاه بعد ما تصطبح بسيجارة بانجو , مانا بقولك طبيعة المرحله بقى .
.
من امبارح و انا
عمال بفكر في سؤال , ماذا لو ( حلوة ماذا لو دي يا حاج محمد ؟ ) , ماذا لو ظهر جمال
خامنجي ولا خشندي ولا طشقندي ده اللي قناة مكملين قالت انه اتقتل و اتقطع شخرميت حتة
؟ ماذا لو مكانشي اتخطف من دوله اجنبيه ولا اتقتل ولا حاجه , ماذا لو ظهر في برنامج
تليفزيوني بعد يومين ولا اسبوعين ولا شهرين ؟ يا ترى خرفان قناة مقملين هيقولو ايه
لخرفانهم الصغيرين الكتاكيت و يبررو الحكاية دي ازاي ؟
.
و حيث ان الواحد
بيحب يساعد , فانا بعد تفكير عميق لقيت الحل , هو حل واحد مفيش غيره , حلقة كامله يعملها
معتز مطر او زوربح ده ولا اسمه ايه برضه و يبدأو بمقدمة ناريه ماتخرش المايه يقولو
فيها التالي :
.
(( قبل أيام قامت
الأجهزه الأمنيه القمعيه الفاشيه في مصر والإمارات والسعوديه باختطاف المناضل الفارس
جمال خشمندي و قتله و تقطيعة إلى اجزاء إربا إربا , و زيادة في فجرهم قامو بتقسيم جثته
بالتساوي بين الدول الثلاثه حتى يتفرق دمه بين القبائل , إلا أن البطل الخليفه رجب
طيب أردوغان لم يفقد الأمل , أرسل على الفور فريقا محترفا من رجال المخابرات التركيه
, استطاعو في ظرف أيام وجيزه أن يجمعو أجزاء جمال شخرمنجي من الدول الثلاثه رغم انهم
كانو يحتفظو بهذه الاجزاء في صناديق خشبيه مكتوب عليها ( سري للغايه ) .
.
استطاع رجال المخابرات
التركيه تجميع الأجزاء ( بما فيها الجادون اللي ماكناش بنلاقيه أبدا على غطا إزازة
الكاكولا ) , و عادو بها سراً على متن طائره خاصه إلى تركيا , و أثناء خروجهم من المطار
تصادف مرور موكب للرئيس الخليفه أردوغان , أوقف أرودغان موكبه و اقترب من سيارتهم و
أخرج من جيب البدله عروسه لعبه و ما إن ظهرت العروسه اللعبه حتى حصلت المعجزه , تجمعت
الاجزاء بتاعة خربشندي و عادت إليه الروح بفضل الله و بفضل حكمة و حنكة و عروسة أردوغان
, جن جنون رجال المخابرات التركيه و اقبلو على أردوغان لتقبيل يديه ولكنه رفض قائلا
, العفو يا ابني العفو .
..................................................................................................
Mohamed
Hussein
9
أكتوبر 2018·
و بس يا سيدي
, احنا بعتنا 3 طيارات خاصه لتركيا , فيهم مسئولين سعوديين , مسكو جمال خاشقجي جوه
السفاره السعوديه و قتلوه و قطّعوه 3 أجزاء , ماهو الخروف يابني لازم يبقى 3 أتلات
لما يتقطع , و جابو ميزان و وزنو عشان محدش يتظلم , و بعدين ال 3 طيارات رجعو , واحده
منهم جت على مصر و التانيه على السعوديه و التالته على الإمارات ( حتى يتفرق دمه بين
القبائل ) , كل طياره معاها نصيبها من الخروف ( بس مش عارف بصراحة مين اللي خد الفروه
) .
.
ده التحليل اللوذعي
بتاع الصايع ابن الصايع اللي بيشتغل في قناة مقملين , تخيل يا مؤمن إنه لولا 30 يونيو
كان زمان الخرفان دول اللي بيرضعو من صغرهم زباله وكدب و نطاعه و خيانه لسه بيحكمو
مصر لحد النهارده ؟ أه و عهد الله زي مابقولك كده .
...........................................................................................
Mohamed
Hussein
9
أكتوبر 2018·
مابين التفكير
و الهجص .
.
- أي دوله في الدنيا
بتقوم و ترتكز على عدد معين من الأعمده, و مش كل دوله زي التانيه , فيه أعمده بتكون
مشتركه بين الدول و أعمده خاصه بحكم التاريخ و الهويه و التركيبه و الجينات و خلافه
.
.
- الشعب و الجيش
و الشرطه و القضاء عمدان ثابته في كل دول العالم , بيزيد عليهم في مصر الأزهر و الكنيسه
المصريه , كيانات عملاقه تتفق أو تختلف معاها لكن باحترام , احترام لأهمية وجودها
, احترام لدورها و تاريخها , احترام لقوة تأثيرها في الداخل و الخارج .
.
- عبد الفتاح السيسي
في يونيو 2013 لما جاب شيخ الأزهر و بابا الكنيسه و هو بصفتة وزير الدفاع كان عارف
كويس جدا هو بيعمل ايه , كان خطاب في منتهى الأهميه و لحظه فارقه في تاريخ مصر ( حكم
الأوطان مش لعبه على فكره ) .
.
- دور الأزهر تراجع
كتير في اخر تلاتين سنه , دخلوه الخرفان و اعضاء الجماعه الارهابيه , ده صحيح , الازهر
محتاج تنضيف للمناهج و فلتره للبني أدمين , برضه صح , موضوع المناهج أعتقد بدأو فيه
( على استحياء ) , بس انا مش قلقان طالما فيه إراده سياسيه مؤمنه بضرورة التطوير والفلتره
.
.
- غياب المؤسستين
, الازهر و الكنيسه بيبقى غياب كارثي يا مولانا , عشان البديل كارثي , البديل يعني
العشوائيه التامه و فقدان السيطره ( ماتقارنش مصر بأي دوله , وماتهبدش و انت مدلدل
رجليك في ماية الترعه ) .
.
- كنت والحمد لله
من أوائل الناس اللي كتبت عن ضرورة تطوير و تحديث المناهج في الأزهر الشريف , و كنت
و الحمد لله من أوائل الناس اللي طالبت بأهمية تنقيح البخاري و صحيح مسلم , يافندم
أنا عايز منتج نهائي متراجع مليون مره , منتج يحترم العصر اللي عايشين فيه و التعايش
بين البشر , منتج مايكونشي فيه أي اصطدام بالعقل البشري , و نسيب حكاية السند و الرواه
و الضعيف و اللي واللي واللي كمراجع للباحثين و علماء الشريعه فقط , مش للمواطن العادي
اللي زي حالاتي.
.
بالظبط زي ما بنعمل
لحضرتك علبة دوا و نقولك خدها 3 مرات في اليوم , مش بنوجع دماغك بتركيبها الكيميائي
و مصدره فين و تفاعلات الأدويه مع بعض ايه و كلام كتير جدا مش هيفيدك , انت لك منتج
نهائي تستخدمه بأمان.
.
- أصدقائي الغاليين
اللي عقولهم أضيق من خرم الإبره , لما الستات تقلع في الشوارع ملط يبقى الازهر السبب
, و الإرهاب يبقى الأزهر السبب و النقاب يبقى الازهر السبب و حادثة قطر في باريس و
رز اتعجن عالبوتاجاز يبقى طبعا بسبب الأزهر , الحقيقه الحكايه دي ماسمهاش أبدا منهج
فكري , اسمها ( شقة فكري ) .
.
- كتبت عن الموضوع
ده ييجي 10 ألاف مره بعدد سنين مصر المحروسه و شرحت و اتناقشت مع أصدقاء كتير و اقتعو
وقتها و بعد ثواني بشوفهم واقفين بيهبدو نفس الهبد , لا جمله زادت ولا جمله قلت .
.
- أه بالمناسبه
لو لغينا الأزهر الشريف و معاهده فاحنا حضرتك مش هنوفر لمصر جنيه واحد عشان باختصار
نفس الطلبه هيتنقلو لمدارس حكوميه عاديه فعايزين مدارس و فصول و مدرسين و نفس التكلفه
بالجنيه و بالسحتوت , مانت أصلك ضليع في كل حاجه بما فيها الإقتصاد , ده شئ مفروغ منه
طبعا .
.
و بالمناسبه برضه
, اغلب الاخبار المتداوله عن الأزهر و على لسان شيخ الازهر هي كوميكس و فوتوشوب , فجميل
اوي انك تنشر خبر فوتوشوب و تضحك و تتريأ و تعمل عليه تحليل و شوربه و ملوخيه زيك زي
غيرك من شمامين الكوله .
.
انا عارف والله
ان مهاجمة الكيانات التاريخيه له شمخه حلوه و بيحسس الإنسان بوجوده و بأهميته في الحياه
و بدوره المؤثر في كوكب الأرض و المجموعه الشمسيه , معلش , حقكو عليا .
.........................................................................................................
Mohamed
Hussein
8
أكتوبر 2018·
حوار افتراضي تخيلي
.
وكيل النيابه
: بدنا تحكي كل شي تعرفه و نشيل هالغمامه من على عينيك
هشام عشماوي :
اه شيلو الغمامه دي وانا هحكي لكو كل حاجه بس بشرط .
.
وكيل النيابه
: ويش يكون هذا الشرط ؟
هشام عشماوي :
ماتسلموني أبدا للمخابرات المصريه , أبدا أبدا , ده شرطي الوحيد
.
وكيل النيابه
: يا عسكري بنهاوي , تعالى يابني شيل الهبابه اللي على عينيه دي و هات له كوباية مايه
يشرب و يبلع ريقه , عشان لسه قدامنا سهره صبّاحي .
هشام عشماوي :
بنهاوي !! كوباية مايه !! سهره صباحي !! البتاعه !! , دانا ليلة أمي سوده باين .
.
وكيل النيابه
: نورت مصر يا إتش .
.....................................................................................................
Mohamed
Hussein
8
أكتوبر 2018·
كرنفال حقيقي اسمه
( القبض على هشام عشماوي ) .
.
- هشام عشماوي
كان ظابط في الجيش المصري , اتحول للأعمال الإداريه سنه 2000 بعد محاكمه عسكريه و اتفصل
من الخدمه سنة 2009 بعد محاكمة تانيه .
.
- لو هتقولي إيه
أهم 10 حاجات عملها جمال عبد الناصر ؟ هقولك من ضمنهم انه منع أعضاء الجماعه الإرهابيه
الرسميين من الإلتحاق بالجيش المصري العظيم , ده مايمنعش ان فيه عناصر اتسربت للجيش
في وقت من الأوقات أو عناصر تم استقطابها لكن في النهايه عددهم في الظباط مش هيزيد
عن صوابع الإيد الواحده , تخيل حضرتك تخيل مثلا لو كان جيش مصر اللي فيه عشرات الألاف
من الظباط منهم ألف ظابط بس منتمين للجماعه الارهابيه و الفكر الإرهابي؟ حرفيا كان
زمانا دلوأتي و عزة جلال الله بنصعب حتى على الصراصير و كلاب السكك .
.
- الجيش الليبي
أعلن القبض على الإرهابي هشام عشماوي في درنه , والمتحدث باسم الجيش الليبي قال ان
فيه تنسيق أمني مع مصر , و أنا قناعتي التامه ان العمليه كلها تمت بعلم و مشاركة المخابرات
المصريه و أفراد من عندنا .
.
- الجيش المصري
بيقدم كل الدعم للجيش الليبي من سنين والكلام ده معلن و رسمي , كل أشكال الدعم اللي
ممكن نتخيلها , عشان أمن مصر الغربي بيبدأ من حدود ليبيا مع الجزائر و يمكن أبعد من
كده .
.
- الإرهاب يا محترم
مش شوية بهاليل بدقون معاهم بنادق , الإرهابيين اللي أسقطو دول و خربو بلاد وراهم ترسانات
من الأسلحه و أجهزة مخابرات عالميه بتدعمهم و مليارات بتتصرف , عشان كده القبض على
عشماوي في رأيي هيكون حدث يساوي الصيده بتاعة جبل الحلال , الصيده اللي غيرت سياسات
دول بالكامل و غيرت توجهاتها الخارجيه .
.
- اللي زي هشام
عشماوي بقى مابيتعدمش حضرتك , النوع ده مش بنعدمه, بنقعّده معانا شهور و سنين و نعصره
ألف مره و حجم المعلومات و الأسرار اللي هنطلع بيها هيكون حجم مرعب لكل ولاد الحرام
اللي بره و اللي جوه , النوع ده بتساوم عليه و ممكن تعرضه في مزاد بعد ما يدخل الغسّاله
الاوتوماتيك و ينشف و يتفرد و يتكوي , النوع ده بيساوي باختصار مغارة علي بابا .
.
و يمكن ده السبب
كمان إن ولاد الحرام الصيع الخونه بتوع مراكز حقوق الإنسان ( الأمريكيه ) و بتوع القنوات
و الجرايد التركيه و القطريه و البريطانيه هتلاقيهم بيلطمو على وشهم دلوأتي و بيجيبو
تراب و يحطو على دماغهم , عشان هي شبكة واحده يا مولانا , شبكه واحده و توزيع أدوار
.
...............................................................................................................
Mohamed
Hussein
8
أكتوبر 2018·
البراح
.
ممكن حضرتك تكون
عايش في قصر كبير فيه بتاع 17 اوضه و 5 حمامات و عندك 11 سرير و مراتب كلها أمريكاني
واتنين تلاته شغالات , عايش في القصر ده انت و مراتك و عندك عيل واحد اسمه حماده .
.
بتصحى من النوم
انت و مراتك مخنوقين , دماغكو مش بتبطل تفكير , القصر خنيق أوي و ضيق عليكو , طب يا
ترى حماده لما يكبر هيعيش معانا و ياخد نص القصر مثلا ولا احنا محتاجين نجيب له قصر
جديد ؟ بتقومو من النوم ضهركو واجعكو و أخر النهار تضربو أدوية نفسيه و مهدئات و سيبرالكس
بسبب ( العيشه الخنيقه ) , حماده كبر شويه و بقى عمره 15سنه و بيتعمل له تشيك أب و
تشيك داون و تشيك إن كل شهر , كونسلتو من الاطباء و الحكما , و بياخد فيتامينات مستورده
و أوميجا 369 و الدكتور قال لازم ياكل كافيار كتير فبتبعتو تجيبو الكافيار بالطياره
مخصوص , بس حماده لو مسك كوباية ماية بتقع من ايده !!.
.
افتكرت و احنا
صغيرين , بيت بالطين مساحته ماتزيدش عن 100 متر , فيه حمام واحد و4 أوض , و فيه بدون
مبالغه أكتر من 20 طفل بأعمار مختلفه أولاد و بنات و 4 رجاله كبار و 4 زوجات , و سرير
نحاس في كل أوضه و حصيره جنب السرير , نمت 13 سنه من عمري عالحصيره , زي كل أطفال البيت
, بنتشعلق على شجر التوت من فوق عشان ناكل توت , محدش فينا ضهره وجعه , محدش في الرجاله
و الستات قال كلمة ( أووف ) , مفيش دكتور دخل بيتنا , محدش سمع عن الأدويه النفسيه
, مانعرفش الكافيار , اللحمه نفسها بنسمع عنها طشاش .
.
إزاي كبرنا ؟ إزاي
فرحنا ؟ إزاي ضحكنا ؟ إزاي نجحنا ؟ البراح ملوش علاقه بمساحة ولا عيشة لوكشورياس ولا
بإمكانيات ماديه و ظروف , البراح بيبدأ بالرضا , و الصحه النفسيه و الجسديه بتبدأ بالقناعه
و القلوب الصافيه .
.
أول تحليل و أهم
تحليل لازم تعمله لأولادك هو تحليل الرضا مش الهيموجلوبين وتبقى حريص جدا ان مستواه
يكون مرتفع في الدم , و أول درس لازم تعلمه لهم قبل الإنجليش و الماث و البايولوجي
و دورة كربس اسمه درس القناعه , غير كده صدقني , كله شكليات .
.........................................................................................................
Mohamed
Hussein
7 أكتوبر 2018·
شوفت حضرتك صور
المذيعه اللي قدمت برنامج تلفزيوني وصدرها لامؤاخذه عريان شويتين تلاته ؟
- أه يابني شوفتها
كتير , قصدي لمحت صورتها من بعيد كده و انا ماشي في التايم لاين .
.
أهي اتحولت للتحقيق
بسبب لبسها ده , عشان تتربي و تتعلم الأدب .
- أيوه مانا عرفت
برضه .
.
بس ايه رأي حضرتك
في الموضوع ؟
- والله بصراحة
ربنا يعني أنا شايف إنه موضوع حلو , حلو أوي .
.
هو ايه ده سيادتك
اللي حلو أوي ؟ تقصد إيه بالظبط ؟
- أقصد موضوع تحويلها
للتحقيق يا حيوان .
.........................................................................................................
Mohamed
Hussein
6
أكتوبر 2018·
أووووووووووه
, يعني السوبر المصري السعودي يبقى اسمه كأس فخامة الرئيس عبد الفتاح السيسي و نسيبه
يا جدعان ؟ مايصحش طبعا , انتو دارسين الكلام ده ؟ مانتو لو دارسين كنتو عرفتو اننا
مش هنسيبه .
...................................................................................................
Mohamed
Hussein
6
أكتوبر 2018·
إنتو ليه مش مصدقين
؟!
.
ليه مش مصدقين
ان الحكايه لا فيها بحث عن الحقيقه ولا بحث عن البطيخ ولا القصه قصة تاريخ مزيف ولا
تاريخ مناخيره 3 فتحات .
.
ليه مش مصدقين
إن هما هما , نفس الجهات , نفس الكيانات المنحطه , و بتروج لنفس الأفكار , ثورة 52
تبقى بشعه و ياااي و سوفاج , وأيام الإحتلال و الأتراك و الأنجليز كانت أحلى أيام
, أيام ماكانت الخدامه فرنسيه و صورة شارع في القاهره و هوبااا بقى , وسع و صلي عالنبي
, و البهايم بتبلع الطعم و تصدق و تردد في ثبات : الإستعمار التام أو الموت الزؤام
!! .
.
و هما هما اللي
بيروجو ان مصر مانتصرتش في 73 مع إننا حرفيا فشخنا الصهاينه ( و الأمريكان من وراهم
) و مع اننا حرفيا مانعرفش أكتر من 1 % من بطولات المصريين في 73 .
.
و هما هما اللي
دلوأتي و بعد خمسين سنه بيروجو و هيروجو لإن 30 يونيو كانت انقلاب عسكري و مفيش 25
مليون نزلو للشارع , دول هما 25 ألف و بعد كام سنه هيبقو 25 نفر ( اللعب في الصور و
الفيديوهات شغلانة الخنزيره و ال bbc
) .
.
و في 2040 تبقى
قاعد كده يا مؤمن لا بيك ولا عليك و تلاقي عيل برياله بيقولك يا جدو يا جدو انتو مخدوعين
و تاريخكو مزيف , محدش نزل في 30 يونيو و كل اللي نزلو 7 أنفار( من عبيد البياده )
, و تفتكر المشهد في ذهنك و انت محشور وسط ملايين المصريين في كل ميادين مصر و يبقى
قدامك حل من اتنين , ياتشيل الواد ده ترميه من البلكونه يا تقوم تضرب راسك في الحيطه
لحد ماتجيبها نصين ( اللي هو نفس شعور أبطال اكتوبر اللي لسه عايشين لحد النهارده ونفس
شعور أجدادنا اللي حضرو أيام الملك ( أيام ماكانت الخدامه فرنسيه !!) ومنهم اللي لسه
عايش لحد النهارده ) .
.
انتو ليه مش مصدقين
إن القصه هي هي , بتتكرر بشكل ممل , و إن المبدأ واحد , تتخلص من احتلال صهيوني زي
ماتتخلص من استعمار بريطاني تركي زي ما تتخلص من حكم جماعه ارهابيه , عشان التلاته
واحد يا مولانا , و عزة جلال الله التلاته واحد .
.
انتو ليه مش مصدقين
إن القصه و الحدوته بتقول التالي , أنا مش بدور عالحقيقه , أنا بس عايز تاريخك يبقى
مشوه , و رموزك الوطنيه خونه , و انتصاراتك هزايم , انا عايز أكسر جواك الوطنيه و حب
البلد دي و الأمل في بكره , أنا عايزك تموت و تتحلل عالكرسي بتاعك وانت قاعد من غير
ما تحارب ولا تزرع شجره , انا عايزك تبقى مجرد كائن بلاستيك له زرار و بمشيه بريموت
كنترول .
............................................................................................................
Mohamed
Hussein
5
أكتوبر 2018·
الحاره و الفتوه
و البلطجي الوهمي
.
من سنين طويله
أوي , ييجي 50 سنه و أكتر , كان فيه حاره فقيره معدمه , بتكح تراب , الحاره دي صحي
أهلها في يوم من الأيام و لقو عندهم كنز , دهب و لولي و مرجان , كنز مالوش أول من أخر
.
.
الفتوه النصّاب
عايش في بلاد بعيده , بس عرف بموضوع الكنز , قال لنفسه دي مصلحه و سبوبه زي الفل ,
تعمل ايه يا فتوه ؟ تتصرف ازاي يا فتوه ؟ قال أنا أروح لأهل الحاره دي و أقول لهم انا
جاي احميكو و عايز منكو إتاوه , بس هحميهم من ايه ؟ أيوه لقيتها , احميهم من البلطجي
اللي عايز يسرق الكنز بتاعهم و ياخد أرضهم و ياكل عيالهم الصغيرين .
.
بس البلطجي ده
مجرد نفخه كدابه , هو صحيح عنده جينات البلطجه قديمه و مترسخه , انما هو حاليا هيكل
عظمي لا بيهش ولا بينش , طب خلاص تاهت و لقيناها , احنا نصوّره في صورة البلطجي الجبار
المخيف اللي بيطلع نار من ودانه , و نقول لأهل الحاره هنحميكو , هاتو فلوس بقى , فلوس
كتير , ربع الكنز , ولا أقول لكو ؟ احنا عايزين نص الكنز ,ده بلطجي مرعب , شوفو عينيه
حمره ازاي ؟ .
.
و بالفعل الفتوه
نفذ خطته بمساعدة البلطجي الوهمي , وأهل الحاره الطيبين صدقو الملعوب , و فضلو يدفعو
و يدفعو و يدفعو , و كل مايدفعو أكتر الفتوه يطمع أكتر , لحد مادفعو له يا مؤمن فلوس
تكفي لبناء قاره , اه و عهد الله .
.
وبعد سنين طويله
, أهل الحاره كانو زهقو من الحكايه و الإبتزاز المتواصل , و لما لقو الفتوه بيبجّح
و يطلب الإتاوه عيني عينك و قدام الناس , قالو له لا خلاص , مش عايزين حمايتك يا عم
الفتوه و مالكش عندنا إتاوه, مممممممممممم يا ترى هيصدقو في كلامهم و هيقدرو ولّا من
شبّ على شئِ شاب عليه ؟!
.
و توته توته مافرغتش
الحدوته .
.
ملحوظه : هما
2 فتوات مش فتوه واحد , بس الأتنين أصحاب من سنين طويله أوي , واكلين شاربين سارقين
قاتلين مع بعض , و بيصونو اللقمه الحرام , بيتكلمو نفس اللغه و عندهم مراكز حقوق إنسان
و جمعيات أهليه و قانون جاستا و برلمانات و جرايد و هيئات و قنوات و حبشتكانات (عدة
الشغل ) .
........................................................................................................
Mohamed
Hussein
5
أكتوبر 2018·
السيد رئيس مركز
شرطة بندر مدينة ليون الفرنسيه
........ تحيه
طيبه و بعد , بونسوار يافندم
نحيط سيادتكم علما
بأن السيد رئيس مكتب الإنتربول الدولي ( هونجوي مينج ) قد اختفى و مش لاقيينه , أه
و عهد الله , هو وفردة الشراب البني بتاعتي .
, هذا للعلم و
اتخاذ اللازم .
.................................................................................................
ليست هناك تعليقات:
إرسال تعليق