Mohamed
Hussein
5
أكتوبر 2017·
في الورق بتاعهم
و دفاترهم و الخطه المرسومه , كان المفترض انك في 2017 مثلا تكون دولة منهكه بحرب أهليه
, و جيش رمى سلاحه , و ملايين القتلى و المشردين , و ميليشيات و مرتزقه كل شويه مسيطرين
على حته في مصر , و مستقبل بلدك بيحدده شوية صيّع و بلطجيه في غرفه مقفوله في سويسرا
مثلا !! .
.
بس اللي حصل إنك
في نفس التوقيت , 2017 , عندك بلد مستقره تماما , سياسيا و أمنيا , و جيش بقى أقوى
بمراحل , و بقيت بتحكم و تتحكّم , تشيل عصابه بتحكم قطاع من 11 سنه و تجيب حكومه فلسطينيه
تستلم القطاع , في إيدك مفاتيح الحل و الربط في ليبيا و بترعى اتفاقيات التهدئه في
سوريا , و بتجبر دول الخليج على مقاطعة الشاذ القطري .
.
الفقرتين اللي
فوق دول , و الفرق بين اللي كان مرسوم لك و متخطط لك و بين اللي حصل و النتيجه و الواقع
هو المعنى الحرفي لكلمة ( قلبنا الترابيزه ) , يابني انت كبير , كبير أوي , و أي حد
بيحاول يحطّك قدام مرايه تبان فيها انك صغير , إمسك المرايه و كسّرها على دماغه و دماغ
اللي خلفوه , من غير تنميه بشريه ولا حاجه .
..............................................................................................................
Mohamed
Hussein
5
أكتوبر 2017·
الجيل بتاعنا ده
ماحضرشي حرب اكتوبر , و أصلا اتولدنا بعد 73 , بس ربنا أكرمنا وحضرنا 2011 و ما بعدها
, حرب ماتقلّش خالص عن نصر اكتوبر العظيم , حاربنا بالصبر و بالقلم و بالألم و بالصمود
و بالوقوف في ضهر دولتنا و جيشها و خارجيتها و رجالة الأمن , و رئيسها الفارس المنقذ
.
.
حاربنا بالحروف
و الكلام و تفنيد الإشاعات و الشرح و المناهده , استحملنا شتايم و اهانات و خوض في
الأعراض و تهديد و سخافات , حاربنا بأعصابنا وراحتنا , حاربنا بلاد بتعادينا من بره
, و خرفان و شمامين كوله من جوه , كنا كلنا فرسان مقاتلين واقفين صف واحد في جبهة وطن
, عبد الودود اللي واقف عالحدود لو كان زهق و تعب و فرّط في سلاحه كان ممكن احنا كمان
نقول زهقنا و نبطل نكتب و نشرح و نبطّل نقف في ضهر بلدنا , حاربنا و انتصرنا و عبرنا
.
.
الصهاينه بيقولو
إن حرب اكتوبر حوّلت الجيش الإسرائيلي من جيش لا يُقهر لجيش تحت الإنشاء !! .
و نفس الصهاينه
بعد عشرين و تلاتين سنه هيشهدو و يعترفو بنصر الجيل بتاعنا ده في حروب الجيل الرابع
و في مخطط التقسيم و الخراب , ماحنا أصلنا مش ولاد حرام , احنا أبناء و بنات و أحفاد
الأبطال اللي شالو السلاح و عبرو القناه و رفعو العلم , أبويا الله يرحمه مكانشي شمّام
كوله ولا جدي كان خروف , و الحرب هي الحرب , بالقلم أو بالسيوف .
..................................................................................................................
Mohamed
Hussein
4
أكتوبر 2017·
قواعد اللعبه
, و الدرس المصري .
.
عندك مؤامره و
طوفان في المنطقه و خطة بدأت من سنين طويله و مشارك فيها ست سبع دول و بيتصرف عليها
عشرات المليارات , و بلدك نفسها في مقدمة الدول المستهدفه ؟ أه عندك .
.
عندك دوله على
حدودك الغربيه وقعت و جيشها اتدمر و ترسانة أسلحتها اتنهبت و بينك و بينها 1200 كيلو
متر حدود , كلهم صحرا ؟ أه عندك .
.
عندك دوله في الجنوب
بيحكمها خروف ضاني مستعد يعمل اي حاجه و يهبّل أي هبل لو اترماله شوية دولارات ؟ أه
عندك .
.
عندك عدو أزلي
في الشمال الشرقي هو المحرك للأحداث ؟ أه عندك .
.
عندك عصابة بتحكم
قطاع حدودي في الشمال الشرقي برضه بمباركة العدو الأزلي و بنفس عقلية جارك اللي بيحكم
في الجنوب ؟ أه عندك .
.
عندك جوه البلد
فساد متراكم و مشاكل و ملفات ياطولها يا عرضها , و حراميه و لصوص و مرتشين , بقو بيشكّلو
دولة كالجسد الواحد ؟ أه عندك .
.
و عندك جوه البلد
عشرات الألاف من أعضاء التنظيم الإرهابي الدولي , الأعضاء الرسميين , اللي دينهم و
وطنهم و هويتهم و عقيدتهم اسمها الجماعه الإرهابيه , و اللي كل واحد فيهم هو ارهابي
تحت الطلب , و حياته و بيته و شغله ممكن يتقلبو في لحظة لوكر أسلحه أو مخبأ لزمايله
الإرهابيين ؟ أه عندك .
.
و عندك شمامين
كوله و مراكيب , منهم اللي ممول و منهم اللي بيمارس الحموريه بالمجان و مستعد يسخر
من بلده و جيشها و تاريخها و يرفع علم أعداء بلده ؟ أه عندك .
.
و عندك شريحة مثقفين
و إعلاميين و صحفيين و بيزنطيين أغلبها مايتقلعشي من رجلك, إما انتهازي وصولي جاهل
, أو كلب يتباع بالفلوس ؟ أه عندك .
......................................
طيب تمام , تعمل
ايه انت بقى في حالة بالوصف ده ؟ تفتح النار على أمريكا و بريطانيا و تركيا واسرائيل
و قطر ( و كان معاهم دول الخليج ) و السودان و قطاع غزه ؟ يعني تحارب نص الكره الأرضيه
و انت عندك جبهه في الغرب مفتوحه و جبهه في الداخل خربانه ؟ يبقى الله يرحمك و يحسن
إليك و الفاتحه لروحك .
.
أومال تعمل ايه
؟ تعمل بالظبط بالظبط زي اللي عمله الرجاله دول , عبد الفتاح السيسي و سامح شكري و
صدقي صبحي , تفكيك مكعبات و تبقى السعوديه و الإمارات معاك في مقاطعة قطر , تقاطع قطر
تبقى قفلت حنفيه التمويل , تقفل حنفيه التمويل تلاقي عمر البشير قطع الكلام و النفس
, وحركة حماس بتقولك موافقين عاللي انتو عايزينه , و في نفس اللحظه و لحظة قفل حنفيه
التمويل يكون معاك أدله ماديه ملموسه على خيانه قطر و حركة حماس لكل ماهو عربي .
.
كده انت فككت المكعبات
, تقعد بقى عالكرسي و تسند ضهرك و تقول لحماس سلّمو القطاع للسلطه الفلسطينيه و اتصالحو
معاهم و مانشوفشي وشكو عالحدود , و تركز جهودك في الجبهه الغربيه و ترفض أي تدخل اجنبي
و تدعم الجيش الليبي بكل الطرق و تتعامل مع دولة الفساد بهدوء و بخطوات محسوبه , و
تعمل قانون تظاهر عشان الشارع يبقى بتاع الدوله , و تسيب للخرفان و شمامين الكوله الفيس
بوك و تويتر يهرتلو عليهم براحتهم و يعملو شألباظات و يشمو صوابع رجلين بعض , ده الدرس
المصري للعالم كله , درس تحت عنوان ( الفرق بين الفروسيه و الغشم ).
................................................................................................................
Mohamed
Hussein
4
أكتوبر 2017 ·
حلم المونديال
.
ياخي بنحب بلدنا
بجنون , بنحبها بغباوه , حتى في الكوره , لدرجة اننا اليومين دول مهتمين جدا بأخبار
منتخبات غانا و أوغندا و بماتشاتهم الوديه و أدق التفاصيل و مين اتصاب و مين هيلعب
, كلنا بقينا غانيين أكتر من أهل غانا نفسهم , و يوم السبت هنشجع منتخب غانا وندعي
ربنا إنه يفوز أو يتعادل مع أوغندا .
.
ليه بقى ؟ للي
مش متابع يعني أو بقاله سنه بيشرب سيجاره في البلكونه , لو غانا فازت يوم السبت أو
اتعادلت هيبقى احنا عندنا ماتش يوم الحد في ستاد برج العرب , هنلاعب الكونغو اللي هي
حصالة المجموعه و اللي مالهاش أمل ولا عمر و اللي فوزنا عليها في أرضها , يعني منطقي
جدا اننا نفوز عليها في برج العرب , و وقتها هنبقى اتأهلنا رسمي لكاس العالم , مونديال
روسيا , و نقيم الأفراح و الليالي الملاح و نغيظ مجدي عبد الغني , يارب من غير مقاطعه
.
.
#ماتقاطعش .
...................................................................................................................
Mohamed
Hussein
4
أكتوبر 2017·
لعبه حلوه بزمبلك
.
كل ما بشوف حمدين
صباحي بيتكلم في أي مؤتمر أو برنامج تلفزيوني أو على أي مصطبه , بتخيل دايما إني قدام
لعبه بزمبلك , تشغّل الزمبلك كده تلاقيه بيرص لك 20 جمله ورا بعض , و شبه بعض , فيهم
الكلام الكبير أوي المجعلص بتاع الحريه و الكرامه و العداله الإنسانيه و الخيانه و
الفاشيه و الخنوع و الخضوع و الركوع و كل الحاجات اللي أخرها حرف العين دي.
.
لو مصر حكمها السيسي
أو مبارك أو نيلسون مانديلا أو عمر بن الخطاب أو شارل ديجول أو مرعي بتاع الكليمه
, و جبت حمدين صبّاحي و قلت له اتكلم هيرص لك العشرين جمله , بنفس الحماس , و بنفس
رصّة المعلم , انا بس وقتها ببقى قاعد حاطط ايدي على قلبي و خايف إن الزمبلك يعطل و
يبوظ فجأه عند الجمله السابعه مثلا , هيبقى موقفنا إيه بقى قدام الأمم المتحده و دول
الكومنولث ؟! .
...............................................................................................................
Mohamed
Hussein
3
أكتوبر 2017·
تشاوش أوغلو وزير
خارجية تركيا : بعض دول المنطقه تعمل على تغيير السلطه الفلسطينيه و تنصيب دُمى تابعه
لها !!
.
أه فهمتك فهمتك
, تقصد صوابع خارجيه ؟ مممممممممم واضح ان الصوابع المصريه سمّعت جامد و وصلت لحد مؤخرة
النظام التركي , بالشفا يا حبايبي .
.
طب هقولك حاجه
يا اوغلو عشان أنا متخيل حجم المعاناه و ( الألم ) اللي انتو فيه دلوأتي , و إن صورة
أردوغان اللي كانت متعلقه في قطاع غزه بقى مكانها صفيحة الزباله , انت تعمل ايه بقى
؟ هقولك اهو , تجيب أردوغان خليفة الشواذ , و تجيب محمد ناصر و زوبع و معتز مطر و كل
الصيع اللي انت لاممهم عندك , و تطلعو عالهوا في أي قناه من قنوات الخرفان , تعملو
حفلة ( تأوهات ) جماعيه بدل ما كل واحد ب ( يتأوّه ) لوحده , و تعملو كمان مندبه و
تلطمو على وشكو و تجيبو طين و تحطو على دماغكو و تضربو بعض بالخناجر و السيوف زي احتفالات
الشيعه كده .
..............................................................................................................
Mohamed
Hussein
3
أكتوبر 2017·
-
مقاطعه مصريه و خليجيه لقطر بنت التيت ( و قفل حنفية التمويل )
- تقوم حماس تقبل
بالتنازل عن إدارة قطاع غزه و يسلموه للسلطه الفلسطينيه
- تقوم الحكومه
الفلسطينيه تقول حرس الرئاسه سينتشر على طول الحدود مع مصر
- يقوم اسماعيل
هنيه يقول هنكمل المصالحه مع حركة فتح في القاهره
.
ال 4 سطور اللي
فوق دول هما المعنى الحرفي للملوخيه لما بتيجي تحت المخرطه .
يبدو إن جبل الحلال
هيتعمل عنه كُتب و مجلدات , و رجالة مصر و حُرّاسها , ولاد الحلال في جبل الحلال .
...............................................................................................................
Mohamed
Hussein
3
أكتوبر 2017·
عبقرية مصر
.
أيوه اللي هي إزاي
يعني ؟
تعالى احكيلك الحدوته
من أولها , بقى كوكب الأرض ده يا مولانا عامل شبه قريه كبيره , فيها كذا حاره , منهم
حاره بائسه في نص القريه بالظبط اسمها الشرق الأوسط , و حارة بلطجيه في طرف من أطراف
القريه .
.
الحاره اللي في
النص فيها بيت كبير أوي اسمه بيت الحاجه بهيه , عندها عيال كتير أشكال و ألوان , وجذورها
و فروعها واصلين لقبل كتاب التاريخ بيومين , جنب بيت الحاجه بهيه فيه بيوت عاليمين
و الشمال , كام بيت من اللي عاليمين لقو كنز تحت بيوتهم , و عليها بدأت المعجنه , أصحاب
البيوت دي راحو لحد حارة البلطجيه و قالو لهم عايزينكو تحمونا , احمونا و النبي و خدو
اللي انتو عايزينه , أصل جارنا اللي عاليمين ده عايز ياكل دراع عيالنا الصغيره , البلطجيه
طبعا قالو حاضر من عنينا , و البلطجيه اصلا كانو من قبلها زرعو واحد بلطجي منهم على
طرف الحاره اللي في النص , و البلطجيه كمان اختارو واحد صايع شاذ من سكان الحاره ,
قالو له انت بتاعنا و هنخليك تكبر , و بدل مانت قد النمله هنخليك قد الفيل .
.
طيب ماطولشي عليكو
بدل ما تنامو مني , في أخر عشره عشرين سنه بدأ الفصل الأخير في المعجنه , البلطجي اللي
مزروع على طرف الحاره راسه وألف جزمه ان كل بيوت الحاره اللي حواليه تتهد و تخرب و
تتقسم و تتفتت , ساعده في كده الخواجات بتوع حارة البلطجيه و النمله اللي عايزه تبقى
فيل , الدنيا قلبت معجنه بالمعنى الحرفي , وفلوس الكنز اللي تحت البيوت استخدمها البلطجيه
في قتل و هدم بيوت جيران أصحاب الكنز و ولاد عمهم , ده شئ جميل خالص .
.
المهم و المحصله
ايه ؟ إفرد حجرك كده , خد و ماتقولشي لحد , المحصله ملايين القتلى و الجرحى و المشردين
و عزا في كل بيت من بيوت الحاره اللي في النص , الحاره المكلومه بأولادها أكتر ماهي
مكلومه بأعدائها البلطجيه .
.
و لما البيوت بتخرب
بتلاقي ناس بتتدخّل و تتحكم , مين الناس دي ؟ الناس دي هما البلطجيه و صبيانهم و محاسيبهم
و مخابيل الكنز , يعني لو بتستخدم فلوسك في حرق بيت جنبك هيبقى لك وجود فيه و ( كرسي
) , لو مسرّح جماعه ارهابيه و بتدعمها بالمال و السلاح في تخريب بيت تاني , وقت التفاوض
هيبقالك وجود و كرسي , لو عامل منظمات اسمها منظمات حقوق الانسان و صحف و قنوات عالميه
و بتستخدمها كورقة ضغط و مساومه و لوي دراع هيبقالك وجود و كرسي .....كل الأفعال القذره
اللي فاتت بتخلق لصاحب الفعل القذر وجود في القضيه .
.
طب فين عبقرية
مصر بقى ؟ عبقريه مصر ياسيدي , الحاجه بهيه , إنها مابتشتغلشي في الوساخه دي , لا عندها
فلوس بتصرفها على حرق البيوت اللي جنبها ولا ارهابيين بتسرّحهم لتخريب البيوت , ولا
مراكز حقوقيه و ميديا بتستخدمهم للإبتزاز , و مع ذلك , تلاقيها وقت الحل و الربط ,
لها الكرسي الرئيسي , تحكم و تقول و تقرّر , في قضايا كتير و ملفات ملتهبه .
.
بهيه مابتشتغلش
في الوساخه ( اللي الحمير عندنا بيسموها البراجماتيه ) , بهيه قويه بإسمها و تاريخها
و جيشها و مؤسساتها و دبلوماسيتها الخارجيه و مخابراتها و فنّها , و الأهم من ده كله
بهيه قويه بإيديها النضيفه و عنيها اللي مش مكسوره و مصداقيتها و عقلها اللي يوزن بلد
.
........................................................................................................
Mohamed
Hussein
2
أكتوبر 2017·
السعوديه بعد ما
خدت قرار بالسماح للمرأه بقيادة السياره و السماح للسيدات بحضور مباريات كرة القدم
في المدرجات , النهارده قررو إن القناه الثقافيه تذيع الحفلات الغنائيه , الكلام اللي
الناس ممكن تكون شايفاه بسيط هو مش بسيط , هو تغيير كبير بيحصل هناك , الحاجات دي كانت
من المحرمات تحريم الخمر , و ده معناه إن هيئة الأمر بالمعروف في طريقها للإنقراض
.
.
الجميل في الخبر
بتاع الحفلات الغنائيه , ان القناه الثقافيه السعوديه هتبدأ بحفلات أم كلثوم , ياخي
تتشال الدنيا و تتهبد و يمر سنين و عقود و قرون , و تفضل كوكب الشرق هي كوكب الشرق
.
.....................................................................................................
Mohamed
Hussein
2
أكتوبر 2017·
مقتل 50 شخص و
أكتر من 200 اصابه في هجوم على ملهى ليلي في لاس فيجاس .
.
طب فين بقى الشرطه
الأمريكيه الجبّاره اللي بتمشي عالحيط و بتعرف النمله دكر ولا نتايه من مجرد نظرة عنيها
أو شكل حواجبها ؟ وفين الأستاذ جاك باور بتاع مسلسل 24 ؟! دانا كنت بحس إنه دايما بيوصل
لموقع الجريمه قبل المجرم و قبل الإرهابي و قبل أجهزة مخابرات الدول التانيه و قبل
القنبله ماتنفجر بفيمتو ثانيه و قبل المخرج و قبل الممثلين كلهم و قبل الأكل 3 مرات
.
.............................................................................................................
Mohamed
Hussein
2
أكتوبر 2017·
من سنه و اتنين
و تلاته كنت هتلاقي في قطاع غزه لوحه طويله عريضه فيها الاتنين الشواذ الإرهابيين بتوع
الشرق الأوسط , أردوغان خليفة المثليين , و تميم اللي بيشعر بالوحده , اللوحه دي كانت
متعلّقه أيام السبوبه , لما يتحول قطاع يا طوله يا عرضه و قضيه اسمها القضيه الفلسطينيه
لمجرد سبوبه , أو تبقى لعبة بزمبلك , تحط فيها دولارات و ريالات من فوق , تغنّي لصاحب
الريالات و الدولارات و تقتل و تحرق عشان ترضي جنابه و معاليه .
.
النهارده صورة
عبد الفتاح السيسي متعلقه في القطاع ( مع إننا لا معانا ريالات ولا دولارات ) و مكتوب
بالبنط العريض ( تحيا مصر) , يابني الصياعه أدب مش هزر كتاف , و مصير اللامؤاخذه تجيبه
اللامؤاخذه بتاعته , و اهي جابته .
.
بالنسبه بقى لأصدقائي
الأعزاء اللي مش واثقين خالص في حركة حماس و فكرها الصهيوني , و متوجسين خيفه , حلوه
متوجسين خيفه دي يا حاج محمد ؟ عايز أقولك يا صديقي العزيز , انا و انت و الواد حوكشه
و الأبله اللي قاعده هناك ممكن نبصم بالعشره إن حركة حماس دي ماتتقلعش من رجلك , إنما
المؤكد و الأكيد ان السيسي و سامح شكري و صدقي صبحي يبصمو بالخمسين , و يعرفو قد اللي
نعرفه ألف مره , و ما خفي كان أنيل , فعايز أقولك , ماتقلقش , سيب الرجاله تشتغل و
تلعب و تنطّط القرود .
..........................................................................................................
Mohamed
Hussein
2
أكتوبر 2017·
واحد إرهابي طعن
سيدتين في محطة قطار في مارسيليا النهارده .
.
أكيد السبب في
تكوين شخصية الإرهابي دي هما الأزهر الشريف فرع مارسيليا و مجانية التعليم بتاعة جمال
عبد الناصر ..
.
يا عم الحاج ايه
علاقه عبد الناصر و الأزهر بمارسيليا , انت عايز تجنني ؟
- هو في الحقيقه
مفيش علاقه بس أنا عايز أبقى مثقف و عميق و سابقكو بمليون فدان , عشان كده لازم أحط
الأزهر و عبد الناصر في أي أجمله و أي حدث و أي موقف , بالك انت لو غسيل ست أم شوشو
جارتنا اللي فوق نقّط عالسجاده اللي احنا ناشرينها في البلكونه ؟ هقول الأزهر وعبد
الناصر هما السبب هما و الفاشيه التي تطل برأسها من غسق الدجى , حلوه غسق الدجى دي
يا حاج محمد ؟ .
........................................................................................................
Mohamed
Hussein
1
أكتوبر 2017·
مالقيتش أي مبرر
إني ماشجعش الأهلي النهارده عشان انا زملكاوي , لقيت الأهلي بيلعب في بطوله أفريقيه
و الزمالك مش موجود فيها , لقيت الأهلي بيلعب بإسم مصر , و لقيت المذيع و أي مذيع لما
بييجي يعلق عالماتشات دي بيقول مصر فازت بكذا بطوله منهم الأهلي كذا و الزمالك كذا
, يعني في النهايه فوز الأهلي بالبطوله هينضاف لرصيده و لرصيد بطولات البلد , ده بالمنطق
البسيط , و من غير جعلصه كلام , و بالتالي تشجيع الأهلي يبقى فرض عين على كل زملكاوي
و العكس صحيح .
.
النتيجه بتاعة
النهارده معقوله و مقبوله و ماتخضّش , فريق النجم الساحلي مش تقيل , يتغلب بسهوله في
برج العرب و يتعمل عليه حفله كمان .
.
أنا بس عندي ملاحظتين
,واحده قلتها قبل كده , وليد أزارو ده مقلب , و عبد الله السعيد مش عارف ايه قصته
, ماسك سيديهات على حسام البدري و هيكتور كوبر ؟ إسمه مكتوب في الدستور و احنا مش عارفين
؟ مايرتاح شويه و يقعد كام ماتش احتياطي لحد مايرجع لمستواه ده لو عرف يرجع .
...............................................................................................................
Mohamed
Hussein
1
أكتوبر 2017·
اللي عملته الحكومه
الأسبانيه النهارده و الأيام اللي فاتت في موضوع استفتاء انفصال إقليم كتالونيا , و
إن الحكومه الأسبانيه تقفل مراكز تصويت قبل عملية الإستفتاء و إن الشرطه الأسبانيه
تواجه المواطنين اللي نازلين للإستفتاء بعنف , اللي بيحصل ده حضرتك مش ضد الديموقراطيه
, الديموقراطيه مش هي البطيخه القارعه اللي محشوره في دماغ شوية صيع و تجار شعارات
و روبابيكيا , الديموقراطيه مش هي العروسه الأمريكاني البلاستيك اللي شكلها حلو و بتصدرهالنا
احنا .
.
المحافظه على وحدة
أراضي الدوله و منع تقسيمها هي ماده فوق فوق دستوريه , يعني الدساتير بديموقراطيتها
و حريتها و سلطاتها تبقى تحت أقدام و تحت جزمة هيبة الدوله و وحدة أراضيها .
.
أسبانيا عملت الصح
, عكس اللي عملته حكومة السكرتاريه العراقيه في استفتاء كردستان , ماينفعشي تكون فيه
فرصه لتقسيم دولتك و انت تقول ده حقهم الديموقراطي أو تستناهم ينفصلو و بعدين تقعد
تشجب و تستنكر و تعيط و تولول , في كلا الحالتين تبقى خاين لبلدك و خاين لمنصبك لو
كنت مسئول , مفهوم الدوله عمره ما كان بيعني إنها علبة جبنه نستو قابله للتقسيم لمثلثات
تحت داعي الديموقراطية و حرية الرأي , و كل واحد ياخد مثلث جبنه ويقعد على جنب
.
حاجتين مهمين أوي
كمان لازم الناس تعرفهم
- من حق أي دوله
في الدنيا تستخدم كل أدواتها و ألياتها , المسموحه ( و الغير مسموحه ) لمنع انفصال
أي جزء عنها , شعاراتك العبيطه بتاعة حرية الرأي و التعبير في الحاله دي تبرمها و تحطها
في التلاجه ( مشيها التلاجه ) .
.
- أي دعوه لانفصال
أي جزء من أي دوله في العالم لازم يكون وراها أطراف خارجيه بتدعمها , طرف واحد أو أكتر
, أطراف بنت كلب من مصلحتها ان دول العالم تتحول لشوية كانتونات ( و مثلثات جبنه )
, لا برضه , مفهومك عن كوكب الأرض إنه حد جميل اخر حماده و إن الأطراف بنت الكلب دي
بتاعة ورد و حقوق إنسان و عصافير كناريا , برضه مفهومك العبيط ده تبرمه و تحطه في نفس
التلاجه .
...........................................................................................................
Mohamed
Hussein
30
سبتمبر 2017·
نقطه و من أول
العقل
.
سؤال لإخواني في
الله المصريين المسلمين :
هو احنا المفروض
نحب مجدي يعقوب ولا نحب محمد بديع ؟
.
محمد بديع حافظ
كتاب الله و مقطع حصر الجامع , بس إرهابي قاتل و مرشد لجماعه إرهابيه إيديها غرقانه
في دم ولادنا و حاولت بكل قوتها إنها تحرق بلدنا .
.
و مجدي يعقوب طبيب
القلوب , اللي عالج و عمل عمليات جراحيه لقلوب مئات و ألاف الفقراء في الصعيد , بس
مجدي يعقوب مش حافظ القرأن الكريم ولا بيصلي معانا في الجامع .
.
نحب مين بقى ؟
سامعك ياض انت
ياللي بتقول المرء يُحشر مع من أحب , و عايز أقولك بالمناسبه السعيده دي و بنفس راضيه
مطمئنه , إلهي تتحشر في ماسورة مجاري يا بعيد , و يكون يوم عيد و أجازه و مانلاقيش
حد في الصرف الصحي ولا الدفاع المدني شغال , و لجل حظك الهباب يكون فيه فار ملظلظ كده
و مليان و صحته حلوه و ماشي في الماسوره , و يكون الفار ده دكر و بيعاني من الوحده
.
...............................................................................................................
Mohamed
Hussein
30
سبتمبر 2017·
علاء الأسواني
......... المرقعه هي الحل .
.
بنته عملت حادثه
بعربيتها , ضربت واد على موتوسيكل تقريبا , حادثه زي ألاف الحوادث اليوميه في حياتنا
, و طالما فيها اصابه و محضر يبقى فيها نيابه , مع شوية هري معتاد حلوين و مين هيتحمل
تكلفه العلاج و مين هيتحمل الإصلاح , لا انا ضربته لا ماضربتوش , هو اللي وقع لوحده
, العادي في أي حادثه يعني .
.
بس عند علاء الأسواني
الكلام ده مش عادي , لا ده عشان موقف ابوها المناضل السياسي الفشيخ , يبقى يلزمه شوية
تويتات , و التاتش الجميل اللي هو مايختلفش عن تاتش الإخوان , ويقولك النيابه قبضت
على بنتي في منتصف الليل , حلوه منتصف الليل دي يا حاج محمد ؟ زي قبضو على فلان و هو
بيصلي , قبضو على علان مع انه حافظ الكتاب الله , قبضو على ترتان و هو طالب في طب أو
هندسه , كلها شوية تاتشات بلح يعني فستك , شغل كربلائيات عبيط من بتاع الخرفان و شمامين
الكوله .
.
عزيزي الدكتور
علاء الأسواني
- صدقني و الله
انت مش مهم , مش مهم خالص , ولا حد بقى فاكرك , يعني مالكش أي تلاتين لازمه في الحياه
.
.
- الدوله بقى يا
دكتور الفاشيه القمعيه لما بتحب ترزّل على واحد عشان موقفه السياسي مش بتستدعي بنته
( في منتصف الليل ) و تحقق معاها في حادث سير , لا و الله , الدول الديكتاتوريه بتجيب
الشخص نفسه و تعلقّه على عمود نور في شارع عمومي وقت صلاة العصر , مالخيبه كمان لا
تكون فاهم ان اللي كان راكب الموتوسكل ده ظابط مخابرات أو عسكري امن مركزي و الدوله
الفاشيه ( رمته ) على بنتك عشان يجرحو مشاعرها و يرخمو على باباها المناضل الجبّار
اللي بيمشي عالحيط واللي بيهز عرش مصر و يزلزل استقرارها .
.
- أما حكاية انك
تترجم تويتاتك بالإنجليزي , عشان حبايبك و أسيادك و تاج راسك يقروها و يبقى لك قضيه
ف دي ملهاش غير تفسير واحد , هقوله بمنتهى الأدب , تفسيره إنك مجرد لامؤاخذه رينبوهي
متمرّس و ضليع جدا في قواعد النص الورّاني !! , أه و عهد الله , و برضه ملكش أي تلاتين
لازمه , ياكشي تترجم تويتاتك بالروسي و العبري و الألماني و الموزمبيقي و تبعت منها
نسخه لكوكب بلوتو
.
ماهو مش كل عيل
يجيله دور إسهال أو بنت خالته تتطلق أو يتكعبل في قشرة موز يبقى الدوله عملت فيه كده
عشان موقفه السياسي يا ولاد الوارمه .
..........................................................................................................
Mohamed
Hussein
30
سبتمبر 2017·
شقة حماده
.
عبد الفتاح السيسي
: عندنا 10 مليون وحده سكنيه غير مشغوله و فيه ناس عايشين في أوضه و حمام !! .
.
لا ياريس اسمح
لي بقى , ال 10 مليون وحده سكنيه دول يبقو باختصار اسمهم ( شقة حماده ) , مين حماده
يا ريس ؟ حماده هو طفل موجود في أغلب بيوتنا المصريه , إسمه محمد أو أحمد أو محمود
أو حتى عبد السميع , بس بندلّعه و نقوله يا حماده .
.
حماده لسه صغير
أوي , عمره سنتين أو بالكتير خمسه , بس باباه و مامته قررو انهم يشترو له شقه , عشان
يأمّنو مستقبله , و تفضل الشقه مقفوله كده لحد ما حماده يكبر و يتجوز , يعني ياريس
تفضل مقفوله لمدة 25 سنه , ربع قرن كامله , في انتظار حماده و عروسته , و ده طبعا على
اعتبار إن عبد السميع اللي هو حماده و هو صغير لما يكبر هيبقى حماده برضه !! .
.
طب خد التقيله
بقى ياريس , 10 مليون وحده سكنيه مش مشغوله , تبقى قيمتهم السوقيه كام ؟ نقول كام يعني
؟ نضرب في كام ؟ 200 ألف ؟ اعتقد ده أقل رقم , يعني عندنا وحدات سكنيه مقفوله بقيمة
2 تريليون جنيه , اه و عهد الله , مدخرات مصريين تحت بند ( شقة حماده ) .
.
احنا للأسف مش
دوله فقيره ولا شعب فقير , المشكله كلها ثقافه و قناعات و ترتيب أولويات و هاجس الخوف
, الموضوع محتاج برنامج شامل متكامل يديره ناس متخصصين و أساتذه علم نفس و علم اجتماع
, الموضوع موصّل على بعضه يا ريس , أصل الحدوته و ما فيها , إن حماده هيتعلم و ياخد
دروس خصوصيه بالشئ الفلاني و باباه هيجيب جاز لحد ما يكون حماده دخل الجامعه , حماده
هيدخل الجامعه و يبقى عندنا ( 4 مليون و 1 شهاده جامعيه ) , يتخرج حماده مايلاقيش شغل
في مجال تخصصه , يقوم يقعد عىلى قهوه أو يشتغل في مطعم او على توكتوك , و ده هاجس الخوف
اللي بيبدأ من بدري عند الأب و الأم ( المكلومين ) .
.
الحدوته و القصه
دي لها بدايه ياريس و لها حلول , بس عايزه حكومة حرب , الحلول بدون مواربه ولا مجامله
كالتالي :
.
- تجريم الدروس
الخصوصيه اللي بتستنزف 30 مليار جنيه سنويا عالأقل من جيوب المواطنين , تجريم ياريس
مش تحريم , ربع المبلغ ده ممكن ندفعه لوزارة التعليم و يتحول لمرتبات محترمه للمدرسين
, او نلغي التعليم خالص لو هتستمر حكاية الدروس الخصوصيه , البيوت مابقتشي قادره تتنفس
ولا الوشوش عارفه تضحك و مش هنضحك على نفسنا .
.
- عندنا 4 مليون
حاصل على شهاده جامعيه , عايز أقول لفظ أبيح , 4 مليون ليه ؟ تلتينهم عالأقل عاطل أو
بيشتغل في أي مجال غير دراسته , طب الدوله صرفت عليه ليه عشان يتعلم و ليه قبلت العدد
ده ؟ بنريّح الزبون ؟ و تقوم الدوله تشيل أوبح هي و الزبون , قصه عبيطه بنت ستين كلب
, لا فيها دراسة سوق و لا دراسة احتياج , عدد المقبولين في الجامعه لازم ينزل للربع
و الجامعات الخاصه تتقفل بالضبه و المفتاح , أصل المشرحه مش ناقصه قُتله , و ننشر ثقافة
ان التعليم الأساسي لحد تالته ثانوي بس , انا موافق ان بناتي لو مش متفوقين أوي مايدخلوش
جامعه , و عزة جلال الله موافق .
.
- كسر حاجز الخوف
عند الناس , أولياء أمور حماده , عشان يفتحو شققهم المقفوله و يعرضوها للإيجار أو للبيع
, و ينشغلو بتربية عبد السميع قصدي حماده عشان يبقى راجل و يعرف يعتمد على نفسه و يعمل
شقته بإيده , و لما نفتح شققنا المقفوله هيبقى المعروض كتير أوي و الايجارات هتنزل
و أسعار الشقق و الشباب يلاقي و يتجوز , اللي فوق ده ياريس تركة سنين طويله أوي , سنين
من سوء التخطيط و ندلّع الزبون و هاجس الخوف , عشان كده قلت لك محتاجه حكومة حرب .
............................................................................................................
Mohamed
Hussein
29
سبتمبر 2017·
بعد قرار السعوديه
بالسماح للمرأه بقيادة السياره , المملكه قررت الإستعانه بمدربات قياده من مصر و بعض
الدول العربيه
.
المدربه المصريه
: بصي يا حبيبتي , اهم 3 حاجات و انتي بتسوقي العربيه
الطالبه السعوديه
: أدري أدري و الله , الدركسيون و الجير ( الفتيس ) و البريك ( الفرامل ) .
.
المدربه المصريه
: لا غلط , اهم 3 حاجات هما التابليت يكون على رجلك مفتوح عالفيس بوك و علبة ماكياجك
في الشنطه جنب منك , و الموبايل في طرحتك
الطالبه السعوديه
: هلا !! , ويش أسوي ؟!
.
المدربه المصريه
: وانتي بتسخّني العربيه تفتحي صفحة الفيس عشان تتسلى في زحمة الطريق , و أي مكالمة
موبايل تعمليها وانتي سايقه عشان الملل برضه , و في الإشارات تستخدمي الروج بقى و الحاجات
دي .
الطالبه السعوديه
: و كيف أركز و أنا اقود السياره ؟
.
المدربه المصريه
: ماتركزيش , لو ركزتي هتتعبي .
الطالبه السعوديه
: و لو صديقتي أرسلت لي رساله عالفيس أرد عليها ؟
.
المدربه المصريه
: طبعا يا حبيبتي تردي عليها , بس هيحصل مشكله بسيطه
الطالبه السعوديه
: إيش بيصير ؟
.
المدربه المصريه
: انتي غالبا بعد ما تكتبي الرساله لما تيجي تدوسي إنتر هتتلخبطي و تدوسي بريك فجأه
, و انتي في نص الطريق و ماشيه على سرعة 100 كيلو
الطالبه السعوديه
: يا الله , و بعدين ؟
.
المدربه المصريه
: هتلاقي واحد رشق في عربيتك من ورا لأنك دوستي فرامل فجأه و غالبا الإكسدام بتاعه
باظ و الفوانيس و وش العربيه اتدمّر
الطالبه السعوديه
: إي صحيح بخرّب له الصّدام و السياره , بوقّف على جنب و انزل اعتذر منه و أقوله اني
كنت فاتحه الفيس بردّ على صديقتي و مادريت .
.
المدربه المصريه
: نعم ياختي !!! لا طبعا , انتي تنزلي تزعّقي , و تقولي له مش تفتح يا اعمى , يا غبي
, لما انت مابتعرفشي تسوق بتركب عربيه ليه
الطالبه السعوديه
: ويش بيقول ؟
.
المدربه المصريه
: هيقولك انتي اللي غلطانه يا أبله و وقفتي فجأه في نص الطريق , ماتسمعيش كلامه و قولي
له انت اللي مش محتفظ بالمسافه القانونيه بين العربيتين لأنك مش متعلم سواقه كويس ولا
بتفهم حاجه .
الطالبه السعوديه
: كام بتكون المسافه القانونيه بين السيارتين ؟
.
المدربه المصريه
: تسعه كيلو و 470 متر , دي معروفه في العالم كله .
...................................................................................................................
Mohamed
Hussein
29
سبتمبر 2017·
الحكومه دي لو
ذكيه و بتفكر بره الصندوق كان ممكن تحل الأزمه الإقتصاديه و تسدد ديون مصر في إسبوعين
, لو فرضت بس رسوم عالناس اللي بيدخلو الفيس و يقعدو يبعتو رسايل من النوعيه دي ( ربع
جنيه على كل رسالة أو حتى بريزه ) , النهارده يوم الأخ و انا اختارتك , 39 ثانيه هيغيرو
حياتك و يغيرو مجرى التاريخ , افتحها ولن تندم ( يا جدع عيب ) , ماتوقفهاش عندك , عاملين
حملة تسبيح و عايزينك تشبط معانا في المصلحه دي , الجمعه المباركه , التلات بتاع حمدين
, ماتقبلوش الواد اللي اسمه شيتوس ده هاكر و اللاب توب بتاعك هينفجر لو قبلته , انسخ
الرساله دي و ابعتها لمارك عشان من يوم الحد الجاي بعد صلاة العصر هيبقى الفيس بوك
بفلوس , انسخ الرساله دي عشان أم شوشو قالت لي ان خصوصية الفيس هتتلغي و لو مانسختهاش
يبقى خصوصيتك هتتلغي و هتبقى قاعد كده سالبوته عالفيس و الناس كلها شايفه رسايلك و
مناخيرك , النهارده اليوم العالمي للاحتفال ببنت الخاله , فلو كنت من النوع اللي كل
ما يتقفش مع واحده في شارع يقول دي بنت خالتي و جايبها من الدرس يبقى لازم تشاركنا
في الحمله و إلا تبقى أبله انشراح اللي في الدور الرابع هي اللي منعتك .
.................................................................................................................
أزال أحد مشرفي المدونة هذا التعليق.
ردحذف