Mohamed
Hussein
10
مايو 2018·
و بس يا سيدي
, الجيش الصهيوني ضرب كام قنبله و صاروخ على مواقع للقوات الإيرانيه ( في سوريا )
, قامت القوات الإيرانيه اللي في سوريا ردت بضرب كام قذيفه على الجولان ( الأراضي السوريه
المحتله ) .
.
الصهاينه قالو
للإيرانيين و رحمة خالنا ليشع ما هنسيبك يا إيران غير لما تقولي حقي برقبتي , قامو
الإيرانيين قالو للصهاينه طب و رحمة كل أجدادنا الملالي ما هيطلع عليكو شمس بكره (
و لو طلعت عليهم الشمس ؟ تبقى راحت على ايران نومه , بصوت هاني رمزي في فيلم أبو العربي
) .
.
طب طهران و تل
أبيب , العواصم و المدن و الأراضي الإيرانيه و الصهيونيه , أخبارهم ايه ؟ زي الفل يا
مولانا , و مش ناقصهم غير أكلة سمك .
.
أمريكا شافت الخناقه
و العاركه و قالت يا اسرائيل إدّي إيران دي على دماغها , أنا عايزه أشوف دم , قامت
روسيا دخلت عالخط و قالت يا جدعان مايصحش كده , دانتو ولاد حرام زي بعض .
.
قامت سوريا اتدمرت
شويه كمان , و الكيكه بقت جاهزه للتقسيم , و فيه ناس كده قاعدين على جنب معاهم فلوس
كتير , هيبتزوهم كالعاده عشان يحموهم من البعبع أبو عين حمره , و مش بعيد الأربعه يكونو
بيقسمو مع بعض ( أبو قسم بقى ) .
.
والنبي دي حاجه
أخر دلع و لقمه عيش زي الفل , و كما قال الحكيم الهندي قديما ( اللي يلاقي دلع و ما
يتدلع ,تشعلل فيه النار ويولّع ) , أه و عهد الله .
............................................................................................................
Mohamed
Hussein
10
مايو 2018·
في ماليزيا , مهاتير
محمد الله يرحمه و يديله الصحه , فاز بالانتخابات و هيشغل منصب رئيس وزراء ماليزيا
لفتره جديده .
.
مهاتير محمد شغل
المنصب ده ( الحاكم الفعلي في ماليزيا ) لمدة 22 سنه قبل كده , ضيف عليهم خمس ست سنين
تانيين يبقى 28 سنه .
.
الأجمل في الموضوع
انه مولانا مهاتير عمره حاليا 92 سنه و هيخلص فترته دي و هو بيلعب في المئويه !! ,
أه و عهد الله .
.
في الصين نفس الحكايه
مقبوله , و في روسيا هتلاقينا نوعى عالدنيا و احنا بنسمع اسم فلاديمير بوتين و في ألمانيا
نفس الشئ .
.
أومال فين بقى
تداول السلطه و تمكين الشباب ؟ ممممممممم بص يا حبيبي , انت تيجي بكره الصبح بدري و
معاك سلطانيتين , تاخد في واحده تداول سلطه و في التانيه تمكين شباب , بس اوعى يدلدقو
منك و انت ماشي .
.........................................................................................................
Mohamed
Hussein
9
مايو 2018·
و حيث إني عندي
اتساق مع النفس , يعني متسق مع نفسي و نفسي متسقه معايا واحنا الاتنين متسقين مع بعض
, عايز أقول لحضراتكو .
.
فيه حاجه اسمها
حرامي غسيل تائب , واد كده اسمه ( علي بوند ) كان بيسرق الغسيل من عالمناشر و لما اتقفش
اتسجن سنتين و ربنا تاب عليه و خرج و قرر انه يشتغل في مهنه شريفه .
.
و فيه حاجه اسمها
مزوّر تائب , حد كان بيضرب اختام و بطايق و اتسجن سنتين تلاته و ربنا تاب عليه و اشتغل
في محل كشري ( شغلانه شريفه ) .
.
انما مفيش حاجه
في الدنيا اسمها ارهابي تائب لا قدام القانون ولا قدام الشعوب , ليه بقى ؟ لأن كلمة
إرهابي مش معناها واحد صاحب وجهة نظر أو صاحب مرض أو صاحب صاحبه , إرهابي ملهاش اصلا
غير معنى واحد , إرهابي يعني قاتل , , و القاتل يٌقتل ( إما في مطارده بإيد الأجهزه
الأمنيه أو يُعدم بحكم قضائي) , الكلام ده في الدين الاسلامي و المسيحي و كل الأديان
, و في القانون المصري و اللبناني و الألماني و الموزمبيقي و كل كتب القانون في العالم
.
.
طب ليه كده ؟ لأن
الإرهابي ( القاتل ) لو كانت له توبه قدام القانون و قدام الشعوب , يبقى قول عالدنيا
السلام , هتبقى غابه بالمعنى الحرفي , هبسطهالك , بص يا مولانا , نفترض انا قاعد في
شغلي في أمان الله بس زهقان شويه , و جالي واحد اسمه أبو الدرداء أو أبو نتاشا و قال
لي انت معانا يا اخ محمد و هتبقى من المجاهدين , عجبتني الفكره و قلت قشطه ( من باب
التغيير ) , و قررت إني أروح اشتغل ارهابي ( قاتل ) لمدة سنتين تلاته و اقتل لي كام
جوز عساكر من أي دوله و بعد شوية منظر الدم مبقاش يرضي غروي و الشغلانه بقت ممله (
أو يا سيدي توبت قدام ربنا ) , فقررت أرجع تاني وأقول لكو انا توبت جدعان و أرجع اشتغل
في مهنتى بقى و اكتب بوستات عالفيس بوك و انتو تقولو يا سلام عالحنيه , ده محمد رجع
تاني كيوت و قلبه قلب خسايه , بالذمه ده كلام يدخل عقل عيل صغير ؟ .
.
طب ايه لازمة التوبه
للإرهابي لو تاب فعلا ؟ ولا حاجه يا مولانا , دي بينه و بين ربه , يمكن ربنا يغفر له
في الأخره , لكن احنا كبني أدمين , ك مخلوقات الله , لا نملك رفاهية قبول توبة الإرهابي
( القاتل ) .
.
باختصار , الإرهابي
اللي معترف بالقتل و ثبتت عليه الجريمه المفترض اننا مانشوفهوش و لا نشوف خلقته بعدها
غير جثه هامده ( برصاصة ظابط أو بحبل عشماوي ) , أصل صوته حلو؟ أصل شعره سايح ؟ أصل
نَفَسه في الأكل يجنن ؟ أبوس إيديكو المراره مش مستحمله والله .
........................................................................................................
Mohamed
Hussein
9
مايو 2018·
مش حقيقي إن أجمل
لحظه في حياة الانسان هي اللحظه اللي بيشوف فيها بنته و هي لابسه فستان الفرح .
ولا اللحظه اللي
بيتخرج فيها من الجامعه أو حتى لحظة ما بياخد شهادة الدكتوراه
ولا اللحظه اللي
بيرجع فيها بلده بعد ما يتغرب 97 سنه .
.
إنما اجمل لحظه
في حياة الإنسان على الإطلاق , على الإطلاق , هي اللحظه اللي بيستلم فيها رخصة السواقه
بعد ما تكون اتجددت من مرور السلام , أه و عهد الله.
.
عايزين شهادتين
باطنه و نظر , يووه فين الصور الشخصيه , ماجبتش صور شخصيه يا كافر ؟ طب روح اتصور و
تعالى , جيت ؟ اطلع بقى لنائب مدير المستشفى يختمها و بعدين ختم كمان من شئون العاملين
( و شئون اللاعبين المحترفين ) , ختمت ؟ طب روح المرور بقى , هات شهادة مخالفات , صور
البطاقه و الرخصه القديمه , روح اعمل استعلام أمني عن البطاقه لا تكون عامل مصيبه ولا
عليك قضية نفقه ولا حاجه ( أقسم بالله ما عيالي ) , جبت الملف ؟ هتقدم الورق ازاي من
غير الملف , هات ملف و عايزين حافظه , لا مش حافظة انسولين , حافظة أوراق , روح هاتها
من بتوع الفحص ( يابني الفحص مش الفعص ) , املا البيانات بقى , اسمك و عنواتك و تليفونك
و سنك و أهلاوي ولا زملكاوي , و لو ليك عمه تخينه شوية اكتبها في الملاحظات .
.
خلصت و قدمت ؟
استنى دورك عشان تتصور , اتصورت ؟ استنى قد ساعتين لما تستلم , ايه ؟ شكلك محروق خالص
في صورة الرخصه ؟ يابني انت في المرور مش في برنامج اسامه منير , شكلك طالع حلو أهو
و صومالي و زي الفل , يا عالم بطّلو تلاكيك .
.
شوف بقى جمال اللحظه
و انت بتستلم الرخصه الجديده في ايديك , و شعورك اللي أكيد اكبر بكتير من شعور مجدي
عبد الغني بعد ماجاب جون مصر في كاس العالم , عارف لما تكون ماشي في صحرا بقالك اسبوعين
و جبال تشيلك و جبال تحطك و شفايفك و معدتك شققكو من الجوع و العطش , و بعدين تلاقي
قدامك فاترينه فيها 9 أزاير مايه معدنيه من الحجم الكبير, ساقعه و مشبّره, و جنب الفاترينه
واقف الشيف شربيني و في ايده حلة محشي و جوزين حمام عاملهم لك بنفسه ؟ أهو بالظبط نفس
الشعور ده , يا جمالو يا جمالو
.
البيروقراطيه يا
ولاد لها هدف سامي و نبيل , الهدف انك تحس بنشوة و لذّة و متعة لحظة السعاده الحقيقيه
اللي لازم تيجي بعد معاناه عشان تعرف قيمتها و قيمة الحاجه اللي معاك , طب هنروح بعيد
ليه , تخيل انك اتخرجت من الجامعه و قعدت في البيت جنب مامي و بقيت كل ليلة تسهر مع
اصحابك في الكافيه , لا شغل ولا سفر ولا تعب ولا معاناه ولا أي حاجه خالص , و فجأة
لقيت بابي جاي بيقولك يا حماده , هتتجوز هايدي اللي بتحبها , فرحك النهارده , ده مفتاح
شقتك مفروشه من الألف للياء و حجزت لك القاعه و المأذون ومش مطلوب منك غير انك تحضر
كتب الكتاب , بالله عليك هتحس بأي متعه في اللحظه دي ؟ طب هتحس بقيمة عروستك ؟ طبعا
مستحيل .
....................................................................................................................
Mohamed
Hussein
8
مايو 2018·
شوف يا حبيبي
.
.
واشنطن , تل أبيب
, طهران , لندن , أنقره , إمتى يحصل مواجهه مباشره بين مدينتين من الخمسه اللي فاتو
؟ و نشوف صواريخ هنا و هناك و أشلاء بتتطاير أو حتى لمبات كهربا بتتحرق ؟ الاجابه
, بسم الله الرحمن الرحيم , تحصل مواجهات مباشره بعد 3 مليون سنه ضوئيه و يومين , في
ساعة عصاري , يعني ايه ؟ يعني مستحيل .
.
ليه مستحيل ؟ عشان
كلهم دول استعماريه ( قديمه و حديثه ) , زمن المواجهات المباشره راح لحاله , و الديب
مابيعضش ودن الديب اللي زيه , لكن ممكن يتخانقو على فريسه , يتخانقو في بيت الفريسه
ذات نفسها , و تبقى الخناقه مجرد خربشه لتقسيم التورته او تقسيم الفريسه أو مين يكون
له كرسي أكبر ( مين اللي هياخد كنبة الأنتريه ), أو يكون ديب فيهم مثلا مثلا يعني عايز
قرشين من فريسه تانيه بحجة انه بيحميها من الديب التاني ( الشرير أبو عين حمره اللي
بيتربص بيها و لابد لها في غيط الدره ) , اه و عهد الله زي ما بقولك كده .
.
.
يعني ايه الكلام
ده ؟ يعني احمد ربنا مليون مره , إن عندك جيش عظيم منعك انك تكون فريسه أولى , أو فريسه
تانيه !!
..................................................................................................................
Mohamed Hussein
8
مايو 2018·
حزب النهضه الإخوانجي
الضاني في تونس فاز في انتخابات البلديه , و هيستمر في التوغل في كل مفاصل الدوله التونسيه
بما فيها الجيش و الاجهزه الأمنيه و المحليات و خلافه .
.
تونس الخضره مابقتشي
خضره , عندي اصدقاء توانسه كتير بيقرّو و يبصمو بالعشره على رأيي اللي قلته من سنين
, إن أكتر دوله من دول ( الربيع اللامؤاخذه العربي ) هتعاني الأمرّين هي تونس , فيه
بركان بيكبر تحت الرماد , العلبه القطيفه دي جواها عفريت و مارد و تعبان , و إجمالا
مفيش حاجه في الدنيا أسوأ ولا ألعن من إن دوله تحط رقبتها تحت سكينة جماعه إرهابيه
!! .
.
اللي عايز يشوف
بعنيه مصير الدول و الشعوب بعد كام سنه من حكم الإخوان فهو مش محتاج يقرا الفنجان ولا
يوشوش الودع , يكفي جدا انه يبص لحال السودان تحت حكم عمر البشير و حال قطاع غزه تحت
حكم حركة حماس .
.
جماعه ارهابيه
دوليه يعني فصيل خاين بينه و بين الوطنيه جبال و بحور و محيطات , يعني مجموعه من المرتزقه
بينفذو أجندات أي حد حتى أجندات الشيطان ذات نفسه , يعني جين منحط بيلعب في تركيبة
و جينات و هوية الشعوب و الأوطان , يعني الخراب بييجي في رجليهم أينما حلّو .
..........................................................................................................
Mohamed Hussein
7
مايو 2018·
أنا يا عمي يسعدني
و يشرفني أطلب إيد بنت حضرتك الأنسه كوكي
- اهلا و سهلا
يا ابني , شرفتنا و الله , انا بس عندي سؤال واحد مهم جدا .
.
من غير ما تسأل
يا عمى هجاوبك ,انا حضرتك مدرس في كلية اقتصاد وعلوم سياسيه و مرتبي معقول .
- لا يا ابني مش
ده السؤال .
.
اه فهمت , أكيد
حضرتك تقصد الشقه , عندي شقه تمليك 3 اوض في منطقه راقيه
- لا برضه مش ده
السؤال المهم .
.
خير يا عمي ؟ اتفضل
حضرتك اسأل
- سؤالي المهم
و الوحيد , وانت في رابعه ابتدائي لحد سنه ساته كنت بتدرس العلوم و الرياضيات بالعربي
ولا الانجليزي ؟ .
.
ممممم بصراحه سؤال
غريب جدا , كنت بدرسهم بالعربي .
- أسف يا ابني
, المقابله انتهت , شرفتنا بالزياره القصيره دي
.
ليه بس كده ؟ انا
بحب كوكي و هي كمان بتحبني .
- يا ابني حب ايه
بس , انتو مفيش بينكو توافق عقلي و علمي و اجتماعي و ثقافي , هي درست علوم و رياضيات
بالإنجليزي في رابعه و انت درستهم بالعربي , لو اتجوزتو هتخلفو عيال مشوهين , متخيل
شكل الجنين ايه لما يكون جاي من أب درس جمع و طرح و أم درست أديشن و سابتراكشن ؟ و
لما يتولد المسكين ده هيكون ذنبه في رقبة مين ؟.
.
حضرتك بتقول كلام
غريب جدا , جنين ايه و مشوه ايه ؟
- و أقول ايه لأخويا
النشرتي بيه وابن عمي الشمورتي باشا , أقول لهم عريس جاي لبنتكو و هو دارس العلوم بالعربي
في رابعه ؟ دول كانو ياكلو وشي .
.
يا عمي انا مش
فاهم حاجه
- و بعدين انت
بدراستك للعلوم بالعربي في رابعه مفيش شركة مالتي ناشونال هترضى بيك ولا مصنع هيرضى
يشغلك , حتى لو كان مصنع معسل .
.
شركه مالتي ناشونال
ايه و مصنع معسل ايه ؟
- مليش دعوه يا
ابني , انا حافظها كده .
.
يافندم بقول لسيادتك
انا مدرس في الجامعه يعني مش محتاج أدور على شغل في مصنع معسل .
- و لا بيفرق معانا
الكلام ده .
.
طب اعمل ايه عشان
حضرتك توافق .
- بص يا ابني
, انت لو بتحب كوكي و شاريها زي ما بتقول يبقى مفيش قدامك غير حل واحد .
.
أبوس إيدك لايمني
عليه .
- انت تروح تقدم
ورقك في مدرسة زوسر في سنه رابعه ابتدائي و تشتري اليونيفوم و الفلاسك و اللانش باج
و تدرس 3 سنين لحد سنه ساته , و تجيلي بقى وانت ضليع في الرسبايراتوري سيستم و المالتيبلاي
و لما أسالك خمسه في سته بكام تقولي إيكوال كذا ( إيكوال مش يساوي)
.
حاضر يا عمي ,
هعمل اللي قلت عليه وارجع لك بعد 3 سنين بس انا عندي سؤال
- اتفضل يا ابني
اسأل .
.
كوكي بنت حضرتك
درست في مدرسه لغات لحد تالته اعدادي و بعد كده كملت انترناشونال و بعدين دخلت الجامعه
الأمريكيه
- مظبوط .
.
و بعد كده حضرتك
سفّرتها لندن لمدة سنه عشان تظبط الأكسو بتاعها , و هي حاليا متخرجه من الجامعه من
6 سنين
- تمام , ده صحيح
يا ابني
.
أفهم من كده انها
حاليا بتشغل منصب مدير عام مصنع المعسل ؟
- غووووووور ياض
من هنا , معنديش بنات للجواز .
........................................................................................................
Mohamed Hussein
6
مايو 2018·
في 2011 كانت الصوره
ضبابيه تماما عند أغلبنا , ماسورة الحريه اللي انفجرت فجاه خلّت الرؤيه معدومه والحقايق
مقلوبه , فكنا عايشين في أحلى شوية تخبُّط و شألباظات .
.
بعد كده بدأت الصوره
توضح شويه بشويه , لحد ما بقت واضحه حتى للأعمى , و بدأنا نعرف مين معانا و مين علينا
, مين الفارس البطل و مين الصايع الحلنجي .
.
واحد من اهم الناس
و الشخصيات اللي اتظلمت جدا في 2011 كان المشير محمد حسين طنطاوي , لحد ما فهمنا كلنا
و خلصنا مرحلة الشألباظات العبيطه , و عرفنا ان الراجل ده كان بطل حقيقي بيقود سفينه
بمنتهى الإحترافيه في أصعب ظروف مرت على السفينه في تاريخها الحديث .
.
المشير طنطاوي
مالوش حزب سياسي ولا ألتراس فيس بوكي يدافع عنه , عشان كده دي شهادة حق لوجة الله
, تقولي بقى طنطاوي حضر مناسبه مع ولاد مبارك و متصور معاهم أو حتى مع مبارك نفسه
, رأيي مش هيتغير , والنبي لو راح حضر فرح بنت أبو لهب على إبن دراكولا و رقص لهم بالعصايه
في قلب الفرح ما هغير رأيي فيه .
...................................................................................................................
Mohamed Hussein
6
مايو 2018·
صباح الخير
.
بقى عندي قناعه
و يقين تام إنه الأوزون مش هو بس الحاجه الوحيده المخرومه في كوكب الأرض , لا فيه حاجات
كتير أوي مخرومه .
.
واحده من نعاج
رابعه او من شمامات الكوله علّقت على ان الوزاره هتوزع تابلتات على الطلبه و قالت أكيد
عشان يتجسسو عالطلبه و أهاليهم !! .
.
اه يا ضنايا ,
الدوله هتوزع مليون تابلت على العيال و كل تابلت فيه برنامج تجسس بيشتغل بالأشعه فوق
المحشيه , عشان الدوله تعرف تراقب حماده عن كثب , و تشوفه هينام امتى و يصحى امتى
, و بيشجع الاهلي ولا الزمالك , و اخر مره حلق شعره امتى و دفع للحلاق كام , مش بس
كده , دي كمان هتراقب البيت و تتجسس عليه و تعرف حالة السجاد و النجف في شقتك و فيه
كام كوبايه في النيش , و لو معاليكي دخلتي المطبخ تطبخي ملوخيه و انشغلتي في أي حاجه
و حماده ماسك التابلت بيذاكر عليه , هيلاقي رساله جت له فجأه من المخابرات , رساله
بتقول , أمك نسيت تشهق عالملوخيه يا حماده .
.
يا معالي وزير
التعليم , يا معاااااالي الوزير , تطوير ايه بس اللي بتتكلم فيه ؟
.
- وانت عندك نعجه
زي اللي فوق دي بتقولك هيتجسسو علينا , و لو الوزاره وزعت عالعيال أستيكه بريحة الفراوله
هتلاقي اللي بتقولك دي مش أستيكه , دي قنبله بيولوجيه صغيره و الريحه دي مش فراوله
, ده غاز اعصاب بينيّم اهالي الطلبه عشان الدوله تسرق البوك بتاعي من تحت المخده و
تسرق الشرشوبه .
.
- تطوير ايه بس
و انا عندي صديقه مدرسه عامله أبحاث و ريسيرشز و شألباظات و شايفه انك مابتفهمش حاجه
لان قراراتك بتاعة مناهج التجريبي معناها ان الطلبه هيرجعو يدرسو الكيميا بطريقة يد
2 أ و كب معرفش ايه ( مع ان الطريقه دي اتلغت من مدارس الحكومه من أيام سعد زغلول
) .
.
- تطوير ايه بس
وانا لقيت ناس فاهمه ان ولادها لما يدرسو رياضيات و علوم بالعربي في ابتدائي ف ده معناه
ان مستقبلهم هيضيع و سحليه عملاقه هتطلع لهم بالليل و تاكل ودانهم , و كيف نعيش بدون
أديشن و سابتراكشن و بالموناري سيستم ؟ البالموناري سيستم صابتني و رب العرش نجّاني
.
.
- بص يا معالي
الوزير من الاخر كده , وانا صغير كان عندنا واحده ست في بلد جنبنا عقلها تعبان شويه
, فارط رُمّان بلي ( ربنا يعافينا ) فكانت كل يوم تروح تقعد على شط الترعه و ترمي فيها
زلط و طوب و تقول للترعه ( ماتتجوزيني بقى , انتي مش بتتجوزيني ليه ؟) .
.
عايز اقولك اني
مش هتفاجئ لو عرفت في يوم من الايام انك قلعت ملط في قلب مكتبك و لميت حاجتك و أوراقك
و نضارتك و شبشبك في كيس بلاستيك و مشيت لحد شط ترعه و قعدت تحدفها بالزلط و الطوب
و تقول لها ( ما تتجوزيني بقى ) .
.............................................................................................................
Mohamed Hussein
5
مايو 2018·
حكاية البيضه و
الفرخه , و مستقبل حماده !! .
.
صباح الخير
- الست الجميله
اللي حبّت تعترض على قرار وزير التعليم و كان سبب اعتراضها هو ان ابنها ( حماده ) كده
هيتساوى مع ولاد البوابين !! يعني لا مشكلتها في طريقه تدريس و لا بالموناري سيستم
, مشكلتها في انها هتتساوى مع ولاد البوابين ( اللي عددهم 20 مليون بالمناسبه و اللي
انا كنت منهم و غالبا هي كمان كانت منهم ) , الحقيقه هي مش عندها منهج فكري , ده مرض
نفسي لا اكتر و لا أقل .
.
- الأب اللي بيدخّل
ابنه مدرسه انترناشونال مش عن اقتناع بمناهجها و مستقبلها إنما عشان ( كوكي ) مايبقاش
أقل من ( زيزو ) ابن صاحبه الشندويلي باشا , و الأم اللي بتدخل بنتها انترناشونال عشان
( ساسو ) ماتبقاش زي ( توتي ) بنت المهندس عبد الحميد جارهم اللي في مدرسه لغات بتاعة
الناس البيئه , الحقيقه ده مرض نفسي برضه .
.
- فيه جروب عالفيس
خاص بسكان منطقه معينه , الجروب لامم مجموعه رائعه من المرضى النفسيين , تشم فيه ريحة
( العته ) من على بعد , و بوستات و تعليقات كلها من نوعية , يا جماعه فيه دبانه كانت
ماشيه في الشارع النهارده , اوووف مايصحش كده , داحنا كده هنبقى زي سكان المنطقه الفلانيه
, انا شوفت توكتوك كان داخل المنطقه عندنا , مستحيل , هو احنا هنبقى زي سكان المنطقه
الفلانيه ولا ايه ؟ , يعني مشكلتهم مش في نضافه و جمال منطقتهم , انما نفس طريقه تفكير
مامة حماده و بابي بتاع كوكي , مايبقوش زي فلان , المرض النفسي و الأنعره الكدابه
.
.
- أبو موتوسكل
بيبص لابو عجله بقرف و ابو عربيه ب (يتأنعر) على أبو موتوسيكل و ابو عربيه غاليه بيحتقر
أبو عربيه رخيصه , و أبو انترناشونال قرفان من ابو لغات و ابو لغات بيحتقر أبو تعليم
حكومي ( بتاع ولاد البوابين ) , دايره رائعه و بديعه من المرض النفسي .
.
- الحقيقه الموضوع
ده شغل تفكيري , و توصلت لقناعه , الحكايه ملهاش علاقه بانك اتربيت في بيت غني ( و
اتولدت في بؤك معلقه بلاتين ) ولا اتولدت في بيت فقير و كنت بترضع مش و جعضيض , السبب
الحقيقي لوجود الشريحه دي من المرضى النفسيين هو أب و أم مالقيوش في وقتهم و حياتهم
5 دقايق بس يقولو لأطفالهم احمدو ربنا , و ماتبصوش لحاجة غيركو , و عاملو الناس بشكل
محترم و ادمي , لا تحسد اللي فوق منك ولا تحتقر اللي تحت منك .
.
- و هنا بتيجي
المشكله التانيه , الأب و الأم هما اللي بيربّو , طب يا ترى احنا محتاجين مناهج تعليم
محترمه عشان تخرج أجيال ( متزنه نفسيا ) و خاليه تماما من المرض النفسي ؟ و لا احنا
محتاجين نعالج المرضى النفسيين ( أولياء الأمور ) من أنعرتهم الكدابه عشان يعرفو يربّو
أجيال متعلمه تعليم حقيقي و أدمي ؟ دي بقى حكاية البيضه الأول ولا الفرخه , يعني نظبّط
البيضه و نسنجفها عشان لما تكبر تبقى فرخه عليها القيمه ؟ ولا نعالج الفرخه الأم عشان
لما تبيض تبيض بيضه محترمه ؟
.................................................................................................................
Mohamed Hussein
4
مايو 2018·
عشان نقفل الهري
و الهبد
.
إتعلمت في مدرسه
حكومي في أخر قرى و أدغال السنبلاوين , الشنطه كانت كيسه قماش ( أمي الله يرحمها بتخيطها
) و البرايه عباره عن موس الحلاقه بتاع ابويا الله يرحمه ( بعد مايكون حلق بيه دقنه
17 مره ) , المدرسه اللي اتعلمت فيها كانت بتاعة ميس ميرفت , لا والله حتى ماحصّلناش
حتى ميس ميرفت ,و أول مره في حياتي أسمع عن الانجليزي سمع خير كانت في أولى اعدادي
( يعني راجل كده ملو هدومي و كان شنبي بدأ ينبّت ) و انا لسه يادوب هاخد ABCD .
.
خلصت الثانويه
العامه و دخلت كلية الصيدله , لقيت قدامي اسماء المواد ذات نفسها محتاجه معجم و عبد
المجيد الصحاح بتاع انجلترا ييجي بنفسه يشرحها و إيشي فارماكوجنوزي و فيزيكال كيمستري
و هيتيروسايكليك و أليسيكليك , و تدخل جوه المواد تلاقي معجنه كلها بالإنجليزي , طب
شمّر بنطونك بقى , و انزل ماتخافش , و بالفعل شمرت البنطلون و نزلت و اتعلمت , لا شديت
في شعري ولا خدت درس ولا قلعت ملط , ولا قلت يا ناس ترجمولي .
.
خلصت الكليه و
سافرت و اشتغلت , جالي شغل خاص بجانب شغلي مع شركة بترول أمريكيه , و بقيت مضطر أكلمهم
كل يومين تلاته , و مره يرد عليا دكتور أمريكي و مره بريطاني و مره ألماني و مره ماليزي
, برضه مانتحرتش ولا حاجه , تواصلنا و بقينا نفكر مع بعض في الأدويه و المتاح , اه
بالمناسبه محدش منهم قالي ال ( أكسو ) بتاعك مش مظبوط يا محمد ولا عايرني اني اتعلمت
في مدارس حكومي في قريه مش موجوده على الخريطه .
.
هو انا عايز أقول
لحضرتك ايه ؟
- ابنك و بنتك
هيتعلمو الرياضيات و العلوم بالعربي في ابتدائي , و احلف لك على مصحف مش هيستفيدو حاجه
من حكاية نيرفاس سيستم و و أرتري و أديشن و سابتراكشن , لو ذاكروها بالعربي هيستفيدو
اكتر و يعرفو يطبقوها في حياتهم , و هتبقى أسهل عليهم و أسهل على الأهالي في شرحها
( و بالتالي هتقلل فرصة الدروس الخصوصيه ) .
.
- من بين كل
100 طالب فيه خمسه هيدخلو كليات علميه , لو ابنك او بنتك منهم ماتقلقش , يبقى يشمر
بنطلونه و ينزل زي ماحنا عملنا , هو في كل الأحوال لازم يشمر بنطلونه و ينزل ( حتى
لو كان دارس نيرفاس سيستم و اديشن ) , لان المناهج في الكليه حماده تاني خالص , و في
كل الأحوال هيقدر يتعامل و هيتخرج , محدش بيتغرس في الكليه بعد مايكون شمر بنطلونه
.
.
- لو ابنك او بنتك
مكانوش من ال 5 % يبقى يا دار ما دخلك شر , الواد عرف الجهاز التنفسي و تفاصيله و الجمع
و الطرح و لو سواق الميكروباص سأله خمسه في سته بكام هيجاوبه على طول , مش هيقوله اسألني
بالانجليزي .
.
- اللغه الانجليزيه
ك لغه عالميه مهمه جدا هتتدرس من اولى ابتدائي ( احنا بدأنا دراستها من أولى اعدادي
) , و هيطلع الواد عنده لغه قويه يعرف يستخدمها في التخاطب و في حياته اليوميه , و
يوم ماربنا يفتح عليه و يصحى من النوم يلاقي نفسه في لندن أو في شركة مالتي ناشونال
, هيعرف يتعامل و يقول أي ويل جو هوم و بليز جيف مي هامبورجر .
.
أخر حاجه عايز
أقولها و ياريت محدش يزعل مني , كتير من الظواهر في حياتنا بتندرج تحت بند ( الفزلكه
و الأنعره الكدابه و التقليد الأعمى و عقدة الخواجه و الشيخ الغريب سره باتع ) بدون
اي تفكير منطقي .
.
و نظرة البعض للغتنا
العربيه , لغة الضاد , على إنها حاجه تعرنا و كأنها لغه ماشيه على حل شعرها أو مناخيرها
3 فتحات , دي نظره مثيره للشفقه و الإشمئزاز , اه و عهد الله .
..............................................................................................................
Mohamed Hussein
4
مايو 2018·
يابني الاحتياطي
النقدي لمصر زاد و وصل ل 44 مليار دولار ( أول مره في تاريخه ) وبقى يكفي احتياجاتنا
8 شهور كاملين .
- بس حضرتك احنا
واخدين قروض و علينا ديون و العيشه هباب و هتبقى هباب برضه .
.
يابني الاحتياطي
النقدي انخفض جدا و وصل ل 15 مليار دولار و مبقاش يكفي احتياجاتنا أكتر من 3 شهور
( حصل فعلا بعد 2011 ) .
- ياسنه سوخه
, يادي الوقعه المنيله , يادي المصيبه , يعني كده مصر هتعلن إفلاسها , و هنتباع في
سوق الخرده ؟
.
يابني انت عايز
ايه بالظبط ؟
- انا عايز أهري
و أنكت حضرتك و أنشر السواد على قد ماقدر , ماتيجي تنشر السواد معايا ؟ .
.
لا والله مش فاضي
,إنشر السواد لوحدك ,إلهي المنشر و البلكونه يقعو بيك يا بعيد.
............................................................................................................
ليست هناك تعليقات:
إرسال تعليق