Mohamed Hussein
31 يوليو
طارق سويدان : رغم كل عدم الإستقرار في
ليبيا و تونس واليمن إلا إنهم تقدمو بمراحل وصار لهم أمل بالمستقبل عكس مصر !! .
.
هههههههههههههه شوفتو التقدم اللي في ليبيا
و تونس واليمن ؟ طب شوتو طاقه القدر اللي اتفتحت لهم للمستقبل ؟ دانا سمعت إن السويسريين
شغالين عمال نضافه في ليبيا حاليا , طب شوفتو التخلف والرجعيه اللي حطت علينا فجأه
في الشهرين اللي السيسي حكم فيهم مصر ؟ بيقولو إن أبرهه الأشرم جاي عايز يهد أبو الهول
و بيوت أصحاب الرايات الحمر انتشرت في صلاح سالم , رفيقتي لم تعد تعطيني شيئا , يا
ويلي شُلّت ذراعي .
.
المهم يا شيخ طارق تحط إسم مصر و تحشرها
حشر في أي جمله , وأي كلب إخوانجي زيك لازم يعمل كده , مره انت و مره جمال ماعرفش ايه
كلب الجزيره , عندنا بهايم و بهاليل بيعملو برضه زيكو , بقولك إيه يا مولانا , ما تخطب
لي خطبه عصماء زي عملة محمد حسان عن وفاة سيدنا النبي عشان أعيط وراك واتشحتف واشوف
في عنيك اللي بتبقى مليانه دموع أثر التقوى على ساندوتشات الحلاوه بالقشطه ؟!.
Mohamed Hussein
31 يوليو
اتصلت بلوجي بنتي
و سألتها جمعتي عيديات أد ايه ؟ قالت لي عمو فلان اداني كذا و عمو فلان و تيته و خالتو
و عمتو و و و , قلت لها ايوه كلهم كام بقى في الأخر ؟ قالت لي هما طلعو فايف هاندريد
أند ثيرتي !!.
و طبعا لسه عديتي
و عدية مامتها اللي انا هدفعها برضه , البت دي ممكن توصل لرقم قياسي , أنا عموما وعدتها
اني هاخد الفلوس منها و استثمرهم زي كل مره ( فاتح فرع للريّان في البيت ) , أيوه مش
بدل ما البنت تنحرف و تشرب باربيكان في مصر ؟!!
Mohamed
Hussein
31
July
منتهى الحموريه
إنك تبقى حاطط صورة مرسي و اردوغان على بروفايلك و كاتب شعارات بقى من بتاعة القدس
و بيت المقدس و حماس و كل الحاجات اللي فيها حرف السين .
مرسي الجاسوس اللي
هرب من السجن بمساعدة حماس , مرسي بتاع الصديق الوفي اللي اتستر على قتل جنودنا في
رفح , مرسي بتاع الجماعه الإرهابيه اللي قتلت ألاف البشر في تاريخها بس مافهمشي صهيوني
واحد.
.و أردوغان اللي
عامل اتفاقية دفاع مشترك مع الصهاينه , أردوغان اللي بيدرب طيارين الصهاينه على أرضه
, أردوغان اللي بيمد الطائرات الصهيونيه بالوقود , أردوغان اللي محتفظ بواحده من اكبر
القواعد الأمريكيه على أرضه.
هما دول اللي هيحررو
القدس يا جحش ؟! طب فيه كام خروف اخوانجي وكام جندي تركي بيحارب الصهاينه حاليا تقدر
تقول ؟ طب كام واحد فيهم حارب الصهاينه من 60 سنه لحد لنهارده ؟! .
على فكره شكل البني
ادم مش بيهمني ولا مظهره , يعني تمشي في الشارع لابس بدله ماشي , لابس عبايه اوكيه
, لابس ترينينج مايضرش , لكن بقرف لما بشوفك في الشارع و الفيس داير تلف و تنهق و محدش
مالي عينك عشان لابس البردعه .
Mohamed Hussein
30
يوليو
طول عمري مش بحب
الميك أب الأوفر عالبنت , حاجه خفيفه اوي ممكن , لكن بتخض من شكل البنت لما تدخل عند
الكوافيره و تطلع كأنها لابسه ماسك خارجي , وش مستعار يعني , وانا بكره الوشوش المستعاره
.
.
أغلب الكوافيرات
في مصر كان حلم حياتهم يطلعو نقاشين باين , تدخل العروسه عندها بجمال ربنا التلقائي
البسيط , و تخرج كأن دايس عليها قطر , الميك أب ده أصله فن زي الرسم والشعر والموسيقى
, بكره الخبط على غُطيان الحلل و مش عارف ازاي نسميه موسيقى كلاسيك ؟ بكره اللي بيسمى
نفسه كوافير قصدي شاعر و هو خد وش البنت وراح بيه ميدان التحرير و عدى الشارع و لزق
عليه 2 كيلو بودره من بودرة طائر السنونو ( كوافير الحلزونه يامه الحلزونه ) .
.
حتى الضحكه والإبتسامه
مش شرط يكون صاحبها شكله جميل أوي وسنانه بيضا وبتلمع و مظبوطه بالمسطره , الضحكه مالهاش
علاقه بالشكل , لها علاقه بالروح و صفاء القلب , و أجمل ضحكه شفايف في الكون هي اللي
بتصاحبها ضحكه عين أو حتى دمعه .
.
و في المطاعم الغربيه
, هتلاقي شريحة لحم شكلها غريب فوقها كاتشب مش بتاعنا و مايونيز مش بتاعنا و سلطه خضره
و جبنه ماعرفشي ايه و يتعملو ساندوتش !! , يضيع طعم ده في ده masking the
taste of each other
وفي الأخر ماتعرفش انت بتاكل ايه ؟ عشان كده بسميه الأكل البلاستيك
اللي مالهوش طعم , زي الضحكه البلاستيك و الوش البلاستيك .
.
عالمسطبه في بلدنا
أو على شط الترعه هتشوف ضحكه العيون والشفايف لراجل أو ست ( لها طعم ) وهي دي الست
اللي لما تصبح عليها تقول لها : صباحك نادي , وهتاكل رز معمر مش عليه كاتشب ولا مايونيز
( له طعم ) و هتشوف وشوش بريئه من غير ماسكات , وفي سيتي ستارز هتلاقي الضحكه البلاستيك
والساندوتش البلاستيك والوش البلاستيك .
Mohamed Hussein
29
يوليو
أجمل حاجه في العيد
في أخر 15 سنه كده إن التلفزيون بطّل يجيب أفلام أميتابتشان لما كان بياكل التمساح
و يسلّك سنانه برجل الأسد و أفلام ناديه الجندي لما كانت بتكشف كتفها يقوم الموساد
كله تحصل له حالة رياله جماعيه على كتف ماما ستو ناديه الجندي و يقول لها على كل الأسرار
و الأسلحه و ترجع مصر بقى هي و محمد مختار و احنا نقعد نتشحتف و دموعنا تنزل من أم
الفرحه اللي حطّت علينا فجأه بمجرد وصولهم .
.
الحمد لله نفدنا
بجلدنا و خلصنا من حلّة الطبيخ البايت بتاعة كل سنه.
Mohamed Hussein
29
يوليو
و لما فشل الإخوان
في عمل مسيره واحده عليها القيمه في العيد قامو جابو صوره لعسكري بيصلي العيد باللبس
الميري والسلاح في جنبه و قالك بس جيش الإنقلابيين كان بيراقب الجوامع والساحات في
العيد عشان يمنع مسيراتنا الجباره !!.
.
.......... هع
هع يعني عسكري واحد بيمنع ألف واحد مثلا من الخروج في مسيره ؟ طب العسكري ده لو واقف
خدمه و سمع التكبير لصلاة العيد وعايز يصلي زي بقية الناس يعمل ايه في لبسه الميري
؟ ولا مايصليش ؟ يعني يروح بسرعه مثلا لبلدهم في مغاغه ولا السنبلاوين يلبس جلابيه
بيضا و طاقيه شبيكه و يخبّي سلاحه تحت الشجره عشان يصلي الركعتين ؟ طب شرطه مبارك كانت
بتراقب الساحات ايام ثورة يناير و ماقدرتش عالناس , طب هو جيش الإنقلابيين لو عايز
يراقب الساحات مكانشي عارف يقول لظباطه وعساكره البسو لبس مدني و خبّو السلاح ؟!!.
.
الغريبه إن الخبر
والصوره نزلو على شبكة رصد وطبعا الاف اللايكات و الشير , و من ضمن اللي بيصدقو الهطل
ده ناس زمايلي صيادله و اطباء و مهندسين و جامعيين , الله يخرب بيت العلام عاللي عايز
يتعلم , يا زميلي الجامعي العزيز اللي بتنشر خبر وصوره زي دي و حاطط دماغك في اللامؤاخذه
, عايز أقولك جمله واحده بس : أنا بستعرّ منك أه و عهدالله بستعر منك .
Mohamed Hussein
29
يوليو
بإسم الديانه اليهوديه
و التوراه الصهاينه بيحرقو و يقتلو أطفال غزه و شيوخها .
بإسم الديانه المسحيه
و الإنجيل والصليب طلعت الحملات الصليبيه من أوروبا في القرن ال 18 تجتاح العالم و
تحرق الأخضر واليابس .
و بإسم الديانه
الإسلاميه و دولة الخلافه داعش بتهجر المسيحيين من الموصل و بتقتل المسلم اللي يخالف
رأيها .
.
و كل تنظيم همجي
استعماري متخلف مابيلاقيش أفضل من الدين عبايه يلبسها أو ماسك يغطي بيه وجهه القبيح
.
.
المسلم بيفتكر
الحملات الصليبيه و عمايل الصهاينه و ينسى عمايل داعش والقاعده و طالبان , و المسيحي
بيفتكر داعش وطالبان والصهاينه و يغمض عنيه قدام كتاب التاريخ و اليهودي يصور المسلمين
و المسيحيين على إنهم سفاحين و عند اسرائيل يقول ان قتل مليون بني أدم هو ده حقها في
الحياه , و طول ماعقول البشر كده هنفضل في مجزره أبديه .
.
و كأن ربنا سبحانه
و تعالى خلق البشر واستخلفهم في الأرض عشان يكوّنو مزرعة فراخ و خلق الأديان عشان تبقى
السكاكين اللي نندبح بيها , وشوف انت بقى كام جوز فراخ بيندبح كل ساعه في المزرعه قصدي
في كوكب الأرض .
Mohamed Hussein
28
يوليو
قمة السفه و العته
و الإفلاس العقلي إنك تتخيل إن هدم الأنفاق و السيطره على معبر رفح و فتحه و قفله بحساب
ينفع يتقال عليه حصار لغزه , و إن حماس يا ولداه كانت هتنتصر و تدمر تل أبيب و تحرر
القدس و الأندلس والعراق و صواريخها هتوصل لحد بيت أوباما في واشنطن لولاش بس السيسي
هدم الأنفاق !!.
.
بيفكروني باسماعيل
يس في الفيلم زمان لما كان عسكري و ماعرفش يمسك الحرامي , قال لهم اقبض عليه ازاي وانا
مش معايا صفاره ؟!.
...............
يا بشر على ما تُفرج , يا بشر لحد ما نلاقي بشر , الجزيره بتلعب بعقولكو كأنها كوره
شراب .
Mohamed Hussein
28
يوليو
و بما إن مراتي
مش موجوده معايا و انا عايش لوحدي , قلت فرصه اتمرّد بقى على كل حاجه , اشتريت بطيخه
و قطعتها و خدت شقة بطيخ بقشرتها و باكلها بنهم و بتفتف في البذر , أنا تعبت يا مولانا
من حكاية البطيخ اللي بيجي في طبق متقطع زي السلطه من غير بذر و يتاكل بالشوكه , هو
البطيخ بيتاكل كده و إلا مايبقاش بطيخ , هذا ما وجدنا عليه أباؤنا .
Mohamed Hussein
28
يوليو
و انت ماشي في
شوارع مصر المحروسه النهارده , هتلاقي أطفال لابسين جديد و فرحانين , هتلاقي بلالين
و ألعاب و أب وأم واخدين أطفالهم الملاهي أو رايحين يعيدو على ناس قرايبهم , وفي وسط
المشهد الرائع ده هتلاقي مسيره من 17 بهلول إخوانجي نازلين و رافعين شعار رابعه , أهي
أي عكننه والسلام , و طبعا معاهم 9 كاميرات للجزيره بتصورهم من الجنب و من فوق ومن
تحت زي أفلام البورنو .
.
لو حصل و شوفت
المشهد ده قرّب من المسيره وامسك بهلول اخوانجي من ياقة الجلابيه بتاعته , لأ بلاش
تمسكه من بنطلون الترينج , و اسأله : إنت ياض سايب أهلك و قرايبك و فرحة العيد و نازل
تهبب إيه ؟ لو قالك أنا نازل عشان الشرعيه و عشان مرسي راجع تقوم حضرتك مسلّمه لأقرب
مصحه عقليه عشان ده كده يبقى خروف رسمي و خطر عالبلد , و لو قالك أنا نزلت بس مش عارف
أنا نازل ليه , برضه تسلمه لأقرب مصحه عقليه عشان ده كده يبقى حمار و برضه خطر عالبلد
.
Mohamed Hussein
28
يوليو
الإنبوكس عندي
اتملى تهاني و مباركات , اللهم لك الحمد , محبة الناس دي أكبر نعمه ربنا بينعم بيها
عالإنسان .
كده انا عيدت على
أهلي في مصر كلهم و صحابي عالفيس كلهم , باقي اتنين بس عايز أقول لهم كل سنه وانتو
طيبين , أم الجندي الشهيد اللي اتقتل و هو بيحمي حدودنا و الحاجه زينب الست الفقيره
اللي عمرها 90 سنه و اتبرعت بحلقها لمصر , و أي ست مصريه بشم فيها ريحه مصر و شهامتها
ببقى عايز أوطّي على إيديها وابوسها واقول لها : كل سنه وانتي طيبه يا أمي .
مصر هتفضل عايشه
و أبيه و رافعه راسها و محفوظه من رب العالمين مش ببركه المنظرين السياسيين أمثالي
, إنما ببركه الناس دي و دم ولادهم الطاهر .
Mohamed Hussein
28
يوليو
ذكرياتنا الحلوه
في العيد
.
و انا طفل صغير
كنت بصحى من النوم يوم العيد ألاقي الشغاله الفلبينيه جايبالي الفطار عالسرير , وبابي
يدّيني العديه 500 دولار , أصل بابي كانت عنده شركة صرافه كبيره و عدياتنا كلها كانت
بالدولار و بعد ما نفطر ألبس الطقم الجديد الفرنسي و الجزمه الإيطالي و بابي ياخدنا
يفسحنا في كدزانيا اللي في التجمع الخامس .
.
ممممممممممم واضح
إن الكلام اللي فوق ده كله كدب و تخرصات , أصلا مكانشي فيه تجمع خامس وانا طفل صغير
, ما علينا , نيجي للواقع بقى و نعيد المشهد اللي فوق ده تاني :
.
وانا طفل صغير
كنت بصحى من النوم بالعافيه و بضرب الجزمه أحيانا و كنا نروح نصلي العيد في جامع القريه
أو في الخلا و بعد الصلاه نلبس بيجامة العيد الجديده ( كان بيجي توب قماش كبير كده
و يتفصّل عند الخياط لكل أطفال البيت ) , و يا حلاوتي بقى وانا طالع ألعب في الشارع
بالبيجاما الجديده أم 6 زراير و الجزمه البلاستيك أم 3 خطوط في الجنب.
.
العديّات كانت
شلن و بريزه ( يعني أقل شويه من 500 دولار ) , و يوم ما الواحد ياخد ربع جنيه كان يبقى
حدث تاريخي , نشتري بالعديه بلالين و بمب و حبش و مسدس ب نص جنيه و تتفرتك العديه في
ظرف ساعتين , بس فرحتنا بالعيديه و البيجاما الجديده كانت اكبر بكتير من فرحة أطفال
كدزانيا و التجمع الخامس بال 500 دولار و الجزمه الإيطالي .
Mohamed Hussein
27
يوليو
يالله بقى , كل
أصحابي يقولو هيعملو ايه في الكام ساعه الجايين ؟ أصحابي اللي في الخليج و أوروبا مايقولوش
عشان انا عارف , هننزل نصلي العيد و نرجع نكمّل نوم للعصر و بعدين لما نصحى ننام تاني
و نصحى و ننام , انا بتكلم عن صحابي اللي في مصر , الولاد يقولو , اللي نازل يشتري
حشيش يقول مايتكسفش ( رمضان ولّى يا أخ مرجان ) , والبنات مايقولوش هيعملو إيه , إحنا
عارفين و الحكومه عارفه عنكو كل حاجه بس ساكته , و أصحاب الصيدليات هيبقو فارشين قدام
الصيدليه بكرتونتين تلاته , هما 5 أصناف مفيش غيرهم و هتبقى ليله يا عمده .
Mohamed Hussein
27
يوليو
بوناسيرا سينيوري
.
.
كل سنه وانت طيب
يا عبد الفتاح ياخويا , ربنا يعينك عالحمل اللي انت شايله , بقى يا عبفتاح كان عندي
حلم كده بحلم بيه و هحكي لك عليه , نفسي يابا الحاج اشوف القاهره نضيفه أوي زي زمان
, أصل دي العاصمه و واجهة مصر الحضاريه , نفسي أشوفها زي القاهره من 70 سنه أيام ما
كانت شوارعها أنضف من شوارع باريس و الطليان بيشتغلو جارسونات عندنا ..... طب دي نعملها
إزاي ؟ هقولك أهو
.
1- أولا سيبك من
حكايه هنمنع العربيات من دخول القاهره و نخلّيها تدخل يوم اه ويو م لأ حسب رقم العربيه
( فردي و زوجي ) ده اسمه حل مؤقت وسياسة أطفاء الحريق , حتى تنضيف الشوارع و إزالة
التعديات برضه حلول مؤقته .
.
2- الحكايه أصلها
بتقول باختصار , إن القاهره شايله فوق طاقتها يرضي مين ؟ بتاع 20 مليون مقيم على زائر
, و من هنا يبدأ الحل , وانا واحد من الطيور المهاجره ( على رأي مراتي القاهريه ) اللي
بهرتهم أضواء العاصمه فقررو يعيش في القاهره و يعملو زحمه ( على رأي مراتي برضه )
.
.
3- تقدر بسهوله
تتخلص من نٌص الرقم ده ( 20 مليون ) لو عملت التالي , تحديث كامل للجهاز الإداري للدوله
و عالاقل مليون موظف حكومي في القاهره يقعدو في بيوتهم وياخدو نفس مرتبهم الأساسي كمعاش
, يعني مليون واحد مش هينزلو الشغل الصبح و لا يركبو مواصلات , تعمل في كل محافظه جهازها
الإداري المتكامل بحيث مايضطرش واحد من كفر صقر يسافر القاهره عشان يختم ورقه , هيلاقي
كل حاجه عنده في الزقازيق و كده تبقى حيّدت جزء كبير من الوافدين على القاهره يوميا
.
.
4-تنهي حكاية الحكم
المركزي والعاصمه اللي فيها كل حاجه , و تدي لكل محافظ صلاحيات كامله إنه يعمل مشاريع
في محافظته , كل محافظه لها مشاريع تناسبها , كل محافظ ياخد كام شهر يدرس فيهم محافظته
كويس اوي , ويعمل دراسه بالمشاريع اللي ماتخليش حد من ولاد المحافظه دي يضطر يبقى زي
حالاتي من الطيور المهاجره و شيل ده من ده يرتاح ده عن ده ( ماتنساش تقبض على مراتي
قبل ماتعمل فتنه بين القاهره وباقي المحافظات ) .
.
5- و طبعا ماشي
زي مانت في تنضيف الشوارع وازالة التعديات و فرض هيبة الدوله , وبس يا سيدي , في ظرف
سنتين هترجع القاهره زي زمان , والطليان و القطريين يشتغلو جارسونات عندنا , واد يا
مالديني , هات لنا اتنين شاي على مايه بيضا , بوناسيرا ياخويا , إخلص بقى , وقول للواد
حمد اللي بيسيّخ الشيشه جوه يشتغل بضمير , إحنا في مصر هنا مش في قناة الجزيره !!.
Mohamed Hussein
27
يوليو
كل سنه و كل أصدقائي
بخير و سعاده و رضا من ربنا سبحانه و تعالي , كل سنه و أقباط مصر و مسلميها بخير و
سلام , كل سنه و كل العرب و المسلمين طيبين , خلاص مش هنصوم تاني يا يا يسري , مش هنتسحر
النهارده يا منى , عنينا مش هتطلع على إزازة المايه الساقعه المشبره يا ريم .
Mohamed Hussein
27
يوليو
طول عمري لا بحب
و لا بعترف باللي يناضل من بره أرضه , الي قاعد عالشط لابس بدله و متشيك و متبرفن و
عمّال يدي أوامره و تعليماته لخلق الله الغلابه الغرقانين في البحر , و انت ياض تعوم
كده و انتي يا بت تبلبطي بإيدك بالشكل ده و خلي بالكو الموجه بتيجي من هنا مش من هنا
.
.
عشان كده ماحبتشي
طريقه نضال البرادعي من وراء البحار و لا بعتبر خالد مشعل بيناضل من جناحه الفندقي
في الدوحه .
.
عندك قضيه بجد
و وطن خايف عليه إنزل واتزرع فيه زي الشجره و سط الغلابه , انما ماتكلمنيش عن الغلابه
و المعدمين و تديني دروس و خطب و تبقى فشر محمد حسان و انت قاعد في قصرك و مدلدل رجليك
في ماية البيسين , و لو تعليماتك و افكارك صادقه بس فيها ناس هتموت يبقى واجب عليك
تكون الشهيد رقم !! .
.
اللي عايز يضحّي
يبدأ بنفسه عشان أقول عليه مناضل , أما إنك تضحي بغيرك تبقى مجرد تاجر مش أكتر , تاجر
بتبيع أمشاط و فلايات وشعارات .
Mohamed Hussein
26
يوليو
الناس اللي عماله
تكتب على صفحتها : و الله لسه بدري و الله يا شهر الصيام !! , مممممممممم لا بدري إيه
بس ؟ يا جدعان احنا بنصوم 17 ساعه في اليوم و السحور لازق في الفطار زي الأتب لحد ما
نشفنا , ما تسمعشي كلامهم يا رمضان , اتوكل على الله انت و ترجع لنا بألف سلامه , يا
أهلا وسهلا يا أهلا وسهلا , شرفتنا والله يا رمضان ياخويا عالشويه الصغيرين دول و لولا
إن الشقه ضيقة زي مانت شايف و مفيش سرير زياده كنت قلت لك بيّت معانا , على مسيدات
بقى يابو صيام .
Mohamed Hussein
26
يوليو
مشهد عبقري ( سجن
النسا ) ........ عبقرية مريم ناعوم و كامله أبو ذكري
.
زينات ( شفيقه
) و هي بتضحك : إيه يا بت يا رضا حواجبك دي ؟ تعالي اعملهالك , تعالي يا بت انت شكلك
يقرف .
.
رضا و هي بتضحك
: إنتي مجنونه يا بت , حواجب ايه دلوأتي ؟ يخرب سوقكي .
....................................
زينات بتموت بسبب
كليتها أو تقريبا ماتت و رضا باقي لها ساعات على لبس الطقم الأحمر بتاع الإعدام و دي
اسمها الضحكه الأخيره .
Mohamed Hussein
26
يوليو
سرايا القدس تعلن
إن صواريخها ضربت مفاعل نووي اسرائيلي !! ....ممممممممم و انا مغمض عيني كده أقدر أقولكو
ماحصلش , و رحمة ريا وسكينه و حسن البنا ما حصل , لسبب بسيط خالص إن الست ناديه الجندي
مش شغاله مع سرايا القدس , يبقى هيعرفو مكان المفاعل النووي إزاي ؟!.
.
و داعش بتقول إن
2 من الجن أسلمو على إيديهم !! , مع إن الإنس نفسهم , مسلمين و مسيحيين بيهجّو من داعش
و أم داعش , بس رأيي الشخصي إن داعش اللي جابت الجن من ديله أصدق من سرايا القدس أو
بمعنى أصح أقل و قاحه .
.
ياريت الأشاوس
في حماس وسرايا القدس يقعدو كده لما الدنيا تهدى و يجيبو ورقه و قلم و يحسبو , يحسبو
هما كسبو ايه و خسرو ايه , بس ماينسوش والنبي يحسبو كام غزّاوي برئ مالهوش ذنب اتقتل
و كام بيت اتهد وكام اسره اتشردت , مش تبقى حسبة دولارات و بس !!.
.
و على سيرة سرايا
القدس اللي ضربت المفاعل النووي و داعش اللي سيطرت عالجن الأزرق ذات نفسه , أحب أقول
لحضراتكو إني ماحطتش صورتي عالفيس عشان أنا أحلى مليون مره من أحمد عز و خايف عليكو
من الفتنه أنا وعبد المنعم الشحات ولا ياسر برهامي مش فاكر , أه ورحمة أم أيمن اللي
قالت انها اتعرضت للتحرش و محاولة للإغتصاب !! , و إوعى تقولي إن كلامي ده #عبث و إني
بقول #تخرصات و السلام !!.
Mohamed Hussein
26
يوليو
أيامنا الحلوه
.
.
وانا صغير أوي
بتاع 7 سنين كده , كنا عايشين في بيت من الطين ( بيت ني ) , و طبعا السقف بتاعه لا
بيهش ولا ينش , يعني مايه المطر تنزل علينا كأننا نايمين فوق السطح , كان البيت ده
5 أوض , كل راجل و مراته وعياله ال 5 و لّا ال 6 في أوضه , وانا كنت واحد من العشرين
تلاتين عيل اللي بيتنططو في البيت , أخر البيت من جوه كان فيه حمام و زريبه كبيره
, كان عندنا جمل كبير و شوية بقر على جواميس و قطيع من الخرفان بتاع 40 راس ده طبعا
غير ال 70 فرخه اللي بيتمشو في أوض البيت عادي و الجمل و المواشي بيطلعو ويدخلو من
وسط البيت , من الرسبشن يعني يا مولانا .
.
كنا بناكل لحمه
كل اسبوعين تلاته قول شهر بس كان لها طعم بجد , بيطبخوها عالكانون أبو حطب في حله نحاس
كبيره , و انا كنت كل يوم الصبح بصحى بدري أوي و اسرح مع جدي حسين بالغنم ( ماعرفش
ليه اختارني انا بالذات ؟ ) , نلف في الأراضي لحد ما ياكلو و يشبعو و نرجع عالمغرب
, و كل كام يوم كده ننزّلهم الترعه يستحمو وانا انزل معاهم .
.
إنما أجمل حاجه
في بيتنا الدافي ده إن الجدار بتاع الحمام مكانشي واصل للسقف
و كنت لما بدخل
الحمام بالليل ألاقي الفراخ نايمه عالجدار من فوق , تقوم تصحى على صوت الباب و تقعد
تكاكي كاك كاك كاك , أهي والله الفراخ دي كانت بتونّس الواحد و تسليه .
.
مش مهم الحمام
يكون رخام و المايه سخن وبارد , و لا مهم يكون عندك عربيه مكيفه , و مش مهم التلاجه
تبقى مليانه فراخ و لحمه و تشيليز فاتح تحت البيت , معدش فيه حاجه لها طعم .
Mohamed Hussein
25
يوليو
في مسلسل سجن النسا
, أكتر دور عجبني أوي هو دور زينات , البت الغلبانه اللي بتزوّق البنات , اللي باعت
شرفها بملاليم عشان تلاقي لقمه تاكلها , اللي اتعاملت أسوأ معامله من الرجاله مع انهم
بيغلطو نفس غلطتها , ولما كليتها تعبت اوي نصحتها ممرضه ( بنت حلال ) تروح لدكتوره
( بنت حلال أوي ) في مستشفى في القاهره و هتعمل لها عملية الحصوه ببلاش
.
الدكتوره بنت الحلال
أوي سرقت كلية زينات السليمه و بقت البنت عايشه بكليه واحده و مش سليمه كمان و بقت
تخرج من السجن تشتغل شغلانتها عشان تجيب 20 ولا 30 جنيه تاكل بيهم , وتروح المستشفى
الحكومي تغسل كليتها ماتلاقيش أجهزه شغاله , تقوم تضطر انها تدخل السجن تاني عشان تلاقي
حل لغسيل الكليه بدل ما تموت .
زينات باعت شرفها
عشان تلاقي حق اللقمه و بتدخل السجن عشان تعرف تتعالج , والدكتوره بنت الحلال أوي هي
والممرضه بنت الحلال مش في السجن , لأ في المستشفى الإستثماري , واحتمال الدكتوره دي
تبقى وزيرة الصحه !!.
.
هو ده حال مصر
بعد 30 سنه من التجريف , الحرامي القاتل الكبير بيبقى باشا و مثال للنزاهه و الشرف
و زينات الغلبانه يتقال عليها بنت الحرام , والغلبان في مصر مابيشبعش غُلب .......شابو
فتحيه العسال و مريم ناعوم و الممثله اللي أدت الدور ببراعه و في رأيي تستاهل أوسكار
بس مش عارف اسمها أصلها غلبانه وبنت حرام هعرف اسمها ليه ؟ أنا لا يمكن أعرف الأشكال
دي , تحب أقولك اسم الدكتوره اللي هتبقى وزيرة الصحه بعد 10 سنين ؟!
Mohamed Hussein
25
يوليو
ده بوست كتبه واحد
عندي في الأصدقاء , أو كان عندي
.
جماعه بيت المقدس
تعلن مقتل 3 من عناصرها فى هجوم لطائره اسرائيليه بدون طيار ... فى سيناء .. و الجيش
المصرى ... ينفى!!!!.. مش هقول حاجه ...
عارف فى ناس فوق
ال70 سنه عندنا فى البلد ... ما تعرفش ان إسرائيل كانت محتله سيناء اكتر من 6 سنين
.. كل اللى يعرفوه ان عبدالناصر دخل تل ابيت و اننا اسقطنا اكتر من 100 طياره إسرائيليه
فى 67
أشعر بالموت كل
يوم .... لاننى (-----)
.
................
انتهى البوست و اتحذف بعد شويه !!.
.
كان معايا حق لما
كتبت امبارح عن أوضة الحشيش , و أصدقائي كان معاهم حق لما قالو محدش من الكولجيه بيسمع
أو يفهم , و الصديق ده حذف البوست قبل ماعلّق عنده , بس عايز أقوله رساله قبل البلوك
, مفيش داعي تشعر بالموت ولا حاجه , شنطتك في إيدك و جواز سفرك في جيبك و على تل أبيب
عدل أو الدوحه أو حتى انضم لأنصار بيت المقدس , هما دول التلاته اللي بتصدقهم , وبلاش
مصر ولا جيشها اللي انت قلت عليه كداب .
.
و صدقني مصر مش
هتقعد تعيط عليك طول الليل و ترفّص برجليها , انت و مليون كولجي و إخوانجي زيك مايهزّوش
شعره واحده من شعر مصر المهره البهيه , ملعون أبوها دي ثوره إذا كان التمن إننا نوصل
لكده , نصدق الإرهابيين والصهاينه و نكدب جيش بلدنا , نغنّي للإرهاب و نشم كوله و نهد
في حيطان البيت , الله يرحم شهداء يناير , النضيف اللي فيها مات ,.... أجمل مافيها
اندفن و احنا فاتو لنا العفن .
Mohamed Hussein
25
يوليو
يعني الواحد لما
يقعد يركّز و يمخمخ و يكتب بوست طويل زي اللي فات , وبعدين اغيب دقيقتين تلاته وارجع
الاقي 11 اشعار , و احد عمل لايك والتاني عمل شير و 9 باعتين لي طلبات للعب كاندي كراش
!! مممممممممم يا خساره تعبي و مجهودي , راحت فلوسك يا صابر .
.
مره وانا صغير
أيام ما كنت عبيط و كنت بسمع وجدي غنيم , هو سافل صحيح بس دمه خفيف احيانا , قال وجدي
غنيم في خطبه من خطبه , أنا كنت بلقي محاضره في اسكندريه و اتحمست اوي و خدتني الجلاله
وحاسس اني تألقت , و كانت المحاضره عن تحرير القدس و طلعت من الجامع لقيت جموع غفيره
و هتافات قلت اللهم صل عالنبي الناس فاقت و خطبتي أثّرت فيهم , أتاريهم كانو بيهتفو
عشان الإتحادي السكندري فاز عالأهلي !!.
.
أهو انا عملت زيه
كده , كتبت و مخمخت و خدتني الجلاله و لقيت جموع غفيره في الإشعارات قلت اللهم صل عالنبي
, أتاريها لكاندي كراش , و شكلي هبقى زي وجدي غنيم عن قريب , واقول للعيال بتوع كاندي
كراش دول : انتو مش بتقرو البوست بتاعي ليه يا كفره ؟!.
Mohamed Hussein
25
يوليو
حتى لا يطير الدخان
.
إقفل شبابيك أوضتك
كويس وانت بتشرب حشيش , شوية الدخانه اللي هيطيرو من الشباك خساره , مناخيرك و صدرك
أولى بيهم , وانا ممكن أقعد معاك في الجو المعبّق ده و احكي لك حكايه صغيره , مانا
أصلا مش بعرف ألاقيك بره الأوضه دي .
.
بقي في تاريخنا
الحديث , يعني أخر 50 سنه مثلا , الصهاينه بدأو يبنو دوله قويه , يتسلحو بالعلم و البحث
العلمي , يشترو و يصنعو أحدث أنواع الأسلحه , طبعا تحت غطاء و دعم كامل من أمريكا واللوبي
الصهيوني , هما عارفين ان مفيش سلام مع العرب و وجودهم في وسط قاره عربيه شبه متكامله
بيخليهم حريصين اوي على كده .
.
و في الحروب أيا
ما يكون نوعها أو الطرف التاني فيها بتبقى أمريكا فاتحه حجرها للصهاينه و تقول لهم
عبّو و شيلو اللي انتو محتاجينه , شيك على بياض أو تقدر تقول أوبن بوفيه , جسر جوي
جايز , مقاتلات بتيجي بجنودها من واشنطن و معاهم خطة الحرب جاهزه , في الوقت ده بتبقى
ماما أمريكا الحنينه الناعمه زي الغريبه قافله دكاكين حقوق الإنسان بتاعتها ( أجازه
مفتوحه ) .
.
المهم بقى احنا
في ال 50 سنه دول ربنا ابتلانا برؤساء من عينة مبارك و القذافي و اللي واللي , كل همهم
الكبش والهبش و توريث الحكم لعيالهم الصيع عشان كده بقى فيه فجوه بينا وبيهم في التسليح
العسكري و تكنولوجيا الأسلحه تحديدا .
.
كل اللي فات ده
كان مقدمه او استهلاله , و عايز أقول باختصار , إن اللي كان بيعمل توازن قوه بين اسرائيل
ومصر تحديدا هو العقيده القتاليه عند الجندي المصري , البساله والروح و التضحيه , ده
سلاحنا الفتاك اللي اسرائيل فشلت في تصنيعه عندها , سهل جدا تعمل قنبله نوويه بس مستحيل
تزرع عقيده قتاليه في شوية شواذ.
.
يارب تكون فهمت
بقى إن حكاية جيش نوال و جيش المكرونه اللي انت بتقولها بمنتهى البساطه و السذاجه بتسعد
الصهاينه جدا , وكل تطاول على جيش مصر و سخريه منه بتلاقي ترحاب شديد من اللوبي الصهيوني
, أنا خلصت كلامي و هقوم امشي و انت رجاءاً حاول تفتح شباكك و تنضف صدرك و تخلي نور
ربنا يدخل .
ليست هناك تعليقات:
إرسال تعليق