Mohamed
Hussein
21 يناير
رسمتك ضحكه مكسوره
بتشبه ضحكة المساجين
و مين يا مصر يشبهلك ؟
و مين يا غاليه يستاهلك
و مين ناسك و مين اهلك
و مين ناصر و مينا و مين ؟!.
.
ببص عليكي في مرايتي
اشوف صورتك واشوف صورتي
ولو شاطر في يوم هعرف
أقول الفرق بين لتْنين !!.
.
رسمتك ضحكه مكسوره
بتشبه ضحكة المساجين .
.
.
محمد حسين
Mohamed
Hussein
30 يناير
كنت أه عريان وحافي
كنت رغم البرد دافي
كنت صوت للخير بيدّن
كنت نبع جميل وصافي
.
كنت عاشق للبشر
كنت مغرم بالنفوس
كنت بنحت في الحجر
كنت وسط الشوك بدوس
ملعونه يادي الفلوس !!.
.
.
محمد حسين
Mohamed
Hussein
2 فبراير
يا مصر فين رقٍّتك
لمّا بنتلاقي
و فين جمال ضحكتك
لو كنتي مشتاقه ؟!
.
لمّا انتي حُبِّك وَجَع
واجمل ما فيكي فراق
بتلبِّسينا ليه
بالغصب توب عُشَّاق ؟!
.
غُرْبه و الليل ده حالِك
يا جنة المحبوب
لا إيدي طالتْ جمالك
و لا كفّانيش التوب !!.
.
و غلبت قوله و نِدا
مين اللي بايع مين ؟
هو انتي مُتأكده
إن احنا جوز عاشقين ؟!
.
.
محمد حسين
Mohamed
Hussein
5 فبراير
في عرضك مكانتك
في أرضك مكانك
قراري وتعرف
فلان اللي باعك
و مين اللي خانك ؟
.
تحارب و تزرع
جناين جناين
ما تسمح لعاطل
ما تأذن لخاين
يزعزع إيمانك
في عرضك مكانتك
في أرضك مكانك
.
و ساعة العصاري
بتحلى العزومه
حصيره و لُقمه
تدندن لسومه
و تسرح معاها
ما يسلم غُناها
و يسلم لسانك
في عرضك مكانتك
في أرضك مكانك .
.
يا عمي و خالي
يا قلب البراءه
و م الحقد خالي
بلدنا العفيّه
بشوفها ف كفوفك
و اغنِّي لبهيه
ساعات لما شوفك
ماهي دموعك
و هي ابتسامتك
و هي و هي
ملامحك و سمتك
و هي الحبيبه
يا زارع ترابها
كرامه وطيبه
و عايش عشانها
و عايشه عشانك
في عرضك مكانتك
في أرضك مكانك !!.
.
.
محمد حسين
Mohamed
Hussein
7 فبراير
لايف يا طير
يا غريب
على قلبي
كنَّك ناي
بتغنِّي لحن
عجيب
و تقولّي غنِّي
معاي
.
مانا كنت كاتب
ع الضلوع ممنوع
دَخَلْت كيف
و ازَّاي ؟!
.
.
محمد حسين
Mohamed
Hussein
11 فبراير
مصر دايماً يا حبيبتي
لسّه ليكي عمر باقي
فوق ترابك بين ولادنا
اسألي الأجراس و مدنه
واسمعي صوت السواقي
.
فجر يطلع خير بنزرع
نبته تحضن في الحيطان
الأمان في الحضن يجمع
و الهوى سر التلاقي
.
مصري عاشق ذكرياتك
أهراماتك وحكاياتك
و ابتسامتك هي هي
ياللي فوتِّي الكون ما فاتك
من جمالك يا بهيه
.
فاكره أحمس فاكره مينا
فاكره سيدنا المسيح ؟
فاكره جيشك حرب سينا
يا جبل ما يهزه ريح
.
عوديني بالمحبّه
شرّبيني الصبر حبّه
علميني أنسى كلمة
( لأ محال )
.
ازرعيني بين حدودك
اطبعيني فوق خدوك
لجل عودي يبقى
راسخ زي عودك
زي ما تكون الجبال
.
وافردي قلوعك ودوسي
عالكلاب ويّا الديابه
مش ولادك مش حبايبك
اللي عايزك تبقي غابه
.
اللي تافه واللي خاين
و اللي غرَّر بالولاد
اللي باعك في المداين
و اللي عارضك في المزاد
تبقى ليه طيبتك يا غاليه
تبقى ليه الطيبه عاد ؟!!
.
.
محمد حسين
.
Mohamed
Hussein
27 فبراير
غاية مرادي تكوني
مرفوعه فوق الراس
ياللي مقامك نزل
في الأصل كان عالي
.
ما شبعت عمري اوصفك
و اصرخ ما بين الناس
حبّوها لجل النبي
بلدي و راس مالي
.
و لمّا بدأو الضرب
قُلت البشاره يا رب
و لا خوفت من حُرّاس
و لا بعت لملالي
.
غاية مرادي تكوني
مرفوعه فوق الراس
ياللي مقامك نزل
في الأصل كان عالي !!.
.
.
محمد حسين
Mohamed
Hussein
10 مارس
ليه يا مصر تخلِّي دايما
سكِّة العاشق سراب ؟
قولي مالك ؟
الطريق مفرود وسالك
و انتي حرّه
و بايعه حالك للكلاب
.
اللي خاين جاي يقبض
و اللي مات مقهور عشانك
حقه ضايع في الحساب !!.
.
.
محمد حسين
Mohamed
Hussein
يا عيني شوفتي الدلع ؟
شدّ الهوى توبي
فلّاح و طبعه جدع
مصري و من توبي
.
سامحوني ياهل العتب
دايقه الغرام دوبي
أنا جيت في ساعة غضب
و كتبت مش عايزه
و حياة عنيك يا هوى
لم تقرا مكتوبي !!.
.
.
محمد حسينMohamed Hussein
يا عيني شوفتي الدلع ؟
شدّ الهوى توبي
فلّاح و طبعه جدع
مصري و من توبي
.
سامحوني ياهل العتب
دايقه الغرام دوبي
أنا جيت في ساعة غضب
و كتبت مش عايزه
و حياة عنيك يا هوى
لم تقرا مكتوبي !!.
.
.
ليست هناك تعليقات:
إرسال تعليق