Mohamed
Hussein
9
يونيو 2016·
قواعد العقل
.
- ربنا سبحانه
و تعالى أعظم من انه يجري ورانا بعصايه في الشارع عشان نعبده , و ربنا سبحانه و تعالى
ماقالشي لحد يجري ورانا بعصايه في الشارع .
.
- ربنا سبحانه
و تعالى مابيبعتش للشيخ و القسيس و الحاخام قايمه أو ملف إكسل بأسماء الناس اللي هيدخلو
الجنه و اللي هيدخلو النار .
.
- أصل الخلق و
الخليقه مش كده خالص , الأصل هو الإختيار و العقل و أعمالك و تصرفاتك , عشان في النهايه
هتشيل شيلتك مش شيلة حد تاني , و كل إنسان ألزمناه طائره في عنقه .
.
- الدوله الوحيده
اللي طبقت حكاية العصايه في الشارع هي الدوله الأكثر ممممممممممم , ما علينا .
.
- ماهو مش هينفع
تعيّن لكل بني أدم بني أدم زيه يشوفه بيصوم ولا لا , بيصلي ولا لا , أخر مره كلم أمه
امتى , بيعامل مراته ازاي , بيكدب ولا لا , بيهبب إيه عالفيس بوك , .... الخ , طب والرقيب
اللي متعين ده مين هيراقبه ؟!! .
.
- الفتوى بتاعة
دار الأفتاء اللي اتكلمت عن المجاهره بالإفطار في نهار رمضان هي فتوى غير ملزمه للدوله
( ممكن تكون نوع من التوجيه أو النصيحه للمسلمين ) , يعني الدوله المصريه عمرها في
تاريخها مانزّلت حد بعصايا في الشارع ولا كانت دقنها شبرين , وبرضه عمرها ماكانت بتُختزل
في صورة واحد عربيد ماسك ازازة خمره في ايده .
.
- الحاله الوحيده
اللي كانت الدوله المصريه هتوصل فيها لكده هي فترة حكم بهاليل الإخوان و السلفيين
, لما بدأو يطبقو الحدود بدراعهم من وجهة نظرهم , و ده كان سبب مهم جدا في الثوره عليهم
, السبب إن مصر مش كده ولا جيناتها بتقبل كده
.
- ماينفعش في كل
حاجه نحط الازهر في جمله مفيده , و نهجم عليه بغشم , الأزهر ده عمره ألف سنه , و الهبل
و البلاله بتوع التكفير و العصايه و اللي واللي عمرهم خمسين سبعين سنه من عمر الجماعه
الإرهابيه و مشايخ البترودولار , لو سمحت وجه أصابع الإتهام صح .
.
- الجماعه الإرهابيه
و مشايخ الوهابيه لقو لقمة عيش عندنا عشان مستوى الجهل و الأميه و ( الفقر ) سمحو بكده
, و استغلو حالة الضعف و الوهن اللي كان فيها الأزهر .
.
- مشايخ الجماعه
الإرهابيه و الوهابيه مكانوش هيحققو أي حاجه من غير الزبون , الزبون اللي هو احنا
, المتلقي , اللي عمل لهم سعر و قيمه , و بالتالي يبقى الخطوه الأولى في الحل هي باختصار
إن الزبون مايبقاش زبون , و مانحطش أبو قرش على أبو قرشين , و نصبر شويه عالدوله و
نساعدها في تنضيف تركة الخمسين سنه اللي فاتو .
..............................................................................................................................
Mohamed
Hussein
9
يونيو 2016·
النهارده الريس
عبد الفتاح السيسي وافق على زيادة المعاشات بنسبة 10 % من 01/07/2016 , الزياده هتشمل
9 مليون بني أدم , الغالبيه الساحقه منهم هما الغلابه و الأسر الأولى بالرعايه , و
التركيز على إن الحد الأدنى للمعاش إجمالا مايقلش عن 500 جنيه و الحد الأدنى للزياده
مايقلش عن 75 جنيه .
.
شمامين الكوله
و صفحاتهم هيكتبو الخبر ده ازاي ؟ ببساطه شديده هيتكتب كده , السيسي يعلن زيادة معاشات
العسكريين بنسبة 20% , زيادة معاشات القضاه بنسبة 30 % للمره السبعتاشر في شهرين ,
السيسي يقرر صرف مكافأه 75 % للقضاه بمناسبة إنهم بيصومو رمضان , مع ضحكه رقيعه و ابتسامه
سمجه و كوميكس بيض و لايك يا جدع و شير بعنف .
.
و هي دي كل الحدوته
, إن واحد يعيش سنتين تلاته متصله جوه مقلب زباله هيحصل له ايه ؟ هيحصل إن مناخيره
هتتعود على ريحة الزباله و تدمنها , بعد شوية هتتأقلم و مش هتعرف تشم غيرها , لو حضرتك
جيت فجأه و رشيت قدامه رشتين جيفينشي هيقول ايه القرف ده ؟ ايه الريحه المقرفه دي ؟
و طبعا قمة الكوارث بالنسبالك إنك تدخل عليه و في إيدك بوكيه ورد .
.
يعني ايه الكلام
ده ؟ يعني قبل ماحضرتك تحاول تتناقش مع صاحبك الكولجي افتكر التشبيه اللي فات واعرف
ان صاحبك مستمتع تماما و متأقلم و مندمج و متكيّف مع ريحة الزباله و ماتحاولش تقنعه
إن بره المقلب ده فيه نور ربنا و أمل و خير ولا تحاول تقنعه بريحة الورد , هتبقى دخلت
في معركة خسرانه .
..............................................................................................................
Mohamed
Hussein
9
يونيو 2016·
أيام الأفلام الأبيض
و إسود كانت الموضه في كل فيلم تقريبا لازم يكون فيه رقاصه , فقره تتحط في الفيلم للرقص
الشرقي , الرقاصه ممكن تكون حد من الأبطال أو ماتكونش , يعني تظهر في الرقصه و بس
, و الرقصه نفسها ممكن يكون لها لازمه أو مالهاش ( محشوره في الفيلم ) , إيشي سهير
زكي على نعيمة عاكف عالست تحيه , وانا بصراحه وكلام في سركو يعني كنت بحب رقص سهير
زكي ( و العياذ بالله )
.
قوم عشان احنا
شعب ( متدين بطبعه ) بطّلنا حكاية الرقاصه الفاجره الماجنه دي , بطّلناها تحديدا مع
بداية ظهور الوهابيه و السلفيه و البطاطس المقليه , ماهو عيب و مايصحش و كده , و بعد
2011 بدأنا في موضه جديده لانج , في الأفلام و المسلسلات , اسمها القتل , و احيانا
القتل يبقى مقترن بالحرق , و يا سلام بقى لما المؤلف و المخرج يتألقو و يكون المشهد
لعيل بيحرق ابوه و يقتله , أو أب بيقتل بنته !! .
.
شخصيا أتمنى نرجع
لأيام أبيض و إسود تاني ( أه يا مولانا و نرجّع الرقاصه ) , و بالنسبه للساده المخرجين
و المؤلفين و كتاب السيناريو بتوع اليومين دول , عايز أقولهم , الله يحرقكو ببرميلين
جاز من اللي طفحو في أرض العرب و في ساعة ( صفا ) زي اللي عشناها في أم الربيع العربي
, أشوفكو محروقين و المايه جنبكو مقطوعه بحق المشاهد اللي بتصوروها و تفرّجو عيالنا
عليها .
...........................................................................................................................
Mohamed
Hussein
8
يونيو 2016·
في العاصمه الإدارية
الجديده هيتم نقل 18 وزاره غير مبنى مجلس الوزرا و مبنى البرلمان , الكلام ده يخلص
خلال سنتين بحد أقصى .
.
بصو , نصيحه لكل
أصدقائي , اللي معاه أي فلوس محوّشها يروح يحجز بيها شقه في الحي السكني اللي في العاصمه
الجديده , التخطيط و الشكل و التقسيمه و الفكره والتنفيذ و المرافق اللي بتتعمل هيبقو
حاجه فوق الخيال , من الأخر كده احجز شقتك في 2016 و بعد سنتين هيبان الجزء الأكبر
من المشروع , سيب سنتين كمان و اضرب سعر شقتك في 5 عالأقل .
.
هبسّطهالك , عارف
دبي ؟ اللي مساحات الشقق فيها بتتحسب بالسنتيمتر مش بالمتر ؟ أهي شقتك هتتحسب بالشكل
ده في 2020 , و دعوة المصريين بعد 4 سنين عالفطار في رمضان هتكون : يارب نجّح بنتي
في الثانويه العامه وتجيب 99.9% و الواد ابني يتقبل في اختبارات الزمالك و ارزقني بشنطة
سامسونايت مليانه دولارات أو شقه 17 متر و 37 سم في العاصمه الإداريه الجديده .
.
بالنسبه لأصدقائي
التانيين بتوع ( الفنكوش ) هقول لهم نصيحه برضه , لو معاكو أي فلوس محوشينها حاولو
تحجزو بيها أكبر كميه ممكنه من علب الكوله , عشان هتحتاجو تشمو جرعات مضاعفه في الفتره
الجايه , و الكوله هتشح في السوق و بعد كده هتتباع بالشمّه .
....................................................................................................................
Mohamed
Hussein
8
يونيو 2016·
توقيف العشرات
في الجزائر بتهمة تسريب امتحانات الثانويه العامه و اعادة الإمتحانات لأكثر من 300
ألف طالب جزائري !! .
.
خُش في لحم اخوك
يا فواز , هي شوطه و طالت الوطن العربي تقريبا , و احتمال أشقائنا في الجزائر اللي
سرّبو الإمتحانات و نشروها يكونو استعانو بالخبرات المصريه , و بكره نلاقي في وطنا
العربي تخصص جديد , فلان الفلاني أستاذ متفرّغ في تسريب الإمتحانات و عضو المجلس الحلزوني
للغش الجماعي و أدمن صفحة ( غششني و نغنشني )
.
إنما سؤال بقى
, هما شمامين الكوله في الجزائر تعاطفو مع الناس اللي اتقبض عليها ( أغلبهم أدامن لصفحات
الغش ) و قالو انهم أبطال بيحاربو أنظمة التعليم الفاشله بطريقه مبتكره ولا لسه ؟!!
.
..........................................................................................................................
Mohamed
Hussein
7
يونيو 2016·
وانا في اعداديه
و رغم اني كنت خجول جدا و بخاف من المدرسين بس كانت بتجيلي نوبة عملقه غريبه وقت الإمتحانات
, في قلب اللجنه , المدرسين و المراقبين
( كعادة المدارس
اللي محدوفه في أخر الدنيا ) لازم ييجو أخر نص ساعه و يغششو الطلبه , اللي حصل اني
كنت بقف في قلب اللجنه و برفض الغش و بطلب من المدرس المحترم اللي جاي يغششنا انه يخرج
من اللجنه , الحكايه اتعرفت في مدرستنا , و بقى اللجنه اللي فيها محمد مفهاش غش .
.
الموضوع اتطور
و كعادة القرى الصغيره ان الناس كلها عارفه بعض , فبقي ييجي عندنا في البيت أولياء
أمور و مدرسين أخر النهار , يكلمو أبويا الله يرحمه أو يكلمو عمي ( الله يرحمه برضه
) , لو سمحتو محمد محبكها أوي , و عمي يقولي يابني انا فاهم انك صح بس مش عايزين مشاكل
, أقوم أقوله طب خلاص هتصرف و فكرت في حل , أنا رافض الغش كمبدأ , كحاله , مش هعرف
أقعد في مكان فيه غش , و كان الحل اللي هو مش حل ولا حاجه , إني أسيب اللجنه أخر نص
ساعه , أسلم ورقتي ( عشان انا بخلص بسرعه ) و أمشي , هما بقى يغششو الطلبه أو يحمّوهم
أو يركّبوهم مراجيح , مش مشكلتي .
و في الثانويه
الحمد لله كان فيه رجاله بتراقب و مفيش غش , و بالتالي ماكنتش مضطر أقف في قلب اللجنه
.
.
بنتي الحمد لله
طالعه متفوقه جدا , دايما من التلاته الأوائل عالمدرسه , لو ربنا قدرني و علمتها ان
الغش حرام و هتاخدي حق حد غيرك و ان الغشاش ده لما بيكبر غالبا بيكون فاسد أو فاشل
( أو كلاهما معا ) هبقى عملت اللي عليا .
و من رحمة ربنا
كمان إني ماعنديش عقدة و لا كولكيعة طب و صيدله , يعني يا بنتي اعملي اللي عليكي و
بس , مفيش ضغط ولا ستريس ولا هستريا الربع درجه , كفايه عليهم نظام التعليم العقيم
اللي بيقتل طفولتهم و يخنقها .
...................................................................................................................................
Mohamed
Hussein
7
يونيو 2016·
فرقة ( فيران
) الشوارع
.
فيران الشوارع
أو أطفال الشوارع , نوع جديد من الفن اللي طفح علينا من ماسورة الحريه اللي محبسها
ماتقفلش بقاله 5 سنين , الحدوته مش انك تكون غني او فقير , بتعرف تسرّح شعرك او مخاصم
المشط و الفرشه , بتستحمى أو عندك تار بايت مع المايه , انما التجميعه دي عبقرية بصراحه
, تجميعة 5 عيال مالقوش فرصتهم في شغلانة التبّاع على ميكروباصات السلام النهضه , فقررو
إنهم يعملو فرقه فنيه و كده .
.
فيران الشوارع
انكرو في الأول التهمه و قالو الكلام اللي في الفيديوهات مش بتاعنا و الصوت متركّب
و بعدين قالو لأ احنا بس احنا غرضنا السخريه مش التحريض ( يعني غرضنا شريف ) , إجمالا
مشكلتي مع العيال دول مش في شكلهم ولا ريحة بؤهم ( اللي ممكن تشمها في الفيديو ) و
لا في الكلام العبيط اللي بيقولوه و لا في حكايه انه تسليه و سخريه ولا حتى انه تحريض
.
.
مشكلتي باعتباري
بني أدم , و بيفهم شويه صغيره في الفن , مشكلتي ان العيال دول يعتبرو الهباب اللي بيقدموه
فن و يلاقو له جمهور, أكيد جمهور من الصراصير , صراصير بتتفرج على فيران و تتعاطف معاها
, هي مشكلة عامه طفحت علينا في السنين اللي فاتت , واد ينفع بالكتير أدمن لصفحه سكس
بقى يتقال عليه روائي و فنان و بطل و حرية الرأي , واد نزل بواقي ذكري و صور فيديو
بقى يتقال عليه فنان و عمل فني , و أخيرا شوية فيران طلعو من ماسوره و قررو يعملو فرقه
فنيه
.
مشكلتي بقت في
الوصول للحد الأدنى , الحد الأدنى للذوق , الحد الأدنى للجمال , الحد الأدنى للإبداع
, الحد الأدنى للفن , الحد الأدنى للأدميه , الحد الأدنى لأي حاجه
.................................... اللهم بلّغنا الحد الأدنى بحق جاه النبي و أهل
بيته قبل مامرارة اللي خلفوني تتفقع .
.....................................................................................................................................
Mohamed
Hussein
7
يونيو 2016·
العيال بتوع صفحات
تسريب امتحانات الثانويه بيعلنو إنهم هيسربو امتحان الإنجليزي بكره ( واثق الخطوة يمشي
ملكا ) !!.
و وزارة التعليم
بترد إنه لو امتحان الإنجليزي اتسرب هنلغيه , ( ممممممممم حليب قلبي من جوه و الله
, و تبقو تعملوه في وقت تاني في ساعة عصاري مثلا ؟! ) .
.
ياريس لو سمحت
, مستقبل أولادنا مش حقل تجارب لمعالي وزير التعليم , يعني ماينفعش الطالب يذاكر انجليزي
النهارده و امبارح و يفحت نفسه و يروح بكره مايلاقيش امتحان , الكلام ده ينفع في الدورات
الرمضانيه , فريق كده يروح يلعب ساعة عصاري و يسلّي صيامه يقوم يلاقي الفريق التاني
مجاش و الماتش اتلغى يقوم واخد الكوره و راجع أو يعملو تقسيمه .
.
لو المهزله دي
حصلت بكره فعلا و الإمتحان اتلغي يبقى ياريس مفيش قدامنا حل يشفي صدور الطلبه و أولياء
الأمور غير إقالة الوزير و تحويل كل المسئولين في الوزاره للتحقيق ( و محاكمه عسكريه
) و الجيش يتولى طباعة و توزيع باقي امتحانات الثانويه العامه , حتى لو وصل الأمر لتحويل
لجان الإمتحانات لثكنات عسكريه .
.
نصيبنا كده ياريس
و الحمد لله ان عندنا جيش بيعرف يشيل الليله في كل الأحوال , و بالنسبه للبهاليل اللي
كل شويه يسألو السؤال ده : هو ليه السيسي بيعتمد عالهيئة الهندسيه للقوات المسلحه في
كل مشاريعه و مابيعتمدش على القطاعات الحكوميه بتاعة الدوله ؟َ!! , يارب تكونو عرفتو
الإجابه و تبطلو تسألو .
...................................................................................................................................
Mohamed
Hussein
6
يونيو 2016·
أحيانا كده بيجيلي
إحساس إن رامز جلال كان جزء من خطة الفوضى الخلّاقه أو الشرق أوسط الجديد , كمية البيض
اللي عنده والسخافه و السماجه كافيه جدا لفقع مرارة شعوب بحالها , و الإصرار على ظهوره
كل سنه في رمضان بسماجته و سخافته ( و بيضه ) هو أصرار عالجريمه , يعني على طريقة
: اللي ماتفقعتش مرارته السنه اللي فاتت ولا اللي قبلها قدامه فرصه السنادي يا جدعان
.
.
هو رامز كان جزء
من الخطه فعلا ولّا احنا اللي ذوقنا اتعدم ؟ هي الكوميديا و الفن ماتو و لّا جالهم
عقد عمل في بلاد بره ؟ ولا جايز الحكايه تكون حالة عامه , عشان احنا عايشين بقالنا
5 سنين في مرحلة البيض الأعظم , بيض بإسم الثوره , بيض بإسم الصحافه , بيض بإسم الفن
, بيض بإسم الفكر اليساري , و أي عيل صايع ماشي في الشارع بقى من حقه يدخل بيوتنا
, يكاكي مرتين و يبيض على طول , و أحيانا يدخل يبيض من غير ما يكاكي , يعني من غير
مايقول إحم ولا دستور .
...............................................................................................................................
Mohamed
Hussein
5
يونيو 2016·
المتحدث الرسمي
باسم الحكومه البريطانيه في الشرق الأوسط قرر إنه يصوم بكره تضامنا مع الشعب السوري
!! .
.
أقذر مسئولين على
الإطلاق هما البريطانيين , اللي يقتلو القتيل و يصومو تضامنا معاه ,
و مش بعيد كمان
يومين تلاته نقرا خبر إن ديفيد كاميرون قرر إنه يعمل عُمره و يتعلّق في ستاير الكعبه
و يدعي للشعب العراقي , أو يعتكف في العشره الأواخر من رمضان تضامنا مع الشعب الليبي
!! .
.................................................................................................................
طول ما بلادنا
العربيه فيها خونه و شمامين كوله و شوية عيال لامؤاخذه بيتضامنو مع أي كلب جربان ماشي
في الشارع و يتعاطفو مع الإرهابي الكيوت و يتشحتفو من رقة و حنّية و أخلاق و جمال حلف
الناتو يبقى البريطانيين و أمثالهم هيلاقو لقمة عيش حلوه عندنا و ممكن بقلاوه .
...........................................................................................................................
Mohamed
Hussein
5
يونيو 2016·
أصدقائي التانيين
, بعد التحيه
.
داخلين على شهر
مفترج و الله و محتاجين المراره و الطحال و القولون و الحاجات دي عشان نعرف نصوم ,
انا أصلا بصوم رمضان بالعافيه .
.
بقى صلو عالنبي
عليه الصلاة و السلام , من أول زرع و حصد أهو , كالعاده يعني
.
عيل صايع عمل صفحه
لتسريب امتحانات الثانويه العامه و نشرها , طبعا مش هو المسرب الرئيسي , بس الموقف
هنا يكون ازاي ؟ أه يكون ازاي بقى ؟ , هحكي لكو حدوته :
.
... المعلم عبده
القمّاش بيتاجر في المخدرات , هو الراس الكبيره و البيج بورص , كويس كده ؟ طيب تمام
, المعلم عبده بيكسب ملايين و هو المجرم الرئيسي و غالبا تحت ايده كام واحد مساعدين
, لكن تجارة المخدرات كمان يلزمها شوية صبيان في الشارع اسمهم ( الديلر ) , ممكن يكون
منهم مثلا الواد حوده الديلر , حوده غالبا مايعرفش المعلم عبده القماش ولا عمره شافه
, حوده اتقبض عليه و هو بيوزع حشيش في مدينة نصر , يبقى موقفنا ايه من الواد حوده الديلر
؟! .
.
هل ينفع نسيب الواد
حوده باعتباره مجرد عيل و نركز في البحث عن المعلم الكبير عشان مانسمعش الجمله العبيطه
اللي هي دي ( سايبين الحمار و ماسكين في البردعه ) ؟!
.
انا و الله ما
عايز انفعل , بصو يا جدعان :
.
1- حوده الديلر
أو أدمن صفحة التسريبات ماسمهوش البردعه ولا اسمه العيل الصغير , اسمه مجرم ولازم يتحاكم
, اللي عمله جريمه مش وجهة نظر ( ولا لعب عيال ) , يعني لو سمحت حُط المسميات صح .
.
2- محاكمة الأدمن
و التحقيق معاه مش معناها اننا مش بندور عالمعلم الكبير , بالعكس , التحقيقات كمان
بتساعد في الوصول للراس الكبيره ( ممكن يكون طرف الخيط ) , يعني الأدمن مجرم و ممكن
يوصلنا للمجرم الأكبر , طبعا مع تحقيقات وزارة التعليم نفسها .
.
3- عبد الفتاح
السيسي مش بتاع التستر على مجرمين أو فاسدين , وزير الزراعه نزل من الوزاره عالبوكس
عدل , يعني ايه الكلام ده ؟ يعني أي مسئول مهما كان اسمه متورط هيتحاكم حتى لو كان
رئيس الوزرا بنفسه , التحقيقات هي اللي هتقول .
.
4- بلاش تعيشو
الدور و ترددو في كلام شمامين الكوله بعبط و غشم , ده لو سمحتو يعني , أصل أنا عارف
اللي فيها , النهارده هيبقى الواد ده عيل صغير و مجرد بردعه و بكره هنقول ضيعتو مستقبل
الواد الصغير الكيوت , ده كان غرضه شريف و عايز تطوير منظومة التعليم , و بعد بكره
هيتحول لبطل قومي زي الواد بتاع الواقي الذكري وزي عشرات الصيع اللي عملنا منهم أبطال
.
.
5- هو الكلام ده
مكتوب ألماني و محتاج ترجمه ؟! .
............................................................................................................................
Mohamed
Hussein
5
يونيو 2016·
عيل صايع عمل صفحه
عالفيس بوك لتسريب امتحانات الثاويه العامه , و كعادة كل صايع في البلد دي و تحديدا
في أخر 5 سنين لازم طبعا يعمل لصياعته و اجرامه قضيه و مضمون و هدف و غايه , وقالك
أصل انا معترض على نظام التعليم الفاشل عشان كده عملت صفحة الغش و التسريب دي و لما
الدوله تصلح المنظومه الفاشله هبقى أتوقف عن نشاطي !! , أه سيادتك ماهو في ال 5 سنين
بتوع البلاله بقت الصياعه و الوساخه يتقال عليها نشاط و ممكن نعتبرها عمل بطولي كمان
!! .
.
الواد الصايع ده
زيه بالظبط زي الصايع اللي نزل يحرق عريية شرطه و اعتبر ان ده عمل ثوري و بطولي و هدفه
تحقيق أهداف الثوره !! , و زي الصايعه اللي نزلت بلوحه أيام ريجيني ( بتقتلوه ليه ؟
هو احنا قصرنا معاكو في حاجه ) , برضه أكيد متخيله انها بتعمل عمل بطولي و ممكن تتألق
و تقولك انا هدفي تظهير جهاز الشرطه !! , و زي الصايع اللي بيكتب عن انشقاقات في جيش
مصر و يقولك حرية رأي و تعبير وانا هدفي الوصول للحقيقه !! , و زي الصايع اللي ترجم
تقارير مضروبه و بعتها لإيطاليا و ممكن يقولك حرية تبادل المعلومات , و زي كل صايع
في البلد دي بيحاول يعمل من صياعته بطوله .
.
الواد الصايع بتاع
صفحة التسريب اتقبض عليه و بيتحقق معاه دلوأتي , أقسم بالله ما هتفاجئ لو لقيت خالد
علي رايح يدافع عنه و بتوع 6 ابريل عاملين هاشتاج , #الحريه_للواد_الصايع
و ممكن نعمل وقفه
بالشموع قدام وزارة الداخليه البلطجيه و وزارة التعليم اللي حرمت الواد الصايع من ممارسة
نشاطة البطولي العظيم .
...........................................................................................................................
Mohamed
Hussein
5
يونيو 2016·
الغش و تسريب الإمتحانات
و الربع درجه و منظومة حماده .
.
الغش بقى ثقافة
عامه , جزء من منظومة البلاله اللي اسمها التعليم في مصر , الطالب لمدة 12 شهر يتربط
في ساقيه هو و باباه و مامته , مدرسه مفيش مدرسه , فيه دروس , مراكز دروس , سنترات
و حبشتكانات , إلحق يا حماده درس الكيما عند حوت الكيميا , و بسرعه بقى تجري على ديناصور
الأحياء و تاخد لك كلمتين , الربع درجه بتفرق يا حماده , طبعت لك مذكرة نيوتين الفيزياء
أستاذ سلامه , كده بقى عندك 17 مذكره في الفيزيا , عايز تاني ؟ احشي يا حماده , ماتنساش
زي ما قلت لك , الربع درجه بتفرق , لفيت عالمكتبات و لميت لك المراجعات النهائيه كلها
, عندك يا سيدي 9 مراجعات في الرياضيات , حلهم بقى , ركز , احفظ , ماتنساش يا حماده
الربع درجه بتفرق , بقولك يابو حماده , الفلوس خلصت اللي كنت سايبهالي , و دي اهم سنه
في عمر حماده , انا هروح ابيع الغويشتين عشان الدروس , الشهرين بتوع المراجعات دول
اهم من السنه كلها , ياخويا مش مهم الدهب , ده مستقبل ابننا , و زي مانت عارف الربع
درجه بتفرق .
.
يابوحماده اصحى
و النبي , بيقولو الامتحانات ممكن تتسرب , ماتقوم تشوفها , انا بس خايفه على حماده
يغلط في سؤال , ماهو كله بيغش و وانت عارف الربع درجه بتفرق .
.........................................
.........................................
السيد وزير التربيه
و التعليم , بعد التحيه , الدنيا اتطورت خالص يا مولانا , موبايلات و نت و فيس و واتس
و سكايب , الامتحان لو اتصور في المحله بعد ربع ثانيه هيكون مطبوع في حلايب و شلاتين
و الساقيه اللي بيتربط فيها حماده بتبقى في اللحظه الأخيره زي قلتها , ماتشوفو لنا
حل , يا تبطلو موضوع الساقيه , ياتشوفو حل في التسريب , مانا خايف نوصل ليوم نضطر فيه
اننا نسند امتحانات الثانويه العامه للهيئة الهندسيه للقوات المسلحه !! .
.
الساده الأساتذه
المدرسين الأفاضل , أساتذتي اللي جزمتهم على راسي , مش ناويين تنزلو تتظاهرو بقى ضد
منظومة الحماده دي ؟ مش حاسين ان حضراتكو بتشاركو ( عمدا ) في تدمير أجيال و أسر و
تدمير الحياه في ربوع مصر ؟ عاجبكو الحال ده ؟ ماقرفتوش ؟ الطالب في الثانويه العامه
يكلف أسرته عشره عشرين ألف في السنه ( في التعليم المجاني !! ) , و التعليم اللي هو
تربية العقول يتحول لابتزاز و مافيا .
.
السيد الفاضل رئيس
الجمهوريه , وقّف مشاريعك ياريس و ركز والنبي في تفوير منظومة الحماده بتاعة التعليم
مهما كانت التكلفه , شوف اليابانيين قالو لك ايه و نعمل زيهم , تراكمات العشرين تلاتين
سنه ممكن تحلها حل نهائي و ده يبقى أعظم مشروع ممكن حضرتك تعمله , طور المنظومه كلها
و اعمل للمدرس مرتب محترم و بعدها جرّم الدروس الخصوصيه يعني تبقى جريمه و 10 سنين
سجن , أخويا مدرس انجليزي لو مسكتوه وقتها بيدي درس اسجنوه و انا مش هقوم له محامي
.
....................................................................................................................
Mohamed
Hussein
4
يونيو 2016·
رمضان بعد بكره
, كل سنه و كل المصريين بخير و سعاده , بصو بقى عشان محدش يتفاجئ أو يقول ماقولتوليش
ليه , بالنسبه للي بيسأل احنا هنصوم كام ساعه و درجة الحراره هتبقى كام ؟ من الأخر
كده احنا هنصوم في درجة حراره خمسه و سبعين قول تمانين درجة مئويه , و المغرب يا معلم
بيأدن بعد أدان العشا بنص ساعه , ربنا يقدرني على فعل الخير .
.
الساده المدخنين
اللي زي حالاتي , نصيحه , ماتحاولشي تكتر سجاير قبل الفجر و كأنك داخل في سباق للنفخ
, الحكايه مابتنفعشي بطريقة الخزين , يعني جسمك مش هيخزن نيكوتين طول ال 40 ساعه اللي
هنصومهم , ياسيدي 39 ساعه بلاش 40 لو كان الرقم خضك يعني , انصحك عموما بكوباية شاي
بعد السحور و علبة زبادي صغيره و ابقى قابلني لو فرقو معاك في أي حاجه , برضو هتصحى
من النوم خرمان ومصدع و مش عارف راسك من رجليك و بتغلط في أسامي عيالك , المهم ماتغلطش
في اسم مراتك يا مولانا , عشان الحركه دي دونها الرقاب , يعني لا هيشفع لك انك صايم
وقتها ولا انك قاعد قدام المصحف , و على أي حال لو وقعت الفاس في الراس و قلت لسميره
مراتك يا صفاء تبقى امك داعيالك و الله , عشان هتقابل رب كريم في أيام مفترجه .
.
#اللهم_بلغنا_شهر_شوال
.
........................................................................................................................
Mohamed
Hussein
4
يونيو 2016·
و إيه فايدة التأهل
لنهائيات أمم أفريقيا أو حتى نهائيات كاس العالم واحنا ماعملناش تنميه للإنسان ؟ ,
و ايه فايدة الفوز في ماتش كوره وسط الفاشيه و القمع و مصادرة الحريات ؟ و إزاي نفرح
بالفوز و بالجونين بتوع محمد صلاح و احنا عندنا 300 مليون معتقل رأي في السجون ؟
.
احنا لازم ننزل
و نعتصم على سلالم نقابة الصحفيين و نهتف ضد تأهل مصر لأمم أفريقيا , و نبعت رسايل
مترجمه للكاف و الفيفا نتهم فيها الإتحاد المصري إنه بيحقن اللاعيبه بتوعنا هرمونات
و منشطات زي الفراخ البيضا , و نطالب الأسطول الامريكي في البحر المتوسط بالتدخل و
مهاجمة مصر و اعتقال محمد صلاح و رفاقه .
........................................................................................................................
Mohamed
Hussein
4
يونيو 2016·
علاء الأسواني
: لن تكون أقوى من الجيش النازي و لن تنجز مشروعات أفضل من الإتحاد السوفيتي , أي انجاز
قائم على قمع الناس و إهدار حريتهم سيكون هشا وبلا قيمه !!
................................
................................
عموما يا دكتور
علاء ماتقلقش , مش انت لوحدك اللي كده , هو انت فاكر ان انت لوحدك اللي كده ؟ لا ,
ده البرادعي كده , و جميله اسماعيل كده , انتو كتير .
.
و حضرتك جدول أعمالك
ايه الفتره الجايه يا دكتور علاء ؟ ايه ؟ بتقول ايه ؟ هتسافر أمريكا و تحاضر في ندوه
هناك عن قمع النظام المصري و فاشيته و مصادرة الحريات و انه بياكل دراع العيال الصغيره
؟ طب تمام تمام , و طبعا هتسافر من مطار القاهره الدولي و هترجع من نفس المطار و معاك
جواز سفرك المصري و ظابط الجوازات هيختم لك كداهو ؟ .
.
طب و بعد كده هتعمل
ايه ؟ هتكتب في جريدة مصريه أو تطلع في قناه مصريه بتبث من مصر و أو تدخل على تويتر
و تتكلم عن قمع النظام و فاشيته و مصادرة الحريات و انه بياكل دراع العيال الصغيره
برضه ؟ طب تمام تمام , و طبعا هترجع بيتكو اللي هو متسجل في البطاقه و معروف للاجهزه
الامنيه , عماره رفم كذا في حي كذا ؟ و تنام و تشخّر , و تصحى من النوم تبدأ يوم جديد
من الهري عن الفاشيه و مصادرة الحريات .
.
طب و بعد كده ؟
لأ بص كويس , ازاي معندكشي حاجه في جدول الأعمال بعد كده ؟ يعني الصفحه بتاعة يوم التلات
الجاي فاضيه ؟ طب اكتب فيها بقى , هملّيك أنا , يوم التلات بإذن الله معاد الحقنه
!! .
.
بالك يا دكتور
علاء , من شويه كده و انا ماشي في الشارع حصل موقف زي الهباب هحكيهولك , لقيت عيل جاي
يجري و بينادي عليا , و حصل بينا الحوار ده
.
العيل : يا أستاذ
يا أستاذ
أنا : نعم , تحت
أمرك , اتفضل .
العيل : هو حضرتك
الدكتور علاء الأسواني ؟
أنا ( بانفعال
) : اخرس يا حيوان , يلعن أبو شكلك
العيل : بس انت
شكلك كده علاء الأسواني .
أنا ( بانفعال
أكتر ) : يا جدع عيب عليك , دانا راجل متجوز و عندي عيال .
...........................................................................................................................
Mohamed
Hussein
3
يونيو 2016·
أجمل حاجه قالها
عبد الفتاح السيسي لما اتكلم عن ( عن العلاقه مع أمريكا ) :
.
(( أدبيات السياسيه
اللي كانت موجوده من 30 سنه لا تصلح دلوأتي , أدبيات السياسه اللي كانت قبل كده مش
ملزمه ليا )) .
كلمتين فيهم الخلاصه
و الشفا , كلمتين زي الرصاص .
.
الترجمه : أمريكا
عايزانا نرجع تحت عبايتها و جناحها زي زمان كشرط لعودة العلاقات القويه , بس لأ , و
لأ يعني no
............................................................................................................................
Mohamed Hussein
3
يونيو 2016·
ممممممممم مش انا
سيساوي و طبال و كده ؟ و كل يوم بقعد أقول و أعيد في مشاريع السيسي يعني المفروض اني
حافظها صم ؟ بس و الله اتخضيت من ( تجميعة ) المشاريع اللي تمت مع بعض , اتخضيت لما
شوفت الفيلم التسجيلي , ده شغل بتاع تلاتين أربعين سنه اتعمل في سنتين , و المعجزه
مش في التوقيت , المعجزه الأكبر كانت في حاجتين أهم بكتير , ان المشاريع دي اتعملت
في ظروف اقتصاديه زي الهباب , و اتعملت و احنا في حالة حرب مع الإرهاب , يعني كان المفروض
في السنتين دول اننا نركع و ننتهي زي غيرنا مانتهى , لوى دراع اقتصادي و حرب ( متعمده
) , قمنا احنا حاربنا و زرعنا و بنينا و حفرنا و عدّينا , يبقى ملهاش وصف تاني غير
المعجزه .
.
مدن سكنيه و عاصمه
جديده و محطات كهربا و غاز و أنفاق و صوامع و قمح و طرق و كباري و تسليح للجيش وأمن
في الشارع و حدود متصانه و شقه للغلبان و رغيف عيش بكرامه مش بإهانه .
.
يا عم عبد الفتاح
, روح الله يعمر بيتك يا شيخ و يحفظك و يحميك و ينصرك بينا و ينصرنا بيك .
..................................................................................................................................
Mohamed Hussein
3
يونيو 2016·
طاقم البحريه المصريه
اللي تولى إدارة حاملة المروحيات مسترال , شكلهم يفرح القلب
.
القائد ( قائد
المسترال ) : عايزين نثبت للعالم اننا قادرين على حماية سواحل مصر و الوطن العربي
, فاهمين يا رجاله ؟ الرجاله ( في صوت واحد ) : فاهمين يا فندم , القائد : هنعمل كذا
يا رجاله ؟ الرجاله ( في صوت واحد ) : ان شاء الله يافندم .
.
أحلى حاجه ان الجيش
المصري العظيم ماوصلتش له أيادي شمامين الكوله الأثمه , الكلام فيه بيبقى بطريقة (
قائد و رجالته ) , و تعليمات و حاضر يافندم , و تنبيهات و ان شاء الله يا فندم
.
و إلا كنا شوفنا
مهازل , و يبقى الحوار بالشكل ده :
.
القائد : عايزين
نثبت للعالم اننا قادرين على حماية سواحل مصر والوطن العربي
.
شمامين الكوله
بالترتيب :
- و ليه نثبت ليهم
يافندم ؟
- هو العالم فاضي
لنا يافندم ولا داريان بينا أساسا , داحنا في مؤخره الدول من حيث مستوى التعليم و الوعي
الصحي و المنفلوطي .
- انا مش مقتنع
بالكلام ده , و سواحلنا مالها بس يافندم ؟ ماهي زي الفل أهي و الناس بتصيف و تعوم و
لابسه مايوهات.
- بطّل تعيش في
نظرية المؤامره يافندم و اسمع كلام البرادعي .
- طب سواحل مصر
ماشي , إنما مالنا احنا و مال أم الوطن العربي يافندم ؟
- مش كنا وفرنا
تمن المسترال دي و استفدنا من الفلوس في تنمية الإنسان يافندم ؟
- عايزن نعمل حوار
مجتمعي يافندم قبل أي خطه نفكر في تنفيذها .
- انا معترض يافندم
عالمسترال لأنها لما تمشي في المايه ممكن تؤدي لخلل بيئي في حياة كلب البحر , أسف جدا
, مضطر أنسحب لأني متضامن مع كلب البحر يافندم .
......................................................................................................................
.
ليست هناك تعليقات:
إرسال تعليق