منوع محمد حسين

·        
Mohamed Hussein 19 يناير

·          خدنا ايه من حماس ؟! . صباح الخير - حركة حماس بدأت في فلسطين من سنين طويله كحركة مقاومه شعبيه ضد العدو الصهيوني , وعشان انا مش عجوز اوي هجيب الحكايه من أول ما وعيت عالدنيا . - حماس استقلت بقطاع غزه وقسمت فلسطين , وطبعا أكبر هديه تقدمها لعدوك هي إنك تقسم أرضك بإيدك , يعني تقدر تقول كده , يأتي الإسلاميون دائما بما يشتهي الغرب والصهاينه !!. . - في العدوان الصهيوني الأخير على قطاع غزه من 7 سنين تقريبا , ومعاناة مدينة جينين اللي شبه اتدمرت بدأت أنا أفوق من وهم حركة حماس اللي هتحرر القدس . . - لقيت الحمساويين بيضربو على اسرائيل نوع من الصواريخ أشبه ب ( بمب العيد ) حاجه كده لو جت في بطن واحد صهيوني واقف على بعد مترين هيقول أي , أه يا أسي , كده جبت لي مغص في بطني ؟! . . - تقوم اسرائيل ترد بترسانه من الأسلحه , تدمر الأخضر واليابس , في الوقت ده قيادات حماس موجودين في قصورهم الفخمه الفخيمه في دمشق وطهران والدوحه ...مين اللي دفع التمن ؟ المواطن الفلسطيني البسيط , وكل ده تحت شعار تحرير القدس ومحاربة الصهاينه ...طب مين اللي قبض التمن ؟ قيادات حماس طبعا , مليارات بتجيلهم من دول الخليج تحت بند إعادة إعمار قطاع غزه . . - شويه وبقت حماس والصهاينه حبايب وسمنه على عسل , أفتكر إن أخر طلقه ضربتها حماس ضد عسكري اسرائيلي كانت من سنين كده , لكن أخر طلقه ضرتها ضد عسكري مصري كانت من ساعات !! . . - تقريبا فكرتهم عن تحرير القدس اتغيرت وبقى الطريق الي تحرير القدس يبدأ بحرق القاهره !!. . - الأنفاق اللي كان مبارك بيقفلها والدنيا تهيج عليه ويقولو شعب غزه بيموت من الجوع يا كفره , كانت بتنقل سلاح ومخدرات وارهابيين , واحنا مغفلين وشعب عاطفي ونحنوح بطبعه . . - عارف إنت , إحنا خدنا ايه من حماس غير القتل والإرهاب ؟ خدنا حاجه مهمه أوي , الألقاب اللي بيستخدموها , موضه وانتشرت زي السوس , أبو حمدي , أبو قتاده , أبو الدرداء , أبو سميه , أبو صافيناز , أبو جلمبو !!.

·          

·          

Mohamed Hussein 19 يناير  

· تم التعديل شعبيه من الهوا . يقدر عبد الفتاح السيسي أو إكس من الناس إنه يعمل لنفسه شعبيه جارفه في ظرف شهرين تلاته ( يعني قبل انتخابات الرئاسه ) لو فهم عقول أغلب الشباب والنخبجيه في مصر . . يعني ما يجراش حاجه مثلا لو السيسي قابل أباء وأمهات الشهداء , وخصص لهم معاش شهري معتبر وعمل لوحه جداريه كبيره جدا في ميدان التحرير بصور واسماء الشهداء , وما يجراش حاجه لو سمح بعرض فيلم الميدان على التلفزيون المصري 9 مرات في اليوم , وطلع كل يوم ساعه عالهوا يتكلم فيها عن أهداف ومبادئ وجمال وحلاوة ودلع وشقاوة ثورة يناير , واتحايل على باسم يوسف عشان يرجع يقدم برنامجه , وكل كام يوم ينزل بيان يلعن فيه فراتيك أبو الفلول , الفلول الفلول الفلول . . سهله الحكايه صح ؟ طب اقرو الكلام اللي فات ده تاني , لو عمله السيسي هيخسر حاجه ؟ أبدا , هيتكلف أي حاجه من جيبه ؟ لأ , طب شعبيته هتقل أو تتأثر بكده ؟ مستحيل , دي هتزيد ...طب ده اللي حضرتك نفسك فيه صح ؟ أه . . طيب بالمناسبه , السيسي لو عمل كل اللي فات ده في الوقت الي مصر بتحارب فيه الإرهاب ومش فاضيه تهرش حتى هيبقى نصاب وبيّاع كلام مش اكتر , يعني انا مش قلقان من السيسي دلوأتي , إنما لو كان عمل كده وطبطب عالثوار بحنيه أوي كنت هقلق , وهعرف إني واقف قدام شخصيه مكاره ومش هتفائل خير لمصر . . الضحك على عقول الناس مفيش اسهل منه , حتى اسألو الإخوان والسلفيين , وكل شريحه في مصر لها نقطه ضعف , نقطة ضعف الجاهل والأمي والعاطل عن العمل هي الكلام في الدين يعني اوعدهم بجنة ربنا حتى لو كنت نصاب وبتستغلهم , ونقطة ضعف الثورجي هي الكلام الجميل عن ثورة يناير وحق الشهداء حتى لو كنت نصاب وعايز المراكب تمشي حاليا , ونقظة ضعف النخبجيه هي شوية كلام كبير مجعلص تقوله لهم حتى لو كنت هتطبق الورقه اللي بتقرا منها الكلام ده بعد ما هما يمشو وترميها في التواليت !!.

Mohamed Hussein 19 يناير

 نقطتين جاز وعودين جرجير !! . أهي خيبه بالويبه , كل مرشح رئاسي يطلع في حوار ولا برنامج يسأله المذيع : هتعمل ايه لو بقيت رئيس ؟ يرد المرشح : أهم حاجه السيسي مايترشحشي للرئاسه . طب ايه خطتك في الحمله الإنتخابيه بتاعتك ؟ يقول المرشح , لو السيسي ماترشحشي هيبقى عندي خطه زي الفل وبارك الله فيما رزق . طب ممكن تتحالف مع أي تيار اسلامي في انتخابات الرئاسه ؟ يقول المرشح : ترشح السيسي للرئاسه ضد ثورة يناير والناموس الكوني وحركة الشمس والمجرات وعقارب الساعه . . طب ممكن تتراجع عن ترشحك في لحظه معينه ؟ يعني لو السيسي اترشح هفكر ولو السيسي مترشحش هفكر برضه . . مين اللي هيصرف على حملتك الإنتخابيه ومصادر تمويلها ؟ ده بيعتمد على إن السيسي هيترشح ولا هيتراجع عن قرار الترشح . . عندك قواعد وانصار يساندوك في القرى والنجوع ؟ لما نشوف الأول السيسي هيقرر الترشح ولا لأ . . ايه رأي حضرتك في إشراف المنظمات الأمريكيه على الإنتخابات في مصر ؟ الموضوع بيعتمد أولا وأخيرا على ترشح السيسي للرئاسه . ....................................... ....................................... أهو احنا بقينا بنمارس السياسه على إنها لوغاريتمات , طبق سلطه كبير و متلخبط أوي , مقطعين فيه خياره واوطايه ولمونه ورغيف عيش وصندل بلاستيك وحته تفاحه حمره وشوية زيت جدايل من اللي بيطول الشعر ونقطتين جاز وعودين جرجير , وراشين عليه من فوق شوية رمل من بتاع مرسى مطروح ( اللي كانت بتمشي عليه ليلي مراد ) . . أو جايز نكون احنا اللي ناس طيبين , وكل واحد عايش في حال اللي جنبه ( الله يرحمك يا عم جلال )!!.

Mohamed Hussein 19 يناير

 ولما تعرف إن وزير الخارجيه الأمريكي بيشكك في نزاهة الإستفتاء وإن الجرايد الأمريكيه العملاقه النزيهه ( ولا مؤاخذه ) بتقول الشعب المصري نزل يستفتي على شعبية الجيش مش الدستور ولما تعرف إن الكلام ده هو بالظبط نفس كلام الجزيره وعشة الفراخ القطريه ونفس كلام الإخوان وحماس يبقى أن الأوان إنك تفهم بقى مين بيلعب مع مين ؟ واتوبيس كام بيروح فين ؟!. . ماهو اللي حصل في ال 3 سنين اللي فاتو كفيل إنه يخلي الحمار يفهم والحجر ينطق , ولو حضرتك لسه مفهمتش لحد دلوأتي تبقى عامل زي نبات الحامول كده بتطلع وتكبر وتتغذى لحد ماتموت علينا احنا ( الزرعه الأصليه ) على صحتنا وعافيتنا ومرارتنا رغم إنك مالكشي أي تلاتين لزمه ( مجرد حشائش ضاره ) , وبالتالي تبقى المناقشه معاك حرام شرعا !! .

Mohamed Hussein 19 يناير

 · تم التعديل يا بُنيّ اركبْ معنا !! . مش خايف على مصر , مابقتشي خايف عليها , من يوم 30 يونيو وانا مش خايف , حاطط في بطني شادر بطيخ صيفي , والسبب ببساطه إني شوفت بعيني يعني ايه شعب وجيش يبقو ايد واحده , سيبك من الشرطه مش بحبهم رغم اني بعذرهم احيانا كتير , لكن اللي يهمني الشعب والجيش , الجيش والشعب , الشعب والجيش , ولو الجمله دي بتعصبك ممكن اختصرهالك واقولك ( الإتنين شين ............ ومش مهم الشين التالته ) !! . . أي كلام بكتبه حتى لو بإسلوب ساخر أو لاذع أحيانا بيبقى غرضي منه صرخه مش اكتر , نداء بحسه الأخير ( يابني اركب معنا ) , كلامي بوجهه للبرادعاويه تحديدا لأني عارف صدق نوايا أغلبهم , وللنضيف من 6 ابريل والإشتراكيين الثوريين ( و قليلٌ ما هم ) . . كل الحكايه إني بدأت أربط شويه بين الحلم والواقع , بين المرجو والمتاح , واشوف مصر بنظرة اشمل , نظره تشمل الوضع في الدول اللي جنبنا واللي بيحصل فيها , نظره لا تستبعد ابدا إن تكون بلدنا في خطر حقيقي , وعند كلمة خطر حقيقي دي بقف تماما واقفل على أحلامي , المثل عندنا بيقول ( اللي بيعوزه البيت يحرم عالجامع ) , والخبز قبل الحب أحيانا , شبر واحد من تراب مصر بألف ديموقراطيه أمريكاني ... . يابني افهم انا مش جاهل ولا ساذج و ممكن أألف لك كتاب عن شغل المخابرات بتاع زمان , بس اللي مايشوفشي من الغربال يبقى اعمى . . بالمناسبه وبدون سخريه , 6 ابريل والإشتراكيين الثوريين , أخرهم كده لا يغني ولا يسمن من جوع , يعني في صناديق تخسرو وفي الشارع تخسرو بفضيحه , دي النظره الواقعيه , ورؤيتي لكو بتقول انكو نوعين اتنين , نوع طيب و وطني وثورجي فعلا بس ساذج وده اللي بيروح في الرجلين غالبا , والنوع التاني نصاب ( لألف سبب ممكن يكون نصاب ) وده اللي بيصدرك في الشارع . . في النهايه عايز أقول إن 90 % من المصريين ايد واحده دلوأتي , وده مش من باب التعالي اد ماهو اقرار بحقيقه , وانتو بالظبط هتبقو عاملين زي المنديل اللي بيتحط في جيب البدله لزوم الشياكه وكداهون , في كل الأحوال البدله هتبقى شيك على مصر ولايقه بمنديل أو من غير , ده حتى فينا ناس بقو يقولو إن موضة المنديل اللي في جيب البدله دي بطلت من زمان !!.

Mohamed Hussein 19 يناير

 أكبر غلطه وقعت فيها ثورة يناير إن السجل المدني مجابشي كام موظف من عنده ووقفهم على مداخل الميادين وقتها , عشان يسجل أسماء ال 20 مليون اللي نزلو ويعمل لهم كارنيهات , وكانت النتيجه إن ال 20 مليون رجعو بيوتهم من غير كارنيهات ... ومش باقي منهم غير 10 ألاف بالكتير , جايز يكون لهم هدف محترم أو يكونو فاهمين إن كلمة ثورجي دي مهنه زي طبيب ومهندس ونجار نابوليا , وكل يوم ينزل الصبح , رايح فين يابني ؟ نازل اثور يا ماما عايزه حاجه من تحت ؟!. أهي حكاية الكارنيهات دي كانت هتحل مشكل كبير , عشان الساده الأشاوس الي لسه غاويين نزول وطلوع بقو بيسمو نفسهم ثورجيه بطريقة الإحتكار ( إحنا الثوار , إحنا الثورجيه ) , .................... كل واحد معاه كارنيه ثورة يناير يطلعه ويوريهولي ياخوانا !!.  

Mohamed Hussein 20 يناير

 الرقص على دماء الشهداء . أنا : هو حضرتك نازل تعمل ايه يوم 25 اللي جاي ؟ هو : نازل أحقق أهداف ثورة يناير . أنا : اللي هي إيه أهداف ثورة يناير ؟ , فكرني عشان انا مش فاكر هو : عيش حريه عداله اجتماعيه . أنا : ممكن تترجم لي الشعار ده ؟ , أنا أصلي علامي على أدي مش متنور زيكو يا بتوع المدارس . هو : يعني توفير الحد الأدنى من العيشه الأدميه للفقراء ومحدودي الدخل و . أنا : استنى لحظه , ماهو فيه حد أدنى للأجور هيتعمل 1200 جنيه والمعاشات بتاعة الناس زادت وزودو الضمان الإجتماعي . هو : ما علينا , عايزين مساحه كامله من الحريه بقى , مش يتقبض علينا بشكل عشوائي و ... . أنا : استنى , بس فيه قانون تظاهر اتعمل , وده مش عيب , حاجه لتنظيم العمليه , ممكن تاخد التصريح وتتظاهر باحترام ولما ساعتها حد يتعرض لك هتجبرني اني ادافع عنك عشان انت هتبقى ساعتها على حق هو : لأ , أنا ماخدشي تصريح من حد , من النهارده أنا الحكومه , أنااااااااااا الحكومه , وبعدين فيه ناس بيتقبض عليها عشوائي ومالهاش ذنب و ... . انا : استنى , بس احنا دوله بتحارب الإرهاب فعلا وانت نفسك شوفته بعينك وانت اللي فوضت الجيش بمحاربة الإرهاب , ده وضع مؤقت , وفي أي دوله مهما كانت قوة أجهزتها الامنيه لما بتحارب الإرهاب بيبقى فيها خساير جانبيه ( مش بدافع عن كده ) بس ده اقرار للحقيقه , اسمها collateral damage . هو : طيب ايه يضمن لي العداله الإجتماعيه ؟ . أنا : الدستور اللي ناس وافقت عليه باغلبيه ساحقه يضمن لك كده , والمسأله بقت مسألة وقت مش أكتر هو : كده تمام , ومعاك حق فعلا.... وسع لي بقى عشان انا نازل أنا : نازل رايح فين ؟ هو : نازل أتظاهر عشان أحقق أهداف ثورة يناير !!.

Mohamed Hussein 20 يناير

 هيه بقى كانت أيام , فين أيام زمان ؟ , أيام الضظوي وعبده صالح الوحش , جيل السمنه البلدي وام كلثوم ونجيب محفوظ , كان المسئول أو المرشح وقتها بيطلع في التلفزيون يتكلم عن نفسه , ويبدأ كل فقره من حواراته بجملة ( أنا ...واعوذ بالله من قولة أنا ) , دلوأتي كل واحد بيطلع يقول ( فلان واعوذ بالله من فلان ) !!. مطلوب لمصر فورا , لأعلى سعر وشعبيه وتوافق وطني , مرشح مدني دكر , في منتهى الدكرنه , الوسطاء الأمريكيين والقطريين يمتنعون !!.

Mohamed Hussein 20 يناير  

حكاية 25 يناير 2014 ( فيلم النشطاء والإخوان ) في كلمتين . هتنزل وهما هينزلو , هتهتف وهما هيقتلو , هتنشغل بالميدان وهما هيعملو , وهنبدأ الفيلم من أوِّله , وفي الأخر في الأخر في الأخر , هيركبوك ويدلدلو ........ أمانه عليك يا مصري , شرفك ما تبهدله !!.

Mohamed Hussein 20 يناير

 أنا وصاحبي الثورجي . لو اتكلمت باستفاضه عن يوم 25 الجاي هيقول أكيد انت خايف ومرعوب , ولو طنشت الموضوع ( كأن لم يكن ) هيقول بتتعمد تداري الحقيقه وتدفن راسك في الرمل زي النعامه , ولو اتكلمت عن اليوم ده بهزار وسخريه أبقى بخبي خوفي في عنيه وبهزر حلاوة روح , ولو اتكلمت بانفعال هيبقى انفعالي دليل على الإرتباك والتخبط والقلق من 25 يناير !! . وفي كل الأحوال أنا في نظره فلول زي ما كنت في نظر الإخوان كافر , يعني كده كده مش عاجب , يبقى ايه بقى ؟ هكتب بمزاجي , أهزر وانفعل , اسكت واتكلم , استفيض واختصر , أكاونتي بقى وانا حر فيه , أفرده براحتي واتنيه , وممكن أعمل شالباظات هنا , وممكن أطلّع لك من الشنطه فرخه تكاكي !! .

Mohamed Hussein 20 يناير  

علاء الأسواني كتب مقاله طويله عريضه عن تفسيره للجمله دي ( السيسي طلب تفويض من الجيش ) , وقعد بقى يبنى في استنتاجات وافتراضات وحبشتكانات , منها إن ده معناه ان الجيش بيمارس الحياه السياسيه وإزاي وهو اصلا مالوش حق التصويت , وكده هتبقى منافسه مش شريفه ,........... وأي حاجه في رغيف بنعتبرها ساندوتش حتى لو كانت فردة شبشب ...!!. . بيخونك عقلك أحيانا يا دكتورنا , الحكايه مكانتشي تستاهل الهري ده كله , ولا الجيش هيصوت في الإنتخابات ولا بيكون له مرشح ولا يحزنون ولا المنطقه المركزيه هتنزل في المحليات وحرس الحدود هينزل في انتخابات البرلمان و لا الدفاع الجوي هيحتكر النقابات !! . . مانت لو تهدى شويه وتاخد نفسك هتعرف ان الراجل بيقول موافقة الجيش , يعني قياداته , والموافقه هنا بتبقى من باب الإحترام والتوقير مش اكتر لأنها بيترتب عليها حسابات تانيه من بينها حساب مخاطر ترشح وزير الدفاع في وقت زي ده ؟ ومين هيكون وزير الدفاع بعده ومين رئيس الأركان والموافقه كمان بتعني إن المجلس العسكري إيد واحده مفهوش انشقاقات ودي رساله لكلاب بلاد بره , فهمت يا مولانا ؟!. . واحد قاعد عالقهوه وبيحكي لنا عن مغامراته لما كان بيطلع يصطاد ديناصورات من الصحراء الشرقيه في مصر , وإزاي إنه في مره اصطاد ديناصور صغير كده فصعب عليه وخده معاه البيت ورفض ان مراته تطبخه وقرر انه يربيه واشترى معزه عشان الديناصور يشرب لبنها وبقى ينيم الديناصور ده جنبه في السرير من كتر الحب والعلاقه اللي بينهم !!. . الدخله نفسها غلط يا دكتور علاء , مفيش حاجه اسمها تفويض جيش , وانت غلطان في الحكايه من أولها وبنيت 50 ألف استنتاج على كلمه فهمتها غلط , وبالمناسبه مفيش ديناصورات في صحراء مصر الشرقيه !! .  

Mohamed Hussein 20 يناير

 ظاهره غريبه جدا في بوستات الثورجيه عن 25 يناير , الأول كاتبين أهم اهدافهم اسقاط حكم العسكر وتاني هدف منع السيسي ( العسكر )من الترشح وحكم مصر !! , هههههههههههه يعني اسقاط حكم العسكر اللي هو مش موجود أساسا ؟ , ثوره نازله بطريقة المجاز المرسل باعتبار ما سيكون ؟ , وعهد الله احنا جبنا لكتاب السياسه والثورات نوع غريب جدا ونادر من التسلخات !! . . وبعدين هتلاقي عشرين تلاتين هدف في البوست كلهم بيتكلمو عن العسكر ومبارك والفلول والسيسي والميسي والبيسي واللي واللي واللي ...بس مفيش كلمه واحده يا مؤمن عن الإخوان ؟ أه والله ولا كلمه , ولا حد اتقتل في عهدهم ولا خربو البلد وملوها ارهاب وسلاح ...ثوره دي ولا ** مطه ؟!!.

Mohamed Hussein 20 يناير

 يا مصر طالني الوجع منِّك ومن حالك مبدوره أرضك بِدَع كافره بموَّالك . لا ليا فيكي جاه و لا كنت يوم مسئول و ما نابني غير الأه و أه ساعات بتطول و عشان بحبك أنا برجع وبصفالك !! . أراجوز يا سيدنا النبي و بضحك المساكين العشق كان مطلبي يزرع أمل فدادين و تعبت من زرعِتك يا مصر دي خِلفتك هبكي عليكي لمين ؟! يا بخت عُزَّالك يا بخت عُزَّالك !!. . يابني التراب غلَّاب و تاريخها مش كداب ارفع عليها العلم باهي بنيلها الأمم هتلاقي فين زيِّها ؟ ده شبر من أرضها بيساوي كبشة دول و ألف حلم هباب !!. . . محمد حسين

Mohamed Hussein 21 يناير

 الهولوكوست وجيفارا الأقرع !! . صباح الخير - من كام يوم كان فيه ضيف في التلفزيون بيتكلم عن فترة ما بعد 30 يونيو مباشرة , المفاوضات بتاعة الوفود الأجنبيه والعربيه لحل ازمة اعتصام رابعه بطريقه سلميه , منها إن الوفد الفلاني اقترح خروج تدريجي لقيادات الإخوان من السجن مع فض تدريجي لاعتصام رابعه حقنا للدماء , الرد الإخوانجي كان فيه نقطتين مهمين جدا . . أولا إن الرد النهائي والكلمه الأولى والأخيره عند خيرت الشاطر , يعني مرسي ده ( اللي كان شغال رئيس مصر ) مجرد سيكا في مكتب خيرت بيه الشاطر بتاع المليارات , الكلمه كلمتك والشوره شورتك يا تاج راسي !!. . النقطه التانيه اللي اكدها الحضور واللي منهم ناس حضرو المفاوضات دي بتقول باختصار إن خيرت الشاطر رفض كل الحلول السلميه المقترحه واشترط عودة مرسي كشرط هزلي تعجيزي لكن الأهم من ده كله إن ردوده دايما كان بيبقى فيها رغبه واضحه جدا في إراقة الدماء , وكان واضح تماما إنه محتاج كام جثه عشان يعرفو يتاجرو بيهم بعد كده . . خلصت الليله من 6 شهور , واللي ماتو في رابعه في اعتصام مسلح أقل من ربع اللي ماتو في يناير في مظاهرات سلميه , ومع ذلك ونظرا لأموال خيرت الشاطر وشطارة وحقاره الجزيره هيتعمل عنهم أفلام وحواديت وقصص ومؤتمرات ومهرجانات وشعارات وهيحاولو قدر الإمكان تحويل الموضوع على إنه هولوكوست زي بتاع اليهود في ألمانيا النازيه كده . . نفس أم الفكر الصهيوني , واسرائيل قتلت من العرب والمسلمين , من النساء والأطفال والشيوخ عشرات أضعاف اللي مات منهم في محرقة هتلر النازيه ( ده بفرض إنها حصلت فعلا ) , ومع ذلك العالم كله يعرف ويسمع ويقرا عن الهولوكوست ومحدش يعرف حاجه عن جرايم الصهاينه في حق العرب والمسلمين , الحكايه كلها بتتوقف على طريقة عرضك للقضيه وتكبيرها أو تصغيرها وتسليط الضوء عليها , محتاجه فلوس وأفلام وتوثيق وتزوير في جرايد ومحطات تلفزيونيه عالميه , الصهاينه والإخوان هما التؤأم السيامي اللي ربنا ابتلى بيهم كوكب الأرض في بداية القرن العشرين وتحديدا بعد نهاية الكوليرا والطاعون , يعني خلصنا من الكوليرا والطاعون جالنا الصهاينه والإخوان !!. . أمريكا , الراعي الرسمي للإرهاب والدعاره السياسيه في العالم قررت إنها تنتج فيلم وثائقي عن ثورة يناير و 30 يونيو ( 3 سنين في عمر مصر ) , الفيلم هيظهر فيه بروس ويلز ويتكلم عن المناضل المصري البطل الهمام الجبار المخيف الوطني الشريف الأقرع أحمد ماهر القابع خلف أسوار السجون يا ولداه ( جيفارا الأقرع ) , ومش عارف بروس ويلز هيتكلم عن المناضله أسماء لا مؤاخذه محفوظ والبطل القومي سوكا ولا لأ ؟!!.

Mohamed Hussein 21 يناير  

· تم التعديل شوفت صوره حديثه لسميره سعيد , اللهم صلي على كامل النور , البت دي كانت من 20 سنه عضم على لحم ومش بالحلاوه دي , هي الناس دي لما بتكبر في العمر بتصغر في السن ليه ؟! , أنغام نفس الحكايه , وعمرو دياب كل ما يكبر سنه بيصغر سنتين , مين يصدق إن عمرو دياب أكبر مني ب 15 سنه ؟! ده كان بيغني أول أغانيه وانا لسه عيل صغير وبقول على السكر أوكَّر !! , أهو لو قابلني في الشارع دلوأتي هيقولي يا عمو أو يا أونكل . . البت بنتي الصغيره لمار صورتني من كام يوم وانا قاعد عالسرير نص قاعده كده ( أه نص قاعده ونص انقلاب ) فجت الصوره من فوق خالص , يعني top view , وصدمتني بالحقيقه المرّه , شعري اللي كان سلاسل دهب ( فوّتها دي يا مولانا ) , بقى فاضي ومش عمران خالص زي أحياء الفيلات اللي في العبور كده , بين كل شعرايه وشعرايه حته فاضيه لو زرعناها واستصلحناها هتكفي الوطن العربي من محصول القمح . . كان يجرى ايه يعني لو الواحد طلع مطرب وبقى غني ومشهور وقضى يومه كله في البيسين والجاكوزي , دلع بقى ومساج وكريمات وفازلين ومليطه , وبشره ناعمه زي بشرة البنات , قطيعه تقطع السياسه عالفيس بوك على المناهده ووجع الدماغ .

Mohamed Hussein 22 يناير

 هيبقى عقلك صغير أوي لو فهمت إن مصر حدوته منفصله عن محيطها , يعني مثلا , لو فصلت بين اللي هيحصل يوم 25 يناير الجاي ( بعد يومين ) وبين اللي بيحصل النهارده في مؤتمر جنيف حوالين سوريا . . الليله بتتقسم بره , على عينك يا تاجر , وسوريا هي الدبيحه اللي محطوطه عالترابيزه وانت الدبيحه المربوطه في العمود عشان ييجي عليها الدور , موقف مصر في أزمة سوريا أصلا متكتف , لو وقفت مع النظام السوري بوضوح وحاولت تحافظ على تراب سوريا من الإرهابيين هتكسب عداوة دول صديقه ومهمه لنا جدا , بالإضافه لعداوة أمريكا اللي هي أساسا مش طايقانا حاليا , ولو مصر وقفت مع المعارضه هتبقى باعت سوريا وقبلت بخرابها عشان تحمي نفسها من ( شر ) أمريكا و ( شح ) الريالات والدينارات !!. . وحضرتك لسه فاهم إن الليله هي الديموقراطيه و حالف لا تعمل ثوره كل يوم تلات !!. يعني الضرب على دماغ السيسي وعدلي منصور هيبقى من بره ومن جوه , وضغوط عليهم في موقف دولي يعرنا قدام سوريا ( تاريخنا مفهوش كده ) وإلا هنولّع لك في البلد عندك بعد يومين والبيت الأبيض بقى هيشجب وأوباما هيستنكر وهتبقى ليله يا عمده , وانا مطلوب مني أنزل أخربها معاك عشان أبقى مناضل وثورجي ويبقى من حقي أطلّع كارنيه الثوار ؟!

Mohamed Hussein 22 يناير

 أيوه أنا . مكانشي عندنا لعب أطفال واحنا صغيرين , لا عربيات بالريموت ولا عروسه بترقص وتغني , وكنا بنعمل العربيه اللعبه من الطين من على جسر القنايه واحنا بنروي الأرض , نعمل عربيه و 4 عجلات بالطين ونجيب حتة حطب صغيره ( أوشبره ) وتبقى هي دي الaxe اللي بين العجلات ونسيبها شويه تنشف في الشمس ونلعب بيها , والعروسه بنعملها من الطين ونجيب الورقه اللمّيع من أي علبه سجاير كليوباترا مرميه ونلبسها للعروسه تبقى هي دي الفستان , كانت أجمل من باربي وفُله !!. . مكناش نعرف يعني ايه مراجيح وملاهي , بس كنا بنتصرف , نجيب حبل كبير ( سلبه ) ونربطه في سقف البيت في الحديده اللي بتبقى معموله لوزن الرز والقطن والغله وقت الحصاد و نتني الحبل ويبقى هو المرجيحه ونتمرجح , أو نربطه بين أي شجرتين كبار قدام البيت ونتمرجح عليه , أجمل من دريم لاند وكدزانيا . . ما عمريش كان عندي شنطه جلد , لحد تالته اعدادي , كل شنطي كانت قماش , حته قماش من أي توب قديم وامي تخيطها بالإبره والفتله وتعملها شنطه وتعمل لها جيب كمان بالقماش برضه , مش مهم يكون عندي شنطه ماركة ديزني , دي أجمل . . في الصيف لما الناس ولاد البندر والأغنيا كانو بيروحو المصايف كنت أنا بروح أجمع القطن في أرضنا وأراضي الناس بطريقة ( الزمال ) أو حتى بالأجره ( 2 جنيه ) , واضم الرز واقطع القطن والدره . . أهو أنا فخور ببلدي دي , الطين والقطن والشجره والحبل وسقف البيت وتوب القماش , وشايف إن هي دي مصر , و هو ده أنا , مربوط بأرضها وطينها , مغروس فيها , مزروع زي الشجره , ............ مَنْ منكمُ يحبُّها مثلي أنا ... مثلي أنا ؟!!.

Mohamed Hussein 23 يناير

 يوم البوس العالمي . إمبارح 22 يناير هو يوم البوس العالمي , اللي اخترعه المصريين , وممكن ربنا يكرمنا ويتحول لعيد عالمي معترف بيه من كل الدول , زي الفلانتاين داي ( عيد الحب يا أونكل ) . الحكايه بدأت صدفه , صفحة الحريه والعداله كتبت بوست تعتذر فيه عن ممارسة الدعاره السياسيه 85 سنه متصله , نياهاهاها , وده الإعتذار رقم 101 على فكره , والمراجعه الفكريه رقم 56734 , ونبذ العنف رقم ألف , إنما بوست الإعتذار كان جميل ومرهف الحس , أول ما قريته تخيلته قُبله حانيه تطبعها الجماعه على خد 6 إبريل . . بعد شويه , وكنوع من رد الجميل أو رد البوسه , قامت صفحة 6 ابريل كتبت إنها كمان ظلمت الإخوان شويه كده , واللي بينا كان شيطان وراح لحاله , أنا قريت البوست على إنه حضن كبير من 6 ابريل للإخوان مع بوسه خاطفه في الشفايف . الإشتراكيين الثوريين دخلت عالخط , المشهد الرومانسي اللي شبه مشاهد معينه من فيلم تيتانك أو بمعنى أصح فيلم unfaithful شدت القيادات بتاعة الإشتراكيين لا مؤاخذه الثوريين , قامو هما كمان دخلو ببوستاتهم عشان يبوسو , على رأي عادل إمام في الفيلم ( أنا عايز أبوس زي الأستاذ يوسف شعبان ...قصدي زي الأستاذ 6 ابريل ). . في اللحظه دي اتأثر جدا البوب الصالح , بس هو عايش بره وعجّز خلاص ومبقاش له في حكاية البوس والفرهده دي , لكن المشهد أكيد فكّره بذكريات معينه من 60 سنه مثلا , أيام الدلع والشقاوه بقى والسوالف الطويله والبناطيل الشارلستون , البوب قال يشارك ولاده فرحتهم وأحضانهم , فشير اغنيه رومانسيه لحمزه نمره , فيها بقى البوس والجرح والفراق واللوع والكلام الحونين ده . اتفقو هما الأربعه إنهم هيتقابلو في الميدان بعد بكره ( الإخوان .. 6 ابريل ...الإشتراكيين ...والبوب الصالح هيراقب لهم الطريق ) , مظاهرات تحت عنوان ( قولي بحبك في ودني الشمال .. يسكت يسكت حكم العسكر ) ........... ميدان التحرير هيبقى رمز المليطه السياسيه , الله يرحمك يا عماد انت ومينا , الله يرحم شهدائك يا مصر . . اللي فات ده كان الهزار , ولو عايز الجد بقى , فده توقيعي واعتراف مني ورأيي الشخص , إننا جيل ابن صرمه فاشل , بنفهم بس في الثورات إزاي نثور , بنعرف نهد لكن مابنعرفشي نبني , ولو فينا اتنين قعدو مع بعض هيعملو 3 أحزاب مختلفه , كان نفسي أسيب لولادي وأحفادي ديموقراطيه حقيقيه تملى العين , فيها الشباب إيد واحده ومفهاش تجاره بدين ولا بوطنيه , ولا شعارات كدابه ورقص على جثث الشهداء , عشان كده وبما إننا فشلنا نسيب لهم حاجه نضيفه زي كده فانا قررت إني أسيب لأحفادي حتة أرض سليمه على بعض , زي ماستلمناها من أجدادنا سليمه , أرض مش متقسمه ولا محتله , هسيب لهم مصر مش سوريا ولا العراق ولا السودان !!.

Mohamed Hussein 23 يناير  

الخلاصه يابني وانت حر . الإخوان مزنوقين في كام جثه من الثوار بعد ما جثث رابعه فقدت بريقها شويه , كام جثه هيجيبو رِجل النحانيح والثورجيه وحركة معرفشي ايه وايه , يعني حضرتك هتنزل الميدان لو محرقتش وخربت هما هيبعتو اللي يحرق ويخرب بدالك عشان الشرطه تتهور وتتعامل بعنف ( نفس غباوتها المعتاده ) ولو الشرطه التزمت تماما بضبط النفس ورفضت التعامل بعنف ( يعني مفيش جثث من الثوار ) الإخوان هيبعتو اللي يخلّص برضه , هما جاهزين لكل الإحتمالات , السلاح موجود والقناصه موجودين وحماس مش هتقصر معاهم أكيد , ومش هيطلعو من المولد ده بأقل من 15 قول عشرين جثه , أهم ينفعوهم في الجزيره والواشنطن بوست والمليطه اللي بيعملوها وكربلائياتهم المعتاده , يعني من الأخر , هيقتلوك تحت شعار ( بيدي لا بيد الشرطه ) . . ده مش تهديد ولا تخويف , عقلك في راسك واعرف خلاصك , اللهم قد بلغت اللهم فاشهد .

Mohamed Hussein 23 يناير 

 مصر وسوريا في الميزان . شوف يا سيدي , مصر دوله لها حضاره طويييييييله جدا , ألاف السنين ( وسوريا كذلك ) , مصر فيها شعب عربي متمسك بعروبته ( وسوريا كذلك ) , مصر فيها رجاله عندهم نخوه ( وسوريا كذلك ) , مصر فيها شريحه مثقفه ومبدعه وموهوبه فعلا ( وسوريا كذلك ) ....... يعني باختصار , أقرب الشعوب العربيه لنا هو الشعب السوري وكان تالتنا العراقي ربنا يرد غيبته !!. . طب سوريا قامت فيها ثوره ضد نظام فاسد ( ومصر كذلك ) , سوريا عندها شريحه تانيه من الأميه والفقر ( ومصر كذلك ) , سوريا فيها تنوع طائفي وعرقي شويه ( ومصر كذلك...مسلمين ومسيحيين واخوان وجهاديين وزفت الطين ) , سوريا دوله مجاوره لاسرائيل ( ومصر كذلك ) , أرضها مستهدفه من كلاب السكك ( ومصر كذلك ) . . طيب فين الفرق بقى ؟! ليه مصر فضلت متماسكه ( لحد النهارده وربنا يكملها بالستر ) وسوريا لأ ( ربنا يرجعهالنا بالسلامه ) , سيبك من جرايم بشار وجرايم الإرهابيين هناك , هقولك على حاجه تانيه خالص , وصمة عار في جبين الجيش السوري العظيم إنه يسمح لأرضه إنها تُنتهك من كلاب السكك ويفقد السيطره في لحظات ما على مدن وقرى سوريه , أسلحه وإرهابيين وميليشيات من كل مكان , وهنا تحديدا , هنا بالظبط , لازم حضرتك تنحني احتراما لجيش بلدك, وإلا يبقى مفهومك عن الثوره والديموقراطيه إنك هتبيع البيت عشان تدخّل فيه كهربا !!.

Mohamed Hussein 24 يناير

 للسيسي ؟ لأ للجيش . مساء الخير - امبارح بتناقش مع مراتي , قالت لي أغنية تسلم الأيادي دي معموله للسيسي , قلت لأ معموله للجيش , قالت للسيسي قلت للجيش , قالت لي الجيش كان بيتعمل له أغاني لمانتصرنا في 73 , هيتعمل له أغنيه ليه دلوأتي ؟ قلت لها عشان اللي عمله الجيش في ال 3 سنين اللي فاتو أعظم في رأيي من انتصار 73 . . بنحارب الإرهاب يا محترم , عارف يعني إيه إرهاب ؟ , لأ لأ , مش يعني عيل صغير جه فجأه ورن عليك جرس الفيلا بتاعتك وطلع يجري , ده تعريف الإرهاب في النمسا عند مولانا المتعاطف , إله المتعاطفين والجرح والهوى . . الإرهاب في مصر وفي الوطن العربي زي ما حضرتك بتشوف كده , قنبله في عربيه تنفجر عن بعد ويموت كام عسكري , هجوم على كمين أو على عساكر غلابه نايمين في الخدمه وضربهم بالنار , تفجيرات هنا وهناك , أسلحه ومتفجرات ومليارات بتتصرف على ولاد الكلب , بني أدمين بتتقطع روسهم ويتلعب بيها كوره . . لما كنت بتحارب اسرائيل كان عدوك معروف ومكانه محدد مش في أرضك , حتى خطته للحرب النظاميه بتبقى شبه معروفه , إنما لما تحارب إرهاب موجود وعايش بينا تبقى بتحارب اشباح , في كل حي وشارع في مصر فيه إرهابي على الأقل , إرهابي رسمي ( معاه كارنيه ) أو إرهابي تحت الطلب , . بالمناسبه يعني وخلاصه القول , معرفشي في أي ديموقراطيه في العالم , ولا في أي ديانه سماويه أو حتى وضعيه , إن فيه حاجه اسمها التصالح مع الإرهابيين , والله ماعرف , وحياة بناتي والعيش والملح اللي بينا ما قريت عن حاجه زي كده , ممكن حضرتك تسأل في أمريكا أو النمسا أو البرازيل أو أي دوله ديموقراطيه تختارها بنفسك , إنتو بتتصالحو مع الإرهابيين ياخوانا ؟ وممكن كمان تسأل شيخ أزهري عالم أو قسيس أو حاخام ( عندكو حاجه اسمها التصالح مع الإرهاب في النصوص السماويه يا مولانا ؟ ) . . عشان كده , رأيي الشخصي إن الجيش والشرطه مطلوب منهم فورا حرق الإرهابيين وفرمهم بدون رحمه أو هواده , ده رأيي اللي بقوله بصفتي مسلم ورأيي اللي بقوله بصفتي واحد بيفهم شويه في معنى ومفهوم الدوله والديموقراطيه , لو حضرتك لك رأي تاني أرجوك أرجوك إنزل بدل العسكري اللي واقف خدمه وبعدين ابقى اتصالح , أو سيب مكتبك الهندسي واشتغل ظابط شرطه واتعامل بمعرفتك معاهم وورينا هتعمل ايه ؟!.

Mohamed Hussein 25 يناير

 ما لهُ وما عليه . صباح الخير , يارب النصر لمصر . - مبارك ربنا يجحمه مطرح ماهو قاعد قالها جمله حكمه قبل مايتنحى ويغور في داهيه ( سوف يذكر التاريخ ما لنا وما علينا ) , وأظن جه الوقت اللي التاريخ يتكلم فيه , 3 سنين كانو بمقام 300 , وكم الحقايق والوشوش الي اتكشفت فيه تكفى إننا نقول رأينا في فترة حكم مبارك . . أولا : ما عليه . رأيي الشخصي , إن تدمير التعليم والصحه وتجريف العقول وإفقار الناس وإذلالهم والرشوه والفساد والمحسوبيه وشلة المنتفعين مش هو ده أسوأ ما في فترة حكم مبارك , الجريمه الأعظم في عصر مبارك اللي يستحق عليها الإعدام ألف مره هي ( الجماعه الإرهابيه ) , اللي شافت في عهده أحلى سنين عمرها , كبرت وربربت وعملت لنفسها كوادر وتوغلت في مؤسسات الدوله , بقى لها تجاره بعشرات المليارات بعلم مبارك وحاشيته ,............ قريت تقرير من فتره بيقول إن جمال مبارك كان شغال بجزء من فلوس خيرت الشاطر !! . . كل اللي بيحصل النهارده واللي هيحصل لمدة سنين جايه مش بسبب حشد الجماعه ولا أنصارها لأنهم قله لا تغنى ولا تسمن من جوع , استمرار الجماعه الإرهابيه في التنفس الصناعي لحد دلوأتي سببه المليارات المتلتله , راس المال السياسي , مليارات خيرت الشاطر وحسن مالك وغيرهم , شركات ومدارس وفلوس مالهاش عدد في بنوك سويسرا وامريكا , مليارات تكفي لشراء الذمم والعقول والكتاب والصحفيين والإعلاميين وتكفي لرشوة رجال شرطه وقضاه وغيرهم . . الناس اللي حضرتك بتشوفهم في الجزيره زي وائل قنديل ومحمد الجوادي والناس اللي بتطبل للإخوان من سنتين للنهارده زي علاء صادق مش شرط يكون لهم انتماء لتنظيم الإخوان الإرهابي ولا حتى يكونو متعاطفين , دي مش مشكله خالص , هما بيطبّقو المثل اللي بيقول ( مين كَل عيش اليهودي بيضرب بسيفه ) , وهما كلو جاتوهات الجماعه فبيضربو بسيفها . . وقف الإرهاب والتحريض ضد مصر في الداخل والخارج يلزمه في المقام الأول , الوصول لمليارات الجماعه ومصادرتها ده لو عرفنا يعني , إنما اللي خدناه من نظام مبارك نبقى ناخده من نظام خيرت الشاطر !! . الله يرحمه عم جلال ( الحزب الوطني وجماعة الإخوان هما طرفي المقص لهذه الأمه ). . ثانيا : ما له : ........ مش فاكر حاجه لمبارك دلوأتي تنفع إني أذكرها بالخير !!.

Mohamed Hussein 25 يناير

 فكره حلوه ممكن نعملها . بقي يا مولانا ثوار يناير الشرفاء ماتو , الله يرحمهم , واللي مماتشي منهم رجع بيته , وجايز نزل تاني في 30 يونيو لما شاف بلده ماشيه في سكة ( اللي يروح ما يرجعش ) , واللي باقيين عالساحه دول في رأيي الشخصي شوية منتفعين أو بواقي ثورجيه فاهمين إن الثورجي دي مهنه بيمتهنها الإنسان , الموضوع تحول عندهم لإدمان . طيب مفيش مشكله خالص , إنما الناس والشوارع زهقت وقرفت واتخنقت منهم , برضه مفيش مشكله , إحنا ممكن نريّح الكل بفكره بسيطه . . الناس عايزه تثور , عايز أثور بقى , أطلب لي حاجه بقى ( وعندك واحد ثوره للمرحومه ) , خلاص يا سيدي هنخليك تثور , وعايز أحقق أهداف الثوره ونبني دوله معتبره بالديموقراطيه الأمريكاني بس هتكون دوله فخمه وفخيمه , ماشي برضه , سهله خالص , بس مصر مش حقل تجارب سيادتك و البلد تعبت من الشكشكه , كل واحد ماسك سرنجه في إيده وعامل نفسه دكتور وبيغزّ فيها . . أنا هريحك , ممكن النظام الحاكم في مصر حاليا يدِّي للثوار حتة أرض في الصحرا , ألف فدان مثلا أو حتى 10 ألاف فدان بحق الإنتفاع لمدة 100 سنه , يعني ببلاش يا مولانا بس مش تمليك , أصل ترابها مش للبيع سيادتك , ونعمل على الأرض دي سور كبيييييير وعالي , ونجيب الساده الأشاوس بتوع 6 ابريل والإشتراكيين الثوريين نقول لهم الأرض أهي , أعملو دولتكو هنا زي مانتو عايزين , ونتقابل بعد 100 سنه , هاتو أنصاركو ونحانيحكو و ورّونا الديموقراطيه هتعملوها إزاي ؟! ولو نجحت التجربه بتاعتكو بعد سنه ولا عشره نبقى نطبقها عندنا , يا سلام هو فيه حد يكره الخير . . بس انا عايزك تتخيل 10 أشخاص بس من 6 ابريل والإشتراكيين الثوريين قعدو مع بعض في مكان مقفول عليهم , وبدأو يفكرو وحاولو إنهم يتفقو على رأي , إنت حضرتك متخيل حجم المأساه اللي هتحصل ؟! هيبقى مشهد يندى له جبين البشريه , وبعد يومين هنلاقي أحمد المغير بيحكم دوله ( الألف فدان ) , متعرفشي دخل من البوابه إزاي ؟! , والساده الثوار قطعو ودن بعض و بيشرحو بعض بالموس زي خناقة الحلاقين !!.

Mohamed Hussein 25 يناير

 الرحمه يا نشطاء , إرحمو مَنْ في الأرض يرحمكم مَنْ في السماء , بلاش هري كتير وكلام مجعلص , مزهقتوش من ترديد الشعارات , مزهقتوش من الأوهام والخرفات و قصص السحليه العملاقه ؟!. . الناس نزلت النهارده ميدان التحرير تحتفل , وشالت صور السيسي , طب إيه اللي فيها دي ؟ ماهما الناس دي اللي في الأزمات كانو بيشيلو صورة عبد الناصر حتى بعد ما مات ب 50 سنه , السيسي مايلزمهوش حشد للناس في التحرير والميادين , إنت عارف كده كويس بس الوسواس القهري اللي انت فيه مش مخليك عارف تنام , وبتدخل المطبخ تخبّط في الحلل زي المجانين ,. . طب الناس بترقص وتغني , إيه علاقة ده بالرقص على دماء الشهداء ؟ هو السيسي اللي قتل الشهداء ؟ طب الشعب ده عنده غل دفين مثلا لدرجة إنه يسخر من شاب مات زي عماد ومينا ؟ مستحيل , الوحيدين اللي عندهم الغل ده هما التيارات الإرهابيه , هما اللي ممكن يسخرو من قتيل أو يمثِّلو بجثته أو يقطعو راس بني أدم ويلعبو بيها , برضه انتو عارفين كده كويس , لكن الهوجه بتاعة ( يسقط حكم العسكر ) لسه دايره زي السارينا في نافوخكو . . كل الحكايه إن الناس زهقت وتعبت وكان نفسها في زعيم , من سنتين قلنا البرادعي زعيم وبطل بس طل زعيم من منازلهم , وبطل من ورق , الناس محتاجه المنقذ المخِّلص , عندك حد تاني زعيم ؟ لو عندك اطبع له مليون صوره وانزل الشارع اقنع الناس بإن ( فلان الفلاني ) ده هو الزعيم المخلِّص , إقنعهم إنهم يشيلو صورته , أو هقول لك على حل اسهل , ما تعملش انت أي حاجه خالص و يوم ما تلاقي الشعب ماشي في طريق مش على هواك قول عليه شعب عبيد وجيل عرِّه !!. ......... وطبعا بالتأكيد ممكن تقول عليا فلول , هتريّحك الكلمه دي لما تقولها أنا عارف

Mohamed Hussein 25 يناير

 هو الشعب اللي نزل الميادين النهارده ده نزل عشان يحمي ثورته ؟ لأ , الشعب ده نزل عشان يحمي أرضه لأنه حس ولسه بيحس بالخطر , مش مشكلتي ولا مشكلة الشعب اللي في الميادين حاليا إن الثوره بتسبق الأرض في ترتيب أولويات حضرتك , الثورات بتروح وتيجي وثورة يناير مراحتش الحمد لله , بس الأرض لما بتروح ما بترجعش , ويلزمك حتة أرض تكون سليمه وكامله مكلمه , ساعتها بقى تعمل عليها ثوره , تعمل عليها شوربة فراخ , تعمل عليها حواجبك , مش مشكله . . عمرك انت سمعت عن شعب عمل ثوره في الغلاف الجوي و الفضاء الخارجي ؟ , ولّا يلزمك حته أرض تقف برجليك عليها , يعني بأقدام ثابته , على الأقل بفعل الإنتماء و قانون الجاذبيه يا عديم الجاذبيه !!

Mohamed Hussein 26 يناير

 فشخونا واحنا بنتاجر بدين ربنا يا بيه . صباح الخير - نويت أقطع كوبري اكتوبر واصلي العصر 4 ركعات حاضر الله أكبر , إلحقي يا جزيره , رشّونا بالمايه واحنا قاطعين الطريق و بنصلي يا سعادة البيه . . - دخّلنا سلاح في الخيام وقعدنا معتكفين جوه الخيمه , إلحقي يا جزيره , هجمو علينا في الخيام واحنا معتكفين بالسلاح يا سعادة البيه . . - بحرق في المدينه الجامعيه وانا صايم و برمي مولوتوف وبضرب خرطوش عالعساكر عشان أسلِّي صيامي , إلحقي يا جزيره , قبضو علينا واحنا صايمين وبنحرق الجامعه يا سعادة البيه . . - بعمل صفقه لدخول إرهابيين حماس لسينا وانا بحج , الحقي يا جزيره , اعتقلونا جنب الحرم وانا بحج وبعمل الصفقه يا سعادة البيه . . - أنا روحت أبرّ أمي وبالمرّه أخبي عندها صندوقين أسلحه و ذخيره , الحقي يا جزيره , فشخوني وانا ببر أمي وبخبي الأسلحه يا سعادة البيه . . - قيادي من الجماعه الإرهابيه : سيدنا رسول الله ملّس بإيده على برلمان الإخوان . - قيادي من الجماعه الإرهابيه : شوفت في المنام فخامة الرئيس مرسي وهو بيصلي إمام بسيدنا رسول الله وكل الأنبياء والملائكه وحملة العرش . . - بنت قيادي في الجماعه الإرهابيه : مرسي رفض يرد على مكالمة أوباما وقال لهم , قولو له رايح يصلي , مش فاضي يا حيوان . . - محمد الجوادي : السيسي بعد الإنقلاب العسكري كمن زنا بأمه في الحرم وهي حائض في نهار رمضان !!. . - محمد القدوسي على قناة الجزيرة : الجيش يقتل حفظة القرآن وقد نحتاج لجمع القرآن مرة أخرى !!. . ..............باختصار , ملخص الأحداث بعد 25 يناير و 30 يونيو في ذاكرة الجماعه الإرهابيه ( فشخونا واحنا بنتاجر بدين ربنا يا سعادة البيه ) , وفي الأخر بيستغربو من ألاف الشباب اللي ألحدو في مصر في ظرف سنتين . . إنما كان عندي سؤال , هو محمد الجوادي غير محمد القدوسي ولا هما نفس الشخص ؟ أصل العته ده لا يمكن يكون موجود عند اتنين بني أدمين على كوكب الأرض , يعني هما شخص واحد ولا تشابه أسماء محفوظ ؟!!.

Mohamed Hussein 26 يناير

 اطلاق قذائف على دبابه مصريه في سيناء واصابة ظابط جيش , تهديد بتفجير القطارات , انفجار عبوات ناسفه , اسقاط طائره حربيه مصريه بصاروخ أرض جو , تفجير مديريات الأمن , إلقاء قنابل مونه وانفجار هائل في معسكر أمن مركزي , دبح سائق تاكسي في الشارع , عشرات القتلى من الشرطه والجيش !!. هه بقى ؟ فين المصحف يا مولانا ؟ فين سبحتك يا شيخ ؟ , فين دقنك يا حَبر الأمه ؟ فين القدس يا مجاهد ؟ فين طريق الحق غايتنا ........ يا ولاد الكلب ؟!!. .... وبالنسبه للناشط السياسي بتاع الكولّه , فين عقلك يا ناشط ؟! طب فين الكبير بتاعكو طيب عشان أرد عليه ؟ أه مش موجود , مسافر أوروبا و بيكتب تويتات , ربنا يرجعه بالسلامه و يعينه على المسئوليه الجسيمه الملقاه على كاهله ( كتابة التويتات ), ربنا يحميه من شر شظايا الفولورز وخرطوش المتابعين ......... رجالٌ يسهرون الليل على تويتر من أجل حماية حدود الوطن من أيدي العابثين والإرهابيين , !! .

Mohamed Hussein 26 يناير

 الجهل سيد الأخلاق !! . بالمناسبه , رساله عايز أوجهها للساده الروائيين وكتاب السيناريو والمخرجين المبدعين الفخيمين الجبارين في أم التلفزيون والسينما المصريه , ورحمة أبويا وحياة بناتي , والعيش والملح اللي بينا ما فيه راجل في الفلاحين في ربوع مصر كلها بيقول الجمله دي ( إيهههيييييييييي ياجناب العومدِه ) , ولا فيه بنت في الفلاحين بتلبس قرطه دلوأتي ولا بتلبس عبايه اخضر على ازرق على فوشيه , أبوس إيد اللي خلفوكو , إرحمونا من الإفتكاسات دي وشغل البيض , أصل المشرحه مش ناقصه قتله . . البنات في الريف بيلبسو جيبه وبلوزه عادي والمصحف وعالموضه كمان واحيانا بلوزه وبنطلون وبيربطو الطرحه سبانيش أه والله , وهما في البيت بيلبسو عبايات مغربي واماراتي , والناس في بور سعيد واسكندريه مش بيقولو بعد كل كلمه الجمله دي ( أيووووووه يا جدعان ) , وتقريبا مش بيقولوها خالص , بطّلو انتو بس تكتبو أفلام ومسلسلات عن الريف المصري والأقاليم وانتو قاعدين في ( سيلينترو اللي في سيتي ستارز ) , إجلط الحنّه اللي على رجلك يا مولانا , وروح مدن القناه أو روح الريف المصري وشوف الناس عايشين ازاي وبيتكلمو ازاي وثقافتهم ايه ؟ , واهو بالمره تتعلم لك حاجه مفيده من عند الناس اللي بتفهم !!.

Mohamed Hussein 26 يناير

 هقول لكو على سر بقى بس متقولوش لحد ماشي ؟ . . أنا مش من هواه العنف في حياتي , ولا عمري رميت طوبه على حد مهما كان اللي بيعمله , لو كنت موجود في 25 يناير كنت نزلت شاركت وهتفت , لكن مكنتش ههجم على شرطه ولا غيره حتى لو ضربو علينا نار , بالكتير كنت هستخبى , ماهو أنا في اللحظه دي بفكر ان الشخص اللي قدامي ده ممكن يموت بسببي , يعني حجر يرشق في دماغه ويموته مثلا وبتخيل منظره وهو جثه قدامي , المنظر مش هستحمله طول عمري ايا ما تكون الدوافع عشان كده مكنتش هضرب حد , ولما نزلت في 30 يونيو كنت محمي بالجيش وكنا ملايين محميين أجسامنا بأجسام بعض ومكانشي فيه حد يقدر علينا ولا ميليشيات الإخوان ولا ميليشيات ابليس ذات نفسه , هو مين ده اللي يقدر على شعب في الشارع ؟!. . المهم يعني , نهايته , انا بقى عايز أقول ايه ؟ أه افتكرت , أيام بلطجة الداخليه وهي في عزها أيام حبيب العادلي مكنتش خايف , عشان انا واثق اني لو مشيت في حالي مفيش ظابط ولا عسكري كده هييجي يرمي بلاه عليا , وكنت هنزل في 25 يناير وانا مش خايف من نظام مبارك ولا من فلوله رغم ان معاهم سلاح , بس دايما عندي اعتقاد ان مفيش رجل شرطه غاوي يستحدم السلاح عمّال على بطال كأنه بيصطاد عصافير . . برضه الموضوع تاه من ايدي , هحاول أركز شويه , عايز اقول ايه ؟ أه , دلوأتي أنا بنتقد 3 أنواع من البشر هنا على صفحتي , الإخوان رقم واحد والنحانيح رقم اتنين والثورجيه المبرشمين رقم 3 ...النحانيح اخرهم يتهموك بالغباء والإنحطاط وانعدام القيم وإنك معندكشي سوشيال بوليتيكال انتيليجينس , والثورجيه المبرشمين بتوع الإشتراكيين الثوريين أخرهم يشتموك بالأب والقمع بأبشع الألفاظ اللي بتتقال في أفلام خالد يوسف عن العشوائيات والبيوت الصفيح . . من الأخر , الخوف كله من الإخوان وميليشياتهم , ده بجد وحتى في وقت السلم في الفتره الجايه , مش ضروري ابدا تكون ماشي في حالك وأخرك معاهم انك بتنتقدهم عالفيس , ده سبب كافي إنك تاخد عيار طايش وانت في أي مكان أو حتى في بيتك , الإحساس د مجاليش لما كنت بنتقد مبارك قبل وبعد ثورة يناير ولا جالي لما كنت بلعن ابو الداخليه هنا ولا جالي وانا بسب للمجلس العسكري بتاع طنطاوي , بس مع الإخوان لازم تخاف , كمية الغل والغباء اللي جواهم بتقول كده , عموما احنا دماغنا صرمه قديمه ومش هنبطل نكتب , سيبك من كل الهري اللي فات ده , أنا بس كنت عايز أقولك يعني إرهاب ...عرفت حضرتك يعني ايه إرهاب ؟!!.

Mohamed Hussein 27 يناير

 قواعد العشق الأربعون لمولانا البرادعي . صباح الخير - فيديو لعملية تفجير الطائره الحربيه المصريه على يد معرفشي مين من أم المجاهدين اللي في سينا , وقبل كده بيانات مكتوبه وصوتيه لأنصار جماعة معرفشي أم مين كده اللي بتعلن مسئوليتها عن تفجير مديريات الأمن , وبتهدد المصريين لو نزلو من بيوتهم . . في الخلفيه قناه حقيره بتسوّق للفكر ده , وأنصار ربنا نزع منهم العقل في سن مبكره وحط مكانه صندل بلاستيك , وقيادات إرهابيه مرميه في السجن , دراكولات اتربو على شرب الدم . . صاحبك النحنوح والثورجي والأبريلي لسه مش مصدق , ومش هيصدق , بالك إنت محمد بديع لو طلع في التلفزيون حلف طلاق بالتلاته إنهم جماعه إرهابيه بنت صرمه , وإن الجزيره وحماس والجهاد والعفريت الأزرق مجرد فروع لأخطبوط اسمه الإخوان برضه صاحبك النحنوح مش هيصدق . . طب ليه مش هيصدق ؟ لأن مجرد فكرة إن مصر فيها ارهاب رسمي فهمي نظمي بياكل في حيطانها زي السوس و بيستخدم كل أنواع الموبقات اللي ربنا خلقها لهدم الدوله المصريه , الفكره دي بتتعارض مع مبادئ وأهداف راجلنا الكبير اللي بيجيب لنا اللحمه البتلو والديموقراطيه من بلاد بره , يعني باختصار بتتعارض مع ما ورد في كتابنا المقدس ( قواعد العشق الأربعون في الحب والهوى والمصالحه ) لمولانا نحنوح الدين البرادعي !!.

Mohamed Hussein 27 يناير

 ثيروكسين , اسلاميين , بنسلين , برادعاويين , إنسولين , أبريليين , نوفالجين . عمرك جرّبت الإحساس ده ؟ إنك تنام بعمق لمدة نُص ساعه كامله , تنام تنام يعني مش أي كلام , يعني تدخل في النوم وتجيبه من الشمروخ الجواني , يعني تشخّر وتحلم وتروح عن الدنيا ؟ أنا جربته , أه من 3 سنين ومن ساعة ثورة يناير ( المجيده ) جربت الإحساس ده مرتين , كل مره نص ساعه , غير كده ببقى نايم وعيني مفتوحه زي الديب أو الجمل أو زي الديك مش فاكر مين من زمايلي الحيوانات اللي بينام كده , ببقى نايم و ممكن اكلمك ونتناقش عادي خالص واكل واشرب وبعد شويه تقول لي قوم بقى عشان معاد شغلك جه , واقوم البس وانزل ده على أساس إني كنت نايم !!. . نُص ساعه نوم عميق كل سنه ونص ( كل سنه ونص وانا طيب ) , معقولين يعني عشان استعادة التوافق العصبي العضلي في جسم الإنسان , يعني الواحد يعرف راسه من رجليه , أوقات بحسّ إن كرات الدم الحمره خرطت عندي على كرات الدم البيضا وعملو نوع جديد لونه اورانج بس روعه , كرات الدم الأورانج بتقوم بدور الإتنين فترة الصبح ...... وبالليل بتقدم برامج توك شو !!. . الطحال عندي بيستعبط أحيانا وبيفكر نفسه القلب , و ينبض بقى زي اللي بصحيح , شويه كمان ويتقمّص الدور ويقولك انا عندي أُذين وبطين وانت لأ , لأ والنبي يا شيخ ؟ طب وريني الصمامات بتاعتك كده يا مولانا الطحال ؟ وريني الصمامات ياض ؟والنبي انت عيل فاشل وماتعرف الفرق بين صمام القلب وجلدة الحنفيه !!. ياكشي بس الإعلام هو اللي عمل منك عضو مهم في جسم الإنسان , إكمن يعني الجسم بيتوجع ويتألم أول ما ينضرب بوكس في بطنه بسببك , بس انت أخرك يوم ما بتقرف جسمي بتتشال وتترمي ولا أي مشكله . . كله كوم والبنكرياس كوم تاني , أحيانا كتير بيثور ويهيج ويقول لي لأ , أنا معترض , مش هلعب معاكو , مش هشتغل الشغلانه دي تاني , ويروح يخبّط على باقي الأعضاء ويطالبهم بالنزول والتظاهر والإعتصام , طب زعلان من ايه يا عم البنكرياس ؟ يقولك أنا تعبت من إفراز الإنسولين , عمّال بشتغل زي الطور المربوط في ساقيه ليل ونهار وفي الأخر بتعب , أنا ضهري وجعني من الشعلانه دي وعايز أنقل فرع الثيروكسين مكان الغده الدرقيه , إشمعنى أنا بتعب أوي و هي قاعده في الأنيخ وكل فين وفين على بال ما بتتعب ؟! . . ......... وليا طلب كمان , تنبّه عالجهاز العصبي عندك يهدى شويه , مش كل ما تشوف المزه بتاعتك نلاقي ماسورة هرمونات طفحت في المكان ولا شوارع المرج وقت المطر ونقعد احنا بقى نتبل ونتعك ونجيب فوطه وننشف نفسنا , يا إما تجيب لك عربية شفط هرمونات وترحمنا , مممممممم مع إن الحكايه دي كلها توتر يا صاحبي البنكرياس , لأ لأ , توتُّر مش ( تويتر ) , إنت عايز توقعني في الغلط ليه يا ( مان ) ؟! . . المعده بتحلم تبقى مكان فقرات الرقبه وفقرات الرقبه أمل حياتها إنها تنزل تحت عند السمّانه , والنقّاش بقى ناشط سياسي و نجار النابوليا فقيه دستوري , والطبيب بيشتغل مهندس , يعمل رسمي كروكي ودستور للمدينه ويقعد بقى يهندس علينا , والمهندس بيشيل سلاح وعايز يبقى ظابط , و يا ظابط يا خابت , والشيخ بيطلع عالمنبر يرقص , كله قدام الكاميرات بيرقص , مع إن الرقاصه نفسها تابت !!. . صوفي خدت مكان كليوباترا , وشجرة الدر بقو يدلعوها ويقولو لها يا باكينام , يا باكي ( روحي يا بت يا باكي ... تعالي يا بت يا باكي ) , بالذمه مش حالنا احنا اللي باكي ؟!. . كل ده بيحصل في جسمك يا مصر وانتي صابره ومستحمله , لا بيهدك ريح و لا نحانيح ولا قنبله , .......... على جسم مصر التاريخ هيقول ما يشاء , وانا كمان هقول ما أشاء , دي مصر العظيمه , مصر الكريمه , مصر يا ولاد اللئيمه مش حفلة شواء !!.

Mohamed Hussein 27 يناير

 الفريق أول عبد الفتاح السيسي بعد ما مات 17 مره قبل كده اترقّى وبقى مشير , و استقال من وزارة الدفاع و اترشح للرئاسه بصفه رسميه ( يعني بقى مشير ورئيس مصر في نفس اللحظه ) , الراجل ده فيه حاجه لله و كل ما بيموت صحته بتتحسن أكتر ,... الإنقلاب يترنّح !!

Mohamed Hussein 27 يناير  

بعد خبر ترقية السيسي وترشحه للرئاسه , محمد الجوادي اللي طلع عالجزيره من كام يوم وقال ( السيسي كمن زنا بأمه في الحرم وهو صائم ) , وهيعتذر عن زله اللسان دي ويقول ( أنا كنت بقصد أمي أنا يا جدعان , أمي أنا والله ) !!.

Mohamed Hussein 27 يناير

 شوف بقى يا عبفتاح ياخويا , صلي عالنبي عليه الصلاة والسلام , بقى احنا وقفنا جنبك ومكنّاش بنستحمل عليك الهوا الطاير عشان انت كنت وزير الدفاع , يعني قائد الجيش وده منصب له قدسيه خاصه , ده جيش مصر العظيم الوطني البطل , وانت كمان مقصّرتش معانا , وقفت مع الشعب في أزمته وانت ورجالتك حميتو مصر في لحظات ما يعلم بيها إلا ربنا , موقف شجاع وبطل صحيح بس انت خدت حقك تالت ومتلت , ترقيات وشعبيه جارفه وملايين العشاق اللي هينتخبوك في الرئاسه , صورتك بقت في كل شارع وبيت , طلبت تفويض عملنالك اتنين , يعني كنت راجل معانا واحنا رجاله اوي معاك , اللي فات ده كان حماده واللي جاي حماده تاني خالص , انت دلوأتي هتبقى رئيس مصر , يعني منصب سياسي , والغلابه عشمانين فيك بعد ربنا أوي , يعني من الأخر إنْ أحسنت هنشيلك على راسنا من فوق , وإن أساءت ولعبت بديلك زي اللي قبلك ,.... إيه ده ؟ مين اللي طفى النور ؟ ولّعو النور , يا ابراهيم , إنت روحت فين يا ابراهيم ؟!!

.

Mohamed Hussein 27 يناير

 عبقرية السؤال وعبقرية الإجابه !! . بقى سؤال بيتسأل لي عشرين تلاتين مره في اليوم بمنتهى العفويه ( والعبط ) : هو الدوا اللي مش عندك ده ألاقيه فين ؟! ده السؤال العبقري , أنا كمان اجابتي العبقريه بتبقى كده ( إجابه نموذجيه ) : الدوا ده حضرتك تلاقيه في أي صيدليه تانيه !!. .... المهم الزبون اللي سألني السؤال العبيط بيقتنع بالإجابه العبيطه اللي انا جاوبته بيها ويمشي وهو مبسوط أوي !!. شوف بقى مكمن العبقريه في السؤال ( ألاقي الدوا ده فين ) , على أساس إني كل يوم الصبح بعدّي عالصيادله في صيدلياتهم وهما لسه بيرشو مايه قدام المحل واسألهم , هه يا ولاد ؟ عندكو كام ألف نوع دوا النهارده ؟ طيب ممكن أعرف أسماء الكام ألف نوع دوا اللي متوفرين عندكو ؟!! . شوف بقى مكمن العبقريه في الإجابه ( في أي صيدليه تاني ) , ماهو لو زبون مفتح , المفروض يقول لي ( لأ يا شيخ ؟ تصدق انت نوّرتني , دانا كنت هروح ادور عليه في أي محل فول وتميس مش في أي صيدليه تانيه ) !!.

Mohamed Hussein 28 يناير

 منايفه يا رسول الله . صباح الخير . - السيسي طلع منوفي , السيسي طلع منوووووووفي , يادي الجورصه ام حناجل , يعني تالت رئيس منوفي لمصر على التوازي , السادات وبعدين مبارك وأخرهم السيسي , طبعا مرسي كان مجرد فاصل في كتاب التاريخ ( يعني كوما , اللي هي دي , ) , اللي بتتحط بين الجمله والجمله اللي بعدها يعني , محدش يستهتر بالكوما , دي بتبقى مهمع لالتقاط الأنفاس , يعني تكتب جمله و بعدها كوما وبعدين جمله تانيه , خد لك نفس بقى . . - إنما تالت رئيس منوفي على التوالي , المحافظه دي فيها إن , وتستحق التكريم , فانا من رأيي نعدّل الدستور تعديل نونو صغير كده , ونقول إن جمهورية مصر العربيه دوله مدنيه عربيه وعاصمتها المنوفيه , عشان بس نرتاح من شحططة الرؤساء بين المحافظات , إحنا ناخد لهم العاصمه و ختم النسر والحاشيه و الصولجان والجمبري والخيار المتقشّر لحد عندهم , او نختصر أكتر ونجيب من الأخر ونقول إسمها ( جمهورية مصر المنوفيه ) يا محترم !!. . - طبعا مرسي ضرب سمعة الشرقيه لمدة 300 سنه جايين , مين في مصر هيجرؤ ينتخب رئيس شرقاوي بعد ما شاف مرسي ؟! , تخيل مبارك في 30 سنه فساد ماضربشي سمعة المنوفيه , ومرسي عملها بسنه واحده من الهطل والبهلله ؟! , إنما أنا ناوي بإذن الله أترشح للرئاسه مستقبلا , عشان المنصوره تاخد فرصتها , دي محافظه جميله أوي وتستاهل تاخد فرصتها , كلها ( أي أي أي ) سنه لما سيادة المشير عبد الفتاح السيسي يخلص مدده الرئاسيه واترشح على طول , سهله يعني والأيام مفيش أقرب منها , 2 في 4 يساوي 8 , و 3 في 4 يساوي 12 و 8 في 4 ب 32 , ناخد اتنين و يتبقى معانا ال 3 , أهو الواحد يادوب يلحق يجهز نفسه ويهتم بمحافظة الدقهليه عشان السمعه بتفرق , أول حاجه هعملها إني أقتل توفيق عكاشه ومحمد حسان , وسهير ذكي الله يرحمها , لأ لأ , سهير لأ , سهير لأ !!. . يكفي المنصوره فخرا إنها بلد الشعراوي وجاد الحق وام كلثوم واحمد لطفي السيد وابراهيم ناجي والحاج حسين ابو عبرحيم ( ده جدي الله يرحمه , اتجوز 3 مرات وخلّف ييجي 17 عيل ) !!.

Mohamed Hussein 28 يناير

 عن قتلى الإخوان ( ربنا يرحمهم برحمته ) . وردِ الخبرِ التالي يا ساده , عن مولانا حَبْر الأمّه , قال الراوي لشاب حصاوي , إنزل يابني و زيح الغُمّه , إنزل يالله في ثوره وعِيد , بكره تموت وهتبقى شهيد !! . وانت يا شيخنا هتنزل برضه ؟ , لأ يا إبني , إنزل إنزل يالله وسيبني , أصلي عريس لا مؤاخذه جديد !!. . نزل الشاب بيهتف يحرق , جَتْ له الطلقه ف حلّق حوش , بص بطرف عنيه لثواني , مين القاتل مين الجاني ؟ لمح الشيخ في اديه خرطوش !!. . أم الشاب دي طلعت تجري , ابني يا شيخنا بيدرس عندك , جالك مرّه عمل لك بَيْعه , ...إبنك مين يا وليه يا صايعه ؟! , يالله انكشحي وبطَّلي حرك وفرك و بَرَم , أصلي مسافر ويا عروستي و رايح شرم !!.

Mohamed Hussein 28 يناير

 مرسي بدأ ينفعل في المحاكمه , بيسأل القاضي ( إنتو مين ؟ ) , مَنْ أنتم مَنْ أنتم ؟ ( القذافي ستايل ) , ورأيي الشخصي إن إنفعال مرسي النهارده معناه حاجه واحده بس , إن الإتصالات اتقطعت بينه وبين خيرت الشاطر وبديع , مبقاش عارف يقول ( القصاص القصاص ) , يعني العقل اللي بيفكر له اختفى , وبالتالي مرسي رجع يتصرف على سجيته , أهي دي بقى سجيته !!. . يا ريس مرسي يا شيخ الصيادين , إنت بتتحاكم في محكمه مصريه قدام قاضي مصري اسمه ( إكس ) في قضيه اسمها ( إكس ) , وانتو كجماعه ارهابيه فلوسكو متلتله ( أه بتاعة محل العطاره اللي سابهولكو المرحوم !! ) , ولو مش معاكو شوية مليارات فكه ف قطر موجوده , وتركيا موجود , واسرائيل وأمريكا هما كمان موجودين وانتو صحابكو كلهم ولاد صرمه و بيحبو يخدمو في الخراب . . يعني حضرتك يا جناب البهلول اللي كان بيحكم مصر هتقدر تجيب بدل المحامي ألف , أساتذه كبار , سليم العوا بقى وغيره , فريد الديب نفسه ممكن يخلّص مع مبارك وييجي يكمل معاك مفيش مشكله ( بالمناسبه سليم العوا كان محامي شفيق ) , عايز أقول انك مش أحسن من مبارك في حاجه ( واحد كان بيبيع البلد قطّاعي والتاني بيبيعها بالجُمله ) , مبارك كمان قعد سنتين تلاته يتحاكم وطلع براءه أو هيطلع وانت شرحه , طالما المليارات موجوده يبقى سيب الإحساس بالظم ده للغلابه وبلاش تعيش الدور أوي , كلها سنه ولا اتنين وتطلع عشان تتحفنا انت و أمثالك بالأخلاق الحميده والقنابل والسبحه والتفجيرات والدقن والإغتيالات .... واهي دايره وبنلف فيها !!.

Mohamed Hussein 28 يناير  

حاجه كده مش فاهمها ولا عمري فهمت لها سبب , ليه الجماعه الإسلاميه مثلا لما تتخنق من الشرطه تروح تحرق كنيسه ؟ و الجماعه الجهاديه لما يكون لها تار بايت مع الجيش تروح تفجّر كنيسه ؟ ولما راجل إخوانجي يتخانق مع مراته يروح يشخبط على كنيسه ؟ ولما سلفي يترفد من شغله يروح يكتب شعارات عنصريه على كنيسه ؟! , ليه الكنيسه المصريه اللي عمرها أكتر من ألفين سنه بتعتبروها الحيطه المايله اللي في البلد ؟... وفي النهايه عايزني أنا كمسلم ( عاقل ) أتعاطف مع مين ؟ الظالم ولا المظلوم ؟ الإرهابي المسلم ولا المسيحي اللي عايش في حاله ؟!!.

Mohamed Hussein 29 يناير  

بنات أفكاري . صباح الخير - جت لي فكره , أهي حاجه كده من بنات أفكاري , قال خير اللهم اجعله خير , بحلم إني أقدم برنامج تلفزيوني , بس مش بطريقة الهرتله اللي موجوده دلوأتي ( أرى هرتله ولا أرى طحيناً ) , ومعانا الضيف الفلاني الخبير والمحلل الإستراتيجي ألف دال , أو ألف دال ميم , أو حتى ألف دال ميم عين !!. . فكرتي بتقول باختصار إني أتكلم عن مصر , أربط السياسه بالشارع , أجمع بين الفيسبوكيين ( اللي قاعدين عالفيس ) , والمصطبيين ( اللي قاعدين عالمصطبه ) , لغة الخطاب تبقى مزيج بين الإتنين , مصر مش هي البرادعي وتويتر ولا هي الراجل اللي مش لاقي ياكل ولا هي الغني اللي ساكن في الرحاب ولا الفقير اللي ساكن في بيت صفيح , مصر واقعه بين الإتنين , ( واقعه من الوقوع يعني ) . .مستقبل مصر مش بس في إيد الراجل المثقف أبو نضاره اللي بيقول ( إنفرا ستراكشر ) ولا في إيد الراجل النقّاش اللي بيشتغل باليوميه وبيقول ( عايزين الأمن ...حالنا وأكل عيشنا واقف يا بيه ) . . مصر الحقيقيه مش سيئه أوي زي ما بيصورها خالد يوسف في أفلامه تحت داعي ( الواقعيه ) , بالعكس , مصر أجمل من تصوير ساندرا نشأت في فيلمها التسجيلي عن الدستور , بس دوّر انت عالجمال وهتلاقيه . . مشاهد في البرنامج هقدمها من الكوفيهات الغربيه الفخيمه واشوف دماغ الناس هناك ومشاهد وسط الغلابه بدون إسفاف ولا تصويرهم بشكل مهين , إسمع من ده وده واعرف بلدك , بمعنى أصح هاخد المواطن الغني أوي أو المثقف جدا في جوله لحد الفقرا عشان يشوف بعنيه وهاخد الفقير في رحله وسط المولات و مطاعم المينيمم تشارج . . يتهيألي أنا عشت سنين طويله هنا وسنين طويله هنا , وقناعتي ويقيني إن مصر فيها دولتين اتنين منفصلين تماما , دوله فووووووووق أوي ودوله تحت الأرض ومفيش وسط , بالمناسبه مين فيهم اللي فوق ومين اللي تحت دي بتعتمد على نظرتك انت , ومالهاش علاقه بالحاله الإقتصاديه ولا المستوى المادي , دي نظره محدوده للأمور , ضحكة الغلابه ونومهم راضيين بيخليهم هما سكان الدوله اللي فوق !!. . نفسي أتكلم عن الحب بمفهومي , مش مفهوم خالد يوسف ولا مفهوم ياسر برهامي , أصل الحب مش هو الدعاره ولا هو شغل الزرايب !! , قصة الحب بين فلان 17 وفلانه 15 سنه , نظرات العيون وخدود البنت اللي بتقلب ألوان , مين كان بيحب زميلته في الجامعه وأجمل يوم في حياته يوم ما مسك إيديها , حكاية بنت الجيران وعمايلها , شاورت له بطراطيف صوابعها وهي معدّيه , قالت له لو سمحت ما تمشيش ورايا , ولما اتأخر شويه بدأت تتلفت حواليها , وتسأل نفسها : هو بطّل يمشي ورايا ليه ؟!!.

Mohamed Hussein 29 يناير

 ياللي هواكي اتوصف للصبّ و المعلول أجمل ما فيكي الهوى واجمل ما عندي القول و عجزت إني انصفك بالعقل قلت اوصفك هو

 انتي شئ معقول ؟! . . محمد حسين من ديوان ( مكتوب ) 

Mohamed Hussein 29 يناير

 حوار تخيلي واقعي !! ........................ وقال صاحبي إن السيسي لو بقى رئيس مش هيعمل حاجه للبلد وده رهان !! . أنا : طب إنت عايز السيسي يعمل ايه يا صاحبي ؟ صاحبي : عايزين نقضي عالفقر والجهل في ظرف 6 شهور وننظم المرور في 50 يوم ونحل مشكلة الزباله في اسبوعين تلاته. . أنا : وإيه كمان ؟ صاحبي : وعايزين ديموقراطيه وحريات والشرطه تتعامل معانا بالغاز اللي بيسبب الضحك زي شرطه سويسرا قبل نهاية السنه دي . . أنا : وإيه كمان ؟ صاحبي : ونعمل مشروعين تلاته عملاقين , يعني نزرع الصحراء الغربيه قمح والصحراء الشرقيه يوستفاندي ونصدر بقى للعالم ونغتني عالصيف الجاي . . أنا : وإيه كمان ؟ صاحبي : ونصنع صواريخ عابره للقارات ودبابات بتعوم في المايه وتطير في الجو وكام ألف قنبله ذريه وندمر اسرائيل ونحرر القدس قبل عيد ميلادي الجاي . أنا : وإيه كمان ؟ صاحبي : مرتب 3 ألاف جنيه لكل عاطل عن العمل وخدمه واي فاي في كل شبر في أرض مصر , والسجون بتاعتنا تبقى 5 نجوم والمدارس الحكوميه تبقى في مستوى الإنترناشونال ونعلم الأطفال الفروسيه والشيش و هوكي الجليد . . أنا : وإيه كمان ؟ صاحبي : وإعانه لكل شاب 180 ألف جنيه عشان يتجوز وعربيه صغيره كده هديه بمناسبة جوازه وشقه اوضتين وصاله في الشروق , والقضاء على البيروقراطيه ونظام الدمغه وطابع المهن التعليميه وفرخ الكربون وكل مصالحنا تبقى كومبيوترايزد . . أنا : وإيه كمان ؟ صاحبي : ونعمل جزيره في كل شارع في مصر نزرع فيها ورد وفل وشجر كازوارين عشان الأكسجين وصحة ولادنا وكده يعني . . أنا : طيب الفكره الأخيره دي حلوه , قوم بقى انا وانت نزرع الشجره دي في الحته اللي هناك دي . صاحبي : يا راجل كبّر دماغك , يعني هي الشجره دي اللي هتحل مشكلة التلوث وهتجمّل القاهره ؟ , إنت مش شايف المنظر عامل إزاي ؟!!.  

Mohamed Hussein 29 يناير

 حبِّة أمل . حوِّدت أبيع الأمل على ناس رماها الطير و قلت مين يشتري منِّي سنابل خير ؟ سألو بكام الأمل قلت ببلاش يا بشر قالو ببلاش ده كتير !!. . . محمد حسين

Mohamed Hussein 30 يناير

 يعني ايه ؟! . صباح الخير 1- يعني إيه إبداع ؟! . - يعني أم كلثوم تغني من كلمات الشاعر الطبيب إبراهيم ناجي ( وضحكنا ضحكَ طفلين معاً , وعدونا فسبقنا ظلنا . . - يعني محمد صبحي يقول لسعيد صالح في المسرحيه ( قول أه ) فيرد مدبولي ويقول ( أه ) , محمد صبحي يقول له مش انت اللي تقول , مدبولي يرد ( يابني انت مش شايفه نايم تعبان ومش قادر يقول حاجه اهو ) , سعيد صالح يدخل في الحوار ويقول للدكتور محمد صبحي ( يعني أنا لما افتح بؤي واقول أه هتعرف انا عندي ايه ؟ ...حاجه غريبه والله ودكاتره بتتلكك ) . . - يعني سهير الباروني ترجع من عند المنتج وهي طايره من الفرح عشان طلب لها لحمه وطلب لها بيره ( وطالابلي بييييييييييييره ) , ومدبولي يسأل الدكتور انت بتشتغل ايه ؟ أنا دكتور , ...طب معاك بطاقه ؟ لأ ...تبقى حرامي , إنت بتشتغل إيه ؟ أنا بشتغل بطاقه , طب معاك حرامي ؟ لأ , تبقى انت الدكتور !!. . يعني إيه شجن ؟! . - يعني ابو العسكري الشهيد يقول لوزير الدفاع في جنازة ابنه , إبنى فدا البلد ولو عايزني أتطوع أنا كمان في الجيش وابقى مكانه , يعني في الصعيد لما بيموت منهم عسكري في حرب ضد عدو خارجي أو داخلي ويرجع جثه لبلده بيقابلوه بالزغاريط ويباركو لابوه ويمنع منعا باتا البكاء والصراخ وحتى الدموع . . - يعني بنتي لوجي ( 7 سنين ) وانا جايبها من المدرسه امبارح تقول لي ( يا بابا انت عارف العصايا دي اللي بيسموها العكاز ؟ أه يا لوجي , طيب انت لما تكبر وتعجّز , إبقى اسند على كتفي واعملني عكاز لك ) !!. . يعني إيه حموريه ؟! . - يعني صاحبك يفضل لحد دلوأتي فاهم إن أبو الفتوح مش إخوان وإن خالد على يعرف يحكم حته في مصر أد مساحة الصيدليه اللي قدامي دي , وإن أوباما بيبيع ديموقراطيه وسبح وفارش قدام البيت الأبيض بسجاجيد صلاه وإن الواشنطن بوست والسي إن إن و الجزيره و غيرها بيمثلو الإعلام اللامؤاخذه المهني اللامؤاخذه المحترم اللامؤاخذه الشفاااااااااااااااااااااااااااف !!.  

Mohamed Hussein 30 يناير  

وتلاقي صاحبك إياه لمّا مرشحه وحزبه يحكمو مصر يقوم هو ناشر بقى مقولة الحجاج بن يوسف عن مصر وجمالها وجمال أهلها والغمّازات اللي في خدودها وإزاي إننا شعب حر متدين مثقف شامخ . . ولما حزبه ومرشحه يغورو في داهيه يقوم ناشر مقولة ابن خلدون ولا معرفشي ابن مين اللي بيقول فيها الشعب المصري شعب عبيد . . يعني احنا في رأي صاحبك يا إما حلوين أوي وشعب ماحصلش يا إما عبيد وزباله ( حسب الظروف يعني ) !! . . ولما يكون حزبه راضي عن الجيش المصري يقوم هو ناشر بقى حديث خير أجناد الأرض وينشر فيديوهات عن بطولات وانجازت الجيش المصري . ولما يحصل العكس يقول جيش إلهام وجيش سوسن وجيش عبيد. . كأن مصر وجيشها وأهلها وتاريخها الطويييييل مستنيين شهاده منك , يا بقف , يا خلفة الندامه !!

Mohamed Hussein 30 يناير

 مجرد ملاحظه . مرسي البهلول أيام ما كان بيحكم مصر راح يزور روسيا , وهناك قابله في المطار عمدة مدينة معرفشي ايه كده ( زي رئيس مجلس محلي السنبلاوين مثلا ) , وخده معاه ( في توكتوك تقريبا أو ميكروباس مش فاكر ) عشان يقابل الرئيس الروسي اللي كان بيتفرج على ماتش , وكانت المقابله بين الشوطين , يعني بوتين خصص من وقت سيادته السمين بتاع 10 دقايق قول 12 دقيقه عشان يلحق يتفرج على اعلانات بيبسي و شيبسي قبل الشوط التاني . . عايزك تتخيل إن عبد الفتاح السيسي أو حمدين صباحي مثلا بقى رئيس مصر و راح يزور روسيا , حد فيهم هيقبل يتعامل بالطريقه دي ؟ طب بوتين هيجرؤ إنه يعامل حد منهم بالطريقه دي ؟!.... للأسف بوتين قبل ما يتعامل مع مرسي فهم أهم نقطتين يحددو طريقة التعامل واتصرف على أساسهم , أولا إن مرسي ده رئيس لجماعه محظوره مش لدوله كبيره اسمها مصر , ثانيا إن مرسي عاش طول سنينه في الجماعه دي بيشيل جزمة المرشد و يمسك له الميكروفون !!.

Mohamed Hussein 30 يناير

 كنت أه عريان وحافي كنت رغم البرد دافي كنت صوت للخير بيدّن كنت نبع جميل وصافي . كنت عاشق للبشر كنت مغرم بالنفوس كنت بنحت في الحجر كنت وسط الشوك بدوس ملعونه يادي الفلوس !!. . . محمد حسين

Mohamed Hussein 31 يناير  

العصابه يا بابا . مساء الخير - القبض على الصيدلي الفتك النصاب سعيد حساسين , لساني وجعني من المناهده , مجرد نصاب ( وكل مهنه فيها النصابين بتوعها ) , الأفندي اشتغل في المعجنه بتاعة عادل عبد العال , هنعالج لكو السمنه والضعف الجنسي والسرطان والإيدز والسكر والغده الدرقيه وعرق النسا بخلاصة نبات الزوربيح ( مستخرج من معرفشي جبال ايه كده ) , وهنعالج التعبان ونشفي العيان ونطعم الجوعان و نكسي العريان بخلاصة الحبّهان , أقول كمان ؟!. . استغلال لشريحه أميه وجاهله في المجتمع , في غياب أي رقابه حقيقيه للدوله , سعيد حساسين لازم يتحاكم في الجنايات هو وعادل عبد العال وزيهم وتحت نفس التهمه يتحاكم محمد حسان وابو اسلام وكل الدجالين والمشعوذين و بياعين الهوى , اللي بيعملو ملايين من المتاجره بأحلام الناس وأمانيهم , ومصادرة كل أموالهم , أنا شخصيا مش هتخض لو عرفت إن أقل واحد فيهم رصيده في البنك 7 أصفار فما فوق !!. . ولو مش مصدقني إن دول شوية نصابين و دجالين ومشعوذين , جرّدهم من فلوسهم وابعتهم اليابان لمدة 10 سنين , بعدها روح زورهم هناك وشوف العز اللي هتلاقيهم عايشين فيه وهما بيلمو الزباله من الشوارع , أه سوري هما اساسا مش مؤهلين لمهنة زبّال في شوارع اليابان !!. . نسيت أقول حاجه أخيره , سعيد حساسين هيطلع براءه , الملايين اللي معاه بتقول كده , هيلاقي بالتأكيد محامي نصاب برضه هيطلعه منها زي الشعره من العجين وغالبا هيرفع قضيه تعويض على الدوله ورد شرف , يعني هياخد مكافئه مننا واعتذار رسمي , وهيرجع يبيع الوهم للناس , إحنا أسفين يا سعيد !!.

Mohamed Hussein 31 يناير  

اكتر جُمله أبيحه +18 بيرددها الناس بقالهم سنتين تلاته وهما مش حاسين هي دي .... علاء صادق !!.

Mohamed Hussein 1 فبراير  

جذور roots . . أمريكا الدوله العظمى العملاقه دي عمرها تلتميت قول ربعميت سنه , وده في عمر الدول والمجتمعات تبقى دوله نونو أوي يعني لسه بترضع سيميلاك رقم 1 , واسرائيل عمرها 80 سنه ( أه من عمر الجماعه بالظبط !! ) , المواطنين في أمريكا هما بالكتير أحفاد للمهاجرين اللي دخلوها من 100 و 200 سنه , يعني من أصول أفريقيه أو أوروبيه او أسيويه , والمواطنين في اسرائيل مهاجرين من شرق أوروبا ومن أفريقيا واتنين تلاته اربعه من كل دوله , دي مش بيبقى اسمها دول بيبقى اسمها شركات , شركات عملاقه جايز لكن في النهايه شركه مش دوله !! . . عشان كده فكرة الجذور والإنتماء مش موجوده أو تقدر تقول شبه منعدمه في أمريكا واسرائيل , هما بيحاولو , وأمريكا بتصرف مليارات على حكاية زرع الإنتماء في وجدان المواطن الأمريكي , مقالات وروايات وبطولات أغلبها وهمي من صنع أجهزة المخابرات , حتى هوليود نفسها عملت أفلام كتير بتتكلم بقى عن الرئيس الأمريكي وازاي الظابط الفلاني ضحّى بعمره عشان ينقذه وحرب الكواكب وأمريكا اللي هتنقذ العالم وإنك انت كمواطن أمريكي لازم تفخر ( وتتفشخر ) بجنسيتك الأمريكاني... و بسبوري حبيبي حاميني !!. . وبعد ما فشلو في كده , فكّرو في حاجه تانيه , وخصوصا الصهاينه اللي مبدأهم في الحياه إن إسرائيل دوله مش ممكن تكبر أكتر من كده عشان كده الحل إن الدول المحيطه بيها هي اللي تصغر وتتفتت , بنفس الطريقه نقدر نقول إنهم بعد ما فشلو في حكاية خلق جذور و انتماء للمواطنين عندهم بقى يهمهم في المقام الأول قتل الإنتماء عندنا إحنا , يعني أي حاجه تصب في مصلحة شق الصفوف في كل دوله عربيه هو انتصار صهيوني بامتياز . . شريحه معينه حتى لو صغيره أد كده ينعدم فيها انتماء لوطنها ده غاية المراد عند الصهاينه ......دلوأتي بس ممكن أقول بنفس راضيه إن ثورة يناير وما تلاها زي ما حققت أهداف عظيمه لمصر حققت هدف أعظم لاسرائيل , شريحه معدومة الإنتماء والوطنيه اسمها جماعة الإخوان المسلمين !!.

Mohamed Hussein 1 فبراير  

جدير بالذكر إني اكتشفت بالصدفه إني عضو في 17 ألف جروب عالفيس بوك , جروبات الحب والغرام و جروبات اجتماعيه وسياسيه وجروبات الطبيخ بتاعة الشيف شربيني تقريبا واحتمال اكون عضو في كام مجموعه من بتوع الملحدين وجروبات نفخ الشفايف و المتدينين التنين ونجارين النابوليا !!. . كل شويه ألاقي رساله جت لي عالياهو من الجروب الفلاني إن السيد فلان الفلاني قام بتغيير وضع المجموعه بتاعته من مفتوحه إلى مغلقه أو نصف مغلقه ( موارب الباب يعني ) , وإن السيد فلان الفلاني قام بتغيير اسم المجموعه من ( قولي بحبك في ودني اليمين إلى قولي بحبك وبس ) , وان السيد بتاع الجروب الفلاني بعافيه شويه ولازم تاخد اتنين كيلو برتقان وتروح تزوره , طب انا معرفيش مين السيد فلان الفلاني ولا ايه المجموعه دي ولا انا عضو فيها من إمتى ؟ . ..... إلى السيد فلان الفلاني بتاع المجموعه اللي انا مش عارفها : إنت مين يا عم إنت ؟!!.

Mohamed Hussein 2 فبراير

 · طبله وطبله وشعارات وشوية سماجه . . صباح الخير - عندنا في مصر شريحه معينه مايحلاش لها التأييد إلا بالطبله وبالصوت الحياني , مينفعشي يعني يأيد وهو ساكت , يأيد فلان في صمت , صورة السيسي متعلقه في كل مكان في شوارع مصر , واتعمل له أغاني وبقى هو الحب الأول والأوحد عند ملايين المصريين , يا حاج ده مرشح سياسي لمنصب الرئاسه مش نجم سيما يقولك أبدا , يا بويا ده هيبقى رئيس يعني مسئول يعني المفروض حضرتك تسأله وتستجوبه مش تحبه يقولك على جثتي , بالمناسبه الشريحه دي لا تعيب السيسي ولا المرشح نفسه , هو مقالشي للناس أيدوني بالطريقه دي........ الطبله الأولى . . في المقابل شريحه تانيه عامله نفسها مثقفه , بتعارض برضه بطريقة الطبله , وبالصوت الحياني , تلاقيه كاتب في كل بوست الفاشيه العسكريه , إحذرو الفاشيه العسكريه , خلو بالكو من الفاشيه العسكريه , يا حاج ده مرشح سياسي يعني بتحاسبه على مواقفه وتصرفاته هو مش بتحاسبه على تصرفات الي قبله , يقولك أبدا , يا بويا ده هييجي بالصناديق يعني بصوت الشارع ومفيش مرشح عسكري حكم مصر بالصناديق في تاريخها , يقولك مستحيل , يا مولانا هي دي الديموقراطيه , عندك صناديق تجيبه أو ترفضه , وعندك دستور وافق عليه الناس بيحدد اختصاصاته وعندك برلمان بيراقبه , يقولك يا أخي أنا بكرهه لله في لله كده ............ الطبله التانيه وشعارات بلهاء !!. . إلا بالمناسبه مين الحيوان اللي بيقدم برنامج على أون تي في اسمه ( العلم والإيماو ) ؟ الواد ده لازم يتحاكم ويتسجن , لأ لأ , لازم ينضرب بالنار قدام الناس كلها عشان مش يعدي حد تاني , يا أم السماجه والرخامه وتقل الدم , بقى ده اسمه فن سياسي ساخر ؟ وانت فاكر نفسك كده هتبقى خليفة باسم يوسف ؟ انت كده تبقى مجرد نيجاتيف مش اكتر . يابني اقعد جنب أمك , المشرحه مش ناقصه قُتله , وبوس ايديها 9 مرات في اليوم واحمد ربنا انها أصلا مستحملاك , بس هي أمك اللي ولدتك وجحا أولى بلحم طوره !!. . جت لي فكره حلوه دلوأتي حالا نضرب بيها 3 عصافير بحجر واحد أو نضربهم بالبُلغه , إحنا نجيب الراجل اللي بيأيد السيسي بطريقة الطبله , والهانم اللي بتعارض السيسي بطريقة الطبله ( طريقة عبله كامل ومنى ذكى في فيلم معرفشي ايه كده ) ونحبسهم في أوضه ضلمه مع الواد السمج بتاع أون تي في ..ويقدّم لهم فنه بقى ) , ماهو لو الأول ده اسمه التأييد والتاني ده اسمه المعارضه يبقى أكيد أكيد التالت اسمه الفن والإبداع !!.

Mohamed Hussein 2 فبراير

 معاك فلوس ؟ . - طب هات 100 جنيه بس وانا اجيب لك راجل بشنب ملو هدومه يقف قدام الكاميرا ويقول أنا بحب السيسي ومش بيجلي نوم إلا وصورته جنبي , ولو اديتني 300 جنيه هخلي نفس الراجل يقول ( ومراتي كمان بتحب السيسي وبتحضن صورته ) . - هات 1000 جنيه وانا اجيبلك واحد تاني يخلي ابنه يتصور بالبياده فوق دماغه وهات 10 ألاف وانا اخلي نفس الراجل يرقص هو ومراته جنب ابنهم على أغنية تسلم الأيادي !!. . سهله الحكايه واتكلمت فيها ألف مره إنما فيه ناس جيناتهم مؤهله تماما لحكاية الفاشية العسكريه , هو بيدور عالصور عشان ينشرها لأنها بتناسب اوي طريقة تفكيره , من الأخر يعني بتريّحه . . - مع إنه لو فكر شويه هيعرف إن الراجل أبو 100 جنيه اللي قال بحب السيسي ومراته أم 300 , والواد أبو ألف وابوه وامه لا يعيبو السيسي ولو عملو كده للبرادعي ولا حمدين فده مش يعيب البرادعي ولا حمدين . . حضرتك مصرّ تفضل بالعقليه دي , وتتشدق بشعارات الفاشيه العسكريه انت حر مع إن العقل بيقول إن مشكلتك دلوأتي مع الشعب مش مع المرشح السياسي ..يعني تلوم الراجل ومراته وابنه مش تلوم السيسي , والأصح أكتر إنك تلوم اللي استغل فقر الراجل ومراته ودفع لهم فلوس عشان كده , بس الأخير ده انت بتحبه ومتعاطف معاه وبتقول عليه فصيل لامؤاخذه وطني !!.

لو ريري سيلان علّقت صورتي في الصالون عندها فده مش معناه إني بدوب في جمال أمها , هي حره , ولو مرجانه غنّت لي أغنيه تعدل دماغي ودماغ الأفنديه فده يبقى مش عيبي ...ده عيب الوليه !!. . باختصار , صدق أو لا تصدق , السيسي شعبيته جارفه في الشارع ( روح حاسب الشارع ) وملايين بتحبه ( اسجن الملايين دي لو تحب ) , وملايين عشمانين فيه خير ( إهتف ضدهم وقول يسقط يسقط اختيار الشعب ) , والسيسي مايلزموش صور مستفزه زي اللي بتنزل على الصفحات دي , صحيح فيه ناس مأفوره في حبه , لكن الأقرب للعقل والمنطق إنها صوره ب 100 جنيه وبس !!.

Mohamed Hussein 2 فبراير  

الحكايه في نقطتين تلاته . 1- يوم 30 يونيو خرج ملايين الناس للشارع عشان يخلصو من السنه السوده بتاعة حكم الإخوان , البرادعي كان معاهم و حضرتك كمان كنت معاهم في الشارع أو أضعف الإيمان كنت مؤيد جدا لكده ومش بعيد تكون فرحت اوي و وزعت شربات عالجيران يوم ما عزلنا مرسي .... عارف إن اللي بقوله صح بس انت هتنكر !!. 2- الحال معاك استمر اوكيه من يوم عزل مرسي وكان رأيك إن مفيش حل مع الإخوان ولا هيفضو اعتصامهم ويقومو رغم المفاوضات اللي استمرت شهر ونص , وفضل الحال عندك كده لحد يوم فض اعتصام رابعه , وبالتحديد اللحظه اللي قرر مولانا أبو خطوه انه يقدم استقالته ........ عارف برضه اني بتكلم صح بس انت هتنكر !!. . 3- بعد استقالة مولانا ابو خطوه حضرتك شكيت في كل حاجه , شكيت في نفسك أول حاجه وإنك كنت مؤيد ل 30 يونيو ولو حد سألك هتقول له مش فاكر , شكيت إن رأيك من الأول إن مفيش مصالحه هتنفع مع الإخوان , شكيت في صوابع إديك يا شيخ ........ عارف إني بتكلم صح بس انت هتنكر !! . 4- الحل بسيط خالص , لأن اللي اعرفه انا إن انت ( قبل ما تتشقلب ) كان معاك حق , فعلا رفضو المصالحه من وفود مصريه وعربيه واجنبيه , فعلا كانو حريصين جدا على الدم , فعلا هو ده تفكيرهم وهي دي طريقتهم في الحفاظ على المعبد الوثني اللي اسمه مكتب الإرشاد , كل يوم تقارير من جهات مختلفه بتقول حضرنا دعوات المصالحه وخيرت الشاطر رفض واصر على العنف بس انت مش مصدق .... أو جايز مصدق وهتنكر !!. . 5- الحل بسيط جدا جدا , مولانا ابو خطوه , اللي اتسبب في أم الشقلبه اللي في دماغك دي المفروض انه راجل وملو هدومه وعنده حساب على تويتر وعنده أكيد موبايل وعنده لسان , ممكن يطلع في أي برنامج أو يكتب تويته يقول لنا فيها مصالحه ايه اللي عملها الإخوان ورفضها الجش ؟! سهله خالص اهي , وحتى ذلك الحين هيفضل هو في نظري واحد جبان وانت في نظري واحد متشقلب مش اكتر !!. 

Mohamed Hussein 2 فبراير

 يا مصر فين رقٍّتك لمّا بنتلاقي و فين جمال ضحكتك لو كنتي مشتاقه ؟! . لمّا انتي حُبِّك وَجَع واجمل ما فيكي فراق بتلبِّسينا ليه بالغصب توب عُشَّاق ؟! . غُرْبه و الليل ده حالِك يا جنة المحبوب لا إيدي طالتْ جمالك و لا كفّانيش التوب !!. . و غلبت قوله و نِدا مين اللي بايع مين ؟ هو انتي مُتأكده إن احنا جوز عاشقين ؟! . . محمد حسين

Mohamed Hussein 3 فبراير

 · العصابه . صباح الخير - من وحي شهادات بعض المنشقين عن الجماعه الإرهابيه : ....................................................................... 1- الثقه : مبدأ أساسي في تربية الشاب الإخوانجي هي الثقه العمياء في قياداته اللي بدورها بتثق ثقه عمياء في القيادات اللي اعلى منها وهكذا لحد ما نوصل في النهايه لهرم هلامي الشكل ولزج المضمون من الثقه العمياء . . 2- النقد داخل الجماعه ممنوع , مُحرّم حرمة الكبائر , لا تناقش ولا تجادل يا أخ على , وإلا هنحط السيخ المحمي في صرصور ودنك . . 3- الإصطفاء , لازم حضرتك كشاب إخوانجي تفهم وتتأكد كويس إن ربنا سبحانه وتعالى اصطفاك عشان تبقى عضو في التنظيم الإرهابي ده , ههههههههه أول مره أعرف إن ربنا سبحانه وتعالى بيدعم الإرهاب والعياذ بالله !!. . 4- الطاعه العمياء : وقالك لو إنت شاب اخوانجي اسمك x وبتتفرج على شخص اسمه y في التلفزيون مثلا , وسمعته بيقول رأيه في قضيه معينه , فالقيادي بتاعك هيقولك اسمعه كويس وبعد ما تسمعه ابقى تعالى وانا اقولك الشخص y ده بيقول ايه ؟! ليه يا عم القيادي تقولي مانا سامعه بنفسي وخلاص ؟ ..إخرس يا حيوان , إنت هتعارض القيادي بتاعك وتكفر بربنا ولا ايه ؟! . 5- الراديكاليه : إحنا بقى جماعة المصطفين الأخيار , يعني شعب الله المختار (فرع المسلمين ) , وأي حد بره الجماعه يبقى دينه وعقيدته محل شك , أو حتى يقين بإنه مش مسلم , بس هنتعامل معاه من باب المكر والدهاء ( الحرب خدعه يا أخي الكريم ) , وإن سيدنا رسول الله كان بيتعامل مع الكافر واليهودي , واللي سقى الكلب دخل الجنه !!. . 6- المكيافليه , مكيافليه كُحت , بيور يعني , الماده الخام للمكيافليه عندهم , تاخد منها وتعبي في زكايب , بص احنا غايتنا الدعوه إلى الله , بس هنقتل ونكفّر ونسب ونلعن ونسرق وننصب و ننهب ونشيل عقلك ونحط مكانه صندل بلاستيك ونرتكب كل أنوع الموبقات عشان ننشر الدعوه إلى الله بقى والإسلام ينتشر كالنار في الهشيم أو ينتشر كالإشاعه في الفيس بوك , أو كالميست في التيرمست ( يعني اي حاجه في حاجه ). . 7- الإسلام غايتنا ورسول الله قدوتنا ........... نياهاهاها , (حلو البؤ الأخير ده يا حاج محمد ؟) , أهو البؤ ده طلع رقم 7 في الترتيب !!.

Mohamed Hussein 3 فبراير

 طرفيّ الجماعه !! . و كل شويه يقولو هنعمل مراجعات ونرمي السلاح , نلحق بس صلاة العصر جماعه و بعدين نراجع , خلاص بنعمل مراجعات نهائيه اهو , بنراجع والله ....... مممممم و في الأخر تلاقيهم داخلين الإمتحات بالبرشام ( البورشام ) !!. . بص يابني , مصحفك وسبحتك في إيدك , مطوتك ومولوتوفك وسنجتك في جيبك , لو قابلت واحد في الشارع وقال علينا كويسين وانه بيأيدنا قول له بارك الله فيك يا أخي الكريم ( و اديله مصحف هديه ) , ولو قابلك واحد مش عاجبه شغلنا وأدبنا وأخلاقنا وجمالنا وسلميتنا .. غُزّه بالمطوه في بطنه وقول له يلعن *** أمك !!.

Mohamed Hussein 3 فبراير

 وكتب حسام بهجت على صفحته ( مين حسام بهجت ده ؟ ) إن الجرنان اللي يضحي بكاتب مهم زي بلال فضل عشان يرضي كاتب تافه زي هيكل يستاهل اللي يجراله !!. . أه بس كده عرفت انا مين حسام بهجت ؟ , ده أكيد أكيد يكون واحد من ائتلاف حاجه كده تبع الثوره أو جايز واحد من مفكرين ومنظرين الثوره , طالما قال بلال فضل مهم وهيكل تافه , وتلاقيه فاهم إن أحمد ماهر مفكّر كبير فشر طه حسين والعقاد . . ماهو مصطفى لامؤاخذه النجار كان بيشكّل الحكومه مع عبد الرحمن لا مؤاخذه القرضاوي وصوفيا لا مؤاخذه ( مش عارف اسم ابوها ) في التليفون وبالمره بيتطمن على السيديهات . . حلوه أوي ثورة يناير , حلوه جدا ولها غمازات كمان , بس فيها ناس مش فاهمه الفرق بين الثوره والوقاحه !!.

Mohamed Hussein 4 فبراير

 الصوره الكامله . صباح الخير - ده مش اسم برنامج , ده اسم النبي حارسه يبقى الوضع اللي احنا فيه بس بنظره شامله , يعني بره وجوه , بس انت والنبي حاول تركز شويه . 1- بقى يا سيدي هقولك شوية حقايق وهسيبك لضميرك , أه ضميرك انت مش ضمير البرادعي ولا ضمير أبله حكمت ... . - ليبيا بح , بحححح , ودي حدودك الغربيه , الجماعات الإرهابيه هناك بتخطف رئيس وزرا كل يوم تلات أو عالأقل وزير أو سفير , تقعده عندها شويه وبعدين تطلق سراحه , وساعة العصاري بيطلعو بعربياتهم واسلحتهم يعملو عروض عسكريه ويرفعو أعلام القاعده قدام الناس والعالم كله . . - والسودان بح , بحححح , دي حدودك الجنوبيه , البشير ساب جنوب السودان وفاقد السيطره على جزء كبير من أرض الشمال , وكل واحد في السودان شغال بدماغه أو دماغ اللي جنبه , اسرائيل اللي هي عدوك الأزلي بتلعب في جنوب السودان بقالها 20 سنه وكان ليها دور محترم في عملية التقسيم , ووجودها في أثيوبيا غير عادى وسد النهضه والليله السوده اللي حضرتك عارفها , كمان الموساد متوغل في تشاد والقوات الأمريكيه والمارينز موجودين في شرق ليبيا ( يعني على حدود مصر ) واسطول أمريكا البحري عالسواحل الليبيه قاعد ومتسلطن . . - في الشمال بقى سيادتك هتلاقي عدوك الأزلي اسرائيل وعدوك الجديد اللي طلع لك في البخت ( حماس ) , ولو ارضك سلمت من عناصر ارهابيه حمساويه مش هتسلم من عناصر الموساد , وسينا خير دليل , دي بقت شركه يابه وماتعرف مين مع مين واتوبيس كام بيروح فين ؟. . - باختصار يعني حضرتك متحاصر بكماشه من الإرهاب والمخابرات الأمريكيه والموساد , و على فكره الإرهابيين والمخابرات الأمريكيه كالجسد الواحد يشد بعضها بعضا , ده الواقع ودي الحقايق , لا أبانا الذي في المخابرات ولا أبانا الذي في أي حته , الوقت نفذ واحنا بنلعب في الوقت الضايع وحضرتك لسه مفهمتش , في ثورة يناير العظيمه البلد كانت عامله زي البيت اللي فيه هرج ومرج وبابه مفتوح , الخوات جوه البيت مشغولين ونازلين طحن في بعض ومحدش عارف مين دخل ومين طلع والي دخل ساب لنا ايه جوه قبل ما يمشي .؟!. . - حضرتك نزلت من بيتك وسايب الباب مفتوح وماسك في إيدك سلطانيه وراسك والف جزمه قديمه لا تعبّيها ديموقراطيه من عربية الديموقراطيه اللي واقفه على ناصية الشارع , يابني ارجع اقفل بابك الأول واتطمن وشوف اتحط لك فيه ايه وانت بره ؟, عربية الديموقراطيه مش هتمشي والسلطانيه في إيدك هتروح فين يعني والديموقراطيه مش هتطير ولا هتحمض صدقني !!.

Mohamed Hussein 4 فبراير

 بالك انت , لو مصر ( لاقدر الله ) وصلت لليوم اللي فيه الجماعات الإرهابيه تعرف تعمل عرض عسكري بالأسلحه قدام الناس في الشوارع ( زي ليبيا والعراق وسوريا ) , في اليوم ده تحديدا مولانا أوباما هيعمل لولولولي فرح , والواشنطن لامؤاخذه بوست والأسوشيتيد لامؤاخذه بريس والسي لامؤاخذه إنْ إنْ وكل وسائل الإعلام الأمريكيه العملاقه والشفافه و لامؤاخذه هيعملو حفله يشيدو فيها بنجاح التجربه اللامؤاخذه الديموقراطيه في مصر , لو مش مصدقني اسألهم عن العراق ........ ولا مؤاخذه !!.

Mohamed Hussein 4 فبراير

 · السعوديه أعلنت بصفه رسميه الحرب على الإرهاب تحت داعي جماعات تكفيريه مخربه تهدد أمن الوطن , وأمريكا أعلنت بصفه رسميه دعم الإرهاب تحت داعي فصيل وطني بقى وكداهون . . كده صاحبك الإخوانجي ( عضو التنظيم الإرهابي ) مصدق مليون في الميه إن أوباما هو خليفة المسلمين الجديد وإن الحكومه السعوديه حكومه كافره وماجنه وفاسقه . . أوباما خليفة المسلمين الجديد !! والواشنطن بوست هي الكتاب المقدس والعاصمه الرسميه هي واشنطن. يعني تقدر تقول حضرتك إن عاصمة دولة الخلافه الإسلاميه إنتقلت عبر التاريخ من المدينه المنوره إلى دمشق إلى بغداد إلى القاهره إلى اسطنبول إلى واشنطن رأسا ( لأ رأسا مش رقصا ) , ... وقريبا جدا في تل أبيب !!. ......... والنبي دولة الخلافه دي اتقطع نفسها من كتر اللف والشحططه , مش بقولكو أيام سوده !!.

Mohamed Hussein 4 فبراير

 اهداء إلى صديقي العزيز مايكل هلال Michael Hilal . أنا شاب مصري مسيحي , واحد قاعد تحت بلكونة بيتي وبيقرا قرأن بصوت عالي , لو طلعت له في البلكونه وقلت له يمشي هتقوم حرب طائفيه ويولعو في بيتي وفي الكنيسه ؟!. - معاك حق يا مايكل ,من حقك تطلع وتقول له يمشي , وإلا يبقى من حقك انت كمان تقف تحت بلكونة بيتي ( أنا شاب مصري مسلم ) وتقرا في الإنجيل بصوت عالي ويبقى مش من حقي أعترض و لو اعترضت تروح تولّع في الجامع !!.... هو ده العدل اللي بفهمه , اللي هو أساس كل الأديان السماويه , العدل أساس المُلك. .... فينا ناس فاهمه حريتها غلط , مش من حقي أقعد في عربية قطر زحمه واقرا قرأن بصوت عالي أو اشغل راديو على اذاعة القرأن الكريم , واجبر الناس تسمع , فيهم المسيحي اللي مش عايز يسمع وحتى المسلم اللي عايز ينام ومش عايز يسمع , دي مش اسمها حريه شخصيه , دي اسمها جليطه وقلة ذوق واعتداء على حرية الغير . . حريتك الشخصيه بتقف عند حدود حواسك انت وبس , يعني تمسك مصحف تقرا فيه انت حر ولا تمسك مجلة سكس تقلّب فيها انت حر برضه , تقرا قرأن بصوت واطي انت حر , تشغل قران وتحط سماعه في ودنك انت حر , تشغل أغنيه وتسمعها لوحدك انت حر , الإعتداء على حرية الأخرين هو قمة الوقاحه والهمجيه , وهتلاقي الرد الأكثر وقاحه وسماجه وجليطه وهمجيه : يا اخي احنا دوله مسلمه !!.

Mohamed Hussein 5 فبراير

 الغنيمه !!. . صباح الخير . - إمبارح شهادة الشاب اللي اعتدى على كنيسة العذراء , شوفتها على أون تي في بصوته ولسانه و شكله الكيوت , والنبي يا ريت حضرتك ترمي أي حاجه في إيدك دلوأتي وتركز في الكلمتين دول : - الشاب عمره في حدود التلاتين , شكله متدين ( تبدو عليها علامات الصلاح ) ده من النظره الأولى ...بعد شويه هتعرف إن دي مش علامات الصلاح دي علامات الساعه !!. ... شهادته بتقول التالي باختصار , بالمناسبه كان بيتكلم بمنتهى الثقه والتمكن وتحس إن العقاد واقف قدام الكاميرا : . 1- أنا نزلت التحرير في ثورة يناير ( ماشي ما علينا ) , وهناك قابلت ناس سلفيين في الميدان ( أساسا السلفيين مش بينزلو ميادين ولا بيعترضو على أي حاكم غالبا هو يقصد إخوان أو جهاديين بس برضه ما علينا ) , كلمني واحد فيهم ودعاني للجهاد ضد الكفار ( ميدان التحرير ده ولا ميدان تورا بورا ؟ ما علينا ) ,. . 2- وبعدين سافرت اشتغل بره ورجعت بعد سنه قلت أعمل حاجه لله ( فكرته هيقول اعمل كولدير مايه للناس تشرب منه ولا حتى زير ) , إيه يابني الحاجه لله اللي هتعملها ؟ قال هجاهد ضد الكفار , اللي هما مين يابني الكفار ( أكيد يقصد أبو لهب وحنظله ) ؟ قال اللي هما الجيش والشرطه والنصارى , ( ثم استطرد قائلا ) لأن ربنا أمرنا بمحاربة الطاغوت , وأي حد ينطبق عليه وصف الطاغوت يجب محاربة , والنصارى في مصر مش أهل ذمه لأن مصر مش بيحكمها مسلم , أقصد مش بيحكمها الإمام !!!! ( هنا عيوني جحظت زي ما يكون دلقت فيهم برميل اتروبين ) وضربات قلبي زادت و مراتي بتكلمني وانا مش سامعها . . 3- طيب يابني اشتريتو السلاح منين ؟ , احنا حضرتك كنا محتاجين فلوس اتفقت مع فلان وعلان إننا ناخد شوية دهب من محل جواهرجي بتاع أي حد نصراني كافر , روحنا فعلا وخدنا من محل في الحي السادس في مدينة نصر , أه سرقتو المحل يعني ؟ لأ حضرتك دي غنيمه ...إيه ؟ بقول لسيادتك غنيمه من الكفار !!.

4- وبعدين , خدنا الغنيمه اللي هي شوية الدهب واشترينا بيها سلاح وقنابل و هجمنا بيهم عالكفار في الكنيسه !! ...خلصت الشهاده كده أو تقريبا أنا مقدرتش أستحمل . . الخلاصه , مولانا الإسلامي المتدين , سرق الدهب من محلات النصارى الكفار ( غنيمه ) و اشترى بتمنه سلاح قتل بيه النصارى الكفار برضه !! وبكده يبقى عمل عمل عظيم لله كأنه بنى جامع مثلا !!. . هه ؟ لسه حضرتك عايز ديموقراطيه ؟ الشاب ده بحسب الدستور له صوت انتخابي ومن حقه يترشح لأي منصب , ومصر فيها 100 ألف شاب عالأقل بالشكل ده , كفيلين إن هما يهدو حيل أتخن أمه , دكاتره على فكره ومهندسين وصيادله واعرف منهم كتير , مومياوات ماشيه على الأرض , بني أدمين براس كلب .. . ماسمعتش إن حمدين صباحي ( مرشحي المفضل ) أعلن صراحةً رفضة لعودة الجماعات الإرهابيه إلى المشهد , ماشوفتش له فيديو لحد دلوأتي بيقول علي الإخوان جماعه إرهابيه , عشان كده هدعم عبد الفتاح السيسي للرئاسه ( حتى إشعار أخر ) , ولو هتلر كان موجود كنت انتخبته !!.

Mohamed Hussein 5 فبراير

 في عرضك مكانتك في أرضك مكانك قراري وتعرف فلان اللي باعك و مين اللي خانك ؟ . تحارب و تزرع جناين جناين ما تسمح لعاطل ما تأذن لخاين يزعزع إيمانك في عرضك مكانتك في أرضك مكانك . و ساعة العصاري بتحلى العزومه حصيره و لُقمه تدندن لسومه و تسرح معاها ما يسلم غُناها و يسلم لسانك في عرضك مكانتك في أرضك مكانك . . يا عمي و خالي يا قلب البراءه و م الحقد خالي بلدنا العفيّه بشوفها ف كفوفك و اغنِّي لبهيه ساعات لما شوفك ماهي دموعك و هي ابتسامتك و هي و هي ملامحك و سمتك و هي الحبيبه يا زارع ترابها كرامه وطيبه و عايش عشانها و عايشه عشانك في عرضك مكانتك في أرضك مكانك !!. . . محمد حسين

Mohamed Hussein 5 فبراير  

مبادرة حسن نافعه اللي مش نافعه !!. . استاذ حسن مساء الخير , أنا المواطن فلان الفلاني موافق عالمبادره بتاعة سيادتك للصلح مع الإرهابيين , أومااااال , ده الصلح خير على راي ناديه مصطفى , إنما عشان نبدأ صفحه جديده ونبقى على مايه بيضا ليا شوية شروط , حضرتك هتشوفها منطقيه بالتأكيد : . . 1- يطلع قيادات الجماعه الإرهابيه ويقولو لنا قتلو في ال 80 سنه اللي فاتو كام ألف عسكري وظابط وسايح و مدني وكام رئيس وكام وزير ومفكر و قتلوهم ليه وحرقو كام كنيسه ؟ و يلفّو على بيوت أهالي الشهدا دول وهما شايلين كفنهم ويطلبو منهم العفو والسماح . . 2- يقولو لنا كام ارهابي من حماس دخل مصر في سنة حكم مرسي الهباب , أساميهم وأماكن وجودهم وازاي نوصل لهم , وكام ألف قطعة سلاح دخلت والمخازن موجوده فين ؟. . 3- يقولو لنا بالظبط ايه علاقتهم بقطر والجزيره بالمخابرات الأمريكيه وكانو عايزين من مصر ايه بصراحه ووضوح ؟ . . 4- يطلع محمد بديع في مؤتمر تنقله كل القنوات ويقول للناس ( إحنا نصابين وكدابين وولاد صرمه يا ناس , ومفيش حد بيدخل الجنه عشان قال نعم للدستور , وولادكو اللي ماتو في رابعه احنا اللي كنا حريصين على موتهم , احنا اللي بنقدمهم قرابين عشان الجماعه تعيش ) . . 5- يوافقو على مصادرة كل ملياراتهم ومقراتهم وتتحول مقراتهم ومبانيهم من معابد وثنيه لقصور ثقافه عشان الشباب يقرا لطه حسين والعقاد ويتعلم الرسم والموسيقى . . .... بس كده يا أستاذ حسن , كفايه اوي , وأول ما قيادات الجماعه الإرهابيه يوافقو عالشروط دي ( اللي أظنها منطقيه جدا ) ابقى قولي ومش هوافق برضه عالمصالحه , ايوه وانا ايه يضمن لي ؟ ما هما بيكدبو بقالهم 80 سنه وكل ما يتزنقو يقولو توبنا إلى الله , بس توبنا الي الله على طريقه السيد احمد عبد الجواد ( سي السيد ) في بين القصرين !!.

Mohamed Hussein 6 فبراير  

السيسي والإخوان ...بيبو و بشير !!. . صباح الخير . - من كذا و 80 سنه نشأت جماعة الإخوان اللامؤاخذه المسلمين , وعشان فكرهم كان قايم على مبدأ تنظيم دولي فكان لازم يكون لهم فروع في أغلب الدول العربيه تقريبا , إما بتكوين خلايا جديده في الدول دي ودعمها بالفلوس ( والسلاح لو أمكن ) أو بالتواصل مع أي جماعه مشابهه لهم في نفس الفكر وتوحيد الخطه والهدف وبرضه دعمهم المادي والعسكري . . - كذا و 80 سنه يا مولانا , إنت يابني بعتت فلوس فرعنا اللي في الصومال ؟ طيب إخوانا في الجزاير أخبارهم ايه ؟ أه ابعت لهم شوية سلاح ولو عايزين مجاهدين ابعت لهم كام شاب من اللي متلقحين في معسكراتنا , ... وهكذا استمر الحال عشرات السنين لحد ما بقى لهم فرع في كل دوله تقريبا , مش مهم يكون اسم الفرع ( جماعه الإخوان المسلمين فرع سوريا ) , الأسماء مش بتفرق , المهم العقيده والغايه والطريقه والتواصل . . - قناة الجزيره اللي نشأت من 15 سنه تقريبا بمعرفة ومباركة المخابرات الأمريكيه , بتدعم الإخوان بشكل جنوني , يعني تقدر تقول ملكيه أكتر من الملك , القناه بيتصرف عليها مليارات سنويا عشان تبقى منتشره في كل الدول العربيه , يعني محاولة إظهار الإخوان على إنهم ضحيه يا ولداه بتوصل عن طريق الجزيره لكل بيت عربي في حين إن قنواتنا المصريه لا يتجاوز صداها أذن المواطن المصري . . - طيب أنا اعرف اصدقاء عرب كتير , وبعد مناقشات معاهم أقدر أقول إنك لو عملت استفتاء في الشارع العربي بين السيسي والإخوان , السيسي يفوز باكتساح , و ده لا عنده قناة جزيره بتضلل الناس ولا بقاله 80 سنه بيعمل فروع ومعسكرات و بيصرف مليارات عشان يكون له شعبيه عربيه . . - الناس في الدول العربيه عشمانين إن السيسي يكون عبد الناصر الجديد , وبيقولو يا سلام لو حصل ويبقى ضهر وسند لينا , بس السيسي مش عبد الناصر , لسه مبقاش , إنما قدامه فرصه حلوه , بدايته حتى مختلفه عن بداية عبد الناصر , حظه جه أفضل في حاجات واسوأ في حاجات . . .... أفضل إنه قبل ما يبقى رئيس بقى عنده شعبيه في الشارع كافيه جدا , يعني مسنود على ظهير شعبي ( مكانتشي متاحه لناصر الحكايه دي ) وأسوأ لأن أعداؤه اللي عزلهم برغبة الشعب عن السلطه هما جماعه إرهابيه دمويه , عبد الناصر لما قال للملك الجيش مش عايزك , الملك قال يبقى مصر أولى بجيشها ومشي بكل أدب واحترام , كانو ناس مؤدبين ومتربيين في قصور و ( ديليكا ) وغاويين موسيقى وفن يا خال , مش تربية زرايب وخنادق و كتب سيد قطب و مستشفى المجانين !!.

Mohamed Hussein 6 فبراير

 من يوميات ناشط ولا مؤاخذه سياسي . إحنا كويسين أوي و ( حشيش ) حاجه اسمها مؤامره خارجيه على مصر , والإخوان مهما عملو ( بانجو ) اسمهم فصيل وطني , والمصالحه مهمه عشان الشعب يكون كله ( باكيته ) واحده , و ( ترامادول ) مصريين ودول مصريين يبقى المشكله فين ؟!!.

Mohamed Hussein 6 فبراير

 · تم التعديل كلمت أمي الصبح اتطمن عليها وبالمرّه اقول لها تاخد بالها من موضوع انفلونزا الطيور وتبقى تلبس ماسك وهي بتأكل الفرختين والبطتين اللي مربياهم في السور بتاعنا اللي جنب البيت , افتكرت المره اللي فاتت أيام أزمة انفلونزا الطيور من سنتين تلاته , كنت كلمتها وقتها وقلت لها يامّه ارمي شوية الفراخ والبط اللي عندك عشان صحتكو أهم , قالت لي هات حقهم وانا ارميهم , بعتّ لها 500 جنيه , و نزلت أجازه بعد شهرين لقيتها عاملالي بط ومحشي , قلت لها جبتي البط منين يامّه اعترفي ؟, قالت من عندنا يابني من السور !! , ......... أمي وقتها ضربت على ال 500 جنيه ومرمتشي حاجه ..... عندها شوية الطيور بتوعها أحسن من فيلا في الساحل الشمالي !!.

Mohamed Hussein 6 فبراير

 حلم عجيب . أوِّل ما بقى عندي ديوان شعر ونزل السوق جالي حلم يقظه غريب شويه , ماحلمتش إن الديوان يتباع بقى وينطبع منه طبعه تانيه وتالته وكداهون , أبدا والله , بالعكس , أبسوليوتلي , أنا حلمت ان الديوان مش يتباع خالص ويرطرط في السوق , وبعد سنتين تلاته كده اكون انا ماشي بقى هايم على وجهي على كورنيش النيل , وحالتي صعبه , وبعدين الاقي راجل بتاع دره مشوي أقوم أمد ايدي في جيبي ألاقي باقي معايا جنيه ونص , بالظبط تمن كوز دره مشوي , ابص في الجنيه ونص كده نظرة نجيب الريحاني , بس انا بحب الدره المشوي , أقرر في لحظة يأس إني أصرف أخر فلوس معايا على كوز الدره ده , ألاقي الراجل اللي بيشوي الدره لفّلي الكوز في ورقتين كده , ياخدني الفضول اني أقراهم , ألاقيه الشعر بتاعي , في اللحظه دي تنزل مني دمعتين , واقعد افتكر اللي كتبته وامشي من جنب الراجل عشان مش يلاحظ عليا حاجه , واشوف مكان متداري اقعد اعيط فيه , ابكي شويه واكل قرمه من كوز الدره , وانا قاعد في المكان المتداري بعيط وباكل الدره يعدي عليا بالصدفه عيل كده كنت اعرفه من فتره بس هو ربنا فتح عليه وبقى بيطلع في الجزيره والسي بي سي ( أه بيشتغل ناشط سياسي وأديب ومفكر وصحفي وفيلسوف ( لحد ما نلاقي فيلسوف ) مع إني عارفه كويس جدا , أبيض يا ورد . . المهم في اللحظه دي يكون الجو بقى برد أوي ومطر رهيب نازل , والدنيا غرقانه مايه , هتقولي ازاي دره مشوي في الشتا ؟ اقولك معرفش هو حلمي كده , المهم صاحبنا بقى عدّى بعربيته الجيب شيروكي وطرطش مايه عليا وانا قاعد بعيط وباكل دره مشوي , عشان يعني ما ربنا عطاه وبقى مشهور . حلم اليقظه ده فيه لحظة انكسار وشجن غريبه جدا بس حلوه ولها طعم ومذاق خاص زي الدره المشوي . واهو , الشقق في مصر غاليه نار , وغالبا هحط تحويشة العمر تمن شقه , و نازل نهائي بعد 4 شهور ومش هيبقى باقي في جيبي غير ( جنيه ونص ) تمن كوز الدره , والصيف جاي وكورنيش النيل موجود والديوان مش بيتباع , يعني حيثيات حلمي كلها اتوفرت وشكله كده هيتحق ,....... أحمدك يا ربنا !!.

Mohamed Hussein 7 فبراير

 لايف يا طير يا غريب على قلبي كنَّك ناي بتغنِّي لحن عجيب و تقولّي غنِّي معاي . مانا كنت كاتب ع الضلوع ممنوع دَخَلْت كيف و ازَّاي ؟! . . محمد حسين

Mohamed Hussein 7 فبراير  

النصب جميل !!. . ثروة عبد الفتاح السيسي 30 مليون جنيه , مممممممممم طب ايه المشكله ؟ لا احنا عايزين ثروته تكون 117 ألف جنيه و 270 مليم عشان يعجب الناس ( ده على اساس انه شاويش في الجيش ؟ ) , واحد وزير دفاع مصر وكان من قادة الجيش المصري لمدة عشره خمستاشر سنه ومعروف ان مرتبات قادة الجيش بتبقى كبيره ( ولازم تبقى كبيره ) , إنما احنا بنحب اللي ينصب علينا ويقولك معنديش فلوس , إحنا جامعي حسنات !! , بالمناسبه اللي قالو احنا جامعي حسنات عندهم مليارات متلتله ومجهولة المصدر . . اعتقادي الشخصي إن مصر فيها مليون شخص يحملو لقب مليونير , والباقي طبعا مش لاقي ياكل بس مش ده الموضوع , إنما لما تشوف ان 30 مليون ثروة وزير الدفاع ده مبلغ كبير فاحب اقول لحضرتك ان الرقم ده يعادل 1/50 من ثروة محمد حسان و 1/ 30 من ثروة عادل عبد الفتاح ...يا ريت حضرتك تقولي الإتنين دول بيبيعو ايه بالظبط عشان تبقى ثروتهم كده ؟!

Mohamed Hussein 7 فبراير

 ابو الفتوح أعلن رسميا ترشحه للرئاسه , الليله ليلتك يا عم بلال , قبل أي حاجه لازم تجهّز بدله وكرافته حلوين عشان هتطلع في الجزيره كتير الفتره الجايه , كلمنا بقى عن ليبرالية ابو الفتوح وثورجيته وازاي انه مش اخوان وكداهون , بس المره دي هيبقى الضغط اكبر عليك , هتخصص نص مقالات للهجوم على السيسي والنص التاني للهجوم على حمدين وفي أخر كل مقال هلاقي تعليقات القراء الثورجيه المثقفين الجامدين تنين اللي بتسبح بحمدك وبعقلك الرزين وحكمتك البالغه ...و على رأي شويكار ( بحكمتك تحتال علينا ... وانت مراة حضرتنا !! ).

Mohamed Hussein 8 فبراير

 باسم والسيسي . صباح الخير - لما اتمنعت حلقة باسم يوسف اللي فاتت , كتبت هنا على صفحتي إن سبب المنع هي ادارة القناه مش اكتر , جايز بقى خلاف مادي , أو خلاف سياسي , جايز صاحب القناه مؤيد أوي للسيسي ومش عايز حتى مجرد تلميح عنه في برنامج ساخر , هو صاحب المال و ( من حكم في ماله فما ظلم ) , كلامي طلع صح مع إني مش متطلع اوي على دهاليز الإعلام المصري , بس مجرد تفكير عقلاني بيقول إن الحلقه الأخيره وقتها كانت عامله شعبيه للسيسي مش العكس وإن باسم كان بينتقد طريقه حب الناس للسيسي وبالمره بيعرضها عالكل , يعني تقدر تعرف شعبية السيسي (حتى لو مش عاجباك الطريقه ) من مجرد حلقه لباسم يوسف ...... استاذ استاذ فين الفاشيه بقى حضرتك ؟! . - الحلقه الجديده بتتذاع في قناه مملوكه للحكومه السعوديه اللي هي مؤيده تماما لنظام الحكم الحالي في مصر , يعني مكانتشي مشكله فاشيه ولا يحزنون , ولا انت فاكر إن السيسي يعرف يمنع cbc وميعرفشي يمنع mbc ....ده ايه الفاشيه الكيوت أوي دي ؟!. - مولانا الكاتب المبدع المناضل ( معرفشي ناضل فين غير في معركة اللمون بس ما علينا ) بلال فضل , مقالته اتمنعت من النشر في الشروق , والنشطاء والكولجيه قالك بس الفاشيه تاني اهي , قال يعني كان فيه أولاني !! , ومع ذلك نشرها في جرايد تانيه مصريه برضه وعايش بلال فضل في مصر في بيته بياكل ويشرب ويعمل بيبي بمنتهى الحريه والأريحيه , شوفتو الفاشيه العسكريه جميله ازاي ؟!. . - اصدقائي الأعزاء بيحبو أوي ترديد كلمة الفاشيه , الكلمه نفسها أو اللفظ بتوحي بإن قائلها مثقف جامد تنين ومناضل ثورجي فشر جيفارا , واحساسي الشخصي إن السيسي مش فاضي عشان يمنع برنامج أو يوقف نشر مقاله لكاتب هفأ , وإن مصر في الوقت ده تحديدا محتاجه وزير دفاع عنده 17 الف عين مفتوحين و 17 الف عقل بيفكر , يعني مش فاضي سيادتك للهرطقه اللفظيه دي ( والنبي حلوه كلمة هرطقه ). . - اتمنى في يوم من الأيام , إن باسم يقدم حلقه على الهوا مباشرة , وتكوف المفاجأه فيها هي حضور عبد الفتاح السيسي وسط الجماهير , يسأف لفن باسم وابداعه ويقول له استمر يابني , النقد والإعلام الساخر مهمين جدا ولا يعيبو السيسي اطلاقا , بالمناسبه شعبية السيسي قفلت الصناديق من بدري , مش مقالة بلال فضل اللي هتخسره الإنتخابات , بس حركة زي اللي بتمناها دي هتكمم افواه كتير من الثورجيه المفوهين ولو اني عارفهم كويس , هيقولو إن حضور السيسي للحلقه كان تهديد صريح لباسم ...الفاشيه تطل برأسها يا منى !!.

Mohamed Hussein 8 فبراير

 اختراع غريب اسمه العقل !! . 1- عبد الفتاح السيسي بحسب رأيي الشخصي هو وزير دفاع ناجح ( جدا ) في فتره عصيبه من تاريخ مصر , الجيش المصري طول عمره عظيم ( مش خاين يا حيوان ) واي احترام مني للسيسي ده بسبب انه وزير دفاع قدر مع رجالته يحمي مصر من نموذج سوري عراقي ليبي فلسطيني سوداني , الدم اللي حضرتك بتقول عليه رغم عظمته بس يهون في الوقت اللي ارضك تفضل فيه حته واحده , ولو مش فاهم ان تراب الوطن أغلى من دم ولادها ابقى قولي احنا حاربنا 700 حرب قبل كده ومات مليون مصري مقاتل عشان ايه ؟! ............ ده اسمه تطبيل للسيسي ؟!!. . 2- حمدين صباحي , لحد النهارده مشوفتش عليه خيانه , شايفه مناضل محترم , كل الحكايه ان فرصته في الإنتخابات الجايه قلت كتير لو نزل السيسي ومش لاقي مبرر لنزول حمدين , وخايف من تفتيت الأصوات ( اللي اتلسع من الشوربه ), وكنت اتمنى لو قعد مع السيسي وعملو جبهه واحده واهداف الثوره هتتحق لما نشارك في السلطه بشكل ايجابي مش بطريقة ( لا فيها لاخفيها ) ...........ده اسمه تطبيل ؟!!. . 3- محمد البرادعي , عمري ما قلت عليه خاين ولا عميل , بس شايفه ضعيف وجبان وعايش في كوكب تاني ومايعرفشي اي حاجه عن مصر , حتى لما استقال فضلت شويه اقول في نفسي جايز تكون حركه سياسيه معموله بعلم الجيش عشان يرجع وينزل انتخابات ويفضل هو نضيف بعيد عن الحرب ضد الإرهاب , بس لما شوفت تويتاته اتأكدت إنه في البلاله مش اكتر ............. ده اسمه تطبيل ؟!. . 4- هتأيد خالد على , اللي بيلعب على كل الحبال , والشارع بيقول إن خالد على أخره يفوز في انتخابات نادي السنبلاوين مش اكتر , انت بقى شايف إنه رئيس مصر القادم فعندنا مثل في البلد بيقول ( قالو الجمل بيطلع النخله .... قولنا أدي الجمل وادي النخله ) ...ده اسمه تطبيل ؟!. . 5- ابو الفتوح اخوانجي مايفرقشي عن بديع والشاطر , جايز العن منهم , ولو حضرتك لسه محتاج ادله على كده يبقى تتوجه فورا لأقرب مستشفى للأمراض العقليه وهناك هتلاقي العلاج ببلاش أهو بالمرّه تبقى تمسك القطط الهربانه من المستشفى ..........ده اسمه تطبيل ؟!. . 6- شعبية السيسي مكتسحه في الشارع , واللي مايشوفشي من الغربال يبقى اعمى وانا مش اعمى .............. ده اسمه تطبيل ؟!. ..................... ..................... أخيرا , اعتقادي الدائم إن ربنا ميّز البني أدمين عن باقي المخلوقات بالعقل , وانا متمسك اوي بالميزه الربانيه دي , مش مهم أعجب سيادتك , أو مش مهم انك تفهم , اللي مفهمشي في ال 3 سنين اللي فاتو مش هيفهم , وعلى رأي عم ابراعيم عيسى ( إن شالله عن أهلك ما فهمت ) !!.

Mohamed Hussein 8 فبراير  

· الحلم والواقع . اكبر خطأ أو خطيئه وقعنا فيها بعد ثورة يناير هي إن حلمنا كان اكبر بكتيييييير من الواقع , سقف أحلامنا شيلناه , بس بعد فتره بدأت استوعب وافهم واخلي حلمي على أدي , يعني يبقى ليا رجل على الأرض وانا بحلم . . - تعالى كده هقولك حاجه , لو انت عندك فريق كوره بيتكون من شريف اكرامي في حراسة المرمي وعبد الشافي شمال وفتحي يمين وفلان وعلان وترتان وجدو راس حربه أو احمد جعفر كويس كده ؟ أنا بقى هعمل خطتي وتشكيلي على الفريق ده والأسماء دي لأن هي المتاحه , إنما حضرتك أيها النحنوح الحالم هيبقى هو ده الفريق اللي تحت ايدك وهتحلم ب ( بوفون ) في حراسة المرمى وكارلوس البرتو شمال و الضظوي الله يرحمه يمين وفلان وعلان وترتان وكريستيانو رونالدو وميسي , وهتعمل خطتك على كده , وهتقولي عشان بقى ناخد كاس العالم ونحقق اهداف الثوره جمعاء , جمعاااااااااااااااااء .

Mohamed Hussein 8 فبراير

 حبايبي أنصار حمدين صباحي دخلو في المعجنه بتاعة المؤامره وعودة الفلول والديناصورات , وقالك قبضو على 3 شباب عشان حاطين صورة حمدين ههههههههههههههههههه مصر فيها عالأقل مليون شخص معلقين صورة حمدين , تفتكرو عندنا سجون كفايه لهم ؟ طب عندنا نظام حاكم عبيط للدرجادي وفاضي ومش لاقي حاجه يعملها ؟! , ........... حبيبي المناصر لحمدين صباحي ( اللي هو حبيبي برضه ) , إوعى الكلبش يعضك , والسلعوه جايه من وراك اهي انا شايفها ولو مشربتش اللبن قبل ما تنام أمنا الغوله هتجيلك بالليل و تقرم ودنك وهتجيب معاها طائر الرخ يقف لك عالشباك ,................. أهلا وسهلا بالدفعه الجديده في عنبر العقلاء !!.

Mohamed Hussein 8 فبراير

 · حمدين صباحي اعلن ترشحه بصفه رسميه ............. فيلم تفتيت الأصوات .... كلاكيت تاني مره !! . ستوب , كّت , يا أستاذ مليجي يا أستاذ مليجي إنت بتعمل ايه بس ؟ عايز تضرب الأستاذ فريد شوفي ؟ انت جاي عشان تنضرب يا أستاذ و المفروض انك حافظ دورك كويس و وافقت عليه !!.

Mohamed Hussein 9 فبراير

 نص الكوبايه المليان . صباح الخير - خليك متفائل , أوّل ما قامت ثورة يناير وشوفت الناس في الشوارع , حاجه كده تفتح النفس , على كل شكل ولون , فقير وغني , عامل و عالم , أبو بدله وابو جلابيه , ولما الإخوان قررو في اللحظه الأخيره النزول قلت اللهم صل عالنبي , كده يبقى العدد كمل ومفيش حد في بيته إلا سوزان مبارك وعيالها , بدأت أحلم بقى بالعز والجاه والشألطه , شوارع نضيفه ومستشفيات ( مفهاش قطط ) , وكيلو اللحمه يبقى ب 18 جنيه , والغلابه يلاقو لقمه وهدمه , وظابط المرور لما يحب يشوف رخصة السواقه يقولي ( لو سمحت حضرتك ممكن أشوف الرخصه ؟ ) هاااااااااااح , وبس يا سيدي ... اتركبنا عادي وحُمِّيري, واتاري اللي نزل في اللحظه الأخيره ده كان جايب البردعه في إديه عشان تبقى الركوبه مريحه وحلال ....بس أنا متفائل !!. . - بعد شويه طلع الفنجري في التلفزيون , وعمل بإديه تعظيم سلام ( كداهو ) , في اللحظه دي جسمي قشعر , وقلت بس مش هخاف من الإخوان طالما عندنا ناس زي الفنجري وطنطاوي وعنان , لا يمكن المجلس العسكري هيسيب مصر لهم كده بسهوله , الناس دي ركبت على ضهر الثوره وطوب الأرض شافها وهي راكبه ....وبس يا سيدي , ركبو تاني مره ببردعه جديده في معركة اللمون الشهيره .......... بس أنا متفائل !!. . - بعد شويه قلت خلاص مفيش أمل في مجلس طنطاوي ولا الإخوان , إنما أملنا في الجيش والبرادعي بعد ربنا كبير , حتى يوم ما البرادعي استقال من منصبه , قلت بس يا معلم , ده تخطيط ولعب على كبير , والبرادعي استقال بعد الإتفاق مع السيسي عشان هما الإتنين كانو عارفين إن الحرب على الإرهاب هتتسبب في حرق كروت معينه , خليك انت يا برادعي بعيد عشان تفضل إيديك نضيفه وترجع بقى تنزل الإنتخابات وكداهون وتبقى رئيس مصر , شويه ولقيت البرادعي سايق فيها , سايق الهبل عالشيطنه تحت بند مبادئ , المبادئ , ذا برينسيبالز , قعدت كده افكر , ايه المبادئ دي اللي بتقول نتصالح مع الإرهاب ؟ دي وردت في كتاب سماوي اسمه ايه ولا كتاب سياسه بتاع مين ؟ ........... بس أنا متفائل !!. . - امبارح حمدين صباحي أعلن ترشحه للرئاسه , والإنتخابات اللي فاتت انا انتخبت حمدين , قلت بس يا معلم ده توكتيك عالي برضه بين حمدين والسيسي عشان يعني الشكل الديموقراطي قدام العالم وميتقالشي بقى إنه انقلاب عسكري , اسم حمدين صباحي اسم كبير ومجرد نزوله الإنتخابات بيعطيها شرعيه كبيره , وجايز يوصلو الإتنين للإعاده ويبقى زيتنا في دقيقنا , أو حمدين يتنازل في اللحظه الأخيره للسيسي أو العكس , ....مممممممممممم بالك إنت لو بعد كام يوم شوفت حمدين والسيسي بيشرحو بعض بالموس ؟ هفضل متفائل برضه , أصل أنا متفائل  

!!.Mohamed Hussein 9 فبراير  

يا أستاذ يا أستاذ , ينفع حضرتك تأيد حمدين من غير ما تقول على أنصار السيسي ( عبيد البياده ) ؟!...مش جايز يكون السيسي هو الخطه البدليه لك في حالة حدوث أي إخفاق لحمدين وانت مش حاسس ؟ . ... وانت يا حضرة , ممكن تأيد السيسي من غير ما تقول على حمدين خاين ؟!.... مش جايز يكون حمدين هو ملاذك الأخير في الإنتخابات بعد السيسي ؟. . , جربو بس تحترمو بعض , اتعلمو من اعدائكو حاجه مش عيب , كانو بيأيدو الشاطر باليمين وابو اسماعيل بالشمال , مع إن الإتنين شوية نصابين وحلانجيه ... إحنا أولى بالإحترام المتبادل ده , عبد الفتاح السيسي و حمدين شخصيتين يستحقو مننا الإحترام , مواقفهم بتقول كده , مش عيب بقى انك تقول انا هنتخب السيسي وبحترم اللي هينتخبو حمدين أو العكس .

Mohamed Hussein 9 فبراير

 اضحك مع تتح . أبو الفتوح : احنا عملنا حملات توعيه عشان المواطنين يصوتو ب لا على الدستور بس التضييقات خلتنا ننسحب , وقولنا هنرشح مرشح شاب للرئاسه ( بعد الدستور اللي مش معترفين بيه ) إنما ملقيناش مرشح شاب , فقلت مبدهاش اترشح انا بقى للرئاسه وامري لله , إنما امتنعت عشان هي مسرحيه هزليه بنضحك بيها على الشعب !! . الترجمه بقى , أنا سياسي ضليع في ( الحاضر ) وعشان كده انسحبنا من الإستفتاء على الدستور وقتها , وسياسي ضليع في ( الماضي ) عشان كده قلت ننزل بمرشح شاب ...دماء جديده يعني , وسياسي ضليع وبتنبأ ب ( المستقبل ) عشان كده تلاقيني عارف ومتأكد إن الإنتخابات الرئاسيه الجايه مزوره وعندي شهود وادله وسيديهات وفيديوهات من دلوأتي على تزوير الإنتخابات اللي هتتم بعد 3 شهور !!. . أهو ابو الفتوح كده من يومه , ضليع في الحاضر والماضي والمستقبل , أه بالظبط زي المركب نورماندي تو بتاعة عبد الفتاح القصري ( بتعوم في البحر وفي البر وفي الجو كمان ) !!. . وبلال فضل لسه مصرّ يشتغل سيكا لابو الفتوح , يعني يبقى خدّام الكلب , ولسان حاله بيقول عن ابو الفتوح زي ما قال عبد الفتاح القصري برضه ( الباز افندي , هو فيه حد في جمال وحلاوة وحكمة وعبقرية الباز افندي ....دانا نفسي أتمناه ) !!.

Mohamed Hussein 9 فبراير  

· حاسس إن الفيس بوك النهارده عامل زي صوان عزا كبير وفاضي مافهوش حد , الإكتئاب مسيطر على صفحات الناس بس مفيش حد بيعزّي في المرحوم , تقريبا كده والله اعلم أبو عم بَخْ مات تاني !!.

Mohamed Hussein 9 فبراير

 مجرد رأي . رأيي الشخصي إنك تبقى حريص على إزالة الاذى من طريق الناس , يعني مثلا ازازه مكسوره في الشارع وانت شيلتها رميتها في الزباله عشان مش تعوّر طفل أفضل من إنك تبقى حريص على تربية دقنك . وإنك تدخل المحل أو البنزينه تبتسم في وجه العامل وتقول له لو سمحت وشكرا أفضل من إنك تقصّر توبك . لا أنكر أبدا فضل إطلاق اللحيه وتقصير التوب , لكنها في النهايه سنن شكليه أو مظهريه ( في المظهر ) , ولا تساوي فضل حسن الخلق وحسن المعامله ومنع الأذى عن الناس . راجل ملتحي ماشي مع مراته المنقبه , وابنهم ماشي معاهم بيشرب إزازة باربيكان ولما خلصها رماها بعزم جهده في الشارع فاتكسرت 100 حته , مشوفتش منم أي رد فعل تجاه الولد , وكان أولى بالأب يلم الإزاز المكسور بنفسه بعد ما يعلم ابنه ان ده خطأ كبير , بعدها دخلو محل وعاملو العامل بمنتهى الجليطه وقلة الزوق ... ولولا إني ( مكبّر دماغي ) , كنت قلت له ( ليس لله حاجه في أن تطلق لحيتك وتقصّر ثوبك ) ................ مجرد رأي .

Mohamed Hussein 10 فبراير

 عم ابراهيم . - وقالك , بما إن حمدين صباحي اترشح والسيسي اترشح , يبقى لازم الوزراء المنتمين للتيار الشعبي في الحكومه يستقيلو فورا , وباقي الوزراء يمتنعو عن ذكر اسم السيسي في أي مؤتمرات أو بيانات وإلا يستقيلو هما كمان ويروحو يأيدو السيسي براحتهم , عايزين حكومه محايده تشرف على انتخابات نضيفه , وده اسمه العدل ....... ممممممممم كلام زي الفل يا عم ابراهيم , إيه رأيك يا أستاذ بلال في الكلام ده ؟!. . - وقالك تمكين الشباب !! , هما فين الشباب دول ؟ لما اتنين منهم بيقعدو مع بعض بينشقو وبيعملو 3 جبهات مختلفه و بيشرّحو بعض بالموس , هنمكنهم ازاي ؟ هيحكمو مصر ازاي؟ هي مصر مش لعبه ولا دور كوتشينه بنلعب فيه على المشاريب . . - حمدين صباحي في مؤتمره الأخير بيقول صراحة , إن فيه ناس كتير من الغلابه مش عايزني اترشح , والمعنى مفهوم طبعا انهم عايزين السيسي , مع إن الغلابه والفقراء هما الملعب الرئيسي بتاع حمدين , بس رأيه ايه حمدين في الناس دي ؟ قال لو وقفو معايا هما على راسي ولو انتخبو حد غيري برضه على راسي ........ ممممممممم فهمت أيها الشاب المؤيد لحمدين ؟ فهمت يعني ايه احترام الناخب والمنافس ؟!. . - ابراهيم عيسى كان بيتكلم ( رغم انفعاله ) بتفاؤل , وبنبرة المنتصر , تقدر بسهوله تحس بكده في كلامه , طب ايه السبب ؟ يتهيألي فيه سببين , أولا : فكرة إنك تبقى قدام انتخابات ديموقراطيه بيتنافس فيها اتنين محترمين اوي اسمهم عبد الفتاح السيسي وحمدين صباحي شالت من ذاكرتنا المرار الطافح القديم بتاع مرسي وشفيق , كانت ايام هباب ( تختار فردة جزمه ولا فردة صندل ؟) ........ ثانيا : مممممممممم فيه حاجه مدكّنها ابراهيم عيسى , بتخليه مش خايف من المنافسه بين السيسي وحمدين ولا خايف من تفتيت اصوات , جايز ربنا ما يخيّب ظني المره دي , ويكون احساسي في محله , صفقه لأول مره في ال 3 سنين اللي فاتو , صفقه لصالح مصر , فيها تنسيق وفهم للسياسه وطبيعة الأوضاع جوه وبره , .............. يا رب !!.

Mohamed Hussein 10 فبراير

 اعلان سخيف جدا و مستفز بييجي على قناة النهار , إعلان عن برنامج أو تحقيق صحفي لكشف عملاء قطر في مصر , في السياسه والصحافه والإقتصاد .......... الفكره مقبوله , لكن كلمه في الإعلان بتستفزني ( دور المخابرات القطريه في ما يحدث داخل مصر ) !!! , الله يخرب بيت اللي جابك ياللي كتبت الإعلان ده , المخابرات القطريه !! , انت البعيد اهبل ؟ هو فيه حاجه اسمها المخابرات القطريه ؟! , قطر دي بيتين ونخله وطبق كبسه كبير , اللي بيصحى من النوم فيهم أول واحد بيمسك الحكم , مخابرات ايه يا بهيم ؟ حمد ومراته وعياله بتأمنهم القاعده الأمريكيه اساسا , دول مجرد فار صغير وحقير بيشتغل لحساب المخابرات الأمريكيه والموساد ......خايف تقول المخابرات الأمريكيه ؟ وعشان انت خايف تقوم تهين مصر بجلالة قدرها وتقول دور المخابرات القطريه في مصر ؟!. هو يا حاج لو تعلب وديب جابو فار و طلبو منه يروح يعمل مشاكل في عرين الأسد , أهو يقرقض أي حاجه ويزبّل المكان , ساعتها بتكتب عنوان القصه دي ( دور الفار بالإيقاع بالأسد ولّا دور التعلب والديب )؟!!.

Mohamed Hussein 10 فبراير

 الفرق بين رجل الدوله و رجل العصابه . مبارك قعد يحكم مصر 30 سنه , و بقى عنده مليارات ( بالحرام طبعا ) , وشبكة علاقات داخليه وخارجبه تكفي إنها تحرق مصر لو هو حب يعمل كده , ولما جت ثورة يناير بدأ يكدب (أه حرامي وكداب ) , ولما الشعب والجيش وقفو مع بعض قرر هو التنحي ( ماقالشي شرعيه ) , النيابه أمرت باستدعائه للمحاكمه في 17 تهمه مختلفه ( مابعتشي أنصاره يرمو قنابل ومولوتوف على مراكز الشرطه ) , دخل السجن وهو بيتحاكم ( مابعتشي حد من رجالته يتفق مع تنظيم ارهابي دولي على صفقات سلاح وارهابيين عشان ينتقم من الدوله اللي بتحاكمو ) . . القاضي في كل جلسه يقول المتهم محمد حسني مبارك هو يرد ويقول أفندم ( ماقالشي انت مين يا عم انت ) , كل ما يطلع من قضيه يدخل في قضيه ( ماستعداش جيوش أمريكا وتركيا على مصر ولا انصاره طلعو في الجزيره يطالبو بحرق البلد ) , ولاده طلعو براءه ( شطارة محامي طبعا وفرم للأدله ) , ولحد النهارده بيروحو يحضرو محاكمة ابوهم , اللي هو مين ابوهم ؟ اللي هو محمد حسني مبارك رئيس مصر لمدة 30 سنه يعني سلطان زمانه , ماسمعناش ان حد من ولاد مبارك قلّو أدبهم عالقاضي أو على حد في قاعة المحكمه لا أثناء المحاكمه ولا بعد ما طلعو براءه . . مبارك كان يقدر ؟ أه يقدر , كان يقدر يهرب بطياره خاصه على أي دوله ( 50 دوله كانو جاهزين لاستقباله ) , و ملياراته تعيشه ملك لمدة الف سنه جايين , كان يقدر يشتري ارهابيين وسلاح وعصابات ويحرق مصر , كان يقدر يعمل انشقاقات في الجيش , وكان وكان وكان . . ده الفرق بين رجل الدوله ( حتى لو حرامي وكداب ) وبين راجل العصابه ( حتى لو حافظ كتاب الله ) . . بعيد عن دم الشهدا والبلد الي اتجرّفت في عهده , وبعيد عن المليارات اللي اتسرقت من قوت الغلابه , عايز أبعت تحيه لمحمد حسني مبارك ( اه الحرامي الكداب اللي ايده ملطخه بدماء الشباب ) , تحيه بس على احترام القضاء واحترام هيبة الدوله ووحدة ترابها ,............ هو انا كده ابقى كفرت بكتاب الثوره المقدس و بألهتنا الثوار العوالي ؟!!.

Mohamed Hussein 10 فبراير

 ألف مبروك . ألف مبروك يا ولاد , اليمن بقت كونفدراليه , والسودان اتقسمت اتنين وبكره هتبقى تسعه ( حقيقي والله مش فوتو شوب ) , وفلسطين بقت حتتين منهم حته للإرهابيين , وسوريا ببيهدّو في جيشها وشعبها وفيها 17 جهاز مخابرات شغالين عالأرض , والعراق بتنعم بالديموقراطيه الأمريكاني بقالها 10 سنين ( كل يوم تفجيرات وعشرات القتلى لحد النهارده ) وليبيا كل حته فيها بتحكمها عصابه مختلفه , المخابرات الأمريكيه بتنسق بين العصابات ومعدش فيه دوله . . ولما انا بقى أقول لصاحبي النحنوح : يا فلان مصر في خطر حقيقي والدور هييجي عليها وهتبقى حرب اهليه وتقسيم , ... والوقوف جنب جيشها ووحده ترابها دلوأتي بقى فرض عين على كل مصري زي الصلاه والصوم. ............................... يقوم صاحبي النحنوح يحط ايده اليمين على كتفي , ويمسك سجارة الحشيش بالإيد الشمال ياخد منها نفس ويبص لي بنظرة المثقفين اللي بيملأها الفخر والثقه بالنفس ويقول لي : انت مضحوك عليك يا محمد , ده كله شغل مخابرات مصريه , أبانا الذي في المخابرات !!.

Mohamed Hussein 10 فبراير  

توكل خرمان خرمت المنطق براس ازازة كاكولا مكسوره , وقال بترحب على صفحتها باتحاد فيدرالي في اليمن !! , إنتي فاكره نفسك في أمريكا ؟ اتحاد فدرالي في دوله مليانه ارهاب وسلاح وجماعات واغلب شعبها تحت خط الفقر والجهل , اتحاد فدرالي في دوله لسه كي جي وان ديموقراطيه ؟ دانتو هتشوفو ايام سوده و عهد الله.... ( على فكره نفس العقل اللي يقبل بفيدراليه في عالمنا العربي هو نفس العقل اللي ينادي بالمصالحه مع الإرهابيين ( فصيل وطني بقى ) ..وباي باي يا دوله , مممممممم تقريبا العيب في جايزة نوبل نفسها ) !! . . إلا قولي لي يا حاجه توكل , هي جايزة نوبل بتكسر النفوس ولّا الحكايه فلوس ؟ و لّا انتي كنتي كويسه بس اتلمّيتي على خايب الرجا والمتعوس ؟ , تكونيش محسوده يا شابه و معمول لك عمل ومدسوس ؟!!.

Mohamed Hussein 11 فبراير

 كمثلِ الحمارِ يحملُ أسفارَ ......... الخطيئه الكبرى . صباح الخير - ربنا سبحانه وتعالى خلق الناس في شأن العقل والثقافه 4 انواع .... النوع الأول هو ( المثقف الذكي ) , ده بيقرا وبيسمع ودماغه شغال , بيعرف يعمل اسقاط لثقافته بشكل مرن على الواقع , مش كل حاجه بيقراها بيصدقها وبيشوف انها تنفع معانا ...يعني بينتقي ...النوع التاني ( المثقف الغبي ) , وده الأخطر على الإطلاق , الأسوأ , أسوأ كمان في رأيي من النوع الرابع ( الجاهل الغبي ) .......... هقول 3 امثله بسيطه تدلل على خطورة النوع التاني على نفسه وعلى مجتمعه . 1- في المناقشات لمدة 3 سنين فاتو حول موضوع نظام الحكم المقترح في مصر , كان النوع التاني ( أغلبه بيحمل لقب أ .د ) بيطلع في برامج التوك شو ويقول : أنا أُفضِّل النظام البرلماني , زي تركيا واسرائيل كده , لأن النظام البرلماني بيمثل افضل النظم الديموقراطيه في العالم وكأن الشعب بيحكم نفسه بنفسه فعلا .... ............ أهو مولانا قري عن أنظمة الحكم في العالم وشاف بعنيه ( دي ثقافه ) بس أسقطها على مصر بشكل غبي ( غباء ) , والحكايه باختصار إن النظام البرلماني يعني رئيس دوله مالوش صلاحيات تذكر ورئيس وزراء هو الكل في الكل ,رئيس الوزراء بيشكل الحكومه ويشترط انه يكون واخد اغلبيه برلمانيه , يعني من الأخر اللي هيحكم مصر عضو البرلمان اللي حضرتك تنتخبه ...طب ده ينفع ؟ في دوله فيها 50 % تحت خط الفقر , لسه مفهاش مؤسسات ثابته وقويه تعرف تعمل انتخابات برلمانيه محترمه فعلا , في دوله الأصوات فيها بتتشري ب 50 جنيه أو بأيتين قرأن , في دوله أغلب سكانها مايعرفوش الفرق بين دور عضو البرلمان ودور رئيس الدوله ودور شيخ الجامع ؟ في دوله لسه الناخب فيها بيقول المرشح الفلاني ده بتاع ربنا وانا هنتخبه أو المرشح العلاني ده رصف لنا الطريق بتاع البلد وبيدبح عجلين في العيد . . في دوله فيها حجم الإنفاق على الإنتخابات خارج السيطره تماما , يعني انا ممكن اكون افضل بكتير من حضرتك بس ماعنديش 10 مليون اصرفهم عالدعايه والزيت والسكر وكروت الموبايل زيك ......يبقى لما يطلع مولانا ال ( أ.د ) , اللي قاري وضليع في قواعد السياسه والفجل الرومي و يبقى قاعد قدامك كده ويرجع بضهره عالكرسي لورا ويقول ( أنا أفضل النظام البرلماني ) ...على طول تعرف إننا قدام نموذج فج وصريح للمثقف الغبي ...كمثل الحمار يحمل أسفارا !! ........... ممممممممممم البوست بقى طويل ماعرفشي ليه ,هبقى أقول أمثله تانيه بعدين بقى .

Mohamed Hussein 11 فبراير  

المثقف الغبي 2 ............. توكل كرمان . وبفرض حسن النيه عند توكل كرمان , لكن فكرة الترحيب بدوله فيدراليه في اليمن هو نموذج فج برضه للمثقف الغبي . الفدراليه بتعني مجموعة أقاليم ( دويلات ) هيبقى لها استقلاليه كافيه لكن بيجمعها حكومه مركزيه أو حكم فيدرالي . هبسطهالك , واحد مخلّف 6 عيال , وقام عزلهم عن بعض , قال لهم كل واحد يروح يبني له بيت ويستقل بحياته بس ابقو زوروني يا ولاد في الأعياد والمواسم !! ولما يكونو العيال مش متربيين كويس ومش فاهمين اهمية ترابطهم مع بعض وزيارتهم للأبوين وبر الوالدين ممممممممممم ابقى قابلني لو حد حضر عزاك حتى يابو العيال !! . فكرة الفدراليه تنفع لما يكون فيه دستور قوي ومؤسسات قويه متمرسه في الديموقراطيه وقوانين بيفهمها القاصي والداني ودوله مستقره ( أمنيا على الأقل )... . عشان كده الفدراليه في اليمن بتعني باختصار التقسيم الى 6 دويلات رسمي بطريقه شيك ومتحضره , يعني من غير نقطة دم , تقسيم أمريكي ( كرماني ) مشترك , ومحلاها عيشة الفلاح !!. . ملاحظه مهمه جدا تخصنا احنا مباشرة , بس ركز والنبي , اليمن بتقع على مضيق باب المندب , اللي هو المخرج بتاع البحر الأحمر لو اعتبرنا ان قناة السويس هي المدخل , وتقسيم اليمن بيعني ان احتماليه سيطرة العصابات على مضيق باب المندب وارده جدا , وبالتالي مفيش سفن هتجازف وتيجي لحد هناك , و ده بيعني باختصار إن قناة السويس هنبلّها ونشرب مايتها . نفس فكرة سد النهضه وماية النيل , أمريكا بتخنقك , بحجب المايه ( سد النهضه ) وحجب العمله الصعبه ( وقف حال قناة السويس ) وطبعا ده بمساعدة كلابها في المنطفه ...قطر , الإخوان , الصهاينه , توكل كرمان !!. . بس انت لسه عايش في البلاله وبتقول ده شغل مخابرات مصريه صح ؟!!

Mohamed Hussein 11 فبراير  

باختصار باختصار ............ حلم الصهاينه . اسرائيل في يوم من الأيام شافت إن هي مش هتقدر تكبر أكتر من كده ( في المساحه على الأقل ) بحكم العوامل الجغرافيه ولا في عدد السكان ( رجالتها مش رجاله !! ) .. وكان الحل بالنسبالها هو إننا احنا كدول عربيه نصغر ونتفتت , ده اللي بيحصل فينا من 15 سنه تقريبا , بس كل دوله عربيه كان ليها مدخل غير التاني , واحده قالو صدام ديكتاتور وعنده اسلحة دمار شامل , واحده استغلو فيها التنوع العرقي والمذهبي وقلبوها حرب أهليه , واحده ضحكو عليها وقالو فيدراليه وهتبقى العيشه هنيه , واحده استغلو فيها الثوره والربيع العربي , و 3 اربعه اتقسمو كده من تلقاء أنفسهم بمباركة المخابرات الأمريكيه . يعني خطة الصهاينه بتنفذها أمريكا بحذافيرها والعمليه ماشيه معاها زي الفل , زي السكينه في الحلاوه ....ابحثو بقى عن عملاء أمريكا وكلابها في دولنا العربيه . ملاحظه نونو صغيره : حاول تركّز , كل الدول العربيه اللي اتقسمت واللي بتتقسم بيجمع بينهم عامل مشترك واحد , هو ان كل دوله فيهم فيها جماعه إسلاميه ولا مؤاخذه , جماعه اسلاميه واحده على الأقل ...قولتش حاجه انا بقى ؟!!!!!!.

Mohamed Hussein 11 فبراير

 باي باي يمن........ أكلة محشي !!. . هيبقو 6 دويلات , وحرب أهليه بينهم , كل دويله هتسعى للسيطره , الأيام بيننا , السلاح والجهل والإرهابيين والمخابرات الأجنبيه موجودين , وزي ما فرحنا بالديموقراطيه الأمريكاني اللي جايه للعراق من 10 سنين هنشوف بعنينا العز والنعيم اللي هتعيش فيه اليمن السنين الجايه !! . . شايف ناس من أصدقائي ( المثقفين ) فرحانين اوي بكلمة ( فيدراليه ) , وبيرددوها كمصطلح جامد تنين , بعضهم طلب فدراليه في مصر على غرار اليمن , و يقولك انت مش تعرف حاجه عن الفيدراليه يا محمد , ولادك مش يعرفو حاجه عن الفدراليه.... و على راي عادل امام ( وكأن الفدراليه والسكس دول اخترعوهم اول امبارح بالليل ) !!. . عارف انت ؟ لما والدتي أو والدتك بتحب تعمل محشي , بتجيب ورق عنب أو كرنب ورز وشوية شبت وكسبره و حبايتين طماطم و مايه وبعد كده تلف المحشي وتسويه على النار . ولما ماما أمريكا بتحب تخرب بلد عربي , بتجيب إرهابيين وسلاح واسلاميين وشوية خونه وكام حزمة شعارات رنانه عشان المثقفين يرددوهم وبعد كده بتسوي الفتنه والحرب الأهليه على قناة الجزيره !! ...وبس خلاص , بألف هنا وشفا يا ست توكل , مطرح ما يسري يمري , أو مطرح ما يسري فوده !!.

Mohamed Hussein 11 فبراير

 مصر دايماً يا حبيبتي لسّه ليكي عمر باقي فوق ترابك بين ولادنا اسألي الأجراس و مدنه واسمعي صوت السواقي . فجر يطلع خير بنزرع نبته تحضن في الحيطان الأمان في الحضن يجمع و الهوى سر التلاقي . مصري عاشق ذكرياتك أهراماتك وحكاياتك و ابتسامتك هي هي ياللي فوتِّي الكون ما فاتك من جمالك يا بهيه . فاكره أحمس فاكره مينا فاكره سيدنا المسيح ؟ فاكره جيشك حرب سينا يا جبل ما يهزه ريح . عوديني بالمحبّه شرّبيني الصبر حبّه علميني أنسى كلمة ( لأ محال ) . ازرعيني بين حدودك اطبعيني فوق خدوك لجل عودي يبقى راسخ زي عودك زي ما تكون الجبال . وافردي قلوعك ودوسي عالكلاب ويّا الديابه مش ولادك مش حبايبك اللي عايزك تبقي غابه . اللي تافه واللي خاين و اللي غرَّر بالولاد اللي باعك في المداين و اللي عارضك في المزاد تبقى ليه طيبتك يا غاليه تبقى ليه الطيبه عاد ؟!! . . محمد حسين

Mohamed Hussein 12 فبراير

 إكس .. و ...واي ... و ...الكبير أوي ... والصغير نونو . - الكبير أوي هو عمرو موسى , سياسي بقاله نص قرن , استقال من جامعة الدول على أمل الترشح للرئاسه والفوز بيها , اترشح بس خسر ,مقالشي هحرقها مداين ولا قال خلاص هقعد في بيتنا ومش لاعب معاكو ولا ندم إنه ساب منصب رفيع في جامعة الدول ولا ساب مصر وسافر ... جت ثورة 30 يونيو وانطلب منه يبقى رئيس لجنة الدستور , وافق وعمل فيها مجهود غير عادي للتوفيق بين اعضاء لجنة ال 50 مقالشي لا تؤ تؤ , انا عمرو موسى أخري يبقى رئيس لجنة تعديل دستور ؟ ده مش قيمتي ولا مكانتي ....عمرو موسى زي أي سياسي كبير في العالم بيحلم بالرئاسه ولأخر لحظه في عمره هيحلم بيها , إنما كأي سياسي فاهم بيعرف الشارع رايح على فين ومع مين ؟ , في المره الأولى كانت الأمور مش واضحه اطلاقا ولولا ترشح شفيق كان زمان عمرو موسى رئيس مصر من 2012...رأيي انه مش هيترشح تاني للرئاسه بس مش هيتوقف عن ممارسة العمل السياسي والعمل العام ....ده واحد كبير يستحق الإحترام . . الصغير نونو هو المحامي الشاب خالد عبده , خالد عبده اترشح للرئاسه 2012 وجاب ممممممممممم ماعلينا ,إن الله حليم ستار , إنما مايصحش يا أستاذ خالد يا عبده يا بتاع نص ثوره ونص انقلاب إنك تعلن ترشحك تاني بعد الإنقلاب ده وبعد دستور الإنقلابيين وتبقى كداب لما تقول إن الشعب كله عارفك وحافظك يا أستاذ خالد عبده !! , ومايصحش كمان وضد العقل والمنطق إنك تقول قواعدي وانصاري في ربوع مصر دفعوني للترشح , قواعد !! وانصار!! ياخي قعدت لك يا بعيد . . هيتبقى عندنا X و y ....أنا شخصيا بحلم بتحالف بين الإتنين , محور نسميه محور ( إكس واي ) , وصدقني مش مهم مين فيهم اكس ومين واي , واحد مرشح ثورة يناير والتاني مرشح ثورة يونيو , واحد مناضل قديم وقراري والتاني مناضل جديد , ايوه يا سيدي لما يبقى العدو رقم واحد للإخوان والإسم رقم واحد على قايمة اغتيالاتهم وهو عارف كده كويس يبقى مناضل ....انا حابب الليله تبقى كده ( تعاون ) , رئيس ورئيس وزاره , ولو حضرتك مصرّ على طريقة (لأ حدد ؟ ) , تختار مين ؟ معانا ولا مع الناس التانيين ؟ .........مممممممممم طيب لله الأمر من قبل ومن بعد , عندي سؤالين حضرتك تسألهم لكل مرشح من الإتنين , وحسب الإجابه هحدد وهحتفظ لنفسي بحق تحقيق حلم التعاون بينهم . ........ س 1 : هل تقبل بدعم جماعة الإخوان الإرهابيه في الأنتخابات ؟ ........س 2 : لو بقيت رئيس مصر , ماذا ستفعل مع الجماعه الإخوان الإرهابيه ؟

Mohamed Hussein 12 فبراير

 مقابلة السيسي في روسيا بطريقه محترمه تليق بقائد الجيش المصري , اللي ممكن يبقى رئيس بعد كام شهر , بس حكاية رئيس دي مش مهمه اوي عند الروس , ماهو مرسي كان رئيس وكلنا شوفنا المقابله الزرايبي اللي اتقابل بيها . أومال ايه الحكايه ؟ الحكايه إن الروس بيحترمو القوي واحنا كمجتمع مدني و علمي في مصر ماتركناش اي بصمه في أغلب دول العالم في ال 50 سنه اللي فاتو , يعني مثلا مالناش بحث علمي واصل لحد روسيا , ماعملناش صناعه ثقيله أو معقده تفتكرنا بيها روسيا , مالناش تجربه ديموقراطيه تستحق الإحترام , وكل اللي يفتكره الروس ( كحكومه أو مواطنين ) عن مصر هو 3 حاجات. .... الأهرامات ...عبد الناصر .... وجيش مصر العظيم ...........عبد الفتاح السيسي هو وزير الدفاع , يعني قائد جيش مصر و ده كافي جدا لاحترامه عند الروس وجايز اوي يكونو شايفينه خليفة ناصر ويبقى الإحترام مضاعف !! .

Mohamed Hussein 12 فبراير

 يا ولاد التيييييييييييييييييييييييت . وقالك يا سيدي , لو عندك ولد او بنت عمره 4 سنين وعايز تقدم له في مدرسه ناشونال او انترناشونال في مصر ممممممم يبقى هتعمل التالي بس وسّع صدرك على رأي السعوديين : . 1- هيعملو للطفل ( ابو 4 سنين ) انترفيو في اوضه منفصله لوحده ( اوضه ضلمه تقريبا ) , هيسألوه بالإنجليزي عن اسمه وسنه والألوان والأرقام من 1 ل 10 ولون عربية باباه وباباه بيشتغل ايه واسماء النباتات والحيوانات والزهور وماذا تعرف عن دورة كربس ونظرية دارون ؟!. . 2- هيعملو انترفيو للأب والأم , أهم حاجه تبقى لابس الحته اللي عالحبل انت ومراتك كأنكو رايحين تستلمو جايزة اوسكار , وهيسألوك بالإنجليزي عن طريقه معاملتك للطفل ( محل التحقيق ) وازاي بتعاقبه وازاي بتكافئه وبتأكّله ايه ؟ وليه اخترت المدرسه دي تحديدا , وايه اللي يضمن لنا انك مش تخلع منها بعد سنه ولا اتنين ؟!!. . 3- المصاريف بقى يا حلو , أقل حاجه 10 الاف في الناشونال ( لحد 20 ) وأقل حاجه 17 في الإنترناشونال لحد 120 ...ده طبعا غير 50 جنيه كل اسبوع , خرايط ونشاط ثقافي و أرت كرافت , و 200 جنيه عشان الأكتيفيتي , و 1000 جنيه عشان نقعد ابنك على البيسين و 650 جنيه عشان نقوم ابنك من على البيسين , و متنساش طبعا ان عيد ميلاد مس ميرفت بعد بكره وهديتك لازم تليق بالمدرسه ومكانتها ... اهو انا مش خايف غير من مكانتها دي ؟!! . 4- كعادة وطبيعة الشعب المصري الجبار , الأهالي واولياء الامور عملو جروبات ومنتديات وبيغششو بعض , الإجابه النموذجيه لكل سؤال في الإنترفيو للطفل وللأبوين , أيووووووووه بالظبط زي فيلم عسل اسود كده , كأننا رايحين نطلع فيزا لأمريكا : ...س : واحنا ايه اللي يضمن لنا انك مش هتسحب ابنك من المدرسه بعد سنتين تلاته ؟ ...الإجابه النموذجيه : أنا مش ممكن اضحي بمستقبل ابني ومش هقبل له بمستوى تعليمي واخلاقي وثقافي اقل من مدرستكو العظيمه . .................... ..... س : انت ايه اللي عاجبك في المدرسه وليه اخترتها هي تحديدا ؟ ...الإجابه النموذجيه : حسيت ان فيها حاجه مختلفه , ايه هي ؟ ماعرفش ..حاجه كده شدتني ليها ..ايه هي ؟ ماعرفش ...ليها سحر ورونق غريب ايه هو ؟ ماعرفس ... .............. دو يو هاف إتش أر ليتير ؟ ...ممممممم نو دو يو هاف بانك أكاونت ؟ ..ممممممم نو احنا كده خلصنا , كانسيلد ...ديسميس !!.

Mohamed Hussein 13 فبراير

 فضفضه . - عادةً لا أستخدم اللغه الفصحى في الكتابه , بميل للعاميه , اعتقادي ان كتير من المعاني والأحاسيس الجميله أو الصادقه على الأقل بتضيع في البحث عن مفردات مناسبه من اللغه الفصحى فبيطلع الكلام في أغلبه ماسخ ( جميل بس جماله بلاستيك ) , لما يكون عندك تدفق في الأفكار والمشاعر بتاخد اسرع وسيلة نقل ممكنه , اللغه أو اللهجه هي وسيلة النقل مش اكتر , طياره صغيره بتطلع من عند الكاتب لحد المتلقي ...اهم حاجه كمان الهبوط يكون سلس بدون مطبات ولا قلقله !!. . مابحبش قعدات المثقفين امهات بدله وكرافته اللي بيبدأو كلامهم بجملة ( في الواقع ) , وبيطعّمو حديثهم بكام كلمه انجليزي بعضها بطريقه مصطنعه بغرض الفزلكه والتنطيط , عندي ما يكفي من اللغه الفصحى ومايكفي من مصطلحات التنطيط الإنجليزيه إنما بحب قاعدة المصاطب وبشوف الحكمه في كلام الناس البسيطه , اللي الدنيا دعكتها وفرمتها , مش شرط يعني يكون قاري لنيشته وطه حسين . . اكتر فتره قريت فيها كتب هي فترة الجامعه والثانويه العامه , كتب اغلبها ادبي وفلسفي , كنت بحلم يكون عندي كتاب الأغاني كامل ( مش عارف كام وتلاتين جزء ) بس سعره وقتها كان 600 جنيه وانا كنت باخد مصروف الإسبوع 12 جنيه , قريت لطه حسين والعقاد و يوسف ادريس ومحمد عبد الحليم عبد الله وجان جاك روسو وافلاطون وغيرهم , وبعد فتره بقيت أميل للتفكير والتأمل اكتر من القرايه , اعتقادي ان العقل البشري مش سلطانيه عشان نملاها بأي حاجه من غير تفكير , من غير ما يكون عندك وقت كافي للتفكير , مش دولاب الخزين يعني , فكّر بقى ومارس عبادة التأمل . . تأمل في ضحكه الغلبان الصافيه وقارنها باكتئاب الأثرياء اللي تحس من تكشيرتهم ان جالهم فاكس او ايميل بيقول إن الشمس مش هتطلع تاني , تأمل في أيات الله في القرأن والطبيعه , يا سلام , وقال ربنا سبحانه وتعالى بيقول لسيدنا رسول الله ( يا أيها النبي اتقى الله ) !! , يا سنه سوخه , أومال احنا يتقال لنا ايه ؟ , تأمل في صوت الطبلاوي وهو بيقرا الأيه دي تحديدا , تأمل في موهبة سومه وصوت فيروز واحساس ماجده الرومي بالموسيقى , تأمل في شكل ورق الشجر ورسمته اللي عامله زي بصمة الصابع , تأمل في الأديان واللهجات واللكنات والبشر اللي في أقصى الأرض , تخيل عايشين ازاي ؟ بيحبو ازاي ؟ بيتجوزو ازاي ؟ بيلبسو ايه ؟ . .... أسوأ حاجه أو طبع بيتطبع بيه الإنسان هو رفض الغير , الغير في الديانه , الغير في اللون , الغير في الطبع والعادات .............اهي مجرد فضفضه بعيد عن السياسه

Mohamed Hussein 13 فبراير

 بمناسبة عيد الحب وكداهون , حواديت أيام الجامعه . . وانا في الكليه كان ليا واحد صاحبي في كلية طب من قريه جنب قريتنا , وكان بيحب بنت في كلية تربيه , في يوم من الأيام البنت دي أبوها توفى , وصاحبي راح يزورهم ويعزّي العيله في وفاة الأب , البنت أول ما شافت حبيبها أغمى عليها عشان كانت متأثره بوفاة باباها وكده يعني , صاحبي بما إنه طبيب والبيت مفهوش غير مامتها وخواتها البنات شال البنت اللي هي حبيبته ودخلها أوضتها وبدأ يفوّق فيها لحد ما فاقت . . وبعد يوم واتنين واسبوع واتنين , قعد صاحبي مع حبيبته في نادي شجرة الدر عالنيل في المنصوره , قالت له عارف يا حبيبي , أنا مش فاكره أي حاجه من وفاة بابا إلا الوقت اللي انت شيلتني فيه حتى بالأماره رجلك خبطت في الباب وانت داخل ونزلتني عالسرير بالراحه خالص !! ..... صاحبي لما حكالي الموقف قلت له اوعى تتجوز البنت دي , وإلا هتخلفو عيال ( تراللي ) وانت مش ناقص أساسا !!.

Mohamed Hussein 13 فبراير  

عبده الأهبل . بوتين عامل مأدبة عشاء للسيسي والوفد اللي معاه , مجرد لحظة تخيل إن الوفد ده سافر روسيا وقرر بوتين انه يقابل السيسي في استراحه بين الشوطين في مباراة هوكي , هل ممكن ؟!!. احترام الشخص لنفسه واحساسه بذاته وبمنصبه و بدولته اللي جاي منها بيجبر الغير على احترامه . في السياسات الدوليه كل حاجه لها معنى ومدلول ورساله , استقبال محترم , مأدبة عشاء , حتى ربطة الكرافته ومكان المقابله ومدتها , بروتوكولات هي , الحكايه مش ( جرن الهبله ) فاسألو العارفين . . سعد الدين ابراهيم , كلب أمريكا وحلقة الوصل بينها وبين الإخوان , اللي السلفيين لجأو له مؤخرا عشان يوصلهم بأوباما كبديل عن الإخوان في حكم مصر , ده على اعتبار ان مصر دي طابونه بتديرها أمريكا وان سعد الدين ابراهيم هو المشرف أو المندوب السامي على الطابونه !!. . سعد الدين ابراهيم بيقول ان السيسي لما يبقى رئيس هيتصالح مع الإخوان !! , جتها نيله اللي عايزه خلف , الوحيد في مرشحي الرئاسه اللي أضمن انه مش هيتصالح مع الإخوان لو فاز هو السيسي , والحكايه مالهاش علاقه بشخصية السيسي ولا مبادئ ولا يحزنون , إنما هو عارف ومتأكد إنه هيموت مقتول على ايد الإخوان حتى لو بقى رئيس , دي نهاية السيسي الحتميه , سواء اتصالح معاهم او متصالحش يبقى يتصالح ليه ؟ . ماهو مش كل واحد نكش شعره هنقول عليه مفّكر و منظّر سياسي , و إلا يبقى عبده الأهبل بتاع قريتنا هو كبير المفكرين في مصر !!.

Mohamed Hussein 13 فبراير  

حكاية ثورتين باختصار . في حياتي ماشوفتش ولا عرفت ولا سمعت عن حزب أو جماعه أو كيان عجيب وغريب و متناقض زي الإخوان , بيرتكبو كل الموبقات اللي في الدنيا ويقولو من أجل نشر رسالة الإسلام , يعني قتل وكدب وتدليس ونفاق و حرق وتخريب و قذف محصنات وخيانة وطن بس الغايه ( نبيله ) والهدف ( سامي ) !!. . و جت ثورة يناير عشان تعرّفنا إن ( نبيلة ) بتاعة الإخوان عايشه مع ( سامي ) في الحرام بقالهم 84 سنه . . و عشان احنا شعب مش بيحب عيشة الحرام حصلت ثورة 30 يونيو وكان شعارها ( الرقاصه لازم تنزل ) !!.

Mohamed Hussein 13 فبراير  

البرادعي كاتب تويته في ذكرى استقلال ناميبيا !! , تطلع فين ناميبيا دي يا جناب العمده ؟ فكرني بالواد الصبي بتاع محمد رضا في فيلم الراقصه والطبال لما كان بيقرا الجرنان للمعلم وقال له ( مشاجرةٌ في نيكاراجوا ) ...مالنا احنا ومال مشاراجوا دي يا معلم ؟ قصدي مالنا احنا ومال ناميبيا دي يا برادعي ؟! . أه عرفت , ده بيأكد إن المصالحه في ناميبيا هي اللي قضت على الحرب العنصريه هناك وبيقول إن المصالحه هي الحل , ده تلقيح كلام يا برادعي يا ريتك كنت بتبارك لناميبيا في عيد استقلالها فعلا ...ده مش شغل زعماء , ده شغل عوالم . .......... مهو مش ممكن تكون حياتك كلها بتبدأ وتنتهي عند الجمله دي ( المصالحه هي الحل المصالحه هي الحل المصالحه هي الحل ) , يا راجل قول و غيّر , بتصحى وتنام وتقعد وتقوم وتدور في فلك المصالحه مع الإرهابيين . . مع ان الفرق شاسع بين الوضع في مصر والوضع في ناميبيا , وتشبيهك قمئ و بائس , دوله بتحارب تنظيم ارهابي دولي زي ما بتعمل كل دول اوروبا وزي ما بتعمل امريكا واي دوله بتحترم نفسها ...ايه علاقة ده بحرب عنصريه بين قبائل ولا بين البيض والسود ولا زفت ؟ , هما الإخوان لما يخونو البلد ويكفرو بيها ويسوقو عليها كلاب السكك من بره يبقو فصيل وطني ؟ الخيانه في زمانا بقت وجهة نظر ؟!!.

Mohamed Hussein 14 فبراير

 يعني ايه دوله كبيره ( حتى لو مش عاجبه جنابك ) ؟ . .. يعني المتحدث باسم وازرة الخارجيه بيعقب على تصريحات اردوغان اللي بيقول فيها ( ما حدث في مصر هو انقلاب ) فيقول المتحدث باسم الخارجيه : تصريحات اردوغان لا تستحق الرد !!. . .. يعني السيسي يتصل برئيس وزراء ليبيا المؤقت و يؤكد على دعم مصر اللامحدود للشعب الليبي ( ياااااااااااااه اخيرا رجعنا نعلن عن دعمنا للدول العربيه حتى لو دعم معنوي ؟ ) . .. يعني ايمن نور يصرح في الجزيره إن ما حدث في مصر هو انقلاب ( زيه زي عاصم عبد الماجد و وائل قنديل وكلهم في قطر بالصدفه البحته !! ) , فمايلاقيش حد معبّر اهله بالرد من مصر , ولا حتى سكرتير العسكري اللي بيقف خدمه على مكتب المقدم اللي مسئول عن مكتب اللواء اللي مهمته تأمين السيسي !!.. ............ ماهي الناس مقامات يا عم أيمن وانت مقامك كده تبقى كلب رابطاه موزه بسلسه و متلاقيش حد يعبرك !!.

Mohamed Hussein 14 فبراير

 حماده راجع من السفر .... بوست سياسي !! . بعد غربه طويله , بتاع 30 سنه , قرر حماده انه يرجع بقى من غربته ويستقر ويشوف بيته وحاله , حماده وصل عند البيت لقاه غير ما كان سايبه خالص , اتنهبت الحاجات اللي فيه وحيطانه محتاجه ترميم , سأل على جاره اللي ساكن في البيت اللي في وش بيته , قالو له اتخانق مع اخوه وقسمو البيت بينهم بالنص و هو بقى ارهابي ومالي البيت سلاح ومتفجرات وارهابيين , ولاد الحلال كمان قالو له ان جاره ده كان عامل نفق بين بيته وبيت حماده وداخل طالع الله اعلم كان بياخد ايه ويجيب ايه ؟. . حماده دخل ينام سمع ضرب نار وقنابل في البيت اللي على شماله , ولما صحي قالو له ان الورثه في البيت اللي وراه اتقسمو وكل يوم خناق وضرب نار برضه . المهم ان حماده كان راجع بقى باحلام كبيره و ( عريضه ) , صحي من النوم وراح جاب مهندس وقال له والنبي يا باشمهندس انا عايزك تعملي تراس هنا وقدام البيت تعمل لي بحيرة بط وهنزرع جنب البحيره كام شتله من زهرة التوليب عشان انا بعشق الزهره دي , وطول عمري بحلم بالقاعده في التراس بفنجان قهوه وتابلت و عيني تبقى شايفه الجنينه وزهرة التوليب والبط !!. . ممممممممممممم يا حماده البط والتراس والتوليب مش هيطيرو , كل اللي انت محتاجه حاليا هو ترميم البيت و تجيب نجار يعمل لك باب حديد وكالون 4 تكّات لحد ما جيرانك حالهم يتعدل وبعد كده ابقى بلبط في بحيرة البط براحتك ياكشي تركب على ضهر البطه حتى . .............................. قطيعه تقطع الديموقراطيه اللي بوّظت دماغ حماده !!.

Mohamed Hussein 15 فبراير

 في الربيع العربي ...... دروس وفلوس !!. . عندما تقف الحقيقه مجرده و عاريه أمام الأعمى , يا أخي لو انت اعمى ومش شايفها يبقى على الأقل حسّس عليها !! . الدرس الأول : لا تيأس فخلف كل جدار مرتفع يفصل بينك وبين سندريلا الجميله يوجد 19 جدار اعلى منه يا صاحبي , ولو ربنا كرمك و بعت لك الجناحين بتوع عباس ابن فرناس وقدرت تتجاوز الجدران دي فانت غالبا مش هتلاقي سندريلا لأنها اتجوزت ابن المعلم عكوه الجزار ( عقبال أملتك ) وعندها عيلين دلوأتي , لكن ممكن تلاقي الشوز بتاعها ( الجزمه ولا مؤاخذه ) , أهي تنفع برضه , ابقى علّقها في النجفه !! . الدرس التاني : حادثة أتوبيس في فيلم ( جاءنا البيان التالي ) لما حصلت حادثة الأتوبيس كانت رجالة الشرطه بيقومو بدورهم ورجالة الإسعاف بيقومو بدورهم والحراميه ( بتوع المعلم ) برضه بيقومو بدورهم , وفي فيلم الثوره حصل إن شباب زي الورد نزل ومات وشباب أصيب و الشرطه بتقوم بدورها والإسعاف بيقوم بدوره و الحراميه بتوع المعلم برضه كانو بيقومو بدورهم , ناس في الثوره عملت فلوس حلوه , بيقولو الجزيره بتدي للمحلل السياسي ألفين دولار في الساعه , يا سنه سوخه دي ساعة الصيدلي في مصر ب 150 جنيه ( ساعه يوميا لمدة شهر يعني 30 ساعه تبقى الساعه واقفه ب 5 جنيه , ب 5 جنيه والحسّابه بتحسب ) !! ...وانا قلت لابويا يطلعني محلل سياسي قال لي يابني أصلا شغلانه( المحلل ) دي حرام !!. . الدرس التالت : الناس اللي راجعين من العراق من اد 20 سنه حصلت هوجه ماديه وطفره كان سببها فلوس العراق , المصريين اللي شغالين في العراق كانو بيجيبو فلوس حلوه اوي , بيرجعو بقى يبنو بيت بالطوب الأحمر ( المسلّح ) ومعاهم المروحه والكاسيت ابو روحين والتلفزيون الملون , ومش هستغرب لو حصلت هوجه مماثله في الأيام الجايه وناس بان عليها نضرة النعيم , بس دي مش هتبقى بسبب الناس اللي راجعين من العراق , لأ المره دي هتبقى بسبب الناس اللي راجعين من قطر , وتحديدا من قناة الجزيره , أه بيشتغلو هناك عُمال ترحيله ومحللين سياسيين والعياذ بالله . . الدرس الرابع : الإختصار ميزة الشطار زمان , الشيخ الحكيم طلع عالمنبر في خطبة الجمعه وقال أيها الناس عارفين قصة سيدنا يوسف ؟ فالناس قالو أه , قال لهم طب خلاص أقم الصلاه , وبعد ما خلصو صلاه الشيخ مسك الميكروفون وقال أيها الناس عارفين قصة سيدنا سليمان ؟ قالو له أه , قال لهم خلاص ماتجوش الجمعه الجايه !! وانا عايز اعمل زي الشيخ واقول ايها الناس عارفين قصة سوريا ؟ ممممممم طب خلاص بطّلو ثورات بقى و احمدو ربنا إننا فلتنا بجلدنا و أقم الصلاه . أيها الناس شايفين اللي بيحصل في ليبيا ؟ طب خلاص بقى ماتجوش الجمعه الجايه , قصدي الثوره الجايه !!.

Mohamed Hussein 15 فبراير  

مشروع انتخابي اهو . السيسي طلع عنده مشروع انتخابي , من ضمن بنوده توطين 3 مليون مصري في سيناء ( خد بالك مصري مش قطري ..اصلا قطري عدد سكانها 300 الف ) , وانشاء مدينه في العالمين , الخ الخ الخ . يارب الساده النشطاء بتوع اصل السيسي مش عنده مشروع انتخابي يتهدّو بقى , بالمناسبه خبر المشروع الإنتخابي بتاع السيسي لا يعني لي أي شئ إطلاقااااااااااااااااا . مانا قولت وغلبت كلام , حكاية المشروع الإنتخابي دي ممكن تجيبها من على جوجل بالسيرش في دقيقتين , زيها زي أغلب رسايل الدكتوراه في ادارة الأعمال والتنميه البشريه , أغلبهم متاخد كوبي وبيست من جوجل , أه نسيت و ( برنت ) عشان يبقى عندك كتاب , ومقالات الصحفيين وكتب المشايخ كتير منها مسروق من عمك الحاج جوجل اللي فاتح بابه 24 ساعه ومش بيشوف بطاقة اللي بيعمل سيرش !!. . ممكن تجيب مشروع انتخابي روسي أو برازيلي لو تحب و تترجمه بألفين جنيه وتعدّل فيه كام كلمه ويبقى عندك مشروع انتخابي وبارك الله فيما رزق , يابني انا مش بعبد اصنام ومش بردد شعارات بغشم , حاول انت تفكر بس وبلاش تكون الغباوه عندك مرض مزمن زي السكر والكولسترول , ولو يا سيدي مرشح رئاسي ملقاش مشروع انتخابي على جوجل هيجيب استاذ اقتصاد واستاذ علوم سياسيه ويعملو له مشروع انتخابي في قاعده حلوه وغدوة سمك وهما قاعدين , 20 الف جنيه يخلصو الليله دي , تحب أعملك مشروع انتخابي رئاسي مايخرش المايه للمرشح محمد حسين ؟!. . نهايته , الكلام الحلو والمتزوق والمترتب في ورق مفيش أسهل منه , أنا مش عايز من السيسي مشروع انتخابي بيقول اننا هنخترع الذره وندخل حرب الكواكب خلال 6 شهور , كل اللي طالبه من الراجل لو نجح يبقى راجل و مصري و بس ...ولو عالمشروع فانا عايز مشروع من كلمتين اتنين يكفوني أوي أوِّل 4 سنين , القضاء على 40 % أميه ...القضاء على نسبة 50 % تحت خط الفقر (يعني نوصل لأقل من 10% مثلا ) .....لو عملتها يا سيسي تبقى راجل مصري وربنا مايخيب ظني فيك .

Mohamed Hussein 15 فبراير سمعت إن الأهلي هينافسنا السنادي عالمركز التاني ... ايه شغل التماحيك دي ؟!, ما سيبنالكو المركز الأول بمزاجنا و برضى خاطر , جايين تقاسمونا في لقمتنا ؟ خد قوتي وقوت عيالي يا عبد الهادي !!

Mohamed Hussein 16 فبراير

 جيناتنا المصريه ........... أنا و بس !! . صباح الخير 1- أنا صاحب أول طلعه جويه , شاركت في نصر أكتوبر العظيم , لولاي أنا كان زمان سينا محتله لحد النهارده وبناء عليه تبقى البلد دي بتاعتي , هقسمها بقى بمعرفتي بيني وبين ولادي و مراتي وهجيب لي شلّة ألاضيش ومقاطيع يساعدوني في نهبها وإلا تبقى كفرتو بحرب أكتوبر يا كفره . . 2- أنا شاركت في ثورة يناير ضد صاحب أول ضربه جويه لولاي كان زمان مبارك لسه بيحكم مصر وبناء عليه تبقى البلد دي بتاعتي هقسمها بمعرفتي بيني وبين حركة معرفشي ايه و إتلاف معرفشي ايه و هنشكل الحكومه واحنا قاعدين ونقول فلان يترشح وفلان لأ وإلا تبقو كفرتو بثورة يناير يا كفره . . 3- أنا شاركت في نشر الدعوه الإسلاميه وعملت جماعه كانت بتوزع زيت تموين عالغلابه , لولاي مكانشي الناس عرفت إن صلاة العصر 4 ركعات وبناء عليه تبقى البلد دي بتاعتي والدين ده بتاعي , هجيب الإرهابيين وبتوع حماس و قطر واقسم البلد بيني وبينهم ولو مفهمتوش إن ده حقنا تبقى كفرتو بالإسلام و الغلابه يا كفره . . 4- أنا شاركت في حركة تمرد وثورة 30 يونيو ضد بتوع الجماعه وخلّصت البلد من شرورهم وبلاويهم , لولاي أنا كان زمان مرسي بيحكمنا لحد النهارده وبناء عليه تبقى البلد دي بتاعتي , وإلا تبقو كفرتو بثورة 30 يونيو يا كفره .. . 5- مممممممممممممممممممم وانا شاركت في كتابة البوست ده اللي بيوضّح حجم الأنانيه والتخلف اللي جوانا , لولاي أنا مكنتوش عرفتو طباعنا وجيناتنا , وبناء عليه تبقى البلد دي بتاعتي و إلا تبقو كفرتو بالفيس بوك يا كفره !!.

Mohamed Hussein 16 فبراير

 مجرد ملاحظه . اعتقادي إن ربنا سبحانه وتعالى خلق البشر , ونزّل عليهم الديانات ( كتالوج ) للتعامل , وإن تعاقب الأديان كان غرضه الأساسي عملية update و refresh لإيمان البشر بوحدانيه الله وحسن الخلق . يعني مش بفهم أنا إن ربنا خلق الديانات عشان نعيش في خناقه وعاركه طول العمر , ومش بفهم إن دور المخلوق اللي هو أنا أو حضرتك إننا نقضي عمرنا كلنا بنكفّر فلان وعلان وكل واحد مننا بينزل من بطن أمه معاه نسخه من مفتاح الجنه ونسخه من مفتاح النار , يفتح بقى الجنه لحبايبه وولاد حتته و يرمي التانيين في النار . باختصار , إحنا مش عايشين في فيلم أبيض واسود فيه كل طائفه بتعتقد نفسها الأستاذ فريد شوقي , وباقي الطوائف هما الأستاذ مليجي و إلا لو الحكايه كده تقدر تقولي حضرتك فين بقى هدى سلطان والراجل اللي بيبيع فريسكا ؟!!.

Mohamed Hussein 16 فبراير

 ممممم 4 حالات وفاه و 13 اصابه في تفجير اتوبيس سياحي في طابا ؟ طبعا وزير السياحه هو اللي فجّر الأتوبيس عشان يلبسها في الإخوان , إنما سيبك من كل ده , مشهد دماء المصريين والأجانب على الأسفلت وصورة مصر في الخارج وضرب السياحه لا يؤرق نوم النحنوح والناشط السياسي , كلهم ولاد كلب , بيتعبهم اوي منظر بنات زفت حرائر الإخوان عشان متصورين ورا القضبان وام زفت حريه عشان مربوطه بالكلبشات في السرير !! , مع إن لا دول ماتو متفجّرين ولا دي اتقتلت ودمها بقى سايح !!. حاجه تقرف والله , الإرهابيين بيقتلو مصر بالبطئ , عملية ( هد الحيل ) , ضرب للأمن في الشارع , وضرب للسياحه والعمله الصعبه , وقتل وتفجير في مخاليق ربنا ...هنا وفي اللحظه دي عايز أقول لكل نحنوح بيتعاطف مع واحد او واحده بتتحاكم قدام قاضي وفي حضور محامي عشان خالفت القانون وغالبا هتطلع براءه إنك أخطر على مصر من الجماعه الإرهابيه , وكلكو ولاد كلب من الأخر. الخيانه عندكو وجهة نظر , وفاهمين إن الإرهاب ده هنحاربو بمبرد الضوافر وصباع الروج !!.

Mohamed Hussein 16 فبراير

 VIP . في حياتي ماشوفتش حد أغبى ولا أحقر ولا أكثر حماقه وسذاجه و وقاحه من واحد ممكن يقول المقوله دي ( مش قلتلكو مفيش حل مع الإرهابيين غير إنكو تصالحوهم وتاخدوهم بالحضن ) ؟! للأسف , بعرفكو من على بعد , بفهمكو , بشم ريحتكو , بتحاولو محاوله بائسه للحاق بقطار الحقوقين والمثقفين و المرهفين الحس ... وللأسف برضه قطار المثقفين المصري ( مدّعي الثقافه والتحرر ) بقى لامم زبالة المجتمع !! . مصر دلوأتي فيها 3 انواع من القطارات , قطر ركّاب غلابه عادي وده ممكن يتفجّر في أي لحظه ( احضن اخوك الإرهابي بقى ) , وقطر بضاعه و ده ممكن يتنهب في أي لحظه ( ما قلت لك احضن اخوك الإرهابي وانت ليه مش بتسمع الكلام ؟) , وقطر زباله و ده اللي بيركبه المثقفين ال VIP !!. 

Mohamed Hussein 17 فبراير

 مصالح وبتتصالح . - أنصار بيت المقدس ( الإخوان فرع سينا ) فجّرو اتوبيس , الجزيره ( يعني قطر ) هتلاقي خبر ومعلومه وداتا , الحكومه القطريه ( بيسعدها منظر الخراب في مصر , عقدة نقص تقريبا أو حمد و هو صغير كان عنده مشكله ما مع الحارس البنغالي ) , حماس بتوفّي بوعدها بعد ما حالهم اتوقف والسبوبه اتقطعت بعد هدم الأنفاق , كمان ضرب السياحه في مصر بيعني انتقال 10 مليون سايح من التفكير في مصر فور إلى التفكير في ( تركيا ) , 10 مليون سايح بشنطهم ودولاراتهم ويوروهاتهم , حاجه كده بتاع 150 مليار جنيه , وحشين دول يا ابراهيم ؟!! . . ماهو عشان حضرتك تبقى فاهم , أنصار الإخوان في العالم , بقصد الدول والمنظمات والأشخاص مش بالضروره يكونو مؤمنين بالفكر الإخوانجي , إنما مصالح وبتتلاقي , مصالح وبتتصالح , لاهو انت فاكر إن وائل قنديل وعلاء صادق ومحمد محسوب والأشكال الضاله دي كانو في يوم من الأيام اخوان وفاحتين نفسهم في معسكرات الكشافه ؟! , لا يا مولانا , فلوس ودولارات ويوروهات , وناس مالقتشي لنفسها كرسي في صفوف المؤيدين قامت ركبت اتوبيس الإرهاب , المهم تلاقي حاجه تقعد عليها بدل الوقفه , أقصد كرسي يعني !!. . أمريكا استخدمت المجاهدين في أفغانستان لحرب غير مباشره مع الإتحاد السوفيتي , هي الإداره الأمريكيه عايزه تنشر الإسلام وتقيم دولة الخلافه ؟ ولا الرئيس الأمريكي كان مقطّع حُصر الجامع ؟ , اسرائيل بتدعم ارهاب حماس وحماس بتدعم عقدة النقص القطريه وتركيا عايزه تبقى الكبيره الوحيده في المنطقه وكل دول مصالحهم اتلاقت مع مصالح الخرفان والإرهابيين , إلا بالحق أخبار ( أم حريه ) إيه ؟ وازاي حريه بنتها كده ؟ يا رب تكون كبرت وبقت عروسه , ولاد الحرام حطّو الكلابش في اديها وهي في المستشفى ( على رأي اللي قالت : بنت الحرام عضتني في ايدي وانا بخنقها تقولشي مرات ابوها ) , منظر يندى له جبين البشريه و جبين البرادعي , الحريه لأم حريه , صفحة ( كلنا أم حريه ) . . بيقولك يا سيدي في التفجيرات الإرهابيه في الأماكن المزدحمه , المشهد كله بيتحوّل لأشلاء , وبيبقى صعب جدا تجمع جثه على بعضها , انما ممكن تاخد دراع من واحد على رجل واحد تاني وراس واحد تالت وتسلمهم لأهله , وتقول لهم جثة ابنكو أهي , إحنا أسفين يا أم حريه !!.

Mohamed Hussein 17 فبراير
 قصة ( عنب ديبو ) . ارجوك حاول تفهم , ابوس ايدك حاول , احنا اختارنا الطريق الصعب عشان مفيش طريق تاني يعني مفيش اختيار وكلمة اختارنا دي بتتقال غلط , مش كل شويه بقى توقّفني وتقولي احنا ليه ماشيين في الطريق الصعب ده وليه مخدناش الطريق السهل ؟! يابني بقولك مفيش اختيار ومفيش طريق سهل , الحرب على الإرهاب اتفرضت علينا فرض , امشي معايا بقى وانت ساكت بلاش خوته ومش تسألني تاني , هي مش قصة عنب ديبو وهغنّيهالك عالربابه , ... فهمت ؟ طيب الحمد لله انك فهمت , يالله بقى اسألني احنا ليه ماشيين في الطريق الصعب ده ؟!!.

Mohamed Hussein 17 فبراير
إلى مَنْ يهمه الأمر ........ قطر , حماس , تركيا , اسرائيل . مصر دي أكبر دوله في التاريخ , الزمن خد من جتتها راقات , و ياما دقت عالراس طبول , يعني دوله عفيه وعودها ناشف مش طريه و بنت امبارح , الإرهاب اللي انتو بتدعموه ده هندوسه برجلينا وهنعدّي , بس وقتها ارهابكو هيرجع لكو ( بكرتونته زي ماهو ) , طبيعة الأشياء بتقول كده , العقل بيقول كده , ( وعلم العصابات بيقول إن اللي بيدعم عصابه أو بيتستر عليها بيموت مقتول ... غالبا على ايد نفس العصابه !! ) , كمان ماتنسوش إن ساعتها الكوره هتبقى في ملعبنا احنا , يعني الدور هيتقلب والكوتشينه هتبقى معانا واحنا اللي هنفّرق , حاولو تنشفو بقى وقتها و تسترجلو , يا حمد ماتقولشي أي !!.

Mohamed Hussein 17 فبراير

 · تم التعديل الحب هو ........... ( قصه حقيقيه ) . كان فيه شاب مسلم حب بنت مسيحيه , هي كمان حبته أوي , اتجوزو ( مش مهم ازاي ؟ ) , كل واحد فيهم فضل على دينه واحترم ديانة التاني , الشاب ده لما كان بينزل من البيت كانت حبيبته تقول له ( لا إله إلا الله ) , يقوم يرد عليها : محمد رسول الله . بعد فتره اتعرض الزوج لضيقه ماديه , مراته قالت له خد ورثي اللي في البنك , هو صحيح مش مبلغ كبير لكن هيحل جزء من المشكله عالأقل , قال لها لأ ورثك ده ليكي انتي وبس , قالت له ( أنا هو إنت ) , وبعدين هتحل المشكله إزاي ؟ قال لها هتتحل بإذن الله و ببركة سيدنا المسيح !!. . الحب هو ده , مش بيفرق معاه دين ولا لون ولا سن ولا زمان ولا مكان , الحب هو سر من أسرار جمال الله الخالق , و القيود اللي فاتت دي هي من اسرار قُبْح الإنسان المخيّّر دائما بين الجمال والقبح . مخلوق رباني , و مفيش أي كتاب سماوي يحارب مخلوق جميل من مخلوقات الله , وإلا يبقى كتاب دجل وشعوذه أو لا مؤاخذه دفتر بفره !!. . لو انت شيخ حقيقي أو قسيس بجد أو حاخام بصحيح , كلمني عن الحب باحترام , لو مش بتؤمن بيه زي ايمانك باليوم الأخر والملائكه والحساب يبقى اقلع عمِّتك واحلق دقنك وتعالى نضرب سوا سجارتين بانجو في الخرابه اللي اسمها عقل مولانا !!. .................... القصه اللي فاتت دي عمرها أكتر من 1400 سنه , والحبيب وحبيبته لسه عايشين , المكان ده اسمه مصر !! .

Mohamed Hussein 17 فبراير

 اعتذار . بعتذر عن البوست اللي فات , كنت بتكلم فيه عن الحب , عن مصر والمحبه بين المسلمين والأقباط فيها , انا تقريبا عايش في غيبوبه أو زمن غير الزمن , معرفشي كان فيه فتره من الفترات فيها المحبه دي وانا عايش فيها ولا لأ ؟ بعد ما كتبت البوست بثواني قريت الخبر ده ( أسره مسيحيه تتعرض للدبح بالكامل في اسكندريه !! ) , طب هقول ايه و حب ايه ؟ , إحنا المسلمين بقى أغلبنا بيحمل لقب إرهابي بجداره , إما إرهابي بالممارسه بالإيد أو إرهابي بالتبرير والتعاطف أو ارهابي حتى بالصمت , مش عارف بأي أليه هعرف أدافع عن ديني بعد كده ؟ وازاي هقنع واحد مسيحي مصري إنه مايسبّش لنا 100 مله ودين ؟ إذا كان صوت الإرهاب بتاع المسلمين هو اللي عالي وواضح ...حتى كلمة اعتذار بقت مكرره و ممله و ماسخه , إعتذار سخيف

Mohamed Hussein 18 فبراير

 علماء الفضاء بيقولو ان فيه صخره عملاقه بحجم 3 ملاعب كوره ( يعني أد مساحة قطر ) هتصطدم بكوكب الأرض يوم الأربع .......... ممممممممممم الحمد لله الصخره دي مش هتقع على مصر , أصلا لو فكرت تقع عندنا مش هتلاقي حته فاضيه تقع فيها !!.

Mohamed Hussein 18 فبراير
 مجرد نظره بتكفي . عضو في خلية مدينة نصر الإرهابيه , واقف ورا القضبان في المحاكمه , رافع المصحف بإيد و صورة أسامه بن لادن بالإيد التانيه , مجرد نظره بسيطه على صاحبنا ده , على ملامح وشه , نظرات عنيه , الغباوه اللي بتنتطق بيها كل ذره في جسمه هتعرف الجيش والشرطه بيحاربو مين ؟ اشباح يا مولانا اشباح , مخلوقات فضائيه جايز , مصاصي دماء احتمال . . في أفلام الرعب الأمريكي , بتبدأ الحكايه إن تسّرب اشعاعي حصل في منجم ما , والناس اللي كانت شغاله في المنجم دي ماتت , وبعد كام سنه صحيت تاني واتحولو لمصاصي دماء , بيتحركو ببطء , فاقدي العقل تماما , العاطفه والإحساس والإدراك مش موجودين , النوع ده في علم النفس بيسموه idiot , طب عمرك شوفت فيلم أمريكي قرر فيه الأبطال انهم يتصالحو مع المخلوقات ال idiot دول , طب كنت بتشوف سعاده في عيون الأبطال وهما بيخلصو البشريه من شر الناس دي ؟! . من 50 سنه تقريبا حصل تسرب للنفط في بلاد الخليج , وقبلها بشويه بدأ كيان دموي من فصيلة الذئاب وجوده في الشرق الأوسط ( كيانين في نفس الوقت ) , ومن يوميها والأشكال ال idiot دي بتترمي علينا من كل حته , اشكال مننا بس ماتت تقريبا وصحيت تاني أو ماتت وبدل ما بتتحاسب بتحاسبنا احنا , يا ريت كان فيه حل تاني ينفع , مكرهٌ أخاك لا بطل !!.

Mohamed Hussein 18 فبراير
 من قواعد الصيدله الأربعون ................ هام جدا للصيادله حديثي التخرج والمبتسرين !! . 1- لو دخل عليك مريض وسألك على دوا معين وبعد ما جبتهوله سألك على كام بديل له وطلب رأيك ( مين فيهم الأفضل ؟ ) , على طول تقول له على الدوا اللي طلبه في الأول , اللي هو في إيدك , دي الإجابه اللي هو عايز يسمعها , وحوار الشركات والصناعه المحليه والمستورد وصراع الأديان والحضارات ده مش هيفرق معاه , فبلاش توجع دماغك !!. . 2- لما تكون صيدليتك فيها نواقص كتير والإضاءه ضعيفه واللوحه الخارجيه محروقه ومفيش عامل يرتب الدنيا ويمسحها فده معناه إن مبيعاتك هتنخفض جدا بس مش هتوصل للصفر أبدا , ماهو ربك بيرزق الدوده في بطن الحجر !!. . 3- الشاب الحليوه اللي بيجيلك الساعه 12 بالليل وانت بتقفل الصيدليه عشان يسألك على علاج فعال لحب الشباب ده جاي يتسلى , على طريقة ( كنت معدّيه قلت أخد الجمعيه ) , إوعى توجع دماغك معاه , قول له مش عندي , ماهو حب الشباب مظهرشي في وشه فجأه كده أول امبارح بالليل !! . 4- في كل المهن على اختلاف مشاربها بتلاقي تقدير معين لصاحب المهنه , وغالبا تقدير مادي , بيسموه أتعاب أو فيزيته أو أجره أو حتى عرق فلان , يعني لو واحد دخل للطبيب يسأله ادهن كريم ايه على التسلخات دي بيدفع فيزيته , لو واحد راح لمحامي وقال له أطلق مراتي ازاي وانا كاتب لها نُص البيت باسمها بيدفع أتعاب , لو واحد دخل للحلاق قال له هي السوالف دي أد بعض ولا لأ بيدفع اجرته , إلا مهنتنا احنا , هيدخل يسألك عن الدوا الفلاني وتأثيره على الحمل وعلى شرب الكحوليات وتفاعله مع الأدويه التانيه واثره على مسار التحول الديموقراطي والجرعه المطلوبه كام ويحصل ايه لو اتأخرت في الجرعه 7 دقايق ؟ طب لو 8 ونص ؟ وفي الأخر مش هيشتري الدوا ومش هيقولك شكرا , استحمل بقى ومتقرفناش . . اوعى تنسى انك بتشتغل في مهنه ساميه , وساميه دي كانت بنت ناس بس الظروف هي اللي دفعتها للإنحراف بالشكل ده !!.

Mohamed Hussein 18 فبراير
يعني ايه كلمة ( ألم ) ؟ . مش مهم تشوف منظر حد مقتول عشان تتوجع أوي , مش مهم تقرا خبر عن قتل أو حرق أو حتى دبح و تفجير عشان تتألم , ممكن الخبر يوجعك اكتر من غير قتل ولا دبح ولا حرق ولا تفجير , زي الخبر ده : بعثة الأمم المتحده تعثر على طفل سوري اسمه مروان عمره 4 سنوات وفي يده ( كيس بلاستيك ) , الطفل مروان ابو 4 سنين كان ماشي في الصحرا اللي مالهاش أخر بين سوريا والأردن بيحاول يدوّر على ملاذ أمن بعد ما تاه من ابوه وامه اللي هربو من جحيم سوريا , مفيش وجع اكتر من كده , أطفالنا في سوريا ( اللي عمرهم 4 سنين ) بدل ما يبقو بيلعبو في الملاهي بقو تايهين في الصحرا ( أقرب للموت من الحياه ) , يا ترى كنت هتموت بإيه يا مروان ؟ تعبان أو عقرب ؟ ولّا العطش لوحده كفايه ؟ ولا حيوان مفترس ؟! ............ ..................... تسلم يا جيش بلادي !!.

Mohamed Hussein 18 فبراير
 مش معايا الكارنيه . حقيقه للأسف , أكتر ناس شوهت ثورة يناير و شهداء يناير هما ثوار يناير نفسهم , فكرة احتكار العمل الثوري و كأن مفيش 15 مليون ثارو و نزلو الشوارع , حكايه إنك تتكلم عن الحب ولا عن ماتش كوره تلاقيه يقولك الثوره اتسرقت , تاكل يا مولانا سمك ولا لحمه يقولك حق الشهدا ضاع , الحنفيه عندي في البيت بتنقط مايه يقولك ماهو بسبب اللي سرقو الثوره , مممممممممم و زي ما كانت تكرار كلمة الشريعه على لسان الإخوان والإرهابيين ( الشريعه الشريعه الشريعه ) هي السبب الرئيسي لكفر ألاف البشر بدين الله وإلحادهم في السنتين تلاته اللي فاتو بقى تكرار كلمة ثورة يناير وشهداء يناير ( الثوره الثوره الثوره ) هي سبب رئيسي لكفر ملايين بيها , الرحمه حلوه يابشر .......... . إمضاء : واحد من ثوار يناير مالحقشي يطلع الكارنيه بتاع الثوار !! .

Mohamed Hussein 19 فبراير
 ما لهم وما عليهم . ربنا يرحم الشباب التلاته اللي ماتو من البرد فوق جبل سانت كاترين , ويارب يلاقو محمد رمضان ويكون عايش , ممكن أعمل مناحه زي باقية الناس واقول ليه وازاي وفين الدوله ؟ و يسقط يسقط حكم العسكر , بس افتكرت في لحظه كده مقوله لماري انطوانيت اللي قالولها الناس مش لاقيه تاكل عيش فقالت لهم مفيش مشكله ياكلو جاتوه . . 1- الشباب طلع جبل سانت كاترين في رحله سياحيه استكشافيه جايز , و ده حقهم طبعا , طب خدو احتياطاتهم قبل ما يطلعو ؟ طلعو في مجموعات وكان معاهم حد بيعرف دهاليز الجبل ؟ خدو معاهم وسائل اتصال عارفين انها شغاله فوق الجبل ؟ معاهم مسعف أو حد يقدر يلحقهم لو حصل اغماء ؟ عندهم خطه لأي ظرف طارئ وعارفين المساعده هتيجي ازاي ؟ عارفين درجة الحراره فوق الجبل كام وارتفاعه اد ايه ؟! ....الإجابه طبعا لأ , إحنا للأسف بناخد الدنيا بالصدر , وعايزين نعمل زي ما الأجانب بيعملو , بس الأجنبي قبل ما يطلع في رحله زي دي بيكون عارف اجابة الأسئله اللي فاتت . . 2- طب الجيش مابعتشي طياره لهم ليه عشان تنقذهم ؟ , الجيش بيقول ظروف الجو مش سامحه بالطيران في المكان ده , لأ لأ , هو الجيش مش عايز يبعت طياره أصلا , ده لو كان كلب السيسي تايه كانو بعتو طياره له , ممممممممممم الكلام ده بيعجبك صح ؟ بس رأيي إن الجيش هيكون حريص أوي على إنقاذ الشباب اللي تاه , ومعندناش هناك اكتر من الطيارات والطيارين , يا أخي لو مش من باب تحمل المسئوليه هيبقى من باب البطوله , تخيل كده طياره طلعت ورجعت بالشباب الأربعه , ... و دُقي يا مزيكا , دي فيها مليون صوت زياده للسيسي الحركه دي . . 3- وعشان ماحطش ابو قرش على ابو قرشين عايز اقول لحضرتك , في نفس المكان ده تقريبا ممكن تخرج كتيبه لمحاربة الإرهاب , والكتيبه دي تتوه في الصحرا وبرضه مش هتلاقي غالبا طياره تعرف توصل لهم , بسبب الجو أو بسبب إن وسائل الإتصال مش مهيئه لكده , وياما الصحرا في سينا بلعت عساكر واختفو , تخيل انت بقى شوية عساكر بينفذو تعليمات بمواجهة الإرهاب وبقو فص ملح وداب ؟. . 4- الخلاصه لو عايز تفهم اني بدافع عن دوله فاشله فانت حر , لكن رأيي إن مصر قدامها مش أقل من 20 سنه عشان نوصل للمستوى ده , ناس تايهه فوق جبل أو في صحرا يقوم واحد منهم متصل بالدفاع المدني تقوم جاياله طياره هليكوبتر بعد 7 دقايق ومعاها الأطباء والمسعفين ( زي ما بنشوف في الأفلام الأمريكاني ) , وكمان قدامنا مش اقل من 20 سنه عشان احنا كبشر وشعب نعرف المفروض نعمل ايه قبل مانطلع في رحله بالخطوره دي .

Mohamed Hussein 19 فبراير
 خطتي لما انزل مصر . أول حاجه هاخد مراتي و اتأجر عربيه يكون فيها نظام gps و اطلع رحلة سفاري في الصحرا نصطاد أسود , أنا عارف اننا دوله فاشله و بيروقراطيه والإسعاف على بال ما بيجي بياخد كذا ساعه ما بالك في طيارة انقاذ , بس هطلع , وانا مش بعرف في ال gps , ومش عارف فيه شبكة محمول في الصحرا ولا لأ ؟ , يارب مانسى أخد الموبايل , أووه نسيت الشاحن والموبايل هيطفي , مش بعرف أغير عجلة العربيه لو نامت مني في الصحرا , أنا أصلي مش معايا ستبن , ونسيت أجيب الكوريك لو العربيه غرست , ومش عارف ساعتها هطلعها ازاي ؟ عمري ما مشيت وسط الجبال ولا بفهم في الإتجاهات والطرق الجبليه بس هطلع ولا يهمني . . لو توهت و مجاتليش فرقه انقاذ بعد 7 دقايق اعرفو اننا في دوله فاشله بنت كلب , الله ؟ مانا عارف من الأول إننا في دوله فاشله و محتاجين سنين عشان نصلح الفشل ده بس انا طالع , بالك انت لو قامت عاصفه رمليه ممممممم والله مانا عارف هعمل ايه ؟ هي درجة الحراره هتبقى كام في الصحرا بالليل , يوووووووووه نسيت اسأل على دي كمان , مراتي نسيت تجيب الساندوتشات والمايه أومال هناكل ونشرب منين بس ؟ والله مانا متراجع انا طالع اهو , لو موتنا بقى او مرجعناش اعرفو اننا في دوله فاشله بنت كلب , يسقط يسقط حكم العسكر , يسقط السيسي العميل , ولو رجعت هدي صوتي للبرادعي !! . ........... طب ايه علاقة السيسي والبرادعي بالموضوع ؟ والله مانا عارف بس ممكن تسأل أصحابي !!. .......................... .......................... مشكلة الغلابه اللي بيموتو في مصر من النوم في البرد ومن المرض والجوع كل يوم هي مشكله واحده بس , أولا هما مش في رحلة سفاري دول نايمين في الشارع وبيدورو عالأكل في صفايح الزباله , ولما بيموتو بيندفنو جنب صفيحة الزباله بس مشكلتهم الأكبر على الإطلاق مش في في الدوله اللي مش عارفه توفر لهم لقمة عيش ونومه أدميه , لأ , مشكلتهم ان معندهمشي حساب عالفيس بوك و مش معروفين , و زي ماعاشو زي القطط من سكات هيموتو زي القطط من سكات !!.

Mohamed Hussein 19 فبراير
علم الهَرْيولوجي . الحدث : مجموعه من الشباب طلعو رحلة سفاري في جبل سانت كاترين , 4 منهم تاهو في عاصفه ومعرفوش يرجعو , وعلى بال ماراحت لهم قوات انقاذ كانو ماتو ( ربنا يرحمهم ويرحم محمد رمضان ) . التفسير المطلوب : إحنا في دوله فاشيه قمعيه لا تهتم إلا بالأجنبي , مع إن كلمة فاشيه وقمعيه مالهاش اي معنى هنا والصح نقول في دوله فاشله . . الغرض 1 : لصق تهمة وفاة الشباب اللي سببها عاصفه وسوء أحوال جويه في الجيش ( تحديدا في السيسي ) . الغرض 2 : عدم القدره على مواجهة السيسي في انتخابات فمن باب أولى تشويه سمعته من باب ( إذا ماكانشي قادر ينقذ 4 شباب يبقى هينقذ دوله إزاي ؟ ) , يعني باختصار تسييس الحادث , بالمناسبه حضرتك كنت بتتمنى إن الناس دي تموت من أول ما عرفت الخبر , موتهم هيخدم فكرتك اكتر , إوعى تكدب يا بيبي !!. . الحقيقه : أنا ممكن أنتخب حمدين بس بحب المنافسه الشريفه . . البديل : تخيل إن 8 عساكر ( مصريين ) طلعو في محاربة الإرهاب يعني مش رحلة سفاري , يعني بينفذو تعليمات حضرتك مش طالعين بمزاجهم , وتاهو في الصحرا وماتو , قولي بقى حجم التعاطف عندك هيبقى أد إيه ؟ أنا أقولك , ...لو قلت لي اسم عسكري أو ظابط واحد من المئات اللي ماتو في الكام شهر اللي فاتو هقولك حقك عليا وانا غلطان . . العقل بيقول : إننا في دوله فاشله فعلا , فشلها متراكم من 30 سنه , عندنا ترسانة قوانين باليه محتاجه سنين عشان تتغير , الطياره اللي اتأخرت زيها زي الإسعاف اللي بيتأخر زي المطافي اللي بتتأخر , الحكايه يلزمها وقت طويل ونسف للكلام ده كله . . الخلاصه , لما تكون مستني حادث زي كده ,بتدوّر عليه بملقاط , ومش تتكلم عنه بنوع من الإنصاف وتبقى بتتلكك وبتصدق اي حاجه حتى إن الجيش رد وقال لهم إذن الطياره محتاج يومين عشان مفيش أجانب يبقى انت اللي بتاجر بدم الناس وأرواحهم مش أنا . . بالمناسبه يا شباب : إحنا ماعندناش خفر سواحل مؤهل بدرجه كافيه , وجايز مش فاضي أو فاشل زي غيره من أجهزة الدوله , أنا قلت لكو أهو عشان لو حد فيكو فكر يطلع رحله بحريه بياخت يبقى يتعلم العوم الأول و ياخد معاه عوّامه وفرقة إنقاذ على حسابه ...لحد بس ما ربنا يفرجها ونعمل دوله من أول وجديد . على أيد مين بقى الدوله دي ؟ على ايد اللي حضرتك هتنتخبه , وعهد الله ماهيعجبكو الرئيس اللي جاي حتى لو كان اسمه محمد بن عبد الله أو عيسى بن مريم .

Mohamed Hussein 19 فبراير
خلاص خلاص , كده مفيش حل , إحنا نقسم مصر 4 دول ( اتحاد فدرالي زي اليمن.... يارب نعجب توكل كرمان ) , دوله منهم للإخوان والدقون برئاسة مرسي و مرشده محمد بديع , ودوله للنحانيح برئاسة خالد على ومرشده محمد البرادعي , ودوله للفلول برئاسة أحمد شفيق ومرشده محمد حسني مبارك , ودوله ليا أنا لوحدي , هبقي الرئيس ورئيس مجلس الإداره والعضو المنتدب وأمين الخزنه و وزير الدفاع والماليه , وهمارس الديكتاتوريه على مواطني الدوله اللي هما انا , وهبقى فاشي وقمعي ودراكولا واشرب من دمي , وديني لاسجني لحد ما يبان لي صاحب , واكتب عن فاشيتي في الجرايد , واتظاهر ضدي ومش هعبرني في المظاهرات دي , ولو اضطريت هحكم عليا بالإعدام عشان الشعب يعيش اللي هو انا . ياريت بقى سكان ال 3 دول الشقيقه دول يسيبو دولتي في حالها , وبلاش يتدخلو في شئونها الداخليه , وإلا هضطر لسحب السفير !!

Mohamed Hussein 20 فبراير
 أرجوك حاول تتعاطف . 1- في مصر ملايين البشر مصابين بفيروس سي , بيموت منهم ألاف سنويا بعد معاناه مع تليف الكبد وبعد ما يكونو صرفو اللي وراهم واللي قدامهم من غير فايده , إصابة الملايين دول وموت الألاف ده مسئولية الدوله مسئوليه مباشره , المواطن مش مسئول عن فيروس سي اللي بيجيله من عند الحلاق أو من عيادة الأسنان , المفروض دي رقابه دوله على عملية التعقيم والنضافه , رقابه حقيقيه صارمه , مش موجوده الرقابه عشان مفيش دوله أساسا ....... ده إهمال مباشر بيؤدي لمقتل ألاف من الغلابه , أرجوك حاول تتعاطف معاهم .......... انا عارفك مش هتتعاطف عشان الإهمال ده هيتحسب مباشرة على نظام مبارك و وزارة الصحه , و مش هتعرف فيه تجيب اسم الجيش والسيسي !!. . 2- في مصر ملايين الحوادث على الطرق سنويا وألاف بيموتو بسبب إن الطرق مش ممهده ومش معده للإستخدام الأدمي , ومفيش اناره وسواقين بيمشو سكرانين وناس متهوره من غير رخصه , ممكن تتعاطف مع ألاف الضحايا دول , بس انت مش هتتعاطف , عشان برضه ده تراكم فساد نظام مبارك , والمسئوليه التانيه فيه بتقع على وزارة الداخليه ووزارة النقل , أوبااااااا يعني مش الجيش والسيسي ؟ لأ والله للأسف . . 3- عارف إنك بدأت تنفعل في اللحظه دي , وشايفني ماشي في قطيع بعد 30 يونيو زي ما قالي أحد الأصدقاء , قول بقى عبيد بياده , طلّع اللي في صدرك عشان ترتاح , بس وعزة جلال الله أنا لا يهمني السيسي ولا البيسي , كل الحكايه اني حافظك مش اكتر وبحاول أوقّفك قدام مرايا عشان تشوف نفسك بعينك , وجايز هو ده سبب انفعالك . . ربنا يرحم اللي ماتو في سانت كاترين , بس ماسورة الأحزان والعاطفه الجياشه اللي انفجرت في اليومين اللي فاتو دي بشوفها مفتعله ومبتذله ورخيصه , بالمناسبه هديك قلم صغير كده جايز تفوق , لأ قلمين صغيرين , حضرتك اتأكدت بنفسك إن 90 % من الأخبار والمعلومات اللي كنت بترددها بقالك يومين طلعت نصبايه مش اكتر ومع ذلك مش هتعتذر , وحضرتك لو بصيت على بوستاتك في اليومين دول هتكتشف اكتشاف مذهل وخطير , ارجع كده لبوستاتك وشاورلي على اسم رئيس الدوله اللي فيها الإهمال , وإسم رئيس الوزراء ( رئيس الحكومه ) , مش لاقيهم طبعا , مع إن دول اللي بيحكمو مصر , قلم صغير أخير , برضه مش هتلاقي اسم الشرطه ولا وزير الداخليه مع إن جنوب سينا فيها شرطه والشرطه دي فيها دفاع مدني وعندهم طيارات والمفروض يتحملو جزء من مسئولية الفشل . . عرفت بقى إن ماسورة العواطف دي مفتعله ؟ وإن الحكايه تسييس لحادث ومتاجره بدم الشباب عشان الإنتخابات على الأبواب , بس انت كويس متقلقش , زي الفل , رسول من رسل الديموقراطيه وسفير للنوايا الحسنه ومحدش بيفهم ولا بيحس في حقوق البشر والعداله الإنسانيه أكتر منك , بالظبط بالظبط زي الإخوانجي اللي بيقتل ويحرق وشايف نفسه أكتر واحد زاهد وعابد لله !!.

Mohamed Hussein 20 فبراير
 نظام الحكم القادم في مصر . يا ترى ناصري عسكري ( السيسي ) ولا ناصري مدني ( حمدين ) ؟ , مممممممممم لا ياعم أنا مش عايز ده ولا ده , أومال حضرتك عايز ايه ؟ عايزه ليبرالي بيور ( كُحت ) يعني زي أمريكا كده , طب ماشي دي هتعملها ازاي دي ؟ هتجيب رئيس ليبرالي منين يعني ؟ . بص يا سيدي , أنا هبدأ في حمله لتشويه حمدين والسيسي , هقول حمدين بيجيب فلوسه منين ؟ فلوسه ؟ هو حمدين عنده فلوس ؟ ياكشي ال 7 بدل والسشوار اللي حيلته بتسميها فلوس ؟ يا راجل ده عم مصطفى بتاع الجراش يقدر يشتريهم , وهقول كان فين حمدين يوم 30 يونيو من الساعه 3 للساعه 3 ونص ’ وهمسك السيسي اشكك في ثروته واقول عليه فلول واحمّله مسئولية اي حاجه بتحصل في مصر , واتهمه بالفاشيه والديكتاتوريه من قبل ما يبقى رئيس ( يعني بطريقة المجاز المرسل باعتبار ما سيكون ) . - يا سيدي انت مقولتليش فين المرشح الليبرالي بتاعك ؟ اصبر عليا بس وسيبني أكمل كلامي , كمان هقول ان السيسي فلول وحمدين كان مؤيد للجيش في فتره كده يبقى فلول بس متنكر في صورة ثورجي , وهزرع أسافين بين أنصار حمدين والسيسي , ماهو المثل بيقولك لو عايز تدمّر أمريكا وروسيا ماتحاربهمشي هما الإتنين بدل ماتتنفخ إنما الحل إنك توقع بينهم وتخليهم يحاربو بعض ويهدو بعض . . - يابويا فين مرشحك الليبرالي الثورجي ؟ استنى بس أخلص كلامي , وهقول الثوره لازم تحكم الثوره لازم تحكم الثوره لازم تحكم , وطبعا محدش هيسألني هي مين الثوره دي واسمها ايه ؟ طب تحكم إزاي؟ محدش هيسألني والناس هتردد ورايا وخلاص , وفي النهايه بقى لما انصار حمدين وانصار السيسي يهدو بعض ويحرقو بعض نقوم احنا ملبّسين خالد على شورت وتي شيرت و نعمل له عملية احماء خفيفه وننزله الحلبه يكون حمدين والسيسي حيلهم اتهد وخالد على يفوز بقى و نفرح كلنا و أنور وجدي يتجوز ليلي مراد ويبوسها من بؤها !! . أه بس بس فهمتك انا كده , إنت تقصد إنك هتجيب شاكوش صغير وتهد بيه الجبلين دول وتفضل تهد فيهم لحد ما تبقى أكبر حته فيهم أصغر من الطوبه اللي في إيدك دي !!

Mohamed Hussein 20 فبراير
 من علامات الساعه . من علامات الساعه الكبرى طلوع الشمس من مغربها وظهور الدابه و المسيخ الدجال و يأجوج ومأجوج .... , و إن ناشط سياسي مصري بعد ما يديك درس في الأخلاق والقيم والمبادئ والثورجيه والليبراليه و يلعن أبو النظام الحاكم الحالي والسابق والتالي إنه يقول لك بقى إيه الحل أو إيه البديل ؟!!. و بعد مناقشات مستفيضه مع النشطاء السياسيين والثورجيه التنين أقدر أقول لكو مممممممممممممم لسه بدري أوي على يوم القيامه , هيه مش هنموت , إفرحو يا عيال !!.

Mohamed Hussein 20 فبراير
 كل المصريين هيدخلو الجنه . تعليقاً على بوست رائع لستنا المبدعه دائما Dahia Ferfer ... بتقول ستنا عن موضوع ( طلوع الشمس من مغربها ) كعلامه من علامات الساعه الكبرى إن الشمس أصلا مش بتتحرك ولا تتحتح من مكانها , لا بتطلع من الشرق ولا من الغرب , الأرض هي اللي بتلف حواليها . . كلام علمي مظبوط أوي , وبناء عليه يكون الحل لحكاية طلوع الشمس من مغربها دي إن الأرض تتوقف عن اللف وتعكس اتجاها تماما بدرجة 180 درجه , وطبعا أكيد الأرض لما تحب تعكس اتجاه دورانها لازم هتقف شويه تاخد نفسها وتشرب بؤ مايه وتلف نفسها كداهو عكس الإتجاه , الحكايه دي هتاخد شهور وسنين وجايز قرون زي ما بتقول ستنا . . كلام جميل , إذا كنت حضرتك لما بتكون عايز تغير اتجاه السرير بتجيب اتنين رجاله وتقعدو ساعتين , ولو حد في حضراتكو ركب عبارات نقل الركاب اللي في البحر الأحمر اللي بيسموها ( اللانش السريع ) هيكتشف حاجه خطيره , بقى اللانش فعلا بياخد المسافه في 3 ساعات وبيبقى ماشي في المايه وبوزه لقدام ولما اللانش بيوصل المينا بيقعد بقى القبطان 3 ساعات تانيين يلف أم اللانش اللي هو سايقه عشان يبقى ضهره هو اللي ناحية المينا , طبعا كل الركاب بينزلو من ضهر اللانش , اللي صمم الحكايه دي تقريبا بيعتبرنا ( بيبي ). المهم بقى إذا كان اللانش أبو ألف راكب بيلف نفسه في 3 ساعات , أومال الأرض أم 4 مليار راكب عشان تقف وتلف نفسها هتاخد وقت أد إيه ؟ الأرض بقى بقاراتها ومحيطاتها وبحارها وسلطاتها وبابا غنوجها , أكيد هتاخد سنين طويله , إلا بقى إذا كان كوكب الأرض متثبت على ( رُمّان بلي ) واحنا مش عارفين . . نهايته , خلاصة الكلام ده إن الأرض هتقف و تثبت على وضعيه معينه لحد ما تلف نفسها و ده بيعني إنها مثلا لو قررت ( بأمر الله ) الوقوف والساعه كانت في مصر 12 بالليل يعني في عز الليل يبقى هنفضل عالوضع ده شهور وسنين مفيش شمس بتظهر عندنا , تيجي واحده ست تقولي دلوأتي ( يا لهوي , أومال الغسيل هينشف إزاي ؟! ) . و جايز ربنا يكرمنا والأرض تقرر التوقف في ساعة عصاري وتبقى عصريه مفتوحه كده كلها نسمة هوا . . طب دي لوحدها تبقى أهم علامه من علامات الساعه , ماهو مجرد إننا نصحى من النوع نلاقي الشمس ماطلعتش , نستناها يوم واتنين نلاقيها مش بتيجي يبقى ( رساله يا مارد ) وكده عرفنا إن القرار صدر لكوكب الأرض بالتوقف عشان تلف عكس الإتجاه , يعني ( أزفة الأزفه ) , و بما إننا شعب مابيتبلّش في بؤه فوله , أكيد أول ما الشمس تتأخر ساعتين تلاته هتلاقي الستات بيخبطو على جيرانهم والفيس بوك قلبها هري , وكل المصريين هيعرفو إن وقت الحساب جاي قبل كل شعوب الأرض , وبالتالي هتلاقي ست أم شوشو راحت اعتذرت لكل جيرانها اللي كانت بتغتابهم , وكل واحد شاف هو ظلم مين وطلب منه العفو والسماح , أنا كمان هكتب بوست اعتذار لإخواني في الله و حبايبي و نور عيني الإخوان و الفلول و النحانيح وبتوع الكولّه !!...... وكلنا ندخل الجنه بقى , و تتحقق نبوءة البرادعي ( المصالحه يا منى ) !! .

Mohamed Hussein 20 فبراير
 تسجيل صوتي . في تسجيل صوتي للسيده الرائعه الأفضل والأرقي و الأجمل على الإطلاق في السينما المصريه ....فاتن حمامه . سألها المذيع ( صوت مجدي الجلاد تقريبا ) : إيه رأيك في عبد الفتاح السيسي ؟ قالت له كلمتين , راجل وطني و ( أونست ) ...مفيش رطرطه و لت و عجن كتير بقى ولا زعيم ولا خليفه ولا البطل المغوار . . سألها مجدي الجلاد : طب ايه رأيك في الحمله الإعلانيه الضخمه اللي معموله لتأييده من الناس ورجال الأعمال حتى قبل ما يترشح ,؟ قالت له كلمه واحده , قالتها بالإنجليزي ( إكسيجريشن , إكساجريشين , إكزيجريشن ) مممممممم ما علينا المهم يعني بتقصد ( مبالغه ) أو بالبلدي كده ( أفوره ) ومش في صالح السيسي حتى لو اتعملت بحسن نيه . . قولي بقى انك بتفهم احسن من فاتن حمامه ؟ طب تعرف تقول إكزيجيريشن دي ؟ قولها كده ؟!. . الساده النشطاء , يالله هجوم بقى على فاتن حمامه , قولو بتعبد البياده , ومش بتعرف حاجه عن الحريه والديموقراطيه والعداله ولا عمرها راحت أمريكا ومعندهاش سوشيال بوليتيكال انتيليجينس !. على فكره هي عاشت أيام مصر ما كانت جميله اوي , أيام ما كان فيه ممثله اسمها فاتن ومطربه اسمها سومه و شاعر اسمه بيرم وملحن اسمه السنباطي ومفكر اسمه العقاد واديب اسمه طه , أيام ماكانو الطليان بيشتغلو جارسونات في القاهره , أيام الليدز والبرنسيسات ومدرسين الموسيقى بتوع فرنسا , أكيد مابتفهمشي حاجه في الدنيا دي !! . الساده أنصار الإخوان , يالله هجوم على فاتن حمامه , قولو عليها الفاسقه العاهره الماجنه اللي عمر الشريف باسها وقال لها يا بطاطس ( يا بتاتس ) !!.
 

Mohamed Hussein 21 فبراير
 ألتراس خيرتاوي . في اللحظه اللي هيتوقف فيها ألتراس أهلاوي عن الحرق والتخريب بداعي وبدون داعي في اللحظه دي بس هعرف ان فلوس خيرت الشاطر خلصت , صدّق أو لا تصدق , إمنعو البنزين ( التموين ) عن شباب الألتراس المغرر بهم أو انتو أحرار بقى . . من سنتين تلاته , من أيام حكم مرسي و من قبلها وانا قلت قيادات الألتراس ( الكابّوهات ) اتباعو للإخوان , بيع وشرا بعقد رسمي تسليم عالمفتاح , كل مواقفهم من يوميها بتقول كده , إحنا اللي ذاكرتنا ضعيفه , حتى مظاهرات الإخوان بعد 30 يونيو اللي كانت بتلف شوارع القاهره كان بيقودها شباب ألتراس أهلاوي , الأعمى يقدر يشوفها , تون الهتاف , ومسكة الإيد ورفعتها , وحركة الجسم لفوق وتحت ده شغل ألتراس مش شغل بهاليل الإخوان , ...برضه صدق أو لا تصدق . . وبما إن حضرتك ( كقيادي في ألتراس خيرتاوي ) ممكن تكون عندي في الأصدقاء فانا هسيب بلدي تتحرق على إيدك , و هسيبك تخربها مداين و هبقى أقول عليك شهيد لو اتقتلت عشان انت صاحبي وحبيبي و بتعمل لي لايك أحيانا , أو البديل السهل إني هقولك : ملعون جنابك , ملعون أبو اللي جابك !!.

Mohamed Hussein 21 فبراير
مقياس السعاده . لو تخيلنا مثلا إن السعاده دي بتتقاس بالمتر , وفكّرت أنا أروح أقيس سعادتي عند واحد ترزي أمين هلاقيها 17 سم ونص , وسعادة حضرتك هتطلع 15 سم والأفندي اللي جنبك 23 سم , يعني احنا التلاته سعادتنا من النوع القصير ( الشورت ) اللي مابيسترش !!. . أما المسئول في بلدنا هتلاقي سعادته بتجرجر على الأرض ولو سألته : ليه كده سعادتك ؟ هيقولك : تديُّن يا أخي تديُّن , مش أحسن منك ياللي سعادتك شورت ؟ روح يا مواطن استر نفسك عيب كده . . وبالفعل بنطلع احنا المواطنين نجري و نستر نفسنا بشويه غم ونكد , تقريبا بنبقى خايفين من الفضيحه و بدل يعني مانروح النار . . فضيلة الشيخ الملياردير فلان الفلاني بيطلع من قصره الفخم ( الفخيم ) في التجمع الخامس ويركب سيارته الفارهه و يلبس ساعته اللي بكذا ألف دولار و يروح يخطب الجمعه , يطلع عالمنبر ويبقى قدامه شوية صنايعيه و أرزقيه و ناس بتشتغل باليوميه ( الأغنيا بيبقو لسه نايمين ) , ويمسك مولانا الشيخ الملياردير الميكروفون ( الحديده يعني ) ويقول للناس قدامه : أيها الناس , أوعو تكونو مش بتطلعو زكاة المال ؟ وإلا هتدخلو النار يا كفره , ساعتها جموع المصلين بيتأثرو أوي و يعيطو و يتشحتفو . ............... مممممممممممم , ربنا ياخدنا إحنا يا شيخ !!.

Mohamed Hussein 21 فبراير
 حوار الطرشان . عسكري الأمن المركزي ( الغلبان ) اللي ألتراس أهلاوي سحلوه امبارح مات يا بشر , ما رأي الساده الأفاضل النحانيح والحقوقيين والنشطاء ؟ لا مش تردو , سيبو الطلعه دي عليا انا , انا هرد بدالكو : . نحنوح و ناشط سياسي وحقوقي رقم 1 : و لما الشرطه مش عارفه تحمي عساكرها في ماتش كوره أومال هتحمي البلد إزاي ؟ . . نحنوح و ناشط سياسي وحقوقي رقم 2 : بلطجة الشرطه بتخرّج اي حد عن شعوره , إنت نسيت هي عملت ايه في 2011 و في 1978 و 1915 و 1731 ؟ نسيت ؟ هه ؟ نسيت صح ؟! . نحنوح و ناشط سياسي وحقوقي رقم 3 : شباب الألتراس دول أشرف ما فيكي يا مصر , والعسكري أكيد رش عليهم مايه أو رمى عليهم قنابل غاز ويستاهل . . نحنوح وناشط سياسي وحقوقي رقم 4 : البرادعي قالها كلمه حكمه ( العنف لا يولّد إلا العنف ) إشربو بقى . . نحنوح وناشط سياسي وحقوقي رقم 5 : مش مصر دي هي نور عنين السيسي ؟ , ابقى خلّي السيسي ينفعكو يا عبيد البياده . . نحنوح وناشط سياسي وحقوقي رقم 6 ( بيوجه كلامه ليا ) : ماتبطل بقى اسفاف وابتذال واتكلم عن اي حاجه مفيده , إيه يعني عسكري اتقتل ماهو بياخد بدل مخاطر وزاد 30 % , يا أخي مشوفتكشي كتبت كلمه عن أم حريه اللي كانت متكلبشه في السرير ؟ واحده والده قيصري ورابطينها بالكلابش ولّا عسكري مات ودمه ساح ؟! . نحنوح وناشط سياسي وحقوقي رقم 7 ( بيوجه كلامه ليا ) : انت من يوم 30 يونيو وبقيت ماشي في القطيع بتاع عبيد البياده , انا ندمان اني كنت بحترمك في يوم من الأيام . . نحنوح وناشط سياسي وحقوقي رقم 8 ( بيوجه كلامه ليا ) : يلعن م*** أهلك , يا *** يابن ال *** , ماهي اشكالكو الو*** دي هي اللي خربت البلد , يا شعب عبيد .

Mohamed Hussein 22 فبراير
 مبدأ التعالي . - هي ايه حكايتك يا برادعي مع الكلمات دي ( الظلم , الجهل , الإستبداد , الفاشيه ) ؟ , لو كتبت تويته من كلمتين لازم تحط فيهم ال 4 كلمات دول , هو أنا كده اللي أوفر لما اشوف إنك بتكرر نفسك بصوره ممله و سخيفه وكأنك إمّا فقدت الحٌجّه أو فقدت التركيز يعني مش معانا في الليله ؟!. . - هو انا اللي اوفر لما أنتقد البهوات اللي طلعو ( بمنتهى التعالي ) بعد استفتاء الدستور وقالو عن جيل أباءنا وأجدادنا اللي نزل وشارك إنه جيل عرّه , يعني العن أجيال بالكامل عشان ابقى واد ثورجي وجامد تنين ؟ . - هو أنا اللي أوفر لما أحتقر واحد بيسب ويلعن في الفلاحين وبرضه يقول إنهم سبب وكستنا ؟ . - هو أنا اللي أوفر لما ألاقي بهوات نشطاء سياسيين يستبقو الأحداث ويقولو السيسي لو اترشح مش هنعترف بنتيجة الإنتخابات ؟ ديموقراطيه ايه دي ؟ بتاعة مين يعني ؟ مكتوبه في أنهي كتاب ؟ حكاية إن الديموقراطيه هي اختيار الشعب من بين مرشحين انا اللي اخترهم للشعب ده !! , يعني بص يا شعب يا غبي يا عره انت , إحنا هنعمل ديموقراطيه ونقولك الأسماء اللي تنفع حسب رؤيتنا وانت تختار منها يا حيوان , ولو اختيارك ماجاش على هوانا مش هنعترف بيه يا بهيم !!. . هو انا اللي أوفر لما أقرى خبر عن مفاوضات للتحالف بين الدستور ومصر القويه , واشوف انها مصيبه سوده و خيبه بالويبه ؟ المفروض أسأف يعني وازغرط و اهنّي وابارك ؟ حاضر . . هو مين الثوره اللي بيقصدها البرادعي في تويتته ؟ يعني ياريت يقول لنا أسماء الثوار في مصر عشان نبقى عارفينهم وانا بقى أبقى أدور على إسمي في الكشوفات . - هو انا اللي أوفر لما أشوف إن حزب الدستور ( بتاعي ) مالوش وجود يٌذكر في الشارع لحد النهارده ( حزب اللواءات ) على عكس التيار الشعبي مثلا , وإن الإنتخابات على الأبواب و هنسف تراب , ساعتها بس هنعرف إن الراجل أوّل ما بيبوس مراته بوسه طويله مش بتبقى حامل ولا حاجه !!. . هو انا اللي أوفر لما اشوف ان اللي فوق ده مجرد شويه كلام وعلامات استفهام و تعجّب ممكن الرد عليهم بأسلوب محترم ومؤدب بعيد عن الإبتذال ؟ ولا لازم أقول ألفاظ وسخه عشان ابقى من شباب الثوره ؟!.

Mohamed Hussein 22 فبراير
الموت الإكلينيكي . 1- سليم العوا دخل على مرسي في الحبس بتاعه , و قال له بص يا هندزه أنا هسألك السؤال ده وانت هتجاوب الإجابه دي وهسجل الكلام ده بقى , أهو أي حاجه نشغل بيها الدنيا ونأجل المحاكمه شويه , بس وحياة أبوك عايزك ترجع لأيام ما كنت رئيس وقبل كده , يعني مبدأ السمع والطاعه , ممنوع الخروج عن النص , انت شوفت لما خرجت عن النص كنت بتقول ايه و يحصل فينا ايه ؟ مفهوم كلامي ؟ , بص انت هتدخل وتقول الجمله دي بس , لقد وقعنا في الفخ , قصدي هتسألني ( هو السيسي عايز يبقى رئيس ؟) , أقوم أنا أرد عليك بإجابه دبلوماسيه ونسرب الكلمتين دول وفي المحاكمه نطالب بالتحقيق في تسريب الكلمتين , فهمت يا مولانا ؟ . اللي بيعمله سليم العوا في الدفاع عن مرسي واللي بيعمله أنصار الإخوان في الشارع اسمه حالة إفلاس و مماطله لحد ما ييجي المدد من أي داهيه , يعني حالة موت إكلينيكي و زقّ للأيام جايز يحصل جديد . . 2- وانا في الثانويه العامه كان عندنا مدرس رياضيات عبقري , عبقري فعلا و دمه زي العسل بس كان بيشرب حشيش , ولما كان بيفيض بيه من إن الناس مش فاهمه بعد ما شرح وقال وعاد كان بيقول لنا ( يا ابني افهم , إنت هتبقى قاعد في لجنة الإمتحان مزنوق وبتحرك وبتفرك وتطقطق في صوابعك وانا قاعد عالقهوه بشرب حشيش يعني مش هدخل معاك الإمتحان ) . في كتير من الأحيان بصرخ هنا عالصفحه , لشباب حزب الدستور وشباب الثوره و بيبقى غرضي والله انهم يفهمو أو يفوقو عالأقل , ترديدهم للشعارات و تكرارها بصوره ممله بقت تخليني أشوفهم ميتين أكلينيكيا فعلا , يابني انا مش خايف منكو لا على نفسي ولا عالبلد , ولو بحسبة منافسه وكده كنت بطلّت ضرب فيكو لأن الضرب في الميت حرام , حاسس إني بلعب دور مدرس الرياضيات ( بس مش بشرب حشيش ) , ودمي تقيل طبعا , و أصغر من أغلبكو سنا ومقاما , انما انتو فعلا هتبقو في لجنة الإمتحان ( الإنتخابات ) وانا قاعد بهري عالفيس بوك في الأطباق الطائره و ظاهرة تعامد أشعة الشمس على مناخير الملك معرفشي مين 3 مرات في اليوم بعد الأكل . . شباب الإخوان حطيت عليهم إكس من بدري , بس انتو لسه ليكو شويه محبه كده رغم اني مش معاكو , ولا أومن بالشخص الإله الملهم اللي سابقنا بكذا ألف فدان , لا البرادعي ولا السيسي ولا جورج واشنطون .

Mohamed Hussein 22 فبراير
 حوار تخيلي بعد 20 سنه . هو ( شاب في أوائل التلاتينات ) : أنا يا أونكل يشرفني أطلب من حضرتك إيد الأنسه لوجي . أنا : أهلا وسهلا يابني بيك , الشرف لينا احنا , بس مقولتليش انت بتشتغل ايه ؟ . هو : حضرتك ماتعرفنيش يا أونكل ؟ أنا واخد جايزة نوبل للسلام السنه اللي فاتت , واللي سلّمتهالي المناضله العظيمه توكل كرمان وبشتغل في المركز الأمريكي لحقوق الإنسان , هو حضرتك مش بتتفرج على برامج توك شو ؟! . أنا : مممممممممم روح يابني ربنا يسهلك , إحنا معندناش بنات للجواز , ربنا يستر على ولايانا . . لوجي ( بصوت عالي ) : بابا ؟ الله بقى , أنا بحبه وحضرتك قولت لي أنا اللي هختار عريسي . أنا : إمشي يا بت من قدامي يلعن سلسفيل أبوكي بدل ماغزّك بالعكاز ده في مناخيرك , يا خسارة تعليمي وربايتي .

Mohamed Hussein 22 فبراير
عن الفراق . لسّه حبيبي ف سَفْره و تانيه يرجع طير ما بيرجع طيرك و لّا عشان بنحبه يا دنيا كتّر خير الدنيا و خيرك . أيام و بعاتب لياليها إيه ذنب الليله بتتعاتب ؟ بهاودها واصاحب خطاويها مطرح ما تودِّي بنتصاحب . و ساعات بفتكرك جاي واقوم أضحك على روحي واقولّي يا ريت و ساعات يا عيوني ما تعرف نوم بتخيّل صوت بيقولّي أنا جيت يا حبيبتي كفايه دموع أنا جيت . . محمد حسين

Mohamed Hussein 23 فبراير
 أحبيبتي يا مصر . - نزلت مصر 7 أجازات متتاليه , كلهم بالعربيه , سايق طريق طويل , من شقتي هنا لبيتنا في المنصوره حوالي 2700 كيلو , مافهمشي نوم تقريبا , يومين ونص بالظبط واحتمال تلاته , أعرف عدد المطبات اللي في الطريق ده و لو لوحه واقعه من أول مره بروح كل مره ألاقيها واقعه برضه , السعوديه مفهاش مطبات إلا في أخر 200 كيلو في الطريق , لما بتكون قربت من حدود البحر الأحمر , تقريبا بيمهّدو لنا المسائل عشان ناخد لياقة المطبات لما نوصل مصر . . - في المينا في السعوديه اجراءات تخليص العربيه كلها بالكمبيوتر , بتاخد 7 دقايق بالكتير , وفي المينا في مصر بقى ممممممممممم تحس إنك رجعت لعصر الديناصورات وطائر الرخ , فرخ الكربون والختم اللي في الدرج , و وصل تروح تدفع بيه في الخزنه , معلومات الموظفين في المينا عن الكمبيوتر زي معلومات احمد موسى عن الرجوله ومعلومات توفيق عكاشه عن دورة كريبس , حاجه كده بتاخد لها 4 ساعات , وطوابير و انت بتبقى جاي سايق الفين كيلو يعني خلصان , طبعا في المينا لازم تفتح جيبك وتخلي معاك بتاع 500 جنيه عشرات وعشرينات عشان أمين الشرطه اللي هيشوفلك بصمة العربيه , وامين الشرطه اللي بيعمل كشف المفرقعات وهكذا ( حمد الله عالسلامه يا باشا ) , ساعتها بس بتعرف انك دخلت الحدود المصريه , أيها الساده نرجو ربط الأحزمه , دخلنا الأن في الأجواء المصريه , و يقوم الأستاذ نبيل الحلفاوي يحضن عزت العلايلي في مشهد مؤثر .............. أحبيبتي يا مصر . . - تمشي بقى في الطريق في مصر من سفاجا للغردقه للعين السخنه للقاهره للمنصوره , تلاقي دنيا غير الدنيا و أكتر حاجه بتلفت انتباهي هي إن العربيات النقل مكتوب لها لوحه كل مترين ( النقل التقيل يلزم اليمين ) , ومع ذلك كلهم بلا استثناء ماشيين شمال ( ولا مؤاخذه ) , الموضوع ده بشوفه من 10 سنين لحد النهارده , حصلت ثورتين وحبسنا جوز رويسا ومفيش فايده , فكرت في حل لموضوع سواقين النقل , فكرت كتير ولقيت الحل , الناس دي بتعمل كده من باب التمرد ( غتاته يعني ) والحل ببساطه إننا نغيّر اللوح اللي عالطريق ونحط لوح تانيه ( النقل التقيل يلزم الشمال ) , ساعتها هيتمردو على اللوحه والقوانين وتلاقيهم كلهم ماشيين يمين . . حجم الفساد والبيروقراطيه في البلد مش بيخلي الواحد يكره بلده , لكن ممكن يكره الناس ويتضايق منهم , يا ببلاوي في يومين اتنين تقدر تحل مشكله البيروقراطيه وفرخ الكربون في المواني المصريه , لو مش عارف الحل اسألني , أخوك موجود و سدّاد , لا أخوك إيه ؟ قصدي حفيدك موجود !!.

Mohamed Hussein 23 فبراير
 الربيع الأوروبي . أمريكا و روسيا بيلعبو بدول الشرق الأوسط والدول الأوروبيه الصغيره كأننا كوره شراب , وعلى طريقة بلاها ناديه خد سوسو , طب هات سيف وكمان سيف , إنزلّي بأوكرانيا . أيوه بقى كده , مظاهرات حاشده في أوكرانيا , وبدأ الربيع الأوروبي , بكره الإرهابيين هيدوّرو على أكل عيشهم في العواصم الأوروبيه ( هيلاقو هناك لقمه حلوه أوي ) , بدأت الحكايه في كييف والدور هييجي على أثينا , خلينا احنا بقى نتفرج شويه و ناخد نفسنا داحنا ( أثينا ) أوي في السنتين اللي فاتو . . يارب يكون الشيطان شبع من شرب دم العرب وقرر الرجوع لأوروبا ( هذه بضاعتكم رُدت إليكم ) .

Mohamed Hussein 23 فبراير
 باسم يوسف والواد الكوري الأردني اللي مولود في السعوديه وعايش في دبي !!. . - ماكنتش لسه شوفت حلقة باسم يوسف و دخلت عالفيس بعد الحلقه لقيت الدنيا طبعا مقلوبه كالعاده على الإيفيهات والألشات بتاعة باسم وعلى الواد الكوري , بس امبارح شوفتها في الإعاده : . - الواد الكوري دمه خفيف فعلا لكنه مش موهوب , مش فنان يعني , كل الحكايه كانت في عنصر المفاجأه , شاب كوري ( كُحت ) بيتكلم عربي لبلب وبيغني لأم كلثوم واحنا شعب عاطفي وبنحب أي حد غريب يتكلم لغتنا ويحب رموزنا , زي أول مره شوفت فيها مراسل مجلة ديرشبيجل الألمانيه , انبهرت جدا بإنه بيتكلم عربي بلغة الشارع والحواري كمان , وانبهرت اكتر لما قال انه عايش في مصر من تلاتين اربعين سنه وبيحبها وعمره ما سابها ولا بيفكر يرجع بلده , بعد شويه عنصر المفاجأه بينتفى ويبقى الشاب الكوري ده كارت محروق . . - باسم يوسف بقى هو المبدع المتألق دائما , بيعرف يطلع الضحكه من صدور الناس , إحنا محتاجين نضحك حتى لو كان المحتوى مش أد كده , لاحظت إن مستوى الحلقه أقل شويه من الحلقات اللي فاتت , السبب ممكن أتخيله بسهوله ( مالوش علاقه بحبي وكرهي للسيسي ) , إنما له علاقه بالقماشه والماده الخام اللي شغّال عليهم باسم , البير اللي بيعبي منه ويعمل فنه الساخر , أيام مرسي كانت القماشه دي كبيره جدا والبير زايد وفايض , تصريحات بهاليل الإخوان ومواقفهم وقنواتهم كانت تعمل 50 برنامج كوميدي ساخر , تعمل مجلدت لو تحب , إنما القماشه اللي قادم باسم دلوأتي صغيره , 5 أو 6 أسماء بيأيدو السيسي ويطبّلو له بصوره فيها أفوره , مفيش برنامج هيعيش على خمسه سته . . - طبيعة البرامج الساخره والكوميديه إنها بتدوّر على الحدث الشاذ والتعليق والموقف الشاذ ( مش الطبيعي ) , وحتى اللفظ والحركه الشاذه من الشخص ( اللي هو الماده الخام ) , وطبيعي جدا ان باسم يدور على ناس زي أحمد موسى ومصطفى بكري , عشان يعرف يشتغل ( ده طبيعي جدا ومقبول ) عشان كده عمره ما هيجيب رأي ناس زي فاتن حمامه وهيكل وابراهيم عيسي في السيسي , إنما اللي مش طبيعي وبحسه نوع من الهطل هو إن أصحابي النحانيح يختصرو ويختزلو أنصار السيسي في أحمد موسى ومرتضى منصور ....... إنت عبيط ياض ؟! . - و عشان أنا بحب باسم ( أه والله ) عايز أوجه له رساله : حاول تفكّر خارج الصندوق , انزل للشوارع والحواري وشوف تصرفات الناس هتلاقي ماده خام رائعه للسخريه , خايف عليك تتحول لكارت محروق , تبقى موضه وبطلت , زي الطربوش أبو زر والبنطلون الشارلستون والسوالف الطويله , خايف ييجي عليك يوم وألاقي ( جماهير ) بتودّعك وتقول لك ( تشرفنا يا باسم أفندي ) , وانت ترد عليها وتقول لها ( ممنون يا هانم ) !!.

Mohamed Hussein 23 فبراير
· تم التعديل درس صغنن . لما تلاقي الحزب بتاعك بيتحرك بشكل مريب قبل الإنتخابات ( بقول مثلا مثلا ) , و بيتحالف مع الشيطان ذات نفسه , و متلاقيش من قيادات الحزب تفسير مقنع بالنسبالك عن أهمية وجدوى و منطقية التحالف مع الشيطان يبقى حضرتك تعمل ايه ؟ سهله الحكايه خالص والله , تسيب الحزب , شوفت سهله ازاي ؟ أصلك مش واخد بالك النشاط الحزبي الحقيقي بيبان في الأوقات اللي زي دي مش في أوقات الإجتماعات والعزومات والأوبن بوفيه لما تبقى الدنيا بيس و مفيش انتخابات , وصاحبك الحقيقي بتعرفه في الغربه أو في الجيش ( يعني في وقت الشده ) مش في العزايم و سيلينترو !!. . فينا ناس ممكن تغيّر مذهبها الديني من سني لشيعي أو من أرثوذوكسي لكاثوليكي أو حتى من سني لكاثوليكي , وممكن تغير جنسها من راجل لعلاء صادق أو العكس ( لا العكس صعب أوي ) , إنما ماتقدرش تغير حزبها السياسي , وتقولي ديموقراطيه وعايزين ديموقراطيه ؟ جاتها نيله اللي عايزه ديموقراطيه . . - يا محترم أصلك مش فاهم , إنت كده بإسمك وشخصك تبقى الضمانه الوحيده للحزب بتاعك عشان يمشي عالعجين مايلخبطوش , إنت اللي بتعاقب حزبك مش العكس , ماتقلّش حاجه عن المواطن الأمريكي والبرازيلي والياباني , لا في إيدك عصاية موسى ولا عصاية فرعون إنما بتمتلك كيانك الشخصي و صوتك الإنتحابي وتقدر تعاقب بيه حزبك بإنك تمنحه أو تمنعه !!. .......... و إلا تبقى فاهم السياسه على إنها سياسة القطيع زي أنصار الإخوان .

Mohamed Hussein 23 فبراير
· المجتمع ولا مؤاخذه المدني !! . موضه جديده في التفنيد و التفكير و التبرير بقيت شايفها عالفيس بوك , ماسورة مجاري وطفحت علينا , وقالك يا سيدي : ( المفروض الجيش يرجع يحمي حدودنا ويسيب المشاريع والمناصب للمدنيين والمجتمع المدني , هو بيعمل ايه جوه البلد ؟ , ايه اللي فهمه في عمل الطرق والكباري ؟ ) . . مممممممممم , لا الجيش مابيفهمش في عمل الطرق والكباري , أمك هي اللي بتفهم , والجيش بيعمل ايه جوه البلد ؟ بيعمل محشي.... أغرف لك ؟ ده على أساس إن اللي حمى مصر من الخراب السنتين تلاته اللي فاتو هو وزارة الري صح ؟! يابني ما تجيب من الأخر وتقول السيسي يسيب مصر ويهاجر ؟ ساعتها انت نفسك هتقابل أصغر عسكري جيش في الشارع وتاخده بالحضن وتعزمه عالغدا ومش هتقول الجيش بيعمل ايه هنا ؟! . . والجيش ده بقى شغلته ايه ؟ أنا أقولك شغلته ايه ؟ بص يا مولانا , إحنا ننزل يوم 25 يناير وبعد يومين تلاته نصرخ ونقول الحقنا يا جيش وييجي الجيش ( جوه البلد ) ويلحقنا وبعدها نلعن جدود أبوه ونقول له ارجع سكناتك بقى عشان الإخوان بيحكمونا يا حيوان ( إنت ايه اللي جابك هنا؟ ) , يقوم يمشي الجيش , بعد شويه ( في 30 يونيو ) الحقنا يا جيش دول الإخوان طلعو ولاد تيت , يقوم ييجي الجيش ويلحقنا , بعد شويه نقول له امشي بقى يا حيوان وارجع لثكناتك . . إنتو عايزين جيش بسوسته , جيش بزمبلك , جيش بيلعب دور عثمان في الوسيه بتاعة الباشا , و هتشتغل كلّاف و هنضربك بالكرباج يا عثمان . . و حقيقي والله أكتر كلمه بقيت أحسها أبيحه هي دي ( المجتمع المدني ) , إحنا هنعمل ديموقراطيه عن طريق المجتمع المدني , وبعد سنتين تلاته هتسألني : هي فين الديموقراطيه ؟ أقولك ( على طريقة عم أيوب ) : و هو فين المجتمع المدني ؟! ............ وابقى سلّم لي على مجتمعك المدني ياسماعيل بيه !!.

Mohamed Hussein 24 فبراير
 مصر راكبه قطر طنطا . شاب جميل كده وحليوه شايل صندوق خشب على كتفه , و طالع القطر , وسّع يا حاج , وسّعي يا حاجه , و معانا أمشاط و فلايات وشعارات و أحلى توكه للبنات , مين يقول هات ؟ , اشتري يا هانم , اشتري يا بيه , شعار الثوره لازم تحكم باتنين جنيه , طب تاخد لوجو للشهيد ؟ تاخد كراسة أهداف الثوره ومبادئها ؟ حد له شوق في كتاب الديموقراطيه على الطريقه الحمزاويه ؟! . . لو سمحت لو سمحت , يا كابتن يا كابتن الشاب الحليوه : أيوه راجل عامل بسيط : شكلك متعلم وابن ناس , انا هشتري منك كتاب الديموقراطيه بس ممكن تشرحهولي . الشاب الحليوه : من عنيا تؤمرني العامل البسيط : ربنا يكرمك . الشاب الحليوه : بص يا بركه الديموقراطيه هي باختصار حكم الأغلبيه العامل البسيط : يعني مثلا لو انا اترشحت رئيس للقطر ده , واغلب الركاب انتخبوني أبقى رئيس القطر ؟ . الشاب الحليوه : بالظبط الله يفتح عليك العامل البسيط : بس انا بشتغل مبيض محاره !! . الشاب الحليوه : مش مهم , طالما مهنه شريفه يبقى من حقك تبقى رئيس مصر و رئيس القطر ده . العامل البسيط : بس لو السيسي اترشح في انتخابات القطر هيكسب , أنا نفسي ممكن أنتخبه ؟ . الشاب الحليوه : هو مين اللي جاب سيرة السيسي دلوأتي ؟ وبعدين هو السيسي بيعرف يسوق القطر و لاعمره ركب قطر طنطا قبل كده ؟ العامل البسيط : لأ , و انا كمان مش بعرف اسوق القطر و دي أول مره أركبه فيها . . الشاب الحليوه :بص من الأخر عشان مش توجع قلبي , الكتاب معاك اهو اقراه براحتك , الديموقراطيه بتاعتنا بتقول إن من حقي وحقك نحكم مصر و من حق مهندس الديكور والطبيب ومقاول الأنفار يحكمو , لكن الجيش لأ الجيش لأ الجيش لأ . العامل البسيط : طب هدّي نفسك يا أستاذ بلاش تنفعل كده , وتعالى أشرحلك انا الديموقراطيه اللي فاهمها ؟ . الشاب الحليوه : انت اللي هتشرحلي يا جربوع يا حيوان يا جيل عره , إنت مش عارف أنا مين ؟ وقريت كام كتاب عن عن الديموقراطيه وحقوق الإنسان ؟ العامل البسيط : ربنا يسامحك بس يا سيدي من تواضع لله رفعه , هقولك برضه ورزقي على ربنا , ماهو انا عامل باليوميه ودايما حاطط رزقي على ربنا , أنا من بلد اسمها سمنود أكيد تكون سمعت عنها ؟ , سمنود دي كانت بتلعب كوره في دوري المظاليم , وبعدين فازت و وصلت للدوري الممتار , كويس كده ؟ طب ينفع رئيس نادي سمنود يبعت لاتحاد الكوره خطاب يقول لهم فيه أنا هشارك في الدوري بشرط إن الأهلى والزمالك ينسحبو عشان يبقى ليا فرصه في الفوز بالدوري ؟ََ!!...طب ينفع رئيس نادي سمنود يبعت لاتحاد الكوره احتجاج رسمي ضد حكم ماتشنا مع الأهلى ويتهمه بالتزوير و مجاملة الأهلى مع إننا لسه مش لعبنا والدوري ذات نفسه ما بدأش ؟!!. . الشاب الحليوه ( قام ووشه قلب ألوان ) ومشي في القطر يصرخ : جيل عرّه , شعب عبيد , جيل عره , شعب عبيد , الثوره لازم تحكم , الثوره لازم تحكم , اللي فات ظلام واللي جاي ظلمات , اللي فات ظلام واللي جاي ظلمات , هرّاس جاي , هراس جاي !!

Mohamed Hussein 24 فبراير
ذكريات بقى . - أغلب ذكريات 25 يناير ( وما بعدها ) هتبقى ذكريات جميله هنفتخر بيها , زي منظر الشباب وهو بيكنس الميدان وينضفه , وزي الهتاف وعلم مصر اللي بيرفرف , وزي فرحة الناس لحظة تنحي مبارك , وزي الشباب اللي كانو قاعدين بيغنّو في حلقه كده أغنية منير . . إنما فيه كمان ذكريات سيئه هنشيلها على ضهرنا طول العمر كأنها أتب , زي مكالمة صاحبنا ده : ألوه , أيوه يابني , بص احنا هنجيب فلان يبقى رئيس واقنعنا فلان يبقى نائب وفلان طلع معاه رقم تليفون فلان وهيكلمه عشان يبقى رئيس وزاره , والبت مروه دي لهلوبه أوي وبتفوت في الحديد هنجيبها برضه عشان تنسق الكلام ده !!. . و عهد الله يا مصطفي يا نجار انت لو بتعمل مشروع ( دكّانه ) كنت احترمته أكتر من كده , قال مصر هتتحكم بطريقة هنجيب فلان ونمسّك فلان ونوقّف فلان ونعين فلان ونتصل بفلان ونقعّد فلان !! . . الله يرحمك يا عم جلال , مصر بخير و زي الفل و مش ناقصها غير أكلة سمك ( أو مكالمه بين مصطفى النجار وابن القرضاوي ) !!.

Mohamed Hussein 24 فبراير
الوداع يا ببلاوي . أروح البيت أنام ساعه أرجع ألاقي الببلاوي استقال , خبر ب 15 علامة استفهام ؟ , في التوقيت ده يبقى مفاجأه , مفيش حدث ضخم يستدعي الإستقاله المفاجأه دي , أهي كانت حكومه ماشيه وشغاله و بتزق المركب لحد ما يبقى عندنا برلمان ويتولى هو تشكيل الحكومه الجديده . . خايف إن الخبر يتسبب في هزه جديده لمصر , وهي مش ناقصه هز وفرهده والنبي , طب ايه الأسباب بقى والملابسات ؟ محدش عارف , السر في بطن التابوت نفسه اللي اسمه الببلاوي . . ناس بتقول عشان يدّو فرصه لحكومه جديده محايده تشرف على الإنتخابات !!! مممممممم هو احنا مؤدبين أه , بس مش أوي كده يعني , وبعدين لو عايزين حكومه محايده تبقى المفروض تيجي قبل الإنتخابات باسبوعين تلاته . ناس تانيه بتقول إن استقالة الحكومه بالكامل معموله عشان التغطيه على استقالة السيسي كخطوه تمهيديه لترشّح الأخير للرئاسه !! ( أبانا الذي في المخابرات ) , ممممممممممممم أبانا ايه ومخابرات ايه ؟ هو احنا هنفجر تل أبيب ؟ طب ما كان السيسي يقدر يستقيل لوحده ايه لزمتها الإستقاله الجماعيه دي ؟ , بالمناسبه حكاية موافقه المجلس العسكري اللي جت في الدستور دي بتتكلم عن الإقاله مش الإستقاله , يعني السيسي حتى مكانشي محتاج موافقة المجلس العسكري عشان يستقيل . . ما علينا , أهو لغز منيّل بستين نيله هنحطه جنب ال ألف لغز اللي فاتو ويبقو 1001 , سمعت اسم المهندس ابراهيم محلب , بيقولو كويس وانا اسمع عنه من زمان , بتاع شغل يعني مش بروباجاندا , نصيحه لعدلي منصور والنظام الحالي , أبوس ايدك ما تسمع كلام الساده النشطاء السياسيين في اختيار رئيس الحكومه , هما هيعترضو ويشجبو ويستنكرو أي اسم هتقول عليه , ولو جمعت 5 منهم وقلت لهم طب اتفقو على اسم , كل واحد فيهم هيطرح 5 أسماء وهيصر عليهم بغباوه وهيبقى عندنا 25 رئيس حكومه في نفس الوقت !!.

Mohamed Hussein 24 فبراير
في ال 3 سنين اللي فاتو غيرنا بتاع 6 حكومات , يعني بمعدّل حكومه كل 6 شهور , وعايزين استقرار ومشاريع ؟ داحنا لو بنعمل مشروع بطارية أرانب يلزمها استقرار اكتر من كده , حكومه كل 6 شهور , يعني حكومه شتوي وحكومه صيفي زي البدله كده , دي مش تبقى اسمها ثوره , تبقى اسمها رحلة الشتاء والصيف !!. . مين فيكي يا مصر لسه مبقاش رئيس وزاره غيري أنا وخالي رمضان ؟! , ومين لسه مبقاش وزير ؟ , ماهو لما يكون فيه 6 حكومات يعني بتتكلم في 200 وزير , 200 واحد بيحملو لقب وزير سابق في أخر 3 سنين بس . . بعد كام سنه كده وانا قاعد على قهوة السعداوي في ميدان الحمليه بشرب حجرين معسل , هلاقي راجل مزوي في الركن كده أقوم انادي عالواد حوده واقول له هات لنا ( طاوله ) يا حوده , واعزم الراجل المزوي ده على شاي ونلعب دورين طاوله سوا , وأثناء مانا حابس نفس المعسل في صدري هسأله إنما متعرفناش يا معلم , ويقولي إنت متعرفنيش ولا إيه ؟ أنا فلان الفلاني وزير البيئه السابق !!.

Mohamed Hussein 24 فبراير
 هجووووووووووم . و ببدأ الهجوم من الثورجيه والكولجيه والإخوان على إسم المهندس ابراهيم محلب بمجرد تكهنات بطرح اسمه لتشكيل الحكومه الجديده , و بدأو ينزّلو الصور اللي متصورها ابراهيم محلب مع ناس من نظام مبارك السابق , ده طبعا على اساس إن ابراهيم محلب ده كان بيشتغل ( نجار نابوليا ) مش رئيس مجلس ادارة أكبر شركة مقاولات في الشرق الأوسط . . عموما إلى الساده السابق ذكرهم بالإسم سؤال صغنن : هو الببلاوي كان عضو لجنة سياسات في الحزب الوطني ؟ الإجابه لأ ,, طب كان عاجبكو أوي وبتدعموه يعني ؟ الإجابه لأ برضه !!. . سؤال تاني , طب انتو اللي طرحتو قبل كده اسم عصام شرف صح ؟ وكان عاجبكو في الأول , طب عارفين عصام شرف كان شغال قبل كده وزير في حكومة مين ؟ مممممم لا غلط , مش حكومه جورج واشنطن ولا حكومة نيلسون مانديلا ولا حكومة جيفارا !!. . واحد صاحبي كاتب على صفحته , بخلاف إن ابراهيم محلب فلول و عضو لجنة سياسات وحرامي غسيل وابن صرمه وكداهون إنه كمان بتاع شو اعلامي وبروباجاندا ومالهوش في الشغل !! , مممممم طب هات ايدك كده يا صاحبي , وعزة جلال الله انا متابع اعلام بقالي ييجي 15 سنه , واعرف أشكال ناس زي عبد الرحمن عز واحمد المغير وابن القرضاوي ودومه وعلاء وماهر واسماء والواد بتاع تمرد و و و و ألاف الصور أقدر أقولك مين صاحبها , بس وعهد الله اسمع كتير عن ابراهيم محلب لكن ماعرفشي شكله و لا عمري شوفته في التلفزيون ولا في التلاجه حتى !!. . قلتها ألف مره و بكررها , لا هيعجبكو الرئيس الجاي ولا رئيس الوزراء الجاي حتى لو كان اسمه محمد بن عبد الله أو عيسى بن مريم !!.

Mohamed Hussein 24 فبراير
 والنبي يا حاج عدلي , أحبّ على راسك يا شيخ , بلاش ابراهيم محلب , ده عضو لجنة السياسات و مش بتاع شغل وفلول و متصور مع أقطاب نظام مبارك , و حياة عيالك , عشان خاطري أنا , هات لنا واحد يكون من شباب الثوره و متصور في ميدان التحرير , أرجوك بلييييز , هي كلها حكومه 4 شهور ولا 5 يعني مش هتخترع الذره , أنا بس ليا غرض , عايز أشوف حفلات التأييد والدعم للحكومه الجديده من حبايبي النشطاء السياسيين قبل ماموت , نفسي أشوف الناس عالفيس عامله لولولولي فرح عشان الحكومه الجديده . ....................ممممممممممم ايه يا عدلي ؟ بتقول ايه ؟ حتى لو جبت عمرو حمزاوي مش هيعجبهم !!.

Mohamed Hussein 24 فبراير
 للعقلاء فقط .... المخابيل يمتنعون !! . ..............الأن بالمكتبات , كتاب ( محمد حسين الخطير في علم التبرير ) .... ده اللي هو العبد لله !!. . هذا البوست جادي جدا , لا يحتمل الهزل والهزار والضحك والفرفشه و هبقى اطبعه واعلقه على صدري عشان أدافع بيه عن نفسي ضد حبايبي اياهم اللي بيمشو عالحيط . . 1- هعترف الأول عشان أقفل عليك كل السكك إنك عبقري ومثقف جامد طحن وانا اللي رابط الفيل قدام الصيدليه , مبسوط يا مولانا , مرضي كده ؟! وبعدين هكتب كام سطر بقى واسيبك انت تقول مين فينا اللي رابط الفيل ؟! . . 2- في الإنتخابات الرئاسيه الأخيره انتخبت صباحي وانت عارف كده كويس ( كنتو وقتها بتقولو ابو الفتوح مرشح الثوره !! ) , وفي الإعاده أبطلت صوتي ( ورقة تصويتي موجوده في أخبار ياهو مكتوب وموقع عليها كمان ..دور في تاريخ الإنتخابات هتلاقيها , يعني ماعصرتش لمون ولا قولت مرسي مرشح الثوره !! , ولعنت أبو حكم المجلس العسكري بتاع طنطاوي ومن بعده الإخوان ( عشان بس ماتجيش تبيع المايه في حارة السقّايين ) . . 3- من شهر تقريبا لما حمدين أعلن ترشحه للرئاسه قلت كويس , حمدين معارض محترم وتاريخه مشرف ومن قيادات ثورة يناير , في الأول بس كنت خايف يكون وجود حمدين والسيسي في نفس الإنتخابات يعمل تفتيت أصوات تصب في مصلحه ولاد الإرهابيه , وبعدين بصيت بنظره ايجابيه , وقلت طب ليه ماعتبرشي ان وجود الإتنين إثراء لعملية الإنتخابات وفي نفس الوقت يبقى عندنا اختيار , يعني لو منجحشي ده يبقى ده . . 4- بفضّل مرشح مدني لحد النهارده , عايز رئيس مدني ( هات أوفه مصاحف وانا احلف لك عليها ) , طب ليه عايز مرشح مدني ؟ مش عشان ارضي عيون أمريكا والمجتمع الغربي , أبسوليوتلي , كل الحكايه اني عايز حضرتك وحضرتي يبقى لنا فرصه في الحلم بمقعد رئيس مصر ( وده حق مشروع ) , وانا وانت مش ظباط جيش , وفي نفس الوقت مش عايز الإنطباع الي يتاخد عند الناس إن الرئيس المدني الوحيد اللي عرفته مصر هو البهلول محمد مرسي ( سمعه زي الزفت ).

4- لكن معنديش عقدة من حكم العسكري ولا أطباء العيون ولا مهندسين الديكور , ومش بردد شعارات بهطل , لو هتقولي : ظابط الجيش مابيفهمشي حاجه في حكم الأوطان ..يعني هو طبيب العيون والصيدلي هما اللي واخدين دكتوراه في أساليب الحكم الرشيد ؟! . . 5- فرحت انا بترشح حمدين , وبعدين لقيت هجوم شرس من انصار السيسي على حمدين والعكس صحيح , هجوم بأفوره جدا , ومع ذلك قلت ماشي , اتنين متنافسين , إنما اللي مش منطقي بقى , اللي جاب للمنطق تسلخات فعلا هو إن أكتر ناس بتنحت في وبر حمدين دلوأتي هما البرادعاويه و الثورجيه ( أغلبهم ) , اللي هما حضراتكو , اللي انا بسميهم النحانيح , اللي هما تجار الشعارات والفلايات !! , وفجأه كده بقى حمدين ماعرفشي ايه , قال يعني مكانشي رجله على رجل البرادعي في الميدان يوم بيوم , دلوأتي بقى خاين , و بيتسأل منكو زي ما بيسألو مهابيل الإخوان ( هو حمدين بيجيب فلوسه منين ؟) , الله أكبر يا بشر !!. . 6- طب السيسي عسكري وانت عايز مرشح مدني , انما حمدين مش عاجبك طب نعمل ايه بقى ؟ نجيب مين ؟ أضربلك الأرض تطلع مرشح مدني ؟ هتقولي خالد على !! عااااااااا , إنت عبيط ياض ؟ يعني أنا أروح أرمي صوتي في الترعه عشان أرضي عيون الديموقراطيه ومبادئ وقيم مولانا أبو خطوه الكبير ؟ وماله حمدين يعني ؟ وفي النهايه نلاقي نفسنا لبسنا في المرشح أبو جلابيه ودقن ؟! ......ده على أساس إن مصر هنلعب عليها دور كوتشينه و يا صابت يا خابت ...ياخي ملعون أبو حلمي في الرئاسه على حلمك على ديموقراطيتي و ديموقراطيتك . . 7- الخلاصه , عايز مرشح مدني فاحنا سيادتك معندناش وقت نعملّك فيه مرشح تفصيل عشان يعجبك , ولازم تاخد من المعروض اللي في الباترينه , اتفقو بقى كده على حمدين لأنه الوحيد اللي مدني ومن الثوار وله شعبيه حقيقيه ( يعني له فرصه في الفوز ) , اتنازلو شويه يعني واجلطو الحنه اللي على رجليكو , هتلاقوني أول واحد واقف في الطابور بتاعكو , غير كده ( وانا عارف انه غير كده ) يبقي وريني جمال خطوتك . . 8- يارب تكون عرفت مين اللي بيطبّل ومين اللي بيبرّر عالفاضي ومين اللي رابط الفيل ؟!!.

Mohamed Hussein 25 فبراير
 مورجان ... بيوتيفول . إحنا زارنا النبي يا عم الحاج , في فيلم مرجان احمد مرجان راح عادل امام الكافتيريا لقى الولاد والبنات مأنتمين مع بعض , ماعجبهوش الحال فوقع تحت ايد محمود الشاب المتدين ودخل معاه الجامع لقى الولاد والبنات ضاربين ورق عرفي ( حلالٌ حلال ) يا أخ مرجان ..........قال ( طب وهي تفرق ايه ...سلامو عليكو ) . . أيام ما كنت بنتقد حكم الإخوان كان بيتقال علينا كفار وملحدين وبتوع الهام شاهين , لمجرد انك شايف قيادات الإخوان دول شوية ارهابيين والكويس منهم بهلول برياله مش اكتر , في لحظه كده هتلاقي صاحبك الإخوانجي احتكر الدين والعقيده والإيمان والتدين لنفسه , وبقى عنده كشّاف بالليزر بيشوف بيه اللي جوه صدور الناس حتى عالفيس بوك مش فيس تو فيس , فأكيد يعني يكون لمح السواد والشرك والإلحاد اللي جوه قلبي في الوقت ده , ممممممممممممم إنما لو كان حرّك الكشّاف سنّه كان شاف المراره وهي مفقوعه !!. . وبعد استقالة البرادعي الغريبه والمريبه دي بقى أصحابي أنصار البرادعي بيشوفونا معدومي الإنسانيه والضمير , ومش بنفهم حاجه في حقوق الإنسان و معندناش سوشيال بوليتيكال انتيليجينس , يعني تقدر تقول إن صاحبك الإخوانجي سلّم الكشاف اللي بالليزر ده لصاحبك البرادعاوي ( تسليم عهده مش أكتر ) , لمجرد انك بتنتقد الإستقاله وتوقيتها وأثارها و بتقول عالبرادعي رخو و ضعيف ومتردد واستقالته لبّستنا في الحيطه , مع إن صاحبي البرادعاوي اللي كشف عن انسانيتي بالكشاف ده لو كان حرّكه شويتين لتحت كان شاف ال ..... وهي مفقوعه برضه ( الركبه يا سيدي الركبه ) . . طب ايه الفرق بين البرادعاويه والإخوان في النقطه دي ؟ ولولا إنها بلدي كنت قلت لكو زي عادل إمام ( سلامو عليكو ) , بس على رأي اللي قال ( أهاجر واسيبك لمين ؟ ) . يا شباب , ما عمريش قلت على البرادعي خاين ومعرفشي مين كافر ومين مؤمن و مش معايا الكشاف بتاعكو ده ومش عايزه , مش صحيح إننا بنصحى من النوع نشرب كوبّايتين دم على غيار الريق , مش صحيح إننا بنتفرج على ماتشات الكوره واحنا بنقرقش في جماجم البشر ( تسالي يعني ) !!.

Mohamed Hussein 25 فبراير
 مناقشات دي ولا جر شكل ؟ . كتبت عن الجهاز اللي اخترعه الجيش واعترضت على طريقة عرضه , حكاية انه حقيقي فعلا أو مش حقيقي دي يلزمها ناس متخصصين أوي و برضه مش هيبان غير بالتجربه ( يعني بالوقت ) , كلامي كان محدد عن طريقة العرض والتسويق للمنتج , اللي هي مشكلتنا الأزليه في مصر , ناس من صحابي قالو إن المخترع كان بيشرح بطريقه مبسطه عشان توصل للناس !! مممممممممممممم و أديها وصلت للناس يا سيدي , ايه النتيجه بقى ؟ تريقه وسخريه ومألته للصبح , كل واحد من اللي بيتريقو عالفيس هيروح لأمه أو لأبوه اللي مريض بفيروس سي ويكمل تريقته على الجهاز وصباع الكفته , يعني حضرتك تقريبا حرقت المنتج بتاعك بطريقة العرض دي !!.

أيها الساده المسئولين في أم هذا البلد , تنبيه هام , أبوس إيديكو , افهمو عقليتنا بقى , احنا شعب بيحب اللي يضحك عليه و يبلفه , هو ده الواقع , يعني لما تتكلم عن بحث علمي او اختراع اعمل بروباجاندا كده وهات ناس بكرافتات تتكلم بالإنجليزي أو حتى الألماني , ساعتها هتلاقي الشباب اللي داير يهلفت عالفيس بوك مبسوط و فاتح بؤه و مقتنع ومنشكح أوي عشان مش فاهم , أيون احنا شعب لما مش بيفهم بيقتنع , والخواجه عندنا سره باتع , ولما تتكلمو في السياسه قولو كلمات كبيره مقعره زي ( تخرصات ) و أهداف الثوره و إعلاء القيم العليا للوطن والمواطن و التوازن السايكو سوماتيك بين طبقات الشعب الكادحه , ساعتها هتلاقو الشباب بيهتفو ( بالروح بالدم نفديك يا زعيم ) !!.

Mohamed Hussein 25 فبراير
 علم الهريولوجي 2 . الهري اللي شغال على جهاز علاج فيروس سي بيقول باختصار اننا وصلنا لنقطه ( اللا رجعه ) , بقينا بنسيّس كل حاجه , كل حاجه , حتى أحلام الناس وألامهم ومعاناتهم و موتهم , وصل بينا الحال إن طبيب ما وصيدلي ما ينكرو من الأساس فكرة أو مبدأ استخدام الفيزياء في العلاج , يعني يتريأ على مسدس ليزر ممكن يستخدم في علاج مرض ما , مع انها قاعده علميه سليمه ومش جديده اوي ولا حاجه , بنفس الطريقه اللي بنعالج بيها الروماتيزم بالإسوره المغناطيسيه , وبنفس الطريقه اللي بنستخدم فيها الليزر في علاج عشرات الأمراض , ده اسمه استخدام الفزياء في الطب يا دكتور لو كنت حضرتك ناسي يعني !! . ............. ممممممممممممم فجأه كده بقت الحكايه انكار للقاعده العلميه نفسها, يعني انكار لعلم قائم بذاته , و ده مش بيعني طبعا إنه جهاز فعال , لكن أضعف الإيمان تقول مبني على قاعده علميه سليمه , ونسيب حكاية فعاليته دي للوقت والتجربه , الناس فقدت عقولها وفقدت حتى أمانتها المهنيه , وكل ده ليه ؟ عشان السياسه , لمجرد ان الجهاز ده طالع من الجيش ومولانا الطبيب ومولانا الصيدلي أعضاء في حزب الدستور , إنتو بقى بتوع جمهورية الضمير ؟ , انتو اللي هتبنو مستقبل مصر بس مستنيين الفرصه ؟!!. . انا اعترضت على طريقه عرض الإختراع ومقولتش انه فعال ولا لأ عشان مش بزيط في الزيطه ولا بتاجر بمرض الناس واحلامهم , وده حقي , مع إني شايل جميل أصغر عسكري في الجيش على دماغي , يا بتوع دولة الضمير !!.

Mohamed Hussein 25 فبراير
 و ناس بتعرق م التنس . الإعلان طلع حقيقي فعلا , كومباوند ( ماونتين فيو ) اللي في التجمع الخامس بيروج للوحدات السكنيه عنده و من ضمن ال ( أوبشنز ) إن فيه أماكن وممرات وسط الجنياين عشان تعرف تتمشّى فيها بالكلب بتاعك !!. . في الأجازه اللي فاتت لقيت إعلان على النت , كومباوند كاتب إنه بجوار ( ماونتين فيو ) , إدفع 100 ألف و احجز شقتك , فرصه لا تعوض , قلت لو كان على 100 ألف تبقى سهله , جايز الشقه تطلع ( توتال ) كده ب 400 ألف مثلا , تقسيط على 5 سنين ولا حاجه , انا مكدبتش خبر , واتصلت بالتليفون , ردّت عليا القطه ( ماهي لازم تكون قطه ) : . القطه : مساء النور يافندم , أيوه حضرتك الإعلان مظبوط , الكومباوند جنب ماونتين فيو فعلا . أنا : طب ممكن أعاين المكان , بس هروح اشوفه بالليل عشان احنا في رمضان والمشوار كبير . . القطه : أوكيه احنا شغلنا بالنهار بس هتبابع مع حضرتك بالتليفون أنا ( تاني يوم ) : أيوه حضرتك أنا فوتت الجامعه الأمريكيه على يميني ونادي القاهره الجديده عدى على شمالي , وماشي بقالي 5 كيلو في طريق ضلمه مفهوش صريخ ابن يومين , و حاسس اني قرّبت من حدود تنزانيا !! . . القطه : هاهاها , لا حضرتك كده ماشي صح , بعد شويه هتلاقي كومة رمل على يمينك واوضه صغيره فيها غفير نايم أنا : هو ده الكومباوند ؟؟؟؟؟؟ . القطه : أيوه يافندم أنا : هو حضرتك معاد التسليم امتى ؟ . القطه : بعد 4 سنين , في 9 /2017 أنا ( في سري ) : مممممممم أه , قولتي لي بقى , بعد 4 سنين يعني في 9 /2017 , البصراوي اللي ورا مصنع الكراسي اللي في امبابه !!. . أنا : طيب حضرتك مقولتيش ليا لو شقه 140 متر ... 3 أوض , تعمل لها كام ؟ القطه : ثواني أحسبها لحضرتك , تك تك تك , حضرتك هتدفع لنا مقدم 150 ألف , وقسط شهري 3 الاف وقسط سنوي 70 ألف ودفعة استلام 100 ألف ووديعة صيانه 45 ألف عند التسليم ...الإجمالي هيكون 725 ألف والإستلام بعد 4 سنين !! أنا : طيب هتصل بحضرتك بعدين عشان أركز في طريق الرجوع بس !!. .......................... .......................... في مصر صعب جدا تبقى مليونير بس سهل اوي تبقى ملياردير , مجرد ان يكون معاك 20 مليون تشتري بيهم حته أرض كبيره في الصحرا جنب أي مدينة جديده وتعمل عليها مخطط كومباوند ( برنامج كمبيوتر ) وتبيع كامل وحداتك قبل ما تضرب في الأرض كوريك واحد !! ... وال 20 مليون بقو 200 واحنا قاعدين . . بس القطه مكانتشي شاطره في البيع , هي لو كانت قالت لي ان من ضمن مميزات السكن في الكومباوند بتاعهم إنك تقدر تتمشي بالكلب بتاعك في الجنينه بتاعة ماونتين فيو ( يعني عند الجيران ) كنت وافقت على طول , صحيح كانت هتزود سعر الشقه 150 ألف كمان عشان موضوع الكلب , وصحيح اني ماعنديش كلب بس كنت هوافق وهدفع , أيوه أنا ماعنديش عدّه بس هدفع بدل ما يشيلو العده !!. . و أه يا مصر , فيكي الكلاب بتتمشي وسط الجناين ولا أجدع بشر و البشر بيموتو على الرصيف موتة الكلاب , وناس بتعرق عالرغيف و ناس بتعرق م التنس !!.

Mohamed Hussein 25 فبراير
 يا عيون شايفه الحقيقه أحلامنا مش بريئه و لا قدوتنا المسيح . ساعات كتير بنحلم نطلع على ضهر غيرنا نسرق و نقول ده خيرنا و لا نعرف إيه أخرنا و لا جارح من جريح . و بنضحك عالغلابه بنتاجر في التراب مخاليق و لّا ديابه ؟ ضحكتنا بألف ناب !!. . يا شهيد علشانها ميّت كان حلمه نهار جديد عايشين و القلب ميّت بنتاجر في الشهيد !! . . محمد حسين

Mohamed Hussein 26 فبراير
 خليك صاحي . خليك صاحي كده ومدقدق , خلّي دماغك دايما شغّاله و اللمبه منوره , وامشي في الدنيا دي خبّط في الكل زي ال free radical , اوعي حد يضحك عليك ويشرّبك حاجه صفره ويقولك تعالى ناخد منك الكترون عشان توصل لمرحلة الإستقرار العقلي stability , حياتنا يابني مالهاش طعم ولا معنى ولا شكل ولا لون من غير ال خراب damage اللي حضرتك بتعمله ده . . يعني مثلا لو واحد قالك إن فيه جهاز عباره عن مسدس ليزر بيشخص مرض معين على بعد مترين تلاته قول له كدّااااااااااااااااااااب , إنت فاكرني عبيط يا عصام , أصلا أصلا المفروض عشان تشخص أي مرض صح لازم الطبيب والممرضه يشمّرو بنطلوناتهم وينزلو بنفسهم جوه دم المريض ويشوفو الفيروس موجود ولا لأ بعيونهم المجرده , يعني رؤيا العين , هي صحة الناس لعبه يا ناس , ولازم يكون معاهم في الرحله البحريه دي 4 شهود عدول , فإن لم يكونا رجلين فرجلُ وامرأتان ممن ترضون من الشهداء . . لو قالولك استخدام الليزر في الطب والتشخيص دي حاجه معروفه علميا , و إن العلم ( الحديث ) فيه كده , على طول تقول لهم ( الحديث ) ده ضعيف ومالوش سند في ( صحيح ) البخاري , صحيح اللي اختشو ماتو والناس مبقاش في عنيها حصوة ملح , قال ايه هنشخص مرض بالليزر على بعد مترين ؟ بس سبحانك يارب البلد دي مستوره بفضل ربنا والله , وفي اللحظه المناسبه ربنا بعت لها اللي يكشف كدب وتدليس الإنقلابيين , الدكتور فلان الفلاني قدر يعرف وهو على بعد 10 ألاف كيلو ( يعني 10 مليون متر ) إن الإختراع ده كدبه , وقدر يعرف ألوان ومقاسات ملابسهم الداخليه , مش تقولي مسدس بيشخص مرض على بعد 3 متر !!.

Mohamed Hussein 26 فبراير
 إحنا متراقبييييييييييييييييين . إوعى موضوع جهاز فيروس سي ينسّيك إننا متراقبين , أيوه كلنا , في الفيس وتويتر , في ايميلاتك , في ياهو وسكايب وهوتميل , في الواتس أب الله يرحمه , كل رسايلك وايميلاتك وهمساتك وغمزاتك ولمزاتك في إيديهم , وكل شئ عندهم في كتاب , لأ سيادتك , ده مش أبانا الذي في المخابرات , ده أبانا الأمريكاني صاحب المواقع والبرامج دي , يعني في إيد أوباما والمخابرات الأمريكيه . . الكلام اللي فات ده مش مهم اوي , اللي جاي أهم , و قالك الوحده معرفشي كام ( 8200 تقريبا ) في الجيش الإسرائيلي مشرّفه معانا عالفيس , فيها عناصر بتدخل بأسماء عربيه , يعرفو مصري كويس وبالعاميه كمان , ويفضل يتناقش معاك وانت فاكره من امبابه وهو من تل أبيب , وهنروح بعيد ليه ؟ , أنا مثلا شاكك في الواد جون صاحبي وحاسس انه ألماني مع انه بيقول انا مصري وصعيدي بس على مين Uohanna R. Shafik . طب ازاي تعرف إذا كان اللي بيكلمك وبيهري معاك في البوستات والشات مصري ولا صهيوني ؟ .......مممممممممممممم أنا فكرت , لأن الموضوع أمن قومي , ولقيت الحل , هتسأله الأسئله اللي جايه دي وهي هتحدد إذا كان مصري ولا لأ ؟ . س 1 : مين اللي جاب الجون ( البلانتي ) بتاع مجدي عبد الغني في كاس العالم ؟!. . س2 : قولي 5 شعارات ولوجوهات بتبقى مكتوبه على ضهر العربيات النص نقل والربع نقل في مصر غير ( الحلوه دي م المنصوره ) ؟! . س3 : مَنْ هو صاحب المركب نورماندي تو , وإيه علاقة المركب نورماندي تو بالمركب تايتانك إذا كانو الإتنين بيغرقو عادي يعني ؟!. . س4 : عمر الشريف كان بيدّلع فاتن حمامه في الفيلم بتاع زمان وبيقول لها يا إيه ؟! . س5 : ايه اللي مكتوب على عربية الفول اللي في ميدان رمسيس ؟! . س 6: المصريين بيعملو ايه في الأكياس البلاستيك اللي بيبقو جايبين فيها الخضار ؟! . س7 : الستات في مصر لما بيحبو يزورو واحده لسه والده بياخدو ايه في إديهم ؟! . س 8 : من هو الزعيم السياسي الذي صلى إمام بالرسول والصحابه في منام أحدهم ؟ و من هو الزعيم السياسي اللي سابقنا بألف فدان , ومن هو الزعيم السياسي اللي اسمه مكتوب على ورق البردي من كذا ألف سنه ؟! . س9 : أذكر 5 حاجات بتستخدمهم الست المصريه في عمل المحشي ( غير الكرنب ) ؟!. . س 10 : وريني بطاقتك ياض ؟! ............................. ............................. و بس يا سيدي لو صاحبك المجهول ده جاوب على الأسئله ال 10 كلهم صح تعرف على طول إنه مممممممممممم إنه صهيوني حقير طبعا , لأنه لو كان مصري كان سبّلك 100 مله ودين وسابك و مشي من تاني سؤال !!
.

Mohamed Hussein 26 فبراير
 بُلينا بقومٍ ليسَ منهم منفعه !!. . بعد ما شوفت هرتلة الناس كالعاده على تصريحات عصام حجي مستشار رئيس الجمهوريه , اللي قال فيها إن الإختراع ده ( فضيحه علميه لمصر ) روحت أنا بقى أقرا تصريحاته الفخمه الفخيمه العلميه اللي موزونه بميزان حساس ولاحظت التالي : . 1- الأجمل طبعا من إني أكتب البوست ده إني أكتب بوست هزار زي اللي فات عشان اتجنب اهانات متوقعه من أصدقائي الجامدين أوي . 2- حضرتك طبعا كناشط سياسي عايز تحط كلمة الجيش في جمله مفيده أو مش مفيده أكيد يعني تكون فاهم إن المستشار العلمي للرئيس بيفهم في الطب والكبد والصيدله والدوا وحركة المجرات والكواكب والفلسفه ( زي نظام ابن سينا زمان ) , وفينا ناس لو قابلت أحمد زويل في الشارع هتنام على ضهرها وتقول له والنبي يا دكتور تكشف على بطني وتقولي فيها ايه ؟! . 3- عصام حجي مقالشي أي معلومه علميه في تصريحه , تصدق يا مؤمن مفيش أي معلومه علميه , وعهد الله مافي أي كلام علمي , ولو ركزت في كلامه هتلاقيه بيقول اللي احنا قولناه , بيتكلم عن الشكل العام وطريقة العرض والتسلسل في البحث العلمي وإن البحث ماتنشرش في المجلات العلميه الأمريكيه , ده على أساس إن ده القرأن بتاع البحث العلمي ( صلي الله عليه وسبم يا سيدي ) !!. . 4- يا دكتور عصام , يا مستشار السيد رئيس الجمهوريه , يا خليفة مولانا الأرعن , أنا وصحابي الصيّع من حقنا نقول وننتقد الطريقه والأسلوب بتاع الإختراع زي مانت عملت بس سيادتك بتشغل منصب سياسي يعني تصريحاتك بتبقى محسوبه على دين أم مصر !! و بما إنك بنفسك قلت إن فكرة الإختراع اتعرضت قدامكو انت والسيسي وعدلي منصور فكان ممكن في الوقت ده وفي الغرفه المغلقه دي تقول البؤين الزباله بتوعك , يعني مش على الملأ , عايز أقولك باختصار أنا ممكن ألتمس العذر للوا نفسه رغم الطريقه الهبله اللي اتكلم بيها , لأنه مش بيمثل الدوله , وكنت اتمنى تتعلم من عدلي منصور لما قالك هنعرض الإختراع على الجامعات ومراكز الأبحاث العالميه بهدوء وبشويش مش طلع وقال فضيحه لمصر !!. . يبقى تصريحات حضرتك هي اللي فضيحه , زي ماكانت استقاله مولاك وسيدك كارثه لسه بنعاني منها لحد النهارده , كان مولاك البرادعي يقدر برضه يتصرف بشكل أفضل يحفظ للدوله هيبتها وفي نفس الوقت يراعي مشاعره وحسه المرهف , كان يقدر يستنى شويه و بعدين يخترع أي سبب لاستقالته ( مرضيه مثلا ) ده لو كانت مصر دي تعني ليكو أي شئ . . إنما مولاك قرر إن حسه المرهف أهم من البلد وسيادتك قررت إن أمانتك العلميه اللي بتنقّط في كل مكان أهم من البلد , الله يرحمه اللي قال ( بلينا بقوم ليس منهم منفعه ) !!. ....................... ...................... في انتظار الإهانات بقى .

Mohamed Hussein 26 فبراير
 لا زلت في انتظار قرار من السيد الرئيس المحترم عدلي منصور بإقالة السيد الدكتور المحترم عصام حجي من منصبه كمستشار علمي للرئيس , فرق شاسع بين انسان ( حتى لو انسان عادي ) بيعرف يلعب سياسه وإنسان ( حتى لو عالم ) بيعرف يلعب في مناخيره !! . . دكتور عصام , مكانك مش هنا , مكانك في مراكز البحث العلمي مش في السياسه , و لما تُقال أو تستقيل لو عايز يعني تكمل سياسه يبقى مش باقي لك غير تأشيره للنمسا و تذكرة طيران وحساب على تويتر و تابليت يكون كبير كده وحلو , والنبي يا شيخ ما تبقى تنسانا كل اسبوعين تلاته من تويته كده تكلمنا فيها عن الفاشيه العلميه في مصر , والديكتاتوريه في مواجهة البحث العلمي وعصر الظلام الإضمحلالي المنبعث من القرون الوسطى , واقف في الصف بقى و حازي مع زمايلك !!.

Mohamed Hussein 27 فبراير
 فقر و عنطزه صباح الخير - هتعرفهم بسهوله , عنظرتهم سابقاهم , حاجه كده تتعبّى ف زكايب . 1- في صفحة إحدى الصديقات ( كاتبه صحفيه كبيره و محترمه جدا ) دخل أحد الأصدقاء عندها وكتب تعليق على بوست عادي جدا , كام كلمه كده كتبهم صاحبنا بس حاجه ايه ؟ لوز , عنب , منتهى قلة الزوق والصفاقه والجليطه والعنظزه , وبالبحث والتحرّي عن صاحب التعليق المذكور وُجد أنه كاتب صحفي شاب في جريدة المصري اليوم , من شباب لامؤاخذه الثوره , اللي هما شعرهم كبير دول وتلاقيه بيستخدم قاموس الأباحه بمنتهى الأريحيه , أومال يبقى ثورجي إزاي ؟ قاموس الأباحه هو الوسيله تقريبا لتحقيق أهداف الثوره , يعني مش هنعرف نحقق الأهداف من غيره , زي اسماعيل ياسين لما ضاعت منه الصفاره وقال إنت عايزني أقبض عالحرامي من غير الصفاره ؟!... وبس يا سيدي , بيكتب في جريده محترمه.............. ياما رخصتي يا أوطه !!. . 2- طبيب شاب دخل يعلق على بوست بخصوص جهاز فيروس سي , أي هجص علمي ومعلومات غلط ( بيقولها بمنتهى الثقه ) , بس مش ده المهم , المهم تلاقيه بيكتب كلمات من نوعية ( أجيب لكو حزمة برسيم ؟ طب لو طلع كلامي صح تقول انا حمار ؟ ) وأصدقاء كتير هتلاقي تعليقاتهم لما مش بيلاقو رد بقت بالشكل ده ( إحنا نايمين في 14 وابقو ورّونا هتعملو ايه ؟ .... احنا مستنيين لشهر 6 لما نشوفكو وانتو بتعالجو كل الفيروسات اللي في كوكب الأرض , إحنا مش هننتخب فلان ولا علان ولا ترتان وابقو ورّونا شطارتكو , احنا هنسيب لكو مصر وابقو خلّو بالكو منها يا كتاكيت ..... ) . 3- الميزه المشتركه بينهم كلهم للأسف هي دي ( الفقر والعنظزه ) , العنظزه يعني التعالي والتكبر والنظره الدونيه للغير ( جيل عرّه وشعب عبيد ولاحسي بياده ...دي شعاراتهم ) , والفقر هنا مش فقر مادي , يا ريته كان فقر مادي , ده فقر في الزوق والأدب والإتيكيت , فقر في العلم والثقافه , فقر في الوطنيه والإحساس بالناس , و تلاقيه بيكلمك سياسيا ويقول ( إحنا ) .... إحنا هنعمل , إحنا هنسوّي , إحنا إحنا , و تحس إنه مركون على بتاع 30 مليون صوت انتخابي , بيفكروني بفيلم لعادل إمام ( حضرتك المعلم حلاوه العنتبلي ؟ .... أيوه إحنا ) !!.

Mohamed Hussein 27 فبراير  

غاية مرادي تكوني مرفوعه فوق الراس ياللي مقامك نزل في الأصل كان عالي . ما شبعت عمري اوصفك و اصرخ ما بين الناس حبّوها لجل النبي بلدي و راس مالي . و لمّا بدأو الضرب قُلت البشاره يا رب و لا خوفت من حُرّاس و لا بعت لملالي . غاية مرادي تكوني مرفوعه فوق الراس ياللي مقامك نزل في الأصل كان عالي !!. . . محمد حسين

Mohamed Hussein 27 فبراير
 حكايه اسمها البترول والملالي !! . خبر : عودة جثامين 7 من المصريين العاملين في ليبيا , لا مماتوش في حادثة موتوسيكل سيادتك , مممممممممممم حسبنا الله ونعم الوكيل , مفيش حد هيتعاطف ولا ايه ؟ فين النشطاء وبتوع حقوق الإنسان ؟ اعتبرهم أم حريه يا أخي , انت يا أستاذ يا بتاع جمهورية الضمير ؟! . . الحكايه بدأت من 80 سنه مع بدايه ظهور جماعة الإخوان الإرهابيه في مصر , و بعدها ب 20 تلاتين سنه ظهرت الجماعات السلفيه ( طلعو من تحت الأرض هما والبترول في نفس اللحظه ) . أجيالنا بقى مكتوب عليها تحصد الزرعه دي , زرعة الإرهاب والغل والطائفيه , المسيحي في مصر لما بيروح يصلي في الكنيسه ويرجع سليم معافى بيبقى عمل انجاز كأنه عدّى المانش , بس على مين ؟ حبايبنا الإرهابيين ( بتوع ربنا ) وراهم وراهم حتى في ليبيا !!. . وبعد ما حضرتك يا صديقي المسلم العزيز تكتب شعار ( الإسلام دين التسامح ) في أول تعليق عالبوست ده ( ده على أساس إني ماعرفشي إن الإسلام زيه زي المسيحيه دين تسامح ) عايز أسألك انت , أيوه انت , بيبقى شعورك ايه لما تشوف أقباط مقتلوين أو مدبوحين ؟ طب لو شوفت واحد إرهابي بيحرق كنيسه هتطلع جري عليه وتمنعه وتضربه وتقتله لو تطلب الأمر ؟؟ مممممممممم لأ ؟ يبقى مش من حقك تكتب الشعار هنا . . الأزهر ( منارة الإسلام الوسطي المتسامح ) عمّال دوره بيختفي و باقي له تكّه واحده ونحوّل المبني بتاع مشيخة الأزهر لعشة فراخ أو حتى غرزه حشيش , والصوت العالي الواضح الجلي ّ هو صوت الإرهاب , شيوخ وحًكّام كانو بيعلمونا الحقد والغل وكره الأقباط من قبل ما يعلمونا الحروف الأبجديه والنتيجه بنشوفها كل كام يوم , وجاي تقولي ديموقراطيه وعايزين نبقى مجتمع ديموقراطي ؟ مش لمّا نبقى بني أدمين الأول !!. . المغرب بيأدن وانا بكتب البوست , هقوم اصلي , هو ينفع وانا بصلي أدعي للأقباط اللي ماتو دول بالرحمه وادعي على الإرهابيين ( بتوع ربنا ) بالهلاك ؟!

Mohamed Hussein 27 فبراير
 شوية قرارات عماله تطلع مش مفهومه , و ضغوط و تقارير من بره مش مفهومه برضه , احتمال كبير السيسي مش يترشح فعلا , كده يبقى لبسنا في الحيطه رسمي عشان احنا مش متفقين على مرشح واحد ولا حتى حمدين صباحي , في اللحظه دي اللعب والتحالفات والفلوس هيشتغلو , واللي بيبيعو في مصر كتير , واحنا هنبقى مشتتين بين كذا مرشح مش اتنين , و ده معناه باختصار إن الشيطان ذات نفسه بشحمه ولحمه قادم لحكم مصر ( كلاكيت تاني مره و نتقابل بعد 500 سنه ) !!.

Mohamed Hussein 28 فبراير
 يوم في تاريخ المعجنه . مساء الخير . - اسرائيل بتبسط سيادتها على المسجد الأقصى , و حماس مجمعه الإرهابيين بتوعها وواقفين عالحدود مع مصر , بيصلّو يا أخي بيصّلو , إنت ماتعرفشي فضل صلاه الحمساويين على الحدود المصريه ؟ تبقى اكيد ماتعرفشي فضل صلاه الإخوان على كوبري 6 اكتوبر , دي الحسنه فيها تبقى ب 17 ضعف ونص , ومن مؤلفات سيد قطب , سيد بيه قطب لا يكون قريب حد فيكو ولا حاجه , يقول المفكر الكبير في كتابه الشهير ( الإرهاب حلو مفيش كلام ) : لا تُشد الرحال إلّا إلى ثلاث , كوبري 6 اكتوبر , والحدود المصريه وقدام كاميرات الجزيره !!., ياكشي انت بس ثقافتك الإسلاميه ضحله و إيمانك ضعيف وعزيمتك رخوه . . طب دلوأتي الإخوان والسلفيين لو حبّو يعملو مليونيه النهارده يسمّوها ايه ؟ ممممممم مليونية نصرة حماس في اقتحام الحدود المصريه ؟ ولا مليونية مبروك عليكو الأقصى يا صهاينه ... والشريعه ؟! . طب سيبك من الإخوان والسلفيين , خلينا في كتاب التاريخ , اليوم ده يتكتب ازاي في كتاب التاريخ ؟ يتهيألي لو فيه مؤرخ شاطر كده ومدقدق فهو مش محتاج يكتب حاجه تعبّر عن الحدثين بتوع النهارده , هو ممكن يكتفي برسمه صغيره , إشاره بالأصابع , لا مش أربع صوابع و لا اتنين , واحد بس يكفي !!.

Mohamed Hussein 28 فبراير
 الفراغ ....... الفرااااااااااااااااخ . قاعد في الصيدليه زهقان ومش لاقي حاجه اعملها و جعان كمان , لقيت قدامي مثلث جبنه نستو , قمت و جبت نُص رغيف وقلت اكله بدل ماهو مرمي كده , لسه بمد إيدي وافتح الورقه اللي عليه لقيت مثلث الجبنه بيقولي : استنى استنى , دانا خالي من الدسم . قلت له : مممممم وانا خالي من السنبلاوين يا كابتن , يعني و لا يهمني , في كل الأحوال هتتاكل , خُش بقى من سكات ولا تحب اعتبرك ممتنع عن دخول الساندوتش واتصل بالناس ييجو ياخدوك ؟ وصورتك بقى تنزل في الجرانين و يكتبو بالبنط العريض ( مثلث جبنه نستو يمتنع عن أداء مهامه دون إبداء أسباب منطقيه ) , والأستاذه ريهام سعيد تيجي تصور معاك و تقول لك : مش ندمان انك رفضت الدخول في الساندوتش ؟ قول انك ندمان ؟ وبعدين انت مثلث لافاش كي ري يعني مش مصري , وجودك في البلد غير قانوني , قول لي مين الجهه اللي بتموّلك ؟ و كمان صناعه تركي مش فرنساوي ؟ دانت هتشوف أيام سوده , ولما انت فزلوك اوي كده وشايف نفسك و رافض الدخول في ساندوتشات إيه اللي دخّلك كلية الجبنه النستو من الأول ؟! . . قال لي : لأ لأ , ريهام سعيد لأ , انا داخل أهو , كنت بهزر يا جدع , هو الواحد مايتفكّش معاك بكلمتين ؟!!.

Mohamed Hussein 28 فبراير
 على موقع قناة الجزيره : واشنطن على لسان وزير خارجيتها تنتقد جرائم العنف في سوريا وقمع الحريات في مصر والإنقلاب على الحكومه المنتخبه , من ( تقرير حقوق لامؤاخذه الإنسان الأمريكي ) !!. . وبس يا سيدي هما 8 كلمات مفيش غيرهم : .... أمريكا ...قطر ..الجزيره... حقوق الإنسان ...مصر ... قمع ... انقلاب ..........!! . أو ممكن تقولهم بشكل تاني : أوباما ... تميم ... موزه .... توكل كرمان ... مصر ... تويتر !!.... أحمد منصور !! . مش واخدلي بالك انت يا حاج محمد ؟ يالله بقى اقف في الصف مع زمايلك وقول يسقط يسقط حكم العسكر أو اقف في نفس ذات الصف برضه وقول ( يا سيسي يا جبان يا عميل الأمريكان ) !! , او اقف في نفس ذات الصف و متقولشي حاجه بس اكتب تويته في الخباثه عن الفاشيه وخفافيش الظلام.......... كل الطرق تؤدي إلى الدوحه , وإنما أهلكّ أقواماً قبلَكم حُسن النيه !!

Mohamed Hussein 28 فبراير
 اضحك بقى لما تعرف إننا مش ( الأخير ) ....لسه فيه شعوب ورانا . . انا شغال في نفس المكان من 12 سنه , والزباين هما هما , مقسومين نصين , نص سعودي ( السكان ) ونص بنغالي , حُراس العماير والصنايعيه وعمال النضافه , العيال البنغاليين هنا عاملين زي رابطه كده ( رُبّاطيه ) , وتقريبا من 5 سنين اختارو واد منهم ( كهربائي تقريبا ) إنه يبقى الدكتور بتاعهم أو يعني تقدر تقول المرشد الصحي , الواد شكله مميز جدا , سنانه صفرا جدا أو بني من شرب حاجه كده بيشربوها البنغاليين بس هو تقريبا بياكلها مش بيشربها . المهم بدأت الحكايه أول مره لما جالي الدكتور الكهربائي ده ومعاه زبون ( صديق ) وقال لي ( إعطي أرتيز ) , أو بالإنجليزي بيقولوها كده GIVE ARTIZ يعني اديله علبة ارتيز ( ده دوا للحساسيه والرشح والزكام تركيبه سيترزين ) , قلت له اوكيه ...الموضوع اتكرر بقى كل يومين تلاته , ألاقي الدكتور الكهربائي جايب معاه صديق بنغالي من الشله ويقولي GIVE ARTIZ , بدأت ألاحظ إن الزبون التاني عنده صداع والتالت ضهره بيوجعه والرابع مغض في جنبه اليمين بس الدكتور بتاعهم قال أرتيز يبقى هو الأرتيز . . انا خلاص اتعودت وأول ماشوفه داخل وفي إيده المريض بتاعه ( الحاله يعني ) أقوم مادد ايدي و جايب علبة الأرتيز اللي بيستخدمها دكتورنا العزيز في علاج كل الأمراض !!. ماهو سيادتك مش فاهم , إنت ممكن بشوية مجهود وشرح وتحليل وتوضيح تقنع صديقك البرادعاوي إن البرادعي ده بني أدم زينا كده بيصيب ويخطئ ويأكل الطعام ويمشي في الأسواق , لكن مستحيل تقنع العيال البنغاليين دول إن الدكتور بتاعهم مجرد عيل كهربائي ولامؤاخذه أرتيز !!.

Mohamed Hussein 1 مارس
 الزياطين بيشجعو باسم وانا مش معاهم !!. . صباح الخير - فاتتني حلقة باسم يوسف كالعاده عشان شغلي وهشوفها بقى النهارده في الإعاده , بس الفيس بوك ماخلاش لولاد الحلال حاجه , البوستات بتنزل في النفس التوقيت , حاجه كده على الهواء مباشرة يعني , في دقيقتين تقدر تعرف مضمون الحلقه , بعتذر لكل أصدقائي والله , كان نفسي جدا أزيط معاكو , انا أصلا بحب الزيطه والألشه وكده يعني وبشجع اللعبه الحلوه . -اكبر مشكله بقيت ألاحظها في أصحابي ال ( باسمون ) إنهم مش بيستنو باسم يوسف الفنان الساخر المبدع الرائع , تؤؤؤؤؤؤؤؤؤؤ , بيستنو باسم يوسف المنقذ المخلص , وشوفت قال ايه على مين ؟ يبقى انا كان معايا حق ؟ شوفته لما قال رأيه في فلان ؟ الله عليك يا باسم. . ممممممممممممم , يعني احنا عندنا شريحه حلوه كده من الشعب عايشه عمرها بتستنى حاجتين ( تويته وبرنامج ساخر ) للتأكيد على إنهم ماشيين في الطريق الصح , وباقي لهم بس ( أن ينزّل الله عليهم مائده من السماء ) , التابوه الحقيقي انك تحصر نفسك وتزنقها بالشكل ده , الثقه العمياء فيما يكتبه فلان او علان , و حضرتك مش هتفرق كتير عن اللي قال السيسي اسمه مكتوب عالبرديات من كذا الف سنه . . لو عايز زيطه ممكن نزيط للصبح , بالمناسبه وبصفتي بفهم شويه في الفيس أعرف ان زبون الفيس مابيحبش البوستات الطويله اللي زي دي , بيحف الألشه الخفيفه واقدر اعملها بسهوله إنما فيه حاجه مانعاني ممكن تكون اكبر من استيعاب البعض . . نهايته , لو حضرتك شايف إن باسم يوسف هو المنقذ مش مجرد فنان موهوب وان عصام حجي هو العبقري مش مجرد عالم زي مانت شايف ان البرادعي هو حامي حمى المبادئ والقيم والمثل العليا وان النشطاء السياسيين هم حاملي لواء الثوره ومفاتيحها ...فتعالى وانا هشهدك على نفسك ........... 3 أسئله ممكن يكونو ماخطروش ببالك ياريت تفكر فيهم ( درس صغير اوي في المصداقيه والمبادئ ) : . 1- باسم يوسف وعصام حجي اتكلمو عن فضيحة الإعلان عن جهاز فيروس سي والكلام اللي هما شايفين انه غالبا نصب عالناس , كويس كده ؟ معايا حضرتك ؟ ممممممممممم طيب اتمنى من الدكتورين حجي ويوسف ومن باب الأمانه العلميه يقولونا رأيهم فيما يقدمه عادل عبد العال وسعيد حساسين , ألاف المنتجات الطبيه والخزعبلات ومليارات الجنيهات اللي عملها الإتنين دول من دم الغلابه ومتاجره حقيقيه بأحلامهم وألامهم ....هستنى حلقات كامله من باسم عن النصب باسم العلاج بالأعشاب , وهستنى تصريح عصام حجي عن فضيحة مصر اللي بيتسبب فيها عبد العال وحساسين ............... وشكلي هستنى كتير !!. . 2- اتمنى من الدكتور البرادعي يشرح لنا التويته الأخيره بتاعة عيد استقلال ناميبيا ويقول لنا ايه علاقة حرب عنصريه بين البيض والسود بدوله بتحارب الإرهاب ؟ وهل كان الأفضل و الأكثر منطقيه إنه يشبه الوضع في مصر بناميبا ولا بأمريكا لما قررت تحارب الإرهاب ............. شكلي هستنى كتير برضه !!. . 3- أتمنى من الساده النشطاء السياسيين اللي هاجو وماجو على حادثة سانت كاترين يفسّرو لنا سبب صمتهم عن مقتل 7 اقباط في ليبيا , وعن حوادث المرور اللي بتحصل يوميا والإسعاف اللي بيتأخر ساعتين وتلاته والغلابه اللي بيموتو بسبب كده .........مفيش تعاطف معاهم ليه ؟ .............شكلي هستنى كتير اوي !!. . . الخلاصه يا ساده , كلمة السر المشتركه في الأسئله التلاته هي الجيش , والموضه دلوأتي هي الهجوم عليه , متنساش ان باسم بيقدم برنامج ونسبة المشاهده والأعلانات دي أكل عيشه , ولازم يجاري الموضه , حلقة عادل عبد العال وسعيد حساسين مش هتجيب اعلانات حلوه , رأس المال بيحكمك أو بيفرمك أحيانا , والإسعاف اللي بيتأخر عن حوادث الطرق هيبقى انتقاد لوزارة الصحه مش وزارة الدفاع , والبرادعي بيحاول يأكد على مبادؤه بس أحيانا كتير بتفرط منه اوي . . . ممكن لو تسمحو لي يعني نتكلم عن موضوع المصداقيه والمبادئ التي لا تتجزأ في وقت تاني ؟

Mohamed Hussein 1 مارس
 الحكايه باختصار عشان تبقى فاهم . لجان الإخوان الألكترونيه ومعاهم الجزيره وقطر ومليارات خيرت الشاطر وحسن مالك بيلعبو بيكو بمنتهى الحرفنه زي الكوره الشراب , وحضرتك مستمتع أوي بدور الكوره الشراب ده , كل يومين تلاته هيرمولك بوست مضروب أو صوره متفبركه وعلى بال ما تعرف ان البوست مضروب والصوره متفبركه يكونو شغلوك بحاجه تانيه , و موجه تجري ورا الموجه عايزه تطولها . . مش هما مفهمينك ان مشكلتهم مع السيسي صح ؟ السيسي قاتل السيسي سفاح مظبوط ؟ والكلام ده لقى صدى كبير عند مبادئ حضرتك بصفتك كوره شراب أد الدنيا ....طب هات ايدك كده , وعهد الله لو السيسي مات بكره الصبح ماهتتوقف لجان الإخوان عن تشويه الجيش , ولا حضرتك هتبطل تبقى كوره شراب , وهو ده الغرض بتاعهم , هدم أخر حاجه عدله في البلد ( بطريقة عليا وعلى أعدائي ) . . يا أخي انت مش كوره شراب ولا حاجه دانا كنت بهزر معاك , إنتو كبارات البلد ومثقفيها والنخبه اللي عارفه القرد مخبي ابنه فين , وانا محسوبكو , فهّمني يابني عمي , لو انت شايف ان تشويه سمعة الجيش المصري واظهاره بمظهر السفاح هيجيب لنا ديموقراطيه وحقوق انسان وكداهون اشوّهه يا باشا والعن سلسفيل أبوه كمان , أومال ايه ؟ , دانا خدام تراب رجليكو !!.

Mohamed Hussein 1 مارس
 بالمناسبه وعشان المزايدات , السيسي هو مجرد حباية رمل في جبل كبير و عظيم اسمه جيش مصر , لو جت عاصفه كبيره و طيّرت حباية الرمل دي انا غالبا مش هاخد بالي لأني هشوف الجبل زي ماهو ............. أنا بقى مع الجبل ده وبسند ضهري عليه , إنما قولي انت بتستند ضهرك على ايه ؟ ما تيجي تسند ضهرك معايا , نشرب كوبايتين شاي سوا و ممكن ساعتها بقى نتكلم في مشاكلنا وحلولها بس واحنا ساندين ضهرنا !!.

Mohamed Hussein 1 مارس
 كل يومين تلاته بلاقي عندي اتنين برادعاويه بيعلقو بمنتهى قلة الزوق والجليطه والجهل والصفاقه , حتى الألفاظ ألفاظ تبّاعين على ميكروباس ..والحاجه اللي كانت بتبقى معموله بغرض الألشه بقت حقيقه وراسخه في دماغهم . طب انا أيام ما كنت برادعاوي كنت بشوف نماذج بتعرف تتكلم وتتحاور , نماذج تشرف بجد , مش بتردد شعارات ولا خدت جهلها وعاشت معاه في برج عاجي , النماذج دي راحت فين ؟ هو ليه مش باقي عالمداود غير شر البقر ؟!!. . اللي عايز يتأكد من كلامي يشوف تعليقات البرادعاويه على البوستين بتوع الصبح ... وياريت حد يفهّمني ايه علاقة تعليقاتهم بالمكتوب في البوستات ؟ وكباب ايه ونيلة ايه اللي الناس لسه بتهري فيه ؟ الساده الأطباء والصيادله اللي ألشو بما فيه الكفايه على حكاية كباب دي ممكن تشرحو لاصحابكو كان مقصود بيها ايه ولا كبريائك الثوري هيمنعك كالعاده ؟ , يعني خدت الألشه و رميت المعلومه ؟!! . أنا عارف والله ان الغث هو اللي بيعجب الناس عالفيس , الهطل والقهقهه وطرقعة الكاسات عالفاضيه والمليانه هما شعار المرحله .... تحبو أقول لكو نكته أبيحه ؟!!.

Mohamed Hussein 1 مارس
 هكتب بوست علمي شويه يا ريت حضراتكو تقروه وبعدها نقفل الألش على حكاية صباع الكفته , الساده الأفاضل أساتذتي وتاج راسي الأطباء والصيادله يا ريت لما يقرو البوست يتناقشو في المعلومه العلميه لو يحبو ..بس والنبي بلاش انتماءك السياسي أو حرصك على تشويه جهه ما يخليك تتخلي عن ايمانك بالماده العلميه اللي اتعلمتها ...دانت راجل صاحب مبادئ يا راجل ..........................بالمناسبه انا صيدلي ومصر فيها بتاع 200 الف صيدلي وانا اغباهم واكثرهم جهلا , يعني رقم 200 ألف وواحد

Mohamed Hussein 1 مارس
 حقيقة صباع الكفته ومسدس تشخيص الفيروسات . 1- التشخيص باستخدام شعاع الليزر .............................. .............................. - صلو عالنبي عليه الصلاة والسلام , بقى اللي درس في صيدله أو طب حتما ولابد هيكون اتهرى من الجمله دي في الفارما وخلافه , sar ...وهي اختصار ل structure activity relationship يعني العلاقه بين تركيب الدوا ونشاطه أو فاعليته , وأصل الحكايه دي جت منين ؟ جت يا سيدي ان الأبحاث الكتيره والمعقده في ال 100 سنه اللي فاتو توصلت لإن أغلب الأمراض بتحصل لما الميكروب يستغل تركيبه أو بمعنى أصح شكله في الوصول لمركز معين من مراكز جسم الإنسان center , الحكايه دي بيسموها نظرية ال key and lock , يعني القفل والمفتاح ( ممممممممممم ممكن تقلش على حكاية القفل والمفتاح دي لو تحب ههههههههههههههه بس نأبك هيطلع على شونه أصل أنا مش لواء جيش ولا معايه درجة لواء فخريه لأن فخريه مش موافقه ) . . - المهم , هقول تشبيه بسيط , لو نفترض ان فيه ميكروب معين شكله تحت الميكرسكوب شبه علبة الكبريت , أهو الميكروب ده لما بيدخل جسم الإنسان بيدوّر على مستقبل receptorفيه فتحه تشبه علبة الكبريت , ويقوم ايه بقى ؟ يقوم الميكروب معشّق في الفتحه دي ( حلوه معشق دي يا حاج محمد ؟ ممكن تستخدمها في الألش برضه ) , هنا بيبقى الميكروب هو المفتاح key والمستقبل أبو فتحه مناسبه هو القفل lock ...ولما تتم العمليه دي تبدأ اعراض المرض تظهر على الإنسان لأن الميكروب كده قفل على حاجه حيويه موجوده في جسم الإنسان وانت وحظك بقى هيمنع افراز انزيم معين أو هيزود افرازه وهكذا ...يعني وضع مش طبيعي . . - قوم احنا بقى ك ناس بنعمل أبحاث عالأدويه وتطويرها والأمراض وكده بنستخدم حكاية القفل والمفتاح دي في العلاج , أيون ( داوني بالتي كانت هي الداءُ ) , نقوم نصنع دوا يكون له نفس التركيب أو نفس الشكل بالظبط زي الشكل بتاع الميكروب ابن الصرمه ده ( ماحنا شوفنا شكله تحت الميكرسكوب ) , يعني في اللحظه دي هيبقى عندنا علبتين كبريت , واحده فيهم هي الميكروب والتانيه هي الدوا , ونحاول نخلي للدوا بتاعنا الأولويه في الوصول للمستقبل اللي هو القفل priority , بس الدوا بتاعنا بيدخل في القفل يسد المكان بدون ما يشتغل كمفتاح( يعني مش بيعشق ) , يعني بيلحقه بس قبل ما الميكروب يوصل , الأدويه اللي بتعتمد على الطريقه دي بنسميها physical mechanism of action . كل اللي فات ده كان استهلاله ( او استهباله تقدر تقول ) عايز اوصل منها لجمله واحده , إن تركيب الميكروب وشكله بنستخدمه كتير جدا في العلاج نفسه ( بنقلّده يعني ) وبما إن كل ميكروب له شكل معين يبقى نقدر نعمل الدوا المماثل له بنفس الشكل . . طيب الجديد بقى ( مش جديد اوي برضه ) ان كل ميكروب زي ماله شكل بيتحكم غالبا في عمليه احداث المرض , وزي ما كل ميكروب له شكل مميز له , فكل ميكروب برضه له مجال مغناطيسي معين , هاله مغناطيسيه , بتبقى برضه مميزه جدا له عن غيره , وبتعمل معاه حاجه اسمها resonance يعني تردد أو تذبذب برضه مميز لكل ميكروب , لو حضرتك قدرت توصل للمجال المغناطيسي المميز لفيروس سي فتقدر تحدد وجوده أو عدمه في جسم المريض ( العينه ) بواسطة مسدس الليزر لما تظبط الترددات مع بعض ....المرهق جدا والصعب في العمليه هو الوصول للمجال المغنطيسي بتاع الفيروس واكيد ده بياخد ابحاث سنين ويا توصل يا ماتوصلش . . واحد هيسألني ويقولي يا كابتن لطيف هو عبد العاطي ولا عبد المعطي ده وصل لتحديد المجال المغناطيسي بتاع الفيروس ؟ هقولك الله اعلم يابني , إحنا كلنا أسباب ....وتبقى صحة كلامه او عدمه مرهونه بالتطبيق والتجربه والوقت ..إنما القاعده العلميه اللي شغال عليها بالصدفه وللأسف للأسف يعني قاعده سلميه ...انا أسف إني جرحت شعور حضرتك وكبرياءك !!. . . بكره بقى نتكلم عن صباع الكفته ( العلاج ) عشان البوست بقى طويل اوي ومحدش اساسا هيقراه وايدي وجعتني

Mohamed Hussein 1 مارس
 المهم يعني انا كنت عارف ان محدش هيقرا البوست اللي فات , والعارف لا يُعرّف , بقى انت عايزني انا اتنازل واقرا بوست علمي لمحمد حسين وهو حيالله صيدلي بيبيع نوفالجين فاصوليا وفوار فواكه و اسيب رأي عالم كبييييييييير جدا زي الدكتور عصام حجي اللي شغال في وكالة ناسا ومستشار الرئيس العلمي ؟ وعايزني أنا أقرا رأي سياسي مخالف لواحد مجهول الهويه اسمه محمد حسين واصدقه واسيب واحد زي البرادعي اللي واخد جايزة نوبل ومن أفضل 10 مفكرين في العالم وبيمبرمبرمبم بم المثل ؟ ده البرادعي كان باقي له يومين وصورته تنزل عالجنيه يا جدعان !!. . إيدي و كتفي وجعوني من الكتابه , هقوم اجيب مرهم فولتارين وادهنها , ب 17 ريال , فداكي يا مصر !!.

Mohamed Hussein 1 مارس
 كان صاحبي أوي , أعز الأصحاب , كنا بنقسم اللقمه والخياره بالنص بينا , كنا بنخمّس في سجارة حشيش واحده , إزازة البيره كان يفتحها وقبل ما يصب لنفسه يصب لي و يحلف عليا ما هيشرب قبلي , كنت بثق فيه اكتر من ابويا وامي . . مره اتصلت بيه وقلت له هات المزه بتاعتك وتعالى نسهر عندي عشان مزتي انا كمان على وصول , مفيش ساعة زمن ولقيته عندي ومعاه مزه جديده , تهبل , تهوس , يوميها بص لي كده وقال لي وانت فين المزه بتاعتك ؟ قلت له اعتذرت عشان عندها مداخله في الجزيره بالليل وانا مارضتشي أعرفك عشان سهرتك انت مش تبوظ يا صاحبي . ساعتها الدمعه نزلت من عنيه وبص للمزه للي معاه وقال لها ( خشي يا بت عند عمك واوعي تقصري رقبتي معاه ) , قلت له لا يا صاحبي ده مش ممكن ابدا , دي مزتك انت ؟ قال لي والله ولا تغلى عليك دانت اخويا الكبير , دي لو في بؤي يا جدع هسيبهالك . يااااااااااااااه على دي أيام , و بعد كل ده باعني , تصدق إنه يبعني ؟ أول ما ضحكو عليه وقالو له خد لك 20 فدان في الصحرا ازرعهم , وبعد 3 سنين هيبقى عندك مزرعه تين ومانجه , كمان خدعوه وقالو له ان طعم التين والمانجه لما بتزرعهم بإيدك بيكون أحلى من البيره والحشيش , ولاد الحرام فرّقو بينا , بيحاروبني ويحاربو مشروعنا الحضاري التنويري التقدمي . . صُبّ لي كاس صُب صُب , بالك انت ؟ أهو انا اعرفك من يومين بس يا زلفي , بس حاسس إن ربنا عوضني بيك خير عن صاحبي اللي خطفوه مني , ( الحريه لصاحبي اللي خطفوه ) !!.

Mohamed Hussein 2 مارس
القنبله الذكيه . صباح الخير - مجرد فكره صغيره جت في بالي , ومش مهم تأويلك ولا تحريفك للفكره اللي هقولها , أصل أنا مش عندي أمراض نفسيه ولا بشوف الدنيا بعين واحده , أهي فكره هقولها و رزقي على الله , جايز تكون مرايا لحضرتك وتشوف فيها نفسك بوضوح , بس ركز معايا والنبي . . - الفكره بتقول ماذا لو ؟ , ماذا لو أن شبكة رصد وموقع الجزيره نشرو تقرير وقالو فيه ( بالله عليك تركز معايا ) , قالو ان الجيش المصري ( السفاح ) قدر يطوّر نوع من القنابل الذكيه الموجهه بالليزر واللي بتعتمد على التقاط ذبذبات معينه للكائنات الحيه , قنابل شديده الذكاء بتحدث حروق هائله في جسم الإنسان ( الهدف ) قبل ما تتسبب في موته , النوع ده من القنابل حديث جدا وغير معروف حتى في أمريكا وروسيا , وبيستخدمه الجيش المصري في قتل المدنيين العزل في سينا , حضرتك هتعمل ايه لما تقرا التقرير ده ؟ هتنشره طبعا على صفحتك و هتصدقه جدا و فورا , السيسي قاتل السيسي سفاح والجيش بيقتل المدنيين وطوّر سلاح في منتهى الخطوره والدقه ويحتاج لتكنولوجيا عاليه جدا . . طب انت راضي عن نفسك كده ؟ مبسوط يعني ومقتنع ؟ مش ده الجيش اللي شككت في فكرة اختراعه لتشخيص أو علاج مرض قال عليه وساعتها قلت انت ده جيش المكرونه والبوتاجازت ازاي يوصل لحاجه زي كده ؟ دي محتاجه معامل زي معامل الجيش الروسي , بس النهارده عندك اعتقاد إن نفس جيش المكرونه والبوتاجازات يقدر يصنع نوع من القنابل ماقدرتشي عليها روسيا وأمريكا !!. . الحكايه ايه باختصار ؟ الحكايه إن فكرة جهاز لتشخيص مرض ( لو صحّت ) هتتحسب لصالح الجيش ( أو السيسي ) وده طبعا ضد مبادئك وتوجهك السياسي , إنما اختراع قنبله لقتل المدنيين العزل هتتحسب على السيسي ( القاتل السفاح ) يعني هتخدم فكرتك واهدافك !!. . الخيانه في مصر بقت وجهة نظر , ومش شرط تكون خاين رسمي ومعاه كارنيه ( الخونه ) وبتقبض تمن خيانتك , إنما يكفي جدا إنك تكون متحفز باستمرار ضد عمود الخيمه اللي باقي عشان بس تثبت صحه فكرتك ورؤيتك السياسيه , وهنا حسن النيه مش بينفع ولا بيشفع , فكرتك بالشكل ده هي في حد ذاتها خيانه ................. وفي رأيي الشخصي أصعب حاجه مرينا بيها بعد 25 يناير هي اننا نوصل لليوم اللي فيه بنلاقي سؤال بيتردد بالشكل ده ( هل أنت مع أو ضد الجيش المصري ؟ ) , السؤال في حد ذاته كارثه حقيقيه . . في لحظات معينه بتمنى فيها إن السيسي مايترشحش للرئاسه , عشان بس تنتهي مهزلة ( إهانة الجيش المصري بدعوى معارضة السيسي ) .

Mohamed Hussein 2 مارس
 اللي عالشط عوّام . أهي دروس وبنتعلمها , ناس كتير كنا بنشوفهم وهما في المعارضه بيتكلمو , نقول بس دول هيكسرو الدنيا ويزنزنو الزنازين , كلام كبير أوي بقى عن محاربة الفساد و مصر غنيه بثراوتها و.... و... و.... , و أول ما يبقى مسئول أو يدخل الوزاره تلاقي الكلام اتغير , واحنا هنجيب لكو منين والموضوع محتاج صبر وانتو بتضغطو علينا جامد , يطلع من الوزاره تلاقيه رجع لقواعده في المعارضه سالما وبيردد نفس الشعارات الحنجوريه الكبيره , كتير نماذج بالشكل ده , عصام شرف , كمال ابو عيطه حسام عيسى . . و تقعد يا جدع قدام التلفزيون تلاقي راجل ببدله وكرافته وكُبّاره كده , المذيعه تسأله ( ماهي حقيقة الأزمه الإقتصاديه في مصر ؟ ) , لو لقيت الضيف بيقول ازمه مفتعله اعرف انه مش في الحكومه , هيقولك بقى ان عندنا الصناديق الخاصه فيها دشليون دولار , وعندنا موارد ضخمه غير مستغله , ولو عملنا كذا هنجيب كمان دشليون ولو حطينا كذا في كذا هنجيب دشليونين , وهكذا . صاحبك ده لو دخل الحكومه هتلاقيه ركّب الوش الخشب , هو هو بشحمه ولحمه بس تقريبا بيركب قطر البيروقراطيه والتخلف وتلاقيه خايف يوقع على أي ورقه أو أي مشروع من اللي كان بيقول عليهم ويقولك ياعم وانا مالي ... . هي دي الحقيقه في مصر , اللي عالشط دايما عوّام , وفيه فجوه كبيره جدا ما بين أحلام المعارضه و تنفيذ وبيروقراطية الحكومه حتى لو كانو هما هما نفس الشخص !!.

Mohamed Hussein 2 مارس
· تم التعديل صياد سمك . ساعات كتير بحلم إني أسيب الجمل بما حمل واشتغل صياد سمك , اصطاد في النيل مش البحر , بخاف من موج البحر العالي , أنزل مصر واشتري مركب صيد صغيره واتعلم مع صياد لمدة كام شهر كده ( تدريب ) , تمن المركب مقدور عليه . . النيل والمركب مش هيبقى فيهم فيس بوك ولا سياسه ولا مناهده و وجع قلب , و رزقك هيطلع من المايه , هيقل أو يزيد حسب المكان والوقت و الموسم , يعني معركه شريفه جدا بينك وبين النيل و عوامل الطبيعه , لا انت في يوم هتسبّ للنيل والظروف الجويه عشان رجعت بسمكه واحده ( وقتها هتفتكر إن خيره عليك سابق وخيره جاي ) , ولا النيل هيبغتت فيك ويقطّم فيك عشان بعت لك في يوم 50 كيلو , معركه قايمه على الإحترام المتبادل . . معركه بيحكمها شوية خبره واجتهاد و رضا برزق ربنا مش معركة لسان وبؤ وحنجره , شكل السمك وهو لسه طالع في الشبكه صابح وجميل يشد العين , المايه صافيه والسمك واضح وصريح مش متخفي ولا متنكّر , يعني مش هتلاقي سمكه عامله نفسها عصفوره ولا سمكه مستموته وبتقولك دانا فُرشة شعر . . ترجع بيتك بقى وتبيع الرزق اللي ربنا بعته , وتنام بعد ما تصلي العشا , رزقك مش هيتأثر بانهيار البورصات العالميه ولا هيزيد مع التعديل الوزاري الجديد ... , وهييجي اليوم اللي الناس يسألوك فيه : إنت عمرك بقى 90 سنه ولسه صالب طولك وعودك ليه ؟ مممممممممممم اسألو النيل والسمك و السما الصافيه !!.

Mohamed Hussein 2 مارس
 · تم التعديل صياد سمك . ساعات كتير بحلم إني أسيب الجمل بما حمل واشتغل صياد سمك , اصطاد في النيل مش البحر , بخاف من موج البحر العالي , أنزل مصر واشتري مركب صيد صغيره واتعلم مع صياد لمدة كام شهر كده ( تدريب ) , تمن المركب مقدور عليه . . النيل والمركب مش هيبقى فيهم فيس بوك ولا سياسه ولا مناهده و وجع قلب , و رزقك هيطلع من المايه , هيقل أو يزيد حسب المكان والوقت و الموسم , يعني معركه شريفه جدا بينك وبين النيل و عوامل الطبيعه , لا انت في يوم هتسبّ للنيل والظروف الجويه عشان رجعت بسمكه واحده ( وقتها هتفتكر إن خيره عليك سابق وخيره جاي ) , ولا النيل هيبغتت فيك ويقطّم فيك عشان بعت لك في يوم 50 كيلو , معركه قايمه على الإحترام المتبادل . . معركه بيحكمها شوية خبره واجتهاد و رضا برزق ربنا مش معركة لسان وبؤ وحنجره , شكل السمك وهو لسه طالع في الشبكه صابح وجميل يشد العين , المايه صافيه والسمك واضح وصريح مش متخفي ولا متنكّر , يعني مش هتلاقي سمكه عامله نفسها عصفوره ولا سمكه مستموته وبتقولك دانا فُرشة شعر . . ترجع بيتك بقى وتبيع الرزق اللي ربنا بعته , وتنام بعد ما تصلي العشا , رزقك مش هيتأثر بانهيار البورصات العالميه ولا هيزيد مع التعديل الوزاري الجديد ... , وهييجي اليوم اللي الناس يسألوك فيه : إنت عمرك بقى 90 سنه ولسه صالب طولك وعودك ليه ؟ مممممممممممم اسألو النيل والسمك و السما الصافيه !!.

Mohamed Hussein 2 مارس
بوستين بيختصرو المشهد . الإنكار مش هيفيدك , يابني اعترف بقى , عاجبك كده ؟ أديني كنت رايح اصطاد سمك وانت رجعتني من نص الطريق بسبب استفزازك ده . البوست الأولاني منشور على صفحات الإخوان : . بيقولك يا سيدي نفسي أعيش في دوله يرأسها مرسي ونائب له أردوغان ورئيس وزرائها اسماعيل هنيه وجيشها ده اللي هو ميليشيات حماس وحزب الله اللي بيبقو لابسين بتاعه خضره في دماغهم , وتكون في أرض فلسطين ............ كده خلص البوست أو الحلم ( الصوره في أول تعليق ) , بس انا ممكن اتبرع يعني واكمل تشكيل الحكومه , موزه هتمسك وزارة الأعلام , وعلاء صادق لازم يمسك حاجه , ماهو مابيعرفشي يقعد كده من غير ما يمسك حاجه , وائل قنديل هو كمان لازم يمسك هو ومحسوب ... وبكده تكتمل أركان الدوله. . وبعد ما كتبت الألشه أقولك الخيبه بقى , لا مش الخيبه ان مرسي يبقى رئيس على أردوغان في حلم الإخوانجي , دي مش تهمني , يتحرقو بجاز هما الإتنين , الخيبه بتكمن في السؤال ده اللي ممكن تسأله لصاحبك الإخوانجي , لو ربنا أردا واتحقق لك الحلم ده أول حاجه هتعملوها ايه ؟ هيقولك هنحارب ...طب هتحاربو مين يا أخي الكريم ؟ ممممممم لا مش اسرائيل , طلعت أوت دي , احنا هنحارب جيش مصر وبعد كده نحارب السعوديه والإمارات وبعدين نحارب فنزويلا وكوريا و هكذا وبعدين لو لقينا وقت بقى نبقى نحارب اسرائيل . . الخيبه باختصار لو عندك جوز عيون وبتشوف هتشوف البوست بالشكل ده , إن حلم الإخوان في كسر شوكة الجيش المصري بدأ يتلاشى , حلمهم في شق الصفوف في الجيش بدأ يتلاشى , وده طبعا بسبب الأداء الرائع لوزارة الري ووزيرها اللي مش عارف اسمه بالتعاون مع الهيئه القوميه للبريد !! , وبالتالي البديل في الحلم هو تجميع صفوفهم في دوله حدوديه مع مصر , ويبدأو الإنتقام , بس محتاجين دوله تقيله زي تركيا عشان هما عارفين إن العيال بتوعهم أخرهم يعملو معسكرات كشافه وعرض عسكري في جامعه الأزهر , مممممممممممممم لسه عايز مصالحه يا صاحبي ؟!. . البوست التاني منشور على صفحة ناس ممممممم مش إخوان بس بيحترموهم ( الصوره في التعليق التاني ) !!. بيقول شعار ( بكره الثوره تهز الكون ..ترعب كل جنود فرعون ) , وبس خلاص , جنود فرعون اللي هما جيش مصر وحماده عايز يعمل ثوره يرعب بيها جيش مصر !!. .................. .................. وهي دي الحكايه باختصار , انا مش بجيب حاجه من عندي والله , شريحه خاينه والخيانه واصله حتى لأحلامهم ......... والشريحه التانيه هي شريحة الحمير اللي صوتهم عالي( وإن أنكر الأصواتِ لصوتُ الحمير ) !!.

Mohamed Hussein 2 مارس   

ثقافة الهااااااااااااااح . بالمناسبه مش ذنب السيسي إن أحمد رجب بتفرط منه أحيانا كتير وناقص يقول ( هات بوسه مشبك يا سيسي عشان اعرف أنام ) , ومش ذنبه إن مصطفى بكرى متعود يصدرها لأي حاكم بيقدرها , عملها قبل كده مع مبارك ايام 25 يناير ومع طنطاوي ومرسي ودلوأتي مع السيسي , وكل مره بيصدرها بنفس الحماس !!. . ومش ذنبه إن أحمد موسى متربي على ثقافة الهااااااااح , وإن عبد المعطي اتهطل وقالك عرضو عليا 2 مليار دولار والجيش حماني ( العين صابتني ورب العرش نجاني ) . . دي يا محترم ثقافة شريحه معينه من الشعب , بتعشق صناعة الفرعون , حاسبو الصانع مش المصنوع , ماهي مصر فيها ستات الواحده منهم لما بتحب تمدح عريس بنتها اللي جه مش بتقول محترم وابن ناس وبتسكت , لأ , هتلاقيها بتقول وغني اوي ومثقف جدا وحافظ كتاب الله وكل المعلقات بتاعة الشعر الجاهلي وشاطر في الفلك والكيميا والطب وبيعوم في البحر والبر والجو كمان !! . . ولو البرادعي ولا حمدين ولا حتى المعلم عكوه الجزار بقى رئيس مصر هتطلع له شريحه مماثله تماما وغالبا من ضمنها مصطفى بكرى واحمد رجب ., برضه مش هيبقى ذنب البرادعي ولا المعلم عكوه . . أصدقائي الأعزاء يا ريت في نقدهم لمواقف التطبيل والتعريض يصوّبو سهامهم صح عشان مايصيبوش الهدف الخطأ , اجلدو الصانع مش المصنوع , ومتقوليش البرادعي مكانشي هيوافق عالتطبيل ده , هو انت يعني عرفت ان السيسي موافق ؟ شوفته بعينك بعد ما شاف كاريكاتير احمد رجب قامت حصلت له إثاره جنسيه ؟ . . باختصار : لو حضرتك شوفت واحده ست غاويه تقلع ملط وتنزل تنام في الشارع بلاش وقتها تصب جم غضبك على الشارع , وتقول انه شارع مش متربي !!.

Mohamed Hussein 2 مارس

 فولكلور مصري . و بعد كل أزمه طائفيه في مصر يطلع شيخ كبير وقسيس كبير ويحضنوا بعض ( كداهو ) قدام الكاميرا , وصافي يا لبن حليب يا إنجوي . . ممكن نستحضر نفس مكنون التجربه الفاشله دي في الخناقه اللي كانت بين عساكر جيش وعساكر شرطه النهارده , يطلع ظابط جيش وظابط شرطه يحضنو بعض ( كداهو برضه ) ويا دار ما دخلك كهربا ........... ممممممممم عندما تتجلّى الوحده الوطنيه في أبشع صورها !!. . البلد دي مابقاش فيها كبير نعرف نرد عليه يا جدعان ... إخلص يا سيسي انت وحمدين , إخلصو البلد مش مستحمله , وانتو لسه بتتعازمو على بعض , واحد فيكو يدخل ويشيل الليله قبل ما ننام ونصحى نلاقي كل اتنين في مصر حاضنين بعض ( كداهو ) .

Mohamed Hussein 2 مارس

 إنجليزي لبلب . بعد غربه 12 سنه وخبره ( معقوله ) في التعامل مع جنسيات كتير منها المصري والعربي والأوروبي والأمريكي ... أقدر أقول باختصار : . إن عالمنا العربي فيه ناس كويسين اوي وفيه حمير , وأوروبا كمان فيها ناس كويسين و ناس حمير اوي , بس الفرق الوحيد بينا هو إن الحمار العربي لما بيسافر أوروبا بيشتغل حمار أوي , وإن الحمار أوي الأوروبي لما بييجي عندنا بيشتغل مدير عام !!. . و هنروح بعيد ليه ؟ ليا واحد صاحبي شغال مهندس في شركة مقاولات كبيره , صاحب الشركه بعت جاب محامي كندي يمسك شركة المقاولات , المحامي فشل بس قعد سنتين يحشّ في فلوس الشركه كأنها تكية أبوه الخواجه , صاحب الشركه ماكدبشي خبر , مشّاه و جاب محاسب استرالي , المحاسب لهف شويه من فلوس الشركه وخربها شويه ومشي , صاحب الشركه قال مابدهاش بقى بعت وجاب طبيب عيون ألماني يمسك الشركه وفي الأخر مشاه برضه , ودلوأتي صاحبي بيقولي إنهم شغالين بمدير عام نجار نابوليا بس بريطاني ... وكل يوم يا مؤمن المدير الجديد يبعت لهم في الشغل إيميلات عن ال ديفيلوبمينت و الريسيرش .... إديني شوية ديفولوبمنت هنا والنبي يا زلفي . . كل ده ليه بقى ؟ أصلك مش فاهم , العيل من دول بيبقى عمره 12 سنه في انجلترا وبيتكلم انجليزي لبلب , أه والله , وبيشيل الشنطه الهاندباج على ضهره كداهو , مش بيشيلها في إيده يعني زينا ... يبقى لما يكبر يشتغل مدير عام ولا مش مدير عام يا متعلمين يا بتوع المدارس ؟ . يا قوم , يا بشر , علّمو أولادكم الإنجليزي اللبلب وشيل الشنطه عالضهر و مرنوهم عالكلمتين دول ( ديفيلوبمنت و ريسيرش ) وانتو تاكلو من وراهم الشهد !!.

Mohamed Hussein 3 مارس

 مفرقعات . صباح الخير - أمريكا وروسيا بدأو يلعبو سياسه عالمكشوف , خوفك من اللي بيحصل بره حدودك مش مبرر أبدا إنك تغمّي عنيك , بالمناسبه هي دي روسيا اللي لما زارها السيسي خرجو أصحابنا جهابزة الرأي والفكر الحر يقللو من أهمية الزياره فقالو روسيا أصلا مش لاقيه تاكل !!. . ما علينا , بعد الربيع العربي حست أمريكا إن دي فرصتها وده الوقت المناسب لتنفيذ مخططها الصهيوني في خراب الدول العربيه , وضع على الأرض ولا أحلى ولا أنسب , إنفلات أمني وناس بتقطع هدوم بعض , طب بالذمه فيه فرصه أحلى من كده ؟ و بس يا سيدي وبدأت أمريكا في تسليح ( س ) هنا و ( ص ) هناك و ( ع ) جاهز بسلاحه الأمريكي برضه , ماهو إحنا الأمريكان اللي بنبيع لكو السلاح عشان تقتلو بعض واحنا برضه بتوع حقوق الإنسان اللي هنبيع لكو الشاش والقطن والمكركروم عشان نداوي جروحكو أصلكو بتصعبو علينا واحنا قلبنا رهيف مش بيستحمل , عايز شعارات عن الديموقراطيه هتلاقي عندنا , عايز حقوق انسان عندنا , والسلاح عندنا , والخمره عندنا واللي بيحب ربنا ييجي يقيم دولة الخلافه الإسلاميه عندنا !!. . روسيا كمان لقت فيه طرف في كل دوله مغضوب عليه من أمريكا قالت بس , فرصتي بقى ارجع لأمجاد زمان , و انا كمان عندي سلاح وشعارات و فلايات , وبالنسبه للي كان بيشرب سجاره في البلكونه ومش عارف إيه اللي حصل دلوأتي ؟ اللي حصل يا كابتن إن روسيا دخلت أوكرانيا وأمريكا قالت لها اطلعي يا بت يا روسيا من أوكرانيا , قامت البت روسيا قالت لها لما تطلعي انتي من سوريا الأول يا ختي , يعني سيب وانا اسيب , وانتي يا بت يا روسيا بتمارسي العنف في أوكرانيا , يعني انتي ياختي اللي كنتي بتبيعي ورد في العراق , ممممممم كفانا الله شر خناقه بين اتنين عوالم !!. . هه بقى , حد لسه عايز ديموقراطيه ؟ حد لسه ماخدشي ديموقراطيه ؟ الأستاذ اللي ورا حضرتك خدت كويس ؟ متأكد ؟.

Mohamed Hussein 3 مارس

 غلطه بجون يا عم ابراهيم . إمبارح اتفرجت بالصدفه على جزء من برنامج 25/30 , ابراهيم عيسى مستضيف اسامه الغزالي حرب اللي تم استبعاده من الترشح لوزارة الثقافه . . المهم الضيف قاعد يتكلم عن فكرته لو كان مسك الوزاره , وإن المنتج المصري الوحيد اللي بنعرف نصدره كويس هو الثقافه , كلام زي الفل , وانه كان نفسه يعمل مشروع ثقافي تنويري حقيقي للشباب , وبعدين فجأه كده قال أسامه الغزالي حرب ( المفروض مشروعنا الثقافي ده يتم فورا , يعني بمجرد انتهاء انتخابات الرئاسه يتبنّى الفريق السيسي المشروع ده !! ) . . إبراهيم عيسى انتبه للجمله وقال للغزالي : قصدك المشير السيسي !!. . وانا بقى هلكت على روحي من الضحك , ههههههههههههه يعني هي المشكله يا عم ابراهيم هو فريق ولا مشير ؟ مش واخد بالك إن الضيف حسم انتخابات الرئاسه من قبل ما تبدأ أصلا ؟ , يا مرارك يا حمدين يا صباحي , يا مُرِّك يا مهجه .............. يا رزقك الواسع يا عم باسم !!.

Mohamed Hussein 3 مارس

 من النهارده أنا الحكومه ............ رساله رقم 1 لابراهيم محلب . هتخيل ياعم ابراهيم اني مسكت الحكومه الجديده بدالك , و قلت أول مشروع هعمله هو ( نظافة القاهره ) , المطلوب مني انا إيه كرئيس وزراء لمصر في الوقت ده تحديدا ؟ ... أنا أقولك : . 1- هجيب مستشارين ونعمل دراسة جدوى ونشوف الدراسات القديمه في خلال اسبوع . 2- هنوصل لأفضل دراسه واطلع في مؤتمر صحفي أعلن الخبر على الناس بكلام محدد وصريح وواضح , بالأرقام والتواريخ , المشروع هيتكلف كذا في السنه و هنجيب الفلوس من كذا , و هنبدأ فيه خلال شهر وهينتهي خلال سنتين قابلين للتجديد مثلا. . 3- طب أنا كنت فكرت في العماله اللي هتشتغل في المشروع ده , قلت عندنا شباب كتير جدا عاطل عن العمل وقاعد عالقهاوي , تعليمهم متوسط ودون المتوسط , لكن لو قلت لهم تعالو اشتغلو في شركة نضافه وخدو ألف جنيه في الشهر هيستعيبو , دي ثقافة شعب وعلى بال ما نغيرها محتاجين سنين , وانا مش هينفع اسيب القاهره بالشكل ده سنين . . طب الحل ايه ؟ الحل إني أجيب عمال من بنجلاديش مثلا , العامل هياخد برضه ما يوازي ألف جنيه ( وهيغسلو عربيات الناس بعد الضهر كالعاده ) , يعني 10 ألاف عامل بنغالي هيكفو القاهره كلها , وألف عربيه كبيره من اللي بيبقى فيهم مكبس من ورا , وبعد الإعلان عن تفاصيل المشروع من غير زواق ولا بيع للوهم نبدأ نشتغل . . طب فين المشكله بقى ؟ أنا أقولك يا عم ابراهيم , مصر فيها شريحه معينه كده اسمها شريحة ( خُلقنا لنعترض ) , لو قلت لهم هجيب عمال نضافه بنغاليين هيقولو ( شوفو الحكومه بنت الحرام , جايبه عمال من بره واحنا شبابنا عاطل ومش لاقي شغل ) , ولو قلت لهم هنجيب عمال نضافه مصريين هيقولو ( شوف الحكومه بنت الحرام , عايزه شبابنا يشتغلو زبالين , هو ده المستقبل المشرق اللي مستنيكي يا مصر ؟ و كأن ثوره لم تقم ) , . ولو قلت إن الدراسه دي اشرف عليها فلان وعلان وترتان هيقولو ( أهو ترتان ده بقى كانت له خاله الله يرحمها بتشرب معسّل والعياذ بالله , إنتو عايزين تعملو مشاريع لمصر بناء على دراسه أعدها واحد خالته كانت بتشرب معسل ؟ ) . يبقى ايه الحل ؟ الحل اني هعلن عن تفاصيل المشروع بعماله بنغاليه ( مؤقتا ) و هقفل صفحتي عالفيس واسيب بتوع خُلقنا لنعترض يهرو مع بعض ويعيشو حياتهم .

Mohamed Hussein 3 مارس
 بلد بتاعة أرنوبات صحيح . في مدرسة بنتي واحده ست كده عريضة المنكعين بيسموها ( بوليس تيتشر ) , دي بقى مسئوله عن أمن المدرسه و الأمن الغذائي وأمن وسلامة المواطن , و بتلطّش للعيال في الطالعه والنازله , ملامحها الحاده ونظرتها الغريبه بتقول إنها بوليس تيتشر فعلا , صوتها الجهوري وزعيقها عالفاضيه والمليانه بيقول إنها وارثه الشغلانه دي أبا عن جدا زي نجارين النابوليا والقضاه , فيها شبه كبير من الستات اللي بيطلعو في دور السجّانه في أفلامنا العربي , في مره كده كنت عايز أكرمش عشرين ريال واحطهم في إيدها عشان أدخل أجيب بنتي قبل الجرس ما يضرب !! . . وانا قاعد بقى بتفرج على التلفزيون , شوفت الإعلان بتاع كوكاكولا , نانسي عجرم وأدب نانجسي عجرم , لبنان و مقررات لبنان , نانسي بتلاعب الصودا بأرنوبة أنفها فشر أبو تريكه , معرفشي ليه في اللحظه دي اتخيلت إن نانسي هي اللي بتشتغل ( بوليس تيتشر ) في مدرسة بنتي مكان الشاويش عطيات الباكستانيه دي , مممممممممممم حقه ؟ ده يبقى النهارده عيد العمال , ...............عندما يصبح التعليم كالماء والهواء . . بالك انت الإعلان بتاع كوكاكولا ده اللي نانسي مش بتقول فيه ولا كلمه ؟ هتلاقيها واخده أقل حاجه في الإعلان ده 7 ألاف جنيه , طب مانا كنت مستعد أعمله ب 5 ألاف بس , أنا كمان عندي مناخير ولها أرنوبه ( بلد بتاعة أرنوبات صحيح ) , ومش هكلف شركة كوكاكولا ولا ساغ , هعمل لهم الإعلان مجاني وهاخد ال 5 ألاف من شركة بيبسي !!.

Mohamed Hussein 3 مارس
 · صالة جيم ربّاني . . واحنا عيال صغيرين في البلد , من سن 7 سنين فما فوق كده كنا نطلع من صباحية ربنا وسط الأراضي والغيطان , مفيش يوم يعدّي علينا من غير ما نكون طلعنا على شجره واتنين و تلاته , بنتعلّق في فروعها زي القرود ونطلع لأخر جزء فيها , كانت هوايه , وحبذا بقى لو كانت الشجره مثمره وفيه هدف كمان target , يعني هنطلع ونتشألب ونوصل بقى لحبايتين جوافه أو برتقانتين ولا شوية توت من اللي قلبك يحبهم , واضرب يا معلم , لا غسيل ولا يحزنون ولا ديتول جيل , الفاكهه كان بيبقى طعمها ماحصلش وخصوصا انها مسروقه !!. . وبعد ما نطلع ونتشألب وناكل نكمل اليوم تمشيه عالترع والمصارف , الواحد لو كان عنده عدّاد في كعب رجليه يتهيألي كان يقفّل العداد على سن 12 سنه , في اليوم الواحد و من غير ما تحس تلاقي نفسك مشيت بتاع 10 كيلو , والشمس تلفحك لحد ما تحمص و تنشف. مش صحيح ان الأطفال في الريف محرومين من ممارسة الرياضه , ده فيه عندهم صالة جيم رباني , ومش شرط يعني بابي يكون دفع لنا 120 ألف جنيه اشتراك في نادي الرحاب , سيبك انت من العيال بتوع الأمينو أسيدز دول ....بيبقو منظر عالفاضي , مش وتد يعني , بلاستيك يا مولانا بالاستيك !!. .

Mohamed Hussein 4 مارس
 لازم نريّح الزبون . - في شغلتنا هنا بيورد عليك من كل شكل ولون , في الأول بتاخد الأمور على أعصابك وبتبقى مشدود كده , ولما مش بنلاقي فايده وبنبقى تعبنا بنتّبع سياسة ( لازم تريّح الزبون ) يعني مثلا : . 1- كتير من الشباب بييجي وهو ضارب حشيش وكبتاجون ( حبوب مخدره ) وعنده تحليل وظيفه أو تحليل دوري في الشغل ولو اكتشفو الحكايه جايز يترفد , وبعد ما شوفت بتاع 100 قول ألف شاب بالشكل ده أقدر أقول إن مفيش واحد منهم دخل وقال ( أنا بتعاطى كذا وكذا وعندي تحليل ) , لأ , كل واحد بيدخل يقول ( صاحبي بيتعاطى وعنده تحليل أو خويي بيتعاطى وعنده تحليل ) , فيهم اللي بيبقى لسه جاي جديد ومكسوف شويتين و واقف على جنب ومش عايز يتكلم , بقيت أنا بقى أختصر واتكلم بالنيابه عنه واقول له ( خويك بيتعاطى حشيش وعنده تحليل ؟ ) , لا والله للأسف ماعنديش حل له !!. . 2- في السؤال على أقراص Cytotec اللي ممنوعه طبعا وبيستخدموها في الإجهاض بيدخل الواحد من دول ويقول حاجتين اتنين ( كلهم بيشتركو فيها ) , يقولك واحد صاحبي و زوجته حامل ( مايقولشي أنا ولا المزه بتاعتي ) , ولما يسأل على الدوا يقول : عندك Cytotec بتاع الحموضه ؟ ...برضه بعد فتره بقيت أمشي بطريقة ( عنك انت , خليها عليا أنا الطلعه دي ) , حضرتك عايز أقراص سيتوتيك بتاعة الحموضه صح ؟ وزوجة صاحبك حامل وعايزه تنزل البيبي أصلها تعبانه ومش حمل ولاده صح ؟ ........مممممممممم للأسف والله ماعنديش . . 3-ويبدو إننا لازم نريح الزبون في كل حاجه , والزبون ده أحيانا ممكن يكون صيدلي أو طبيب أو استاذ جامعه أو محلل سياسي واسترا...تيجي, لكن يحلو للبعض ترديد الشعارات , يعني مثلا مثلا معروف إن أمريكا عامله مراكز حقوق الإنسان زي ( ميضه ) كده تغسل فيها إديها من دم شعوب العالم التالت , لكن لسه فيه ناس شايفه الميضه بس و مش شايفه الدم , وتقولك ( شوفت أمريكا وهي بتتوضى ؟ ) مممممممم أومال , دانا كمان سامع أوباما بيقول ( اللهم يسر ولا تعسر ..اللهم جيف مي ماي بوك باي ماي رايت نوت ماي ليفت ) . . و أكيد ما تكون حضرتك سمعت عن مافيا صناعة الدواء في العالم ؟ وميزانيات شركات الأدويه الضخمه ( اللي بتعادل ميزانية دوله ) , و دور شركات الأدويه في تأجيج الصراعات والحروب وفي نشر الأمراض والفيروسات أحيانا , إنما مش هتلاقي شركة أدويه منهم إلا ولها حتة نشاط اجتماعي أو انساني كده ( بطريقة هنبني هنا جامع , حاجه لله كده على رأي عادل إمام في مرجان أحمد مرجان ) , يعني تسمع عن الشركه الفلانيه بترعى الأطفال في تنزانيا , ترعى المعاقين في مالاوي , ترعى الغنم في السنبلاوين , و صوّر يابني بقى , صورني وانا ببوس الواد ده من بؤه , عاش رشدي الخيام نصير العريانين , ولما تلاقي صاحبك الصيدلي مركّز على صورة رشدي الخيام وهو شايل الواد ( راعي المبلولين ) يبقى مش توجع قلبك معاه , وقول له أومال ايه ؟ أومال أه , ده رشدي الخيام ده رمز للصمود والتحدى والإنسانيه , يا سلام عالحنيه , يا سلام عالإنسانيه ( مشهد من فيلم الزوجه التانيه )!!.

Mohamed Hussein 4 مارس
وصلنا لمرحلة من التحفُّز ماحصلتش قبل كده , يتهيألي أنا لو كتبت على صفحتي هنا إن عندي زكام و بقول ( هااااااااااتسي ) , التعليقات لن تخلو من واحد هيقول ( أه قصدك هات سي يعني اختصار ل هات سي سي , ده بعينكو يا عبيد البياده ) , مممممممممم يا أخي طب قول يرحمكم الله الأول ؟ ......... و لو كتبت اننا برغم كل شئ عايشين مستورين وحامدين ربنا هتقولي قصدك حامدين صبّاحي مش كده ؟!!.

Mohamed Hussein 4 مارس
خبر عاجل تناقلته وسائل الإعلام العربيه والعالميه : الرئيس المصري عبد الفتاح السيسي يعلن بنفسه خبر ترشحه لانتخابات الرئاسه في مصر !! . . طب وعلى إيه التكلفه دي ؟ فرح ومعازيم وزفه وتورته وجاتوهات وساندوتشات بسطرمه وانتخابات وقضاه ومراكز حقوق الإنسان و نشطاء و كارتر وفي النهايه مش هتعجبو المعازيم ( النشطاء و مراكز حقوق الإنسان وكارتر ) وهيطلعو القطط الفطسانه في الفرح ( الجاتوه مكانشي طازه والبسطرمه مش حلوه ) وفي العريس ( سنانه صفرا ونصه التحتاني أطول من نصه الفوقاني ) وخالد على هياخد حتتين جاتوه وساندوتش بسطرمه وهيقول ماخدتش . . مممممممممم أنا رأيي العريس ياخد عروسته ويروّحو في نور ربنا قبل الدنيا ما تليل , ولا كوافير ولا ستوديو ولا حفله ولا يحزنون , و بتكلفة الحفله دي يدبحو عجلين ويوزعو لحمتهم عالغلابه هما أولى !!.

Mohamed Hussein 4 مارس
 · تم التعديل حماس بقالها فتره كده مش عاجباني يا أم حماس , نازله تطاول واهانه في مصر و جيش مصر , وكل شويه تجيب العيال المقاطيع بتوعها دول والعربيتين النص نقل اللي حيلتها وقال بيعملو عرض عسكري وكداهون , يامّي يامّي , خاف ياد يا عيد . الفار قال للأسد : صدقني أنا ممكن أبهدلك , إنت مش عارف إنت بتكلم مين ؟ مش عارف انا ابن مين ؟ . ...............والنهارده المحكمه حظرت نشاط حماس و مقرّاتها داخل مصر . يعني الأسد قال للفار : لا ... عارف انت مين وابن مين ؟ , أبوك ذات نفسه حابسينه عندنا في البلاعه , و غور ياض من هنا بقى يلعن أبوك لأبو اللي جابك .

Mohamed Hussein 4 مارس
و على سبيل الهزار . من يومين كده قايست وعصرت على نفسي شوال لمون ونزّلت صوري عالصفحه , ومن ساعتها بدأ أصحابي ينزلو صورهم تباعاً , تقريبا كل واحد منهم لما كان بيشوف صورتي يقول ( الحمد لله أنا مش الأخير ) ويفرح بقى و يتشجع أوي و يقوم منزّل صورته ....ممممممم ربنا يسعدكو دايما يا أصحابي . . على عكس كل البشريه تقريبا , رقم الحظ بتاعي هو 13 , مولود يوم 13 بس في شهر 4 , ولو كان فيه شهر في السنه رقمه 13 كنت أكيد اتولدت يوم 13 /13 .... أبويا الله يرحمه كان يقدر يسجلني في أي يوم تاني , أياميها مكانشي فيه تقارير ولاده بتطلع من المستشفى وفيها تاريخ الولاده باليوم والساعه , مستشفى إيه ؟ دي أم عبده الدايه هي اللي مولّداني , ودي مش بتعرف تقرا وتكتب ولا عندها دفتر تقارير ولا قلم ماركر ولا نضارة قرايه , و كانت الناس بتسجل مواليدها بعدها بيوم أو اسبوع أو حتى 6 شهور , إنما الحاج الله يرحمه قال أبدا , لازم اسجله في اليوم اللي اتولد فيه ( 13 ) , يعني حبكت يا حاج ؟ , تقريبا كان خايف عليا من الحسد فقال حلو الرقم 13 ده , تقولشي مخلف أبو زيد الهلالي ...طب يابه طالما كنت خايف عليا لاتحسد ماكنت تسميني شحته ولا خيشه بالمره ؟! . نهايته , من كام شهر كده بدأت أكتب في موقع الكتروني كبير , نسبة المشاهدات فيه كانت بتوصل ل 10 ألاف في المقال الواحد , ومن شهرين تقريبا الموقع اتحجب في السعوديه ( عشان سياسته التحريريه ضد سياسة الحكومه هنا ) , فبقى أي مواطن على سطح كوكب الأرض يشوف المقال بتاعي ما عدا أنا !! , وبعدها بشهرين الموقع أعلن إفلاسه لعدم وجود رعاه لنفس السبب برضه ( الرعاه اللي عرضو خدماتهم سياستهم مختلفه تماما ) ....... مش قلت لكو رقم الحظ بتاعي 13 ؟ , يابه كنت كمّل جميلك و سميني شحته أو خيشه ؟ أقولك كنت سميني شحته والدلع خيشه !!.

Mohamed Hussein 5 مارس
كان معايا حق . صباح الخير يا بشر - كان معايا حق لما قلت إن الفضيحه الحقيقيه هي تصريحات عصام حجي نفسه وإن العالم الخارجي هيتسلى علينا وأول حاجه هيستشهد بيها هي تصريحات السيد العالم مستشار رئيس الجمهوريه , وقد كان !!. . - كان معايا حق لما قلت إن مصر بعد استقالة البرادعي من منصب نائب الرئيس هتاكل حلبه على إيد كل من هب ودب بره , وإن السبب الأساسي مش هيكون فض الإعتصام في حد ذاته ولكن استقالة البرادعي تكفي........... وقد كان !!. . - حضرتك عايز كلام جميل ومتزوّق , عندي والله , و عندي أمل كبير شايله في الدولاب على رأي عم جلال , إنما لو عايز الحق هقولك . . - إيمانك بفكره الأمانه العلميه والمبادئ والقيم الإنسانيه شئ جميل أوي , بس مش دي الحقيقه اللي انت مصدعنا بيها , الحقيقه إنك زهقت بسرعه من إيمانك بفكره مجرده مش محسوسه , وقررت إنك تعمل تجسيد للفكره في شخص , بعد كده بتتلاشى الفكره نفسها و بتختفي و بيفضل عندك الشخص نفسه اللي بيتحول إيمانك بيه إلى إيمان مطلق , يعني بينتهي دور المبدأ والفكره و بتبقى عامله زي قشرة البيضه المسلوقه اللي دورها انتهى بمجرد سلق البيضه !! . . - الأمانه العلميه لا تسمح لعصام حجي إنه يطلع يهبّل بالشكل ده , يعني مش يعالج الهبل بتاع عبد العاطي بهبل أنيل منه , وبصفته شخص مسئول في الدوله كان يقدر يعالج المشكله بطريقه تحفظ لمصر احترامها وقلت الطريقه قبل كده , لكن مولانا قرر إن أمانته العلميه اللي بتنقط في كل مكان أهم من مصر و طلع و جعجع , وبالمناسبه تشبيهي كان سليم , لأني ماشوفتش أمانة عصام حجي في الهبل والوهم اللي بيبيعه عادل عبد العال وسعيد حساسين , لاحظ إنهم بيبيعو منتجات فعلا والناس بتاخدها فعلا يعني مش مجرد فكره جايز تكون فاشله , فين أمانتك العلميه يا مولانا وليه ماحاولتش تكلم رئيس الدوله بإصدار أمر فورا بغلق القنوات الفضائيه دي واعتقال عادل عبد العال وحساسين وتقديمهم للمحاكمه ( السؤال كمان لباسم يوسف اللي مستني محاكمه عبد العاطي ) . . - الأخلاق والقيم والمبادئ لا تسمح للبرادعي بالإستقاله في توقيت زي ده وظروف زي دي , وبرضه لسه بنعاني من تداعيات استقالته لحد النهارده , إنما البرادعي شاف إن قيمه و أخلاقه أهم من تبعات الإستقاله على مصر , كان معايا حق لما قلت البرادعي ماقدمشي استقالته يوم ما أمريكا دخلت العراق رغم إن تقريره بيقول مافيهاش اسلحه نوويه , كان احترامه لذاته يستدعي استقالته , وساعتها الإحراج كان هيبقى للأمم المتحده اللي هي الولايات المتحده , مش لبلده .... لماذا لم يتجرأ البرادعي على احراج موقف أمريكا بتقديم الإستقاله ؟! . لو حضرتك انفعلت من البوست ده تبقى بتأكده , لأني بتكلم عن أشخاص مش مبادئ , ماهو احنا عشان شعب ( متدين ) بنعشق تحويل الفكره والمبدأ إلى شخص نعرف نحسّه نلمسه !!. . و يبقى عندي سؤال أخير : هل تموت الأمانه العلميه على سطح كوكب الأرض بموت عصام حجي ؟ وهل تختفي القيم والمبادئ من المجموعه الشمسيه و درب التبّانه بمجرد وفاة البرادعي ؟!!.

Mohamed Hussein 5 مارس
حقيقه علميه . عدد الأصدقاء والفولورز عندي بقو تقريبا أد عدد سكان دولة قطر , الموضوع ده خلاني أتغرّ و بفكر جديا إني أعلن قيام دوله موازيه عالفيس بوك , وطبعا هبقى أنا الأمير عليها , كل حاجه متستفه وزي الفل , مش ناقصني غير ( كرش ) , هحاول أكل كبسه لمدة شهر 3 مرات يوميا ومتحركش من عالسرير لحد ما جسمي يطرشأ من كل حته , وابقى عريض المنكعين شلولخ , يعني باختصار أمير . . أوّل قرار هاخده و أول حاجه هعملها هي إني هخلع أبواب الحمّامات كلها من القصر بتاعي , اه يبقى الحمّام من غير باب , مش أحسن مالبت لوجي بنتي تيجي بعد كام سنه وتقفل عليا باب الحمام من برّه و تعلن نفسها أميرة البلاد ؟! , وانا ساعتها بقى هبقى استفدت إيه من أم الكرش اللي عملته ده ؟ إزاي أبقى بكرش ومش أمير ؟!

Mohamed Hussein 5 مارس
روسيا فتحت زراير قميصها لأمريكا زي زمان ( على طريقة أحمد رمزي في أفلامنا القديمه ) , ومصر بتعمل مناورات عسكريه مع الإمارات , السعوديه والإمارات والبحرين سحبو سفرائهم من ( عذبة قطر ) , والوضع على الأرض في سوريا اختلف تماما , أمريكا كبرت زياده عن اللزوم وترهّلت و بقى لها في كل جحر تعبان و في كل خرابه عفريت ( فاضل عالحلو تكّه ) . السياسه الدوليه عامله زي ( كاس الجيلي ) , إمتى بقى يارب الساده النشطاء المصريين , اللي بيبيعو مبادئ و شعارات و فلايات يفهمو إن ( الجيلي بيحتاج معامله خاصه ) !!.

Mohamed Hussein 5 مارس
 العلاج بالموسيقى . كنت لسه كتكوت كده متخرج من الكليه , اشتغلت في صيدليه قبل ماسافر , ومن ضمن الناس اللي كانت بتتردد علي الصيدليه بنت زي القمر , كانت في أولى جامعه تقريبا بس بتمر بظروف نفسيه صعبه , باباها كان لسه متوفي من شهرين ( أو من 3 سنين مش فاكر ) , البنت كانت بتاخد كمية مهدئات ومنومات غير عاديه , قمت أنا جيت في يوم كده وخادتني الجلاله والأمانه العلميه ( حلوه الأمانه العلميه دي يا حاج محمد ؟ ) وقلت لازم أضع حد للمهزله اللي بتعيشها البنت دي , بالفعل جت هي بعد كده ضاربه الجينز و التي شيرت قمت أنا قلت لها : ( اللي انتي بتعمليه ده يا أنسه فضيحه لمصر , يا فضيحتك يا مصر ) , قالت لي ( ليه خير , هو انا بعمل ايه ؟ ) , قلت لها : بتستخدمي كمية مهدئات ومنومات كبيره والحاجات دي هتتعودي عليها ومش هتحل لك مشكله , قالت لي طب أنا مش بعرف أنام , إيه الحل ؟ قلت لها الحل مممممممم الحل إنك تسمعي الشريط ده وتحاولي تهدي ( إديتها شريط لأم كلثوم من شرايطي ) . . البنت ابتسمت وأخدت الشريط , وبعدها مباشرة حبتني ( ما الواد يتحب يا رمضان , أو كان يتحب يابو صيام ) , المهم البنت حبتني من أول شريط , قصدي من أول نظره , مع إني والله كان غرضي نبيل وسامي ( دول خوات على فكره ) , وكنت بكلمها على أساس علمي بحت , حتى طريقتي في العلاج دي طريقه معتمده اسمها العلاج بالموسيقى , و ده علم يا جاهل , و موجود له أبحاث وريسيرشات وستاتيستكس في أكبر المجلات العلميه الأمريكيه والأوروبيه , وتقارير بقى عن أثر الموسيقى حتى على نمو النباتات وزيادة انتاجيتها , لو مش مصدقني ابقى اسأل عصام حجي بتاع الصواريخ , إنما الشهاده لله البت كانت صاروخ , صارووووووووووووووووووخ !!.

Mohamed Hussein 5 مارس
متفائل بابراهيم محلب , قول بقى انه فلول قول إنه بلاستيك ولا يهمني , مصر عايزه واحد يكون صاحي ومدقدق و راشق في وسط الناس في الشارع , مش عايزه واحد يكون ساكن في الشقه اللي قصاد أفلاطون في المدينه الفاضله و لا واحد يكون ميت ومتحنط و ساكن في ترب الغفير !!.

Mohamed Hussein 5 مارس
 · تم التعديل ههههههههههههههه توكل هههههههههههههههههه كرمان ههههههههههههههههههههه أهي : . ( سحب السفراء مجرد اعلان فشل المؤامرات وكل محاولات النيل من قطر العظمى، ولأنها في الجانب الصحيح من التاريخ، هكذا أرى الأمر ولن أزيد ) ............................... من قطر العظمي !! معاهم حق الإخوان يشوفو مرسي خليفة المسلمين وقائد لجيوش العالم , ماهو إذا كان مرسي ابو رياله بالعظمه دي تبقى قطر دوله عظمى , يهده القات اللي بهدلك يا توكل يا بنتي , حد لسه عايز جايزة نوبل يا خوانا ؟ حد لسه ماخدش ؟ الأستاذ اللي هناك أيوه خدت حضرتك ورا ولا لسه ؟!!.

Mohamed Hussein 6 مارس
رجاء محبه ............ تنويه بسيط . صباح الخير - في الصفحه عندي بنات و سيدات كتير , كلهم ناس محترمين اوي , تتفق معاهم أو تختلف سياسيا لازم يكون الحوار كأنك بتكلم أختك أو والدتك أو بنتك . - ظاهره بدأت ألاحظها مؤخرا و بتتكرر كتير , بعض الأصدقاء الشباب عندي ( الأولاد ) بيستخدمو الألفاظ الخارجه بصوره غير لائقه , ماعتقدش انه يقدر يقولها قدام أخته أو حتى زميلته في العمل أو جارتهم . - يا صاحبي استخدامك للألفاظ دي مش بيخدم قضيتك ( ده إذا كان عندك قضيه من أساسه ) , بالعكس , ده دليل إفلاس وقلة حيله . . - شريحه معينه من ( الثورجيه ) وخصوصا الأعضاء الرسميين في الألتراس و 6 ابريل بقى كل نقاشهم كده , ** امك , يابن ال ****** , بالمناسبه أصغر عيل في مصر يقدر يقول الكلام ده و أده 10 مرات , مش شطاره يعني , ولو كنت أفلست أو عايز تعلن إفلاسك بالطريقه دي فأحب ألفت إنتباه حضرتك إن دي صفحة فيس بوك مش الجريده الرسميه للدوله !!. . - الناس اللي حاطين صورة البرادعي وحمدين والسيسي وبيدخلو يقولو ألفاظ خارجه , راعي ان صاحب صورة البروفايل بتاعك مايقولهاش الألفاظ دي , تتفق أو تختلف معاه لكن ما يقولهاش . . - الناس اللي حاطين صور الشهداء زي جيكا وغيرهم , عيب عليك , ده صاحب الصوره مات عشان البلد دي تعيش , ويوم ما مات كان بيهتف ضد ظلم وفساد مش بيقول ألفاظ أبيحه , ياريت تحترم صاحب الصوره على الأقل وتختار ألفاظ تليق بيك وبيه . . - كلمه أخيره للشباب المتحمس أوي , مش ملاحظ إن الدايره بدأت تضيق عليك ؟ مش ملاحظ إنك كل شويه بتزداد عزله ؟ مش ملاحظ إنك زي اللي ماشي في صحرا لوحدك من غير بوصله ولا خريطه ؟ مش ملاحظ إن سلبيتك واصرارك على اعتبار العمل الثوري كأنه مهنه بيمتهنها الإنسان هي اللي وصلتك لكده ؟ , أتمنى تفوقو وتلحقو في البلد دي مكان , عشان يبقى لكو صوت وحق فيها !!.

Mohamed Hussein 6 مارس
 ليلة سقوط واشنطن !!. . - من أد عشرين سنه كده كنت غاوي اسمع الأخبار في الراديو ونشرة 9 في التلفزيون , ولو ايدي وقعت على جرنان أقراه , وقتها تفتح الراديو تلاقي المذيع بيقولك الإتحاد السوفيتي عمل وسوّى , تفتح التلفزيون تلاقي المذيع بيقول جورباتشوف هيكسر الدنيا , تفتح الجرنان تفتح الحنفيه تلاقي سيرة القوه العظمى الجباره المخيفه اللي اسمها الإتحاد السوفيتي , موسكو بقى وأدب موسكو , كنت حافظ أسماء المسئولين هناك من كتر ما بسمعها من أكبر راس في البلد لحد الواد اللي ماسك الخرطوم و بيرش الجنينه بتاعة الكرملن ........... وبعدين نمت في يوم وصحيت لقيت كل حاجه بح , فين الإتحاد السوفيتي يا خوانا ؟ يقولك ( يعني ايه الإتحاد السوفيتي ؟ يطلع مين الإتحاد السوفيتي ده يا جناب العمده ) .................... ممممممممم ولا دايم إلا وجه الله . . - اعتقادي إن الجيل بتاعنا ده محظوظ , صحيح ماحضرش حروب شاركت فيها مصر لكن حضر أحداث تاريخيه مهمه زي انهيار الإتحاد السوفيتي والثوارات على أنظمة الحكم الفاسده , اعتقادي كمان إن جيلنا نفسه هيشهد عن قريب ليلة سقوط واشنطن ( تطلع مين الولايات المتحده دي يا جناب العمده ؟) . - عوامل كتير هتعجل بسقوط أمريكا , ليس من بينها إن السيسي هيبقى رئيس مصر ( أنا مش مصطفى بكري ولا أحمد موسى سيادتك ) , إنما في رأيي الشخصي الإنهيار بدأ بالفعل , و هسيب كل العوامل الإقتصاديه والعسكريه والسياسيه وهتكلم على حاجتين مهمين أوي مش بيلفتو انتباه الناس : . 1- الإرهاب : المخابرات الأمريكيه بدأت تلعب بالنار يوم ما فكرت إنها تصنع جماعات إرهابيه في أفغانستان لمحاربة الإتحاد السوفيتي ولحد النهارده , أهي حضرت العفريت ومش هتعرف تصرفه , والمثل بيقول ( البايره لبيت أبوها ) .......... هذه بضاعتكم رُدت إليكم . . 2- الوجه الحسن لأمريكا : الجيل بتاعنا وجيل بعدنا وأجيال كتير قبلنا , لو كنت سألت فيهم أي واحد في سن الشباب أو المراهقه بتحلم بإيه ؟ كان هيقولك إجابة واحده ( أعيش في أمريكا واخد الجنسيه ) , الكلام ده اتعكس تماما , وبان الوجه القبيح لامريكا , مراكز حقوق الإنسان وحقوق العصافير وحقوق الزقازيق طلعو فطشه مش أكتر , ميضه وأمريكا بتغسل فيها إديها من دم الغلابه في العالم . .......................... .......................... باختصار , جيلنا ده هيشهد سقوط أمريكا , اللي بقى ليها في كل خرابه عفريت وفي كل جحر تعبان , هتقع مره واحده زي جبل الجليد , وفي لحظة الجد هتكتشف الإداره الأمريكيه إن عدد أعدائها في العالم أكتر من عدد سكان الصين والهند مجتمعين , وإن عدد حبايبها أقل من عدد سكان قطر

Mohamed Hussein 6 مارس

 ذكريات بقى ......خفة دم الفلاحين . لما كنت في ابتدائي كنت باخد كراستي وقلمي وكتابي واروح أعمل الواجب واذاكر عند بيت أخوالي , اللي هو بنسميه ( دار سيدي ) , عشان كان فيه اتنين من ولاد اخوالي اكبر مني بسنه وكنا بنقعد نذاكر ونلعب وناكل سوا , المهم بيتنا في البلد وقتها كان في أول الشارع و ( دارسيدي ) زي ماهي حاليا في أخر الشارع , الكلام ده كنت بعمله كله يوم , وفي نص الشارع واحد راجل دمه خفيف اوي و قريبنا من بعيد اسمه رضا , دايما قاعد على المصطبه . . - وكل ما يشوفني وانا ماشي والكراسه تحت دراعي ( وغالبا ماشي حافي ) يتريأ عليا ويقول لي ( والنبي يا أستاذ محمد عايزينك تكتب لنا شكوى للرز )........... ممممممم كان عمري وقتها 7 سنين او 8 , وكل ماعدّي ألاقي رضا بيقولي نفس الجمله لدرجة اني فاكرها لحد النهارده , يعني كل يوم مرتين في الرايحه والجايه , واضح انك بتتريأ يا رضا , والراجل شاكك في امكانياتي واني ممكن في يوم من الأيام اتعلم واكتب له شكوى لأرض الرز . . عموما أنا مش ناسي الموضوع ده , و ناوي لما أنزل الصيف الجاي , أخد باكيته ورق A4 و كام قلم و امشي في نفس الشارع بتاع دار سيدي , غالبا هلاقي رضا قاعد نفس القاعده على نفس المصطبه ( رغم مرور اكتر من 25 سنه ) , هقوم انا بقى قاعد جنبه , واقول له أنا جيت لك أهو يا رضا يابن عمي , ملّيني بقى عايز تكتب ايه في الشكوى بتاعة الرز ؟!

Mohamed Hussein 6 مارس
 والله ما شوفت كده ولا كنت أعرف إننا كده , مش مهم إن توكل كرمان المعتوهه تكتب بوست عن ( دولة قطر العظمى ) , ومش مهم إن فيه ألاف المصريين الإخوان بيعملو لها لايك , ومش مهم إنهم بيتريقو على أي حد بيرد عليها على طريقة ( إنت عايز تفهمني انك تعرف اكتر من واحده واخده جايزة نوبل ؟؟؟ ) , ده على أساس إن نوبل في السلام بتعني ان صاحبها خبير في السياسه والطب والفلك والميكانيكا , مانا مره واحد قالي ( هو انت بتفهم في الدوا اكتر من عصام حجي العالم الي شغال في وكالة ناسا ومن البرادعي الي واخد نوبل ؟ ) , مممممممممممم كل ده مش مهم , إنما ماتوصلشي إني ألاقي شباب كتيييييير معلقين عند توكل زفت و بيثبتو بالأدله و البراهين إن قطر دوله عظمى فعلا , الناس دي ماحصلتشي غنم والله , يعني كلمة خرفان كبيره عليهم !!. طب أنا بقى أطالب السيد رئيس مجلس محلي مدينة السنبلاوين بإعلان قيام ( إمبراطورية السنبلاوين العظمي ) , والله السنبلاوين أولى من قطر .

Mohamed Hussein 6 مارس
 حوار افتراضي تخيلي ............. دكتور مرعي وريتشارد . دكتور مرعي هو رجل عربي يعمل في منصب مرموق في هيئة الكشف عن السحلب الممنوع دوليا , وريتشارد هو موظف بلغاري يعمل في نفس الهيئه وفي نفس الفريق الذي يترأسه دكتور مرعي .............. .............. دكتور مرعي : مش ممكن اللي بيحصل ده يا ريتشارد , إتس إيمبوسيبل , مش معقول أبدا , إزاي بلغاريا تهجم على موريتانيا بالشكل ده ؟ وايه المبرر ؟ ماحنا قولنا موريتانيا مفهاش سحلب , مش ممكن أبدا . ريتشارد : بي كول مان , تيك ات إيزي . . دكتور مرعي : إيزي ايه وزفت ايه يا ريتشارد , قالو لنا روحو دوّرو في موريتانيا على سحلب و روحنا ودورنا ومالقيناش , وقلنا موريتانيا خاليه من السحلب تماما و كتبنا تقريرنا بكده , هما ليه بيعتبرونا كروديات ؟ . ريتشارد : لا كروديات ولا حاجه يا بوس , بس يو نو , الموضوع له أبعاد تانيه . . دكتور مرعي : يبقى يقولو , مش يلبسوها فينا , انما قالو إن هجوم بلغاريا على موريتانيا كان بسبب السحلب ....الله ؟ مش احنا المسئولين هنا ولا ايه ؟ . . ريتشارد : مسئول طبعا وحضرتك ان تشارج وكبيرنا كلنا , بس بليز بي كول . دكتور مرعي : لأ لأ , أنا لازم أريح ضميري . . ريتشارد : يعني هتعمل ايه بوس ؟ وات زا مينيج أوف ( أريح ضميري ) ؟ . دكتور مرعي : بص يا ريتشارد , أنا هقدم استقالتي من الهيئه , وهكتب مقالات في أكبر المجلات البلغاريه أدين فيه الهجوم , مش عايز التاريخ يحكم عليا بالظلم . . ريتشارد : أوووو مان , انت نسّتني الخبر الحلو اللي كنت جايبهولك , خبر فيري جريت . . دكتور مرعي : خبر ايه يا ريتشارد , تيل مي , انا بقيت حاسس ان مفيش حاجه حلوه إن زيس ورلد . . ريتشارد : جيس ماي بوس ؟ . دكتور مرعي : يا ريتشارد قول بقى وقعت قلبي . . ريتشارد : إنت ممممممممم يو , إنت اسمك نزل في الترشيحات لجايزة ( زنوبه ست أبوها ) الدوليه . . دكتور مرعي ( منتشيا ) : يو أر فاكينج ويز مي ريتشارد , يو أر جوكنج , مش معقول مش ممكن , مستحيل , تيل مي يو أر جوكنج . ريتشارد : أه والله زي ما بقولك كده مان . دكتور مرعي : انا مش مصدق نفسي , يااااااااه معقوله ؟ بس انت عرفت منين ؟ . ريتشارد : يا مان إنت ناسي إن أنا بلغاري ؟ عرفت طبعا من ناس موثوقه داخل مؤسسة ( زنوبه ست أبوها ) , ناس كبار هناك بشروني . . دكتور مرعي : ياااااه ثانكس ماي جود . ريتشارد : بس ممممممم , إنما مممممممم , بت ممممممممم . دكتور مرعي : بس ايه يا ريتشارد ؟ مش توقع قلبي يا أخي . ريتشارد : أ ثينك ماي بوس إنك لو قدمت استقالتك دلوأتي هتبقى فرصتك ضعيفه في الفوز بجايزة ( زنوبه ست أبوها ) وانت طبعا عارف أن دي الجايزه الأشهر والأهم في العالم . . دكتور مرعي : وايه علاقة استقالتي من هيئة السحلب بجايزة زنوبها ست أبوها ؟ . ريتشارد , كَم أون مان , انت عارف الترشيحات والتزكيات والأمور بتتم أزاي ؟ . دكتور مرعي : ايوه يا سيدي عارف عارف أي نو , ولو أني ماحبش الأسلوب الرخيص ده لكنه أمر واقع للأسف . . ريتشارد : هه مان , تيل مي , وات يو ويل دو ؟ . دكتور مرعي : ممممممممممممم مانا لازم أريح ضميري يا ريتشارد , دي مسئوليه أمام التاريخ , شوف , أنا هكتب مقالات واطلع في القنوات أندد بالهجوك والعن سلسفيل أبو بلغاريا . . ريتشارد : طب وبالنسبه للإستقاله ؟ . دكتور مرعي : شوف يا ريتشارد ياخويا استقالتي مش هتمنع هجوم دولتك على موريتانيا , وانا هريح ضميري بالمقالات والتاريخ هيسجل اعتراضي , الإستقاله محتاجه تفكير شويه , جايزة ( زنوبه ست ابوها ) أي حد في العالم يتمناها . . ريتشارد : جريت مان , ولو تحب أجي ألعن معاك سلسفيل ابو بلغاريا بلدنا أنا ماعنديش مانع , كونجراتيوليشن بوس .

Mohamed Hussein 7 مارس  

شريحتين و ربنا ابتلانا بيهم , شريحه بتقول انتو شعب كافر وفاسق وبتاع شذوذ ودعاره واحنا بقى اللي مؤمنين و بنبيع سبح , و شريحه بتقول انتو شعب عبيد , طول عمركو شعب عبيد , بتعبدو العسكر والبياده والحاكم واحنا بتوع الحريه وبتوع العداله وبتوع الثوره !!. يعني كلمة الشعب بقت هي الحيطه المايله والشماعه لكل واحد فاشل سياسيا ولكل عيل تافه برياله , الشعب مش عاجب البهوات في الحاله دي ولا في الحاله دي , وبما إني واحد من الشعب الكافر الفاسق الزنديق و الشعب العبيد أحب أقول للساده الأفاضل المؤمنين الأتقياء والساده الأفاضل المناضلين الأحرار : ملعون أبوك لأبوه . . ....ممكن الشريحه الأولى تغور في ستين داهيه وتروح أفغانستان هتلاقي هناك ناس مؤمنين أخر حاجه ( يعني أحدث فيرشن ) , والشريحه التانيه تروح أمريكا هتلاقي هناك حريه على كيف كيفك ( معاك سلطانيه ولا حاجه تاخد فيها الحريه ؟ ) ...... وارحمو مصر بقى يا ولاد المره .

Mohamed Hussein 7 مارس
 كنز اسمه المغتربين . رساله إلى عبد الفتاح السيسي ............................................ ماسمعتش الخطاب اللي بيقول فيه الناس تتقشف ( ماحنا متقشفين يا مولانا ) , و بيقول الناس تتبرع عشان اقتصاد مصر !! ( محدش هيتبرع يا حاج ) طب نعمل ايه طيب ؟!.... أنا أقولك يا سيدي . 1- عدد المغتربين المصريين في الخارج مش بيقل بأي حال عن 5 مليون , كويس كده ؟ حجم مدخراتهم يعني لو قولنا في المتوسط 100 ألف , يبقى بنتكلم في 500 مليار جنيه ( يعني نُص تريليون ) , أنا بقى عايزك تاخد نُص مدخرات المصريين يا سيسي , يعني تاخدلك بتاع 250 مليار ولا الحوجه لفلان ولا علان ولا صندوق النقد . . 2- طب تاخد فلوسنا ازاي ؟ بالدراع ؟ لا طبعا ماينفعش , طب بالتبرع ؟ مستحيل مش هيحصل , أومال إزاي ؟ . 3- شوف يا سيدي , المغترب مننا بيطلع عين أهله عشان حاجتين اتنين , البيت والمشروع , يعني بيت يعيش فيه عيشه أدميه , ومشروع يسترزق منه لما ينزل ويستقر في مصر , إدينا انت بقى الأرض بتاعة البيت والأرض بتاعة المشروع وخد اللي انت عايزه , يعني ايه الكلام ده ؟ يعني بيع جزء من أرض مصر لولاد مصر المتغربين ( واللي مش متغربين برضه ) واستفيد من مدخراتنا في بناء دوله من أول وجديد . . 4- استنى هكمل كلامي , بقى مصر كدوله مش حيلتها حاجه تبيعها لولادها غير الأرض , والأرض عندنا شرحه وبرحه , أهي فرصه نعمل مجتمعات عمرانيه جديده واستثمار زراعي وصناعي ضخم , طب نعملها ازاي الحكايه دي ؟ انت كدوله هتقول إننا بنبيع 10 مليون فدان من أرض مصر في المناطق الصحراويه المجاوره للمدن , بمساحات محدده ( 30 فدان لكل قطعه ) , تمن قطعة الأرض 300 ألف جنيه ( يعني 10 ألاف للفدان ) , الدوله هتدينا عقد بيع نهائي بمجرد ما بدفع الفلوس , طب والتسليم ؟ التسليم خلال سنتين , على بال ما حضرتك تعمل حصر بالأراضي وتقسّمها برحتك وتعمل لها طرق رئيسيه و بس ( الطرق الفرعيه بتبقى مدقّات ) , كده حضرتك ضمنت 100 مليار جنيه في ظرف 6 شهور . . 5- طب انا هشتري ليه ومين يضمن لي ؟ الدوله تضمن لي طبعا وهشتري عشان المشروع ده لما أزرع الأرض واصرف عليها 300 ألف كمان ( على مدار سنتين ) هتجيب لي صافي ربح سنوي 300 ألف ( يعني تمنها هيرجعلي في سنتين وسعرها بيزيد طبعا ) , طب البيع فيه قرعه ؟ لأ , البيع مباشر والقرعه هتكون لتحديد رقم قطعة الأرض مش اكتر , والدوله هنا لازم تحط شرط الزراعه خلال 5 سنوات وإلا تُصادر الأرض ........... مزايا المشروع عالبلد مش محتاج اني أقولها ولا أقول حجم العماله اللي هتشتغل ولا حجم الإنتاج اللي أغلبه هيتصدر . . بكره بقى يا سيسي هقولك كمان حاجه ب 100 مليار ورزقي على الله , الكلام ده لك ولغيرك , ولأي رئيس جاي هيختاره الشعب المصري !!.

Mohamed Hussein 7 مارس
 فكره عبقريه . عملت حادثه بالعربيه النهارده على كورنيش الخبر , العربيه اتشلفطت من قدام , وجيت الشغل مضطر , إيدي اليمين انجزعت وفيها ألم رهيب ماحستش بيه إلا بعد ساعه ’ طب ايه اللي مخليني قاعد عالفيس ؟ لا انا قادر أمسك ازازة دوا ولا قادر أمسك الماوس حتى , صحرا ايه اللي عايز الناس تزرعها ؟ يعني انت عايزني اروح ادفع فلوسي في ارض صحرا واجيب عمال ياخد كل واحد منهم 1500 جنيه ( بدل قاعدة القهاوي ) ويروحو الصحرا يتعفّرو وهدومهم تتبهدل ومايعرفوش ياخدو شاور في الجاكوزي بتاعهم ؟ وفي الأخر استنى سنتين عشان ابدأ أحصد اللي زرعته ؟ ممممممممم ده مشروع فاشل , كده يبقى السيسي معاه حق , إحنا شعب مرفه ولازم نتقشّف !!. . عندي فكره تانيه مضمونه بقى مليون في الميه ومفهاش رسك ولا اي حاجه , ومفهاش تعب إطلاقااااااااا , ( لا... غير انك تشتغل ناشط سياسي أو مراسل للجزيره ) . . الفكره بتقول باختصار , كل بيت في مصر فيه ( بير سلم ) صح ؟ وده بتبقى مساحته من 10 ل 50 متر مربع , مساحه غير مستخدمه اطلاقا , احنا بقى نستغل المساحه دي و نعمل مشروع زراعة ( بير السلم ) في كل بيوت مصر , نزرعها مكرونه , أه مكرونه وممكن صلصه ...هنكسب من وراها دهب , المكرونه هنرويها من الماتور اللي اصلا بيبقى موجود في بير السلم . . مزايا المشروع ده ايه ؟ أولا الربحيه المضمونه , ثانيا الراحه التامه يعني حضرتك هتنزل كل كام يوم في الأسانسير ( بالتي شيرت والبرمودا والسابوه ) تبص على محصول المكرونه اللي في بير السلم وتوصّي البواب إنه يرويه في المعاد وتطلع تاني , يعني راحه ما بعدها راحه . . الميزه الأهم في المشروع ده , إنتو عارفين الكهربا بتقطع عندنا كتير , وفيه عيال شباب بيستغلو الحكايه دي وتلاقيه واخد المزّه بتاعته و بيبوسها في بير السلم , إحنا طبعا هنمنع الفاحشه دي بزراعة المكرونه ( يعني مش هيلاقو مكان للبوسه ) وده مهم جدا لإننا شعب متدين بطبعه !!.

Mohamed Hussein 8 مارس
باسم يا باسم . صباح الخير - بنتي الصغيره عمرها 4 سنين , و بتعشق باسم يوسف , مش بتعرف تنطق اسمه , بتقول ( سابل يوسف ) , و سابل ده اسم محل ملابس في الخبر , المهم ان البنت مش فاهمه اصلا هو بيقول ايه؟ انما بتفضل تضحك لمدة ساعه متواصله , هي تقريبا بتلاقينا كلنا بنضحك فبتضحك معانا وخلاص ...هنيالك يا عم سابل يوسف . . - كده دليل براءتي كتبته فوق , ومسيرك يا ملوخيه تيجي تحت المخرطه , و أديكي جيتي , إنت جيت ولا الهوا رماك ؟! , تعالى بقى يا عم سابل وانا أقولك . . 1- أماني الخياط أنا مش بحبها ( مبسوط كده ؟) , بس اللي انت عملته امبارح ده اسمه هبل وإفلاس , ليه بقى ؟ عشان كلنا , كلنا , كلنا في فبراير 2011 وما بعدها لمدة سنتين تماما واحنا بنلعن أبو العسكر ( اللي هما طنطاوي وعنان ) , لو أي حد دخل على صفحتي في الوقت ده هيلاقي بوستاتي مقسومه ما بين السب للإخوان والسب لطنطاوي وعنان , وأغلب ال 30 مليون اللي نزلو في 30 يونيو كانو من النوعيه دي اللي شايفه طنطاوي وعنان سلّمو مصر تسليم أهالي للإخوان . . 2- إنما يبدو إنك يا عم سابل مش معترف إن فيه ثوره تانيه حصلت , و وشوش سقطت , ولو إنك شايف الناس لازم تلعن أبو العسكر على طول الخط يبقى عايزهم يعملو زي الطور اللي مغمّي عنيه ومربوط في ساقيه وبيلف في نفس الدايره , الساقيه دي اسمها الثبات على المبدأ ولا مؤاخذه...... ( إقلع غُماك يا طور وارفض تلفّ ) !! . . 3- يبدو إنك مش عارف الفرق بين عسكر سلمونا للإخوان و خلّو مصر تشوف أسوأ سنتين في حياتها , وبين عسكر أنقذونا من إيد الإخوان , هو ده الثبات على الموقف يا مولانا ؟؟ طب أنا وانت كنا فاكرين الإخوان دول فصيل وطني وبتوع ربنا , ثورنا عليهم ليه ؟ مش كان واجب برضه نثبت على مواقفنا ولا ايه ؟!. . 4- حكاية ابراهيم عيسى لما كان بيتكلم على الشباب , كان بيتكلم على شريحه معينه , اللي مش بيعجبها العجب , مفيش شخص بيعجبها ولا موقف ولا قرار , اللي عايشبن بمبدأ ( خُلقنا لنعترض ونصلح ولاعات ) , انت كده بتصطاد يا عم باسم , بس للأسف بتصطاد في ماية البانيو , شباب الثوره دول ملايين وانا واحد منهم , إنما اللي مايشوفشي من الغربال يبقى أعمى . . 5- نصيحه هقولهالك للمره التانيه ( عشان بحبك ) , القماشه اللي انت شغال عليها صغيره اوي , بكره هتبقى موضه قديمه زي الطربوش الأحمر أبو زر والبناطيل الشارلستون , حاول تتحرّر فعلا , بص على بقية ( التوب ) هتلاقي ماده خام للسخريه تكفي 20 سنه .

Mohamed Hussein 8 مارس

 تعالى نبيع شعارات ....... الثبات على الحلم و المبدأ . - لما كنت في ثانويه عامه كان حلمي زي أي شاب ( وخصوصا في الريف ) إنه يدخل كلية طب , ماهو مفيش أحلى من كده , الحلم ده فضل ملازمني سنين زي خيالي , ذاكرت كتير أوي وكنت شاطر اوي جايز زياده عن اللزوم , وكل ما تعدي سنه أقول الحلم بيقرب أهو , و لحد يوم معين ( قبل امتحان الثانويه بتاعي بيوم ) . . حصلت حاجه كبيره في حياتي , كانت وفاة والدي الله يرحمه , الحدث كان اكبر من استيعابي , كان قطمة ضهر باختصار , دخلت الإمتحانات تاني يوم وانا حالي ما يعلم بيه إلا ربنا وخلصت وجبت مجموع كبير , جيت بقى في الرغبات قلت أحقق حلمي اللي هو ( حلم أبويا الله يرحمه ) , بس فيه حاجه وقفتني , دلوأتي الوضع اتغير ( الواقع اتغير ) , الأب مش موجود وانا الإبن الكبير يعني مسئوليه خواتي بقت في رقبتي , عندي 3 خوات بنات عايزين يتعلمو ويتجوزو , لو دخلت طب هفضل سنين طويله جدا باخد مصروف من أمي , أصلا البيت مافهوش فلوس ( عالحميد المجيد ) , عشان كده دخلت صيدله و قلت لحلمي باي باي , قلت هشتغل من تاني سنه واصرف على نفسي عالأقل واشيل شويه عن أمي . . بالفعل بدأت أتدرب في صيدليات من أول سنه وبدأت اشتغل واخد مرتب من تانيه كليه , مرتب مش كبير بس بصرف بيه على نفسي وبساعد أمي شويه , خلصت الكليه بسرعه وسافرت , بعد سنيتن من سفري كنت اتجوزت و بصرف على تعليم البنات ولبسهم عشان مش يبقو أقل من زميلاتهم في الثانويه والجامعه ...........يوم فرحي كانو صحابي ودفعتي الي دخلو طب حاضرين ولسه في الجيش ( يعني بياخدو مصروف من أهاليهم ). . في السياسه كلنا حلمنا بحكم مدني وثوره على نظام فاسد وجبان , وعملنا الثوره واجتهدنا , لكن حصلت أحداث كبيره جدا ( زي وفاة والدي ) , ناس كنا مفكرينهم مننا وبيحبونا واكتشفنا انهم واخدينا لدولة ملالي وبهاليل , بيقولو قطر دوله عظمى وبيلعنو الجيش المصري في القنوات والجرايد العالميه , وناس كنا فاكرينهم مناضلين وثورجيه طلعو تجار شعارات , طب نعمل ايه ؟ نكمّل حلمنا بنفس الطريقه و نسيبهم ولا نغيّره شويه ؟ ايه المشكله يعني ؟ الدنيا حوالينا بتتشال وتتهبد وبلاد بتتقسم وجيوش باعت القضيه و انت لسه بتفكر بعقلية 24 يناير 2011 ....ده اسمه ثبات على المبدأ ؟ يا مولانا المثل بيقول ( اللي يعوزه البيت يحرم عالجامع ) واللي يعوزة الواقع يحرم على حلمك . . كتير من الشباب بشوف إن الأحداث اللي حصلت في ال 3 سنين اللي فاتو أكبر من استيعابهم بكتير , عشان كده ربطو على موقف معين ورفضو تغييره , بالمناسبه , الجحش لما بتحمّل عليه حمل أكبر من طاقته وهو صغير بيكبر ويعجز في الملامح بس لكن جسمه بيفضل كده ( بيبقى جحش عجوز ) وعمره ما هيبقى في يوم من الأيام فرس في السباق !! .

Mohamed Hussein 8 مارس

 دفعاً للرتابه والملل ........... اشهر جمله درسناها في كتب الوزاره . و من باب التغيير يعني , ممكن الواحد يجيب قفاه قدام ويخلّي وشه ورا , أو يمشي على إديه ويرفع رجليه لفوق وهو ماشي , أو يطلع السلم بضهره , أو يسوق عربيته و ضهره للدركسيون أو يبقى راجل كده وملو هدومه و يقول للستات كفايه عليكو كده و يضرب هو مكانهم بقى بوتكس وسيليكون ( تغيير يا مولانا تغيير ... نيو لوك يعني مايجراش حاجه ) . . أو يشتغل ناشط سياسي , يصحى من النوم و قبل ما يغسل وشه يدخل عالفيس يهري و ينكت و يلعن في جيش بلده و يقولك السيسي كان عضو في المجلس العسكري , السيسي كان عضو في المجلس العسكري يا ناس , يام نيازي صحي نيازي و قولي له السيسي كان عضو في المجلس العسكري وانا عرفت الحكايه دي أول امبارح بالليل !! . . ممممممممم أومال انت عايز وزير الدفاع يكون عضو في ايه ولامؤاخذه ؟ في المجلس القومي للأمومه والطفوله ؟ ....أقولكش على حاجه؟ , أنا أعرف واحد صيدلي صاحبي عضو في النقابه العامه للصيادله ( مش المجلس العسكري ) بس ايه بقى ؟ طول بعرض بارتفاع و كان أحسن واحد يصطاد عصافير بالنبله و هو صغير , أظن مفيش بعد كده , إحنا نمسّكه وزير دفاع مؤقت لحد ما حضراتكو تلاقولنا وزير دفاع مدني كده , بس والنبي نقّوه كويس و اتوصو , يعني من وش القفص بلاش الحاجات المفعصه والنطيحه والمترديه وما أكل السبع !!.

Mohamed Hussein 9 مارس  

الدراسه بدأت في مصر والفيس كله بقى سكووووووووووت , يااااه , الناس كلها اختفت فجأه أومال مين اللي هيحاسب عالمشاريب دي ؟ هو انا كنت مصاحب شوية تلامذه ولا ايه ؟ بعتو القضيه يا شباب وبقى كل همكو دلوأتي الساندوتشات والكراسه ال 9 سطور والبرجل والمسطره حرف تي والسحاحه والهديه بتاعة عيد ميلاد ميس ميرفت ؟ طب أنا ههري وانكت مع مين دلوأتي ؟ مين هيستفزني ؟!

Mohamed Hussein 9 مارس  

· تم التعديل عجائب و طرائف سياسيه ......اللحم الأبيض المتوسط !!. . كيم كارديشان طلبت من خطيبها إنه يدفع لها مليون دولار عن كل سنه جواز !! ...يعني 7 ونص مليون جنيه في السنه ...يعني 600 ألف جنيه في الشهر ...يعني 20 ألف جنيه في الليله , واحد هيسألني طب والليالي اللي بتعدّي عالفاضي ؟ برضه محسوبه يا برنس ......مالها زيزي صديقة الطلبه ؟ , ب 50 جنيه وبتجيب صحابك معاك !! . . دلوأتي لو خطيب كيم كارديشان قعد يصورها وهي عريانه ويركّز على اجزاء معينه مؤثره من جسمها ويبيع الصور والفيديوهات لمجلات البلاي بوي وقناة البابيلون بلو و الجزيره والواشنطن بوست ولا حد يقدر يلومه , يعني الراجل لازم ( يبيع ) لحم خطيبته عشان يعرف ( يشتري ) رضاها !!. . سعد الدين ابراهيم بيقول ان موزه بتاعة ( عذبة قطر ) بتحب مصر وبتحب ثورة 30 يونيو و بتعشق السيسي وكداهون !! . . في رأيي الشخصي مفيش أي فرق بين موزه وكيم كارديشان , الإتنين بيبيعو لحمهم وشرفهم ( السياسي ) لكلاب السكك مقابل فلوس أو صيت و مجد وهمي , ومفيش فرق بين خطيب كيم كارديشان و سعد الدين ابراهيم , الإتنين بيلعبو دور الوسيط ما بين اللحم و بين كلاب السكك !!.

Mohamed Hussein 9 مارس

 امبارح كان اليوم العالمي للمرأه , الأحداث شغلتني ونسيت أبارك لكل فتاه و سيده مصريه من نبت الأرض الخضره , إنما ملحوقه , إحنا لسه فيها : كل سنه وانتو طيبين يا رجاله !!

Mohamed Hussein 9 مارس

 عايز أكل ولا بحلقه ؟ . - السيسي هو رئيس مصر القادم , انا وانت عارفين كده , شعبيته في الشارع بتقول كده , حلمك وحلمي حاجه و الواقع حاجه تانيه , ولا فارقه معاه تطبيل مصطفى بكري واحمد موسى ولا قانون انتخابات ..............هي دي الحقيقه , يبقى العقل بيقول اننا نبدأ نفكر في مرحلة ( ما بعد إعلان السيسي رئيسا لمصر بصفه رسميه ) , حاجتين اتنين مهمين أوي لازم نفكر فيهم و نعملهم لو حقيقي يعني عندنا مبدأ وكرامه وبنخاف عالبلد والحكايه بالنسبالنا مش أشخاص . . 1- نبدأ فورا في الإستعداد للإنتخابات البرلمانيه ( في الشارع مش في الندوات والمنتديات ) , وحّدو صفوفكو و اعملو تكتّل محترم , وابذلو مجهود كبير , حتى لو مخدناش أغلبه هناخد نسبه مؤثره أوي نعرف بيها نوجّه الدفه , يعني نشارك في صنع القرار و في مستقبل البلد دي . . 2- السيسي في حد ذاته ماعندوش خبره سياسيه واقتصاديه كافيه , خطاباته ارتجاليه وعاطفيه , طب ماشي هو كان ظابط جيش ومعذور مالوش في الليله دي , لكن يلزمه مستشارين محترمين , ناس تكون سند وعكاز حقيقي له ( البطانه الصالحه ) , محتاج حد يعلمه لغة الكلام والخطابه وايه اللي يتقال وايه اللي مايتقالش , حد يعلمه ان الحركه والهمزه لها تمن , حد يشرح له الوضع السياسي الدولي وتعقيداته والوضع الإقتصادي الداخلي وتداخله .................. دورنا احنا بقى نساعده ( حتى لو مش عاجبك ) , نقترح له اسماء مستشارين محترمين , ناس تكون عايزه تخدم البلد دي بصدق مش بمنظره وتناكه أو بطريقة ياتسمع كلامي يا مش لاعب معاكو . . . أو ممكن تريّح دماغك ومتقراش الكلام اللي فوق ده وتقول ( يسقط يسقط حكم العسكر ) , بلا ننزل الشارع و نجتهد بلا نساعد السيسي ونكون البطانه الصالحه بلا نيله , مفيش أحلى ولا أجمل ولا أرق ولا أسهل من ترديد الشعارات !!.

Mohamed Hussein 9 مارس  

· و ابقو قابلوني في الحلّه الجايه !! . وصلنا لجيل معين من الزوجات ( أه اللي هو الجيل بتاع مراتي ) , لما واحده فيهم بتعمل حلّة محشي بتصوّرها وتنزلها عالفيس بوك , على اعتبار ان ده حدث تاريخي وظاهره كونيه مش بتتكرر غير كل كذا سنه ضوئيه , وعلى رأي المفتش كرومبو ( وابقو قابلوني في الحلّه الجايه ) , وفيه منهم اللي بتتصور جنب حلة المحشي بتاعتها فشر اللواء عبد العاطي في زمانه , وناقص تقول أنا اتخطفت واتعرض عليا 2 مليار دولار عشان اتنازل عن حلة المحشي دي بس قولت ابدا على جثتي , جوزي وعيالي أولى بيها .

الله يمسيكي بالخير يامّه , كانت بتعمل لنا حلة محشي كل اسبوع أد كداهو , فيها ييجي ألفين صابع , ونقعد احنا بقى 8 نضرب فيها ( حتى يسيل العرق ) , المهم إن أمي ربنا يديها الصحه كانت بتبقى لسه جايه من تشتيل أرض الرز وبعد ما تعمل المحشي تروح تغسل هدومنا كلنا في الطشت النحاس , يعني كانت بتعمل المحشي ده بصباع رجليها الصغير في وقت ال بريك break !!

Mohamed Hussein 9 مارس

 و عهد الله احنا العرب احتمال كده ندخل كلنا الجنه من غير حساب , أه في الأخره يعاملونا معاملة الأطفال و حديثي الولاده والمبتسرين , ماهو كفايه اللي احنا بنعمله في نفسنا في الدنيا . . لو نزل اعلان في قناة فضائيه أو جريده عن شامبو جديد لعلاج تساقط الشعر ( و الضعف الجنسي ) بخلاصة ( زبل المعيز ) هلاقي الناس واقفين قدامي طوابير :.... ماعندكشي شامبو بخلاصة زبل المعيز ؟ كيف يعني ما عندك شامبو بخلاصة زبل المعيز ؟ انت ماتدري ويش هي فوايد زبل المعيز على الشعر و الجنس ؟ كيف تكون صيدلي وما تعرف فوايد زبل المعيز ؟ . مممممممممممم لا و الله مادري فوايد زبل المعيز , كل اللي أعرفه عن المعيز إن المعزه بتولد وأحيانا يعني لو مزاجها مش حلو بتكسّل و تقرر إنها تبيض !!.

Mohamed Hussein 10 مارس  

العَمْلقه .....gigantism . من أهم الظواهر اللي حصلت في ال 3 سنين اللي فاتو هي الظاهره دي ( العملقه ) , إضطراب في هرمون النمو بيصيب الأطفال , تلاقيه المفروض يكون طفل وديع كده وسو كيوت لكنه فجأه يبقى طفل بملامح راجل عملاق , يامّه يامّه , خاف ياد يا عيد . . الظاهره اتكررت مرتين , مره عند جماعة الإخوان الإرهابيه الصغيره والضئيله في الحجم والعقل والتفكير , وعلى رأي اللي قال , تلاقي واحد منهم قاعد في بيت في الأرياف لابس جلابيه بيضا وتحت منها بنطلون ترينج وشبشب وحاطط قلم فرنساوي في جيب الجلابيه و بيفكّر و يحلم ب ( أستاذية العالم ) , واحد منهم طلع عالتلفزيون وقال ( كلها كام سنه ومصر هتبقى مجرد ولايه في دولة الإخوان وأمريكا هتدفع لنا الجزيه ) !! , ياختي جميله و بيضا والنبي ..... . المره التانيه كانت في ( عذبة قطر ) , اللي النظام الحاكم فيها فكر إن شوية الغاز اللي بيطلعو من تحت الأرض والقواعد الأمريكيه هتخلي الطفل الوديع ده يبقى عملاق و دوله عظمى على رأي ( توكل لامؤاخذه كرمان ) , و أدي حال الدنيا , قرصه صغيره عالطفل ونسي انه عملاق وقعد يعبط في ركن البيت و ينزل لا مؤاخذه من مناخيره , ويقول تعالي لي يامّه ( اللي هي أمريكا ) , أمه قالت له انت لابني ولا اعرفك أنا أصلا لقيتك وانت صغير جنب برميل غاز فقلت أخدك واربيك على إيدي و بالمرّه أخد البرميل ,........... ممممممم أمريكا مالهاش عزيز يا بيبي . . مصر والسعوديه والإمارات أعلنو الإخوان جماعه ارهابيه و بدأو يدوسو برجليهم على عذبة قطر , وباقي الدول العربيه اما مساند الموقف المصري السعودي أو بيلتزم الصمت , الطفل لازم يرجع طفل زي ما كان , أدينا بنحاول نعالج الإضطراب في هرمون النمو ده . . والإخوان بقو مطاردين في كل البلدان , هيهيمو في الصحاري والوديان , .............( حتى إذا ضاقت عليكم الأرض بما رحبت ) , دوّرو انتو بس عالراجل أبو جلابيه وبنطلون ترينج هتلاقوه قاعد دلوأتي على شط ترعه بيكلّم الترعه و يقول لها : تتجوزيني يا هبه !!.

Mohamed Hussein 10 مارس  

انت وطني وخايف عالبلد دي ولا ناشط ولا مؤاخذه سياسي ؟! . تعالى وانا اقولك الفرق بيني و بينك . لما تسمع أخبار عن استقالة السيسي من منصبه كوزير دفاع هتقعد تهري وتنكت عن الإستقاله وتقول إنها بتعني الترشح للرئاسه واننا كنا عايزين رئيس مواصفاته كذا والسيسي كان قال كذا .... وافلام بقى وحكايات وروايات , مرجعها ومفادها في النهايه إن لك مرشح بعينه عايزه يبقى رئيس أو مرشح بعينه عايزه مايبقاش . . انا بقى لما بسمع الخبر ده بقول تتحرق الرئاسه على انتخابات الرئاسه عالمرشح الفلاني والعلاني , فيه حاجه أهم بس عشان حضرتك ناشط ولا مؤاخذه سياسي مش هتفكر فيها , احنا في أيام وظروف مايعلم بيها إلا ربنا ( أنظر حولك ) , جيوش باعت القضيه ورتب عسكريه انشقت , الحمد لله جيشنا معصوم من الحكايه دي , بس انا ماعنديش شك إن الإخوان بتنظيمهم الإرهابي ومعاهم الكلب القطري وأجهزة المخابرات الأمريكيه والموساد يكونو بذلو محاولات مضنيه في الفتره اللي فاتت في استماله بعض قيادات الجيش عندنا ( الترغيب والترهيب ) , ماعنديش شك , عشان كده قلقان من اللحظه اللي هيستقيل فيها السيسي وثقتي بربنا وبوطنية قيادات الجيش مش بتتهز لكن الحرص واجب . . أتمنى من عبد الفتاح السيسي ك ( ظابط مخابرات ) مايقدمشي استقالته إلا لو كان متأكد ألف في الميه إن قيادات المجلس العسكري وقيادات الجيش على قلب رجل واحد ( وإلا هنسفّ تراب كلنا ) , أتمنى من مخابراتنا العسكريه تكون في قمة نشاطها الفتره اللي فاتت , و أي ظابط مهما كانت رتبته أو اسمه سمح بأي اتصالات بينه وبين الإرهابيين واللي وراهم يتعدم بالرصاص فورا من غير محاكمه .... وابقو نزّلو الخبر على إنه حادث سير عادي أو حتى ماس كهربائي وانا هفهم !!.

Mohamed Hussein 10 مارس

 طز في كنتاكي و تشيليز ... و طزين في ساندوتشات البانيه والهامبورجر , و ليسقط الكاتشاب ابن سلطح ملطح ..... هي دي مصر اللي بعشقها . ياللي مابتفهمش في الزوق والطعم , ياللي مابتعرفش تميز , حقنا احنا اللي نفتح مطاعم في قلب واشنطن وطوكيو للفطير المشلتت والجبنه القديمه

Mohamed Hussein 10 مارس

 نيو لوك . أحيانا كده بحلم إني ألبس جلابيه بيضا زي بعض الناس , و تحت منها شورت طويل شويه و باين من تحت الجلابيه و فالنه ( جيل ) شفافه ويبقى عندي كرش حلو كده ( باين من تحت الفالنه ) , أظن مفيش شفافيه أكتر من كده ؟ , و اركب عربيه لاندكروزر واركنها قدام ماكينة الصراف بالظبط عشان مش أمشي أكتر من 7 خطوات , واعمل لي مشروع سوبر ماركت واجيب واحد هندي يتأجره و يديني كل شهر 40 ألف ريال عالجاهز ( وجواز سفر الهندي يبقى معايا ) , واتجوز تلاته منهم واحده سوريه , بعد شويه جسمي من كتر الأكل والرحرحه هيفلطح و يطرشأ من كذا مكان مش مشكله أبقى أوسّع التوب شويه واشتري فالنات وشورتات 4 إكس لارج , واقف بالعربيه قدام اي بقاله و ادّي كلاكس عشان البنغالي يطلع و اقول له هات لي علبة سجاير يا محمد , و يكون عندي في الشقه إل إي دي 46 بوصه ورسيفير إتش دي وشوية فزدق و لزدق , واصلي الفرض بفرضه في الجامع ( بالعربيه ) , و أخر الليل أسهر قدام الهوت بيرد ........... يا سلاممممممممممممم , وكده يبقى الواحد كسب دنيته وأخرته مع بعض , اتنين في واحد !!.

Mohamed Hussein 10 مارس

 ليه يا مصر تخلِّي دايما سكِّة العاشق سراب ؟ قولي مالك ؟ الطريق مفرود وسالك و انتي حرّه و بايعه حالك للكلاب . اللي خاين جاي يقبض و اللي مات مقهور عشانك حقه ضايع في الحساب !!. . . محمد حسين

Mohamed Hussein 10 مارس

 كل واحد في الجيل بتاعنا ده لازم يستغفر ربنا كتير أوي على حاجتين اتنين , أول حاجه إنه كان بيستنى عشان يشوف صابرين بالفستان الأحمر وهي بترقص في إعلان مسرحية ( حمري جمري ) , وتاني حاجه إنه كان بيحلم يشتغل في مركز من مراكز حقوق الإنسان الأمريكيه , البني أدم مننا ضعيف , يارب سامحنا بقى ده كان طيش شباب وشقاوة لسان !!.

Mohamed Hussein 11 مارس

 يا عم ابراهيم . امبارح ابراهيم عيسى استضاف واحد كده قدّمه على إنه نائب رئيس تحرير جريدة الأهرام للشئون السياسيه , نااااااااااااائب رئيييييييس تحرييييييير جريييييييدة الأهرااااااااااام , الضيف كان جاي عشان يتكلم عن مجلس التعاون الخليجي وتاريخه , والعلاقات بين السعوديه وقطر وباقي دول المجلس , عم ابراهيم قعد طول الفقره يغشش الضيف , الي هو نائب رئيس تحرير الأهرام , الراجل الضيف معلوماته عن مجلس التعاون الخليجي والعلاقات السعوديه القطريه أقل من معلومات أي حد في الشارع , الواد حوده اللي بيسيّخ الشيشه في القهوه بيفهم اكتر منه . . الحقيقه مصر بقى وقعت ما بين شاب فاتح زراير قميصه وواخد الدنيا بالصدر , وعجوز بيروقراطي لسه بيطلب منك ورقه متوقعه من اتنين موظفين راتبهم لا يقل عن 60 جنيه تثبت إنك على قيد الحياه , وسياسي بيلعب سياسه بطريقة ( أنا ومن بعدي الطوفان ) , ويوم ما يتزنق في الدور يهدّه ويقول مش لاعب أو يسافر و يناضل من وراء البحار , و شوية طبالين لزيد وعبيد , و شباب مربوط في ساقيه وعاشق غُماه ويقول ده ثبات عالمبدأ , وناس غلابه ضايعين في النص , دايخين يا عيني من مكتب ده لمكتب ده لمكتب ده . . مصر هتقوم زي المهره العفيّه وهترمي من على ضهرها كل النماذج اللي فاتت ( الوَغَش ) , عايز تعرف قوة مصر الحقيقيه ؟ شوفها وهي بتقوم وبترمي الأشكال دي كلها من على ضهرها ............سيدي نائب رئيس تحرير جريدة الأهرام : إنت بتعمل ايه عندك بس ؟ , مكانك مش هنا , ده فيه أزمة بوابين في البلد !!

Mohamed Hussein 11 مارس  

الشباب اللي عايز يتنازل عن جنسيته المصريه ماينفعشي يطلع في التلفزيون يا شوية إعلاميين بقر , الجنسيه المصريه مش مجال نتناقش فيه و لبانه نمضغها في برامج توك شو يا شوية بهايم . . وصلنا لأيام ما يعلم بيها إلا ربنا , احترام جيش مصر بقى سؤال نجاوب عليه ب ( نعم أو لا ) , و الجنسيه المصريه بقت محل اختيار ( أوافق أو لا أوافق ).....ربنا يرحم كل عسكري دمه سال عشان يحرر تراب البلد دي , وسابها لناس ماتسواش . . ما يغورو في ستين ألف داهيه تاخدهم حتى لو كانو مليون , دي مصر مش قطر يا ولاد الصرمه , خليها تعمل حجامه و تخرّج الدم الفاسد اللي جواها ....أهي فرصه عشان تغسل جسمها .

Mohamed Hussein 11 مارس  

حوار تخيلي ................. للكبار فقط . المذيعه : ومعانا أحد الشباب المصريين اللي قرر انه يتنازل عن جنسيته , نتعرف بحضرتك ؟ الشاب : أنا حماده ميمي . المذيعه : أهلا بيك حماده ميمي , قولي ليه فكرت تتنازل عن الجنسيه المصريه؟ . الشاب : انتي مش شايفه الدنيا حواليكي ولا ايه ؟ البلد مليانه فساد وعملنا ثوره مفيش فايده , لا عارفين نشتعل ولا نتجوز . . المذيعه : انت عمرك كام سنه ؟ الشاب : 28 . المذيعه : وليه مش بتشتغل لحد دلوأتي ؟ الشاب : الشغل اللي مرتبه معقول مش في مجال تخصصي . . المذيعه : وايه المشكله ؟ الشاب : لأ طبعا انا ماتعلمتش كل ده عشان اشتغل في حاجه تانيه . . المذيعه : طب مجالكش شغل خالص في مجال تخصصك ؟ الشاب : جالي , بس المرتب كان ضعيف جدا أقل من 1500 جنيه ,دول هيعملو ايه لشاب النهارده .؟؟ . المذيعه : معقولين يعني كبدايه الشاب : لأ دانا أقعد عالقهوه أفضل لي , هتجوز ازاي وانا بقبض 1500 جنيه ؟ . المذيعه : طب مافكرتش تسافر زي ملايين الشباب اللي بيسافرو يشتغلو الشاب : واسافر ليه واتغرب ؟ الحكومه دي هي اللي علمتني وهي اللي المفروض تجيب لي شغل ...بلد بنت تييييييييت مش بتقدر ولادها . . المذيعه : بس ده حال عالكل والشاب لازم يتعب شويه الشاب : الكلام ده كان زمان , إحنا عملنا ثوره عشان نعرف ناخد حقنا في البلد بنت التييييييييييت دي . . المذيعه : يعني الحكومه هتعمل ايه ؟ عدد الموظفين في الحكومه اكتر من 5 مليون ومش بيعملو حاجه والميزانيه ماتسمحش وانت بتدوّر في القطاع الخاص . الشاب : قطاع خاص , قطاع عام ده مش شغلي , بلد بنت تييييييييييت والمفروض تجيب لي الشغل والشقه . . المذيعه : انت خاطب ؟ الشاب : أيوه من 4 سنين . . المذيعه : وخطيبتك واهلها مستحملين 4 سنين من غير ما يعترضو ؟ الشاب : خطيبتي هي كمان ناقمه على البلد بنت التييييييت , وعارفه اننا لازم نتنازل عن جنسيتنا الزباله دي لأنها بلد ماتستاهلش . . المذيعه : طب ممكن مش تنفعل يا حماده , تعالى اقعد هنا جنبي عايزه اطبطب عليك الشاب : حاضر . المذيعه : تسمح لي أبوسك كمان عشان تهدا الشاب : اوكيه بس يا ريت تبوسيني في بؤي عشان اهدى بسرعه . . المذيعه : حاضر يا حماده , كله عشان خاطر مصر الشاب : ياريت كل الإعلاميين في مصر وطنيين وشرفاء زيك كده . . المذيعه : ده العنوان بتاعي يا حماده , لو حسيت انك متضايق في أي وقت تعالي عشان اطبطب عليك , بس بليز تراجع نفسك في موضوع الجنسيه , إنت عارف يا حماده لو اتنازلت عن جنسيتك ايه اللي ممكن يحصل ؟ هنصحى الصبح نلاقي نهر النيل اختفى والأهرامات مالهاش وجود ومش هنعرف نسمع أم كلثوم , مصر هتنهار لو اتنازلت عن جنسيتها يا حماده , أرجوك بليز بليز راجع نفسك , مصر محتاجاك أوي وانا كمان محتاجاك ( أوي ) . حماده : حاضر , أوعدك هراجع نفسي بس عشان خاطرك انتي مش عشان خاطر مصر لانها بلد بنت تييييييييييت .المذيعه : ميرسي يا حماده , أنا طول عمري أقول إن مستقبل مصر كله في الشباب و عنفوان الشباب !!.

Mohamed Hussein 11 مارس 

 موجه جديده من الأفلام الهابطه داخلين عليها , نجاة الفريق سامي عنان من محاولة اغتيال !! ....... قال يعني , وهنسمع بقى في الفتره الجايه عن اللي اتعرض لمحاولة اغتيال واللي اتعرض للخطف واللي اتعرض للإغتصاب واللي جاله جواب تهديد و اللي بعتوله سحليه عملاقه في كيس الشيبسي , وكل مرشح فاشل هيحاول يهري في نفس أم الفيلم اللي اتهرى ألف مره قبل كده , مرشحين رئاسه محتاجين إعادة تأهيل نفسي . و انا والله لما بسمع الخبر ده : ( نجاة ) الفريق سامي عنان , بقول في داهيه الفريق سامي عنان , أهم حاجه ( نجاة ) !!.

Mohamed Hussein 11 مارس

 هه , العربيه وديتها التوكيل عشان تتصلح بعد الحادثه و شركة التأمين تحاسب , روحت لهم النهارده في التوكيل لقيتهم عاملين التسعيره بتاعة التصليح quotation ب 31 ألف ريال !! , رفرف متني وكبوت متني سنّه واكسدام ب 31 ألف ريال !! , العربيه كده التأمين هيطلّعها ( توتال لوس ) , دي اللي كنت هنزل بيها مصر يا ولاد التيت , وعهد الله لو خدتها بحالتها كده للورش عندنا في السنبلاوين , هما 600 جنيه و يخلّوها عروسه , قطيعه تقطع التوكيل على شركة التامين عالكل كليليه

Choose a sticker or emoticon